#طوبى "جنة طوبى"
#جمان_فريد
#الجزء_107"كانون الأول/شتي يادني"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 " لم يعتذر أحد على الطريقة التي عاملوني بها..
لقد ألقوا دائماً باللوم، على ردة فعلي "🍃
_______________________________________
بعد ماصلت العصر وقرت وردها من القرآن..ورقدت بنتها..
لبست جلابيتها وشاربتها وطلعت من الدولاب السحابه وطلعت من الدار..
وهي متوجهه لدار المعيشه سمعت سدرة تكلم في اريج بإنفعال..
"كذب كذابه ماتقوليش في الحق واضح اللي داره فيها اكبر من الضرب"
سرعت خطواتها وخشت للدار وهي تقول..
/والضرب حاجه هينه ياسدرة! انتي تعرفي انه كان مريض نفسي يعني شكل الضرب من واحد زيه كيف بيكون!
نزلوا دموع سدرة وهي تقول..
/وخوه الكبير اليوم جايني يبررلي ويقولي نحسابه بري من مرضه!
طوبى؛نقولهالك للمرة الألف المهدي مالاش ذنب..حطي فيا حتى اني نص الذنب لأني بعد عرفت بمرضه تصرفت بسذاجه ع اساس بنمشي بالمثل اللي يقول بنت الاصول تتحمل وتحملت وقلت معليشي اوقفي معاه ياطوبى وساعديه بش يتعالج ويبرا منه..كنت نفكر بعقليه طفوليه مش ناضجة بكل وماصار معاي اللي صار الا بش يعلمني ويخليني نعرف نفكر ونتصرف صح..
غيرت اريج نظرها عنها لسدرة لاحظت في عيونها نظره غريبه لطوبى ماقدرتش تفسرها كويس..حستها وكأنها نظرة خوف..
ردت نظرها لطوبى لما سمعتها قالت..
/هي نوضي بدلي بش نمشوا لحوش الصيد..
مسحت سدرة دموعها وقالت..
/باهي..
ناضت ومشت طلعت من حداهم..لحقتها طوبى..وقفت للباب وشافتها خشت الدار التانيه وسكرت عليها..
التفتت لأريج وقدمتلها بعدين قالت بضيق..
/الحقير هدا مش ناوي ع خير..
اريج بكره..
/شن مازال يبي التافه على شني عابي!؟
فركت بروس اصابعها جبهتها وهي تقول..
/مش عارفه..نزلت يدها وقالت..تعرفي اني في بالي شي بنبدا نسعاله الفترة الجايه ان شاء الله..
اريج:شن هو!؟
طوبى..
"نبي نزوج سدرة للمهدي"
انفتح باب الدار..
طوبى قالت؛بعدين نزيد نهدرزلك ردي بالك ع جنو..ولفت بتمشي وقفت سدرة في الباب وقالت..هيا..
طوبى؛جيت..
ومشوا طلعوا مع بعض من الدار وقعدت اريج في حالة عدم استيعاب من اخر جمله سمعتها من طوبى..
🍃🍃🍃🍃🍃
طلعوا من الحوش ولهداكا الوقت كان السمي مغيمه والمطر مازال مانزلتش..
قصوا الطريق وتوجهوا لحوش الصيد..
لما قربوا يوصلوا فيه انفتح الباب..
طلعت راما وهي مربعه ايديها جو عيونها في عيون طوبى..
هربت راما بنظرها عنها ومشت طول من غير لاسلام ولاكلام..
سدرة؛قليله ادب زي امها..
طوبى بضيق؛هي خشي خشي..
خشت سدرة وهي معصبه وطوبى خشت وراها وسكرت الباب..
🍃🍃🍃🍃🍃
"كيف حالك انتي وشن دايرة في قرايتك"
مروة بإبتسامه؛الحمد لله ماشيه..
فهيمه؛قالتلي مناسك تبيني في موضوع ضروري..
مروة بضيق:والله ماعارفه كيف بنفتحه معاك متحشمه منك الحق..
عقدت حواجبها بإستغراب..
تنهدت مروة وقالت بشي من الاحراج..
/في بنت نعرفها تكلم في شاب الشاب هدا مش عارفه منين جاب صورها وبدي يهدد فيها ياتطلع معاه ياينشرهم
فهيمه:ماتبي كان الكوي في راسها هالزوفريه..
مروة بضيق:توا صار اللي صار وهي ماتبيش تزيد تغرق في الغلط وضيع روحها اكثر..طلبت مني نساعدها واني بعد مافكرت واستشرت جي في بالي ولدك..
فهيمه بأستغراب..
/ولدي!؟ اني عندي 4 مني فيهم..
مروة:الصغير قالتلي مناسك اسمه معين قبل وقف في مشكلة تشبه هادي شويه،هي قصة طويله اسأليه عليها يحكيهالك..
فهيمه بإبتسامه:حاضر تو نقوله انتي عطيني اسم الزوفري اللي يهدد في البنت..
مروة:اسمه محمود مبارك ******..
