■■■■■■■■■■■■■■■■■■■■
❎تنويه❎
بعض احداث اقسام جزء #منازل_القمر صعبة ومرهقه نفسيا
#طوبى "جنة طوبى"
#جمان_فريد
#الجزء_116"منازل القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 إنني أحب هذا، أحب أن يخطئ الإنسان، إن هذا هو امتياز الإنسان الوحيد على سائر الأحياء، وبهذه الطريقة يصل الناس إلى الحقيقة؛ أنا إنسان، وأنا إنسان لأنني أخطئ وأمتص الخبرات والتجارب من الحياة؛ لعل الخطأ الأصيل، خير من حقيقة تافهة؛ من الممكن دائمًا استعادة الحقيقة، لكن الحياة حين تنتهي، فقد دفنت للأبد.
- دوستويفسكي🍃
________________________________________
واقفه في الروشن تراقب في باب الحوش..
تراجي في شخص معين..وهالشخص واخيرا خش..
مشت بسرعه طلعت من الحوش وقفت في الباب ونادت عليه..
"حمزة"
هو انتفض بفجعه..
خديجه وهي عاقده حواجبها اشرتله يجيها..
وعيونه تشوفلها بنظرات ريبه مشالها..
وقف عليها وهو يقول..
/نعم!
خديجه بنظرات حادة مع رفعة حاجب..
/هات تليفونك..
الولد من خوفه منه عطاها الهاتف بدون تردد..
خداته ومشت خشت للحوش وسكرت في وجهه الباب وخلاته جامد في مكانه..
🍃مشت بسرعه بإتجاة دارها..
خشتلها وسكرت الباب عليها..قامت الهاتف وبدت تكتب في رقم، هالرقم كان لوحده من بنات جيرانهم ماتفرقش عن رقية في حب النميمه..
اتصلت بيها وحطت الهاتف ع وذنها نادى الخط مرتين وانفتح..
"ايوه"
خديجه:ايوه سرور معاك خديجه شنيبه...
🍃ودارت مكالمتها بعدين طلعت من الدار وع وجهها ملامح المكر وصلت في باب الحوش وفتحاته لقت حمزة مقعمز يراجي..
مدت الهاتف وهي تقول..
/تعال خود..
ناض بسرعه وقدملها وخداه منه وهي لفت وخشت وخلتله الباب مفتوح..
حمزة قعد يفتش في هاتفه مالقي في شي غريب توقع انها اتصلت بحد ومسحت المكالمه شافت جهة الباب بنفس نظرات الريبه بعدين خش للحوش..
🍃🍃🍃🍃
"بنعطل اليوم عندي زوز عرايس امشي مع اختك"
مروة بضيق..
/شن فيها كان قعدت في الحوش لين روحتي!
فايزة بحزم:مروة اني قلت امشي يعني امشي..
تنهدت مروة بضيق ومشت طلعت من دار امها تلاقت مع اختها تاله اللي قالتلها..
/قالتلك امشي ولا!؟
هزت مروة راسها وهي معصبه وكملت طريقها لدارها..
ضحكت تاله بعدين مشت لدارها حتى هي..
🌸لما خشتلها شافت للبسه اللي اختارت تلبسها اليوم وبدت تتخيل في رد فعل يزن لو شافها بيها..هو لبس مستور لكن انيق والوانه ملفته بعض الشي
☘وصاحبتها وبنات عمة صاحبتها كانوا يجهزوا للمة في صالون الشقه ديكورات لطيفه وتنسيق حلو خلا منظر الصالون مبهج ومبهر..
وفي الكوجينه سدرة المنتهى ونسرين كانوا مشغولات في تجهيز الموالح وحلو للمة..
والشباب بكبيرهم اليوم كانوا مطرودين لحوش الجد وغداهم حيكون من ايدين سميرة..
☘☘☘☘☘
مرت الساعات وجي وقت صلاة العصر..
بعد الصلاة..
فايزة توجهت للمركز كانت عليها مهمة تزيين وجوه العرايس فقط باقي الشغل ع العاملات اللي عندها..
وبناتها بدوا يجهزوا في انفسهم بش يمشوا للمه..
🌸طلعت مروة من الدار وهي لابسه عابيه وشاربه ع طلعة تاله اللي كانت بكامل اناقتها..
مررت مروة نظرها عليها بعدين قالت..
/حسيتك مبالغه شويه..
احمر وجهها وتوترت بعض الشي وهي تقول..
/لاعادي..
هزت مروة راسها بعدين قالت..
/بري قدامي..
مشت ومروة لحقتها وهي تشوفلها بنظرات شك..
☘☘☘
طلعوا من بوابة الحوش لقوا مروان واقف ع ولد عبد الفتاح قدام حوش الصيد..
لما شاف تاله معاش شاف شي ولاعادسمع شي وولد عبد الفتاح يضحك ع حاله..
اما تاله ولااهتمت لوجوده من الاساس مشت هي واختها بإتجاه حوش محمد شنيبه..
🍃وفي جنان حوش محمد شنيبه..
تحديدا في الجهة اللي ترفع لشقة المهدي كانوا محمد المهدي ومحمد حامد ويزن واقفين مع فرح يهدرزوا..
فرح :ياابني افتح مخك معاي ارجوك..
يزن:ماتحاوليش معاه ماعنداش مخ اصلا..
