#طوبى "جنة طوبى"
#جمان_فريد
#الجزء_الثالث_والتسعين"خريف"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)٦
..........
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 عزيزي يا صاحِب الظِّل الطويل..
"لقد حلَّ الخريف مِن جديد، فصل الحنين والرحيل ومازال ظلك بعيد عني .. أوراق عمري تتساقط ورقةً ورقة، ومازلت أنتظر قدومك 🍁
أخاف أن يكون عمري خرِيفاً تلو الخريف ولَا ربيع يأتي".
_________________________________________
الساعه 11:00صباحا..
وتفيق مغليه في هالساعه ع اصوات الزغاريد مفجوعه..
ناضت قعمزت وهي تسمع ومازال مش واعيه..
وشويه شويه وعت بعدين نزلت من السرير ومشت بإتجاه باب الدار فتحاته وطلعت..
وتشوف قدامها مايصدمها..
حمواتها وسلفاتها خاشات للحوش وهما حاملات ومحملات ويسلموا ع سميره اللي كانت ع سنقى عشرة زي مايقولوا..
خشت طول وسكرت عليها قبل مايشوفوها..
وقعدت واقفه ورا الباب وهي تنحرق من الغضب والقهر..
🍃وفي حوش الصيد..
كانوا مجتمعين ع سفرة الفطور..
نجمه وكناينها الكبيره والصغيره وعواطف ونجاح اللي قاعده بايته في حوش اهلها..
الاجواء كانت حلوة وهاديه..لعند ماخشوا عليهم خديجه بولدها تيم ومعاها راما بنتها..
مع بعض قالوا..
/صباح الخير..
الوجوه انقلبت واصحابها ردوا عليها التحيه بالغصب..
هي حطت ولدها ع الفراش ومشت لنجاح تسلم عليها..
/كيف حالك نجوحه؟
نجاح ناضت وسلمت مجاملة..
/الحمد لله شن حالك انتي..
خديجه:الحمد لله..بعدت عنها وقالت..شن حال العزري..
نجاح:راقد..
خديجه:ايه اغلب الوقت يكونوا راقدين الشهر الاول..
بعدين مشت سلمت ع باقي مصافحه بس ماعدا عزوزتها كبت ع راسها..
وبنتها دارت زيها بالزبط ومشت قعمزت..
نجاح:شن جو القرايه ياراما؟
راما:الحمد لله..
خديجه:والله ليل نهار حابسه روحها في دارها وشاده كتاباتها..
نجاح:مش حتلقى غير قرايتها..
ابتسمت راما بالغصب..
نجمه:تبوا فطور..
خديجه:لاصحتين عمتي فاطرين..
ناضت عواطف بالسفره وطلعت من حداهم وصفاء لحقتها..
سميره:شن تبوا الغدي عمتي؟
نجمه:ديرولنا كسكسي بالحويتات اللي جابهم فتوحه..
خديجه:قداش ليك هني سميره؟
سميره:تلاته ايام..
خديجه:شكله ابتسام وحمها واعر..
نجمه بإمتعاض:ابتسام في حوش ماليها وعبد الفتاح طالع من طرابلس..
خديجه بإستغراب:اليوم؟
نجمه:امس العشيه..
خديجه ضحكت..
راما بإبتسامه تهكم:امس بعد المغرب شفناهم في السوق..
نجاح شافت لسميره..
اما سميره قالت..
/حاضر عمتي تو نديروا كسكسي..ومشت طلعت من حداهم..
نجمه شافت لخديجه برفعة حاجب وقالت..
/حق اللي قلتيه؟
راما:والله العظيم ياحنينه ومعاهم ندى عمو كان رافعها في غمره...هما ماشافوناش حني شفناهم..
شافت نجمه لنجاح بضيق..ونجاح بادلتها بنفس النظرة..
وخديجه وراما مستمتعات ع الآخر..
🍃في الكوجينه..
كانت سميره تتصل بعبد الفتاح وهو مايردش وهي تعاود لين انفتح الخط..وترد ابتسام..
"صباح الخير سميرة"..
طلعت سميرة من الكوجينه وعواطف وصفاء معاها بنظراتهم اللي كلها استغراب..
🍃خشت سميره لدار حماتها وسكرت عليها وهي تقول..
/عطيني عبد الفتاح..
"عبد الفتاح راقد"..
سميرة:تمام..وسكرت عليها ودموعها نزلوا وهي تقول...اني الغبيه اني نستاهل..
🍃وعند ابتسام..
ردت تليفون راجلها ع طاولة المدخل..
ومشت خشت لدار بنتها..
عبد الفتاح:توا احسن بابا..
ندى:ايه بابا معاش توجع فيا هلبه..قرب عبد الفتاح من رجل بنته اللي كانت مربوطه بلفة الفك وباسها عليها..بعدين ناض وهو يقول..تو نكلمك بابا..
ندى:باي..
هو بإبتسامه:باي..
ومشي طلع من الدار وابتسام لحقاته..
ابتسام؛بنقولك حاجه..
التفت وقال..
/شن في تاني؟
ابتسام:امس وحني في السوق شفت خديجه..
هو قال:مرت خوي محي الدين؟
ابتسام؛ومانعرفش شن قالت لسميره اتصلت بيك واني رديت بش نوضحلها الموقف سكرت في وجهي..
هو بنرفزة؛علاش تردي عليها!؟
ومشي خدي التليفون واتصل بسميره..
ابتسام:اني كنت نبي نوضحلها اللي صار بس!
هو لما مالقاش رد من سميره مشي طول وطلع من الحوش..
رفعت ابتسام حاجبها..بعدين مشت لدار بنتها...
