#طوبى "جنة طوبى"
#جمان_فريد
#الجزء_الثاني_والثمانين "مارغريت4 "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء 🌼
سمع النبي صلى الله عليه وسلم رجلا يقول:
اللهم إني أسألك بأني أشهد أنك أنت الله الذي لا إله إلا أنت.
الأحد الصمد الذي لم يلد ولم يولد، ولم يكن له كفوا أحد.
فقال: " قد سأل الله باسم الله الأعظم الذي إذا سئل به أعطى، وإذا دعي به أجاب "
. أَخْرَجَهُ الْأَرْبَعَةُ، وَصَحَّحَهُ ابْنُ حِبَّانَ.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 تعزُ علي كثيرًا نفسي ، نفسي التي وصلت إلى اقصى نقطة من الإنهيار حتى السكون الزائد يبكيها..🍃
__________________________________________
فاقده الوعي بين ايدين عمتها..
حاولوا يفيقوها عمتها واختها ومرت خالها وهما مرعوبات عليها..لكن مافاقتش..
وصل فيها الجالي طبس عليها وجي بيرفعها وهو يقول..
/حولوا شويه حولوا..
مطيره اللي كانت مقهورة منه ومش طايقه تشوف وجهه تلقائيا بدون اراده منها ضرباته ع ذراعه وهي تعيط عليه وتقول..
/برا غادي..
والناس في الشارع تتفرج...
عبد القيوم بينجن وربيع مازال شاده من ذراعه بقوة..
والتونسي يمرر في نظره بينه وبينهم..
المهدي بتوتر وانفعال..
/مش وقته..خليه يدخلها داخل..
فردوس وهي ترعش..
/عمتي خلاص..
مطيره استسلمت ونزلت راسها وقالت بعصبيه..
/ارفعها..
هو اللي كان مضايق ومعصب في نفس الوقت..
رفع طوبى بين ايديه..وفردوس سبقاته وفتحت الباب..
خش بيها داخل وهما خشوا وراه حتى المهدي...
جبد عبد القيوم ذراعه من ربيع..ولف ومشي للحوش وهو يمسح ع لحيته بعصبيه..
وربيع وفراس معاه بعيونهم..
اما في قهوة نضال...
☘محمد المهدي بضيق:لاحول ولاقوة إلا بالله..
نضال بإنزعاج..
/قعدنا عار..كل اسبوعين فضيحه شكل..
🍃🍃🍃🍃🍃
في المربوعه الخارجيه لحوش لطفي الواعر..
كان الجالي مرقد طوبى ع الصالون وحاط تحت رجيلها مخاد..
ومطلعه شيشة عطره الصغيره اللي كان حاطها في جيبه..
وفتحها وطلع العود وقربه لأنفها..
وفردوس ومطيره والمهدي حواليهم ..
طوبى لما شمت العطر بدت تفيق..
الجالي؛اهي ناضت..
هما قعدوا يشوفولها بلهفه وقلق..
وهي بدت تفتح في عيونها شويه شويه..
وين وضحت الصورة قدامها...شافت وجهه..
قعدت تشوفله بنظرات..
كلها كره..وعيونها تعبوا دموع بعدين قالت بهدوء..
/حول من قدام وجهي..
مطيره جاته وقالت..
/نوض نوض ساد ماغميتها بفعايلك السود..
المهدي:جالي..
ناض الجالي وهو يشوف لمطيره بحده..
وهي جت لبنت خوها قعمزت جنبها وقالت بقلق..
/خيرك بنتي شن جاك كنت باهيه مافيك شي..
طوبى حاولت تنوض مطيره ساعدتها..
نزلت رجليها وقعدت مقعمزه..حطت يدها ع راسها اللي كان واجعها شويه من الخلف بعدين شافت للمهدي والجالي بنفس نظرات..
الكره..
فردوس بقلق:ضغطك هابط..ومشت طلعت بسرعه من حداهم..
طوبى نزلت يدها وقالت بتعب..
/بنخش داخل..
المهدي حط يده ع ظهر الجالي وقال..
/هيا..
الجالي:دقيقه شويه..طلعولي بنتي..
شبحتله طوبى بنظرات حاده..
مطيره:اسمع اطلع روح وماطلعش جنوني..
الجالي:وين الغلط في اللي قلته هدا حقي..حقي نشوف بنتي..هادي بنتي..
المهدي وهو يحاول يتحكم في اعصابه..
/جالي هيا توا..
الجالي بإصرار..
/مش طالع لين نشوفها..
مطيره ناضتله وقالت..
/انت شني قولي!! ماعندكش دم مش بنادم شن صحة الوجه اللي عندك هادي!
