■■■■■■■■■■■■■■■■■■■■
❎تنويه❎
بعض احداث اقسام جزء #منازل_القمر صعبة ومرهقه نفسيا
#طوبى "جنة طوبى"
#جمان_فريد
#الجزء_116"منازل القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير.. 🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 بشكل ما، بقيت ملامح الأحداث على وجهي🍃
_____________________________________
الإنسان..لما يكون صاحب قلب نظيف..ويعرف الصح من الغلط وتعود في حياته يدير الصح ع قد مايقدر وع قد مايقدر يتجنب الغلط..لما تجيه لحظه يفقد فيها تركيزه ويرتكب الخطأ وين يرجع لعقله يبدا يحس بأتعس شعور يحسه الإنسان..الندم..ويقعد يلوم في نفسه ويسألها..
"اني كيف درت هكي"
🌸وهدا اللي صار لتاله..تاله ع صغر سنها عايشت احداث ومواقف خلتها تكبر قبل وقتها وتتعلم حاجات لسنها ومش لسنها ومع الاسف في عمر زي هدا "سن المراهقه" لو مالقتش حد يوجهها كويس حتما حترتكب اخطاء..
بس الفرق بينها وبين اغلب بنات جيلها في زماننا هدا هو ان البيئة اللي تربت فيها صالحه لهالسبب اي غلطه ديرها حتوقف عندها وتخاف من عواقبها وتحاسب نفسها عليها في الوقت اللي فيه بنات جيلها يديروا ماهو اسوأ ومستمتعين ومش حاسين انه غلط نهائي..والله المستعان..
🍃ليلتها تاله ماكانتش ع بعضها طول الوقت متوترة وغالبه ملتزمه الصمت...
فايزة زي ماصارلها مع صفاء ومروة ماتنتبهش للي يصير مع بناتها الا بعد مايتأزم الوضع وممكن المشكله اللي صايرة معاها حاليا خدت كل تفكيرها..
اما مروة..الاخت اللي تكبر تاله عمرا وخبرة في الحياة اغلب تركيزها كان ع وضع اختها..ياما شافت عليها من تصرفات اثارت فيها الشك واليوم بالذات قررت تتكلم معاها..
*******
في دار تاله...
مروة:قوليلي حبيبتي كان في شي صاير معاك احكيلي من امتى ندرقوا ع بعض حني..
تاله وهي تفرك في ايديها ببعض وعيونها عليهم قالت بشي من الربكه..
/باهي بنقولك لكن بالله عليك ماتعصبيش عليا..
مروة حست بالخوف لكن وهي تكلم فيها حاولت تحافظ ع هدوئها لما قالت لأختها...
/قولي مش حنعصب عليك..
تاله بضيق ووجهها ولى يحمر خجلا..
/اني نحب واحد..
مروة شدت ضحكتها وقالت..
/حب شني اللي تعرفيه انتي!؟
شافتلها وقالت..
/مش صغيره اني وانتي تعرفي اني كبرت خلاص..
مروة ابتسمت وقالت..
/باهي ياكبيرة قوليلي من هو هدا اللي تحبيه!؟..غمضت عيونها وقالت..راجي راجي..راك تقولي مروان ولد جيرانا!؟
تاله بقرف..
/عينك ماناقص..
فتحت مروة عيونها وقالت..
/مالا منو..
شبكت تاله صوابعها في بعض ونزلت عيونها وهي تقول..
/يزن..
ضيقت عيونها وقالت..
/يزن ماغيره!؟
هزت تاله راسها بإيجاب..
مررت مروة نظرها ع اختها بعدين قالت..
/بصراحه يزن اني واخده منه موقف..
قامت عيونها وقالت بخوف..
/علاش!؟
مروة:لما صارت معاي المشكله هديكا نتفكر في شبحاته ليا كيف كانت وقتها حسيت روحي كرهته اكثر من خوه..
كلام مروة كبر الخوف في قلب تاله وخلاها تزيد تندم ع اللي داراته..
مروة:مش عارفه شن نقولك بس اني كنت في عمرك وعشت حاجات نحسابها حب وطلعت بعدين مشاعر طايشه وين نتفكرها نضحك عليها..تولي حبيبتي حني مانبوا حد يتكلم ع ماما ويقول ماعرفتش تربي اي تصرف نديروه محسوب علي ماما بالدرجة الاولى ماتنسيش محمد شن دار معانا في مشكلتي هديكا وزي ماقتلك يزن مازال احرف منه كان شاف حركة منك هكي ولاهكي يديرك وحده مش متربيه ويخلي اخته تقطع علاقتها بيك..
تعبوا عيون تاله بالدموع وقالت..
/اني نحس فيه يحبني!؟
مروة بإبتسامه..
/كيف ترا!؟
تاله:لما نروح من حوشهم لازم يروح وراي ومرة تعارك هو ومروان ع خاطر ناشبني..
مروة:امتى!،
تاله:الاسبوع اللي فات
مروة:حبيبتي هدا مش معناه انه يحبك انت بنت شارعه وصاحبة اخته طبيعي بيحزر عليك..
طاحوا دموع تاله وهي تشوف لأختها دموعها قطعوا قلب مروة..قربتلها وضمتها وهي تقول..
/ياروحي..حبيبتي الهي بقرايتك بس توا الحاجات التانيه لاحقة عليها ان شاء الله..توتكبري وتتخرجي ويجيك شبوب سموح يخطبك وتتزوجوا وتعيشوا احلى قصة حب..
تاله تسمع في كلام اختها لكن ماتأثرتش بيه مشاعرها الحاليه مسيطرة عليها ومش قادرة تفكر غير في نتيجة فعلها..
