#طوبى "جنة طوبى"
#جمان_فريد
#الجزء_120"حلاوة الدنيا"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الحوقله
عن أبى هريرة رضى الله عنه عن رسول الله، صلى الله عليه وسلم، قال: "من قال: لا حول ولا قوة إلا بالله كان دواءً من تسعةٍ وتسعين داءً أيسرها الهم".
حديث رواه الإمام الحاكم وقال: صحيح الإسناد. 🌿🌿🌿🌿🌿🌿🌿🌿🌿🌿🌿🌿🌿🌿🌿
🍃سَأختارَك مَهمَا كان حَالَك،
سَأختار الألم مَعك لَا الأمَل يَا جَميل قَلبِي،
سَأختار إنطفائِك، تَعبِك، ألمِك؛
سَأختارَك دَائِماً 🍃
_______________________________________
الساعه 7:00مساءا..
كان مقعمز في الصاله ومعاه يحيى ولد اخته يتفرج ع الرسوم المتحركه..
هو عايش لحظات انتظار كلها توتر مخلياته يحاول ينسجم مع اللي يتفرج عليها ولد اخته المهم يخفف من التوتر اللي عايشه..
شويه سمع صوت باب الحوش انفتح وتبعه اصوات هدرزة نسرين وسميره..
يحيى لما سمع صوت امه ناض وطلع يجري من الصاله وعيون خاله عمر قعدوا معلقات في الباب بعد ماكانوا يتبعوا فيه..
"مع مني قاعد حبيبي"
"عمر"
"روح!"
ابتسم عمر وهو يسمع في حوارهم مع يحيى لحظات وخشوا عليه..
نسرين؛حمد لله ع السلامه ياكابتن..
سميرة بضحكه قالت..
/قولي ياعريس..
كبرت ابتسامته وبانت في عيونه الفرحه..
سلموا عليه بالمصافحه وقعمزوا ونسرين تقول..
/الباين عليهم عيله ماشاء الله ولاهي الله يبارك عليها زين ورزانه..
سميرة؛وفلاحه..تهنيكم عليه..
هو حاول يخفي لهفته بس ماقدرش يخفي فرحته اللي بانت في عيونه بإبتسامه قال..
/ ع شنو تفاهمتوا؟
سميرة:ياسيدي الفضانيه بعون الله نهار الخميس والفرح كيف ماانت حددت نص 11 ان شاء الله..
عمر:يعني عجبهم الموعد!؟
نسرين:مااعترضوش عليه بكل..ربي يكمل ع خير ..
ناض وهو يقول..
/إن شاء الله..
نسرين:نديرلك ماتاكل؟
عمر:لالا نبي نرتاح ناقص نوم..ماتنسيش نسرين تبشري امي..
ابتسمت سميرة..
هزت نسرين راسها وقالت بإبتسامه..
/اكيد..
مشي عمر طلع من الصاله وهما بعيونهم معاه بعدين نسرين قالت..
/إن شاء الله الثالثه تابته..
سميرة بإبتسامه:بعون الله تابته..
🍃🍃🍃🍃
"شن شكلها خالتي!؟"
سدرة وهي تحول في شاربتها قالت..
/عميمك طاح واقف يابنت زي الغزاله ..
سدرة المهدي قالت بضحكه..
/تشوقت نشوفها..
ابتسمت سدرة وقالتلها..
/نص 11يجيبها ياحنه وتشوفيها..
قالت:إن شاء الله..ايه حقة خالتي قرضت المعلاق وقليت البطاطا راجيت تروحي بش تساعديني في تطييب القلايه نبيها زي اللي ديري فيها..
قرصتها سدرة من خدها وقالت..
/سلم بنتي الفالحه..
ضحكت سدرة المهدي..
مشت مرت بوها لدارها وهي تقول..
/جوري نزلت؟
قالتلها:لالا قاعده في داري...
خشت سدرة للدار ع طلعة جوري من داربنت عمهاوهي تقول..
/خل بننزل خلاص..
سدرة المهدي:خليك تعشي معانا..
جوري:لالا وعدت سيما بندير معاها العشي حتى اني..سلام..
سدرة المهدي بضحكه:سلام..
ومشت سقدت بنت عمها بعدين توجهت للكوجينه..
🍃🍃🍃🍃
درس بسيارته وسط المزرعه المقام فيها فرح لبانه..
قام هاتفه ودار اتصال..
عبد القيوم:السلام عليكم..
"وعليكم السلام..وصلتوا؟"
عبد القيوم:خشينا المزرعه توا بالله ياسلافه طلعي حد يدخل طوبر للخيمه..
من ورا الخمار طوبى كانت رافعه حاجبها وهي معصبه من الوضع لكن حاولت تتغاضى حاليا لين يروحوا للحوش..
