#طوبى "جنة طوبى"
#جمان_فريد
#الجزء_الثامن_والثمانين "سجن يوسف/صبر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
قال شَيخ الإسلام #ابن_تَيمِيَة -رحِمَه اللّٰه- : 🎙️
إِذَا نَاجَى العَبدُ ربَّهُ في السَّحَرِ و استَغَاثَ بِهِ و قَالَ :
"يَا حَيُّ يَا قَيُّومُ لَا إِلهَ إلَّا أنتَ بِرَحمَتِكَ أَستَغِيث " أَعطَاهُ اللهُ مِنَ التَّمكِينِ مَا لَا يَعلَمهُ إلَّا اللهُ.
📜 مجموع الفتاوى (242/28) 🍂
صباح يوم الجمعه..
28ديسمبر...سنة 2018..
طلعت من الحمام وع وجهها ابتسامه راحه وفرح..
لطف الله غمرها وخلا اللي خافت منه مايصيرش ومش بس هكي عطاها امل..امل كبير..وخلاها متفائله بقرب الفرج..
مشت وقفت ع المرايه..
طلقت شعرها وقعدت تتأمل في نفسها..
اثر صفعة ضرتها كان واضح ع وجهها لكن هي لما شافاته ابتسمت بنصر بالذات وين تفكرت حالتها من بعده..
حطت شعرها كله ع الجنب لاحظت اثار جريمته هو باديه تخف..
خدت كريم ع الزيانه..فتحاته وحطت منه بيدها ع ع اثار الجروح والكدمات..
رجعت رفعت شعرها كعكه..ودهنت وجهها كله..
فجأه انفتح باب الجناح..بفجعه رمت حكة الكريم ع الزيانه..
ع خشته شافها كيف واقفه منزله راسها ترعش..
تنهد بعدين قال..
/حددي البدله العربيه..ولف بيطلع..وهو طالع فتح الباب ع وسعه ومشي..
هي شافت للباب كيف مفتوح فهمت انه حررها من حبسها الانفرادي..ابتسمت وغمضت عيونها وقالت في نفسها..
"نحبك ياربي..لك الحمد"..
بعدين فتحت عيونها ومشت لدولابه طلعت البدله العربيه..
كوتها وعلقتها...وبعدها قعدت تفكر تطلع ولاتقعد في مكانها..
سمعت صوت جنه وهي تطلع في صوت..
بضحكه قالت؛زرياكه..
ومشت طلعت بسرعه لدارها..وين وصلت فيها وجت بتخش..
"شويه ترا"
انتفضت بفزع ووخرت..وهو خش.
جت بتمشي وقفها لما قال..
/خليك..شويه وطالع..
قعدت واقفه جنب الباب وهي فرحانه ع الاخر..
وطول الوقت تحمد في ربي بهمس..
لما جي طالع نزلت راسها بخوف..
هو تباعد..وهي خشت..ومشت تجري لجنه وهي تقول بضحكه..
/جنة جنونتي..وتمددت جنبها وخدتها وحطتها عليها وهي تقول..
/سلملي خدود المارشميلو..وقعدت تبوس فيهم..بعدين قالت..
اني اليوم فرحانه ورايقه وجوي حلو...صح امس رقدت خايفه ونبكي..بس ربي فيقني ع راحه وفرحه..باستها تاني وقالت..ربي حلو هلبه جنونه حلو..اللي عطاني هالبنيه الحلوة حلو ومافيش احلا منه..غمضت عيونها وقالت..
"ياربي لك الحمد"...
🍃🍃🍃🍃🍃
"معاش تتوتري سلمي امرك لله وبعدين الموضوع طبيعي"
نجاح بإبتسامه قلق..
/صح..بس للي في عمري يكون خطير شويه..
عبد الحفيظ:وفي اللي اكبر منك وولادتهم كانت عاديه..
نجاح:يارب..اوفي تعالى...
جاها ولد راجلها يجري من داره..
نجاح؛قعمز افطر..
هو قال؛حاضر..خالتي امتى تجيبي خوي عطل هلبه.
بوه ضحك وشرب الشاهي..
نجاح بضحكه؛قريب حبيبي قريب ان شاء الله..
وخدت ساندويتش داراته ومدتهوله...
🍃🍃🍃🍃🍃
"بنتغدا في حوش نساباتي"
نجمه:صحتين..
صفاء:كان تسمعي مني وتجي معانا..
نجمه بإبتسامه؛مرة تانيه بنتي نادوا امك وخواتك وبعدين نمشولهم..
صفاء بإبتسامه:ان شاء الله..
وعواطف اللي كانت تفطر معاهم تسمع من سكات وغضب مخفي...
🍃🍃🍃🍃🍃
"قال خالي بيسافروا بيها اليوم العشيه"
المهدي بأسف:لاحول ولاقوة الا بالله..خلاص..بعد الغدي نمشوا كلنا نسلموا عليها..
سدرة بحزن:اني لا بابا..
يزن؛هي مريضه توا ماديرلك شي..
محمد؛معليشي سدره في االنهايه حناي ام امنا ع خاطر امي بس..
سدرة نزلت عيونها بحزن وهزت راسها بالموافقه..
وبوها معاها بنظراته اللي كلها حزن..
دق باب الشقه..
ناض يزن وهو يقول بضحكه؛النفاخ..
المهدي:تحشم..
