#طوبى "جنة طوبى"
#جمان_فريد
#الجزء_122"ذكريات لاتموت"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تلاوة_القرآن
" فإنّ قراءة القرآن بالتدبّر تُعطي العبد قُوةً في قلبه، وحياة، وسعة، وانشراحًا، وبهجةً، وسُرورًا؛ فيصير في شأن والنّاس في شأنٍ آخَر ".
- مدارج السالكين لـ ابن القيم
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 تراها في كل شيء ملفت كأنها جمعت كل بريق النجوم في عينيها🍃
_______________________________________
الساعه 11:30صباحا..
طلعوا فردوس وغرفه من باب الحوش الدخلاني وكل وحده فيهم كانت متقية نفسها كويس عن الصقع"البرد" وشاده في ايديها مواد تنظيف ومكنسة كهربائيه..
توجهوا للمربوعه الخارجيه وصلوا فيها وخشولها..
فردوس:ماتبيش هلبه كل اسبوع نقلب فيها..
غرفه:مازال بعد حوسة غدوة تبي تقليبه وتنفيضة وحال..
حطوا الحاجات وبدوا شغلهم فيها..
فردوس وهي تاخد في وسايد الجلسة وقفت وين شافت خاتم رجالي ع مندار..
استغربت..ومدت يدها وخداته وقعدت تتفحص فيه..
شافتها غرفه اللي كانت تنفض في الصالون سألتها..
/خيرك؟
شافتلها فردوس بعدين مشتلها وهي تقول..
/تعرفيه لمني هذا!؟
وصلت فيها وغرفه شافت الخاتم بعدين خداته وتفحصاته وقالت..
/اول مرة نشوفه!
فردوس:ليها ايام ماقعمز فيها حد!
غرفه:خل نمشي نسأل اللي داخل بالك يعرفوا لمني..
ومشت طلعت وفردوس لحقتها..
☘داخل الحوش..
كانوا اغلب الموجودين فيه يحوسوا اللي في الكوجينه واللي في الحمامات والصاله ماعدا سدرة وسميتها وتاله قعدوا في دار المعيشه مع الصغار..
وطوبى في الدار تجهز في نفسها بش تطلع مع راجلها للسوق..
سمعت صوت دوشة برا وهي تلبس في قفازاتها طول مشت طلعت..
لقتهم كلهم متجمعين ع غرفه اللي بانت عليها توري فيهم حاجه..
قدمتلهم وهي تقول..
/خيركم شن في!؟
التفتوا شافولها وغرفه ورتها الخاتم وقالت..
/لقينا هذا في المربوعه.
طوبى لما شافت الخاتم تبدل لون وجهها للأحمر وحست بحرارتها ارتفعت..
اميمه وهي شاده ضحكتها قالت..
/تعرفيه لمني!؟
وهي محرجه وعيونها ع الخاتم مدت يدها وخداته تقول..
/لعبد القيوم..
اغلبهم بصوت واحد قالوا..
"لمني!؟"
طوبى بإحراج وارتباك..
/خطم امس تعشا وروح..
سمعت رنين هاتفها اللي كان بمثابة المنقذ ليها من هالموقف المحرج لفت وولت للدار بسرعه..
هما بعد ماكانوا يشوفولها شافوا لبعض وضحكوا..
وهي طلعت مرة تانيه ومشت بسرعه بدون ماتشوفلهم ولاتقول كلمه..
لبست في رجليها وطلعت وسكرت الباب..
☘برا الحوش..
كان عبد القيوم مدرس بسيارته قدام الباب يراجي فيها بشوق..سمع باب الحوش انفتح شافها طالعه ابتسم من قلبه..
فتحن طوبى الباب وركبت وهي تقول..
/السلام عليكم..
عبد القيوم بإبتسامه..
/وعليكم السلام ورحمة الله وبركاته..
طوبى بأحراج..
/عليك موقف انحطيت فيه ع الصبح..
عقد حواجبه وقال..
/موقف شنو؟
وراته الخاتم وقالت..
/اليوم بيضموا المربوعه لقوه فيها مش عارفه كيف نسيته..
رفع نظاراته شويه وقال بعد ماغمز بعينه..
/مش منك ياسمح..
طوبى نزلت عيونها وقالت بإبتسامة خجل..
/خلاص عاد..
لبس نظاراته كويس وهو يضحك بعدين شغل السيارة وتحرك..
