#طوبى "جنة طوبى"
#جمان_فريد
#الجزء_116"منازل القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ◾️ قالَ ابْنُ القَيِّمِ - رَحِمَهُ اللّٰهُ تَعَالَىٰ - :
" أَنَّهُ سُبْحَانَهُ هَيَّأَ لِعِبَادِهِ الْمُؤْمِنِينَ مَنَازِلَ فِي دَارِ كَرَامَتِهِ لَمْ تَبْلُغْهَا أَعْمَالُهُمْ، وَلَمْ يَكُونُوا بَالِغِيهَا إلَّا بِالْبَلَاءِ وَالْمِحْنَةِ، فَقَيَّضَ لَهُمُ الْأَسْبَابَ الَّتِي تُوصِلُهُمْ إِلَيْهَا مِنَ ابْتِلَائِهِ وَامْتِحَانِهِ، كَمَا وَفَّقَهُمْ لِلْأَعْمَالِ الصَّالِحَةِ الَّتِي هِيَ مِنْ جُمْلَةِ أَسْبَابِ وُصُولِهِمْ إِلَيْهَا" .
📚 [ زَادُ المعَادِ ١٩٨/٣ ].
_________________________________________
🍀بعد مرور اربعين يوما🍀
اواخر شهر يوليو...
في احد الاحياء الراقيه في العاصمة طرابلس..
فيلا من طابق واحد...
هدا حوش حسين اللي قاعد فيه مع امه واخته..
اميمه اللي كرهت الخشة لحوش جدها بعد وفاته وهي حاليا تعاني من حزنها الشديد عليه..
قدرت تتخطى الكورونا لكن حزنها ع جدها ماقدرتش تتخطاه...
حابسه روحها في دارها ماتطلعش منها الا الحمام..وماديرش في شي فحياتها غير الصلاة وقراءة القرآن..
ولما تتعب ترقد ع سريرها وهي متوسده مخده جدها اللي قاعده فيها ريحته وحاضنه سوريته المخيطتها بإيديها..
وعكازه متكي ع كامدينو جنبها..
من قلة الاكل صارلها هبوط قعدت يوم في عياده وطلعت بإصرار منها وامها قاعده تعافر معاها بش تهتم بصحتها..
وحالها هدا اكيد مش حيطيب ع راجلها اللي يحبها حب كبير..
🍃صفيه ودموعها ينزلوا..
/مش عارفه كيف ندير معاها ياولدي عجزت..
اسامه بضيق:كان فيها كيف نخش عليها نشوفها..
سكتت صفيه وهي تفكر للحظات بعدين هزت راسها وقالت..
/باهي..تعالى معاي..
ناضت وهو ناض معاها ومشوا مع بعضهم بإتجاه دار اميمه...
وصلوا فيها وقفت صفيه ع بابها دقت وفتحاته لقتها مقعمزه ع سريرها تقرا في القرآن وتبكي تنهدت بألم وقالت لأسامه..
/خشلها..
هو قدم وخش عليها للدار وقال..
/السلام عليكم..
ردت صفيه الباب وخلتهم ومشت وهي تدعي لبنتها...
اميمه سكرت المصحف وحطاته جنبها ..
شافتله بملامح وجهها الباهته وعيونها الذبلانه من البكي ردت بصوت مبحوح..
/وعليكم السلام..
مرر نظره ع الدار جت عينه ع كرسي خداه وقربه ليها وقعمز..
قعد يشوف لعيونها بدون مايتكلم...
نزلوا دموعها وهي تقول..
/عارفاتك مش حتتحمل اكثر من هكي ونقولهالك يااسامه مش حنزعل منك ولانعتب عليك لو قررت تسيبني..
شد ع يدها بحنان وقاطعها وهو يقول..
/اميمه اميمه حبيبتي...اسمعيني للآخر تمام...كلنا نعرفوا ان الموت حق ولكل أجل كتاب وكلنا اخرتنا ليها..وجدك الله يرحمه يوم وفاته مكتوب من قبل الدنيا والدين مهما كانت الاسباب..يعني هدا شي بأمر الله بس انتي مالكش ذنب فيه..حاجه تانيه ياقلبي جدك كان يحبك هلبه وهمه كله تعيشي مرتاحه ومتهنيه وتكوني ديما ناجحه..هو اللي خلاني نفهم الشي هدا لما جاني للمصحه بعد خطبتك..كان حريص ع حلمك ونجاحك ممكن اكثر منك..كان يبي يعرف الراجل اللي قدامه يقدر يعوض حفيدته ويسعدها ولالا..جدك لو يعلم بحالك هدا يااميمه حتزعليه وتوجعيه عليك..اميمه يقولوا الميت يحس بأحبابه ياأميمه الله اعلم مرات حاس بوضعك هدا ومش مخليتيه يرتاح في قبره..
