#طوبى "جنة طوبى"
#جمان_فريد
#الجزء_108"كانون الثاني/2020"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#فضل_الصلاة_الإبراهيمية
🌼وإذا لزمت الصلاة الابراهيمية واكتفيت بها عن باقي الأذكار فاعلم أنك لزمت أفضل الأذكار وأفضل الدعاء وأفضل العبادات
يكفي أن الصلاة على النبي هي العبادة الوحيدة التي تجعلك في إتصال مباشر مع الله والنبي والملائكة
فأي فضل يعادلها ؟!!🌼🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "وإذا رُزِقتَ بمَنْ يُحبُّكَ صَادقًا
حَافظْ عَليهِ فَمِثلُهُ لا يُوجَدُ
يَكفِيكَ قَلبٌ واحِدٌ عَنْ أمَّةٍ
تَحظَى بهِ بعدَ العَناءِ وتَسْعدُ"🍃
______________________________________
صباح يوم الجمعه..
في حوش المحجوب المرة هادي..
كانت الاجواء جميله ودافيه عكس حالة الطقس..
طوبى في هداكا الصبح كانت زي الشمس بإشراقتها من الفرح..
فرحة لاتوصف مسيطره عليها..وعلى ملامح وجهها متسيده ضحكتها الجميله..
فرحتها عكست ع اللي حواليها خلتهم كلهم مبتهجين بزيادة..
ماعدا...
🍃"غرفه تعالي لبنتك"
وغرفه مقعمزه شاردة الذهن مش منتبهه مع شي من اللي حواليها..
طوبى:غرفه..روفي..
استاقظت وقالت..
/نعم!؟
طوبى بإستغراب في حالتها..
/تنادي فيك نبيله قالتلك تعالي لبنتك.
تنهدت وناضت مشت من حداهم..
طوبى قعدت معاها بعيونها بعدين التفتت عليهم..
مطيره بضيق؛مش بلاش بكل حتى وزنها نزل..
اميمه شافت لطوبى بضيق وطوبى بادلتها نفس النظره..
صفيه:صدقيني مافي حاجه غير الوسواس والتخميم واكلها ع خاطر الصغار من هالمرض..
هاديه:كلنا نخمموا فيه وركبنا الوسواس الناس يطايحوا في الشوارع ويموتوا ومافي حد يقدر يجي جيهتهم..
اريج؛ايه هادوا في ايران الكورونا دايره فيهم حاله..
مطيره بخوف:يارب الطف بينا يارب..
ع جية نبيله وهي تضحك قالت..
/المشاغب اواب خدي لهايه اخته..
صفيه بضحكه؛يومها دار حاله يبي يرقد في الشنطه متاعها..
ضحكت طوبى وقالت..
/هو يغار اكثر من خوه..
ع خشة جنه تجري وهي تقول..
"ماما..اوبا..باحه" ...زلباحه..
طوبى:تخبر فينا شن صار..
مطيره بضحكه؛نجيها هالجرينه..
واللي حواليهم يشوفوا لجنة بإبتسامه..
نبيله بإبتسامه..
/ربي يحفظها..هي تفضلوا الفطور واتي..
🌼🌼🌼🌼🌼
ومن فطور اهل العروس..لقهوة العروس..
اللي شم ريحتها العريس وهو واقف قدام مراية الزيانه في دار النوم يبخ في عطره..
حط العطر ومشي طلع من الدار...
وصل في الكوجينه..وقف في بابها لقاها تجهز في السفرة..
قعد يتأمل فيها ومازال يسأل في نفسه..
هدا حلم ولاعلم!؟..
لتوا مش قادر يستوعب شي من اللي صار...
هي حست بوجوده خدت بكرج القهوة وبدت تصب في القهوة وهي تقول..
/خش..
ضحك ضحكه خفيفه وقدملها وصل فيها..شاف للسفره لقي الفل مزينها ابتسم وقال..
/نزلتي لوطا؟
حطت خصلة شعرها ورا وذنها وقالت..
/ايه..
سكت وهو يتأمل فيها...
هي كملت صبان القهوة شافتله بتكلمه جو عيونها في عيونه..
نظراته نستها شن كانت بتقول..
المهدي بحب..
/خايف هلبه..
هي قالت..
