#طوبى "جنة طوبى"
#جمان_فريد
#الجزء_الثالث_والثمانين "حرب باردة/ستار حديدي "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء 🌼
وانت بتدعي خليك طماع، ايوا طماع، إدعي بـ كُل
حاجه نفسك فيها، انسي المنطق وانت بتدعي
ومتشغلش بالك ازاي الدعوه دي هتحقق، النبي
بيقول"إذا تمنى أحدكم فليستكثر فإنما يسأل ربه"
سيدنا موسى طلب من ربنا 7 حاجات مره واحده
وكان الرد ساعتها "قَالَ قَدْ أُوتِيتَ سُؤْلَكَ يَا مُوسَىٰ"
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃الانتقام طبق لذيذ ولكن يؤكل باردا🍃
________________________________________
فتح باب المكتب وخش..
شغل الضي..ومشي بإتجاه الروشن وفتحه..
وقف عليه وهو يتفرج ع المنظر اللي تعود يشوفه كل مايروج لحوش خوه...
غير نظره عنه..وشاف لروشن حوش الجيران..
ليه فترة ملاحظها معاش بانت..والروشن في الغالب يكون مصكر عكس اليوم لقاه مفتوح..
استغرب في نفسه لما حس روحه يبي يشوفها ويراجي امتة تبان عليه..
شن معناه هدا؟..تعود!!؟...
ماباش يفسر احساسه وقعد يراجي وبس..
شويه وبانت..عيونها جو فعيونه..
تلقائيا ابتسلمها زي ماتعود..واستنى منها ترد الابتسامه..
لكن هي قابلتها بوجه عابس..هربت بنظرها عنه وسكرت الروشن..
تلاشت ابتسامه حلت محلها ملامح الاستغراب..
وشويه وسكر الروشن حتى هو...
🍃🍃🍃🍃🍃
"هاه شن قولك"
اريج بضيق:فكرت هلبه امي من قبل في الموضوع هدا..مانبيش..
فردوس:علاش؟
اريج:مازال الوقت..مانبيش نخش في الموضوع هدا مرة تانيه لبعد التخرج..
فردوس:متأكده؟
اريج هزت راسها وقالت..
/ايه متأكده..
فردوس:إن شاء الله خير..ومشت طلعت من الكوجينه..
وخلت اريج ضم فس الكوجينه وهي مضايقه..
☘من داخلها كانت عندها رغبه توافق..لكن خافت تستعجل وتندم بعدين لهدا اختارت انها ترفض الارتباط بشكل عام حاليا☘
هي هكي تبان ناسيه نضال وكأنه ماكانش يوم يعنيلها شي..
🍃لكن هو ولا لحظه مرت عليه من غير مايفكر فيها..
وكل ليله يقرا في محادثاته هو وياها ويسمع في الرسائل الصوتيه اللي كانت تبعت فيهم..ويتأمل في خاتم الخطبه اللي قعد عنه وماقدرش يفرط فيه...
وقعدت حاجه ماقدرش يمحيها ولايحذفها..
صورة ليها بالحجاب وهي مقعمزة معاه قدام البحر كانت مبتسمه فيها ابتسامه طبيعيه وحلوة..ابتسامتها اللي وين يشوفها صدره ينشرح..لكن بعدين يرجع يضيق لما يتفكر انها معاش ولت ليه خلاص...
🍃وفي هالليله الخريفيه..
المهدي كان سهران في شقته ع شغل يكمل فيه يخص تجارته..
حس بشويه تعب..اتكى ع الكنبه اللي كان مقعمز عليها..
وشويه وسرح بتفكيره..
يفكر في كل شي صاير معاهم وفي داخله قلق كبير من اللي مازال يصير..
المهدي بحسرة..
/غير شن خلانا نوصلوا لهني بس..
وبعد قال هالجمله..رجع تفكر الماضي..الماضي الجميل..
ايام الود الصافي..والنفوس الطيبه..
ويتفكر سدرة..وذكرياته معاها..
مرحلة المراهقه بالذات وقف عندها..
قعد كل مايتفكر ذكري..تكبر الابتسامه المرسومه ع وجهه لين ولت ضحكه ع بعض المواقف..
بس سرعان ماجي الحاضر ووقف سير شريط الذكريات..
اختفت ضحكته...وتنهد بضيق..
بعدين رجع قعمز ولهي بشغله مرة تانيه..
🍃🍃🍃🍃🍃
تاني يوم..
الخميس...
20سبتمبر...سنة 2018..
صبح خريفي مغيم...
الجو المحبب لقلبها..يعطي فيها طاقة ايجابيه عكس باقي الناس اللي تشوف في الجو هدا لون من ألوان الكآبة..
