#طوبى "جنة طوبى"
#جمان_فريد
#الجزء_الثاني_والتسعين"العضيد"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء
مَنْ عوَّد لسانه وقلبه سُؤالَ الله في كل أموره ،
والالتجاء إليه في كل ما يقوم به ، والافتقار إليه في كل أحواله ؛ أورَثَه القوة في قلبه ، والبصيرة في شؤونه ،
والثبات في مبادئه ، والانشراح في صدره ،
والتوفيق في حياته ..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃سنشد عضدك بأخيك🍃
________________________________________
دارو غداهم..
وتغدوا وسط الطبيعه الحلوة..الرجاله بروحهم والنساوين بروحهم...
الجو كان معتدل ولطيف...يريح النفسيه ويفتح الشهيه...
☘فردوس:خسارة خالي..
نبيله:خالك توا اكبر همه يكبر مكتب المحاماة متاعه بس..
طوبى:ربي يعلي قدره..
كلهم بأصوات متقطعه قالوا..
/آمين..
غرفه؛ان شاء الله المناجيه هدوكا خلوه بوهم يتغدا..
شافوا مطيره وهاديه جهة الرجاله لأنها كانت مقابلتهم..
مطيره بضحكه؛واحد في حجر رؤوف والتاني في حجر حسين..
طوبى:حسين يموت الصغار اني كان نخليله جنه ياخدها مني..
فردوس:اييه ياايام زمان كنتي ماتسكتي الا عنده هو حتى وين تجي ترضع يشدها بين ايديه ويحطلها الرضاعه في فمها تسكت طول..
مطيره:مالا لما كان يقرا وتجي تفسد عليه لين دارها كراسه وقلم بروحها..
ضحكوا وطوبى تضحك معاهم..
وهاديه تسمع فيهم وهي تشوف لحسين...
شافتها مطيره وقالت..
/شوفوا هاديه كيف تشبحله شكله معاش مطول حتى هو..
سمعت شن قالت وبعدين سمعت قدامهم..
غيرت نظرها لمطيره وقالت..
/حسين حنين هلبه شوفي وليد غرفه في حجره تقول ولده..
التفتوا كلهم وشافوله..
غرفه:ربي يهديه حتى هو ويتزوج العمر يجري..
مطيره:حسيته زي اللي تعقد من حكاية الزواج مايبيش يسمعها بكل..
طوبى:خلوه ع راحته..المواضيع هادي ماتمشيش بالضغط لازم تكون عنده رغبه..
اميمه؛صح..وكان عنده نصيب تو ياخده..
🍃وبعيد عن مواضيع الزواج والنصيب كان كلام الرجاله كله عن الوضع السياسي للبلاد وعن بوادر حرب تلوح في الافق..
الوضع يخوف..البلاد ع صفيح ساخن...
🍃🍃🍃🍃🍃🍃
كانت في الكوجينه تغسل الماعين..
هو خش عليها..كان يشوفلها بشي بنظرات متردده..
بعدين تشجع وقال..
/عواطف..
هي ولاكأنها سمعت شي..لاهيه باللي دير فيه بس..
اشرف:عواطف..نبي ندوي معاك شويه...
طفت الميه والتفتت عليه وقالت..
/خير!؟
اشرف:مش مبررلك اللي قلته يومها لأن غلط ميه في الميه ومالاش مبرر..لكن بنقولك اني علاش قلته..اني كنت ملاحظ معاملتك لصفاء في البدايه ومابيتش ندوي لانها لاشكت ولاتكلمت..ولماعرفت اللي صار فيها عقلي ماجابش خير فهمت غلط ولخبطت الدنيا في بعضها..
عواطف ودموعها في عيونها..
/حتى لو كانت نفسيتي تاعبه من اللي صار فيا لو شفت منكم تقدير وجبر خاطر ماكانش هدا حالي..اني ماريتش التقدير غير من بنيه صغيره ليها اربعه شهور معانا بس..قدرت وضعي وعاملتني احسن معامله..واني متأكده مليون في الميه ان هي اللي خلاتك تجي تعتذر لأن هادي مش طبايعكم خوتي..
اشرف غير نظره عنها وهو محرج..
مسحت دموعها وقالت..
/ع العموم مش مشكله ماصارشي..متعوده مش جديد عليا.
ولفت وفتحت الميه وولت تغسل في الماعين..
تنهد وقال..
/باهي بعدين وتي روحك بنطلعكم لجردينة ***** وماتقولش مش ماشيه كان مامشتيش انتي ماماشي حد..
ومشي طلع من الكوجينه..وخلاها تغسل في الماعين وهي تذرف في الدموع..
🍃🍃🍃🍃🍃
"علاش!؟"
مروة؛وراي قرايه وهم مايلتم..
فايزة:ساعه ماديرشي.
مروة :ساعه غير ساعة المشي والجي نلقوا روحنا خشينا ع المغرب وفات النهار..
فايزة عقدت حواجبها وقالت..
/من الاخير مروة شن صاير بينك وبين مناسك..
مروة بإعتباط..
/شن صاير بيني وبين مناسك! شن بيصير يعني!؟ شي..
فايزه؛مالا نوضي بدلي حوايجك وهيا..
مروة بتذمر:ياماما!..
فايزة؛مش حنصدق ان مافي شي الا لو مشيتي معاي بتسكري راسه بنقعد وراك لين نعرف اللي مدرقتيه عليا..
ناضت مروة وهي تقول بعصبيه..
/باهي تو نمشي..ومشت للدولاب وفتحاته بش طلع منه حوايج..
وامها قعدت تشوفلها للحظات بنظرات شك..بعدين طلعت وخلتها..
هي تأففت بعدين استغفرت ومشت سكرت عليها باب الدار..
🍃🍃🍃🍃🍃🍃
"تغدوا من هني ولموا بعضهم وطلعوا من هني.."
مغليه؛هاللي ينقاللها صفاء فرخة قاعده ماطلعتش الدحيه حطت عيلة الصيد كلهم في جيبها..
خديجه؛متربيه ع ايدين لفعات عيت الواعر كيف تبيها تطلع..