نزل الهاتف وقال..
/خل نزيد نقرب السيارة..
وقدم بيها شويه لين ولت قريبه هلبه ع الخيمه..
وتطلع سلافه برغم انها كانت لابسه كاب ساتر جسمها لكن شعرها كان مكشوف ومكياجها مكياج مناسبه اكيد مبالغ فيه..
طوبى اللي كانت تحرق فيها الغيرة حرق شافت لراجلها طول لقت نظره بعيد عن سلافه..
وصلت سلافه في باب السيارة ودقت عليها..
طوبى شافتلها وبدون ماتنطق بكلمه فتحت الباب ونزلت..
سلافه بإبتسامه مجامله..
/اهلا وسهلا..
سكرت طوبى الباب..
وعبد القيوم قعد واقف يبي يشوفها وهي خاشه داخل..
سلافه رفعت يدها حياته بإبتسامه وهو يدوب رد عليها بحركة الراس..
بعدين مشت دخلت طوبى للخيمه"صاله متنقله"
وهو طول تحرك بالسيارة للجهة اللي فيها الرجاله..
🍃داخل..
حاولت طوبى تحافظ ع هدوئها برغم البركان اللي كان فاير في قلبها تبادلت اطراف الحديث مع سلافه وهي تتفحص فيها من ورا الخمار..
سلافه:من هون حبيبتي..
طوبى:نبي نحول العبايه قبل..
سلافه:ايه من هون في محل فيكي تزبطي حالك فيه..
طوبى مشت بصمت وسلافه لحقتها وهي تكتم في غيرتها وغيظها..
وصلت طوبى لمكان فيه مرايه وكرسي..
حطت شنطتها ع الكرسي..حولت الخمار وفكت الشاربه ورمت العبايه..
اللي شافاته سلافه خلا الدموع عبوا عيونها..
برغم ان جمالها يتفوق ع جمال طوبى بس لطوبى جاذبيه رهيبه مخليتها تبان اجمل منها بمراحل..
قعدت تشوفلها كيف تساوي في مكياجها وشعرها الطويل والجميل وتتفحص في الفستان اللي كان واكل منها حته ع قولة المصرية..
خدت طوبى العباية والشاربه والخمار حطتهم ع ساعدها وشدت بنفس اليد الشنطه وشافت لسلافه بإبتسامه باين فيها الغرور وهي تقول..
/وصلت لبانه؟
سلافه وهي مبتسمه بالغصب..
/ايه بس لسا مادخلت ع المعازيم..
هزت طوبى راسها..
سلافه:تفضلي..
مشت طوبى وكانت تلقائيا بدون ماتشعر تمشي بكبرياء وشي من الغرور..غيرتها وحبها لراجلها ومعرفتها انها هي حبه الوحيد مخليها تشوف نفسها ع اي وحده تتمناه..
وسلافه وهي ماشيه معاها حولت الكاب وهي مخنوقه..
خشوا ع المعازيم..
اول عيون شافتهم عيون ميار..بدت ع وجهها ملامح الصدمه لما شافت طوبى ماعرفتهاش الا من عيونها المميزات متغيرة تغيير شامل..
قعدت معاها بعيونها وهي تشوف فيها كيف ماشيه لشاديه لعند ماوصلت فيها غيرت عيونها لصاحبتها شافت الحزن والدمعه في عيونها..
☘شاديه بإبتسامه فرح..
/فرحتيني بجيتك كثير..
طوبى بإبتسامه ود..
/تسلمي خالتي شاديه..شن حالك وحال صحتك..
شاديه:الحمد لله رب العالمين..مبروك عليكي الزواج والله عبد القيوم شب مافي منه يهنيكم ببعض يارب..
طوبى بضحكه:تسلمي ويهني لبانه ويفرحك بسلافه..
شافتلها سلافه من فوق لتحت..
☘☘☘
وبعد ماسلمت طوبى ع شاديه رفعتها سلافه لوحده من الطاولات ومشت لميار..
☘ميار وهي تشوف لطوبى بشي من الازدراء..
/ماحاسبه في روحها..والله انتي احلا منها بوين..
سلافه بحسرة..
/حظ ونصيب..
ميار:قولي ذهاب شيرة اللي يخليه يفوتك انتي وياخد وحده مطلقه ومريضه..
تنهدت سلافه بحسرة وعيونها ع طوبى..
🍃وطوبى كانت لاهيه بهاتفها تراسل في بنات العيله ع قروب هي داراته وسماته قروب العيله..
