#طوبى "جنة طوبى"
#جمان_فريد
#الجزء_الثالث_والتسعين"خريف"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)٦ 🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 في زمن الحرب....
لايمكن ان نكتب النهايه....
ولكن سيكتب التاريخ دوما ان ماكينه الحرب لاتطحن سوى الابرياء🍃
_________________________________________
الساعه 8:30مساءا..
في جنان الحوش من الخلف..
كان مقعمز جنب الشلال يتفرج ع المية وهو يفكر..
تفكير مادام وقت طويل..ناض ومشي بإتجاه دروج شقة خوه الكبير..
وصل فيهم وركب...
🍃داخل الشقه..
كان يزن مع اخته سدرة يرتبوا في كتب امهم ويحطوا فيهم وسط صندوق..
دق باب الشقه..
سدرة:اني تو نفتح..
ومشت بسرعه بتفتح الباب...
ويزن بعد ما نزلت منه دمعه مسحها طول..
"شن ديروا"
ابتسم لما سمع صوت عمه نضال..
سدرة:نحطوا في كتابات امي الله يرحمها في صندوق..
نضال وهو خاش معاها للصالون..
/علاش شن بديروا بيهم..؟
سدرة:ابلة طوبى قالت تبيهم..
ابتسم نضال ووقف ع الطاوله وهو يشوف للكتب..
يزن؛شن جو عمي..
شافله وقال:تمام..غير نظره لسدره وقال..طلبتهم منك امس؟
سدرة:ايه..
نزل عيونه للكتب بعدين عقد حواجبه وقال..
/حلوة حفلة امس؟
شافله يزن..
سدرة:امم حلوة..
رفع عيونه فيها وقال..
/زحمه؟
سدرة هزت راسها وهي ساكته وتراجي في السؤال اللي بعده..
السؤال نفسه اللي كان حاس يزن ان عمه يلف ويدور عليه..
بس عمه ضبط نفسه في اخر لحظه وتراجع عنه..
نزل عيونه للكتابات مرة تانيه وبشي من الربكه..خدي زوز كاتبات واحد منهم فلت من يده وطاح..
نضال:ايااح..
حط الكتاب التاني في الصندوق..بعدين طبس بياخد اللي طاح..
كان مفتوح ع ورقه بيضا مكتوب عليها..خدي الورقه وقراها..
(اللهم عاف قلبي من التعلق بغيرك)
الدعاء مس شي في داخله..اثر فيه..
رد الورقه وسكر الكتاب وشاف غلافه...قري اسمه..
《روضة المحبين ونزهة المشتاقين》
وقف ع حيله وعيونه يقروا في الغلاف..
وصغار خوه يشوفوله..
يزن:تبيه؟
قام عيونه في ولد خوه قعد يشوفله للحظات بعدين قال..
/عادي ؟
يزن بضحكه؛شن تقول! عادي ونص..
ابتسم نضال وقال..
/منور ياسيدهم..
ابتسمت سدرة وقالت..
/نتصل بيها نقولولها جايك..
يزن وهو يسكر في الصندوق قال..
/بسرعه..
نضال؛بعدين تعالوا تعشوا معانا..
بدت ع وجه يزن ملامح الضيق..
نضال:يزن ع خاطري..
هز راسه موافق ع مضض..
ونضال قال:اني نازل..نراجي فيكم مش متعشي لين تجوا..
ومشي من حداه..
وخلاه مضايق ع الاخر..مش طايق يقعد في حوش عاش فيه الوجع اكثر من اللحظات الحلوة..
🍃🍃🍃🍃🍃
ع كرسي اسود جلد النوع اللي يفضله..
كان متمدد يقرا في كتاب..وفي جنبه مق شراب "مليسه" يشرب منها مرة مرة..
"مساء الخير"..
اشرلها بيده تقعمز ع كرسي مقابله..
مشت بشي من القلق وقعمزت ع الكرسي وهي تشوفله..
نزل الكتاب وعدل جلسته ..بعدين حول النظارات ومسح عيونه وهو يقول..
/ماتخافيش..
صابرين؛مش خايفه منك..خايفه من اللي بتقوله.
بإستغراب سأل..
