#طوبى "جنة طوبى"
#جمان_فريد
#الجزء_110"نضال"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
أكمل وأجمل وأفضل وأشمل صيغة للصلاة على النبي ﷺ🤎
اللهم صلَّ على محمد وعلى آل محمد
كما صليت على إبراهيم وعلى آل إبراهيم
إنك حميد مجيد،
اللهم بارك على محمد وعلى آل محمد
كما باركت على إبراهيم وعلى آل إبراهيم
إنك حميد مجيد.
🤎صلوا عليه وسلّموا تسليما ﷺ🤎
اللَّهُمَّ صَلِّ وسَلِّمْ وَبَارِكْ عَلَى سَيِّدِنَا مُحَمَّدٍﷺ وَعَلَى آلِهِ وصَحْبِهِ وَسَلِّمْﷺ
#رزقنا_اللــــــــــه_واياكم
شفاعته ومرافقته في الجنة..{ﷺ} ❤️🤍
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لو لا مصائب الدنيا لوردنا القيامة مفاليس.
ابن القيم..🍃
_____________________________________
هي الدنيا شني غير انها دار بلاء!؟
والابتلاءات فيها انواع..
االلي يطهر بيهم الله عبده من الذنوب..
واللي يربي بيهم الله عبده العاصي..
واللي يرفع بيهم الله عبده المحبوب لدرجات عاليه عنده وفي الآخرة..
☘وغرفه قاعده تتأدب..عقلها قاعد ينضج..وقلبها بدي ينظف..
ينظف من اسوء علل الدنيا اللي تصيب القلب..
الحسد..والكبر..
اللي قاعده تمر بيه حاليا صعب جدا عليها لكن في قرارة نفسها شايفه انها تستاهله وهني هي نجحت في اجتياز اختبارها ووقع في قلبها المقصود منه..
🍃وفي المقابل..
في ناس مهما تنزل عليهم من ابتلاءات وعقوبات مايتغير فيهم شي..ولايبوا يدركوا اصلا انها ابتلاءات وعقوبات رادعه..يشوفوا فيها عين..حسد..قلة حظ..كيد كائدين..وهما المغلوب ع امرهم والدنيا جايه عليهم..
🍃"قالت مقاطعاته ومش مخلياته يخش الحوش ومانيش راضيه عنه لين يطلقها"
نجمه:قوليلها ياقعادك تراجي..هو ماصدق خداها..
رقيه:صدقتي..لكن ياوخيتي لتوا مش عارفه كيف عيلة الواعر ناسبوهم مرة تانيه بعد اللي صار بيناتهم..
عواطف:الرجاله علاقتهم ببعض كويسه ع حسب مايحكي بوي..
رقيه؛ايه كويسه لكن ياودي الدوة كلها في النساوين..
نجمه؛ماهو من لما الحكومه ولت حكومه النساوين الخراب ولى في الزايد..
عواطف:الحمد لله من يومنا لانفرضوا في كلمتنا ولانمشوا فيها ع بو ولاخوت كل واحد فيهم يدير مايبي ومايصلح بيه..
نجمه؛ايه والله..واهي بنت شنيبه اللي مافيها حاجه باهيه مارضيتش بطلاقها لكن ماحكمتش ع ولدي يخليها..
رقيه؛ايه حقه مادورتش صغارها بكل!؟
عواطف بإبتسامه متهكمه..
/مافي نهار اتصلت تنشد على تيم..
رقيه:يالطيف!
نجمه:وراما معاش دورتها بكل..
رقيه:لاحول ولاقوة الا بالله..
نجمه بحسرة:الله يسامحني وخلاص اني اللي سعيت لولدي بش ياخدها..
عواطف:حتى هو كان يبيها يام..
رقيه؛نصيبات وربي يعوضه باللي خير منها..
الزوز قالوا..
/آمين..
ضيقت رقيه عيونها وقالت..
/شن حال ابتسام!؟
نجمه بحزن:شن بيكون حالها شاده الشقه تراجي لين تم عدتها..
رقيه:تنزل في الصغار!؟
نجمه:كل يوم حتى الوليد الصغير تبعت فيه مع عواطف..