(التنسيق حلو عجبني هلبه)
غرفه
(وهديكا وينها توا)
(تحوس)
اريج
(شن مادارت وقالت طنشي)
(ولاتحرك فيا شعره عارفه روحي اني شني كويس في عين نفسي وفي عين راجلي)
آلاء..
(اقوى عليهم)
غرفه..
(صحة ليك)
اريج..
(ياواعر انت ياواعر)
وطوبى تقرا في رسايلهم وتضحك..
"مساء الخير"
تبدلت ضحكتها لإبتسامه ثقه..قامت عيونها في اللي كلمتها وقالت..
/مساء النور..
قعمزت ميار وهي تقول..
/شن جو؟
طوبى:مليح الحمد لله..
ميار:لاهو واضح مليح حتى وضعك يبان متحسن..
طوبى بإبتسامة واسعه..
/اللي ربي يرزقها بزوج صالح زي عبد القيوم اكيد حتولي في احسن حال..
ميار برفعة حاجب..
/متغير الكلام..
طوبى:اي كلام!؟
ميار:كلامك..مش ع اساس واخدك ع خاطر مريضه يعني بيدير فيك جميل ع حسب مافهمت..
قعدت طوبى تشوفلها بصمت وع وجهها نفس الابتسامه..
نظرات طوبى وطول صمتها وتروا ميار غصب عنها مع هذا ضحكت وقالت..
/يللا ماعلينا..ربي يهني سعيد بسعيده ويزيدك من الشفي..ناضت وهي تقول..انستي..
ومشت طول بإتجاه صاحبتها وطوبى تلحق فيها بنظرها لين وصلت في سلافه لقتها تشوفلها بنظرة مش حلوة ابتسمتلها طوبى بعدين ولت للمحادثه وهي تحاول المحافظه ع ثباتها..
🍃سلافه:شو حكيتوا!؟
ميار:مش ساهلة بكل راهو..
سلافه:شو قلتيلا ان شاء الله ماخبصتي معها بالحكي!؟
ميار؛حرقتلي دمي برفعة خشمها حرقتلها دمها شويه..
سلافه بضيق..
/رح تفهم اني باعتك الها وتعمليلي مشاكل مع عبد القيوم..
ميار وهي تشوف لطوبى .
/مااعتقدش...
ع جية وحده من خوات ميار قالت..
/مفروض تخش توا..
سلافه:صح..يللا ميار..
ومشوا مع بعض للمكان اللي قاعده فيه لبانه وعيون طوبى معاهم...
☘☘☘☘
وخشت لبانه وزفوها بأغنية زفه من غير موسيقى...
كانت طلتها ناعمة زيها وابتسامتها زايدتها جمال وعيون امها تشوف فيها بفرح والدموع مغرقتهم..
وصلوها للكوشه وساعدوها تقعمز وبعدين قربولها صاحباتها واقارب عيلة راجلها ومعاهم ميار وسلافه..
بدوا يغنوا عليها في الشتاوات الليبيه وامها واختها يصفقوا وهما مبتسمات بفرح وود..
هذا كله طوبى تتفرج عليه بإنسجام من مكانها وكانت تصفق معاهم..
بعد ماعدت حوالي ربع ساعه في الشتاوات قدمت شاديه لبنتها سلمت عليها بالخد وكل وحده فيهم كانت شادة دموعها بقوة..
بعدين وقفت شاديه حدا بنتها حطت يدها فوق فمها وبدت تقول..
/ أويهاا وع العلعي وع العلعي..
البنات كلهم قلدوها وردوا وراها..
"اويها"
/وصبايا تجمعي..
"اويها
/وعروستنا حلوة
"اويها"
مابدها غندرة..
وزغردوا كلهم وفي منهم كانت تضحك والحاضرات وع راسهم طوبى كانوا مستمتعات جدا..
وتكمل سلافه عن امها باقي الزغاريد الشاميه والبنات يردوا وراها..
/أويهاا الدهب بقفاصو
"أويهاا "
/والألماس بجراصو
"أويهاا"
واللي بياخد من بناتنا
"أويها"
بيمشي وبيرفع راسو
وزغدرت والبنات معاها والمصورة تصور فيهم وهي مبتسمه..
ضحكت ميار وهي تقول بصوت عالي..
/اويهااا..
ضحكوا بنات عيلتها وامها وخواتها ومعاهم سلافه ..
..كملت ميار نقول اللي حفظتهولها سلافه..
/خدودك طرايا
"اويها"
وزنودك مرايا
"اويها"
تسلم عيون معز
"اويها "
نقاكي من بين الصبايا
وتزغرد وهما وراها..
ولبانة تتفرج عليهم وهي تضحك بفرحه طالعه من وسط القلب..