/من شني!؟
هو قال..
/خايف نطلع نحلم..
ضحكت ونزلت عيونها بعدين رفعت عيونها فيه وقالت..
/قعمز اشرب قهوة بش تتأكد انك في علم مش حلم..
تنهد من قلبه..وقعمز ع الكرسي..
وهي قعمزت خدت الفنجان وحطاته قدامه والمهدي مش قادر يغير عيونه عنها..
خدت فنجانها وقالت بضحكه عصبيه..
/تي خلاص عاد عقدتني..
المهدي؛شن هي!؟ خلاص!!؟ مازال تقولي خلاص انتي!؟ اشربي اشربي قهوتك وانتي ساكته..
ضحكت وخدت فنجانها وبدت تشرب وهو رجع يتأمل فيها..
شويه وشافتله بطرف عينها بعدين قالت..
/خلينا نحكوا جد توا..
حط الفنجان وعقد حواجبه وهو يشوفلها بإنتباه..
سدرة:شوف..اني من البدايه نبي الصغار يتعودوا ع وجودي معاهم مانبيهمش يحسوا نهائي اني بناخد منهم بوهم والمكان اللي كبروا وتربوا فيه هدا علاش نبيهم اليوم يتغدوا معانا هني واني بندير الغدي..
بدت ع وجهه ابتسامه حلوه وهو يقول..
/حاضر..
سدرة بإبتسامه..
/يحضرلك الخير..اعطي سميرة علم ماتحسبناش في الغدي..
المهدي بنفس الابتسامه..
/حاضر..
سدرة بضحكه؛يحضرلك الخير..اشرب قهوتك صقعت..
المهدي بإبتسامه؛تعرفي نظام ماكلتي ولا؟
سدرة بإبتسامه حب..
/من جدك تسأل فيا سؤال زي هدا!؟ اي شي يخصك نعرفه اكثر منك..
سكت كلام الشفايف وتكلموا مكانهم العيون بأحلى كلام حب مايقدرش اللسان يقوله..
مد يده ليدها..خداها وطبع عليها قبله وهي تشوفله بنظرات تغزل في العشق..
🌼تشيب الاجساد عمرا لكن الحب لا يشيب ابدا🌼
🍃🍃🍃🍃🍃🍃
"صحيت خالي بارك الله فيك"
حط يده ع راسها وبدي يرج فيه وطوبى تضحك..
المحجوب لنبيله..
/سمعتيها شن قالت!؟
نبيله بضحكه:هدا حوش خالكم بيبو مش براني..
حول يده وقال بإبتسامه..
/تي اني مش عارف فرحتي وين نحطها..
طوبى بإبتسامه؛ربي يحفظك ويطول في عمرك ويخليلك هالبرنسيسه..
حطت ايديها ع فمها وقالت بضحكه..
/تحشمت..
ضحكوا عليها المحجوب وطوبى..
🍃وكانت طوبى اخر من يسلم عليهم بعدين طلعت لسيارتها اللي كانوا راكبين فيها اريج ومطيره ومعاهم جنه..
ركبت وشغلت السيارة وتحركت..
🌼مطيره؛عمك شكري من بكري يتصل يراجي فيا في حوش
جدك..
طوبى:معقوله بيروح بيك توا!؟
مطيره:اخته عازمتنا قداش ليها وهو كل مرة يأجل في عزومتها لين حددتله واصرت عليه..
طوبى:باهي لكن لازم تجي غدوة بش تمشي لسدرة..
مطيرة؛اكيده هادي اني الاولى يخي..
ابتسموا طوبى واريج..وجنه في مقعمزه في كرسيها الخاص وبدت شويه شويه تنعس لين خداها النوم..
🍃🍃🍃🍃🍃🍃
"جتها حفله حلوة "
مختار وهو يشرب في المليسا..
/باهي كويس المهم فرحت بروحها..
فاتن؛امم..ميخو بنمشي غادي غدوة بنزور معاهم سدرة..
مختار:ضروري !؟
فاتن:سدرة حرصت عليا مرتين نجي..
تنهد وقال..
/ok..
سكتت شويه وهي تفكر بعدين قالت..
/اختك غرفه..
رفع حاجبه وقال..