محمد حامد بتهكم :ياخفة دمك يااخي..
محمد المهدي بإبتسامه..
/اني من رايي يفوت الدوشه هادي ويلهى بقرايته..
ضيقت عيونها وهي تقول..
/مش معقول انت محمد علاش عقلك كبير هلبه هكي تقول شيباني في 50..
يزن:حي كان يسمعك خالك حي..
ضحكوا..
ع جية سدرة المهدي وهي تمشي بسرعه..
خوها الكبير قال..
/وين ماشيه؟
سدرة؛بنفتح لتاله..
جو يزن تعكر بالمرة وبان هالشي في ملامح وجهه..
☘وصلت سدرة في الباب وفتحاته وقعدت وراه..
خشت تاله وبعدها خشت مروة اللي كان تلقى تولي لحوشهم..
سكرت سدرة الباب وقالت بضحكه..
/مروة شن هالمفاجآت!
سلمت عليها سلام حار وقالت..
/نورتينا..
يدوب ابتسمت مروة وهي تقول..
/سلمك حبيبتي..
جت سدرة لتاله سلمت عليها بالخد..
/مش قلتي مش جايه!؟
تاله؛ماما اليوم عندها خدمه هلبه ماقدرتش تقعد بروحها في الحوش..
سدرة بإبتسامه..
/ياهلا وغلا..
مروة بإبتسامه مجامله..
/بيك حبيبتي..
سدرة:تفضلوا تفضلوا..
☘ومشوا مع بعضبإتجاه شقة المهدي..
وهما ماشيين سمعت مروة صوت محمد يتكلم حست بضيق شديد..
اما تاله اللي سمعت صوت فرح بدت ع وجهها ملامح العصبيه..
ويوصلوا فيهم وتشوف فرح وهي تضرب بكفها في كف يزن انصدمت...وشعور الغيرة المزعج سيطر عليها وبان ع وجهها..
☘فرح وهي تأشر ع يزن قالت..
/الوحيد اللي يركب جوه ع جوي..
محمد المهدي:غير توا رايق بس شوفيه لما ينوض عليه البوري معاش يولي عنده جو بش يركب ع جو حد..
يزن عقد حواجبه بسخريه وهو يشوف لخوه بربع عين ومحمد حامد يضحك عليه..
فرح وهي تضحك شافت يمينها جو عيونها ع مروة بمفاجأة قالت..
/مروة!
طول التفت محمد المهدي لما شافها قلبه بدي يرجف..
اما هي تجاهلت وجوده تماما وعيونها قعدوا ع فرح اللي كانت جايه ناحيتها..
سلموا ع بعض سلام حار وعيون محمد المهدي ماتحولتش عنها..
يزن خوه كان يشوفله بضيق تنهد وغير عيونه عنه جو في عيونه تاله اللي عطاته نظرة حاده من فوق لتحت بعدين غيرت عيونها لفرح واختها..
هو استغرب وقعدوا عيونه عليها..
سلمت ع فرح حتى هي بعدين خدوهم هي وسدرة بإتجاه الشقة وعيون محمد قعدوا ع مروة لين درقت عنهم..
بلع ريقه بعدين مشي بيطلع من الحوش بدون مايقول كلمه..
محمد حامد بإستغراب..
/خيره!؟
يزن:فوت..نمشوا للملعب!؟
محمد حامد:هيا...
يزن؛خل نكلم حمزة يسايرنا..
محمد حامد:تحسه قاعد متأثر مهبي وديما ساكت..
يزن بضيق:ربي يكون في عونه..
ومشوا مع بعض ويزن طلع تليفونه من جيبه واتصل بحمزة..
🍃🍃🍃🍃
خش بسيارته في الباحة متاع مركز علاج الاسنان..
درس..لبس الكمامه..بعدين فتح باب السيارة ونزل..
سكرها وتوجه لباب المركز..
🍃🍃
خش للمركز ومشي طول للإستعلامات وسأل عنها..
ليه اكثر من اربعه ايام يكلم فيها وماتردش عليه في الاول فكر ان صاير معاها شي لعند مابعتتله ع الخاص امس وطلبت منه يجيها للمركز..
ولأنه للأسف صاحب شخصيه مغرورة بطبعها وزايده ع هكي مصارحتها ليه بإعجابها بيه توقع انها جايباته بش تفتح معاه موضوع الزواج بطريقه غير مباشرة..
🍃بعد ماخدي معلومه من الاستعلامات انها موجوده مشالها لحجرتها..
وين قرب يوصل فيها تلاقى مع الممرضه اللي تخدم معاها سألها كان عندها حالة هي جاوبت
/ماعندهاش حالات حاليا تفضل.
ابتسم وهو يهز في راسه بعدين مشي للباب دق عليه..
لما اذنتله بالدخول فتح الباب وخش..
🍃هي اول ماشافاته حست بضيق لكن اخفاته بإبتسامه عاديه..
تصافحوا وسألوا عن احوال بعض بعدين قعمز مقابل مكتبها..
عمر:وينك الفترة اللي فاتت انشغلت عليك!؟
منيه بإبتسامه..
/كنت مشغوله بشوية ظروف..
هو قال..
/ان شاء الله خير بس!
بإبتسامه قالت..
/خير خير..
"انخطبت"
قعد يشوفلها بصمت وتعابير وجهه قعدت زي ماهي..
ضحكت وقالت..