محمد بضحكه؛بصارة بوي..
المهدي:بايخه..
وسدرة تضحك..
شويه وخشوا يزن ومحمد حامد وهو يقول..
/صباح الخير..
ردوا كلهم؛صباح النور..
المهدي؛تعالى قعمز خالي..
مشي محمد وقعمز جنب يزن..
المهدي:سمي ولدي وافطر..
محمد بضحكه؛فطرت عند امي لكن مافيش بس نفطروا مرة تانيه..
ضحكوا...والمهدي ابتسم...
شويه وقال ولد نسرين:امي امس كانت في حوش خالي الجالي وشكلها صارت دعكه غادي..
المهدي عقد حواجبه وقال..
/دعكه كيف يعني!؟
محمد؛سألت امي مابتش تقولي لكن شفتهم نازلين من سيارة خالي ويعطوا في مرته التانيه ع راسها وامي تعارك فيهم وشفت مرت خالي الاولى تبكي..قلت اكيد صارت دعكه بين نساوينه..
المهدي قعد ساكت وهو يفكر..
محمد المهدي؛ربي يهديه خالي وخلاص..
سدرة بكره؛نجاة المسمومه الحرفه نكرهها..
المهدي بحده:سدرة!..
سكتت وهي متنرفزة..
يزن:خلاص اني معاش نبي تجي معاي محمد؟
محمد؛تمام..
وناضوا الزوز خشوا داخل..
محمد المهدي؛دارها في روحه..
سدرة سمعت خوها شن قال شافت لبوها لقاته سرحان بتفكيره...
🍃وهالصبح كان سعيد ع محمد شنيبه ومحي الدين اللي فيقوهم نساوينهم ع نكد وقلبة وجه في يوم مبارك..
اما صغار نجاه تعودوا ع حال امهم..وداروا كل شي الصبح برواحهم...
🍃🍃🍃🍃🍃
وفي بلاد بعيده...
كانت خالتهم..مقعمزه في فيرندا الحوش الخشبي اللي قاعدين عليه..تتأمل في طبيعة هالبلاد الخلابه..بالذات في الشتي تكون غايه في الجمال..
تخلي اللي يشوفها يتسائل..هي الدنيا هكي مالا الجنه كيف!!؟
☘بس صابرين الشتاء القارس اللي عايشه قلبها مخليها مش حاسه بولا حاجه غير البرد والحزن..
فهاليوم..حفلة خطوبة رضا..مهما حاولت تقوي نفسها بش تتجاوز هاليوم..كل مايقرب الموعد تحس في شي فداخلها قاعد ينهار...
"حتاخدي برد لو فضلتي هنا"
صابرين بحزن:ياريت بش يكون عندي سبب يخليني مانحضرش
امينه قعمزت حداها وقالت؛بالعكس..انتي مش حتقدري تنسي لو ماشفتيش بعنيكي انو بقا لغيرك..كده حتتأكدي ان كل شي انتهى وحتنسي بجد مش بس كلام..
صابرين قعدت تفكر في كلامها اللي شبه اقتنعت بيه...
🍃🍃🍃🍃🍃
الساعه 5:00عصرا...
درست سيارة واحد من خوت اسكندر..
وسيارة اسكندر وراهم..
نزلوا من السيارتين نساوين..بين خواته وحده من خالاته ووحده من عماته..
ومحمد شنيبه اللي كان طالع من حوشه بيمشي لسيارته..
شاف سميره معاهم قدام حوش لطفي الواعر..
فتحولهم وخشوا...واسكندر وخوه تحركوا بسياراتهم وطلعوا من الشارع..
هو تنهد..بعدين مسح ع لحيته وهو يفكر..واخر شي مشي ركب سيارته..شغلها وتحرك...
🍃🍃🍃🍃
"الله يبارك قاعده تكبر بسرعه الامورة"
طوبى بلغة طفوليه..
/وين بنتك ياعمو علاش ماجبتهاش معاك صاحبتي راهو!..
ابتسم الجالي..
والمهدي قال بضحكه..
/والله فكرت فيها..معليشي مرة تانيه ان شاء الله..
طوبى بإبتسامه؛ان شاء الله..شن حالها هي وشن دايره في قرايتها..
المهدي:الحمد لله..الايام هادي مع بنت فايزة ديما مع بعض والزوز الله يبارك متفوقات..
طوبى:ايه تاله شطوره وبنيه كويسه هلبه..
المهدي:انتي شن دايره في قرايتك..
الجالي:امتحاناتها النهائيه بعد اسبوع جبتلها باقي المنهج بش تقرا وتكمل..
المهدي؛خلاص بتتخرجي!؟
طوبى؛لامازال فصل تاني مع المشروع..
المهدي؛موفقه..
ويرن جرس الانترفون..
استغرب الجالي وناض وهو يقول..
/مني!!!؟..
ومشي طلع من حداهم..
المهدي شاف لطوبى وقال..
/شن صار امس؟
طوبى رفعت كتافها ونزلتهم بعدين قالت..
/المعتاد..
المهدي:شن قالولك؟
طوبى قعدت تفرك في ايديها ببعض وهي تقول
/نفس الدوة..اني ماننفعش وكل اللي صار مني..
حرك المهدي راسه يمين ويسار اسفا بعدين قال..
/وهو؟
ابتسمت طوبى وقالت.
