#طوبى "جنة طوبى"
#جمان_فريد
#الجزء_122"ذكريات لاتموت"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تلاوة_القرآن
" فإنّ قراءة القرآن بالتدبّر تُعطي العبد قُوةً في قلبه، وحياة، وسعة، وانشراحًا، وبهجةً، وسُرورًا؛ فيصير في شأن والنّاس في شأنٍ آخَر ".
- مدارج السالكين لـ ابن القيم
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃إن الذكريات سواء كانت ممتعة ام مؤلمة لتتسبب للمرء دائما في المعاناة...دوستويفسكي 🍃
_________________________________________
في صباح اليوم التالي..
اللي كان الخميس..كانت غرفه فايقه بكري تجهز في نفسها بش تمشي للجامعه عندها محاضرة ضروري تحضر وبتاخد كل شي فاتها لأنها الاسبوع الجاي خاشه ع امتحانات..
بعد ماجهزت نفسها مشت بسرعه للكوجينه تشوف كان في حاجه تاكلها ع السريع..
لما خشت لقت سالمين وطوبى مقعمزات يشربوا في القهوة..
☘غرفه:صباح الخير..
ردوا عليها...
"صباح الخيرات..صباح الورد"
طوبى رفعت صونيه قدامها في قطعة حلو وقالت..
/هاك خودي..
بسرعه غرفه خدت كلينكس وخدت بيه قطعه الحلو وهي تقول..
/بالله صغاري طوبى..
طوبى:ماتخمميش فيهم..
مشت طلعت بسرعه وطوبى تقوللها..
/ماتستعجليش في السواقه..
جاها ردها من برا وهي تقول..
"باهي باهي"
سالمين بإبتسامه..
/ربي يفتح عليها ويعاونها..
طوبى قالت..
/آمين..
☘طلعت غرفه للفيلا وتوجهت لسيارتها وحسين اللي كان مقعمز ع الدرجيحه وهو سرحان بتفكيره فيها لما شافها طالعه لسيارتها ناض ومشالها..
لما قرب منها قال..
/وين ماشيه!؟
عقدت حواجبها بغضب وركبت السيارة من غير ماترد عليه..
هو غمض عيونه بنفاد صبر بعدين فتحهم قعد يشوف للسيارة متاعها كيف تحركت..مشي طول لسيارته وركبها وبعد ماشغلها تحرك وراها وطلعوا من الحوش..
هدا كله كان ع عيون مطيره وهي واقفه في روشن دار حسين اللي كانت بايته فيها ضحكت وحركت راسها يمين ويسار بعدين خشت داخل..
🍃🍃🍃🍃
الساعه 11:36صباحا..
كان كل من الفيلا فايق بعد مافطروا قعمزوا في صالة الجلسة العربيه وقعدوا يهدرزوا ع ليلة الحفله واجوائها في قاعة اهل العريس..
وهما يهدرزوا كانت سالمين تسرق في النظر لفاتن وفاتن مركزه مع الهدرزة بس في لحظه مررت نظره عابرة ع المكان جو عيونها في عيون سالمين..
ابتسمت سالمين وفاتن ردتها مجامله...
🍃🍃
بعد فترة بسيطة من الزمن ناضت فاتن تشوف ولدها اللي كان راقد في دار اميمه طلعت من الصاله وسالمين لحقتها..
🍃"فاتن"
وقفت فاتن والتفتت لسالمين وقالت بإبتسامه..
/نعم؟
سالمين بإبتسامه..
/نبي نحكي معاك شويه..
شافتلها فاتن شويه بعدين قالت..
/تعالي معاي للدار..
..ومشوا مع بعض لدار اميمه خشولها وفاتن مشت وقفت ع ولدها تشوف فيه لقاته قاعد راقد..
سالمين:ربي يفرحك بيه..
فاتن بإبتسامه قالت..
/تسلمي..
تنهدت سالمين وقالت..
/من امتى تعرفي مختار؟
شافتلها فاتن وهي تقول..
/من قبل 10سنين..
سالمين:يعني تعرفيه كويس واكيد حكالك كل شي عن حياته؟
فاتن بإبتسامه..
/نعرف عنه كل شي،كل شي حكاهولي ماضيه بكل تفاصيله..
سالمين بتعجب..
/ورضيتي تمي معاه بعد اللي عرفتيه!؟
تنهدت فاتن وقالت..
/مختار زيه زي اي بنادم في الدنيا غلط وكلنا نغلطوا ومن حقه ياخد فرصته في الاحتواء واصلاح اخطائه..فكرة النبذ والنفور هادي ممكن تزيد دمره وتخليه يزيد يغلط اكثر واكثر..
سالمين:سمعت انكم اطلقتوا قبل بعدين ردتيله!..
هزت راسها وقالت..
/ايه..والسبب تعاملي الغلط مع شخصيته وتصرفاته بس توا الوضع اختلف..
سالمين وهي تشوف لعيونها ابتسمت بأسف بعدين قالت..
/باهي..نبي نسألك عن شي بعينه..
قاطعتها فاتن وقالت..
/اي سر من اسراره مستحيل نطلعه..