فهيمه:حفظته خلاص..لكن قوليلي البنيه شن تكونلك؟
مروة بضيق:بنت جيرانا وفي نفس الوقت بنت سلف اختي..
🔺️🔺️🔺️في وقت سابق🔺️🔺️🔺️
في أول يوم لعزاء عبد الفتاح..
كانت مروة من ضمن الجارات اللي عولوا ع ضيافة المعزين..
وراما معاهم تعول ودموعها مابطلوش نزول وكل شويه تسرق في النظر لمروة بدون ماتلاحظها..
وقعدت ع هالحال لعند ماجو بيروحوا..
"مروة"
التفتوا مروة وتاله وشافولها بعدم تقبل..
قربت منها وقالت..
/نبيك شويه بالله عليك..
تاله:لا حبيبتي مانطلقش اختي معاك بروحها..
راما بتوسل:بالله عليك شويه بس..
شدت تاله يد اختها وقالت..
/والله ماني مخيلتها..
مروة بنبرة جافه..
/قولي شن تبي بسرعه..
انهارت بالبكي وقالت بالعبرة..
/بالله عليك سامحيني ع اللي درته فيك ربي ردهولي يامروة..
انصدمت مروة اما تاله قالت..
/ضحك عليك الصايع صاحبك..
حطت ايديها ع وجهها وقعدت تبكي بشده..
مروة حست بوجع على حالها..
تاله بحقد:ان شاء الله معاد تولي..
مروة:خلاص تاله حبيبتي..راما شن صاير معاك؟
نزلت ايديها وقالت:عطيني رقمك نكلمك بش نحكيلك..
تاله:تعطيك عينك راما ببكي:والله مانبي نضرها..
تاله شدت بقوة ع يد اختها وقالت.
/ردي بالك يامروة هادي شيطانه راهو..
راما يأست ومعاش قدرت تحاول اكثر هزت راسها وقالت.
/خلاص خلاص..ولفت بتمشي..
"رقمك قاعد هو نفسه؟"
تاله فنصت في اختها..
التفتت وقالت بلهفه..
/ايه..
مروة:تو نتصل بيك..هيا تاله..
ولفت فتحت الباب وطلعت واختها وراها..
سكرت تاله الباب وهي تقول بإنفعال مكتوم..
/خيرك انتي غبيه!
مروة:سكري فمك ياهبله عندي تطبيق تسجيل مكالمات..
تاله:وكان وزعت رقمك!؟
مروة:تؤ..ماديرهاش..وكان دارتها نغير الشفرة مش معضله..
تاله هزت راسها وهي معصبه وكملوا طريقهم للحوش..
🔺️🔺️🔺️الوقت الحاضر🔺️🔺️🔺️
فهيمه بأسف:لاحول ولاقوة إلا بالله..ربي يستر عليها وعلينا..
مروة:سامحني خالتي اللي تكلمت معاك في موضوع زي هادي ماكانش قدامي حل تاني..
فهيمه؛وشن هادي حكايه تافهه هادي اعراض وربك يستر من النار اللي يستر خوه المسلم...
مروة:ان شاء الله يستر عليها..
فهيمه؛مخلاك تساعديها الا بش يستر عليها عطيني رقمك عطيني..
بدت مروة تسمي في رقمها وفهيمه تسجل وفي الاخر كتبت اسمها عليه وهي تقول..
/مريوة..
ضحكت مروة..
ابتسمت فهيمه وقالت..
/خلاص الموضوع عندي وعند مونا قوليلها تريح بالها..
ضحكت لما سمعت اسم دلع معين وقالت..
/بارك الله فيك خالتي..
فهيمه؛فيك بارك الله..هي نوضي نولوا غادي..
ناضوا الزوز وولوا للمكان اللي مقعمزات فيه عمة مناسك وخواتها وفايزة اللي كانت طول مابنتها مقعمزة مع فهيمه تسرقلها في النظر..
🍃🍃🍃🍃🍃
وفي حوش الصيد..
وسط زحمه المعزين كانوا موجودات طوبى ونجاة في نفس المكان..والزوز كانوا يسمعوا في وحده من الجارات تقول..
/جوها خوتها اليوم الصبح رفعوها..
سدرة بأسف:لاحول ولاقوة الا بالله..والولاد؟
:والله مانندري عليهم لكن مظنهم قعدوا..
جارة تانيه قالت..
/زعمه يصير لإبتسام نفس الشي!؟
:الله اعلم بعيت كعبار..
في هاللحظه..طوبى ونجاه مع بعض وجهوا انظارهم لإبتسام اللي كانت مقعمزه في التركينه "الزاوية"وفي حضنها ولدها راقد بالنوم..
تشوف في الفراغ..سرحانه وملامح الهم ع وجهها..
نجاة وهي تشوفلها..جت بين عيونها مجموعه من الذكريات السيئه يفوتوا قدامها وحده ورا التانيه..
تفكرت اللي داراته فيها خديجه ايام زواجها من طاهر الاحتقار والاهانه والاستكراد..واللي داراته بعد ماعرفت بزواجها السري من الجالي..
