#طوبى "جنة طوبى"
#جمان_فريد
#الجزء_102"البوم ذكريات"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
(من اكثر الصلاة على رسول الله نور الله قلبه)
الإمام ابن الجوزي رحمه الله...
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "المشاعر التي تغيرت بسبب الإدراك لا تعود المُدرك ليس كالغاضب، المُدرك لا يعود، لا يعود أبدًا" دستويفسكي🍃
______________________________________
تحت الكرمه...
كانوا حاطين مرجوحه جنه..
جنه كانت فيها وهو جنبها يدف بيها ويغني..
🌼طيري..طيري ياعصفورة..انا متلك حلوة صغيرة..
طيري فوق حفاف الزهر..بحجر ع ميات النهر
وبخبي شعري بشورة..
طيري طيري..طيري طيري ياعصفورة...🌼
صوته كان عذب وحلو بالمرة..ومعروف عنه اجمل صوت في العيله بعد وردة..
طوبى في الكوجينه وهي تجهز في الفطور مع هاديه وعمتها مطيره اللي قاعده متأثره بموقفها مع مختار تسمع فيه..
في قلبها كان في خوف كبير من علاقه مختار بجنه..الى جانب خوفها من تصرفاته اللي قاعده تأثر بشكل مباشر ع مشاعر المحيطين كان يلعب بيها بإحتراف..
ولأن خوفها حسسها بشي من الضعف والتردد..غمضت عيونها وخدت نفس..فتحتهم وبدت همسا تردد في ذكر..
"لاحول ولاقوة إلا بالله"...
وكل ماترددها كان الخوف يتبدد شويه شويه وتحل محله قوة كبيره خلت التردد يتلاشى..
خدت نفس مرة تانيه..ابتسمت ابتسامة راحه خفيفه وكملت ترديد الحولقه همسا..
🍃بعد لحظات..
طلعت هاديه رافعه بخشه كبيره"مفرش"..
وهي ماشيه شافت مختار مقعمز جنه ع رجله ومقابلاته سدرة وفاتن وصفيه واميمه..يهدرزوا مع بعض بإنسجام..
وصلت فيهم فرشت المفرش وقالت..
/اقربوا وانت مختار بتفطر ع الطاوله..
رد عليها بإبتسامه هي ردت بإبتسامه مجامله وولت خشت للكوجينه...
🍃ع طلعة طوبى من الباب الدخلاني بسفرة فطور رفعتها لدار المعيشه وين مافي غرفه وصغارها معاهم اريج..
خشت عليهم وهي تقول..
/اهو جاكم الفطور..
وحطاته قدامهم..
غرفه وبنتها في حضنها..
/بتفطري معاهم..
رفعت طوبى حاجبها وقالت..
/طبعا...ولفت متوجهة للباب..
وغرفه واريج معاها بعيونهم لين طلعت..
غرفه بضيق؛ماتقدرش عليه..واحد زي هدا مايقدر عليه كان ربي..
اريج؛في النهايه بدير اللي عليها ماتسلمش من اولها وتخليه يدير مايبي..
غرفه بحقد:ربي يجعل كيده في نحره ويكفينا شره..
🍃وتطلع طوبى للجنان فاتت من قدامه بدون ماتشوفله..
لكن هو اللي كان يوكل في جنه قعد يسرقلها في النظر لين قعمزت..
مختار:وين غرفه واريج؟
طوبى:غرفه تعاني في بنتها واريج تفطر في الصغار..
مختار: يفطروا مرتين الله يبارك..
طوبى:الصغار يحبوا ياكلوا في كل وقت..التفتتله وهي تقول بإبتسامه..اهي جنونه تفطر معاك...
هو بإبتسامه؛باهي علاش ماتفطرش هي وياهم هني!؟
سدرة وفاتن وجهوا نظراتهم ليه بضيق..
واميمه كانت تشوف لطوبى وتراجي في ردها..غيرت نظرها مطيره اللي ردت عنها تقول...
/صغارها حركيين مايهنوش في ارواحهم..
ابتسم وهو يشوف لجنه ويقول..
/حركتهم هادي دير بهجه في المكان..
طوبى بضحكه:ساداتك جنونه بهجة الدنيا كلها منها..
ابتسموا..ومطيره رفعت حاجبها بإبتسامه وهي تاكل..
هو شاف لطوبى شويه بعدين رسم ع وجهه ابتسامه واسعه..
هي ردتلهاله..
غير طول نظره عنها ولهي بجنة وهي تنهدت ولفت وجهها ليهم..
شافت لسدرة لقتها تفطر عادي..غيرت نظرها عنها وولت تاكل..
🍃وكملوا فطورهم وهما يهدرزوا هدرزة حلوة واغلبها عن الذكريات اللي كان يجبد فيهم مختار..ذكريات حركت مشاعر مطيره..خلاها تحكي معاه بحماس وضحكتها مافارقتش وجهها إلى جانب حماس سدرة وصفيه..
اميمه وفاتن وهادية كانوا مستمتعات بحديثهم..لكن طوبى كانت تسمع وتركيزها كله مع حاجتين
قوة تأثر سدرة باللي تسمع فيه وتحكي عنه وطريقة سرد مختار للذكريات القديمه.
*******
وبعد الفطور...
اميمه مشت للمصحه ورفعت في طريقها اريج..
وصفيه وفاتن قعمزوا حدا غرفه وصغارها في الدار..
اما سدرة ومختار كانوا ماشيين في الممر اللي يرفع للديار..
