#طوبى "جنة طوبى"
#جمان_فريد
#الجزء_الحادي_والتسعين"نهوض"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#القرآن_المجيد
ثمُ إن القرآن أعظمُ مارُتّبت به بعْـثرة الأرواح وأجل ما هُذّب به شَعث السرائر وأنقى ما جُمع به شتات القُلوب فالزموه في الشدة والرخاء.. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "لا تتمسك بما يسبب لك الألم
احيانا التخلي عن بعض الاشياء راحه"🍃
________________________________________
اصعب واطول ليله تمر ع مالك في حياته كلها الليله..
لأن عاش سنين طويله لما وعي ع الدنيا انسان لامبالي حتى تخلي امه عنهم ماأثرش فيه هلبه سرعان ماخشت فوزيه لحياتهم وعوضتهم عن حنانها اللي شبه ماشافوا منه شي..
بس هالمرة غير..
الحب لما يحرك في الانسان مشاعر حلوة وساميه يخليه قلبه حي..حساس..وكان تغير القلب يغير صاحبه معاه..
مالك قبل مايعرف مروة كان غارق في بيئه البنات اللي عرفهم فيها كانوا برغم غناهم المادي..فقيرات اخلاق وحياء يديروا مايبوا ومافي شي يردعهم..لااب لا خوت لاعمام لاخوال..عايشين زي مايبوا واخر همهم سمعتهم..
بس بعد ماعرف مروة..
شاف بنت يتيمه..امها تخدم عليهم هي وخواتها...عايشات بإحترامهم..محترمات محتشمات..محافظات ع انفسهم...لاعندهم اب واخ يخافوا منهم ولاعم ولاخال يديرولهم حساب...
الخوف ع نفسها وشرفها شافهم ف في نظرة عيونها البريئه...شافهم في رجفة ملامح وجهها الخايفه..سمعهم في صوتها المخنوق..
هديكا اللحظه اسرت قلب مالك آسر...وغيرتله حياته..
🍃وشاء الله ويجتمع بيها من جديد بدون تخطيط منه..كله تدبير الهي..يخلي مروة تخش حياته وتزيد تتوغل في قلبه لين سيطرت عليه سيطرة تامه وخلاته انسان تاني..
وتوا بعد ماخشت لحياته وحلتها..بتطلع منها وتخليه يعيش المرار...
هو توا في سيارته مقعمز في الكرسي الخلفي..شاد المق متاعها اللي عباه شاهي بالليمون وقاعد يشرب منه..
وعيونه يشوفوا للمكان اللي تعود بيها تقعمز فيه...
خلاص يامالك من بعد اليوم هالمكان مش حتقعمز فيه مروة..
ولاعاد مازال تخش حوشكم...ولاترضى تكون في حياتك بأي شكل...
🍃وخسارة مناسك كبيره..
لصديقة مادارتش زيها في حياتها..انسانه صافيه..وصادقه وحقيقيه...بعيده كل البعد عن الزيف والنفاق...
بكت مناسك هديكا الليله بكي ألم تعبها..
🍃لكن مروة...اكتفت بشوية دموع نزلتهم..ومن بعدها تحجرت الدمعه في عينها..حاليا مروة قاعده تكره..وقلبها قاعد يتحجر..وبدت تحس ان مافي شي يستاهل تبكي عليه غير نفسها وعيلتها...
سهرت الليل كله وهي تفكر في اللي صار في كل التفاصيل..
لعند ماطلع الفجر...
ناضت للحمام بش تتوضا وتصلي..تفاجئت بأن الحجه اللي قالتها لأمها بش تروح من الحفله صارت فعلا..
الألم والصدمه كان قويات عليها لهالدرجه...
ولت للدار وسكرت عليها..وخدت اللاب توب متاعها وقعمزت..
وفتحاته..وخشت ع مجلد ما..وبدت تكتب...
🍃🍃🍃🍃
وطوبى بعد مافيقت الكل للصلاه..
صلت..ومشت للكوجينه حطت القهوة ع النار..بعد ماطيبتها..
عجنت سفنز وخلاته لين يخمر..
صبت القهوة وطلعت للصاله وقعمزت خدت تليفونها من ع الفراش..وخشت ع الفيس وبدت تتصفح وهي تشرب في القهوة..
وتسمع مرة مرة في حركة باقي اهل الحوش..
ابتسمت لما شافت منشور ع صفحة حنان دارتلها بيه اشارة وحده من قريباتها فيه صور الصاله والعشي والباقه وجزء من فيلو حنان..وكاتبه دعاء حلو ليها..
تفاعلت طوبى مع المنشور بعدين شافت اللي بعده..
كان منشور لأبلة زينب منزله مقطع قصير لنشيد ديني عن الحب فتحاته طوبى وقعدت تسمع فيه..
