#طوبى "جنة طوبى"
#جمان_فريد
#الجزء_107"كانون الأول/شتي يادني"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 تشيب الاجساد عمرا لكن الحب لا يشيب ابدا🍃
______________________________________
في صباح تاني يوم..
طلعت فهيمه من دارها بعد ماقرت ماتيسر من القرآن..
تسمع في اصوات الضرب اللي جايه من بعيد بدون ماتبدي اي ردة فعل..تعودت زي ماالناس كلها تعودت..
☘الحرب ليها تمانيه شهور لتوا كل مايدور فيها ولى ضمن الروتين اليومي...
سكان العاصمه اللي قاعدين في مناطق قريبه بعض الشي من الاشتباكات كانوا يوميا يسمعوا في ضرب المدفعيه من لما تطلع لعند ماطيح...
وفي من تعود ع صوت الهاوزر..وفي من بدي يسمع في صوت صاروخ الجراد ويتسائل زعما طالع من عندنا ولاجاينا!!..
🍃التعود في حالات زي هادي يولد شعور البلادة عند الانسان يخليه يتكيف مع هالوضع ومايفكرش يغيره🍃
وصلت فهيمه في الكوجينه لقت ولدها معين واقف ع الرخامه وقدامه الخلاط صاب فيه حليب وضايفله موز ولوز خزايني وتمر..غطاه وشغله..
مشتله وضرباته ضربه خفيفه ع ظهره..
التفت شافها برفعة حواجب وقال..
/يام..صباح الخير..طفى الخلاط..
وهي بإبتسامه قالت..
/صباح النور..امتى روحت..
معين:امس مع الساعه 2..حط يده في نصه وعقد حواجبه وهو يقول..من بعد ماكلمتيني عقلي قعد يرفع ويجيب غير مابيتش نقلق نومك كانهدا من لما روحت نوضتك..
فهيمه؛عارف روحك كان درتها بتاكل كف..
ضحك بعدين قال..
/ايه شن في ان شاء الله خير!
فهيمه:قعمز قعمز..
قربوا للطاوله وقعمزوا حواليها مقابلين بعض..وبدت فهيمه تحكي لولدها..
هو بعد سمعها قال..
/وين تعرفها وحدة زي هادي!.
فهيمه؛قالت بنت جيرانهم..
رفع حاجبه وقال:قولي اسمه مرة تانيه..
فهيمه؛محمود مبارك ******..
هز راسه وقال..
/تمام..قوليلها كان فيها كيف تبعت صورته
فهيمه بإستغراب..
/ضروري!؟
معين:بش نوصلوا فيه اليوم...
هزت راسها وقالت..
/باهي تو نقوللها..ابتسمت وهي تقول.. تعرف البنت هادي ديما تثبتلي ان نظرتي فيها صح قدعه وصاحبة مواقف..ضحكت وكملت تقول..ضحكتني لما قالت وهي متحشمه سامحيني ياخالتي االلي تكلمت معاك في موضوع زي هدا..نجيها ياربي..
ناض معين وهو يشوف لأمه بإبتسامه امتعاض..
/تشربي فروبي!؟
بدلت ضحكتها بملامح الامتعاض وهي تقول..
/نشرب فروبي..
مشي للخلاط وهو شاد ضحكته..
وامه تقول..
/توا نشربوا الفروبي وبعدين ان شاء الله نشربوا الروزاطه..
شغل الخلاط وهي تشوفله بطرف عينها..
🍃🍃🍃🍃🍃
الساعه 10:00صباحا..
في شقة المهدي اللي مأجرها عبد القيوم..
تحديدا في وسطها كانوا المهدي ومحمد مقعمزين يتكلموا عن قصة الافتراء اللي دبرتها نجاة...
محمد بضيق:كانت واجعتني حناي الفترة هديكا..عمي نضال سافر ع اساس بيهاجر معاش بيولي خفت لو عرفت باللي صار تاخدنا وتسيبهم حتى انت..
المهدي:في امور ماينفعش السكات عليها بالذات الشي اللي يطق في اخلاقك وتربيتك انت هكي خليتهم يقولوا ع امك الله يرحمها ماعرفتش تربي..
التزم محمد الصمت وهو مضايق ع الآخر..
المهدي بعصبيه:غير تروح بنت عمك بس..
شاف محمد لبوه شويه بعدين قال بغل..
/عرفتوه من هو الكلب اللي تكلم فيه!؟
هز راسه وقال:تو نعرفه..لولا حالة الوفاة كنت عطيت بوها علم بكل شي..لكن في الاخير حيعرف حاجه زي هادي ماتندسش عليه هو بالذات..
محمد بضيق:خسارة والله خسارة..
المهدي:هدا اللي يجيب صغار ويطلقهم طولهم طول عصاتهم..
🍃وهلبه هكي توا زي ماقال المهدي يجيب ويطلق للشارع يربي..مايندروش عليهم وين يمشوا ومن يصاحبوا وشن يتابعوا.. شن يتابعوا..هادي اهم حاجه في وقتنا الحالي لأن مواقع التواصل اكبر معول لهدم الاخلاق والتربيه الحسنة..
🍃🍃🍃🍃🍃
واقف وفي يده ورقه يشوف فيها ويسمع في زميله وهو يقول..
/النقص هدا لينا فترة نرصدوا فيه لكن ماعرفناش وين يمشي ومن ياخد فيه..
نزل عبد القيوم الورقه وقال..
/في حد في بالي ليا فترة شاك فيه مانقدرش نقول اسمه لين نتأكد من شكوكي ويكون في يدي ادله قويه عليه..انا نبيك توا تسكت وماتلمح بشي لأي حد مهما كان قريب عليك..
