#طوبى "جنة طوبى"
#جمان_فريد
#الجزء_109"عرجون فل"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#التسبيح
التسبيح من الأذكار العظيمة
قال ابن مسعود رضي الله عنه :
ما كُرِب نبي من الأنبياء إلا استغاث بالتسبيح
فأكثروا من التسبيح في الرخاء والشدة
"الذين يحملون العرش ومن حوله يُسبّحون بحمد ربهم"
ويقال أن الملائكة لم يعينوا على حمل العرش إلا بالتسبيح
فالتسبيح يفرج به الهموم وتفك به الأزمات وهو سر من أسرار الإستجابة كما شرط من شروط اداب الدعاء لأن لكي يكون دعاءك صحيحا لابد من الثناء على الله والتسبيح فيه ثناء على الله وتنزيه له....
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 إن الأمر الذي يغيظني في هذا كله أكثر مما يغيظني أي شيء آخر ليس وقوعهم في الخطأ، فالوقوع في الخطأ يمكن التسامح فيه دائمًا، حتى إن الخطأ شيء رائع فعلًا لأنه يؤدي إلى الحقيقة. ليس الخطأ إذن هو الذي يغيظني منهم، وإنما يغيظني إصرارهم على إنكار الأخطاء التي يقعون فيها.
دوستويفسكي...
_______________________________________
الإثنين..
3فبراير..سنة 2020..
مع عصر اليوم كانت سدرة تستعد لإستقبال ضيوفها ابله زينب واختها ايمان ليباركولها وحتستقبلهم معاها سميرة..
☘ووصلت سيارة عدي اللي كان جايب خواته قدام حوش محمد شنيبه..
نزلوا زينب وايمان وكانوا في استقبالهم من الباب سدرة وسميرة..
بعد ماخشوا نزل عدي من سيارته ومشي للمطحن ولاقاه المهدي اللي كان واقف قدام المطحن..
ع طلعة التارقي من الحوش كان ناوي يمشي لمطعم ربيع الفرع التاني..
ومجرد مالمح عدي واقف ع المهدي ركبت فيه نار من اسفل رجليه لأعلى راسه..
تراجع عن المشيه لربيع وتوجه طول لقهوة نضال خشلها وقعمز ورا وحده من الطاولات المطله ع عدي والمهدي..
شاف محمود ومعاه واحد من العمال مطلعين كراسي..
واحد خداه المهدي قعمز عليه والتاني خداه عدي..
☘وبدت دور الأحاديث بين المهدي وعدي والتارقي اللي كان يراقب فيهم من الغضب والغيره كانت رجله اليمين تهز تلقائيا بدون مايشعر...
☘ومقابلهم في محل جنه..
كانت طوبى واقفه تراجي في المندوبه بش تسلمها طلبيات زباين..
:الله يبارك طوبى شغل فنانه حق..
طوبى بإبتسامه..
/قولي الحق من غير مجامله زي ماطلبتهم الزبونه بالزبط ولا!؟
:والله العظيم زيهم واحلى يخي..
طوبى:يارب يعجبوها..
:انتصار ترن،شكلها وصلت..
طوبى:تعالي طلعي معاي هناء..
خدت طوبى كيسة فيها علبة التورته ولحقتها العامله بالتانيه
ومشوا طلعوا برا المحل..
🌼وتطلع طوبى وعيون عدي بالقصد جو عليها لأنه من أول ماقعمز كان يراقب في المحل..
عبد القيوم لاحظه شاف طول للمحل لقي طوبى واقفه ع المندوبه تكلم فيها..
رد نظره لعدي لاحظه يسرقلها في النظر..ويزيد غضب ع غضبه لما يشوف المهدي يشوف جيهتها حتى هو..
🍃المهدي:لاخلاص كل حد في حاله..
عدي:معناها لو طلبت منك تخش واسطه بيني وبين الحاج علي مش حيكون عندك مشكله..
عقد المهدي حواجبه وقال..
/خطبتها منه وردك!؟
عدي؛كلمت عنها خوها وقال جدها رافض وهي شكلها ماشيه في طوعه حتى الامور المتعلقه بحياتها الشخصيه..