/خيرها!؟
فاتن؛نحس فيها مهمومه امس كانت تبتسم بالسيف..
مختار:اكيد صايرة معاها مشاكل خاصه ماتعنيناش..
فاتن؛اني فكرت ان مرات راجلها بيشارك في الحرب او حاجه زي هادي وهي خايفه عليه..
مختار:ولايهمني..ناض بالمق ومشي و هو يقول..عندي اجتماع اون لاين ردي بالك تخشي عليا..
تنهدت وهزت راسها بصمت..بعدين ناضت وهي تقول..
/خل نمشي نشوف امينه..مشت خطوتين وفجأه وقفت لما حست الدنيا لفت بيها..
ولت قعمزت وهي تمرر في نظرها حواليها..لما استعادت وعيها تماما ناضت بهدوء وقالت..مافطرتش اليوم خل نمشي ناكل حاجه..ومشت بالشويه وطلعت من الصالون للكوجينه..
🍃🍃🍃🍃🍃
طلع من الحمام بعد ماكان يدوش..
خش لدار النوم لقاها تكويله في اللبس العربي للصلاه..
حط المنشف ع كتافه وقال..
/شن تخبرينا عن جو الحفله؟
غرفه وهي تكوي في رقبة سوريه "ثوب"..
/جتها حفله قنينه الحمد لله..
قعمز ع الكرسي وقال..
/راجيتك هلبه امس تبعتي صورة..
رفعت السوريه وقالت..
/بعتلك صور مئاب..ولبست العلاقه السوريه..
عبد الرؤوف:قصدي صورة ليك انتي!؟
علقت القميص ع الشماعه وقالت.
/نسيت..شافتله وقالت..تلبس الزبون العسلي ولاالأزرق..
عقد حواجبه وقال..
/غرفه تعالي قعمزي هني..
مشت طول وقعمزت وين ماقاللها مقابلاته ع السرير..
عبد الرؤوف؛ليك فترة حالك منقلب وزدتي جافتيني اكثر من قبل..شفتي مني شي ضايقك قلت كلمة زعلاتك اني مش راد بالي منها!؟
غرفه؛حالي زي ماهو ماتغير شي عاديه جدا انت علاش قلت هكي قصرت معاك في حاجه شفت مني تصرف ضايقك!؟
سكت شويه بعدين قال..
"تحبيني"
ضحكت وقالت..
/عليك سؤال.. ع فكرة مولي غريب شويه الايام هادي ..
ناضت وهي تقول..خلاص معاش في وقت ع الغدي خل نطلعلك الزبون العسلي ليك هلبه مالبستاش..مشت للدولاب فتحاته وهي تقول..ايه حقه بعدين بتجيني طوبى ديرلي الحنه اللي طلبتها قلتلها ماعجبتاش العاديه يبي وحده مزخرفه ع قولتك..ضحكت وطلعت الزبون..علقاته حتى هو وقالت..هي نوض سقد روحك شويه تانيه ويبدوا يتصلوا بيك..ومشت طلعت من حداه...
مرر نظره القدام بعدين تنهد بضيق وناض توجه للشماعه..
🍃🍃🍃🍃🍃
خشت عليه بالبخاره وهي تقول..
/اللهم بارك اللهم صل ع النبي...عليك طله يامهدي ماشفتها في حد...
وقربت منه وقعدت تبخر فيه هي وتقول..
/هدا عود اصلي حاجه صح راهو..
المهدي وهو هايم فيها...
/راهو قلبي بالهون من غير شي خفي عليه..
سدرة بضحكه قالت باللهجه المصريه..
/حاضر حسقيه من الحب جغمه جغمه..
المهدي بضحكه عصبيه ؛تي حولي من قدامي حولي..
وخرت وهي تقول بتعجب..
/الستر ياربي!
مشي طلع وهو يضحك..لحقاته وهي تقول..
/روح انت والصغار ماتخشش شقه من غيرهم..
التفت شافلها وهو يضحك حرك راسه يمين ويسار بعدين فتح باب الشقه وطلع..
هي تنهدت بإبتسامه وقالت..
/خل نمشي نكلم طويبه...
🍃🍃🍃🍃🍃
"غلط اكبر غلط اللي دير فيه عمتي..مش حتحصل منه حاجه.."
