■■■■■■■■■■■■■■■■■■■■
❎تنويه❎
بعض احداث اقسام جزء #منازل_القمر صعبة ومرهقه نفسيا
#طوبى "جنة طوبى"
#جمان_فريد
#الجزء_116"منازل القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لقد شابت الروح وكثرت تجاعيدها لله أجر شبابنا الذي لم نعشه🍃
________________________________________
الساعه 1:30بعد منتصف الليل..
في الصاله..
كانوا راقدات والشباك مفتوح عليهم يدخل في النسمه البارده وضي القمر اللي حيوصل لتمامه الليله الجايه..
غرفه واريج كانوا غارقات في النوم..راقدات براحه..
لكن طوبى حتى في نومها مش قادرة ترتاح..
🌠تشوف في منام..وكأنها تمشي في شارع مظلم مش باين منه شي..تمشي وتمشي..ضايعه مش لاقيه دليل..
كانت خايفه..مرعوبه..
وهي مازال تمشي بان عليها شي خلاها توقف..
بحر..والقمر نازل فوق البحر كان كبير وضخم زادت خافت خافت هلبه...
🌠وتفيق وهي تشهق وكأنها طلع في الروح وفيقت معاها غرفه واريج اللي انفجعوا..
قربولها الزوز وهما يسألوا فيها..
"طوبى..طوبى خيرك!؟"
حطت يدها ع صدرها وهي دور بعيونها في المكان..
قلبها كان يدق بقوة من الخوف..الخوف الرهيب الغير طبيعي..
حطت غرفه يدها ع ظهرها وهي تقول..
/طوبى..
شافت طوبى لغرفه شويه بعدين خشت في حضنها وهي ترجف..
ضمتها غرفه وهي خايفه ومتألمه وقالت لأريج..
/جيبي ميه..
🍃ناضت اريج اللي كانت ترجف من خوفها ع طوبى وعقلها يفكر في اللي قاعد يصير معاها بدت فعلا مقتنعه انه مش مرض نفسي...
وغرفه بدت تشك في الوضع طلوعها في الليل وكأنها منساقه مش بإرداتها ووين تفيق اليوم التاني ماتتكلمش عن الحاجة هادي وكأنها ماصارتش..الشي هدا يدل وبقوة عن ان اللي فيه طوبى مش تعب نفسي..
🍃🍃
قرت غرفه ع الميه وعطتها لطوبى..شربتها وولت رقدت عادي..
لكن اريج وغرفه معاش قدروا يرقدوا..قعدوا يراقبوا فيها بدون ماتعلق وحده فيهم عن اللي صار...
🍃🍃🍃🍃
ويطل تاني يوم...
..الإربعاء..
الرابع عشر من شهر محرم..
2سبتمبر...سنة 2020..
العصريات..وزي مانقولوا العشيه..
وحده من خوات ربيع مشت لحوش اهلها تزور امها واكيد اول موضوع حيتفتتحوا بيه حديثهم بعد السؤال عن الاحوال هو نسرين وفضايح اهلها..
🍃ام ربيع؛المرة هادي حسيته مش زي قبل..
بنتها قالت:كيف يعني!؟
قالتلها؛مادافعش عنها حسيتها بدت تطلع من خاطره..
ابتسمت بنتها بفرح وقالت..
/زعمه يام!
ام ربيع:اني اللي نعرف ولدي كويس،حتى فتحتله موضوع صاحبتك ماقال شي..
قالتلها بنتها بتمني..
/ياريت يام ياريت يطلقها ويفتك منها ربيع يستاهل خير من هكي..
امها قالت:ايه والله..المهم توا ديري اللي بنقولك عليه اعزمي صاحبتك نهار ع المطعم متاعه وخليه يشوفها غادي..
ضحكت بنتها وقالت..
/مادام زي ماقلتي معاش عنده لبنت شنيبه خل نضربوا الحديد وهو حامي ونعرفه ع الهام طول هو غدوة خميس تو نعزمها غدوة..
امها قالت؛قوليلها تجيب صغارها تعرفي خوك نقطة ضعفه الصغار اصلا ماخداش العزوز هديكا الا ع خاطر ولدها..