كانت في زوايه من الجنان قريبه ع الباب..
تزرع في الاقحوان وهي تسمع في صوت فيروز اللي جاي من الكوجينه..
اختها الكبيره وهي دير في الفطور تسمع فيها..بعد ماجهزتاته طلعتلها وهي تقول..
/مازال..
ناض طوبى وفي يدها اداة الحفر..
/لاخلاص كملت..ومشتلها..
خشت فردوس..وطوبى بعد ماحطت الأداة في مكانها خشت وراها..
☘في حوش جدها علي..
فم الباب القدامي..
مطيره؛والله هي اللي قوليلها تجي..
اميمه وهي تلبس في شنطتها هزت راسها وقالت..
/تمام..ماتبي شي؟
مطيره؛سلامتك بنتي..
اميمه مشت طلعت من الحوش ومطيره وراها تسقد فيها..
وبعد ماطلعت..توجهت طول لحوش خوها لطفي...
☘فطرت مع بنات خوها..
بعدين طول بدوا يجهزوا في اكل السهريه موالح وحلو...
🌼وفي حوش فايزة..
بعد ماطلعت فايزة لخدمتها..
صفاء بدت توتي في الموالح اللي بيرفعوهم لحوش لطفي وخلت ع خواتها ضمان الحوش...
🍃في الوقت اللي كانوا فيه اريج وآلاء في اعمالهم..
☘اريج كانت زعلانه ع حال الدكتورة منيه اللي تغير بعد ماعرفت قصة عمر..كان باين ع اريج منها انها حباته وتأثرت بيه هلبه..
☘اما آلاء اللي كان قلبها مغموم من امس كانت وهي تخدم تسمع في زميلتها الشرقاويه اللي تحكي ع نضال وع علاقتهم اللي تطورت..واستشفت من كلامها ان نضال ناوي يخطبها..
ونضال مش في باله حاجه زي هادي نهائيا..البنت تحلم بروحها...
🍃🍃🍃🍃🍃
"نبوا باص يرفعنا ويروح بينا مع بعض..المشكله في المسافه وينه اللي بياخد طرق هلبه بعاد عن بعض؟"
فوزيه؛مش ضروري تقعد مربوطه بيك تشوف باص تاني في جيهتهم..
مناسك؛خاطري نكونوا مع بعض في المرواح..
الحديث يدور بيهم حدا مالك اللي كان يفطر بصمت..
فوزيه:اما انتي عليك فنات..
ومشت وهي تقول..
/خل نمشي نشوف غسالتي خيرلي..
ومشت من حداهم..
ومناسك تأففت بضيق..
شويه مالك بلع اللي ياكل فيه وقال..
/تو نشوفلكم موضوع الباص..
مناسك بحماس .
/جديات!..ضيقت عيونها وقالت..بتخدم ع باص شكلك؟
هو ضحك بسخريه وقال:اسكتي واسمعي تو ندور ونشوف متأكد حنلقى..
هي بإبتسامه قالت..
/إن شاء الله..بعدين شبحتله شويه بنظرات شك وقالت..ملوكي قول الحق..انت عينك ع مروة صح؟
مالك وهو يشوفلها بإمتعاض..
/انتي معاش تتحشمي بكل..
هي بضحكه قالت..
/راك مفضوح..وحتى هي تحسها مش عارفه..
عقد حواجبه وقال..
/هي شني!؟
مناسك ارتبكت وقالت..
/لالا خلاص فوت فوت انسى...وفي نفسها قالت..
"غبيه يامناسك كيف تفضحي صاحبتك!"..
هو شبحلها شويه بعدين قال..
/ايه عاجبني ونيتي معاها صافيه..
ابتسمت مناسك..
مالك بضيق..
/لكن نبي منك حاجه..
هي قالت:شن هي؟
مالك؛كان حق زي ماقلتي..سكت فجأه وغير عيونه عنها..
هي بقلق قالت..
/شن في مالك؟
شبحلها شويه بضيق وهو يفكر بعدين قال..
/مناسك مانبيهاش تشوف شكلي..
هي بإستغراب شديد..
/علاش!؟
من التوتر مسح بيده ع وجهه..بعدين قعد يمرر في نظره ع المكان..
واخته زاد القلق داخلها..
هو شبحلها شويه بعدين قال..
/اني نعرف مروة قبل لإنتي تعرفيها..
مناسك تفاجئت..
مالك بلع ريقه ونزل نظره لسفرة فطوره وهو يقول..
/صاير بيني وبينها مشكله ع خاطر..بنت كنت نعرفها..
مناسك؛مشكله شني!؟
مالك حك ذقنه بعدين عقد حواجبه وقال..