سدرة:دارك قعدت مسكره..
مختار ودموعه في عيونه..
/نبي نخشلها..
وينفتح باب دار البنات وتطلع منه طوبى..
سدرة؛رقدت..
طوبى:ايه نايضه من الفجر..
هزت سدرة راسها بعدين قالت..
/مختار يبي يخش لداره القديمه..
التفتت طوبى للدار..بعدين ردت نظرها ليه وقالت..
/الدار هادي منسيه مايخشلها اكيد كلها غبره وحشرات خلي ندير عليها حمله ونخليك تخشها ع نظافه وتبات فيها كان تبي..
بدايه كلامها ضايقت سدرة وفرحت مختار لأنه حيجي لصالحه بس سرعان مالفرحه راحت بعد ماسمع تكملة الكلام اللي صدماته وفرحت سدرة
ابتسمت وشافت لمختار وهي تقول..
/شن رايك؟
شاف لطوبى بإبتسامه وهو يقول..
/تمام..بس في عندي اقتراح بسيط جدا بعد اذنك طبعا..
غيرت سدرة نظرها لطوبى وهي تسمع فيها تقول..
/اللي هو؟ مرر نظره ع المكان وهو يقول..
/لاحظت ان الحوش ليه فتره طويله مش مصين..حالة الحيوط والسقف تقول هكي..وجه نظره ليها وقال..فلو سمحتيلي نبي نصينه..
سدرة:مانحسش فيه محتاج شي..
مختار:لايبي ياسدرة..تنهد وقال..نبي نديرله الحاجه هادي بس مش هاين عليا حاله هدا..ابتسم وقال..نتمنى من قلبي صاحبة الحوش ترضى..
شافت سدرة لطوبى بنظرات لما شافتها سدرة حستها تبيها توافق وتاخد بخاطره..
وهو كان يراجي في الرد اللي يبيه معاكس لرغبته..
تنهدت طوبى وقالت..
/ماتمنيتش نردك..لكن اني مانبي شي داره بوي يتغير نبي كل شي يقعد ع حطة يده نبي ريحته وذكرياته يقعدوا فيه..
نزلوا دموع سدره..نزلت راسها وهي تمسح فيهم وتقول.
/صح عندك حق..خلوه يقعد زي ماهو كيف ماخلاه بوي الله يرحمه..
ابتسمت طوبى وغيرت نظرها لمختار شافت في عيونه نظره فيها غل..
غيرت نظرها عنه وقربت لأختها مسحتلها دموعها وقالت..
/توا خلينا في الفرح..تعالي معاي نبي نوريك حاجه..شافت لمختار وقالت..شويه بس..خدت اختها من يدها وقالت..تعالي هيا..
سدرة بضحكه:باهي باهي..
ومشت معاها للدار...فتحت طوبى الباب وخشوا مع بعض وتسكر الباب وعيون مختار عليه..
امتزجت ملامح وجهه الهاديه بالعاده مع ملامح تجهم مخيفه ...
🍃وابتسامه الاعجاب بدت ع وجه سدره وهي تشوف للفستان اللي رافعاته قدامها طوبى وتسمع فيها تسأل..
/شن رايك؟
ردت بإبتسامه وهي تقول..
/يهبل لكن ليش مكلفه ع روحك عندي راهو خديت للمه والعرس..
نزلت طوبى الفستان وهي مبتسمه بأسف تقول..
/هو اني لما شريتلك زوز قفاطين لللمه وللحفله مافكرتش انك اكيد حتجيبي معاك من برا..ضحكت وقالت..شن بيجيب الماركات لهادم..
سدرة:والله مالابسه غير اللي خديتيه وطز في الماركات..
ضحكت طوبى وجتها وضمتها وهي تبوس في خدها..
سدرة بضحكه:القفطان يارتيله القفطان...
🌼وورتها الفستان التاني اللي خداته للعرس شرحتلها حتى عن المكياج والتسريحات الشعر اللي يمشوا معاهم..
وسدرة تسمع فيها بحب ولمعة الدموع واضحه في عيونها..
طلعت هي وياها من الدار ومازال يحكوا عن المناسبات تحديدا عن ذكريات عرس صفاء..
خشوا لدار المعيشه والموجودات فيها يسمعوا لحديثهم..
قعمزوا معاهم وتشاركوا الحديث عن ذكريات العرس..صفيه وسدرة يسألوا بفضول وهما متشوقات وطوبى وغرفه ومطيره يجاوبوا فيهم..
وكالعاده فاتن مكتفيه بالاستماع وهي مستعمتعه لعند ماسألتها سدرة عن مختار..
فاتن؛طلع من ربع ساعة تقريبا..
سدرة:قداش بيقعد في*****؟
فاتن:يروح الأحد..
سدرة:يمشي ويجي سالم إن شاء الله..
وطوبى تسمع فيهم وعقلها مابطلش تفكير...
☘☘☘☘☘☘
طلعت من حجرة خاصه لحالة تابع فيها قامت تليفونها وقعدت تتراسل مع خوها ضحكت ع الكلام اللي بعته وبدت تكتبله في الرد ولأنها معاش ركزت في الطريق لقت روحها ضاربه شخص جي في طريقها ع ذراعه..
"ياساتر..ان شاء الله ماصارلك شي!"
سمعاته قالها بنبرة خوف..رفعت عيونها جو في عيونه..
حطت يدها ع جبهتها وقالت..
