[كان الله في عون اهلنا في غ.زة دعائكم معاهم هدا أضعف الإيمان ]
#طوبى "جنة طوبى"
#جمان_فريد
#الجزء_المئة_وواحد"حسابات قديمه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#فضل_الحمد
قال رسول الله ﷺ:
« إذا قال العبدُ : ( الحمدُ لله كثيراً ) قال الله تعالى :
اكتبوا لعبدي رحمتي كثيراً ». 🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لا تبدأ بصلح من خاصمَك بغيرِ حق، فتُذِلّ نفسَك في غير محلٌٍ وتكبر نفسُه بغير حق.
- الإمام الشافعي.🍃
_________________________________________
"لاباس ميغ"...كيف الحال
شافله شويه بعدين رد عليه عبد القيوم بإيتسامه..
" اخمادغ مسينغ"....الحمد لله...
مختار وهو موجه نظره القدام قال بإبتسامه..
/حبيت لغتكم فيها شي خاص وغريب..رد نظره عليه وقال بنفس الابتسامه اللطيفه..اساسا ثقافتكم خاصه ومميزة..
رد عليه بملامح وجه هاديه وابتسامه مجامله..
/شكرا..
مختار:العفو..مرر نظره ع الخيمه..ثبته وين جو عيونه في عيون عبد الرؤوف ونظراته ليه كانت حاده بعض الشي..
ابتسم ببرود ورد نظره للتارقي وهو يقول..
/وتوا اسمحلي نشكرك ع جمايلك الكبيره اللي درتها مع عيلتي..تاني شي وهدا اللي جيتك ع خاطره نبي دير فيا حتى اني جميل..
تنهد وهو يشوف لعدي اللي كان ولى يهدرز مع حسين وقال..
/انا معتبر نفسي ولدهم مافيش بيني وبينهم جمايل..وانت شن ماتبي مني كان نقدر عليه نديره إن شاء الله..
غير مختار نظره لعدي وقال..
/نعرف انك خطاط ممتاز وموهبتك زي ثقافتك مميزة..شفتلك شغل قبل وعجبني ونبيك ديريلي زيه في الفيلا عندي..رجع نظره ليه وقال..وشن ماتبي ندفعلك..
🍃هني ربيع اللي كان طالع برا يتكلم بالتليفون ولى للخيمه لما خش وشاف مختار مقعمز مع التارقي انصدم وخاف وغير نظره طول لعبد الرؤوف..لقاه يشوفله بنظرات ربيع فهمها..
ماكانوش هما الزوز بس اللي ركزوا على هالمشهد حتى الحاج علي..نظراته لعبد القيوم كانت نظرات قلق تتبدل للبغض لما يشوف لحفيده...
تنفس بعصبيه وغير نظره للمحجوب لقاه لاهي مع واحد مع من الجيران...
🍃عبد القيوم:دامك من عيلة الواعر نخدمك بعيوني ومانبي منك شي..
مختار بإبتسامه:مشكور جدا كلك ذوق..تعطيني رقمك!؟
عبد القيوم مد يده وقال:هات نسجله
مد مختار تليفونه للتارقي..خداه منه وبدي يسجل في الرقم غير مختار نظره عنه لربيع..
رسم ربيع ع وجهه ابتسامه وقدملهم وهو يقول..
/مخمخ..وركز بنظره ع التارقي وهو يسجل في اسمه..
مختار:سنان وينك معاش تقابل؟
ربيع:هايم في الدنيا..
عبد القيوم:في اي وقت تقدر تكلمني..وعطاه التليفون..
ربيع وهو يشوفله قال في نفسه تعجبا..
"هدا خيره!!؟"
خدي مختار التليفون وقال بإبتسامه..
/تمام..فرصه سعيدة ياتارقي..
عبد القيوم بإبتسامه:اني اسعد..
ناض مختار وهو يقول..
/نستأذن..ومشي ولى لمكانه..
وعيون اللي مركزين معاه عليه ومعاهم اياد اللي شافه قعمز جنب المهدي تبدلت ملامح وجهه للضيق..
لاحظ ان مختار مش متقبله ويعامل فيه بكبر وتجاهل ولأنه عارف كيف ولى مؤثر بشكل كبير في سدرة المنتهى خاف يخليها تبعد عنه...
