#طوبى "جنة طوبى"
#جمان_فريد
#الجزء_121"انا لحبيبي وحبيبي إلي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الدعاء
251 - باب فضل الدُّعاء بظهر الغيب
قَالَ الله تَعَالَى: وَالَّذِينَ جَاءُوا مِنْ بَعْدِهِمْ يَقُولُونَ رَبَّنَا اغْفِرْ لَنَا وَلإِخْوَانِنَا الَّذِينَ سَبَقُونَا بِالْأِيمَانِ [الحشر:10]،
وقال تَعَالَى: وَاسْتَغْفِرْ لِذَنْبِكَ وَلِلْمُؤْمِنِينَ وَالْمُؤْمِنَاتِ [محمد:19]،
وقال تَعَالَى: إخْبَارًا عَن إبْرَاهِيمَ ﷺ: رَبَّنَا اغْفِرْ لِي وَلِوَالِدَيَّ وَلِلْمُؤْمِنِينَ يَوْمَ يَقُومُ الْحِسَابُ [إبراهيم:41].
1/1494- وَعَن أَبي الدَّردَاءِ أَنَّهُ سمِعَ رَسُولَ اللَّهِ ﷺ يَقُولُ: مَا مِن عبْدٍ مُسْلِمٍ يَدعُو لأَخِيهِ بِظَهرِ الغَيْبِ إِلاَّ قَالَ المَلكُ ولَكَ بمِثْلٍ رواه مسلم
. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃ومع كل شتاء كنت ادعو الله ان تكون معي🍃
_________________________________________
🍀يوم الإثنين..
الثامن من شهر ربيع الآخر
23نوفمبر...سنة 2020..
الساعه 4:45عصرا...
خش للشقه مروح من الجامع بعد صلاة العصر..
توجه طول لدار النوم..لما خشلها..
لقي زوجته واقفه ع المرايه تلبس في خراصها"اقراطها"
مرر نظره عليها..اول مرة تلبس لبسة بنطلون بلونها المفضل الأزرق السماوي وتحتها بلوزه بيضا..اما شعرها طويل اللي رجع لسابق عهده في جماله وكثافته ولمعانه كانت مجدلاته عند مؤخرة راسها بطريقة حلوة والباقي خلاته مش مجدل ومطلوق ع طوله..
ودايما كل مرة يشوفها فيها وكأنها اول مرة حتى بعد ولت معاه يتصبح ويتمسى بيها شعور الحب اللي في قلبه ليها ديما متجدد ويزيد يوم عن يوم..وياه ع حجم الشوق فاق أي قدرة ع التحمل..بس هو مجبور يصبر ويتحمل سيوره ينول مراده..زي ماخلاها الله سبحانه وتعالى نصيبه برغم كل الظروف حيعطيه منها حظه وقسمه ليروي بيه عطش سنين طويله..
وهو في عز تأمله ليها شافتله بإبتسامه فيها شي من الخجل وهي رافعه حواجبها..
ضحك ضحكه خفيفه وقال..
/واتيه!؟
مشت للسرير تاخد في عبايتها وهي تقول بإبتسامه..
/شويه بس نلبس عبايتي وشاربتي..
قدم للسرير ومشي قعمز عليه وعيونه ع شعرها لعند مادرق عنه بعد مالبست العبايه قاللها..
/كان معاش تطلقي شعرك ع طوله..
التفتت شافتله وهي ترفع في سوستة العبايه وقالت..
/علاش!؟
قاللها؛شن علاش! الله يبارك عليه طويل واجد ويزهى في العين..
ابتسمت وقالت..
/قارية اذكاري..
هز راسه وقال..
/عارف لكن الحرص واجب زي حرص سيدنا يعقوب ع ولاده..
ضحكت وقالت..
/حاضر في الجديد مش حنخليه مطلوق ع طوله..
وخدت شاربتها وبدت تلبس فيها وهو يشوفلها..بعد كملت شاف للقفازات اللي كانوا ع السرير خداهم وناض قدملها بيهم وهو يقول..
/بكرا رادين للخمس ان شاء الله..
خدت منه القفازات وقالت..
/كملت شغلك هني خلاص!؟
ضيق عيونه وقال..
/ايه وبإذن الله نجوا هنا مرة تانيه اول 12..
كملت طوبى لبس القفازات ومشت بتاخد شنطتها وكيسة الهدايا وهي تقول..
/تمام..
خدت حاجاتها وهو قدملها وخدي منها كيسة الهدايا شد يدها ومشوا طلعوا مع بعض وهي مبتسمه وقلبها يدق بقوة...
🍃🍃🍃🍃🍃
"والله ماني عارف ياحاج تفاجئت زيي زيك"
محمد شنيبه بإستغراب..
/عمتك ماجابتش سيرة بكل!..
المهدي قال وهو يفكر..
/اكيده قالت لنسرين ..
هز بوه راسه بعدين قاله..
/ناديها..
شاف المهدي للباب ونادى بصوت عالي..
/نسرين...يانسرين..
"جاية جايه"
لحظات وخشت عليهم وهي ماشيه اتجاههم وتقول..
/نعم!؟
المهدي:حكتلك خديجه ع موضوع جمال ولد سلف عمتك كامله!؟
بإستغراب شديد قالت..
/موضوع خطوبه قصدك؟
هز راسه بإيجاب وبوها
