طوبى "جنة طوبى"
#جمان_فريد
#الجزء_113"الحجر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
قال ابن القيم رحمه الله..
"اذا انكشف الغطاء للناس يوم القيامة عن ثواب أعمالهم لم يروا عملا أفضل ثوابا من الذكر فيتحسر عند ذلك أقوام فيقولون ما كان شيء أيسر علينا من الذكر.."
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃و لكن العاطفة الإنسانية غلبتني , لقد صدق الشاعر هايني حين قال أن هذه العاطفة الإنسانية تحشر أنفها في كل شيء ..
دوستويفسكي 🍃
________________________________________
الساعه 11:25صباحا..
في مصحة القدس..
حجرة محمد المهدي اللي كانوا فيها بوه وخوه يزن وعمه نضال..
هو كان مقعمز ع السرير..يحاول يبان قوي وبأحسن حال قدامهم لكن ملامح وجهه تحاول تبين العكس..
حاليا هو يتعرض لهجوم حاد من الحاج المهدي..
مااهتمش للهزايب اللي تلقاها قدام خوه وعمه همه كله حالة بوه الصحيه..
🍃المهدي بغضب..
/قسما بالله ماتبي الا طريحه ع العناد وكساحة الراس والله لولا اللي فيك ضربتك بالله..
ضيق محمد عيونه وهو يقول..
/عندك حق والله عندك حق..وكل شي تقوله اني نستاهله..لكن والله ماتصرفت هكي الا من خوفي عليك كنت نبي نجيبه بروحي مانبيكش تطلع..
يزن؛واهوا طلعته وخليته يخش مستشفى ويبات فيها ويقعد لتوا
شاف محمد لخوه امتعاضا بطرف عينه
نضال:ابو السوس شكرا ع المشاركه وياريت معاش تعاودها..
المهدي لنضال..
/يعني انت عاجبك اللي داره!؟
نضال:اكيد لا ياحاج لكن هو عنده مبررات..ع العموم هو خلاص تعلم من غلطه ومعاش يعاودها..شاف لمحمد وفنص فيه..
محمد المهدي:لا خلاص والله ماعاد صايرة..
المهدي هز راسه وقال .
/حسابك مازال بعد ماتطلع..المهم توا قول شن صار بالزبط !؟
محمد المهدي بضيق..
/تو نحكيلك لكن قبلها قولولي شن حاله توا!؟
تنهد نضال بضيق..
المهدي بإستياء:مش معروف لتوا كان باهي ولالا..انت احكيلي اللي صار...
🍃وحكي محمد اللي صار بالتفصيل ومجرد مانهي كلامه قال يزن بنرفزة ولوم..
/قتلك مادخلكش بيه ولا!؟لكن انت خلاص حمار مات في راسك..
المهدي بحده..
/يزن!
يزن بضيق وانزعاج..
/ولدك ينرفز يابوي يطلع الواحد عن طوره يدخل في روحه في مشاكل غيره وفي الاخير ماتجي كان ع راسه هو..اشر ع خوه وقاله..قوله يابوي معاش يدخل في حد بالذات صغار عمتي خديجه قوله خليك بعيد عنهم..
محمد بعصبيه:يزن سكر فمك ولا اطلع برا..
المهدي بصرامه..
/امنعوا الصوت انت وياه..
سكتوا وكل واحد فيهم كان مليان غضب ع التاني..
هني عمهم تكلم وقال..
/اني مع يزن المرة هادي يامحمد صغار خديجه خليك بعيد عنهم..شفت شي عرفت شي يابلغنا حني يابلغ بوهم ولااعمامهم من اليوم وبرا غادي خليك بعيد عنهم..
ركز المهدي بنظره ع ملامح محمد لاحظ انه متضايق ع الآخر..قاله..
/بتطلع العشيه وفالحوش نزيدوا نتفاهموا..
🍃🍃🍃🍃🍃
الساعه 2:00بعد الظهر..
كانت طوبى مقعمزة في الكوجينه شاده تليفونها وهي تتفرج ع فيديو ليه علاقه بالكورونا.. محتواه عن تجارب الناس اللي تعافت منها..
في عز انسجامها مع الفيديو جاها اتصال من غرفه..
تنهدت..فتحت الخط وردت..
/السلام عليكم..
"كان اني مااتصلتش ماتتصليش"
طوبى بضحكه..