🍃🍃🍃🍃
"الحمد لله بوه يعاون فيا عليه"
خديجه؛يابختك طحتي في راجل متعاون..محي اللي دار حال بش نحمل مرة تانيه ولا معبر ولده وكان ناض عيط يقولي اطلعي انتي وياه..
نجمه؛مش منه يجري ويخدم ليل نهار..
نجاح؛ربي يعطيه الصحه..
خديجه:آمين..ويعطيك حتى انتي القوة بش تعاني اول عيل ووليد فوقها الاول متعبين هلبه في كل مراحل عمرهم وانشديني اني..
نجاح:ربي اللي عطاهم يعاون علي تربيتهم بإذن الله..
خديجه؛ايه سبحانه العاطي..تتفكري يانجاح لما قريب هبعت بيك هديكا الدكتورة كان ماحكتليش وقتها راهو يوم زي هدا ماجاش..
نجمه شافت لنجاح..
ونجاح ابتسمت وقالت..
/سبحان مسخر الاسباب..
اكتفت بهالجمله ردا ع خديجه اللي قاعده تتمنن عليها..
وخديجه امتعضت منها لأنها كانت تبي الشكر رد ع كلامها..
راما كانت تشوف لعمتها نجاح بحده ولت مش طايقتها من بعد ماتكلمت ع اهمالها لقرايتها والصحبة السيئه اللي مخالطتهم..
بعد رد نجاح..جي لخديجه اتصال..رفعت تليفونها شافت المتصل امها خافت..
ناضت ومشت طلعت من حداهم وهما معاهم بعيونهم..
🍃وقفت في اخر الممر وردت..
خديجه:ايوه يام..
"خديجه بنجيك"
خديجه بقلق:خيره صوتك يام!؟
"الكلبات عماتك ونساوين عمامك خشوا عليا بالزغاريط وهما يباركوا لهديكا الشلولح.."
خديجه بحقد؛فرصه ولقوها الشيطانات..
"بنجيك مش قادرة نتحمل"
خديجه؛باهي اميمتي ماتغششيش روحك طز فيهم..هي تعالي نراجي فيك..
"باهي بنيتي باهي"..
نهت خديجه المكالمه ورسمت ع وجهها ابتسامه وولت لدار المعيشه..
خشت عليهم وهي تقول..
/حناك بتجي تتغدا عندنا بنركب..
راما:راكبه معاك ماما ليا هلبه عليها استاحشتها..
رفعت خديجه ولدها وهي تقول..
/باهي..بالسلامه توا..
ومشت طلعت وراما وراها..
قعدوا نجمه ونجاح ساكتات شويه بعدين قالت نجمه..
/اشبح شن صاير..
نجاح؛باين من وجهها..
🍃وتطلع خديجه مع بنتها من الحوش بإتجاه دروج شقتها..
ع خشة عبد الفتاح اللي لما شافها بدت ع وجهه ملامح الازدراء..
مشي بسرعه خش للحوش وهو ينادي..
/سميره..
🍃نجمه بقلق:ماصدقنا حالهم تعدل..
نجاح؛اعوذ بالله من شر الفتن والمفتنين..
🍃🍃
وتطلع سميرة بإتجاه وسط الحوش..
لقت عبد الفتاح واقف يراجي فيها..
جاته وهي تقول..
/مسرع نضت من النوم وجيت.!؟
عبد الفتاح؛نوم شنو!..
سميرة بتهكم؛اللا ابتسام توا كلمتها وقالت راقد..
تنهد عبد الفتاح وقال..
/امس وين طلعت من هني كلمتني ابتسام وقالت ندى طاحت ع رجلها وشكلها انكسرت..مشيت غادي وطول رفعت البنت نعاينها طلعت رجلها مفكوكه فك..المهم البنت قعدت تعيط وفي قولة نبي بابا ماقدرتش نسيبها وبش نسكتها رفعتها للسوق خدتيلها العاب وين جيت مروح بيهم شدت فيا نبات حداها..
سميرة قعدت تضحك..
عبد الفتاح ضحك وقال..
/شن يضحك فيك..؟!
سميرة هدت ضحك وقالت..
/جو المسلسلات المصريه القديمه اللي دير فيه هديكا..
عبد الفتاح؛لاالحق البنت رجلها انفكت..
سميره:مصدقه..بس هي معلمتها شويه حركات بايخه..تمام
..اني بنتخطا اللي صار لكن في الجديد رد بالك تعاودها وتخليني اخر من يعلم وننحط في موقف خي قدام مرت خوك خديجه..
عبد الفتاح بإزدراء..
/اني مانحبش نخش في جو النساوين..لكن المراة هادي اعوذ بالله منها..
ضحكت سميره وقالت..
/المهم شن مايصير معاك اني لازم نعرف قبل الكل..
ابتسم وقال..
/حاضر..هي المشيه ماصارش منها خلاص توا..راجي نجيبلك بدلتي العربيه تحدديها..
سميره:حاضر...
باس يده وحطها جبينها ومشي وخلاها تضحك..
🍂🍂🍂🍂🍂🍂🍂🍂🍂🍂🍂🍂🍂🍂🍂🍂🍂
قاعده ع كرسيها المتحرك في حجرتها مقابلها الفيرندا المسكره..تشوف في الفراغ بنظرات غضب وخوف..
سمعت باب الحجره انفتح..
التفتت بالكرسي صفيه جتها ساعدتها وخلتها مقابلتهم..
الدكتور وجهينه ويوسف...
الدكتور خاطبها باللغة الانجليزيه..
《سدرة كيف حالك الان》
جهينه:الدكتور يسأل عن حالك توا ياسدره..
سدرة بشي من الصعوبه بدت تتكلم..
/نبي...نعرف كل شي..عن حالتي..
ترجمت جهينه للدكتور اللي قال..