قامت بنتها هاتفها وهي تشوفله وقالت..
/تو نكلمها توا..
🍃🍃🍃🍃
"شن حالها يانسرين"
نسرين بألم؛نفسيتها مدمرة تبكي وتقولي وجهي تشوه ياخالتي معاش نقدر نمشي للمدرسه..
نزلت خديجه عيونها وهي تبكي..
تنهدت نسرين بحرقه وقالت..
/الله غالب الله غالب..خديجه..
خديجه قامت عيونها فيها..
نسرين:بوي قالك وتي حوايجك غدوة بيرفعك لزليطن..
خديجه ببكي ورجاء..
/بالله حاولي معاه يانسرين بالله عليك كيف بنعيش غادي اني كيف..
نسرين؛صدقيني خير من عيشتك هني انتي حتى من الدار هادي مش قادرة تطلعي..
قالت وهي تبكي..
/الله لايربحه الله لايسامحه ولد نجمه الفاسد هداكا الله لايهنيه هو الحقيره هديكا ان شاء الله يلحق رجالاتها الاولين الوسخه هادي..
ناضت نسرين من حداها ومشت طلعت من الدار وسكرتها عليها وخلتها تبكي وتندب..
مشت بخطوات ثقيله بعض الشي لدار امها كانت مفتوحه..
خشتلها ومشت قعمزت مقابلتها ع السرير.
مغليه كانت تسمع في عياط خديجه وهي تبكي..
نزلوا دموع نسرين وهي تشوفلها و تقول...
/مش قتلكم قبل يام بلاش فكونا..ماديروش هكي حرام عليكم..كنت عارفه وحاسه يوم زي هدا جاي يام ربك مايخلي شي..رشفت وكملت تقول..ياريتني كنت قويه زي خديجه راهو ماخليتكم ديروا شي من اللي درتوه..راهو ع الاقل ماسكتش عنكم..ياريت بدال مانخاف منكم خفت عليكم وعليا من ايام زي هادي يام..
مغليه كانت تسمع وتبكي زي ماكانت سميرة اللي مقعمزه في الكوجينه تسمع في كلام نسرين وواجعها الحال..
🍃لكن مش كل الناس تدرك ان ماينزل بيها من عقوبة هو عقوبه فعلا..في اللي يشوفوا انه عين..قلة حظ..حسد..سحر ولأن قلوبهم مختوم عليها بسبب الكبر ماشافوش الوضع ع حقيقته زي ماصار لإبليس بالضبط..🍃
🍃🍃🍃🍃
وفي حوش طوبى..
كان الحوش عامر بحس الهدرزة والضحك..
هاديه وصفيه وغرفه ملتمات ع سفركبار وصواني كبار مليانات بعجاين الحلويات الزمنيه منها والحديثه..
وفي الجنان اريج لاهيه مع الصغار تلعب معاهم تضحك وتصيح زيهم وعايشه اجوائهم الطفوليه..
الوحيده اللي غايبه عنهم اميمه كانت في المصحه..
او لا مش هي الوحيده الغايبه..حتى طوبى بس غيابها كان مختلف..
معاهم ومش معاهم...تتفرج عليهم شن يديروا وهي حاسه بضيق شديد..
خاطرها تعاونهم لكن مش قادرة لأنها معاش تعرف..
هي القهوة معاش عرفت اديرها!!..
هما مالاحظوا عليها شي غريب لتوا لأنها قاعده تظاهر انها منسجمه مع هدرزتهم..هدرزتهم اللي مش قادرة تركز فيها بسبب التشتت والسرحان اللي ولوا ملازمينها الفترة الاخيرة..
"طوبى"
استاقظت وشافت لصفيه اللي قالت..
/ارفعي الطاجين هدا للكوجينه..
طوبى:حاضر..
ناضت وطبست ع الطاجين الكبير خداته ومشت بتطلع بيه للكوجينه الخارجيه وين مافي الفرن الكبير..
غرفه كانت خايفه لتصيرلها حاجه وهي ماشيه بيه ناضت وقالت..
/خل نمشي نشوف الصغار..
ومشت طول طلعت وراها وعيون هاديه وصفيه يتبعوا فيها..
