■■■■■■■■■■■■■■■■■■■■
❎تنويه❎
بعض احداث اقسام جزء #منازل_القمر صعبة ومرهقه نفسيا
#طوبى "جنة طوبى"
#جمان_فريد
#الجزء_116"منازل القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "الإنسان هو مخلوق متعدد الأبعاد ؛ يتألف من جوانب متضادة ومتناقضة، فهو قادر على النبل والخسة في الوقت نفسه."
دوستويفسكي🍃
________________________________________
واقفات في الممر بيناتهم وراق وحده تشرح للتانيه عن اللي فيهم..
🍃اميمه؛فوق فقر الدم عندها نقص كالسيوم وبوتاسيوم فيتامين دال في الارض وب12ناقص هلبه وعندها نقص حتى في الزنك..عندك الغده الدرقيه ووضائف الكبد والكلى هادم امورهم تمام..
غرفه بقلق:معناها وضعها النفسي والكسل وكثرة النوم بسبب النقص في الحاجات هادي!؟
اميمه بأسف:اكيد..وينها هي نبي نشوفها..
تنهدت غرفه وقالت..
/راقده..
اميمه ضيقت عيونها وقالت..
/قداش ليها راقده؟
اميمه؛صلت العصر ورقدت طول..
مطت اميمه شفايفها القدام وضمتهم وع وجهها باديه ملامح القلق..
غرفه بضيق..
/كان فيها كيف تجونا من غدوة يااميمه.. غدوة صيام نبي نديرلها جو لمه زي ايام رمضان بالك تغير جوها شويه..
اميمه هزت راسها وقالت..
/تو نقول لأمي وحسين ونرد عليك..
حطت غرفه يدها ع ذراع اميمه وقالت برجاء..
/عارفتها صعبه عليك وكان تلقي في العيد من اصله ماتجيش حتى جيتك توا ع خاطر طوبى عارفتها غاليه عليك وانتي اقرب وحده ليها بالله يااميمه ع خاطرها تحملي شويه كلها نهارين وتروحوا..
تأثرت اميمه بكلام غرفه وعيونها دمعوا..
حطت يدها ع يدها وقالت..
/حاضر ع خاطر طوبى غدوة إن شاء الله من الصبح نكونوا هني..
شدت غرفه يدها بقوة وقالت بإبتسامه..
/سلمها ياربي..
🍃🍃🍃
وروحت اميمه وخلت عقلها عند طوبى حالتها خوفتها..من قبل تشوف فيها كيف قاعده واقفه ع رجليها رغم كل شي مرت بيه..ع صغر سنها قاومت وتحملت وحملت ع كتافها همومها وهموم غيرها وقاعده داري في جروحها واحزانها ع خاطر الناس اللي تحبهم ماتبي تشغل بال حد بيها ماتبي تكون عبء ع حد..
فهمت اميمه وقتها ان طوبى حملت حمل اكبر منها ظهرها ماكانش قوي كفايه بش يقيمه..انهارت وطاحت وطاح هالحمل عليها..
🍃خدت دوش وصلت المغرب ومشت طلعت للصالون لقت امها وخوها مقعمزين يتفرجوا ع الشاشه"التلفزيون"..
صفيه ودموعها في عيونها..
/الحمد لله العيد هدا بيديروا الصلاة..
اميمه:ايه لكن مش في الساحات العامه زي قبل...
صفيه:المهم يصلوا العيد..
حسين حط يده ورا راسه وشاف لامه وهو يقول..
/غدوة ان شاء الله بناخد الضحايا وبنرفعهم لحوش طوبى.
اميمه:هدا اللي جيت بندوي عليه اليوم مشيت رفعت تحاليل طوبى لحوشها..
صفيه بقلق:شنو تحاليلها!؟
اميمه:جسمها ضعيف هلبه وناقص فيتامينات وعندها فقر دم..
حسين بأسف؛والله قلتها امس مضاعفات الكورونا نعرف واحد بعد بري منها رقد في المستشفى اسبوع لنفس السبب..
صفيه بحزن..
/ياروحي بنيتي..
اميمه ودموعها في عيونها قالت..
/قالتلي غرفه نبيكم تجوا من غدوة،قالت بالك اللمه تغير جوها شويه..
صفيه؛كانك عليا اني مادا بيا...
حسين:خلاص غدوة الصبح بإذن الله نرفعكم..
اميمه:بتجي معانا من غدوة قصدك!؟
حسين بإستغراب..
/وين المشكله!؟
اميمه بضحكه..
/ماهو سمعتك امس تكلم في واحد تقوله وتي الفطور..
فرك شحمة وذنه اليسار وشاف للشاشه وهويقول..
/بالجو..بصارة مش جديات..
صفيه:خلاص مالا غدوة تاخد الخضرة ع طريقك..
هز حسين راسه وقال..
/تمام..
🍃وعدا باقي اليوم زي ماعدت الايام اللي فاتت ع غرفه واريج وطوبى..وجنه..
لكن في الخمس..
☘الاجواء كانت غير مع زوارها..
مزرعة المهدي بنظامها وكل شي فيها حلوة من اول ما حطوا رحالهم فيها انشرحت صدروهم..
ولأنهم في الخمس لازم يزوروا بحرها..
توجهوا كلهم بعد الغدي للبحر وقعدوا فيه لبعد آذان العشاء وعاشوا احلى الاجواء..
واكثر من استمتع فهاليوم خديجه اللي قضتها سليفيات وستوريات..
🍃وعند التوارق ماكانتش الاجواء تقل في جمالها عن اجواء عيلة شنيبه الا ان عبد القيوم مش قادر ينسجم فيها قلبه واكله القلق..مش قادر يرتاح..
هو من غير شي معاش يطيق يقعد في مكان هي مش فيه يابال توا خلاها وهو عارف حالة الحزن اللي عايشه فيها..
من وسط الاجواء الحلوة انسحب..ومشي وين مافي مشتل الورد رفع تليفونه وخش ع الفيس بوك بيشوف لو منزله حاجه ع صفحتها "حنة"..خش وشافها لقي اخر منشور نزل فيها ليه عشرة ايام..