الجالي:مراة واكبر مني مش راد عليك..
مطيره:بالك بترد..ترا بالله رد..رد وخليني نوريك شن ديرلك المراة الاكبر منك وكان قدرت ترد بعدها..
غمض عيونها وفتحهم بنفاد صبر..
المهدي لمطيره؛خلاص صل ع النبي..وانت اطلع قدامي بالطيب احسن..
الجالي بأنفعال؛تي شن الظلم هدا ياناس..جيت لهني وماتبونيش نشوف بنتي! يرضي مني هدا ياناس قولولي..
طوبى بإزدراء..
/خلاص اسكت..
شبحلها وسكت..
طوبى شافت لعمتها وقالت..
/جيبيها عمتي..
هو تنفس براحه بعد ماوصل للي يبيه..
مطيره بحمق..
/ااخ..بس..
ومشت طلعت من حداهم..
بعد ماطلعت شبحتلهم وقالت..
/ترضى كل اسبوع تشوف بنتك في حوش ماليك مرة وحده بشرط طلق..
المهدي قعد يشوف لطوبى وهو مستغرب..
والجالي يشوفلها بإمتعاض وهو ساكت..
هي.كملت تقول..
/بالمحكمه مش حتحصل مواعيد زيارة هكي...
مازال ساكت وماباش يرد..
هي كملت تقول..
/نديروا بينا عقد اتفاق عند محرر عقود وعليه شهود نديروا فيها شروط..انك تعطيني حقي..من مؤخر
ونفقه ليا ولبنتك وسكن او بدل سكن..انت تشوف بنتك في الموعد اللي قتلك عليه..واني من جهتي حنسكت مش حنقول شي يضرك...هدا ينكتب في العقد..شن رايك..
ضيق عيونه وابتسم تهكما وقعد ساكت..
طوبى:شوف رغم كل شي قاعده نبي نحافظ ع شويه احترام نبيهم يقعدوا لبنتك ليك بعدين..حط عقلك في راسك خير مابعدين تقول ياريت..
المهدي شاف لخوه وهو يراجي في رده...
ع خشة مطيره بجنة ووراها فردوس بطاسه ميه وملح وسكر وكان باين عليها الضيق..
هو لما شاف بنته ابتسم بلهفه وقدم لمطيره..
عطتهاله مطيره وهي مش طايقه روحها..
وهو خداها منها ومشي قعمز بيها..
قعدوا يشبحوله فردوس ومطيره بإزدراء..
وطوبى تشوفلهم وهي تشرب في الميه..
الجالي وهو يشوف لبنته بآبتسامه حب قال..
/الله يبارك الله يبارك..تعالى شوفها يامهدي كيف كبرت..
قرب منه المهدي..وقف حداه وشاف لبنت خوه..
ابتسم وقال:الله يبارك..
قربها الجالي لأنفه وقعد يشم في ريحتها..بعدين طبع ع خدها قبله خفيفه..
بعدها شويه وهويشوفلها قال..
/اسف بابا ماجبتلك معاي شي ماتخيلتش نشوفك اليوم بكل..
فردوس تشوفله بإمتعاض..
ومطيره بإزدراء..
لكن طوبى نظراتها ليهم كانت نظرات حسرة..
الجالي:صحتها كويسه..
مطيره:في احسن حال الله يبارك رادين بالك منها ومهتمين بيها وحاطينها في عيونها بنتنا هادي..
قام عيونه في مطيره وهو يشوفلها بملل..
والمهدي كان يشوف لطوبى..
طوبى:شن قلت..
غير نظره لطوبى..بعدين ناض بالبنت ومشي قعمز جنبها..
وفردوس ومطيره يفنصوا..
الجالي شافلهم وقال:معليشي نبي ندوي معاها ع انفراد..
مطيره:والله ماني طالعتها ياطوبى..
المهدي:صل ع النبي وخليهم يتفاهموا مع بعض..
مطيره بحده:معليشي انت ياريت ماتدويش بكل..
انصدم المهدي..
والجالي شبحله..
طوبى:ترا شويه..
هو شبحلها ومدلها البنت لااراديا لما قربت منه..
خدت بنتها وناضت وهي تقول..
/اللي عندي قلته ونراجي في الرد..
هو قعد يشوفلها بتفكير للحظات بعدين ناض وقال..
/نفكر قبل..
رفعت طوبى حاجبها وهي تشوفله..
مطيره:خلاص خود خوك وتوكل..
الجالي شبحلها بعدين ضيق عيونه بإبتسامه ساخره وقال..