/لامافي شي..نزلت يدها وهي تقول..اسفه ماركزتش..
ابتسم وقال وعيونه ع تليفونها
/اللي واخد عقلك..
هي لقت روحها ترد عليه تلقائيا..
/كنت نكلم في خوي..احمر وجهها وزادت ارتبكت لما انتبهت للكلام اللي قالاته..
ضحك وقال..
/تمام تمام..المهم..اني كنت ندور عليك..
هي اشرت ع نفسها وقالت..
/عليا اني!؟
هوبضحكه اشر عليها وقال..
/ايه عليك انتي..
بلعت ريقها وردت بإبتسامه تخفي بيها توترها وهي تقول..
/تفضل..
أسامه:تعالي معاي..
اميمه بإستغراب:وين!
اسامه بضحكه:بنطلعوا من الممر بس..مش حلوة وقفتنا فيه..
هي هربت بعيونها عنه ومن داخلها كانت تشتم في نفسها ع حالة غباء اللي صابتها معاه..
ابتسم وقال؛هيا؟
نزلت راسها وهي تهز فيه بإيجاب..
مشي وهو شاد ضحكته وهي وراها لين طلعوا من الممر
وقفوا ع بعض وهو بدي الحديث يقول..
/اول شي اني واخد منك موقف وتقدري تقولي زعلان منك هلبه..
اميمه بتضييقة عيون..
/علاش!؟
ابتسم وقال..
/ولاكأنك تعرفيني ولاكأن كنا رفاقة دراسه سبعه سنوات،اقل شي سألتيني عن حالي وشن صار فيا!؟
حطت ايديها في جيوب البالطو وقالت..
/حسيتك مش زي قبل متغير...
اشر على نفسه وقال تعجبا
/اني !؟
ابتسمت وقالت..
/هكي حسيت قلت كان في كندا قري وخدم فيها معاش يشوف حد معاه..
ضحك وقال..
/نهائي...وانتي تعرفيني كويس..قاعد زي مااني اسامه عبد الرزاق الاحمر اللي عرفتيه من 10سنين...
"ماحبش من الطير غير الكناري"
اجتاح قلبها شعور حلو بالمرة خلاها تهرب بعيونها عنه والربكه والخجل رجعوا بانوا عليها..
بإبتسامه قال..
/عندك علم قريت عن حالة تغير لون العيون في من قال ان ليها علاقه بالحالة النفسيه وفي من قال ان ليها علاقه بتركيبة القزحية متاع العين..يعني هي مشكله بسيطه وماتخوفش..
رجعت نظرها ليه وقالت بإبتسامه..
/وفي من قال خرافه وكذب ماعرفتش يعني نكذب عيوني ونصدقهم هما!
ضحك بعدين قال؛شن اخبارك اميمه؟..
بإبتسامه قالت؛عادي..تزوجت واطلقت وكملت قرايه وشغل والحمد لله حياتي ماشيه كويس وماناقصني شي..
بتساؤل قال: /ماناقصك شي!!؟
هزت راسها بإيجاب وهي تقول..
/والحمد لله..
غير نظره عنها وهو يتنهد بإبتسامه بعدين قال..
/تمام..تمام..شافلها وقال..خل نخشوا في الموضوع الاساسي..سمعت عن الفريق التطوعي اللي درتيه بخصوص النازحين في مدرسة قريبتك وبصراحه عندي رغبه نولي معاكم..
اميمه بإبتسامه:
/خلاص تواصل مع الدكتور عبد الرحمن الاسطى بش تفهم منه مزبوط الآليه اللي ماشيين بيها..كان ماعندك شي تبي تقوله مضطرة نمشي مشغوله هلبه..
هو بإبتسامه:تفضلي..
هزت راسها ولفت ومشت وع وجهها بانت ابتسامه حلوة بالمرة..
وخلاته وراها يلحق فيها بنظرات الحب ومجرد مااختفت من قدام عيونه تنهد من قلبه بعدين مشي يشوف شغله حتى هو..
*********
"وقال نفسه اللي عرفتيه من عشرة سنين ماحبش من الطير غير الكناري"
طوبى بضحكه ولمعة الدموع باينه في عيونها..
/مش قتلك يااميمه هدا روح ع خاطرك وخدم في المصحه بش يكون قريب عليك..ياااه يااميمه عشرة سنين وانتي في قلبه حبك واحترمك وحتى لما خداك غيره فضل يبعد لاقال نفسد عليها ولانخربلها حياتها قعد بروحه سنه ومعاها لاخطب لاتزوج واول ماعرف ان مازاله فرصه معاك روح طول..ردي بالك يااميمه تفرطي فيه ردي بالك..
اميمه بإبتسامه وقلبها دقاته متسابقه قالت..
/تتوقعي يصير منه ياطوبى!..تنهدت بضيق وقالت..مرات اهله مايرضولاش ياخد وحده مطلقه..
طوبى؛تفائلي خير..بإذن الله هادي الحاجه الحلوة اللي حست بيها هاديه..
ضحكت اميمه..
طوبى بضحكه؛قالت لعمتي معاش طولي واهي توا مخطوبه وقالت بتصيرلك حاجه حلوة روح اسامه..
كلام طوبى خلا اميمه سعيده لدرجة مالاحظتش فيها الحزن الباين في عيون طوبى..