تنهد بقلق..طلع من الفيس بوك وخش ع جهات الاتصال..حط ع رقم المهدي واتصل بيه..
🍃المهدي وقتها كان يسكر في سيارته بعد مانزل منها الحاجات اللي رفعوها لطلعة البحر..
وكيف جاي بيمشي يخش للحوش جاه اتصال عبد القيوم..
طلع الهاتف من جيبه شاف المتصل فتح الخط ورد..
/اووو..تارقي
"مهدي شن حالك"
المهدي:الحمد لله انت شن حالك وشن حال العيله اللي جيتهم..
"الحمد لله في خير ونعمه..شن حال هلك وناس الشارع"
رفع المهدي حاجبه وقال..
/العيله حالهم باهي لكن ناس الشارع مانندريش عليهم..
"ليش انت وينك؟"
المهدي بإبتسامه..
/لحقانك ياسبع..
"كيف قصدك انتم في مزرعتك اللي هنى!؟"
المهدي بضحكه؛اها جينا اليوم الصبح..
"قصدك انت وهلك"
المهدي:ايه كلنا قلنا نعيدوا بعيد عن طرابلس وجوها اللي يغم..
سكت عبد القيوم والمهدي كيف عارف ان في فمه كلام تاني ويبي يقوله مش قادر..
/تارقي..ايوه..
"معاك معاك..معناها بكرا ان شاء الله معزومين عندنا بعد الفطور"
المهدي:بارك الله فيك خليها مرة تانيه..
"لاوالله العظيم تجوا يامهدي..نقولك..تو نكلم عمي محمد ليش نقولك انت"
ضحك وقال..
/خلاص تفاهم انت وياه..
"تمام..مالا سلم ع الجميع وتصبحوا ع خير"
المهدي:حتى انت سلم ع العيله..نتلاقوا..
"ان شاء الله..السلام عليكم"
المهدي:وعليكم السلام..
نهي المهدي المكالمه وهو مبتسم ابتسامه جانبيه ومشي كمل طريقه للحوش..
🍃اما عبد القيوم اللي كان مضايق لأبعد حد مشي لجذع الشجرة وصل فيه وقعمز عليه وهو يشوف لتليفونه اللي شاده بين ايديه...
تنهد بضيق ورفع عيونه للقمر اللي كان منور بنص وجهه..
كان يشوفله وباله وقلبه مشغولين بالحبيبه..
غير نظره عنه لما سمع اصوات هدرزة وضحك..شاف للجهة اللي جايه منها الأصوات لقي معمر وصفيه يتمشوا مع بعض..
ابتسم وناض ومشي انسحب من المكان..
☘ع بعد مسافه لأباس بيها عن جذع الشجره...
معمر كان يقول لصفيه..
/كان عجباتك لهالدرجة شن رايك ناخدوها من عبدو ونتموا فيها اسبوع وحدنا..
ضرباته ع ذراعه وهي تضحك بعدين قالت..
/لكن انا خاطري في البحر..
معمر:ياحبك للبحر كان تلقي تعيشي فيه..
هي بضحكه قالت..
/ومن مايحب يجاور البحر ويتنفس ريحته بالذات ع الصبح..
كيف جي معمر بيرد جو عيونه ع عبد القيوم وهو ماشي ابتسم بأسف وقال..
/عبدو جوه مش تمام..
التفتت شافت وين مايشبح بعدين ردت نظرها ليه وقالت بضيق..
/والله ماخايف الا من اللي بيصير بينه وبين امي وخالتي لو حكوا معاه في موال الجيزة "الزواج"..
معمر:بحتي..انا مش مطاوع عمتي في انها تفرض عليه الموضوع لكن كيف ماتعرفي مش عاجبني الموضوع اللي في باله هو..
صفيه؛رد بالك تدوي معاه فيه انت تعرفه زي ماانا نعرفه مايحبش من يدخل في حياته ولايوجهه مرات يتعارك معاك..
معمر؛لالالا مستحيل نحكي معاه في اموره الخاصه بندعيله بس ربي يهديه ويفكر في مصلحته..
وجهت صفيه نظرها للقمر وقالت..
/ربي يقدمله اللي فيه الخير..
🍃🍃🍃🍃🍃
التاسع من ذي الحجه..
30يوليو...سنة 2020..
مع الساعه العشرة ونص الصبح جاب حسين امه واخته لحوش طوبى،حطهم ومشي بيقضي مشاوير تخص اضاحي العيد وتوابعهم...
🍃🍃
اميمه وصفيه اول ماخشوا للحوش تلقتهم غرفه..
ضمت صفيه وبدوا يبكوا بألم..واميمه جنبهم حاطه يدها ع فمه وهي تبكي بالعبره...
شويه وطلعت اريج سلمت عليها بالاحضان وقعدت تبكي معاه..
🍃اصوات بكاهم سمعاته طوبى وهي طالعه من الدار دموعها كانوا ينزلوا بصمت..
وهي ماشيتلهم للحظه شافت الوان كل شي حواليها ساطع بقوة لدرجة عيونها وجعوها..
لما بدت تقربلهم رجعت تشوف في كل شي طبيعي ..
وصلت في اميمه..ضمتها وهي تقول..
/كيف حالك..
اميمه ردت بصوت باكي..
/الحمد لله ع كل حال..كيف حالك انتي..
تباعدت طوبى وشافت لصفيه وهي تقول بنبرة فيها ألم..
/الحمد لله..
جت لصفيه ضمتها بدون ماتتكلم..
وصفيه تحضن فيها وتقول..
/شن حالك طويبه حبيبتي..
طوبى:الحمد لله ياخالتي الحمد لله..
وخرت عنها كم خطوه لين وقفت جنب غرفه وقالت..
/خشوا خيركم واقفين!؟
غرفه:ايه خشوا خشوا..