/بدل ماتعقليها وتوريها مصلحتها وين قاعده تحرضي فيها وتساعدي فيها ع الغلط..
مطيره وهي تتمالك في اعصابها قالت للمهدي..
/خود خوك واطلعوا..
الجالي بسخريه..
/شن متوقع منك عندك في الخراب..
المهدي بصوت عالي:جالي اطلع قدامي..
مشي طلع وهو مبتسم بسخريه..
والمهدي وراه..
مطيره بعدم استيعاب..
/ريتوا ولد مغليه ريتوا!؟..
ولحقتهم..
فردوس طلعت وراها وهي تقول بخوف..
/عمتي تعالي..
مطيره وقفت في باب المربوعه وهي تشوفلهم كيف ماشيين للباب قالت..
/اني متاع خراب!؟..هديكا امك السحارة..
وقفوا الزوز وشبحولها بحده..
والجالي قال..
/حطي يدك ع راسك وين تدوي ع امي شن جابك ليها..
المهدي التفتله ودفه وهو يقول..
/سكر فمك واطلع..
الجالي:هي اللي تسكر فمها وتحترم سنها خيرلها..
مطيره:ياكلب ياواطي..
وطبست خدت شبشبها وحدفاته بيه..
فردوس بصدمه..
/عمتي!..
وشبشبها ماغلطش في العنوان جي ع كتفه مباشرة..
مطيره:كان ماعرفتش تربيك امك انب نربيك ياعرة الرجاله..
الجالي بغضب وهو يأشر ع الشبشب..
/تو تندمي عليها تو تشوفي..
المهدي جبد خوه وفتح الباب وطلعه وطلع وراه وسكر الباب..
الجالي وهو يهز في راسه بوعيد..
/تو تشوف المسترجله هادي اللي مش لاقيه من يحكم فيها..
المهدي؛ضم فمك معاش نبي نسمع صوتك بكل ..
سكت الجالي وقعد يمشي وهو يوزع في نظره ع الشارع ومازال يهز في راسه بوعيد..
والمهدي يشوف للناس اللي قاعده تتفرج بعدين غير نظره لخوه..
قصوا الطريق الزوز..
بعدين الجالي مشي لسيارته..والمهدي وقف قدام المطحن..
حط ايديه في نصه وهو يشوف لخوه كيف ركب السيارة بعدين شغلها وتحرك..
تبع السيارة بعيونه لين درقت..غير نظره لمطعم ربيع لقاه يشوفله..
حرك المهدي راسه يمين ويسار بأسف بعدين خش للمطحن..
وربيع بدت ع وجهه ملامح الأسف..
🍃🍃🍃🍃🍃
ولت مطيره للمربوعه وهي تقول..
/الله لايسامح اللي لمنا عليكم..
خشن وراها فردوس وقالت بلوم..
/ربي يهديك ياعمتي شن ردتي!
مطيره شافت لطوبى بضيق وقالت..
/سامحيني ماقدرتش نتحمل تمادى هلبه..
طوبى مشت حطت بنتها ع الصالون وقعمزت جنبها وهي حاطه ايديها ع ركابها وعيونها في الارض..
فردوس بقلق:طوبى شن صار في حوش الصيد شن ريتي شن سمعتي!؟
مطيره تشوفلها بإستفهام وهي تراجي الاجابه..
خدت نفس بعدين قامت عيونها فيهم وقالت:
/طلع متزوجها..
الزوز بدت ع وجوههم ملامح عدم الفهم..
فردوس:من هما؟
عيونها تعبوا دموع وهي تقول بنبرة مخنوقه..
/الجالي..طلع متزوج نجاة قبلي..
انصدموا بقوة من اللي سمعوه..
مطيرة بصدمه:كيف قبلك؟
فردوس:قصدك كانت مرته مش علاقه!
نزلوا دموع طوبى وهي تشوف لفردوس بألم..
مطيرة رجليها ثقلوا ومعاش حملوها..
مشت قعمزت مقابله بنت خوها وقالت..
/كيف عرفتي؟ من اللي قالك!؟
🍃🍃🍃🍃🍃
"مش من جدك؟"
ضحك وقال..
/تجي البصارة في موضوع زي هدا!؟
عبد الرؤوف بعدم استيعاب..
/عارف فرق العمر اللي بينك وبينها!؟..اشر بيده اليمين..خمسه..خمسه..خمسه..واحد..
اسكندر:وين المشكله!!؟
عبد الرؤوف؛انسى الموضوع..
اسكندر اضايق وقاله..
/ماتوقعتهاش منك..
عبد الرؤوف:حبيبي افهمني..الموضوع مش راكب..