🍃🍃🍃🍃
"صار السي مختار جي"
حطت اريج راسها ع المخده وقالت..
/تعرفي وليت معاش طايقه نشوفه..
غرفه وهي تحط في بنتها ع الفراش ببعد مارقدتها..
/مازال بيجي تاني الموال اللي في راسه يبي يغنيه بأي طريقه..
اريج بقلق:ربي يصرفه علينا..
غرفه:ايه والله يعطيه فاش يلهى..
ع خشة طوبى وهي تقول بشي من الوجع..
/صوت المولد قلبلي راسي..
اريج:رجع الصداع!؟
طوبى وهي تفرك في جبهتها قالت..
/ايه وين البنادول دورت عليه في الثلاجه مالقيتاش..
غرفه بعدم رضا..
/مش باهي البنادول ع معده فاضيه ياطوبى..
طوبى بإنزعاج؛فاضيه شني تعشيت!
غرفه:ماهناك ماكليتي..
طوبى بضيق:هادي حد ماكلتي..بالله اللي عندها بنادول تعطيني..
ناضت غرفه بإستسلام وهي تقول..
/تعالي معاي..
مشت طلعت وطوبى لحقتها وخلت القلق ياكل في قلب اريج عليها...
🍃🍃🍃
خدت طوبى البنادول ومشت للدار بش ترقد وكالعاده لاسألت ع بنتها ولادورتها..
حطت راسها ورقدت بصعوبه وبعد مرور ساعتين ع نومها فاقت..
وللمرة التانيه تفيق ع شعور رهيب بالخوف..
مررت نظرها ع الدار..ظلام دامس..توقعت ان الضي انقطع مرة تانيه .
ويزيد شعورها بالخوف..ماكانش هالشعور طبيعي في حياتها ماحست بيه هكي..
طلعت تليفونها من تحت المخده ضوت الشاشه بعدين فتحت الفلاش..
نزلت من السرير ومشت بطريقها للباب فتحاته وطلعت..
رجليها مارفعوهاش لدار المعيشه..بل خلوها تمشي لباب الحوش تفتحه وتطلع..
قعدت تمشي في الجنان وهي خايفه خوف شديد..
تمشي وتمشي لعند ماوصلت في الكرم متاع العنب..
قعمزت تحته..وضمت نفسها من الخوف..
اصوات المولدات الشغاله في حياش الجيران رجعوا شعورها بالصداع مرة تانيه وشعور الخوف كل ماله يزيد لدرجة تمنت فيها لو تموت..نزلوا دموعها وزادت حضنت نفسها بقوة..
هي طوبى من زمان ماتحبش الليل لعند ماتعودت ع صلاة القيام بدت تحبه وتتلهف لحلوله..بس توا رجعت كرهت الليل وتمنت لو معاش يجي..
🍃وتمر الساعات وهي مقعمزة تحت الكرمه وشويه شويه شعور الخوف بدي يخف لعند مارقدت وهي حاطه راسه ع عمود الخشبي مافاقتش الا ع صوت الآذان الكاذب..
فتحت عيونها ومررت نظرها حواليها وهي تسمع..
"أشهد أن لااله الا الله"
فجأه..بدت تحس بوخزات في جسمها كله..وكأنها تنضرب بإبر ..
ناضت ومشت خشت داخل بسرعه وسكرت الباب حطت الهاتف ع المدخل وتوجهت طول للحمام بش تدوش..
🍃وبرغم الدوش اللي داراته مازالت تحس بالوخز في جسمها كله...
بعد مالفت شعرها فوق كانت تبي ترقد وتفوت صلاة الفجر..
لأول مرة تجيها هالرغبه..
مشت للسرير انطرحت عليه وغمضت عيونها ويأذن الفجر..
ويبدا في داخلها صراع رهيب بين رغبتها في النوم وبين رغبة قلبها في الصلاة..
رجعت سمعت جملة التوحيد ويرجع الشعور بالوخز اكثر من قبل لدرجة بدت تحس بيه فعيونها..غمضتهم بقوة ورجعت فتحهم..
وناضت قعمزت ومازال تسمع في الآذان..
بعد ماانتهي خف الوخز شويه شويه..ورجعت رغبتها في النوم..تمددت ع السرير وغمضت عيونها..
فاتت دقيقه..اتنين..تلاته..اربعه..خمسه..
وتفتح عيونها وتنوض تنزل من ع السرير وتطلع من الدار بإتجاه الحمام بش تتوضا وتصلي..
🍃صلت وهي معصبه..كانت حاسه بضغط نفسي قوي لكن قلبها خلاها تتحمله لين كملت الصلاة وطول انطرحت ع السرير ورقدت بالملاية...
🍃🍃🍃🍃
يوم الإثنين..
الخامس من شهر محرم..
24اغسطس..سنة2020..
الساعه 2:00بعد الظهر..
🍃"حطي كلب البحر في الطنجرة"
حطت سدرة المهدي قطع كلب البحر في الطنجره وبعد ماحطت الصونيه جنبها خدت كسكاس الكسكسي وحطاته فوق الطنجرة وقالت لمرت بوها..
/نغطيه؟
سدرة وهي تقرض في البطاطا..
/لالا خليه..
سدرة وخرت عن الغاز وقالت..
/باهي..
ع خشة يزن مرر نظره عليهم وقال..
/عطيكم الصحه..
ردوا عليه...
"سلمك.."
هو شاف لأخته واشرلها بيده تلحقه..ومشي..
استغربت ومشت طلعت وراه..
لقاته واقف فم باب دارها لما شافها خش..
وهي بإستغراب شديد لحقاته..
يزن:سكري الباب..
سكرت الباب وهي تقول..
/شن في!؟
يزن:توا تكلمي تاله وتقوليلها تجيك العشيه ضروري..