/كيف؟
صابرين:نقصد خايفه تكون جايبلي خبر سو..
حرك راسه بالنفي بعدين حط الكتاب جنبه وقال..
/بنحكي معاك في موضوع...شبك ايديه في بعض وقال..موضوع زواج..
فتحت عيونها ع وسعهم بصدمه وهي تشوفله..
مختار:امم..شني؟
صابرين بعدم استيعاب..
/ليا اني؟
مختار:مش عارف بالك لأمينه وفتحته معاك انتي بش تقنعيها!...مالاشنو ياصابرين ليك انتي..
صابرين بعدم فهم..
/انت قبل قلت اني يعني!
مختار:قبل بس توا تغير الوضع وانتي جاتك فرصه ماتتفوتش..خطيبة رضا..خالها..ايهم تتفكريه ؟
تفاجئت صابرين لما عرفت ان ايهم خطبها وهي قبل كانت واخده عنه فكره خلتها مستبعده الحاجه هادي..
مختار:اني اجبار مش حنجبرك..لكن بنقولك واضح ان الراجل حابك حق..وهو راهو انسان ناجح في حياته ووضعه المادي ممتاز وفوق هكي شخص منفتح ومن عيله متحضرة يعني ماتخافيش منهم..
صابرين بجديه:لو هكي فعلا لازم يعرف عني كل شي..
مختار:تبيه يعرف اللي كان بينا! اني ننصحك ماتخبريشي..تعرفي علاش!؟ لأني توا حنكون بمتابة الاخ الكبير ليك الخال العم..يعني عيلتك لازم يشوفني ديما بهالصورة بش يديرلك قدر فاهمه عليا..
صابرين فكرت شويه في كلامه بعدين قالت..
/مانضمنش رضا ..
مختار:من سابع المستحيلات يطلع شي اني نبيه يقعد مدسوس..ريحي بالك من ناحيته..
صابرين؛يعرف؟
مختار:وفرح وبارك..انفتح الموضوع قدامه اساسا..
بدت ع وجه صابرين ملامح الألم مع الغضب..
ومختار ضيق عيونه وهو يشوفلها..
تنهدت بعدين قالت..
/عطيني وقت نفكر..
رخي عيونه وقال:براحتك...بري..
ورجع لبس النظارات..بعدين خدي الكتاب وتمدد ع الكرسى..
وولى يقرا من وين ماوقف..
وصابرين ناضت وسيباته وهي مخنوقه..
هو بدي يدندن..
/جبار...في قسوته..جبار..
وخدي مق المليسه وشرب منه...
🍂🍂🍂🍂🍂🍂🍂
وبعيد عنه في دوله مجاورة..
كانت اختها مقعمزة مع خطيبها في حديقه المستشفى يحكيلها وتسمعله..
اياد:مهند تزوج لكن ماتوفقش في زواجه وبعدين جاته فرصة عمل في بلاد عربيه..في قناة ليبيه غادي سافر
سدرة بأسف:خسارة..ربي يفتح عليه
اياد ابتسم وقال..
/آمين..بعدين تنهد وقال..وقعدت بروحي بطولي في حوش كبير يبي حسك فيه بش يولي فيه روح
هربت بعيونها عنه..وهي حاسه بضيق شديد..
وتسأل في قلبها..
كيف درتها ووافقت عليه! شن خلاني نوافق!؟معقوله نفس السبب اللي خلاني قبل نوافق ع الفاندي!..معقوله رجعت تعاركت اني وعيشه بسبب المهدي!؟..في شي مش واضح..
جية المهدي مع نسرين..بعدين اختفوا بكل!!
"سدرة"..
وجهت نظرها ليه بفزع..
هو قال:اسف..
سدرة؛نعم؟.
اياد:سدرة زي ماقتلك اني راجيتك ومازال بنراجيك..اني خديت اجازة طويله..4شهور بنقعد هني حداك ماعندي شي اهم منك..
سدرة:بتقعد..تراجي..وتعاني..شن جابرك؟
اياد بإبتسامه:مايقولوش نعاني..يقولوا نحب..الحب مش كلام ومواعيد..ولحظات حلوة يعيشوها زوز مع بعض..الحب وقت الشدة يكون حلو اكثر يبان اكثر..اني لما نرد بالي عليك ونرعاك ونقعد جنبك لين تشفي وتولي كويسه هدا اسمه حب مش معاناة....