طوبى كانت تتكلم وفي قلبها وجع وغصه..فرحت لأميمه من قلبها..لكن في نفس الوقت قلبها هدا كان موجوع وروحها موجوعه معاه
🍃روحت اميمه للحوش وهي واخده جرعة سعاده وتفاؤل خلتها تختار تلبس احلا ماعندها للمشيه لحوش خطيبة خوها..
🍃وسدرة ومطيره واريج حتى هما بدوا يجهزوا في انفسهم للمشيه..لكن تفاجئوا لما عرفوا..
"مش ماشيه"
سدرة بصدمه؛علاش!!؟
طوبى:حاسه روحي مرهقه شويه وفوقها العذر زايدني ع مابيا..
اريج:بيبو كانك ع خالتي غرفه والصغار بتقعد معاهم خالتي صفيه..
طوبى:لالا مش هكي..والله مرهقه وماعنديش خلوق..
مطيره:خلاص ع راحتك بنتي بري اتكي في الصاله بنتك حدا صفيه تو ترد بالها منها..
طوبى:لا بنمشي نقعد معاها..ومشت طلعت من حداهم وسكرت الباب..
سدرة وهي تشوف للباب قالت..
/تؤ..فيها شي من امس حالها مش عاجبني..من بعد ماروحت من المدرسه..
ضاق صدر اريج لما فكرت في السبب..
تنهدت مطيره وقالت..
/هي بعد ماجابت وضع العذر تغير معاها ماتخافيش عليها يوم ولايومين تولي زي ماكانت..
هزت سدرة راسها مسايره لعمتها..
واريج وهي تمشط في شعرها كانت تشوف للوحه المعلقه من المرايه والدموع في عيونها..
🍃بعد خمسة دقايق طلعوا..مشوا كلهم في سيارة يوسف..
وقعدت طوبى مع جنه تلعب هي وياها بعدين خلتها تلعب بروحها وهي اتكت حداها تراقب فيها...
شوية ركزت ع هدرزة صفيه وغرفه..حست بشي من الاستغراب لعلاقتهم اللي ولت احسن من قبل..
☘غرفه نست كل الخلافات اللي صارت بينهم وبين صفيه بعد اللي داراته مع سدرة..وصفيه لاحظت منها المعاملة الحلوة والاحترام والتقدير زادت تقربت منها..هدا غير صغار غرفه اللي حبتهم من قبل ماتشوفهم بسبب كلام حسين المستمر عنهم...☘
ابتسمت طوبى وهي تسمع في تعليقاتهم وضحكهم ع الصغار..بعدين تنهدت وقامت تليفونها..خشت ع الفيس بش تشوف اخبار الحرب..
انتقلت من صفحة لصفحه ومن خبر لخبر وكانت تقرا في تعليقات الناس ع الاحداث..
وماطلعتش من عالم الاخبار عن الحرب الا لما شافت منشور لآلاء..
كان صورة لتجهيزات حفلة ذكرى ميلاد مدايرتها لراجلها..
وكاتبه فوقها باللغة الانجليزيه..
"كل عام وانت فرحة عمري"
تفاعلت وعلقت بدعاء وهي مبتسمه من قلبها..
طلعت منه ويقابلها منشور لصفاء كذلك كان فيه صورة لحفله ذكرى زواجها الاولى وكاتبه فوقها كلام حلو..
حتى هي تفاعلت معاها ودعتلها وهي تضحك في سرها لما تفكرت اللي صار يوم الحفله..بس هالضحكه كانت مختلطه بمشاعر الحسرة والأسف...
طلعت من منشورها..ويقابلها منشور المشاركه ع صفحة صفيه التارقيه..
اول ماشافت اسمه وصورة البروفايل دق قلبها بعنف..
خشت ع المنشور وقرت ابيات الشعر اللي في اخرها موضح انه مقتبس..شافت التعليقات لقتها كلها لشباب..
في لحظه فكرت تشوف المتفاعلين..خشت عليهم..
وتشوف حساب" سلافه الكسابكجي " من اوائل الحسابات المتفاعله...
برغم النار المستعره في قلبها..خشت ع حسابها تشوف..
كان مفتوح..
زادت انحرقت بكل مافيها لما عرفت ان سلافه خطاطه..
شافت منشورات فيها شغلها خشت ع قائمة المتفاعلين لقاته من ضمن اصدقائها ومافيش منشور ليها يخص شغلها مش متفاعل عليه..حتى ان في منشور علق عليه بصورة من شغله هي راده عليه..
"مافي حدا بيطلعلوا معك"وهو متفاعل مع ردها بلايك..
طلعت من المنشور بأصابعها اللي ترجف ..
طلعت من صفحتها ومن صفحته ومن الفيس بوك. ومن الدار اللي كانت فيها بدون مايلاحظوها غرفه وصفيه..
خشت لدار البنات ومشت لسريرها خشتله وحضنت مخدتها اللي غمت وجهها بيها وبدت تبكي...
🍃🍃🍃🍃🍃🍃
"بكرا بنعدي ل*****"
المهدي:وقداش بتقعد غادي!؟
عبد القيوم:تقريبا اسبوع كان مالقيتك وانا ماشي بنعطي المفتاح لمحمود..زي ماتقولوا المشيه مشية ربي..
المهدي بإبتسامه؛ربك الحافظ...تمشي وتروح سالم ان شاء الله..
عبد القيوم هز راسه وهو يقول..
/ان شاء الله..هي خل نعدي زمانه عيسى يغز عليا في الملح..
المهدي بضحكه؛ياريت عندي صاحب بنداق زيه..
