#طوبى "جنة طوبى"
#جمان_فريد
#الجزء_107"كانون الأول/شتي يادني"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا.. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "وَإِذَا اشْتَكَى أَحْبَابُ قَلْبِي عِلَّةً
أَحْسَسْتُهَا كَالسَّهْمِ فِي أَضْلَاعِي"🍃
________________________________________
طلع من الحمام بعد ماتوضى ومشي للدار
خشلها وخدي المنشف وقعد ينشف في وجهه وايديه..
ع خشة محمد اللي كان جاي من الكوجينه بكباية عصير ليمون مذوب فيها عسل..
مدهاله وقال..
/اشرب..
التفتت وخداها منه وهو يقول بإبتسامه ع ملامح وجه ذبلانه..
/صحيت يامحمد صحيت سامحني تعبتك وشقيتك وان شاء الله مانكون دعيتك..
محمد:خديت احتياطي شربت زغتر وبخرت زعتر..
ضحك عبد القيوم وبدي يشرب ومحمد يشوفله وهو يتفكر في اللحظه اللي هذي فيها التارقي بإسم طوبى وقال كلمة لتوا مش مصدق انه سمعها..
ماعرفش وقتها شن حس اتجاه التارقي هل ضايق منه او تعاطف معاه..
قاعد يحس ان طوبى تعنيهم حس بالغيرة عليها..
في نفس الوقت فكر فمشاعر التارقي وتوقع انها من طرف واحد وقاعده تعذب فيه..
كمل عبد القيوم شرب العصير وقال..
/هيا معاش في وقت..
محمد بفزة:وين وين!؟ قصدك تبي تصلي في الجامع راهو وضعك قاعد مش تمام..
عبد القيوم عقد حواجبه بإبتسامه وقال
/بردة راهي مش حاجه كبيره..
ومشي طلع للكوجينه..
لحقه وهو يقول..
/غلط هكي راهو..
خش عليه الكوجينه لقاه يغسل في الطاسه ويضحك..
محمد؛تارقي ندوي جديات غلط طلوعك توا فالوقت هدا الجو مصقع ..
حط التارقي الطاسه في مكانها وقال..
/عدي جيبلي الجيبوطي الاسود والشال الازرق كحلي والطاقيه السودا تلقاهن ع الشماعه..
تنهد بإستسلام ومشي يجيبله اللي قاله عليه...
🍃🍃🍃🍃
ومشوا للجامع بالسيارة..
هو وعلي الواعر ومحمد..
عرف علي الواعر بمرضه قعد يعارك فيه وهو يسمع ويساير...
بعد وصلوا للجامع..
لما خشوله حس عبد القيوم بالإعياء لكن قعد يقاوم..
خش وقت الصلاة..وقفوا في الصفوف وهو جي في طرف الصف جنب علي الواعر..
من لما بدت الصلاة واحساس الاعياء بدي يزيد وهو مستمر في المقاومه لعند ماتمت الصلاه..
كان ناوي ينوض يروح طول بش يرقد..ومجرد ماناض حس كل شي فيه هبط والدنيا ظلمت في عيونه وطاح من طوله..
المصلين جوه يجروا منهم المهدي وعبد الرؤوف ونضال..
حاولوا يفيقوه بدون جدوى..
محمد بقلق وعصبيه..
/قتله ماتطلعش وهو سكر راسه..
وطلعوا بيه عبد الرؤوف ونضال وهما مسندينه لسيارة رؤوف..
ركبوه فيها ومشوا مع بعض..والمهدي ركب معاه ولده والحاج علي وتحركوا طول للمصحه...
🍃الجالي؛هدا شكله ضربه الصقع ع صدره انجلط اعراض جلطه هادي..
محمد شنيبه بصدمه..
/معقوله!!؟لا ان شاء الله لا مسكين..
الجالي:شن يعني بيخلد كلنا بنموتوا..تنهد بملل وقال..هيا هيا اركب...
🍃🍃🍃🍃🍃
الساعه 9:00صباحا..
في سيارة المهدي..
المهدي:شتي هدا ياتارقي مايلعبوش معاه..
عبد القيوم بضحكه..
/والله عشت في اماكن الصقع فيهن اضعاف اللي هنا متكيف معاه الجو هذى عادي..