/شن متوقع منه؟
المهدي:قولي الحق يمد في يده عليك!؟
حركت راسها بالنفي..
المهدي:مش مصدقك..
كيف جت طوبى بتتكلم سمعت صوت الجالي وهو يرحب ببوه..
والصوت قرب لين خشوا عليهم..
محمد شنيبه:السلام عليكم..مشي للمهدي وقال..جيبها جيب..
وقعمز جنب ولده والمهدي عطاه جنه..
ناضت طوبى وهي تقول..
/آنستنا..وكبت ع راسه..
هو قال؛تكبي ع الكعبه..شن حالك؟
وخرت عنه وقالت..
/الحمد لله..نستأذن شويه..ومشت طلعت..
والجالي مشي قعمز جنب بوه يلاعب معاه في بنته وخوه المهدي يشوفله بنظرات شك..
🍃🍃🍃🍃🍃
"تفضل تفضل راهو هادي حاجه صح تبيع فيهم اختي في محل عيلة الواعر"
عبد القيوم بإبتسامه..
/ماعنديش ع الحلو واجد....المهم توا خلينا في الموضوع اللي جايك عشانه..
محمود بنظرات ترقب زي اللي يراجي في لاعب كورة لفريقه المفضل ينهي هجمته بهدف..
/نسمع فيك..
عبد القيوم؛انت اول حد حقيته في شارع القهوة ويعلم الله ان خشيت قلبي من اول ماعرفتك وهلك ناس الشارع كله يمدح فيه..واكيد حظه سمح اللي يناسبكم..
محمود بضحكه؛بارك الله فيك..
عبد القيوم؛ماقلت الا الحق..حمحم وقال..المهم عندي صديق يخدم معاي خوه بيطلع بعثه برا وقال يبي يزوج قبل وبعدين يسافر ومواصفات الزوجه اللي يبيها انها تكون قد المسؤوليه وتتحمل الغربه..وانا بصراحه فكرت كريمتكم..
بدت ع وجه محمود ملامح الاحباط..ضيق عيونه وقال..
/امم...باهي هو منين وشكون عيلته وشن يقرا؟
عبد القيوم عطاه معلومات كامله عن الشاب وعيله..
واللي سمعه محمود غيرله جوه..عيلة مرتاحه ماديا..والشاب يقرا في تخصص ليه مستقبل وغير هكي سنه مناسب لسن اخته..
عبد القيوم ضم كفوفه لبعض وقال..
/شن رايك؟
هز محمود راسه وقال..
/نشوف العيله ونرد عليك..
عبد القيوم:وانا عطيتك اسم عيلته اسألوا عنه براحتكم..
محمود ابتسم وقال..
/إن شاء الله خير..
عبد القيوم بإبتسامه..
/إن شاء الله..
🍃🍃🍃🍃
وضيفت طوبى شيبانيها وسلفها..وقعمزت معاهم هدرزوا شويه بعدين طلب محمد شنيبه طلب خلا الجالي يستغرب ويخاف.
محمد:بالله بنتي نبيك في موضيع..
طوبى:تفضل عمي..
ناض محمد وقال؛بيني وبينك..
ناضت طوبى وهي تقول:تعالى نطلعوا للصاله..تفضل..
مشي محمد سبقها وهي لحقاته وكانت مبتسمه ع جنب..
الجالي للمهدي:شن في!؟
المهدي؛اكيد ع المشكله اللي صار في حوشك امس امك قلبتله راسه..
تافف الجالي ضجرا بعدين قال..
/استغفر الله..
المهدي:شن صار بالزبط..
الجالي وهو يشوف لبنته كيف شاده صبعه قال.
/دوة نساوين فاضيه...
☘☘☘☘☘
وفي الصاله..
ع الصالون قعمزوا طوبى ومحمد شنيبه..
هو كان مرتبك بعض الشيء..
وهي حاولت تشجعه لما قالت..
/اكيد عمتي دارتلك قصه ع المشكله اللي صارت امس.
محمد شنيبه؛صدعتلي راسي الحق واني الدوة هادي مش مدورها بكل..
طوبى:ربي يهديها..اني حاولت نسايرها لكن وسامحني فيها هي طبعه صعب وماتتفاهمش..عكسك عمي بالك واسع وقلبك كبير وتساير..
ابتسم محمد شنيبه وهو يهز في راسه..
طوبى:انتم في هالعمر مفروض تبعدوا عن المشاكل وتلهوا في ارواحكم وصحتكم وماعليكم في حد..
محمد شنيبه؛صعب يابنتي المشاكل تجينا بروحها..
تنهدت طوبى وقالت..
/الله غالب..تعرف عمي وسامحني يعني..لوعمتي مراة تانيه مرنه هكي ومرحه وقلبها كبير زيك وبالها واسع راهو نص المشاكل اللي طحنا كلنا فيها ماصارتش..
هز راسه وقال؛صدقتي..وسامحيني يابنتي..اني لولا انها اصرت عليك ماخليتهم يخطبوك بكل..ويعلم الله قداش متحشم منك لكن حتى انتي ربي يهديك ماقصرتيش..
طوبى:مش مهم توا خلاص اللي صار صار..
هوقال:صدقتي..خلاص اللي صار صار..بنتي طوبى..
طوبى:نعم عمي..
حمحم وقال..
/مش عارف كيف بنبدا..ضحك..
طوبى بإبتسامه:ماتتحشمش مني اني زي بنتك..