رقيه بشفقه مصطنعه..
/ياروحي عليها وعليهم..
تنهدت نجمه بحسرة..
وعواطف سرحت بتفكيرها وع وجهها باديه ملامح الحزن...
🍃🍃🍃🍃
وفي مكان بعيد عنهم..
في مقر جمعية الخطاطين والرسامين اللي تقع في احد مناطق العاصمة الآمنه..
اقاموا في هاليوم حفل تكريم لأساتذة وطلاب دورات الخط العربي ومن بين اللي حيتكرموا عبد القيوم وسلافه..
لكن سلافه فهاليوم ماقدرتش تحضر وطلبت من صديقتها ميار تاخد الشهاده عنها..
☘قبل ليبدا الاحتفال بدقايق مشي عبد القيوم لميار بش يسألها عن حال سلافه وعيلتها..
ومن اول ماوقف عليها وسلم لاحظ انها تكلم فيه من فوق نفسها..
ميار:الحمد لله وضعهم كويس ومش محتاجين لحد..
عقد حواجبه وقال..
/كان تقولي اللي عندك طول من غير رمي كلام..
ميار بإبتسامة أسف..
/ماتوقعتش منك اللي درته بصراحه،لما حكتلي سلافه ماصدقتش..قصدي انت كذا مرة وقدامي كنت تعرض عليها في المساعده بإصرار مش من باب المجامله وهما ولا مرة طلبوا منك تساعدهم انت اللي كنت ديما تبادرفي المرة الوحيده اللي طلبوا منك تساعدهم كانت المسأله مسألة حياة او موت ياريتك حتى رديت وقلت مانقدرش لا صكرت تليفونك مرة وحده..ياريتك شفت حالة سلافه وهي تحكيلي في الموقف قالتلي فوق من الحالة اللي كنت فيها هو كمل عليا مرة وحده..قالت عمري ماحسيت بالغربه في حياتي زي ماحسيتها يومها..خليتها تندم اشد الندم انها تأملت فيك خير..
كلام ميار كان ينزل عليه زي السيوف صغره هلبه في عين نفسه وخلاه خجل جدا ومش قادر يدافع عن روحه او يبررلها...
هزت راسها وقالت..
/يللا..الكلام هدا توا لايقدم ولايأخر اللي صار صار خلاص..هو هكي ولاهكي مافي حد يقدر يرد الموت عن حد لكن الناس مواقف ياعبدالقيوم وموقفك هو اللي مش حيقدروا يتخطوه بسهوله..
تنهد وقال بضيق شديد..
/كلامك حق ومانقدرش نقول فيه شي لكن نبيك توصلي لسلافه أسفي وتقوليلها حندير كل شي نقدر عليه بش نكفر عن غلطتي..نستأذن..ومشي وخلاها...
******
مياربمكر:زودت عليه العيار شويه خليته يكره روحه..
سلافه بضيق..
/ليش هيك ياميار بس!انا قلتلك اني كنت السبب في التصرف اللي عملوا..
ميار:وعلاش شن درتي!!؟ شادتها في جرته تليفونات ولاتلحقي فيه من مكان لمكان!!؟
سلافه بضيق؛ايه بس يعني يمكن زدوتها شوي لما حكيت معه بعد ماطلع من السجن وخليت ماما تحاكيه بالنهايه كان لازم حط ببالي انه اللي بيصير عندنا مابيصير عندكن..
ضحكت ميار سخرية وقالت..
/مابيصير عندكن!! والله ياسوفي نعرف وحده من عندنا معرفه اهلها ع اصدقائها الشباب كلهم يكلموا في امها ف الاعياد والمناسبات وكان صارت في واحد فيهم حاجه هي تكلمهم مش هكي وبس حتى بوها وخوتها كم مرة عزموهم في الحوش ع غداوات وعشاوات رانا مش مجتمع انبياء وصحابه..وبعدين اني مانشوفش فيه واحد منغلق ومايتعاملش مع النساوين..
سلافه:ايه بس مع هيك عنده حدود..
تأففت ميار بملل وقالت..
/المهم هو غلط خليه يحس بغلطه..