سالمين قعدت تشوفلها شويه بعدين هزت راسها وقالت..
/نحترم الحاجه هذي لكن عليا ننصحك نصيحة لوجه الله خلي ولدك يخالط هله ويتربى معاهم عشان تلقي فيه الخير بعدين..
ختمت كلامها بإبتسامه اسف بعدين مشت طلعت من الدار وخلت فاتن تفكر في كلامها وهي تشوف لولدها..
🍃🍃🍃🍃
بعد العصر..
عطي حسين سيارته لضيوفهم الشراقه بش ترفعهم زيارة لأقارب ليهم في طرابلس..
ومع طلعتهم طلعوا طوبى وعبد القيوم ومعاهم جنه دهواري كان لطوبى هدف من طلعاتهم مع بعض تبي جنة تتعود ع عبد القيوم اكثر لأنها ناويه تخليها تعيش معاهم..
☘زي ماكان ناوي حسين يتقرب من غرفه ويبدا في محاولاته لكسب ع الأقل قبولها..
🍃"صقع ع الصغار ياعمتي"
مطيره:مهناك صقع الجو عادي هي اسمعي الكلام سلم بنتي ونوضي ماديريش حساسيات بينك وبين مرت عمك..
تنهدت غرفه بضيق وقالت...
/باهي..
☘وجهزت نفسها وصغارها زي ماتجهزوا باقي نساوين العيله للطلعة مع حسين ماعدا سدرة وفاتن اللي بيروحوا لحياشهم..
🍃🍃🍃🍃
في احد المولات في العاصمه..
كانوا طوبى وعبد القيوم وجنة مقعمزين في مطعم..هما يهدرزوا وجنة تاكل في حاجه حلوة..
🍁"قاعد جرحها مابراش وحسيته زي اللي سببلها عقدة"
عبد القيوم:الله يرحمه عبد الرؤوف مات من الندم قبل مايموت في الحرب كان يحب اختك بصدق ومن كل قلبه..
قالت بحزن:الله يرحمه ويسامحه..
ضرب عبد القيوم بأصابعه ع الطاولة بعدين قال..
/حسين لو يبيها بجد لازم يداوي جروحها ويخليها تنسى اللي عاشاته مايفرضش نفسه عليها فرض الاسلوب هذى مع وحده في حالتها يخليها تزيد تنفر منه ومرات تكرهه حتى الكره..
طوبى وهي تفكر في كلامه خطرت عليها حالة غرفه بعد الموقف اللي داره حسين وقالت..
/كلامك صح..باهي عبادة حاول تنصحه وتوريه كيف لازم يتعامل معاها..
ابتسم وقال..
/لو فتح معاي الموضوع حنعطيه هالشور وان شاء الله يعرف يمشي بيه مشكلته طبعه شوي صعب وقليل صبر..
تنهدت طوبى وقالت..
/ربي يهديه ويجعل فيه الخيره لغرفه وصغارها..
عبدالقيوم:إن شاءالله..
شافت طوبى لجنه لقتها كملت الحلو اللي كانت تاكل فيه ومخليه فمها وخدودها حاله..
ضحكت وقال:شن هدا يامامي..
جنة قالت..
"عطيني كينكس"
ضحك عبد القيوم..
وطوبى خدت كلينكس من علبة ع الطاوله ومدتهولها وهي تقول بإبتسامه..
/خودي هي..
خداته جنه وقعدت تمسح في وجهها وهما يتفرجوا عليها وابتسامتهم ع وجوههم..
كملت وقالت..
"عاش في مامي؟"
طوبى اشرت ع انفها وقالت..
/مازال خشمك بس..
جنه مسحت انفها وقالت..
"نظيفة توا ولا"
ضحكوا عليها وطوبى قالت..
/نظيفه وحلوة بنتي..
حطت جنه الكلينكس ع الطاوله وشافت لعبد القيوم بعدين قالت..
"نبي ملاهي"
قرصها من خدها بلطف وقال..
/حاضر ياسمحه..
ويرن هاتفه..
خداه من ع الطاوله لما شاف المتصل عقد حواجبه وفتح الخط ورد..
/السلام عليكم عمتي شن حالك؟
حست طوبى بالتوتر وبمغص في بطنها لكنها خلت روحها عاديه قدامه..
"وعليكم السلام حبيبي..حالي باهي الحمد لله انت شن حالك وشن داير"
عبد القيوم:الحمد لله رب العالمين في خيار الخير..
"الحمد لله..شن حال طوبى"
شاف عبد القيوم لطوبى وقال..
/بخير والحمد لله..
"معاك هي!؟"
وهو يشوف لطوبى قال..
/ايه..
"ترا عاطيها ليا نبي نباركلها ع فرح بنت عمها"
سكت شويه بعدين قال..
/اهي معاك..
مد الهاتف لطوبى وهو مركز ع ملامحها قال..
/عمتي سليمه تبي تبارك..
رسمت طوبى ع وجهها ابتسامه مصطنعه وخدت الهاتف وردت..
/السلام عليكم عمتي..
ردت عليها بنبرة تهكميه..