طوبى:هات يدك..
مدلها يده وهو مبتسم..
لبساته الخاتم بعدين ركزت ع حوايجه رفعت حواجبها وقالت..
/مزود العيار اليوم..
بعدم فهم قال..
/شني!؟
طوبى برفعة حاجب قالت..
/قصدي متأنق زياده عن اللزوم..
ضحك بعدين قال..
/لعيونك ياسمح نبوك ديما تحقنا جذابين..
ضحكت بعدين شافت القدام..
هو قال:حولي من يدك القوانتي..
شافتله لقاته يأشر ع يدها اللي جايه جنبه ابتسمت وحولت القفاز متاعها وقالت..
/حولته..
خدي يدها وشدها بقوة وهي شدت يده بنفس القوة..
ابتسم وقال..
/غنيلي..
ضحكت وبدت تغنيله وهو يسمع فيها بقلبه اللي كل ماله يزيد يتعلق بيها اكثر واكثر..كل ماتزيد تقرب بينهم المسافات حبه يزيد يقوى..شوقه يزيد يكبر..وكل ماله يزيد يتأكد ان من غيرها مايقدرش يعيش..
وحتى هي تحبه بقوة وحبها ليه كل يوم يزيد يكبر لكن قلبها كان محمي من التعلق بيه لأنه متعلق بمن هو أعظم الله سبحانه وتعالى والله كان حب قلب مايخليشي يتعلق بغيره..
☘التعلُّق باللَّه هو الأمن الذي لا يصحبه خوف، والطمأنينة التي لا يشوبها قلق☘
🍁🍁🍁
ورفعها لمحلات معينه هي طلبت تمشيلهم..
اول محل كان للأطفال خشوله مع بعض وكانوا الزوز يدوروا ع فستان حلو يناسب جنه..
كان هي حطت عينها ع واحد بعد تاخد رايه يطلع فيه مية علة تفوته..وهو كان اختار واحد طلع فيه عله يفوته ماقدروش يتفقوا ع ولا اختيار وكان في زبونه مركزة معاهم وحبت تعطيهم رايها..
كلمت طوبى وقالت..
/لوسمحتي..
التفتت طوبى وشافتلها..
قالتلها:شن رايك في هدا!؟
طوبى وهي تشوف للفستان التفتت لعبد القيوم وقالت..
/شن رايك؟
هو اللي كان واقف بعيد شويه تفحص الفستان بنظره بعدين قال..
/كويس..
طوبى بإبتسامه:حتى اني عجبني..شافت للزبونه وقالت..شكرا..
هي بإبتسامه ردت تقول..
/عفوا..لبنتك؟
طوبى:ايه..
=تبيده بالهني ان شاء الله..نستأذن..
ومشت وطوبى تقوللها..
/جزاك الله خير..
قدملها عبد القيوم لعند ماوقف جنبها وقال.
/ذوقها سمح..
طوبى لاشعوريا ضرباته بقبضة يدها ع ذراعه..
هو ضحك بصدمه..
وهي استاقظت لنفسها شن دارت قالت بإحراج..
/اسفه..ومعاش تشكر وحده غيري..
وخدت الفستان ومشت بيه للبنت اللي واقفه ع الكاصه
وهو لحقها وكان يضحك عليها ..
🍁🍁🍁
وبعد ماشروا الفستان ولوازمه لجنه وقف عبد القيوم ع محل العاب خشوله وقعدوا فيه حوالي ربع ساعه وطلعوا وهما حاملين ومحملين..
وبعد محل الألعاب توجهوا لمحلات ملابس نسائيه..
درس قدامه عبد القيوم وكيف جاي بينزل قالتله طوبى..
/وين ماشي المحل معبي نساوين!؟
ضحك بعدين خدي شنطتها وطلع فلوس من جيب البالطو الدخلاني وحطهم فيها مدلها الشنطه وقال..
/احتجتي مساعده رني بس..
خدت الشنطه وهي تقول..
/لاتريح مش حنحتاج..ونزلت من السيارة..
قعد معاها بعيونه لعند ماخشت للمحل وهو يقول بضحكه..
/عليك غيرة عندها..تنهد وقال..لكن عسل في عسل..
🍃🍃🍃🍃
"هذا علاش نكره المناسبات اني مايتفكروا حاجتهم كان في الوقت الغلط"
فتح الباب الفاصل وهو معصب وخش لجنان حوش طوبى..