مغليه؛عطيهم سحيقه تسحقهم
خديجه:خلينا من سيرتهم اللي تغم وقوليلي ولد خالتي شن صار فيه؟
مغليه؛مرته اللفعه سكرت راسها ياحوش بعيد عن ماليك يامانوليش..
خديجه؛كاني من خالتي نجيبله وحده تانيه..
مغليه:والله قلتها لخالاتك هدا اللي يربي الاناثي الفاجرات..
خديجه؛كانهي فالحه تجيبهاله اصغر منها ويسكنها في الشقه وخلها هي تقعد في حوش ماليها معلقه لاطايله لاسمي ولاوطا..
مغليه؛وماليها معروفين ناس دقة قديمه يردوها غصب عنها وتقعد خدامه تحت رجلين خالتك..
خديجه؛مش عارفه شن صايرلهم نساوين هالوقت يحمدوا ربي اللي حصلوا من يسترهم رجاله مقومين لامتاعين تلخبيط ولاحرام..غيرهم مش بعقلهم من الصبح لليل وشادين فيهم بإيديهم وسنونهم..
مغليه؛سيورهم يندموا اللي تتكبر ع نعمة ربي تريح منها وتكمل عمرها نادمه بعدين..
وتخش عليهم نجاه وهي تقول..
/السلام عليكم..
ردوا عليها السلام..
مشت صافحتهم بعدين قعمزت في كرسي بروحها وهي تقول..
/شن رايكم في لمة امس!؟
خديجه؛مافيش حاجه عليها القيمه..
نجاه؛انصدمت بصراحه توقعت دير مهرجان وليد وجاباته ع كبر..
مغليه؛راجلها حالته الماديه عاديه راهو..
نجاه؛مش مفروض ع ماليها!؟
خديجه؛هو ماباش خلاها نص بنص..
نجاه حطت رجل ع رجل وقالت..
/مش عارفه بصراحه كله دون المستوى..
مغليه؛هي شكلها ادينت ماداروش اغاني في الصاله..
خديجه؛ايه ياحنه قالوا بدت تلبس في الخمار..
نجاه:لكن لاحظتي كيف سلفاتك مع نجاح دايرات حزب عليك انتي وابتسام..
مغليه:والله جيت بنقولها بعدين قلت بالك اني فاهمه غلط..
خديجه برفعة حاجب..
/هديكا اللي اسمها سميره طلعت وجهها الحقيقي..
نجاه:ناقمه عليك هلبه..
خديجه بإبتسامه مكر..
/جايتها قهرة جديده..
مغليه؛لالا! راك تقولي راجلها خدي التالته..
خديجه بضحكه..
/لالا..ابتسام حامل..
نجاه؛اها..بتبدالها بالجو..
خديجه رفعت حواجبها ونزلتهم وقالت..
/ابتسام مش ساهله..
مغليه؛ان شاء الله تسحن كبدها...حلوة !هي اللي سلمت في راجلها بروحها علاش دير فالجو هدا توا!؟
خديجه؛عبيتر وخلاص..
تنهدت نجاه وقالت؛راما جت معاك؟
خديجه؛لا قالت عندها قرايه..
نجاة:لاحظتها معاش تجي هلبه هني..
خديجه؛لاهيه بقرايتها معاش تطلع بكل..
مغليه؛ربي يفتح عليها وينجحها بنيتي.
خديجه؛آمين..
ونجاه تشوف لخديجه بنظرات تبان عاديه لكنها تخفي مكر الله به عليم...
🍃🍃🍃🍃🍃
وتوصل فايزة بسيارتها لحوش اهل مناسك..
نزلوا هي وتاله ومروة اللي تجر في رجليها جر..
لما جت فايزة بتضرب الجرس..
انفتح باب الحوش وطلع مالك ويشوفهم اللهفه بانت في عيونه..تاله شافت لأختها...
ومروة نزلت عيونها وع وجهها ملامح الكره..
مالك وخر عن الباب وقال..
/تفضلي خالتي خشي..
فايزة:يزيد فضلك..كيف حالك ولدي..
مالك :الحمد لله..تفضلي..
خشت فايزة وبعدها خشوا بناتها..
وعيون مالك مافارقوش مروة لين خشت..بعدين قدم وسكر الباب وهو مبتسم..
🍃خشوا للحوش واستقبلوهم خوات مالك..
رفعوهم للصالون الارضي اللي كان معبي بالنساوين من الاقارب والمعارف وفوزيه في وسطهم..
مشتلها فايزة وسلمت عليها سلام حار وتحمدتلها ع السلامه..
وبعدين سلموا عليها ومشوا قعمزوا ..
مناسك وهي وسط بنات العيله كانت تشوف لمروة بضيق..
ومروة كأنها مقعمزه ع شوك...
فايزة كانت تراقب فيهم ..اما فوزيه هدا وين ركزت عليهم وفهمت ان اللي صار في مناسك ع خاطر مروة واستنتجت ان مالك هو السبب..وولى في قلبها خوف لو مالك دار تصرف غلط مع مروة...
🍃فاتت دقايق ورا بعض لين عدت ربع ساعه..
ناضت بعدها مناسك ومشت لمروة وقالت..
/تعالي شويه..
مروة شافت لأمها لقتها تشوفلها..
انجبرت تنوض..
مناسك؛تعالي..وخدت يدها ومشت طلعت بيها منها مت الصالون لين تباعدوا عنه..
جبدت مروة يدها وقالت بحده..
/شن تبي..
مناسك بضيق..
/مروة علاش تبيني نخسر صحبتنا ع خاطر شي اني ماليش علاقه بيه!
مروة:اني قتلك قبل معاش نبي نعرف منكم حد..
مناسك؛اعتبري مالك مش موجود كأنه مش خوي..
تنهدت مروة وقالت..
/لو قعدنا صحاب الدوة اللي طلعت عليا بتثبت..وغير هكي بنقعد نشوف خوك نبي ولامانبيش ومرات هو يتأمل في حاجات مستحيل تصير..
مناسك؛باهي علاش ماقلتيش امك!؟ علاش خليتيها تجي وانتي معاها!؟
مروة ودموعها في عيونها..