علي:كان حق علاش صار فيك هكي !؟
عبد القيوم:ممكن لأن معدتي فاضيه بس..
محمد:صح امس شبه لاتغدا لاتعشا وقبل الفجر رجع..
المهدي:وطلعت من الحوش!!؟
عبد القيوم بضحكه:خلاص ماصار شي هاكم تشوفوا فيا قدامكم زي الجن..
علي الواعر:بلاش استهتار ياولد ماسمعتش بالدي اللي جي للصين قاعد يحصد فيهم بالميات وقالوا بيجي للعالم كله..
المهدي؛ربي يكفينا شره مش ناقصين سادتنا هالحرب اللي كل يوم تحصد..
علي:ياريتها تجي تحصد طيور الشر والخلايق المقلبه..
عبد القيوم شد ضحكته بقوة.
والمهدي شبه فهم على من رمي الكلام واحتفظ بصمته..
🍃بعد طول مسافه وصلوا للشارع..
درس المهدي قدام حوش طوبى زي ماطلب منه الحاج علي..
هني محمد بدي يركز ع التارقي لاحظ انه لما قال الحاج علي..
"حطني قدام حوش بنت ولدي"
ملامح وجه عبد القيوم تبدلت للجديه وزاد عقد حواجبه..
وكأنه توتر ويحاول يخفي هالتوتر..
ولما درست السيارة قدام الحوش..
هو قعد يشوف القدام ورد السلام ع الحاج علي بدون مايشوف جهة الحوش..
التصرفات هادي طبيعيه ولاتستحق الوقوف عندها لأي شخص مايعرف شي..لكن محمد توا عرف شي مهم يخليه يدقق في ابسط حركة يشوفها او كلمة يسمعها...
🍃🍃🍃🍃
وعلي الواعر بعد ماخش لحوش طوبى توجه لباب الحوش الدخلاني ودق عليه..
شويه وفتحت اريج..
/صباح الخير جدي..
علي:صباح الخير بنتي..
وخش وهي سكرت الباب....
*********
علي الواعر وهو يشوف بإبتسامه لجنه اللي تلعب ع عكازة قال...
/استاحشنا الجرينه قلنا نجوا نفطروا معاها..
سدرة؛معاش تجينا كان ع خاطرها ياحسرة علينا..
ضحكت وهي تجهز في الشاهي..
علي الواعر:ليا فوق تلاتين عام ندلل وندور فيكم سادكم..
سدرة:لاوالله ماسادني مانشبع من دلالك ودوارتك ياغالي..
طوبى:من يشبع منه ومن شوفة وجهه القنينون..
سدرة بضحكه..
/نجيه ياربي..
علي:سقدوا بالفطور بلا كلام فارغ..
ضحكوا التلاته..
☘وكملوا تجهيز الفطور وهو يلاعب في جنه...
شويه جتها امها خدتها لبستها المريول..وحطتها في كرسيها وحطت قدامها فطورها..
علي وهو يكسر في خبزة القمح..
/ياصارت فينا رعشه بعد صلاة الفجر..
وجهوا انظارهم ليه بإنتباه وخوف...
وهو مكمل يقول..
/طاح علينا التارقي ومعاش ناض..
عيون اريج طول شافوا لطوبى..
شافت ملامح الصدمه باديه ع وجهها اللي شحب لونه حتى شفايفها تغير لونهم للأبيض..
وجدها مكمل يقول..
/طول جوه راجل اختك غرفه والمهدي شنيبه وخوه نضال رفعوه للمصحة واني مشيت معاهم..طلعت جاياته بردة قويه وحرارته راقيه نزلوها وداروله تغذيه قعدت من الساعه سبعه للساعه تسعه...
اريج؛يعني هو توا حاله باهي؟
هز راسه وقال..
/ايه الحمد لله فاق وحاله باهي وروح من المصحه..
سدرة وهي تسمع ماكانتش مهتمه للتارقي وحاله همها طوبى بس..
كانت تسرقلها في النظر بطرف عينها..شاف ردت فعلها..
ولأنها مرت بهالشي مرارا عارفه شن تحس طوبى..
طوبى اللي كانت ديما بارعه في اخفاء المشاعر اللي ماتبيهاش تطلع..