وهو ماشي بطريقه للمستراح وقف في مكانه لما شاف غرفه طالعه من المربوعة الخارجيه وهي شاده المكنسه الكهربائيه..
حطتها والتفتت ع الباب سكراته..بعد ماسكراته جت بتاخد المكنسه لقتها في يد حسين..
قاللها:صباح الخير..
غرفه:مساء الخير..
ضحك وقال..
/راحت عليا نومة..
هزت راسها وقالت..
/هاتها ترا..
حسين:فوتيها تو ندخلها..
بدون تعليق جت بتمشي وقف قدامها تفاجئت..
حسين:درت اللي وصيتك عليه في غيابي!؟
رفعت عيونها فيه وقالت..
/تبي حاجه؟
رفع حاجبه وهو ساكت..
غرفه:تو ناديلك خالتي..
وكيف جت بتمشي اعترض طريقها مرة تانيه..
بدت ع وجهها ملامح العصبيه..
هو عقد حواجبه وقال
/علاش المعامله هادي!؟
غرفه بشي من الانفعال..
/معاملة شني ياحسين!لاقللت من احترامك ولاقلتلك كلمة غلط!
قاللها:تكلمي فيا من فوق نفسك من لما جيتك للجامعه قبل لنسافر..علاش هذا كله!. ع خاطر هداكا الموقف! ياستي اسف وسامحيني وانسيه خلاص..
مابتش ترد عليه بكلمه بسرعه مش من حداه لحقها وهو يقول..
/راجيشويه غرفه..غرفه اوقفي نبي نكلمك شويه..
وغرفه تسمع فيه وهي معصبه ومضايقه وشبه بدت تتأكد من شكوكها في تصرفاته..
ارتبكت لما لاقت صفيه في وجهها..
قعدت لحظات واقفه بعدين خشت طول..
صفيه بعد ماتبعتها بعيونها شافت لولدها لقاته قاعد بنظره مع غرفه لعند ماخشت عقدت حواجبها وقالت..
/شن لبزت معاها مرة تانيه!
شاف لأمه بضيق بعدين حط المكنسه وقال..
/شن تبي يام؟
صفيه:لاحول ولاقوة الا بالله ربي يهديك وخلاص..
هو بإنزعاج قال..
/غير فكيني يام وقولي شن تبي..
☘وقالتله امه شن تبي من طلبات وهو مشي طلع من الحوش وكان في حالة غضب وضيق من رفض غرفه اللي ولى واضح بالنسبه ليه..
🍃🍃🍃🍃
الساعه 4:00عصرا..
في دار المعيشه..
🍁"وهذا قفطان بنتي الأميرة"
جنة وهي تشوف للفستان قالت بذهول..
"وااو"
هاديه بضحكه:نجيها ياربي..
طوبى بإبتسامه..
/سلمك..حلو جنوني..
جنه وهي مازال مبهورة قالت..
"ايه"
☘بألف ياويلاه اقنعوها ماتلبساش توا..بعدين وزعت طوبى عليهم الألعاب اللي خداهم راجلها..
ديكور وحاجات حوش العاب كامل لجنة ومئاب..
وزوز سيارات تحكم عن بعد لمهاب وأواب..
طارت عقول الصغار من الفرحه بهداياهم ومعاش شافوا بعدهم شي..
طوبى كانت تسمع في عبارات الشكر والمدح اللي تنقال ع راجلها وهي فرحانه وقلبها يرفرف بشعوره الحلو..
بعدين ناضت وطلعت من حداهم ومشت للدار بش تبدل لما خشتلها لقت غرفه شادة مذكرة مطبوعه وتقرا..
سكرت الباب وغرفه شافتها وقالت..
/شن خديتي!؟
طوبى:بدلة بسيطه لكن حلوة هلبه..شوفي..وطلعتها من الكيس..
غرفه بإعجاب:تجنن تجنن!!..
طوبى وهي تشوف للبدله..
/عجبتني اللقطه اللي في الجاكيت والحزام متاعه والقونه كيف ضابطه حلوة هلبه..
غرفه غمزت وقالت..
/لكن هو اللون..حموري..
طوبى بضحكه:قلت نغير شويه ونعنشها..
غرفه بإبتسامه خبيثه قالت..
/هي منعنشة من امس شكلها..
ضحكت بإحراج وقالت..
/مبردك..
ضحكت غرفه بعدين قالت..