سدرة بفضول:علاش!؟
يزن؛مادخلكش..قوليلها تجي وردي بالك تجيبيلها سيرتي ردي بالك..
سدرة هزت راسها وقالت..
/حاضر..
يزن بحده وتهديد؛ضروري تجي ياسدرة وحي عليك تقوليلها يزن يبيك تجي..
سدرة بخوف:لالاوالله مانقوللها حاجه..
ركز علي عيونها وهو يشوفلها بنظرات تهديد بعدين مشي فتح الباب وطلع..
بعد ماطلع ابتسمت سدرة وقالت..
/شكله بيعترفلها..عقدت حواجبها بتفكير وقالت..زعمه نقوللها!؟ لالا خليها مفاجأة احسن..
ومشت طلعت لوين مافي الهاتف الارضي بش تكلمها...
*******
تاله بخوف؛علاش!؟
جاها صوت سدرة المفرفح وهي تقول..
"غير تعالي ياهبله وتو تعرفي بايات"
ونهت المكالمه وخلت قلب تاله يدق بقوة لكن مش من الخوف هالمرة بل من شعور السعاده اللي حست بيه لما فسرت كل شي تفسير وردي والقلوب تتناثر من عيونها والفراشات الملونه طير حواليها...
🍃🍃🍃🍃
مجتمعات الثلاثه حوالين سفرة الغدي وحداهم الصغار ياكلوا في سفرة تخصهم..
اريج وغرفه كانوا ياكلوا ويهدرزوا اما طوبى كانت يدوب تاكل..
مزاجها اليوم معكر بزياده وراسها مازال مصدع وفوق هكي عندها رغبة في النوم..
وجهت نظرها لأواب ولد غرفه اللي يدق بكاشيكه ع الصونيه متاعه..صوت الدق تحس فيه فراسها..مع كل دقه كانت عصبيتها تزيد..
شافت لغرفه لقتها منسجمه في الهدرزة مع اريج كانت تبي تكلمها لكن تحشمت منها..
نزلت عيونها للصونيه وحاولت ترجع تاكل مرة تانيه..ضيقت عيونها بشدة لما حست بوجع راس شديد وهي تسمع في مهاب وجنه يديروا في نفس الحركه اللي يدير فيها اواب..
جتهم مئاب تبي تقلدهم حاولت تاخد كاشيك خوها بعد يده اللي فيها الكاشيك والبنت بدت تعيط.
هني طوبى حست وكأنه في صعق كهربائي صاب راسها غمضت عيونها بشده وبصوت عالي قالت.
/خلاص خلاص..ياسر انت وياها!..
الصغار انفجعوا قعدوا يشبحولها وهما جامدين في مكاناتهم..
والفجعه كان لأريج وغرفه نصيب منها..
فتحت طوبى عيونها وهي تقول بعصبيه..
/دوشتهم هلبه معاش تخلوهم حدانا لما ناكلوا..
لوحت الكاشيك في السفره وناضت طلعت من الدار..
اريج غيرت نظرها لغرفه حست بخوف من ردة فعلها..
لكن غرفه قالت بضيق..
/عندها حق مفروض غديناهم قبل بعدين تغدينا..
غيرت اريج نظرها للصغار وقالت..
/كولوا ياقلبي كولوا..
شافتلهم غرفه وقالت..
/هي تغدوا حبايبي..وخدت بنتها حطتها في حجرها وقعدت توكل فيها...
🍃وطوبى بعد ماخشت للدار سكرتها عليها ورمت نفسها ع السرير وغمت راسها بالمخده وبدت تبكي...
🍃🍃🍃🍃
الساعه 6:30مساءا..
🍃"حاولت فيها بش تجي مابتش تنوض نومها ثقيل هلبه"
الطبيبه النفسيه قالت..
/امم..تصدقي اني كنت متوقعه طوبى توصل لهالحاله..اني لاحظتها في الكم مرة اللي اجتمعت فيهم معاها ان عندها مشكله التفكير الزايد في اللي حواليها وتحاول ديما تكون قويه بسبب المسؤوليات اللي تحملتها..واللي زاد فاقم الوضع هو الكمد والكتمان لأوجاعها واحزانها كانت حريصه كل الحرص بش ماتخليش حد يحس بيها ويحمل همها..لاأخفيك سرا هي توا تعتبر خاشه في حالة انهيار داخلي اللي تحملاته كان فوق طاقتها..
غرفه ودموعها في عيونها قالت..
/باهي شن مفروض نديرولها يادكتورة حاسه روحي عاجزة مافي يدي شي خايفه اختي تريح من بين ايديا قدام عيوني..سكتت وحطت ايديها ع عيونها وهي تبكي..
خلتها الطبيبه تبكي ع راحتها للحظات بعدين قالت..
/عندي سؤال..
مسحت غرفه دموعها وهي تقول..
/شن هو!؟
الطبيبه:سدرة..وينها!؟
قعدت غرفه منزله عيونها ودموعها مازال ينزلوا..
الطبيبه:ياريت تجاوبيني ع سؤالي..
غرفه رشفت وقالت..
/مقاطعتها..
الطبيبه:مني اللي قاطعت التانيه؟
غرفه:سدرة..
سكتت الطبيبه شويه بعدين قالت..
/امم..المهم توا ننصحكم تكونوا ديما معاها تدعموها تحتووها وتتحملوها ولو ماتبيش تجيني اني تو نمشيلها..
غرفه ابتسمت مجامله وقالت..
/ان شاء الله..
🍃🍃🍃🍃
واقف هو اخته في اخر الجنان اللي يجي تحت شقتهم..
🍃سدرة؛اهيا جت..
