#طوبى "جنة طوبى"
#جمان_فريد
#الجزء_121"انا لحبيبي وحبيبي إلي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الدعاء
251 - باب فضل الدُّعاء بظهر الغيب
قَالَ الله تَعَالَى: وَالَّذِينَ جَاءُوا مِنْ بَعْدِهِمْ يَقُولُونَ رَبَّنَا اغْفِرْ لَنَا وَلإِخْوَانِنَا الَّذِينَ سَبَقُونَا بِالْأِيمَانِ [الحشر:10]،
وقال تَعَالَى: وَاسْتَغْفِرْ لِذَنْبِكَ وَلِلْمُؤْمِنِينَ وَالْمُؤْمِنَاتِ [محمد:19]،
وقال تَعَالَى: إخْبَارًا عَن إبْرَاهِيمَ ﷺ: رَبَّنَا اغْفِرْ لِي وَلِوَالِدَيَّ وَلِلْمُؤْمِنِينَ يَوْمَ يَقُومُ الْحِسَابُ [إبراهيم:41].
1/1494- وَعَن أَبي الدَّردَاءِ أَنَّهُ سمِعَ رَسُولَ اللَّهِ ﷺ يَقُولُ: مَا مِن عبْدٍ مُسْلِمٍ يَدعُو لأَخِيهِ بِظَهرِ الغَيْبِ إِلاَّ قَالَ المَلكُ ولَكَ بمِثْلٍ رواه مسلم
.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لا أستطيع أن اقترب ولا أن أبتعد. لا أستطيع أن أنسى ولا أستطيع أن أتجاوز. فأهلاً بك بالمنتصف المميت🍃
__________________________________________
الخمس..
الساعه 10:00ليلا..
كانت طوبى مقعمزة في دار النوم ع السرير..
قدامها اللاب توب"الحاسب المحمول"..وحواليها مذكرات الخط والمذكرة الخاصه بكتابة سور القرآن الكريم وكتاب الداء والدواء..
هي كانت مشغوله باللاب توب..خاشة ع الفيس تشوف في الرسائل اللي جتها ع صفحة ..الحنة.."بضم الحاء"
من ضمن هالرسائل رساله اثرت فيها جدا لوحده من المتابعات كانت تشكي بحرقه وألم...
(السلام عليكم..
بالله عليك ساعديني اني قاعده نتعذب هلبه والله قريب ننتحر)
طوبى بقلق ردت..
(وعليكم السلام..خير ياغاليه شن اللي معذبك وموصلك لهالحاله)
بدت تكتب وطوبى تستنى فيها لعند مابعتت..
(اني قاعده ندير في ذنب ومش قادرة نسيبه..كل مانتوب عنه نرجعله من جديد وبعد مانديره نموت من الندم نستغفر ربي ونقول خلاص هادي اخر مرة نرجعله مرة تانيه..قوليلي بالله عليك شن ندير بديت نتحشم نستغفر ربي وخايفه هلبه يغضب عليا..خايفه نموت واني هكي ويكون مصيري النار ومرات نفكر ننتحر ونقول هكي ولاهكي بنخش النار المهم نرتاح من هالعذاب..ساعديني ارجوك بالله عليك ساعديني)
تأثرت طوبى هلبه بالرسالة تخيلت حالة المتابعه وهي تكتب فيها اكيد منهارة وفي حالة يرثى لها..
خدت نفس عميق..مسحت بإيديه ع وجهها بعدين قالت..
/يارب..
وبدت تكتب في ردها ع البنت بتأني وهدوء كانت حريصة انها تنفعها وتكون سبب لنجاتها وفي نفس الوقت حست بمسؤولية كبيرة وكأن الله وكلها بمهمة لازم تمها من قلبها واكمل وجه
🍁في هالأثناء..
كان راجلها يتفقد في الأماكن اللي تقعد فيها الحيوانات وهو يجري في مكالمة هاتفيه تخص الخدمه..
عبد القيوم وهو يسكر في باب مكان الارانب قال
/بكرا ان شاء الله جاي لطرابلس.....تمام تمام...وانت طيب تصبح ع خير.......وعليكم السلام..
نهي المكالمه والتفت بيمشي وقف في مكانه لما شاف الارنب "ونوسي" واقف يشوفله قال بتعجب..
/كيف طلعت انت!؟
والارنب مازال ع حاله واقف يشوفله بس..
ضحك ونزله ع رووس اصابعه وهو يقول..
/تبيني نشيلك لها..مصر داعكني عليها..وخداه ورفعه وهو يقول..ان شاء الله نلقوها واعيه..رفع عيونه للسمي ابتسم بعدين نزلهم للأرنب وهو يقول..شكلها في مطرة قوية جايه اه كان تصب توا بس..
وكمل طريقه للحوش لين وصل فيه وخش بالأرنب بعدين سكر بيبانه كويس..