《حسنا..اشرحي لها》
جهينه:شوفي سدره..انت صار معاك حادث ليه سنه وشهرين
طحتي من مكان عالي من دروج في حوشكم والطيحه جاتك ع راسك تسببتلك دخول في غيبوبه مدتها 9شهور..
جحظوا عيونها فزعا من اللي سمعاته..
جهينه:سدرة..
سدرة شافت ليوسف وعيونها تعبوا بالدموع بعدين قالت..
/كيف؟
يوسف بألم..
/كنتي فوق السطح وانتي نازله تقريبا فقدتي وعيك وطحتي..
سدرة بصدمه:تسعه...شهور...هلبه..ونزلوا دموعها
جهينه؛سدرة حني في اما عام توا؟
تبدلت ملامح الصدمه ع وجهها للأستغراب وقالت..
/ألف..الفين..وستطاش! شهر...تسعه لا..لو تسعه...شهور...معناها...توا...توا...
جهينه:يوليو 2017..
سدرة هزت راسها بالموافقه..
تبادلوا يوسف وامه نظرات الاسف..
وجهينه كانت ترجم للدكتور في الحديث اللي صار..
هو بعدين قال كلام لجهينه وين سمعه يوسف وجعه قلبه ع سدرة..
جهينه شافت لسدرة وقالت..
/سدرة..بصدق وبدون مجامله انتي خلتيني فرحانه بيك بقوتك وبقوة مقاومتك برفضك للعجز والضعف..خلتيني فخورة وبدون مبالغه انك ليبيه زيي زيك..
سدرة بقوة:قولي..كل...شي..
جهينه:سدرة..الاصابه تسببتلك في مشكله مؤقته..فقدان ذاكره..
سدرة تنهدت بعدين قالت..
/حسيت..
ااستغربوا فيها..
سدرة:شك..شكل..امي...ويوسف..ونسرين..والمهدي..واياد..متغيرين..هلبه..وكأن مر اكثر من..شهور..
جهينه:باهي بنقولك حني توا في اي عام وفي اي شهر..حني توا في اواخر شهر 3 سنة 2019..
رجعت الصدمه تحتل ملامح وجهها...
من 2016 ل2019...هلبه!!!؟
عقدت حواجبها ودموعها نزلوا وهي تقول..
/امتى...خشيت...غيبوبه يوسف:اخر يوم في شهر 1سنة 2018..
غمضت عيونها بألم ودموعها زي السيل..
جهينه رجعت ترجم للدكتور في حديثهم..
ويوسف يشوف لسدرة بألم..
قربتلها صفيه من الخلف وطبعت قبله ع راسها...
فتحت سدرة عيونها ورفعت يدها ليد صفيه..صفيه شافتها وشدتها بقوة...
سدرة بنبرة مخنوقه مع صعوبه النطق..
/بوي..بوي...صارتله..حاجه؟
شاف يوسف لجهينه بخوف والم..
جهينه بحزن ترجمت للدكتور سؤال سدرة..
هو شاف لسدرة شويه بعدين قال..
《انها تشعر بهذا بقوة ولاينفع نفيه بعد الآن.. د.جاك "الطبيب النفسي" نصح باطلاعها ع هذا الامر》
جهينه ..
《اظن انه يجب تركهم عائله لوحدهم لإخبارها》
الدكتور.
《وانا ايضا ارى هذا》
جهينه شافت ليوسف وهزت راسها..
هو فهم عليها..
طلعت هي والدكتور وسكروا الباب..
سدرة بألم:
/راح..ولا!..ماتحمل..ماتحملش..
ضمتها صفيه لحضنها بقوة..
ويوسف حط ايديه في جيوبه ونزل راسه وبدي يبكي بصمت..
الجواب وصلها خلاص....غمضت عيونها بشده وبدت تبكي بصمت وهي تزيد تدفن وجهها في حضن صفيه..
وصفيه تمسح علي ظهرها وهي تقول..
/إنا لله وإنا إليه راجعون ياماما..
سدرة قلبها كان موجوع بس الخبر ماكانش صادم بالنسبه ليها...كان حاساته بقوة غياب بوها عنها وهي فهالحاله خلاها تشك وزاد شكها بشوفة مختار لأنها متأكده انه احد اهم الأسباب..وهما توا قطعوا الشك..بالخبر اليقين..
🍂🍂🍂🍂🍂🍂
ومختار مقعمز بروحه ع مقعد خشبي وسط طبيعه حلوة مقابل بحيره وجبال بعيده..
سرحان بفكره في اللي صار كله..
شعوره بالضعف قدام سدره كان قاهره..سدرة بالنسبه ليه السبب الأكبر لكل شي بشع عاشه في حياته..مفروض ينتقم منها انتقام يبرد قلبه..بس المشكله وين يشوفها يضعف وينسى كل شي..ع قد ماكبرت قاعده في عيونه اخته الصغيره..
وهالحاله كانوا يقاوموا فيها حقده ونزعة الانتقام عنده..
خلوه يتفكر كل شعور وموقف سيء عاشه بسببها..والشيطان كان ينفخ ع هالنيران بش تزيد تقوا اكثر واكثر..
خدي نفس عميق وطلعه بعدين عقد حواجبه ومرر نظره ع المكان وبدي يفكر...
خلال لحظات هالتفكير..كانت ملامح وجهه تتبدل كل شويه..
مرة يضيق في عيونه..مرة يزيد عقدة حواحبه..مرة تبان في عيونه نظرات حقد مخيفه..وشويه وارتخت ملامح وجهه كلها..مد نظره للجبال وضيق عيونه...وشويه وبدت ترتسم ع وجهه ابتسامه..رفع حواجبه ونزلهم..بعدين ناض وقف..
غمض عيونه وقال باللغة الألمانيه..