ابتسم وقال..
/بصراحه يابنتي..اني ناوي نتزوج..
قعدت تشوفله بملامح عاديه ماابدتش اي ردة فعل..
محمد شنيبه؛هدا حقي الشرعي..والحق الحق..عييت وفديت من النكد ووجع الراس.
هزت طوبى راسها وقالت..
/حقك..والله حقك..
ابتسم وقال..
/باهي نبيك تساعديني..
طوبى وهي تسمع فيه..تردد لمسامعها كلام مغليه اللي سمتها بيه امس..
《 مغليه؛ظلمتي ولدي في جرتك ونكدتي عليه وماخلتيشي يفرح ببنته ويقعد متحسر ع شوفتها وحرمتينا حتى حني منها.
ببكي:اني مش مسامحتك والله ماني مسامحه.》
ابتسمت ابتسامه تبان بريئه لكن نظره العيون كانت العكس وقالت لعمها..
/حاضر عمي نساعدك باللي نقدر عليه وان شاء الله مانتحشمش معاك..
🍃🍃🍃🍃🍃
الساعه 7مساءا..
في قاعة احتفالات كبيره..
تنسيقها كان جميل جدا وراقي..مليانه بالمعازيم من اصحاب الطبقه المخمليه..عرب وغرب..
كلهم جايين يحضروا حفلة خطوبة بنت طبيب ليبي مشهور ع شاب من ولاد بلادها انقال عنه رجل اعمال واعد وعنده مستقبل..
صابرين كانت واقفه ع وحده من الطاولات ومعاها امينه..
لابسه فستان سماوي مستور وانيق..وطلتها كانت ناعمه شعر وزينه...
بس ملامح وجهها كان باين فيهم الحزن..
وامينه جنبها تتفرج ع العالم اللي هي فيه وتقول في نفسها ان اللي داره رضا كان عين العقل...من الاساس قصته هو وصابرين محكوم عليها بالفشل من قبل لتبدا..
من بعيد شويه شافتهم فاتن اللي كانت لابسه افارول سهره لونه خمري وطالعه جميله جدا بموديل شعرها القصير ومكياجها الناعم...
مشت ناحيتهم..وصلت فيهم وقالت بإبتسامه..
/وينكم وين؟
وجت لصابرين وسلمت عليها بالخد..
امينه:وصلنا تعبانين من السفر نمنا على طول..
جتها فاتن سلمت عليها وقالت.
/حمد لله ع السلامه..
الزوز قالوا:الله يسلمك..
فاتن وهي تمرر في نظرها بيناتهم..
/شن هالحلو..
صابرين بإبتسامه؛عيونك الحلوة.
امينه:كلك ذوق..
ركزت فاتن بنظرها ع صابرين لاحظت ان وزنها نازل والحزن باين في عيونها..تنهدت بعدين غيرت نظرها للمعازيم..
لمحت من بعيد مختار قالت..
/نستأذن..ومشتله بسرعه..
صابرين ودموعها في عيونها؛تعرفي مخنوقه مش قادرة نتنفس نبي نروح..
امينه؛قوي نفسك واستحملي ياحبيبتي معليشي..وكأنك بتكوي جرحك بالنار عشان يلتئم..وجع ساعه ولاكل ساعه..
بلعت صابرين ريقها وقعدت تمرر في نظرها ع الحاضرين..
🍃🍃
فاتن؛كنت مع صابرين وامينه..
خال ياسمين "أيهم"؛من يكونوا؟!..
مختار:ناس عزيزه عليا..وينهم..
فاتن اشرتله عليهم وقالت..
/غادي..
ايهم وجه نظره ليهم..وعيونه ماجو كان ع صابرين لفتت انتباهه هلبه..
مختار مش ناحيتهم ومعاه فاتن وهو لحقهم...
وصلوا فيهم..ومختار قال.
/حمد لله ع السلامه.
هما ردوا عليه..
/الله يسلمك..
مختار:علاش ماجيتوش بعد ماارتحتوا؟
امينه؛من التعب السفر رحنا في سابع نومه.
مختار؛معذورين بش وصلتوا هني خطمتوا ع ستلاف مطار..
امينه؛حضرتك وشك كأنو تعبان شويه..
فاتن؛اسكتي ياامينه..فجعنا عليه..
مختار:ماتبالغيش..
امينه؛حصلك ايه!؟
مختار:تعب بسيط..
فاتن:نحسابوه مات رضا قريب خش في عقله وطلع لما طحت قدام داره..
امينه بخوف:للدرجه دي!؟
هما يتكلموا وايهم عيونه ع صابرين...
مختار:مافيا شي..الدكتور قال ضغط نفسي مش اكثر..
امينه:خود بالك من صحتك الشغل مابيخلصش ريح نفسك شويه..
مختار بملل:كنتي ناقصتيني انتي ماهو!
ضحكوا..
ايهم بإبتسامه؛خلونا من الدوة الكئيبه هادي وعرفونا...
التفت مختار نص التفاته وشافله بنص عين..
فاتن بإبتسامه:هادي امينه بالنسبه لمختار اخت كبيره..
مختار شاف لصابرين وقال...
والجميله هادي صابرين تقدر تقول اختي الصغيره..
ابتسم وقال؛فرصة سعيده..اني ايهم..ودار بأصابعه حركة بين قوسين..خال العروسه..
