#طوبى "جنة طوبى"
#جمان_فريد
#الجزء_121"انا لحبيبي وحبيبي إلي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الدعاء
251 - باب فضل الدُّعاء بظهر الغيب
قَالَ الله تَعَالَى: وَالَّذِينَ جَاءُوا مِنْ بَعْدِهِمْ يَقُولُونَ رَبَّنَا اغْفِرْ لَنَا وَلإِخْوَانِنَا الَّذِينَ سَبَقُونَا بِالْأِيمَانِ [الحشر:10]،
وقال تَعَالَى: وَاسْتَغْفِرْ لِذَنْبِكَ وَلِلْمُؤْمِنِينَ وَالْمُؤْمِنَاتِ [محمد:19]،
وقال تَعَالَى: إخْبَارًا عَن إبْرَاهِيمَ ﷺ: رَبَّنَا اغْفِرْ لِي وَلِوَالِدَيَّ وَلِلْمُؤْمِنِينَ يَوْمَ يَقُومُ الْحِسَابُ [إبراهيم:41].
1/1494- وَعَن أَبي الدَّردَاءِ أَنَّهُ سمِعَ رَسُولَ اللَّهِ ﷺ يَقُولُ: مَا مِن عبْدٍ مُسْلِمٍ يَدعُو لأَخِيهِ بِظَهرِ الغَيْبِ إِلاَّ قَالَ المَلكُ ولَكَ بمِثْلٍ رواه مسلم
.
2/1495- وعَنْهُ أَنَّ رسُول اللَّه ﷺ كانَ يقُولُ: دَعْوةُ المرءِ المُسْلِمِ لأَخيهِ بِظَهْرِ الغَيْبِ مُسْتَجَابةٌ، عِنْد رأْسِهِ ملَكٌ مُوكَّلٌ كلَّمَا دَعَا لأَخِيهِ بخيرٍ قَال المَلَكُ المُوكَّلُ بِهِ: آمِينَ، ولَكَ بمِثْلٍ رواه مسلم.🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لولا الإبتلاء لشككت بالطريق🍃
_________________________________________
يوم جديد طل ع طوبى اللي من اول مافاقت بدت منهمه بالتفكير في جية اهل عبد القيوم..
من بعد صلاة الفجر بدت في التجهيز لكل مالذ وطاب،كانت تشتغل واعصابها مضغوطه..عقلها مابطلش وهو يتخيل في المعامله اللي بتلقاها من عمات راجلها..
حاولت تتفائل وتحول من بالها الافكار السوداء اللي تغم القلب..حاولت تصدق كلام عبد القيوم اللي قال فيه انهم فرحوا بزواجه منها وان قلوبهم حنينه تحب اللي هو يحبه..
حاولت وحاولت..المهم تخفف عن نفسها الضغط اللي كانت عايشة تحته..
اما عبد القيوم فكان يشوف للي دير فيه بعين الحب والتقدير
عارف ان غايتها رفع قدره هو قبل قدر اهله..
حاول يخش يساعدها لكنها رفضت تماما ولما طلبت منه لأول مرة يطلع ويخليها بروحها فهم انها عايشة حالة توتر هو نفسه كان عايش زيها...
🍃🍃🍃🍃
اهل الزوج غالبا يكونوا اكبر معول هدم لبيوت ولادهم..
زي ماصار مع غرفه وعبد الرؤوف بسبب عمته وبناتها..
عمته وبناتها اللي كانوا بالامس يكرهوا غرفه كره العمى زي مايقولوا اليوم قاعدين يتوددولها بش تقرب منهم..
🍃"حلفت عليا تصدقي!"
فردوس بتعجب:سبحان الذي بغير..
غرفه بتساؤل:معقوله ع خاطر الفلوس! اني هكي ولاهكي مش مقصرة معاهم ندير معاهم زي ماكان يدير عبد الرؤوف الله يرحمه واكثر
فردوس:بالك لما شافوك عامليتهم كويس بعد اللي داروه فيك تغيرت نظرتهم ليك وتقبلوك..
غرفه بتفكير:اشك..لكن نقول ان شاء يكون هكي..تنهدت وقالت..بالله دوسه ساعديني في تلبيس الصغار..
فردوس:انتي بري الهي بروحك ماعليكش فيهم الصغار..
مشت غرفه من قدام الكوجينه اللي كانت واقفه قدامها ع فردوس وتوجهت للدار
اما فردوس مشت لدار المعيشه وين مافي الصغار بش تجهزهم
🍃🍃🍃🍃
واقفات وهما شادات مقات بابونج يشربوا فيه ويتحاكوا..
هناء بإبتسامة؛والله لتوا مش مصدقه التغيير اللي صاير لشخصيته مولي هادي هلبه وحكيم وبدي يسمعلي اكثر مانسمعله..تعرفي نحس في روحي وكأني تعرفت عليه مرة تانيه..حبيته من اول وجديد..
اميمه وهي مبتسمه قالت..
/كلامك حلو هلبه..هو الدكتور خالد من الناس اللي يتعلموا من اخطائهم،يستاهل الفرصه اللي عطيتهاله..
هناء:فعلا برغم اني كنت خايفه هلبه من الندم لكن الكلمه..
الحمد لله توا وليت مطمنه ع الآخر.
اميمه؛اني فرحت لولدكم اكثر منكم..
هناء وهي مبتسمه ببهجه..
/والله حتى اني هدا اكثر شي مفرحني نفسيته تحسنت هلبه قبل كنت تشوف في عيونه حزن وتوا في كل وقت نشوف فيهم يضحكوا..ضحكت وقالت..حتى مرة كنا اني وخالد نتفرجوا ع فيلم في الصالون ومن الانسجام لقيت روحي في حضنه وهو حاط يده ع ذراعي وماركزناش عليه وهو واقف يتفرج علينا لعند ماانتبهله خالد ونبهني وتباعدنا ع بعض مشي قاللنا لالا خليكم منظركم كيوت نبي نصوركم.
ضحكت اميمه..
هناء بضحكه؛بدي يكبر مايفوته شي..المهم خالد قال خلاص رجعي وضعية الكيوت خليه يصورنا..
واميمه تسمع وتضحك وهناء تضحك معاها بعدين هدت ضحك وتنهدت بعمق وقالت..
/الحمد لله..