Nach Regen kommt Sonnenschein
"بعد العاصفه يأتي الهدوء"..
فتح عيونه ومرر نظره ع المكان بنظرات كلها كبر..
بعدين لف ومشي لسيارته...
🍃🍃🍃🍃🍃🍃🍃
"اني رفعت الصفرة"
طوبى:شويه ولاحقاتك..
وطلعت من حداها مطيره رافعه سفرة الغدي..
وهي مشغوله بغدي بنتها..
قصتلها جزر مسلوق اصابع...وموز اصابع..
وفصلتهم عن بعض ومشت طلعت بيهم للصاله..
كانت جنه مقعمزة في كرسيها تتفرج عليهم وهما ياكلوا ويهدرزوا..
لين جت امها وهي تقول..
/اهو جي غدي بنتي..
حطتلها الصونيه قدامها..ومشت قعمزت مع مطيره وفردوس واميمه وهي تتفرج عليها..
بدت جنة تشد في صبع جزرة وقرباته لفمها وكلت منه..
اميمه بضحكه:ياعمري!..
مطيره؛مالا شنو كبرنا وناكلوا برواحنا..
ابتسمت طوبى .
اميمه؛قداش ليك تعلمي فيها؟.
طوبى وهي تشرح:ليا فتره..غرفه قالتلي معاش تعوديها ع الماكله المهروسه وقت طويل علميها تاكل الخضرة من غير هرس ع هيئة صوابع وخليها تشدها بروحها..قالتلي تقوي عضلات يدها وتساعدها تتكلم بكري ماهو في عضلات في اليد ليها علاقه بالنطق..
مطيرة:هدا علاش ولادها باديين يحدفوا في كليمات..
فردوس بضحكه:يضحكوا فيا كان لما ينادوا في امهم"غفه"..
ضحكوا..
مطيره:جو عليهم هالزرابيط..
شويه سمعوا جنه تنغم وكأنها تغني وتاكل في نفس الوقت..
اميمه بضحكه:تبي الزمط الله يبارك عليها..
فردوس:عسيسيلتي..
ضحكت طوبى وهي تتفرج ع جنه..
وجنه حطت في فمها صبع موزة وهي تشوفلها...
🍃🍃🍃🍃🍃
وسميرة قامت بواجب اهل راجلها وهما عجبهم جوها وعجبتهم هدرزيه..مراة تلقائيه عفويه متواضعه دمها خفيف..وناشطه وفالحه هدا غير زينها..
كامله اكثر شي عجبها فيها علاقتها بسدرة المهدي اللي كانت تعاون فيها في كل شي..جاها احساس وقتها ان ربي اراد يعوض فقدان الأم في حياة سدرة بيها وتمنت من الله ان احساسها يكون في محلها..
🍃بينما مغليه اللي طلعت من الحوش من غير ماتعبرهم كان تحرق وتسحن مع بنتها..
خديجه بحقد:الحقيرات..
مغليه بغيظ؛مش بعيد هما اللي قاموله عرسه اللي يحكوا بيه..
خديجه:يقيموا عزاها وعزاهم ياالله..
مغليه:يااني ياهي هالشيطانه يااني ياهي..
خديجه:الله يطيرها ياربي..وهديكا نجاه معاش جت..
مغليه بنرفزة..
/ماعندي ماندير بخليقتها شاده خاربتها معاش جت بكل..
خديجه:والمهدي!؟
مغليه بإبتسامه سخريه..
/هو المهدي هما فروخه قلبت دماغاتهم في يومين..
خديجه بتهكم؛جاته كيف مايبي المهدي..
مغليه بسخريه:بالك مازال يحلم بهديكا اللي حتى عقلها مش عليها!؟
خديجه؛عارفتيه انتي لو تقعد تزحف مايحلم بغيرها..
مغليه:تزحف ولاطير كان خلوه يلمحها مش يعطوهاله هدا وجهي خديجه:ضحكي يام..يلوحوها عليه عادي بش يفتكوا من معاناتها..
مغليه:والله كان هو هكي يبي خله يعاني..
سكتوا شويه بعدين مغليه قالت..
/شن يهدزوا نجمه واللي عندها..
خديجه:قايمين خشومهم عليا..
مغليه بغيظ؛من هبالك تستاهلي..
خديجه بضيق:حمقت ع خاطرك..
مغليه:تنوضي ديري هكي وتركبي الحق عليك..
🍃وهما يتناقشوا...وراما في دارها تتكلم بالتليفون..
راما:لاحبيبي مانقدرش عيونهم مفتوحه عليا الايام هادي...........ضحكت وقالت..باهي خلاص.......نقولك تعالى لشارعنا في سوبر ماركت غادي نتلاقوا فيه........هدا اللي نقدر عليه.........لانحبك وهلبه.....اففف...الو...الو.....نزلت تليفونها وشافت للشاشه لقاته سكر عليها..
خدفت التليفون ع السرير وهي تقول بنرفزة..
/برا طير انت التاني..
🍃وخوها في داره..
مشغول باللاب توب يتفرج ع المحرمات وهو غارق في عالمها لين ولى مدمن عليها...
وبوه وامه في سكرة يهمعون...
🍃🍃🍃🍃🍃
بعد المغرب...
روح التارقي مع سامي والحاج علي من الصلاة لشارع القهوة ع رجليهم..
سامي:اني تسمحولي وراي تحميض وقصه طويله..
علي:زينه..
عبد القيوم بضحكه؛ومربوحه..
ضحك سامي وقال..
/تصبحوا ع خير..ومشي لسيارته وهو يسمع فيهم يردوا عليهم..
بعدين علي شد يد التارقي وقال..
/وانت بنحصل عليك تخش تتعشا معاي..
عبد القيوم يتمنعن وهن الراغبات..
/لاعشا شنو ياحاج مافيش داعي..