قعدت محتفظه بصمتها..خدت طاسة عصير البرتقال وبدت تشرب منها...ظاهرها عادي جدا لكن داخلها كله يرجف من الخوف عليه..
اريج:باهي الحمد لله ع سلامته..خطر عليا الوباء اللي طلع في الصين..
سدرة:الله يجيرنا وخلاص امس شفت فيديوات رعشتني..
حطت طوبى طاسة العصير وهي تراقب في بنتها..
علي الواعر:قالوا بينتشر في العالم..
اريج؛ايه في هلبه كانوا في الصين روحوا منها اكيد روحوا بيه وتو بينشروه في كل تركينه..
سدرة بقلق:ربي يبعده علينا..
شافتلها طوبى وقالت..
/ديما ادعوا بدعاء الرسول ..اللهم اني اعوذ بك من البرص والجنون والجذام وسيء الأسقام..
🍃الأوبئة..
جيلنا ماعاشش زمان فيه وباء عالمي..ولاكنا متخيلين ان حيجي علينا وقت ونعيشوا هالزمان..نعيشوا الرعب والخوف..ولحظات انتظار الموت...لافي زمن الكورونا عشنا ماهو اصعب لأننا من البلدان اللي عايشه في حالة من عدم الاستقرار وديما فيها نزاعات وحروب..
يعني الليبين فوق خوفهم من الحرب والمآسي اللي عاشوها من وراها حيزيدهم الوباء المجهول اللي ينبأ بأيام اصعب من اللي مروا بيها...
(ظهر الفساد في البر والبحر بما كسبت أيدي الناس)
ايه اللي صار فينا من حروب وامراض وكترة الموت من جهة هي ابتلاءات..لكن من جهة تانيه كانت عقوبات..
عقوبات ع شنو!؟
ع الذنوب اللي تعودنا نديروها لين ألفناها..
ع الظلم..ظلمنا لبعض في كل شي..ظلم افراد العيله لبعض..الخوت..ظلم الابناء للوالدين وظلم الوالدين لأبنائهم..
ظلم ام زوج وخوات الزوج لمرت ولدهم والعكس ظلم الكنه لأهل زوجها..
هالمشاكل اللي في نظر البعض هايفه وماتستاهلش حد يوقف عندها هي في الحقيقه السبب الاقوى والاخطر اللي تنزل بسببه العقوبات الالهيه..
بسببه تتفكك الاسر وتكبر العداوات وتصير الثارات وتنهار اجيال كامله تتربى في بيئه سيئة من جميع النواحي..
وهكي الذنوب تزيد والحرام يكثر...
وكان لابد من نزول العقاب..بالحرب..بالأوبئة وغيرها من اشكال العقاب الإلهى الرادع...
لكن زي مافي من تردعه العقوبه في من تزيده جبروت ع جبروته..
🍃"توا كنت نكلم في راما قالت لمت حاجتها ونزلت لحوش جدها "
مغليه؛وعلاش تنزل هالغبيه قوليلها اقعدي ع قلبها..
خديجه بعصبيه..
/بش تحصل مع الكلب بوها وماليه!
مغليه:الحق بنتك هادي مرخيه ومش فالحه بكل..
خديجه تنفست بعصبيه وقعدت ساكته وهي تهز في رجلها..
مغليه؛كاني منك ناخد الصغار ونقوله نبي حوش..
خديجه بتهكم؛تحسابيه غالب فيه يام والله يشريه ويلوحهم عليا وياخد راحته بعد تخلاله..
سكتت مغليه وهي تسحن من الغيظ..
اما خديجه بعد صمت دام للحظات قالت بحقد..
/لو اللي في بالي صار وربي لما نخليهم سيرة ع كل لسان..
مغليه بإستغراب:شن بديري!؟
خديجه بمكر؛خليها لوقتها يام خليها لوقتها خليهم توا ياخدوا راحتهم ع الآخر...
🍃"ردي بالك ياابتسام خديجه نعرفها كويس تو بتحطك في راسها"
ابتسام وهي تكلم في نجاه بالهاتف..
/خابزتها وعاجنتها نعرف نتصرف معاها..هي توا خليني نلم باقي حوايجي بعد العصر بنركب للشقه..