/خيرك!
رفع حواجبه وقال..
/تبصري!
هي بضحكه قالت..
/لا والله ندوي جد امس كانت فضاينتي..
نزل حواجبه وقال..
/مافهمتش! قصدك كنتي تلعبي بيا ولاكيف!
اختفت ابتسامتها وعقدت حواجبها وهي تقول..
/نلعب بيك!؟
عمر حمحم وقال..
/اسف مش قصدي..لكن..انتي قبل قلتي انك معجبة بيا!
منيه:وانت قتلي خلينا نقعدوا اصدقاء .
مسح ع لحيته وقال..
/اوك قتلك خلينا نقعدوا اصدقاء بش نزيدوا نتعرفوا ع بعض..
منيه:وتعرفنا ع بعض وحسيت اني مانسابكش ولاوانت تناسبني..
ضحك نص ضحكه بعدين زفر وقال..
/كويس..سهلتي عليا..قبل بنقولك نفس الكلام لكن ماعرفتش من وين نجيبهالك ماكنتش نبي نجرح مشاعرك ونكسر قلبك..
رفعت حواجبها تعجبا..
ناض وهو يشوفلها بإبتسامه كبر بعدين قال..
/ع العموم مبروك وربي يتمم ع خير..
نزلت منيه حواجبها وقالت..
/شكرا والفال ليك..
هز راسه وقال..
/السلام عليكم..ومشي طلع من الحجرة..
هي قعدت بعيونها ع الباب بعدين ضحكت تهكما وقال..
/باهي اللي رجعت لعقلي..
🍃وهذا عمر حتى وان جاه يوم واعترف بأخطائه وحاول يصلح من نفسه طبعه المتكبر مثبت جذوره في شخصيته ع قد مادار وماصار فيه ماقدرش يقلعه لكن ممكن مع الوقت زي ماتخلص من بعض خصاله السيئة يقدر يتخلص من هالخصله الذميمه اللي تخلي صاحبها يقعد وحيد طول عمره لو قعد متشبت بيها..
🍃🍃
وفي ناس مقطوع منهم الرجاء.لايمكن يتعظوا او يتغيروا للأحسن ولو شويه مهما يصير معاهم بل احيانا يزدادوا سوء...
🍃في صالة حوش شنيبه..
كانت رقيه مقعمزه مع سميرة اللي متحمله وجودها بالغصب..
شن جاب رقيه!؟
اللي جابها الخبر اللي انتشر اليوم زي النار في الهشيم..
خبر خطبة محي الدين لإبتسام وفي الحقيقه اللي جابها
ماوراء هالخبر..
خديجه لما عرفت انها جت..لبست وتأنقت وطلعتلها وهي ناسيه تماما الفضيحه اللي دارتها من قبل عشرة ايام..
"خالتي رقيه"
شافتلها سميرة بصدمه وهي خاشه قعدت معاها بنظرها لعند ماوصلت في رقيه وسلمت عليها..
رقيه كانت متعجبه ومستغربه لحالتها وشبه بدت تقتنع ان عقلها خف بالمعنى الحرفي للكلمه..
قعمزت خديجه وهي تقول..
/شن حالك وحال عويلتك!؟
رقيه وهي تمرر في نظرها عليها..
/الحمد لله..شن حالك انتي!؟
تنهدت وقالت..
/حالي..شن بنحكيلك ع حالي ياخالتي..حال المطعون في ظهره..سميرة قعدت تشوفلها بنظرات ريبه..
رقيه شافت لسميرة بعدين ردت نظرها لخديجه وقالت..
/معناها اللي سمعناه حق..
خديجه:ع ولد نجمه وارملة خوه الله لايربحهم هالفاسدين..
سميرة عيونها قريب طلعوا وهي تفنص فيها..
خديجه؛انضحك عليا ياخالتي وغافلوني وياريت اني بس اللي ضحكوا عليها حتى عبد الفتاح الله يرحمه مالا علاش اطلقت اني لما كشفت وساختهم هما الزوز..
سميرة في نفسها قالت بصدمه..
"غبارة مغبرة !!"
رقيه بصدمه:معقوله!
خديجه بدت تنزل في دموعها وهي تقول..
/هددني بصغاري قالي كان طلعتي شي معاش تشوفيهم..
رقيه وهي مصدومه..
/نهار اسود ع رووسهم!!..
سميرة في نفسها..
"النهار الاسود ع راسها هي"
🍃طبعا سميرة ماقدرتش تدخل وتسكتها خوفا منها واستمرت خديجه في الكذب والافتراء ورقيه منصته انصات تام وبش تشبع فضولها سألتها عن ادق التفاصيل..
☘هدا كله صاير ونسرين في شقة خوها المهدي مستمتعه بأجواء ترند اللمه وماخلتش شي ماصورتاش..
مروة حتى هي انسجمت وعجبها الجو وبسبب انشغالها مع البنات سهت عن اختها تاله..
تاله اللي تحججت انها بالمشي للحمام بش تخش لدار الولاد.
🍃برغم انها كانت ترجف من الخوف..
خشتلها وقعدت تمرر في نظرها عليها كانت مرتبه وريحتها حلوة..
جو عيونها ع كرسي شافت عليه شنطة الجلد متاع يزن..
ابتسمت وقلبها يدق بقوة...غيرت نظرها عنها شافت للزيانه لفتت نظرها حديده جلد في اخرها خيوط ينربطوا..