/تعرفي يامناسك امي لو تعرف مرات من صدمتها تصير فيها حاجه..انتي تعرفي كويس علاش خلت صفاء تتزوج وهي تقرا ولا!؟شفتي الخوف اللي عاشت فيه وقتها ولا!!؟ راهي مراة ربت تلاته بنات من غير راجل لاخو لابو لاولد هي كانت هادوا كلهم..دارت اللي تقدر عليه بش تربينا احسن تربيه وتحافظ علينا وماتخلي حد يوصل فينا..ياريت نقدر نحكي ع كل شي شافاته امي في حياتها ع خاطرنا..عرفتي حجم الغلطه اللي دارها خوك توا!!؟
مناسك ودموعها ينزلوا..
/مش عارفه شن نقولك..سامحيني هدا اللي نقدر نقوله..ياريت عرفتك في ظروف تانيه ياريت..
مروة مسحت دموعها ولفت ومشت بصمت ولت للصالون..
اما مناسك مشت ركبت لدارها وهي تبكي...
🍃🍃🍃🍃🍃
وفي وسط سحر الطبيعه الخلاب..
كانوا الاقحوانتين يتمشوا وهما يتأملوا بنظرات عيونهم اللي بان فيها ابداع الصنع الرباني زي مابان في الطبيعه اللي حواليهم..
طوبى:الله يبارك..حلو المكان قنوشتي صح؟..ياريت لو ينسونا هني ومعاش نروحوا بكل..ضحكت بعدين قالت..شوفي البطات محلاهم..بطة كبيره وبطوطات صغار زي بنتي..
وعيون جنه الزرق يشوفوا لهالكائنات الغريبه عليها بنظرات استكشاف..
طوبى بدهشة : ارانب! ياوخيتي محلاهم!
وقفت في مكانها ومابتش تقرب بش ماتفجعهمش..وقعدت تتأمل فيهم وهي تقول..
/محلاك ياربي..كل شي حلو تشوفه عيني تخليني متشوقه لشوفتك..كان اللي خلقته حلو هكي مالا انت كيف..سبحانك..
تكلمت جنه بلغة طفوليه..
طوبى بضحكه:تبي تشديهم ياكركوبه..لالا خليهم في حالهم وتعالي نمشوا نشوفوا شن في تاني..
وقعدت تمشي طوبى وهي تسبح من الجمال اللي تشوف فيه حواليها..
لعند مابانت عليها مساحة كبيره مزروع فيها فراوله...
طوبى بإبتسامه؛هادي الفرواله..بس شكله وقتها مازال..
قعدت تتفرج عليها للحظات بعدين كملت تمشي وهي مدهوشه في كبر المزرعه...
ماكانش فيها فراوله بس..حتى شجر تفاح..ومزروع فيها الشمام والبطيخ"الدلاع" طوبى ماعرفتهمش لأنهم مازال مااثمروش..
ولت من وين ماجت..لين وصلت في مشتل الورد اللي حكت عليه صفيه...
وقفت وهي تتفرج عليه من برا...معبي ورد اشكال الوان بس الزهرة المفضله عندها مش موجوده..
كان خاطرها تخش...وخشت..
وانبهرت باللي شافاته..من كل جهة في نوع ورد مختلف..
كان في حتى المتسلق زي النسرين..
طوبى بإنبهار:الله يبارك!!.. ياربي اني كيف بنروح من هني!!؟
شافت لبنتها وقالت..شن رايك وين يجوا مروحين نلبدوا اني وياك في مكان هني وينسونا..اها قولي شن رايك..
تكلمت جنه..وهي قالت بضحكه..ياعمري اني..وباستها من خدها بقوة بعدين قالت..هي خل نطلعوا...
🍃وطلعت من المشتل وهي مازال تتمشى لين شافت جذع شجره كبير طايح..بس كان جاي في مكان مخليه داير زي الديكور...
مشتله وقعمزت عليه..وقعدت تتفرج ع الارض الخاليه اللي قدامها وكلها خضار...
طوبى:حاسه روحي شفت ياماما..تخيلي ماما مكان في الدنيا زي هدا القعده فيه لساعات تجلي الهم..مالا الجنه كيف!
شن نحسوا لو خشينالها!؟..هو قال فيها مالا عين رأت..ياربي..
ابتسمت بشوق وقالت..كل مالي نتشوق نشوفك انت اكثر من أي شي..رفعت عيونها فوق وع وجهها نفس الابتسامه وقالت..
...سبحانك...
"انتوا هني واني ندور عليكم!"
التفتت وضحكت لما شافت اريج جايتهم..
وصلت فيها وقعمزت وهي تتفرج ع المكان وتقول..
/مش عادي..
طوبى:المزرعه كلها مش عاديه ماتوقعتش نشوف مكان في ليبيا حلو هكي..
اريج:في في ياما في..انتي كان تشوفي شن في الشرق شن تقولي..
طوبى:ماريتش غادي الا بنغازي مدينه زيها زي طرابلس..وان شاء الله يجي يوم ونمشي لغيرها في الشرق..
اريج؛إن شاء الله..تنهدت بعدين قالت..كبيره هلبه المزرعه الله يبارك..
طوبى:ايه..
اريج؛بس تعرفي..مستغربه في حاجه..
طوبى شافتلها وقالت..
/شن هي؟!..
اريج؛في ان التارقي شراها..
طوبى لما جت سيرته قلبها بدي يدق بقوة بس دارت روحها عاديه وهي تقول..
/كيف يعني مافهمتش!؟
اريج؛ماقالوش عمته وبنتها انه ناوي يشريها..
طوبى:بالك ماكانتش خاطره في باله الفكره..
اريج:هدا قصدي..يعني..انتم قدامهم قلتوا خاطركم تشوفوها وبعد وقت هو يشريها ويقول نبيكم انتم اول من يخشها..وفوق هكي نجوا ونلقوه مامخلي ماجايب فيها..قصدي هدا كله ماخلاكش تستغربي!؟
طوبى توترت من كلام اريج بس ردت عليها تقول..
/عادي ..هو ديما يجيها ويجيب في اهله معاه..اكيد فكر يشريها من وقتها..وبعدين انتي تعرفي ان حني زي اهله ف طرابلس ويعزنا هلبه..ومرات زي ماقلتي هما وصلوله ان خاطرنا نشوفوها وهو من طيب اصله عزمنا عليها..