"وعليكم السلام عاش من سمع صوتك ياحنة لاتقولي نتصل بهل داري نسأل عنهم ولادايرة روحك زعلانه"
ماكانتش تشوف لعبد القيوم وهي شاده الهاتف ماتبيشي يشوف في عيونها اللي بتحاول اخفائه..بلعت مع ريقها ضيقها ووجعها وضحكت ضحكة مصطنعة بعدين قالت..
/اهو لهيت بحوسة العرس ودوشته..
"ايه ايه العرس اللي ماكلفتوا خاطركم تعزمونا عليه"
بلعت ريقها وهي مبتسمه تظاهر وكأنها تسمع في كلام طيب
وهو مقابلها كان موزع تركيزه عليها وع بنتها..
"حتى نا نقول في كلام يضحك تي انتم ماعطيتونا علم بزواجكم !"
ومازال طوبى مبتسمه وملتزمه الصمت..
"ساكته ماعندك ماتقولي وحتى انا ماعنديش معاك كلام واجد..قولي حكيتي مع هلك عن الفرح"
طوبى بإبتسامه:ايه حكيتلهم عليه..
"وشن يراجو مايكلمونا عشان نتفاهموا شن بنديروا وشن مش دايرين ولاماهمش ناويين يحضروا من اصله!؟"
بلعت ريقها وقالت..
/اكيد في اقرب وقت تو يكلموكم بش تتفاهموا ع باقي التفاصيل..
"شن ورانا نرجو ونشوفوا شن اخرتها"
بتتنهد ضحكت وقالت..
/ان شاء الله إن شاء الله..
"عطيني ولد خويا"
طوبى:سلمي ع صفيه..
ماردتش سليمه..
ابتسمت وقالت..
/بالسلامة..ومدت الهاتف لعبد القيوم.
خداه وهو يشوف فيها كيف تهرب بعيونها عنه..
رد ع عمته وقال..
/هاه عمتي..
"هاه حبيبي افطن لروحك ياغالي الصقع قوي واجد في طرابلس"
قاللها:لامفروض معاش تخافي عليا عندي مراة راد بالها عليا وقريب تفسدني بدلالها..
شافتله طوبى وهي مبتسمه بحب..
"طبيعي حبيبي طبيعي اللي عندها راجل كيفك تحطه في عيونها"
هو قال:وهذى اللي صاير حبيبتي..غمز لطوبى وبعتلها قبله في الهواء..
هي ابتسمت بخجل شديد وشافت لجنه وجنة اللي كانت تراقب في عبد القيوم وهو يتكلم قلداته غمزت لأمها وبعتتلها بوسه..
حطت طوبى يدها ع فمها وهي تضحك..
وعبد القيوم قعد يضحك بدون صوت..
"ربي يدومها عليك ويهنيكم ببعضكم هي بالسلامه ولدي"
ابتسم وقال..
/بالسلامه ياغاليه سلمي ع الجميع..
"يوصل تصبح ع خير"
عبد القيوم:قدامك كل خير..
نزل الهاتف بعد ماسكرت عمته عقد حواجبه وقال لطوبى..
/شن قالتلك؟.
طوبى بإبتسامه..
/تكلمت ع موضوع العرس شكلهم متحمسين هلبه..
هو قال:تو نقول لعمي يكلم خالك المحجوب ويتفاهموا ع التفاصيل..
طوبى:واني تو نقول لسدرة تكلم عمتك..
عبد القيوم؛اول حاجه بيتفاهموا عليها الحوش اللي بيقعدوا فيه..عندي حوش جدتي غادي وهباته ليا الله يرحمها وين نعدي غادي نقعد فيه تو نقول لعمي يبرم عليه عشان يقعدوا فيه فترة الفرح..
هزت راسها بإيجاب وهي مبتسمه..
ربع ايديه وحطهم ع الطاوله بعدين قال..
/ع فكرة عندي حوش سمح غادي هذى اللي بنقعدوا فيه نحنا..وغمزلها بعينه
ضحكت بخجل وهو يتأمل في ضحكتها وتقطع عليه جنة لحظه هالتأمل لما قالت..
"عبدو..هيا ملاهي"
ضحكوا وهو ناض خداها ورفعها في حضنه وقال..
/حاضر ياعسل حاضر..شاف لأمها وقال..هيا يانحلة انتي.
خدت طوبى شنطتها ومشتلهم وطلعوا من المول...
🍃🍃🍃🍃
وفي مول تاني..
كانوا يدهوروا فردوس ومطيرة وصفيه واريج وهاديه وفايزة وبناتها مروة وتاله وغرفه اللي كانت دف بكروسه "عربة اطفال" بنتها مئاب وولادها مع حسين اللي كان يمشي وراهم بمسافه
بعد ماداروا دورة ع المحلات قعمزوا في وحده من مطاعم المول..
☘"برا لماما قوللها سونا يبي يكلمك شويه"
مهاب:باه..
ومشي جري للطاوله المقعمزة فيها امه..
وقف عليها وقال..
/ماما راهو سونا يبيك شويه..
اريج وفايزة شدوا ضحكاتهم بقوة..
والباقي شافوا لحسين ماعدا غرفه اللي قعدت تشوف لشيشة مية قدامها بنظرات تذمر..