"شقتك"
ضحكت ضحكه خفيفه وقالت..
/سلام..
نهت المكالمه وحطت التليفون ع السرير ومشت للدولاب بش طلع باقي حوايجها...
🍃🍃🍃🍃🍃
ومع الساعه 11 الصبح..
كانوا اريج وبنات الواعر واصلين للمدرسه...
لما وصلوا لقوا سيارات المساعدات سابقتهم..
والمتطوعين مع الابلات والاستاذ فتحي بادين يوزعوا فيهم ع ارباب الاسر اللي اصطفوا في طوابير لإستلامها...
سدرة وطوبى خشوا طول معاهم ليساعدوهم..
اما اريج مشت طول للمستوصف ولقت اميمه غادي..
*********
اميمه بصدمه:ألبوم صور؟!
اريج:ايه البوم وCD فيه فيديو الحفله..
حطت اميمه يدها ع جبهتها وقالت..
/كيف هكي! اني نحساب كل شي في الفلاشات اللي عطتهولنا!؟
اريج:لاياحنه في البومات لصور العرس...
غمضت اميمه عيونها بشده بعدين فتحتهم وقالت بعصبيه وقلق..
/يدبرولي اللي عندهم يجيبوه..
🍃وطوبى وهي تراقب في توزيع المساعدات شافت جهة المستوصف لقت اريج واميمه واقفات مع بعض لاحظت من ملامح وجه اميمه انها مصدومه ومتوترة فهمت ان اريج خبرتها عن البوم الصور..
مشتلهم طول...
🍃اميمه؛غير راهو يطلع حتى انتي عندهم صورك..
اريج وهي تحاول تخفي ضيقها..
/لالا نضال بعتلي كل شي..
ع جية طوبى قالت..
/قالتلك..
اميمه بلهفه خوف..
/اي شي عندهم ليا يطلع خيرلهم..
طوبى:امس كلمت نسرين طول وقالتلي توا تجيب البوم متاعك..
تنفست اميمه براحه بعدين قالت..
/اني متأكده ان عمر مايندريش عليهم لكن هداكا شكله يندري بيهم من البدايه علاش توا بس تفكرهم!!؟
طوبى:السؤال الأهم شن يديروا عن هديكا الجايفه المده هادي كلها!؟
اريج:نحس فيها نستهم حتى هي.
طوبى وهي عاقده حواجبها بغضب..
/لااعتقد..ومع هذا لو صار وعرفت ان هداكا قاعد عنده منهم لما نطلق عليه مختار..
اميمه واريج ضحكوا غصب عنهم..
رفعت طوبى حاجبها وقالت..
/ عادي راهو ربي سخر لسيدنا سليمان الشياطين..
ضحكت اميمه واريج قالت..
/ياباي منك ياباي..
وطوبى توزع في نظرها ع المكان وهي رافعه حاجبها..
فجأه..رخت حاجبها وملامح وجهها تبدلت للضيق لما شافت سلافه خاشه للمدرسه ومعاها وحده اول مرة تشوفها.
اريج بنزفزة؛مبردها ياناس حرام مانزلتلي من زور..
اميمه؛اول مرة نشوف اللي معاها..
اريج؛ومرة تانيه تجيب معاها غيرها وتقعد سريك مريك..
اميمه شافت لطوبى لاحظتها انطفت مرة وحده..مشت وانسحبت من جنبهم بدون ماتقول كلمه..
اميمه؛سمعت باللي صارله في الجامع!؟
اريج بضيق:خافت عليه هلبه..
تنهدت اميمه وقالت..
/خل نولي نكمل خدمه وكان حصلت فضوة نجيكم.
اريج؛تمام..ربي يعاون..
اميمه:اجمعين..
وكل وحده فيهم مشت تشوف شن في وراها..
🍃وانشغلوا بمساعدة الناس مش بس بالحاجات الماديه حتى بالكلمه الطيبه والوجه البشوش..
وطوبى طول الوقت كانت تشغل في نفسها بالتفكير في الخالق عن المخلوق..قعدت تستشعر في نظرة الرضا من الله عليها وهي تسعى في حاجة خوتها المؤمنين..
وفي لحظات حست بشعور حلو بالمرة خلاها سعيده لدرجة لاتوصف...