سلافه بإبتسامه حزن..
/هو حس فيه وعم يحاول يكفر عنه..امبارح حكالي معز انه دفع اجار4شهور لقدام..
ميار بضحكه..
/كان نقولك شن سألني امس..
سلافه؛شو؟
ميار:قالي في شي بين سلافة والتارقي حسيته مهتم بيهم هلبه..
وجه سلافه احمر خجلا وقلبها دق بقوة وهي تقول..
/وانتي شو قلتيلوا!؟
ميار:قتله اللي نعرفه حاليا مافي شي..
ضحكت سلافه ضحكه خفيفه بعدين تنهدت بألم وقالت..
/ياخوفي الناس هون تبلش تحكي علينا..
ميار بأستغراب..
/ليش!؟
سلافه بضيق..
/ظلينا نسوان لحالنا...
ميار:باهي اللي جبتي السيرة هادي..في موضوع نبي ناخد رايك فيه..
سلافه بإستغراب..
/قولي..
ميار:الموضوع يخص خوي واختك امس تكلمنا فيه مع بابا وماما ووصلنا لرايي وان شاء الله انتي وخالتي شاديه توافقونا فيه...
🍃🍃🍃🍃🍃🍃
"باهي لعند امتى بيقعد واخد وجهه!؟"
قعمزت سميره ع الكرسي وقالت بضيق..
/كان امك قعدت مسكرة راسها ع موضوع بنت خالتك ماظني مازال يولي..
نسرين بضيق..
/هي خايفاته يدير زي مادار المهدي..
سميره؛باهي بري قوليلها المراة ماتبيشي مسكرة موضوعه نهائي وماتبيش من يدوي فيه..
نسرين؛وتحسابيني ماقلتلهاش!؟ قلتلها..قالتلي ايه زي ماخالتها سكرت موضوع المهدي..
تنهدت سميرة بضيق وقعدت ساكته..
نسرين:حقه طوبى انخطبت!؟
سميرة بتعجب:من قال!؟
نسرين:وصلتني دوة من ناس قالوا في واحد يبيها وعطي فيها كلمه..
سميرة بضحكه:والله يابنتي منك نسمع..
نسرين:اللي قالي خبرني ان الراجل نفسه كلم خوي المهدي عنها..
سميرة بإستغراب..
/من هو اللي خبرك!؟
نسرين:اللي هو..المهم قوليلي حق الدوة هادي!؟
سميرة:اني اللي نعرفه ان تكلم عليها ولد الفاندي ورداته غيره والله مانعرف ولاحكوا قدامي حاجه..
نسرين:لالا مش ولد الفاندي هدا محامي..
سميرة رفعت حواجبها وقالت..
/ايه ايه..عرفته هدا خو زينب اللي تعلم في طوبى القرآن..
نسرين:معناها حق!
سميرة:ياودي نعرف قبل ان حاط عليها العين غير هكي مانعرفش..
نسرين:اني نقول دسوا الموضوع لين يتم..
ومالحقتش تكمل كلامها من خشة الجالي عليهم وهو في قمة الغضب يقول وهو يشوف لسميرة..
/قولي اللي تعرفيه قولي انخطبت!؟
سميرة بفجعه..
/قسما بالله مانعرف حاجه..
نسرين بحمقه..
/وانت شن دخلك !؟
خبط باب الكوجينه بقوة وقال بغضب وانفعال..
/كيف شن دخلي كيف! هادي ام بنتي..بنتي عندها واني والله مانخليها لراجل امها..
سميرة بدت ترجف من الخوف..
ونسرين ناضت وهي تقول بخوف..
/ياودي من قالك حق مرات اشاعات..
خبط الباب وقال..
/حق..خبطه مرة تانيه وهو يقول..حق..
اشر عليها وقال..واللي قالك فايزة...
ع جية امه واخته خديجه يجروا..
مغليه بخوف:خيرك ياجالي شن في!؟
الجالي شاف لسميرة بنظرات حاده كلها غضب بعدين قدملها وهو يقول..
/اسمعي انتي..
نسرين وهي تشوفله بخوف..
/جالي!
وصل في سميرة اللي كانت ترعش من الخوف..