كانت كلماته حلوة بالمرة..
🌼من لي سواك..فأنت عمري
نبض قلبي..والحبيب
سال دمعي ماوجدت.
غير عينيك الطبيب🌼
تفاعلت معاه وقالت:يارب تعجبها الطورطه حطيت فيها جهدي كله...
ومررت هالمنشور للي بعده كان لصفحه عامه قراته بعدين تخطاته لمنشور في قروب حفظ قرآن كان فيه اختبار للحفظ..
حاطين آية ناقصه طوبى تلقائيا قرتها وهي تقرا في الآيه..
تفاجئت في نفسها كيف تفكرت كلمة لآية في وسط القرآن..
ولما تعمقت في التفكير عرفت ان قرايتها المستمرة للقرآن وسماعها ليه خلوا الآيات تحفظ في الذاكرة..
تخطت هالمنشور للمنشور اللي بعده..
كان ع صفحة سامي المصور العامه..
اسمها"عدسة سامي"
شافاته منزل صور لمعرض لوحات رسم وخط..
قرت الكلام اللي كتبه عن المعرض...وكان متكلم عن الجمعيه المنظمه للمعرض..عجبها هدف الجمعيه..
كيف ممكن للواحد انه يستغل موهبته بش يساعد الناس..
تفرجت ع صور المعرض..حبت الشغل اللي شافاته وحرك فيها رغبة الرسم اللي ليها وقت طويل في غيبوبه..
طلعت من المنشور وخشت ع صفحة سامي تشوف كان في عنده صور تانيه..
ولما شافت اول منشور طلع قدامها..
قلبها رجف...نظرات عيونها تغيرت...وحست بالجو سخن هلبه...
تمرر في نظراتها ع 4صور كانوا ليه هو بالزي الساحر..
فتحتهم وقعدت تتفرج عليهم..كلهم كان فيهم ابداع المصور المحترف..وكذلك كلهم عبد القيوم ماكانش يشوف مباشرة للكاميرا..
اما يشوف لمنظر الغروب..او مركز بنظره ع الارض...وحده منهم كان فيها يضحك وهو يلف في طرف العمامه"الشاش"
هادي بالذات لفتت نظرها هلبه..كان فيها ابداع اكثر..
قعدت مركزة في كل تفاصيلها..حفظتها حفظ...
تنهدت بعدين طلعت من المنشور وهي تحك في خدها..
عيونها جو ع اسمه اللي دايرله بيه سامي تاق..
لقت روحها خاشه ع الصفحه بدون اراده منها..
وتشوف صورة العرض متاعه...سكرت قبضة يدها وحطتها ع فمها..وخشت عليها وقعدت تتفرج ع الصورة...
حست روحها بدت تسمع في دقات قلبها مش بس تحس بيهم..
في هديكا اللحظه جابتلها ذاكرتها موقف صار بينهم في المطحن...
لما كانت تناقش فيه عن الارباح...اسلوبها الحاد والقاسي قدام ردوده المحترمه عليها..
فتحت يدها وغمت وجهها بيها وقالت همسا..
/مااتفهني! كيف كلمته هكي!..
نزلت يدها بالشويه ورجعت شافت للصورة..بلعت ريقها..
غمضت عيونها وفتحهم لما استاقظت لنفسها..وطول طلعت من الصفحه متاعه ومن الفيس كله وحطت التليفون جنبها وربعت ايديها وغمضت عيونها من جديد توترا وخجلا وهي تردد..
/استغفر الله..استغفر الله..استغفر الله العظيم..
"طوبى جنة ناضت"
فتحت عيونها وناضت بسرعه وطلعت تجري من الصاله..
🍃🍃🍃🍃🍃
الساعه9:00صباحا..
كانت فوزيه حاطه الفطور في دار المعيشه تفطر مع راجلها وبنته الصغيره وهي تسرقلها في النظر بقلق..عيونها حمر منفوخات ووجهها عابس..
بوها قال؛لقيت مالك راقد في السيارة امس..
فوزيه بخوف:فالسيارة!
هز بوه راسه وهو ساكت..
فوزيه:شن جاه!؟
:مش عارف حسيته مش مزبوط..قصدي في حاجه صايرة معاه عنده مشكله هكي حسيت.
فوزيه ناضت ومشت طلعت طول متوجهه لداره..
راجلها شاف لبنته وقال..
/حتى انتي وجهك مش عاجبني..
مناسك:شكلي بنمرض بس..
:من الاهمال لبسك خفيف وتشربي في المصقع..
ومناسك تشرب في الحليب وهي تسمع فيه وصدرها ضايق ع الآخر...
🍃وفي دار مالك..