:حاضر..وكان تبي مساعده قولي..
هز عبد القيوم راسه وقال..
/خلاص توكل شوف شغلك..
مشي زميله..وهو خدي الورقه طواها وحطها في الجيب الداخلي للبالطو متاعه بعدين توجه لمكتبه..
🍃🍃🍃🍃🍃
بعد نهاية الدوام الدراسي روحوا مروة وتاله للحوش..
امهم اليوم ماعندهاش خدمه دللتهم بوجبة غدي فيها اكثر من صنف..
🌸مروة:ياربي! جعاانه موت..
فايزة؛بعيد السو..ايه قوليلي شن صار فيها البنت اللي تقرا معاك..
حاولت مرة تخفي ارتباكها وهي تقول..
/شي قلتلها كلمنا ناس تو يحلوا الموضوع..
فايزة؛اخر مرة دخلي روحك في هالمعامع هادي مانبوش وجع راس سلم بنتي..
مروة؛حاضر ياقلبي..غير سقدينا بالغدي ميته جو..
وتخش عليهم تاله وهي تقول..
/كان نقوللكم شن صار..
فايزة:شني!؟
تاله:امس في حوش جدي محمد شنيبه عمي نضال حصل ع راما تكلم في واحد..
انصدمت مروة..
تاله:قالت سدرة جايه بتطلع معاه..
فايزة بصدمه:غبارة سودا ع راسها!
تاله:وامها حطتها في راس محمد ولد عمي المهدي..
فايزة بإزدراء..
/هالجيفه حاطه راسها براس عيشه حية و ميته..
تاله:المهم صارت عركه كبيره وسدرة فضحت راما وخلت عمها يضربها لين جت سايخه..
فايزة:لاعاد كان وصلت بيها لهني تستاهل الق.تل..
مروة بضيق:باهي خلاص فكونا من الكلام عليهم..تبي نعاونك في حاجه ماما!؟
فايزة:ديري سلاطه..
مروة:حاضر..ومشت للثلاجه وهي تفكر بقلق في راما.
وتاله تشوفلها بعدم رضا بعدين مشت طلعت من الكوجينه..
🍃وراما في هالوقت كانت تفكر تاخد من عمتها نجاح تليفونها بش تكلم مروة وتعرف شن صار معاها..
بعد تردد حسمت امرها ومشت كلمتها..
☘نجاح؛تلقيه ع زيانه دار امي..
راما؛مش مطوله بيه..ومشت بسرعه لدار النوم وعمتها نجاح معاها بنظراتها الحزينه..
خدت راما التليفون ومشت لدار عماتها بعد ماسكرتها عليها بدت تكتب في رساله لمروة..بعتتها واستنت لحظات بعدين اتصلت..
نادى لين فصل ماردتش..تأففت وهي تقول..
/ماشافتش الرساله..فجأه يجيها اتصال من مروة طول فتحت الخط وردت.
/ايوه مروة..
"راما..علاش تكلمي فيا من رقم تاني!؟
بدت تبكي وهي تقول..
/صارت معاي مصيبه امس...
☘وحكت لمروة اللي صار بالتفصيل وهي تبكي"
راما ببكي:وجعني محمد هلبه ع اللي درته فيه قعد ساكت والله كارهة روحي يامروة وخايفه ربي يزيدني بعد اللي صار امس..
"اسمعي مادام محمد سكت معناها مايبيكيش تنضري..المهم توا عندك صورة لهداكا الحقير"
رشفت راما وهي تقول..
/ايه..عندي وحده في الايباد..
"تمام توا توا ابعتيهالي "
راما بدون تفكير:باهي تو نسكر وندبر كيف نبعتهالك..
"تمام نراجي فيك"..
نهت راما المكالمه وطلعت ردت التليفون وين ماكان..بعدين مشت طلعت من الحوش وبطريقها للشقه..
🍃وحناها مغليه فهالوقت راكبه لشقة ولدها الجالي..
وصلت في الباب ودقت عليه..
لحظات وفتحت نجاه الباب..
/عمتي..تفضلي..
خشت مغليه بدون ماتقول كلمه..خلت نجاة تستغرب وتخاف..
سكرت الباب ولحقتها لين خشوا للصاله..
وقفت مغليه وقالت..
/بنسألك ع حاجه ونبيك تجاوبى من غير كذب..
نجاه بإستغراب وخوف.
/حاجة شني!؟
مغليه:حق انتي اللي خليتي تكذب ع ولد عمها وتشهد زور..
بلعت ريقها وقالت متصنعه الصدمه..
/كيف!؟
مغليه:بنتك هكي قالت..قالت امي هددتني بالقطوسه متاعي يانقول محمد دارت حاجات مش كويسه لراما ياتقتلي القطوسه..
☘الكلام هدا سمعه الجالي وهو طالع من الدار النوم..مشي وقف في مدخل الصاله وهو يشوف لنجاه بعدم استيعاب..
هي لما شافاته كان هيغمى عليها من الخوف ومع هذا تماسكت بقوة وبدت بالعرض الدرامي متاعها..
/معقوله ياعمتي معقوله!! اني ندير هكي!! نهاري نتبلى ع حد وفوقها نهدد بنتي ونخليها تشهد زور!! سمعت ياجالي سمعت!!
التفتت امه شافاته وقالت..
/قاعد انت!؟
الجالي:شن الدوة اللي تقولي فيها هادي يام!!؟ من قالهالك اصلا!؟
مغليه؛اللي قالها قالها..شافت لنجاه وقالت..معناها الدوة هادي مافيش منها!؟
بإنفعال مصطنع:والله ماصارت منها حاجه والله..حسبي الله ونعم الوكيل حسبي الله ونعم الوكيل..والله زبطتها والله عرفتها..هديكا ناويه طلعني من هني خلت صغاري يحبوها وكرهتهم فيا لدرجة خلت بنتي تقول عليا هكي.