هو يتكلم وهي تفكر في كلامه اللي كان حلو بالمرة ويخش القلب..القلب اللي ذاكرته جابتلها ذكرى ع قد ماكانت صعبه كانت حلوة في نفس الوقت..
🍂🍂🍂قبل سنوات🍂🍂🍂🍂
سنة 1995...
في حوش لطفي الواعر اللي كان مليان بالجارات جايين يوقفوا مع وردة في محنتها بعد مانزلت عليها مصيبة مختار وتلحقها مصيبة حبس راجلها
سدرة في وسط الحوش تتفرج ع حالة الصدمه اللي كانت فيها امها وهي غضبانه وموجوعه وحاقده ع اللي كان السبب ودموعها مابطلوش نزول
تسمع في الهمز واللمز..وتسمع في كلمات المواساة اللي كانت توجع اكثر..
وحواليها صاحباتها عائشه وفايزة يشوفولها بحزن وقلة حيلة مش قادرين يديرولها شي..
ع جية نسرين قعمزت قدامها وقالت بصوت منخفض..
/اطلعي للمهدي..
شافتلها ودموعها في عيونها..
نسرين بحزن؛يبي يكلمك..
هزت راسها..وناضت ومشت طلعت من الصاله ومنها من الحوش...
قعدت دور عليه في الجنان بعيونها لين شافاته واقف جنب الدرجيحه يشوفلها بعيونه الملهوفه والحزينه ع حالها..
مشتله وهي منزله راسها..حاسه بالخزي...
وصلت فيه ووقفت قدامه وراسها فالارض وقالت بنبرة مخنوقه..
/نعم..
المهدي:سدرة ارفعي راسك..
غمضت عيونها بشده وبدت تبكي..
المهدي بوجع..
/سدرة...بطلي بكي واشبحيلي..
سدرة بنبرة باكيه..
/مانقدرش .
المهدي:علاش.
سدرة:اللي داره مختار يقصر الرقبه..
المهدي بحزم..
/ارفعي راسك..ارفعي راسك توا..
رفعت راسها بالشويه وهي مغمضة عيونها بشده..
المهدي بوجع:سدرة اللي صار مايقدرش يمس سمعتكم ولاينزل من قدركم..حتقعدوا عيلة الواعر اللي الناس تشهدلهم بطيب اصلهم وافعالهم وخيرهم اللي واصل في هلبه ناس..
غلط مختار يتحاسب عليه بروحه..وانتم لااول ولااخر ناس يصير فيهم هكي..سدرة افتحي عيونك..راك قاعده في عيوني زي ماانتي..يخي كان مازدتي كبرتي..
فتحت عيونها المدمعه وهي تشوف لعيونه..
ابتسم من قلبه وقال..
/ااه منهم هالعيون..
نزلت عيونها هالمرة خجلا ووجهها اكتسي باللون الاحمر..
ضحك بعدين قال..
/صدقيني كله حيعدي والناس مش حتتفكر منكم كان الباهي بس..اما اني نقعد عمري كله حاطك ع راسي من فوق..
لمح ابتسامة صغيره ع وجهها قبل لتمشي وتخليه..طلعتله بشكل ورجعت بشكل تاني..الشعور الحلو اللي حسسها بيه زاد قواها ..
🍂🍂🍂في الوقت الحاضر 🍂🍂🍂🍂
استاقظت من تفكيرها بالماضي لصوت الحاضر اللي قلبها مايبيش يرجعله...
🍃وصاحب قلبها بعيد عنها..
مقعمز في جنان الحوش من القدام بروحه وهو سارح بفكره في وضع ولد اخته اللي لازم يندارله حل..
تنهد بضيق..ومرر نظره ع الجنان...لين ثبت ع مكان فاضي زمان كان فيه طاولة سعف وكراسي...
وهما الاربعه مقعمزات عليه..وهو في نفس المكان اللي مقعمز فيه كان يسقي الغرس ويشوفلها وهي تتكلم
🍂🍂🍂قبل سنوات🍂🍂🍂
في الصيف..