كانت فوزيه واقفه قريبه عليه حاطه يدها ع جبهتها تشوف في حرارته وهو راقد..
/حرارته عاديه..
وقفت ع حيلها وهي تشوفله بتفكير...
حست ان في شي صاير معاهم هو واخته والنتيجه اللي وصلتلها..امهم..
الفترة الاخيرة تعاركت هي وبوهم ع خاطرهم ومتهماته انه يحرض فيهم عليها هو وفوزيه..
لذلك توقعت تكون واصله فيهم وموجعتهم بالكلام زي عادتها...
طلعت من الدار بهدوء ومازال عقلها مشغول بنفس الفكرة..
🍃🍃🍃🍃🍃
بعد الفطور..
بدوا بحمله نظافه ع الحوش كامل زي كل يوم جمعه...
ماعدا طوبى اللي خشت لدار لطفي ووردة بش دير العاده متاع كل شهر..ضمها وطلع حوايجهم وتعطرهم بعدين تردهم للدولاب..
بعد ماكملت..قعمزت ع السرير وخدت مصحف بوها...فتحت ع سورة الكهف وبدت تقرا..
تقرا وتشم في ريحة بوها المميزة..ريحة الأب ديما بروحها الريحه المخلطه بالذكريات الحلوة المحفورة حفر في قلب..
ماقدرتش تمنع دموعها من النزول..بكت بصمت وقلبها معصور من الألم..ومشهد موته كان بين عيونها..وكلامه ليها قبل بموته قاعد يتردد لمسامعها...
كملت قراية السورة..سكرت المصحف وضماته لقلبها ودموعها ينهمروا....
فجأه..دق باب الدار..
"طوبى مروة جت وقالت تبيك"
مسحت دموعها وردت المصحف لمكانها وهي تفكر بقلق ..
اللي صار لمروة قعد في بالها..وحست ان في شي تاني غير الحجه اللي قالتها...
ناضت..خدت نفس..بعدين مشت للباب فتحاته وطلعت..
مشت بإتجاه دار المعيشه..وقفت في الباب..
شافت مروة مقعمزة وهي سرحانه وباين عليها الضيق..
طوبى :مروة..
شافتلها وناضت وجتها طول..
مروة ودموعها في عيونها..
/نبيك بروحك في داركم..
طوبى؛تعالي..
مشت ومروة لحقتها لين وصلوا للدار..خشت مروة وطوبى وراها وسكرت الباب..
🍃🍃🍃🍃🍃
مركزة بنظرات شك ع بنتها الصغيره..
والبنت تفطر وهي متوتره..
"تاله"
بإرتباك شافت لأمها..
فايزة بحواجب معقوده؛خيرها اختك؟
تاله بلعت اللقمه اللي كانت تاكل فيها وقالت..
/شي..
فايزة؛متأكده!
تاله وهي تحاول تخفي توترها
/هي...مرضت بس..
فايزة هزت راسها وهي رافعه حاجبها وخدت طاسة العصير وشربت منها وعيونها ع تاله..
وتاله هربت من نظراتها ولهت روحها بالفطور..
🍃🍃🍃🍃
تسمع فيها وهي مصدومه ومش قادرة تستوعب شي من اللي قالاته..
مروة بإنفعال وبكي..
/بننجن ياطوبى..معقوله في ناس هكي!
طوبى؛اهدي شويه حبيبتي وفكري معاي..يعني هو علاش بيدير هدا كله كان ناويلك الشر!؟
مروة:خيرك ياطوبى! بلعاني جو يدير فيه بش يجيبني للطريق..
طوبى:علاش يدخل فيه عيلته وعيلتك!؟يقدر يحاول معاك بطرق تانيه!
مروة بنفاد صبر:ياطوبى الناس هادوا مايخافوش ربي افهمي..
طوبى شدت ايديها وقالت..
/اهدي مروة..اهدي..مش هكي..
مروة ودموعها ينزلوا..
/اني مقهورة ياطوبى! تخيلي توا شن يقولوا عليا اللي شافوني راكبه سيارته..متخيله راما شن حكت عليا في المدرسه غادي بنات الشارع كلهم يقروا غادي ياطوبى!
طوبى:عندك حق وفاهمه عليك والله فاهمه..لكن حني توا نبوا نعرفوا..كان حق ناويلك ع شي ولالا..عطيني رقم مناسك..
مروة جبدت ايديها من طوبى وقالت..
/مانيش مكلمتها..
طوبى:قتلك عطيني رقمها اني نكلمها..
قعدت مروة تشوف لطوبى والغضب في عيونها..
بعدين قالت..
/هاتي تليفونك نكتبهولك..
طوبى:هونا ع الزيانه..