🍃طلعت غرفه برا لقت طوبى خاشه بالطاجين للكوجينه..
سمعت صياح ولادها التفتت جيهتهم شافتهم يلعبوا بالكرة ابتسمت..
🍃وطوبى في الكوجينه حطت الطاجين في الفرن وسكرت عليه بعدين طلعت..
وين وصلت في الباب وقفت فيه لما شافت غرفه واقفه في الجنان تشوف لأريج والصغار فهمت انها كانت طالعه وراها..
مابتش تكلمها نهائي مشت بإتجاة الكوجينه الداخليه بدون ماتحس غرفه وخشت داخل..
🍃🍃🍃
وتروح اميمه بعد المغرب وتبلغهم ان يوسف ومرته مروحين الاسبوع الجاي وعاد صفيه ماعندهاش وين تحط فرحتها بهالخبر..
لهوا بالكلام عنه لعند ماخشوا عليهم فايزة وبناتها وكبرت اللمه وزادت الزحمه..والدوشه..وراس طوبى بدي يصدع..
قعدت تمرر في نظرها عليهم وتحاول تركز مع هدرزتهم مش قادرة..
فجأة..الرؤيه عندها بدت ضبب والضي في المكان ولى ساطع هلبه..غمضت عيونها وفتحتهم زادت ضببت الرؤيه لكن سطوع الضي بدي يخف..شويه وبدت تحس براسها ينمل..
وكأنه جيش من النمل يجري تحت جلدة راسها..وينتقل التنميل هدا لجسمها كله حست بقشعريرة..وبعدها بدي شعور الوخز..
معاش قدرت تتحمل ناضت ومشت بتطلع من الدار..
سألتها اريج..
/العشي يذن!؟
طوبى وهي تحاول تخفي ضيقها جاوبت بتشتت..
/مش عارفه لكن قريب..ومشت طلعت بإتجاه دارها..
وماحد ركز عليها غير رفيقاتها في الحياة حاليا..
...اريج وغرفه...
🍃هي خشت لدارها وسكرتها عليها..مشت رمت نفسها ع السرير وغمضت عيونها وبكل مااوتيت من قوة بدت تقرا..
"بسم الله الرحمن الرحيم الحمد لله رب العالمين"
وهي تقرا بدي ينزل عليها النعاس وبدت تتلعثم في الايات وتقول في كلام غريب وفي النهايه رقدت...
🍃🍃🍃🍃
الساعه 10:00ليلا..
في الجنان..
تحت كرم العنب..
غرفه ودموعها ينزلوا..
/هني يااميمه ماتجيش الا هني ترقد وهي مقعمزة..تقولي نبي البروده ياغرفه..ترقد شويه بس راهو ولما نوضها تنوض تخش معاي..
اميمه بألم ودموعها في عيونها قالت بتساؤل..
/باهي شن معناه هدا ياغرفه؟
رشفت غرفه وقالت..
/مش عارفه علاش بديت نحس فيها مسحورة..
اميمه بخوف..
/باهي مش قلتي تقروا عليها وتشربوا فيها مية رقيه وماتتأثرش..
غرفه بحيرة وألم..
/مش عارفه يااميمه مانبيش نصدق ان عقل اختي صارت فيه حاجه..معقوله طوبى ولت مريضه نفسيا معقوله!!
نزلت اميمه عيونها للأرض وهي تذرف في الدموع..
غرفه بقهر:الله لايسامحهم الله لا يسامحهم ويقهرهم كيف ماقهروها..ولا هادي سدرة ماقالت نجي نهار نشوف اختي ماقالت تتصل بيها حتى اتصال..اني مش قادرة نستوعب اللي دير فيه والله لتوا مااستوعبته..
🍃قدام المربوعه..
طلع حسين بيدير اتصال سمع حس هدرزة..شاف يساره بانوا عليه اميمه وغرفه واقفات تحت كرم العنب يبكوا..
عقد حواجبه بضيق ومشي ناحيتهم..
وصل فيهم وقال..
/صلوا ع النبي..
مسحت غرفه دموعها واميمه قعدت تشوفله بحزن..
وقف عليهم وقال..