🍃🍃🍃🍃
وسدرة اللي كانت مقعمزه مع نساوين عيلة الفاندي تهدرز وتضحك وجوها حلو تسمع في اخبارهم اللي فرحتها بالذات اقبال..زي ماهو معروف هي فاقده جزء من ذاكرتها ونهاية قصتها مع يوسف ماكانتش متفكرتها لين حكالها يوسف عنها..خدت منه موقف وتأسفت ع اقبال بس لما عرفت اخبارها السعيده تجاوزت الموقف بعض الشيء وتوا تخطاته تماما وولت فرحانه من كل قلبها ليوسف..
🍃من جهة تانيه كانت طوبى واخدة الصغار كلهم ورافعتهم لدار المعيشه ماعدا ولاد عبد الرؤوف اللي طلعوهم لبوهم...
حطتلهم عشاهم وقعدت معاهم تعشي في جنه
🍃في الكوجينه..
صفيه بنرفزة؛معقوله بعد اللي صار مازال دخل في صغار هديكا الرزيه للحوش!؟
اميمه؛هادم اطفال امي ماليهم ذنب في شي يخي امهم هادي ظلمتهم حتى هما..
صفيه بحقد:اني بعد عرفت اللي داراته هي واختها كرهتهم وكرهت مايجي منهم..
اميمه؛لاتزر وازرة وزر اخري ياماما..
ع خشة سميرة وفايزة..
سميرة:تعشوا الصغار!؟
اميمه؛طوبى تعشي فيهم..
ابتسمت سميره..
فايزة؛خلاص خل نطلعوا العشي...
☘عشي النساوين طيبوه حوش الواعر..لكن عشي الرجالة جابوله طباخ داره في جنان حوش علي الواعر..
🌼تعشوا رجاله ونساوين...وقعدت طوبى في عالم الاطفال اللي كان تلقى ماتطلعش منه..
طوبى بضحكه:عاودي غنيها جوري..
جوري:حان الدرس..دق الجرس..اسمعوه..اسمعوه..
صوته جميل ليس له مثيل..دينق..دنق دونق..
سكتت وجنه بدت تردد في الكلمات الاخيره بلغتها العسليه وهما يضحكوا..
سدرة المهدي بضحكه؛نجيها ياربي..
طوبى بإبتسامه:سلمك حبيبتي..
معاذ:نبي لحمة..
طوبى:باهي حبيبي..وخدت طرف لحمه وبدت تفترش فيها وتوكل فيه وهي تسمع في هدرزة البنات وجنة مرة مرة تشارك فيهم..
وهالحاله الحلوة شافتها فاتن اللي كانت دور عليها..
وقفت في الباب وقعدت تتأمل فيها كيف تتعامل مع صغار نجاه..عيونها دمعوا...زادت تأثرت بيها هلبه..حبتها اكثر وزاد احترامها ليها..
ابتسمت من قلبها وقالت..
/انتم هني!؟
طوبى التفت شافتها وقالت..
/فتون..
قربت قعمزت حداهم ع ركابها وقالت..
/ماتبيش تتعشي..
طوبى:حتى بعدين..تعشيتي انتي؟
فاتن وهي تشوف لجنه كيف تاكل قالت بإبتسامه..
/ايه..الفلوسه هادي استاحشتها..
ابتسمت طوبى..
شافتلها وقالت..
/عادي بعدين نطلعها لخالها يبي يشوفها..
ضاق صدر طوبى من طلب فاتن بس ماقدرتش ترفضه ابتسمت مجامله وقالت..
/مش مشكله...
🍃🍃🍃🍃🍃
وفي خيمه الرجاله..
اغلب الحاضرين كانوا ياكلوا بشراهه وهادي ماكلة الرجاله بالعاده..
ماعدا البعض ولأسباب مختلفه..
زي الحاج علي اللي سدله مختار شهيته.
وعبد القيوم اللي مش قادرة يتهنى باللقمه وهو يشوف في عدي كيف يقوي في علاقته برجال عيلة الواعر..
وعبد الرؤوف اللي كان مقهور من الوضع حرفيا..
اما الحاج الصيد فكان الفترة الاخيره يشكي من معدته ولما عاين عليها قالوله التهابات..وفرضوا عليه يبعد عن الاكل الحار والمدهن..
لكن ماقدرش يقاوم ماكلة العزومه خدي كاشيك وطاح في الكسكسي وولاده عبد الفتاح ومحي الدين واشرف يراقبوا فيه وماباش حد فيهم يدخل خافوا يهزبهم قدام الحاضرين..