اشر حسين لعمته وكأنه يقوللها "كلميها"
مطيره شافت لغرفة وقالت..
/بري بنتي اسمعي منه وخليه يسمع منك بري..
صفيه:عطيه فرصه يقول اللي عنده يابنتي..
شافت غرفه لصفيه بضيق بعدين هزت راسها بالموافقه استسلاما وناضت..
ابتسم حسين ابتسامه جانبيه وهو يشوف فيها جاياته وقلبه يرف رفان..
لما قربت توصل للطاوله..ناض ومشي وخرلها الكرسي..
☘مطيره بضحكه..
/ألعب..
فردوس بضحكه:ياوالله عليك حسين وخلاص..
وامه تشوفله بإبتسامه..
☘قعمزت غرفه هو ولى لكرسيه وقعمز مقابلها..
غرفه:اواب مهاب بروا لأريج..
هما طول نفدوا امر امهم ومشوا لأريج..
تنهدت غرفه وشافت لحسين لقاته يشوفلها بنظرات احرجتها غيرت نظرها عنه وقالت..
/قول اللي عندك..
"نحبك"
قامت عيونها وهي تشوفله بتعجب وقالت..
/مرة وحدة!
ضحك وقالت..
/مالا تبيها ع مرات!!
رفعت حاجبها تعجبا بعدين نزلاته وقالت..
/استعجلت بيها هلبه..
ضيق عيونه بعدم فهم..
غرفه:شوف حسين اني نبي ندوي معاك بهدوء وبالعقل..شن ماكانت مشاعرك ناحيتي ماتهمنيش المواضيع هادي بالنسبه ليا مسكرة والزواج مانفكرش فيه نهائي اني نبي نعيش لنفسي ولصغاري وبس..
سكت شويه بعدين مسح ذقنه وقال..
/مقدر الوضع اللي انتي فيه..ويكون في علمك اني عارف انك كنتي ناويه الطلاق قبل ليتوفى عبد الرؤوف رحمة الله عليه تفاصيل اللي صار بينكم مانعرفهاش ولانبي نعرفها لكن اللي يهمني منها ان قلبك فاضي منه والحاجه هادي لاحظتها لما لمحتلك برغبتي ماجبتيش سيرته نهائي ولاقلتي بتقعدي عايشه ع ذكراه..
غرفه بعدم فهم..
/والمعنى!
ابتسم وقال..
/انتي خايفه..
توسعوا عيونها شويه وهي تشوفله..
حسين؛خايفه تتكرر معاك نفس الخيبه..
تعبوا عيونها بالدموع ومازال ملتزمه الصمت..
حسين:غرفه..اني اول مرة في حياتي نعرف شن نبي بمعنى الكلمه..ممكن انتي مازال في بالك شي من ايام زمان واني نقولك زمان بالنسبه ليا مش متفكر منه شي غير ذكرياتنا مع بعض..
ضحكت وقالت..
/هديكا الايام وين نتفكرها نضحك..تفكيري كان تفكير وحده مراهقه حتى مشاعري ماكانتش ثابته وعقلي مش ناضج..
حسين:لكن اني راجل بالغ راشد ومشاعري ثابته وفاهم ع نفسي كويس ياغرفه..اقسملك بالله اللي حسيته ناحيتك عمري ماحسيته في حياتي..حتى البنت اللي كنت خاطبها ع قد ماحاولت نحرك قلبي ناحيتها ماقدرتش نتقبلها ولاعجبتني فيها حاجه..وراهو نقابل في اشكال والوان وكل وحده خير من التانيه اللي تتودد واللي تبي تتقرب واللي تحاول تلفتني ليها مافيش وحده دارت فيا ربع اللي انتي درتيه..
تتفكري اول مرة ريتك لما جيتك مع خالك بش نحكوا عن وضع رزق صغارك اقسم بالله اقسم بالله لما بنتي عليا حسيت بحركة قلبي اقسم بالله وبدون مبالغه ياغرفه هزتيني من داخل وكأني عمري في حياتي ماريتك ولالماتكلمتي اسلوبك تصرفاتك..وحده تانيه في حياتي ماعرفتها
ضحكت غرفة نص ضحكه وقالت..
/يااه!لهالدرجة تغيرت!؟
قاللها بإبتسامه..
/تبدلتي
هزت راسها وقالت..
/ع كل حال شكرا...
تلاشت ابتسامته ورفع حواجبه تعجبا..
تنهدت وقالت...
/برا شوف بنت عيله صغيرة وعزبا زيك تبدا معاها حياتك انتي مانصلحش بيك ياحسين لاانت ولاغيرك..سامحني..وناضت ومشت لمكانها قعمزت وهي تشوف لصفيه وتقول..
/ربي يبعتله اللي خير مني ياخالتي..
شافوله كلهم لقوه يكلم في اواب ومهاب اللي مشوله بعد ماخلاته امهم..كان مبتسم بس واضحة ابتسامته كان ابتسامة ضيق..
مطيره شافت لغرفه وقالت..
/كله قسمه ونصيب..
فردوس:يستاهل كل خير حسين سيوره يلقى نصيبه زي ما لقاه يوسف..