سلافه شافت لصاحبات اختها واشرتلهم وهي تهز براسها فهموا عليها وبدوا يغنوا مع بعض في المقطع متاعهم..
"أويهاا ويا صحن نجاص
أويهااومكلل بالألماس
أويهاا ويلي بياخذ بنت الكسابكجي
أويهاا بيمشي مرفوع الراس"
وتعالت اصوات الزغاريد وام سلافه مع فرحتها الكبيره تفكرت راجلها..دمعوا عيونها لكن مسحتهم بسرعه وحاولت تتماسك بش ماتنكدش ع بنتها في ليلة عمرها...
☘وشويه وجابوا الدربوكه وبدت اجواء العرس ع اصولها وكانت مزيج حلو بين الثراث الليبي والشامي وخلوا هالليله مميزة جدا..
العشي كذلك كان عبارة عن بوفيه مفتوح فيه احلى اصناف الاكل الليبي والشامي وكل حد يختار ع ذوقه..
اثناء الوقت اللي بدوا يتعشوا فيه المعازيم مشت طوبى للبانه بش تسلم عليها وتباركلها..
☘لبانه بإبتسامه..
/انبسطت كثير بحضورك..
ردت عليها بإبتسامة ود..
/تسلمي حبيبتي ربي يهنيك ويسعدك طالعة زي القمر..
لبانه:وانتي كمان طالعه بطيري العقل شو محظوظ فيكي عبد القيوم..
ابتسمت طوبى بخجل وقالت..
/سلمها ياربي..وحتى معز يابخته بيك..
لبانه بضحكه..
/تسلميلي..
طوبى:ع حسب ماسمعت من عبد القيوم انكم بتسافروا..
لبانه بإبتسامة ضيق..
/ايه للأسف اجت فرصة شغل مهمه لمعز ماقدر يضيعها من ايده..
طوبى وع وجهها ابتسامه تحاول تخفي ضيقها قالت..
/فيها خيرة حبيبتي وكانك ع امك واختك هما بين اهلهم وناسهم ماتخافيش عليهم..
تنهدت وهي مبتسمه بقلق وعيونها ع امها واختها وطوبى جنبها تشوف لسلافه وهي واقفه مع ميار ع وحده من العاملات وفي قلبها قلق كبير من اللي حيصير بعدين...
🍃🍃🍃🍃
"لكن لاحظت في ناس في عيلة راجلها زي اللي مش راضيين طول الوقت وجوهم مقلوبه"
عبد القيوم وهو يسوق..
/ايه في ناس من هله كانوا رافضين الموضوع..
طوبى:من يعني امه وخواته!؟ حسيتهم فرحانات بيها..
عبد القيوم:لا في ناس تانيه من العيله حاربوا البنت نفسها وخلوها تسكر الموضوع في البدايه غير معز وامه وخواته حاولوا فيها واجد لعند ماوافقت وصار النصيب..
طوبى رفعت حاجبها وهي تفكر لكن مش في اللي قاله كانت تفكر في جواب تساؤل يدور في عقلها من وين يعرف هالمعلومات المفصله!..
طول صمتها وهي تفكر وهو لاحظ وقاللها..
/في شن تفكري!؟
طوبى:شن رايك ترفعني غدوة من الصبح لماليا؟!
عقد حواجبه وقال..
/اتفقنا نعدوا بعد الغدا تسلمي عليهم قبل نعدوا للخمس!
قالتله:معليشي هالمرة نغيروا الاتفاق نبي نطول في قعدتي مع جنة..
تنهد وقال..
/حاضر اللي تبيه يصير..
ورجعت طوبى التزمت الصمت وهو معاش تكلم قعد بس يفكر في شي ناوي عليه الليله..
☘الليله يبي لزواجه هو وطوبى يكون حقيقي..يحقق مايقتضي بيه الشرع وينول وصل حبيبته اللي في قلبه ليها شوق مالاش حد..شوق عمره سنين طويله..لكن عنده تخوف من الاقدام هالخطوة..حس ان طوبى مازال مش مستعده وفي نفس الوقت قال لنفسه مرات تكون مستحيه منه لاأكثر
ولو كانت هكي فعلا فهذا مايعتبرش عائق كبير وسهل جدا تجاوزه☘
🍁🍁🍁
وصلوا لشقتهم..
اول ماخشوا توجهت طوبى لدار النوم وهو وراها..
لما خش عليها لقاها تحول في العبايه قعد يتفرج عليها وهو مبتسم..
وهي كانت حاسة بيه مركز بنظره ليها وشبه فاهمه هو شن يبي..توترت هلبه..وحست بالخوف..
حطت العبايه ع السرير وقالت..
/صليت العشي؟
هو بإبتسامه قال..
/الحمد لله..
هي قالت..