خدمتهالي صح بش طيرني وكله..كله من تدبير شيطانة الرجيم طوبى..
الجالي:تو شن دخل طوبى في الدوة الفاضيه هادي المراة في حالها لاعاد لينا علاقه بيها ولاليها علاقة بينا..
نجاة؛هداكا عندك انت بس حبيبي انت ماتعرفهاش هادي اصلا من اللي جاب الحقيرة سميرة!
رفعت مغليه حاجبها وهي تفكر في كلام نجاه وبدت تقتنع بيه..
الجالي:مادخليش المواضيع في بعض يانجاة..
مغليه:مرتك عندها حق..اني توا فهمت كل شي خلاص..
ومشت طول طلعت من الشقه..
الجالي بعد ماسمع الباب تسكر قال..
/ياويلك يطلع اللي قالاته امي صح..
نجاة برفعة حاجب:انت خيرك دافع هكي عن الحقيرة اللي دارت فيك العبيتر..
الجالي:ماتحاوليش تغيري الموضوع..اني قتلك يانجاة لو عرفت ان انقال عليك صح صدقيني وقتها اني اللي نطيرك..
ومشي طلع لدار النوم..
مسحت نجاة بيدها ع شعرها للخلف بعصبيه بعدين قالت بغضب..
/جوري..جوري..
🍃🍃🍃🍃🍃🍃
ومع العصر..
والاجواء الشتويه بإمتياز وصوت المطر اللي تصب..
كانوا نساوين عيلة الواعر ملتمات في صالة حوش طوبى.
ومعاهم سميرة وفايزة وبناتها..
والعاله مزينه لمتهم وصفيه اللي دير فيها المرة هادي..
☘سميرة:والله لتوا قلبي مغموم وقاعده نرعش مع بعضي شن هالناس هادي!؟ كيف عشتوا معاهم يااميمه وطوبى!؟
ابتسموا الزوز بتهكم وسدرة تشوف لطوبى بحزن..
سميرة:اني ماقهرني في هدا كله كان زوز..محمد ولد المهدي ياروحي..هالوليد قداش يتحمل في روحه..
سدرة بحزن؛زي امه الله يرحمها..
كلهم باصوات متقطعه..
"الله يرحمها"
سميرة بحزن:ونضال مسكين ع قد مايساير فيها امه العقرب مانفع فيها دعت عليه دعوة امس ع خاطر ضرب بنت الكلبه هديكا..دعوة رعشت افادي..قالتله الله يشل يدك اللي ضربتها بيها..
فز قلب اريج..الدعوة قبضاته وقسماته نصين من الوجع عليه..
طوبى بألم:المخلوقه هادي مش عارفه شن تركيبتها معقوله تدعي عليه دعوة زي هادي لا وحددتها تحديد تقول قاصدتها..
سميرة؛راهو مدايرة الفرق بين صغارها لاحظتها عطيها الجالي وخديجه والباقي تحصيل حاصل..
اريج بحمقه:ماهم نسختها المريضه هادي..
كلهم شافولها ولاحظوا لمعة الدموع في عيونها واكثرهم سميرة..
صفيه:ع قد ماصار معاها ماتنهدش بكل كان ماتزيد في الضلال..
سميرة بكره وازدراء
/هي وبنتها الكبيره اعوذ بالله منهم..
🍃🍃🍃🍃🍃
"هكي ديري في امك هكي!! تعرفي شن بيديروا فيا توا!!؟ تعرفي..بيلزوني ونقعد بروحي في الشارع ونموت زي ماتت خالتك صابرين"
جوري وهي تسمع في لوم امها العنيف ليها كانت ترجف من الخوف..لكن في لحظه جمدت لما سمعت اخر جمله قالتلها.
نجاة بيكي..
/ايه خالتك صابرين ماتت قتلوها مجرمين..واني بيصير فيا زيها توا..
جوري بنبرة مرتجفه..
/خويله ماتت!!؟
وبدين نفسها يضيق..نجاة لما شافت حالتها خافت..
شدتها وهي تقول بخوف..
/جوري خيرك جوري! خيرك ياماما!!؟
رفعتها في حضنها للروشن وفتحاته بش تاخد نفس..
جوري وهي تشوف للمطر كيف تصب بدت تبكي بالعبرة وتشهق..
ضمتها نجاه وهي تقول ببكي..
/تخيلي حتى اني نموت زيها لو لزوني تخيلي..
البنت وهي تسمع فيها كانت تتفكر في خالتها صابرين ذكرياتها معاها كلها حضرت..ماقدرش عقلها الصغير يتخيل كيف ماتت مقتوله اكثر انسانه حبتها في حياتها اكثر حتى من امها..
امها اللي قاعده تستغل في مشاعرها بش تحمي نفسها وتوصل للي تبيه...
🍃🍃🍃🍃🍃
كملت دوامها في المدرسه بعد ماعطت حصة من كورس الخط..
لفت الشال كويس حوالين رقبها وفتحت السحابه حطت فوق راسها وهي طالعه..
وتقابلها صديقتها اللي ليها شهور مقاطعتها..
ميار:قاعد قلبك اسود!؟
سلافه:ليش انا قاطعاتك لإني بكرهك!؟
ميار بضيق:خلينا نحكوا شويه سوفي بالله عليك..
تنهدت بعدين قالت..
/طيب تعالي..
وولت خشت للمبنى وميار لحقتها..
*******
سلافه؛قلتلك من قبل نحنا مو خرج نعلق مع ناس مثل بنت عمتك عايشين هون ونحنا عم نمشي جنب الحيط ونقول يارب السترة..