ابتسمت صابرين مجامله ونزلت عيونها للطاوله..
مختار التفتله وقال:تعالى نشوفوا العروسه ياخالها تعالى..وخداه من يده ورفعه معاه..التفت ايهم لصابرين قعد يشوفلها بإبتسامه..
وهي غيرت عيونها عنه وقالت..
/خيره هدا!!؟
فاتن بضحكه:ماقدرش يقاوم..
ضحكت امينه..
وصابرين ابتسمت بملل..
فاتن:نستأذن..
صابرين:خودي راحتك..مشت فاتن...
وصابرين تنهدت من قلبها..امينه طبطبت ع ذراعها..شافت لأمينه بإبتسامه بسيطه..
☘بعد مرور ربع ساعه..
جي وقت دخول العرسان..
صابرين شدت في يد امينه..وامينه شدت ع يدها بقوة..
خدت نفس عميق وهي تسمع في الاغنيه اللي بيخشوا عليها..
قالت في نفسها بنفاد صبر..
"هيا خشوا..تعبت"
ويبان عليها رضا..فتحت عيونها ع وسعهم لما شافاته وقلبها فر فران..
ليها شهر ماشافاته...بس اللي صدمها انه يبان مرتاح وزايد وسامه و وانيق بزياده الليله..
كان مبتسم..الابتسامه تبان من القلب..ايده شاده يدها..البنت اللي اختار يكمل حيانه معاها..طبس وقعد يساويله في فستانها بعدين وقف ع حيله هي قربت منه وهمستله بكلام خلاه يضحك..
وبدوا يمشوا مع بعض بإتجاه الكوشه..
صابرين وهي تتفرج قلبها المتصدع قعد يتكسر قطعه قطعه حست روحها وكأنها سمعت صوته وهو يتكسر..
قعدت معاهم بعيونها وهما يمشوا وشادين في ايدين بعض والضحكه ع وجوههم ومنسجمين ع الآخر..
فاتوا من قدامها وتباعدوا عنها..ومازالت نظرات عيونها المصدومه تلحق فيهم...لين وصلوا للكوشه..
فاتن من بعيد كانت مركزه عليها وجعها قلبها..
وامينه وين شافت حالتها والدمعه اللي طاحت من عينها خافت عليها من الانهيار..قوت مسكتها ليدها وصابرين كانت راخيه..معاش عندها حيل لشي..
اللي صدم صابرين ان رضا طلع زيه زي كل الرجاله ومافي شي يميزه عنهم..وكل اللي قاله واللي عيشها فيه مجرد اوهام ومشاعر كذابه..والله اعلم مرات حتى هو كان غرضه منها مش شريف وبريء زي ماهو يقول غير جاها بطريقه تانيه يقدر يطيحها بيها...
قعدوا دموع يطيحوا وحده ورا التانيه وين شافتهم بيلبسوا الدبل..
العروس لبساته هو الاول..وسط تصفيق الحضور..
بعدين هو لبسها..ومجرد مالبسها سمعوا صوات زغاريد شافت لمصدر الصوت..لقتهم زوز نساوين جميلات لابسات الزي الجزائري وغير محجبات وحده تبان خمسينيه..والتانيه تلاتينه..
مشوله الزوز سلموا عليه بالأحضان بعدين سلموا ع خطيبته بالخد..
صابرين بنبرة مخنوقه..
/منو هادم..
امينه بحزن؛امه واخته..
شافتلها وهي متفاجئه..
امينه؛امه جزائريه واخته من امه..
ردت صابرين نظرها ليه..لقاته يسلم ع ام خطيبته..
بعدين سلم بوها..وبعده جاه مختار خداه بالأحضان..
ومن بعد سلامه ع مختار..سلمت عليه خطيبته بالخد..
عايشين في بيئه لايحكمها دين ولاعرف مدعين التحضر لاعجيب عليهم ولاغريب..
نزلت صابرين عيونها وحطت يدها ع صدرها وهي تقول بوجع..
/معاش قادره خلاص..بنموت ياامينه..
وجبدت يدها من امينه ومن بين الحضور طلعت برا القاعه..
فاتن اللي كان مركزه معاها لما شافتها طالعه لحقتها طول..
🍃صابرين كانت تمشي في ممر طويل وهي حاطه يدها ع الحيط وتبكي بألم..
معاش قدرت تمشي سندت ظهرها عليه..وقعدت تمروح ع روحها بإيديها وهي تبكي..
فاتن لما شافت حالتها دمعوا عيونها..
جتها وهي تقول:صابرين..
صابرين ببكي:نار..نار تحرق في قلبي..وضمت فاتن..
وفاتن ضمتها ودموعها ينزلوا..
🍃🍃🍃🍃🍃
"عيلة جوها مليح وشهلوليين يجلوا الغمه"
مطيره؛بالله ياوخيتي فكينا من كلمة يجلوا اي كلمة تشبهها معاش تقوليها..
ضحكوا..
هاديه بضحكه:باهي..لكن نقوللكم حاسه والله اعلم اريج والاء بيمشوا في ليله وحده وقريب مش بعيد..
فردوس:لاياوخيتي في مرة وحده لا ع الاقل تقعد وحده تصبرني ع اختها..
الاء بضحكه:مازال اني قدامي مشوار قرايه..
اريج؛عن نفسي ماعنديش مشكله كان قريب..
