#طوبى "جنة طوبى"
#جمان_فريد
#الجزء_117"رحلة حب وحرب"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "عندما يشعر الإنسان بالمحبّة تتغير جودة الأيام في عينيه للأفضل..
تزهو اللحظات، وتتمدد الراحة في كل لحظة..
لا يطلبُ المرء أكثر من هذا..
محبّة صادقة دون حاجة أو دافع .."🍃
_________________________________________
ومرت ساعات الليل..
وهو ساهر ليلها..يرقد ويفطن ويتفقد فيها...
كانت تتكلم في نومها بكلام مش مفهوم ومرات تأن..
وهو يقعمز حداها ع رووس اصابعه يفيقها..تفيق وترجع ترقد وهو مايفارقهاش الا بعد مايقرا عليها وهو حاط يده ع راسها..
🍁بعد مااطمن انها رقدت بعمق رجع لمكانه وعيونه مافارقوهاش..ولكن لأنه انسان..طبيعي يتعب ويغلبه النوم
غصب عنه غفي وهالغفوة غالبا ماتعدتش العشرة دقايق ويأذن الفجر..
هي كالعاده ساعتها البيولوجيه او بالأحرى القلبيه تفيق فيها ع صوت الآذان..
وهو لما سمع صوت الآذان فتح عيونه بفزع وشافلها في نفس اللحظه اللي هي ناضت قعمزت فيها وشافاته..
قعدوا يشوفوا لبعض بعدم استيعاب...
بعدين هو استاقظ وقال..
/شني!؟
وهي بعد سؤاله استاقظت احمروا خدودها لما جاوبت عليه تقول..
/شي..
طلعت بصوت طفولي خلاه يبتسم وهو عاقد حواجبه..
هي يدوب ابتسمت بخجل وقالت..
/الفجر..
غير نظره لشباك دارها وهو يسمع في اخر الآذان..
"الله أكبر الله أكبر...لاإله إلا الله"
رد نظرها ليها شاف في وجهها ملامح الضيق سألها..
/حسيتي بشي!؟
طوبى بضيق..
/شعور مش عارفه كيف نوصفه يضايق هلبه..
نزل رجليه وقال..
/جنبك الميه اشربيها..
التفتت شافت الشيشه ع الكامدينو..
زاد شعورها بالضيق..
عبد القيوم:قولي يارب..
شافتله بضيق وخوف..
هو بادلها بنظرات تشجيع وهز راسه..
تنهدت والتفتت وهي تقول..
/يارب..
خدت الشيشة فتحتها وبدت تشرب وهو يراقب فيها..
كملتها وحمدت الله بعدين قالت..
/خايفه..
عبد القيوم:معاك ربي ماتخافيش..قولي حسبي الله ونعم الوكيل وبري توضي..
خدت نفس وزفرت وهي مغمضه عيونها..
عبد القيوم؛حسبي الله ونعم الوكيل..
طوبى؛حسبي الله ونعم الوكيل..
لما قالتها طلعت من قلبها..حست بمعية الله..تيقنت تماما انه معاها..هالاحساس خلاها تطمن..فتحت عيونها ونزلت من السرير ومشت طلعت من الدار..
هو ناض لحقها وقعد واقف في باب الدار لعند ماخشت للحمام بعدين مشي طلع للحمام الخارجي..
بعد ماطلع بدقايق هي طلعت من الحمام ومشت للدار..
خشتلها ومشت طول للشماعه اللي معلقه عليها المنشف..
خداته وتوجهت للزيانه..وقفت قدامها وبدت تمسح في وجهها..وهي تشوف للمرايه ركزت ع شكلها..
وجهها اللي كان ضاعف هلبه..لونه الشاحب..الهالات اللي تحت عيونها..عيونها نفسهم كانوا منفخات ومنظرهم تعبان..
بس كله كوم وشعرها كوم تاني..وضعه كان اسوأ من ماكان عليه في فترة زعلها ع سدرة ومشكلتها مع الجالي..
وتوا بس تستاقظ ان عبد القيوم كان معاها في الدار وشافها من غير حجاب..شاف شكل شعرها التعبان والشايب..