ميار:عارفه والله عارفه ووالله ياما درنا فيها سوا امها ولااني ولامعز..معز فكر يقتلها حتى القتل..
سلافه:لا يقتلها ولايعملها شي يخليه بحاله بس ولاعاد يقرب ع لبانه..
ميار بضحكه:حكالي ع الموقف اللي صار بينه وبين عبد القيوم..
نزلت سلافه عيونها وهي تضحك..
ميار:شكله في هلبه تطورات صارت في فترة المقاطعه..
سلافه بضحكه:لاوالله مافي شي لساتنا مثل مانحنا بحبوا لحالي وهو مو دريان بشي..
ميار:بالقصد امس علقت بهديكا الصورة..
سلافه بإبتسامه..
/بتصدقي..فرحتيني كثير..
ميار بضحكه:واضح من ردك..باهي قوليلي شن درتوا مع بعض الفترة اللي فاتت..
تنهدت وقالت..
/شغلات كتير الها علاقه بنشاطات الجمعيه وكمان خلاني اطوع بمدرسه صارت مركز ايواء للنازحين..سكتت شويه بعدين بدت ع وجهها ملامح البكاء وقالت..طوبى..
عقدت ميار حواجبها وقالت .
/طوبى!! الاسم االلي ديما يكتب فيه!؟
نزلوا دموعها وقالت..
/ايه..طلعت حبيبته..
بدت ع وجه ميار ملامح الوجع..
سلافه:وهو مثل حالاتي بيحب لحاله..
ميار:قصدك شفتيها!؟
هزت راسها وقالت..
/صاحبة المدرسه اللي حكتيلك عنا
ميار:وشن لونها وكم عمرها!؟
سلافه؛حلوة وعيونها شهل وقصتا قصة..
ميار بفضول؛احكيلي احكي...
🍃🍃🍃🍃🍃
"احكيلي بنتي وماتخافي من شي"
جوري ودموعها في عيونها..
/اني كذبت ع ماما..
عقد حواجبه بإستغراب..
جوري:مش هي اللي قالتلي ديري هكي راما..قالتلي نقتل قطوستك كان طلعتيني كذابه..
المهدي:سدرة قالتلي امك هي اللي خلاتك ديري هكي..
جوري ودموعها ينزلوا..
/راما هكي قالتلي نقول قالتلي امك مسافره مايقدروا يديرولها شي.
مااقتنعش المهدي بأي شي من اللي قالاته جوري وكان عارف السبب..ماباش يضغط عليها ويزيد خوفها الواضح في عيونها..
مسح ع شعرها وقال..
/باهي حبيبتي اني المرة هادي بنفوتها وخليها اخر مرة تكذبي بعدين نعاقبك..
جوري بنظرات حزن:لالاوالله اخر مرة..
طبس باس راسها بعدين قال..
/بري عمو بري..
بسرعه مشت خشت لدار المعيشة وهو بعيونه معاها بعدين تنهد ومشي طلع من الحوش...
🍃🍃🍃🍃🍃
"لاياحنه خداها الشكشوكه زي ماخدي الدكتور وسيمه القطوسه"
ضحكوا..
طوبى بمشاغبه..
/عقبال مايجيك صاحب النصيب وياخدك حتى انتي..
سدرة بتعجب..
/ريتوا الرتيله ريتوا تبي تفتكي مني..
ضحكوا وهاديه قالت..
/تبي تطمن عليك..وكان ربي ماكذبني ياسدرة جايك جايك..
صاحوا وفايزة قالت..
/لاخلاص تمت ياسدرة ..
طوبى بضحكه:هيا خل نبدوا نحطوا برنامج العرس من توا..
قعدوا يضحكوا وسدرة قالت..
/عرس شني وجارنا اليوم بس سكر اسبوع..
طوبى؛الله يرحمه..معناها موافقه من ناحية المبدأ..والعرس نديروه في حوش مختار مش مشكله..
شدت سدرة ذقنها وقالت بتعجب..
/اشي!!
واصوات ضحكاتهم عبت الصاله..
اميمه:حطاتك في راسها استسلمي..
سميرة بإبتسامه؛ارفعيها الراية البيضا سادك..
وتنهال ع سدرة النظرات الجانبيه من كل حدب وصوب..
ناضت وهي تقول..
/اقعدوا فيها..
وطوبى في يدها تليفونها حطت ع صورة لممثل تركي ووجهتها لجنه وهي تقول..
/من هو هدا جنونه..
شافاته جنه وقالت..
"أمو"..عمو..
فايزة بضحكه؛ديما نقول فيها حتى اني..
جت سدرة لطوبى طبست عليها وقعدت تريش وتنكش في شعرها وهي ميته بالضحك..واللي حواليهم يضحكوا حتى من جنة...
🍃🍃🍃🍃🍃
(غايتي من زواجك من المهدي اني نخلص ضميري ونرتاح من الاحساس بالذنب وفي نفس الوقت فكرت في ان زواجكم فيه مصلحه لجنه..البنت بعدين لما تكبر اكيد حتمشي لحوش جدها ومش حنقدر نمنعها وبش نطمن عليها سعيت لزواجك من المهدي بش تقعد تحت عيونك مش حنأمن حد ع جنه اكثر منك)
وقفت كتابه وهي تفكر وتتسائل.
كيف حيصير الشي هدا وامتى!؟ هي توا ولت جازمه انه حيصير حتما ماتبيش تحط اي احتمالات تانيه..
رفعت عيونها فوق وغمضتهم وهي تقول..