🍃مختار:ليا وقت ع ماكلة المناسبات..
المهدي بإبتسامه:صحه..
ركز في عيونه وقال..
/كل شي ياخد وقته ويفوت..
عقد المهدي حواجبه بعدم فهم..
مختار ابتسمله بعدين رجع ياكل وخلاه يفكر في كلامه...
🍃وتعشوا المعازيم..
وجتهم الطاسه الخضراء "الشاهي الأخضر"..
وهني استغل شكري الفرصه وقعمز مع علي الواعر وفتح موضوعه..
في جهة تانيه من الخيمه..
نضال:تي غير شن درت فينا ياعبدو معاش بديت نستطعم في الشاهي الاخضر من غيرك..
ضحك عبد القيوم ومختار ربع ايديه وقعد مركز عليه..
المهدي:شهاده لله لافي قبله ولابعده الشاهي التارقي..
تكلم مختار وقال..
/شوقونا..ان شاء الله نشربوه شاهيك يوما ما..
نظرات رجال عيلة الواعر كلها كانت متوجهه لمختار بحده ماعدا ربيع اللي كانت نظراته نظرات ريبه..
عبد القيوم بإبتسامه..
/إن شاء الله..
فهموا رجال الواعر ان عبد القيوم يجامل لكن ربيع حسه يتكلم بجديه..
هني عدي قال..
/قعدنا كان حني ياعبد القيوم..
زاد تركيز مختار ع نظرات عبد القيوم لعدي..
عبد القيوم وهو مبتسم فوق من نفسه قال..
/كان لقيتلك وقت..
فنص ربيع عيونه وهو شاد ضحكته..
واللي مركزين مع حديثهم استغربوا رد عبد القيوم ماعدا عبد الرؤوف اللي كان يقاوم جاهدا بش ماتطلعش ضحكته..
ابتسم عدي بإستغراب لرد عبد القيوم اللي بان مش لطيف..
ضحك عبد القيوم وقال..
/نبصر عليك..في اي وقت تفضل وتشرب احلى طاسة شاهي..
ربيع بهمس:سقوطري..
سمعه عبد القيوم وحافظ ع ابتسامه المجامله بقوة..
عدي حتى هو ابتسم مجامله وقال..
/بارك الله فيك..
🍃🍃
علي الواعر:والله ياولدي الشور في موضوع هدا لصاحبة الشان نشوفها ونرد عليك وان شاء الله خير..
ابتسم شكري وقال:ان شاء الله..
☘اخفى علي الواعر فرحته بطلب شكري..حال مطيره ديما شاغله خاف تغيب عينه وتقعد بروحها وهو توا متمني من الله مطيره توافق عليه وكان ناوي يقنعها بيه...
لكن شكري كان يراجي بفارغ الصبر امتى يتجاوز هالشكليات ويتزوج مطيره وتكمل معاه باقي العمر..
اعجابه بيها زاد بعد انتقلوا لطرابلس وقعد يجي زيارات لأخته..كان احيانا يشوف فيها عندها..ومرات يشوف فيها لما تخدم في المحل..ويصير احتكاك غير مباشر لما تطلب منه اخته طلبات تخص المحل وهو يجيبهم في حضور مطيره..
خشت خاطره زي مانقولوا وكره وحدته بعد ماعرفها..
اما هي لقت روحها بدون ماتحس منجذبه لشخصيته الراكزه المقدرة..ولما خطبها حست بفرحة كبيره وفهمت وقتها انها متقبلاته وعاجبها...☘
🍃🍃🍃🍃🍃
وتعشوا الحاضرات وشربوا الشاهي...
وبعد شربوا الشاهي فاجئوهم أريج وصفاء وهما خاشات بالدرابيك..
سدرة بالذات كانت مندهشه للغايه..
اريج:هي ايديكم معانا يا عويله...
دب الحماس في الحاضرات وهما يراجو امتى تبدا دقة الدربوكه...
وبدوا يدربكوا اريج وصفاء والحاضرات يصفقوا..
وغنت اريج..
..على اول ماتبدينا..على محمد صلينا..
وهما يردوا وراها وسدرة تصفق وهي مبتسمه ودموعها في عيونها..
ع خشت سميره وهي تصفق..
..هالنهار تمنيته..طلبت العالي ولقيته...
ردوا وراها وسدرة تشوفلها بإبتسامه...
مطيره ودموعها في عيونها..