المهدي:الحاج علي كبيرهم وكلمته هو اللي تمشي من زمان وتوا..لكن اني ننصحك نصيحه امشيله هو طول افتح معاه الموضوع هدرز عليه وحاول تقنعه..
عدي مرر نظره قدامه بعدين شاف للمهدي وقال..
/ان شاء الله حناخد بنصيحتك لكن في حاجه مهمه لازم نستفسر عنها منك انت بالذات..انت تعرف ان اكبر عائق في موضوع زي هدا هو العيل اللي يقعد بين زوز منفصلين..الام بش ماتخسرش الحضانه تضطر ترفض مواضيع الزواج..وهي توا لما يجيها موضوع زواج حتفكر انها لو وافقت الحضانه حتنتقل منها لأم طليقها لأن والدتها متوفيه..سؤالي لو صار وتزوجت،امك حطالب بالبنت!؟
المهدي تنهد وقال..
/اكيد من غير سؤال هادي بنتنا وحني اولى بيها..
هز راسه وقال..
/متوقع..تمام في الوضع الحالي يعني بعد مااختها ولت زوجتك تتوقع توافق وتقعد البنت عندكم تحت عين خالتها!؟
المهدي وهو يمرر في نظره حواليه..
/شكلك عندك خلفيه ع الاحداث اللي صارت كلها...رد نظره ليه وهو يقول..المهم حاجه زي هادي مانقدرش نفتيلك فيها مانعرفش صاحبة الشأن في شني تفكر..
عدي هز راسه وقال..
/ان شاء الله خير..ناض وقال..بارك الله فيك خوي مهدي ومبروك مرة تانيه..
ناض المهدي وهو يقول..
/اقعد اشرب قهوة!؟
عدي بإبتسامه:الجايات اكثر إن شاء الله السلام عليكم..
المهدي:وعليكم السلام..
ومشي عدي لسيارته ركبها وشغلها وتحرك..
وعبد القيوم بنظراته اللي تشع بنار الغيره قعد مع السيارة لين درقت من قدام عيونه..رد نظره للمحل اللي كان بابه مسكر بعدين شاف للمهدي..فكر يمشيله يسأله بعدين تراجع..
كيف بيسأله...
"في شن كنتوا تحكوا!!؟ شن كان يبي منك!!؟"
بشن يعلل طرح أسئله زي هادي عليه!
وقعد مع نار غيرته اللي قاعده تاكل في قلبه وكان يلقى يمشي للمحل ياخدها منه ويهرب بيها ومعاش يعرفلهم حد طريق...
🍃🍃🍃🍃🍃
الساعه 8:15مساءا..
طلع محمد المهدي من داره وهو يلبس في كبوطه"معطفه"..
توجه للكوجينه اللي سمع اصوات بوه وسدره جايه منها ليعطيهم علم بالوجهة اللي بيمشيلها..
لما خشلها سمع بوه يقول..
/قال فتح الموضوع مع مختار..
سدرة؛ايه وقال لجدي وجدي سكر الموضوع..
المهدي:مايبيش عدي!؟
سدرة ركزت بنظرها ع طاجين الدجاج اللي كانت تجهز فيه وهي تقول..
/مايبيهاش تتزوج توا..
لاحظ المهدي ع سدرة ملامح الضيق من لما بدي يتكلم في الموضوع لهذا فضل يسكره ومايخوضش في تفاصيل تزعجهم هما الزوز..
لما سكتوا حمحم محمد وقال..
/اني طالع ل***** بنتلاقى اني والجماعه..
التفتت سدرة شافتله..
وبوه قال:الساعه 11تكون هني..
محمد:حاضر..
المهدي:مفتاح السيارة ع المدخل..
سدرة:رد بالك ع روحك..
ابتسم وقال..
/ان شاء الله..السلام عليكم...ومشي..
شافت سدرة للمهدي وقالت..
/الوقت يخوف يامهدي كيف تخليه يمشي!؟
المهدي:ماتخافيش مش اول مرة وراهو محمد راجل ينعبا عليه..
ابتسمت وقالت..
/ربي يحفظه ويفرحك بيه..
المهدي بإبتسامه..
/آمين..