التفتت مروة شافاته..بعدين ناضت خداته وولت بيه للسرير.
قعدت تكتب في رقم مناسك وهي ترجف من العصبيه والخوف..
كملت ومدت التليفون لطوبى..
طوبى خداته واتصلت بمناسك وفتحت المايك..
نادى الخط اربعه مرات وبعدين فتحت مناسك وردت..
"آلو"
بدت ملامح الاحتقار ع وجه مروة..
طوبى:السلام عليكم..مناسك معاك طوبى جارة مروة
بدت الرعشه في صوت مناسك لما قالت..
"ماتقوليش مروة صارتلها حاجه"
طوبى شافت لمروة لقتها تشوف للتليفون بملامح ازدراء..
/لامروة كويسه مافيها شي..
"الحمد لله"
طوبى:مناسك..مروة حكتلي كل شي تمام..وهي توا فاهمه انكم تلعبوا عليها انتي وخوك..
"والله العظيم والله ياابله ياطوبى..ماهكي..نترزى في صحتي ان شاء الله نموت كان نكذب عليك"
مروة قلبت وجهها وملامح الازدراء قاعده ع وجهها..
طوبى:باهي احكيلي اللي صار بالزبط..
مناسك بنبرة باكيه..
"اني عرفت مروة في المدرسه اخر العام اللي فات والله ماكنت قبلها نعرفها ولاسامعه عنها شي تقربت منها لأني نشوف فيهاديما بروحها وهدا اسلوبي مع الكل والله من قبل..مالك ماكان يعرف شي والله ماكان يعرف.."
مروة بغضب:كذابه
طوبى:مروة
"والله العظيم يامروة مانكذب والله العظيم"
مروة؛لو تحلفي ع القرآن مانصدقك..
مناسك بدت تبكي.
طوبى شدت يد مروة بقوة وغمضت عيونها بشده بعدين فتحتهم..
مروة قلبت وجهها عنها وهي معصبه..
طوبى:مناسك..
مناسك ببكي..
"والله ياابله طوبى ماكذبت في كلمه..شوفي مالك مشدد عليا هلبه باهي..ومايخليش فيا نمشي لصاحباتي هما اللي يجوني تمام..ولما نتعرف ع اي وحده لازم نعطيه عليها معلومات لما حكيتله ع مروة قالي عادي امشيلها اني استغربت هلبه لكن قلت بالك لما حكيت عنها انها بنت محترمه وهكي خلاني نمشيلها..مع الوقت حسيت ان في شي..بالذات لما لاحظت انه مايبيهاش تشوفه.."
مروة تسمع وهي موجوعه وكارهه في نفس الوقت..
"تكلمت معاه وحكالي قالي...انه يعرفها قبل وصايرله معاها موقف لكن كذب عليا وماحكاليش الموقف الحقاني.."
مروة؛هاه ريتي ياطوبى مش قتلك !
طوبى:مناسك..خوك شن يبي من مروة!؟ من الاخير..
سكتت شويه بعدين قالت..
"يبي يخطبها"
مروة؛نعم!!؟
طوبى:تحكي في الحق يامناسك!
"اقسم بالله يبي يخطبها هو نادم بيموت ويحبها هلبه"
مروة بقرف:حاشا النعمه..
طوبى:يعني مافيش شر ناويلها عليه..
مروة:مش حتقولك الحق ياطوبى..
"اقسم بالله اقسم بالله مافي باله شر بكل..اصلا امس تعاركت معاه وعرف وحالته بالويل"
مروة ابتسمت سخريه..
طوبى:شوفي مناسك اني مصدقاتك باهي..لكن نبيك توصلي لخوك ان مروة وراها تريس مش بروحها..
"ناسيين شن دار ع خاطر قصة صفاء! مروة خوي باع سيارته بش يدفع دين عمك "
شافت طوبى لمروة..لقت ملامح الكره مسيطره ع وجهها وهي تقول..
/تعرفي..لو يبيع روحه مايقدر يمسح شي من اللي داره فيا..خوك وصل في حاجه عندي مايساويها شي..بجديات ومن كل قلبي..من كل قلبي نتمنى من ربي يعيشه اللي عيشهولي هو والحقيره اللي مخلط عليها والكلبه راما.ان شاء الله كلهم اللي داروه فيا يلقوه...اما انتي ياريت تنسيني بكل حتى لو ماكانش ليك علاقه بشي اني معاش نبي نعرفك..
"علاش يامروة شن شفتي مني!؟"
مروة؛ساد انك اخته..لايمكن نقبلك مانقدرش..
طوبى تنهدت بألم وقالت..
/باهي يامناسك صحيتي..ونهت المكالمه..
مروة بنبرة باكيه؛حسبي الله ونعم الوكيل فيهم كلهم..