خشوا معاهم للصاله..اميمه جت جنب طوبى حاوطتها من ظهرها بذراعها وقالت..
/صايمه!؟
هزت راسها بصمت..
اميمه بضيق..
/علاش ياطوبى ماتقدريش عليه الصيام..شافت لغرفه وقالت..كيف تخليها تصيم!؟
غرفه بضيق..
/سكرت راسها..
تباعدت طوبى عن اميمه وشدت ذراعها وهي تقول..
/مايصيرلي شي..قعمزي..
قعمزت اميمه وهي تشوف لطوبى بضيق..
واللي حواليهم كانت باديه ع وجوههم ملامح الضيق ..
قعمزت صفيه وهي تقول..
/وين الصغار..
غرفه؛لاهيين باللعب..علت صوتها تنادي..اواب مهاب..جنه..تعالوا حنينه صفيه جت..
🌸ولحظات وجو الصغار يجروا وكلهم بصوت واحد ينادوا..
"نينه"
اول ماخشوا عليهم ابتسموا وصفيه قعدت تضحك..
لما وصلوا فيها ضموها كلهم مع بعض وقعدوا يبوسوا فيها وهي تبوس فيهم وتغنيلهم..بعدين خدت شنطتها وطلعت منه قطع شكلاطه صغيره ووزعتها عليهم..
غرفه:قولوا لحنينه شكرا..
اواب ومهاب وجنه بصوت واحد قالوا بلغتهم الطفوليه..
"شكرا نينه"
صفيه بضحكه..
/نجيهم ياربي حبايب نينه..
اواب ومهاب بدوا يفتحوا في غلاف الشكولاته..
اما جنه شافت لأمها بعدين مشتلها وعيون اريج معاها بنظراتها القلقه المترقبه..
ماحد كان ملاحظ غيرها..غرفه لهت مع ولادها وصفيه تكلم فيهم واميمه معاهم بإنتباهها
وصلت جنه في امها وقالت..
"ماما حوليها"
تنهدت طوبى بضيق وخدت قطعة الشكولاته حولت الغلاف ومدتها لبنتها
خدتها جنه وجت بتقعمز في حجرها شدتها طوبى وقالت.
/بري مع اوبا وهوبا بري..
مشت جنه لولاد خالتها وعيون اريج معاها..
وهي تشوف في نظرة الحزن في عيونها كانت حتبكي وبدت في داخلها تضايق من تصرفات طوبى معاها وتفسر فيها تفسيرات تانيه..
اما طوبى كانت في نفسها موجوعه هلبه من حالها مع بنتها لكن شن بدير..حاسه كل شي دير فيها خارج عن ارادتها..غصب عنها مش متحمله بنتها..وللأسف بدت تفسر في اللي قاعد يصير معاها تفسيرات تشبه لتفسيرات اريج وهالشي زاد ضايقها اكثر واكثر...
🍃🍃🍃🍃
قبل الظهر روح حسين بالأضاحي..
خروف ليهم هو وامه واخته وخروف لبنات عمه ربطهم في الجنان بمساعده عامل جابه معاه وبعد ماسقده خدي دوش في الحمام الخارجي وطلع منه ع اذان صلاة الظهر..
صلى في المربوعه الخارجيه بعدين تمدد ع فراش دارتهوله امه فيها وطلعتله اواب ومهاب وجنه ع حسب طلبه..
لعب معاهم لعند ماجاه النوم اتصل بأمه تطلع دخلهم لكن لما جت بطلعهم من جنبه اواب ومهاب رفضوا يطلعوا ويخلوا وطلبوا منه يرقدوا حداه..
☘حسين بضحكه..
/خلاص خليهم..
ضحكت صفيه ورفعت جنه في حضنها وطلعت من المربوعه..
حسين شاف للتوأم وقال..
/هيا ارقد انت وياه..
نفذوا امره ع طول رقدوا جنب بعض ع الفراش متاعه ضحك وقال..
/واني وين بنرقد؟!
تباعدوا وخلوله مكان بيناتهم..ضحك ورقد في نصهم وقال..
/خل نحكيلكم حكايه بش ترقدوا وتخلوني نرقد..
🌸وبدي حسين يحكيلهم في حكايه من تألفيه..وهما مع حكايته وبرودة المكيف والهدوء راحوا في النوم وهو لحقهم...
🍃وطوبى في الدار بعد ماصلت الظهر حاولت ع قد ماتقدر تجاهد نفسها ماتبيش اجر هاليوم وبركته يفوتوها..
مشت للمصحف متاعه خداته..وقعمزت بيه ع السرير وفتحاته وين ماوقفت في الختمه..
الضيق الي في صدرها زاد وبدت تتوتر..لما جت تقرا الرؤيه ولت ضبابيه..غمضت عيونها بقوة وفتحتهم بدت تتوضح شويه..بدت تقرا..والضيق زاد والتوتر علي لدرجة ان رجلها قعدت تهز وولت مرة تانيه الرؤيه الضبابيه معاش شافت الحروف زين..وقفت قرايه..تنهدت بضيق..وحاولت تقرا مرة تانيه لكن معاش قدرت..سكرت المصحف وهي تتأفف بعصبيه وقالت..
/شكله الصيام المرة هادي مأثر عليا هلبه..ياريتني سمعت كلام غرفه..
خدت نفس وناضت ردت المصحف لمكانه ورجعت للسرير تمددت عليه..
حاولت دير شي تاني غير قراية القرآن..الذكر..
وبدت تردد في تاج الذكر...من اول مرة قالاته فيها نزل عليها النوم وراحت فيه...
🍃بعيد عنها بمسافه تحديدا في الكوجينه..
كانوا اريج وغرفه واميمه يتساعدوا ع تجهيز وجبة الفطور ومخليين صفيه مع الصغار...
🍃اميمه بعدم استيعاب..
/معقوله!؟
اريج:راهو هلبه صار معاهم هكي يااميمه..هي من بعد ماعرفت بقصة صورها اللي عند الجالي وحالها متغير سيطر عليها الخوف وحست روحها عاجزه مش قادرة ديرله شي..