"اللهم اني في تدبيرك مايغني عن الحيل..اني لاأفتقر وانت ربي ولاأهلك وانت رجائي"
🍃🍃🍃🍃🍃
"قالت انها انخطبت"
لبانه بتعجب؛انخطبت!؟
سلافه وهي تاكل في الشيبس..
/امم..زلمة زنقيل وعندوا مركز بالبلد..
لبانه:وافقت عليه برغبتها!؟
سلافه:ميار قالت انها طارت من الفرح..
لبانه بإزدراء:عنجد هي وحده مريضه..وكأنها كان بدا معز مايرتبط بغيرها وهي تروح تتزوج اللي بدا ياه..
سلافه؛تنباع بالعزا...هلأ المهم انه معز بدوا يبعت اهله..
انصدمت لبانه..
سلافه؛امها واخواتها انبسطوا كثير لما عرفوا انه بيحبك وبدوا اياكي..
تبدلت ملامح وجهها للضيق وقالت..
/مابعرف ماتحمست ولافرحت لساتني خايفه...
سلافه:خليهون يجوا بالأول وبعدين بنشوف..
تنهدت وقالت..
/تركيني فكر..
سلافه:حقك حبيبتي خدي راحتك بالتفكير..
ورفعت تليفونها وخشت ع الفيس ومازال تاكل في الشيبس
خشت لقروب شعر شعبي وقعدت دور في ابيات معينه..
قرت اشعار اغلبهم كانت كلماتها معقده بالنسبة ليها لين وصلت في شعر كلماته مفهومه ومعانيها زي ماتبي بالزبط..
نسختها ونشرتها ع صفحتها..
"ندعي الله ياقاري القصيده..
يدوم الله ياغالي هنااك..
اتعيش اسنين مطمانه سعيده..
فيها الفرح مزروع وزهاك..
وماتلقاك في الدنيااا مكيده..
وعند الناس ماينقص غلاك..
وليك العز مولاناا ايزيده..
وكل الخير ينزل في بدااك..
وليك الله يعطي اللي اتريده..
ويلطف بيك ويحقق مناك..
اترافق نااس رفقتهم مفيده..
معاهم دوم تبعد عن خطاك..
وماتلاقيك في الدنياا شديده..
ويبقى الخير متراافق معاك..
بجااه الله مااتطوولك صهيده..
وديما الله يحقق مبتغاك..
ان جاك كدر مولانا ايحيده..
ورب الكوون مايخيب رجااك..
وتبقى هموم هالدنياا بعيده..
عن مدعااك مااتلحق وراك..
اتعيش اسنين ياغالي مجيده..
ويبقى الفخر متكدس احدااك.."
وكان التفاعل ع المنشور في صفحتها قوي واقاربها واصحابها السوريين ناشبوها في التعليقات..
"ايوه ياليبي"
"شوفي مافي سوفي"
"ليبي ياليبي"
وهي تقرا وتضحك..
شافتها لبانه وقالت بإبتسامه..
/على شو عم بتضحكي!؟
سلافه بضحكه؛نشرت بوست فيه شعر ليبي كومنتات ولاد وبنات العيله مسخرة..
خشت لبانه ع الفيس وشافت المنشور والتعليقات بعدين قالت..
/ليش كلن فكروا انك بتحبي واحد ليبي!؟
سلافه تنهدت بحسرة وقالت..
/مشاعري عم تنشاف من بين الحروف وهو لساتو مو دريان بشي..
لبانه؛حكيتي لميار عن طوبى!؟
انخنقت لما سمعت اسمها وقالت..
/حكيت..وكان رأيها من رأيي مابتصلحلوا وقالتلي انها بتعرف كتير منيح تفكير الرجال هون مابيقبلوا يربتبطوا بمراة بظروفها..
لبانه:بس هيك صعب كتير..قلبه رح يضل معها..
سلافه؛بينسوا صدقيني بينسوا..
لبانه بضيق؛مابدي اياكي تنجرحي اكثر سلافه تأملي حالك ع الفاضي ويصدمك الامر الواقع بعدين..
تنهدت وهي شاده دموعها بقوة بعدين قالت..
/سكري ع السيرة خلص..وقربت لفراشها خشتله وتغطت..
ولبانه معاها بنظراتها الحزينه...
🍀🍀🍀🍀🍀
ويعدوا يومين...
🍃فهاليومين وصل معين في صاحب راما شدوه حبسوه وكلي نصيبه من الضرب والشتم وخدوا منه تليفونه وجبروه يسلمهم اي شي فيه صور لراما وهددوه لو صار وطلعت صورة ليها حيجيبوه وين مايكون ويديروا فيه العمايل وماتهددش بس بنفسه هددوه حتى بعيلته بش يزيد يخاف ومايفكرش حتى مجرد التفكير ينتقم منها..
وفعلا محمود خاف وتمنى لو ماعرفش اسماء اللي خلاته يعرف راما..
🍃راما لما وصلتها الاخبار من مروة صلت لربي حمد وشكر كانت تبكيله امتنان وفرح وهي ساجده بين ايديه سبحانه..
لكن قعد فيها الخوف من خوالها لو وصلوا شي لبوها..
🍃بوها اللي توا مقعمز في الخيمه مع بوه وخوته مجتمعين بولاد كعبار..
:ياحاج ادريس ماتجيش والله ماتجي مراة في العده تقعد في حوش فيه رجاله محرمين عليها..
واحد من ولا الصيد:حني في الفترة هادي مش خاشين الحوش بكل..
ادريس:واني نضمنلك الحاجه هادي ياولدي اني نبيها تقعد لين تبرد نار خالتك نجمه شويه المراة خايفه من طلعتها وتبكي ليل نهار..