/لا والله ماهكي..عارفاتك كان كلمتك بتهزبي..
"تستاهلي الضرب مش الهزايب بس يامهبوله تحسابيك بيقول بيه"
طوبى:والله مافكرت فيها ولا راجيت منه شي..
"هدا دهولك قلبك خلاص انتي من قبل قلبك زي حلوة الصوف"
ضحكت طوبى.
"اضحكي اضحكي..مخليه بنتك ع خاطره"
طوبى بإبتسامه..
/بعيد وبر كان جاتك حندير معاك نفس الشي..وبعدين بنتي في امان وعند من يرد باله عليها اكثر مني..
"ياودي معاش بناقشك اكثر من هكي خلاص..المهم توا شن حالك؟"
طوبى:الحمد لله في خيار الخير..انتم شن حالكم!؟
"حني حالنا باهي الحمد لله لكن الاكشن كله عند عيت شنيبه"
عقدت حواجبها وقالت..
/خير بلاهم!؟
"ياحنه ولد هديكا خديجه شوره خش عركه حز عليه ولد المهدي محمد وكلي نصيبه مسكين ضربه جاته بكمية في ذراعه.."
طوبى بصدمه..
/الله المستعان!
"رقدوا في القدس الزوز..اميمه قالت جرح ولد المهدي مش عميق..لكن البلي كله عند ولد خديجه شكله ياخد في مخدرات.."
طوبى بأسف..
/لاحول ولاقوة الا بالله
"كلمت سدرة بكري متغششة ياروحي ومشغوله ع المهدي هلبه قالت قاعد من امس في المصحه.."
طوبى بقلق..
/سكري سكري خل نكلمها..
"باهي..ردي بالك ع روحك"
طوبى:حاضر..السلام عليكم..
"وعليكم السلام"..
ونهت معاها المكالمه واتصلت بسدرة..
🍃🍃🍃🍃🍃
"ان شاء الله لاباس عليهم..بالسلامه.."
نهت فايزة مكالمتها مع نسرين وهي تقول بأسف..
/لاحول ولاقوة الا بالله..
مروة وتاله كانوا واقفات معاها في الصاله سمعوها وهي تتكلم..
قالت مروة بقلق..
/شن قالتلك!؟
فايزة:قالت ولد خديجه كان يتعارك مع ولاد،شافهم ولد المهدي محمد خش في العركه وحامى ع ولد عمته ضربوه بكميه في ذراعه..
مروة بأسف..
/تؤ..تؤ..تؤ...
تاله بضيق..
/قالتلي سدرة ديما حاصل في مشاكلهم وياريتهم يستاهلوا..
فايزة: يقعدوا صغار عمته في النهايه..
تاله بإزدراء..
/ريت هالعمة..
مروة:ان شاء الله يثمر فيها..
فايزة؛خلاص خلونا منهم توا وتعالوا نبدوا في الفطور..
وقبل لتتوجه للكوجينه وقفها اتصال جاها..
لما شافت المتصله ابتسمت وقالت..
/الحاجه فهيمه..
احمر وجه مروة تلقائيا وارتبكت شافت لاختها وقالت..
/تعالي نبدوا لين تجي امي..
ومشت طول للكوجينه وتاله لحقتها وهي شادة ضحكتها..
فايزة بإبتسامه..
/وعليكم السلام..الحمد لله في خيار الخير شن حالكم انتم..
🍃🍃🍃🍃🍃
"يانجوحه الولد من قبل ماينفعش رمضان اللي فات شده عمه اشرف فوق الحيط يسبس في نهار رمضان"
هادي نجمه تكلم في بنتها نجاح هاتفيا..
وحواليها عواطف مرقده تيم ع رجليها..
صفاء تهز بولدها في القعماز..وراما حداهم تسمع في حناها وهي قمة الضيق..
ياكم مؤلم الشعور اللي تحس بيه راما توا مخليها تفقد الرغبه في كل شي وتكره حياتها..
رفعت عيونها في صفاء..تمعنت فيها بنظرها وهي تتفكر كيف في يوم ما عايرتها باليتم...
نزلت عيونها والدموع نزلوا منهم بألم...
🍃كل سَاقِي سَيُسقىٰ بِما سَقىٰ وَلا يَظْلِم رَبُّكَ أَحَدًا.