/صارت حاجه!؟
☘حكتلها طوبى بإختصار عن التقارب اللي صار بينها وبين راجلها بعدين قالت..
/تعرفي ماحسيتش بالخوف اللي كنت نحس بيه قبل..اللي حسيت بيه وقتها راحة مع هلبه مشاعر حلوة..تنهدت وقالت..تعرفي زدت حسيت بحبه ليا قداش قوي ياغرفه حسيت بالحق اني الوحيده اللي في قلبه..
غرفه:مازال عندك فيها شك هادي!؟
هي بضيق قالت..
/مش شك..بس غصب عني نلقى نفسي نقارن..هداكا الجالي من اول يوم ليا معاه كنت حاسه ان في حد بيني وبينه كنت حاسه انه مش معاي..يقولوا المراة تحس بالحاجه هادي ويكون احساسها ديما في محله..
غرفه:تجاوزي ياطوبى وانسي ومعاش تخلي شي من هداكا الماضي الاسود تخطر عليك..
دمعوا عيون طوبى وهي تقول..
/والله قاعده نحاول..بس شكله هالماضي ياغرفه خلا فيا اثر قوي هلبه..
تنهدت غرفه بحزن وقعدت ساكته..
مسحت طوبى دموعها قبل لينزلوا وقالت..
/مخليتها ع ربي سيورني نتخطى ونعيش حياتي زي مانتمنى..
ابتسمت غرفه وقالت..
/ونعم بالله..ربي يهنيك ويخليكم لبعض..
طوبى بإبتسامه تخفي الكثير قالت..
/آمين
🍃🍃🍃🍃🍃
ويجي اليوم المنتظر..
حفلة اسبوع ولد المهدي وسدرة..
نساوين عيلة الواعر كلهم من الصبح توجهوا لحوش الجد..
غرفه وطوبى انشغلوا مع شركة التنسيق اللي دارت ديكور حلو في المربوعه الخارجيه..
اما اميمه طلعت مع اريج وجابوا باقي طلبيات الحار ونوع تاني من الشكولاته موصيين عليه..
وبالنسبه للوجبه الرئيسيه كانت بين الكسكسي والبازين اللي بطيبوهم مطيرة وفردوس وصفيه في الدور الاول لحوش سدرة..
ذبح المهدي العقيقه كانت ثلاثه كباش كبار وملاح واحد صدقوا اللحم متاعه والزوز التانيات خلوهم لعشي السبوع..
☘☘☘☘☘
الساعة 7:00مساءا..
في الشقه اللي يقعد فيها عمر مع مرته لما يجي لحوش اهله..
كانت نفيسه واقفه ع الزيانه تحط في أخر اللمسات ع طلتها..
شويه وخش عليها عمر اللي كان جاي من برا..
لما شافها طلتها قلبه فر فران وقال..
/تي غير شن هو الباهي اللي دايره في عمري بش عطاني ربي هالغزاله ياناس..
ضحكت نفيسه..
مشي قعمز ع السرير وقال..
/تعرفي قريب نقولك فوتيها اللمه وخليك قدامي هكي نقعد نتأمل فيك..
التفتت وهي تضحك بإستنكار..
عمر بهويام:اااه ياقلبي..
هي بخجل قالت..
/خلاص عاد..
قاللها:خلاص عينك..
التفتت بجسمها كله وقالت..
/باهي قولي عموري لما ربي يرزقنا بدير هكي حتى انت!
عمر:واكثر من هكي وربي نديره مهرجان نخليهم يدووا بيه عمر القدام..
ضحكت وقالت .
/اني حامل .
توسعوا عيونه بمفاجأة وهو يقول..
/كيف عرفتي!!؟
بإبتسامه قالت..
/ريت امس لما قتلك بنمشي مع اختي بدير تحاليل حللت معاها وطلعت حامل..
ناضلها وقدملها ولما وصل فيها ضمها وقال..
/نحبك موت..
حطت ايديها ع ظهره وقالت..
/فرحان؟!
تعبوا عيونه دموع وهو يقول .
/شن هالسؤال يانفس..كان نلقى نطير من الفرحة..
طبطبت ع ظهره وكأنها عرفت في شن كان يفكر..تعرف كويس المآسي اللي مر بيهم واللي خلفت في قلبه حزن عميق ناحية موضوع الأطفال ومن قلبها سألت الله يكمل عليهم فرحتهم ويشوفوا عيلهم بأتم صحة وعافيه وينمسح من قلب عمر كل خلفاته تجاربه السابقه...ء
🍃التجارب السابقه..