وقعدت تبكي..ضمتها طوبى لحضنها وهي تمسح ع شعرها وفي قلبها الم كبير عليها..صعب هلبه اللي مرت بيه وهي فهالعمر..
مروة ببكي:لو كان بابا عايش ماصارش هدا كله..
طوبى:وبوي عايش ياما صار فيا يامروة..مافي حد يقدر يرد عليك شي ربي مقدره..ياما منهم عندهم عزوة وحوش معبي رجاله وصار فيهم كوارث...
مروة بألم؛لكن في اللي عايشين حياتهم ومرتاحين هلبه نشوف فيهم في عمري مافي شي مكدرهم بكل..يهدرزوا عالعيله البو الخوت والعمام والخوال..مشينا لحوش جدي..طلعني بوي للسوق..خوي مايخليش فيا نطلع بروحي..نحس في روحي وسطهم مقطوعه من شجره..نحس في روحي مرات اكبر منهم..
قلب طوبى تألم بقوة عليها..صغيره هلبه ع انها تقول كلام زي هدا..بس مابتش تبين هالألم...بدل ماتبين زعلها عليها وتعاطفها معاها اختارت تدعمها بشكل تاني..
طوبى:الناس عند ربي مش كلها زي بعضها..في اللي عادي جدا..وفي اللي مميز..اللي عنده قوة تخليه يتحمل كل حاجه صعبه يعيشها ويطلع منها وهو احسن واقوى من قبل..مش قال لايكلف الله نفسا الا وسعها..وانتي ربي عاطيك قوة كبيره تقدري تتحملي بيها كل شي وتتخطي كل شي بش يوصلك لمكانه تستحقيها عنده هو مش بس في الدنيا..
بعدت مروة عنها وهي تشوفلها بعيونها المعبيه دموع..
طوبى ودموعها في عيونها..
/ديما حاطه في بالي ان ربي داسلي حاجات حلوة ع قد الألم اللي عشته متأكده من الحاجه هادي وقاعده نراجي فيها..حتى انتي كل اللي قاعد يصير معاك صار بش يوصلك للحاجه االحلوة المدسوسه ليك..حتحسي وقتها لما توصلي فيها انك اكثر حد محظوظ في الدنيا كلها..
ابتسمت مروة تلقائيا..
طوبى بإبتسامه؛محلاك بجد يامروة..
مروة:انتي اللي محلاك ومحلا كلامك..مافكرتش نحكي لغيرك لما تفكرت كلامك ليا قبل..تعرفي نحبك هلبه...
طوبى ضحكت وقالت..
/واني نموت فيك..
ضمتها مروة وهي مبتسمه براحه..بعدين تباعدت وقالت..
/شكرا..
طوبى:باهي..اسمعي..
مروة بضحكه:شني؟
طوبى:ماتحكي شي لأمك ردي بالك..
مروة:لالا مش حنحكي ..
طوبى؛نبهي ع تاله..
مروة:نبهت عليها وخوفتها..
طوبى:حطيها في الصورة وقوليلها لو امك تعرف بتتكدر وتزعل هلبه..
مروة:ايه قلتلها هكي..
طوبى هزت راسها بعدين قالت..
/ايه وهديكا راما ماتعدليش عليها خليها تخرف..زيها زي امها وحناها مش حيبطلوا كذب وافتراء ع الناس..
مروة:ربي ياخد فيهم الحق..
طوبى؛آمين...
🍃🍃🍃🍃🍃🍃
الساعه 5:00عصرا..
قدام مطعم ربيع كانوا مقعمزين هو وصحابه..
يشربوا في الشاهي التارقي اللي جابه عبد القيوم في "طرمس او ترمس"...
وهدرزتهم كانت ع الوضع السياسي للبلاد اللي ماكانش يبشر بخير..
🍃مقابلهم في محل الحلويات..
كانت طوبى تساعد في البنات في تجهيز الطلبيات وهما يراجو في المندوبه تجي توصلهم..
:وصلت المندوبه..
طوبى:هي طلعوا يابنات وبالشويه..
طلعوا الطلبيات وهي معاهم..
سلمت بالكلام ع المندوبه..وحطت الطلبيه في سيارتها من الخلف وتوجه في البنات كيف يحطوا اللي عندهم..
وخرت وشدت باب السيارة وهي تراقب فيهم..شويه وغيرت نظرها القدام..
جو على عبد القيوم وهو يتكلم بيده اللي فيها الخاتم..
ورجع قلبها يتلخبط..غيرت نظرها عنها ووجهها مكتسي باللون الاحمر..
:خلاص هكي!
طوبى بشي من الربكه..
/ايه خلاص..
:تمام..قبل المغرب ان شاء الله نكون هني..