مش ساد وجهها اللي اصبح منظره مخيف! ولا ايديها..
نزلت عيونها لإيديها وقعدت تشوفلهم شكلهم يخوف..
طاحوا قطرات من دموعها عليهم وهي تشوفلهم بنظرات كلها ألم..
وهني جزء الذاكرة المحتفظ بالذكريات السيئه طلعلها ملف معاملة الجالي ليها لما كانت في حالة شبيهة بهادي لحد ما...
قعد يرن في وذانها كلامه المؤذي ويجوا بين عيونها نظراته المزدرية..
ولأن الراجل يقعد راجل سواء كان الجالي او عبد القيوم اكيد يهمه الجمال الخارجي للمراة..تخيلت لو بينه وبين نفسه علق ع شكلها وحالتها وان كان مش مزدري زي الجالي ممكن مشفق عليها...
لما فكرت هكي زاد وجع قلبها..لأنها تحبه مش حتتحملها منه حتى شفقه...
سمعت باب الحوش انفتح..
مسحت دموعها بسرعه ولفت ومشت للشماعه خدت ملايتها وقعدت تلبس فيها ماتبيشي يشوف شعرها مرة تانيه...
"طوبى"
غمضت عيونها بألم وفتحتهم..رسمت ع وجهها ملامح عاديه وهي تقول..
/خش..
هو خش عليها وقال..
/صليتي!؟
التفتت شافتله وقالت.
/لا..
☘كانت لابسه ملايه كامله لونها اخضر زيتي اللون عكس ع عيونها وزاد سحرهم وجاذبيتهم..
ابتسم ابتسامه حلوة وقال..
/كويس..شن رايك تطلعي تصلي برا؟
طوبى:برا!؟
عبد القيوم بإبتسامه:والصبح إذا تنفس..الجو فهالوقت يكون سمح بزياده والهوا متاعه نظيف..عندك علم ان هالفترة من النهار احسن فترة في اليوم كله من جميع النواحي..ضحك وقال..بعدين نقولك ليش..المهم توا جيبي الصلايه وتعالي..
ابتسمت وقالت..
/تمام..
ومشت خدت الصلايه اللي كانت محطوطه فوق وحده من شناطيها..
التفتت بتمشي للباب لقاته واقف يشوفلها بإبتسامه..
نزلت عيونها خجلا وهي مبتسمه..
هو ضحك ضحكه خفيفه وقال..
/تعالي..
مشي وهي مشت وراه قعدت تشوفله وقلبها طاير بيه..
مافيش حاجه فيه مش عاجبتها مش قادره تمنع قلبها ومشاعرها من انهم يتحركوله..
اما هو كان يبي يلتفت ويشوف عيونها لكن مش قادر..
☘طلعوا برا..
هو قال:الباين الجو اليوم بيجي بارد..
طوبى:صيف السنه معاش يبي يتم استغفر الله..
عبد القيوم بضحكه..
/تبيه يكمل قبل وقته!؟
طوبى بضحكه:مانحباش..رفعت عيونها فوق وقالت..سامحني يارب..
وهو يسمع فيها ويضحك..
وكملوا مشي وهما ساكتين لعند ما وصلوا لمكان خلا طوبى مبهورة جدا...
مكان معبي ورد بلدي..وفيه شجر ياسمين وفل..مظل بمظله لونها ابيض..
طوبى بذهول:مانتفكرش اني شفت المكان هدا !؟
عبد القيوم بإبتسامه..
/لأنه ماكانش موجود..اشرلها بيده عليه وهو يقول..
/توا عدي صلي وكيف ماوصيتك طولى في السجود وادعي ولو ماقدرتي تقول شي يكفي تنادي..
"يارب"
التفتت شافتله بإبتسامه امتنان وعيونها معبيات وهي تقول..
/حاضر..
بإبتسامه قال..
/بنعدي نصلي في الجامع قريب واجد نصلي ونجي مش مطول..
طوبى:تمام..لكن ردبالك تطلع من غير كمامه ومعقم..
زادت تسارعت دقات قلبه لو قعد اكثر من هكي حيفقد السيطرة ع نفسه..
ابتسم وهو يهز في راسه بإيجاب بعدين لف ومشي...