محي الدين:تو انتم مشكلتكم في انها قاعده في حوش يخشوا ويطلعوا عليه رجاله محرمين عليها..باهي كان قعدت في حوش بروحها!؟
بوه وخوته شافوله بإستغراب..
واخ ابتسام قال؛كيف حوش بروحها!؟
محي الدين؛شقتي فاضيه تقدر تقعد فيها فترة العدة..
تفاجئوا بوه وخوته..
اما خوت ابتسام قعدوا يفكروا في كلامه..من الاساس هما مش ناويين يتحملوا مسؤولية صغار عبد الفتاح ولولا كلام الناس مافكروش ياخدوا اختهم حاليا..لكن اللي قاله محي توا خلاهم يفكروا لبعيد...
ناض واحد فيهم وهو يقول..
/عن اذنكم شويه..شافوا لخوته وقال..تعالوا..
مشي وخوته ناضوا وراه وقفوا بعيد شويه عنهم وقعدوا يتشاوروا...
الصيد:توا خلاص ماتبيش ترد بنت شنيبه..
محي بإزدراء:ماصدقت افتكيت منها..
خوه قاله:باهي وصغارك وين يقعدوا!؟
ع جية خوت ابتسام واحد فيهم سأل محي الدين نفس السؤال..
/انت عندك ولد عزري ماشاء الله مايجيش يقعد معاها..
محي الدين بإبتسامه..
/عندي مكان سكن تاني نقعدوا فيه الفترة هادي اني وياه..
شافوا خوت ابتسام لبعض بعدين كبيرهم قال..
/خلاص تقعد في امانتكم لين تكمل عدتها...
🍃الخبر لما وصل ابتسام اتفاجئت بشدة..بينما اللي حواليها سلفاتها والاقارب والناس اللي سمعت بدوا من توا يتوقعوا شن بيصير بعدين..
☘☘☘☘☘
"هاه شن جو"
هادي طوبى تسأل في حواء عن انطباعه ع الخاطب بعد مادارت معاه مقابله شرعيه..
حواء بإبتسامه:الحق ارتحتله صارحني بكل شي كان نقولك شن طلع داير؟!
طوبى بإبتسامه فضول..
/شني!؟
حواء؛مشي لطليقي وعيلته تكلم معاهم..
طوبى وهي متفاجئة..
/شن قاللهم وشن قالوله!؟
حواء:حسيت من ملامح وجهه لما تكلم عليهم انهم قالوله كلام ضايقه..حد اللي قالهولي عطيتهم علم بس..
طوبى:خطوة كويسه الحق..باهي انتي توا شني!؟
هزت راسها وهي مبتسمه قالت..
/ارتحت ع الآخر..
☘وقدام باب حوش علي الواعر..
كان الحاج علي واقف ع خاطب حواء ويقوله..
/مش تقول ماوراها حد رانا عيلتها وقاعدين وراها بتجينا وبنمشولها..
ضحك وقال:اكيد ياحاج هو هدا واحد من شروطها ماعنديش عليه اعتراض ونقولك مرة تانيه اطمن ع الآخر..
هز الحاج علي راسه وقال..
/إن شاء الله خير..إن شاء الله خير...
🍃وعيون نضال معاهم كان واقف يستنى في الراجل يجي بش يعرف منه شن صار..
وماهي الا لحظات وكان جاي ناحيته..
طلع نضال من القهوة وقدمله لين وصلوا في بعض..
بإبتسامه قال:هاه شني مشت الامور!؟
هز راسه وهو يقول بإبتسامه..
/الحمد لله..
بضحكه قال:باهي ربي يكمل ع خير..
رد عليه يقول..
/آمين والفال ليك إن شاء الله..
حط نضال ايديه في جيوب جلابيه الكاشمير اللي لابسها وهز راسه بدون مايتكلم...
🍃🍃🍃🍃
"باهي ربي يكمللها ع خير"
طوبى بإبتسامه..
/آمين..الفال اللي في بالي هما زويز نعطيهم ونفتك..
قلبت اريج عيونها..وسدرة تشرب في الشاهي وهي متجاهله كلامها..
هاديه؛اهو عقد اللولو حباته يطلعوا وحده ورا التانيه..
طوبى:ع قولتك ياهويديه يبوا ولامايبوش..
سميرة بإبتسامه:ربي يقدم اللي فيه الخير..خل نقوللكم اخر الاخبار..
وجهوا انظارهم ليها بفضول..
سميرة؛اليوم كنت في حوش الصيد..قالوا ابتسام بتكمل عدتها حداهم..
بدت ع وجه طوبى ابتسامه خفيفه..تحولت لإبتسامه دهشه لما سمعت سميرة قالت..
"محي الدين عطاها شقته"
كلهم للحظات قعدوا يشوفوا لسميرة بصمت بعدين قالت هاديه..
/عرفت شن بصير في الحلقه الاخيره..
طوبى بضحكه:وهادي تبيلها احساس !..
هاديه بضحكه..
/لاياعيوني هادي تبيلها حد يعرف ان الدنيا دوارة..
صفيه؛معقوله ديرها نجمه!؟
سدرة؛ديرها وعلاش ماديرهاش!؟ابتسام كان روحت لماليها بعد تم العده اكيد بتتزوج والصغار بيولوا لماليهم وهما مازالوا صغيرين يبوا من يعانيهم..اما خير يتشردوا ويتمرمدوا ولاتقعدلهم امهم ويربيهم عمهم!!؟
طوبى:ياودي كلامك كله صح وعين العقل ان شاء الله خالتي نجمة تطلع تفكر هكي يارب..
ضحكوا كلهم..
طوبى وهي تمرر في نظرها عليهم وحواجبها معقودات..
/قولوا آمين...
كلهم وهما يضحكوا قالوا بصوت واحد..
"آمين"..