🍃وسلافه فوق في مكان الاطفال..
عرفتهم ع ميار..وهدرزوا عليهم شويه بعدين تغني هي وياهم في اغاني اطفال من بلدها الأم...
"هينا مقص وهينا مقص
هبنا عرايس بتترص
فيهم واحدة شامية
شعرها ضانى ضانى
لفيته على حصانى
وحصانى فى الخزانة
والخزانة من غير سلم
والسلم عند النجار
والنجار عاوز مسمار
والمسمار عند الحداد
والحداد عاوز بيضة
والبيضة عند الفرخة
والفرخة عاوزة قمحة
والقمحة عند التاجر
والتاجر عاوز فلوس
والفلوس عند الصريف
والصريف عاوز لبن
واللبن عند البقرة
والبقرة عاوزة برسيم
والبرسيم فى الجبل
والجبل عاوز عصافير
والعصافير فى الجنة
والجنة عاوزة حنة
والحنة فى أيديهم.."
كانت تغني بأسلوب طفولي ممتع والبنات انسجموا..
لكن هي في اخر الاغنية دموعها نزلوا مسحتهم وقالت.
/كنت عم غني هالغنيه لولاد متلكن بمخيمات النازحين السوريين..الوضع هونيك كان سيء كتير عندكن انتوا كتير منيح..في سقم حاميكم ومكان حلو متل هالمكان بتلعبوا فيه..بس هني كانوا ساكنين بخيم ماحمتهن من البرد والثلج اللي عم ينزل..اغلبهن ماتوا...
نزلوا دموعها ومسحتهم وهي تقول..
/مشان هيك حبايبي بدي ياكن دايما تحمدوا الله انتوا بخير ونعمه كبيرة كتير..قولوا الحمد لله..
كلهم بأصوات متقطعه قالوا..
/الحمد لله..
وميار تمرر في نظرها عليهم بإبتسامه وهي تمسح في دموعها..
🍃وهدا كله كان ع عيون طوبى اللي كانت واقفه في الباب من لما بدت سلافه تغني..برغم غيرتها الشديده منها حستها تستاهل راجل زي عبد القيوم وهو يستاهلها..
ابتسمت وقالت..
/محلاه كلامك..
التفتوا سلافه وميار للباب..
طوبى بإبتسامه..
/اللي قلتيه توا حسيته حتى اني وحمدت ربي معاهم..
هزت سلافه وهي مبتسمه مجامله..
طوبى:قولي لخالتي شاديه تكثر الطلبيات حلوياتها عليهم طلب كبير..
سلافه بإبتسامه:ان شاء الله..
ابتسمتلها طوبى بعدين مشت وخلتهم...
تمالكت سلافه نفسها وقالت..
/يللا خلينا نبلش لعب بالبازل..بتعرفوا ماهيك!؟
وخدت العلب متاع اللعبه وصاحبتها تعاون فيها وبدوا يفتحوا فيهم وهما يحكوا مع البنات..
🍃🍃🍃🍃🍃
بعد الظهر...
خشوا المهدي وولاده للمدرسه..منظمين اليوم مباراة جديده مع ولاد الاسر النازحه اللي داروا صحبه معاهم...
اما بوهم فكان جاي يشوف الاوضاع في المدرسه ويسأل عن باقي المساعدات اللي يعرف مسبقا انها حتوصل اليوم..
وهو ماشي في امان الله..
يوقفوه تلاته بنات وحده فيهم شاده في يدها سفرة حلو
🍃ومن جهة تانيه..
كانوا بنات الواعر في الساحه واقفات يشوفوا في الناس اللي فيها كيف يخدموا وكأنهم في خلية نحل..
طوبى كانت توجه فيهم وهي تقول..
/من غادي..ايه من الباب اللي غادي..
بعدين ابتسمت وربعت ايديها وشبحت لسدرة لقتها مش معاهم..
بنظرها وبكل تركيزها معاه هو..
هالمرة واقفات عليه مجموعه بنات وهو بعيد عليهم شويه لكن يهدرز معاهم..
ابتسمت وقالتلها..
/كل يوم في الزايد الله يبارك .
ردت عليها سدرة بغيره وتهكم..