حطت يدها التانيه ع فمها وقعدت تبكي بالعبره..
حضن يدها إيديه الزوز وهو يقول..
/ريحيه يااميمه وديري اللي ياما تمناهولك انك تكوني مرتاحه وفرحانه وناجحه...
قرب يدها ليه وباسها بعدين حط يده عليها وقال..
/اما اني مستعد نستناك عمري كله ياأميمه وانتي تعرفي الحاجه هادي كويس..
نزلت يدها وقالت ببكي..
/مش قادرة نصدق..مش قادرة نستوعب..مش قادره..معاش بنشوف جدي..معاش بنسمع صوته ولانهدرز معاه ولاندللة ويدللني..معاش بنسمع معاه خطبة الجمعه من الحرم معاش في من يحكيلي عن ايام زمان الحلوة..معاش في علي الواعر..علي الواعر اللي ضحكته مع عقدة حواجبه في عمري ماريت احلى منها..اسامه اني كنت نتنفس في جدي ياأسامه كنت عايشه بيه ياأسامه..اسامه..اني حاسه روحي متت...
🍃هي تتكلم وقلبه يتقطع دموعه غصب عنه نزلوا ماقدرش يشدهم..خلاها تتكلم وطلع اللي في داخلها وسمعها بدون مايقاطعها وهو يمسح ع بإيديه ع يدها بحنان...
لما انهارت بالبكي..ناض قعمز جنبه وخداه في حضنه وقعد يمسح ع ذراعها..
وامها برا الدار تسمع فيها شن تقول تسمع في صوت بكاها المؤلم وتبكي معاها...
🍃🍃🍃🍃
"لا وضعك تمام التمام وقلبك اموره في السليم"
سكر مختار ازرار قميصه وهو يقول..
/ان شاء الله يفتحوا المجال الجوي قريب بش نتأكد..
ضحكالطبيب وقال..
/موسوس من غير شي..
مختار:اسمه حرص مش وسواس هادي صحة راس مال البنادم..
هز الطبيب راسه وهو يقول..
/عندك حق..لكن الوسواس يتعب النفسيه ويأثر ع الصحة الجسديه رد بالك..
ابتسم وقال..
/إن شاء الله..مشكور جدا دكتور..
قاله بضحكه..
/خيرك مستعجل خليك هدرز شويه..
مختار؛كان بودي لكن المدام تستنى فيا عند دكتورة النساء..
ابتسم الطبيب وقال..
/اها كان هكي معناها توكل وان شاء الله تشوفه ع خير..
هز مختار راسه وقال..
/إن شاء الله..
🍃وطلع من عند طبيب القلب وتوجه لقسم النساء والولاده..
كانت فاتن تشوف مرحله جديده من مراحل نمو جنينها اللي عرفت جنسه..ذكر..
فاتن بإبتسامه ودموعها في عيونها..
/راجي شويه لين يجي بوه دكتورة..
بإبتسامه قالت..
/تمام..
دق باب الحجرة..
فاتن:اكيد هو..
الطبيبة:تفضل..
انفتح الباب وخش مختار اللي كان مدرق نص وجهه بالكمامه..
سكر الباب بمرفقه بعدين مشالهم وهو يقول..
/هاه شن جو..
فاتن بضحكه؛تعالى شوف ولدك تعالى..
دق قلبه بقوة قرب منها وشاف للشاشه ابتسم وقال للطبيبه..
/سمعينا دقات قلبه..
هي بإبتسامه قالت..
/حاضر...
🍃يوم عن يوم كانت لهفة مختار لشوفة ولده تزيد..بسببها..طوبى..زرعت في قلبه حبه ليه وخلاته متلهف يمارس الابوة معاه🍃
طلعوا من عند طبيبة النساء والولاده وهما في قمة السعاده..
مختار كان حريص ع فاتن بزياده وين تجي تركب السيارة العاليه يرفع فيها بين ايديه ويركبها..
فاتن شافت منه دلال خلال هالفتره زودت حبها ليه اكثر واكثر...
☘الاقجم بضحكه..
/اللهم صل ع النبي عيني ماضركم..
مختار:فكنا من نقانك وتوكل لشارع القهوة..
فاتن ضحكت..
والاقجم قال بضحكه..