اريج بإبتسامه:تمام..حني مانختلفوش ع انه كريم ويعزنا وديما يتعامل معانا بطيب اصل..لكن تحسي ان اللي يدير فيه معانا مبالغ فيه شويه لو ماكانش وراه سبب..
طوبى هني عقلها ماجابش خير..من التجربه اللي مرت بيها انعدمت ثقتها في الناس اللي تظهر الجانب الكويس فيها..بس بعدين رجعت هالثقه لكن مش بشكل كامل..قعد في معاها خوف..ولما سمعت كلام اريج الاخير عن التارقي خافت وقالت..
/لاعاد استغفر الله العظيم..كيف بديت نصدق ان في ناس مازال فيها خير..باهي زعمه شن يبي!!؟
اريج بضحكه؛فهمتي غلط ياهمي مش هدا قصدي..اني قصدي شي تاني...
طوبى؛باهي قولي اللي عندك طول وفوتي التلميحات..
اريج:باهي..من الاخير حاط عينه ع حد..
عقدت طوبى حواجبها بإستغراب وقالت..
/كيف!؟
اريج؛حاسه ان اللي يدير فيه..ع خاطر عيون حد..يعني لما عطي حسين مفاتيح المزرعه وقاله نبيكم اول من يخشها وكأنه يوصل في رساله..
طوبى قلبها رجعت تسارعت دقاته وهي تفكر في كلام اريج..
بس يعني زعمه مني!! هي مستحيل! مستحيل اي راجل يعرف اللي هي مرت بيه يفكر فيها..اللي يبي يستقر مستحيل يفكر في مراة حياتها كلها مشاكل وتوتر...وهو شاهد ع كل شي عاشاته..ممكن لو يحس اتجاهها بشي مش حيكون اكثر من التعاطف..بس لو مش هي من تكون!؟ من تقصد اريج!
"واخيرا لقيتكم"..
التفتوا الزوز لمصدر الصوت..
كانت اميمه..
طوبى وهي تشوفلها قالت في نفسها..
"ايه صح..علاش لا!؟ حتى لو كانت مطلقه بس مافي شي في حياتها منغص عليها حتى طليقها خلاها في حالها وعاش حياته..غير هكي اميمه مازال اجمل مني وجذابه ومثيره للإعجاب وتنحب بسرعه..ايه صح ممكن هو لمح بالزواج قدام حسين قاصد اخته لكن حسين مافهمش عليه!...اصلا علاش يعطي لحسين المفاتيح ويقوله نبيكم اول من يخشها..هو يجي للشارع هلبه وديما مرافق جدي كان اولى يعطيهم لجدي..بس هو قصد يعطيهم لحسين يبيه يفهم عليه"
قعدت تبع في اميمه بعيونها لين جت وقفت عليهم..
اميمه بإبتسامه؛هي نوضوا معاي درنا تقعميزه مش عاديه وعمتي دير في الشاهي..
اريج بحماس:الله!عاله في هالمكان البديع..
وناضت وطوبى ناضت ببنتها..
اميمه مشت وهي تقول..
/قداش يهبل المكان..
اريج؛كيف كنا نحكوا عليه اني وطوبى..
خلتهم يمشوا قدامها وهما يهدرزوا..
وهي قعدت مركزه بنظرها ع اميمه..كانت حاسه اتجاهها بشعور مزعج...بس في نفس الوقت فرحتلها..وقالت في نفسها..
"تستاهل كل خير....لكن اني علاش مضايقه هكي!؟"
هربت من اجابة السؤال وغيرت نظرها عن اميمه..رفعت بنتها وهي تشوفلها..ابتسمت بحب ممزوج بالحزن..بعدين باستها وضمتها لحضنها....
☘☘☘☘
وصلوا في المكان اللي قالت عليه اميمه...
كان تحت شجرة كبيره..
مفرشين حصاير..ودايرين العاله..ومقعمزين حواليها وهما يهدرزوا..
هاديه وهما جايات شافت لأميمه وقالت بضحكه..
/الله يبارك وين نشوف وجه ربيبتي يبان عليا حظها حلو..
ضحكت اميمه..وطوبى شافتلها بإبتسامه فيها شي من الضيق..
مطيره:وتقولي مش شباحه!
ضحكوا..
هاديه بضحكه؛احساس والله احساس واصلني من شوفتها..
قعمزوا البنات وفردوس قالت..
/لكن الحق الحق احساسها ديما صادق..قالت بنت فايزة حامل وطلعت حامل..وقالت اريج والاء بيعرسوا مع بعض وصار..
مطيره؛وقالتلي معاش طولي..وينه العريس قوليلي!!؟حي عليك كان مايطلع قصدك حاجه تانيه غير ماتبيش تقولي!
بنات خوتها قالوا مع بعض..
/بعيد السو..!
هاديه بضحكه؛لاوالله ماهكي..لكن زي ماقتلك هو احساس يخيب ويصيب..
غرفه:باهي اني لما تشوفيني ماتحسي بشي..
هاديه بضحكه:الحق لا..
آلاء؛واني..
هاديه:انتي سبحان الله تقول ربي خالقك بش تعيشي مرتاحه..الله يبارك ملامح وجهك وين نشوفهم هكي نحس..
فردوس بإبتسامه؛الله يبارك.
الاء بضحكه:الحمد لله..
اريج:واني!؟
هاديه:انتي شخصيتك قويه نحس فيك مهما ريتي في حياتك تتخطي فيسع وتعيشي..
كلهم قعدوا يشوفولها بإبتسامه..ماعدا نبيله اللي جي بين عيونها يوم طلاقها هي ونضال حست وقتها ان اريج مستحيل تحب حد بعده..
اريج بإبتسامه رضا:الحمد لله..
مطيره؛باهي وطويبه..
هاديه حافظت ع ابتسامتها بقوة وين شافت لطوبى وقالت..
/ديما نحس ان ربي يحبها..
ابتسمت طوبى بفرح وقالت..
/ان شاء الله..
مطيره؛مافيش احلى من هكي..