هزت صفيه راسها وهي تشوف لولدها بعدين شافت لغرفه وابتسمت بأسف وهي تقول..
/ان شاء الله..
وغرفه غيرت عيونها عنها وهي مضايقه..
🍃🍃🍃🍃
"والله مانحكيلك يانسرين فخامه عمري ماريتها حتى في مسلسلاتهم"
نسرين وهي تكلم في خديجة مكالمة فيديو..
/ماشاء الله..حتى حوشك حاجه صح..
"قالي جمال قعد عامين يبني فيه واثاثه كله اوروبي"
نسرين بإبتسامة:واضح ماشاء الله..
"باهي خليك مني واحكيلي شن جو عرس هديكا الجربة"
نسرين بتذمر:وواك منك..
"تي هيا احكي"
نسرين:دارت عرس كامل الله يبارك وكل شي داروه من احسن شي..
"ولى وصار منهم عيت طليبة القفاص"
نسرين:كله من حسين..
"باهي وشن جابولها متاعينها"
نسرين:الله يبارك كسوة تحل العين المغمضه وحتى هما تحسيهم عيلة اكابريه وناس راقيه..
"وشن عجبهم في هالمنسرفه!"
قالتلها بملل:خلاص خديجه عاد هنيلنا روحك..
"باهي نفوتوا هالسيرة المعفنه وقوليلي امتى بتبدوا في المدرسة"
نسرين بإبتسامة..
/الاسبوع الجاي ان شاء الله..
فجأة..
سمعت صيحات الشباب في الجنان ضحكت وهي مفجوعه..
"خيرك!؟"
نسرين بضحكه..
/الولاد دايرين مباراة في الجنان..
"وبوي وين!؟"
نسرين:بوي في زليطن..
"الله استاحشتها واستاحشت ايامها"
ضحكت نسرين وقالت..
/من قال خديجه خانوم تحب زليطن وتستاحشتها..
"وجه السعد عليا لولاها ماعرفت جيمو"
نسرين بضحكه..
/اه يا..ياجيمو انت..
☘ومن دار نسرين لجنان الحوش..
اللي كانوا يلعبوا فيه الاحفاد كرة قدم..
الاولاد يلعبوا والبنات يتفرجوا عليهم..
🌸فرح بحماس:الله عليك يزونا رونالدو..
شافلها يزن ورفع ابهامه يده اليسار..
ويرجعوا يلعبوا مرة تانيه وراما تراقب في محمد المهدي من تحت لتحت...
جوري:خاطري نلعب معاهم..
سدرة حامد:بش يشوطوك يلوحوك برا..
ضحكوا..
سدرة المهدي قالت..
/محمد خوكم يجري وخلاص..
فرح قالت:عطيه يغني راب بس هداكا..
جوري بفرح:حي حمزة خويا سجل هدف..وناضت تصفقله..
حمزة شافلها وابتسم ومحمد المهدي قرب منه ومسح ع شعره ولما قام عيونه بيشوف لجوري جو في عيون راما هي طول هربت بعيونها عنه وهو ارتبك وغير عيونه عنها..
☘وبعد ماكملوا المباراة ناضت فرح وهي تقول..
/اجمعوا اجمعوا كلكم اجمعوا هني..
محمد محي الدين..
/دوشة اختك هادي..
ضحك خوها وقال..
/تي حالة ياراجل..
يزن بصوت مسموع..
/شن تبي!؟
فرح حمحمت بتصنع وقالت..
/نبي نخبركم خبرية حلوة كتير..بنبدا نقرا في المدرسه هني مع ريمو..
شاف محمد المهدي لراما لقاها تشوفله ارتبكوا وغيروا عيونهم ليزن لما سمعوه يقول..
/وين الجديد ليك قريب عام وانتي تقولي فيها !
ضحكوا عليها..
فرح:هوبصراحة مش هذا اللي نبي نقوله..اللي نبي نقوله ان شهر واحد قريب يتم وبيخش شهر تنين ترا الباهي فيكم يقول شن صار في شهر 2؟
محمد حامد؛النكبه..
قعدوا يضحكوا وفرح قعدت تشوفله بإزدراء..
مرر محمد محي الدين نظره عليهم وقال..
/نكبه اس تربيع..
سدرة حامد:بختك يااختاه خلاك تجي في يوم زي هذا..
فرح:كلمة تانيه نبكي راهو..
راما شافتلها بإبتسامه وقالت..
/فوتيهم..تو نديرولك حفله كبيرة ونضربوها في تنين خالي عمر جي في نفس اليوم كان دخلنا مرته معانا تعاونا..
فرح بحماس..
/وااو..تشوقت تشوقت..هي نوضي معاي نقولوا لماما..
ناضت راما ومشت خشت مع بنت خالتها وباقي البنات لحقوهم..
محمد حامد بضحكه:مختشات..
ويرتفع آذان صلاة المغرب..
كلهم قالوا بأصوات متقطعه..
"صدق الحق..الله اكبر"
حدف محمد محي الدين الكرة وقال..
/هيا ياولاد..
مشي ولحقوه محمد حامد وحمزة..
اما يزن جي لخوه حط يده ع ظهره وقاله..