كان دور نسرين في اللمه اللي يديروا فيها كل اسبوع
مقعمزات يشربوا في "اللوقا" المصقعه وهما يهدرزوا..
سدرة وقتها كانت لابسه تيشرت وردي وسروال امريكاني"جينز"..ولامه شعرها ذيل حصان عاكسه عليها الشمس مخليتها تبرق في عيونه..
نسرين؛شرطي مادخليش بيك بتغني يعني بتغني..
فايزة:خلاص سدره عاد اللي اوله شرط اخر سلامه..
سدرة بنرفزة:باهي ضموا فامكم..
ضحكت عائشه
وهو ابتسم..
غمضت عيونها وحمحمت وبعدين فتحتهم وبدت تغني..
🍂حبيتك تانسيت النوم..ياخوفي تنساني..
حابسني برات النوم..وتاركني سهراني..
انا حبيتك حبيتك..انا حبيتك حبيتك..
وقعدوا فايزة ونسرين يردوا وراها..
وعائشه تشوفلهم بإبتسامه..بعدين ردت نظرها لسدره لما كملت تغني..
🍂ياخوفي ابقى حبك..للأيام اللي جايي
واتهرب من نسيانك..ومااطلع بمرايي
حبسي انت وحريتي وحريتي انت..
انت يلي بكرهوا ويلي بحبوا انت..
ياريت ماعشقت وحبيتك..انا حبيتك..
حبيتك..
🍂🍂🍂وهو في الوقت الحاضر كمل يغني بصوته..
انا حبيتك..حبيتك..
ابتسم بألم وقال..
/حتى لو نصيبك مش فيا قلبي مش حيرضى بغيرك لين نموت ولافي مراة تخش حياتي مرة تانيه غيرك..
🍃🍃🍃🍃🍃🍃🍃
"ولاريب ان المحبوب احلى في عين محبه واكبر في صدره من غيره وقد أفصح بهذا القائل في قوله:
ف والله ماادري أزيدت ملاحة
وحسنا على النسوان أم ليس لي عقل"
ابتسم نضال وهو يقرا في هالجزئيه من كتاب روضة المحبين ونزهة المشتاقين لإبن القيم الجوزيه اللي خداه معاه لعالم تاني..
وكأن كان محتاج يقرا هالكلام...محتاج هلبه..
🍃وطوبى اللي عايشه حتى هي في عالم ابن القيم الجوزيه مع كتاب الداء والدواء..
عجبتها جزئيه لما قرتها لمست قلبها..
خدت تليفونها وكتبتها ع صفحتها ونزلتها..
(ولا شيء على الإطلاق أنفع للعبد من إقباله على الله، واشتغاله بذكره، وتنعمه بحبه، وإيثاره لمرضاته، بل لا حياة له ولا نعيم ولا سرور ولا بهجة إلا بذلك.
ابن القيم | الداء والدواء)
🍃🍃🍃🍃🍃🍃🍃
بس كان لمختار اختياراته المختلفه فوت الليل كله وهو يقرا في روايه "رسائل تحت الارض" لديستوفيسكي الروايه اللي قراها اكثر من 5مرات في حياته وكان يعيش في عالمها ويتخيل في نفسه البطل متاعها..
وتقطع عليه فاتن انسجامه لما تبعتله رساله..
خدي تليفونه من ع الكامدينو وفتح الرساله وقراها..ابتسم بعدين دار الهاتف ع الصامت ورد لمكانه ورجع لديستوفيسكي...
🍃🍃🍃🍃🍃
وفي ليله نفسها..
كانوا العرسان سهرانين في صالة الألعاب اللي تصمم ديكورها ع ذوق العروس.
كانوا من المفروض يتفرجوا ع فيلم رومانسي ع الشاشه..
لكن اريج اللي دارت مقين شاهي اخضر خفيف خلتهم يلغوا فكرة مشاهده الفيلم..
وكملوا ليلهم كله هدرزة وضحك وحكاوي عن الذكريات الحلوة..
اسكندر كان غارق في تفاصيلها ضحكتها طريقة كلامها حركاتها العفويه...
اما هي ماتغير فيها شي...مرتاحه وحابه حياتها معاه بس..