هي قعدت معاه بعيونها لعند مادرق عنهم..
تنهدت والتفتت للمكان اللي بتصلي فيه..قدمتله..
تأكدت من جهة القبله..فرشت صلايتها..
وقفت عليها..مررت نظرها ع المكان تنفست هوا الصبح اللي يرد الروح..غمضت عيونها..تخيلت انها قاعده في الجنه..
وهي تتخيل حست بشعور راحه عجيب عبا صدرها..
فتحت عيونها اللي كانوا معبيات دموع..نزلت نظرها لمكان السجود..
رفعت ايديها لين حادوا وذانها وقالت بصوت مرتعش..
"الله اكبر"
هالجمله اللي ياما رددوها المجاهدين في ساحات المعارك..
وهي توا مجاهده خاشه لساحه معركه مش هينه حتحارب فيها بكل ماعندها من ايمان وثقه بالله اللي عمرها ماخذلها وحاشاه ان يخذل او يخيب عبد لجأله...
🍃وبعد التكبير بدت حربها واكيد العدو حيقاومها مش حيستسلم من اول جوله..
بدي يتعب فيها..ويخلي فيها تحس بأعراض اشبه بأعراض الموت...
هي خافت..خافت هلبه لدرجة انها صقعت من الخوف..
حست روحها بتفقد الوعي وقعدت تراجي انها تفقد الوعي
ركعت وهي متوقعه انها طيح وماطاحتش..
سجدت وكانت متوقعه ان حيغمى عليها وهي ساجده لكن ماصارلها شي..
بس مازال تحس بنفس الأعراض...
《 وكيف ماوصيتك طولى في السجود وادعي ولو ماقدرتي تقول شي يكفي تنادي..
"يارب"》
مجرد ماتفكرت وصيته بدت تنادي بصوت خافت..
"يارب"
اشتدت عليها الاعراض نزلوا دموعها ونادت بصوت اعلى..
"يارب"
ضاق نفسها وحست بقلبها حيوقف..
بصوت عالي مرتعش نادت..
"يارب"...
ورفعت من السجود..والاعراض بدت تخف شويه شويه لكن ماارتاحتش حست انها حستسلم بسرعه..
لكن كيف تستسلم والله معاها وهي بين ايديه!؟
استجمعت قوتها وقالت..
"الله اكبر "
وسجدت مرة تانيه وترجع نفس الاعراض بنفس الشده..
وهي هالمرة بعد ماسبحت بدت تردد..
"حسبي الله ونعم الوكيل"
وكل ماتزيد تتعب ترددها من وسطها قلبها بألم كل ماتراودها فكرة الاستسلام ترددها بقوة وتفكر نفسها بكل معركه خشتها في حياتها ماكانش فيها معاها غير هو سبحانه وتعالى وكانت تطلع وهي منتصرة وايمانها يزيد اكثر واكثر...
وهدا اللي صار بعد مارفعت راسها من هالسجده الطويله..
ابتسمت ابتسامه خفيفه ودموعها مازالوا ينزلوا..بعدين وقفت وهي تقول..
"الله اكبر"
🍁وهو في الجامع كان يصلي ورا الامام ويحاول ع قد مايقدر يخش في صلاته خوفه عليها شتته شويه وماقدرش يرجع لحالة الخشوع الا لما دعي بينه وبين نفسه..
"اللهم اني استودعك طوبى"
ومجرد مادعي هالدعاء سكن قلبه الاطمئنان ورجع ركز في صلاته..
☘☘☘
كملت طوبى الصلاة وهي منهكه وحاسه بنعاس شديد ماقدرتش تنوض وتولي للحوش..
تمددت ع الصلايه وحطت ايديها تحت راسها وغمضت عيونها وراحت في النوم...
☘وعبد القيوم مجرد ماكمل الصلاة طلع من الجامع وركب سيارته وتوجه بسرعه لمزرعته...
🌼🌼🌼🌼
"طوبى..طوبى..طوبى.."
فتحت عيونها..رفعتهم فيه وقعدت تشوفله بدون ماتتكلم..
وهو ضايع في سحر عيونها اللي بان عليهم لونهم اقرب للفيروزي..ابتسم من قلبه وقال..