اول شي البنت صغيره هلبه..تاني ماليهاش فتره يعني مطلقه والطلاق ماكانش ساهل..واخر شي وهو الاهم امها مستحيل تعطيها..
اسكندر قعد يشوفله بتفكير للحظات بعدين قاله..
/قول الصراحه..فيا حاجه مش عاجبتك!
عبد الرؤوف؛هدا اللي فهمته!!؟
اسكندر:ماهو حاسك انت اللي ماتبيش..
عبد الرؤوف؛مانبيكش تنحط في موقف مرة تانيه..
تنهد اسكندر بضيق وقعد ساكت..
عبد الرؤوف هز راسه وقال..
/باهي اني تو نفتح الموضوع مع خالهم المحجوب ونشوف شن يقول بالك يعني كان اقتنع يتكلم معاي ويقنعهم..
ابتسم اسكندر وقال..
/نوارة..
ضحك وقال..
/ان شاء الله خير وخلاص..
اسكندر بإبتسامه..
/اني متفائل..بإذن الله تمشي الامور..
عبد الرؤوف ابتسم وهز راسه وقال..
/ان شاء الله....غير نظره للزباين اللي كيف خشوا للمحل متاعه..
وصاحبه جنبه سرح بتفكيره وهو يفكر في موضوعه بحماس وأمل..
🍃🍃🍃🍃🍃
"مالقوش غيرنا..! تي شن بينا وبينهم بش يديروا فينا هكي ياناس!"
فردوس وهي مش مستوعبه..
/ماتفهميشي حقد..هزوة..مافهمتش!
وطوبى تسمع فيهم ودموعها زي السيل..
مطيره بحمق..
/علاش ماتكلمتيش وواجهيتهم!؟
ابتسم تهكما وقالت..
/وشن بيقول!؟ بيعترف يعني! وخوه شن حيدير اساسا من البدايه شن دار بش يدير توا..هدا اذا كان مش عارف من الاول!..اشرت ع المكان اللي كان واقف فيه وهي تقول..انتي شفتي شن دار بش يشوف بنته ..سمعتيه كيف يتكلم..نفس شي داره لما واجهته قدام بوي الله يرحمه..وهو نفسه حيديره لو واجهته توا..مش حنستفيد شي ..
فردوس بحسره ودموعها في عيونها..
/الله يربحهم يلقوه ويتلقوه..علاش يجونا حني..علاش من دون البنات يديروا فيك انتي هكي!
مطيره:هي ولا غيرها يافردوس حرام حرام..ولدهم يبي وحده تانيه..لقوه واخدها يخلوه يصطفل منه ليها..يبوا يربوه يديروا فيه اي شي تاني مايبلوش بنات الناس فيه ويضيعوا مستقبلهم..!
طوبى شافت لبنتها وهي شاده بكاها بقوة..
بعدين خدتها وناضت بيها..ومشت طلعت من المربوعه من سكات..
هي طلعت وفردوس انهارت بالبكي..
ومطيره تنهدت بحسرة من وسط قلبها..
🍃وطوبى لما خشت للحوش..
فاتت من قدام الصاله اللي كانوا فيها نبيله وبنات فردوس..
شافوها...وشويه وسمعوا باب الدار تسكر..
اريج بقلق:اشبح شن صار..
الاء في جنبها كانت مضايقه..
ونبيله اللي كانت حاسه بنفس الشعور قعدت تفكر وهي متسائله شن اللي صار في حوش الصيد!
🍃🍃🍃🍃🍃🍃
وبعد ماروحوا الناس من حوش الصيد..
قعدوا الكناين ماعدا خديجه اللي ركبت لشقتها...
وقعدت نجاح اللي كانت تبي تكمل باقي الاسبوع عند امها..
طول الوقت كانت سرحانه وتفكر في طوبى وهي قلقه عليها ومتخوفه من اللي بيصير بعدين...
🍃🍃🍃🍃🍃
"خاطري نديرلهم لمة نبي نتفخشر عليهم "
ضحك وقال..
/معناها كاذبه عليهم ومقايله اني راجلك!؟.
صابرين:كاذبه حتى في اسمك..
مختار:اممم..اكيد مايعرفوش وين تسكني؟
صابرين:اكيد مش انت قتلي ماتقولي لحد..
مختار:اممم..تمام..في عندي حويش قنين مفرش نأجر فيه بين فترة والتانيه اعزميهم غادي وقولي هداكا حوشك..
صابرين؛اهم شي يكون عليه القيمه..
مختار:تشبحي فيا..تعرفيني كويس!