عبد القيوم بضحكه؛حظ محمود اللي ولوا نسابته..
ضحك المهدي..وعبد القيوم لف ومشي وهو رافع يده يقول..
/السلام عليكم..
المهدي:وعليكم السلام..وقعد معاه بعيونه وهو يشوف فيه كيف ركب سيارته..
🍃وعبد القيوم بعد ماركب سيارته شاف لحوش الحبايب ومش هاين ع قلبه يمشي ويخلي مكانهم..
حرك سيارته وشغل الاغنيه اللي تسمت ليها..
"تاتريت..نجمه"..
وقعد يسمع فيها وهو يسأل في قلبه كيف نقدروا نبعدوا عنها اسبوع كامل!!؟
🍃🍃🍃🍃🍃
بعد صلاة المغرب..
روحوا بنات الواعر وكنتهم من زيارتهم لحوش خطيبة يوسف..
طول الطريق وهما يعلقوا ويناشبوا فيه بالذات عمته اللي خلتهم يضحكوا من قلوبهم وندماته هو ع الساعه اللي رفعهم فيها..لكن طبعا ماسكتش ناشبها حتى هو وقعدوا لبعض كلمه بكلمه وسدرة تشحن فيهم ع بعض والبنات يضحكوا بدموعهم..
🌼ضحكاتهم شافتها القلوب المتولعه بيهم..
وياقداش فرح قلب نضال وين جت عينه بالغلط اريج وشاف ضحكتها..واخيرا شافها تضحك من قلبها ضحكتها اللي يموت عليها..
ولأنه نضال توا غير نضال زمان نبه نفسه ع الغلطه اللي طاح فيها غير نظره طول عنها وبدي يستغفر ويتوب إلى الله في نفسه..
☘لكن حالة خوه الكبير تفرق عنه..كان حريص حرص شديد انه مايشوفش جهة عيلة الواعر نهائي ولامرة من بعد اللي صار حس فيها بوجود سدرة المنتهى وشاف ناحيتها..
قبل كان يتقصد يقعمز قدام المطحن يستنى في طلتها..
توا بدي يتجنب يطلع برا المطحن الا لقهوة خوه مع شباب الشارع ويكون ديما عاطي بظهره لحوش الواعر...☘
زي ماصار توا وهو مقعمز في قهوة خوه مع نسيبه ربيع،حس بوجودها...قلبه رغم عنه التفت لكن عيونه اللي ولوا خاضعات لسيطرة عقله ماقدروش يلتفتوا..
********
"زي العسل راقيه ومحترمه وكيوت لين خلاص"
اميمه بضحكه؛اكثر حاجه عجبتني فيها انها رفيقة المهنة..
طوبى بضحكه؛ماشاء الله ماشاء الله..وعيلتها؟
مطيره:ناس متواضعه ميمتها ووخياتها عليك اسلوب عندهم وعليك احترام مال شنو ياحنه ناس من يوم يومهم في العز وعيونهم شبعانه..
طوبى فهمت قصد عمتها هي نفس تفكرت ايامها مع العيله اللي كانت النقيض لعيلة جهينه..
سدرة؛الحمد لله عوضه خير..
صفيه بإبتسامه ودموعها في عيونها..
/الحمد لله...
اريج؛ايه حقه تسلم ع غرفه وبعتتلها هديه..شافت لسدرة وقالت..وينها خويله؟
سدرة؛نسيتها في السيارة تو نقول ليوسف ينزلها بعدين..
غرفه بإبتسامه:بارك الله فيها..
اميمه وهي تشوف لطوبى..
/سألت عليك وقالت خاطرها تشوفك..
سدرة بإبتسامه..
/ وحني غادي نفختلها راسها بيك تشوقت تشوفك..
ابتسمت وقالت..
/اهو قريب تخش العيله ان شاء الله ونتعرفوا ع بعض..
وفاتن تسمع فيهم وهي تشوف لطوبى اللي لاحظت اثر البكاء والحزن في عيونها...
🍃كملوا كلامهم وهما يحكوا عن خطيبة يوسف واهلها وشن قدموا من الضيافه بعدين انتقلوا بالكلام عن تفاصيل لمة غرفه اللي حتكون تاني يوم...
🍀🍀🍀🍀🍀
ويجي تاني يوم...
مع الساعه السابعه مساءا كلهم كانوا في الصاله..
طوبى بفستانها البنفسجي الناعم وطلتها المبهرة اللي زايدها الله سبحانه وتعالى بهاء كانت مشرفه ع العاملات وتستقبل في المعازيم من اهل الشارع والاصدقاء مع نبيله ومطيره...
🌼وجنتها ترقص مع اقرانها من البنات ع اغاني الاطفال فوق المسرح..
كانت الاميز والاجمل بيناتهم..الاظرف والاكثر خفة دم..
واريج حواليها تصور فيها وهي تضحك ع حركاتها..
🌼سدرة كانت مقعمز جنب طاولة الشكولاته اللي يجي ياخد منها يسلم عليها وهي تراقب في الوضع من بعيد...
حضروا اغلب جيران الشارع..مع الاصدقاء عيلة الفاندي وعيلة عدي..والعيون مانزلتش عن طوبى..
من جهة تانيه ع وحده من الطاولات كانوا مقعمزات عمة عبد الرؤوف وبناتها..وجوههم متجهمه ومش عاجبهم شي بالذات لميس اللي كانت الدمعه باينه في عيونها..