يزن؛ردي بالك تقوليلها عني شي ردي بالك..بري افتحي..
مشت سدرة لباب الحوش وهي شاده ضحكتها..
وصلت فيه وفتحت الباب وقعدت وراه..
خشت تاله وهي تقول..
/شن في!؟
سكرت سدرة الباب وخدت يدها وهي تقول بإبتسامه..
/تعالي..
ومشت بيها وتاله تسأل فيها..
/قولي شن في بالله عليك!
سدرة:توا توا تعرفي..
كملت تاله طريقها مع صاحبتها وقلبها يدق بقوة وحست بشويه مغص في بطنها..
وين قربوا يوصلوا في المكان اللي فيه يزن لما بان عليها قلبها كاد يطلع من مكانه..
وهو قعد واقف وعيونه في الارض..
وصلوا فيه وسدرة قالت لخوها..
/اهيا..
ضمت تاله ايديها لبعض ونزلت عيونها لوطا وهي مبتسمه بخجل..
وسدرة توزع في نظرها بيناتهم وتحاول تبان عاديه قدام خوها..
عقدت حواجبها بإستغراب لما شافاته طلع حاجه من جيب بنطلونه الخلفي..
حمحم وقال ..
/خالتي فايزة عندي في مكان امي وغلاوتها ويشهد عليا ربي من غلاوة امي لأن اللي تحبه اني نحبه ونقدره ومستحيل نغلط فيه مهما يصير..
عقدت تاله حواجبها بخوف ومازال عيونها تحت وايديها رختهم من بعض..
كمل يزن كلامه وهو يحرك في يده اللي شاد بيهم الرساله والحديده..
/اني نعرف ربايتك كويس ومانبيش نغلط فيها وياريت ياتاله حتى انتي ماتغلطيش فيها ماديريش تصرفات تجيب لأمك الدوة ماتخلي حد يوصل في امك ياتاله مراة تعبت عليكم وربتكم وياما شافت ع خاطركم ماتستاهلش ديري فيها هكي..مدلها الحديده والرساله وهو يقول..
/حنعتبر اللي صار كأنه ماكان زي مايقولوا وبننساه مرة وحده لكن صدقيني لو شفت عليك غلط مرة تانيه مش حنخلي اختي تعرفك..
شافت سدرة لتاله ودموعها في عيونها..
تاله وهي تسمع في كلامه كانت تتمنى الارض تنشق وتبلعها دموعها طاحوا منها وعيونها قعدوا ف الارض وشدت ايديها في بعض بقوة...
يزن:خوديهم والحديده متاعي رديها..
بدت ع وجه سدرة ملامح الصدمه وهي تشوف لتاله..
فكت تاله ايديها من بعض..كانوا يرجفوا..
يزن رفع عيونه وشافهم..شافها كيف قامت كمها عن رغسها اللي كانت ملبساته الحديده..
فكتها وهي تبكي...رفع عيونه لوجهها شاف الدموع عبوهم وشفايفها ترجف من البكي..
نزل عيونه طول..مدتله الحديده متاعها وخدت منه الحديده والرساله..
هو خدي الحديده وهي مشت بسرعه للباب ودموعها مابطلوش نزول..
كل اللي تبيه انها تهرب منه ومعاش تخليه يشوفها عمرها كله
فتحت الباب وطلعت قعدت تمشي وقصت الطريق وهي تبكي لعند ماوصلت في حوش سدرة فتحت الباب وخشت وسكراته بقوة..
هدا كله صار ع عيون محمد المهدي اللي كان واقف في قهوة عمه..وعيون محمد حامد اللي كان واقف قدام حوش عيلة الصيد مع ولد خالته وولد عبد الفتاح..
🍃في جنان حوش شنيبه..
وين مافي يزن وسدره..
سدرة لما جت تلحق تاله شدها خوها من يدها وهو يقول..
/تندري عليها انتي!؟
سدرة وهي تبكي..
/لا والله العظيم لا..لكن تاله بنت متربيه يايزن باهي صح غلطت لكن مش قصدها والله متربيه وكويسه..
فك يدها وهو يقول..
/بري اركبي..
مشت سدرة للدروج وهي تبكي..
يزن قعد معاها بعيونه لين ركبت تأفف بضيق..بعدين نزل عيونه للحديده قعد يشوفلها للحظات...ولما جي بيلبسها تفكر شكل تاله وهي تبكي لما كانت تحول فيها..
غمض عيونه بشده بعدين فتحهم وحط الحديده في جيبه بعصبيه ومشي بإتجاه باب الحوش..
🍀🍀🍀
ويعدوا اربعه أيام..
تاله قاطعت فيهم سدرة مش لأنها خدت منها موقف بل خجلا من اللي داراته وفي نفس الوقت ماكانتش تبي اي حد او اي شي يفكرها بيزن..
حكت لمروة اللي صار كله..عاتبتها و احتوتها في نفس الوقت وخلتها ان تفهم ان اللي صار معاها كان عبارة عن درس لازم تتعلم منه وفي النهايه اتفقوا مايبينوا شي لأمهم..
🍃امهم اللي قاعده تعاني من المعجب اللي كان يوقفلها بالساعات قدام المركز ويبعتلها في الورد..
حاولت طبق نصيحة صاحبتها وتتجاهله وهي متأمله انه حيمل في النهايه ويخليها..
لعند ماجي يوم..
مشت فيه فايزة لأحد اسواق المواد الغذائيه بش تاخد تموين للحوش..
🍃هاليوم كان السبت..
العاشر من شهر محرم..
29اغسطس..سنة 2020..
الساعه 6:00مساء..
كانت فايزة تتمشى بالكروسة "العربه" وتحط فيها في البضاعه اللي تبي تشريها..