/تم يامعلم...
وتحرك بيهم ووجهته المنطقه اللي فيها شارع القهوة...
🍃وفي مكان تاني..
درست سيارة نجاة قدام محل ذهب..نزلت وهي لابسه عبايه ووشاح و نظارات مدرقات نص وجهها...
خشت للمحل وهي تقول..
/السلام عليكم..
رد عليه البايع..
/وعليكم السلام...
طلعت من شنطتها منديل ورقي كبير داسه فيه شي لما حطاته قدام البايع وفتحاته قالت..
/نبي نصرف التاكم هدا..
هو ركز بنظره عليه كان يبان غالي ومن برا..
خداه وبدي يوزن فيه..
ونجاة تشوف للطقم ودموعها في عيونها..هو نفسه اللي هداهولها الجالي قبل زواجه من طوبى...
باعاته وخدت فلوسه ودستهم كويس وطلعت بيهم للسيارة وبعدين تحركت لوجهه محدده...
🍃🍃🍃🍃🍃
"لاحول ولاقوة الا بالله..لاحول ولاقوة الا بالله"
اريج بضيق؛خيرك!؟
طوبى بإنزعاج وتذمر..
/جت احرف من اللي قبلها مش عارفه علاش!؟ والله زابطه مقاديرها كويس..مش اول مرة نديرها ياهمي..تأففت وقالت..استغفر الله العظيم واتوب إليه..
دفت الطاجين بيدها وقالت..
/خل ندير الغدي معاش في وقت مختار وفاتن قريب يخشوا..
ع خشة جنه تجري باللعبه متاعها وهي تقول..
/ماما ماما..ركبي..
طوبى بشي من العصبيه..
/بالله عليك اطلعي من راسي..
وفاتتها ومشت بطلع الرز من الفريز..
اريج قعدت تشوف لجنة اللي بدت عليها ملامح الزعل..
مشتلها خدتها وطلعت بيها لدار المعيشه...
خشت للدار اللي كانت فيها غرفه تركب في الستاير..
نزلت من ع السلوم وهي تشوف لأريج كيف قعمزت بجنه وقعدت تركبلها في اللعبه..
غرفه بقلق..
/خيرها!؟
اريج ودموعها في عيونها..
/نوع الحلو اللي ديره يفشل معاها مش عارفه خيرها مش قادرة تركز ولاقعدتها فترة من غير خدمه نستها كل شي..مش عارفه..
لحقت غرفه جنه بعيونها وهي ماشيه باللعبه لمئاب بش تلعبها وقالت..
/اني حاسه مقاطعه سدرة ليها مأثرة عليها ومتعبه نفسيتها..
اريج بضيق..
/والغيظ كله جاي في هالمسكينه تغيرت معاها هلبه معاملتها ليها ولت قاسيه..
غرفه وهي تشوف لجنه كيف تمسح ع شعر مئاب قالت..
/زعمه مضاعفات كورونا!؟ قالوا دير احرف من هكي..
تنهدت اريج بضيق وقالت..
/والله مانعرف حاجه غير ان حالها هدا قاهرني عليها وواجعني ع جنة...
جنة:بوشة كودي "خودي"..
وعطتها اللعبه تلعب بيها وهي التفتت للمكعبات وبدت تركب فيهم..
ضحكت غرفه في عز همها وقالت..
/تبي تلهيها بش ماتخربش عليها..
ابتسمت اريج وقلبه موجوع...
🍃وطوبى في الكوجينه طيب وهي تذرف في الدموع..حاسة روحها مش طايقه حد ومش متحمله حد وكأنه في حد ضاغط ع اعصابها بقوة..
مسحت دموعها ورفعت عيونها فوق بعدين غمضتهم وقالت..
"يارب"
🍃🍃🍃🍃
"يعني حتى بعد عزماتك مش ماشيه!؟"
سدرة هي طيب في الغدي..
/عازمه هداكا حتى هو وانت عارفني مانبيش نشوف وجهها..
المهدي:انتي هكي تخليتي عن طوبى مرة وحده..
نزلوا دموعها وهي تشتغل بعصبيه وتقول..
/بالله يامهدي معاش تدوي معاي في الموضوع هدا بكل..
مشالها وقف وراها حط ايديه ع ذراعتها وطبس باس راسه وقبل ليمشي ويخليها طبطب ع ذراعها..
وقعدت بروحها تبكي بصمت وقلبها موجوع...
🍃🍃🍃🍃
"شن رايك في القصة"
نسرين وهي تمشي بيدها ع شعر اختها قالت..