/مشكله يعني..مش مهم تعرفي التفاصيل مش مهمه هلبه..المهم ان مروة لو تعرفني اني نفس الشخص احتمال تقطع علاقتها بيك..
انصدمت مناسك وقالت..
/لهالدرجة!
سكت وهو مضايق..
مناسك بقلق بالغ..
/مالك شن داير للبنت!؟
شبح لأخته وهو يفكر للحظات بعدين قال بشي من الربكه والاحراج..
/هو مش ليها هي بالزبط لبنت تانيه هي تعرفها...يعني كيف بنقولهالك..البنت هادي تعرفت عليها فترة وفتتها وهي نفسيتها تعبت وهكي..فاهمه عليا..
مناسك بضيق وأسف..
/خسارة لو عرفاتك حتغير رايها فيك..
مالك بضيق..
/مش لازم تعرفني ماتخليهاش تعرفني..لو عندك صور في هاتفك امسحيهم بأي شكل ماتخليهاش تعرفني.
مناسك بضيق..
/انت قلت عاجباتك وبنيه صافيه!
تنهد من وسط قلبه بعدين قال..
/مناسك نبيك تساعديني..
مناسك قعدت تشوفله بضيق..
مالك؛اني نبي نخليها تعرفني صح..
مناسك؛كيف قولي اني ضاحك ع غيرها كيف تأمن فيك؟
مالك؛انتي غير قولي باهي والباقي عليا اني..
مناسك بحده؛ردبالك يامالك مروة مش للعب راهو..
مالك؛اقسم بالله نيتي جيهتها صافيه وربي عالم..
مناسك زادت ضايقت وتوترت وناضت وهي تقول.
/شوف موضوع الباص قبل وبعدين ساهل..
ومشت وخلاته وهي خايفه منه يدير شي يخسرها مروة..تعرف خوها ملعب وعنده هلبه علاقات مع البنات ماقدرتش تصدقه وفي نفس الوقت كانت حاسه انه ماحكاش القصه اللي صارت بينه وبين مروة بصدق..
اما هو ندم ع استعجاله فالبوح لأخته باللي في نفسه بس كان لازم يدير هكي بش ماتعرفاش مروة وتقطع علاقتها بيهم نهائيا...
🍃🍃🍃🍃🍃🍃
الساعه 5:30عصرا..
طلعت الحافظه وهي تقول..
/اسكندر طلعت اني..
هو طلع من المربوعه وقعد يلبس في سبيدروه..
سكر الباب ولحقها..
🍃بعد ماركبوا للسيارة..
وقبل ليتحرك قال..
/زي ماوصيتك..
هي قالت:ياودي باهي باهي..
ضحك وشغل السيارة وتحرك طول...
🍃ولحوش لطفي..
كان واصل المحجوب..
خش هو ومرته للحوش..سلم ع بنات اخته وطلع مشي لحوش الحاج علي..
بعد حوالي عشر دقايق..
🍃وصل اسكندر..
وشافه نضال من القهوة وتوتر وعصب زي العاده...
بس بوه اللي كان واقف يهدرز مع الصيد قدام للمطحن لما شاف سميره نازله من السيارة..
قعد معاه بعيونه...وهي وين جت ماشيه للباب بش دق عليه..
دارت روحها بتشوف خوها..التفتت جو عيونها عليه..غيرتهم القدام لما جي جنبها اسكندر ودق الباب بالخاتم اللي كان لابسه..
شويه وانفتح الباب ولحسن حظه اريج اللي فتحاته..
هو طول تباعدت وع وجهها ابتسامه حلوة..
وسميره شافتلها بنفس الابتسامه وهي تقول..
/روجه..
اريج بخجل؛اهلا خالتي سميرة تفضلي..
سميرة؛رؤوف هني؟
اريج؛لا قالت خالتي في المحل..
هز اسكندر راسه ومشي لسيارته..
وسميره خشت وسكرت الباب وراها..
وعيون نضال تراقب في اللي صار وقلبه محروق بنار الغيره وهو يشوف في ابتسامة اسكندر اللي مافارقتش وجهه..
وقعد مع سيارته بعيونه لين درقت..
خبط بيده ع السياج المحاوط بالقهوة غضبا بعدين مشي يشوف الزباين..
🍃🍃🍃🍃🍃
لبست بنتها ستريتشا مزينة بنجمة صفراء وقالت..
/وخيتي سلملي هالعسل..هي خل نرقيك ياقلبي..
وبدت ترقي فيها...بعد ماكملت..
رفعتها في حضنها ومشت وقفت بيها قدام المرايه..