تفكرت انها شافتها في يده اكثر من مرة،خطر ع بالها شي خيالها الوردي الطفولي صورهلها نتجيته الحلوة وهي ع طول بدون تفكير نفدت..
🍃🍃🍃🍃
الساعه 9:00ليلا..
طلعت فايزة من المركز بعد ماكملت شغلها وخلت العاملات يشطبوا ع المركز قبل ليروحوا..
وهي ماشية لسيارتها شافت سيارة فخمه لونها زيتي ومظلمه مدرسة ورا سيارتها..
نزل صاحبها المرش وهو يشوفلها بإبتسامه..
قلبها كاد يوقف من الصدمه قالت في نفسها..
"يعطيك مايرفعك نحساب روحي افتكيت منك!"
سرعت خطواتها وركبت سيارتها وشغلتها وتحركت طول..
وهو وراها...
لحقها لعند ماخشت من فتحة الشارع بعدين مشي..
وهي توجهت لحوش شنيبه بش تكمل باقي السهره مع صاحباتها..
********
سدرة المنتهى:تي كم عمره هدا اللي يدير في حركات المراهقين!
فايزة بقلق..
/هني المصيبه ياسدرة يبان صغير من طور اشرف راجل بنتي.
ضحكت نسرين..
فايزة بضيق..
/تضحكي يانسرين!
نسرين بضحكه:غصب عني والله انتي شوفيلها بمنظور تاني انك قاعده مزة ومهبله الرجاله بجميع الاعمار..
سدرة ضربت نسرين ع ذراعها وهي شاده ضحكتها قالت.
/تقعدي طول عمرك بليده..
فايزة:ع اساس انتي خير منها شادة ضحكتك بالسيف..
قعدت تضحك سدرة..
فايزة:قصدك الموضوع تافه للدرجة هادي يعني اني مهولتها!
حمحمت سدرة وقالت..
/طنشيه تو يمل..
نسرين؛يمل من شني! انتي مستوعبه ان بعد قريب عام كامل حرب ومرض رجع يلحق فيها! يعني عام كامل وهي في باله..
فايزة؛ياحليلي اني وخلاص..عندي بنات ياهمي مرات يديرلي فيهم حاجه..
سدرة:مش تعرفوا واحد عيلته عندها ثقل ونفوذ في البلاد..
فايزة وهي تفكر..
/عيلة ******
سدرة:ايوه اللي ولدهم خشلكم في المشكله اللي حكتيلي عنهامتاع صفاء..
فايزة بضيق..
/لكن بيخناها معاهم وين ماتصير معانا حاجه نكلموهم..
نسرين:معليشي الموضوع خطير مش حاجه تافهه كلميهم كلمي..
رفعت فايزة حاجبها وقالت..
/صار عارفتيه خطير وتضحكي!..
ضحكوا نسرين وسدرة وفايزة تشوفلهم بإمتعاض وقلبها ياكل فيه القلق...
🍃🍃
وقعدت نص ساعة زياده تعشوا مع بعض بعدين روحت هي وبناتها...
🍃وكملت باقي الليل وهي تخمم ومافيش سيناريو اسود ماخطرش ع بالها لعند ماخداها النوم...
🍃🍃🍃🍃
في نفس الوقت..
خش يزن لدارهم وهو يمسح في شعره المبلول بالمنشف شاف خوه متمدد ع السرير وهو حاط يده تحت راسه وباين عليه سرحان..
حرك راسه يمين ويسار بعدم رضا بعدين مش وقف ع الزيانه..
حول المنشف حطه ع جهه وين جي بياخد المشط شاف مكان حديدته لقاه فاضي..
عقد حواجبه بإستغراب وبدي يدور فيها في الادراج مالقهاش..
مش للدولاب لما فتحه دار صوت خلا خوه يستاقظ شافله وقال..
/ع شن دور!؟
التفت وقاله:الحديده الجلد متاعي اللي خداهلي بوي ماشفتهاش!؟
محمد المهدي:لا..
سكر يزن الدولاب بقوة وهو يقول بعصبيه..
/وين مشت!؟
محمد؛بالك راميها في مكان تاني!
يزن بنفاذ صبر..
/تي لا..حولتها بكري ولبست في مكانها القهويه..مشي حط يده ع مكانها في الزيانه وهو يقول..حطيتها هني هني..
دق باب دارهم بعدين سمعوا مرت بوهم تنادي..
"شباب"
ناض محمد قعمز ويزن قال..
/خشي خالتي..
خشت سدرة وهي تقول..
/تتعاركوا!..
يزن؛لاياخالتي حديدتي الجلد هديكا معاش لقيتها..
سدرة:دورت كويس!
يزن؛خيرك خالتي رميتها قدامك لما قلتيلي البس القهويه تمشي مع اللبسه..
ضيقت عيونها وقالت..
/ايه ايه تفكرت..وين بتمشي!
محمد:لما طلعت من الدار سكرتها بالمفتاح؟
حط ايديه في نصه وهو يحرك في راسه يمين نفيا بعصبيه..
سدرة؛معقوله في حد خش الدار خداها!؟
يزن ضيق عيونه وقال..
/كيف يعني قصدكم انخنبت!
سدرةومحمد قعدوا ساكتين وهما يفكروا.