/حلوة هلبه طلعت فالحه اكرام..
خديجه:فالحه في كل شي صبغه وحنه وقصان شعر..
نسرين:نفكر نقلدك..
خديجه؛قصي لكن ماديريش نفس القصه مانبيش نطلعوا زي بعض لقطه عبيطه..ع خشة سميرة شافت لنسرين وقالت..
/هيا كان بدوشي لأمك يانسرين..
ناضت نسرين وهي تقول..
/هيا هي..
ومشت طول من الصاله وسميره وراها وخلوا خديجه تشوف في شكلها ع المراية...
🍃عايشه حياتها وكأنها بنت العشرينات ونست كونها ام بالمرة..بس مرة مرة تجيها راما تفكر فيها للحظات...
راما اللي بدت تتأقلم مع وضعها ووتتعود..
علاقتها بصفاء تحسنت بعض الشي..وعلاقتها بعمتها عواطف ولت قويه..
زي ماكانت علاقتها بتيم قويه الولد تعود عليها مايرقدش الا في حضنها وهي كانت عايشه حياة مليانه بيهم وبولد عمهم اشرف..قدروا ينسوا عواطف كل شي سيء مرت بيه في حياتها..خلوها سعيده وشغوفه بالحياة اكثر ع خاطرهم...
🍃زي ماخوها محي الدين اصبح شغوف بالحياة وهو عايش مشاعر ماعاشش زيها في حياته رجعاته لسن المراهقه...
☘"اسف خديت رقمك بدون مانسألك يعني قلت نكلم الصغار مرة مرة ونشوف كان محتاجين شي.."
ابتسام وهي مقعمزه مقابله المكيف وصغارها حداها يتفرجوا ع التلفزيون قالت بإبتسامه..
/مش مشكله..هما حداي توا تبي تكلمهم..
"اكيد"
قالتله..
/لحظه بس..بعدت التليفون وهي مبتسمه بشي من الغرور..شافت لصغارها وقالت..تعالوا كلموا عمو محي الدين..
🍃كانت تتكلم بأسلوب لبق بزياده وفي شي من الميوعه وهو من غير منتهي امره معاها...
جوها الصغار يجروا خدوا منها الهاتف وكلموا عمهم اللي كان حنين عليهم حنيه ماشافوهاش صغاره منه وامهم تشوف فيهم كيف تعلقوا بيه زي مايشوفوا خوالهم اللي مخليين اختهم ع راحتها المهم قعدتها معاهم ماطولش...
🍃🍃🍃🍃
"حطي الفرشات الجدد في نفس الشنطه"
مروة وهي تلم في عدة المكياج..
/اهم كلهم حطيتهم في هادي..
سكرت فايزة شنطة المكياج اللي عندها وهي تنادي..
/تاله..ياتاله..
طلعت تاله من دارها وهي تقول..
/نعم ماما؟
فايزة؛قبل لنطلعوا بري لحوش خالتك سدرة باهي..
تاله وهي تحاول تخفي فرحتها..
/حاضر..
مروة وهي ضم في باقي الحاجات كانت تسرقلها في نظرات الشك اللي بدت تهرب منهم تاله زي ماهربت توا وخشت لدارها وع وجهها ابتسامة فرح وع طول اتصلت بصاحبتها بش تخبرها..
🍃فرحت سدرة ومشت طول لمرت بوها بش تعطيها علم..
لقتها في الكوجينه مقعمزه..حاطه يدها ع خدها وسرحانه بتفكيرها..
قربت منها وقالت..
/خالتي سدرة..
غمضت سدرة عيونها وفتحتهم بعدين شافتلها وقالت..
/نعم حبيبتي..
قالتلها وهي مركزة ع ملامح الحزن في وجهها..
/العشيه بتجيني تاله..
هزت سدرة راسها بصمت..
زادت قربت منها وطبعت قبلة ع خدها..رسمت بهالقبله ابتسامه حلوة وسط الملامح الحزينه وخلت صاحبتهم تاخدها في حضنها...
وفي نفس الوقت نزلت دموعها لما خلتها تتفكر كيف كانت طوبى تخفف عنها وترسم في الضحكه ع وجهها...
🍃🍃🍃
طوبى اللي كانت مقعمزه في الصاله مع مختار وفاتن واريج وغرفه وحواليهم الصغار يلعبوا...
🍃فاتن بإبتسامه؛امس وحني نفكروا في حكايه الاسم قالي خليه ع طوبى..