صابرين قعدت ساكته وهي تشوفله..
مختار:اني تكون عندي حاجه ماعليهاش قيمه!؟
صابرين هزت راسها وقالت..
/باهي اسفه مش قصدي نبي نطمن بس..
مختار:okبنعديهالك هالمرة..عموما ليك الاذن وكل شي تحت ايدك اللي تبيه ديريه ينقص شي كلميني وخودي راحتك ع الاخر..
ابتسمت وقالت..
/مافيش احلى منك..
ضحك وقعد ساكت..
صابرين:باهي بنسألك سؤال..
مختار؛هاتي..
صابرين؛هادي اللي في العزي متاع شريكك عيونها ملونات وطويله .
مختار:فاتن..
صابرين:ايوه ايه هكي اسمها..سمعت انها كانت مرتك..
هز راسه بإيجاب..
صابرين:تحبها؟
ابتسم وهو ساكت..
صابرين:حسيتها تحبك..
ضحك..
صابرين بضيق:جاوبني..
مختار:امم..تعز عليا زيك بالزبط..بس هي زياده لأنها رافقتني في فترة حساسه في حياتي ووقفت معاي وممكن مافي حد فالدنيا يفهم عليا قدها..
صابرين بغيره..
/حتى اني نفهم عليك..
ابتسم وقال..
/انتي عرفتيني واني مختار اللي توا..هي عرفتني من لما بديت من الصفر...
صابرين سكتت لما فهمت قصده..
مختار:شوفي في حاجه نبيك تاخديها بعين الاعتبار..فاتن بالنسبه ليا حاجه بروحها..يعني العالم كله في كفه وفاتن في كفه..
صابرين بغيره..
/وهدا شني كان مش حب؟
مختار؛الحب حاجه سخيفه ماتعني شي قدام الصداقه والمعزة اللي بيني وبينها..
سكتت صابرين وهي مضايقه ع الاخر..
هو ناض وقال..
/تمام..اني طالع توا وبنروح متأخر..تبي اي شي رضا موجود Tschüss "إلى اللقاء"..
ومشي طلع من حداها..وخلاها معصبه منه ومحبطه في نفس الوقت...
🍃🍃🍃🍃🍃🍃
الساعه 10:00ليلا...
خشت عليهم دار المعيشه وهي تقول..
/لقيتها راقده..
فردوس بضيق؛وجنة؟
اريج؛حتى هي راقده..
قعمزت اريج ع سفرة العشي وقالت..
/اقربي يام..
فردوس:تعشوا انتم ماعنديش نيه..
الاء خدت الساندويتش وكلت منه بالسيف..
واريج دارت نفس الشي وعيونها ع التلفزيون...
🍃وفي الحوش اللي جنبهم..
مطيره؛هبوط لكن حالها باهي توا..
علي:والكلب هداكا شن صار بينها وبينه..
مطيره؛الكلب هداكا يابوي...وسكتت..خافت تصير مشكله كبيره وبوها ينفعل ويتعب خصوصا ان الايام الاخيره بدي ضغطه يرقا هلبه..
علي؛تكلمي خيرك سكتي!
تنهدت وقالت..
/قالتله...شن رايك نديروا عقد عند محرر عقود فيه شروط بيني وبينك نمشوا عليها بعد الطلاق..من بينهم تخليه يشوف بنته في حوش ماليه كل اسبوع مرة..
علي:وشن تاني؟
مطيره:قالتله حقوقها مش متنازله.عنهم وتبيهم..
علي؛مستحيل يقبل..
مطيره:ع اساس قال بيفكر..
علي؛قولي بيماطل..
مطيره؛عارفاته حتى اني..لكن قالتله كان مايبيش يترفع قضيه وخلاص..
علي؛مافيش غير هكي والله.غالب قدر الله وماشاء فعل..بلوة وانبلينا بيها..
🍃🍃🍃🍃🍃
"قعدوا يلقحوا ويفتفتوا بعدين انتلفوا"
محمد شنيبه:المهم انتم مادريتوش عليهم..
مغليه؛هدا اللي ناقص نزلوا من ارواحنا ونردوا عليهم..!
محمد شنيبه:احسن مادرتوا..
واتكا ع السرير وقال..
/ان شاء الله غدوة بنحطوا حجر اساس الجامع..
ابتسمت وقالت..
/ربي يجعله في ميزان حسناتك..
محمد شنيبه؛آمين..اني عندي.هدا مشروع العمر..
مغليه؛معلوم..هو في خير من بيوت الله..
هو قال بإبتسامه..
/صدقتي..هدا بس اللي يقعد...
🍃🍃🍃🍃🍃
وبعيد عنهم..