مطيره:خيرلك تطويل الخيط يريح اليبره..
فردوس:ان شاء الله خير..
هاديه؛مالا وين فايزة نبي نسألها عن بنتها..
مطيره:لهت بعزومة نسيبها..
هاديه؛ماعرفتوش كان بنتها حامل ولالا..
مطيره؛ياوخيتي ماقالتش..
"عمتي"
هاديه:ربيبي حسين..
مطيره؛ماتبيش احساس..
ضحكوا ومطيره قالت..
/خش خش مهناك حد..
شويه وبان عليهم حسين لمح مرت بوه وخر..
هاديه؛تي تعالى ياودي خل نشوفك اني مرت بوك زي امك..
قعدوا يضحكوا..
وهو خش عليهم شافلها بإبتسامه وقال..
/سامحيني..
هاديه:اللهم صل ع النبي..
مطيره:تو مش خسارة هدا يقعد من غير مراة..
حسين؛قصدك ماسمعتيش انتي بنترهبن خلاص..
ضحكوا..
مطيره؛بالله شوفي وجهه وجه زواج ولالا!؟
عقد حسين حواجبه بأستغراب..
هاديه؛والله اعلم..وجه زواج..
حسين ضحك بعدم فهم..
مطيره:باهي امتى!
هاديه بضحكه؛لاعاد اني هاديه مش هدى..
ضحكوا عليها..
بعدين حسين قال بضحكه..
/ماشي نروح بأميمه اعبوا بيا في العشي..
هاديه؛توكل توكل حصتك مدسوسه مدام اميمتك مهناش اني اميمتك..
ضحك حسين وقال..
/بارك الله فيك..السلام عليكم..ومشي ..
هاديه:ربي يحفظهم كلهم غزله...
"هاديه"
هاديه؛اهو الغزال الكبير..جايه جايه..
وناضت وطلعتله تجري..
مطيره:كلا حظ خوي عبد المطلب يفلق الصخر..
الاء بهمس:افتك من هديكا المنكده..
عضت مطيره ع شاربها وهي تضحك..وفردوس واريج يضحكوا بكتمان..
🍃🍃🍃🍃🍃
"ماتخلنيش نعطيك بقفا ايدي"
غرفه وهي تبكي؛خلاص شديتك بالثابت ورسايل وجو..شن ديري..وراجيه لين يطلع وكلميني..انت تطلع هكي يارؤوف انت!! ياخسارتك وخلاص..ياخسارة قلبي في واحد زيك..
ومشت لدار النوم خشتلها وسكرت الباب بقوة..
عبد الرؤوف بضحكه:مراة مهبوله..والله مانقولك لو تطلبي الطلاق عارفك كان قتلك شن ديري..
ومشي بطريقه للباب وطلع من الحوش..
🍃وطوبى..
مقعمزة في دار بنتها جنه ترضع فيها رز مطبوخ ومرحي..
شافت ضي البرق بعدين سمعت صوت الرعد..
ع خشته هو..انتفضت مفزوعه..
هو بدون مايشوفلها حط دوسيه معبي شيتات ع الكرسي وطلع من غير مايتكلم..
وهي قعدت تشوف للدوسيه بضيق... رضعت جنه لين رقدت وحطتها في سريرها..
بعدين مشت للدوسيه خداته وفتحاته وقعد تعد في المذكرات اللي فيه..
تنهدت..وسكراته ورداته للكرسي..بعدين طلعت من الدار..
مشت بخطوات متردده ناحية الجناح..شافت ضي دار المكتب مفتوح عرفاته داخل..
ولت من حيث اتت وهي خايفه..
سمعت باب المكتب انفتح..بعدين تسكر بالمفتاح كالعاده..وسمعت بعدها صوت خطواته نازل من الدروج..
طلعت من الدار ومشت وقفت جنب سياج الدروج..سمعت باب الفيلا انفتح وتسكر..
مشت بسرعه لروشن الجناح..وقفت وراه وهي تسمع..
سمعت باب الحوش الخارجي انفتح والسيارة طالعه..
والمطر تصب خيط من السمي زي مانقولوا..
التفتت ومررت نظرها ع الجناح وبدت بعمليه البحث..
دورت كويس بدقه وفي كل حاجاته..حاجه حاجه..مالقتش اللي تبيه..
طوبى باسف..معناها يافي دار المكتب ولاالسياره..وهادم الزوز صعب هلبه ندور فيهم..فكرت شويه وقالت..نو ندبر كيف..ورتبت الجناح كويس..بعدين طلعت منه وتوجهت لدار جنه...
🍀🍀🍀🍀🍀
ويمر اسبوع...
🍃من تاني يوم بعد حفلة الخطوبه يسافروا صابرين وامينه من غير مايشوفوا رضا...
انشغلت صابرين بقرايتها وشغلها..وشبه تناست رضا...
🍃واريج اللي تبي تنسى نضال تمت فضانية اسكندر فيها وحددوا موعد للتلبسيه اللي حتكون مشتركه بينها وبين اختها ...
🍃وصفاء عاشت احلى اسبوع مع راجلها..طلعات وعزايم وكان يساعد فيها حتى في القرايه..يعني ارتاحت من هم الحوش...وارتاحت من عواطف مؤقتا...