خبط ع الطاوله قدامها بقوة وقال..
/وصليلها قوليلها قالك الجالي تبي تتزوجي في ستين داهيه لكن بنتي تجي تقعد هني في حوش ماليها..ورجع خبط الطاوله مرة تانيه ومشي بعصبيه طلع من الكوجينه..
خديجه شافت لنسرين وهي رافعه حاجبها وقالت..
/توا بس عرفت علاش عطوا سدرة للمهدي..
مغليه شافتلها وهي تفكر بعدين قالت..
/ع اساس بنخليها لسدره والله مانخليها تحلم بظفرها..
ومشت ولت لدار المعيشه وخديجه بعد مارمقت سميرة بنظرات مكر لحقتها..
خبطت نسرين فمها وهي تقول..
/قلل قولي حتى اني..
سميره وهي حاطه يدها ع قلبها قالت..
/سامحيني فيها يانسرين خوك قاعد مش طبيعي راهو..
شافتلها نسرين وهي تفكر بقلق...
🍃وهو كان في غضبه زي الثور الهايج..
ركب للشقه..خبط بابها بقوة..فتحتلها نجاه وهي مفجوعه..
دفها من قدامه بقوة خلاها تنضرب في الحيط..
بصدمه قالت..
/خيرك!..
وهو يخش للشقه ويبدا فيها تخبيط وتكسير ونجاه تتفرج عليه وهي ترعش من الخوف..
كان يخبط ويصيح بس بعدين مشي لدار النوم وبدي يخبط فيها وهو يقول..
"مش مخليك لغيري مش مخليك ياطوبى"
تبدلت ملامح وجهها للغضب..غمضت عيونها وحركت رقبتها يمين ويسار بعدين فتحتهم ومشت للكوجينه وهي تتخطى في اثار جنون راجلها..
خشت للكوجينه عبت طاسه ميه..بعدين مشت لدرج من ادراجها فتحاته وطلعت منه علبه دوا..
سكراته برجلها وخدت طاسه الميه ومشت طلعت لدار النوم..
🍃خشت عليه لقاته حاط راسه بين إيديه..
مدتله الطاسه وقالت..
/خود المهدئ خود..
نزل ايديه خدي الطاسه..وهي طلعت حبة من الدوا وعطتهاله..
خداها وقال..
/بنرقد ردي بالك تنوضيني..
نجاه:حاضر وبعد تفيق نهدرزوا..
خدي الدوا ومدلها الطاسه بعدين ارتمي ع السرير..
وهي مشت طلعت وسكرت الباب وراها...
🍃🍃🍃🍃🍃
"وجي الارنوب للجزرة..هدا الارنوب وهادي الجزرة وخدي الجزرة وقعد ياكل فيها.."
خدت جزرة محطوطه في صحن ع الطاوله وبدت تاكل فيها بطريقه مضحكه..
وجنه تتفرج عليها وهي تضحك بعدين قالت..
"ابي..ججره"
طوبى:زي الارنوب في القصه تبي تاكلي جزرة..وخدت قطعه متوسطه من الجزر وعطتها لجنه بعدين فتحت كتاب القصص واشرتلها ع صورة فيه وقالت..
/الارنوب ياكل حتى هو..
وقعدت جنه تاكل في قطعه الجزر ع قدر استطاعتها..
ناضت طوبى وهي تقول..
/شويه ماما نشوف الغدي ..
ودارت طلة ع الغدي بعدين ولت قعمزت مع جنه تكمللها باقي القصة لعند ماقطع عليهم الاتصال اللي جاها.
طلعت التليفون من جيب الماليه شافت المتصل لقاته رقم غريب..حطاته ع الطاوله وشافت لجنه لقتها ترقص ع النغمه قعدت تضحك..
فصلت المكالمه وطوبى قالت..
/هي نكملوا..
رجع رن تليفونها مرة تانيه وجنه ولت ترقص..
طوبى خدت التليفون وهي تضحك..شاف المتصل لقاته نفس الرقم..
/خل نشوفوا مني..
فتحت الخط وحطاته ع وذنها من غير ماترد..