ابتسمت اميمه وقالت..
/الحمد لله..
هناء وهي تشوفلها لاحظت في حد وراها يقرب منها خلت روحها عاديه وشربت من مق البابونج..
ولما جت اميمه بتشرب ماحستش الا ويد انحطت ع عيونها..
هناء بضحكه:ترا قولي مني..
اميمه بشقاوة:ابله كريمه" ممرضة معاهم"
حول اسامه يده وجي جنبها قرص خدها وقال وهو يقلد في صوتها..
/ابله كريمه..
حطت يدها ع خدها وهي تفنص فيه وتقول..
/اسامه بلاعار!
ضحكت هناء وقالت..
/نستأذن..ومشت وخلتهم..
هو جي قدامها وقال..
/وين ياكناريه مغيبه اليوم!
اميمه:خشيت عمليتين وكل وحده اصعب من التانيه..
اسامه؛اها ايه زبطت اما حالات المهم مشت الامور؟!
ابتسمت وقالت..
/الحمد لله الزوز ناجحات عاد تحت اشراف الدكتور خالد..
اسامه ابتسم بعدين قال..
/بعدين ان شاء الله تخشي عمليات زي هادي تحت اشرافك انتي..
ابتسمت اميمه بحب وقالت..
/يارب..
تنهد وقال..
/كناريه عمتك بتجيكم اليوم تهدرز شويه عن تفاصيل العرس..
اميمه؛ايه اتصلت بماما وخبرتها..
اسامه:كويس..شوفي حبيبي اي شي ناقصك قوليلي عليه تتحشمي مني ياويلك..
بضحكه قالت..
/لا والله ماناقصتني حاجه..
قرصها من انفها وقال..
/نحسابك بتقولي ناقصني انت بس حبيبي..
وهي حاطه يدها ع انفها قالت بضحكه.
/بطلها حركاتك هادي رانا في مكان عمل..
ضحك بعدين قال..
/تي باهي باهي..بنمشي توا نشوف شن وراي لما تكملي دوامك اتصلي..
بإبتسامه قالت..
/ok
خدي منها مق البابونج ومشي وهو يقول..
/ see you..
مطت شفايفها للأسفل وهي تشوفله بضحكه بعدين حركت راسها يمين ويسار ومشت تشوف شن وراها حتى هي..
🍃🍃🍃🍃
وبعد الظهر بساعه درس المحجوب سيارته قدام حوش طوبى وع طول طلعتله غرفه مع صغارها نزل ساعدها فيهم لعند ماركبوا كلهم بعدين ولى لمكانه وتحرك..
☘نبيله وهي تشوف لصغار خوها بإبتسامه حب قالت..
/شن جو ياعساسيل..
اواب ومهاب..
"مليح"
ضحكوا بعدين مدتلها غرفه مئاب وهي تقول..
/بري لعميمه..
خدتها نبيله وهي تقول..
/هاتيها حبيبة عمتها المحنطشة..
المحجوب:شن الامور؟
غرفه:ماشيه الحمد لله..
🍃وكملوا طريقهم لحوش عمة نبيله وهما يهدرزوا...
وفي نفس الوقت...
درست السيارة اللي كانت جايبه اهل عبد القيوم للعمارة اللي ساكن فيها وهو كان واقف يراجي فيهم..
نزلوا عماته الثلاثه ومعاهم عمه عبد الله وولاد عماته بريكه وغزاله..
سلامهم عليه كان حار بالذات عماته وكأن مش صاير بينهم شي وهالحاجه طمنت عبد القيوم وفرحت قلبه..
🍁وفي الشقه..
كانت طوبى مقعمزة في الصاله بكامل اناقتها تستنى في خشتهم التوتر مازال ماانفكش عنها..تردد بإستمرار همسا..
"حسبي الله ونعم الوكيل..حسبي الله ونعم الوكيل"
سمعت صوت باب الشقه انفتح زادت تسارعت نبضات قلبها..
"هي تفضلوا تفضلوا"
وبدت اصوات النساوين تقرب..ناضت من مكانها..خدت نفس عميق وزفرت..ويخش عليها عبد القيوم شافلها بإبتسامه قال..
/اهي العروس..
ابتسمت وشافت لعماته وهما خاشات قاموا خماراتهم وشافولها بإبتسامه مابانتش لطوبى انها مريحة ابدا..
قدمتلهم بسرعه تأهل وتسهل وترحب وسلامها عليهم كان حار وهما كان سلامهم باهي ويسألوا عن الاحوال عادي وعبد القيوم يتفرج عليهم وهو مبتسم بود..
رفعتهم طوبى للصالون وخلتهم يقعمزوا ..
بريكه:حالك باهي؟
طوبى بإبتسامه:الحمد لله..
غزاله:ماشاء الله عليها ماشاء الله..
ابتسم عبد القيوم بعدين قال.
/طوبى.
شافت لعيونه وفهمت من نظرته شن يبي هزت راسها وقالت..
/لحظة بس..شافتلهم وقالت..نستأذن..
ردوا عليها بإبتسامه..
"خودي راحتك"
مشت للكوجينه وهو بعيونه معاها وعماته مركزات عليه..بعد ماغابت عن نظره رده ليهم..مرره عليهم وقال..
/آنستونا..
ابتسموله وسليمه قالت..
/الله يأنسك
مشي عبد القيوم للمربوعه وهما معاه بنظرهم ومجرد مااختفي تبدلت ملامح الابتسامه ع وجوههم للتجهم والحدة..
شافت بريكه لغزاله وقالت..
/ريتيه!؟كيف المسحور..
غزاله:ياريتها غير طلعت تستاهل اللي داره عشانها والله بناتنا احلى منها مليون مرة..
سليمه بحسرة:كانك حقيتي السوريه بس هذي ماتجي شي حداها
بريكه؛قتلكن ساحراته ماوصلت بعبد القيوم يدير هك معانا الا لأنه مش بعقله
🍁سليمه وهي تسمع في اختها ماكانتش مقتنعه بكلامها لكن نظرتها لطوبى تغيرت تماما بعد ماكانت عاجبتها وتعزها ولت تكرهها بكل عبد القيوم عندها اغلى من صغارها وهو نفسه كان مرات ينادي فيها امي ومكانتها عنده كبير وعمره في حياته مافكر يزعلها..لكن بسبب طوبى زعلها منه بقوة وقاطعها وبعدين خداها بدون علمهم وانحرموا بفرحتهم بيه اللي كانوا يستنوا فيها اكثر من هو وفرضها عليهم فرض ومافكرش يراضيهم بعد ماعرف انهم سمعوا بزواجه منها وخلاهم غصب عنهم يجوه لحد عنده..