/خيرك!؟
محمد المهدي بإستغراب..
/خيرني..
هز يزن راسه وقال..
/هيا هيا..
ومشي للباب وهو مضايق وخوه لحقه وكان متوتر ومعصب منه في نفس الوقت..
☘☘☘
وبعد صلاة المغرب..
روحوا الولاد ع قهوة نضال ماعدا محمد المهدي مشي للحوش بش يبدل ويمشي لصاحبه مؤيد في المحل..
وهو خاش للحوش..
قابل راما وهي طالعه بتروح..
هي لما طلع في وجهها انفزعت ابتسم ع ردة فعلها وسكر الباب..
شافتله بفزع واستغراب في نفس الوقت..
قاللها..
/تو بتبدا المدرسه الهي بقرايتك وردي بالك ع روحك وشن مايصير معاك تعالي قوليلي طول..
عيونها تعبوا دموع وهي تشوفله..
وهو فتح الباب وقال..
/تصبحي ع خير..ومشي طول...
وهي قعدت معاه بعيونها لعند مادرق عنهم بعدين طلعت بسرعه وسكرت الباب..
🍃🍃🍃🍃
"محاولة بائت بالفشل"
طوبى وهي تعلق في ملاية الصلاة قالت..
/يحاول مرة وتنين وعشرة كان يبيها بجديات..
أريج بضحكه..
/لكن لقطة الكرسي معاش خلت..
ابتسمت طوبى وقالت..
/اني عجبتني منه هلبه كان يبي يحسسها بقيمتها عنده..
اريج بتفكر..
/تتفكري كيف كانت تبيه زمان ولما طلع من ليبيا وقالوا معاش بيولي شن صار فيها!!؟
طوبى وهي تذكر قالت..
/اني اللي نذكر..لكن مع السنين مشاعرها بردت ناحيته وتغيرت كانت مشاعر مراهقه..
اريج:صح عكس حب خالتي سدرة وعمي المهدي..
طوبى:هادم حبهم مزروع في قلوبهم زرع كل مايكبروا يكبر معاهم يبعدوا ولايقربوا يزيد..
دمعوا عيون اريج وهي تقول..
/الفراق مرات يزيد يقوي الحب..
طوبى وهي تفكر في عبد القيوم قالت بإبتسامه..
/والقرب يخليه يكبر اضعاف مضاعفه..
اريج شافتلها وقالت بضحكه..
/شن جوكم مع بعض مافيش تطورات..
حركت طوبى راسها بالنفي وهي في قمة الخجل..
اريج بإبتسامه..
/ان شاء الله بعد عرسكم تمشي الامور..
سيرة العرس فكرت طوبى بمكالمة سليمه تغيرت ملامح وجهها للضيق..
اريج لاحظتها وقالت..
/خيرك!؟.
استاقظت طوبى لنفسها وقالت..
/شي..هي تعالي نطلعولهم..
مشت فتحت باب الدار وطلعت واريج لحقتها وهي تفكر فيها...
🍃🍃🍃🍃
"ااه يافلذة كبدي قداش استاحشتك"
فاتن بضحكه..
/غير وطي صوتك خليه راقد..
مختار:نقولك مستاحشه خليه ينوض بعدين نرقده انتي اطلعي منها..
ضحكت فاتن بعدين مشت قعمزت ع السرير عدلت منبه الهاتف لصلاة الفجر بعدين حطاته ع الكامدينو..
مختار وهو يشوف لولده قال..
/ كان تغيري النغمه ولاتنقصي الصوت تفجعي فينا معاك..
فاتن حركت راسها يمين ويسار بعدم رضا بعدين جت بتتمدد لكن تراجعت لما تفكرت حاجه..شافت لمختار شويه وقالت..
/اليوم هدرزت عليا سالمين..
تبدلت ملامح وجه مختار للجمود ولونه انخطف..
فاتن:كانت تبي تسألني عن شي يخصك لكن اني خليتها تفهم انها مش حتعرف مني شي..
رفع عيونه لشباك مقابله بعدين شاف لفاتن وقال..
/تحسابك ماتعرفي عني شي..
فاتن:قلتلها هو حكالي عن ماضيه كله..
رجع نزل عيونه لولده تشتت تركيزه عليه لما سرح وهو يتفكر في الماضي البعيد..
🔺️🔺️🔺️قبل اكثر من عشرين عاما 🔺️🔺️🔺️
كان واقف من بعيد يشوفلها وهي ماشيه ودف في كرسي متحرك مقعمزة عليه مراة ستينيه..
مرر نظره عليها..شافها لابسه تنورة واسعه وطويله لونها بني عليها بلوزه خضراء زيتيه فيها ورود بنيه صغيره طول البلوزه لنص الفخد..ومغطيه شعرها الذهبي بشاربه بنيه فيها خطوط خضر من الاطراف..
رفعوه رجليه ليها بدون اراده منه قلبه كان مسيطر عليه لعند ماوقف فجأة لما سمعها تقول..
/مش هاين عليا امشي واسيبك مش عارفه ازاي حقدر ع بعدك يا آنتي.."خالتي او عمتي باللغة الانجليزيه"
طبطبت المراة ع يدها وهي تبتسلمها..