/وهو عاجبه الوضع..
قالتلها طوبى وهي رافعه حاجبها...
/ومن اللي مايعجباش كل وحده احلى من التانيه يشبحوله ومش مصدقات..
هي قالت بمكابرة...
/علي شني هدا كله مافهمتش شن المميز فيه؟
قالتلها بتعجب..
/منك جد!؟...مررت نظرها ع الساحه وقالت..ترا شوفي حواليك شوفي في حد زيه؟
هي غيرت نظرها عنه وقعدت تمرر فيه ع الساحه بعدين رجعت شافتله..وجهها احمر وقعدت ساكته..
قالتلها..
/لقيتي؟
هي توترت وبنرفزة تأففت وقالت..
/حتى انتي فاضيه شوفي حني في شني وانتي في شني..
ومشت وخلتها.. هي ضحكت شبحتله بعدين شبحتلها ولحقتها وهي تضحك وتقول..
/راجي شويه...
لحقتها وجت في جنبها بعدين قالت..
/صدقيني لو يحطوا قدامه احلى بنات الدنيا ماهو شايف غيرك..
وقفت سدرة وقالت..
/طوبى انتي علاش مصرة ع حاجه مستحيل تصير..
طوبى:وشن اللي يخليها مستحيله ياسدرة قوليلي!؟ مانبيش نعاود نفس الكلام...علاش تبي تكملي عمرك وانتي مقهورة قوليلي!؟
سدرة ودموعها في عيونها..
/بعد اللي صار معاش فيها ياطوبى حتى قدام الناس..الناس اول حاجه حيقولوها..معقوله بعد اللي صار بيناتهم مازال بيعطوهم!؟!
"خلاص كله دخلناه ياابله"
طوبى وهي تشوف للعمال قالت..
/بروا للأستاذ فتحي يعطيكم فلوسكم هونا واقف غادي..
واشرت بصبعها على مكانه وهما طول مشوله..
نزلت يدها وشافت لأختها وهي تقول..
/طز فيهم وفي اللي بيقولوه اني اصلا مازاد ودرني الا تفكيري في كلام الناس وع قد مادرت ماسلمت منهم وكليتها في عمري..بعدين حني وياهم علاقتنا مش مقطوعه بكل..سميرة اللي هي مرت كبيرهم تمشي علينا وتجي صغارهم يمشوا علينا ويجوا..رجالتهم عزمانهم وحضروا مناسباتنا..نقولك حاجه..الناس من لما سمعت بيك روحتي وهما متوقعين ان المهدي ياخدك..
رجعت سدرة نظرها لقاته شاد سفرة الحلو وهو يحي في البنات بحركة الراس وهما مشوا وخلوه وكانوا يوزعوا في الابتسامات عقدت حواجبها بغيره..
ضحكت طوبى وقالت..
/والله غير تشقي في روحك ع الفاضي لو منك اول مايقول بنخطبك نقوله تاني يوم اعقد عليا..
ضربتها سدرة ع ذراعها وطوبى تضحك بكتمان...
🍃🍃🍃🍃🍃
الساعه 3:30بعد الظهر..
بعد نهاية المباراة مشي يزن لخوه..
وقف عليه وقال..
/نمشولها توا؟!
محمد شاف جهة سدرة لقاها واقفه ع وحده تهدرز عليها غير نظره لبوه لقاه واقف ع راجل ومعاهم استاذ فتحي..
رد نظره لخوه وقاله..
/هيا..
ومشوا الزوز مع بعض اتجاه سدرة...
🍃وورا واحد من رواشن "شبابيك" الدور التاني كانوا اريج واميمه وطوبى واقفات يتفرجوا عليهم..
اريج:ماشيين لسدرة ولا!؟
اميمه وهي مركزة معاهم..
/ايه والله ماشيين لسدرة..
وطوبى جنبهم تشوف لولاد المهدي كيف وقفوا قراب سدرة ويكلموا فيها..
**********
محمد؛خالتي سدرة..
شافتلهم سدرة وهي متفاجئه وقلبها يدق بقوة..
محمد:شن حالك خالتي؟
سدرة:الحمد لله ولدي شن حالكم انتم؟
الزوز بأصوات متقطعه..
/الحمد لله..