يزن؛من جدكم! شن بيدير بيها اللي بيخنبها حقها مايفوتش ستين جني!..
ع خشة المهدي مرر نظره عليهم وهو يقول..
/اجتماع الامم المتحده!
يزن بضيق؛الحديده اللي شريتهالي راحت يابوي..
المهدي؛تاخد سوك يازعيم..
يزن:شن تقول ياكنج اللي تجيني منك نفرط في روحي ولانفرط فيها..
محمد المهدي..
/خش في جو باب الحارة..
ضحكت سدرة..
يزن بإمتعاض؛غير جيت خوي الكبير بس..
المهدي:ماتكدرش روحك ناخدلك خير منها..
تنهد يزن بضيق..
قربله بوه وحط يده ع شعره ومسح عليه بعدين اشر لسدرة بعيونه تطلع..
سدرة:خلاص ولدي ارقد وان شاء الله غدوة الصبح ندورلك عليها تصبحوا ع خير..
ردوا عليها..
/قدامك كل خير..
المهدي:زي ماقتلك اليومين هادم توصلك اللي خير منها..
ابتسم يزن..
المهدي:تصبحوا ع خير..ولف وطلع...
ردوا عليه ومحمد رجع تمدد ع السرير..
يزن؛معقوله فرح دايره فيا مقلب!
محمد؛توقع بش تستفزك..
يزن؛ان شاء الله يطلع هكي المهم الحديده ماتريحش..
🌸وهالحديده الغاليه ع قلبه بايته جنب تاله اللي كانت تتأمل فيها بإبتسامه لين رقدت🌸
🍃🍃🍃🍃🍃🍃🍃🍃🍃🍃🍃🍃
🍀🍀🍀بعد مرور يومين🍀🍀🍀
الرابع من شهر محرم..
23اغسطس..سنة2020..
..صباح يوم الأحد..
🍃"تهبل تهبل"
تاله بضحكه:سدرة قالتلي قلب عليها الدنيا قلب..
زميلتها قالت:حي عليك! باهي انتي شن بديري بيها؟
تاله بإبتسامه:بنخليها عندي..
زميلتها بريبه:وبعدين!؟
تاله:شريتله غيرهابنهديهاله في مكان اللي راحت..
زميلتها بدهشه:ياجرأتك!
تاله بضحكه:اكيد مش حنعطيهاله وجه لوجه نعرف كيف نوصلهاله..
زميلتها وهي تفكر..
/مش عارفه نحس الحكايه هادي مش حتمشي ع خير ياتاله..
تاله بشي من الخوف..
/اسكتي بلا فال شوم..اني مش قصدي حاجه غلط نبيه يعرف اني نحبه بس..
سكتت صاحبتها وهي تشوفلها بعدم رضا..
وتاله تتأمل في الحديده وهايمه في عالمها الوردي..
🍃🍃🍃🍃
"لما قلت لخالي قالي يادماغ عندك معرض سيارات وتبي من يدورلك سيارة"
اريج بضحكه:حي عليك نسيتيه عبو عليك وصار اللي صار..
غرفه:لامش هكي..لكن ديما نحس ان اللي هدا كله مايخصنيش ومانملك فيه شي..
اريج:انتي بتشريها شري مش واخدتيها بلاش..
تنهدت وغيرت نظرها لطوبى لقتها تشوف للفراغ وسرحانه..
غرفه:طوبى..طوبى..
استاقظت وشافتلها..
غرفه:قاعد راسك يوجع فيك!
حركت طوبى راسها بالنفي بعدين قالت..
/نحس في روحي ناعسه ونبي نرقد..
اريج؛مالكش هلبه نايضه..
طوبى:امس في الليل مارقدتش كويس من الصداع..
غرفه؛باهي تمددي وارقدي..
تنهدت طوبى..وتمددت ع الفراش وحطت راسها ع المخده..
غرفه:ايه حقه بتمشي غدوة للعياده متاع الدكتورة مريم!
طوبى بصوت ناعس..
/كان ولى حالي باهي تو نمشي..
غرفه وهي تشوفلها بقلق قالت..
/ع راحتك
*******
في الكوجينه..
اريج:قصة النوم هادي مخوفتني حسيتها غريبه..
غرفه بقلق..
/كان مامشتش للدكتورة غدوة اني نمشيلها..
اريج:باهي مافكرتيش في احتمال تاني..ان متلا تكون عين ولاحسد..
غرفه:مش كل شي عين وحسد..وبعدين انتي سمعتي الدكاترة شن قالوا وضعها الصحي وضعها النفسي تاعبين هلبه يعني اللي هي فيه مالاش علاقه بالحاجات هادي..
اريج وهي تفكر في كلام غرفه..
/عندك حق..المهم توا نبعدوا جنة عنها ليها يومين ماعندهاش ليها خلوق خايفه يتكرر نفس الشي اللي صار قبل..
غرفه؛في هادي معاك الصغار كلهم من العشيه للعشية نرفعوهم لهاديه كان لاقدر الله صار هكي ولاهكي نخلوهم يباتوا عندها..
اريج بخوف:اها ريتي اللي تقولي فيه طبيعي!؟مش طبيعي بكل..
غرفه؛بري اقري ع اعراض الاكتئاب حاد بري شوفي شن يصير للمريض بالاكتئاب حاد نفس اعراض طوبى بالزبط..
سكتت اريج وهي مضايقه وقلقه لأبعد حد.