القهر اللي قهراته خديجه لنجاه كان اصعب من قهر مرت بوها بالنسبه ليها..
حرقت قلبها وذلتها ودمرت كل احلامها مع الجالي..
🍃وطوبى الضحيه الأكبر لخديجه..حتى هي تفكرت الجريمة اللي دارتها فيها..كل شي سيء عاشاته طوبى في حياتها لليوم خديجة السبب الأساسي فيه...
☘وهو الظالم غالبا اعماله السيئة تسلط عليه ويكون جزائه من جنس العمل☘
"ابتسام ولدك رقد"
استاقظت ابتسام ع صوت الجارة اللي كلمتها..
شافت لولدها تنهدت بحسرة وناضت بيه..
وعيون نجاة وطوبى معاها لين طلعت من الصالون..
طوبى:شويه وجايه..
ناضت من مكانها وطلعت من الصالون وعيون نجاة وسدرة معاها..
بعد ماطلعت غيرت نجاه نظرها جو عيونها في عيون سدرة لقتها تشوفلها بنظرات حاده رفعت حاجبها وغيرت نظرها عنها..
🍃🍃🍃🍃🍃
وصلت طوبى في الدار اللي خشتلها ابتسام..
وقفت جنب الباب ودقت وهي تقول..
/ابتسام..
لحظان وطلعت ابتسام شافت طوبى قالت..
/نعم..
ابتسمت طوبى وقالت..
/نبي نحكي شويه كان فيها كيف..
هزت ابتسام راسها وقالت..
/تفضلي..
خشت طوبى وابتسام خشت بعدها..
مررت طوبى نظرها ع الصغار وهما راقدين قالت بإستغراب..
/غريبه الكبار راقدين توا؟
ابتسام بألم:من لما مات بوهم وهما هكي فاشلين ويبوا يرقدوا بس..
طوبى بأسف:نفسياتهم تعبانه..
ابتسام بألم:معقوله يتأثروا لهالدرجه بالموت مازالوا مش واعيين..
طوبى:مالاش علاقه بالعمر الشي هدا صغارك متعلقين ببوهم وفاهمين انهم مش حيشوفوه مرة تانيه..
نزلوا دموع ابتسام وهي تقول..
/مش عارفه علاش حظي هكي!؟ راجلي الاول مات وسيبني بالصغار وهدا نفس الشي..خايفه تطلع عليا دوة بعدين ويقولوا فال شوم اللي ياخدها يموت..
شافتلها وقالت..
/ماتفكريش هكي كله مقدر ومكتوب ماحد عارف لو كان مازال عندك نصيب في حد امتى ووين يجيك..في عهد الرسول والصحابه في مراة ماتولها 4رجاله ومامنعهاش هالشي انها تتزوج مرة تانيه كله نصيب وبيد ربي..
ابتسمت تهكما وقالت..
/نتزوج مرة تانيه!؟
طوبى:وعلاش لا..
ابتسام:لو فكرت فيها حياخدوا مني صغاري مرة تانيه مش عارفه كان هالمرة حنتحمل فراقهم ولالا..
شافتلهم طوبى شويه بعدين قالت..
/ان شاء الله يجيك نصيب مايخلي حد ياخد منك صغارك..
☘ابتسام من اول ماعرفت بموت راجلها وهي تفكر في الموضوع هدا..هي مش النوع المضحي واللي عنده ع الإيثار مش حتوقف حياتها ع خاطر حد..لكن لو لقت من ياخدها بصغارها من عبد الفتاح اكيد حتفرح مهما كان تقعد ام..
وتوا كلام طوبى خلاها تفكر من اللي يرضى ياخدها بصغارها و مايخليش اهلهم ياخدوهم منها!!؟☘
استاقظت من سرحانها لما سمعت طوبى قالت.. /حاليا الكلام فالموضوع هدا سابق لأوانه..قربتلها طبطبت ع ذراعها وقالت...ربي يصبرك ويكون معاك..
ابتسمت وقالت:بارك الله فيك..
يدوب ابتسمت طوبى وهي تقول..
/نستأذن..ولفت ومشت طلعت الدار..
وخلت ابتسام غارقه في تفكيرها..
🍃طوبى وهي طالعه من الدار شافت نجاح طالعه من الكوجينه نادتها..
/ابله نجاح..
التفتت نجاح وشافتلها بملامح كلها حزن وتعب..
وصلت فيها طوبى وقالت..
/شن حال خالتي نجمه ؟!
نجاح ودموعها ينزلوا..
/توا بس قدرت ترقد..مرواحة سميرة هدت حيلها ان شاء الله مايروحوش بإبتسام حتى هي..
طوبى بأسف:لاحول ولاقوة الا بالله ربي يصبرها ويربط ع قلبها..
نجاح بحزن:آمين...
🍃ومن حوش الصيد لحوش جيرانهم اللي كانوا مجتمعين في الصاله متاعه..
مغليه والمهدي وخديجه وراما ومحمد المهدي وسدرة وسميرة...