/اني ماصليتش..مشت طول للدولاب طلعت منه بيجامه ومشت طلعت من حداه متوجهه للحمام..
ضحك ضحكه خفيفه بعدين مشي قعمز ع السرير...
وتعدي دقايق تنعد ع اصابع اليد الوحده وتخش طوبى وهي شاده الفستان شافتله بنظرة سريعه لاحظت نظراته ليها زاد توترها وخوفها..
علقت الفستان في الدولاب بعدين التفتت تشوفله..
لقاته مازال يشوفلها بنفس النظرات..
مسحت بإيديها ع جناب رجليها بعدين قالت..
/تعشيت كويس!؟
ابتسم وهز راسه وهو يقول..
/امم..كليت من الشامي..
رفعت حواجبها وقالت..
/من الشامي!..
هز راسه وهو مبتسم وحاجبه مرفوع..
ضيقت عيونها وقالت..
/شوف بنقولك حاجه وماتفهمنيش غلط تمام..
هو بإبتسامه قال..
/انا اكثر من يفهم عليك في الدنيا كلها..
شدت ابتسامتها وهي تقول..
/خلينا في الجد.. بصراحه تعاملك مع سلافه فيه تصرفات مش مقبوله..
هو بضحكه قال..
/زي!!؟
طوبى:قتلك نحكي جد..تواصلكم بالتليفون وانها تطلع قدامك وهي بهيئة زي اللي قابلاتك اليوم لاشرع ولاعرف يرضى بيهم..
هو قال.. /تعرفي ان في بيني وبينها خدمه صح!؟
طوبى:ماقلت شي لكن تعاملك معاها لازم يكون بحدود الخدمه وبس غير هكي مفروض يكون رقمها عندي وتكلمني اني مش انت..
ابتسم وقال..
/عندك حق..حاضر..بس نبي منك تحطي في عقلك حاجه وحده..ماتخليش اللي سمعتيه من اشاعات قبل يسيطر ع تفكيرك البنت عمري ماشفت منها غلط ولافي مرة تجاوزت حدودها معاي نهائي..
سكتت شويه بعدين قالت..
/واني شن قلت بش تقولي هكي!!
ناض من مكانها وقدملها وع وجهه ابتسامه مافارقتاش..
وصل فيها وخدي ايديها الزوز وشدهم وهو يقول..
/عيني عمرها ماحقت غيرك ولايمكن قلبي يلتفت لغيرك تعرفي ليش!؟ لأنهم مش حيشوفوا احلى منك..كل شي حلو في الحياة بكبرها اختصرته فيك..الناس كلها اختصرتها فيك انتي انتي ليا كل شي واغلى من كل شي واحلى من احلى شي في الدنيا كلها...
🍃كانت تسمع فيه بكل شي فيها وقلبها متفاعل مع كل كلمة تطلع منه..مع نبرة صوته ونظرة عيونه اللي تنادي فيها..
كله مشاعر التوتر والخوف تبددت ماحستش في هديكا اللحظه غير بالحب..
لكن..
فجأة..وبدون سابق انذار..تغير لون المكان في عيونها للأصفر والأحمر..حست بشي اسفل من اخر راسها يشده فيه شد وبعدين حست بكل شي قاعد يهبط..وظلم الدنيا في عيونها ومعاش تستاقظ بشي..
🍃🍃🍃🍃
"كلمتها توا صوتها ماعجبنيش حسيتها مريضه غير تكابر"
غرفه:الحق اني قبل ناويه غدوة نمشيلهم نعطيهم مصروفهم الشهري..
"يااه ياغرفه قداش سهلتيها عليا حبيبتي قبل نبي نطلب منك تمشيلها تشوفيها وعارفه ان الطلب ثقيل بس مافيش غيرك يقدر يديره"
ابتسمت وقالت..
/ولايهمك بلبله اني نبي ندير واجبي جيهتهم كيف ماقلت قبل اللي كان يدير عبد الرؤوف الله يرحمه مستحيل نقطعه..
"الله يرحمه ويغفرله..بارك الله فيك ياغرفه"
غرفه:مش بينا يانبيله الرسميات هادي حني عيلة راهو..
"صدقتي وربي مايفرق بينا"
غرفه بإبتسامه:آمين..
"قوليلي شن حالها طوبى؟"
غرفه:الحمد لله وضعها تحسن هلبه هلبه وتحسيها مرتاحه..
"دوم ان شاء الله"
غرفه:يارب..ويصرف عنها الشر والاشرار..
"آمين"
🍃🍃🍃🍃
"طوبى حبيبتي"
فتحت عيونها اللي جو في عيونه..شافت فيهم خوف كبير نزلوا دموعها..