من قهرَ سيُقهر ، ومن ضرَّ سيُضر ، ومن ظلمَ سيُظلم ، ومن عابَ اُبتِلي،فإن الله يمهلُ ولا يُهمل🍃
🍃🍃🍃🍃🍃
ومرت الساعات..
وجو الحزن ساد..والضغط النفسي في ازدياد..والقلوب المعبيه سواد ومسيطرة ع صحابها الأحقاد..قاعدة دبر في الدباير وتكيد في المكائد بش توصل لأهدافها الخبيثه...
🍃بعد العصر..
" جالي نازله لحوش العيله "
الجالي وهو راقد ع السرير ومغمض عيونه..
/زي ماقتلك تجنبي سدرة وطنشيها شن مادارت..
نجاة:حاضر..مانكش نازل تشوف ولد خوك؟
الجالي:تو نشوفه ع الفطور..عدلي المكيف قبل لتطلعي..
نجاه:باهي..
🍃عدلت المكيف وطلعت من الدار النوم..
نجاه:هيا جوري خودي خوك وانزلوا قدامي..
جوري:حاضر..
وخدت جوري خوها من يده ومشت للباب وامهم وراهم...
🍃وفي حوش محمد شنيبه..
كانوا نسرين وسميرة وسدرة في الكوجينه يجهزوا في الفطور..
ع خشة سدرة حامد تجري وهي تقول..
/روحوا..
كل وحدة فيهم خلت اللي في يدها ومشوا للحوض..
غسلوا ايديهم بالتناوب وطلعوا بسرعه..
🍃وبرا في الحمام الخارجي اللي روحوا من المصحه تناوبوا عليهم بش يغسلوا قبل ليخشوا..
لما جي دور نضال كان عمر واقف في الباب يسرقله في النظر..
شافه كيف يغسل في يده اليمين وكان في الامر بعض المشقه..
تباعد عن الباب قبل مايشوفه وهو يفكر ويتسائل بينه وبين نفسه..
"كيف يدير في باقي امور حياته!؟"
حس بألم كبير وهو يتخيل في معاناة خوه...
غير نظره لباب الحوش لما شاف نسرين طالعه تجري لمحمد..
ضماته بحذر وباساته من خده وقالت..
/ياروحي وليدي..شافت لذراعه وقالت..عطيهم كسرة ياربي..
محمد بضحكه..
/ماتبكيش مافيا شي ضربه عادي..
سميرة:حمد لله ع سلامتك حميدا..
شافلها وقال /الله يسلمك..
المهدي:هيا خشوا داخل..
ع جية نجاة وصغارها وين قربت منهم قالت..
/حمد لله ع سلامتك محمد..
بدت ع وجه المهدي ملامح الامتعاض..
ونضال لف وجهه للجهة التانيه وهو مش طايق وجودها..
محمد رد عليها بدون مايشوفلها..
/الله يسلمك..
وخشوا كلهم داخل الحوش..
تلقت سدرة محمد وهي تقول..
/حمد لله ع سلامتك ولدي لاباس عليك..
ابتسم محمد وقال..
/الله يسلمك خالتي شن حالك..
المهدي قعد يشوف لسدرة..
هي قالت..
/توا ولى باهي بعد طمنت عليك..
المهدي:هي حولوا شويه خلوه يمشي للمربوعه..
وتجي سدرة المهدي تجري لخوها ضماته وقالت..
/حمودي..
ضحك ومسح ع راسها وهو يقول..
/مافيا شي ياشفشه..
🍃وسلموا عليه بنات عمته وتحمدوله بالسلامه بعدين مشوا بيه الشباب للمربوعه..
والبنات ولوا للدار..ونسرين وسميرة مشوا للكوجينه..
نجاة وهي متوجهه للصاله سمعت المهدي يقول لسدرة..
/خليك شويه..
خشت للصاله وقفت ورا وحده من فرادي بابها المسكرة..
🍃المهدي:شن جو..
سدرة وهي تحاول تخفي ضيقها..
/خفنا عليكم هلبه..
المهدي:كانك عليا الكمامه ماحولتهاش بكل وكل شويه نبخبخ..
يدوب ابتسمت..
المهدي بإبتسامه..
/ومحمد حاله باهي الحمد لله..المهم انتي توا حالك باهي!؟
هزت راسها وقالت..
/الحمد لله..
المهدي:والشنيبيه اللي داخل امورها تمام؟
ضحكت وقالت..