/اللهم بارك..
رجعت غمضت عيونها..
هو بضحكه قال..
/طوبى..
هي بإنزعاج قالت..
/خليني..
ضحك عليها وقال..
/حاضر نخليك لكن خشي ارقدي داخل..
مادارتش اي ردة فعل..
عبد القيوم رفع حاجبه وقال..
/تعرفي كان مانضتي خشيتي بروحك نشيلك وندخلك ..
فتحت عيونها وناضت قعمزت وهي تقول بخجل..
/نضت هاه..
قعد يضحك..
وهي ناضت ومن خجلها ماقدرتش تشوفله مشت طول وهي تسمع فيه يقول..
"الصلايه..يااهوو...نسيتي الصلايه...غير ليش الجري بس..تو طيحي عارفك.."
زادت سرعت خطواتها وهي تضحك بكتمان..
وهو ماشي وراها بمسافه وفي يده صلايتها يشوف فيها كيف تمشي بسرعه ويضحك عليها..
🌼وتنشطت طوبى ومعاش صار من نومها حطت صلايتها في الدار وقعدت بالملايه وطلعت معاه بش يتمشوا ف المزرعه...
☘☘☘☘
"اول مابديت الصلاة حسيت بتعب قوي هلبه وكأني حيغمى عليا ولابنموت قعدت نراجي اللحظه اللي بنفقد فيها الوعي لكن ماصارلي شي..اول ماسجدت حسيت ضلوعي طبقوا ع بعض وقلبي بدي يدق بسرعه نحسابه بيوقف..تفكرت لما قتلي نادي يارب..تعرف اول ماقلتها زدت تعبت اكثر"
هي تحكي وقلبه ينعصر عصر من وجعه عليها لكن حاول يخفي هالشعور..يبي يبان قدامها عادي وديما قوي بش تتقوى بيه و يهون عليها تعبها..
قاللها:اكيد حيقاومك زي ماتقاومي فيه..
طوبى:خفت هلبه..لكن لما حسيت ان ربي معاي قويت روحي وقاومت اكثر وماطلعتش من الصلاة الا واني حاسه روحي وليت اقوى من قبل..
ابتسم وقال؛قتلك انتي عندك القوة اللي تخليك تشفي بسرعه بإذن الله..
طوبى تنهدت وقالت..
/يارب..
عبد القيوم:لو تبيني نقعد معاك مرة تانيه نقعد..
طوبى:لالا بالعكس اني لازم نعالج نفسي وانت معاي بش تساعدني يعني مش حنخلي كل شي عليك..
التزم الصمت وهو مبتسم..
هي شافتله وقالت..
/كيف تعلمت العلاج بالرقيه!؟
عبد القيوم؛مانقولكش تعلمته لكن عندي خلفيه عليه عشت فترة مع خالي لما كان معالج خلاني نساعده ونتعلم منه حاجات معينه..ع فكرة انا كنت فضولي وسكان ونسأل واجد وهو كان موسع باله معاي يجاوب على اسئلتي ويشرحلي..الحاجه الوحيده اللي نقولك تعلمتها صح الحجامه..تعلمتها وحصلت..
قال الجمله الاخيره وهو يضحك..
طوبى بإبتسامه؛علاش!؟
عبد القيوم:تميت نحجم للي نعرفه واللي مانعرفاش الناس تطلبني وانا مانعرفش نقول لا..
طوبى بإبتسامه..
/كله بأجره
ابتسم وقال..
/هدا اللي مخليني مانقدرش نرد حد..
بإبتسامه قالت..
/قلت عشت فترة مع خالك وبعدين مشيت لبنغازي!؟
عبد القيوم؛ياستي كيف ماتعرفي انا يتيم الاب والأم وربك ياخد ويعطي احسن من اللي ياخده..عوضني بهلي من الطرفين غرقوني في الحب والاهتمام يعني تقدري تقولي انا دلوع العيله..
ضحكت طوبى..
هو عقد حواجبه وقال بإبتسامه..
/لكن هاه تربيت في الصحرا تارقي الأصل وبدوي الصفات..اللون اسمر..مد يده اليمين وقال واليد حرشة..