اميمه قاطعتها وقالت..
/علاش ماخبرتش مختار!؟
اريج؛قالت ماعنديش فيه ثقة..
اميمه بإستغراب..
/بعد اللي داراته معاه وكسرت كلمة سدرة ع خاطره!
غرفه:مش ع خاطره هي قالت مش غبيه بش نروح بمرضي وندعيكم وتاني شي هداكا خش عليها لما كلمتها سدرة مابتش تقوله شن قالت خافت ينقم عليها اكثر ماهو ناقم..
اريج:قالت قعد يسأل فيها شن قالتلك بطريقه خوفتها..
اميمه التزمت الصمت وهي مضايقه..
اريج:الشاهد ان طوبى توا بدت تحس جنه السبب في اللي قاعد يصير فيها هي الحاجه الوحيده اللي تربطها بالجالي نحس فيها مرات ندمت اللي جابتها مرة وحده..
غرفه:الحق اني مش معاك بكل طوبى تعشق بنتها يااريج..
اريج؛هني الهم هو هي توا عايشه زي الصراع في داخلها راهو مرات تفكر تعطيهاله بش ترتاح وتعيش حياتها..
اميمه:لالا اريج بالغتي هلبه..
اريج؛باهي فسرولي تصرفاتها مع بنتها مش طايقتها بكل..حطت الموس"السكين" اللي كانت تقشر فيه بالبطاطا وهي تقول..خلونا واقعيين شويه طوبى مهما بانت قدامنا قويه قبل من داخلها كانت مدمرة ومقهورة ع روحها اني وياكم نعرفوا ان قلبها مش خالي واول مرة تحب في حياتها ديما كانت تقولي لما تحكيلي عنه اللي زيي اني خلاص معاش تقدر تعيش حياتها وتحب وتتزوج مرة تانيه الفكرة هادي مدام في بالها معناها تفكر فيها هلبه وبعد ماعرفت بنية الجالي معاها التراكمات اللي دس فيهم بدوا يطلعوا ومع الوضع اللي مرت بيه تعبت نفسيتها هلبه ووصلت لهني..
🍃كلام اريج اقتنعت بيه اميمه لأنها من البدايه كانت تفكر هكي..لكن غرفه ماقدرتش تقتنع مش قادرة تصدق ان طوبى ممكن تفضل نفسها ع بنتها مهما يصير فيها..
حركت راسها بالنفي وقالت..
/مااقتنعتش..ايه ممكن تكون مقهورة ع روحها وهدا الطبيعي لكن اني نصدق ان طوبى تشوف في جنه واقفه بينها وبين راحة بالها مستحيل..يااريج الشي هدا لو فبالها من قبل كان بان عليها..طوبى مش هكي بكل..
اريج: باهي اني معاش بنزيد كلام ع اللي قلته غير خليه في بالك وشوفي زين واحكمي..
حركت غرفه راسها رفضا وهي تحط في الرشده في الكسكاس..
واميمه حداها تعجن في العجينه وهي تفكر في كلامهم...
🍃🍃🍃🍃
ومرت الساعات الاولى من النهار بين تجهيز وجبة الفطور وبين الذكر والدعاء...
ماعداها هي اللي قاعده غارقه فالنوم...
لكن هالمرة كانت في عالم المنام ولأول مرة تشوف منام من فترة طويله...
🌠شافت وكأنها واقفه في مكان خالي يشبه الصحراء وكأن في ضي يشبه البرق طلع من صدرها وركب للسماء اللي كانت حالكه السواد..فجأه نزل الضي هدا ونزل بعده القمر ومعاه كواكب تانيه..
القمر كان حجمه كبير والكواكب اللي جنبه صغيره..
وبدي القمر يدور حواليها والكواكب تبع فيه وهي تشوفلهم بخوف شديد...
🌠رجعت للعالم الواقعي بعد ماوعت من النوم وهي حامله في صدرها الخوف اللي جاباته من عالم المنام..
سمعت اذان صلاة العصر..غمضت عيونها وخدت نفس عميق وزفرت..فتحت عيونها وناضت قعمزت وشعور الخوف قاعد مرافقها..رفعت عيونها فوق ورجعت غمضتهم وهي تقول بألم..
"يارب"..
بعدين نزلت راسها وفتحت عيونها ونزلت من السرير ومشت طلعت من الدار...
🍃🍃🍃🍃
بعد ماصلت العصر فكرت تخش معاهم الكوجينه تعاونهم شويه..
خشت الكوجينه لقتها فاضيه..شافت للغاز لقت عليه طنجرة وكسكاس كبار وجنبهم طنجرة متوسطه الحجم.
غيرت النظر عنهم للخضرة متاع العصبان اللي كانت مغسوله ومحطوطه في سفرة لوح كبيرة..
غيرت نظرها عنها ومشت للكوشه متاع الغاز فتحتها لقت طواجين مغطيه بالقصدير سكرتها ووقفت ع حيلها وفكرت دير شي..مالقتش قدامها غير الكيكه الزمنيه حاجه بسيطه مافيش اسهل منها..
🍃طلعت حاجاتها وبدت دير فيها..
وهي تجهز فيها رجعت حست بالتوتر..بسبب هالتوتر بدت تعصب ومن العصبيه جتها رغبه في العياط..
تأففت..وبدت تقرا في اذكار المساء..تقرا فيهم من غير تركيز لخبطت فيهم وحست بهالشي عاودت قالتهم مرة تانيه صح لكن مش كاملات كلهم اربعه اذكار اللي قالتهم وماكانتش مركزه فيهم ولافمعانيهم..
🍃🍃
كملت تجهيز الكيكه..حطتها في الكوشه"الفرن" الكهربائيه وشغلتها بعدين قعمزت ورا الطاوله..
ع خشة غرفه شافت الماعين اللي دارت بيهم الكيكه ع الرخامه من غير غسل..
ابتسمت وقالت..
