#طوبى "جنة طوبى"
#جمان_فريد
#الجزء_المئة"راجعين ياهوى"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الإستغفار
"وَمَا كَانَ اللَّهُ لِيُعَذِّبَهُمْ وَأَنتَ فِيهِمْ ۚ وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ"
إستغفــروا الله
🍃الإنسان الذي تربيه المصاعب ، لن يكون تلميذاً لأحد ..
دوستويفسكي🍃
________________________________________
في احدى الممرات لمصحة في العاصمه..
كانت تمشي بإندفاع..ملامحها الحاده ممزوجه بملامح الخوف والقلق..عيونها اللي من لون البحر كانت مليانه دموع محبوسه..
جاية بلهفة وخوف الأم تشوف ولدها اللي مشارك في الحرب كان جريح وليه وقت وهدا وين جاها الخبر..
وين وصلت في الحجره قابلها واحد تاني من ولادها لما شافها بانت ع وجهه ملامح الصدمه وهو يقول..
"امي شني ديري جايه"
دفاته من غير ماترد عليه وفتحت الحجره وخشت وهو لحقها وسكر الباب..
وقفت قدام سرير ولدها الصغير اللي لقاته يشوفلها بنظرات عدم رضا وحواجبه معقوده بعدين قال..
/شن ديري خاشة لقسم رجال!؟
فهيمه وهي تتفحص فيه قالت بحده..
/سكر فمك..وخاطبت التاني متسائله..شن وضع خوك توا؟
تنهد بإستسلام وقال..
/الحمد لله يام جرحه مش خطير..
فهيمه:طلعوه لتونس مايقعدش هني الليله..
معين بإنزعاج؛يام!
حطت سبابتها ع فمها وهي تقول بحزم..
/اسكت ولاكلمه..نزلت صبعها وقالت..بتسمع الكلام ورجليك فوق راسك..
ع دقة الباب اللي انفتح طول بعدين..
اللي خش اتفاجأ لما شافها عكسها هي اللي انصدمت لما شافاته..صفقت بإيديها ع بعض وهي تقول بصدمه..
/نهارك الاسود يامالك!؟
سكر الباب وجاها طول باس ع راسها وقال بتوسل..
/نسألك بالله خالتي فهيمه ماتقولي لحد..
فهيمه بصدمه..
/كيف مانقولش كيف! خواتك بيهبلوا امك فوزيه مرضت حتى المرض!..
تعبوا عيونه بالدموع وصاحبه يشوفله بنظرات ألم..
فهيمه:اقل شي ياولدي عطيهم علم..
اخ معين:من الاول قتلك اقل شي خوك الكبير يعرف..
مالك بأسف وتهكم..
/خوي الكبير! اللي هانت عليه اخته الصغيره تقعد في حوش عمته بش يرضي مرته..
🍃خلال الشهرين اللي فاتوا تعرض حوش اخ معين الكبير للقصف وتضرر اضرار جسيمه خلاته يطالب ببيعة حوش بوه بش ياخد حصته ويدير بيها حل ومافي حد قدر يعارضه بس كان عندهم مشكلتين..الاولى اختفاء مالك..والتانيه مناسك عند مني تقعد..
الاولى انحلت لما قرروا يدسوله حصته لين يروح..اما مناسك اللي رفضت تقعد عند خوتها جت بتاخدها اختها جيداء لكن خوتها مانعوا بقوة وبعد مشاكل كبيره قررت عمتها تاخدها تقعد عندها..عمتها ارمله زوجت بناتها كلهم وماقعدلها حد كان ولد اصغر من مناسك بسبع سنوات وبهكي تكون انسب حد تقعد عنده مناسك..
ومناسك اللي تعذبت هلبه من المصايب اللي نزلت عليها ارتاحت في حوش عمتها بعض الشي بس قعد عقلها عند خوها مالك..
وهالاحداث كلها علمت بيها فوزيه اللي تألمت عليهم لدرجة المرض وكادت تفقد حياتها🍃
فهيمه؛وخيتك توا محتاجاتك ياولدي دام خوتك وسامحني فيها طلع مافيهمش خير ماتكونش زيهم حتى انت وتخليها..
مالك بألم؛صدقيني ياخالتي هكي خيرلها والله هكي خيرلها في النهايه قاعده مع عمامها...
🍀قال هكي ع اعتبار ان عمته بعد وفاة زوجها سكنت في حوش موجود في سانيه جده حدا خوتها🍀
حركت فهيمه راسها يمين ويسار بعدم رضا وهي تقول الله يسامحك ياولدي..
معين لاحظ كيف صاحبه محرج وموجوع قال..
/معليشي خلوني مع امي شويه..
مالك شافله من نظرة عينه فهم عليه..
هز راسه ومشي طلع واخ مالك بعد مامرر نظره ع خوه وامه لحقه..
معين وهو يشوف لأمه بجديه
/قعمزي يام نحكيلك..
قربت فهيمه كرسي وقعمزت وهي منتبهة مع ولدها...
🍃🍃🍃🍃🍃
"بوس خالتو سدره"
هادي غرفه تكلم في ولدها مهاب اللي كانت ضاماته سدرة المنتهى..