/اكيد تدووا ع طوبى..
التزموا الصمت ودموعهم مازال تنزل..
تنهد بضيق وقال..
/كان بنقول اللي عندي تزعلي ياغرفه..
غرفه بنبرة باكيه..
/مش ساهله ياحسين والله ماساهله..صح مرات تكون مصلحتها فيها لكن القدام حتعبها الحاجه هادي حديرلها مشاكل ليها اول ماليها اخر واولهم جنه..
حسين:تقعد هكي خير ياغرفه!
حطت ايديها ع وجهها وانهارت بالبكي..
ضمتها اميمه وهي تبكي معاها بصمت..
اما حسين اللي حس بقلبه انعصر عصر وهو يسمع في صوت بكاها مشي بسرعه للكوجينه دق ع بابها مرتين لما ماجاه رد من حد..
خش للكوجينه لقاها فاضيه..صب لغرفه طاسة ميه من الثلاجه وطلع...
🍃🍃🍃
مقعمزين حوالين الطاوله..
اميمه وجنبها غرفه شاده طاسة الميه وتشوف في الفراغ..
وحسين مقعمز مقابلهم وهو يشوفلها تنهد وقال..
/شن رايك نقعمزوا مع طوبى نتكلموا معاها بصراحه عن وضعها؟..
شافوله وهما يفكروا في كلامه..
حسين؛طوبى واعيه تعرف مصلحتها وحتتفهمنا...
تنهدت غرفه بحزن ودموعها نزلوا مرة تانيه..
حسين بإنزعاج..
/خلاص عاد ساد بكي من امتى انتي بكايه هكي!
مسحت اميمه ع ظهرها وهي تقول..
/كلنا حنوقفوا معاها لين نطلعوها من الحالة هادي بإذن الله..
غرفه غمضت عيونها وقالت برجاء..
/يارب..
ابتسم حسين وقال..
/نبي نصارحك بحاجه..
اخته شافتله وهي رافعه حواجبه..
وغرفه فتحت عيونها وهي تشوفله وتراجي فيه يكمل كلامه..
حسين؛مش قادر نستوعب انك نفسها غرفه وسامحيني يعني كنتي تنغري من طوبى لدرجة الكره وماتوديلهاش الخير بكل لين مرات نشك انكم خوات..
اميمه بصدمه..
/حسين!
حسين؛الصراحه..يعني..حك حاجبه وقال..كنتي بصفه عامه ماتحبي تشوفي حد خير منك ومايهمك حد كان روحك..
اميمه:خلاص عاد حسين زودتها..
مسحت غرفه دموعها وقالت..
/هو صح كلامه مش وقته لكن عنده حق..مررت نظرها ع الطاوله بعدين شافتله وقالت..مانيش ناكرة ولاعمري حننكر اني كنت زي ماقلت ومرات اسوأ بهلبه لكن الدنيا تعلم واللي يتعلم منها يتغير..يتغير فيها تفكيره ونظرته للحياة واني مريت بهلبه حاجات علمتني ووعتني وفتحت عيوني..وخل نقولك حاجه طوبى قدرت دير فيا اللي ماعرفتش ديره سدرة..طوبى ولا مرة قالتلي الكلام اللي انت قلته توا وين شافتني تغيرت معاها ولامرة قالتلي كنتي كذا ودرتي كذا طوبى حسستني انها عمرها ماشافت مني شر حسستني بقيمتي قعدت تدافع عني قدامي ووراي نظرة اللي حواليا ليا قاعده زي ماهي الا في عيون طوبى كانت ديما تحسس فيا اني حاجة كبيره..نزلوا دموعها وهي تقول..اني ماحسيتش ولامرة ان سدرة امي..لكن حسيت طوبى امي..
☘اميمه كانت تسمع فيها وهي تشوفلها ودموعها مابطلوش نزول كل كلمه تقول فيها ع طوبى خلتها تحس بنفس المشاعر اللي حستهم غرفه حتى هي يوم من الايام كانت في مكان غرفه مع اختلاف المواقف وقتها طوبى كان عمرها بس11عام لكن قدرت تخلي اميمه تحس بقيمة نفسها وتبدا تحبها☘
غرفه وهي ترشف كملت تقول..