غرفه؛ع العموم اكتشفت ان احساسك مضروب لأنك شفتيني وماعرفتيش اني حامل..
ضحكوا..
وطوبى بدهشه قالت..
/بالله.!
غرفه بضحكه؛والله..وان شاء الله تجيني بنوته زي جنيوه..
مطيره؛ماضاله الا جايه زيك انتي طير وطير وتيبس الريق..
ضحكوا..
غرفه؛الله غالب عمتي وتعودت ع لسانك..
نبيله بإبتسامه:تحلي عويناتك ع خير..
مطيره؛قداش ليك!؟
غرفه؛قولي شهرين..
هاديه؛خل نحسبلك بالجدول الصيني ونتوقعوا شن يطلع..
وقعدت تسأل فيها مجموعة اسئله وغرفه تجاوب..
وهما مركزين معاهم..
هاديه:والله اعلم..وليد تاني..
غرفه بضيق:لالا ياربي..
مطيره؛قولي الحمد لله غيرك يتمنى فيهم ومش محصلهم..
غرفه:الحمد لله ماقلنا شي بس خاطري في بنوته..
فردوس:اللي يجي من ربي يامحلاه..
طوبى بضحكه:احسن خل تقعد جنونه دلوعتكم الوحيده..
غرفه بأبتسامه:وكان نجيب عشرة مافي وحده تجي بغلاوتها كنتي..
نبيله؛يابختها بهالعزوز..
غرفه:زي بختي بحماتي العسل..
ضحكوا...
وكملوا هدرزه وفتحوا هلبه مواضيع وحتى الوضع السياسي تكلموا عنها وختموا كلامهم بدعاء..
"ربي يكفينا شر الحرب"
🍃🍃🍃🍃🍃
وفي طرابلس..
في جردينه حلوة..كانوا مقعمزين..
نجمه وصفاء وعواطف ومعاهم اشرف والحاج ادريس.
يشربوا في الشاهي ويعدوا بيه في المشلتت والسفنز مع الهدرزة الحلوة..
في الاول عواطف كانت ملتزمه الصمت بس بعدين انطلقت معاهم وقعدت تهدرز بإنسجام..
🍃وتروح فايزة من حوش اهل مناسك وعقلها يفكر في اللي صاير بين بنتها وصاحبتها...
☘وفوزيه مااستنتش سألت بنتها طول..
مناسك بحزن؛خلاص تقاطعنا..
فوزيه بصدمه؛علاش اللطف! راك تقولي مالك داير حاجه!
مناسك ودموعها في عيونها..
/ايه..
فوزيه بغضب..
/هدا اللي كنت خايفه منه..نحسابه تعدل وتغير حاله لكن مافيش فايده..
قعدت مناسك ساكته وهي مضايقه لأبعد حد..
🍃ومالك في هالوقت..
درس قدام معرض سيارات يملكه صاحبه عبد المعين..
صاحبه اللي من لما عرف باللي داره مع مروة لاعاد جاه ولاكلمه.
..خش للمعرض وهو يشوف فيه كيف مقعمز ورا المكتب يشوف للاب توب قدامه بإهتمام..
وصل فيه وقال؛السلام عليكم..
رفع عيونه وشافله بنظره وجعت مالك..
مالك؛نطلع!؟
معين رجع نظره للاب توب وقال..
/قعمز..
قعمز مالك وهو يشوفله بضيق...
وخر معين عن اللاب توب وشافله وقال..
/شن جو؟
مالك؛تكلم فيا بالسيف..
معين:تبي الحق ايه..لعند توا مش مستوعب اللي درته..
مالك؛يعني بنخسرك حتى انت..!
معين تنهد وقال؛اني وياك صحبة عمر..خسارتك مش ساهله..لكن مضايق منك..في نفسي حاجه عليك كلمة البنت قاعده ترن في وذني لتوا..
"كان ترضى اللي داره فيا في اختك عطيهاله.."
اني من ثقتي فيك نأمنك ع خواتي بس بعد عرفت اللي درته في بنيه زي هادي بديت نخاف منك عليهم..
مالك بضيق..
/لاعاد مش لهالدرجه!..
معين:لالهالدرجه واكثر..هو لو درته لبنت ماتنفعش مانرضاشي يابال لبنت زي ماقلت عليها متربيه ومحترمه وفوق هكي يتيمه والدنيا جايه عليهم..والاسوأ من هكي انك درته في جرة وحده ماتسواش..
مالك بضيق:وقتها كنت نبي اسما تلين معاي وتجي في طوعي..
معين:فاهم عليك..وعارفك وانت تعرف ان الجو اللي كنت عايش فيه مش عاجبني..ايه صح اني صاحبت بنات ع قد شعر راسي لكن ماغلطتش مع ولا وحده فيهم..لكن انت تعمقت هلبه في الغلط ياصاحبي لين وصلت لهني...اهو شوف ربي حط في طريقك بنيه محترمه خلاتك تحبها وبسبب طيشك مش حطولها..
مالك بأسف شديد..
/تعرف..كانت تقول لأختي اني نحترم فيه لأن بادي يصلح من روحه..الراجل عندي هو اللي يعرف غلطه ويقدر يصلح من نفسه..
عقد معين حواجبه وقال..
/لاحول ولاقوة الابالله..والله تستاهل العزي انت ..
مالك بإبتسامه حزن..
/نقبله ياصاحبي..لكن نقولك ع حاجه ممكن ماتصدقهاش..نحمد ربي اللي حطها في طريقي..من لما عرفتها تغيرت حياتي كلها وخلتني عشت راحه عمري ماحسيتها..خلتني لاول مرة في حياتي نرضى عن نفسي..
ابتسم معين وقال..
/تصدق..لو منك نحارب ع خاطرها ندير المستحيل..بنات الناس ولوا عمله نادرة ياصاحبي..
مالك ابتسم بأمل وقالت..
/تتوقع تغير موقفها!؟
معين:هو صعب شويه لكن مش مستحيل..في النهايه هي بنت امتى تشوف حد يحبها بجديات وشاد فيها تلين..
مالك تنهد وقال..
/ان شاء الله ياصاحبي ربي يسمع منك..