/درتي كيكه؟
طوبى؛ايه الزمنيه نشربوا معاها شاهي العاله متاع خالتي صفيه بعدين..
غرفه بدت تغسل في الماعين وهي تقول..
/احسن مادرتي..
طوبى؛بتقرضوا الخضرة توا؟
غرفه:ايه جيت بنطلعها..
ناضت طوبى وهي تقول..
/وين بتقرضوها؟
غرفه:في دار التقعميز..
مشت طوبى للدرج خدت مفرش كبير متاع جلد وطلعت بيه من الكوجينه..
ابتسمت غرفه براحه لما حست ان اللي داراته صح وجو اللمه غير شويه في نفسية طوبى..
🍃🍃
طلعت بعدها بسفرة الخضرة للدار...
واجتمعوا عليها وبدوا يقرضوا وطوبى معاهم..
هما يهدرزوا حداها وهي ملتزمه الصمت مرة مرة تسرقلها اميمه في النظر..لاحظت ع وجهها ملامح العصبيه وشافت تقريضها يبان من غير نيه مش نفسه تقريض طوبى الناعم السريع...
غيرت نظرها لجنة لما جت جنب امها مدت يدها بتاخد معدنوش تلقائيا ضربتها ع يدها بقوة..
كلهم انصدموا وصفيه قالت..
/ليه عليك!؟
طوبى بعصبيه وهي تشوف لجنه..
/لبز المفرخ مانحباش بري العبي بألعابك تحركي..
البنت حطت يدها اليسار ع يدها اليمين اللي انضربت عليها بزعل ومشت لألعابها..
اريج اللي ماتحملتش فيها سيبت اللي في يدها وناضت لجنه مشتلها ضمتها ورفعتها في حضنها وهي تقول..
/تعالي نعطيك شكلاطه..
وطلعت بيها من الدار..
اميمه شافت لطوبى بضيق لقتها تقرض بعصبيه اكبر غيرت نظرها لغرفه لقتها تقرض وباين ع وجهها الضيق..
شافت لأمها لقتها تشوفلها بأسف بادلتها اميمه بنفس النظره بعدين كل وحده فيهم ولت للي دير فيه..
🍃🍃🍃🍃
كملوا تقريض الخضرة..ناضت غرفه بالصونيه الكبيره اللي حطوا فيها الخضرة المقرضه واميمه حولت طاولة اللوح ولمت المفرش...
طلعوا الزوز ورا بعض بالحاجات..
وطوبى وخرت اتكت ع الفراش وهي تشوف للتلفزيون..
اما صفيه ناضت ومشت طلعت للحمام..
🍃في الكوجينه..
سكرت غرفه الباب وقالت..
/اميمه..
شافتلها اميمه لقتها ماشيه طلع في طاجين الكيكه من الكوشه قدمتلها ليه وحطاته ع الطاوله وهي تقول..
/تصدقي ان الكيكه هادي دارتها طوبى!؟
اميمه وهي تشوف للكيكه قالت..
/خيرها هكي!؟
غرفه بضيق:مش عارفه ناسيه البيكنبودر ولا دقيقها شويه مش عارفه تعرفي لو شافتها هكي مش بعيد تبكي بكي..
اميمه بضيق شديد..
/ياروحي..والله ماتوقعت حالتها متأزمه لهالدرجه..
غرفه ودموعها في عيونها قالت..
/حسبي الله في اللي كان السبب..
قالتلها اميمه..
/باهي شن بديريلها توا؟
سكتت غرفه وهي تشوف للكيكه وتفكر...
🍃🍃🍃🍃
"ساعة بينا وبين آذان صلاة المغرب..الساعه هادي ردوا بالكم ضيعوها...تعرفوا من هو قليل البخت حق اللي يضيع الساعه هادي من غير مايشدها دعاء ويطلب من ربي اللي خاطره فيه كله..ربي سبحانه وتعالى توا قريب علينا لدرجة ماتستوعبوهاش..شفتوا السمي هادي ربي توا فوقها قريب لهالدرجة بش يسمعكم ويتباهى بيكم ويعطيكم..
بس هاه راكم تنسوا زي ماقلتلكم قبل ربي يستجيب الدعاء بتلاته طرق..
الاولى يحققلك فوق ماتبي..
التانيه يدفع بدعائك هدا مصيبه جاياتك لامحاله..
الاخيره يدسلك الدعاء متاعك ليوم القيامه رصيد تلقاه في وقت الزنقه وهو اللي يدخلك الجنه..
مانبيش نطول عليكم وقت الساعه خش..let's go"
🌸ابتسمت اريج وقلبها يدق بقوة وهي تطلع من برنامج الانستقرام بعد ماشافت مقطع منزله نضال ع صفحته..
ليه فترة نضال ينزل في فوائد دينيه دعويه ع حسابه بأسلوبه الخاص المميز لم بيه عدد كويس من المتابعين خلال فترة قصيره واريج منهم...🌸
حطت تليفونها ع المدخل خدت شاربتها من ع الشماعه لبستها وطلعت للجنان قعمزت في زاويه منه ورفعت ايديها وبدت تدعي..
ووسط دعائها هو كان موجوده..زي ماهي كانت موجوده في دعائها..طالبين مولاهم ومتأملين في كرمه انه يردهم لبعض ويعيشوا تحت عينه الراضيه لأخر العمر..
🌼وعبد القيوم كانت هدا اغلى واهم مسأله يسأل الله يعطيهاله بعد رضاه والجنه والرحمه لوالديه..
"يارب..إنك على كل شي قدير"
☘☘☘☘☘
وانتهى يوم عرفه..وفطروا اللي صاموه وهلبه ناس من اهل العاصمه هداكا اليوم كانت فرحتهم زايده لأنهم بيعيدوا في حياشهم وشبح الحرب فارقهم سائلين الله انه يكون فراق لارجوع بعده...
🍃🍃🍃🍃
جت فايزة وبناتها بفطورهم لحوش الواعر بش يفطروا مع بعض..وهاديه كذلك دارت نفس الشي..