طوبى بضحكه؛ياوخيتي سلم قفاطينها..
بعدين شافت لنفسها..كانت لابسه بلوزه ازرق ملكي طويله لعند الركبه..ع سروال جينز ازرق غامق..ورافعه شعرها فوق..ومتزينه بعقد لولو مع الخراص متاعه كانوا اكسسوار..لكن مش حاطه شي ع وجهها..
وجهها اللي قاعده ملامحه تعبانه..بس هي قاومت تعبها بإبتسامه كلها قوة..
شافت لبنتها وقالت..
/هي نطلعولهم ماما..
ومشت للباب فتحاته وطلعت...
وتوجهت للصاله ولما خشت عليهم غنت تقول..
/جتكم جتكم جنونتي..جتكم جتكم..
اريج حطت صوابعها في فمها وصفرت..وهما بين اللي صاحوا وبين اللي ضحكوا..
ضحكت طوبى ومشت بجنه سلمت ع نبيله وسميره..
بعدين مشت قعمزت جنب عمتها...
🌼فهالوقت خشت اميمه من الباب الفاصل وفي يدها كيسة هديه..كانت نوعاما متوترة..
وصلت في حوش عمها اللي كان بابه مفتوح..رمت كندرتها..
وخشت..سمعت اصوات الهدرزة والضحك ابتسمت..
وقعدت تمشي لين وصلت في الصاله وخشت عليهم وقالت بإبتسامه..
/السلام عليكم..
وجهوا انظارهم ليها..
نبيله وسميره وفايزة وبناتها وعمتها ردوا السلام عادي..
اما بنات عمها وآلاء وأريج كلهم مع بعض تفكروا حديث صار بينهم قبل العصر..
🔺️في وقت سابق..
طوبى:يابنات..غرفه..اميمه بتجي راهو..
تأففت غرفه..
طوبى برجاء:غرفه..معليشي..نبيها لمة حلوة مانبيهاش تزيد تنقص ساد اللي نقصونا..
تنهدت غرفه بحزن وهي ساكته..
الاء:تمام لكن معليشي ماتقوليش هدرزي معاها عادي..
غرفه:ايوه..
طوبى:تو هي غلطت غلطت فيا اني..خلوني اني بس نقلب وجهي عليها..
غرفه بضحكه:لاقلبة وجهك انتي بقلبات..خلاص تفاهمنا كان هكي..
طوبى بضحكه:خزي..وانتي للوشه..
الاء وافقت ع مضض وقالت..
/Ok
🔺️في الوقت الحاضر..
كلهم ردوا السلام وابتسموا في وجهها ماعدا طوبى اللي ردت ودارت روحها لاهيه في بنتها..
ارتاحت اميمه بعض الشي ومشت سلمت عليهم بالوحده سلام بالخد..
لكن لما وصلت في طوبى كانت مصافحه عادي لأنها لاحظت طوبى قاعده واخده منها موقف..
وبرغم هكي قعمزت جنبها..وحطت كيسة الهديه قدامها وقالت..
/هادي لجنونه..
طوبى:شكرا..
تنهدت اميمه وهي مبتسمه مجامله بعدين مررت نظرها ع الباقي وقالت..
/ايه..شن حالكم؟
🌼🌼🌼🌼
وهدرزوا...وضحكوا...وشربوا وكلوا...وياقداش استمتعوا بهدرزة سميره وبالذات لما تشاركها مطيره..
اصوات ضحكهم بصداها عبت الحوش كله...
وطبعا..الاء وثقت كل شي بالصور..ماخلت شي..
🍃والرجاله كلهم التموا في حوش رؤوف..
علي..وعبد المطلب..والمحجوب..واسكندر...
وكانت اجواء هدرزتهم مختلفه واغلبها عن السياسه ووضع البلاد واللي كان يلطف هالاجواء مرة مرة مناشبة اسكندر لعبد المطلب..
🍃🍃🍃🍃
الساعه 9:40 ليلا..
مقعمزين يتعشوا وهما يتفرجوا ع التلفزيون..
كانوا حاطين ع قناة ليبيه جايبه مسلسل "العمارة"
سميره هي اللي جبرتهم يخلوا عليه..
مطيره؛عطيه طعوان..الرجاله مايملى عينهم كان التراب..
سميره؛كلهم هكي..غير خلينا من الدوة هادي وقوليلي لبسة الامريكانيه اللي لابسها بمن فكراتك..
كلهم قعدوا يشبحوا للممثل ولبسته..
ومطيره ضيقت عيونها وهي مركزه بعدين التفتت لسميره..
سميرة ابتسمت وغمزتلها..
غمضت مطيره عيونها بملل..
