#طوبى "جنة طوبى"
#جمان_فريد
#الجزء التاسع_والسبعين "مالكش حق..الاخير"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
🌙رمضان مبارك🌧رمضان الدعاء🌙
قال صَلَّى اللَّهُ عَلَيْهِ وَسَلَّمَ : (الدُّعَاءُ هُوَ الْعِبَادَةُ) رواه الترمذي
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 «أنت المحيطُ الّذي أوردتهُ سُفني
أنت البلاد الّتي أسميتُها وطني!»🍃
___________________________________________
ردة فعل عبد القيوم ادهشت الحاضرين..
واندهاش نضال منعه يدير اي ردة فعل..
عبد القيوم وهو يشوف للجالي كيف طايح ع الارض وراسه ليها وهو جبهته قاله بإزدراء..
/لاتحشم ولاعندك دم ولافيك نخوة خزي ع التريس اللي هك...
غير نظره عنه ووجهه لعبد الرؤوف وحسين وهو يقول..
/عدوا شوفوا حالكم ولاتعالوا معاي للشقه..
الزوز قعدوا يشوفوا للجالي بكره وإزدراء بعدين مشي حسين بإتجاه حوش المهدي..
اما عبد الرؤوف لف بيمشي لحوشه..
عبد القيوم وين جي بيلحق حسين..
ناضله الجالي وجاه بسرعه وجبده من كتفه وهو يقول..
/تعالى هني ياكلب..
وجي بيصفعه ع وجهه شده عبد القيوم وضربه بقبضه يده التانيه ع وجهه..وبدوا يضاربوا الزوز..
حسين ماباش يدخل كان يبي الجالي ياكل ع راسه..
لكن عبد الرؤوف ونضال وشباب من الشارع منهم التونسي وخو ربيع قعدوا يحزوا فيهم عن بعض..
🍃في عز هالعركه القائمة..
نساوين حوش الواعر كانوا واقفات ع روشن المخزن المردود ويتفرجوا ع العركه..
فردوس وبناتها ومطيره..
لكن غرفه قاعده لوطا حدا صغارها..
وطوبى مقعمزه في الجنان ع الكرسي وهي تسمع في الدوشه وكانت في قمة الخوف والضيق والقلق..
🍂حتى اميمه وامها كانوا في الجنان يسمعوا والزوز خايفات ع حسين..
🍃وبرا بعدوهم عن بعض وكل مجموعه شاده واحد وبدي الجالي بالتهديد..
/والله نرقدك في حوش خالتك ياتارقي والله ندمك عليها لأخر عمرك ياكلب..
عبد القيوم وهو في عز الغضب دار صوت بفمه وبعدين قال..
/طز...
هز الجالي راسه بوعيد ودف عنه اللي كانوا شادينه..ومشي لسيارته وركب وهو يقول..
/تو نوريك ياتارقي ياكلب..
وشغل السياره وتحرك وهو يحرك في العجل..
🍃مطيره:مشية الحصان لفزان ياالله..
فردوس:ماريتش احقر منه في حياتي..
اريج:خل ننزل نشوف خالتي..
ومشت بسرعه طلعت من الدار وامها لحقتها..
الاء وهي مازال تتفرج..
/برد ع قلبي التارقي..
مطيره؛مانا اني شن نقول لولا العيب والحرام راني نزلتله كبيت ع راسه..
🍃وفي الجنان..
طوبى شافت اريج وامها جايات شبحتلهم بخوف وقالت..
/شن صار ضربه حسين!؟
اريج؛لالا ماتضاربوش هو وحسين التارقي هو اللي عطاه طريحه ماكنه..
طوبى بصدمه..
/وشن دخله هدا!!؟
اريج:اشبح هداكا الكلب شن قال من الكلمه لان الراجل كان يحز في حسين ورؤوف عنه فجاة التفت وعطاه فرخ دماغ..
عضت طوبى ع شفها السفلي بخوف..
فردوس:هو جي بيمشي بعدين لكن هداكا ناضله زعميته بيضربه ويحصل طريحه مقومه..
طوبى بقلق؛وبعدين؟
اريج؛حزوهم عن بعض وهداكا انتلف بسيارته..
طوبى بخوف:بيمشي يشكي فيه..