خديجه؛قلتلها نفس الدوة وهي شي مسكرة راسها..
نجاة؛شن رايك نمشولها لحوش خالك بالك وجه لوجه نقدروا نقعنوها تروح..
خديجه قعدت تفكر في كلامها..
نجاة:راهو حتى ع خاطر انتي..اني والجالي غدوة ماشيين لمصراته وبنقعدوا اسبوع عشرة ايام كيف بديري بروحك؟
خديجه؛اني مانغلبش فيهم هادم همي كله امي تروح وماتعطيش مجال لبنت شنيبه تسيطر ع الحوش باللي فيه حتى هي..
نجاة:خلاص نقولوا للجالي يرفعنا العشيه!؟
هزت خديجه راسها بالمواقفه..
رفعت نجاه تليفونها وهي تقول..
/هدا عين العقل..مانخليش حوشي لكل من هب ودب يحكم فيه واني نطلع ايديا ع راسي..
رفعت خديجه حاجبها وقالت..
/معاش تكلمي فصاحبتك..
نجاه وهي حاطه وذنها ع التليفون..
/من صاحبتي..
خديجه؛ابتسام..
نجاه بضحكه:من وين لوين صاحبتي..ايوه جللو..قتلك بعدين ترفعنا اني وخديجه لحوش خالك بش نهدرزوا على عمتي!؟......تمام بعد العصر.....ok..نهت المكالمه وقالت..خلاص بعد العصر يرفعنا..
خديجه؛باهي جاوبيني ع سؤال معاش كلمتي ابتسام..
عقد حواجبها وقالت..
/بالك النهارين اللي فاتوا..حالها زي قبل ماعندها مايجد عليها..
هزت خديجه راسها بصمت ونجاه من داخلها كانت تضحك بشماته ع حالها...
☘☘☘☘☘
"الله يبارك طول عمرها جميله خالتي سدرة"
فايزة بإبتسامه؛فرحتها زادتها حلاوة..
صفاء بضحكه:عاد خدت حبيب عمرها من زيها..ومدت لأمها التليفون..
خداته فايزة وقالت..
/ربي يهنيهم ويصرف عنهم كل شر..
صفاء:آمين..امس الدوة كلها عليها ولارقيه هادي مابطلتش تقصقيص لكن صكتيلها الازرق..
فايزة بضحكه؛ربي يعنيها ع نفسها..باهي وابتسام معاش شفتوها بكل..
صفاء بعدم تقبل..
/مشتيلها يومها بالسيف مع عواطف وسلفتي منى..الجو اللي دير فيه واضح مكشوف جو تمسكين نحلف عليها نست راجلها ومايجي منه من اول اسبوع وتوا قاعده تكتك بش يردها خوه..
فايزة:باهي مالمح حد لعزوزتك عن الموضوع هدا!؟
صفاء:قدامي مافي حد لمح بشي..لكن تبي الحق نحس فيها حتى هي تبي محي الدين يردها..
فايزة بتعجب:معقوله!؟
صفاء:هكي لاحظت من كلامها وتصرفاتها..
فايزة؛ضربه كبيره لبنت شنيبه كان صار هكي..
صفاء؛زيدها منه..
سكتوا شويه بعدين قالت فايزة..
/هالكورونا الغبرة شفتي شن دارت في الناس!؟
صفاء بخوف..
/والله ياماما بنموت من الخوف كان وصلت فينا شن نديروا لاصحه زي الناس لابلاد زي الناس اللي ماقتلاته الحرب تقتله الكورونا..
فايزة بقلق..
/اني بعد عرس سدرة معاش نبي نمشي لمناسبات بنطلع للخدمه بس ولا لحوش خالتك طوبى..
صفاء:ياريت نقدر ندير هكي..العيله غادي ماشيين مع نظرية المؤامرة وكذب وتمثيل ومش عارفه شنو..
فايزة:خليهم تو لما يوصل فيهم يعرفوا شن هو الكذب والتمثيل..اهم شي ردي بالك ع روحك وع حمودي..
هزت صفاء راسها وقالت..
/ان شاء الله...
ع جية مروة وهي حضنها احمد ومعاها تاله..
مروة بضحكه:عسل العساسيل ولدك هدا..