🍃🍃🍃🍃🍃
مرات الحب مايكونش اساس لحياة مستقرة وهاديه..
التفاهم والانسجام والاحترام اهم..
وهادي كانت نصيحة امينه لصابرين..
☘امينه؛الشب قمر ودمه خفيف وحتعرفي تعيشي معاه مرتاحه صدقيني..دي فرصه ماتتفوتش ياصابرين فكري في مصلحتك يابنتي..مصلحتك في الجوازة دي..
صابرين وهي تفكر في كلامها قالت..
/صح..المصلحة فوق كل شي..كل حد مايدور كان ع مصلحته وحتى اني نبي مصلحتي..
امينه وهي تشوفلها بقلق دعت في نفسها..
"ربنا يجيب العواقب سليمه"
🍃🍃🍃🍃🍃🍃
المصلحة..
ونجاة ديما تسعى ورا مصلحتها بعد ماشدت شقتها لفترة منها الا لشغلها ولمدراس صغارها..قررت اليوم تنزل لحوش العيله وتشوف الوضع كيف صار بعد اسبوع من جية سميرة..
🍀3ابريل...سنة 2019..
يوم الاربعاء...
الساعه 2:00بعد الظهر..
خشت بصغارها للحوش..
هما سبقوها يجروا لين وصلوا للصاله وخشوا..
وهي خشت بعدهم..
لقت مغليه مقعمزة بروحها تتفرج ع التلفزيون..
بعد ماسلموا عليها الصغار..سلمت امهم..
وكان سلام مغليه بارد ومانبيش تشوف حتى بالغلط في وجه نجاة..
قعمزت نجاه وهي تقول..
/شن الوضع عمتي..
مغليه؛وضع شني!؟
نجاة:قصدي هديكا شن دايرة؟
مغليه:شي..
سكتت نجاة لما حستها مش طايقه تتكلم معاها..
غيرت نظرها عنها للشاشه بعدين رجعت شافتلها وقالت..
/معاش كلمكم عمر؟
مغليه؛لا..
نجاة في نفسها..
"لوا وخبطة ع ستين وطا"
معاذ:مية..
نجاه لقتها فرصه بش تمشي للكوجينه تشوف سميره..
ناضت طول وقالت..
/تعالى ماما..
ومشت وهو يتبع فيها..
جوري:حنينه نبي سبيستون..
مغليه برفعة حاجب..
/في شقتكم مش هني..
شافوا جوري وحمزة لبعض بضيق بعدين غيروا نظرهم للشاشه..
🍃في الكوجينه..
كانت سميره مقعمزة تكلم في وحده من خواتها هاتفيا..
شافت نجاة خاشه رفعت حاجبها وقالت..
/نقولك حاجه اني توا حاصله في الغدي لما نفضى نكلمك...بالسليمه..بالسليمه...ونهت المكالمه وحطت تليفونها ع الطاولة وهي تشوف لنجاة برفعة حاجب..
نجاه وهي تشرب في ولدها قالت..
/شن حالك؟
سميره؛قبل لتخشي كنت كويسه..
شافتلها نجاه برفعة حواجب..
سميرة:اسمعي حبيبتي ومن الاخير..انا لاطايقه نشوفك ولانسمع بسيرتك من اصله ياريت ماتطلعيش قدامي بكل تمام..
نجاه؛خيرك اللطف خاشه فيا هجوم هكي! امتى عرفتيني انتي بش تكلميني بالاسلوب هدا!؟
سميرة:صيتك الباهي سابقك ياحنه..
نجاه بحده؛اسمعي تكلمي بإحترام وماتخلنيش نغلط فيك..
ناضت سميره وقالت..
/جربي اغلطي وشوفي عمك الحاج شن يدير فيك..ورفعت حاجبها بمكر..
نجاة خدت ولدها وهي حامقه ومشت طلعت من الكوجينه..
سميرة:سحيقة لهالخليقه..
🍃وتخش نجاه للصاله بولدها وهي تقول بعصبيه..
/الشوارعيه هادي جت امس وبدت تحكم وتطلق..
مغليه عقدت حواجبها وقالت..