🍃🍃🍃🍃🍃
وهو هالوقت يخوف..زي مايقولوا المصاروة..
"زمن مايعلم بيه الا ربنا"..
ومروة خشت في حالة خوف من صاحب السيارة السودا العاليه اللي ركزت عليه اليوم وهو لاحق الباص لين خش بيها للشارع وفهمت انه يلحق فيها هي..
وبدت الافكار المرعبه تخطر عليها وتاخد فيها وتجيب..
اللي مرت بيه قبل يخليها تخاف لحد مبالغ فيه من اي موقف مريب يصير معاها...
ومن خوفها لقت روحها شادة تليفونها وحاطه ع رقم فهيمه.
كانت مترددة ومستحيه تكلمها..حستها حتكون حركة ثقيله منها..
تأففت بضيق..بعدين غمضت عيونها وقالت..
/الله غالب مافيش قدامي غير هكي..
فتحت عيونها وشافت لتليفونها واتصلت بيها..
☘وفهيمه مقعمزه في دار المعيشه طيب في القهوة ع الكانون وولادها حداها..
فهيمه:ربي حفظكم وسلمكم ليا ولعويلتكم سلم وليداتي الهوا بصغاركم وفوتوا هالسريب كله..
اكبرهم قال:يام اني مش في الجبهه الاماميه ماتخمميش عليا..
فهيمه:الدوة ع خوتك متطوعين مش زيك انت..
اوسطهم قال:حاضر يام اللي تبيه يصير ومعين وسطهم يسمع وملتزم الصمت..
ع جية اخته تجري بتليفون امها اللي كان يرن..
فهيمه وهي تشوفلها..
/مني..
مدتلها التليفون وقالت..
/شوفي بروحك..
الولاد قعدوا يشوفوا لأمهم بريبه واستغراب وهي تاخد في التليفون من اختهم..
لما شافت المتصل وجهت نظرها لمعين وردت..
/ايوه بنتي مساء الخير..
"مساء النور خالتي فهيمه كيف حالك!؟"
فهيمه؛الحمد لله في خيار الخير..شن حالك انتي وشن حالك اميمتك ووخياتك..
"الحمد لله كلنا بخير..خالتي"
فهيمه:نعم بنتي..
"عارفاتك توا بتقولي شن صحيحة الوجه هادي لكن والله مضطرة مالقيتش غيرك بعد ربي"
فهيمه بخوف وحزم..
/مروة بنتي مروة..تكلمي طول يابنتي قولي شن في!؟
تسارعت دقات قلب معين لما سمع اسمها ودمه بدي يفور ويغلي في عروقه..
"خالتي ليا مدة ملاحظه سيارة تراجي فيا قدام المدرسه وتلحق في باصنا بعد مانروحوا في الاول نحسابه لوحده من البنات معاي لين شفته اليوم لاحق الباص لشارعنا..خفت منه هلبه خفت يديرلي مصيبه"
وبدت فهيمه تضحك..
وولادها وهما يشوفولها بدت ع وجوههم ملامح التعجب..
فهيمه بضحكه:يديرلك مصيبه! هو بروحه مصيبه يابنتي.
"نعم!"
ناضت فهيمه وهي تضحك قالت..
/راجي شويه..ومشت طلعت من حداهم وهما بنظراتهم المتعجبه معاها..
كبيرهم قال لأخته..
/قولي من هي مروة هادي!؟
معين بغيره وعصبيه..
/شن دخلك بيها!؟
فنص فيه خوه..
هو ارتبك بعض الشي وقال..
/فوت ماتسألش..وناض وهو محرج وطلع ورا امه..
:هدا خيره!؟
خوه الاوسط قال بضحكه..
/افهم ياقفل شكلها الكبيده..
اختهم ابتسمت بخجل ومشت وخلتهم..
☘وفمكان تاني من الحوش .
كانت فهيمه تكمل في مكالمتها مع مروة..
فهيمه؛اني قتله يدير هكي لأن الوقت مولي يخوف بنتي حرب والأمن بالهون والطريق طويله من حياشكم للمدرسه..