🌼وياه على اميمه وجمال طلتها المتألقه..الفرحة اللي في عيونها زادتها جمال والحيويه اللي عطتهالها هالفرحه زادتها جاذبيه..
🌸لكل مش زي الجاذبية اللي كانت عند فاتن..من نوع خاص خلت عيون المعازيم تسرقلها في النظر والهمس والكلام بيناتهم عليها..
☘وفي هالأثناء خشت فايزة مع صفاء ومروة وتاله جابهم اشرف..
بعد السلام مشت فايزة قعمزت جنب سدرة وصفاء ومروة مشوا قعمزوا حدا عيلة الصيد اللي مقعمزة معاهم اميمه..
اما تاله مشت لأريج وين مافي البنات الصغار وقعدت ترقص فيهم وترقص معاهم...
وعيون رقية الحشريه اللي عزمتها مطيره قصدا تراقب في الجميع ومركزه ع أدق التفاصيل...
☘☘☘☘
وبدت الحفله فعليا بطلة غرفه وهي لابسه البدله الصغيره وفي حضنها بنتها تدرج ع انشوده سامي يوسف عن الصلاة ع الرسول...
كانت قدامها مصوره تصور فيها وهي تقدم خطوة خطوة لين وصلت للكوشه..جنبها كان في كروسه...
خدتلها المصور لقطات..بعدين حطت بنتها في الكروسه وقعمزت ع الكوشه..
ويجوها سدرة وعمتها مطيره..
وطوبى من بعيد تتفرج عليها وهي مبتسمه من قلبها..
~~~~~
لميس بغيره وحسد..
/حرام ماطالعه عليها حاجه ومكياجها مش حلو بكل..
اختها قالت:تبان اكبر من اختها اللي كانت في الغيبوبه..
امهم ريسه قالت بكره..
/من الاول مش ليه لكن الله غالب بخته بالهون وليد وخيي..
...............
اقبال بإعجاب:جميله جميله غرفه..
تبره؛اني مانشوف كان في وخيتها الصغيره من زنين خوكم..
ضحكوا البنات..
سعاد بضحكه؛بعدين نمشي نكلم سدرة وخلاص..
حطت امها يدها عليها وقالت..
/لاسدرة لاغيرها كلميها هي طول خوك قال كلموهالي هي..
اقبال بضيق..
/كان مايصيرله زي جلال نسيتوا كيف قعد فترة ع امااقتنع يتزوج بعد رداته فايزة!؟
تبره؛لاان شاء الله المرة هادي تصيب مع ايمن يارب الصغير ونبي نفرح بيه خلاص بيوصل للأربعين ياكبدي..
🍃وقعدوا يراقبوا في طوبى بعيونهم وهما يراجوا في الفرصة المناسبه...
وجت هالفرصه وناضت سعاد مشتلها وعيون امها واختها معاها شافوها هدرزت عليها شويه بعدين خدتها من يدها وجابتها معاها..
وسدرة واميمه واريج يشوفوا فيهم..
مش بس هما حتى رقيه الحشريه اللي طاولتها كانت قريبه من طاولتهم..
********
تبرة بإبتسامه:والله كل شي جي ماشاء الله عليه..
طوبى بإبتسامه:تسلمي خالتي..
ضيقت سعاد عيونها وقالت..
/طوبى بنسألك..ماجاتكش مواضيع زواج ؟
وجه طوبى تغير لونه لكن حاولت تحافظ ع هدوء ملامحها وهي تقول..
/لا نهائي والحق اني الموضوع هدا معاش نبي نفتحه بكل...
الثلاته بصوت واحد قالوا..
"علاش..ليش ياكبدي!؟"
طوبى بإبتسامه..
/مش خافي عليكم وضعي واللي صار معاي اني توا نبي نربي بنتي بس..
تبرة:عارفاتك خايفه ياخدوا منك بنتك..بإذن الله بنتك تقعد معاك ماياخدها منك والي..
رفعت طوبى حواجبها تعجبا..
اقبال بإبتسامه..
/طوبى خوي ايمن يبي يخطبك..
عقدت حواجبها بإستغراب..
سعاد:ماتعرفيشي انتي لكن هو شايفك وعارفك..
طوبى بإستغراب اكبر..
/وين؟
تبرة:مش مهم وين المهم الراجل يبيك بنيه صافيه وقال قولولها ماتخافش بنتها تقعد عندها وماتفكر في شي
اقبال؛ايمن شخصيته وطبعه زي ايهاب الله يرحمه وانتي تعرفي ايهاب صدقيني حيحطك في عيونه..
طوبى كانت متفاجئة ع الآخر..حتما الموضوع مرفوض عندها بس هي تبي تعرف وين شايفها اللي يبان شاد فيها هلبه لهذا شكت في أمر ما..
🍃وشكها حكت عنه اريج لخالتها سدرة..
اريج بضحكه:اني شكيت الحق..كذا مرة شفته جاي للمدرسه زعميته يراقب في الوضع..
سدرة بضيق؛صح ايمن مايتخيرش عن ايهاب لكن الحق وضعه مايشجعش..
اريج؛فهمت عليك..
تنهدت وقالت بألم؛سادها الكسره اللي نشوف فيها فعيونها اني كان نلقى معاش تتزوج بكل..زواجها من الأساس غلط..
استغربت اريج كلام خالتها اللي مالاش تفسير واضح..
وسدرة اللي قاعده تشوف لطوبى بقلق وحزن كانت تبي تمشي تاخدها منهم وماتخليهاش تتحرك من حداها..