وهي تمرر في نظرها ع الحاجات جو عيونها ع حد واقف بعيد شويه يشوفلها بإبتسامه..
كان هو نفسه..هي انصدمت وخافت وع طول لفت بالكروسه ومشت بسرعه هاربه منه..هو سرع خطواتها ولحقها لين سبقها ووقف قدامها..
حط ايديها ع بعض وهو رافعهم افقيا وقال بإبتسامة رجاء..
/ارجوك عطيني خمسة دقايق من وقتك مش مطول عليك صدقيني..
ردت عليه وهي تقول بشي من الحده..
/انت اللي ارجوك خليني في حالي تربح..
هو قال:اقسم بالله نيتي معاك صافيه نبيك بالحلال..
ضيقت عيونها وقالت..
/كم عمرك بالله!؟
عقد حواجبه وقال..
/شن قصدك!؟
فايزة؛جاوبني قبل..
هو قال:اني مواليد 86..
فايزة:عندك علم راجل بنتي من عمرك ومانقوله كان ياولدي ماناديش فيه بإسمه..سلم ولدي برا شوف وحده من جيلك وماتكسبش دعي الولايا عليك..
ومشت وخلت الكروسه..كانت حاسه ان عيون الناس كلهم عليها وفي الحقيقه مافي حد لاهي بيها كل حد لاهي بهمه..
لكن تفكير فايزة هدا مستحيل يتغير بسبب اللي مرت بيه حتقعد دايما شايفه روحها قاعده تحت مجهر نظرة المجتمع اللي ماترحمش..
🍃ونظرة هالمجتمع الظالم هي اللي خلت افتراءات خديجه ع ابتسام تنتشر وتوصل في ناس يعرفوا ابتسام ووصلولها الدوة اللي طالعه عليها..
برغم ان ابتسام حتى هي انسانه سريرتها مش نظيفه لكن الكلام اللي طلع عليها قهرها وبكاها وقررت تتصل بحماتها نجاح وتحكيلها اللي سمعاته..
🍃"نهارها اسود الحقيره هادي"
هدا كان رد عواطف ع الكلام اللي سمعاته من نجاح..
نجاح بغضب:الكلام هدا ماينسكتش عليه لازم يندارلها حد البنادمه هادي..
نجمه كانت تسمع فيهم وهي تغلي من الغضب فكرت شويه بعدين قالت..
/ماتعاودوا لمحي الدين شي..تو نقول لبوكم وهو اللي يتصرف..
*******
الصيد بصدمه:معقوله دوة زي هادي تطلع من خديجة شنيبه!؟
نجمه:عندك حق ماك ماتعرفهاش زي ماحني نعرفوها..اني مانبيش الدوة توصل لمحي ابتسام بروحها قالت مابيتش نحكيله خوف يتهور ويدير مصيبه برا انت للحاج محمد وكلمه وقوله يدير لبنته حد..
تنهد راجلها بضيق وهز راسه بإيجاب..
🍃🍃🍃🍃
طلعت للجنان لقتها مقعمزة تحت شجرة الياسمين وفي يدها فنجان قهوة تشرب فيه..
غرفه:طوبى..
التفتت طوبى وشافتلها..
غرفه:ماشيه لحوش عمي ساعة ومروحه حاطه طنجرة فاصوليا ع النار مرة مرة شوفيها..
طوبى:اريج قاعده في المحل؟
غرفه:ايه..
طوبى:باهي بري تو نشوفها..ولفت وجهها عنه ورجعت سرحت بتفكيرها..
تنهدت غرفه ومشت لفت ع الجنان لين وصلت في الباب الفاصل..
دقت عليه شويه وفتحتلها هاديه..
/ياهلا بالبزنس ويمان ياهلا..
ضحكت غرفه وقالت..
/شن جو توا..
هاديه؛مليح..
خشت غرفه وسكرت الباب وهي تقول.
/ماهبلوكش الصغار!؟
هاديه:بالعكس مونسيني ومعبيين حياتي.
ابتسمت غرفه..
هاديه:تعالي حسين يراجي القدام..
ومشوا مع ببعض للجنان الامامي..
لما وصلوا فيه لقوا حسين كعادته هايم مع الصغار..
هاديه:افندينا..
التفتلهم وعيونه ماجوش الا ع غرفه..
اخر مرة شافها فيها كانت اخر يوم ليهم في الخمس،هو بعدين انشغل بحاله وكذلك بحال رزق صغار عبد الرؤوف..
وهو يشوفلها توا حس وكأنه كان مشتاق لشوفتها تجاهل احساسه هدا وخلا روحه عادي وهو يقدملها..
وقف عليها وقال..
/كيف الحال..
غرفه:الحمد لله..كيف حالك انت..
حسين:الحمدلله..
هاديه:قعمزوا ع الكراسي قعمزوا..شويه وجايه..
ومشت طول خشت للحوش..
اشر حسين لغرفه ع الكرسي وقال..
/قعمزي..
قعمزت غرفه ع الكرسي وهو جاب شنطه يد كان مسندها ع الحيط وجاها قعمز مقابلها..
فتح الشنطه وقال..
/عندك علم كنت في تركيا..
غرفه وهي متفاجئه..
/والله مانعرف
عقد حواجبه وابتسم وهو يقول..
/امم..طلعلها ملف شفاف ومدهولها وهو يقول..الملف هدا فيه كل شي يخص المبنى اللي كان مأجره عبد الرؤوف الله يرحمه غادي..
خداته وهي تشوفله..
حسين:افتحيه ترا..