هي اللي كانت هايمه فيه..في كلامه..نبرة صوته..حركاته..انتبهت للخاتم في يده لما مدها..بدون ماتشعر شدت يده بإيديها الزوز ووقفت في مكانها وهي تقرب فيها لعيونها بش تتفحص الخاتم وتشوف للكلمه المكتوبه فيه..
ومش حاسه باللي داراته فيه في هديكا اللحظه قلبه قريب طلع من مكانه..
طوبى:النقاب..شن معناه..وقامت عيونها فيه لقاته يشوفلها بإبتسامه حلوة ونظرات عيون احلى..
حست بالخجل نزلت عيونها ليده انتبهت لروحها شن دايرة طلقت يده بسرعه وهي مصدومه في نفسها ووجها مولي احمر بشده من الخجل..
ضحك ضحكه خفيفه وحول الخاتم من صبعه ومدهولها..
بلعت ريقها وخداته بيدها اللي ترجف..
عبدالقيوم:النقاب هو وصف عربي قديم للرجل اللي يسافر شرق الارض وغربها يدور ع شي معين..علم..مصدر رزق..طموح..ومرات ع حبيبة..
ابتسمت بخجل ومدتله الخاتم وهي تقول..
/امم..
خداه ولبسه وهو يشوفلها بإبتسامه..
هي حمحمت ومشت وهو حط ايديه في جيوبه ومشي معاها..
قعدوا ساكتين لكن القلوب مدايرة هرجه..عيونهم تشوف لكل شي الا بعض..وهما يتمنوا لو معاش يشوفوا شي في الدنيا غير بعض..
ويقعدوا ع هالحال لين يوصلوا في المشتل..
وقف قدامه وشافلها وهو يقول..
/تخشي!؟
طوبى بإبتسامه؛ياريت..
ابتسم وقدم للباب فتحه واشرلها بيده تخش..
خشت والابتسامه مش مفارقه وجهها قعدت تمرر في نظرها ع انواع الورد وهي تقول..
/ايه حقه..علاش زرعت ورد في المكان اللي صليت فيه وانت عندك مشتل؟
عبد القيوم؛نعترف اني حاولت نقلد جنان حوشكم..
بضحكه قالت..
/لهالدرجه عاجبك!؟
عبد القيوم:حوشكم كله ع بعضه عاجبني مريح واللي يخشه يحبه وينسحر بيه..الله يرحمه عبد الرؤوف مرة قالي ياريت لو نقدر نشريه ونعيش فيه حتى هو كان يحب جنانكم واجد..
طوبى بإبتسامه ودموعها في عيونها..
/الله يرحمه..ع ماسمعت من بوي الله يرحمه وخواتي ان جنان الحوش امي الله يرحمها هي اللي زرعت كل شي فيه بروحها وكانت تهتم بيه هلبه..قالتلي سدرة كانت كل صبح تسقي في الورد وهي تغني لفيروز..اغنيه اسمها "البنت الشلبيه"..
كان يسمع فيها وهو يشوفلها بإبتسامة حب وفي عيونه نظرة حزن وهو يتأمل فيها..
وهي كانت تحكي وعيونها ع الورد..
غيرت نظرها ليه لما سمعاته يقول..
/نطلب منك طلب..
طوبى:كان نقدر عليه حاضر..
هو بإبتسامه قال..
/غني..
ردت نظرها للورد وهي مبتسمه بخجل..
عبد القيوم؛اعتبريه رجاء..مش عارف ليش حاس ان صوتك حلو..خاطري نسمعه..
قربت لوردة كانت مركزه بنظرها عليها..
حطت يدها عليها وقعدت تتلمس في وراقها..خدت نفس وبدت تغني..
🌸 شايف البحر شو كبير كبر البحر بحبك
شايف السما شو بعيد بعد السما بحبك
كبر البحر وبعد السما بحبك يا حبيبي
يا حبيبي بحبك...
☘وكأنه ناقص سبب يخليه يزيد يغرق في حبها وينسحر بيها..من لما عرفها وهو مايشوفش منها الا في كل شي حلو..