كان ولدهم الجالي في الفيلا متاعه..
مقعمز في دار بنته..حدا سريرها الفاضي وهو يتأمل فيه بألم ودموعه تنزل..
تفكر كيف كانت اول مرة شافها وكيف ولت لما شافها اليوم..
بنته قاعده تكبر...لكن بعيد عنه...
جي بين عيونه لما طوبى لما هزباته وين قالت..
"خلاص اسكت"
وقالت لعمتها جيبيها....
حس لحظتها بالقهر..والحقد ع طوبى...
هادي بنته هو..تنتميله هو...وحامله اسمه..في نظره هو الأحق بيها..
مسح دموعها بعنف وهو يقول..
/والله لما نجيبها ونخليها تتربى تحت ايديا وقدام عيوني..واني وياك ياطوبى والزمان طويل...
🍃🍃🍃🍃🍃
تاني يوم...
الاربعاء..
12 سبتمبر..سنة 2018..
العصريات..
في جنان حوش لطفي الواعر..
فردوس:حابسه روحها في الدار من امس سفرة الماكله اللي ندخللها فيها نطلع بيها شبه زي ماهي..
فايزة وهي مصدومه وحزينه..
/لاحول ولاقوة الا بالله..
فردوس:البية نسرين دايرة روحها ماتعرفش ..
فايزة بضيق..
/مرات حق ماتعرفش..
فردوس:بالله من جدك يافايزة! حاجه زي هادي معقوله ماتندريش عليها!..
سكتت فايزة وهي مضايقه ع الاخر..
فردوس بنرفزة...
/بالله مادافعيش عليها ولاتبرريلها قدامي..
فايزة:ماندافعش عليها..لكن مش مستوعبه كيف الموضوع واصل لهني وكيف هي درقت عليا حاجه زي هادي تقول علاقه وكان يبيها وخلاص..
فردوس:العيله هادي مافي حد فيهم صافي كلهم زي بعضهم من كبيرهم لصغيرهم..
فايزة بحزن..
/كان الله في عون هالمسكينه كل مرة صدمه شكل..كل وحده احرف من التانيه..اني ماقدرتش نتحمل كيف هي..
فردوس بحسرة..
/مالا اني شن نقول..تعرفي يافايزة معاش نبي سدرة تنوض لو ناضت وعرفت باللي صار لطوبى بالذات تموت قهرة..
فايزة ودموعها في عيونها..
/الله لايسامح هديكا الشيطانه البلي كله من تحت راسها..
فردوس بحقد..
/تشوفه في بنتها ان شاء الله..هدا ماعندي ليها..
🍃🍃🍃🍃🍃
"من قال ترضى تشوفني مرات نزيدها على مابيها"
مطيره بضيق..
/باهي لعند امتى حالكم هدا!؟
اميمه بحزن..
/خليها للوقت..الوقت ينسي..مرات..مش عارفه..
مطيره:الله يحنن القلوب واللي فرقكم فرق بينه وبين ضي عيونه..
اميمه تنهدت بحزن وقعدت ساكته..
"اميمه..مطيره"
مطيره:روح بوك..زعما شن جايب من غادي..
ضحكت اميمه غصب عنها وقالت..
/تحلمي..
مطيره؛وصيته ع زيت زيتون بندير روحي متفاجئه بيه..
وطلعت تجري..
اميمه ضحكت ولحقتها...
🍃🍃🍃🍃🍃
ويفوت هاليوم واللي صار في عقابه كان بدايه لأحداث اليوم اللي بعده...واللي حيكون طويل..طويل هلبه...
13سبتمبر..سنة 2018..
يوم الخميس...
الساعه 12:30قبل الظهر..
كان محمد شنيبه في واحد من محلاته..
اللي كان مزحوم بالناس اللي جايين يباركوا مشروع بناء الجامع ويعطوا وعود بتقديم مساهماتهم في بناءه..
وبعد ماطلعوا من المحل..
قعد محمد.شنيبه في المحل يشوف في كتالوجات لبضاعه جديده ناوي يجيبها الشهر الجاي من برا..
وفي عز انشغاله..يجيه اتصال..
حط الكتالوج..وخدي تليفونه..قربه ليه بيشوف المتصل كان رقم غريب..
فتح الخط ورد..
/ايوه..
"السلام عليكم حاج محمد شنيبه معاي"
محمد:ايه وصلت..تفضل..
"مش واخد من وقتك هلبه ياحاج نبي نقولك معلومه تهمك وبنسكر طول"
استغرب وقال..
/من معاي؟!