" Bonsoir" مساء الخير بالفرنسيه..
طوبى:هو انت!؟
"ديموزيل طوبى شن جو"
طوبى:قبل شويه كان كويس..
"ولا حنعبرك ولانعدل عليك نشرب في المليسا يامليسا وجوي اخر رواق"
ضحكت بدون صوت..
كلمتها جنه وقالت..
"ججرة"
"بنت قلبي وبوبو عيني وروح روحي هاتيها هاتي"
طوبى:شن هاتيها تبيني نبعتهالك في مسج ولاشنو!؟
"It'sfunny"
طوبى شدت ضحكتها وبعدت التليفون وحطاته ع وذن جنه..
طلقت جنه الجزرة وشدت التليفون وقالت..
"آلو"
وباقي اللي قالاته مش مفهوم منه حاجه..
حطت طوبى وذنها ع التليفون وهي تضحك بصمت تبي تسمعه شن يقوللها لقاته يتكلم زيها..
تباعدت وحطت يدها ع فمها وهي تضحك..
شويه ومدت جنه التليفون لأمها..
استغربت طوبى وخداته وردت..
/ايوه..
"الله يبارك ذكيه عسليتي قلتلها اعطي التليفون لماما عطتهولك"
طوبى بتعجب قالت..
/والله صح..
"مش غريب عليها طالعه لخالها"
طوبى ابتسمت بأمتعاض وقالت..
/باهي علاش متصل شن تبي!؟
"شي..نسأل وخلاص..غرفه شن حالها"
طوبى:هي وصغارها كويسين والحمد لله..
"ماجدش في موضوعها جديد"
طوبى:لا..
"امم..وسدرة شن اخبارها نتصل بيها نلقى في رقمها مقفل"
طوبى:مسافره شهر عسل هي وراجلها ماتسألنيش وين لاني مانعرفش..
"وين بيسافروا والعالم ولى معبي كورونا!"
طوبى:في البلاد مش برا منها..
"اها..تمام ع راحتك"
☘عارفه مش حيصدقها لكن تبي توصله ان مش حيقدر ياخد منها اي معلومه عن خواتها☘
طوبى:شن حال فاتن..
🍃وبعد السؤال عن فاتن نهي مختار المكالمه وطوبى رجعت تلعب مع جنه وفي نفس الوقت رادة بالها من الغدي..
وقبل ليطيب"يستوي" الغدي بشويه روحت اريج من المدرسه وكانت جايبه معاها مواد تخص الحلويات اللي بتخدم عليهم طوبى مع هاديه باقي اليوم..
حطتهم في الكوجينه ومشت تشوف خالتها غرفه..لما خشت عليها دار المعيشه لقتها هي وصغارها راقدين استغربت..
********
طوبى بحزن ودموعها في عيونها..
/توقعته يدير هكي..
اريج بغضب..
/وعلاش يدير هكي!؟هارب من الوضع اللي حط روحه فيه!؟ معقوله هو ضعيف لهالدرجه!؟مراة معاش تبيك معاش في بينك وبينها نصيب ماتوقفش الحياة عليها..عندك صغار من بيهم صغارك كان صارت فيك حاجه!!؟ شن الأنانيه هادي!!!؟
طوبى بضيق..
/اهدي شويه اريج تو تسمعك..
نزلوا دموع اريج وهي تقول..
/بنمشي نرقد..
طوبى:ماتبيش تتغدي!؟
اريج مشت طلعت من الكوجينه وهي تقول..
/ماخاطري في شي..
تنهدت طوبى بضيق وقالت..
/الله المستعان..
🍃🍃🍃🍃🍃
فهالوقت كان نضال مقعمز في مربوعه حوش صاحبه..
ويخش عليه صاحبه بسفرة الغدي..
حطها قدامه وقعمز وهو يقول..
/هي سمي بالله ومد يدك..
نضال بشي من الاحراج..
/سامحنا ياشيخ عرفة كلفناكم وتعبناكم..
ابتسم وقال..
/تي غير شن تقول ياراجل مافي شي من قدرك ياشيخ نضال..سمي بالله ومد يدك تو يعجبك طعامنا ونديروك نسيب..