"ريحتيني الله يريحك ياخالتي والله قريب هبلت واني نفكر زعما هدا منو وشن يبي"
فهيمه بإبتسامه:توا حطي في بطنك بطيخه صيفي ومعاش تخافي شي وراكم صنديد كان شاف حدغلط فيكم بشبحه يقلعله عيونه..
"بارك الله فيك خالتي وربي يحفظك ويطول في عمرك"
فهيمه؛ويحفظك بنيتي وينجحك ويفرح ميمتك بيك..
"سلمك..سامحيني ازعجتك وخوفتك"
فهيمه بضحكه:ياوخيتي سلمها..لابنتي لاازعاج لاشي وفي الجديد شن مايصير معاكم كلميني طول يامريوة..
"صحيتي خالتي..هي مانعطلش عليك تصبحي ع خير"
فهيمه؛قدامك كل خير..سلمي ع ميمتك..
"يوصل..السلام عليكم"
فهيمه؛وعليكم السلام..ونهت المكالمه وهي تقول..زي العسل مانبداش فهيمه التركي كان مادرتك كنتي..
ولفت بتمشي لقت معين واقف وراها..
ملامح وجهه الجاده كانت ممزوجه بيها ملامح ابتسامه خفيفه جدا وهو يقول..
/خيرها!؟
فهيمه:ياسيدي ركزت عليك تلحق فيهم وخافت منك ماتعرفش انك انت طبعا تحسابه واحد زوفري اشبح شن يبي منها كلمتني وهي خايفه مسكينه وشكلها قبل تبيني ندخلك في الموضوع..
معين؛معناها توا عرفت اني نلحق فيهم!؟
هزت راسها ايجابا وهي رافعه حواجبها...
هو عقد حواجبه وشاف لأمه شويه بعدين مشي..
ابتسمت بخبث فهيمه وهي ترقص في حواجبها...
🍃🍃🍃🍃🍃
الساعه 12:00ليلا..
في الطريق..
كان عبد الرؤوف مروح من الشارع اللي فيه محلاته بطريقه للشقه اللي واخدها من صاحبه..
الطريق كانت هاديه وشبه خاليه من الحركه وهو متعود عليها..
فجأه شاف ضي ماعرفش من البدايه كان جاي من القدام ولامن الخلف لعند ماقرب منه لقاه جاي من زوز سيارات..
كانوا يبوه يوقف وهو لما تأكد ان في شي مريب قاعد يصير زاد السرعه..
شافهم من المرايه لقاهم يلحقوا فيه رجع ركز في الطريق وزاد السرعه وهما وراه لين لحقوا عليه وجوه عن يمينه ويساره..
طلع واحد ملثم راسه من الروشن وهو يقوله..
/وقف وانزل..
هو زاد السرعه بدون مايرد عليهم..
ويسمع صوت ضرب النار..طلع المسدس متاعه شاف المخزن تأفف بعصبيه ..سكره وشاف يساره بعدين شاف القدام وجه المسدس متاع ليهم وبدي يضرب عليهم ويزيد في السرعه..
وهما يضربوا ع مرش السيارة من الخلف لين هشموه تماما..
قعد يقاوم فيهم لين تم مخزن المسدس..لوحه بعصبيه وسط السيارة وزاد السرعه..
وهما لحقوا عليه وضربوا زوز من عجل سيارته وخلوها توقف..
وتلاقوا عليه من الأمام والخلف..وهو يشوفلهم بغضب وخوف في نفس الوقت وكان ياخد في انفاسه بصعوبه...
وفي لحظه بدون سابق انذار..
يسمع ضرب نار متواصل قعد ثابت في مكانه وهو مستغرب..
شاف السيارات اللي كانوا يلاحقوا جايات بيهربوا لكن تحاصروا حصار بسيارات عسكريه...
ركز عبد الرؤوف ع اسم الجهة المكتوب ع السيارات العسكريه بدت ع وجهه ملامح المفاجأه...
*******
:وصلتنا الاخباريه قبل نص ساعه طلعت وحده وجينا هني طول..
عبد الرؤوف بإستغراب..
/من مني جتكم!؟
:اركب معاي توا نمشوا للمقر وغادي تفهم كل شي..