حلوة في كل شي من داخل ومن برا وعيونه عمرهم ماحيشوفوا اجمل منها مهما مر عليهم...لكن وهي تغني حس انها قصدا اختارت الاغنيه هادي بش تعبر عن مشاعرها اتجاهه بطريقه غير مباشرة..وفعلا طوبى كانت تبي تعبر عن مشاعرها اللي كانت واثقه ومتأكده وقتها انها مستحيل توصل لقلبه لأنه معبي بغيرها.
🌸نطرتك أنا ندهتك أنا رسمتك على المشاوير
يا هم العم يا دمع الزهر يا مواسم العصافير
ما أوسع الغاية وسع الغابة قلبي
يا مصور ع بالي ومصور بقلبي
شايف البحر شو كبير كبر البحر بحبك
شايف السما شو بعيد بعد السما بحبك
كبر البحر وبعد السما بحبك يا حبيبي
يا حبيبي بحبك...
🍁ويرن هاتفه..
بدت ع وجهه ملامح الضيق طلعه من جيبه وشاف المتصل استغرب فتح الخط ورد..
/السلام عليكم مهدي......شاف لطوبى وقال..لاواعيه....تمام تمام...مدلها الهاتف وقال..سدرة..
هي خدت الهاتف وردت..
/ايوه..
"وينك وين حاذفه تليفونك"
طوبى بضحكه:طلعنا نتمشوا ونسيته في الدار..
"ماشاء الله عليك ماشاء الله انتي تتمشي واني نرعش من خوفي عليك اتصلت بيك قريب مية مرة"
طوبى بضحكة احراج..
/اسفه..
ابتسم عبد القيوم ..
"باهي قوليلي فطرتي"
طوبى:لا.."وشن تراجي ماتفطريش تبي دوخي!؟"
طوبى؛سدرة الساعه قاعده ثمانيه راهو..
"الساعه تلحقها ساعه وتفوتي الفطور وتخشي ع الغدي تنقشي تنقيش وبعدين تقعدي لين ترقدي ماتاكلي شي"
طوبى بضحكه؛خلاص والله توا نفطر..
"خليه هو يديره باهي"
طوبى غطت وجهها بيدها وهي تضحك وعبد القيوم واخد راحته وهو يتأمل فيها..
"اسكت يامهدي تربح....وشن فيها كان دارلها فطور هاك انت ديرلنا فيه......مافيش منك زوز !!؟...باهي باهي..باهي اسكت خليني نعرف ندوي"
وطوبى تسمع في نقاش المهدي وسدرة وتضحك من قلبها وقلب عبد القيوم بيموت عليها..
"ياودي انتم الرجاله ربي يعينا عليكم وخلاص..سكري بنتي سكري لما نقعد بروحي نكلمك...بالسلامه..هاه راجي..افطري افطري"
طوبى بضحكه؛حاضر والله حاضر..بالسلامه..
نهت المكالمه وهي تضحك..
عبد القيوم بإبتسامه..
/متعلقه بيك واجد..
طوبى بإبتسامه..
/واني اكثر منها سدرة امي..
هز راسه وقال وهو مبتسم..
/ربي مايحرمها منك..
طوبى:ولايحرمني منها..
تنهد وقال:آمين..هيا نمشوا نديرولك فطور يااخر العنقود يامدلع انت..
ضحكت بخجل بعدين قالت برفعة حاجب..
/لاوالله مامدلعه اني ترهونيه الأصل والصفات.. مدت يدها وقالت..واليد الحرشة..
ضحك من قلبه وهي تضحك معاه..بعدين قال بضحكه..
/اطلعي ياترهونيه خيرلك اطلعي..
مشت طلعت وهي تضحك وخلاته يطلع وراها وقلبه ملهوف عليها...
🍃🍃🍃🍃🍃
"والله مشروع مش عادي اسمع كلامي ومش حتندم"
بشير بضحكه:والله ياخديجه انتي مافي منك ياريتك جيتي اصغر مني راني خديتك..
خديجه بضحكه:تو نحرش فيك امال..
بشير:وباك تحسابيني نخاف منها بالله كان سكرتي راسي عليك ناخدك غصب عنها وع اللي جابها..
ع جية كامله بالنعناع وهي تقول..
/بالله حلف كان ماسكتت نحرش في بوك..