/اني توا معاش نقدر نتخيل حياتي وطوبى مش فيها لو صار فيها شي هدا وين حنحس اني..
"فقدت امي"
حطت ايديها فوق عيونها وقعدت تبكي بصمت..
واميمه خدت يدها التانيه حضنتها بإيديها الزوز وقعدت تبكي معاها..
حسين فنص عيونه وقال..
/يابقرة انت وياها بتبكوني يازفتات..
انقلب بكاهم ضحك في لحظه..
وهو ضحك معاهم وقعد يمسح في عيونه بقوة...
🍃وهما في الجنان..
كانوا هاديه وصفيه وفايزة وبناتها مقعمزات في الصاله يحطوا الحلويات في حوافظهم.
واريج في دار المعيشه الصغار ترقد فيهم وفي دار اللي مقابلتها كانت طوبى رايحة في النوم..
🍃🍃🍃"ايه حقة تعالي جاي منين جاتك السيارة هادي!؟"
غرفه شافت للسيارة وردت نظرها ليه وهي تقول..
/شريتها..
ضيق عيونه وقال..
/بروحك!؟
غرفه:ايه مشيت لمعرض صغاري واخترتها بروحي..
عقد حواجبه وغير نظره للسيارة وهو ملتزم الصمت..
ناضت غرفه وهي تقول..
/خل نمشي نشوف مئاب رقدت ولالا..
ومشت خشت للكوجينه..
اميمه وهي تشوف لخوها قالت..
/تبي حاجه حسين؟
بدون مايشوفلها قال..
/لا..
ناضت وهي تشوفله بعدين مشت خشت للكوجينه وسكرت الباب...
🍃🍃🍃🍃
"انت كتبت كلماتها!؟"
حمزة:ايه ليا اسبوع نكتب فيهم..
يزن:عادي نقراها..
حمزة؛لا نبي محمد بس يقراها كان عجباته يغنيها وقتها اسمعها.
ابتسم يزن..
محمد حامد؛باهي جيبها ترا..
ناض حمزة ومشي خش للحوش ع طلعة جوري وقفت قريبه عليهم وقالت..
/بالله عليكم شوفوا قطوستي كان جابت..
ضحكوا ويزن قال..
/حاضر..
ناض ومشي للصندوق متاع القطوسه..
محمد حامد؛نبوا زردتها..
جوري بضحكه:سيمو قالت بديرلها عصيده..
قعد يضحك محمد..
ع جية يزن وهو يقول..
/مبروك جابت 4..
طارت جوري تجري للصندوق ونست خوفها من الظلام..
ويزن ومحمد يضحكوا عليها..
ع طلعة حمزة بكراسه في يده شافهم يضحكوا قال..
/على شن تضحكوا!؟
محمد؛قطوسة اختك جابت..
ابتسم ابتسامه خفيفه وقدم لمحمد عطاه الكراسه..
ومحمد خداها منه وبدي يقرا...
🍃في الوقت اللي فيه امه راقده ع سريرها وولدها جنبها تذرف في دموع بلوا وسادتها..
حاسه بشي متجمع في صدرها وكاتم ع انفاسها كانت تتمنى لو تقدر تصرخ بأعلى صوتها بش ترتاح شويه...
لكن هي وين والراحه وين...
🍃الراحه اللي معاش عرفت للتارقي الطريق حاير وضايع ومش عارف شن يدير..هو توا يبي معجزة يبي من الله سبحانه وتعالى معجزة تحقق اغلى اماني حياته..
هو توا مقعمز في بالكونه شقته..يتأمل في القمر اللي تم اكتماله..خطر ع باله بيت شعر بالفصحى قاله...
"يا ليلُ هَيَّجتَ أَشواقًا أُداريها
فَسَل بها البدرَ إِنَّ البدرَ يدريها"
🍃🍃🍃🍃
الساعه 2:00بعد منتصف الليل..
فتح حسين باب المربوعه الخارجيه وطلع للحمام الخارجي خشله وسكر الباب..