فايزة بضحكه:سلم وليد حناه ماجاباته كان امه بس..
ضحكت صفاء وبعتتلها بوسه في الهوا...
🍃🍃🍃🍃🍃
ركبوا الدروج مع بعض وواحد فيهم يقول..
محمد المهدي:نحس فيها بايخه يابوي ..
المهدي:تو اني شن نهدرز من بكري هي قالت ماتخشش شقه من غيرهم!؟
سدرة بضحكه؛بسطت سيطرتها من توا..
ضحك يزن بكتمان..ومحمد ضربها ع راسها وهو شاد ضحكته ويقول..تحشمي..
المهدي؛تعاوديها مرة تانيه معاش تكلميني..
سدرة وهي شاده ضحكتها..
/اسفه بابا..
وصل المهدي في الباب فتحه..
وخر وقال..خيركم واقفين خشوا..
خش محمد وهو متحشم وخشوا بعده خوته..
ع جية سدرة وهي لابسه عبايه مغربيه متاع حوش لونها ازرق غامق مع ابتسامتها الحلوة طلعت فيها قمة في الجمال بدون ماتحط اي شي من الزينه ع وجهها اخطا كحل العين..
زادت زهت في عين المهدي لكن قعد مسيطر ع نفسه قدام صغاره وماامعنش النظر فيها..
سدرة بإبتسامه وهي تغني..
/مرحبتين اهلا بالجيه مرحب ياضي القمراتي..
ضحكوا..
مدت يدها لمحمد وقال..
/شن جو..
صافحها وقال..
/تمام الحمد لله..
قالت:الحمد لله..صافحت بعده يزن وقالت..ياهلا بالمهدي الصغير..
صافحها وقال بضحكه..
/ديما يقولوا فيها..
ابتسم المهدي..
سدرة:لكن عاد انت احلى..
ضحكوا..
شافت لسدرة مدت يدها وقالت..
/السميه..شن اخبارك..
صافحتها وباستها من خدودها وقالت..مبروك..
سدرة بإبتسامه فيها شي من الخجل .
/الله يبارك فيك..
وخرت شويه وقالت.
/خيركم واقفين هكي!؟ حوشكم هدا خشوا..
ابتسموا وهما محرجين شويه وخشوا داخل..
سدرة جت بتلحقهم شد المهدي يدها وقال عند وذنها..
/نموت فيك..بعدين طلقها وتوجه للدار..
ضحكت ومشت توجهت للكوجينه..
لقت سدرة مقعمزه فيها بروحها..
سدرة الواعر:شن جو القرايه سديره؟
سدرة المهدي:توا كيف بدينا مرة تانيه..
قالتلها؛ربي يفتح عليك..تعاونيني نوتوا سفرة الغدي..
سدرة المهدي:سفرة!؟
التفتت وقالت بأبتسامه..
/ايه..نحب ناكل عالوطا اريح واحلى جربيها اليوم وشوفي..
سدرة بإبتسامه؛باهي نجربوا..
🌼وتعاونوا ع تجهيز سفرة الغدي وهما يهدرزوا..
تعاملت سدرة مع سدرة الصغيره وكأنها من عمرها هدرزت معاها بطريقه بان فيها التقدير..
وهالنوع من التعامل يعزز الثقه بالنفس ويقوي الشخصيه..
وهدا اللي كسباته طوبى من تربيه سدرة ليها بنفس الطريقه..
🌼🌼🌼
بعد ماكملوا طلعت سدرة المهدي بالمفرش ووراها سدرة بسفرة الغدي..
ناض محمد وخداها عنها..
سدرة قعمزت وهي تقول..
/عارفتكم مش واخدين ع الماكله هكي هلبه لكن صدقوني مش حتتبنونها غير هكي..
المهدي؛كسكسي!
سدرة المهدي؛ماتفكرش بابا..
سدرة بضحكه قالت..
/غير عري الصونيه اللي قدامك..
حول الغطا شاف فيها كسكسي حتى هي استغرب..
سدرة:هدا متاع قمح والبصله متاعه مش مدهنه هلبه هيا ابدا تغدا..هي اقربوا ياولاد...
🌼كلي المهدي من الكسكسي وعجبه هلبه اكيد مادام دايراته سلطانه قلبه بإيديها حيعجبه ويطير عقله فيه..