"مش مهم تعرف ياحاج..المهم تعرف ان في عمارة في.****** فيها شقه لواحد من ولادك كاتبها بإسم مراة برا شوف موضوعها"
هو بصدمه قال..
/شن قاعد تقطف انت.!
"زي ماقتلك ياحاج..برا ل****** في شارع***** العمارة غادي الدور الرابع..اخر دور...السلام عليكم"
وسكر عليه..
محمد بإنفعال..
/من انت..من..بعد.التليفون شاف مدة المكالمه قال بعصبيه..يلعن اصله مرة وحده...
بعدين غمض عيونه بأسف وقال...استغفر الله العظيم..
فتحهم..وقعد يفكر للحظات..بعدين شاف لتليفونه..وحط ع رقم المهدي واتصل بيه...
🍃🍃🍃🍃🍃
"والله اني مسافر يوم السبت لكن تو نتواصلوا في حالة صارت اي اشكاليه"
:ان شاء الله باش مهندس..صراحه اني ماصدقت حصلتك مشيت للشركه اللي كنت تخدم فيها قالوا سيب والمديره الجديده حاولت تقنعني نعطيها المشروع لكن ماقدرتش نحط الثقه في غيرك اسم.كبير ومعروف ع مستوى في البلاد وبرا منها..
الجالي بإبتسامه..
/مشكور..وان شاء الله نكون عند حسن ظنك..اني الفترة الجايه بعد مانكمل مشروع الملعب بنفتح شركه خاصه هني..
:خطوة موفقه..
الجالي بإبتسامه:إن شاء الله...
🍃ومن احد صالات الفنادق..لمكتب نجاة في الشركه..
نجاة؛اغلبها تعاونا فيها اني والباش مهندس الجالي شنيبه..
:ممتاز جدا..معناها متفاهمين خلاص..
نجاة:وبإذن الله تشوف اللي يعجبك..
؛إن شاء الله...
🍃🍃🍃🍃🍃
"عاودت عليه عطاني الرقم غير مستعمل"
المهدي وهو يفكر..
/مافيش غير نمشوا لوين هو قال ونتأكدوا برواحنا..لكن قبلها خل نزيد نسأل عن المنطقه وكان حق فيها عمارات ولالا..
محمد شنيبه بتوتر ونفاد صبر..
/شوف بسرعه شوف..
🍃🍃🍃🍃🍃
"انتي لو تعرفي الدوشه اللي صارت ع خاطر الحلو متاعك ماتستغربيش علاش رفعنا الاجر هكي"
الاء بضحكه:الحمد لله...
مدير المطعم:حاولي ع قد ماتقدري ماتسيبيناش مرة تانيه ..
الاء بإبتسامه:ان شاء الله..نستأذن توا..
:تفضلي..
الاء؛سلاام..ولفت ومشت بتطلع..شافت ساعة تليفونها قالت..حي بنعطل ع المراة..
☘زبونه تراجي في طلبيه☘.
وطلعت تمشي بسرعه من الفندق وهي دس في تليفونها..
وفجأة..
يصير تصادم..يطيح منها تليفونها ع الارض..
واللي اصطدمت بيه قعد يقول..
"ياساتر ياساتر.."
وطبس خدي تليفونه وهو يشوف للشاشه قال..
/انكسرت الشاشه..
الاء بصدمه؛حي عليا!..بالله عليك شوفه يخدم ولالا..
هو حول نظاراته وحاول يشغله بعدين شبحلها بإبتسامه وقال..
/للأسف مايخدمش .
الاء اللي كانت مركزه في تليفونها بس قالت بإحباط..
/ياربي كيف بندير توا كيف بنوصل في المراة!؟
هو قال..
/نعطيك تليفوني.!
قامت عيونها فيه واتفاجئت..
هو ابتسم لما شافتله وكانت باينه لمعه في عيونه..
مدلها تليفونه وقال..
/مشي بيه امورك..
هي حاولت تتمالك نفسها..خدت منه تليفونها..وجت بتمشي..
وقف قدامها وقال..
/ماتحرجنيش مع خالك..
شبحتله وقالت.
/شن دخله خالي!
هو بإبتسامه قال..
/لو عرف اللي صار ياخد مني موقف ماسد فسدتلك تليفون نخليك تمشي من غير مانديرلك حل؟!
رفعت حاجبها وقالت..
/ومن بيقوله خالي..
هو قال:اني..
تأففت..وجت بتفوته وتمشي اعترض طريقها مرة تانيه..
ومدلها التليفون وقال بإبتسامه..
/ارجوك..
هي شبحتله شويه..بعدين نزلت نظرها لتليفونه..