ضحكت وهما ضحكوا معاها...
بعدين سدرة قالت..
/خزي ع جحشه غرفه..
صفيه:والله فقدتها هي وصغارها..
طوبى:صغارها هما اللي حبسوها وسواسه وخوافه هلبه غرفه..توا تلقيها فاتحه المكيف ع السخون وملبسه الصغار ستين حاجه..
سميرة:غلط هكي..
طوبى:شن بديرلها هدا عقلها..شن رايكم غدوة نلموا بعض ونمشولها حتى انتي سمرمر تعالي..
سميرة:شوفوها قبل..
طوبى:اكيد..خلاص نكلمها ونرد عليكم..
سدرة:راك تنسي غدوة عندنا يوم طويل عريض في المدرسه..
طوبى:مابطلتش تفكير فيه..
اريج؛بنمشي معاكم راهو غدوة ماعنديش خدمه..
هاديه:معناها جنيوه عندنا غدوة..
طوبى بإبتسامه:إن شاء الله...
☘وكملوا هدرزتهم لعند ماقرب آذان المغرب..
ناضت سميرة بتروح..وهي طالعه كلمت طوبى تجي معاها..
🍃طوبى:حتى اني عندي شي بنقولهولك..
سميرة؛باهي قولي اللي عندك قبل..
طوبى:حاولي نجسي نبض المهدي تشوفيه كان مازال راغب سدرة بجديات..يعني لو عرف انها لانت ناحيته مافي شي يمنعه ياخدها!؟
سميرة:ولو اني عارفه اجابة هالسؤال لكن باهي تو نهدرز عليه ونشوفه..مدتلها كيسه وهي تقول..خودي..
طوبى بضحكه؛من لما جيتي واني نشوفلها ونقول في خاطري زعما شن فيها ولمن جايبتها..
سميرة؛هادي عطهالي المهدي قال حاجه منك قعدت عند الجالي..
تلاشت ضحكة طوبى وهي تشوف للكيسه بريبه وكره بعدين مدت يدها وخدتها..
سميرة:هي اني طالعه بالسلامه توا..
طوبى وعقلها مش معاها..
/باهي..
شافتلها سميرة بنظرة فيها شي من القلق بعدين مشت طلعت من الحوش..
بعد ماطلعت طوبى فتحت الكيسه..لما شافت الألبوم استغربت..
طلعاته وفتحاته..
ويقابلوها اربعه صور ليها مع الجالي ليلة زفافهم...
🍃🍃🍃🍃🍃
"صداع رهيب"
محمد:عندك الجيوب!؟
عبد القيوم؛لاوالله..هذى حالي لما تجيني بردة..هيا حطهم في الطاجين وحده وحده..
محمد خدي قطع الدجاج وبدي يحط فيهم ف طاجين البايروكس وهو يقول..
/سمعت بالوباء اللي جي للصين!؟
عبد القيوم:اها يحكوا عنه قالوا حصد منهم واجد..
محمد؛منظمه الصحة العالميه متوقعه يولي وباء عالمي لانه ينتشر بسرعه..
عبد القيوم؛هذى كان يوصل فينا يكمل ع عقابنا..
ضحك محمد وقال..
/نحطه توا..
عبد القيوم؛لا ارجى نقولك شن دير قبل..
رن جرس الشقه..
عبد القيوم؛عدي حل الباب قبل..
ضحك محمد ومشي طلع من حداه..
توجه لباب الشقه وفتحه طول..
اللي واقف ورا الباب قال..
/حمادة..انت هني!؟
محمد بإبتسامه..
/تفضل عمي مختار تفضل..
خش مختار وهو يقول..
/شن جو يا good boy
محمد بضحكه؛تمام الحمد لله..وسكر الباب..
مختار:التارقي وين..
طلع عبد القيوم من الكوجينه وهو يقول..
/مرحبا مرحبا..
مختار:شكلك مريض!
عبد القيوم؛اها..بردة...
مختار بضحكه..
/مالا خلي بينا مسافة امان..
عبد القيوم بإبتسامه..
/باهي خش ماتقعدش مصبي هكي..
مختار قدم وهو يقول..
/طبيت عليكم طبان اسف..
عبد القيوم وهو ماشي لوسط الحوش..
/مش مشكله..وقف بعيد شويه واشرله يخش وهو يقول..تفضل..
خش مختار ومشي قعمز ع الكنبه..
وعبد القيوم قعمز ع كرسي فردي..
محمد:باهي اني ماشي نكمل شغلي..
وطلع من حداهم..
مختار:شغل شنو!؟
عبد القيوم بضحكه:يدير في العشا..
مختار بإبتسامة..
/شكلكم صحاب..
عبد القيوم:محمد يعز عليا واجد راجل بمعنى الكلمه ومتربي كويس..
هز مختار راسه بعدين قال..
/ع هكي مش حنشربوا شاهي تارقي!؟..
عبد القيوم:انا من ناحية النظافه ماتخافش مني..
مختار مرر نظره ع مكان وهو يأشر ع انفه ويقول..
/واضح..مش شقة عزابي بكل..
ضحك عبد القيوم وقال..
/نديرلك شاهي!؟
مختار بإبتسامه..
/دير ياسيدي..
ناض وهو يقول..
/مش معطل..ومشي طلع وخلا مختار يمرر نظره ع اللي باينله من الشقه...
🍃🍃🍃🍃🍃
ودار التارقي الشاهي وكمل محمد الطاجين وحطه في الكوشه..
وبعدين قعمزوا مع مختار يشربوا الشاهي..
مختار بإعجاب..
/بيرفيكت..
عبد القيوم هز راسه وهو مبتسم.
محمد بإبتسامه..
/تو تولي مدمن عليه..