وعبد المطلب فطر مع ولده حسين في الجنان لأن الجو كان حلو واواب ومهاب حداهم يلعبوا بالسيارات ومرة مرة حسين يجوا لحسين لما ينادي فيهم بش يوكلهم..
☘عبد المطلب بضحكه..
/من يومك بالك واسع مع الصغار وهما يحبوك..
ابتسم حسين بدون مايعلق..
عبد المطلب رفع حاجبه وهو يشوف لصغار غرفه قال..
/لكن صغار بنت عمك متعلقين بيك اكثر من غيرهم..
حسين بإبتسامه..
/حتى اني تعلقت بيهم اكثر من غيرهم..
ضيق عبد المطلب عيونه وقال..
/في شي خطر في بالي بنقوله وانت خود ولاخلي..
عقد حواجبه بإستغراب وشاف لبوه وهو ياكل..
عبد المطلب؛شن رايك تاخد بنت عمك وتربي صغارها؟
وقفت اللقمه في زور حسين..انصدم في طلب بوه..
طلب خلا جسمه يصقع في عز النو وقلبه يدق بقوة..
عبد المطلب:مش حتلقى خير منك ولاانت تلقى خير منها واهو في النهايه رزق الصغار مايمشيش لحد غريب..
تبدلت ملامج وجهه للامتعاض حرك راسه يمين ويسار ورجع ياكل..
عبد المطلب؛قتلك خود ولا خلي وانت حر..
وولى ياكل مرة تانيه وخلا حسين في حالة ارتباك وتوتر حاول يخفيهم وهو ياكل ويوكل في التوأم اللي قعدوا يحوموا حواليه...
🍃🍃🍃🍃
ومن طرابلس للخمس..
بعد صلاة العشاء حلوا عيلة شنيبه ضيوف ع اهل التارقي في مزرعته..
سليمه وصفيه استقبلوا مغليه وخديجه من فوق النفس لكن استقبالهم لسميرة كان حلو عكس استقبالهم لسدرة كان عادي لأنه أول لقاء..
اما الرجاله طول انسجموا مع بعض بحكم المعرفه السابقه حتى عمر اللي اول مرة يخالطهم انسجم عليهم...
🍃🍃🍃🍃
عمة عبد القيوم الكبيره تسيدت جلسة النساء بشاهي العاله
ومن الضيافه مايعدوا بيه الشاهي اشكال والوان حلو ومالح والمنظر يشهي..
خديجه اللي كانت نظرتها ليهم دونيه قبل لتخالطهم لما شافتهم وشافت العز باين فيهم غيرت نظرتها فيهم تماما لكن سليمه وبنتها مستحيل تتغير نظرتهم ليها اللي هي اكدتها بطريقتها في الكلام والمواضيع اللي تفتح فيها كلها عن الماديات وتوافه الحياة..
بس بسرعه سميره ماداركت الموقف وغيرت جو الهدرزة وخلاته اريحي وحلو..
وفي هالقعده سدرة اغلب الوقت مستمعه وصفيه مركزه عليها...
🍃🍃🍃🍃
وفي حوش طوبى الواعر..
كانوا كلهم ملتمين ع عالة صفيه يهدرزوا في مواضيع مختلفه..
وطوبى مستمعه فقط..او هكي يبان عليها..في الحقيقه اغلب الوقت كانت سارحه ومش معاهم..
لعند مابدت اريج توزع اول دور شاهي شافت طوبى مع الضيافه كيكه مغطيه بكريم الشانتي ومزينه بالمكسرات المرحيه..
شافت لغرفه لقتها تهدرز مع فايزة غيرت نظرها لأريج لما قالتلها..
/خودي..
رفعت يدها بمعنى ماتبيش..
تخطتها اريج وقعدوا عيون طوبى مع الكيكه...
*********
في الكوجينه..
خشت غرفه بسفرة العاله بش تغسلها..
لحقتها طوبى وسكرت الباب..
التفتت غرفه تشوفلها..
طوبى:وينها الكيكه اللي درتها..
غرفه:حدا العاله ماشفتيهاش!؟
طوبى:قلت نبيها زمنيه يعني عاديه علاش درتي فيها شكلاطه وغطتيها بالكريمه!؟
غرفه:ضميت فريز الثلاجه بكري لقيت فيه ظروف كريمة شانتي بطيح صلاحيتهم غدوة قلت نديرها عليها خير مانلوحها..
شافتلها طوبى شويه بعدين ابتسمت ودموعها عبوا عيونها وهي تقول..
/حلو..
غرفه بضحكه..
/المهم مش زعلانه..
حركت راسها بالنفي ولفت ومشت فتحت الباب وطلعت..
تبدلت ضحكة غرفه لملامح الحزن والتفتت للحوض وبدت تغسل في الماعين ودموعها تنزل...
🍃🍃🍃🍃🍃
بعيد عنهم وين مافي مشتل الورد..
كانوا واقفين يهدرزوا...
🍃عبد القيوم وهو عاقد حواجبه..
/توقعت اول يوم عيد هلك تكون مع عيلتها هذى اول عيد من غير الحاج عليه الله يرحمه..
المهدي:زوجتي نفسيتها تاعبه هلبه وهي فوضع يخليني ملزم نبعدها عن اجواء الحزن والنكد..
عبد القيوم:قصدك لو كنت مكانها تخلي عيلتك وتعدي تغير جو!؟
تنهد المهدي وقال..
/في حاجات غايبه عنك ياتارقي ماتعرفهاش..
عبد القيوم..
/اللي نعرفه في مواقف كيف هذي الواحد مايخليش عيلته مهما كان هلك هي الاخت الكبيره لمن خلت خواتها وحده ارمله والتانيه وضعها الصحي والنفسي مش في احسن حال!
المهدي بضيق:ياما تحملت معاهم ودارت ع خاطرهم بتقعد لأخر عمرها وهي تعاني!؟ لازم يتعودوا يعتمدوا ع ارواحهم زي ماداروا وقت لما كانت في الغيبوبه..عبد القيوم بعدم استيعاب..