🌼طوبى في هالوقت كملت كتابة الرد وبعتاته بعدين قالت..
/مفروض نكتب منشور ع الموضوع هدا اكيد في هلبه غيرها يعانوا من نفس المشكلة ومايقدروش يحكوا...
حست بشي يخربش في رجلها اللي كانت منزلتها تحت..بشي من الخوف شافتلها..ضحكت لما شافت الأرنب وقالت..شن دير هني!؟..حطت اللاب توب ع جهة ونزلت من السرير وقعمزت ع رووس اصابعها قدامه..قعدت تمسح ع ظهره وهي تقول..شكله عبادة مااستاقظش بيك..
"شكله من !؟"
ضحكت ووقفت ع حيلها والتفتت وهي تقوله..
/عبادة..اني بس بناديك بيه رد بالك تقول عليه لحد..
بضحكه قال..
/حاضر..
حط يده ع راسها وقعد يمسح عليه وهو يقول..
/بكرا من الصبح بنطلعوا من هنا..
طوبى:مش قلت بنمشوا العشيه!؟
هو قال؛تذكري الراجل اللي يبيني نخدمله الضي في المبنى متاع مكتبه قالي تعال ابدا من بكرا..
طوبى هزت راسها بإيجاب وهي تقول..
/ممم..
قرصها من خدها وقال..
/كان نقولك في شن خاطري توا..
ابتسمت وقالت..
/شني!؟
قاللها:سحلب...
ضحكت وقالت..
/هدا وقته اصلا..
ومشت بتطلع تبعها ونوسي وعبد القيوم يشوفله وهو طالع وراهم ويقول بعصبية مصطنعه..
/وين ماشي تعال هنا!
طوبى بضحكه..
/ماتخوفاش..
قال بنفس النبرة..
/اسكتي انتي..
قعدت تضحك..
قدمله بسرعه وطبس عليه وخداه..
/حطيته في الكوبيا مع صحابه وسكرت عليهم وين جت بنمشي لقيته مصبي قدامي..
طوبى بضحكه..
/اني بنغيرله اسمه لشراد ديما هارب من جماعته..
حطه عبد القيوم ع رخامة البار وقعمز ع الكرسي وهو يقول..
/لما تكوني انت هنا يشرد عنهم ويخليهم مايصبرش عليك..
شافتله بإبتسامه وهي تعبي في طنجرة صغيرة مية للسحلب..
لقاته يشوفلها بنظراته اللي تحبهم وف نفس الوقت يخجلوا فيها..
نزلت عيونها وكملت شغلها ع السحلب وهو قعد يتبع فيها بنظره ويمسح ع ظهر الأرنب..
وهي التزمت الصمت...حطت السحلب ع النار بعدين مشت طلعت جزرة من الثلاجة غسلتها وجت بيها للأرنب..
شدها وبدي ياكل منها وهي تشوفله بإبتسامه حلوة تأثيرها ع عبد القيوم قوي وهي اساسا بكل تفاصيلها ديما تأثر فيه بقوة.
تباعدت عنهم وولت للطنجرة وخدت كاشيك لوح وبدت تحرك فيها وهو يشوفلها بتفكير..
تنهد بعدين قطع هالصمت اللي دام لدقايق وقال
/طوبى
شافتله وقالت..
/نعم؟
مسح ع لحيته وقال..
/تو انتي ع شن ناويه بعد التخرج؟
رفعت حواجبها وقالت..
/ايه حقه!..بكري كلمتني سدرة وحكتلي شن صار فموضوع المدرسه قالت قدر المهدي يحل مشكلتها مع الوزارة وحتفتح العام الجاي ان شاء الله وتبي تسلم ادارتها لحماتها..
عبد القيوم؛تبي صيانه وخدمة واجد..
طوبى:ايه قداش ليه المهدي يصين فيها شكله كان واثق ان مشكلتها حتنحل بسرعه حتى داروا اعلانات للتسجيل فيها وطلبوا مدرسين للخدمة وطبعا كله بالشروط اللي حاطتهم الوزارة..
هز راسه وقال:كويس..كويس..
طفت ع السحلب وقالت..
/ايه..واني من زمان من لما كنت نقرا في الثانوي عطتني سدرة وعد تخليني ماسكة ادارة الروضة في مدرستها..
بانت ع وجهه ملامح الضيق وفي عيونه نظرة الخيبه اللي ماشافتهمش طوبى لانها كانت مشغوله بتجهيز مقات السحلب وهي مكملة تقول..
/يعني بإذن الله بعد التخرج بنخدم فيها..
شاف للأرنب وقال بإبتسامه..
/كويس..
شافتله لما سمعت كلمة"كويس" منه بنبرة ضيق قالتله..