شافتله طوبى بإبتسامه بعدين قالت..
/عن طيب خاطر فتون؟
فاتن بضحكه:واني فرحانه..
ابتسموا اريج وغرفه ومختار قال..
/اختاري اسم فخم ماشي مع اسمي..
ضحكوا وطوبى قالت..
/هو اسم واحد اللي فبالي..علي..
خفتت ابتسماتهم وهي عيونها تعبوا دموع...
فاتن شافت لمختار وشدت ع يده..
هو ابتسم وهز راسه وقال..
/علي مختار...حلو..
علت ع وجوههم ابتسامه حلوة وهي ناضت تقول..
/خل نمشي نشوف الغدي..
وطلعت بسرعه من حداهم...
شافت فاتن لجنه وهي تلعب مع صغار خالتها قالت..
/طولوا هلبه شعراتها ماشاء الله اللون ذهبي بان فيهم بزياده..
غرفه:ايه لون شعرتها مختلف علينا شويه..
ركز مختار في اللون..تلاشت ابتسامته وحلت محلها ملامح الحزن..ناداها..
/جنه..
التفتتله بعدين مشتله تجري وخشت في حضنه وهي تقول..
/موخي...
وهو ضمها بقوة وقعد يضحك..
🍃طاب "استوى" الغدي وسقت طوبى واريج اللي كانت معاها في الكوجينه لاحظت ع وجهها ملامح الضيق والاستياء عرفت السبب من غير ماتسألها...
🍃🍃
حطتلهم الغدي وبدوا يتغدوا..
هادي اول مرة ياكلوا عندهم فاتن ومختار من بعد الازمات اللي مروا بيها..
اللي ياكلوا فيه توا لافيه بنه ولاطعم والزر كان مكسر ومش طايب كويس..
مختار كلي شويه ووخر وهو يقول..
/ليا فترة منقص الماكله هادي..
مرته واخته وبنت اخته كانوا يتمنوا لو يلقوا حجه زيه تخليهم يوقفوا اكل..
طوبى كانت فاهمه بس حاولت تتغاظى وهي تقول..
/نديرلك حاجه تانيه؟
مختار حرك راسه بالنفي وهو يقول..
/لا مش لازم اصلا اني وفاتن فطرنا متأخر..
حطت فاتن الكاشيك"ملعقه" وهي تقول..
/ايه دارتلنا امينه فطور يقنع واني طحت فيه بإيديا ورجليا..وختمت كلامها بضحكه تخفي ارتباكها..
زاد ضاق صدر طوبى بس حاولت ع قد ماتقدر تبان عاديه..
ناضت وهي تقول..
/خل ندير شاهي اخضر..
حطت غرفه كاشيكها وقالت..
/قعمزي انتي تو نديره اني..
ومشت بسرعه طلعت من الصاله..
وماقعدش غير اريج اللي رفعت السفره وهي تقول..
/قعمزي ارتاحي من الصبح وانتي في الكوجينه..
ومشت طلعت بيها ولحقت خالتها...
انتابت طوبى رغبه شديده في البكاء بس تماسكتع قد ماتقدر..رسمت ع وجهها ابتسامه مصطنعه وشافت لمختار ومرته وهي تقول..
/شن حالها امينه؟
🍃في الكوجينه..
غرفه وهي تلم في الماعين..
/هي المده الاخيرة بنة تطييبها تغيرت وكأنها دير في الحاجه من غير نيه..
اريج ودموعها في عيونها..
/الله يسامحك ياخالتي سدرة وخلاص..
غرفه التزمت الصمت وهي تلم في الماعين وع وجهها باديه ملامح الغضب..
🍃غضب ع سدرة اللي قست قلبها ع طوبى ورفضت كل محاولاتها لطلب السماح..غرفه شايفه ان قسوة سدرة هادي مبالغ فيها ولازم يندارلها حد...
🍃🍃
شربوا فاتن ومختار الشاهي وروحوا مع اذان العصر..
وطوبى صلت وطول خشت سريرها ورقدت...
وقعدوا اريج وغرفه لاهيات بهواتفهم في دار المعيشه وحواليهم الصغار يتفرجوا ع التلفزيون..
غرفة:قداش وجعوني الناس اللي ولوا لحياشهم ولقوها مدمرة..
اريج؛في اللي لقوا فيها بلاوي وعفن سيبوهم بكل..تنهدت وقالت..زعمه الناس اللي كانوا نازحين في المدرسة شن صار فيهم!؟
غرفه؛ان شاء الله روحوا لقوا حويشاتهم مساكين..