علي:فكني من دوتك الزايده وتعالى..
ومشوا مع بعض وعبد القيوم يضحك..
وصلوا في الباب وقال..
/اهو ركبنا السحاب بالمحرك..
عبد القيوم بإبتسامه..
/وباب حوشك؟
علي:قليل النادر مايطلعوا ويخشوا منه ماهو لازم هدا مولي حوش العيله توا واني مانرتاح كان فيه..
هز عبد القيوم راسه بإبتسامه..
والحاج علي طلع المفتاح وفتح الباب وخش هو الاول..
دور بعيونه في الجنان كان فاضي التفت وقال..
/خش خش..
خش عبد القيوم وهو يهمس بالبسمله..
سكر علي الباب بعكوزه وقاله..
/تفضل تفضل ..ومشوا مع بعض خشوا للمربوعه الخارجيه..
🍃وفي الكوجينه..
مطيره تصلح في خيط الكوشه الكهربائيه وطوبى حداها وهي خايفه..
/فكينا ياعمتي تربحي هدا ضي مايلعبوش معاه..
مطيره بنرفزة؛بتسكتي ولانهفك بالبينسا!..
سكتت طوبى وهي خايفه...
فجاه رن تليفون مطيره..
مطيره وهي لاهيه...
/ردي عليه..
مشت طوبى وهي تسرق في النظر لعمتها بخوف..
وصلت في الدولاب وخدت التليفون لقت جدها يتصل ردت عليه..
/نعم جدي؟
"ديروا زوز قهوة"..وسكر عليها..
طوبى:يبي زوز قهوة.
مطيره؛جو خدمة الغرف اللي يديرلنا فيه بوي..اكيد يبي عشي..مش وقته ولاوقت اللي جايبه..ديري قهوة ديري..
طوبى وهي تشوفلها كيف توصل في الخيوط ببعض قالت بخوف..
/حاضر..
🍃ودارت طوبى القهوة واتصلت بجدها قاللها تحطها ع الطاوله اللي برا..
ودارت اللي قاللها عليه وخشت..
ويطلع علي ياخد السفره ويمشي بيها للمربوعه يتلقاه عبد القيوم وياخد منه السفره..
ويقعمزوا بقهوتهم ويبدوا يرشفوا فيها وهما يهدرزوا..
🍃🍃🍃🍃
مطيره:هي خل بنشغلها..
طوبى بخوف:ياالله..
مطيره بنرفزة؛اسكتي يادعوة معاش توتريني مانفكوش في لغم رانا..
وتخط الخيوط في البريزة..
🍃🍃🍃
عبد القيوم؛لامش واجد مرات..ويقرب من فمه فنجان القهوة..مالحقش يوصل الا وهو مبعده من الفجعه لما سمع صوت حاجه انفجرت..وعياط..
وحده عيطت ع طول حسها..
والتانيه قالت..
"وااك عليا"...
والضي انطفي عليهم...
علي الميه نزلت في ركابه..
وعبد القيوم معاش عرف شن يدير ..
ناض علي ومشي طلع برا لحقه عبد القيوم وشافوا الضي متاع الحوش مطفي كله...
علي بصوت عالي..
/شن صار ياهوو!؟..
ماجاشي رد..
عاود بصوت عالي..
/شن صار حد يرد علينا ياسبحان الله!..
جاه صوت طوبى وهي تقول..
"شي ياجدي شي..الكوشه تفجرت بس...قصدي بريزة الكوجينه"..
علي غمض عيونه وقال..
/لاحول ولاقوة الا بالله..
طبطب عبد القيوم ع ظهره وهو شاد ابتسامته ويقول..
/بسيطه ياحاج بسيطه..
🍃🍃🍃🍃🍃
طوبى بإحراج وعصبيه:عليك حشمه وخلاص..قلتلها ياعمتي سيبي الهم شن يفهمك فيه...شي..
فردوس بضحكه:عناد عمتي وتعرفيه..
🍃وفي الكوجينه المسكره..
كانت مطيره بحجابها الكامل واقفه ع بوها اللي كان مقعمز تقيسله في الضغط..
وعبد القيوم واقف يركب في بريزة جديده وجنبه ضي الفلاش مفتوح..
علي:شن يفهمك فيها الحاجات هادي قولي!؟
مطيره بنرفزة واحراج:والله نفهم فيها يابوي غير هديكا الرتيله فلوشتني..
عبد القيوم زبطها من تقصد شد ضحكته وقلبه يدق بقوة..
علي:شيطولي الضغط وخلاص..
فكت الجهاز وهي تقول..
/لامافيك شي الله يبارك..
عبد القيوم وهو عاطي بالظهر قال بإبتسامه..
/في الجديد اي مشكله ليها علاقه بالضي عطوني بيها علم بس وين مانكون نخلي اللي عندي ونجيكم ياحاج..
علي هز راسه وقال..
/بارك الله فيك ياولدي..
مطيره:ربي يحفظك ويرفع قدرك..
🍃🍃🍃🍃
"قريب طلعتله الاستشوار"
طوبى ووجهها احمر..
/هدا مامازال!..
مطيره بضحكه:نبصر يارتيله..ايه حقه قلت عليك رتيله قدامه
طوبى عيونها قريب طلعوا وهي تشوف لعمتها بصدمه..
فردوس بضحكه:ياوالله عليك عمتي وخلاص..
مطيره بضحكه:ماندريش على روحي شن كنت نقول قاعده فيا الرعشه وجدك يهزب..
فردوس بضحكه:الحمد لله اللي جت ع هكي..
مطيره:ايه والله الحمد لله..
وطوبى حداهم بتتبخر من الخجل...