بشير:وشن قلنا من غلط ياعمتي..خديجه ماشاء الله عليها مافيها حاجه تتلوح شن فيها كان خديتها..
خديجه بضحكه:والله ماتنلام..
كامله؛ماتخلنيش نضربك قدامه..وانت خود سفرة فطورك وبرا غادي..
خدي السفرة وناض وهويقول..
/الله يسامحك ياعمتي..ومشي تباعد عنهم..
كامله؛بطلي رزاله يامراة..
خديجه بضحكه:جو عليه..
رفعت عمتها حاجبها وقالت..
/قصدك كان خطبك توافقي!؟
ضحكت خديجه بصوت عالي وعمتها تشوفلها بتعجب..
هدت ضحك وقالت..
/اما انتي ياعمتي..منك جد اني خديجه ناخد بشير فوق ماانه اصغر مني رايح زي هزار اللي في طاش ماطاش.
كامله ضربتها ع رجلها وقالت بضحكه..
/ياقردة..
خديجه بضحكه؛حتى في الخيال تجي مشوشه..تنهدت وقالت..اني نبي راجل حقاني يملى عيني مانبيش نطيح مرة تانيه في راجل لاشخصيه ولاوزن..
كامله؛الحق راجلك الاول مرخي تكه ومساح جوخ ويتلصق ع اللي عنده معاه مصلحه..
خديجه؛وعينه زايغه وياما عرف عليا نساوين..
كامله؛ورضتيها ع روحك وقعدتي ع ذمته ياخديجه!..
خديجه وعيونها مليانات دموع..
/خير من حالي هدا ياعمتي.
كامله:حالك هدا انتي اللي جبتيه لروحك..يللا توا الكلام هدا مافيش منه فايده..حطي في عقلك في راسك وعدلي من نفسك بش يجيك الراجل الباهي..
خديجه بمكابرة..
/عقلي في راسي ومراة مقومه الف من يتمناني..
كامله بضحكه:زي بشير..
التفتت خديجه شافت بشير من بعيد ياكل ويشبحلها ضحكت وشافت لعمتها وهي تقول..
/عطيني كعك عطيني..
حركت عمتها راسها يمين ويسار ومدتلها طرفين كعك..
هي خدتهم وكسرتهم في طاسه وصبت عليهم شاهي..
وعمتها تشوفلها وهي تضحك..
🍃🍃🍃🍃🍃
الساعه 9:30صباحا..
طلعت من الكوجينه بفنجان قهوة توجهت لدارها هي واختها..
خشت لقت اختها مقعمزة وهي حاطه يدها تحت خدها وسرحانه..
لبانه؛سلافه..سوفي..
سلافه؛اممم..
لبانه؛شوبك حاطة الحزن بالجرن وقاعده..
سلافه بضيق..
/قلبي مشغول عليه يالبانه صرلوا اسبوع مسكر تليفونه وورشة الخط بعديومين وهو مو مبين..
لبانه:جربي اتصلي فيه مرة تانيه يمكن يكون فتحه..
سلافه:قولتك الوقت مناسب!
لبانه؛انتي بدك تحكي معه بشغل ضروري مو لطقي حنك..
تنهدت سلافه وقامت هاتفها وهي تقول..
/يارب..
حطت ع رقمه واتصلت بيه..
☘وهو وقتها مقعمزيفطر مع طوبى تحت المظله...
عبد القيوم:الكفرة معروفه بالمانجا..
طوبى وهي شاده تليفونه تتفرج ع صور مزارع المانجا قالت..
/الله يبارك..اول مرة نسمع بالمعلومه هادي..
عبد القيوم:جبت منه قابيه تو نعصره لك كله..
ابتسمت بخجل وهي تشوف للصورة فهالهاتف وهو يتأمل فيها بإبتسامه..
خفت ابتسامته وخالطها الاستغراب لما شاف ابتسامتها اختفت وهي تشوف لهويه المتصل بيه حاليا..
مدتله الهاتف بدون ماتشوفله...
خداه وهو يشوفلها وهي ناضت ومشت...
غير نظره للهاتف شاف..