فردوس:يشبه المدعي محمد شنيبه ولا..
ضحكت سميره..
نبيله وهي تشوف للتلفزيون..
/صح فيه لمحه..
طوبى كانت معركشه وجهها وهي تشوف للتلفزيون..
فايزة بضحكه؛عنده لبسه زي هادي صح..
سميره كلت طرف بيتزا وهي تتفكر في اللي صار بكري وتبتسم..
ومطيره تشوفلها بنظرات استسلام وهي مبتسمه...
🍃🍃🍃🍃
"المهدي ماباش يردها الجالي خبط صدره وقال اني ناخدها"
كامله:هدا صح وخيي انت تشوف ان هكي يصحح يلم صغار خوه تحت جناحه ويشرد بنته!؟"
محمد شنيبه؛لاخلاص معاش نبيه يطلق مرته..هو بروحه شاد فيها هلبه..
كامله؛وبعد العمله كان في امل تولي مسحتوه..
محمد؛عملة شني ربي يهديك..
كامله بإنزعاج؛ماعندي علاش ناقش فيك كان تشوف في اللي درته صح..
محمد تنهد وهو يحرك في راسه بمين ويسار يأسا..
كامله؛خلي سدرة الليله هني..
محمد؛نقول لبوها قبل..
كامله؛اني نكلمه بوها..ياناري البنيه قعدت مشتته كل مرة عند حد..وكان عندها جدات مقومات راهو مش هدا حالها..
محمد؛ام امها بالذات نستهم لاعاد دورتهم ولاجتهم..جدهم يدور فيهم خوالهم ينشدوا لكن هي شي..
كامله بحزن؛لاحول ولاقوة الابالله..لالقوها منها لامن مرتك..
محمد شنيبه قعد ساكت وهو مضايق..
كامله تنهدت وقالت؛فكنا منهم ومن سيرتهم..
هو قال؛ياريت والله..
ع خشة اختهم اللي قاعده عندها كامله بسفرة الشاهي..
ابتسم محمد وقال:جت في وقتها...
🍃🍃🍃🍃
مقعمز في السيارة العاليه Vip..
ويشوف لباب المطعم ويراجي فيها تطلع..
وطلعت ومعاها واحد كانوا يهدرزوا ويضحكوا..
هو حط صبعه ع ذقنه وقعد يفرك فيه وعيونه عليهم..
شافها حط يده ع كتفها بعدين مشي وهو يحي فيها..
وهي ردتله التحيه بعدين غيرت عيونه عنه وشافت للسيارة..وجتها..
غير رضا عيونه القدام ونزل يده شد بيها الدومان..
هي وصلت في السيارة..ضغط ع زر انفتح الباب السحاب..
ركبت طول وفيدها ملف حطاته جنبها..
بعد تسكر الباب هو تحرك طول..
والصمت سائد الاجواء..
غير نظره للمراية لقاها لاهيه بتليفونها..
رد نظره للطريق وهو حاس بشي يشبه الغضب في داخله كان يبي يفش غله في شي ومش عارف كيف..
لعند ماخطرت عليه حاجه..
رضا:كلمتي اختك..
قامت عيونها وشافتله في المرايه وقالت..
/لا..
رضا:تتهربي..
هي بحده؛لا..
رضا؛مالا علاش مااتصلتيش لتوا..
هي قالت:ماسمعتش الاستاذ شن قال امس..
هز راسه وقال:امم..تمام..
هي استفزها اسلوبه اللي فيه شك واضح..
لقت روحها تكتب في رقم نجاة بعدين اتصلت بيها..
فتحت المايك وقالت..
/اسمع..
هو شافلها من المرايه بعدين رد نظره للطريق..
نادى الخط تلاته مرات..بعدهم ردت..
"ايوه"
صابرين بجفاف:نجاة..
"مني..صابرين!؟"
صابرين:ايه صابرين هدا رقمي الجديد..المهم شن حال الصغار..
"الحمد لله كويسين"
هي شافت لرضا من المرايه وقالت تهكما..
/نقولوا مبروك وبالرفاه والبنين..!
تنهدت نجاه وقعدت ساكته..
صابرين؛لما سمعت ماصدقتش..قلت لازم نتأكد منها هي..
"صابرين"
صابرين:امم..
"اسمعي..نبيك تتفهميني..اني توا خلاص وليت ع ذمة الجالي وكنة للعيله قدام الناس كلهم..مانبي شي يضر سمعتي وسمعتهم ويديرلي مشاكل مع الجالي"
غير رضا عيونه للمرايه..شافها عيونها غرقوا بالدموع..
"سامحيني معاش نقدر نتواصل معاك بكل"
بنبرة مرتعشه قالت..