ضحك نضال وقال..
/ليا الشرف..
بإبتسامه قاله..
/بارك الله فيك..
🍃وبدوا يتغدوا وهما يتبادلوا في الاحاديث..كل مرة يحكوا في موضوع..مرة عن الحرب..ومرة عن الوباء والوضع الاقتصادي للبلاد..
بعدي الغدي..شربوا مع بعض شاهي اخضر وفتح نضال حديث جديد بسؤال ارق تفكيره وتعب نفسيته..
نضال بشي من الضيق..
/توا ياشيخ اني نعرف ان طاعة الوالدين واجبه بما يرضي الله..باهي كان امي خيرتني بين اني نتزوج علي كيفها ولاتغضب عليا شن لازم نختار..
سكت شويه الشيخ وهو يفكر بعدبن شاف لنضال وقاله..
/شوف..برك بوالديك وبالذات امك امر اجباري مافيشي نقاش امر جاك من الله سبحانه وتعالى مباشرة مخالفته تجيب عقوبه شديده لكن..مش واجبه طاعتهم في كل شي..الامر اللي انت قلت عليه هدا ماينفعش فيه اجبار لازم الطرفين يكونوا مقتنعين وراضيين هدا زواج هدا مصير وحياة جديده لازم تنبنى صح..يعني انت توا لو درت زي ماتبي امك وتزوجت وحده مش مقتنع بيها مش حتظلم نفسك وتظلمها معاك وتعيش انت وياها في جحيم والله اعلم كيف تكون النهايه اللي هي غالبا الطلاق..يجيني حد يقول ماهو مرات بعد الزواج يتعودوا ع بعض ويتقبلوا بعض وتمشي حياتهم..نقوله مرات..والشي القائم ع الاحتمالات بالذات في الموضوع هدا يجب تجنبه..وزي ماقتلك فيه ظلم حيقع عليك وع بنت الناس ورب العالمين مايرضاش بالظلم..
نضال بحيرة وأسف..
/باهي هي قالت كان مادرتش اللي نبيه مش راضيه عليك..
الشيخ:معليشي ياما تقول الام في لحظه حمقه وغضب خليك بار بيها وحاول تقنعها بأن اللي تبيك ديره غلط..
نضال بضيق..
/صعب تقتنع ياشيخ امي شديده شويه..
الشيخ:مهما دارت فيك دير واجبك ناحيتها وبرها ع قد ماتقدر لكن رد بالك دير شي تندم عليه بعدين رد بالك..
هز راسه بعدين قال..
/في بالي سؤال تاني معليشي..
ابتسم وقال..
/اسأل باللي تبيه ماعندكش مشكله..
نضال:هو ليه فتره يدور في عقلي وخفت نسأله يطلع معناه مش كويس..
الشيخ:هاته خل نسمعه وبعدين نحكم عليه..
نضال :توا البنادم اللي غلط هلبه في حياته لما يجي يتوب ربي يعاقبه ع ذنوبه اللي تاب عنهم!؟
الشيخ:اكيد لا لأن التوبه تجب ماقبلها..
نضال بضيق..
/لكن اني نحس في ربي يعاقب فيا ع اللي درته في حياتي قبل..كان مش هكي علاش نحس فيها زادت ضاقت بيا...
ابتسم وقاله..
/هادي مش عقوبه يانضال..هدا امتحان،رب العالمين يختبر فصدق توبتك..بيشوفك لما ضيق بيك شن بدير تزيد تتقرب منه ولاترجع ع تالياتك!؟..نضال..الطريق اللي يبدا يمشي فيها التائب معروفه شن نهايته لو صدقت توبته..رضوان من الله وجنة تجري من تحتها الانهار..
وطبعا لازم توصل وانت طاهر مش بس من ذنوبك حتى من اي علة صابت قلبك من اي شي صاب نفسك وكان سبب في فسادها..انت توا وكأنك تمر بمراحل علاج من مرض ما بش تولي سليم معافى لازم تمشي ع نظام العلاج هدا وتتحمل كل مايجيك منه لأنه سبب شفائك..