🍃واللي في الحوش كانوا كلهم راقدين في الصاله وهوا المكيف البارد يهب عليهم..وقف صوته شويه لأنه استاكا..
فهاللحظه صدر صوت ضجه جاي من برا فيق غرفه..
ناضت قعمزت وهي مفزوعه شافت لمكان طوبى لقاته فاضي طول وقفت وطلعت تجري من الصاله...
🍃في نفس الوقت..
كانت سدرة جايه من الكوجينه لدار النوم بعد ماكانت تشرب في ميه..
اول ماخشت الدار وقفت جامده في مكانها لما سمعت صوت صرخة كسرت هدوء هالليله الطويله..
🍃هالصرخه سمعها حسين بعد ماطلع من الحمام شاف لمصدرها عيونه جو جهة كرم العنب شاف شي خلا عقله يطير من راسه طول طلع يجري بإتجاهها..
ع طلعة امه واخته واريج وهاديه الاربعه طلعوا من باب الكوجينه الخارجي..
اريج وين شافت جهة الكرم عيطت ع طول حسها اما اميمه مشتله تجري..
صفيه وهاديه كانوا في حالة صدمه..اللي شافوه كاد يوقف قلوبهم..
غيروا نظرهم لعبد المطلب لما سمعوه يقول وهو مفجوع..
/يارب لطفك يارب لطفك..
🍃عند الكرم...كان في اعلى المظله خشبه ملفوف عليها طرف شاربه نهايتها كانت ملفوفه حوالين رقبة طوبى..
طوبى اللي كانت غرفه شادتها ورافعتها فوق وهي تبكي وترجف..
وحسين جنبها واقف ع الكرسي اللي كان طايح تحت طوبى يفك في ربطه الشاربه عن رقبتها..
هدا كله وطوبى كانت بين الوعي واللاوعي..
بعد مافك حسين الربطه اميمه قالت وهي ترجف..
/نزليها ياغرفه نزليها..
بدت تنزل فيها غرفه وهي تبكي لعند ماجي وجه طوبى مقابل وجهها شافتلها طوبى بنظرات كلها الم وضعف وغمضت عيونها...
صوت صرخات غرفه لحظتها فيق شارع القهوة كله..
اريج كادت تنجن وصفيه وهاديه يبكوا بالصوت..
🍃🍃
طلعوا فايزة وبناتها يجروا من الحوش..
ع طلعة المهدي ومعاه سدرة اللي كانت تجري حافيه ونست انها حامل...
مجرد ماوصلوا للباب انفتح سمعوا صوت منبة سيارة حسين..
تباعدوا من قدام السيارة وهو طلع بيها يجري كانوا معاه الى جانب طوبى اميمه وغرفه..
سدرة بعياط:ارفعني يامهدي ارفعني.
المهدي شدها وهو يقول..
/حاضر حاضر خشي شويه وجايك بالسيارة..
بعدين طلقها ومشي يجري للحوش..
وهي جتها فايزة اللي كانت ترعش بكل مافيها خدتها وخشت بيها لحوش طوبى هي وبناتها...
ومازال صراخ اريج مسموع في الشارع كله ونضال اللي كان واقف مع خوه عمر وولاد خوه واخته قدام باب حوشهم يسمع فيها وقلبه يتقطع تقطيع...
🍃🍃🍃🍃
الساعه 4:30صباحا..
"مش منطقي اللي تقولوا فيه الراجل شد قلبه ويقولي بنموت وانت تقولي قلبه مافيه شي"
الطبيب:يامدام زوجك عنده مشكله نفسيه متعلقه بالتوتر العالي التوتر يدير اعراض توهم المريض بحدوث مشكله في قلبه..
فاتن ودموعها ينزلوا..
/توتر شنو!قبل ليرقد كان ينكت ويضحك ومافيه شي.
الطبيب:هدا مايدلش ع انه مايعانيش من ضغط نفسي او توتر..
مسحت بإيديها ع وجهها ووخرت بيهم شعرها للخلف وهي في قمة القلق..
الطبيب:طمني بالك يامدام هو توا حاله باهي تقدري تخشيله..
هزت راسها ومشت خشت للحجرة والطبيب حرك راسه يمين ويسار اسفا ومشي..