ومشي عبد الرؤوف وهو مستغرب ركب مع واحد من رفقاته في الكتيبه اللي كان ضمن افرادها سابقا وتوجه بيه للمقر..وباقي افراد الوحده اعتقلوا جماعة التشكيل العصابي اللي كانوا ناويين يخطفوا رؤوف ولحقوا الآمر متاعهم...
🍃🍃🍃🍃🍃
في المقر..
كانوا عبد الرؤوف وصديقه ماشيين بإتجاه المكتب وفي حديث يدور بينهم..
:مش حنطولوا ونعرفوا من وراها..
وصل في المكتب وقال..
/نساباتك يراجوا فيك..
عبد الرؤوف بعدم فهم..
/نساباتي!؟
؛ايه الاخباريه جتنا منهم..فتح الباب وقال..خش تو نزيد نفهمك..
ويخش عبد الرؤوف وهو في حالة عدم استيعاب..
شاف قدامه بان عليه المحجوب..لاحظ نظراته ليه كانت نظرات اسف..
غير عيونه عنه للشخص اللي كان جالس مقابله وينصدم بقوة...
صديقه قال..
/الاستاذ مختار وصلاته معلومات تفيد بان في شخص خطط لخطفك من فترة واليوم بيقوم بالتنفيد،لما تأكد من المعلومات عطانا علم وحني تصرفنا
نزل مختار الكمامه وقال..
/مابيتش نحطكم في الصورة قبل لنتأكد قلت ممكن اللي وصلي المعلومات يبي يدير بلبله وخلاص ولما تأكدت جيتكم بنفسي وخبرتكم انتم بالذات..التفت لعبد الرؤوف وقال..عارفكم صحابه وفي بينكم عشرة حتكونوا احرص عليه من غيركم..
وعبد الرؤوف بملامح متجهمه كان يشوف لمختار وفي داخله كابت غضب شديد..
المحجوب شاف للآمر وقال..
/لو سمحت خلينا معاه ع انفراد..
ناض وقال..
/مش مشكله خودوا راحتكم..
ومشي طلع من المكتب وسكر الباب وراه..
المحجوب:من هو اللي ورا الحركة هادي!؟
مختار ناض وقف وهو يقول..
/تو يحققوا مع اللي كانوا ناويين يخطفوه ولما يخلوهم يعترفوا حتعرف..
شاف لعبد الرؤوف..بعدين قدمله لين وقف قدامه مباشرة وبدي يتكلم بهدوء وثبات عالي...
/المفروض خليتهم يخطفوك ويديروا فيك مايبوا وانت تعرف كويس ان الحاجه هادي من مصلحتي..رفع سبابته وقال..لكن شفقه مني ع حال اختي وصغارها حولت كل خلافاتنا ع تركينه وحميتك..نزل يده وقال..ياريت تخليك راجل حقاني زي ماعرفتك ومادخلش اختي في اللي صار بيني وبينك..اختي اللي عادتني ونكرتني ع خاطرك ماتستاهلش منك تهينها وتعايرها بشي هي مالهاش ذنب فيه...شاف لخاله وقال..ياريت لو ولى يشوف نسب عيلة الواعر مايشرفش تخلوه يطلقها..شاف لعبد الرؤوف وكمل يقول..هكي خير ليه وليها ولصغارهم..رفعت كمامته وهو يشوفله بنظرات باينه فيهم مسحة النصر بعدبن مشي طلع من المكتب...
المحجوب شاف لعبد الرؤوف وقال..
/للأسف عطيته الفرصه ع طبق من ذهب..
شد عبد الرؤوف ع قبضة يده بقوة وفي داخله كان حجم القهر كبير ضاق بيه صدره....
🍃🍃🍃🍃🍃
تاني يوم...
الساعه 11:30صباحا..
في مربوعة حوش طوبى..
كانوا المحجوب وعلي الواعر مقعمزين وطوبى واقفه حداهم وهي مربعه ايديها وتسمع في خالها شن يقول..
المحجوب:دار هكي قصدا بش يهينه ويردله اللي داره فيه..
علي بتهكم:وهو عاد ماقصرش عاونه عليها..
طوبى بألم؛ايه هو غلط وغلط هلبه مش شويه لكن والله مايستاهل يصير فيه هكي..