اريج؛يارب..نزلت التليفون وهي تقول..ياريت تولي القرايه نبي نكمل ونتخرج خلاص..
غرفه:ان شاء الله قريب العالم اللي برا بدت ترجع الحياة عندهم طبيعيه شويه شويه..
اريج؛يارب..ملينا من الحبسه...
🍃وهما يهدرزوا وجنه طلعت من حداهم ومشت لأمها..
خشت عليها الدار وجت عند سريرها وبدت تخبط ع خدها خبطات خفيفه وهي تقول..
/ماما..
استاقظت طوبى وهي منزعجه قالت..
/بري اطلعي خليني..
جنه بزعل..
/ماما ابي اكل "نبي ناكل"
تأففت طوبى وقالت..
/بري عليا غادي..مدت يدها ودفتها وهي تقول..اطلعي..
والتفتت عطتها بالظهر والنوم مسيطر عليها..
بدت ع وجه جنه ملامح الحزن برغم صغر سنها الا ان معامله امها اللي تغيرت معاها اثرت ع نفسيتها هلبه..
لفت ومشت وطلعت من الدار وصلت في دار المعيشه..
مشت لأريج انطرحت حداها وعيونها ع التلفزيون..
غرفه شافتها وقالت..
/خيرك جنوني بترقدي!؟
ماردتش جنه قاعده تشوف للتليفزيون وبس..
مسحت اريج ع شعرها وهي تقول..
/شكلها بترقد..
🍃🍃🍃🍃
خش عليها للدار وكأنه مقتحم سألها بغضب..
/معاش تمشي الخدمه من غيرك خلاص!؟
نجاه وهي تفرد في شعرها بجهاز الفرد"لاسترا" جاوبت وبكل برود..
/ايه وانت عارف السبب..
زادت غضبه ببرودها قدملها جبد منها الجهاز وحطه الزيانه بقوة وهو يقول..
/مش اهبل ولامضروب ع راسي بش يفوت عليا الجو اللي ديري فيه..
حطت عيونها في عيونه وردت عليه بعصبيه وهي تقول..
/اما جو اللي نفوت فيه عليك!؟ شايف روحك انت شايف وضعك!؟ مش قادر تركز علي شي ولاكأنك قريت هندسه في حياتك هدا غير اللي صار في مصراته قبل الناس اللي شهدت عليه اكيد طلعاته ولولاي اني راهو قداش لينا منتهنين والمكتب مسكر..
معاش قدر يرد عليها بأكثر من نظرات حاده مليانه غضب بعدين طلع وخلاها..
وهي بعد طلع زفرت..ومشت شغلت الجهاز وولت تفرد فشعرها...
🍃🍃🍃🍃
"حي حرام عليك علاش تقصي فيه هكي"
تاله:خيره يهبل وطالع عليا حلو..
سدرة:لكن خسارة شعرك كيف كان طويل راك تقولي اللي قصتيه لوحتيه!؟
تاله:مالا شنو بندسه!؟
سدرة:كيف هان عليك بس..
تاله بإنزعاج..
/فكينا من كلام العزايز خلاص..
سدرة:كلام عزايز عينك ياهبله وجعني شعرك بس..
كلت تاله من الشيبس وهي تقول بلامبالاة..
/تو يطول...
سكتت سدرة وهي تاكل وع وجهها باديه ملامح الضيق..
تاله ركزت عليها وقالت..
/نحس فيك مضايقه..
سدرة بحزن:هلبه..خالتي سدرة من بعد موت جدو علي معاش ولت زي قبل ديما حزينه وتبكي ع قد ماحاولنا نطلعوها من الكآبه ماقدرناش..
تاله بحزن؛وهي حامل ياروحي..
سدرة بضيق:ايه..
تاله:تعرفي كلهم عايشين نفس الحاله..ماما وخالاتي بالذات خالتي طوبى متغيره هلبه ومعاش زي زمان..
سدرة بإستغراب..
/كيف!؟
تاله:مش عارفه كيف نشرحلك لكن هكي ديما سرحانه ومضايقه...
سكتت سدرة وهي تفكر وتاله حتى هي سرحت معاها..
استاقظوا لما سمعوا باب الشقه تسكر بعدين سمعوا صوت يزن ينادي..
"سدرة"..
وجه تاله اكتسي باللون الاحمر وتوترت..
سدرة لاحظتها شدت ضحكتها وناضت طلعت لخوها..
☘مدلها الشكارة وهو يقول..
/تفضلي ياابله طلباتك..