غرفه بضيق..
/ياريت لو قدرنا نقعدوا في الخمس اكثر من هكي الله غالب مانقدرش نربط حسين ولاعمي بينا ديما حتى هما عندهم ماشاغلهم..
🍃اصعب شي يحسه الانسان انه يكون عبء ثقيل ولاعاله ع حد..وطوبى هدا كان اكبر مخاوفها..
مابتش تقعد عبء ع سدرة تزوجت الجالي..
ومابتش تكون عبء ع لطفي تقبلت تقعد معاه ع علته وعيوبه..
ومابتش تكون عبء ع اي حد من عيلتها شالت همها بروحها بل شالت حتى همومهم ع صغر سنها..
واللي عشت عمر تهرب منه وتتجنب فيه صار وولت اكبر همهم وعبء ثقيل ع ظهورهم..
🍃🍃🍃🍃
"شوف محلاهم يهبلوا ولا!؟"
مختار وهو يشوف لملابس الاطفال قال..
/اللي يشوفك يقول بتجيبي غدوة مازال شهر ونص..
فاتن بإبتسامه..
/يمروا بسرعه زي مامروا سبعه شهور..
ابتسم ورفع حواجبه ونزلهم..
فاتن:تمشي معاي لبابا بعدين!؟
مختار:لاعندي مشوار لشارع القهوة..
فاتن:شن حالها طوبى!؟
مختار:كانت في رحله نقاهه لمدة اسبوع اكيد في احسن حال..
هزت راسها وهي مبتسمه..
مختار:خلاص يابطه اطلعي قدامي الغدي يراجي فينا.
ضحكت ومشت بتطلع وهو ماشي وراها ويناشب فيها...
🍃🍃🍃🍃
الساعه 6:00مساءا..
طلعت غرفه من الدار وهي لابسه بلوزه لونها بترولي طولها للركبه وتحتها بنطلون اسود عليهم شاربه لونها من لون البلوزة عليها علامه احدي الماركات ولابسه شنطو منماركه الشاربه..
فاتت من قدام دار المعيشه وهي تقول..
/طالعه..
سمعت صوت اريج وهي تقول..
"راك تنسي الجيلاطي"
غرفه وهي تلبس في حذائها الارضي فم الباب قالت..
/باهي..
بعد مالبست حذائها طلعت وتوجهت لسيارة اريج..
ركبتها وطلعت برا الحوش..ومنه طلعت من شارع القهوة كله..
☘شافها ربيع اللي كان واقف قدام مطعمه وقعد مع السيارة بعيونه لين درقت..
غير نظره جهة حوش سدرة لما سمع صوت الباب متاعه انفتح..
شاف تاله طالعه منه ومتوجهه لحوش شنيبه غير نظره عنها وجي بيولي بخش للمطعم ويشوف سيارة مرسيدس خاشه يعرفها كويس لمني..
درست قدام حوش طوبى..لحظات وانفتح الباب ونزل منها مختار..
ع طلعة محي الدين من حوش الصيد..
شافله مختار من ورا النظارات بإبتسامه ومحي الدين بادله الابتسامه ومشاله..
قص الطريق وقعد يمشي لين وصل فيه وسلموا ع بعض بالخد وربيع يشوف فيهم..
لما تباعد مختار عن محي الدين شافله رفع يده وحياه..
رد ربيع التحيةع مضض..اشرله مختار يجيه..
وهو فوق من نفسه مشاله...
🍃🍃🍃
"خشي خشي"
خشت تاله لدار سدرة وهي تقول..
/تو بترجع العطله والكساد..
سدرة:نقروا فيها ورانا امتحانات..
تنهدت تاله بملل وقعمزت..
سدرة بضحكه:درت جيلاطي اليوم راجي شويه ماشيه نجيبه..
تاله وهي تحاول تخفي ربكتها قالت..
/جيبي معاه العصير اللي قتليلي عليه..
سدرة؛ok..
ومشت بسرعه طلعت من الدار..
خدت تاله نفس وناضت ..مشت بخطوات متردده ناحية الباب ومع كل خطوة كانت تفكر تتراجع ومع هذا كملت.
طلعت وهي تشوف هني وهني وسرعت خطواتها لدار الولاد..
وصلت فيها لقتها مفتوحه..
خشت لقت شنطة يزن قاعده في مكانها..
ابتسمت وقدمتلها بسرعه فتحتها وطلعت من جيبها حديده ورساله وحطتهم فيها وسكرتها وبسرعه طلعت من الدار وولت لدار سدرة..
قعمزت وهي حاطه يدها ع مكان قلبها اللي كان يدق بسرعه من الخوف قريب يطلع من مكانه..
🍃🍃🍃
"قالوا خطبت"
محي الدين بإبتسامه..
/ايه بعد اسبوعين الفاتحه..
مختار:ع البركه ع البركه وبيني وبينك طيب فيك.
رفع حاجبه ربيع وهو يشوفله..
كمل مختار يقول..
/بصدق وصراحه وياريت ماتأخذنيش لتوا مش عارف كيف خديت خديجة شنيبه..
ربيع بحمقه؛شن تبيه يقولك توا ينزل في المراة قدامك هادي ام صغاره..
محي الدين غير عيونه للطريق وع وجهه باديه ملامح الضيق..
ضحك مختار ضحكه مستفزة وقال..