☘فتحاته وهي وتمرر في نظرها عليه وحسين بدي يشرحلها عن محتوى الملف بالورقه..كانت مركزه معاه تركيز تام..حريصه جدا ماتخليش اي شي يفوت عليها تبي تفهم وتعرف كل شي..سألاته اسئله اجاباتها بديهيه..تبي تفهم اكثر وهو موسع باله معاها ويشرحلها بالتفصيل☘
غرفه بإبتسامه امتنان..
/بارك الله فيك ياحسين والله ماعارفه شن نقولك ربي لما ياخد شي يعطي اللي خير منه..
..الجمله هادي قلبه خلا عقله يفسرها تفسير غير منطقي تفسير خلا درجة حرارته ترتفع..لكن فيسع ماخدي قلبه الصدمه اللي وقفت عقله وخلاته يصقع مع بعضه لم سمع تكلمه كلامها..
"لقيناك خير من خونا ولد امنا وبونا"
بلع ريقه وقال بإبتسامه وهو عاقد حواجبه..
/باهي فوتي الدوة هادي وقوليلي شن حال طوبى..
تبدلت ابتسامتها لملامح الحزن وهي تقول..
/حال يقطع القلب..معاش عرفته شنو مرة نقول مرض نفسي مره نقول مرض روحي..درنا كل شي معاها حتى مية الرقيه شربنهالها وبلافايده المراة كل يوم لتالي..خايفه تصيرلها حاجه خايفه هلبه..نزلوا دموعها قعدت تمسح فيهم ونزلت راسها لوطا.
حسين بضيق..
/مش عارف شن نقولك لكن هكي خطر في بالي شي..
قامت عيونها فيه وقالت..
/شن هو!؟
حسين:غير بالله ماتفهمنيش غلط شن رايك نطلعوها برا تتعالج..
غرفه بصدمه..
/تبيني نحط اختي في مستشفى المجانين!
حسين بشي من الربكه..
/مجانين شني ربي يهديك..مصحة نفسيه ..
غرفه ودموعها ينزلوا زي السيل..
/لاوالله ماتهون عليا اختي ندير فيها هكي..لكن انت..صدمتني فيك الحق والله صدمتني ماتوقعتش يكون هدا قدر طوبى عندك..
وناضت ومشت وخلاته هو ناض حط الشنطه ولحقها..
/غرفه..والله مازي مافهمتي اقسم بالله..
غرفه بعصبيه:بالله عليك اسكت معاش تبررلي شي.
وفتحت الباب الفاصل وطلعت وسكراته في وجهه..
هو غمض عيونه بإستياء بعدين فتحهم ومشي ولى وين كان..
🍃وغرفه مشت خشت للحوش من القدام وهي مازال تبكي..
وقفت بكي لما شمت ريحة شياط بسرعه توجهت للكوجينه..
خشتلها لقتها معبيه دخان جرت للغاز طفت تحت طنجرة الفاصوليا اللي انحرقت تماما..
ع خشة طوبى اللي كانت جايه تجري من الجنان..
لما شافت حال الكوجينه قالت بصدمه..
/سامحيني ياغرفه مش عارفه كيف نسيت بكل..
التفتت غرفه شافتلها..
ركزت عليها بالنظر..وجهها الشاحب الخالي من الحياه بملامح فجعه ونظرات عيون مليانه ضعف..
جسمها الهزيل وايديها..ايديها اللي ولوايخوفوا من الضعف..
جت بين عيونها طوبى قبل اربعه سنوات..
طوبى الجميله..الانيقه..اللي في الحوش مستحيل تلبس بيجامات اللي لما تجي ترقد..
طوبى اللي تعشق الحيوانات الاليفه وتحب تزرع الورد..
طوبى الفنانه في الرسم وفي حطة المكياج..
طوبى اللي تتفنن في الطبخ حار وحلو وبنة ماكلتها مميزة مالهاش زي..
طوبى الرايقه الطيبه الحنونه اللي برغم مسحة الحزن الموجوده في عيونها كانت عندها ضحكة حلوة تملا المكان بهجة..
شتان بين طوبى هديكا وهادي اللي تشوف فيها قدامها..
《شن رايك نطلعوها برا تتعالج..》
《مصحة نفسيه 》
رجعوا نزلوا دموعها لما تفكرت كلام حسين اللي قهرها قهر..
طوبى لما شافت دموعها قالت..
/تبكي!؟
مسحت دموعها وقالت..
/شن رايك نطلبوا سكالوب!؟
غلبت طوبى ملامح الابتسامه..
/ياريت..
ضحكت غرفه..
ع خشة اريج اللي جتهم تجري قالت.
/شن الريحة هادي!؟ الفاصوليا شاطت!
غرفه:لاجعلها ولت..خل نمشي نطلب سكالوب..وطلعت بسرعه من الكوجينه..
لحقتها اريج وهي تقول..
/اني نبى شاورما زوز شاورما وبيتزا..
ضحكت طوبى ضحكة خفيفه بعدين مشت شغلت الشفاط..
وبدون ماتنتبه شدت الطنجرة من عراويها من غير ماتلبس قفازات ولاتشدهم بفوطه.. انحرقوا ايديها وفيسع مابعدتهم..
نفخت عليهم شويه بعدين خدت زوز فوط شدتها بيهم وحطت الطنجرة في حوض الميه وفتحت عليها الشيشمه
وعيونها يشوفوا للون السواد اللي غطا الطنجرة..السواد اللي فكرها بلون حياتها حاليا..
🍃🍃🍃🍃
"شن انتي تبي تجلطيني تبي تقتليني شن تبي ديري فيا يامصيبه يامصيبه"
سميرة بخوف:وسع بالك يامحمد بالله عليك..
محمد شنيبه بإنفعال شديد..
/رحتي عزوز كبيره كيف بنمد يدي عليك قوليلي كيف.