/خيرك!؟
نجاة:الشوارعيه اللي مش عارفه كيف عمي بدلك بيها تلز فيا من الحوش.!وكأن الكلمه ولت كلمتها..
ناضت مغليه وهي معصبه ومشت طلعت من الصاله..
ونجاه معاها بعيونها اللي نظراتهم كلها مكر..
🍃خشت مغليه ع سميرة وقالت..
/من انتي بش تلزي كنتي من حوشي!
سميره بإبتسامه عريضه.
/لامالزيتها ياضريرتي اني قتلها مانبيش نشوف وجهك يعني تشد تركينتها وماتورنيش وجهها..
مغليه؛نجاه كنة الحوش هدا تخش فيه وتطلع زي ماتبي..
سميرة:معلوم..تخش فيه وتطلع زي ماتبي..
مغليه بعصبيه:شن قصدك!
سميره:ماقصدي شي ياغاليه..وحاضر زي ماتبي تخش وتطلع في الحوش زي ماتبي..
مغليه شافتلها من فوق لتحت بعدين مشت طلعت من الكوجينه..
سميره بصوت منخفض قالت..
/يااني ياهي..
🍃🍃🍃🍃🍃🍃
وفي الحوش اللي مجاورهم..
كانت صفاء طالعه بكيس القمامه للجردل اللي في الجنان..
وين وصلت فيه وحطت الكيسه..سمعت صوت راما وهي تقول .
"نحبك"
قربت ناحية مصدر الصوت..بانت عليها واقفه شجرة زيتون وشافتها وكأنها تقرب في التليفون من فمها وتبوس فيه بعدين رداته لوذنها وقالت..
"تريحت هكي مودي."
وخرت كم خطوة وولت بسرعه للكوجينه وهي تقول بقرف..
/ماتمشيش معاه الا الاشكال هادي مروة هلبه عليه...
🍃ومروة ..
في الشقه دير في الغدي ليها ولأختها اللي خشتها تجري بالتليفون وهي تقول..
/هاك تليفون مناسك تتصل ..
خافت مروة وخدت التليفون..
فتحت الخط وردت..
/ايوه.. جاها صوت مناسك وهي تعيط وتبكي وتقول..
"بابا مات يامروة بابا مات"..
وفصلت المكالمه بعد ماخلت مروة جامده في مكانها والدموع تلقائيا نزلوا من دموعها..
تاله بخوف..
/خيرها!؟
🍃🍃🍃🍃🍃
"لاحول ولاقوة الا بالله..خلاص ياماما وتي روحك شويه وجايه"
ونهت المكالمة مع بنتها وخدت حاجاتها ووصت العاملات عندها..بعدين طلعت من المركز تجري لسيارتها..
🍃وصلت للحوش بعد ماتلفت اعصابها من الزحمه..
نزلت مروة تجري ركبت السيارة وهي تبكي وتقول.
/بسرعه ياماما..
فايزة بقلق..
/اختك مشت لحوش جدك؟
مروة بنبرة باكيه:ايه..ياروحي عليها مناسك تحب بوها هلبه..كيف مات بس!..استغفر الله العظيم..
فايزة ودموعها في عيونها..
/إنا لله وإنا إليه راجعون..
🍃وبعد ماقطعوا مسافه زادت في طولها الزحمه..
وصلوا للشارع اللي فيه حوش مناسك..
شافوا قدامه زحمة سيارات وسمعوا اصوات العياط والنواح..
درست فايزة ونزلوا الزوز ومشوا يجروا بعد ماسكرت السيارة..
خشوا للحوش..لقوا الجنان زاحم بالرجاله..
سمعوا اصوات بكي جاي منهم مروة شافت لمصدر الصوت..
لقت مالك حاضن واحد من خوته ويبكي..
جنبه معين اللي كان واقف يشوفله بوجع..بس لما خشوا مروة وامها انتبهلهم وركز ع نظرات مروة لمالك قبل لتخش للحوش هي وامها...
🍃خشوا داخل..
وشافوا مشهد فكرهم بأوجاع فقد متلاحقه مرت عليهم..ابرزهم موت احمد..
فوزيه تبكي بالعبرة...وبناته بينجنوا..