وهي ابتسمت والدمعه في عينها بعدين قالت..
/اللي مهون عليا اني هسكن قريبه منك وكل يوم بعد العصر حجي اقعد معاكي..
المراة اشرتلها بإيديها..
ضحكت وقالت..
/مش بخاطره غصب عنه دا شرطي الوحيد..
مدت المراة ايديها ضحكت وخشت في حضنها وهي تقولي..
/ياحبيبتي ياآنتي..
"انا لك على طول خليك ليا"
تباعدوا عن بعض وشافوله بفزع..
مختار بعيون مدمعه وابتسامة خيبة ع وجهه قال..
/قداش مرة غنيتهالي وكنتي ديما تقوليلي عمري ماحكون لغيرك..طلعتي اكبر كذابة..بعد ماكنت نشوف فيك زي الملايكه اكتشفت انك شيطانه ماتفرقي شي عن الناس اللي وجعتني وخذلتني..تي انتي طلعتي احرف منهم كلهم..
ضربت المراة الكبيره ع يدها وهي تشوفلها بتوتر..
شافتلها بعدين هزت راسها وقالت..
/اهدي ياحبيبتي اهدي حنمشي خلاص..
ومشت طول بالكروسه وهو يتبع فيها بعيونه ويقول بألم..
/مارييت علاش درتي فيا هكي يامارييت والله قاعد نحبك نحبك هلبه يامارييت..مارييت..
وهو ينادي وهي تمشي وتتباعد بدون ماتلتفت لعند مااختفت من قدام عيونه..
🔺️🔺️🔺️الوقت الحاضر🔺️🔺️🔺️
بسرعه مشي طلع من الدار وهو يقول بنبرة مرتعشه..
"ماتلحقنيش"
نزلوا دموع فاتن وهي تشوف للباب اللي طلع منه بعدين غيرت نظرها عنه لما سمعت صوت عياط ولدها ناضت مسحت دموعها ومشتله...
🍃🍃🍃🍃
مقعمزات قدام التلفزيون يتفرجوا ع اعادة المسلسل الهندي وياكلوا في المكسرات..
اريج:تي شن هالملل هدا ربع ساعه وهو شادها ومبلم فيها!
غرفه بضحكه:كل شويه يزلقوا ويعتروا بش تصير اللقطة هادي اللي تريح عليها نص الحلقه..
سالمين تسمع فيهم وتضحك...
فردوس وهي تشوف لهاتفها قالت..
/اريج ابعتي لأختك صور الكسوة..
اريج وهي تتفرج قالت..
/باهي..
شويه جت دعايه كانت لفيلم البطل متاعه ممثل اسمه"شاهيد كابور" قلب اريج فر فران وهي تشوفله..
تاله اللي كانت تتفرج معاهم بصمت قالت..
/الممثل هدا نسخة من عمي نضال شنيبه..
فايزة شافت لتاله بإمتعاض..
وفردوس قامت عيونها وشافت لبنتها..
والباقي وجهوا انظارهم ليها..
مروة بعد ماشافتلها فنصت في تاله..
وتاله نزلت عيونها وهي منحرجه..
ناضت اربج بصونية السامينسه"بذور دوار الشمس" وقالت..
/تمت خل نمشي نعبيها..
وطلعت بسرعة هاربه بدموعها عنهم..
تنهدت غرفه بضيق وهي تشوف للتلفزيون..
وهاديه شافت لفردوس لقتها تشوف لهاتفها وهي عاقده حواجبها بغضب...
🍃فهالوقت كانت طوبى مقعمزة في وحده من الديار تسمع في ورد الحفظ ع سلوى...
"اللهم بارك ياطوبى خلاص قربنا نكملوا السورة"
ابتسمت طوبى وقالت..
/سامحيني شغلتك في هالوقت.."احب ع قلبى كان نلقى مايشغلني شي في الدنيا غيره"
تعبوا عيون طوبى بالدموع الجمله اللي قالتها سلوى اثرت فيها هلبه..
"بيبا معاي"
طوبى:معاك معاك..
"نبي نقترح عليك اقتراح..شن رايك ندخلك قروب لطالبات جدد تعلميهم انتي"
طوبى بفرحه:ياريت..
"خلاص بكرا ان شاء الله ندخلك فيه ونزيدوا نحكوا مع الطالبات"
طوبى بإبتسامه:ان شاء الله جزاك الله خير ياسيلا..
"واياك بيبا سلمي ع اللي عندك وبوسيلي خالتي"
طوبى بضحكه:يوصل..تصبحي ع خير..
"وانت من اهله..السلام عليكم"
طوبى:وعليكم السلام..نهت المكالمة وهي متحمسه وفرحانه..
لكن فجأة وبدون مقدمات حست وكأن في صعقه كهربائيه ضربت راسها حطت يدها عليه والرؤيه قدامها تشوشت..
غمضت عيونها بشده وبدت تقرا في سورة الفلق..
وهي تقرا فيها..حست بتنميل ووخز في كل جزء من جسمها..
ناضت من مكانها حست روحها فقدت التوازن كانت حطيح لكن شدت روحها..