وطبعا وكما جرت العاده في مجتمعنا في الحالات هادي الذنب يكون ذنب المراة بروحها..
هي اللي غيراته..وهي اللي باعداته..وهي اللي نساته فينا وهي اللي قطعت بينا وبينه..وحتما حتكون ساحراته حتى السحر بش يجي في طوعها..
وظروف طوبى مخليه هالتهم تثبت عليها ومش حتخليها في نظر الناس الا شيطانه..
🍃وللأسف موقف عمات عبدالقيوم هو نفسه موقف خالاته وبعض من خواله وعمامه..
ماحد تقبل هالزواج وباركله غير عمه عبد الله وخاله عبد القادر وصفيه اما باقي افراد العيله كانوا واقفين في منطقة الحياد...
يعني...طوبى حاليا الكنه الغير مرحب بيها لذا وجب محاربتها لتطفيشها🍃
صوت الجرس اللي رن في المربوعه صدح في الحوش كله بعد ماضرباته طوبى من الكوجينه..
شافوها الثلاثه وهي طالعه بسفرة الضيافه ومتوجهه لأخر الممر..
غادي واقف عبد القيوم يراجي فيها..
خدي منها السفره وهو يقول بإبتسامه..
/شن جو..
بدت ع وجهها ابتسامة حب وهي تقول بهمس..
/مليح..
ضحك ضحكة خفيفه وخدي السفرة منها ومشي..
اما هي ولت للكوجينه بش طلع الضيافه للنساوين..
فاتت من قدامهم بدون ماتشوفلهم وهما يشوفولها بنظرات عدم تقبل..
خشت للكوجبنه وبعد ثواني طلعت بسفرة العصير والشكولاته..
فرقت عليهم وهما كانوا ياخدوا بدون مايتكلموا..
حطت السفرة الطاوله ومشت قعمزت ع الكرسي اللي مقابلهم..
ضمت ايديها لبعض وقالت بإبتسامه..
/صقع الكفرة زي هني؟
جاوبتها سليمه بعد مارشفت من العصير وقالت..
/عادي..مررت نظرها ع المكان وقالت..مالا وين بنتك؟
نبض قلبها نبضه قويه موجعه السؤال جدا قاسي واجابته صعبه بس هي حاولت تتماسك وجاوبت..
/قاعده مع خواتي..
بريكه قالت..
/كيف قصدك عدتلهم زيارة ولاقاعده عندهم ديما!؟.
بلعت ريقها وتصنعت الثقه وهي تجاوب..
/قاعده بيني وبينهم يعني مرة عندي ومرة عندهم..
سليمه سألت متعجبه..
/وقدرتي ع فراقها!!؟ كانت عندك كيف عيونك ياما درتي عشانها...!
وتستمر طوبى في بلع ريقها مع الالم اللي تحس بيه وبعدين تجاوب في اجوبه غير مقنعه بالنسبه ليهم..
/مش مفارقتني لما تكون عندهم نكلم فيها اكثر من مرة في اليوم..
رشفت سليمه من العصير بدون ماتعلق..
غزاله:شوره حتى باتها ناسيها!
سليمه؛وهو هذكي اب ولابنادم من اصله!
بريكه؛يعلم بيك ازوجتي!؟
وتستمر طوبى بالتظاهر بالثبات ومن داخلها كل شي مهزوز وهي تجاوب..
/مانندريش عليه ليه وقت مسيب البلاد ومافيش اخبار عنه..
سليمه بضحكه متهكمه..
/نسيتي يابريكه زواجهم دكنوني!..
بريكه؛لامانسيت ومن لما عرفت وانا في عقلي سؤال،كيف هلك رضوا يعطوك لواحد طلبك وحده من غير هله!!؟
🍃كل سؤال كان زي السيف يخش في قلبها قبل مسامعها كان لازم تتوقع ان هذا اللي حيصير بش ماتكونش صدمتها كبيرة لهالحد فيهم..كان لازم تكون واقعيه في توقعاتها وماتتفائلش لحد الوهم...🍃
برغم كل مشاعر الوجع والخيبه اللي كانت تحس بيهم ابتسمت بمكابرة وقالت..
/اللي زي عبد القيوم يعطوه والعيون مغمضه سوا خطب بأهله ولامن غيرهم لأنكم عرفتوا تربوه وتخلوه راجل ينشرى بالذهب..
رفعت غزاله حاجبها وشافت لبريكه اللي كانت تشوفلها حتى هي وكأنها تقول..
"مش قتلك وحده مش ساهله"
اما سليمه كل مالها تزيد تنفر من طوبى وتكرهها..
شربت من العصير بعدين ناضت حطت الطاسه ع الطاوله ومعاها طرف الشكولاته اللي ماكلتش منه..
غزاله:هاك سلومه..
ناضت طوبى بتاخد منها سليمه قالت..
/قعمزي قعمزي..ومشت خدت من خواتها طواسيهم وطروف الشكولاته اللي ماخدوا منهم شي بعدين حطتهم في السفرة وولت قعمزت وهي تقول لخواتها..
/توا اللي صار صار..مافش قدامنا غير نقبلوا ونرضوا بالأمر الواقع..شافت لطوبى وقالت..عندك علم ان الناس في الكفرة عرفوا قبلنا!!؟ وهما اللي خبرونا..متخيله الموقف اللي قعدنا فيه قدامهم!؟
بريكه:خليتونا نرقعوا بالكذب ونقولوا ان عاقد عليك والفرح بعد الشتا
طوبى وهي تسمع فيهم كانت باديه ع وجهها ملامح الصدمه..
سليمه؛قلنالهم هي بدير فرح في طرابلس وبعدين بيجوا للكفرة نديرولهم فرح تاني..من توا خبري هلك لازم يجوا معاك ومايخلوناش نقعدوافي موقف تاني مع هلنا وناسنا..
قعدت طوبى تشوف لسليمه بصمت ودموعها عبوا عيونها..