مسحهم وباس ع راسها وقال..
/شن جو؟
بنبرة ألم قالت..
/مش حلو بكل..
قاللها:ليش شن تحسي!؟
بنبرة باكيه قالت..
/نبي نوض نصلي..
قعد يشوفله كيف نتنوض ع مهلها بعدين نزلت من السرير جي بينوض معاها قالتله..
/خليني بروحي شويه..
ومشت طلعت من الدار متوجهه للحمام..
هو ناض وراها وقف في باب الدار وهو يشوفلها بنظرات حزن لعند ماخشت للحمام..
وهي بعد ماسكرت وراها الباب مشت قعمزت ع حافة البانيو وقعدت تبكي بألم وكتمان...
🍃ليها وقت وهي تفكر في وضعها معاها كانت تحس بخوف وتوتر مبالغ فيهم وهي تفكر فهالشي وماقدرتش تحدد السبب .
هل اللي دار فيها الجالي قاعد مأثر فيها..او ان ماصابها من السحر حيدير حاجز بينه وبينها!!؟.
وهالليله تحدد السبب وعرفت ان اللي آذاها بالسحر كان ناوي يدمر حياتها من جميع النواحي يخليها حتى لو قعدت عايشه تموت اكثر من مرة وهي ع قيد الحياة..
وطبعا نتيجة زي هادي تتمسك بفكرة توقع اسوأ الاحتمالات في مصير زواجها من عبد القيوم..
وكأنها كل ماتبي تعطي فرصه لقلبها يعيش الحب وينسى الماضي يجيها شي يوقفها ويقولللها ردي بالك تتعلقي بيه وتأمينله...
🍃🍃🍃
توضت وطلعت من الحمام لدار المعيشه ملاية الصلاة متاعها كانت فيها..
خدتها ولبستها وتوجهت للقبله وبدت تصلي..
وهو بعد ماخدي دوش خش عليها الدار لقاها مقعمزة نقرا في القرآن ودموعها تنزل..
قعد يسمعلها لعند ماكملت..سكرت المصحف بعدين التفتت وقالت..
/برا ارقد وارتاح..
ناض بدون مايرد عليها خدي منها المصحف رده لمكانه بعدين رجعلها خداها من ايديها الزوز ونوضها وقال وهو يشوف لعيونها..
/مش راقد من غيرك..
طوبى بألم..
/سامحني والله مامني الله..
ضمها وهو يقول..
/اصص خلاص..مانبيش نسمعك تبكي..
رفعها فوق وقال..
/نحكيلك قصتي مع لعب الكورة!؟
ضحكت من وسط دموعها..
ضحك معاها ومشي رفعها للدار وهو يحكيلها ويعلق في تعليقات مضحكه تخليها تضحك من وسط قلبها..
برغم حزنه الشديد ع حالها مجرد شاف ضحكتها وسمعها تبدد حزنه كله..
عكسها هي اللي ماقدرتش الضحكة تمسح الغصة اللي سكنت قلبها الشاقي..
🍃🍃🍃🍃
"عندك حاجه غدوة بعد العصر!؟
حسين وهو شاد في يده طاسة ميه قال..
/لا..علاش!؟
اميمه:بكري كلمتني غرفه وقالت بتمشي تزور اقارب عبد الرؤوف الله يرحمه ولأن المسافه بعيده تبيك تمشي وراها"
شد ابتسامته ع قد مايقدر ورفع طاسة المية وشربها كلها بعدين حطها ع الطاوله وقال..
/تمام..
ومشي طلع من حداها وهي تلحق فيه بعيونها وع وجهها ملامح ابتسامة شك..
🍃🍃🍃🍃
تاني يوم..
🍀الأربعاء..
الرابع من شهر ربيع الأول..
21اكتوبر...سنة2020..
🍃مع الساعه عشرة صباحا حط عبد القيوم طوبى عند اهلها ومشي يدير مشاويره..
هي اول ماوصلت فطرت مع تانيه مع العيله وبنتها في حجرها توكل فيها وتهدرز معاها..
كلهم كانوا يشوفوا فيها عاديه ماعدا غرفه اللي بدت تعرف طوبى من نظرة عيونها..
☘في الدار اللي كانت مسكرة عليهم..
طوبى تحكي وتشكي وغرفه تسمع فيها وقلبها موجوع لوجعها..
🍃طوبى ودموعها تنزل..