/تبيها بنت شكلك!؟
المهدي:منك انتي نبيها بنت بش نسميها مهرة..
سدرة بضحكه:اشيه اشيه..
المهدي:مال شنو بنت المهدي وسدرة هادي الجواد والفرس ..
سدرة وهي تضحك..
/ايه واسمها يجمع بين حروف اسمك واسمي..مهدي وسدرة..مهرة..
المهدي بإبتسامه جانبيه..
/ياعيني عليك..
ضحكت سدرة وقالت..
/خلاص برا المربوعه خير مايطب علينا حد..
المهدي:حاضر بعدين نكملوا هدرزتنا..
ومشي بإتجاه المربوعه وهي تبع فيه بعيونها المغرمات لعند ماخشلها..
حطت يدها ع قلبها وتنهدت بإبتسامه..
بعدين لفت بتمشي للكوجينه لاقت خديجه جايه من دار امها شافت لسدرة بنظرة احتقار من فوق لتحت وقالت..
"قلوب ميته"..
وخشت للصاله..
غمضت سدرة عيونها محاولة منها لتمالك غضبها بعدين فتحتهم ومشت للكوجينه...
🍃في الصاله..
قعمزت خديجه وهي تقول..
/لاقال نشوف اختي لاقال نطمنها ع ولدها شدلي ست الحسن متاعه وقعد يتمعشق هو وياها زي المراهقين..
نجاة:نسمع فيها تضحك انصدمت فيها الحق مش وقته بكل الجو هدا مشنوق وباله في حلوة..
خديجه:تي هي توا متشمته الحقيره..
نجاة:بش تعرفي مش حتحصلي منها حاجه..
خديجه رفعت حاجبها وقالت..
/مش بحاجتها كان نبي حاجه تو نوصلها بروحي ..
غيرت نجاة نظرها للتلفزيون وبينها وبين نفسها كانت كعادتها هازيه ع خديجه وهي اكثر الشامتين بيها..
🍃🍃
ومازال الحبل ع الجرار وياما حتتشمت نجاة الليله وفي نفس الوقت حتستغل كل الفرص اللي تسنحلها بش توصل لمبتغاها...
🍃🍃بعد صلاة العشاء🍃🍃
مشت راما لحوش جدها شنيبه بش تشوف امها..
قعمزت معاها في الصاله هي ونجاه ونسرين وحناها حداهم ع كرسيها المتحرك..
بعد لحظات خشوا عليهم فرح واختها ومعاهم جوري وسدرة بنت المهدي..
🍃سدرة المهدي كانت ع اعصابها مش متحمله لاعمتها خديجه ولاصغارها..
لكن بسبب نوم سميره بعد الصلاة..ومرواح مرت بوها مع بوها للشقه برواحهم ماقدرتش تقعد بروحها وانجبرت تخش معاهم للصاله..🍃
فرح؛شن جو رموش..
راما هزت راسها وقالت..
/الحمد لله..
فرح؛سمعت قالوا بيديرولكم اسئلة استرشاديه تقروا منها ازمة الكورونا جت معاها..قالت كلامها الاخير وهي تضحك..
خديجه:اقري وانجحي بنتي احسن نجاح ماتخلي حد يتشمت فينا بنتي..
شافت نسرين لأختها بعدم رضا..
راما وهي تحاول تخفي ضيقها..
/حاضر..
🍃وفي شقة خالها المهدي..
كان ماشي بسرعه بإتجاه الباب وهو يقول لزوجته..
/انزلي لوطا..
سدرة بقلق..
/باهي قولي شن في!؟
المهدي وهو يلبس في شبشبه..
/بعدين نقولك بعدين..اطلع قدامي هيا..
لبست سدرة شبشبها وهي في قمة القلق..
فتحلها طلعت وهو طلع وراها...
🍃لما نزلت تحت..شافت الجالي وعمر خاشين مع للمربوعه الخارجيه زاد قلقها..
المهدي:خفي روحك..
زادت من سرعة مشيتها لين وصلت في باب الحوش وخشت..
ويدق باب الحوش الخارجي مشاله المهدي طول وفتحه...
محي الدين بقلق..
/السلام عليكم..
المهدي:وعليكم السلام..خش خش..
خش محي الدين وهو يقول..
/شن في!؟
المهدي:تعال معاي للمربوعه...