علي الواعر بأسف..
/والله يابنتي لتوا مامصدق الي صار بينا وبينه لكن هو دارها بإيده ماكانش عند حسن ظنا بيه ياطوبى
المحجوب بضيق..
/والله الواحد مايتمناها توصل لهني لكن الباين خلاص معاش في نصيب بينه وبين غرفه..
مسحت طوبى دموعها وقالت.
/بالذات بعد اللي صار امس..
تنهد علي بضيق وقال..
/إنا لله وإنا إليه راجعون..
🍃🍃🍃🍃🍃
طلع من حجرة المكتب وهو ينادي..
"فاتن..فاتن"
ع جية امينه وهي تقول..
/طلعت من شويه..
عقد حواجبه وقال..
/وين مشت!؟
امينه؛قالت مشوار صغير مش حتتأخر..
شاف القدام وهو يفكر بعدين قال..
/ديريلي مليسا..ولف ورجع لحجرة المكتب..
امينه بقلق..
/قطع المليسا وسنينها..
"سقدي ياامينه"
انتفظت بفجعه ومشت بسرعه للكوجينه وهي تقول..
/حاضر..حاضر...
🍃وفاتن في هالوقت..
كانت مقعمزه في مخبر تحاليل تراجي في نتيجة تحليل داراته...
وبعد لحظات طالت من الانتظار جتها النتيجه...
"مبروك مدام انتي حامل"
🍃🍃🍃🍃🍃
"حي عليا ياطوبى حرارته معاش تبي تنزل زوديلي"
حطت طوبى يدها ع جبهة مهاب وقالت..
/نوضي وتي روحك بش نرفعوه..
غرفه ببكي..
/حي عليا كان ماتطلع كورونا!
طوبى:تعوذي من الشيطان ونوضي البسي ملايتك هيا
ناضت وهي تقول..
/نلبس جلابيتي ونطلع نسخن السيارة..
ومشت طلعت من حداها...
🍃وخلوا اواب وجنه عند هاديه وصفيه وطلعوا بأواب لمصحة المنطقه متاعهم..القدس..
🍃اول ماوصلوا غادي استقبلتهم اميمه ووصلت لقسم الاطفال واستلمت صديقه ليها حالة مهاب..
غرفه ببكي:خايفه تكون كورونا ياأميمه..
اميمه:كورونا شني ياغرفه! من وين بتجيه بس! راهو في بلادنا لتوا ماسجلوش حالات يعني قاعده خاليه من الكورونا.
طوبى:غرفه حولي عنك الوسواس وادعيله بس حبيبتي
غرفه بنبرة باكيه..
/ياربي اشفي وليدي واحفظه يارب..
شافوا اميمه وطوبى لبعض بنظرات حزن واسف...
🍃🍃🍃
بعد الفحص طلعوا مهاب لحجرة بروحه بش يبدوله في العلاج..
قعدت معاه امه داخل..اما طوبى قعدت برا تستنى في حد..
بعد عشرة دقايق وصل..
هي شافاته جاي من بعيد قعدت واقفه في مكانها تراجي فيه لين وصل فيها..
عبد الرؤوف بقلق..
/شن صار فيه..
طوبى:ماتخافش مافي شي خطير داروله اللازم وان شاء الله تنزل حرارته وحاله يولي باهي..
عبد الرؤوف:حطيتوه في حجرة بروحه!؟
طوبى:ايه امه طلبتها..
قاللها:وينهم!؟.
اشرتله عليها بيدها المغطيه بقفاز اسود..
هو طول مشي للحجرة وطوبى معاه بعيونها اللي كانت نظراتهم كلها اسف..
🍃فتح باب الحجره وخش..
لقي غرفه مقعمزه قريبه ع ولدها..شاده يده وتبوس فيها وهي تبكي..
قلبه وجعه هلبه..قدم لين وصل في السرير من الجهة التانيه وقال..
/شن حاله توا؟
غرفه بدون ماتشوفله..
/خير من بكري..
هو قال؛باهي علاش تبكي هكي!..
مسحت دموعها بدون ماترد عليه..
تنهد ومشي قعمز ع الكرسي مقابلهم..