/متفاجئ فيك لاالصراحه مصدوم..المفروض حتى انت تصبي معاهم في وضعهم هدا!
ضيق المهدي عيونه وقال..
/مش ملاحظ انك تدوي في امور عائليه!؟
عقد عبد القيوم حواجبه وقال..
/مش لازم نذكرك اني واحد من عيلة الواعر انت عارف هالشي كويس..
غير المهدي نظره يساره وقعد يمرر فيه حواليه..
وعبد القيوم يشوفله بشي من الحده..
رد المهدي نظره ليه وقال..
/خليك صريح وقولي شن اللي يربطك بعيلة الواعر غير اللي اني نعرفه ع قولتك!؟
نزل عيونه ورفع حواجبه بعدين رفعهم فيه وقال..
/ايه اللي في بالك صح..انا نبيها بالحلال وطلبتها قبل من جدها الله يرحمه وردني بسبب خوك...
رد المهدي نظره يساره بدون مايعلق..
وعبد القيوم بنبرة اصرار وتأكيد قاله..
/وحنعاود نخطبها من خالها ولو ردني حتى هو حنعاود نخطبها ومش حنمل لين هو يمل ويعطيهالي...
🍃هو يتكلم من قلبه وفي عيونه باينه لمعة حب ندر وجوده في زماننا هدا..
وفي جهة تانيه عمته تتكلم عنه في امر مصيري يخصه مخالفة لإرادته وفي الحقيقه هي تحاول توصل رساله لمن يعنيه الأمر...
🍃سميرة:لاعاد شن تقولي في شن بيتعبنا هدا وليدنا راهو..
سليمه بإبتسامه..
/تسلمي وبارك الله فيك..لكن توا خلاص قريب يستقر ومرته هي اللي ديرله فطوره وغداه وعشاه..
بدت ع وجه صفيه ملامح الضيق..
سميرة بإبتسامه..
/شني مالا نويتوا تخطبوله؟..
سليمه بضحكه..
/ايه.. وبإذن الله مش مروحين للكفره الا ونحنا مكملين موضوعه..
سميرة:ع خير ان شاء الله..
خديجه:السوريه!؟
سميرة في نفسها..
"كيه ولفعة ملويه"
سليمه بإبتسامه مجامله..
/ايه..
سدرة المنتهى:شفتها كذا مرة جميله وراقيه..
شافت سليمه لاختها بعدين ردت نظرها لسدرة وقالت..
/ايه ماشاء الله عليها..
سميرة:ربي يتمم ع خير..
سليمه واختها بريكه ردوا مع بعض..
"ان شاء الله.."
وصفيه حداهم في نفسها تقول..
"ماشاء الله عليكن حاسمات الامر وناهيات الموضوع من قبل ماتحكوا معاه فيه! مانقول غير ربي يستر من اخرتها"
🍃🍃🍃🍃🍃
الساعه 1:30بعد منتصف الليل..
في دار المعيشه..
اريج راقده وجنة راقده جنبها..
وبعيد عنهم شويه ولاد غرفه راقدين وحداهم صفيه..
جنب صفيه كانت اميمه سهرانه في فراشها وهي شاده هاتفها وتتراسل مع راجلها..
وغرفه اللي كانت راقده وهي حاضنه طوبى تشوف لأميمه كيف تبتسم..
ابتسمت وخدت مخدة من جنبها حذفتها بيها جت ع وجهها..
اميمه فنصت فيها وهي شاده ضحكتها وردتلها المخده..
ضحكت غرفه بدون صوت بعدين شافت لطوبى لقتها غارقه في النوم..
ضحكت اميمه وولت لهت بمحادثها مع راجلها..
اما غرفه قعدت تتأمل في وجه طوبى بحزن وهي تقول في نفسها..
"طول عمرك طيبه وقلبك ابيض وقريبه لربي علاش يصير فيه هكي علاش وحده زيك حظها بالهون!؟"
🍃ممكن يكون حظ طوبى في الدنيا بالهون ياغرفه لكن امثالها العباد اللي عاشوا اغلب عمرهم في ابتلاءات وصبروا عليها ورضوا بيها هم الاعظم حظا في الآخره..
ومايلقاها الا الذين صبروا ومايلقاها الا ذو حظ عظيم...
🍃🍃🍃🍃🍃
العاشر من ذي الحجة..
يوم الجمعه..
31 يوليو...سنة 2020..
اول ايام عيد الأضحى المبارك...
هالعيد هدا اللي جي بعد نهاية الحرب ف طرابلس كانت ليه نكهة خاصه نكهة راحه برغم الظروف الصعبه اللي خلفتها..
لكن عيلة الواعر في بداية اول ايامه ذاقوا نكهة الفقد..الفقد المر لعمود العيله وكبيرها..
اصوات البكاء كانت معبيه الحوش كله ومسموعه للرجاله..
حسين وعبدالمطلب والمحجوب اللي جاب مرته بش يعيد معاهم..
المحجوب كان يبكي بألم وهو يسمع فيهم وعبد المطلب دموعها تنزل ويمسح فيها..وحسين كان متأثر والدمعه في عينه...
🍃كان اول عيد اضحى يغيب فيه المبروك او عبد الرؤوف
نبيله كانت ضامه غرفه والزوز يبكوا بالعبرة...
🍃🍃🍃
لكن في الخمس عند عيلة شنيبه استمرت الاجواء بروعتها وعاشوا فرحة العيد بمعنى الكلمه..
☘سدرة بضحكه..
/شن ماتلبس يطلع عليك يادعوه حتى هالشراتيل..
ضحك المهدي وقال..
/زي ماتفاهمنا ماتعبيش روحك هلبه..
هزت راسها وقالت..
/ان شاء الله..وحتى انت زي ماتفاهمنا الكبده اشويها مانبيهاش مقليه..
المهدي:حاضر..
قربلها باس جبينها ومشي طلع...
ع جية سميرة قالتلها..
/تعالي نوتوا السفر..
سدرة:هيا هي..