/هو قالك؟
"ايه "
صابرين بنبرة باكيه..
/وتبيعوا اختكم الصغيره ع خاطر راجل!
"صابرين"
قاطعتها وقالت...
/"فضلتك ع مصلحتي في يوم من الايام سيبت كل شي ع خاطرك...عمرك ماهنتي عليا لاانتي ولاهديكا التانيه..لكن تعرفي كيف..معاش ينفع الكلام مهما قلت خلاص"
وسكرت عليها ونزلت التليفون وعيونها لوطا وهي تبكي بألم وبصمت..
هو غير عيونه للطريق..وكان حاس بصدره ضايق..
قامت عيونها المدمعه فيه وقالت..
/ارتحت توا..
هو ماباش يشوفلها عيونه فالطريق وبس..
اما هي نزلت عيونها تاني وانهارت بالبكي..
🍃🍃🍃🍃🍃
"اني اللي يدير حاجه من وراي ويخوني حكم ع روحه بالموت تمت خلاص"
هدا مختار واقف يكلم في واحد من اصحاب القوة في البلاد..
:اللي تبيه حني حاضرين نفدوه طول..
مختار:الخيانه عقابها واحد..ومش هو وبس..هو وخوته مانبيش راجل منهم يقعد ع ظهر الارض..
:تم..
🍃ويوصل رضا بالسيارة ويخش للعماره..
درسها في الباركيه..وفتح الباب لصابرين..
نزلت...شافت واحد طويل عريض منظره مرعب ماشي بإتجاه باب العمارة..
قعدت تمشي وهي تشوفله بريبه لين طلع..
بعدين خشت للعمارة..
ورضا بعد ماسكر السيارة..مشي لحقها..
🍃كان مختار مقعمز ورا مكتبه وهو شاد كرة افراغ التوتر يسكر في يده عليهاويفتح..
ع خشة صابرين دقت الباب..
شبحلها..مشت وقفت قدام المكتب...حطت الملف قدامه وقالت..
/الامور مشت تمام..وفي وسط الملف في فلاش لازم تشوفه..
مختار:ممتاز..ماطلب منك شي؟
هي قالت بعد مابلعت ريقها..
/لا نهائي..
مختار خدي الملف وقعد يشوف فيه وهو يقول..
/ولايقدر..
ع خشة رضا سمعه يقول..
مختار:مايقدر حد يقرب حاجه تخص مختار الواعر..
عقد حواجبه بإمتعاض وهو يشوفله..
اما صابرين كانت تتفكر في كلام نجاه ورجعوا عيونها دمعوا..
سكر الملف وقال..
/خلاص بري ارتاحي..
هي هزت راسها ومشت فاتت من جنب رضا اللي لاحظ بطرف عينه دموعها يطيحوا من عيونها...
مختار شبحله وقال..
/سكر الباب..
ورضا فورا نفد امره...
🍃وفوق في دار صابرين..
لوحت شطنتها ع السرير وهي تقول بحقد وغضب..
/تو نوريكم..انتم الزوز..والله لما نبيعكم زي مابعتوني..تو تشوفوا..
🍃🍃🍃🍃🍃
في كوجينة حوش الواعر..
كانت اريج تنشف في الارضيه متاعها..
ع خشو سميرة وهي تقول..
/يعطيك الصحه..
اريج بإبتسامه؛سلمك..
وقفت قدامها وقالت..
/شن جوك شن دايره في الخدمه
اريج:الحمد لله ماشيه..
سميره:القرايه بتبدا خلاص..
اريج؛ايه الاسبوع الجاي..
سميرة:موفقه يارب..
اريج بإبتسامه؛تسلمي..
سميرة:اخر عام ولا..
اريج هزت راسها وقالت..
/ايه..
تنهدت سميره وقالت..
/امم..حطت يدها في نصها وقالت..شن بنقولك..شافت لأريج وضحكت..
واريج ضحكت معاها لكن ارتباكا..
سميره؛اني نوعي لبازة..ديما نلبز ع الناس اللي نحبهم..بالذات خوي الصغير..اخر تلبيزة معاه موضوع الخطوبه هدا..هو كان يدوي عليك واني فهمته يدوي ع اختك..ع العموم..انتي شن رايك..مع امك واختك؟..
اريج وهي مبتسمه بضيق واحراج..
/مش قصة معاهم ولاضدهم..لكن اني توا تفكيري مشوش ومش قادرة ناخد قرار..ماليش هلبه مطلقه..والحق اني مانبيش نفتح موضوع الزواج لبعد مانتخرج..
سميره هزت راسها وقالت..