يانجمة في الحوش ضويتي ياطيب فينا صحيتي..
وهما يردوا عليها..تبادلت هي وسدرة نظرات الحب...بعدين غيرت نظرها لغرفه اللي غنت تقول..
..طار السؤ تباعد عنك ....عز خواتك وين ايجنك..
زغردت مطيره وهاديه وسميرة يزغردوا معاها..
وسدرة فرحانه فرحة لاتوصف لكن قعدت دور بعيونها ع طوبى..
غنت بعدين صفيه..
... ياسلم الغالي داواها ماخلاش تمكن داها...
تغيرت الوجوه بعد وردوا وراها بالغصب عكس باقي الحاضرات اللي ردوا عادي وسدرة تصفق معاهم وهي مبتسمه بحب...
وتزيد فرحتها بمشاركه صديقة عمرها..
فايزة..
..صبح جنة بيك المطراح..هليتي وهلت لفراح...
زغردوا وراها ورددوا بيتها..
بعتتلها سدرة قبله وهي ردتها مع ابتسامات حب..
هالاجواء الحلوة عاشتها فاتن بإستمتاع حاسه بدفي ومشاعر حلوة وسطهم وكأنها ليها معاهم عمر..
هني خشت زينب للصاله وخشت طوبى بعدها لكن ماكانتش خشة عاديه..
خشت ترقص في وسط الصاله وهي تغني..
🌼 افرح ياقلبي وزيد افرح...على اللي كان مريض وصح..
ردوا وراها بيتها وزغردوا عليها وهي ترقص بفرح خلت دموع سدرة تنزل وهي تشوفلها بحب...
غنت طوبى تاني..
... الحوش ضوا اصحابه جو …..الخاطر مشغول وهنوه
زغردت مطيرة وخشت ترقص مطيره..
اريج ومروة صاحوا بحماس..
وصفاء غنت..
/هاللي ترقص هي وياها..ان شاء الله ماتقعدش بلاها..
ومطيره وطوبى يرقصوا بحماس وهما في قمة الفرح..
غرفه وهي رافعه ايديها فوق وتصفق..
/هادي عمتنا الغاليه..كيف ذهب ايطاليا..
زغردوا سميره وهاديه..والحماس زاد عند الحاضرات...
وطوبى غنت بيت تاني وهي ترقص وتقدم لسدرة..
... ياوخية راني فرحانة...والشاهد ربي سبحانه...
حطت سدره ايديها ع فمها طبعت عليهم قبله وبعتتهالها..
وطوبى مدت خدها....ضحكوا عليها...
وعيون عيلة الفاندي وعيلة عدي عليها زادت عجبتهم وزهت في عيونهم..
☘وكملوا شوطهم الحامي والرجاله في الخيمه يسمعوا..
المهدي كان يتخيل في فرحة سدرة وقلبه من داخل فرحان لفرحتها..
وقلب عبد القيوم حتى هو كان فرحان لفرح حبيبته اللي ياما شافت من مر وآلام في غياب امها التانيه عنها...
لكن مختار كان يفكر في اللي قاعد يصير توا..العزومه وهالفرحه كبيره كلها ع خاطر سدرة..غيرته منها تحركت بقوة وزاد تعمق في تفكيره..هدفه اللي يبي يوصله اللي قاعد يصير توا ممكن يزيد يأخره عنه..هو يبي سدرة تحس بالغربه والوحده بيناتهم يبيها تلجأله هو وتقعد ديما تحت جناحه بش توصله لمآربه...
تنهد وقال في نفسه..
"خليهم يفرحوا بيها اليومين هادم وانت خليك صبور اخرة الصبر ديما حلوة يامختار"..
رفع حواجبه وشاف جهة الحوش لما سمعهم يغنوا..
"اني وخواتي كلمة وحده..كيف القوات المتحده"..
🍃وكان شوط الفرح اللي قاموه مسموع في الشارع كله واكيد بيوصل لأصحاب القلوب الحاقده وخلاهم يتآكلوا من الغيظ...
وصحاب الفرح عايشين جوهم وهما يهيئوا في رواحهم لتوالي الافراح عليهم وختموا شوطهم وهما يغنوا مع بعض..
" إن شاء الله ديما افراح ياربي..وقليبي مرتاح ياربي"
🍃🍃🍃🍃🍃
الساعه 12:30منتصف الليل..
واقف قدام كرم العنب..يتأمل فيها ويتفكر في الايام الخوالي..