كلهم انظارهم كانت بين خديجه وبين ظرف فلوس وورقه محطوطات ع الطاوله..
المهدي:وطبعا صغاره عنده يعني مافيش نفقة..
خديجه بكره:خيرمن وجهه الحقير هدا..
محمد شاف لراما لقاها منزلها راسها ودموعها ينزلوا..
مغليه:بعدين تو يقول ياندايمي..
سميرة بدت ع وجهها ملامح الامتعاض..
المهدي؛مش مهمه الدوة هادي توا..بنتك في حوش بوها ماناقصها شي وشن ماتبي حاضر ماتطلبي حد تعاليلي طول..
ابتسمت ودموعها في عيونها وهي تقول..
/يدومك عليا ياغالي..
مغليه وسميرة شافوا للمهدي بإبتسامه..
لكن سدرة ماكانش راضيها اللي صاير وعيونها تشوف بكره لعمتها وبنت عمتها..
راما وهي تسمع لأمها شن تقول..
جتها رساله ع تليفونها اللي كانت حطاته ع الوضع الهزاز..
قاماته وفتحتها..
انخطف لون وجهها لما قرت محتواها..
مسحت دموعها وناضت طلعت من حداهم وماحس بيها حد كان سدرة ومحمد...
🍃مشت بسرعه جهة دار الكوي لكن قبل ماتخشلها شافت المربوعه لقتها فاضيه تماما..
مشت للدار وهي توزع في نظرها ع الممر بعدين خشت للدار وسكرت الباب.
بعد اقل من تلاتين ثانيه كان محمد طالع من الصاله يدور فيها..توقع تكون في الجنان طلعله طول..
ومن اخر الممر..كان نضال راكب من الريفودجي بعد ماحط فيه حاجه
توجه للصاله..لكن في نص الطريق تفكر السوريه "ثوب عربي" اللي كواها بش بيمشي لصلاة المغرب خلاها في الدار وتوا يبي يطلعها منها ويرفعها لداره فوق..
وصل في الباب ولما جي بيفتحه سمع صوت حد يتكلم داخل ركز ع الصوت..عرفه صوت راما...
عقد حواجبه وقعد يتصنت..
راما بتوسل:والله عمي توفى والله العظيم مش مصدق تعال لشارعنا واسأل..
"اسمعي يابنت انتي اخر مهله يوم الخميس هدا ماتجيش ماتلومي الا نفسك"
راما:يامحمود نقولك حالة وفاة عمي مات كيف تبيني نطلع من الحوش قولي!!؟
🍃في الصاله..
سميرة بحزن:اليوم الصبح رفعوها خوتها صارت فيهم حالة وين طلعت نجمة قريب ماتت مسكينه..
المهدي بأسف:لاحول ولاقوة الابالله..
مغليه:حتى ابتسام تو يروحوا بيها خوتها واعرين ماظنيش يخلوها..
المهدي:اني والله مانفكر كان في صغاره كيف بصير فيهم!
"من هو ياحيوانه تكلمي..تكلمي"
كلهم انفجعوا وسميرة قالت..
/نضال!
سمعوا عياط راما..ناضت مغليه طلعت تجري والمهدي وسميرة وسدرة وراها..
خديجه اللي كانت في دارها لما سمعت عياط بنتها طلعت تجري..
🍃وصلوا في الممر..
لقوا نضال شاد راما من شعرها وبغضب شديد يكلم فيها..
/تطلعي مع ولاد يامسخه ياحيوانه..
المهدي بصدمه:شن تقول انت!..
نضال بعصبيه شديده..
/سمعتها تكلم في واحد المسخه تقوله كيف تبيني نطلع من الحوش وعندنا حالة وفاة..
خديجه بعياط:شن تخرف انت بنتي اني ماديرش هكي..
نضال بغضب:اسأليها ياهانم..ضربها ع ظهرها بقوة ودفها ع امها وهي تقول..اسأليها كان لنقول فيه حق ولاكذب!
ضمت خديجه بنتها وهي تقول..
/مانسألهاش بنتي ونعرفها ماديرش الغلط..
مغليه وهي ترعش..
/بالك سمعت غلط ياولدي!
نضال بنفاد صبر..
/تشن سمعت غلط يام قالت اسمه محمود..
المهدي بصرامه:هاتي تليفونك جاي..
ضحك نضال بسخريه وقال..
/لما خشيت عليها لوحت التليفون في مالقي الميه..
خديجه شافت لبنتها شويه بعدين شافت لنضال و قالت..
/قلت محمود! بالك قالت محمد وانت سمعتها محمود..
نضال بعصبيه؛محمد محمود شن الفرق!
شافوا سدرة وسميرة لبعض بخوف..
ومغليه هني تفكرت محمد وقعدت دور فيه مالقتاش وقالت..
/وين ولدك محمد يامهدي!
نضال ضيق عيونه و شاف للمهدي ..
والمهدي شاف لأمه وقال..