/عندك مشكله !؟
شافله وقال بإبتسامه..
/لا نهائي..
لسانه قال كلام عكس اللي باين في عيونه وهي شافت هالشي وقالت..
/كان عندك اعتراض قول مش لازم تسايرني في كل شي .
ضحك وقال..
/قتلك قبل اللي خاطرك فيه ديريه مش حنمنعك عنه نهائي وبعدين بالعكس اطمنت واجد لأنك بتخدمي في مكان يعتبر ليك انتي..
ماصدقتش كلامه لكن مابتش تصر عليه هزت راسها ومشتله بمق السحلب بعد مازيناته بالمكسرات..
حطاته قدامه وقعمزت مقابلاته..
هو خداه وقال..
/خيرك ماصبتيش لروحك!؟
طوبى:ماخاطريش فيه..شافت للأرنب لقاته كمل الجزرة وبادي يغمض في عيونه ابتسمت..
وعبد القيوم يشرب ويشوفلها...
شافتله وقالت:موعد عرس بنت عمي تحدد 21 واحد..
هز راسه وقال..
/ع البركه ان شاءالله..
رفعت حواجبها وهي تقول..
/من توا بنقولك تبيني نطلع ونوتي معاها..
ابتسم وهز راسه بالموافقه وشرب من السحلب..
ربعت ايديها وحطتهم ع الرخامه وقدمتله شويه وهي تشوفله بإبتسامة حب وتقول..
/عندك علم انك تهبل..
نزل المق بعد شرب منها ضم شفايفه لداخل وهو يشوفلها بنفس النظرات اللي تحبهم طوبى..
كانت عنده رغبه في المبادرة للتقارب بس في داخله خوف يصير فيها شي..
وهي كذلك كانت تبي للتقارب يصير بس نفس الخوف هو اللي مانعها..
قعدوا يتبادلوا في النظرات للحظات لعند ماقطع عليهم صوت الرعد اللي فجعهم وفجع ونوسي اللي كان واخده النوم..
حطت يدها ع قلبها وقالت..
/سبحان من يسبح الرعد بحمده والملائكة من خيفته..
وهو ردد نفس التسبيح همسا بعدين علا صوته يقول بضحكه
/من بدري وانا ندعي تصب توا..
قالتله بإبتسامه..
/عاد انت ماعندكش الروح مع الشتي..
قاللها؛انا ماعنديش الروح معاك انتي بس..
ضحكت بخجل وهو نزل من الكرسي وجاها خدي يدها ونزلها وقال..
/تعالي..
مشي بيها وهي تضحك..
وصلوا في باب الحوش فتحه وفتح اللي بعده وطلعوا وقفوا قدامه كان فيه سقف متقي عليهم..
عبد القيوم:ياكم تخيلت اللحظه هذي وانتي معاي..
خداها في حضنه وهو يقول..
/تخيلت تكوني قريبة من قلبي زي توا ونحكيلك وتحكيلي كلام في الحب والشوق وبس..
دمعوا عيونها وهي مبتسمه بحب بعدين بدت تغني..
"أنا لحبيبي و حبيبي إلي
🍁زاد ضمها وباس راسها وهي مكمله تغني...
"يا عصفورة بيضا لا بقى تسألي
لا يعتب حدا ولا يزعل حدا
أنا لحبيبي وحبيبي إلي
وندهلي حبيبي جيت بلا سؤال
من نومي سرقني من راحة البال
أنا على دربو ودربو عالجمال
يا شمس المحبة حكايتنا أغزلي
أنا لحبيبي و حبيبي إلي
ياعصفورة بيضا لا بقى تسألي
لا يعتب حدا ولا يزعل حدا
أنا لحبيبي وحبيبي إلي"
☘☘☘☘
والاجواء الشتويه هادي ماكانش في زيها فطرابلس غير ان رومانسية الشتي تطغى ع قلوب المحبين شن ماكانت حالة الجو...
زي عمر اللي استغل سكون الليل وهدوئه وطلع هو مرته من شقته اللي يقعد فيها لما يبات مع نفيسه في حوش اهله..
خداها لمكان الشلال الصناعي..قعمزوا قراب عليه وقعد شاد يدها بإيديه الزوز ويتغزل فيها ونفيسه مع ابتسامتها الخجوله كان قلبها طاير بمشاعرها..بدت تحس اتجاه عمر بالحب والراحة والأمان وحست انه فعلا هو العوض الجميل اللي بعتهولها الله سبحانه وتعالى..
☘امافي شقة خوه الكبير اللي كان غارق بالنوم..
"مهدي..مهدي.."
فتح عيونه وضيقهم..
"مهدي نوض"
التفت وشافت سدرة مقعمزة تشوفله بملامح بانت عليه ملامح ضيق..
ناض قعمز وهو يقول بخوف وصوته مبحوح من النوم.