🍃 زي الراحه اللي عاشت فيها طوبى بتحاشي الجالي ليها ووجودها جنب بنتها..قعدت بس لاهيه بقرايتها وماتبي تشغل بالها بشي لين يتموا ا متحاناتها...
🍃والجارة منيه شبه ارتاحت لما خلت ادارة المركز تنقل اريج للخدمه مع دكتورة تانيه المهم ماتقطعش رزقها..
واريج مااستغربتش اللي وفسرت انها تبي تحافظ ع علاقتها بعمر...
🍃وغيرهم عايش ع نار يراجي في يوم يسمع فيه مايطمنه عن عزيز قلبه...
التارقي اللي مش قادر يعيش زي الناس من خوفه ع ام العيون الحايره..
بس في نفس الوقت ريح قلب محمود وعيلته وطمنهم ع بنتهم...
حنان انخطبت لأخ عيسي اللي لما شافاته في النظره الشرعيه نست التارقي ومايجي منه..كان شاب وسيم ودمه خفيف وغير هكي عجباته هلبه..شن مازال تبي تاني..
عصفور في اليد ولاطير حر في صحرا مش اي حد يصيده!.
🍃ومازالت غرفه عايشه دور المراة اللي اصطادت راجلها يخون فيها..وخدت موقف من عبد الرؤوف وقاطعاته مقاطعه تامه وهو صابر ع هبالها ولاهي مع ولاده اللي كل مايكبروا يسيطر حبهم ع قلبه اكثر واكثر...
🍀🍀🍀🍀🍀
وبدي اسبوع الامتحانات...
والجالي يرفع في طوبى يوميا دير امتحانها يقعد يستناها لين تكمل ويروح بيها...
لعند اخر يوم اللي كان الاربعاء...
9يناير...سنة 2019...
اليوم هدا كان الجو فيه شديد البروده..والمولد في الفيلا شغال لأن الضي كان مقطوع..
طوبى ضامه بنتها لحضنها...وهي تسمع في تسجيلات لسورة الاعلى من زينب تعطي فيها بالأحكام..
ع خشته هو..وقفت التسجيل وقعمزت كويس..
هو قال بدون مايشوفلها.
/خالك لوطا..
من فرحتها..حولت الغطا ونزلت من السرير وطلعت تجري..
وهو بخوف قعد يلحق ويقول..
/بالشويه تو طيحي..
ولااهتمت لكلامه..وصلت لوطا ومشت للمربوعه بسرعه..
وصلت وخشت وين شافت المحجوب قالت بفرح..
/خالي.
هو دمعوا عيونه بألم..وهي جاته تجري وضماته..
المحجوب ماقدرش يتمالك نفسه قعد يبكي..
وهي قعدت طبطب عليه وتقوله..
/ماديرش في روحك هكي..تباعدت عنه وقالت..تشوف فيا حالي باهي..عايشه الحمد لله..
المحجوب مسح دموعه بقوة..وخدها من يده قعمز وقعمزها جنبه وقال..
/جاوبيني بصدق مادارلك شي!ماضربكش مااستعملش سلاحه معاك!؟
طوبى:لاصدقني لا..هو مخليني نقرا..ومرات يطلع فينا..وقاعد يساير فيا..
المحجوب بشك:متأكده؟.
ضحكت وقالت..
/وانت شن تشوف قدامك؟
مسح ع راسها وقال..
/وبنتك شن حالها؟
طوبى:تهبل الله يبارك خسارة كيف رقدت كان هدا نزلتها..
🍃والجالي واقف جنب الباب يسمع في حديثهم..
قعد المحجوب ساعه وروح وبرغم كل محاولات طوبى لطمئنة قلبه مااطمنش ولو شويه..
🍃🍃🍃
"ياريت لهفتك ع خالك نشوفها عليا..ياريت تضحكي في وجهي وتحكي معاي زي ماديري مع بوي وخوتي.."
راكبه الدروج وهو وراها يتكلم وهي تسمع بخوف..
وصلوا فوق..شد يدها..بدت ترجف وتجبد فيها..
الجالي بالألم؛تعالي نوريك كيف كنتي قبل..تعالي شوفي..
وجرها وراه لدار المكتب..فتحها وخش..
قعمزها ع الكرسي وهي ترعش وقلبها بيوقف من الخوف..
فتح قدامها اللاب توب وحط ع الفيديوهات..
الجالي ودموعه ينزلوا..
/شوفي شوفي كيف كنت تمشي وانتي في حضني..كيف كنتي تضحكي معاي وتهدرزي وتغني..كيف كنتي تحطي في راسك ع كتفي وترقد..كيف كنت نحط راسي ع رجلك وانتي تمسحي ع شعري لين نرقد..اني نبي طوبى هادي..طوبى هادي هي اللي نبيها..
طوبى بحده ونبرة مرتعشه..
/طوبى هادي ماتت في اليوم اللي عرفاتك فيه ع حقيقتك من قبل مانكشف علاقتك بنجاه..لما عرفت قداش انت واحد اناني اصولي همه نفسه وبس..اني في وقت الشده لقيتك زايدني ع مابيا. لما هملت روحي وتغير شكلي وزاد وزني معاش عجبتك وقعدت تقارن فيا بغيري وياما سمعتني كلام كسرني وهدني ياما..شافتله وقالت..انت طفيتني ياجالي قتلت فيا كل شي حلو..انت وعيلتك باللي درتوه معاي نسيتوني كيف كنت اصلا..