سدرة خدت الشكارة وهي تقول..
/سلمك جياب..
يزن بإمتعاض:قولي لتاله تروحي بروحك نتفاهم معاك..
ومشي طلع من الشقه..
ضحكت سدرة ومشت للدار...
🌸خشت عليها وقعمزت وهي تفضي في كيسة الشكولاته وتقول..
/قالك تروحي بروحك نتفاهم معاك..
تاله بوجه محمر:علاش!؟
سدرة:انتي لما جيتي من شفتي في الشارع؟
تاله بإنزعاج:مروان البارد مثقل دمه..
سدرة بضحكه:خلاص واضحه..
تاله:شن قصدك!؟
سدرة وهي تضحك مدتلها طرف شكولاته وقالت..
/ماقصدي شي كولي..
خدت تاله الشكولاته وهي تشوفلها بطرف عينها..
وسدرة تاكل وتضحك عليها..
🍃ومن شقة المهدي اللي ملتها المشاعر الحلوة البريئة للشقه اللي عايش فيها عاشق من الطراز الرفيع..
"قلبي مش مطاوعني نعدي ونخليها والمشكله بنطول واجد"
ربيع:ااه منك ياصاحبي والله ماليك حل ولاعلاج..
عبد القيوم:ديما نقول معاش بندويلك وكل مانحق وجهك الكلام يطلع بروحه..ضحك ربيع بعدين قال..
/والله ماهزوة ياصاحبي اني مقدر حالتك وحاس بيك لكن نبيك ترتاح وماتقعدش متليع عمرك كله..
تنهد عبد القيوم من قلبه وقعد ساكت..
ربيع؛مانبيش نرجع نقولك انساها وعيش حياتك وغيره لا هالمرة بنقولك وانت بعيد فكر في الموضوع بالعقل بعيد عن المشاعر..
عبد القيوم؛تشرب شاي..
ضحك ربيع وهو يحرك في راسه يمين ويسار..
🍃عيد الاضحى هالعام حيكون في مزرعته في الخمس وبحضور اهله..عمته سليمه وبنتها وعمته الكبيره وواحد من ولادها وعمه عبد الله...
بعد رحلة طويله وقفوا خلالها ع اكثر من محطه حلوا فيها ضيوف ع معارفهم واحبابهم وصلوا للخمس وتوجهوا طول لمزرعة عبد القيوم وليهم يوم قاعدين فيها...🍃
☘"شفتيها يابريكه قداش سمحه وكبيره"
عمة عبد القيوم الكبيره..
/تقول جنه حتى الحوش اللي فيها كبير ومشرح..
صفيه وهي تصور..
/مالا مشتل الورد ياخالتي عالم..
ابتسمت العمة وقالت..
/ااه وكان يطاوعني ويرضى بمنى بنت سلفي..
مطت صفيه شفايفها القدام بإنزعاج..
سليمه:وكان انتي طلعي هالموضوع من راسك البنت مش سمحه واجد وعبادي لاقوة الا بالله عليه طول وعرض وزين وشخصيه مش له بكل..
قالتلها:انتي اللي ماني عارفه كيف تفكري..معقوله تفضلي وحده غريبه ع بنت بلادك وناسك!
سليمه:انا نبي لعبادي الحاجه السمحه وبعدين كيف مانشوف فيك والله ماهو قايل باهي ع بنت سلفك وكان تصبي ع رموش عيونك وكان يبينا نحنا نخطبوله راهو ليه وقت مزوج..
سكتت اختها وهي تمرر في نظرها ع المكان..
سليمه: انتي تعرفي ان ام البنت عازمتنا وان شاء الله لما نعدوا لطرابلس نشوفوها ع الطبيعه ونتعرفوا عليها اكثر تغيري رايك..
تنهدت اختها وقالت..
/ان شاء الله خير..
تباعدت عنهم صفيه وهي مضايقه وقلقه ومن قلبها تدعي جيتهم هادي تعدي ع خير...
🍃🍃🍃🍃
"الله يعطيهن العافيه خلوها تضوي ضوي"
سلافه بإبتسامه راحه..
/الحمد لله يارب..
شاديه ودموعها في عيونها..
/الله يرحمك يانبيه قديش كان مقهور عليها..
دمعوا عيون بناتها وهما يمرروا في نظرهم ع شقتهم..
خدت شاديه نفس ومسحت دموعها وهي تقول..
/يللا خلونا نتساعد لنفرشها كلها ونرتب الغراض بدي الليله نخلص كل شي..