🍃🍃🍃🍃🍃
وروح التارقي بعد العشي..وماكان في شقة حد غيره هو محمد كان معزوم عند نسرين وهي شداته يبات عندها...
حدد حوايجه ورتب الشقه..بعدين اتكي ع سريره..
وشد تليفونه وخش ع الفيس بيكتب ابيات شعر..
شويه شاف قدامه منشور مشاركاته صفيه من حساب طوبى مكتوب فيه...
( لـم أكـن وحيـدة ، كان لدي مُصحفاً ،
سجــادة وربّــاً مُنصـتاً لِـ دُعائـي.|•
اللهم مافي قلبي..💙)
ابتسم وتفاعل مع المشاركه...غير نظره لاسم حسابها والصورة...
اسمه جديد...جنة طوبى...والصورة ليد جنه وهي شاده زهره اقحوان..
ماقدرش يمنع نفسه وخش ع الحساب..
شاف السيرة الذاتيه ابتسم لما قراها..
( الإنسان عند النَاسِ بهيئةِ وجههِ وحليتهِ التي تبدو عليه، ولكنَّه عند اللّٰه بهيئةِ قلبِه وظنِّه الذي يظنُّ بهِ.!")
وين جي بيشوف باقي حسابه لقاها مسكراته..
تنهد وطلع منه ورجع لحسابه وبدي يكتب في ابيات..
بعدين نزلها..
🌼وتقراهم صفيه وديرلهم مشاركه..
وطوبى اللي قاعده لاهيه بالفيس..
تشوف مشاركتها وتقراها...
🌾ماعنديش من غيرك سريب
ومانبيش من بعدك غلا
والله نبيك الحبيب
عشقتك عشق في دمي سرا
عشقك جرح لايمكن يطيب
وليه سنين كابر في الحشا...
شافت لصاحب الحساب..قلبها بدت تتسارع دقاته...
رجعت قرت الابيات مرة تانيه بعدين قالت..
/وليه سنين كابر في الحشا....يقصدها هي!..
سكتت وكملت حديثها في نفسها ...
"واضح قاعد يحبها..معناها اريج يومها تخترف..الراجل يعامل فينا زي عيلته..خالتي سالمين قالت كان يعامل فيهم هي وعمي جبريل زي بوه وامه..هو هكي طبعه..اصيل وولد اصل..يارب يصيرله من البنيه اللي يبيها بش يرتاح لانه يستاهل كل خير..وهي تعيش معاه سعيده وحياتها كلها حب.."..
تنهدت بضيق وقالت..
/ياربي اغفرلي حاسه روحي حاسدتها ولامش عارفه كيف..استغفر الله العظيم..استغفر الله..وطلعت من الفيس وتمددت ع السرير وحطت التليفون جنبها..
بعدين خدت المسبحه وبدت تصلي ع النبي لين جاها النوم وراحت فيه....
🍃🍃🍃🍃🍃
تاني يوم
30مارس...سنة 2019..
صباح سويسري جديد يطل ع سدرة المنتهى بعد ليله قضتها وهي موجوعه..
بس الغريب بالنسبه لأمها وخوها ان الخبر مارجعش عليها بسلبيه بالعكس..
لاحظوا انها كانت تبي تستعيد قوتها بسرعه وتطلع من الحزن بسرعه...
تحت الشجرة مقعمزين حداها وهي تسأل فيهم عن العيله فردا فردا..
يوسف:حسين قاعد اعزب..
سدرة:اميمه؟.
صفيه:لاهيه بخدمتها وخلاص..
سدرة:احسن..غرفه؟
يوسف:تزوجت وجابت توأم..تزوجت وانتي مش راضيه هلبه عن زواجها لأن راجلها كان مع المليشيات..
سدره قعدت تحاول تتفكر..
صفيه:المهم متهنيه ومرتاحه في حياتها وصغارها زي العسل..
سدرة شافتلها بنظرات مبهمه وهزت راسها بعدين قالت..
/طوبى..قرايتها...شني؟ ولا..حتى هي عطيتها..
يوسف ماعرفش شن يقول..
صفيه:قريب تتخرج وتولي ابله روضه..
ابتسمت سدرة..
وهما ابتسموا معاها غصبا..
هي قالت:فايزة..بناتها..
صفيه بضحكه:صفاء تزوجت..
تفاجئت سدرة..
صفيه:خداها اشرف ولد الصيد..
سدرة:المشراني...هداكا؟
يوسف؛لاكويس معاها ع الخبر..
سدرة:ان..شاء الله..فردوس..واريج..الاء..
صفيه:عطتهم..
بدت ع وجه سدره ملامح فرح والدموع عبوا عيونها..
يوسف:رجاله كويسين..
سدرة هزت راسها ورفعت يدها لدموعها ومسحتهم بعدين قالت..
/انت ..حرجانه منك..تفسخ من البنت ع خاطري...علاش!؟
صفيه:نصيب نصيبه مش فيها..
سدرة سكتت وغيرت نظرها القدام بعدين رجعت شافت ليوسف وقالت..
/نبي ...نشوفهم...بالنت..
يوسف ابتسم وقال..
/حيفرحوا فرحه..
ابتسمت سدرة وصفيه ابتسمت لإبتسامتها..
🍃🍃🍃🍃🍃
"طوبى زودي ياطوبى"
طلعت من الكوجينه تجري بخوف وهي تقول..
/جنونه!.
لقته بنتها تلعب بالعابها عادي..
غيرت نظرها لعمتها واختها لقتهم يبكوا..
هي بقلق قالت..
/خيركم؟!
مطيره ودموعها ينزلوا..
/يوسف كلمني..قعمزي بش نحكيلك شن قالي..
قعمزت طوبى وهي حاسه بقلبها بيوقف من الخوف.
مطيره:قال سدرة عرفت بوفاة لطفي الله يرحمه..