معين بإبتسامه وهو عاقد حواجبه..
/لكن ربي يصبرك ع طول لسانها لو تطلع في طريقي وحده زيها نتعامل معاها بالكفوف بس.
مالك بضحكه؛انت ان شاء الله ربي يطيحك في وحده لاتهش ولاتنش بش تعرف تعيش معاك..
ضحك معين بعدين قال..
/تمشي لصالة شعيب!؟
مالك؛قداش ليا عليه..هيا نوض..
سكر معين اللاب توب وخداه وناض وهو يقول..
/قدامي..
ومشوا الزوز مع بعض وهما يهدرزوا عن اخر اخبار ولاد يعرفوهم يجتمعوا بيهم في صاله الالعاب متاع شعيب...
🍃🍃🍃🍃🍃
ملتمين حوالين اميمه اللي كانت شاده تليفونها بالعرض وتكلم في امها فيديو..
"ليا توا قريب شهر ماريتها بين العلاج الطبيعي والنفسي وفوق هكي حاستهم مايبوهاش تشوفنا هالفترة"
طوبى بقلق:علاش!؟
"مش عارفه وين ننشد يوسف يقولي علاجها هكي يبي"
اميمه؛اكيد خايفين تعرف شي يأثر في نفسيتها..
"شكله هكي"
مطيره:باهي شن يقولوا عن حالتها في تحسن؟..
"ع كلام الدكتورة الليبيه ايه..قالت هي قويه وقاعده تقاوم"
ابتسمت طوبى وعيونها تعبوا دموع..
مطيره بإبتسامه؛هادي سديره..
غرفه بحسره:خساره..قبل ناويين نمشولها..
كلهم وجهوا نظرهم ليها بمفاجأة ..
"مافيش فايده من جيتكم توا" .
طوبى بشي من الضيق:كان هكي باهي ليها معليشي نصبروا..
☘وبعيد عنهم شويه..
آلاء كانت مقعمزه تحت المظله تتكلم بالتليفون...
/ايه كلنا..
"وين زردتكم"
شافت آلاء جهة عيلتها وقالت..
/في منطقه قريبة من جود الدايم..
"اها..تمام..المهم انتي شن امورك شن استعدادتك مش ناقصك شي ماتبي شي!؟"
آلاء:لاحبيبي نبي سلامتك بس..
"تمام براحتك بس حتجيك قريب هديه وان شاء الله تعجبك"
ابتسمت وقالت:اي شي منك يعجبني..
"حبيبة قلبي..خلاص نخليك تستمعي بالاجواء..اها ايه حقه قبل لنسكر..قولي اني وين ومن معاي؟"
آلاء بإستغراب:مش خاطر في بالي شي..
"تمام تو نقولك..اني في ******* ومعاي معتز"
هي بفرحه قالت..
/صار في تاجورا!؟..
"يس..يللا نخليك توا ونشوفه شن يدير سلام حبيبتي"
الاء بإبتسامه؛سلام..ونهت المكالمه وناضت بتولي للباقي..
بس في نص الطريق جاها اتصال.
لما شافت المتصل ضحكت وقالت..
/وأخيرا..
وغيرت طريقها وردت ع المكالمه...
🍃🍃🍃
"ايوه عمر ولدي"
هادي مغليه ردت ع مكالمه جتها من عمر وهي فاتحه السماعه وحداها خديجه ونجاه يسمعوا...
"امي شن حالك وشن حال بوي"
مغليه ودموعها ينزلوا..
"الحمد لله ولدي الحمد لله..شن حالك انت وشن حال خوك"
نزلوا دموع نجاه..
"الحمد لله قاعد ماشي كويس في العلاج"
رشفت مغليه وقالت..
/شن يقولوا الدكاترة!؟..
"يقولوا في كلام كويس يام وان شاء الله كل شي يولي تمام"
مسحت خديجه دموعها وقالت..
/ان شاء الله..باهي شن صار في خدمته رتبتوا الوضع!
"ايه كله تمام ماتخمموا في شي"
خديجه وهي تشوف لأمها كيف تبكي قالت..
"باهي الحمد لله"
🍃وانهارت مغليه لما جت سيرة نضال..الجالي وان واجعها حالها اكثر من باقي ولادها..لكن نضال ولى زي الحسرة في قلبها..نضال مقرر معاش يولي هجره معاش في بعدها رجوع واكيد لو فكر يزورهم مش حتكون زيارته قريبه🍃
حاولوا يهدوها خديجه ونجاه..وهدت بعدين دخلتها بنتها لدارها وقعدت معاها لين رقدت..
وقبل لتروح وصت عليها نجاة...
خديجه:كان فيها كيف باتي حداها انتي والصغار..
نجاه:حاضر..
خديجه؛تصبحي ع خير..وفتحت الباب وطلعت..
ونجاة وهي تسكر وراها في الباب شافت المهدي خاش..
ردت الباب ردان وقعدت وراه..
فكرت انهم ممكن يتكلموا عن وضع الجالي ويقولوا شي هي ماتعرفاش...
🍃خديجه:باهي اللي تلاقيت اني وياك..
المهدي عقد حواجبه بإستغراب..
خديجه؛خش مرة مرة واقعد حدا امك ولاخودها وطلعها ولاحتى سفرها تغير جو..
المهدي:مش محتاج حد يوصيني ع امي بعدين اني الفترة هادي مشنوق في الخدمه حتى صغاري معاش نشوف فيهم..
خديجه بشي من الحده..
/تقدر تفضي روحك يامهدي وتلقى وقت للسفر مش صعب عليك..
فهم قصدها من تلميحها ورد عليها يقول..
/امم..حتى انتي تقدري تفضي روحك وتلهي بصغارك شويه..ولدك محمد وضعه مش مزبوط حذرتك قبل وتوا نعاود نحذرك مرة تانيه..ربي صغارك ياخديجه..
ومشي بإتجاه شقته وخلاها تغلي غضبا...فتحت الباب وطلعت وجبدت وراها الباب بقوة..
وتسكر نجاه الباب وهي مبتسمه بخبث...
🍃🍃🍃🍃🍃
بعد ماروحت..حبست روحها في دارها وطرحت كتاباتها قدامها وغاصت في القرايه..