يعني الماضي..الماضي سوا كان سعيد ولامؤلم يقعد موجود بذكريات الحية في عقولنا وقلوبنا ماتموتش...
يقولوا مهما كان شكل الماضي اللي عشناه لابد من تجاوزه وتناسيه..
لكن كيف!؟ كيف اذا حاضرنا هو نفسه امتداد للماضي!؟الماضي اللي صنع شخصياتنا بكل شي فيها من تفكير وصفات ونفسيات ومشاعر...!
🍃"وكأنه عرس الله يبارك"
هالجمله قالها الاقجم وهو واقف قدام مختار اللي كان مقعمز قباله طاولة رقعة الشطرنج..
رفع حواحبه بعدين تنهد وقال..
/اممم..
الاقجم بضحكه..
/نصارحك بحاجه!؟ توقعتك تمشي وتحطهم في موقف..
شافله مختار وقال..
/لاعاد مش بارد لهالدرجة!..رد نظره للرقعه وقال..لكن حتما حنمشي لأختي ونباركلها ونكون احسن منها..خيركم من يبدأ بالسلام..
ابتسم الأقجم بعدين قال..
/ماتبي مني شي تاني!؟
رفع حواجبه ونزلهم بمعنى"لا"
الاقجم:نستأذن..
ولف ومشي طلع من المكتب..
قدم مختار بوجهه للرقعة وقعد يتمعن فيها بعدين قال..
/زعمة شن ناخدله من هديه ولد شنيبة هذا!!!؟
🍃🍃🍃🍃🍃🍃
ومن الفرحة بولد شنيبة هذا تعبت المربوعة الخارجيه لحوش علي الواعر بالمعازيم من النساء..جيران ومعارف واصحاب..
ع راسهم..
عيلة الصيد حتى نجاح جت ماعدا راما اللي قعدت مع حناها مغليه..
كذلك جو أم محمود ومرته وباقي جيران الشارع واكيد مناسبه زي هادي مش حتغيب عنها رقيه..
اما اللي حضروا من الاحباب..
عيلة الفاندي..عبير صديقة طوبى..اماني صديقة اريج..وزوز من صديقات غرفة وحده منهم جابت معاها بنت اختها..وكذلك جت حواء وجابت معاها بناتها...
والمعارف..
زينب وإيمان ومعاهم امهم واللي جابهم عدي...
ومن عيلة شنيبه كانوا حاضرات نسرين وسميرة وكنتهم نفيسه...
🍃🍃🍃
مطيرة وصفيه كانوا في استقبال المعازيم..
صفيه كانت في قمة الاناقه وملفته جدا للإنتباه وياما علقوا عليها وع التتغير اللي طرأ ع حياتها..
اما مطيره اللي كانت طلتها بسيطه ويدوب كحلت عيونها فكلهم كانوا يقولوا انها مازال حازنه ع بوها ووجودها فهالمناسبة اخد بخاطر بنت خوها لاأكثر..
شويه وخشت عليهم فردوس اللي هلبه من الحاضرات اعجبوا جدا بطلتها بانت عليهم احلا وأصغر من قبل وكأنها توا بس انعطت عمرها الحقيقي..
لكن جمال غرفه بفستانها الاخضر المخملي خلا العيون مبهورة بيها وهي عاد ياأرض اشتدي مافي حدا قدي..
وتلحقها اميمه اللي كعادتها كانت زي الاميرات الاوروبيات في طلتها وبدت الانظار تتوجه لنفيسه وهما يراجوا يشوفوا حركة او نظرة غيره لكن نفيسه صاحبة الشخصية القويه والواثقه من نفسها جدا لما شافت اميمه ماتحركتش فيها شعرة..اميمه بالنسبه لراجلها ماضي وعدا في حاله وهو توا مايشوفش في غيرها..
لما وصلت فيها اميمه سلموا ع بعض عادي جدا وكل وحده فيهم ماحستش اتجاه التانيه بأي شعور سلبي..
☘عقول ناضجة☘
وتخش نجمة هالحفلة وولدها في حضنها ومعاها فايزة..
سدرة لبست قفطان مغربي وخلت شعرها القصير مطلق وشداته ع جنب بمشبك ذهبي ومكياجها عادي ماكانش مبالغ فيه ومع هذا كانت قمة في الجمال..