وفي حاجه مهمه لازم تعرفها ان الابتلاءات والشدائد اكبر مكفرات الذنوب..
لو مع كل ابتلاء تمر بيه تفكر ان كل لحظه الم وتعب نفسي كان وجسدي يصيرلك من وراه قاعد يكفرلك في ذنب معين..والله لو تفكر فيها هكي يهون عليك كل شي وتحس براحه مابعدها..
ابن القيم رحمه الله قال في كتاب مدارج السالكين..
"لا ريب أنَّ المُبتلى إذا قويت مُشاهدته للمثوبة سكن قلبه واطمأنَّ بمشاهدة العِوض، وإنما يشتدُّ به البلاء إذا غاب عنه مُلاحظة الثواب، وقد تقوى ملاحظة العِوض حتى يستلذَّ بالبلاء ويراهُ نِعمة".
سمعت شن اخر كلامه اللي قاله..حتى يستلذ بالبلاء ويراه نعمه..
☘قدر الشيخ بكلامه يشرح صدر نضال ويدخل الطمأنينه لقلبه وهالشي بان ع ملامح ع وجههه..
كمل الشيخ كلامه يقول..
/رد بالك تعطي فرصه للشيطان يردك عن الطريق مهما يصير معاك يانضال راهو توا بيهبل يدور ع خرم يبرة يخشلك منه ماتعطيشي مجال بكل وزيد هبله..
ضحك نضال وقال..
/لامن الناحيه هادي ماتوصيش حريص اني نهبل بلاد حالها بإنسهم وبشياطنهم..
ضحك الشيخ وقال..
/ربي يحفظك..
🍃🍃🍃🍃🍃🍃
الساعه 5:30عصرا..
في شقة ابتسام اللي كانت جايتها نجاة تهدرز عليها..
🍃ابتسام:مرات جو دير فيه بلعاني تبي الجالي يتحرك ويردها..
نجاة حركت راسها بالنفي وقالت..
/لالا مش هكي شكلها حق تبي تتزوج هدا علاش عطوا اختها للمهدي عارفه الحضانه بتولي لمغليه بعدين وهكي البنت تقعد تحت عين خالتها..مالا شن تفسريلي قعادها في نفس الشقه فوق حوش العيله!؟
ابتسام وهي تفكر..
/كلامك فيه وجهة نظر..
نجاة برفعة حاجب..
/وهو ماعنداش مانع راهو سبله ويدور فيها تو يدير المستحيل بش يردها..
ابتسام:باهي كان هكي انتي شن بديري!؟؟
عقدت نجاة حواجبها وبانت في عيونها نظرة مخيفه..
ابتسام بشي من الريبه..
/ع شن ناويه!؟
فردت نجاة حواجبها وقالت..
/لو نقدر ندير حاجه راني درتها من زمان ماعندي كان ندعي ربي ياخدها ويريحني منها..
سكتت ابتسام وقعدت ترشف من فنجان قهوتها..
شافتلها نجاه وقالت..
/وانتي شن صار فيك!؟
ابتسام اعتباطا..
/في شني!؟
نجاة:في اللي قتلك عليه الف مرة قبل خديجه خلاص سكرت عليه بالطابيه السودا..
ابتسام:الدوة هادي سابقه لأوانها مانبيش نفكر فيها بكل..
نجاة هزت راسها وهي تشوفلها بطرف عينها..
بعدين رشفت القهوة من فنجانها بالصوت..
وابتسام تشوفلها بإبتسامة تعجب..
🍃🍃
وفي الوقت اللي فيه نجاة عند ابتسام كان الجالي طالع لمشوار مهم بالنسبه ليه يخص طوبى وجنة..
حيحاول منه يرسم خطة بديله تخليه يجبر طوبى اجبار ترجعله واكيد مش حتكون الخطف زي سابقتها... 🍃🍃🍃🍃🍃
الساعه 7:30مساءا..
طلعت اريج من الدار وهي مضايقه..
مشت للكوجينه وخشتلها كانت فاضيه..
قعدت واقفه تتفرج عليها ومش عارفه شن ندير..
لما جو عيونها ع الباب متاع الجنان مشت فتحاته وطلعت برا..