مناسك وهي تبكي وتعيط لمحت مروة..
بدون وعي منها مشتلها تجري ومروة قدمتلها بسرعه وضمتها..
مناسك بالعبره..
/بابا يامروة..بابا..
ومروة لما سمعت نبرة الالم اللي قالت بيها "بابا"انهارت وبكت معاها..
وفايزة مشت لفوزيه وهي وين شافتها ناضت وضمتها طول وهي تبكي..
حست ان فايزة الوحيده اللي تعرف قوة نارها من فقد راجلها لأنها مرت بنفس الحاله...
🍃وعرفوا بعدين ان سبب وفاة اب مالك ومناسك كان سببه حادث سير خارج طرابلس..🍃
🍃🍃🍃🍃🍃🍃
وع الغدي في حوش شنيبه التموا ع طاولة الاكل في الكوجينه..
محمد ومغليه ونجاة وصغارها..
حطتلهم سميره غداهم ومشت طلعت..
نجاه شافت لمغليه اللي كانت تشوف لراجلها..
محمد شنيبه بإستغراب ناداها..
/سميره..ياسميره..
"راكبه نتغدى مع صغار المهدي"
مغليه غمضت عيونها بعصبيه..
وهو ناض طول وطلع من الكوجينه..
نجاة:لفعه..
شافتلها مغليه بحده وهي ساكته..
🍃🍃🍃
محمد شنيبه:شن ماشيه تتغدي مع صغار المهدي هادي؟!من شاورتي!؟
سميرة بضيق:اني ياحاج من قبل قتلك مانقدرش نقعد في مكان مع حد مانحباش..
محمد؛قصدك نجاة!
سميرة:ايه..اني متحمله مغليه لأن عندها حق معاي فيك وفي الحوش لكن المخلوقه هادي لا مادام اني فالحوش مانبيش نتلاقى اني وياها في مكان واحد..
تنهد بعدين قال..
/باهي نقولك حاجه..خشي جيبي غداي وغداك والحقيني للجناح..
ابتسمت وقالت..
/ايوه..مانبي نقابل كان وجهك ياغاليا..
ضحك وقال:تحركي..
ومشي طول بطريقه للجناح..
هي ابتسمت بنصر ومشت خشت للكوجينه..
خدت سفرة..حطت فيها صونيه راجلها..وصبت في صونيه لروحها وحطت عصير..ورفعت السفره وطلعت..
ومغليه معاها بعيونها..بعد ماطلعت..
لوحت الكاشيك"الملعقه" بعصبيه..وناضت ومشت طلعت من الكوجينه لدارها..
وقعدت نجاة بروحها مع صغارها..
مررت نظرها عليهم وقالت..
/خل ناخدوا حتى حني غدانا ونركبوا لشقتنا..
ولمت الصواني والمشروب في سفره وطلعت بيها هي وصغارها من باب الجنان متوجهه لشقتها..
🍃🍃🍃🍃🍃
"مفروض نمشوا حتى حني في وفاة بوي الله يرحمه جو من اول يوم"
فردوس:صدقتي بس حوشهم بعيد شويه..
طوبى:نشوفوا غرفه كان بتمشي يرفعنا رؤوف ولانكلموا حسين..
مطيره:خل نشوف حسين قبل..
🍃واتصلت مطيره بحسين اللي قال انه يقدر يرفعهم لكن بعد العصر..
واستنوا لبعد العصر..وجاهم رفعهم ومعاه جده اللي كان يبي يدير الواجب زي ماهما داروا معاه واجبهم في عزي ولده...
🍃ويروح نضال للحوش بعد ماقضى نص النهار مع صحابه..
توجه للكوجينه بش يشرب..شاف سميره طلع في طاجين بسبوسه من الكوشه..
نضال:السلام عليكم..
حطت الطاجين مع الرخامه وقالت..
/وعليكم السلام..نحطلك غداك؟
هو قال:خليه عشي تغديت برا..شويه وننزل نشرب قهوة.
سميره:راجي نحكيلك شن صار اليوم..
رفع حاجبه اليسار وقال..
/ياساتر!..
🍃وبدت سميرة تحكيله في اللي صار بالتفصيل لازادت ولانقصت..