/اسف..اسف جدا نسيت بكل انك نسيبهم..
ربيع عقد حواجبه وقال..
/شوف مختار الواحد ع عيون العشرة وايام زمان يحاول يتغاضى ويفوت فارجوك ماتزيدش تتمادى وتوصلنا لمواصيل مايبيها حد..
محي الدين شافله وقال..
/صل ع النبي ياربيع..
ربيع:عليه الصلاة والسلام..
ابتسم مختار وقال..
/انفعالك مبالغ فيه..الباين ياصاحبي كلامي جي ع الجرح..
ربيع قعد يشوفله بنظرات غل وهو عاقد حواجبه..
شاف مختار وقال..
/اني بس كنت نبي نأكد لمحي الدين ان اللي داره كله صح ورد باله يجيه يوم ويندم عليه بالذات بعد الموقف اللي داراته معاي طليقته..
عقد محي الدين حواجبه وشاف لمختار..
وربيع وهو يشوف لمختار بلع ريقه وقال..
/شن دارت..
مختار بإبتسامه الواسعه المعهودة..
/اشبح من وين خدت رقمي وقعدت تتصل بيا عقابات الليل
ربيع بغضب..
/شن تقطف انت!؟
محي الدين بصدمه..
/مختار ردبالك كلامك كبير هلبه!
مختار رفع هاتفه وقال..
/تبيني نسمعكم تسجيل المكالمه!؟
ربيع شاف لمحي الدين بصدمه..
ومحي الدين شاف لهاتف مختار شويه بعدين لف ومشي قص الطريق ركب سيارته وتحرك بسرعه وهو يحرق في العجل..
ربيع بعد ماكان يشوفله شاف لمختار بنظرات كره ممزوجه بالإزدراء بعدين لف ومشي بإتجاه مطعمه..
نزل مختار هاتفه ولف ومشي لباب حوش طوبى وهويقول..
/ايييه..الحقيقة لايحبها احد..
وحط سبابته ع زر جرس الانترفون وضغط عليه...
🍃🍃🍃🍃
درست سياراتها قدامها معرض السيارات..
نزلت منها وهي تمرر في عيونها ع الواجهة واللافته ابتسمت بإعجاب..بعدين سكرت سياراتها ومشت توجهت للداخل..
🍃داخل..
ورا جدار شفاف كان مقعمز ورا مكتبه فاتح قدام لاب توب يتابع في شغله عن طريقه..
رفع عيونه..وجه نظره للشاب اللي يخدم عنده وهو يوري في زبون سيارة..
رد نظره للاب توب ورجع لهي بشغله عليه..
☘فهاللحظه خشت غرفه وهي تمرر في نظرها ع المكان..
قدمت وهي تشوف للسيارات.. كل وحده كانت احلى من التانيه موديلات السنه ومن اشهر الانواع..
وبدت تمر عليهم وحده وحده..
الشاب اللي يخدم في المعرض لاحظها وضعها بالنسبه كان مريب رفع الزبون لمديره بش يكمل معاه اجراءات الشراء وهو مشي لغرفه..
وصل فيها وقال..
/تفضلي ياابله..
شافتله غرفه وقالت..
/تو لو ماتعجبني حاجه نادي عليك..
وردت نظرها للسيارة اللي واقفه عليها..
رفع الشاب حواجبه ونزلهم وهو متعجب وقعد واقف في مكانه يراقب فيها..
وتمر بضع دقائق..طلع فيهم الزبون بالسيارة غرفه التفتت شافتله بعدين قالت..
/الخدمه امورها تمام هني!؟
شافلها بإستغراب..
وضحت تقول..
/يعني حركة البيع ماشيه؟
هو بإستغراب قال..
/تعتبر ماشيه كويس مع الظروف الحاليه.
هزت راسها ومشت تشوف في باقي السيارات..
الشاب توجس منها ومشي طول لمديرة خشله للمكتب وقاله..
/استاذ عدنان..
قام عيونه فيه..
الشاب:في وحده توا خشت وضعها مريب شويه..
عقد حواجبه وقاله..
/مريب!؟
التفت الشاب وشافلها وهو يقول..
/سألتني عن حركة البيع..
عدنان؛ترا حول شويه..
تباعد الشاب عن نظر عدنان وخلا غرفه تبان عليه..
شافها تتفحص في وحده من السيارات قاله..
/قتلي سألاتك عن حركة البيع..
الشاب؛ايه ومن بكري دور من سيارة لسيارة..
ناض عدنان من مكانه ومشي طلع من المكتب والشاب لحقه..
☘وصل عدنان في غرفه وقال..
/السلام عليكم..
التفتت شافتله وقالت..
/وعليكم السلام..
ابتسم وقال..
/عندك طلب معين دوري عليه!؟
غرفه شافت للسيارة اللي واقفه عليها وقالت..
/لاحطيت العين ع هادي..
قرب عدنان للسيارة وبدي يشرح عن مميزاتها ومواصفاتها..
والشاب يشوفله بإستغراب..
وختم شرحه بخبطه خفيفه ع سقف السيارة وهو يقول بإبتسامه..
/عروسه ماشاء الله..
هزت غرفه راسها وقالت..
/كويس.
عدنان بإبتسامه..
/عادي نعرف من تكوني!؟
رفعت حواجبها تعجبا..
ضحك وقال..
/في بالي شي نبي نتأكد منه..