طوبى:إن شاء الله..
ركبت المندوبه وتحركت بالسيارة..
سمع صوتها التارقي شاف جيهتهم ويجوا عيونها عليها..
قلبه فر فران...نسي روحه وقعد يشبحلها وخلاص..
وهي خشت مع البنات بدون ماتشوفله..
سامي:عبدو..
استاقظ وشافله..
سامي:كلماتك بنت الكسابكجي!؟
عبد القيوم عقد حواجبه وقال..
/ايه..قلت باهي..
سامي؛توقعت تقنعك..مش عارف بس نحس تأثر عليك..
ربيع شرب الشاهي وهو يشوف لعبد القيوم..
عبد القيوم؛المعنى!؟
سامي بإبتسامه؛في اعجاب..
عبد القيوم ابتسم تهكما وقعد ساكت..
سامي:توقعت غلط!؟
عبد القيوم؛اكيد..
ربيع:شكلك تجس في نبضه انت اللي حاط العين عليها..
ضحك وقال..
/ابدا والله..اني قلبي مسكر ومفتاحه راح مع اللي راحت..
ربيع بإحراج؛سامحني قلبت المواجع..
سامي:ولايهمك..مانسيتش بش تفكرني..
عبد القيوم بضيق:الله يرحمها..وغير نظره للمحل..
شاف سيارة تانيه جت درست قدامه..
شويه وطلعت طوبى وفي يدها بوكس وهي مبتسمه..
تلقائيا ابتسم لإبتسامتها..
🍃طوبى:واهو طلبك معلمتي..
خداته زينب وحطاته ع الكرسي جنبها وهي تقول..
/جزاك الله خيرا ونردلك هالخدمه ان شاء الله في وقت طيب..
طوبى بإبتسامه:تسلمي يارب..
زينب:في هالساعه المباركه اسأل الله الكريم رب العرش العظيم ان يجبر قلبك الطيب بزوج صالح يصب عليك الحب صب..
برغم الالم اللي حست بيه وقتها بس الدعاء فرحها هلبه وردت عليه بدعاء..
/ويحفظلك زوجك ويسخرلك قلبه العمر كله يارب..
زينب:اللهم آمين استجب ليا وليها يارب العالمين..
طوبى ضحكت خجلا وقالت..
/هي مانعطلش عليك..استودعك الله..
زينب:واياك ياقلبي..السلام عليكم..
طوبى وخرت عن السيارة وقالت..
/وعليكم السلام..
وتحركت زينب..وطوبى لحقت سيارتها بعيونها لين درقت عنها..
بعدين غيرت نظرها القدام..جو عيونها في عيونه..
ارتبكت..توترت..وقلبها دقاته تلخبطت هلبه
نزلت عيونها وطول خشت للمحل وسكرت الباب بقوة..
قعدت واقفه عليه وهي تتنفس بسرعه..
بعدين رفعت ايديها حطتهم ع خدودها تتحسس فيهم..
استاقظت وشافت حواليها لقت البنات محاوطينها بنظرات الاستغراب..
هي بارتباك؛شكلي بنمرض..وجهي سخون..
:ايه اليوم صقع والمحل دافي وحني نطلعوا ونخشوا..
هزت راسها بشي من التوتر وقالت..
/ايه صح..
🍃🍃🍃🍃
وهالحاله اللي عاشتها ام العيون الحايره كان للأسمر الجذاب نصيب منها..بس حاول يخفيها ع قد مايقدر قدام سامي..
لين ناض سامي ومشي للمصور متاعه يشوف الزباين..
☘عبد القيوم وهو يشوف لمحل جنة قال لربيع..
/تعرف..!
رد بإبتسامه:شنو!؟
تنهد وقال:انا غبي..غبي وهبل..
ربيع بضحكه قال؛نعرف..أااقصدي ليش!؟
عبد القيوم بشي من الانفعال
/شن طلعني من الشارع !!؟ كان صبرت شويه كان حكمت عقلي..! حتى انت ماتنفع صاحب بكل..الصاحب يعقل صاحبه يوجهه يدير الصح مش يخليه ع راحته..!
رفع حواجبه تعجبا وقاله:والله ماتبي الا كفين ماشي جاي ع وجهك..كان مش مني راك درت العار...
ابتسم وقاله:باهي دير موقف سمح هكي يزيد يكبرك في عيني..
حط ايديه ورا ظهره وعقد حواجبه وقال تساؤلا..
/زي!؟
رفع حاجبه اليسار وقال:زي..انك تاخد هلك وتعدي تسكن في حوشك اللي في عين زارة وتعطيني الحوش اللي هنا..
ربيع :منك جد!!؟
عبد القيوم؛اها من جدي نحكي!