بريكه:سمعتي!؟
شافتلها طوبى وهزت راسها بإيجاب وهي شاده دموعها بقوة..
تكلمت غزاله بلغتهم وهما ردوا عليها واستمرت هدرزتهم اللي طوبى مش فاهمه منها حرف..
من قوة الألم والقهرة اللي كانت تحس بيهم شدت بيدها اليسار اصابع يدها اليمين بقوة وقعدت تضغط عليهم..
"طوبى"
سكتوا التلاته وشافولها..
بعدين شافوله وهو خاش عليهم بالسفرة..
طوبى لما شافاته..شافت عيونه وابتسامته الحلوة هان عليها كل شعور سيء كانت تحس بيه رسمت ع وجهها ابتسامه حلوة وناضت مشتله طول خدت منه السفره وهو يقوللها..
/وتي الغدا..
هي بإبتسامه قالت..
/حاضر..
ومشت للكوجينه وعيونه المغرمات يلحقوا فيها..
"عبدو ننغ"
شاف لعماته لما نادوه بعدين ضحك ومشالهم قعمز في نصهم وعاد هما اللي طبطب واللي دلل واللي تقول في كلام حلو هما هكي من قبل معاه يحبوه حب كبير اكثر من حبهم لبوه اللي هو خوهم وهو كذلك يحبهم ولايمكن ينسى جمايلهم عليه لكن وين توقف المسألة عند طوبى معاش يتفكر حد غيرها..
☘وهي توا قاعده تشوف لعبدالقيوم للي داره معاها للراجل اللي حبها بقوة وصدق رغم كل الظروف وتحمل معاها مالايقدر راجل غيره ع تحمله ودارلها مع اهلها واهله قدر كبير ع خاطر عيون هالراجل الأصيل تتحمل كل شي...☘
🍃🍃🍃
زي مادارت قبلها غرفه يوما ما...
غرفه اللي قاعده تشوف لريسه بإبتسامه كيف تهدرز مع صغارها وتلاعب فيهم بكل حب برغم مقابلتها ليها بوجه ناشف لما شافت حبها لصغارها فرحت من قبلها كل همها ان ماقعد من اهل لصغارها يتواصلوا معاهم وماينسوهمش..
خشت عليهم لميس بسفرة الغدي واختها وراها بالمفرش..
نبيله:سامحونا في تعبكم..
لميس بإبتسامه..
/تعبكم راحه..
فرشت اختها المفرش وقالت..
/مافيش حاجه من قدركم..
حطت لميس السفرة هي تقول..
/اقربوا هيا..
غرفه:اوبا هوبا تعالوا ماما..
لميس:خليهم ليا تو نوكلهم..
استغربت نبيله استغراب شديد..
غرفه:مش حيخلوك تاكلي براحتك..
لميس بضحكه؛عادي..هي تعالوا ياحلوين..
شافوا الولاد لأمهم وهي قالت..
/قعمزوا مع خويله ماما..
مشولها الزوز وهي شدتهم وقعدت تبوس فيهم وتقول..
/وخيتي سلمهم..
امها قدمت وهي تشوفلها بطرف عينها..
اما اختها تبان عاديه..
لميس:مئاب رقدت؟
غرفه:مالهاش هلبه راقده..
نبيله وهي تشوف للميس قالت لاختها..
/وين صغارك نهى؟
ردت عليها تقول..
/سلامتهم رفعهم بوهم لحوش جدهم يبوا يلعبوا مع الصغار غادي..
هزت نبيله راسها بصمت..
سكتوا شويه وهما ياكلوا بعدين ريسه قالت..
/شن صاير في رزق صغارك؟
نبيله شافت لغرفه اللي قالت..
/ربي يزيد فيه ويبارك..
نهى:قالت نبيله ولد عمك واقف عليه..
لميس قعدت تسمع بإنتباه..
غرفه:ايه بارك الله فيه كل مرة يتابع في حاجه يسافر ع خاطرهم حتى السفر..
لميس:مش متزوج هو ولا!؟
ضيقت نبيله عيونها وهي تشوف للميس..
غرفه؛لا كان خاطب وماصارش نصيب ولتوا ربي ماسخرلاش الزواج
لميس:قالت نبيله يحب صغارك هلبه وهما يحبوه..
غرفه؛من حياة عبد الرؤوف الله يرحمه قال وصاني عليهم..
ريسه ونبيله بعيون مليانه دموع قالوا..
"الله يرحمه ويغفرله"
نهى:فيه الخير حتى راجلي يشكر فيه وقالي في واحد من صحابه كان متطوع ايام احداث 2011 حارب معاه حكاله عنه وقال حقاني وقلبه قوي
غرفه:ايه حسين هكي فعلا رغم ان وحني صغار كان لطيف وهادي وحنين لكن بعد ماخش للعكسريه تغير 180 درجة..
لميس بإبتسامه اعجاب..
/لكن قاعد حنين ع الصغار
ابتسمت غرفه وقالت..
/ايه..
نبيله وهي تاكل حست ان في قصد من كلامهم ع حسين وشبه بدت تفهم فيه..
اما غرفه مش حاطه في بالها شيء نهائي..
🍃🍃🍃🍃
حطت طوبى قدام عمات راجلها سفرة غير شوفتها تشبع وهما سموا وبدوا ياكلوا ورجعوا يدووا بلغتهم هي حست انهم كانوا يعلقوا ع ماكلتها لانهم يتكلموا ويشوفوا للسفرةشويه تكلمت بريكه عربي وهي تقول..
/ايكالك كويس لكن حار كيف متحمله عبد القيوم!؟
طوبى:لاوالله نهائي مانكترش في الفلفل ولانحط في توابل في ماكلته بكل
بريكه؛كيف يابنتي والله بطني تمت توجع فيها حار بكل..
غزاله:خلاص خلي يابريكه..
طوبى بربكه واحراج..
/تبي نديرلك حاجه تانيه..
بريكه:لا ارتاحي توا خلاص..
طوبى؛كيف بتقعدي من غير غدي!؟
سليمه:حطيلها طنجرة برودوا ع النار..
ناضت وهي تقول..
/حاضر
ومشت بسرعه للكوجينه وبإستعجال حطت طنجرة البرودو بش تطلع تساير باقي ضيوفها ع الغدي..