ايام امه..ويامحلى ايام ورده اللي هو اختار يبعد عنها ويخليها تذبل من الحزن وتقعد في قلبه غصه وحسرة لأخر عمره..
"خالو اني جيت"
مسح دموعه بقوة والتفت..
شاف جميلة الجميلات بفستان ابيض وشعرها الذهبي مزين بتوكات ع هيئة زهرة الاقحوان..
اكثر شي كان محليها ابتسامتها الحلوة البريئه اللي بدت ع وجهها وين شافاته..
شافها تقدم وهي في حضن مرته لين وصلوا فيه..
مدت جنه ايديها ليه تبيه..
هو ضحك وخداها..وهي طول حطت يدها ع لحيته..
فاتن بإبتسامه؛روح الطفل شفافه تعرف الانسان الحنون..شفت ضحكتها لما تشوفك ولهفتها عليك..حست بالحن متاعك..
مختار بتوتر:نحس في روحي نرجف..خايف نطيحها..
فاتن:بالعكس انت شاد فيها بقوة..
ركز على نفسه لقي روحه متمسك فيها بقوة..
فاتن؛مش قادره نصدق انك ماتحبش الصغار..
حس بشعور مؤلم بعد ماسمع كلامها الاخير..مدلها جنه وقال..غدوة العشيه يجيك الاقجم..
خدت منه جنه وهي تشوفله بضيق ..
مشي بيهرب وهو في قمة التوتر..حس بوجع في قلبه لما سمع صوت بكاها..وجمد في مكانه لما سمعها قالت..
"بابا"..
بلع ريقه..ودقات قلبه تسارعت..التفت شافلها..
لقاها تشوفله وهي تبكي وتمدله في ايديها وتكرر في ندائها "بابا"
فاتن بوجع؛مختار!
هو بخطوات سريعه قدملها وخداها من فاتن وضمها..لف وجهه عن مرته لما نزلوا دموعه غصب عنه..
جنه لفت ايديها ع رقبته وبدت تهدا شويه شويه لين سكتت..
مسح دموع ورجع شاف لمرته وقال..
/قلبي يافاتن..
حطت يدها ع ذراعه وقالت بإبتسامه من بين دموعها..
/ديما نقولك فيها قلبك مافيش احن منه..
تنهد من قلبه..طبع قبله ع راس جنه وهو مغمض عيونه..
وفاتن تتأمل في حالته بحب..
☘كانت متأمله في الكثير..انه يغير رأيه في حكاية الانجاب لعل وعسى يلقوا طريقه يجيبوا فيها حتى طفل واحد..ومتأمله اكثر انه يشفى من كل علل قلبه وجروحه العميقه اللي قاعده تنزف كل يوم...☘
حمحم مختار وقال..
/خشي جيبي حاجه نحطها عليها الجو صقع شويه..
فاتن بإبتسامه:حاضر..
ومشت طول خشت داخل وخلاته يحكي مع جنه وهو يقول بألم..
/اسف..
جنه شدت خشمه وقالت
"هشمي"..خلاته يضحك من قلبه..
🍃وعيون طوبى وهي واقفه فم باب الكوجينه وفي يدها غطا لبنتها عليه
بين عيونها جت ذكرى كل ماتخطر عليها يتعبى قلبها بالخوف والألم..
قداش كان لطيف وحنون وقتها..زي ماتشوف فيه توا بالزبط..
هو بضحكه قال..
/طعمة طعامه يابنت انتي..وباسها من خدها..وجه نظره لباب الكوجينه وهو يقول...وين مش....وسكت لما شافها واقفه..تشوفله بنظرات خلاته يرجع يتوتر..
فجأه وبدون مقدمات..
قدمتلهم وهي تقول بإبتسامه..
شن جنونتي خديتي ع خالو بسرعه..حطت عليها الغطا وقالت..حبتيه حتى انتي..شكله صح زي ماقالت خالتك سدرة خالك حنين هلبه..
هو قعد يشوفلها بتعجب..بعدين غير عيونه للباب شاف سدرة واقفه تتفرج عليهم وابتسامتها ع وجهها..
رفع حواحبه وحرك عيونه لطوبى..
لقاها تشوفله بإبتسامه واسعه...
قدمت ناحيتهم سدره وهي تمشي بالقيلا لين وصلت فيهم وقالت ودموعها في عيونها...