/امم..باهي انتي قاعده تحبي طليقك؟
اريج حست بشعور مؤلم بعد ماسمعت سؤالها بعدين قالت..
/كان نبيه مانطلبش الطلاق..اني قصدي من كلامي معاش نبي نشغل نفسي بشي بعيد عن قرايتي..
ابتسمت سميره وقالت..
/كلام سليم..كملي وتخرجي وبعدين يصير خير وفي النهاية كل شي قسمة ونصيب..
اريج؛صح..ان شاء الله ماحرجتيش بس..
ضحكت وقالت..
/لا علاش بنحرج بنتي عادي..هي مالا نخليك تكملي تنشيف..ربي يعاونك..
اريج بإبتسامه:تسلمي يارب..
ومشت طلعت سميرة من الكوجينه...
وهي بعد ماطلعت..زفرت براحه..وولت تكمل في باقي شغلها...
🍃وربع ساعه تانيه..
وروحوا سميره ونبيله..وبعدين مطيره واميمه...
🍃خشوا لجنان حوش علي واميمه تقول..
/قاعده مليانه مني ياعمتي حسيتك انتي اللي قلتي تعالي مش هي..
مطيره:لاوالله يابنتي هي وفردوس شاهده..غير هي هكي تعرفيها لما حد تحبه يوجعها ماتفوتلاش نسيتي لما ضربها حسين شن دارت فيه؟..
اميمه بضيق..
/اصلا مفروض مانلومهاش..
مطيره؛سيورها تصفي بيناتكم انتي بالذات قيمتك عندها كبيره ماتفرطش فيك..
سكتت اميمه وماعلقتش لأنه حال طوبى معاها مايقولش انها حتسامحها نهائي توا ولابعد سنين..
خشوا للحوش واميمه قالت..
/خل نمشي نشوف.بوي..
ومطيره مشت كملت طريقها للدار...
🍃🍃🍃🍃🍃
تاني يوم..
الجمعه...
21 سبتمبر...سنة 2018
الساعه 1:00ظهرا..
في حوش الصيد..
نجاح؛قالت من الاول بيطول يام..
نجمه بضيق؛قلبي مش مستريح يانجاح..
نجاح؛انتي اللي تحبي التخميم يام بنتك مرتاحه وتشكر في راجلها وناسها مفروض تفرحيلها..
نجمه تنهدت وقالت..
/إن شاء الله هكي يابنتي ان شاء الله..باهي انتي شني دايرة مع متاعينك؟
نجاح:الحمد لله..والله ناس مافي منهم كان تشوفي كيف يراعوا فيا ع خاطر حامل لين نتحشم منهم..
ابتسمت وقالت:دوم ان شاء الله..
نجاح؛إن شاء الله...وين كناينك مش منهم حد؟
نجمه: اني قلتلهم ماتجونيش ع خاطر انتي جايه خليهم يرتاحوا..
نجاح:من اكثر من يقعد عندك؟
نجمه:سمورة الله يخلف عليها..ضحكت وقالت..لكن تعرفي خوك زي اللي نادم اللي خدي عليها..
نجاح بفضول:كيف عرفتي؟
نجمه بضحكه؛نشوف فيه كيف يفرفش عليها ويدور في سبله بش يدوي معاها لكن هي مش طايب خاطرها تعامل فيه باهي قدامي بس..
نجاح بضحكه:اما الرجاله!..
نجمه؛مالا عملة خو هديكا المنجوهه..
نجاح بكره:مش عارفه شن هالبشر الله يصبر هديكا المسكينه على مابلاها..
نجمه بحسرة:ايه والله ماتستاهل مسكينه..لكن حكتلي رقية عليها امس قالت شافتها طالعه لحوش اختها غرفه جوها عادي جدا ولاكأنه صايرة حاجه..
ابتسمت نجاح وقالت؛امس كانوا دايرين لمه في حوشهم انتشرت صورها ع الفيس...
نجمه؛ صحة ليهم...تعرفي لو منها نقعد ع قلوبهم مانخليهم يتهنوا..
نجاح؛ان شاء الله مايتهنوا...
🍃🍃🍃🍃🍃
الساعه 5:30عصرا...
في شارع القهوة اللي كان مليان دوشه..هدرزة وحركة واصوات اغاني وسيارات وأصوات تانيه مختلفه..
كانت حنان اخت محمود ماشيه مع وحده من بنات الجيران للعطريه..
حنان:والله عييوا وهما يشكروا فيه حني نجربوا مش خاسرين شي..كان مانفعش مايضرش..
:ان شاء الله مايضرش..
ووصلوا في العطريه وخشولها...
🍃ومن قدام المطحن كان واقف محمود وهو يراقب فيها..