وبعد كملت ورجعتلهم لقتهم موخرات عن السفرة انصدمت وقالت..
/خيركم!؟
سليمه:الحق كلينا في الطريق توا نبوا نرقدوا بس..
غزاله:ايه والله تعب الطريق رد علينا..
🍁وابلعي ياطوبى ومشي وارفعيهم لدار المعيشه واللي هادي تمددت ع فراش وهي غطتهم بالبطاطين وطلعت وردت الباب..
مشت بإحباط للصالون وشافت سفرة غداها اللي قاعده زي ماهي ع الارض..
غمضت عيونها وخدت نفس عميق بعدين فتحتهم وقالت..
/الله المستعان..
وقدمت للسفرة خدتها ودخلتها للكوجينه..
وطول ماهي تشتغل في الكوجينه كانت تسبح بحمد لله دموعها اللي كادوا ينزلوا معاش حست بيهم والنار اللي كانت والعه في جوفها هدت شويه..
لحظات وخش عليها عبد القيوم بالسفرة قاللها..
/عطيك الصحه ياسمح..
ابتسمت وهي تشوف للسفرة شبه ماقعد فيها شي..
هو قربلها خدي ايديها الزوز وباسهم بعدين قال..
/وين عماتي!؟
طوبى وهي تشوف لعيونه بحب قالت..
/تغدوا وخشوا رقدوا..
هو قال:حتى جماعة المربوعه نازل عليهم النوم..
طوبى:طبيعي تعب طريق طويله هلبه..
هز راسه بعدين مرر نظره ع الكوجينه وقال..
/خلاص عدي للدار تو نكمل عنك..
طوبى؛لالا بالله عليك لا برا ارقد وتريح حتى انت..
عبد القيوم؛من الصبح وانا متريح وماندير في شي..عدي ياطوبى اسمعي الكلام..
جت بتطلب منه يطلع مرة تانيه حلفلها تطلع،معاش قدرت تقعد مشت طلعت من حداه وتوجهت لدار النوم..
اول ماسكرت وراها الباب مشت قعمزت ع السرير وبدت تتفكر في كل الحديث اللي دار بينها وبين عماته ورجعت حست بنفس المشاعر الموجعه..نزلوا دموعها مسحتهم فيسع بعدين رفعتهم فوق وغمضتهم وهي تقول..
"لاإله إلا انت سبحانك انتي كنت من الظالمين"
نزلت عيونها وفتحتهم بعدين شافت لهاتفها اللي كان ع الزيانه وجنبه السماعات..مشت خداته وولت تمددت ع السرير شغلت القرآن بصوت احمد العجمي بعد ماحطت السماعات في وذانها وغمضت عيونها وهي تنصت بقلبها الموجوع..
☘في هاللحظات..
طلعت وحده من عماته من الدار وكانت ناويه الحمام..
سمعت صوت ولد خوها وهو يغني في اغنيته المفضله مشت لين وصلت في الفتحه اللي توصل للكوجينه وتشوفه يغسل في الماعين وطوبى مش معاه..
ابتسمت بريكه بتهكم وقالت..
/والله مانك بعقلك ياولد خويا...تنهدت بحسرة ومشت للحمام...
🍃🍃🍃🍃
"حسيته متجنبني هلبه الفترة الاخيرة"
سامي وهو يشرب في العصير قالت..
/اكيد عارف السبب..
ربيع؛لا مش عارفه..
حط سامي الشوكه ع الصحن وقال..
/لاعارف غير تبي تتأكد..مايبيش يسمعك تغلط في زوجته بس ما يخسركش.
ربيع بصدمه:من جدك انت وياه!؟ معقوله بنوصل في مرته!؟ مرت صاحبي!!؟ شن تحسابوني انتم!؟
سامي:معروف رايك ماتعرفش دسه..
ربيع:المراة توا ولت مرته مستحيل ندوي عليها لاقدامه ولامن وراه وبعدين علاش فاهمين اني مش متقبلها بالعكس طوبى مراة ماشاء الله عليها..لكن ظروفها ياصاحبي ظروفها صعبه هلبه اللي يبي يتزوج يبي يدير عيله في وضع مستقر ياخدها وحده مايجيشي من وراها دوة ومشاكل ووجع راس..راهو مش كل شي حب ياسامي في امور اهم منه بهلبه..
سامي:كل حد وقناعاته وتفكيره..
ربيع؛تي غير فكر فيها بالمنطق ياراجل هو خداها من ورا ماليه لأنهم مايبوهاش حتى لو قطعهم توا مش حيقعد قاطعهم طول العمر متوقع لما يوليلهم كيف بيكون شكل علاقتهم بمرته..هو اكثر من حيعاني معاهم..ولاالمصيبه الاكبر المتخلف الجالي تي هدا شد واحد فكر يتزوجها عطاه طريحه قريب قتله متوقع اللي بيديره لما يعرف انها تزوجت لاومن عبد القيوم اللي يطيق العمي ولايطيقه!!
سامي؛الكلام هذا كله قلته وعاودته اكثر من مرة وعبد القيوم اللي سمعه منك عارفه كويس ولادارله راس مال الراجل يحب بقلب صافي ياربيع ياما تحمل ع خاطرها ومازال يتحمل راهو..نجيبهالك من الآخر مش حيفارقها الا بالموت..
ربيع بأسف؛شن مازال بنقول خلاص الكلام تم..ماعندي غير ندعي ربي يخيب ظني ومايصير شي من اللي متوقعه..
سامي:يارب..
ورجع يتغدا ابتسم ربيع وقاله..
/هيا سقد روحك بيذن العصر بعد الصلاة ع طول بنمشوا غادي ونبدوا في جلسة التشك تشك..قال كلامه الاخير وهو يمثل بالحركات.
سامي بإبتسامه جانبيه قال..
/كان نعرف شن خطر عليك..
ضحك وقاله..
/مش لازم تعرف حتى اني بندير اسرار لروحي..
ضحك سامي وهو يحرك في راسه يمين ويسار..
🍃🍃🍃🍃
آذن العصر وعبد القيوم فيق عمه وولاد عماته بش يمشوا يصلوا في الجامع..
وطوبى حطت كل شي صار ع جنب وخشت ع عمات راجلها ونوضتهم للصلاة وهما ناضوا..