"سلافه يتصل بك"
بدت ع وجهه ملامح الضيق..تنهد بعدين فتح الخط ورد..
/السلام عليكم..
"وعليكم السلام..عبد القيوم وينك وين كنت مختفي"
عبد القيوم؛انشغلت شويه المده اللي فاتت..
🍃سلافه وهي تحاول تبان عاديه وعيونها ع يدها اللي كانت ترجف قالت..
/ان شاء الله خير!؟
"خير خير..تزوجت"
حست وكأن ميه مصقعة"باردة" انكبت عليها..
قعدت جامده مش قادرة تتكلم ولاترمش عيونها..
"ايوه سلافه"..
حطت يدها ع قلبها وقالت:عم تمزح!
"مافيش مزح في الزواج "
من صدمتها الشديده ضحكت وقالت..
/فاجئتني..يعني..قبل اسبوع التقينا ومالمحت بهيك شي..
"تعرفيني ماندويش عن حياتي الشخصيه واجد..ع العموم انا اسف خليت شغل اعداد الورشه عليك كله لكن بإذن الله بنحضرها"
نزلوا دموعها وهي تقول..
/مافي مشكله..مبروك والله يهنيك..
"الله يبارك فيك.."
بلعت ريقها وقالت..
/طيب..بنلتقي الثلات..
"إن شاء الله..السلام عليكم"
سلافه؛وعليكم السلام..
نزلت الهاتف وهي تشوف للفراغ بصدمه ودموعها ينزلوا زي السيل..
لبانه اللي طلعت شويه تكلم راجلها لما خشت عليها وشافت حالتها انفجعت وهي تقول..
/شو في؟ سمعتي خبر مو منيح عن عبد القيوم؟
بنبرة مرتعشه قالت..
/تزوج!
لبانه بصدمه:شو!؟
سلافه بنبرة مخنوقه..
/قلبي رح يوقف يالبانه..
قربتلها لبانه بسرعه وضمتها. وسلافه في حضنها تذرف في الدموع ومازالت تحت تأثير الصدمه...
🍃🍃🍃🍃
خشت دار ولدها بش تشوفه كان فايق..
لقاته فايق وراجلها يلعب معاه..
نسرين؛تعالى ماما نديروا دوش..
نزله ربيع والولد مشي لأمه..
ربيع وهو عاقد حواجبه قال..
/بعدين اتصلي بأمي طيري عليها السو..
نسرين بخوف..
/خيرها؟
ربيع:جتها بردة قويه شويه..
نسرين بريبه؛راك تقول كنت عندها امس!؟
بإستغراب؛ايه كنت عندها..
هي بصدمه وانفعال..
/وشاد ولدي تلعب فيه!!؟
هو بإستغراب وغضب قال..
/شن قصدك!؟
هي قالت:قصدي معاش في حد تجيه بردة توا امك فيها الكورونا..
ربيع بغضب:كان فيها الكورونا ماتخلي حد فينا يجيها..
نسرين:عاينت امك عاينت!
ربيع قعد ساكت وهو يشوفلها بغضب..
نسرين:والله الا فيها الكورونا وانت خديتها منها وجبتهالنا اسمع دبر لروحك..احجر روحك ولادير حل..
رفع حواجبه وقال..
/صار هكي!؟ ابتسم تهكما وقال..مش غريب عليك..
نسرين؛شن هو اللي مش غريب عليا!
بصوت عالي قال..
/ياهانم يابنت الاصول مراة تانيه غيرك عندها راجل زيي اني تحطه تاج ع راسها..تي اني جاني من ماليك احرف من الكورونا وتغاظيت وسكتت وحضرتك توا تقوليلي جبتلنا الكورونا من امك واحجر روحك ولادبر!!
نسرين قعدت تشوفله بخوف وولدها شاد فيه وهو يشوف لربيع بنفس النظرة..
هز ربيع راسه..بعدين مسح ع لحيته وقال
/okتمام زي ماتبي.بري انتي اقعدي في حوش اماليك اسبوعين واني بنحجر روحي هني..ومشي بيطلع من الدار وهو يقول..
"مانبيش نروح بعدين ونلقاك قاعده"
#رحلة_حب_وحرب
#طوبى
....يتبع...