خشت عليها اريج في هاللحظة شافت حالتها قالت بخوف .
/خيرك
طوبى بتعب:وطي صوتك مافي شي حاجه بسيطه وتفوت جيبيلي الشيشه جيبي وسكري الباب..
سكرت اريج الباب وبسرعه خدت شيشة الميه من ع الطاوله وعطتها لطوبى..
خدتها طوبى فتحتها وشربت منها بعدين سكرتها وانطرحت ع السرير..
اريج بخوف شديد..
/طوبى!
طوبى بتعب..
/مافيا شي حبيبتي تعدي تو تعدي..ورجعت تقرا في سورة الفلق..واريج واقفه تشوفلها بألم ودموعها ينزلوا..
🍃🍃🍃
ويجي تاني يوم وطوبى بحال غير اللي كانت عليه في الليل عاديه تضحك وتهدرز وجوها حلو واريج بس اللي كانت مركزة معاها ولاحظت انها فهاليوم ماحولتش خاتم التسبيح من يدها ..
🍃🍃
بعد الغدي..
روحوا هاديه وفردوس وغرفه بصغارها ومعاهم جنه واريج وفايزة وبناتها لشارع القهوة..
وبعدهم جي راجل مطيره روح بيها..
اما طوبى مع عرب الشرق توجه بيهم عبد القيوم للخمس بش يقعدوا في المزرعة يومين..
🍁🍁🍁
هاليومين كانوا من اجمل الايام اللي تعيشها طوبى خصوصا بعد تقربها من الصابر اللي كانت احاديثه بأسلوبه المميز والمريح تجذب فيها وبين لحظه والتانيه كانت تتخيل فيه لطفي..
وغالبا بعد اللقاء يجي الوداع ..
وهالمرة غير كاريمان وسالمين كان في حد تاني مش هاين عليه يفارق طوبى..الصابر..
شد عبد القيوم ع تركينه قبل ليروحوا ووصاه عليها للمرة التانيه ونبه عليه يوفي بوعده ويجيبها تقعد عندهم اسبوعين وعبد القيوم اكدله انه قاعد عند وعده..
☘وبعد روحوا اهل الشرق بيوم..غادرت اميمه مع راجلها ارض الوطن..
وداعها لعيلتها كان مؤثر جدا هي وغرفه وطوبى كانوا يبكوا بالعبرة وهما يسلموا ع بعض...
ولا حال امها بعد ماطلعت من قدامها حست روحها طلعت وراها فقدت الوعي وتعبت وياما صار فيها وسدرة ومطيره وهاديه قعدوا يعانوا فيها ويهدوا في قلبها بكلمات المواساة اللي تهون شويه من عذاب الفراق...
🍀🍀🍀🍀🍀
وتمضي الايام..
🌸وتبدا الدراسه ومدرسة سدرة تفتح ابوابها..
المدرسة استلمت ادارتها نسرين ورجعولها اغلب مدرساتها القدم من بينهم زينب وزهرة وانضمولها اعضاء هيئة تدريس جدد وكلهم اصحاب خبرة وكفاءة..
كان اول يوم دراسي منظم جدا ونسرين بنفس مفتوحه وحماس كبير كانت قايمه بواجبها ع اكمل وجه وهي حريصه كل الحرص تكون قد الامانه اللي سلمتهالها صاحبتها..
🌸وبما ان الدراسه بدت رجع معين لمهتمه السابقه بس هالمرة بصفة مختلفه الحارس الامين لخطيبته وزوجته المستقبليه ولان الوضع اختلف مروة بدت تلاحظ اعجاب البنات بيه ومحاولاتهم لفت نظره برغم انه مش مهتم لوجوهم من الاساس لكن هالحال شكله مش حيعجب الكاتيوشا..
🌸ومن الحارس الامين لخطيبته للحارس الأمين لبنت عمته
يوميا يلحق في باصها الصبح لعند مايحطهافالمدرسه ويدرس قدام باب مدرستها في نهاية الدوام يراقبها لعند ماتروح هو ماكانش عارف هل اللي يدير فيه من باب الحرص ع بنت عمته او انه في شي تاني يدفع فيه يدير هكي برغبته وبكامل ارداته!..
☘لكن هلبه حاجات احيانا تصير خارج ارداتنا بس من داخلنا نكونوا راغبينها بقوة..
زي نضال اللي سلموه منهج ماده منزلتها اريج لقي روحه رغما عنه وفي نفس الوقت برغبته حيتقابل هو وياها مرات ومرات..
☘وخلال هالأيام طوبى كانت مشغوله بوضع اللمسات الاخيرة ع مشروعها اللي ساعدها فيه عبد القيوم وفي الخفاء كانت تعاني من بعض الاعراض اللي بدت تعرف تتعامل معاها بروحها بدون ماتشغل بال راجلها وتزيد تشقيه معاها...
🍃بس اختفاء عبد المطلب وهاديه المفاجئ شغل بال بنات خوه وماعرفوش الا مؤخرا انه حط زوجته عند اهلها وسافر لوحده من الدول المجاورة برغم ان الوضع يبان طبيعي لكن في حقيقته كان مريب للغايه...