ربيع هز راسه بعدين قال..
/حالك باهي!
عبد القيوم؛عدي وانت ماتجي منك اللي تفرح..
ربيع:ياناكر المعروف اه وياويلي واوف..
عبد القيوم ضحك بعدين تنهد وقال..
/معاش عندي صبر..
ربيع:معليش..انت صبرت سنين جت علي هالكم شهر..
عبد القيوم بضيق..
/خايف تزيد الطريق تطول..
ربيع:اخرتها حلوة صدقني.
تنهد من قلبه وقال..
/ان شاء الله..
🍃وينفتح باب حوش علي الواعر ويطلع منه..
ربيع:مدام مربط حبالك مع ليالي الحلميه طريقك سالكه..
ضحك عبد القيوم وقال..
/نتلاقوا بعدين...ومشي ناحية علي الواعر..
قص الطريق وقف قدامه وسلم عليه بعدين تسايروا للجامع..
🍃علي:مغيب ليك مده..كان مش من العرس ماريناك.
عبد القيوم؛والله ياحاج مشغول واجد..
علي:عارفك تو بتنشغل علينا وتنسانا..
هو ضحك بإستغراب..
/ليش!؟
علي:بتتزوج توا وبتلهى..
عبد القيوم بصدمه:كيف!!؟
علي وقف معاه لما وقف وقاله..
/خيره عيونك طلعوا هكي! مالا كنت تبي دسها وماتقولش لين تعزم..
عبد القيوم:شن تقول ياحاج..عزومة شنو ودس شنو وزواج شنو!!؟ تي من قاللكم اني بنزوج اصلا!
علي بإستغراب..
/كيف! مش قلت لحسين بتخطب وشريت شقة بش تتزوج فيها..!؟
عبد القيوم عقد حواجبه بغضب حاول يكتمه لما قال..
/حسين هذى مش عارف شن نقول عليه..انا ياحاج لانبي نخطب ولافي بالي فكرة الزواج من اصله والشقه شريتها لاني معاش نبي الايجار هذي كل القصه
علي:مالا شن يهدرز حسين!؟.
عبد القيوم؛رسم شي في عقله وصدقه وتمه يحكي بيه..
علي حرك راسه يمين ويسار بعدين قال بضحكه..
/يللا اهو فاولك...قول فال وع الله الكمال..
عبد القيوم بضحكه..
/ان شاء الله خير..
علي:امشي امشي..
مشي وعبد القيوم في جنبه وهو يقول في نفسه..
"الله يسامحك ياحسين تزيد تعقد فيها فوق ماهي"..
🍃🍃🍃🍃🍃
"يطلع في اشاعات ع الراجل "
مطيره بضحكه؛ياوالله عليك حسين وخلاص..
فردوس:باهي وكلام عمته!؟
مطيره؛نحس فيها قالت هكي لأنها انحرجت من دوة سالمين..
علي:المهم الراجل لايبي يتزوج ولافي باله..
ع خشة طوبى وهي رافعه جنه بيد واليد التانيه شاده بيها صونية ماكلتها..
علي؛جرينه..
طوبى حطت الصونيه وقالت..
/ع من كنتوا تحكوا!؟ اكيد حسين مادام قال جدي زواج مازواج
مطيره:هو حسين ومش حسين..
طوبى بضحكة استغراب..
/كيف!؟
فردوس:طلع اشاعة عن التارقي انه بيخطب.
طوبى وجهها ولى احمر تلقائيا..
مطيره؛طلع يفتي من راسه جدك سأل الراجل وقاله مافيش منها الدوة هادي..
طوبى حست بالفرح بدون سبب واضح عندها وقالت..
/امم..بعدين جت بتطلع..
علي:تعالي جاي بجرانتك خل نشوفها..
ضحكت بتوتر ومشت بجنه لجدها...
🍃🍃🍃🍃🍃
ويقعد مالك في حالة عزله اليوم كله..ماطلعش من داره الا بش يمشي يصلي في الجامع..
حتى خوته وخواته ماباش يقعد معاهم والصغار كانوا مشتاقينله هلبه لكن هو ماكانش في حالة تسمحله يشوفهم...
ومناسك ماكانتش خير منه..بس دارت سبلتها المرض..
وخلوا عيلتهم محتارة في حالهم ومشغوله عليهم..
بالذات فوزيه اللي كان في بالها شي واحد وقررت تتصرف بروحها المهم دير شي يريح صغار روحها...
🍀🍀🍀🍀
وتمر الايام..
وترجع مروة تمشي للمدرسه عادي..لاحظت غياب مناسك لكن ماضايقهاش هالشي بالعكس ارتاحت المهم عندها ماتشوف منهم حد...