يزن؛معليشي خالتي نبوك في موضوع..
المراة اللي معاها قالت..
/اني نستأذن..
سدرة وهي تحاول تخفي توترها قالت
/بالسلامه..
شافت للولاد وقالت..
/خير وليداتي موضوع شنو اللي تبوني فيه..
تنهد محمد وقال..
/اول شي تعرفي قداش نعزك ونحترمك ونقدرك هلبه من حب امي الله يرحمها ليك..
يزن:وحني اللي تحبه امي نحبوه وانتي كنتي اقرب الناس ليها..
محمد:قريبه عليها لدرجة سمت بنتها ع اسمك برغم ان موقفها كان صعب وانتي تعرفيه كويس لكن وين شفتها كيف قعدت محافظه ع علاقتها بيك تأكدت انك تستاهلي حب امي واحترامها ليك..
نزلوا دموع سدرة وهي تقول..
/الله يرحمها ويغفرلها...
الزوز قالوا مع بعض..
/آمين..
تنهد محمد وقال بإبتسامه والدمعه في عينه..
/قالولك امي قبل ماتموت كتبت رسايل لينا حني وانتي؟
هزت راسها هي تمسح في دموعها..
محمد؛قريتيها؟
سدرة بنبرة مخنوقه..
/ايه..
محمد؛مانبيش نسألك شن كتبتلك فيها لكن بنقولك شن كتبتلي في رسالتي..
"امي وصتني نجمعكم انتي وبوي."
اللي سمعاته سدرة توا صدمها بقوة صدمه ربطت لسانها..
مسح محمد دموعه قبل لينزلوا وقال..
/ماتبيش بوي يقعد بروحه وكان عندها احساس كبير انك حتفيقي قالتلي شفت رؤيه هدا تفسيرها..
غيرت سدرة عيونها عنه وهي شاده بكاها..
ويزن لف وجهه عنهم وقعد يمسح في دموعه..
🍃وعيون المهدي عليهم من بعيد يشوفلهم وهو متفاجئ ومش فاهم شي..
محمد؛خالتي بوي راجل مريض وقاعد يحمل في نفسه فوق طاقتها واني خايف عليه هلبه..نبي نريحه ونفرحه نبي من يقيم معاه حمل هموم الدنيا اللي ماتمش..
شافلها يزن وقال..
/كلنا راضيين حتى سدرة راضيه كلنا نبوا بوي يفرح ويرتاح ومش حيلقى خير منك..
حطت سدره ايديها ع وجهها وقعدت تبكي..
وهما يشوفولها بإبتسامة ألم..
فتح محمد شيشة ميه مسكرة كانت في يده مدهالها وقال..
/خلاص خالتي..هاك اشربي..
يزن:خالتي سدرة نبوا لبوي مراة فرفوشه مش نكوديه..
ضحكت من وسط دموعها..
حولت ايديها وهي تشوفلها بإبتسامه الم..
محمد بإبتسامه:خودي خالتي..
خدت منه الشيشة وشربت منها..
محمد؛فكري كويس خالتي بالله عليك..
يزن:نبوا الشقه يولي فيها روح..صح ماحد يقدر ياخد مكان امي..لكن عندي انتي اختها...
سدرة بنبرة باكيه..
/ربي يحفظكم ويرحم عيشه اللي ربت رجاله محترمين مقومين..الله يرحمها ويغفرلها..مسحت دموعها وكملت تقول..ان شاء الله خير وليداتي ان شاء الله خير..
هز محمد راسه وقال..
/مشكورة اللي سمعتينا..السلام عليكم..
يزن؛السلام عليكم..
سدرة وهي تشوفلهم بحب..
/وعليكم السلام...
🍃وبوهم فضوله بيقتله يبي يعرف في شن كانوا يحكوا..
قدملهم وهما قدموله لين وصلوا فيه..
المهدي:شن في!؟
محمد طبطب ع كتف بوه وقاله..
/برا اضرب الحديد وهو حامي..
يزن بضحكه:مهدنالك الطريق اغنم فرصتك ياراجل..
المهدي كان مرتبك وملخبط ع الاخر فاهم ومش فاهم...
محمد؛بوي برا هيا..
حمحم ومشالها طول..