لعند ماسمعت نغمة رساله جايه لتليفونها..
وجهت نظرها ليه..ويتلاحقوا من بعدها الرسائل....
فكرت انها تكون من مناسك او من مالك..
جبدت التليفون بعصبية وفتحتهم..
توسعوا عيونها لما شافت صور لمالك واسماء في سيارته واخدتهم اسماء..الصور كانت فيها تصرفات ماتندارش الا بين المتزوجين..
مروة حست بشعور بإشمئزاز رهيب...
نزلت عيونها لرساله مكتوبه وصلتها بعدهم مكتوبه فيها..
(في أي مرحله وصل معاك)
نزلوا دموع مروة وجسمها كله بدي يرجف...
خطر في بالها تتصل بيها تهزبها
و خطر في بالها توصل فيه هو تمسح بيه الارض..
وياما خطر في بالها..
بس اللي دارته...مسحت الرسائل وحطت رقم في الحظر وقفلت تليفونها وانهارت بالبكي...
🍃وفي هالوقت..
خشت راما لدارها بعد ماجت امها وخدت عنها خوها..
سكرت الباب ومشت ارتمت ع السرير وكملت هدرزتها في قروب ماسنجر مختلط..
كانوا اسماء وصاحباتها من ضمنهم..ومعاهم شباب من بينهم صاحب اسماء الجديد اللي يراقب في رسائل راما بصمت..
كانت راما تنكت وتهدرز مع الولاد وتستخدم في عبارات جريئة..
(ألبي)..(تحفون)..(خشموش)..وماإلى ذلك من العبارات اللي تعلمتهم من الصحبه السيئه المحاوطه بيها..
والشباب عاجبهم جوها وواخدين راحتهم معاها..
فجأه تجيها رساله ع الخاص..
اتفاجئت لما لقتها من صاحب اسماء..
فتحتها..
(بطلي الجو اللي ديري فيه)
في بخوف..
(جو شنو)
(ماتاخديش راحتك معاهم )
(وانت شن دخلك)
(اني اللي دخلي..مانبي حد يكلمك ولاانتي تكلمي حد غيري اني)
من الصدمه ناضت قعمزت..
عاودت قرت الكلام اكثر من مرة ومازال مش مصدقه..
(انتي عاجبتيني هلبه)
بدت تكتب وهي ترعش..
(واسما)
(شن جابها ليك بس..مانبيش ندوي عليها..المهم انتي عندي غير..غير في كل شي مهبلتيني راك)
نزلت التليفون وبدت ع وجهها ملامح ابتسامه مفاجئه..
صاحب اسما هدا وسيم هلبه وفي حواليه معجبات حاسدين اسما عليه..وطبعا هو من النماذج اللي تليق بأسماء وامثالها..
وبالنسبه ليه راما صيده مغريه جميله ودلوعه وفيها شويه سذاجه....
مابتش ترد عليه سكرت النت قصدا..
وعاودت قرت كلامه وهي فرحانه بروحها وكأنها دارت انجاز!
🍃🍃🍃🍃🍃
وتعدي الساعات ع الموجودين في المزرعه...
وهما في قمة السعاده والراحه النفسيه..
الرجاله داروا جوله في المزرعه وكانت حديثهم متشعب حول المزارع واصحابها...
☘اما عند النساوين فكانت الاجواء مجنونه نوعا ما..
مقالب وجري وضحك...
اريج فضحت الاء قدام عزيز لما كانت تكلم فيه حطتلها صغير بط في حضنها..وفجعتها وخلتها تعيط..ولما استاقظت سكرت ع خطيبها وطلعت تجري ورا اريج لين حصلت عليها وضربتها وهي تقول..
"خلتيني نعيط في وذنه ياحقيره"
وهما يسمعوا فيها ويضحكوا...
ماكانتش المقالب من نصيب الاء بس..
هاديه كانت تكره الحيوانات وماتتحملش يقربوا منها او يمسوها..
ومطيره شدت واحد من الارانب وقعدت تجري في جرتها بيه وهي تعيط ع طول حسها..لين تحامت بأميمه..
ويطب عليهم الحاج علي اللي هزبهم بعد ماسمع صوت العياط..
وهما ولاكلمه...ومجرد مامشي وخلاهم انفجروا ضحك...
☘بعد صلاة المغرب..
بدوا الرجاله يديروا في الشواء..ونساوين يديروا في السلايط..
اما البنات كل وحده هامت في العالم متاعها..
الاء واريج يكلموا خاطبيهم..
واميمه لاهيه بفيديوهات عمليات جراحيه في تليفونها..
اما طوبى بعد مارقدت بنتها..
قعمزت تحت المظله بكراسة رسمها.. وبدت ترسم في المنظر اللي تشوف فيه ..
بداية الليل والقمر طالع...المنظر من عندها لمد بصرها قعدت ترسم فيه بشغف...
فاتت مايقارب الساعه وهي مش حاسه بالوقت..
لين كملت..ركزت فيها كويس عجبتها...بعدين غيرت نظرها للمكان وتنهدت بإبتسامه...
رجعت شافت للدفتر وقلبت الصفحه اللي بعده..قعدت تشوفلها للحظات..بعدين قلبت الصفحات بالعكس..لين وقفت عند رسمه قاعده في البدايات..
كانت ليه هو.. بالعمامه "الشاش" مقبل ع الجنب وعيونه للارض وهو مبتسم....
ابتسمت بإمتنان..وانشغلت بيها بش تكملها...
🍃وهو في البر مع صحابه ماقدرش يستمتع بالأجواء بسبب الم جرس العقل"ضرس العقل"عبد القيوم وهو متألم ومعصب في نفس الوقت..
/سيبت السنون كلهن وجت لضرس العقل!
صاحبه وهو يضحك:هاك امسك هذى مسكن يخفف الألم..
خداه وبلعه طول وشرب بعده ميه بعدين قال..
/غير نرد من جذروها..ومثل بإيديه وكأنه يخلع في حاجه وكان معصب ع الاخر..
وصحابه هاربين بضحكاتهم منه..