نزلت حواجبها وقالت بجديه..
/اني ارملة عبد الرؤوف بن موسى الله يرحمه..
عدنان بإبتسامه..
/الله يرحمه ويغفرله..باهي انتي جايه تشري ولاتشوفي الوضع..
هي قالت..
/الزوز..
ضحك وقال..
/تفضلي معاي للمكتب..
غرفه؛حتى اني باهي..
غمض عيونه وهز راسه بعدين فتحهم وقال..
/حاضر..
☘وبدي يشرحلها عن وضع المعرض من لما فتحه لليوم..
لاحظ ع غرفه الجديه والفطانه كانت تسأل فيه اسئله بينتله ان عندها خلفيه لابأس بيها..
غرفه؛باهي تمام...شافت للسيارة وقالت..غدوة بإذن الله يجيك خالي يدفع حقها ويستلمها..
عدنان؛من غيرحقها مانبي شي..
غرفه بجديه؛حندفع حقها مش ناقص منه ولاقرش..
ابتسم وقال:براحتك..
غرفه:مشكور..السلام عليكم..
ومشت طول طلعت من المعرض وعيون عدنان مافارقوهاش لين غابت عنهم..
☘ركبت غرفه للسيارة شغلتها وتحركت وهي تقول..
/ووك عليا قاعده نرعش الموضوع مش ساهل بكل ياغرفه..
🍃البدايات ديما صعبه ومع التعود الصعب يولي ساهل🍃
🍃🍃🍃🍃🍃
"راقده فهالوقت!؟"
اريج:قاعده مريضه راهو..
مختار بإستغراب..
/وشن هو هالمرض اللي مابتش تبرا منه لتوا!؟
اريج:اكتئاب المراة مكتئبه..
مختار:قولولها هداكا لم قشيشه وهج برا البلاد..
اريج ودموعها في عيونها قالت..
/بعد شني بعد ماقتلها الف مرة وهي حية وركبها المرض! هو وكل من كان سبب في اللي قاعده تعيشه طوبى توا حينتقم منهم ربي شر انتقام..
عقد حواجبه لما حس بشي من الخوف..هز راسه بعدين قال..
/تمام..نبي نشوف جنه..
اريج:جنة في حوش عمي عبد المطلب تلعب..
مختار:قصدك حوش جدك علي الله يرحمه..
عقدت اريج حواجبها بريبه وقعدت ساكته..
تنهد وقال..
/تمام نجي يوم تاني..
هزت اريج راسها بصمت..
هو لف ومشي طلع من الحوش..لبس في رجليه بعدين لبس نظاراته ومشي بإتجاه الباب الخارجي واريج واقفه تشوفله لعند ماطلع من الحوش..
زفرت بعدين مشت خشت داخل...
🍃🍃🍃🍃
الساعه 7:30مساءا..
خشوا يزن ومحمد حامد للشارع وهما يهدرزوا..
لما وصلوا لقهوة نضال..
شافوا تاله طالعه من الحوش ومروان كعادته واقفلها يراجي فيها..
يزن بعصبيه..
/مش عارف علاش حاس ان في شي بيناتهم نحس فيها تمشي ووتجي ع حوشنا بش تشوفه..
محمد حامد:ماتحطش في ذمتك ياراجل..
يزن وعيونه ع تاله لين خشت للحوش قال..
/لالا اني نفهم فيه الجو هدا قسما بالله لو تأكدت من اللي نفكر فيه معاد مخلي اختي تحاديها ولاتفوت من ركنها..
محمد بضحكه..
/قتلي تفهم فيه الجو هدا!؟ ورب العزه ماتفهم في حاجه ياراس القلعاوي تاله معجبه بيك انت..
توسعوا عيون يزن بصدمه وهو يشوف لمحمد..
محمد:ملاحظها كيف تشبحلك ولا لما تشوفك مع اختي فرح كان تلقى تضربك وتضربها..
هني جي بين عيون يزن نظراتها ليه يوم اللمه..
كمل محمد يقول..
/ماكنتش نبي نقولك بكل عارفك كيف تفكر لكن لما لقيتك بتظلم البنت ماقدرتش نسكت..
عقد يزن حواجبه وقال..
/معاش تدوي معاي في الحاجه هادي ورد بالك تطلع منك لحد..
ابتسم محمد ع جنب وقال..
/تم ياقلم..
مشي يزن بإتجاه الحوش ومحمد لحقه وهو يضحك بصمت..
🍃🍃🍃
في شقة المهدي..
طلعت سدرة من الدار بعد مافاقت من النوم الحمل مخليها ترقد ساعات طويله احيانا..
خشت للكوجينه طول بش تبدا بالعشي..
ع خشة يزن للشقه..مشي طول لدارهم هو وخوه..
جي لشنطته بش بيطلع منها ملخص فيه اجوبة الأسئله الاسترشاديه ناوي يعطيه لولد يقرا معاه بش يصوره..
فتح سوستة الشنطه وتبان عليه اسوارة جلد وتحتها ورقة محطوطات فوق الكتابات..
ابتسم من قلبه..توقعهم من بوه..
خدي الاسوارة والورقه..فتحها..
وهو يقرا فيها تبدلت ملامح الابتسامه ع وجهه للصدمه..
(هادي مني في مكان اللي راحت..
....تاله)
#منازل_القمر
#طوبى
...يتبع....