🍃بريكه؛قولي لعبد القيوم يكلمهم يرقوا الشناطي هنا..
طوبى:حاضر..
ومشت طلعت لراجلها لقاته واقف يراجي فيها فالصالون..
شافها لابسه ملاية الصلاة قال..
/تعالي عمي يبي يسلم عليك..
ابتسمت ومشتله هو شد يدها هي حاولت تجبدها وقالت بخجل..
/شن دير!؟
شد ع يدها وقال بإبتسامه..
/اسكتي..
ورفعها لاخر الممر وهي محرجه جدا..
وصلوا غادي لقوا عبد الله واقف شاف طوبى ابتسم ونزل عيونه وهو يقول...
/بنيتنا..
ابتسمت طوبى من قلبها وقالت..
/كيف حالك عمي..
هو قال..
/الحمد لله..انتي شن حالك وشن اخبار ولدنا معاك..
طوبى بإبتسامه خجل..
/كويس..
ضحك عبد القيوم..
عبد الله قال:هو انا عارف انه دايرك كيف عيونه لكن مع هذا نقولك كان حي نهار وظلمك كلميني وناخدلك حقك منه..
طوبى:ولد انتم ربيتوه مايظلمش ياعمي..
شد ع عبد القيوم ع يدها بقوة شافله عمه وابتسم وهو هرب بعيونه عنه وكان مبتسم بإحراج..
ضحك عبد الله وقال..
/ربي يسخركم لبعضكم وبهنيكم..
دق باب الشقه قال عبد القيوم لطوبى..
/خشي..
طوبى:السلام عليكم..ولفت ومشت..
عبد الله رد عليها السلام وقال لولد خوه..
/نعرفك ماتقنص كان الغالي.
ضحك عبد القيوم ومشي فتح الباب لولد عمته اللي كان جايب الشناطي اللي نست تقول عنهم طوبى..
🍁🍁🍁🍁
بعد صلاة العصر..
عبد الله وولاد خواته مشوا لواحد يعرفوه عندهم معاه مصلحة..
وقعد عبد القيوم بش يشرب الشاهي مع عماته ويهدرز عليهم..
هما قدامه كانوا عاديات يتعاملوا مع طوبى عادي لايمدحوا فيها ولايذموا ولايلقحوا بالكلام معامله جدا عاديه وهو ماشاف شي غلط فهالمعالمه..هما الرجال بشكل عام مايركزوش التفاصيل عكس الجنس الناعم اللي مايفوته شي..
🍃سليمه:الخدمه بروحك خير من الخدمه في الشركه.عبد القيوم؛بواجد..
غزاله؛سمعت بيك درت معهد لتعليم الخط
سليمه:يومها ورتني صفيه صورك وانت فيه وشفت حتى سلافه تخدم معاك هي!؟
هو شاف لطوبى لقاها تشوفله بنظره تبان عاديه رد نظره لعمته وقال..
/ايه..الفكره لها في الاصل..
سليمه؛كم تعز عليا هالبنيه بالله شن خبارها واخبار امها واختها..
عبدالقيوم:اختها زوجت قبل شهر وسافرت وامها شكلها ماتحملتش فراق بنتها وجاها الضغط..
بريكه بوجع:لاحول ولاقوة الا بالله..
سليمه بتعاطف:يامينتي عليها والله ماتنلام مسكينه المصايب جنها فوق بعض وفوق غربتهم بنتها تباعدت عنها وتغربت اخرى..
غزاله:مساكين السوريين والله..
بريكه:ايه والله العيله هذي بالذات كويسين واجد باين كانوا ناس عز..
عبد القيوم:صح وهالحرب جارت عليهم..
سليمه:بالله شيلنا لهم بكرا نشوفوهم..
رجع نظره لطوبى وهي اول ماجو عيونه عليها قالت..
/خالتي شاديه غدوة تطلع خل نمشوا نشوفوها..
سليمه بإستغراب:من وين تطلع..
عبد القيوم شافلها وقالت..
/لها يومين راقده في المصحه من يومين بس جاها الضغط..
سليمه:لاحول ولاقوة الابالله..
عبد القيوم:الباين لكي مدة معاش كلميتهم!؟
سليمه:لاانا ولاهما..تنهدت وقالت..بعدين نرن ع سلافه ونعطيها علم بجيتنا..
عبد القيوم؛تو تخبرها طوبى.
سليمه:مافيش فرق وبعدين انا نبي نسأل ع المراة ..
حاول يخفي عبد القيوم ضيقه..غير نظره لمرته لقاها ناضت بش تلم طواسي الشاهي الفاضيه وهي تقول..
/نزيدكم..
ردوا عليها بأصوات متقطعه..
/صحيتي..
مشت حطت الطواسي في السفرة ورفعتها للكوجينه..
سليمه شافت لعبد القيوم وقالت..
/زعلت مني!؟
عبد القيوم بهدوء..
/الموضوع هذى تتحسس منه طوبى واجد وانتي تعرفي ليش ونا مانبي شي يضايقها..
بريكه:وخيرها توا قالتلك شيلنا نشوفوها..
عبد القيوم؛علاقتها بيهم كويسه من قبل وفي بينهم شغل وتعرف كويس ان سلافه تتعامل معاي كزميل يعني مافي بيني وبينها شي..
عماته شافوا لبعض..
هو تنهد وقال:المراة مولاة عقل كبير ومافش منها وانتي تعرفي الحاجه هذي كويس ياعمتي سليمه لأن هذى كان رايك فيها..
سليمه؛خلاص انهي تو تسمعنا واسفه كان درت حاجه ضايقاتك..
شاف الدمعه في عيونها قلبه وجعه ناض ومشي قعمز حداها خداها في حضنه وباس ع راسها هي ابتسمت وطبطبت ع ذراعه وعماته يشوفوله بإبتسامه..
ع جية طوبى لما شافتهم ابتسمت وقالت..
/شن تبوا نديرلكم عشي!؟
عبد القيوم:ماديري شي بنجيب من برا..
بريكه:غير فكنا من الحار..
عبد القيوم بإبتسامه:لاهذى مطعم صاحبي دايرلي طلبيه خاصه..
طوبى:ربيع؟
عبد القيوم:ايه بدري شويه رنيت عليه وطلبت..