ومشوا مع بعض للكوجينه الخارجيه...
🍃🍃🍃🍃
وزي مايقولوا الدنيا ساعه وساعه..
ساعة حزن وساعه فرح..
وعيلة الواعر بدلوا ساعه بساعه وبدوا يعيشوا في اجواء العيد..
ولأنه اول يوم جي جوه لطيف بعض الشي العواله كلها كانت في الكوجينه الخارجيه...
🍃"غرفه طلعي الصونيه هادي لعمك بش يحطوا فيها المعاليق"
خدت غرفه الصونيه من مرت عمها ومشت طلعت بيها من الكوجينه وهي ماشيه شافت صغارها يلعبوا بسياراتهم هما وجنه قالتلهم..
/بالشويه بالشويه..
وكملت طريقها وين مافي الرجاله..
غرفه:عمي..
عبد المطلب شاف لحسين لقاه لاهي بعدة التشويط غير نظره لغرفه وقال..
/تعالي بنتي تعالي..
قدمت وعطاته الصونيه وهي تقول..
/بالله عمي حط القراجيط راك تلوحهم..
المحجوب:تحبيهم زي خالك..
غرفه بضحكه..ماهو تعرف تاكل زي بنت اختك..
رفع حسين عيونه اللي كانوا مدرقات بالنظرات وشافلها بإبتسامه بوه لاحظه ضحك وقال..
/الله عليك غرفه وخلاص..
ابتسمت غرفه بعدين قالت..
/ماتبوا شي..
المحجوب:الله الله بالفطيره..
غرفه؛والله من الفجر نضت ندير فيها كولوا وماتعلقوش حطيت جهدي كله فيها راهو..
ضحكوا..
ابتسمت وجت بتمشي قال عمها..
/راجي راجي ارفعي الصونيه..
سيب حسين اللي في يده وهو يقول..
/وين تقدرها هادي كلها..
مشي لبوه خدي منه الصونيه..
هي مشت وحسين مشي معاها وعبد المطلب يشوفلهم بإبتسامه..
🍃حسين:تعلمتي ديري قلايه؟
غرفه بضحكه:يقولوا تعلمت ندير كل شي لكن هادي مش اني بنديرها خالتي هاديه..
ابتسم وقال..
/باهي الحمد لله..
ابتسمت وهي تحرك في راسها يمين ويسار..
وصلوا في الكوجينه..
خشت غرفه قبله وقالت..
/حسين بيخش بالصونيه..
لبسوا نبيله وفايزة وبناتها حجابهم..
غرفه:خش حسين..
خش وحط الصونيه وهو يقول..
/السلام عليكم كل سنة وانتم طيبين..
ردوا عليه بأصوات متقطعه..
/كل عام وانت بخير..
حسين:خالتي هاديه..
هاديه بإبتسامه..
/نعم ياافندم..
ضحكوا..
هو بإبتسامه قال..
/قالوا انتي بديري القلايه..
هاديه:ان شاء الله..
حسين:نقولك ارتاحي وخليها لغرفه..
انصدمت غرفه وهما ابتسموا بإستغراب..
هاديه:ليش!؟
حسين؛اخر عهدي بيها ماتهنيش ع دحي مقلي وتوا قالت تعلمت كل شي واني مش حنصدق لين نتأكد..
هو يتكلم وهما يضحكوا..
غرفه بضحكه..
/تمام تو نوريك..هي تسقد بش نبدا بيها..
حسين؛ردوا بالكم تخشولها في حاجه..
هاديه بضحكه: اطمن اني نراقب فيها..
حسين:خلاص عابي عليك..ولف ومشي طلع من الكوجينه..
صفيه:هلبه عليك هادي كلها..
غرفه بتحدي..
/والله مادايرها واحد غيري تو نوريه ولدك هدا..
ضحكوا كلهم ..
ربطت غرفه اطراف شاربتها ع رقبتها ورفعت كمامها وخشت التحدي وهاديه تشوفلها بإبتسامه وهي مضيقه عيونها..
☘وراجلها وهو مشغول بالذبايح لما شاف ولده جاي وهو مبتسم وعاقد حواجبه ابتسم..
شافله لقاه يشوفله وهو مبتسم ابتسامه غريبه بلع ابتسامه وبدلها بملامح امتعاض وحرك راسه يمين ويسار وهو مكمل طريقه لعدة التشويط...
🍃🍃🍃
وداخل الحوش..
كانت طوبى مقعمزه في دار المعيشه وهي شاده هاتفها تشوف لرقم سدرة بتردد وفي الاخير حسمت امرها واتصلت بيها...
حطاته ع وذنها تراجي ينادي فصل طول..
عقدت حواجبها..نزلت الهاتف وعاودت اتصلت تاني رداته لوذنها صار نفس الشي فصل طول..
ناضت من مكانها وقعدت دور في الدار وهي تتصل وهو يفصل لين طلعت من الدار وتلاقت هي واريج..
طوبى:اريج اتصلتي بسدرة عيدتي عليها؟
..اتصلت بيها وعيدت عليها لكن سؤال طوبى خوفها وخلاها تكذب وتقول..
/لتوا لا..
طوبى:اني من بكري نتصل ويفصل طول مافهمتش التغطيه ماتنفعش هني!؟
اريج:ترا هاتي تليفونك..
عطتها طوبى الهاتف..خداته اريج واتصلت بسدره وحطاته ع وذنها وهي تبلع في ريقها..
وللاسف الخط فصل طول..
نزلت اريج التليفون وقالت وهي تشد في دموعها بقوة..
/مرات المكان اللي هما فيه التغطيه فيه تعبانه..
خدت طوبى منها التليفون وهي تشوفله قالت..
/مرات..
شويه وجاها اتصال شافت المتصل كانت حواء..
ابتسمت ودموعها عبوا عيونها فتحت الخط وولت للدار وهي تكلم فيها واريج معاها بعيونها اللي طاحوا دموعهم...
#منازل_القمر
#طوبى
...يتبع....