سمعت اصوات هدرزة جايه من الكوجينه الخارجيه كانت لطوبى وهاديه اللي كانوا يديروا في طلبيات الحلو...
خدت نفس ومشتلهم..
وصلت في الباب فتحاته وخشت..
طوبى لما شافتها قالت..
/جنو ناضت!؟
اريج بضيق:لالا قاعده راقده..
هاديه:تباني مضايقه!.
حطت يدها ع صدرها وقالت..
/مش عارفه خيرني اليوم من لما نضت الصبح حاسه خلوقي مطبقات..
طوبى:صليتي ولاقريتي قرآن..
اريج:قريت قرآن لكن صدري قعد مطبق حاسه روحي نبي نبكي..
هاديه قعدت تشوفلها بقلق حتى هي حست ان في شي سيء حيصير..
ناضت طوبى وهي تقول..
/تعوذي من الشيطان..
ومشت للحوض غسلت ايديها كويس بعدين مسحتهم بالمنشف وقربت لأريج لقتها دمع بصمت..
حطت يدها اليمين ع صدرها ومسحت بيدها اليسار دموعها وبدت تقرا في سورة الفاتحه..
وهاديه سيبت اللي في يدها من الضيق اللي صابها فجأه..
🍃وفي حوش محمد شنيبه..
كانوا سميرة ومحمد في الجناح..
عطاته طاسة عصير ليمون يشربها وهي تقول..
/قالك فيتامين سي يقوي المناعه ياحاج..
خداه وقال بإبتسامه..
/باهي هاتي..وخدي منها الطاسه وبدي يشرب..
فجأه جاه اتصال..
مشت سميره للزيانه خدت التليفون شافت المتصل وقالت..
/عمر..
وقربت لراجلها ومدتهوله..
هو خداه..فتح الخط ورد..
/اي نعم....عقد حواجبه بخوف وقال..صل ع النبي!؟
سميره حطت يدها ع صدرها بخوف..
وهو بخوف وعصبيه قال..
/وينكم توا وين!؟..........باهي عرفتها عرفتها..ونزل التليفون..
حط الطاسه ع الكامدينو ومشي بيطلع بسرعه..
لحقاته سميره وهي تقول بخوف..
/وين ماشي ياحاج!؟ قولي شن في شن قالك عمر!؟
محمد وهو ماشي بإتجاه باب الحوش قال بخوف..
"نضال دار حادث.."
🍃سميره لما سمعت الجمله هادي تفكرت لما جاها خبر موت اسكندر للحظه تخيلت نضال مات زيه..
نضال اللي عوضها عنه وخدي مكانه في حياتها ماكانش لسميره زي خوها..في السنه اللي عرفاته فيها خلاها تحس انه ولدها..🍃
طلعت منها صرخة ذعر وبعدها قعدت..
/لاياربي لا لا ياربي..هدا وليدي اللي ماجبته لا ياربي..
ويطلعوا مغليه وخديجه من الصاله يجروا..
شافت خديجه لباب الحوش بعد ماسمعاته تسكر بقوة.
اما مغليه وهي تشوف لسميره قالت..
/خير بلاك!؟
سميرة بإنفعال شديد..
/ولدك اللي سحنتي كبده وقرشتي ملحته وخلتيه يسيبلك الحوش دار حادث..
خبطت خديجه بيدها ع خدها بقوة وهي تشهق من الصدمه..
اما مغليه اللي سمعاته ماقدرتش تستوعبه..
قدمتلها سميره وهي تقول ببكي وانفعال..
/ادعي ربي مايصير فيه شي وانتي كاسرتيه وواجعه خاطره منك..
خديجه حطت ايديها الزوز ع وجهها وهي تقول بذعر..
/ووك عليا وخيي لاياربي لا..ياربي..ياربي..
نزلت ايديها من ع وجهها لما سمعت سميره نادت امها بنبرة غريبه..
"مغليه"
شافت لأمها لقتها حاطه يدها ع قلبها وهي تاخد في انفاسها بصعوبه...
وتغمض عيونها وطيح قدامهم فاقده الوعي...
#نضال
#طوبى
....يتبع....