/انت هني!؟
🍃وفي الجنان القدامي كانوا واقفين علي والمحجوب وحديثهم كان عنه هو..
علي بغضب:والله لولا طوبى لولاها هي بس ماخليته يعفس في الشارع..
المحجوب بضيق؛حتى اني ع خاطرها هي بالدرجة الاولى متحمل وساكت..
"الله احلى بوسه تجيني ع خشمي في حياتي كلها"
سمعوا الجمله هادي اللي كانت بصوته...شافوا لبعض..بعدين قدم الحاج علي لين بانوا عليه من بعيد والمحجوب اللي وقف وراه شافهم...
🍃طوبى بضحكه؛عندك حق ياسدرة لما حكيتي ع حنيته لكن في نفس الوقت مستغربه علاش مادرتش صغارلتوا!؟
هو ابتسم وقال..
/ماننفعش نكون اب مش ليا الابوة..
عقدت سدرة حواجبها وهي تشوفله بضيق ودموعها في عيونه..كانتتضغط باصابع يدها اليمين ع راحتها بقوة..
طوبى برفعة حواجب وقالت..
/بصراحه نهنيك..ياريت كل راجل يشوف روحه غير اهل لمسؤوليه زي هادي يدير زيك..
ضم جنه ليه وهو يشوف لطوبى بإبتسامه مزيفه وهي تبادله فيه نفس الابتسامه وسدرة تمرر في نظرها عليهم..
انفجعوا الثلاته لما سمعوا صوت علي الواعر الهدار وهو ينادي..
"سدرة"
وجهوا انظارهم ليه...
وهو قعد مركز بنظره بس ع سدره اللي زاد احساسها بالضيق...
قدمتله بسرعه لين وصلت فيه وهي تقول بصوت مخنوق..
/نعم جدي!؟
بشي من العصبيه قال..
/سلمي ع خالك..
غيرت نظرها لخالها تبدلت ملامح وجهها للجديه مدت يدها وهي تقول..
/اهلا..
صافحها المحجوب وهو مستغرب فيها...
عارفها مش مذكراته لكن حسها مش قابلاته...
فيسع جبدت يدها وقالت لجدها..
/امور العزومه مشت تمام جدي؟
علي وهو يشوف للمحجوب بإستغراب..
/ايه ايه تمام..
هدا كله قدام عيون طوبى ومختار اللي مركزين ع ادق التفاصيل..
"حاج علي"
بدت ع وجه مختار ملامح الكره بعدين شاف طوبى وهي ماشيه ناحيتهم..
وصلت فيهم ع جية عبد الرؤوف وهو يقول..
/السلام عليكم..حمد لله ع سلامه نسيبتي..
سدره بإمتعاض:انت راجل غرفه!؟
ضيقت طوبى عيونها وهي تشوف لملامح ونظرات اختها لعبد الرؤوف..
عبد الرؤوف بضحكه:ايه..انت حتى قبل ماكنتيش راضيه علينا..
مررت نظرها عليه من فوق لتحت بعدين قالت لجدها..
/تعبت اليوم هلبه بنخش نرتاح تصبح ع خير جدي..
ولفت ومشت وهما بعيونهم معاها..
غيرت طوبى نظرها لمختار اللي كان يشوف لسدره لما وصلت فيه كلماته وخش معاها بجنه داخل..
التفتت شافتلهم وقالت..
/تصبحوا ع خير..
هما ردوا عليها..
"قدامك كل خير..وانتي من اهله"
لفت ومشت وهي مضايقه لأبعد حد..
علي جي بيتكلم شاف لعبد الرؤوف شويه بعدين غير نظره للمحجوب وقال..
/تصبحوا ع خير..ومشي بإتجاه الباب الفاصل...
تنهد عبد الرؤوف بضيق ومحجوب قاله..
/هيا تعالى نطلعوا..
هز عبد الرؤوف راسه وع وجهها باديه ملامح الضيق وفي عيونه باينه القهرة واضحه..
المحجوب كان حاس بيه لأن حالهم من بعض لكن في نفس الوقت كان يبي يعرف علاش تعاملت معاه سدرة بفضاضه!!
🍃🍃🍃🍃
في الكوجينه..
كان مختار مقعمز ورا الطاوله وجنه ع حجره تلعب بساعته..
وسدرة مقعمزة مقابلاته وهي تشوف لطوبى كيف توتي في عشاها...
تنهد مختار وقال..
/الكوجينه معبيه ذكريات..