كلهم في الصاله كانوا مقعمزين حواليها وهي في الصدر..
عيون عمتها مطيره مافارقوهاش نهائي وهي تشوفلها بنظرات فرح وشوق..
باس مهاب خد سدره اللي قالت..
/نجيه المكعبر..شافت لخوه اللي كان ياكل في شكولاته وقالت..الزوز كعابير زيك لماكنتي صغيره..
مطيره؛قلتهالها حتى اني..
ضحكت غرفه..
شافت سدره لبطنها وقالت..
/ماتعبتيش؟
مطيره؛لاوين تعبت هلبه غير مشكلها هديكا الوحم كان واعر..
غرفه:لكن الحمد لله كله مشي وهاني بعد يومين ان شاء الله نجيبها ونرتاح..
سدرة:تحلي عويناتك ع خير يارب..
كلهم بأصوات متقطعه قالوا..
/آمين..
شافت لفتحة الصاله وقالت بصوت عالي..
/طوبى تعالي جاي..
"هي شويه بس"
سدرة:شن دير هادي!
اريج بضحكه:تو تعرفي..
عقدت حواجبها بإبتسامه وهي تشوفلها بعدين دارتلها حركة بأنفها خلت اريج تضحك..
فايزة بإبتسامة:امتى روحتوا؟
كيف جت بترد سدره خشت طوبى بسفرة شربات لما شافتها مطيره زغردت وهاديه زغردت معاها..
ضحكت سدره ودموعها عبوا عيونها..
طوبى وهي مبتسمه واثار الدموع قاعده ع وجهها..
/هي خودي سديرتي..
خدت طاسه وهي تقول..
/تي شن هدا يعطيك الهني!؟
اريج بضحكه:حالفه نهار مرواحك تفرق شربات لارزواطه لاغيره..
سدرة بضحكه؛وعلاش!؟؟
مطيره بإبتسامه..
/قالت نبي ندير شي ماصارش ولاندار هادي سدرة مش اي حد..
ضحكت طوبى وهي تفرق ودموعها في عيونها وهاديه تشوف لردة فعل سدره لاحظت ملامح الابتسامه مخالطها الحزن قعدت مركزة معاها بس..
وجنة واقفه فم الصاله تتفرج ع سدره وهي حاطه ايديها ع بعض..
حطت طوبى السفرة ع الطاوله بعد مافرقت وقالت..
/باهي قوليلنا امتى روحتوا؟
سدره شافت لجنة وقالت..
/خيرها واقفه غادي خايفه مني!؟
كلهم شافولها..
فايزة؛بالعاده ماتستغربش..
طوبى:تعالي جنوني..
جنه شافت لأمها..بعدين مشتلها قعمزت في حجرها وقعدت تتفرج ع سدرة.
سدرة ابتسمت وعيونها تعبوا دموع وهي تقول..
/الله يبارك...
طوبى وهي تمسح ع شعر بنتها..
/سلمك ياقلبي..
شويه جوها اواب ومهاب وكل واحد فيهم عطاها شكولاته..
سدره بضحكه:صحاب..
طوبى:لين فايت فيهم..قريب تولي ولد زيهم..
ضحكوا..
مروة بضحكه:بكري تعاركت مع اواب ع خاطر السياره..
سدرة بإبتسامه؛الله يبارك مريوه كبرتي واحلويتي..
شافت فايزة لبنتها بإبتسامه..
ومروة بإبتسامه خجل:تسلمي خالتي..وانتي الله يبارك عليك زدتي جمال..
سدرة:وخيتي سلمها..شافت لصفاء وقالت..لاعاد هادي الله يبارك ولت ام مرة وحده وخلاتك جده ياشراده وجددتني معاك.
ضحكوا كلهم..
سدرة بإبتسامه:ترا جيبي سنفورك نشوفه..
خدت صفاء ولدها وناضت بيه لسدره..
وطوبى تراقب في سدره وهي تفكر علاش تهربت من اجابة سؤالها!؟
"طوبى"..
سدرة :جدي!..
طوبى:نوضي اطلعيله..
سدرة استغربت..
طوبى حطت بنتها ع تركينه وناضت لسدره وصلت فيها بعد تباعدت عنها صفاء وهي شاده ولدها..
وصلت فيها مدت يدها وقالت بصوت عالي..
/طالعتلك ياجدي..
شدت سدره يدها وناضت..مدتلها اريج القيلا خدتها..
طوبى:هي تعالي..
مشت وسدره معاها وطلعوا مع بعض من الصاله والصغار لحقوهم..
مطيره ودموعها ينزلوا..
/تبيه يشوفها وهي واقفه ع رجليها..
كلهم تأثروا بكلام مطيره..لكن الصغار اللي مايفهموا شي لحقوهم...
🍀طلعوا للجنان...
وتشوف سدرة الواعر الكبير قاعد زي ماهو بهيبته وملامحه الحاده وعكوزه...
لما شافها ابتسم وبانت لمعة الدموع في عيونه وهو يقول..
/جت الصقرة..