اما صغاره في البدايه كانوا ياكلوا ع الاستحياء ومع الهدرزة انطلقوا...
🌼سدرة؛بوكم كان عباره عن عاصفه متنقله اللي يقربه يطيره.
المهدي:اسكتي يانسيمه خيرلك وخليني ساكت..
سدرة؛ماعندك ماتقول فيا عقل وركازه يمشوا ع رجلين..
الصغار يسمعوا ويضحكوا..
المهدي:تمام ماقلنا شي..لكن كان ناض عليك البوري تولي غوله وفي ايدها غربال..مافيش بنت من بنات الشارع ماكلتش منك طريحه..
سدرة:اللي مادير شي مايجيها شي..
يزن بضحكه؛كنتوا تتعاركوا زمان؟!!
الزوز مع بعض قالوا..
"اييييه..اوووه"
ضحكوا عليهم..
سدرة؛بوك هدا كان مستفز للمليون والله مرة جيت بنضربه حزني عنه خوي مختار..
المهدي بضحكه؛وهو ميت بالضحك تتفكري.
سدرة بضحكه:يقولك برا خش داخل معاش نقدر نشدها..
ضحكوا بصوت عالي..
سدرة بضحكه؛هو بلعاني يبيني نحس روحي قويه ونحس بوكم خاف مني بش نهدا شويه..
المهدي بإبتسامه..
/عليك ايام..
ابتسمت سدرة بحسره..
محمد المهدي:ايامكم احلى من ايامنا..
الزوز مع بعض قالوا..
"بوين"..
شافولهم الصغار بإبتسامه..شافوا قداش منسجمين مع بعض وكأنهم شخص واحد..
برغم الوجع اللي داسينه في قلوبهم ملامح الفرح اللي شافوها ع وجه بوهم هونت عليهم هلبه...
🍃🍃🍃🍃🍃
بعد العصر...
توجهت طوبى لحوش اختها غرفه..
استقبلتها غرفه عادي ومشوا قعمزوا في الصالون..
لعبت طوبى مع الصغار شويه بعدين شربت قهوة هي واختها..
وبعدها انتقلوا لدار المعيشه وخلوا الصغار حداهم وسكروا الباب..
وبدت طوبى تلصق لاختها في لصقه الحنه وتهدرز عليها...
غرفه طول الوقت كانت شاده روحها وتحاول تبان عاديه قدامها..
لكن طوبى كانت حاسه بيها وتراجي فيها تتكلم...
🍃طوبى:خلاص خليها تقعد تلاته ساعات...
غرفه؛بالله غطي الولاد كويس..
طوبى:حاضر..
ومشت غطت التوأم بيده وحده كويس بعدين دارت طلة ع اختهم..وطلعت بش تغسل ايديها..
ولت مرة تانيه لقت غرفه تبكي..
تنهد بضيق وقالت..
/لاحول ولاقوة الا بالله..قعمزت جنبها وقالت..خيرك غريفه شن صاير معاك..
غرفه بنبرة باكيه..
/حاسه روحي مخنوقه وكارهه حياتي..
طوبى بقلق..
/علاش هدا كله!؟
غرفه بنبرة مخنوقه..
/من لما روحت سدرة وجي هداكا واني ع اعصابي خايفه نسمع كلمه من عبد الرؤوف ترجع تقهرني..برغم نظرات عيونه وطريقه اسئلته ديما تحسس فيا بالهزوة..
طوبى وهي مضيقه عيونها..
/كيف بالزبط؟!
غرفه؛زي لما نروح من عندكم يسأل فيا من كان في غادي نقوله مرت مختار نشوف ع وجهه في ملامح هزوة..ومرة..سكتت..
طوبى بشي من العصبيه..
/مرة شني كملي!؟
نزلوا دموعها وهي تقول..
/هادي الدوة صارت السبوع اللي فات..
نضت في الليل بش ندير لأواب مرضعه مالقيتاش حداي..
قعد ندور فيه لين سمعته في المربوعه يدوي بالتليفون مع واحد ماعرفتاش سمعته يقوله..