شافتله سدره بإبتسامه حزن وقالت..
/احلى ذكرياتنا فيها..
وبدي مختار يسرد في الذكريات وسدرة تشارك فيه بحماس وشغف..
وطوبى مركزة ع حالتها وع مختار معاها وعقلها مابطلش تفكير..
سدرة ودموعها تنزل..
/ايام معاش تولي خلاص راحت مع اللي راحو..
وقعدت تمسح في دموعها وهو يشوفلها..
وطوبى تشوفله...
"سدرة"
طوبى:عمتي..
خدت سدره القيلا وناضت وهي تقول..
/جايه جايه..
ومشت طلعت من الكوجينه...
هو تنهد..بعدين حرك عيونه لطوبى...
ضيقت عيونها وابتسمت وهي تشوفله..
مختار وهو يحاول يخفي توتره..
/ماتعشتيش؟
طوبى:تس..تتعشى معاي!؟
رفع حواجبه وقال..
/تس..صحتين..
ع خشة فاتن واميمه واريج..
اميمه لما شافاته انحرجت وارتبكت..
هو بإبتسامه قال..
/بنت العم..يابنت العم..شن الجمال هدا كله!؟؟
رفعت طوبى حواجبها وهي تشوف لفاتن لقتها تضحك عادي..
واريج تشوف لأميمه كيف محرجه ووجهها محمر من الخجل..
مختار بإيتسامه؛نجيبها عليك ضرة فاتن؟
فاتن:كان اميمه عادي ماعنديش مشكله..
مختار:خلاص خل نمشي لبوك نقوله البنت لولد عمها..
ضحكوا كلهم ماعدا طوبى اللي تشوف لمختار بإبتسامة امتعاض..
ابتسم وقال..
/شن حالك دكتورة اميمه؟
اميمه بإبتسامه:الحمد لله..
مختار:تعرفي اني معجب بيك وفخور هلبه هو مش غريب ع بناتنا الكفاح والاصرار..بس انتي حالة خاصه تغلبتي ع كل شي صار معاك واثبتي نفسك..
ابتسمت وقال:شكرا..
مختار:جمالك اوروبي خالص..ولون عيونك زي لون عيوني..قصدي لبعض من الاخير..
فاتن بضحكه:البنت ذابت من الحشم ياسرك/خلاص..
ضحك وباس جنه ع راسها وقال..
/انتي حتجي احلى منهم كلهم..غير نظره لطوبى وقال..امك حداك ماتجي شي..
طوبى بإبتسامه؛محظوظه بيك فتون..
هو قال بنفس الابتسامه..
/ربي يعوضك بحظ زي حظها..
الثلاثه تلاشت الابتسامه عن وجوههم وشافوا لطوبى بضيق لكن فيسع ماتبدلت هالملامح لما سمعوها تقول تعجبا..
/زي حظها!!؟ وهل يلذع المؤمن من جحره مرتين!؟
شدت اريج ضحكتها..واميمه شافت لطوبى برفعة حواجب وهي متفاجئه..
لكن فاتن شافت لمختار بضيق..
وهو كان يشوف لطوبى بأمتعاض..
هي بضحكه كملت تقول..
/حد الله بيني وبين الزواج مرة تانيه..
هو ناض وقال..
/احسن شي..مد جنه لمرته وقال..بترقد خلاص..
خدتها وقالت..ساعتك..
مختار:خليها مش مشكله...تصبحوا ع خير..
ومشي طلع وهما يردوا عليه..
قدمت طوبى لفاتن وقالت..
/هاتيها فتون..
مدتلها جنه وهي تشوفلها بضيق..
خدتها طوبى ومشت طلعت من حداهم ولحقتها اميمه..
تنهدت اريج وقالت..
/هيا نديروا نسكافيه..
اغتصب فاتن ابتسامه ع وجهها وقالت..
/هيا...
🍃ومن الكوجينه لمستراح الحوش من القدام..
مدت سميرة ظرف الرساله وقالت..
/قال امانه من عيشه الله يرحمها..
قلب سدرة انتفض وهي تشوفلها..مدت يدها اللي ترجف وخدتها ودموعها نزلوا..
سميرة:تصبحي ع خير..ومشت بسرعه طلعت لراجلها وخلت سدرة واقفه تشوف للرساله بمزيج من نظرات ومشاعر...
الحزن..والخوف...والوجع....
#حسابات_قديمه
#طوبى
....يتبع....ه