🍃من جهة تانيه..
كانت زينب مع امها وخواتها يراقبوا في طوبى واللي معاها..
ام عدي؛صدقيني الا فاتحين معاها موضوع زواج..
اخته قالت؛واضح هكي تبان مرتبكه ومحرجه..
وزينب مازال تشوفلهم وهي محتفظه بصمتها...
🍀واستمرت الحفله بأجوائها الجميله كلها طفوله وبراءة...
عالم فاتن كل ما غاصت فيه تكبر امنيتها انها تكون ام واملها في تحقيق هالأمنيه كل يوم يزيد..
غيرت نظرها ع البنيات الصغار لنجمة الحفله غرفه بعد ماغيرت اللبس العربي وطلت بفستان سهرة فخم وراقي زادها جمال وبريق...
وقفوا اغاني الاطفال والتموا عليها وبدوا يصفقوا ويقولوا في الشتاوات وهي فوسطهم تمرر في نظرها عليهم وتضحك..
بعد ماشتوا عليها هي وصغارها غنوا ع راجلها...
"ناعيني سلم راجلها..هلي هالعز مدللها
سلم غاليها مدللها...مايرضي حد يزعلها
سلم راجلهاالحزار...عليها يصرف بي الدولار
سلم راجلهاالحنون...عليها يصرف بالمليون
طول حياتي مايبدلني...هلي ع الغير مفضلني
عيني سلم راجلها...تطلب ماتبي يديرلها"
هما يغنوا وعمته وبناتها قريب ينفجروا من الغيظ..
وسدرة كانت واقفه تسمع وتتفرج ويدوب تصفق وطوبى وهي تغني مرة مرة تراقب في ردة فعلها..
مش هي بس حتى نبيله اللي بدت تفهم ان سدرة مش قابلتهم نهائي...
🍃🍃🍃🍃🍃
وتمت الحفله ع خير وارتاحت غرفه من همها...
لكن راجلها اللي كان متكي حدا ولاده وهما راقدين يتفرج ع صورها اللي بعتتهوله اتصل بيها ع طول..
نادى الخط مرتين بعد انفتح الخط..
"ياآلو"
رفع حاجبه وقال..
/ماتبيش تروحي؟
بضحكة ردت عليه..
"اياه عاد مش قلنا مازال اسبوع تاني"
تنهد وقال..
/لالا انتي خلاص معاش تبينا..بعد روحت اختك نستينا بكل..
"بلا جو كل يوم نكلم فيك"
حمحم بعدين قال..
/نقولك كيف نطبقوا الشرع وانتي خليك غادي "دير اللي يريحك"
ابتسم وقال..
/عادي عندك!؟
"كان انت عندك عادي حتى اني عادي ونص"
عض شاربه وهو يضحك بدون صوت..
🍃ولأن غرفه كانت لاهيه بالمكالمه..
خلت جنب بنتها فاتن..كانت مقعمزه جنبها تتأمل فيها ودموعها في عيونها..
ع خشة طوبى لدار المعيشه بتسأل غرفه ع شي شافت وضع فاتن..بدت ع وجهها ابتسامة تعاطف بعدين قالت..
/فتون..
شافتلها وهي تقول..
/نعم حبيبتي؟
طوبى:تبي حاجه حبيبتي تبي نديرلك حاجه؟
بإبتسامه قالت..
/لا حبيبتي مشكورة..
طوبى:معاش تتحشمي خلاص انتي منا وفينا توا..
وهي مبتسمه قالت..
/لا والله حبيبتي مانبي حاجه..بس بنقولك الحفله جت حلوة هلبه..
طوبى بإبتسامه:تسلمي ياذوق ياعسل انتي..
ضحكت فاتن..
ضحكت طوبى لضحكتها بعدين قالت..
/غرفه وين؟
فاتن:جاها اتصال طلعت تتكلم برا..
هزت طوبى راسها ومشت بإتجاه دار البنات وهي تسمع في هدرزة مطيره وهاديه وصفيه وضحكهم اللي قالب الحوش جاي من الكوجينه..
خشت للدار...
لقت سدرة مقعمزه لاهيه بتليفونها والسماعات في وذانها..
ركزت ع ملامح وجهها كانت تبان غاضبه والدموع في عيونها..
قعمزت قريبه عليها واريج ع حداهم تبعت في فيديوهات الحفله لأختها..
"سدرة تعالي"..
حطت طوبى يدها ع ركبة اختها..
شافتلها سدرة وحولت السماعات..
طوبى؛عمتي تنادي فيك..
حطت تليفونها جنبها وخدت قيلتها وهي تقول..
/من بكري تقولي بندوي معاك في موضوع..
ومشت طلعت من الدار..
لحقتها طوبى بعيونها بعدين شافت لتليفونها عقلها قعد يرفع ويجيب.. وتوا هي شايفه ان اي شي يخص سدرة لازم تعرفه وهدا يبررلها التصرف اللي بديره توا..
خدت تليفونها ولأنه من غير رمز فتحت الشاشه..
تفاجئت لما لقتها تتفرج ع مسلسل تركي ع اليوتيوب..
شغلت الفيديو وقعدت تتفرج..
اريج اللي شافت شن دارت قالت بإستغراب..
/شن ديري يانهارك!
طوبى ورتها الشاشه وقالت بضحكه..
/من يشبه؟
ركزت فيه اريج بعدين قالت بصدمه..