خديجه ودموعها ينزلوا..
/ماقلتش كذب بوي..
محمد وصل لأقصى مراحل الغضب بصوت عالي قال..
/تي ضمي فمك ضمي فمك..وقدملها وبدي يخبط فيها..
سميرة وهي ترعش..
/ ياحليلي ياحليلي..
ع خشة نضال وعمر للحوش شافوا بوهم شن يدير جوه يجروا..
عمر شد بوه وبعده خديجه وهو يقول..
/بوي شن جاك!
قاله بإنفعال..
/جاني العار والبلي من اختك هادي مافيش حاجه غلط مادارتهاش في حياتها واخرهم قصرت رقبتي قدام جارنا الصيد..
خديجه وهي تبكي مشت بسرعه لدارها خشتلها وسكرتها عليها..
محمد فك نفسه من ولده واشر بسبابته ع الدار وقال..
/الاسبوع الجاي بنرفعك لعمتك كامله..
سمعها تبكي بصوت عالي قاللها بغضب شديد..
/ضمي فمك حسك معاش نبي نسمعه ياكلبه..
وفعلا معاش سمعلها حس..
محمد رف عيونه فوق وقال بقهر..
/ياربي في ذنب مني قاعد نخلص يارب..ذنب مني!؟
ونزل عيونه ومشي للمربوعه وهو يقول..
/حسبي الله ونعم الوكيل..
نزلوا دموع سميره وهي تقول..
/الحقه ياعمر لبين ماجبت جهاز قياس الضغط..
مشي عمر لحق بوه وهو مضايق لأبعد حد.
وسميرة مشت بسرعه لجناحها..
اما نضال اللي كان شاد دموعه بقوة مشي لدار امه..
خش عليها لقاها مقعمزة في سريرها تبكي..
قلبه انفطر من الالم..مشالها وضمها بيده الصحيحه لحضنه وهي شدت فيه وقعدت تبكي بالعبرة..
🍃🍃🍃🍃
الساعه 2:00بعد منتصف الليل..
ناضت مئاب بنت غرفه ونوضت امها بش تعطيها ميه..
خدتها غرفه ومشت بيها للكوجينه..
صبتلها ميه وشربتها..ولما جت بتطلع من الكوجينه شافت بابها مردود خافت..
مشت بإتجاهه وبنتها في حضنها..
فتحاته وطلعت..مررت نظرها للجنان..ثبتاته لما جي ع طوبى اللي كانت راقده تحت الكرمه..
غرفه بفجعه؛ياحي عليا..
مشت تجري ببنتها..
وصلت في طوبى نزلت بنتها وقعمزت ع ركابها قدامها وقعدت تفيق فيها وقلبها بيوقف من الخوف..
/طوبى..طوبى..
هزتها وهي تنادي فيها فاقت..
طوبى بفجعه:خيرك!؟
غرفه بنظرات فزع..
/انتي اللي خيرك راقدة هني!؟
مررت طوبى نظرها حواليها بعدين قالت بتشتت..
/كنت ندور في البرودة شكله خداني النوم..
هزت غرفه راسها وهي تحاول تخفي ضيقها الشديد وقفت ع حيلها وقالت..
/هي تعالي نخشوا..
ناضت طوبى وقفت وهي تقول..
/بنتك..
شافتلها غرفه لقتها ماشيه للشجرة الليمون..
مشتلها خدتها والتفتت لطوبى قعدت معاها بعيونها لين خشت قبلها وهي خشت وراها وقلبها مليان خوف عليها..
🍃🍃🍃🍃
يوم الأحد..
الحادي عشر من شهر محرم..
30اغسطس..سنة 2020...
الساعه 6:00مساءا...
في الجنان الامامي لحوش محمد شنيبه..
كانوا كل من محمد ولد المهدي ومحمد ولدمحي الدين ومحمد ولد حامد مع يزن واقفين يهدرزوا..
محمد المهدي:بالله يامحمد محي خليك شاد مكانك في التشكيله تربح..
محمد محي الدين..
/تي كلهم مايعرفوش يلعبوا ياراجل..
محمد حامد بضحكه..
/قالها اللي ماسكرش شهر يلعب في الكورة..
يزن بإبتسامه..
/لكن شهادة حق يصير منه..
رد عليه وقاله:الا قولي علاش مالعبتش في المباراة..
عقد يزن حواجبه وحاول يحافظ ع ابتسامته وهو يقول..
/ماعنديش ليها جو..
محمد المهدي وهو رافع حاجبه اليسار...
/المدة الاخيره ماعنده جو لشي..
محمد حامد ضحك..
ويزن شاف لخوه بإمتعاض..
🍃ع جية سدرة وهي لابسه عبايه ووشاح وشاده في يدها كتابات..
فاتتهم وجت بتطلع وقفها خوها الكبير وهو يقول..
/وين ع خير!
سدرة:خديت اذن بابا بنمشي لحوش خالتي فايزة..
يزن نزل عيونه لسبيدروه اللي قعد يخط بيه ع الارض..
محمد:ولي ولي..
سدرة بإستغراب:علاش!؟
محمد المهدي:الشارع معبي..
سدرة؛وشن دخلي بيهم اني بنمشي طول للحوش..
هو بحده قال..
/قلت ولي وكلمي صاحبتك تجيك..
سدرة بحمقه:وعادي هي تطلع في شارع معبي اني لا!!؟
قاللها:عليا فيك انتي بس ماليش علاقه بغيرك وتوا ولي للحوش وماطلعنيش عن طوري..
وهي معصبه مشت بتولي للشقه..
محمد محي الدين وهو يشوفلها كيف ماشيه قال..
/كان تخليها تقطع علاقتها بيهم خير..