وقدامه كانوا مقعمزين ع كراسي بلاستك بيض..
المهدي وربيع..ومختار..يهدرزوا..
مختار:اي شي تبيه اني حاضر نخدمك بعيوني..
ربيع بإبتسامه؛بارك الله فيك حبيبي..
مختار:مش بجميلي حني خوت دنيا وولاد شارع واحد..
ابتسم المهدي ابتسامه خفيفه..
ربيع؛والله مانشوف فيكم الاهكي حتى اني..
فات من حداهم ولد خديجه رفع يده وسلم..
ومختار يتبع فيه بعيونه وهو يرد في السلام مع المهدي وربيع..
بعدين غير عيونه للمهدي لقاه يشوفله..
ابتسم مختار ونزل عيونه لفنجان القهوة خداه ورشف منهم..
🍃ومحمود عيونه ع العطريه..
طلعوا اخته وصاحبتها بعد ماشروا حاجتهم..
وهما ماشيات فاتت من حداهم "اللاند كروزر" السودا..
شافتها حنان وقعدت معاها بنظرها لين درست قدام حوش المهدي..ومحمود يشوفلها بشي من اللهفه..
ربيع بضحكه؛واخيرا روح..
المهدي قعد يشوف للسيارة وهو مبتسم..
ومختار حط فنجانه والتفت وشبح وين مايشوفوا...
فتح عبد القيوم باب السيارة ونزل وسكرها وهو يمرر في نظره من ورا النظارات ع الشارع..بعدين مشي للباب الخلفي فتحه بش يطلع الشنطه..
المهدي؛قاعد جوه معكر..
ربيع؛صح..
والمختار يشوف فيه وهو مضيق عيونه..
☘حنان بإعجاب شديد..
/ماريتش زيه في حياتي..
:شخصيته تقتل..لكن اول مره نشوفه لابس لون فاتح..
كان لابس قميص ابيض وسروال جينز بني فاتح...
"تارقي"
سكر باب السيارة وابتسم وهو يشوف لربيع اللي كان جايه..
مشاله ولما وصل فيه حضنوا بعض..
المهدي ناض حتى هو وقدملهم..
وعيون محمود ع اخته..
☘حنان؛قريب كل ليله عندنا..
:ايه حقه علاش..
حنان؛شن علاش عادي..
:انتم تعزموا فيه ولاهو يجي بروحه..
حنان بإبتسامه؛لاهو يجي بروحه..
وقعدت بعيونها مع خوها اللي مشاله وسلم عليه..
🍃محمود بإبتسامه؛هدا وين نور الشارع..
ابتسم وقال:منور بأصحابه يامحمود..
خبط ربيع كتفه وقاله؛مرة تانيه رجلي ع رجلك.
عبد القيوم؛انا هارب من وجهك..
ضحكوا..
بعدين قال بضحكه..
/لاحاضر ان شاء الله مرة تانيه مع بعضنا..
المهدي؛المهم امورك تمام..
عبد القيوم هز راسه وهو مبتسم مجامله..
فجأه..
شافوا لمحمود لما صاح يقول..
"هيه"..
بعدين قص الطريق ومشي لأخته..
المهدي قعد يشوفله بإمتعاض..
اما عبد القيوم غير نظره عنه وقال..
/بنعدي للشقه توا نتلاقوا.بعدين..
ربيع؛ان شاء الله..
ولف ومشي عبد القيوم بإتجاه الحوش..
وعيون محمود معاه وهو واقف ع اخته بعدين قاللها..
/خلاص بري روحي.فيسع..
حنان؛حاضر..
وخدت يد صاحبتها ومشت بسرعه..
وهو مشي ولى للمطحن..
وهو خاش للمطحن فات من جنب ولاد شارعه اللي كيف.قعمزوا...
مختار:الشاب هدا عنده شعبيه هني..
المهدي:راجل اصلي..
ربيع؛عز من عرفت..
مختار هز راسه بعدين قال..
/لكن يبان وضعه المادي مرتاح شن مخليه هني وعلاش ساكن بالإيجار؟
المهدي:مؤقت لين يتزوج ويستقر..
مختار:بيتزوج هني هو؟
المهدي:ايه هكي ناوي..
مختار هز راسه ورجع خدي الفنجان وجي بيشرب منه لقاه فاضي..ضحك وقال..
/زيدونا ياغالي ..
المهدي بإبتسامه:حاضر..
ونادى واحد من واحد من عمال القهوة..
ومختار حط الفنجان ع الطاوله قدامه بعدين غير نظره لمطحن اهله وضيق عيونه وقعد يفكر....
#الحرب_الباردة
#طوبى
....يتبع.....