ابتسموا ولاده وهما يتبعوا فيه بعيونه..
🍃عند الروشن..
اريج بتعجب:ايه اللي بيحصل ده ايه اللي انا شايفه ده..
اميمه بضحكه؛والله جو..
وطوبى تتفرج وهي مبتسمه بحماس..
🍃سدرة كانت تشوف في الفراغ وهي سرحانه في كلام ولاد المهدي..
فجأه اخترقت انفها ريحة عطر تعرفها كويس..
قامت عيونها فيه..
المهدي بإبتسامه مسح ع لحيته وقال..
/شوفي اني مش عارف هما شنو كانوا يحكوا معاك..لكن اللي نعرفه..تنهد وقال..اني شاريك من لما كان عمري16 سنه لليوم ياسدرة لو تشريني نحطك تاج ع راسي لين نموت..ولوتبيعيني مرة تانيه حنقعد شاريك لأخر العمر...حط ايديه في جيوب بالطوه وهو يشوفلها بإبتسامه حب بعدين مشي لولاده وخلاها ضايعه تماما...
🍃اريج:بنقز..
طوبى بضحكه:خلاص مفروض نروحوا توا كلهم يراجوا فينا في حوش غرفه..
اميمه؛خل نقول لأسامه قبل..
اريج ؛ايوه حني حتى راجل ناخد في شوره..
جبدت طوبى اريج من يدها وهي تقول بضحكه..
/عقبالك يامطيورة..
ابتسمت وفي سرها قالت..
"آمين"
ومشوا مع بعض وخلوا اميمه وهي تتصل براجلها تضحك عليهم...
🍃🍃🍃🍃🍃
ويطلعوا كلهم من المدرسه ع طلعة سلافه وميار..
ركبوا سيارة ميار اللي قالت..
/اختها الكبيره احلى منها..
سلافه:ايه حلوة كتير..
ميار؛بصراحه ومش تقولي صاحبتي تجامل فيا والله لا..بس لامقارنه بينك وبينها ومش شايفه انها احسن منك في شي انتي احلى واكثر جاذبيه..
سلافه:كلوا حكي مابيغير شي..
ميار:لاحبيبتي ماتقوليش هكي صدقيني لما يفتح عيونه عليك حينسى هادي ومايجي منها..
تنهدت سلافه وقالت..
/يارب..مو بس مشاني مشانو هو...مارح يكون مبسوط معها..
ميار؛هي هادي..شغلت سيارتها وتحركت وهي تقول..حرام واحد زيه يطيح هالطيحه....
🍃🍃🍃🍃
ويوصلوا لحوش غرفه مع آذان العصر...
لقوا نبيله وهاديه وصفيه غادي ومعاهم جنونه تلعب مع ولاد خالتها..
سلموا بعدين طوبى قالت..
/خل نصلوا ونجوا..وطبست ع بنتها باستها من خدها..
وتنفجع لما تسمع عيطة سدرة..
قامت عيونها شافت عمتها مطيرة خاشه عليهم وهي تضحك..
بسرعه مشتلها تجري مع اريج وسدره..
وصلوا فيها وضموها مع بعض وهي تقول بمزح..
/قتلتوني..كسرتوني..
واللي حواليهم يضحكوا من قلوبهم..
🍃وفي الحوش اللي جنبهم..
طلعت ابتسام وهي لابسة ثوب الحداد وهي رافعه ولدها في حضنها ومعاها نجاح بش توصلها للشقه..
وصغارها الزوز يلحقوا فيهم..
وصلوا في الدروج وركبوا للشقه...
نجاح فتحت الباب وقالت..
/اهو المفتاح ع الباب خوديه تبي اي حاجه اتصلي..
ابتسام:حاضر..بارك الله فيك..
نجاح؛فيك بارك الله..ومشت نزلت طوبى..
☘نجاح ماكانتش راضيه ع اللي صار لكن ماتقدرش تمنعه☘
ابتسام؛خشوا ماما..
خشوا الصغار وهي جبدت المفتاح عن الباب وسكراته..
التفتت للشقه بعدين رفعت خمارها وهي تمرر في نظرها عليها بإبتسامه وقالت همسا..
"شقتي"
#كانون_الأول
#طوبى
...يتبع....