حاول تقنعه يفوتهم خير ويفك روحه من المشاكل وجع راس هلبه ودوشة ماتمش طليقها من تركينه وخوها من تركينه..معاش تحملت نسمع اكثر من هكي مشيت للكوجينه درت مرضعة ولدي واني نرعش مع بعضي والله هديكا الليله نحساب روحي بنموت..
طوبى وهي مصدومه ومستاءة قالت..
/معقوله يقول دوة زي هادي لحد براني !؟
غرفه ببكي:عبد الرؤوف لولا الصغار ماقعدش معاي ياطوبى..هو من غير شي مش قادر ينسى اللي صار زمان وزادت عمايل خوك ..تعرفي اليوم حسيته بيقولي بنطلقك قعدت نتهرب منه..
طوبى ودموعها في عيونها..
/كيف!؟
🍃حكتلها اللي صار قبل صلاة الجمعه بالتفصيل..🍃
غرفه ببكي:حسيته يبيها تجي مني ياطوبى واني مانبيش نطلق وفي رقبتي تلاته صغار ولانبي من يدوي علينا مرة تانيه والله مافي واحد مقايل فينا استغفر الله..
نزلوا دموع طوبى وهي تقول بحمقه..
/طز في كلام الناس والف طز..ياغرفه كان معاش يبيك حوش بوك مفتوح ليك انتي وصغارك الحوش اللي يربي في جنة يربيهم ولاتقعدي تقهري في روحك هكي..وبعدين من هو دراه الكبد اللي مازال يكلم فيه عليا..اني مانبي حد معاش تبي نتزوج بكل يخطوا اصلي الهم.. غمضت عيونها بشده وقالت..استغفر الله..استغفر الله العظيم..فتحت عيونها ومسحت دموعها بعدين شافت لاختها وقعدت تمسح في دموعها وهي تقول..
واجهيه سلم وخيتي واجهيه معاش يبيك سلامته لمي حاجتك وتعالي طول..كل شي يهون ولا تكسري نفسك لحد مايبيكش..
وغرفه تسمع فيها وهي تبكي بصمت..
شافتلها طوبى شويه وقالت..
/معناها مش هو اللي طلب الحنه هكي!؟
غرفه:لاهو اللي طلبها حسيته يدورلي في سبله بش يدير مشكله..تعرفي ياطوبى كانك عليا اني خلاص معاش عندي ليه من هداكا اليوم وقتلك الكلام هدا وقتها لكن قرار الطلاق مش ساهل لوحده في حالتي والله ماساهل..
مسحت طوبى ع شعرها وقالت..
/باهي نقولك..صلي استخارة وبعدين واجهيه واللي فيها الخيره يديرها ربي..وللمرة الالف نقولك ماديريش لكلام الناس راس مال ديري الصح وماتعدلي ع حد..
هزت غرفه راسها بإيجاب وهي تفكر في كلام طوبى...
🍃🍃🍃🍃🍃
وعبد الرؤوف في هالوقت مع واحد من اصدقائه كان من ضمن المشاركين في الحرب..
يعطي فيه اخبار جبهات القتال في العاصمه..
:حسين الواعر معروف والجماعه يتحرموا فيه هلبه المده الاخيره نشوف فيه فالصفوف الاماميه..
عبد الرؤوف بقلق..
/توقعت مايصبرش..قاطع كلامه تليفونه لما رن قال..لحظه شويه..شاف المتصل لقاه ربيع فتح الخط ورد..
/ايوه ربيع..
"ايوه رؤوف..تعرف شن صار في التارقي !؟".
عبدالرؤوف بشي من الخوف..
/خيره!؟
"محبوس من امس تاهمينه تهمه كبيره في خدمته رؤوف.."
عبد الرؤوف بصدمه..
/شن تقول ياراجل!.
"اللي سمعته اعتقد كل شي واضح قدامك "
عبد الرؤوف مط شواربه لداخل بغضب بعدين قال..
/تو نزيد نشوف الموضوع ونرد عليك..
نهي المكالمه واعتذر من صاحبه واستأذن منه ومشي لسيارته وهو يقول بغضب..
/زي ماتوقعت عاود نفس السيناريو..ااه منك ياتارقي شوف اخرة عنادك وين وصلاتك..
وركبت سيارته وشغلها وتحرك طول وهو يحرق في العجل...
#كانون_الثاني
#طوبى
...يتبع...