طوبى مشت قعمزت في مكانها وهي تقول..
/باهي..
🍁وقعد عبد القيوم يهدرز ع عماته وطوبى تتأمل فيه ماتأكدش ان حبها ليه كبير وقوي في قلبها الا بعد اللي صار اليوم لأنها خافت تخسره خافت هلبه..
اما هو فكان كل همه تصفى القلوب وطيح الحواجز بينها وبين اهله ع خاطرها هي بالدرجة الاولى بش ترتاح وهو يرتاح معاها...
🍃🍃🍃🍃🍃
"نبوك تاخدي كسوتك ع ذوقك ولو المبلغ هذا مايسدش نزيدوك حبيبتي"
صفيه:والله كل زايد ياوسيله المهم الهني والراحه..
وسيله:عندك حق لكن في نفس الوقت لازم نديروا الاصول وبعدين هادي ميمو حبيبتي مرت سامو حبيب امه تستاهل الدلال كله..
ضحكت اميمه بخجل وقالت.
/سلمك ياربي..
وصفيه تشوف لبنتها بإبتسامه فرح وقلبها اطمن عليها ع الآخر...
🍃🍃🍃🍃
"غير شوفي شوفي الهبال"
شافت سميرة لهاتف نسرين كانت في صورة باعتتها خديجه من احد المدن التركيه المغطيه بالثلج الصورة مأخوذه ليها وهي منقزه وتلوح في الثلج فوق..
سميرة بضحكه:موسع بال راجلها..
ضحكت نسرين..
شويه وجتها صورة تانيه..
كانت لخديجه وهي بكامل اناقتها وكلها تبرق بالمجوهرات واقفه ع مرايه وتصور في روحها..
نسرين:اشيه!
كتبت وبعتتلها..
(وين هذا!؟)
شويه وردت عليها..
(ماشيين لعرس بنت صاحبه)
بعتتلها نسرين..
(هيجي ياحنه)
ردت عليها بضحكه بعدين بعتت..
(غدوة بنسافروا للكويت)
نسرين..
(توصلوا بالسلامه)
شويه وبعتت خديجه صورة فيها وهي لابسه عباية الكاب رافعه خمارها بيد وبالتانيه تأشر لأختها بالتحيه..
ضحكت نسرين وبعتت..
(سلامات)
نزلت الهاتف وقالت..
/ماشيه لعرس قالت..
سميرة؛ربي يهنيها والفال لنضال..
نسرين بحزن..
/نضال مولي زي الغصه في قلبي الوحيد اللي ع قد ماقلبه طيب بخته بالهون..
سميرة:لاان شاء الله بخته يكون خير من بخت خوته ربي ينوله مايتمنى يارب..
نسرين:زعمه ينول مايتمنى ولايكمل عمره متحسر؟
سميرة:ينوله بعون الله ينوله..
☘فأصبر صبرا جميلا☘
🍃الصبر..هذا اللي قاعده عايشه بيه طوبى في حياتها الصبر ع منغصات الحياة وشدائدها الصبر ع الابتلاءات وهي تحتسب في الأجر..برغم حجم الألم اللي معبي قلبها لكن كانت تحتسب في كل وجع تحس بيه عند الله يايكفر ذنوبها او يرفع درجاتها..يعني مش حتكون غير الانبياء والصالحين كملوا اعمارهم في الابتلاءات..!
ومادام الله سبحانه وتعالي قدرلها هالحياة لازم ترضى وتقول الحمد لله...
🍃🍃🍃🍃
بعد عصر تاني يوم رفعهم عبد القيوم لأهل سلافه..
طوبى هالمرة كانت متوقعه كل شي حيصير معاها وطول الطريق وهي تسبح همسا تبي من الله يقوي قلبها ومايخليش اللي أي اذى تسمعه او تشوفه يأثر فيها..
🍃ومن اول مافتحتلهم سلافه الباب بدت في تلقي كل مايؤذيها..
سليمه سلمت ع سلافه بحرارة تقول جايه لبنتها وسلافه حتى هي تحضن وترحب نقول قابلت امها..
وبريكه كذلك سلمت عليها سلام كويس وغزاله وهي تسلم عليها كانت تردد في جمل..
"ماشاء الله..تبارك الله"
وهي عاد ماقصرتش بلسانها السوري الحلو..لكن هذا كله اختفي اول ماشافت طوبى صافحتها مصافحه عاديه وقالت..
/تفضلي..بعدين فاتتها ومشت لعمات عبد القيوم..
طوبى..
"صبر جميل والله المستعان"
🍃🍃🍃
"الحمد لله ع كل حال الحمد لله"
سليمه؛ادعيلها ديما واستودعيها الله ومعاش تخافي عليها..
شاديه؛ونعم بالله..
سلافه:انا لما شفت اللي صار معا قررت اني ظل جنبا ع طول..
شاديه:ماحزرتي..
ضحكوا عمات عبد القيوم وسليمه قالت..
/ربي يبعتلك نصيب يستاهلك ياسلافه..
سلافه بأبتسامه ألم..
/لا انا موضوع الزواج سكرتوا بالمرة..
شاديه شافتلها بإمتعاض وطوبى مركزة معاها..
تنهدت سليمه وقالت..
/الله غالب..
شافتلها طوبى طول وشاديه شافت لطوبى بعدين قالت..
/حبيبتي طوبى كيفك؟
يدوب ابتسمت طوبى وقالت وهي تبلع في ريقها..
/الحمد لله...
شاديه:والله عبد القيوم حظه من السما اللي رزقه رب العالمين بهيك مراة لو منه بحمد الله ليل نهار ع هيك رزقه محرزة..
ضحكت طوبى من بين دموعها وقالت..
/تسلمي يارب هذا من طيب اصلك..
عمات عبد القيوم لما سمعوا كلام شاديه بدت ع وجوههم ملامح عدم الرضا لكن سلافه كانت تشوف لطوبى بغيرة..
شاديه:الطلبيات ان شاء الله رح توصلكن بنفس الموعد مارح نتأخر..
طوبى:لالا ارتاحي الاسبوع هذا تو يخدموا البنات عنك ..
شاديه:لا بنتي مافيني شي انا اصلا مابطيب الا بالشغل..
طوبى بإبتسامه..
/ع راحتك...