🍀واختها صفاء..
علاقتها في تحسن ملحوظ مع عواطف..اللي تونست بيها وبدت تحس وكأنها اختها الصغيره مش مرت خوها..
وكل رجع ايجابا ع نفسية عواطف اللي تراجي في لمة ولد اختها في الصاله يوم الخميس..
بس قبل مايجي يوم الخميس صار حدث ممكن يتسبب في خسارة غاليه جدا..
🍃يوم الثلاثاء...
26فبراير...سنة 2019..
بعد الظهر...
روحت صفاء من المدرسه طول لجناحها..بدلت وصلت وطلعت بسرعه للكوجينه بش تبدا في تجهيز موالح جنب الغدي لأن اشرف بيروح اليوم..
وماكانتش تندري ان عواطف دارت كل شي عنها..بعد ماكملت قعدت تسيق في الكوجينه من اثر القلي والزيت..
وتخش صفاء بعجله..تزلق في الميه والصابون وطيح مقعمزة..
لوحت عواطف السياقه وجتها تجري..
وساعدتها تنوض وهي تقول..
/علاش تجري بس!.
صفاء وهي حاسه بشي من الالم..
/نبي نلحق .
قعمزتها ع الكرسي وقالت بقلق..
/ماتحسي في شي!؟
صفاء؛ماتخافيش وجع بسيط.
ع جية نجمه وقفت في الباب وقالت بخوف..
/سمعت حاجه انبهدت! راك تقولي انتي ياصفاء!
صفاء؛هادي عمتي مش قويه..
نجمه بخوف؛لالا يابنتي ماتقوليش عادي! تو نقول عمك الحاج يرفعك..
صفاء:بتوحليه ع الفاضي..
عواطف:لالا خليه يرفعك لوين مااتابعي..
تنهدت صفاء وقعدت ساكته وهي حاسه بشويه الم..
🍃جابتلها عواطف عبايه ووشاح لبستهم..
ولبست حتى هي وطلعت بصفاء لسيارة بوها..
وطول طلع بيهم للعياده اللي تراجع عندها صفاء ع الحمل..
🍃وطول الطريق والالم كان يزيد ع صفاء..لين وصلوا للعياده..
نزلتها وخشت بيها داخل..
ومجرد ماوصلوا للإستعلامات..شدت صفاء حزامها وبدت تعيط من الوجع..
وعواطف خافت عليها هلبه..جوها الممرضات ركبوها كروسه ورفعوها طول لقسم النساء وحماتها معاها...
🍃وتخش بعدهم باريلا حواليها ممرضات ومالك ومعاه بوه يجروا...
الباريلا كانت عليها فوزيه غايبه عن الوعي وحاطين ع انفها وفمها قناع الاكسجين..
شويه ويخش وراهم معين صديق مالك يجري حتى هو كان جاي معاهم...
🍃🍃🍃🍃
عدت نص ساعه...
"الحمد لله المدام تعدت مرحلة الخطر"
تنفس مالك بإرتياح..ومعين طبطب ع كتفه..
اب مالك بقلق؛يعني حالها باهي يادكتور توا مافي شي يخوف!؟
:لامافي شي يخوف للحمد لله..بس الباين انها كانت هامله العلاج..
راجلها بضيق:ربي يسامحها وخلاص..
:ع العموم لاباس عليها وان شاء الله ماتشوف شر..
:بارك الله فيك..
مشي الدكتور..بعد ماتباعد..
خبط مالك بيده ع الحيط وقال بغضب..
/غير جت امي بس..
بوه بضيق:شن رفعها غادي علاش ماشيتلها بس..
معين:خلاص اللي صار صار توا المهم حالها باهي..
جاه اتصال شاف تليفونه وقال..
/اني نستأذن عندي موضوع ضروري كلميني كان صار شي واني بعد نفضى تو نولي..
هز مالك راسه بصمت..
وبوه قاله..:يرحم والديك..
هز معين راسه ولف ومشي بسرعه...
🍃وقدام العياده..
درست سيارة فايزة..
نزلت منها تجري وهي تبكي..
ونزلت مروة بعدها..
وصلت فايزة المدخل..
خشت..ومعين طلع..ويجيه صاروخ يخبط صدره مباشرة..
نزل نظره لوطا..
ويسمع صوتها الغاضب وهي تقول..
/حول من قدامي..!
وخشت تجري..هو لحقها بعيونه وقال..
/على من تعيط هادي!!؟
ولف بيلحقها..يرن تليفونه مرة تانيه
شاف لتليفونه وقال..
/خلصها مني الراجل
ومشي بسرعه يجري لسيارته بش يلحق ع موعده مع واحد يخدم معاه...
#نهوض
#طوبى
يتبع..
.