خشتها بولدها تبعتها زغاريد من سميره وفردوس وصفيه ضحكت سدرة والفرحه باينه في عيونها ومشت قعمزت بولدها في مكانها المخصص وشويه وبدوا ينوضوا المعازيم يسلموا عليها..
باهي طوبى وين!؟
طوبى تجهز في نفسها..لهت بطلة بنتها..بعدين استلمت غرفه وفردوس واخيرا سدرة وبعد ماطلعت سدرة بدت توتي في روحها..
🍃🍃🍃🍃
"ماشاء الله ع غرفه زايده في الزين"
ايمان:لكن رافعه خشمها هلبه اني عجبتني فردوس ..
امها قالت:ايه ماشاء الله..لكن وين طوبى!؟
زينب:حتى اني نراجي فيها تخش معقوله تكون مش حاضرة!؟
وفي هاللحظه تخش طوبى والأنظار كلها توجهت ليها وقعدت تلاحق فيها وهي ماشية لبنتها تساويلها في شعرها..
☘البدله اللي كانت مبينه جمال قوامها وعاكسه ع لون بشرة وجهها البيضا هذا غير احمر الشفاه اللي كان من لون البدله ومكياج عيونها الحايرة اللي ابرز جمالهم مميز..
شعرها كانت ضماته ورفعاته فوق ماخلاتاش ع طوله..ودارت نفخه بسيطه في مقدمه راسها ونزلت خصلات قصير جنب وذانها..وكانت التعليقه اللي جابهالها عبد القيوم تبرق عليها وزادتها جاذبيه..
طلتها بشكل عام كانت جدا مختلفه عن المعتاد وخلتها تبرز جمالها الفريد بطريقه مميزة..☘
وخرت عن جنه بعدين مشت لسدرة لما سمعتها تنادي فيها وصتها بعض التوصيات اللي تخص الضيافه بعدين مشت طوبى تسلم ع المعازيم..
ولأن قصتها زواجها من عبد القيوم ولت منتشرة في الشارع الجارات بعد ماشافوا طلتها زادوا تأكدوا من حقيقة هالخبر..
وهي تسلم ع ام ومرت محمود هما كانوا منغاضين منها لأبعد حد لكن هي كانت معاهم بشوشه وتسلم بحرارة..
بعد مشت ام محمود قالت..
/منظرها منظر وحده متزوجه..
ردت عليها كنتها تقول..
/باين في وجهها..
☘☘☘
ام عدي بحسرة..
/عطيه مايرفعه هداكا الجالي اللي ريحها ع ولدي..
زينب:الله غالب مش نصيبه يام..
ايمان بأسف:ياريت عدي يقتنع..
قربت منهم وحتوصل فيهم زينب كانت مستعده لأي حركه ديرها طوبى ممكن ضايقها لكن لما وصلت فيهم طوبى قالت بإبتسامه حلوة..
/اهلا..
وسلمت على ايمان وامها سلام كويس لكن سلامها ع زينب كان بالأحضان وبحرارة خلت زينب تحس بالإحراج من نفسها..
بعد سلامها عليهم هدرزت عليهم شويه بعدين مشت طلعت من المربوعه..
إيمان:زي ماتوقعت..
تنهدت زينب وسكتت..
☘ومن بعيد شويه كانوا تبرة واقبال وسعاد يشوفولهم..
اقبال:هي نوضي يام..
سعاد:يارب..
وناضت ومعاها اقبال ومشوا بإتجاه عيلة زينب بش يفتحوا معاهم موضوع إيمان وأيمن..
زينب بإبتسامه:جايين هني يامنمن..
شدت ايمان ابتسامتها وقلبها كان يدق بقوة..
☘☘☘
"ماشاء الله ع اميمه بنت عمك"
غرفه بإبتسامه:عرسها قريب نهاية واحد..
=ربي يتمملها ع خير..
غرفه:آمين..شافت لآخلاص وقعدت تتفحص فيها بعدين قالت..
/اخلاص..
شافتلها بإبتسامه..
غرفه:ماعندك حد في حياتك؟
ضحكوا هي وخالتها بعدين قالت..
/كان في موضوع خطوبه بعدين ماصارش منه..
غرفه:وتوا مافي حد؟
صاحبتها قالت بضحكه
..
/عندك ليها عريس!؟
ضحكت غرفه وقالت..