/شن قصدك يام!؟
خديجه بحده:ماكنتش نبي نقولك قبل لكن ولدك ياماحاول معاها وكان يلاحق فيها والبنت شكلها انغرت بيه..
المهدي بصدمه شديده..
/كيف!؟
سدرة بإنفعال:كذب كذب والله كذب
خديجه:ياريت جوري قاعده وتشهد
سدرة بإنفعال شديد..
/كذب جوري بروحها قالت كذب..قالت امها خلتها تقول هكي
انهارت راما بالبكي في حضن امها..
خديجه بألم:حرام عليكم ياسر ساد البنت صغيرة ساهل ينضحك ع عقلها بدل ماتحاسبوها هي بروا حاسبوا محمد..
المهدي بغضب:وينه الكلب وينه لااني ولاامه ربيناه هكي..علا صوته ونادى..محمد
"ولدك مادار شي يامهدي"
كلهم وجهوا انظارهم لسميره..
سميرة بحزم..
/جوري حكتلي وقالت امها خلتها تقول هكي ويخي هددتها بالقطوسه متاعها وهي عيل مسكينه خافت ودارت ماتبي امها..
سدرة ببكي؛ظلمتوا خوي وقلتوله كلام زي السم وهو سكت وماردش بكل سكت عليها الحقيرة هادي متاع الولاد بروا اسألوا عليها يزن ومحمد ولد عمتي نسرين لما شافوها في المول وهي لابسه لبس مشحط ومحوله وشاحها..
خديجه بعياط:سكري فمك ياكذابه..
سدرة:لامش كذابه كلهم يعرفوها راما وحده صايعه..
نضال عقله ماتحملش اللي يسمع فيه جبد راما من امها وصفعها ع وجهها صفعه خلت ماقعد عندها من قوة ينهار وطيح من طولها مغمى عليها..
امها جتها تجري وهي تعيط ..
وحناها اللي واجعها حال بنتها من قهرتها القويه عليها قالت لنضال..
"الله يشل يدك اللي ضربتها بيها "
رعشت سميرة مع بعضها من الدعوة شافت لنضال لقاته مشي بسرعه وهو في قمة الغضب..بعدين غيرت نظرها للمهدي اللي برغم كل شي صار قبل شويه خدي بنت اخته رفعها بين ايديه وطلع بيها يجري وامها وحناها لحقوه..
وقعدت سدرة تبكي بالعبرة وسميره جتها خدتها في حضنها..
🍃محمد وين!؟
محمد سمع كل شي صار..لكن بدل مايواجه انسحب طلع من الحوش وهو في حالة صدمه مش قادر يستوعب شي من اللي سمعه..وحلمته بأمه قاعده ماتحولتش من باله..
"لبسها لراما"..
🍃🍃🍃🍃🍃
"الله واخيرا المطر صبت"
طوبى قالت هالكلام لسدرة وهما طالعين من حوش الصيد..
فتحت السحابه وخشوا تحتها الزوز..
سدرة بضحكه:شن رايك نمشوا تحتها للسوبر ماركت ناخدوا حويجات ونولوا..
طوبى بإبتسامه حماس:هيا..
ومشوا مع بعض متوجهات للسوبر ماركت وهما مستمتعات بالمطر وريحة التراب واجواء الشتي الحلوة..
سدرة؛وتقولي مانحبش الشتي..
طوبى بضحكه؛مرات نحبه..
وصلوا في السوبر ماركت وخشوا...
وهما يدهوروا فيه خطرت عليهم القصه خدولها حاجاتها..
وطلعوا مع بعض وهما يهدرزوا..
🍃في هالأثناء روح عبد القيوم..
وهو خاش بسيارتهم شافهم من بعيد..قلبه من لهفته عليها قريب طلع من مكانه ومشالها..
درس قدام حوش المهدي ونزل..
☘كان لابس اسود فانيليا سميكه ع بنطلون جينز اسود ومغطي راسه ووذانه بطاقيه سودا ولابس بالطو اسود للركبه فيه برنوس حطه ع راسها..وكعادته بالذات في الشتي لازم يلبس بوت بس هالمرة بخيوط..☘
سكر باب السيارة وعيونها معاها..
ضحكتها..ابتسامتها مع الحاله اللي كانت فيها والسحابه اللي متقيه عليها مخلينه عيونه مايشوفوا في حد معاها وقلبه مايحس بوجود شي غيرها..
المطر اللي تصب عليه نساها بالمرة..
🌼وطوبى وهي في عز انسجامها مع سدرة غيرت عيونها القدام جو في عيونه..
والقلب فرت فران تبي بعضها تبي تجي لبعض وتحضن بعض..
تلاشت ابتسامتها وغيرت عيونها..
سدرة ماانتبهتش لوجوده وصلوا في الباب طلعت المفتاح وفتحاته..
🍃وربيع اللي كان في المطعم يراقب في حالة صاحبه اللي ولى يقطر تقطير من المطر ناداه بصوت عالي..
"عبدو"
التفت شافله بعدين طول رجع نظره ليها لقاها خشت وسكرت الباب..