وعيونه بين مهاب وامه وكان يتمعن بالنظر في وجه امه اللي كان مشتاقله هلبه..
حطت غرفه يد ولدها بلطف وناضت بتطلع لطوبى..
هو ناض بسرعه واعترض طريقها..
قعدت تشوفله بصمت..
وهو يتأمل في ملامحها وعيونها بشوق..
لكن..
لما ركز في نظرات عيونها حسهم فارغات..مايعبروا عن شي..
غرفه:شن في!..
شد ذراعها وقال..
/لهالدرجة هنت عليك!
نزلت عيونها وابتسمت بأسف وهي تقول..
/بالله حول..لامكانه ولاوقته..
عبد الرؤوف:باهي بعد يطلع مهاب تروحوا معاي للحوش ونتفاهموا..
جبدت ذراعها بهدوء وقالت..
/ماعندي شي نتفاهم فيه معاك..
وفاتت من جنبه وطلعت من الحجره..
غمض عيونه بشده بعدين فتحهم وشاف لولده بنظرات ألم..
🍃🍃🍃🍃🍃
الساعه 2:30بعد الظهر...
في شقة التارقي..
كانوا مقعمزين هو ومحمد يتغدوا في مقطع دايره عبد القيوم..
محمد المهدي:عندك نفس في الماكله مش عادي..
عبد القيوم:صحتين..
محمد؛على قلبك..
وقعدوا ياكلوا بصمت لحظات لعند مامحمد شاف شويه لعبد القيوم وقال..
/الفترة هادي مشغول بشي مضايقني هلبه..
عبد القيوم شافله بنظرات قلق وتساؤل..
محمد بضيق..
/حالة التشتت اللي صايرة في عيلتنا حاله مايدفع فثمنها حد كان الصغار..اللي صار مع صغار عمتي بعد مااطلقت..هانوا عليها تخليهم ولاكأنها أمهم..ولاصغار عمي طاهر اللي امهم ديما هاملتهم ومخليتهم اخر اهتماماتها..ولابنت عمي الجالي..
قام عبد القيوم عيونه فيه..
محمد وهو مركز ع ردة فعل عبد القيوم..
/سمعت بوي يحكي لعياله قاللها ع واحد خطب اختها الصغيرة..فكرت كان وافقت عليه شن بيصير في جنة بتتربى بعيد عن امها حتى هي! ولابيصير فيها ماصار لأمها وتربيها عيال بوي!؟ قصدي عمي الجالي مااظنش يرضى بحاجه زي هادي..حرك راسه يمين ويسار بأسف وقال..لاحول ولاقوة الا بالله..والله بعد اللي شفته ومر عليا اكتشفت ان اهم قرار الواحد ياخد في حياته قرار الزواج..مش بين يوم وليله يقول بنتزوج...
سكت لما شاف عبد القيوم ناض ومشي طلع من الدار..
هز راسه وهو مبتسم بأسف..
🍃وعبد القيوم مشي طول للكوجينه..
وقف ع اللاوندينو فتح الميه وبدي يغسل في ايديه بعصبيه..
بين عيونه نظرات عدي لطوبى..من غيرته كان متمني لو يحلله القتل كان قتله بدون مايرفله جفن..
سكر الشيشمه بقوة حط غله كله فيها وخلاها تنفك من بعضها..
"لهالدرجه!"..
شاف للباب لقي محمد واقف يشوفله بإبتسامة غريبه..
محمد وهو مبتسم..
/عارف راهو..وانت اللي قتلي..
عقد حواجبه بإستغراب وقعد يشوفله بصمت..
محمد ضحك وقاله؛تو نقولك امتى وكيف...
🍃🍃🍃🍃🍃
"اني بصراحة مانبيش نتكلم في الموضوع هدا مافيش فايده من الكلام فيه"
عبد الرؤوف بضيق..
/اني نبي نسألك سؤال واحد بس..غرفه توا واجعها خاطرها ولاعارفه روحها شن تبي!؟"
طوبى وعيونها في الارض قالت بضيق..
/مش عارفه شن نقولك..لكن هي توا مش زي قبل..
