#طوبى "جنة طوبى"
#جمان_فريد
#الجزء_120"حلاوة الدنيا"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الحوقله
عن أبى هريرة رضى الله عنه عن رسول الله، صلى الله عليه وسلم، قال: "من قال: لا حول ولا قوة إلا بالله كان دواءً من تسعةٍ وتسعين داءً أيسرها الهم".
حديث رواه الإمام الحاكم وقال: صحيح الإسناد.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃أنا لست مثاليا... أنا دائما نفسي🍃
________________________________
🍀يوم الخميس
السابع والعشرين من شهر صفر
15اكتوبر...سنة 2020..
الساعه 12:15قبل الظهر..
"ياأنا ياأنا..أنا وياك..
صرنا القصص الغريبه..
ياأنا ياانا..انا وياك..
وانسرقت مكاتيبي..وعرفوا انك حبيبي"
..في شقتهم فالعاصمه طرابلس..
طلع من دار النوم وهو يسمع في صوتها وهي تغني معبي المكان كله..
ضحك وهو ماشي بإتجاه مصدر الصوت..الكوجينه...
وقف في بابها ولقاها تحوس فيها ودور...
ابتسم وقال..
/فيش ادوري!؟
سكرت الدولاب والتفتت وهي نقول..
/نبي ندير الغدي قاعدة ندور ع الماعين وباقي الحاجات..
جي بيخش بش يوريها اماكن الحاجات اللي تبيهم رفعت يدها قدامه وقالت..
/لالالا ماتدخل في شي اني نتصرف بروحي..اشرتله ع الكرسي وقالت..كان تبي تخش تقعمز خش..
ضحك ومشي لكرسي قدام الطاوله وخره وقعمز وراه وهو يقول..
/شن ناويه تغدينا؟
رجعت طوبى دور وفي تقول..
/مكرونه صالصه عمرك في حياتك ماكليت ولاحتاكل اطعم منها..
عبد القيوم بضحكه..
/ملاحظ فيك حاجه..تشكري في طعامك واجد..
طلعت طنجره من الدولاب وهي تتفحص فيها وتقول..
/مش ع فاضي والله..
ابتسم وقال..
/صح..لكن في حاجات نتحداك تقدري عليهن..
التفتت شافتله وهي رافعه حواجبها..
رفع هو حاجبه وقال..
/نتحداك ديري الطاجين اطعم من اللي ندير فيه..ونتحداك تقدري ع خبزة التنور...
بتحدي قالت..
/حندير الطاجين وحيطلع خير من اللي دير فيه بمراحل وخبزة الفرن حتى هي بعون الله كله حنديره ونجيبه احسن من جماعة الخبرة..
هو قال..
/ناعليا من اللي واثق من روحه..
رقصت حاجبها اليمين وهي مبتسمه بغرور مصطنع..بعدين مشت بنفس الغرور المصطنع للثلاجه وهو يتبع فيها بعيونه ويضحك..
سكتوا للحظات..هي تجهز في حاجات الغدي وهو يتأمل فيها..
شويه قالت وهي تقشر في الثومه..
/لكن تعرف..من اكثر الحاجات اللي عاجبتني فيك نظامك ونظافتك في الحوش تمنيت مرة نشوفك مخلي وراك فوضى ولاشي مش نظيف..
بإبتسامه استغراب قال..
/تمنيتي!
ضحكت وقالت..
/نبي نحس انك طبيعي زيك زي باقي الرجاله..
رفع حواجبه وقال..
/قصدك نا مش طبيعي!..
التفتت شافتله وقالت بإبتسامه حلوة..
/ايه..مرات نحسك راجل خيالي مافيش منك في الدنيا..
ضحك وهو عاقد حواجبه بإحراج وقال..
/ماتبالغيش..
ردت عليه بإبتسامة حب بعدين ردت نظرها للي بين ايديها..
وهو يراقب فيها قال..
/كيف ماتعرفي كبرت مع جدتي وهي الله يرحمها كانت مراة مرتبه واجد ونظيفه لدرجه تعيفك في نفسك كيف ماتقولوا خلتني نسخه منها في الحاجه هذي وفي نفس الوقت كانت تبيني نعتمد ع نفسي ومانكونش اتكالي..
طوبى:حبيتها من غير مانعرفها..
عبد القيوم بإبتسامه..
/مافي حد عرفها الا وحبها على طيبة قلبها واخلاقها كانت دير في الخير واجد نصيبها من الورث اللي خلاه جدي اغلبه راح في عمل الخير..من يوم عرفتها وهي اللي في يدها مش ليها..
شافتله وقالت بإبتسامه..
/هدا علاش انت طلعت هكي لأن اللي رباتك مراة زي هادي..راهو نص شخصية الراجل كان مش كلها تبنيها المراة اللي تربيه..
هز راسه بإبتسامه وهو يوافقها الرأي..
ولت للي دير فيه وقالت..
/الحوش اللي عشت فيه موجود!؟
هز راسه وقال..
/ايه..ان شاء الله قريب نمشوا للكفرة وتحقيه بعيونك..
طوبى وهي تشغل في الغاز قالت..
/ان شاء الله...
هو قال:لكن قبلها بنعدوا لبنغازي..الخميس الجاي ان شاء الله..
التفتت وهي تشوفله بمفاجأة..
وهو يشوفلها بإبتسامه حب...
🍃🍃🍃🍃🍃
طلعت للجنان..شافاته يلاعب في صغارها كالعاده..
ابتسمت وقالت..
/السلام عليكم
وقف ع حيله وعيونه ع الولاد وهما يلعبوا بالدراجات ورد عليها يقول..
/وعليكم السلام..
غرفه:خالتي صفيه قالت تبيني في شي ضروري..
شافلها وقال..
/جبتلك ارباح الشهر هدا من المحلات والمعرض..
رفعت حواجبها تعجبا وقالت..
/كيف صار!؟
تنهد وقال..
/تعرفيني قلت اللي قلته واني طايرتلي يعني مش قاصده..
نزلت حواجبها وقالت..
/لكن اني كنت جديه لما قلت معاش نبي منك شي..
عقد حواجبه وقال..
/غرفه ارجوك فكينا من العناد وتسكير من الراس وانتي وخواتك معاش تتصرفوا وكأن مافيش وراكم رجاله..
حاولت تتحكم في اعصابها وهي تقول..
/اني ياحسين مانحبش التعامل بقلة احترام ماعجبكش مني تصرف تقدر تكلميني بطريقه خير من اللي تعودت عليها منك ومن غيرك..اللي قدامك مش عيل ياحسين..
نزل عيونه وهو ياخد في نفس بعدين رفع عيونه وقال..
/عندك حق..اسف..
هزت راسها وقالت..
/صار خير..وبالنسبه للمواضيع اللي تخص رزق صغاري..
قاطعها وهو يقول..
/غرفه..غرفه..صغارك هادم امانه في رقبتي بوهم الله يرحمه وصاني عليهم قالهالي بالحرف الواحد خليتهملك يعني حنقعد متحمل مسؤوليتهم مامد الله ليا من عمر..
شافت لصغارها بعيون مليانات دموع وهو لما شاف نظرها حس بمشاعر وجعتله خاطره عليها..
تنهدت وقالت..
/بارك الله فيك..شافتله وكملت تقول..كلمك راجل طوبى وقالك جوا لطرابلس!؟
حسين:ايه قال بيخطم يجيبها هني بعد المغرب..
غرفه:ايه قالتلي طوبى بيتعشوا عندنا..
هز راسه وقال..
/تمام..اني توا بنطلع ندير مشاويري وبعد العصر نولي نرفع