تنهد من قلبه ولف ومشي خش للحوش وهو ناسي وجود ربيع بالمرة..
حرك ربيع راسه يمين ويسار بأسف ورجع للمطعم..
🍃🍃🍃🍃
في حوش طوبى..
خشوا سدرة وطوبى داخل الحوش..
نزلت سدرة السحابه وسكرتها وهي تغني.....
"شتي يا دنيي تيزيد موسمنا ويحلى
وتدفق مي وزرع جديد بحقلتنا يعلى"
ومن حيث لايعلمون يطلعهم مختار وهو يغني معاها..
"خليلي عينك عالدار ع سياج اللي كلو زرار
بكره الشتويي بتروح ومنتلاقى بنوار"
طوبى انفجعت لكن سدرة كملت غني معاه...
"يحلى عيد يضوي عيد نزرع ونلم عناقيد
شتي يا دنيي تيزيد موسمنا ويحلى
وتدفق مي وزرع جديد بحقلتنا يعلى"
سكتوا الزوز وكأنهم قعدوا يسمعوا في صوت امهم تغني معاهم...ابتسموا بحزن..
وطوبى وهي تشوفلهم:
/امتى جيت!؟
مختار:قبل شويه
سدرة:ماشفتش السيارة..
مختار:جابني الاقجم..
طوبى:وين فاتن.
رفع حواجبه ونزلهم وهويقول..
/مشت لحوش بوها زيارة..
سدرة وهي ماشيه للدار
/اسمع بتقعد الليله تتعشى بنديروا عصيده..
رد عليها..
/مش حنقول لا..
غير نظره لطوبى لقاها خاشه للكوجينه شويه وطلعت اريج بصفرة عصير وشكولاته..
ضحك مختار وقال..
/تي غير علاش هدا بس!؟
طلعت طوبى وهي تقول..
/اكرام الضيف من الايمان..
شافلها برفعة حاجب..
بضحكه قالت..
/نبصروا ياودي خيرك..
واريج تضحك بصمت..
ع جية جنة تتكركب وهي تقول..
"ماما..مياو"
مختار فات اريج ومشي لجنه طبس عليها خداها وهو يقول..
/عسليتي..وباسها من خدها..
طوبى:دخلتي القطاطيس اريج؟
أريج بإبتسامه:ايه في السله قاعدين..
مختار:ردوا بالكم ماتخلوهاش تقربهم..
طوبى:مربيات ونظاف..
اريج حطت السفره ع الطاوله وهي تقول..
/خل نمشي نشوفهم..
ومشت من حداهم..
طوبى حولت القفازات وهي تقول..
/سألت ع الراجل..
شافلها وقال..
/ايه راجل كويس من جميع النواحي لكن متزمت حبتين..
طوبى ماردتش حولت شاربتها بعدين جلابيتها ومختار يراقب فيها شويه وقال..
/مش عارف علاش دافنة روحك بالحياة اطلعي من جو الكآبه شويه اللبس هدا مش ليك بكل..
شافتله بإبتسامه كانت مزيج بعدين التعجب والتهكم..بعدين حركت راسها يمين ويسار ومشت للدار..
تنهد بملل لجنة وهو يقول..
/ردي بالك ديري جو امك الكئيب هدا..
خش بيها للصاله ومشي بيها وقعمزوا تحت الروشن حس بنسمة تخش..
حط جنه ع الفراش وناض وقف سكر الروشن كويس..
بعدين حط يده في جيب بالطوه بيطلع التليفون طاحت منه حاجه..
طول طبس خداها وقعمز..جنة ناضت قعمزت في حجره..
وهو مشغول بالحاجه اللي طاحت منه كانت اشبه بتعليقه من غير سلسال..فتحها وشاف الصورة اللي فيها...
"ماما"
قام عيونه وشاف لمدخل الصاله مالقي حد رد نظره لجنة لقاها تشوف للصورة عقد حواجبه بإستغراب..
ع خشة طوبى وهي تقول..
/ايه كملي شن عرفت عنه بالزبط..
سكر التعليقه وحطها في جيب بالطوه الدخلاني وهو يقول..
/مطلق وتقريبا هاه تقريبا السبب انه عقيم..
طوبى بإستغراب:ماقالش حاجه زي هادي!؟
مختار:هادي المعلومات اللي وصلتني..هي مش بتشوفه وتقعمز معاه تسأله عن كل شي وتشوف شن يقوللها..
طوبى:كان كذب عليها مفروض تفوته الحاجه هادي كان بدت بالكذب نهايتها مش حتكون خير..
مختار هز راسه بعدين قال..
/بنطلب منك طلب صريح وواضح..
طوبى:اللي هو؟
مختار؛ياريت ديري حدود في علاقتك مع فاتن وماتحاوليش تأثري عليها بأفكارك..
ابتسمت طوبى وقالت..
/والله ولا مرة صار بيني وبينها هدرزة طويله ولو ع الهديه اللي عطيتهالها فأني اللي نحبه نهديه هدايا غاليه..