ومشوا مع بعض بإتجاه المربوعه...
🍃وتخش سدرة للصاله وهي تقول..
/السلام عليكم..
ردوا عليها كلهم ماعدا خديجه ونجاة ومغليه حتى لو كانت تقدر تتكلم مش حترد عليها ولاتشوف لوجهها..
قعمزت سدرة جنب نسرين وقالت بصوت منخفض..
/اشبح من اتصل بالمهدي وقاله حاجه وتراته..
نسرين بنفس درجة الصوت..
/وينه المهدي توا؟
سدرة:اتصل بمحي الدين وقاله يجي..
نسرين بقلق..
/يستر الله..
خديجه؛خيركم قارنات الروس..
رفعت نجاة حاجبها وهي تشوفلهم..
نسرين؛لاقارنات الروس ولاشي نهدرزوا عادي..
"نسرين"
نسرين:نعم نضال!؟
"خليك محمد راقد في المربوعه مرة مرة شوفوه اني طالع للخارجيه..
شافت نسرين لسدرة وقالت..
/باهي باهي..
نجاة؛شكله اشبح من جايه..
راما بحزن :بالله شن حاله محمد!؟
لما سمعت سدرة المهدي السؤال حست وكأنه صعقها الضي..
ردت ع راما تلقائيا بحده..
/شن دخلك بيه!؟
بدت ع وجوه الجميع ملامح الصدمه..
سدرة المنتهى:سدرة!
سدرة المهدي بغضب..
/معاش تسألي ع خوي ولاعندك دخل بيه ساده البلي اللي جاه من وراكم..
نسرين؛سدرة عيب شن الكلام اللي تقولي فيه هدا!؟
خديجه بحده؛قليلة ادب من قبل وتوا زادت..
ردت عليها تقول..
/مش اني قليلة ادب بنتك قليلة الادب..
بدت راما تبكي..
وسدرة المنتهي تقول..
/سدرة بنتي عيب هكي اسكتي خلاص..
خديجه بكره..
/انتي من قبل شلولح يابال تخلطي على الشلولحات..
فنصت نسرين في اختها..وسدرة شافتها بحده..
اما سدرة المهدي ردت بأنفعال..
/كان اني شلولح بنتك صايعه..
نجاة:تؤ تؤ تؤ..
سدرة المنتهى بصوت عالي..
/سدرة نوضي اطلعي قدامي..
سدرة انهارت بالبكي وهي تقول لخديجه..
/ساد اللي درتوه لأمي لين لماتت تبوا ديروه لمحمد لين تقتلوه حتى هو ربي مايسامحكم..
خديجه بتعجب..
/حيه..حيه!!؟
نجاة بهمس..
/يالطيف!
سمعتها سدرة المنتهى اللي كانت في قمة الوجع والغضب التفتت ع نجاه وقالت بإنفعال شديد..
/انتي سكري فمك واسكتي ياشيطانه يافتانه ياسحارة..
قدمتلها وطبست وقالت بتهديد..
/اسكتي وخليني ساكته خيرلك..
ونجاه تشوفلها بحده وتحدي..
وخرت عنها سدرة ومشت خدت بنت راجلها وضمتها ليها وطلعت بيها من الصاله بكل..
ناضت نجاة وهي تقول..
/لاخلاص لهني وياسر خليتهالها واسعه وعريضه..
مشت بسرعة طلعت من الصاله وبنتها جوري تلحق فيها بنظراتها الحزينه وهي ترجف..
راما ببكي:ياريتني ماجيت..
خديجه خدت يدها وقالت..
/تعالي نمشوا لدار حناك تعالي..
ومشت بيها خديجه لأمها اللي كانت في قمة الغضب..
دفت بيها الكرسي وطلعت بيها هي وبنتها..
فرح بصدمه..
/لاماما حني لازم نروحوا غدوة..
نسرين بضيق:اريحلكم...
🍃وفي نفس الوقت اللي صارت فيه هالزوبعه كانت صايرة زوبعة تانيه في المربوعه الخارجيه...
"تبي تقولي ان ولدي هو اللي خنبني"
المهدي بضيق..
/للأسف...
محي الدين ضحك بصدمه وقال..
/امس الدكتور يقولي احتمال ولدك يطلع مدمن وانت توا تقولي ولدي هو اللي خنبني!
