#طوبى "جنة طوبى"
#جمان_فريد
#الجزء_117"رحلة حب وحرب"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لا تسقونا مشاعر مزيفة مادمتم مجرد عابرين🍃
_______________________________________
بعد العصر روحتوا لجنتهم الجميله..
هي بعد ماخدت دوش خدت كتاب الداء والدواء لإبن القيم وخدت المصحف الميسر ولبست فوق فستانها الأرزق الغامق شاربه بيضا وفي رجليها سبيدرو من نفس لون الشاربه وطلعت للمكان الشبيه بجنان حوشهم..
🌸🌸🌸
اول ماقعمزت فيه تأملت الفلات والياسمينات بعدين غمضت عيونها وهي تشم في ريحتهم..
لحظات وفتحت عيونها..تنهدت..وشافت للمصحف فتحاته لوين ماوقفت في الحفظ..
راجعت الصفحه كامله ولما تأكدت انها حفظتها سكرت المصحف وحطاته على جهة..وخدت كتاب ابن القيم فتحاته وين ماوقفت فيه وحطت سماعات البلوثوث في وذانها وشغلت في هاتفها درس عن شرح الكتاب "للشيخ عبد الرزاق البدر"...
🍁هي قاعدة تملا في قلبها بحب الباقي..اللي مالهاش غيره ممكن تتخلا عنها الدنيا كلها وتخليها بروحها الا هو سبحانه..
وهي تسمع في شرح الشيخ راحت في عالم السماء السابعه ومعاش تفكرت الدنيا باللي فيها..
☘ولما ربك يحب عبد مش بس يبتليه ويرزقه بقلب مؤمن طيب يحبه بصدق..يحبه بعفه..يحبه بدون مقابل ولايراجي فيه كل همه يشوف الانسان اللي يحبه مرتاح وسعيد..
وعبد القيوم كان احد اجل نعم الله ع طوبى زوج صالح ودود صاحب نفس سويه وقلب مؤمن ونظيف..
هو توا جي قعمز بعيد عليها بمسافه في يده لوحه وادوات الكتابه..قعد يتأمل فيها..ويشوف في وحده من حالاتها اللي يحبها..حالة تخليها تزيد تبرق وتلمع في عيونه زي "التاتريت"
بالتارقيه معنى كلمة نجمه...
غير نظره عنها وخدي القلم الخاص بكتابة خط الثلث وبدي يكتب في اسمها وهالمرة غير المرات اللي فاتوا يكتب وقلبه فرحان والسعاده ماليه صدره...
🍃🍃🍃
وهما عايشين في جنتهم بعيد عن الدنيا وهمومها كان محمد المهدي عايش حالة صدمه عمرها ساعات طوال..
ماقال شي لأي حد..شن بيقول اذا هو نفسه مازال مش مصدق ولامستوعب اللي شافه!!؟
وبعد تفكير مطول سببله الصداع مالقاش قدامه غير يحكي عن اللي شافه لشخص واحد بس..
🍃"خيرك ولدي شن في!؟"
محمد بتوتر وارتباك..
/والله ياخالتي ماعارف من وين بنبدا..
سدرة بخوف:تكلم طول ولدي تربح!
محمد:اهدي خالتي اهدي..مسح ع لحيته وقال..خالتي اليوم وحني في جود الدايم شفت..
سدرة رفعت حواجبها وقالت..
/شن شفت!؟
تنهد وقال؛شفت خالتي طوبى مع..التارقي..
غمضت سدرة عيونها بإحباط..
هو استغرب ردة فعلها وقال..
/ماقلت لحد ولاشافهم حد غيري..
فتحت عيونها وقالت..
/وماتقول لحد ولدي بالله عليك..
عقد حواجبه بإستغراب وقال بتساؤل..
/يعني هما...
هزت راسها وقالت..
/متزوجين ياولدي..
هو ضحك بدهشة..
استغربت ضحكته..
هو قال بضحكه دهشه..
/سبحان الله في الاخير قسمهاله..
بإستغراب شديد قالت سدرة..
/كيف!؟
ضحك وقال..
/تو نفهمك...
☘وحكالها محمد اللي يعرفه وسدرة تسمع وهي متفاجئة..
محمد بإبتسامه..
/لما حكيتله قالي انسى وسكر ع الموضوع..
سدرة تنهدت وقالت..
/المهم ولدي زي ماقتلك ماطلع حاجه لحد رد بالك..
محمد المهدي:كوني هانيه خالتي مايطلع مني شي لكن بنسألك بوي يعرف؟
هزت راسها وقالت؛وشهد ع عقد القران..
ابتسم وهز راسه بعدين قال..
/ربي عوضها بيه خير ياخالتي..
ابتسمت سدرة وقالت..
/ان شاء الله يكون هكي ولدي ان شاء الله..