كان يسمع فيها ودموعه ينزلوا.
ناضت وهي تقول..
/انسى ياجالي يجي يوم ونلين من ناحيتك انسى بالذات بعد اللي درته مش مسامحاتك لين نموت..
ومشت بسرعه طلعت من حجرة المكتب..
وهو قعمز ع الكرسي وحط بده ع جبهته يعاود يتفرج ع الفيديوهات وهو يبكي..بعدين ناض وطلع من حجرة المكتب بدون مايسكرها نزل لوطا وطلع من الفيلا ع رجليه بدون السياره...
🍀وعدت الساعات وهو ماروحش..
وهي حاولت تستغل غيابه ودير حاجه..
خشت ع حجره المكتب ودارت روحها ترتب فيها تحسبا من وجود كاميرات فيها..
دارت روحها خدت مخطط بتحطه في الدولاب..وين جت بتفتح الباب لقاته مسكر بالمفتاح..
ردت المخطط وين مالقاته وطلعت وهي تفكر في اللي مخليه مسكر دولابه في المكتب بالمفتاح!
مشت لدار جنه..وخشت للسرير وهي تفكر لين خداها النوم...
☘بعد ساعه روح ...
ركب الدروج ومشي لدار جنه شافهم الزوز راقدات مع بعض ومعطيتهم بطانيه وحده..
تنهد بألم بعدين مشي للجناح..
فتح الباب وخش..وارتمي ع السرير بحوايجه ورقد ع بطنه..كان منهك هلبه وحاس بوهن في جسمه..
شاف للكامدينو لقي طاسه فيها ميه..عرفها ليها اكيد شربت منها..خداها وناض بنصه الفوقاني شربها كلها..بعدين رجع رقد وجي بيردها لمكانها تفكر هديكا الليله المشؤومه..غمض عيونه بشده وهو يبكي..وضغط ع الطاسه لين انكسرت في يده رخي يده تحت طاحت الاجزاء المكسوره ويده بدت تنزف..
وتمر ساعه تانيه..فاقت من النوم فجأه..شافت جنبها لقت بنتها قاعده راقده..طبست عليها باستها من راسها..
بعدين نزلت من السرير وطلعت من الدار بتمشي للحمام...
وقفت لما سمعت صوت آنين..
التفتت وشافت للجناح...ومازال تسمع في صوت الانين..
رجليها خدوها للجناح..خشت...
شافاته راقد ع السرير ويأن...قدمت بالشويه..
بانت عليها يده المجروحه واجزاء الطاسه المكسورة..
عقدت حواجبها وهي تشوفله بقسوة..
تفكرت كل شي بشع داره فيها..وخرت خطوة بعدين لفت ومشت طلعت من الدار...
🍃عدوا بالزبط سته دقايق...
خشت وفي صندوق اسعافات اوليه..حطاته ع الكمادينو وفتحاته.. بعدين قربتله وهي لابسه في رجليها بش مايجرحهاش المرش...
غمضت عيونها وخدت نفس بعدين زفرت..فتحتهم..وخدت يده شافت الجرح ماكانش عميق..وبدت تسعف فيه..
هي لما حطتله مطهر..استاقظ وفتح عيونه شافها..كان يحساب روحه يحلم....
هي كملت اسعاف الجرح بعدين لفاته بشاش ولصقاته كويس..
نزلت يده ورفعت عيونها فيه لقاته قاعد راقد او هو تظاهر بهكي..
قربت يدها بصعوبه من جبهته وحطتها عليها لقت حرارته مرتفعه..خدت الشنطه متاع الاسعافات وطلعت..
وهو فتح عيونه والدموع تنزل منهم..
دقايق وولت بسفره فيها صونيه ميه وخل ودواء خافض للحراره..
حطت السفره ع الكمادينو...
وقعدت تشوفله بحيره..شويه قربتله..وحاولت تخليه يرقد ع ظهره..
هو فاق وساعدها..وخرت عنه من الخوف..
هو غمض عيونه بتعب ولف وجهه عنها.
هي تنهدت...بعدين قالت..
/نوض خود الدوا..
هو بتعب؛مش قادر..
تأففت واستغفرت بعدين خدت حبة الدوا وقربتها لفمه وقالت..
/افتح فمك شويه..فتحه..حطت فيه الدوا...ساعد روحك بش تشرب..
هو قال؛حتى هكي باهي..
طوبى بحده؛انت حر..وخدت الفوطه عصرتها وحطتها ع جبهته..هو شد يدها ولف وجهه ليها وبتعب قال..
/علاش..
طوبى بحده؛لله مش ليك..
هو قال..
/طيبتك ماتقدريش عليها..
طوبى بنظرات حاده ودموعها في عيونها...
/مانقدرش نولي زيكم ..
حط يدها ع قلبه وغمض عيونه وقال.
/نحبك..وماعرفتش كيف..حبيتك...عشقتك..خديجه دارت فيا خير لما حطاتك في طريقي...خلت في حياتي حاجه وحده بس صافيه وحلوة زيك..حط يده التانيه ع يدها وقال..ياريت عرفت كيف نحبك..ياريت..
جبدت يدها منه بقوة..ومشت طلعت من حداه بسرعه..
وخلاته قاعد حاط ايديه ع قلبه وهو مغمض عيونه ودموعه ينزلوا....
#سجن_يوسف
#طوبى
....يتبع....