🍃وقعدوا يهدرزوا للمغرب وفي وسط هالهدرزة ياما طوبى شافت وسمعت لكن تجاهلت ظاهريا وداخليا لعند مااتصل عبد القيوم وقال هيا..
سلافه:والله جهزنا العشا مارح تروحوا قبل ماتتعشوا..
شاديه:عنجد مابيصير هيك لازم تتعشوا عندنا..
سليمه بإبتسامه:باهي تو نحاول فعبد القيوم..
واتصلت بيه سليمه وطلبت منه يخليهم للعشي وهو وافق ع مضض..
☘وجاهم العشي اللي داراته سلافه وقعدوا ياكلوا ويشكروا فيها وهي تشكر وتقول "صحتين ع قلوبكن "وكل مرة تقربلهم حاجه وطوبى بالنسبه ليها غير مرئيه..
شاديه كانت ملاحظه تصرفات بنتها وقعدت ع اعصابها..
اما طوبى الوضع اللي تشوف فيه كان فوق طاقتها انسدت نيتها يدوب تاكل مجامله وفي نفس الوقت بدت تحس في ألم في حزامها خوفها هلبه...
🍃🍃🍃🍃
وبعد العشي جي وقت مرواحهم هالمرة..
سقدت شاديه ضيوفها لكن قبل ليطلعوا جتهم تجري بحافظه عطتها لسليمه وقالت..
/حصة الأستاذ عبد القيوم..
شاديه شافت لطوبى لاحظت ملامح الضيق ع وجهها ولونه يبان شاحب..
سليمه بضحكه:تسلم ايديك يابنتي..تصبحوا ع خير..
شاديه وسلافه قالوا...
"وانتوا من اهله"
فتحت سلافه الباب وهما طلعوا وبعد ماشافتهم نزلوا سكرت الباب..وتشدها امها من ذراعها وهي تقول..
/شو هالحركات السخيفه!!؟
سلافه:حركات شو!؟
شاديه:لاتتهبلني عليي والله مسكت لساني عنك بالزور..
جبدت ذراعها وقالت..
/ماعملت ولاقلت شي غلط هني اللي مبين عليهن انهن مو طايقينا وكل الحركات اللي عملوها والحكي اللي قالوه كانوا قاصدينه لأن مابدن اياها..
شاديه بضيق..
/يعني بدن يخلوها تترك زوجا بإرادتها..
سلافه: ايه بدن يطفشوها وبصراحه تستاهل هي اللي اختارت تتزوج حدا غصب عن اهله وهيك زواج معروفه شو نهايته..
ومشت خشت داخل..
تنهدت شاديه وقالت بحزن..
/مسكينه والله مابتستاهل..ومشت خشت حتى هي..
🍃🍃🍃🍃
وطوبى اللي كانت محترفه دائما في اخفاء اللي تحس بيه خلت عبد القيوم يطمن ان ماصار شي ضايقها فهالزيارة لكن لاحظ شحوب لون وجهها..
🍃في دارهم..
طوبى بضيق..
/عمرها ماصارتلي اول مرة تجي مرتين في الشهر..
هو بقلق قال..
/نقولك بكرا بعد يروحوا هلي نشيلك للمصحه اللي نعرفها الدكاترة اللي فيها كلهم ممتازين..
طوبى تنهدت وقالت..
/ان شاء الله..تعشيت؟
هو قال:تعشيت في مطعم ربيع..
ابتسمت بمكر وقالت..
/احسن..
فهم قصدها وضحك بعدين خداها لقلبه وقال..
/ارهيقم هولان..
هي ردت بضحكه...
/ارهيقي هولانه هولانات...
🍃🍃🍃🍃
وتعدي هالليله ويلحقها صبح واهل عبد القيوم جهزوا رواحهم للمرواح..
نزل عبد القيوم مع عمه وولاد عماته وفي يده شناطي عماته..
وعماته استفردوا بطوبى قبل ليلحقوهم..
سليمه:يعلم الله اني نعزك ونحترمك واجد بعد اللي صار نظرتي فيك تغيرت خليتيه يعادي هله عشانك ويحط روحه في النار اللي بتجيه من وراك..نقولهالك ياطوبى والله لو صارت فيه حاجه مافي واحد فينا مسامحك..
نزلوا دموعها مسحتهم ومشت طول وخواتها لحقوها بدون مايعلقوا بكلمه..
شافتهم طلعوا والباب قعد مفتوح..
مشتله بخطوات ثقيله وسكرات..بعدين لفت ومشت هي مازال تسمع في صوت سليمه وكلام سليمه..نزلوا دموعها وتلقائيا لسانها قعد يردد..
"لا إله إلا انت سبحانك انتي كنت من الظالمين"
🍃تحت العمارة..
سلم عبد القيوم ع اهله وسقدهم قعد واقف في مكانه يشوف للسيارة لعند ماطلعت من العمارة بعدين لف ومشي بيركب لشقته..
🍃وصل فيها وفتح الباب وخش بعدين سكره وراه ونادى..
/طوبى..طوبى..
ماسمعلهاش استغرب وخاف..كيف جي بيرمي البوت متاع ويخشلها طلعتله وهي تلبس في قفازاتها وتقول بضحكه..
/اهو جيت..
ابتسم من قلبه وين شاف ضحكتها غير نظره للطاولة الاحذيه قدم خدي كندرتها ولما وصلت فيه حطها عند رجليها..
ابتسمت من قلبها ولبستها بعدين شدت يده ومشت فتحت الباب وقالت..
/هيا..
طلع وهو يضحك وهي معاه بعدبن سكر الباب...
🍃🍃🍃
في طريقهم للمصحة....
طوبى:عجبتني فكرة العرس خاطري نلبس تارقي..
عبد القيوم:وانا نرجى بفارغ الصبر نحقك بيه..
ابتسمت بحب وهي تشوفله بعيون مليان دموع بعدين بدت تغني...
🍁انا لحبيبي وحبيبي إلي
..خدي يدها وشدها بقوة وهو يسمع فيها تغني بإحساس عالي..
🍁ياعصفورة بيضا لابقا تسألي
ولايعتب حدا ولايزعل حدا..
"انا لحبيبي وحبيبي إلي"
#انا_لحبيبي_وحبيبي_إلي
#طوبى
....يتبع....