/اني كنت عارفه ان هدا اللي بيصير الايام اللي فاتوا وين يقرب مني نحس بخوف مش طبيعي ياغرفه في الاول قلت بالك من اللي صار معاي قبل وللأسف طلع من السحر..مسحت دموعها اللي نزلوا ع فمها وهي تقول..تصدقي ماوجعتنيش روحي هالمرة هو اللي وجعني ياغرفه..حسيته زي اللي انكسر..زي اللي انقهر..مش عارفه كيف نشرحلك اللي حسيته..راهو مهما كان واعرة ع الراجل بصفة عامه..وهو مهما كان كويس يقعد راجل ياغرفه حاجه زي هادي مش حيصبر عليها هلبه..
غرفه ودموعها في عيونها..
/عبد القيوم يحبك حب مافيش منه ياطوبى..
طوبى:حتى لو كان هكي الحب مش كل شي ياغرفه من حقه زيه زي غيره يعيش حياة زوجيه طبيعيه لأمتى بيقعد يصبر ويعاني قوليلي..
🍃سكتت غرفه لما مالقتش شن تجاوبها فعلا كلامها منطقي عبد القيوم بشر مش ملك من الملايكه اكيد يبي يعيش حياة طبيعيه زيه زي باقي ابناء جنسه ولانه انسان اكيد حيكون في حدود لطاقة صبره وتحمله..🍃
طوبى وهي تشوف للفراغ كملت كلامها بألم..
/كان تشوفي امس سلافه كيف تشوفله ولاتسمعي كلام صاحبتها اللي قهرتني بيه..
غرفه بغضب..
/اني نبي نفهم المريضه هادي شن دخلها علاش حارقه دمها هكي تقول واخدتيه منها هي!؟
طوبى بألم..
/اللهم لااعتراض ربي ابتلاني بمقابله هالنماذج من الناس في حياتي اللي يتعمد يأذيني بدون سبب..الحمد لله ع كل حال لااعتراض ياربي..نزلوا دموعها مرة تانيه وهي تقول..
اني توا كل اللي نتمناه لو جي نهار والحب اللي في قلب عبد القيوم ليا راح يجيني ويصارحني يفارقني بإحترام أقل شي..مانبيشي يدير شي من وراي مانبيشي يغافلني ياغرفه مانبيشي يغافلني..وحطت ايديها ع وجهها وهي تبكي بألم وغرفه ضمتها لحضنها وهي تبكي معاها بصمت...
🍃🍃🍃
وبعد الغدي سلمت طوبى ع العيله كلها وحملت معاها سلامهم الحار لأهل بنغازي وتوصيات غرفه ليها انها تتواصل معاها بإستمرار..
طلعت لسيارة راجلها وركبت وهي ساكته ودموعها تنزل..
عبد القيوم:ااه يامحلاهن هالعيون المحيرات قلبي معاهن كان غير معاش يبكن بس..
ابتسمت وقعدت تمسح فيهم..
وهو قال..
/نجك ليا..
ضحكت طوبى وهو ضحك معاها بعدين لبس نظاراته وتحرك طول بإتجاه الخمس..
🍃ومحمود كعادته يراقب في الوضع وفضوله بيقتله يبي يعرف بأي شكل سر عبد القيوم مع عيلة الواعر...
وهو واقف قدام المطحن يفكر بصوت عالي..
/مش بعيد يطلع واخد منهم مافيش غير هكي لكن مني زعمه!؟طوبى من سابع المستحيلات..هما وحده من الزوز ياغرفه يابنت فردوس..لكن لا حتى بنت فردوس لا هديكا شبه يوميا نشوف فيها طالعه ومروحه..معناها غرفه..
سكت لما سمع باب الحوش انفتح وطلعت منه سيارة تسوق فيها غرفه..
شافها تشبح يمينها بعدين تحركت وشويه ولحقتها سيارة فيها حسين..
رفع حواجبه وقال..
/لالالا مستحيل يامحمود لا...وخش للمطحن ويقول لا ويطرد من راسه استنتاج ارتباط عبد القيوم بطليقة الجالي وهو يعرف كويس اللي صاير بينهم مجرد التفكير في الشي هدا مخيف ليه ولأي حد يعرف قصة الجالي مع طوبى وعدواته لعبد القيوم...
🍃🍃🍃🍃
وصلت غرفه لحوش "رييسه" عمة عبد الرؤوف ونبيله..
درست وحسين درس وراها..
شافها وهي نازله من السيارة كانت لابسه ملابس رغم انها متحشمه لكن الوانها ملفته للإنتباه ومخليتها محط اعجاب اي عين تشوفها..
هي من غير شي موليه زاهيه في عينه هلبه متخيل ان اي راجل حيشوفلها بنفس نظرته ليها ومجرد ماتخيل الحاجه هادي حس بشعور ضايقه ع الآخر..
بدون مايفكر فتح الباب ونزل ومشي وقف حدا سيارتها وقال..
/عندهم رجاله!؟
التفتت وهي مفجوعه وقالت..