ضحكوا الزوز..وسدرة دموعها غلبوها..
خلتها طوبى تقدمله لين وصلت فيه باست راسه..ونزلت ع ايديه باستهم..وهو باس راسها..
شمت ريحته القريبه من ريحة بوها..طول خشت حضنه وهي تبكي وقالت..
/عظم الله اجرك في الغالي..
هو طبطب ع ظهرها بدون مايتكلم ودموعه محبوسات في عيونه..
وطوبى لاهيه مع الصغار لكن كانت تسمع فيهم وع وجهها باديه ملامح الحزن...
🍃🍃🍃🍃🍃
لكن الفرح خلا قلب المهدي يتعب ماتحملش كمية المشاعر الحلوة اللي عاشها في لحظه..
عمر بضحكه؛تي شني ياراجل لاالكدر باهي ليك ولاالفرح ولاالحب!
المهدي وهو مبتسم :اسكت احسنلك..وقعد يمرن في يده اليسار..
ع خشة سدره بنته وهي جايبه طاسه ميه قالت بقلق..
/شنو بابا؟
فتح يده وقال؛تعالي تعالي..
جاته وملامح القلق قاعده ع وجهها وصلت فيه وخشت في حضنه ومازال شاده طاسة المية في يدها..
بعدت شويه ومدتهاله وهي تقول..
/اشرب بابا!
هو ضحك وخداها منها وقعد يشرب وعمر يشوفلهم بإبتسامه..
🍃وبرا الصاله..
تحديدا في دار المعيشه كانت سميره تتصل بصاحبتها مطيره لماردت عليها قالت بنبرة فرح..
"مطيره..طيب فيكم ياوخيتي"..
ومن دار المعيشه..لدار مغليه اللي كانت تتكلم هاتفيا حتى هي..
مغليه بنرفزة:دخله عمر وهو فاشل ودايخ والضحكه من الودن للوذن..
"يما ريحي بالك تربحي لو تطبق السمي ع الوطى والله ماصاير منهم"
مغليه بعصبيه:ان شاء الله ان شاء الله..وكان جي بيديرها لاعاد ولدي ولانعرفه...
🍃وفي هاليوم كانوا صغار طاهر عند حناهم لطفيه اللي بيقعدوا عندها ليوم السبت..
لطفيه:وماقالتش امتى بيروحوا؟
جوري؛لالا ولما سألتها ع خالتي صابرين قالت مش فاضيه..
لطفيه في نفسها..
"غير كيف خليت بوكم ياخد من هالعيله المعفنه..الله يرحمه كان ديما عاصي والشيطانه مغليه كبرت راسه عليا جعنها تلقاه ياربي"
وحمزة مع خوه معاذ في الجنان يلعبوا مع صغار ولد خو جدته..
🍃تعودوا ع شكل حياتهم وتكيفوا معاه..اكيد رح تقعد في نفوسهم علامات من هالمرحله اللي كلها شتات وضياع لكن العزاء الوحيد ان بذرتهم صالحة و قاعدة تنمو في بيئة صالحة 🍃
🍃🍃🍃🍃🍃
وانتشر خبر رجوع سدره في شارع القهوة..
وطوبى مع عمتها ومرت عمها جهزوا ضيافة للشارع كله..
كانت مميزة للغايه وفي نفس الوقت دعايه لنوع كيكة جديد داراته طوبى وسماته"كيكة جنة"...
🍀فرحة عبد القيوم غير بمرواحة سدرة حس في وجودها حتتغير هلبه حاجات للأحسن هو هكي حس..وفكر ان سدره ممكن تسهل عليه الوصول لطوبى هو هكي فكر..
بعد ماسلم ع يوسف سلام حار وهنا علي الواعر..بدي يفرق معاهم في الضيافه ع الشارع...
وربيع وسامي يراقبوا والابتسامه مافارقتش وجوههم..
🍃بس الغريب..
ان المهدي هالمرة مادار شي ماكانش في منه ردة فعله اللي تعودوا عليها اهل الشارع اللي يعرفوا بقصة حبه الاسطوريه هو سدرة...
وهالشي خلا الناس تستنج ان قصتهم بعد اللي صار خلاص انكتب فيها اخر سطر وانتهت...
🍃🍃🍃🍃
جاهم الغدي اللي وصوا عليه من برا وكان بزايد..
تغدوا مع بعض عيلتهم بس مافيهم حد براني...
علي وعبد المطلب كانوا هالكين يوسف بالاسئله وهو كان يتهرب في الاجابه ع اغلبها..
🍃لكن سدرة كانت هي اللي تسأل وتهدرز وقليل ماتعطيهم المجال يسألوها..
لاحظوا كلهم معاملتها الجافه مع هاديه وعدم تقبلها ليها..
وهاديه مااهتمتش لأنها كانت متوقعه هالشي....
🍃🍃🍃🍃
طلع من الحمام وهو لابس ديشمبر..
وقف ع المرايه وخدي عطره وقعد يرش منه ع رقبته..
ومرته اللي كانت مقعمزه ع السرير تقرا في كتاب شافتله وقالت..