مختار:ماتلعبيش معاي بالكلام ياطوبى رجاءا..
طوبى:لا نهائي هالمرة تكلمت صراحه من غير تلميح..هي ممكن تأثرث باللي تشوف فيه..لكن يعني هدا مش ذنبي اني مافرضت عليها شي..ع العموم كان خايف ع عقلها لهالدرجه..
"معاش تجوا"..
مختار قعد يشوفلها بصمت..
وهي تشوفله ببرود...
وجنه شاده التليفون وحاطته في فمها..
وتخش سدرة تشوفها قالت..
/حداك ياطوبى..
شافولها الزوز..شهقت طوبى وحولت التليفون مداته لمختار خداه وهو يضحك..
وجنه طرمت شواربها بنزعل ونزلت راسها..
ضمها بقوة وهو يقول..
/لالالا ياعمري نفداه هالوجه اني..وقعد يلاعب فيها ضحكت..
طوبى:رد بالك تعطيهولها رد بالك..
مختار:ياودي باهي يانشفه..وبدي يغني لجنه وهي تغني معاه..
مشت سدرة بتطلع وهي تقول..
/بندير قهوة..
ناضت طوبى وهي تقول.
/اني بنوتي روحي للصلاه..ردبالك هاه تعطيها التليفون..
ومشت طلعت من حداهم..
مختار بإزدراء:كيف متحملتيها امك هادي!
شدت خشمه وخبشاته..حط يده ع خشمه وهو رافع حواجبه وجنه تضحك ع حركاته...
🍃🍃🍃🍃🍃
بعد صلاة العشا روح محي الدين براما بعد مادارولها تغذيه ضغطها هبط بسبب قلة الاكل...
مافي حد جابله سيرة باللي صار وهو قال فعقله ان بنته متاثرة بوضعهم في الحوش..
🍃اما امها لما روحت حبست روحها في دارها..
وخلت مغليه قالبه الدنيا ع راس سميرة وهي تشكي منها لمحمد شنيبه..
مغليه بغضب وانفعال..
/سكتت وفوتت ومشيت هلبه قوللها تلزم حدها وتخليها في حالها ساده الواحد اللي فيه ساده.
ومشت طلعت من الصاله وهي تتحسب..
شويه وخشت سميره وهي تقول بضيق..
/والله اني مخليه روحي في حالي ع قد مانقدر يامحمد..
هو قال:عارفك عارفك..نقولك حاجه في الجديد معاش تقعمزي معاهم ولاتقعدي معاهم في مكان واحد..
سميرة بضيق:حاضر لكن ماطلعنيش من هني مانبيش نقعد بروحي..
طبطب ع كتفها وقال..
/حاضر اللي تبيه يصير..
🍃🍃🍃🍃🍃
"ايه يابوي واهو محمد يقولك شافها معاي"
المهدي بغضب..
/علاش ماتكلمتوش !؟
يزن بإستياء..
/خفنا يكذبونا ويديرونا نتبلوا عليها..
المهدي قعد يهز في رجله من الغضب ومحمد ويزن يشوفله بقلق..
تنهد وقال..
/خل يروحوا صغار طاهر من حوش حناهم ونفهم من جوري اللي صار بالزبط..
يزن:حط في بالك يابوي محمد مايديرش اللي توطي راسك..
هز راسه وهو يفكر بأسف وغضب في حالة صغار اخته المأساويه اللي ممكن تزيد سوء بعد طلاق امهم وبوهم..
🍃🍃🍃🍃🍃
"خدت رقمي "
طوبى:ان شاء الله يديرولها حل..
مروة:إن شاء الله..تعرفي اني صح مش صافية ناحيتها لكن وجعتي لدرجة معاش بديت نرقد كويس واني نفكر في حالتها..
طوبى:هما هكي الطيبين يامروشه..مرات نقول ان اقوى انتقام اللي يديره طيب لما يساعد اللي ظلمه ويوقف معاه برغم كل شي داره فيه تخلي الظالم يصغر في عين نفسه هلبه..
خطر عليا موقف سيدنا يوسف مع خوته لما قال لاتثريب عليكم اليوم بعد ماواجههم باللي داروه وهو في موقف ضعف وهما ف موقف قوة نعتبره خدي حقه منهم ثالت ومتلت..
ابتسمت مروة وهي تفكر في كلامها..
طوبى كملت وهي تقول برفعة حاجب
/لكن في ناس لازم تتعاقب بأفعالها بش تكون عبرة لمن يعتبر...
🍃🍃🍃🍃🍃
"ردي بالك تطلعي من الحوش العده متاعك كمليها عندهم بش يتعلقول بالصغار "
"وشن بنستفيد اخرتي بنرمي العده ونروح.."
نجاه:شغلي دماغك ومش حتروحي بكل..
"شن قصدك!؟"
نجاه:قصدي افهميه بروحك تصبحي ع خير...وسكرت عليها وهي مبتسمه بمكر..
سمعت باب الشقه انفتح وتسكر وقالت..
/واخيرا روحت..