/خلعتني..
انفتح باب الحوش وطلعت لميس وعيونها بدل مايجوا ع غرفه شافوا حسين قعدت منستهه لحظات لعند ماسمعت غرفه تقول..
/السلام عليكم..
شافتلها بعدين قالت..
/وعليكم السلام..تفضلي..
غرفه:اختك هني!؟
لميس وهي تسرق في النظر لحسين اللي كان مغير نظره عنها قالت..
/ايه هي وراجلها..
حسين شاف لغرفه برفعة حاجب وهي شافتله وقالت..
/خلوه يطلع لولد عمي..
يدوب ابتسمت لميس وهي تشوف لحسين بعدين قال..
/باهي..تفضلي خشي..
خشت غرفه ولميس وهي تشوف لحسين بإبتسامة قالت..
/لحظه بس..
وخشت وردت الباب..
هو حرك راسه يمين ويسار وقعد يمرر في نظره ع الشارع لعند ما سمع راجل بنت ريسه يقول..
/السلام عليكم..
شافله حسين وقال..
/وعليكم السلام..
..ورحب بيه ودخله للحوش وتوجه بيه للمربوعه وغرفه داخل مع النساوين..
لعيون نبيله وذكرى عبد الرؤوف كانت تكلم فيهم بلطف واحترام..
رييسه برغم مرضها كانت قالبة وجهها عنها وبنتها الكبيره مش طايقتها لكن لميس كانت عكسهم اسلوبها مولي ودود خلت امها واختها ومعاهم غرفه يستغربوا فيها..
☘لميس:اثبتي انك بنت اصول بارك الله فيك..
امها واختها قعدوا يشوفولها بعدم استيعاب..
غرفه بإبتسامة مجامله..
/فيك بارك الله..المهم خالتي قولي لنسيبك يرفعك للمصحه اللي قتلك عليها وما دوري شي..
رييسه:اكيد مش مدوره شي ياحنه رزق صغارنا هدا مش بجميل حد..
غرفه سايرتها ع قد ماتقدر وهي تقول..
/عندك الحق..
ناضت وهي تقول..
/ماتبوا شي تاني..
لميس:اقعدي تعشي..
فنصوا فيها امها واختها..
غرفه:في الفرح ان شاء الله..
ناضت لميس وهي تقول..
/غير زيدي شويه تانيه ولد عمك مالحقش يشرب القهوة..
غرفه:هو بالذات عطلته عن مشاغله مانبيش نعطله اكثر من هكي..
لميس:ع راحتك لكن هاه ردي بالك تقطعي..
ابتسمت مجامله وقالت..
/ان شاء الله..بالسلامه وان شاء الله لاباس..
ماردوش عليها رييسة وبنتها الكبيره لكن لميس قالت..
/لايوريك باس..
وطلعت معاها تسقد فيها..
غرفه وهي ماشيه دارت رنة لحسين ومجرد ماطلعت من الحوش لقاته طالع قدامها..
وتشوفه لميس مرة تانيه وعيونها تلمع بنظرات الاعجاب..
غرفه لما شافت راجل بنت ريسه طالع معاه طلعت بسرعه وحسين سلم عليه وطلع وراها..
راجل بنت ريسه قدم للميس وقال..
/الراجل هدا ماشاء الله عليه..
لميس بإبتسامه..
/عيلتهم كلها ماشاء الله..
هو قال..
/مزبوط ناس كويسه..وخش داخل وهي لحقاته ومتشوقه تسمع منه اكثر عن حسين اللي عجبها من اول نظره ونساها المبروك ومايجي منه..
🍃🍃🍃🍃🍃
ويعدي باقي يوم الإربعاء ويجي بعده الخميس يوم سفر طوبى وعبد القيوم لبنغازي..
وسالمين كانت تراجي فيهم ع احر من الجمر..
ماخلت ماجهزت لجيتهم من دارت لطوبى كل اصناف الاكل الشرقاوي اللي تحبه ودارتلها معمول تفننت في صنعه...
🌼"وصلوا ياسالمين تعالي"
لبست حجابها وطلعت تجري للجنان..
اول ماجيت عينها ع طوبى واقفه جنب عبد القيوم وهي تسلم ع جبريل بالكلام..قلبها فر وعيونها دمعوا وهي تقول .
/بيبا..
شافولها الزوز وطوبى مااستنتش ثانيه زياده مشتلها بسرعة ورمت نفسها في حضنها..
ضمتها سالمين بقوة وهي تبكي وخلت طوبى تبكي معاها..
وجبريل وعبد القيوم يشوفلهم بإبتسامة حزن...
#حلاوة_الدنيا
#طوبى
....يتبع...