شويه جاه اتصال..قام تليفونه بعصبيه شاف المتصل لقاه حسين..
فتح الخط وقال..
/هاه..
"وعليكم السلام ورحمة الله وبركاته"
عبد القيوم بنفاد صبر..
/ننقاني ماني متحمل روحي ياحسين شن تبي تقول قول بسرعه..
حسين ضحك وقال.
"السوسه صح!"
عبد القيوم وهو يهز في رجله بعصبيه
/امممم..
"خسارة قبل متصل بيك بش نهزبك ع اللي دايره لكن يقولوا الباب اللي يجيك منه الريح.."
وسكر عليه..
عبد القيوم غمض عيونه بعصبيه بعدين فتحهم ونزل التليفون وهو مازال يهز في رجله من الألم..
وقعد ع هالحاله لعند مابدي ياخد المسكن مفعوله...
🍃🍃🍃🍃🍃
تاني يوم...
كان مايقلش جمال عن اليوم اللي قبله في المزرعه..
اجواء عاشوها خلتهم مايتمنوش يروحوا..
بعد العصر لموا حاجاتهم استعدادا للمرواح...
☘"هيا ياطوبى سقدي"
طوبى بإستعجال:هيا هي..
لبست جنه جاكيتها وحطتها في البطانيه وخدتها وطلعت بيها بسرعه...
ومن الفرفشه..نست مسبحتها وتوكه جنه ع الكامدينو...
🍃طلعت برا لقت مطيره تراجي فيها..
مطيره:وينك هدا كله!
طوبى:جنه بزعت حليب ع حوايجها غيرتلها..
مطيره وهي تشوف لجنه؛سلامتها هالبطشه..
ضحكت طوبى..
ووصلوا في سيارة حسين وركبوا...
ولحظات وطلعوا سياراتهم ورا بعض من المزرعه...
🍃🍃🍃🍃🍃
الاحد..
3مارس..2019..
وبدي العد التنازلي..وخلاص اقل من 15يوم يفصلوا عن عرس بنات فردوس...
وقفوا الزوز قيدهم اليوم..ووقفوا خدمه بش يلهوا بتجهيزات العرس..
🍃واميمه فهاليوم طلعتلها نتيجة امتحان الزماله اللي مرت فيه بعدة مراحل وتكللت بالنجاح...
كانت طالعه من المصحه بسرعه متوجهه لسيارتها اللي درستها في ع الطريق مقابله المصحه..تبي تروح وتبشر احبابها وجه لوجه...
وهي ماشيه بتقص الطريق تجيها سيارة مسرعه..
لما شافتها من الفجعه رجليها فشلوا..
سمعت صوت صراخ هناء كان هدا اخر ماسمعت وبعدين ظلمت الدنيا فجأه...
🍃🍃🍃🍃
"دكتورة"
سمعت صوته وهي متقيه وجهها بإيديها..
"دكتورة تسمعي فيا"..
فتحت عيونها وبعدت ايديها وشافتله وقالت بخوف وفجعه..
/شن صار!؟
عبد القيوم:ماصار شي..
جتها هناء تجري ومعاها خالد..
هناء ضمتها من الخوف..
خالد شاف لعبد القيوم وقال...
/كان مش منك راهو رفعتها معاها بارك الله فيك
عبد القيوم عقد حواجبه وهو يشوف للطريق اللي مشت منها السيارة..
/فيك بارك الله..
تباعدت هناء عن اميمه وقالت بقلق
/شن اميمه!؟
اميمه وهي ترعش..
/كنت مركزه في الطريق مش عارفه منين طلعت!
عبد القيوم سمع كلامها بدون مايشوفلها وهو يفكر.
وخالد كان يدور في عقله اللي يفكر فيه عبد القيوم..
هناء:خلاص تعالي خشي داخل..
وخدتها ومشت بيها لباب العياده..
التفتت اميمه وقالت..
/شكرا..
عبد القيوم رفع يده يحيي فيها بدون مايرد..
لفت وجهها القدام ومشت مع هناء..
عبد القيوم؛مقصود اللي صار.
خالد؛لاحظت السيارة طلعت فجأه..
عبد القيوم:لازم نخبر خوها.
خالد؛تعرفها!؟
عبد القيوم؛جيران..
خالد هز راسه بصمت..
وعبد القيوم تباعد عنه واتصل بحسين..
🍃🍃🍃🍃🍃
في الصاله مقعمزه وهما حواليها يسمعوا فيها بقلق..
اميمه وهي مازال خايفه..
/طلعت بنمشي لسيارتي كانت مدرسه في الطريق المقابله مالقيتش وين ندرسها زحمة سيارات اليوم قدام المصحه..اني متأكده قصيت الطريق بعد ماشفتها كويس السيارة هادي من وين طلعت مش عارفه..معاش قدرت نتحرك لما شفتها جايتني حدي غميت وجهي وغمضت عيوني ومانحسش بروحي الا واني مسحوبه بقوة حسبت السيارة ضربتني ونطرتني..بعدين طلع التارقي مش عارفه امتى جي وعلاش المهم هو اللي شدني وجبدني من قدام السياره..
مطيره وهي حاطه يدها ع صدرها قالت بفزع..
/ووك عليا ياكبدي..تعالي بنيتي تعالي..
قربت منها اميمه وخشت في حضنها..
فردوس بقلق..
/ربك جاب التارقي في هديكا اللحظه..قال حسين كان جاي يعاين ع سنونه..
آلاء بقلق:غريبه قصة السيارة شويه..
اميمه تباعدت عن عمتها وقالت بخوف..
/اني شاكه في زوز ياقصي الحقير ياوسام السافل اللي كان يخدم معاي في المستشفى..
طوبى بقلق..
/كان هكي خليك في الحوش لين الرجاله يعرفوا اللي صار بالزبط..
مطيره:الله ماعاد طالعتها..
اميمه بخوف:اني بروحي خايفه هلبه..حسبي الله ونعم الوكيل فسدوا عليا فرحتي..
طوبى بتعاطف:الحمد لله اللي جاتك ع هكي ميمو...
اميمه هزت راسها وهي تقول..
/الحمد لله....
#العضيد
#طوبى
....يتبع....