رفعت سلافه شعرها فوق وضماته وهي تقول..
/يللا..
شاديه:اييه نسيت خبركن البارح اتصلت فيني عمتو لعبد القيوم قالت انهن بمزرعة عبد القيوم بالخمس رح يضلوا ايام العيد كلها هونيك وبعدين بدوا يجوا لطرابلس وانا عزمتهن لعندنا بدي كفي هالرجال شوي ع جمايله..
قلب سلافه فر من فرحته واختها تشوفلها..
شاديه وهي تشوف للبانه قالت..
/بدي اعزم معهن زوجك واهله...
شافتلها لبانه وهي تقول..
/احكي مع مرت عمي وشوفي امتى بيناسبهن..
هزت شاديه راسها وهي تقول..
/طيب..يللا بلشوا شغل رح يأذن المغرب..
وسلافه بحماس منقطع النظير بدت تحوس واختها تراقب فيها ومن قلبها تدعي ربي يدير معجزه وماينكسر قلب اختها...
🍃🍃🍃🍃🍃
بعد المغرب..
طلعت تاله من حوش عيلة شنيبه لقت يزن واقف قريب ع الباب يراجي فيها..
وهي ماشيه قاللها..
/امشي وعيونك لوطا..
هي شدت ابتسامتها بقوة وكملت طريقها للحوش وولد شارعهم اللي اسمه مروان كانوا عيونه معاها وعيون يزن عليه وكان يلقى يشده يكسرله رقبته..
يزن حازر عليها لأنها بنت شارعه وصاحبة اخته وبنت صديقة امه والغالي ع امه وغواليهم غاليين عند يزن..
بس قلب تاله الصغير اللي قاعد يعيش مشاعر غريبه وجديده عليه قاعد يفسر في هالتصرفات تفسيرات تانيه...
🌸وصلت في الحوش فتحت الباب وخشت قبل لتسكره خطفت نظرة ليزن لقاته يشوفلها بنظرات وملامح حاده..
سكرت الباب وهي مبتسمه بفرح ووجهها محمر من الخجل وركبت طول للشقه...
☘مشاعر لطيفه وبريئه عاشتهم قبلها صديقة امها وكبرت معاها لين وصلت في حب حياتها بعد تعب ومشقه وعذاب كبير...
وهي توا حامله في داخلها ثمرة هالحب الاسطوري وبدت معاها اجمل واصعب مرحلة في الحمل..
المرحله اللي ممكن طلع سدرة شويه من حالة الحزن اللي عايشة فيها..
☘الساعه 10:30ليلا..
خشت عليه الدار لقاته يتكلم بالتليفون..
قعدت واقفه تراجي فيه..هو شافها حاول ينهي المكالمه بسرعه ونهاها شافلها وهو يقول..
/خيرها عمري؟!
يدوب ابتسمت وهي تقول..
/تشم في خبزة الفرن؟!
المهدي:ايه اكيد يدير فيها التارقي..
هي بشهيه ورجاء..
/جت في خاطري..كان تقوله يبعتلنا منها ان شاء الله حتى كسيره..
قربلها وهو مبتسم ابتسامه جانبيه شد وجعها بإيديه وباس راسها بعدين قال..
/حاضر ياكسيرة انتي..
ضحكت وهي عاقده حواجبها وهو تباعد عنها شويه واتصل بعبد القيوم..
☘ويبعت عبد القيوم تلاته فردات خبزة ودارت سدرة شرموله حارة ومعاها دلاع تعشوا بيهم وهما عايشين اجواء حلوة ليهم فترة محرومين منها واكثر من كان سعيد في هالليله سدرة المهدي..
🍃لكن بنت عمها جنه كانت مهبيه وحزينه راقده في حضن امها اللي كانت طبطب عليها وتقول..
/اسفه يامامتي غير اني تعبانه شويه الايام هادي سامحيني ياقلبي..باست ع راسها وضمتها بقوة وهي تفكر بخوف في اكثر من شي..
في اللي قاعد يصير معاها ومش لاقيتله تفسير..
وفي الجالي اللي مش قادرة تتوقع ع شن ناوي بعد ماسمعت باللي كان دايره لصورها..
وفي سدرة اللي جفتها هلبه وكأنها نستها ومعاش مهتمه لأمرها...
حالة من الخوف والحزن عايشه فيها طوبى حاليا وكل مالها تزيد تغرق فيها اكثر واكثر...
واريج حداها تشوفلها وبالها مشغول عليها وقلبها مقبوض..
#منازل_القمر
#طوبى
...يتبع....