/نقصقص بس..
قالتلها اخلاص بإبتسامه..
/لالا مافي حد..
هزت غرفه راسها بإيجاب بعدين وجهت نظرها لباب المربوعه شافت نبيله خاشه ومعاها عمتها وبناتها عمتها ناضت ومشتلهم طول ولحقتها اختها فردوس..
🍃🍃🍃🍃
والاجواء في مربوعه الرجاله كانت مختلفه طبعا هدرزة عن وضع البلاد ونقاشات لاتنتهي في السياسة في الاقتصاد في الرياضه واللي كانوا يعولوا عليهم شباب يخدموا ع العواله في المناسبات جابهم المهدي..
☘☘☘☘
وبدت اجواء اللمة بالإشتعال طلعوا الدربوكه وداروا شوط كله حماس..
ناضوا رقصوا فيه بنات الواعر ورقصوا معاهم سدرة ماعدا طوبى اللي من بعد ماصار فيها عرس بنت سالمين فضلت معاش ترقص في المناسبات وسط الزحمة..
☘بعد مارقصت سدرة مع خواتها وبنت اختها اريج جوها صاحباتها نسرين وفايزة وقعدت ترقص هي وياهم..
وكل من كان يتفرج عليهم خطرت عليهم ايام زمان لما كانوا اربعه وعائشة بيناتهم..
لكن هادي الدنيا وكله نصيب وقضاء وقدر...
☘☘☘
بعد شوط الدربوكه طلعوا العشي للمعازيم اغلبهم طاحوا فيه بإيديهم ورجليهم وع راسهم رقيه اللي كانت تاكل من العشي وتاكل في بعضها بتموت وتعرف من طوبى الخبر اليقين وماارتاحتش لعند مانادت عليها..
☘"نعم خالتي تبي حاجه"
رقيه بإبتسامه:الله يبارك عليك طالعة زي الغزاله..
ابتسمت وقالت..
/سلمك يارب..
رقيه:حالك باهي صحتك كويسه معاش تشكي من شي!؟
الموجودات معاهم ع السفرة ركزوا مع طوبى اكثر..
هزت طوبى راسها وهي محافظه ع ابتسامتها وقالت..
/ايه الحمد لله..
رقيه:الحمد لله..باهي حق اللي سمعناه قالوا تزوجتي..
وقفت طوبى ع حيلها وقالت..
/ايه..تعشي خالتي تعشي كملوا عشاكم صحتين..
ولفت ومشت بسرعه..
رقيه:ريتوها كيف هربت زبطتني بنسألها من خداك..
=معناه التارقي حق!
رقيه:معاش فيها شك..
🍃واسئلة رقية اربكت طوبى ودخلت ع قلبها الخوف خلاص معاش ينفع يدرق خبر زواجها اكثر من هكي لكن تفكيرها في العواقب مخلي قلبها مقبوض...
🍃🍃🍃🍃
وتمت حفلة السبوع ع خير وباتوا نساوين العيله فهالليله في حوش علي الواعر..
☘في دار اميمه سابقا اللي ولت دار معيشه..
كانوا ملتمات ويحكوا عن نفس الموضوع..
سدرة:اعوذ بالله منها هالمراة ماتفوتها الفايته..
غرفه:لكن راهو معروف الحكايه بتطلع اكيد في من شافه يجيب فيها هني ويروح بيها..
صفيه:مزبوط..
تنهدت طوبى وقالت..
/في حاجة بنقوللكم عليها..
كلهم شافولها بقلق واستغراب.
طوبى:عمات عبد القيوم يبوا يديروله عرس في بلادهم وقالوا لازم تحضروا..
التزموا الصمت جميعا.
طوبى:قلت خل تفوت المناسبه هادي بعدين نخبركم هما اصلا يبوا يديروه بعد يتم الشتي..
سدرة:اكيد بنمشوا معاك مافيش كلام واني من توا بنقول للمهدي..
غرفه؛بإذن الله كلنا حنكونوا معاك ومايغيب منا حد..
مطيرة:الله! بنحضروا عرس تارقي!
ضحكوا وطوبى تضحك معاهم..
لكن غرفه وسدرة بس اللي شافوا ماورا هالضحكه لأن عيون صاحبتها ديما مفضوحه الحزن فيهم مايدرقش...
#ذكريات_لاتموت
#طوبى
(كتبتها واني مصدعة سامحوني)
....يتبع....