شاف مختار لمحمد وقال..
/محمد انت طالب في الجامعه صح؟
محمد؛ايه كلية الهندسه بس وضع القرايه ملخبط بسبب الحرب..
مختار؛بوك قالي يبيك تطلع برا لكن انت رفضت علاش!؟
محمد؛مانقدرش بوي بروحه..
مختار:بوك مش بروحه قاعد وسط عيلته..
محمد:مش زي ياعمي مختار..اني ولده اقربله من اي حد..والكبير يعني مفروض نتحمل معاه المسؤوليه ونساعده ع قد مانقدر..
عبد القيوم وهو يسمع في كلام محمد كان يشوف في تعابير وجه مختار..بان عليه شي من الحزن..
رفع حواجبه ونزلهم وهو يقول..
/لكن هدا مستقبلك ولدي وبوك يبي تفكر في مستقبلك بس..
محمد؛بوي وخوتي اولى بيا من كل شي..مالاعلاش جيت الكبير..
بلع مختار ريقه وقال..
/ع راحتك..
شاف عبد القيوم لمعة الدموع بانت في عيون تأكد ان كلام محمد فتحله جرح غائر خلاه يتألم..
تنهد مختار وشاف لعبد القيوم وقال..
/نبيك في خدمه..رجع نظره لمحمد ووقال..معليشي ولدي نبيه ع انفراد..
محمد بإبتسامه..
/ولايهمك..
وناض طلع من حداهم...
🍃🍃🍃🍃🍃🍃
ومن حوش المهدي..لحوش اهله...
اللي ع المغاريب طبت عليهم مراسلة شارع القهوة بش تقول ماعندها من اخبار عاجله..
☘في دار المعيشه اللي تحب تقعمز فيها مغليه ايام الشتاء..
كانوا مقعمزات هي وبناتها نسرين وخديجه ومعاهم الكن نجاة كلهم اذان صاغيه مع رقيه واخبارها..
رقيه:وطلع محبوس قداش ليه وهما يكذبوا ويقولوا مسافر.
مغليه:وااك مفلحهم في الكذب..
خديجه؛من يومها فطيمه يام ماعندها كان الكذب..
رقيه:قولي ياخديجه انتي مخليه صغارك!؟
بدت ع وجه مغليه ملامح الامتعاض..
خديجه بجرأة وحقد..
/ايه مانقعدش نعاني فيهم بروحي..
رقيه:صحة ليك مايبوا الا هكي..
نجاة وهي تشوف لرقيه كانت تقول في سرها..
"تي هيا طلعيها هالفوله"
☘ماتبيش المعلومه تطلع منها اتقاءا للشبهة"
مغليه:مش ديما المراة تتحمل وتقعد تبلع وتغص..
رقيه:تو انتي تبي تشعفيه ع حاجه ولاخلاص معاش تبي توليله..
نسرين بإنزعاج:هادي امور خاصه مش كل شي يدووا بيه..
رقيه:باهي ياحنه باهي اعصابك..اني سألتها ع خاطر سمعته اليوم في حوش الصيد..
عقدت خديجه حواجبها ومغليه قالت..
/شن سمعتي!؟
رقيه:ياحنه قالوا ابتسام بتقعد في شقة محي الدين لين تكمل العدة..
ساد الصمت المكان والانظار توجهت لخديجه اللي بدت ع وجهها ملامح عدم الاستيعاب وهي تشوف لرقيه..
ونظرات نجاة ليها كانت كلها تشفي..
🍃🍃🍃🍃🍃
روح مختار وقعدوا محمد وعبد القيوم يتعشوا مع بعض..
محمد بضحكه:هاه شن رايك غلبتك فيها..
عبد القيوم؛كان بودي نقولك رايي لكن وبالله العظيم مااستطعمت حاجه..
ضحك محمد..
عبد القيوم:خل باتك ياكل منه ويقولك رايه..
محمد ناض بالسفرة وهو يقول..
/تو نغسلهم ونديرلك زنجبيل..
عبد القيوم:معليش يامحمد خليتك دير كل شي بروحك.
تمدد ع الفراش وقال..حاس روحي فاشل حتى عيوني نحل فيهن بالسيف..
محمد بإبتسامه..
/مش مشكله..ومشي طلع من الدار..
وقعد عبد القيوم ع حاله وكل ماله يزيد يتعب اكثر..
ع جية محمد بطاسة الزنجبيل..
عبد القيوم بصوت متعب..
/صحيت خلاص عدي تريح..
محمد بقلق:شكلك مايطمنش.
عبد القيوم بتعب..
/عدي عدي..مافيا شي تو نشرب الزنجبيل ويولي حالي باهي...
استسلم محمد ومشي رقد في فراشه وهو يراقب في عبد القيوم كيف ناض بالسيف يدوب خدي رشفه ورجع رقد..
عدت ربع ساعه..
ومحمد لاهي بتليفونه..شويه ورفع عيونه في عبد القيوم لما سمعه يأن..
ناض ومشالها..
قعمز جنبه وحط يده ع جبهته فتح عيونه وسعهم وهو يقول..
/مرتفعه هلبه..
فتح عبد القيوم عيونه شويه..
ماشافش محمد..عقله المتعب خلاه يشوف في مكانه اغلى انسان ع قلبه في الدنيا كلها..
كانت يتخيل فيها حاطه ع جبهته وتشوفله بقلق..
رجع غمض عيونه وقال بصوت يدوب طالع..
"طوبى"
سمعها محمد وكذب وذانه..
رجع عاودها عبد القيوم بس قال معاها كلمه تانيه صدمت محمد بقوة...
"طوبى..نحبك"
#كانون_الاول
#طوبى
....يتبع....