بان عليها وقال..
/مش رايقلك بكل بنخش نرقد نحس ف روحي بنمرض.
فزت وجاته تعنقت ذراعه وهي تقول.
/بعيد السو عليك حبيبي تعالى معاي للدار..
ومشت بيه لدار النوم....
🍃وخوه الكبير في دار نومه حاط قدامه الحاجه اللي جابها الجالي لطوبى..حاول يمنع نفسه انه يشوفها لكن ماقدرش كل مايفكر في كلام الحاج علي والحركه اللي دارها خوه اليوم الشك يكبر في داخلها..
فتح الكيسه وشاف اللي فيها..
عقد حواجبه وقال..
"ألبوم صور!"
سكر الكيسه وقعد يفكر وعقله ماجابلاش خير...
🍃🍃🍃🍃
وجاره التارقي عقله مابطلش تفكير في صاحبة الصور..
نظرتها الحزينه فطرت قلبه وجعا..
خش ع الفيس بش يشوف كان منزله حاجه في صفحتها..
شاف اخر منشور لإعلان تبرع..الجميل هني انه ماكانش للمدرسه متاعهم بل لمكان تاني موجود فيه نازحين ناقصتهم اساسيات الحياة في فصل الشتاء تحديدا...
(" المتصدق يستخدم جندا يقاتلون عنه وهو نائم على فراشه ، فمن لم يكن له جند وله عدو فإنه يوشك أن يظفر به عدوه ".
ابن القيم...
شرحت معنى كلامه بالعاميه وحثت الناس ع التبرع بطريقه مؤثرة..
التفاعل ع المنشور كان اكثر من قبل بسبب زياده عدد المتابعين وعدد المشاركات للمنشور يعتبر كويس..
هو ماباش يدير مشاركه..نسخ منشورها وخدي الصورة ونزلها ع صفحته وكتب تحته منقول..
وكان عدد المتفاعلين كبير...فجأة وبدون سابق انذار يجيه تاق من واحد من اعضاء الجمعيه ماكانش التاق ليه هو بس..
كان لكل مش شارك في ورشة الخط اللي اقيمت في مصر قبل عام...
المنشور فيه صور من الورشه ومكتوب فوقه..
"قبل عام..وفي جنبه داير هاشتاق..
#اليوم_العالمي_للغه_العربيه
عبد القيوم تفكر هديكا الايام وتفكر حتى شعوره فيها برغم استمتاعه بوقته غادي لكن ماقدرش ينسى انها كانت اصعب ايام حياته لهداكا الوقت..
قعد يشوف في الصور وحده ورا التانيه لين طاح في صورة ليه واقف يشرح وسلافه مقعمزة قريبه عليه..
بدت ع وجهه ملامح الضيق..
غير الصورة وتجي اللي بعدها كانت انيل منها..
صورة ليه هو وسلافه تسأل فيه وهو يرد عليها..
فكر يحذف المنشور لكن تراجع عن الفكرة تحشم من الراجل اللي دارله الاشارة..
فتح عيونه ع وسعهم لما جاته رساله ماسنجر من سلافه..
فتحها وبدي يقرا..
(انا اسفه كتير ماكنت بعرف بقصة المنشور بالمرة)
رد عليها وهو يقول..
(مش مشكله )
طلع من الماسنجر وسلافه معاش بعتت شي..
دار لايك ع المنشور وخش شاف التعليقات..
ويطيح في تعليق لميار زاد غمها عليه..
علقت بصورة فيها الخطاط العراقي المشهور ع يمينه سلافه وعبد القيوم وع يسار ميار وصاحب المنشور..
🍃وتشوف سلافه التعليق تضحك بفرح..
اساسا المنشور فاجئها هلبه وفرحها وتوا تعليق ميار كبر فرحتها خلاها طايرة من الفرح..
تفاعلت عليه بأحببته وردت بقلب..
☘ويااه لوتعرف ان طوبى تشوف في نفس المنشور توا كانت حتما حترقص من الفرح...
طوبى لما شافاته اليوم رجع تلخبط كيانها وماقدرتش تسيطر ع رغبتها في انها تشوف حسابه ومن حسن الحظ طاحت في هالمنشور وشافت الصور وشافت التعليق ورد سلافه عليه.. وتخطر عليها اكثر جمله سمعتها وجعت قلبها وقهرتها اليوم...
《 عبد القيوم حكالي قديش كنتي انسانه صابرة وقاومتي بكل قوة حتى قدرتي توقفي ع رجليكي》
طلعت من المنشور ومن صفحته وهي تأنب في نفسها..
/تستاهلي تستاهلي علاش خاشه بش تقهري روحك وتعبي قلبك ناقصة انتي ماهو ناقصه..
طلعت من الفيس وحطت تليفونها جنبها..مسحت دموعها بقوة وخدت جهاز Mp3وفتحت السورة اللي قاعده تحفظ فيها حاليا..حطت راسها ع المخده وغمضت عيونها...
#كانون_الأول
#طوبى
...يتبع....