فردوس:اكيده هدا اللي يقدر عليه هو..
طوبى بنرفزة:تي غير شن دخله بس شن دخله! تي هو من قبل مش طايقه..خبطت بيده ع فخدها وقالت..
لاحول ولاقوة الا بالله..ااه ياربي ااه وخلاص..
فردوس بقلق:خلاص هدي روحك مش باهي ليك عصاب..
طوبى بقهر..
/إنا لله وإنا إليه راجعون حسبي الله ونعم الوكيل...
وقفت خبط بعدين طلعت تليفونها من شنطتها وهي ترعش..
واريج وفردوس يشبحولها..
فردوس:من بتكلمي؟
طوبى بتوتر:شويه بس يافردوس..
وحطت تليفونها ع وذنها..
🍃في جنان حوش المهدي..
حسين؛ينصر دينك ويسلموا ايديك ياتراس..
عبد القيوم وهو مقعمز ع الكرسي كان يشوف للفراغ بغضب وهو يتنفس بسرعه..
عبد الرؤوف:مروا عليا اشكال الوان في حياتي بوساخة هالبنادم ماشفت..
اخ ربيع:مش طبيعي راهو..
شبحوله حسين وعبد الرؤوف وعبد الرؤوف قام عيونه وقاله..
/شن قصدك؟
:من يوم الحضره ركزت عليه تصرفاته غريبه شويه بالصدفه ريته واقف في تركينه في جنانهم يدوي مع روحه بالكلام والحركات نحسابه يتكلم في الهاتف في الاول راهو..
حسين قعد يفكر في كلام اخ ربيع..
اما عبد الرؤوف شاف لعبد القيوم والتاني بادله نفس النظرة..
:وبعدين في الحضره كان زي المتخوخم هما يقولوا مسحور مش عارف..لكن اللي متأكد منه انه مش طبيعي..
ويجي الاتصال لعبد الرؤوف..
طلع تليفونه من جيب سرواله وشاف المتصل..بعدين تباعد عليهم وفتح الخط ورد..
/ايوه..
"شن صار ياعبد الرؤوف؟"
هو قال؛ماصار عركه وانحزت..
"مش هدا حدها راهو الجالي يكره التارقي في الدم بيدير فيه زي مادار في حسين واحرف"
التفت عبد الرؤوف وشاف لعبد القيوم اللي كان يشوفله..
"اني كان نعرف هو شن حشره شن علاقته علاش يضرب فيه وصل فيه هو"
تنهد وقال؛قال دوة مايتحملها حد..
"وصل فيه!"
عبد الرؤوف:لا ماوصلش فيه لكن الدوة اللي قالها ياطوبى ..
قاطعاته وقالت..
"سامحني عبد الرؤوف شن ماقال مادام ماوصلش فيه مايدخلش مش ناقصين وجع راس رانا"
عبد الرؤوف عقد حواجبه وقال..
/خلاص توا اللي صار صار..
"ع قولتك لكن توا اسبقوه انتم وتصرفوا قبل لهو يدير حاجه"
هو قال:مافهمتش..
"ارفع حسين ومعاكم التارقي وخلي حسين يشكي في الجالي ع اساس انه اعتدي عليه بالقذف والسب والشتم وانتم شهود عليه وخلوا الحق عليه هو..وبما انه هو حيشكي حيكون محضر بمحضر.."
رفع عبد الرؤوف حواجبه وهو متفاجئ..
هي قالت..
"اني مانعرفش كان هدا ينفع ولالا انت ادرى المهم انتم تصرفوا واسبقوه وانت تقدر ياعبد الرؤوف"
ابتسم بتعجب:تمام تمام تو نشوف الموضوع..
"وبالله طمنا وقوللنا شن يصير"
هز راسه وقال..
/حاضر...حاضر..ان شاء الله..
"السلام عليكم"
هو قال..وعليكم السلام..
وسكر وهو يقول..
/فول مقسمومه ع زوز..
ضحك ضحكه خفيفه بعدين ولى للشباب...
🍃🍃🍃🍃🍃
الساعه 7:30مساءا..
في الطريق..
كان هو وياها في السياره..مرة مرة يسرقلها في النظرات وهو مبتسم..