/حي هدا*******..من زمان ملاحظه انه يشبه المهدي..
نزلت طوبى التليفون وهي تغمض في عيونها وتعض ع شفها السفلي بضحكه..
اريج بضحكه:يجري في الدم ياكبدي..
ع خشة اميمه شافتهم يضحكوا قعمزت مكان سدرة وقالت بضحكه..
/خيركم!؟
فتحت طوبى عيونها وقالت..
/شوفي سدرة ع شن تتفرج..
خدت التليفون وهي مضيقه عيونها شافت الفيديو ضحكت بدهشه وقالت..
/حي!!..رفعت عيونها في طوبى..سمعتنا نحكوا ع المسلسل اني وصفاء تكلمنا ع الشبه بين البطل والمهدي..
"تي بري عليا بالله عليك"
انفجعوا التلاته لما سمعوا صوتها يقرب..
لوحت اميمه التليفون جنبها..
وطوبى قعدت تساوي فيه بش يرجع زي ماحطاته..
ع خشتها وهي تقول..
/ياوالله عليك حاله وخلاص..
طوبى وهي تحاول تخفي ارتباكها ..
/خيرك!؟
طبست ع تليفونها خداته ومشت بتقعمز جنب اريج وهي تقول..
/هالموضوع الزفت اللي كرهت جد اصله..
قعمزت جنب اريج وقالت..
/هداكا اياد مكلم جدي قاله نبي نقرا الفاتحه..
ضحكوا بصدمه..
سدرة:فايقه ورايقه بش نزيد ع همي راجل..لا وشادلي مستكة كنتي خطيبتي ومش عارفه شني..باهي اني مانبيش يااخي معاش نبي خلاص سكرنا..وبحركة ايديها الزوز قالت..فينش..بذاكره ومن غير ذاكرة..ضيقت عيونها وهي تشوف لطوبى قالت..
/غير كان تقوليلي كيف واقفت عليه!
ع خشة مطيره..
/يابنتي الراجل شاريك ويحبك..
سدرة بأنزعاج..
/بلاحب بلاكلب..هما الرجاله يعرفوه الحب طيح سعدهم..
مطيره؛لاعاد معليشي ماتعمميش ياماما..
ع جية صفيه وفاتن وقفوا ع الباب وهما يضحكوا ع كلامها..
سدرة؛لا بنعمم بعد بوي وجدي مافيش راجل يعرف يحب حب الرجاله الصح..توا تلقيه يقولك نحبك وياخد غيرك ولاعليك ولا يقعدوا غير يسحنوا في الكبد ويمرضوا لين يجيبوا اخرة المراة معاهم عطهم سحيقه ..
مطيره بشهقه:بعيد السو ياكبدي!
سدرة؛تو نشوفوا شن يطلع منه السي شكري!..
مطيرة:والله لما يغير نظرتك في الرجاله..
سدرة برفعة حواجب..
/شكشكي!! غير امتى عرفتيه انتي!
قعدوا يضحكوا..
بدت مطيرة تصفق وهي تغني..
حتى كان اصلع صلوعي ،، يبيني وماشي ف طوعي
حتى كان اصلع ف راسه ،، يكفيني حبه واخلاصه
حتى كان اصلع صلوعي ،، حبه ساكن بين ضلوعي
حتى كان اصلع صليعه ،، بكنوز الدنيا مانبيعه
ي سلملي بو صلوعه ،، ماشي جاي ع المربوعه..
فجأه..
صفقت فاتن وهي تغني..
صلوعي وعيونه زرقا..سلم زوله برقلي برقه..
كلهم صاحوا وهما يصفقوا..
ماعدا طوبى اللي كانت مكتفيه بإبتسامه..
وسدرة اللي تشوف لفاتن بإزدراء قالت..
/بروا اطلعوا غنوا عليهم بعيد عليا بروا خير مانبدا فيكم..
ع جية غرفه تجري وهي تقولوا بحماس..
/ترا عاودوا عاودوا..
ضحكوا عليها وسدرة تحرك في راسها يمين ويسار..
🍃وهدا كله كان واصل لمسامع هاديه اللي كانت مقعمزة حدا بنت غرفه تتفرج عليها وهي تضحك...
🍃🍃🍃🍃🍃🍃
"كان راجيت لين يصبح الصبح"
بنفاذ صبر:تي غير هيا قولي كلمتوها!
تنهدت سعاد وقالت..
/قالت المواضيع هادي سكرت عليها..
عقد حواجبه وقال..
/تدوي جديات سعاد!
سعاد:والله زي مانحكيلك مش مصدقني برا انشد امي..
مسح بيده ع لحيته بعدين هز راسه ومشي..
سعاد بضيق:ماتجروا كان في جرة الحاجه الصعبه..
تنهدت بضيق ومشت لدارها...
🍃والحاجه الصعبه..حتى هي شايفه روحها تجري في جرة حاجة صعبه..
في يدها تليفونها تشوفله بنظرات حزن غارقه بالدموع تقاوم في رغبتها تخش ع حسابه وتشوف جديده..
خدت نفس عميق..بعدين زفرت..وخشت ع تطبيق القرآن وفتحت السورة اللي وصلت فيها ضمن الختم..
وبدت تقرا ورغبتها مازال ملحة عليها وقعدت تتصارع هي وياها لين غلبتها بالقرآن...وقرت لين غلبها النوم ورقدت...
#البوم_ذكريات
#طوبى
...يتبع...