وفي لحظه خداته ومشت بسرعه..
هو قعد معاها بعيونه وابتسامته مازالت ع وجهه..
شافها لين ركبت سيارتها..وقعدت مقعمزه فيها..
شويه..ونزلت منها وهي دور عليه بعيونها لين شافاته..
وجاته طول..
وهو يضحك..
وصلت فيه مدتله التليفون وقالت..
/الرمز..
وهو يشوف لعيونها قال..
/1585..
هي بشي من الاحراج هزت راسها بعدين لفت ومشت بسرعه لسيارتها..
وعيونه عليها لين ركبت السيارة وشافها كيف استعملت تليفونه بعدين تحركت طول..
ضحك ضحكة خفيفه بعدين لف ومشي خش للفندق...
🍃🍃🍃🍃🍃
في وحده من الاحياء السكنيه الجديده في العاصمه..
درست سيارة المهدي..
شويه ونزلوا منها هو وبوه..الزوز قعدوا يشوفوا للعمارة من برا..
محمد شنيبه:حق الشقه في عمارة زي هادي يفوت 100 الف..
المهدي هز راسه موافقا لكلام بوه بعدين قال..
/تعالى نخشوا...
ومشوا هما الزوز...وخشوا للعماره...
الزوز كانوا محتفظين بصمتهم..
والزوز كانوا متوقعين اللي واخد الشقه..بس مايبوش يتوقعوا من هي اللي كاتبهالها بإسمها..
وصلوا للدور الرابع بعد ماركبوا المصعد..
لقوا شقتين مقابلات بعض...
ماعرفوش اما وحده فيهم المقصوده..
فجأه..
انفتح باب وحده فيهم وطلعت منه مراة..
تبان ثلاثنيه..ومطلعه معاها طفل صغير عمره مايفوتش الاربع سنوات...
الزوز قعدوا يشبحولها بنظرات صدمه..
وهي استغربت فيهم..
شويه المهدي قال..
/السلام عليكم..
هي ردت؛وعليكم السلام..
المهدي حك لحيته بعدين قال..
/معليشي بنسألك الشقه اللي ساكنه فيها ليك انتي؟
المراة بتعجب:نعم!؟
المهدي؛حني جايين نسألوا ع وحده ساكنه في العمارة هادي..
هي قالت؛ وحده ساكنه هني بروحها مستحيل..صاحب العمارة مش مسكن فيها الا العائلات واني بعيلتي الحمد لله وزوجي في عمله..
هو التفت لبوه اللي كانت باينه عليه الحيره..بعدين غير نظره للشقه المقابله..اشر عليها والتفت للمراة وقال..
/تعرفي من ساكن هني؟
هي شافت للشقه وقالت..
/ايه..راجل ومرته بس ليهم فتره ماجوش...
هو قال:تعرفيهم كويس؟!
هي قالت:معليشي علاش تسأل ؟
محمد شنيبه قدم وقال..
/اقاربنا ودلونا ع مكان السكن متاعهم وحني شبه رايحين..الشقه هادي من صاحبها بالزبط؟
هي مااقتنعتش بكلامه وقعدت ساكته..
المهدي:الحاج كلامه مزبوط يااختي ماتخافيش وقولي الشقه هادي من ساكن فيها..
هي قالت..
/الراجل نعرفه بالشكل بس مرته المدة اللي فاتت جت هني وقعدت يومين بروحها وجتني تعرفت عليا بش نونسها..
محمد شنيبه:قاعده بروحها؟
هي قالت؛ايه..قالت راجلها مسافر..
ويجي واحد من الجيران راكب هو من سكان الدور الثالث..سمع كلامهم صدفه وركبلهم..
:تفضلوا من تبوا هني بالزبط..
المراة قعدت واقفه بولدها في الباب وهي خايفه بعض الشيء..
المهدي تنهد وقال..
/جايين نسألوا عن صاحب الشقه هادي..واشر عليها..
:الشقه هادي وضعها مريب شويه...اللي نعرفه انها لزوز متزوجين يجوها من فترة للتانيه من حوالي عام تقريبا لكن المدة الاخيره شبه اختفوا..
محمد شنيبه:الاخت توا قالت ان المراة جت هني المده اللي فاتت وقعدت يومين..
:ايه مزبوط قبل فتره شهر تقريبا..
المهدي:باهي انت تعرفهم ؟
:ايه لكن معرفه سطحيه بإعتباري رئيس لجنة العمارة...الراجل اسمه الجالي وزوجته نجاة....
#مارغريت
#طوبى
....يتبع....
🌼صلوا ع الحبيب🌼