نزلوا دموع طوبى طول وزاد خوفها..
مطيره:وقال عزمها كان قوي وشدت حيلها..وقالت تبي تشوفنا وتكلمنا ع النت..
ابتسمت طوبى ودموعها سيل..
فردوس مسحت دموعها وقالت..
/لكن في حاجه..
عقدت طوبى حواجبها بقلق وهي تراجي في فردوس تكمل كلامها...
🍀وتعدي ربع ساعه جت فيهم غرفه للحوش ملهوفه..
قالولها ماقالوا لطوبى..وبكت بألم..وهما هدوها وسكتوها ونبهوا عليها تبين لأختها ان كل شي ماشي تمام..
ويلتموا الاربعه حوالين اللاب توب وهما يراجو..في اتصال يوسف...
قلوبهم ملهوفه ومشتاقه شوق ماله حد..
ويجي الاتصال اللي ترجف معاه القلوب..
وتفتح طوبى وهي حاسه قلبها بيطلع من صدرها..
وتبان عليهم...
متوسطه يوسف وصفيه..
صح مش زي سدرة الاولى بس حالها افضل من اول مرة شافوها بعد فاقت..
هي لما شافتهم حطت يدها ع فمها..
وهما جامدات ومسهمات فيها يشبحولها وخلاص..
حولت يدها وقالت..
"كب..كبرتوا...هلبه حي ..عليكم.."
ضحكوا مع بعض ودموعهم تنزل..
مطيره:ياروح عمتك يابنت انتي..كان نوصل فيك بس..
يوسف ضحك..
"لا..خليك..غادي"..
ضحكوا...
مطيره بضحكه وهي تمسح في دموعها..
/معفنه..
فردوس بنبرة باكيه..
/سديرة..كيف حالك وخيتي
"الحمد..لله..كويسه..الحمد لله..انتم كيف حالكم..شادات...حيلكم..قويات..زي..مانعرفكم..ولا؟"
مطيره:اكيد مالاشنو حني بنات الواعر ع سن ورمح..
سدرة رفعت ابهامها وهي تهز في راسها...
ضحكوا..
"غرفه"
غرفه بضحكه..
/سديرة..
"قالوا...عقلتي..ووليتي ام"
غرفه بضحكه..
/ريتي بالله..
"اخر..الزمان...حتى هو"..
ضحكوا...
غرفه:مقبوله منك..
"غصب..عنك"
مطيره:من قالك ناشبي كولي ع راسك..
قعدوا يضحكوا..
بدت ع وجه سدرة ملامح الاستغراب وهي تقول..
/لمحت..طوبى...ولااني..نتخيل..
هما استاقظوا ولاحظوا ان طوبى اختفت..
ناضت غرفه تشوفها..
"وينها"
مطيره:شويه وتجي..قوليلي مرتاحه غادي..
"اني...حالي..باهي..المهم انتم..جدي..وين"
مطيره:طالع للميناء مع الحاج صالح وولده يصطادوا..
"استا..حشته..واعرنا الكبير.."
🍃🍃🍃🍃
"مش مستوعبه..مش عارفه كيف لما تكلمت انصدمت وماتحملتش"
غرفه بضيق:هدا وانتي القويه ياطوبى واللي عابيين عليها..
طوبى ببكي:اني ماعنديش عزم معاها مانتحملش نشوفها هكي..
غرفه:لالازم تقوي عزمك وتشدي حيلك ماتوجعيش قلبها اكثر ماهو موجوع..امس بس عرفت بوفاة بوي..
غمضت عيونها وخدت نفس عميق..
بعدين فتحتهم وقعدت تمسح في دموعها..
/عندك حق صح..عندك حق..خل نمشي نغسل وجهي ونجي..
غرفه هزت راسها ومشت طلعت..
وطوبى طلعت للحمام وخلو جنه في سريرها تلعب بالشكشاكه...
🍃🍃🍃🍃
"طويبة"..
طوبى بإبتسامه..
/حبيبتي..
"شن..حالك..يارتيله..قالوا خلاص..بتتخرجي"
طوبى بضحكه:ايه ان شاء الله خلاص..
"يوسف قال..المدرسه..انتي شدتيها"
تمالكت نفسها بقوة وهي تقول بضحكه..
/ايه..
"صحة..ليك..هكي نبيك.."
مطيره:اللي تشوفي فيها قدامك هادي صنديده كبيره..
غرفه:انتي اس 10..
ضحكوا..
طوبى بإبتسامه:تربيتها..
"بنتي..حتى هي..."
سكتوا لما شافوها تشوف لحد يتكلم قدامها.
يوسف..
"خلاص توا عندها جلسة علاج"
مطيره؛خليك زي ماعرفناك..
غرفه:ايوه ردي بالك..
فردوس:ربي يشفيك ويعافيك..
طوبى:شدي حيلك وروحيلنا بسرعه..
سدرة..
"ان شاء الله.."
يوسف..
/هي طيروا..وسكر...
وكلهم انهاروا بالبكي في لحظه وحده..
فرحوا بتحسن حالها..لكن في نفس الوقت انوجعوا عليها هلبه..وزاد وجعهم لما تفكروا لطفي...
🍃🍃🍃🍃🍃
الساعه11:00ليلا..
حاطه راسها في حضن امها وهي تقول..
/معقوله...مختار..مادار شي؟!
صفيه ودموعها في عيونها..
/انتي ولطفي الله يرحمه رفضتوه هو قعد في حاله..
سدرة:علاش..جاني؟
صفيه:مرة مرة يجي يطل عليك..
سدرة:انتم...مش مدر..مدرقين شي..ولا؟
صفيه؛شن بندرقوا عليك يابنتي اللي درقناه قبل عرفتيه..
سكتت سدره وغمضت عيونها..