🍃🍃🍃🍃
ربي عوضها بيه خير..
العوض الجميل يجي بعد تجربه فاشله خلفت في صاحبها جروح وقهاير صعب تنتسى..هالعوض يبعته الله سبحانه وتعالى بش يداوي الجروح ويبدد القهر ويبدل بيه احزان العبد لسعادة ورضا..
ونسرين كانت تحساب ربيع هو العوض الجميل وعمرها ماتوقعت يكون سبب جديد لقهرها وجرح جديد لقلبها اعمق من جروحها السابقه..
هي توا عايشه وسط الألم والمخاوف..تفكر في كل لحظه في يوم الإربعاء واللي بيصير فيه..
اليوم اللي بدير فيه الهام ذكري ميلاد ولدها في مطعم ربيع..
ربيع اللي الح ع اخته تعطيه رقم الهام وحجته انه بيتفاهم معاها ع التجهيزات اللي تخص المناسبه..
بعد ماخدي الرقم كلمها مرة وحده بس كانت الهام جديه معاه في المعامله ورسمية جدا وهكي زادت خشت راسه اكثر واكثر...
🍃روح هديكا الليله قبل منتصف الليل بنص ساعه..
نسرين اول ماسمعت الباب انفتح دارت روحها راقده..
لحظات وخش لدار النوم وهو يدندن في اغنيه عاطفيه فتح دولابه خدي منه حوايج وطلع طول للحمام بش ياخد دوش..
بعد خمسة دقايق..طلع من الحمام للدار خدي شرشاف ومخده من الدولاب وطلع للصاله..
تمدد ع واحد من مناديرها"فراشاتها" وتغطا بالشرشاف وخدي هاتفه فتح الفيس وطول خش ع حساب اخته سهى يدور ع حساب الهام..
وكأنه مراهق عمره ماتعداش 16عام..
🍃نسرين ناضت ونزلت من السرير وطلعت من الدار توجهت للصاله ولما وقفت في بالها درقت وبينت شويه من راسها وهي تراقب فيه..
كان عاطيها بالظهر..تشوف فيه يشوف لهاتفه وفجأة قعد يضحك..
وخرت ومشت هربت للدار ودموعها يطيحوا وحده ورا التانيه..خشت لسريرها وتغطت وغطت حتى راسها وبدت تبكي وهي تتفكر في ايامها مع حامد كان يصير معاها نفس الشي كانت تحس بالاهانه لكن ماتنوجعش هلبه..لكن هالمرة الوجع اللي تحس فيه في قلبها مخليها تتمنى الموت..
🍃وهو هايم في صفحة الهام اللي ماكانتش مسكرتها يقرا في منشوراتها..اغلبها فكاهيه ولطيفه والباقي ادعيه وفوائد دينيه..
خش بعدين ع القصه متاعها لقاها حاطه صورة ولدها ومدايرة اغنيه ليها علاقه بمناسبه ذكرى ميلاده...
هدا كله زاد شد ربيع لإلهام اكثر واكثر...واللي زي ربيع وفي عمره لما يقربوا يوصلوا للخمسين يدوروا ع من يجدد شبابهم ويحببهم في الحياة وممكن هادي وحده من الاسباب اللي خلاته يتاخد بإلهام بهالسرعه..
رقد ليلتها وهويفكر في الهام..وخلانسرين سهرانه مع مخاوفها..
🍃ومخاوف سدرة وخواتها هالايام زادت..الايام الاخيرة من الشهر القمري محرم وحيخش بعد شهر جديد تتجدد فيه معاناة طوبى..
☘عبد القيوم كان خايف ع طوبى خوف كبير..خايف يشوف وجعها وآلامها وجع وآلام المراة اللي يحبها..كيف بيتحملهم!!؟ هو لازم يكون عنده عزم قوي بش يدعمها ويساعدها...وقوة هالعزم قاعد يطلب فيها من الله برجاء وتوسل..
🍃🍃
الحرب قبل دخولها والخوض فيها لازم تندار تعبئة معنويه وماديه للجيش اللي بيحارب..
وهدا اللي حيدير عبد القيوم مع طوبى حاليا..
☘ ☘
طلعت طوبى من الدار بعد ماكانت تغتسل بمية الرقيه..
كانت لابسه بيجامه صيفيه لونها تركواز نص كم طول الفانيليا متاعها لفوف الركبه بشويه بنطلونها كله ورد وكأنه مرسوم بقلم خبر اسود نفسه موجود ع حواف كم الفانيليا وع الصدر مكتوب بنفس الخط كلمة "سعادة" باللغة الانجليزيه..رافعه شعرها الموج كعكه معبثرة وشاده في يدها القفازات اللي كانت لابستهم اليوم ومشت خشت بيهم للحمام..
هدا كله وعبد القيوم في الصاله لاهي بشغله ع اللاب توب ..