نضال:شوفي اني مانحبش ندوي ع مراة من وراها تمام..لكن المخلوقه هادي متاع شر..تحب تفتن وتقرب في النار لخبزتها في نفس الوقت ع خاطر مصلحتها انتي ماتعطيهاش فرصه..وراهو امي لاطايقتها ولامعترفه بيها كنه لولا الظروف..
سميرة؛فاهمه هدا كله كان واضح ليا من قبل..المهم حطيتك في الصورة..
نضال:ايوه كل صغيره وكبيره لازم نعرف الشاردة والوارده من اتفه التفاصيل لأكبرها لازم تعطيني بيهم علم..
حطت ايديها ع بعض وقالت بتعجب..
/هدا شن يقولوله!
ضحك وقالت..
/قهوة وبسبوسه وقصيلي طرف كبير من الحاشيه..
ومشي طلع وخلاها تضحك وهي تحرك في راسها يمين ويسار..
🍃🍃🍃🍃🍃
وفي حوش اهل مناسك اللي كان جرح الفقد عندهم جديد.. تفكروا بنات الواعر وعمتهم يوم موت لطفي..
طوبى وهي تشوف لمناسك وخواتها تفكرت اللحظه اللي خشت فيها ع بوها وهي تودع فيه...اللحظه اللي استوعبت فيها حقيقة موته..ضمت بنتها لحضنها وهي تبكي بصمت..
🍃ومروة مقابلتها واخده مناسك في حضنها ومابتش تخليها بكل...
🍃🍃🍃🍃🍃
"صار هكي!باهي خل يعدوا هاليومين ونجيك غادي ونشوفها شن دير"
مغليه بضيق:لالا بنتي مانبيش مشكلتك مع بوك تكبر تربحي..
"بوي اني بنته يام بنته..مش حيبدي وحده واخدها يكسد عليها على بنته"..
مغليه:مش ساهله بكل ياخديجه..
"طبها عندي يام"..
🍃ومن دار مغليه للصاله..
اللي كانوا مقعمزين فيها سميره ومحمد ونضال يشربوا في القهوة وياكلوا في البسبوسه..
محمد؛هوقال يبي نجاه تمشيله تقعد معاه..
سميره:معليشي يعني..هو توا واعي لروحه عادي وضعه!؟
محمد:ايه عادي يكلم فيا عادي..
سميره بدت ع وجهها ملامح الخوف..
محمد:لكن تبيله ع مايكمل العلاج مازال مشواره طويل وخوه عمر معاش يقدر يعطل روحه اكثر من هكي عن الخدمه..
نضال:باهي الصغار كيف يصير فيهم؟
شاف محمد لسميره..ونضال شافلها حتى هو..
تنهدت وقالت..
/ايه اني لانطيقها لافي سمي لافي وطا لكن صغويرتها مالهمش ذنب..كان خلتهم نحطهم في عيوني..
ابتسم محمد وقال..
/بارك الله فيك..
نضال:باهي امتى بتسافر..
محمد:غدوة العشيه.
نضال:عندها علم!؟
قبل لنروح كنت عندها...
🍃ونجاة طيرها الخبر من الفرحه ع طول بدت تلم في شنطة حوايجها..وصغارها كانوا مضايقين ومستوحشين من قبل ماتمشي..خافوا يقعدوا مع حد مايبيهمش...خافوا من ايامهم الجايه هلبه...
🍀🍀🍀🍀
ويجي اليوم اللي بعده..
4/4/2019..
وصل محمد شنيبه نجاة بنفسه للمطار وقعد معاها لين ركبت الطيارة..وروح طول لحوشه...
🍃وين خش للصاله..
لقاهم كلهم موجودين في الصاله..
المهدي..نضال..مغليه..وسميره..وسدرة المهدي..
يسمعوا بخوف كبير خطاب اعلان الحرب..
🍃اللي كانوا يسمعوا فيه نساوين عيله الواعر مع كبيرهم علي...والقلق متملك قلوبهم..
🍃🍃🍃
الشارع كله...
طرابلس كلها
...سيطر ع اهلها القلق والخوف..وشبح الموت قرب بش يحوم عليها....
#خريف
#طوبى
....يتبع.....