رفع يزن عيونه في محمد وهويشوفله بنظرات حاده..
محمد حامد:علاش!؟
قاله:مش مزبوطين..
محمد المهدي:ماتقولهاش هادي يامحمد..
قاله:ماقلتش الا الحق بنتهم مرت عمي واني اللي نعرفهم كويس..
"انت على مني تتكلم"
التفتوا كلهم لسدرة اللي شافوها جاييتهم وهي حامقه سمعت كلام محمد ولد خديجه كله..
محمد المهدي بحده..
/شن قلت اني!؟
سدرة بعصبيه:مش ماشيه قبل نرد عليه هدا اللي يدوي بأعراض الناس بنات خالتي فايزة متربيين احسن تربيه مش انت اللي تتكلم ع ربايتهم..
سدرة بحده:سدرة..
محمد حامد بعصبيه وعناد..
/ماينفعوش ماينفعوش ماينفعوش بالذات صاحبتك هادي اللي توقف للولاد في الرواشن..
يزن بغضب..
/محمد ضم فمك..
سدرة بإزدراء وعصبيه: تي برا برا..برا..برا شوف اختك قبل لتدوي ع بنات الناس..
محمد حامد ويزن فنصوا في سدرة..
وخوها الكبير قال بغضب.
/ورب العزة كان مامشيتي نضربك بالله..
سدرة من غضبها مااهتمتش لكلام خوها وكملت تقول لمحمد..
/اختك اللي تصاحب في الولاد وتتلاقى معاهم في السيارات.
وقبل لتكمل كلامها تنزل ع وجهها صفعه من خوها الكبير خلتها معاش تحس بخدها..
محمد المهدي بغضب..
/بري ياحقيره ياحيوانه بري..
سدرة شافتله بغضب ودموعها في عيونها قالت..
/تضربني ع خاطرها الكلبه هادي اللي رمت بلاها عليك هالحقيرة..شافت لمحمد محي الدين وقالت..
/برا برا اسأل عمي نضال شن لقاها دير يومها بش..
محمد المهدي غمض عيونه وقال بغضب شديد..
/يزن..
طول يزن قدم لأخته جبدها من ذراعها وقعد يجر فيها وهو يقول بعصبيه..
/تزيدي كلمة تانيه نعدمك..
ومعاش انسمع منها الا صوت بكاها..
محمد حامد وهو يشوف لملامح الصدمه ع وجه ولد خالته قال..
/فوتها تفتفت..
محمد المهدي:مادورش دوتها صغيرة ماتعرفش شن تقول..
هو قعد يسمع فيهم و يمرر في نظراته المصدومه بيناتهم...
وفي لحظه..
لف وطلع يجري وهما لحقوه..
🍁🍁🍁🍁
"شن خطرلك اليوم ديري كعك مقلي فهالنو"
راما وهي تعسل في الكعك قالت بإبتسامه..
/خوي محمد يحبه..
ابتسمت عواطف وهي تقول..
/والله فرحانه لصلاح حاله..
راما:حتى اني فوق ماتتصوري..يارب دوم هكي..
عواطف:ان شاء الله..
انتفظوا الزوز من الفجعه لما سمعوا باب الحوش تسكر بقوة بعدين سمعوا دق قوي عليه..
عواطف:يالطيف هدا شنو!؟.
وراما تشوف لعمتها بخوف وهي ساكته..
ويخش عليهم خوها اللي كان منظره مبهدل..
🍃 عافر لولاد لما حاولوا يشدوه ولما جي خاله نضال بيفهم خيرهم فكوه وهو هرب منهم وخش للحوش وسكر الباب🍃
قعد يقدم لراما وهو يشوفلها بنظرات تخوف..
عواطف بريبه..
/خيرك!؟
هو خطف شدها من شعرها وقعد يكر فيها..
راما بدت تعيط..
عواطف بفجعه:خيرك معاها!؟
هو قال..
/تقربي نقتلها..
طلعها من الكوجينه وكان في باله يرفعها لشقة بوه..
راما وهي تعيط..
/تعاليلي ياعمتي تعاليلي..
هو قال بصوت مخيف..
/والله مافاكك مني واحد يافاسده..
🍃وللأسف الحوش وقتها كان فاضي..محي الدين رفع نجمه لحوش واحد من خوته..
وصفاء في حوش امها وراجلها طالع...
والصيد كعادته قاعد في وحده من محلاته..
عواطف ماقدرتش تخلي راما برغم خوفها من محمد..
مشتله تجري وقعدت تضرب فيه بش تفك راما منه عضاته من ذراعه بقوة...
انوجع وفكها ولماجت بتهرب هو دف عمته ولحق عليها جبدها من شعرها وبدي يضرب فيها بوحشيه وهو يسب فيها بأقبح الألفاظ..
في وذانه يتردد كلام سدرة..وبين عيونه المحرمات اللي كان يدير فيهم مع بنات من عمر اخته..
عواطف قريب انجنت وهي تشوف فيه شن يدير في راما...
مشت خدت عصا وجاته قعدت تضرب فيه وهي تعيط وتقول..
/قتلتها قتلتها..
جاته ضربه ع راسه وجعاته بقوة وخر..
ناضت راما بما قعد عندها من حيل وعمتها قربتلها بش تاخدها وهي تقول..
/عطيك مايرفعك مافيش منك امل..
هو عيونه اللي كلهم شر كانوا ع اخته اللي كانت تشوفله بألم..
غير نظره عنها شاف لمزهريه محطوطه ع طاولة الممر..
خطف خداها وحدفها بيها..
عواطف لما وصلت في راما انفجعت وهي تشوف في حاجه جايه ناحيتهم ومااستوعبتش الا لما شافتها جت ع وجه بنت خوها...