بدت ع وجوه الجالي وعمر ونضال الصدمه بعد ماسمعوا اللي قاله عن كلام اسامه..
المهدي:تأكدوا منها الحاجه هادي!؟
محي الدين بصدمه..
/اليوم رفعوا عينه منه يحللوها..
نضال بأسف شديد..
/الله المستعان!
الجالي بعصبيه..
/وانت وين كنت راقد اللي ولدك داير هدا كله!
المهدي:جالي!
محي الدين بغضب..
/اني وين راقد ولااختك اللي لا عرفت تربي ولاعرفت تكون مراة مقومه!
عمر:الزم حدك احسنلك..
محي الدين ناض وهو يقول.
/انتم اللي الزموا حدودكم وياسركم عاد..
المهدي:محي الدين قعمز ارجوك.
تضال بإنزعاج؛وانتم تعوذوا من الشيطان واسكتوا..
الجالي:مانيش ساكت ساد ماسكتنا للنماذج اللي زيه وعطيناهم فرصة يتمادوا علينا..
ضحك محي بسخرية وقال..
/ياوالله عليك حالة..انت اخر واحد يتكلم يالجالي انت مفروض ماتدويش بكل..
ناضله الجالي بغضب وهو يقول..
/ياعن جد اصلك مرة وحده..
وجي بيتهجم عليه لكن خوته ناضوله وحالوا بينهم وبينه..
محي الدين:اني كنت محترم الحوش اللي قاعد فيه يامهدي لكن خوك هدا مايبيش من يحترمه..
عمر بحده؛انت وصلت في اخته وتبيه يسكتلك..تبي طلع خديجه بس اللي غالطه وحضرتك خالي قضيه!
الجالي:لو كنت راجل في حوشك حق راهو ماوصلتش بولدك يخنبك..
المهدي بحده؛عمر جالي اطلعوا برا..
محي بضحكه ساخرة..
/قالها الراجل اللي ماعنداش كلمة ع حياته..
الجالي دف المهدي وضرب محي الدين ع وجهه وهو يشتم فيه..
شدوه عمر والمهدي بقوة عنه..
محي الدين بضحكه ساخره..
/هزلت قسما بالله..
ومشي طول طلع من المربوعه ونضال معاه بنظرات كلها اسف وضيق..
والجالي مازال يشتم فيه..
دفه المهدي وقال بغضب..
/كويس اللي درته !؟؟عندك باهي هكي!
مشي وهو ينش في يده بلامبالاة..
لحقه المهدي وهو يقول..
/قاعد نكلم فيك!
مشي خش للحوش وهو ينادي..
/نجاة..نجاة..
ع جية نسرين تجري..
شافت المهدي خش وهو يدف في الجالي ويقول..
/شن انت معاش محترم حد خلاص!
الجالي:مانبيش نوصل فيك ونزعلك يامهدي!
عمر:خلاص يامهدي صلوا ع النبي بوي راقد داخل وامي مريضه مش ناقصين رعاش..
نسرين بخوف..
/خيركم يانهاري!؟
الجالي:نجاة والصغار داخل!
جاته جوري تجري بعد ماسمعاته ينادي في امها قالت بزعل..
/ماما ركبت تبكي كشخت عليها مرت عمو..
الجالي ابتسم تهكما وشاف للمهدي وهو يقول..
/كويس كويس بكل..
دف الباب بيده فتحه ع وسعه ومشي..
نضال؛علاش تعاودي ياجوري غلط هكي!
جوري بخزن:ماما سخفتني مرت عمو قريب ضربتها..
نسرين:جوري!
المهدي:صار منهاالدوة هادي يانسرين!؟
شافتله نسرين وقالت..
/تعال معاي للصاله وتو نحكيلك اللي صار..
المهدي:سدرة وين!؟
نسرين؛في دار التقعميز راقده هي وبنتك..
تنهد عمر بضيق ومشي للدروج بش يركب لداره..
ونسرين والمهدي مشوا مع بعض للصاله..
اما نضال اللي كان مستاء جدا من اللي صار توجه للمربوعه بش يقعد حدا محمد..
🍃وهدا كله صار ويزن ومحمد حامد وحمزة في الريفودجي
محمد حامد كان يصور في فيديو لاغنيته الجديده عن الكورونا ويزن وحمزة يساعدوا فيه..
#الحجر
#طوبى
...يتبع...