وصفيه قعدت طبطب عليها وكاتمه في قلبها غصه..
🍂🍂🍂🍂🍂🍂🍂🍂
وتعدي هالليله...ويجي اليوم اللي بعده..
وسدرة تتصبح بهديكا الشجره اللي كانت تفكر فيها بشجرة الياسمين..
كانت بروحها هالمره..
يوسف في الخدمه..وصفيه ماشيه بتاخد حاجه يشربوها مع بعض...
غمضت عيونها وقعدت تسمع في اصوات الطبيعه..
فجأه...
🍂شو كانت حلوه الليالى ....والهوا يبقى ناطرنا
وتيجى تلاقينى يا خدنى بعيد... هدير المى والليل
..فتحت عيونها شافاته...
كان لابس كاجوال...فانيليه ثقيله شوي كم طويل رقبتها طويله لونها ابيض ناصع ع سروال جينز..
حاط يده في جيب السروال ويشوفلها وهو يغني بإبتسامه...
🍂كان عندنا طاحون على نبع المي.... قدامه الساحات مزروعه في
جدى كان يطحن للحي...... قمح وسهريات..
وقهوة..وضحك وكمل غني...
ويبقوا الناس فى هالساحات.... شى معهن اكياس شى عربيات
رايحين جايين ع طول الطريق تهدر غنيات
اه يا سهر الليالى اه يا حلو على بالى غنى اه اه
غنى اه اه غنى على الطرقات...
وقدملها وقعمز قدامها رووس اصابعه وكمل يغني..
🍂 وراحت الايام وشوى شوى سكت الطاحون على نبع المى
وجدى صار طاحونة ذكريات... تطحن شمس وفي
اه ياسهر الليالى اه ياحلو على بالى غنى اه اه
غنى اه اه غنى على الطرقات
حط يده في جيب الفانيليا القدامي وطلع منه طرف بسكويت اللي يتكون من طرفين في وسطهم كريمة وهو يغني..
اه ياسهر الليالى اه ياحلو على بالى غنى اه اه
غنى اه اه غنى على الطرقات..
وفتحه بين زوز...ومدلها اللي فيه كريمه وكلي الفاضي وهو يشوفلها
عيونها اللي غارقات بالدموع كانوا يشوفوا لكريمة البسكويت
والذكريات تحوم حواليها
🍂🍂🍂🍂
كان عمرها 5 سنوات..
طلعت تجري في الشارع وهي حافيه وفي يدها شمعدان..
تنادي فيه..
"مختار..مختار"..
التفتلها هو وصحابه..
المهدي وربيع ومحي الدين..
هي اشرتله يجي..
هو سيبهم ومشالها طول..وعيون المهدي عليها..
وصل فيها مختار وقال..
/خيرك؟
مدتله الشمعدان وقالت..
/افتحهولي..
ضحك وخداه وفتحه..
وعطاها الجزء فيه الويفر..
خداته وقعدت تلحس فيه..
هو خدي الفاضي ومشي وهو يقول..قعمزي ع الرشاده اللي غادي..
سدره:امم..باهي..ومشت تجري وقعمزت ع الرشاده..وقعدت تتفرج عليهم وهما يلعبوا..
🍂🍂🍂🍂
واستمرت هالعاده لعمر 13سنه..
طالعين الصبح للمدرسه..
عطاته طرف بسكويت بالكريمة وقالت..
/مهمتك..
خداه وهو مبتسم فتحه وعطاها متاع الكريمه وقال..
/نقعد عمري كله حاصل فيك..
لحست الكريمه وهي مبتسمه بغرور..
ع جية المهدي فات من جنبهم وشافلها وقال..
/صباح الخير..
مختار قدمله وشد وجهه ولفه القدام وحط يده ع كتافه ومشي بيه..
هي وخرت خصلة شعرها ورا وذنها وع وجهها ابتسامة خجل..
ويطبوا عليها صاحباتها..
نسرين؛قريب كسر رقبة خوي..
عائشه:خوك مش مهني عيونه..
فايزة تنهدت وقالت..
/ااه من الحب..
عائشه:عطيك كلب هي باهي..
ضحكوا..
وسدرة قاعده تلحس في الكريمه وهي شاده ضحكتها..
🍂🍂🍂🍂🍂🍂🍂
بدون ماتفكر في شي..خداته منه وقرباته لفمها..بعدين نزلاته..
هو وقف ع حيله وخداه..وقربه لفمها وقال..
/كولي..
بدت ع وجهها ملامح بكي..وبدت تبكي..
هو بلع ريقه..ولف وجهه عنها..ومسح عيونه بكمه..بعدين رجع قعمز ع رووس صوابعه وقال..
/كولي..
هدت شويه وشافتله..
وين شافت اثر الدموع في عيونه..
قربت وكلت منه...
بدت ع وجهه ملامح حزن وعتب وكره وفي عيونه حب..
متناقضات المشاعر كلها ناضت في لحظه...
اما هي..
فكانت حاسه بفراغ رهيب بعد ماعرفت بموت بوها...
اكيد مش حيعبيه مختار مهما دار...بس توا قاعد يرد فيها للماضي اللي فيه ريحته وتتمنى ماتطلعش منه...
🍃🍃🍃🍃🍃
ورجوعا لليبيا..
وشارعهم القديم...شارع القهوة..
في مطحن الزعيم..
كان المهدي واقف يشوف في العمال وهما يدخلوا في كياس البن..
فجاه سمع صوت سيارة شاف برا لقاها سيارة تاكسي درست قدام حوشهم..
عقد حواجبه وهو يشوفلها..
انفتح الباب اللي جنب السواق ولما اللي نزل منه تفاجئ وقال..
"نضال!"
#خريف
#طوبى
....يتبع....