غير نظره للحجره وفي عيونه نظرات حسرة وحزن..
طوبى:مرات هكي خير ليك وليها ولصغاركم احسنلهم مايكبروش وهما يشوفوا في بوهم يهين في امهم ومايحترمش فيها..
شاف لطوبى وقال..
/ديما نهين فيها اني!؟
طوبى:في كل وقت حتى وانت ساكت ماوصلتش غرفه للمرحلة هادي الا بسبب التراكمات..مانبيش نظلمك ونحملك الخطأ بروحك..لكن ياعبدالرؤوف حياة زوجيه مافيها امان واحترام اكبر غلط انها تستمر بالذات ع خاطر الصغار خلوهم يشوفولك انت وامهم بنظرة حلوة وانتم منفصلين خير مايعيشوا بيناتكم وهما يشوفوا فيكم مش محترمين بعض وفي بينكم كريهه..
عبد الرؤوف؛وعلاش ماتقوليش نحاولوا نصلحوا من وضعنا مع بعض ونفتحوا صفحه جديده!؟
طوبى؛شن ودك الأعمى غير قفه من العيون..والله هدا مانتمنى وكان حاس روحك تبي تحاول معاها حاول لعل الله يحدث بعد ذلك امرا..
ابتسم وقال..
/بارك الله فيك اللي سمعتيني...
طوبى: حتى انت بارك الله فيك ع كل شي درته معانا قبل عمرنا مانسينا معروفك ولاحننسوه وسامحنا ع اللي صار فيك من ورانا..
بإحراج شديد قال..
/انتم اللي سامحوني..السلام عليكم..
ومشي بسرعه وهو محرج ومضايق ع الآخر وطوبى تشوفله بنظرات اسف وحزن..غيرت نظرها للحجره ومشت خشت ع اختها...
لقتها راقده ع الكرسي وهي شاده في يد ولدها..
ابتسمت بحزن وسكرت الباب ومشت قعمزت قريبه ع مهاب..
🍃🍃🍃🍃🍃
وبعد العصر طلعوا بمهاب من المصحه..
طول الطريق وغرفه ضماته لحضنها وتقرا عليه ومرة مرة تبوس ع راسه..
🍃طوبى:ايه حقه بكري اريج كلمتني قالت فاتن جت..
غرفه بضيق:ايااح معناها هداكا بيجي..
طوبى:مش شرط مرات يروح بيها السواق..
غرفه بنرفزة؛ياريت مش طايقه شبح وجهه..
سكتت وهي مضايقه..فكرت في الموقف الاخير اللي صار بين مختار وعبد الرؤوف وتسائلت بقلق عن تابعات هالموقف ياترى شن حتكون!؟
🍃واحيانا الانسان يدير مواقف سيئة في حياته من غير قصد ولأنه مش قاصدها مايفكرش فيها ولايفكر في نتجيتها اللي ممكن تخليه فريسة للندم بعدين...
🍃🍃🍃🍃
"ام سلافه اني طالع بدك شي!؟"
شاديه بضحكه..
/مابدي غير ترجع انت والسيارة بخير وسلامه..
ابتسم وقال..
/إن شاء الله إن شاءالله..جهزي حالك انتي والبنات رح اخدكن فيها مشوار المسا..
ضحكت شاديه وقالت..
/وكأنه اول مرة بحياتنا بنشتري سيارة!
تنهد بحسرة وقال..
/الحمد لله ع كل حال..يللا بخاطرك..
شاديه:الله معك حبيبي..
ومشت رافقاته للباب..بعد ماطلع توجهت لدار المعيشه..
كانت فيها لبانه مقعمزه تتفرج ع التلفزيون..
اول ماخشت قالت..
/الحمد لله مارحنا مع بيت عمي لمصر ليكا اجتن الكورونا..
قعمزت شاديه وهي تقول..
/والله يابنتي في محل بالدنيا رح يسلم من هالوباء..رفعت حاجبها وقالت..اختك لستا حابسة حالها بغرفتها..
لبانه بضيق:مابدا تشوف وشي..
تنهدت شاديه بضيق وقالت..
/الله يهديها ويصلح حالها...
#عرجون_الفل
#طوبى
...يتبع...
