#طوبى "جنة طوبى"
#جمان_فريد
#الجزء_119"أنا وياك"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#القرآن
ماذا لو أقبلنا على القرآن بحضور قلب ؟!
" فإنّ قراءة القرآن بالتدبّر تُعطي العبد قُوةً في قلبه، وحياة، وسعة، وانشراحًا، وبهجةً، وسُرورًا؛ فيصير في شأن والنّاس في شأنٍ آخَر ".
- مدارج السالكين لـ ابن القيم
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ويحدث أنَّ شوقًا كبِيرًا كالبحر، يتدفَّق
من وعاءٍ صغيرٍ كقلبِي!
- الرّافعي🍃
_______________________________________
خشت للحوش بنفسية حلوة ومزاج رايق ع الآخر..
شافت للكنبه لقاته راقد عليها..ابتسمت..
توجهت طول للدار..خشتلها وسكرت عليها..
لحظات وطلعت وهي لابسه بلوزة كم طويل نظامها واسع لونها بني طولها للركبه تحتها بنطلون جنيز لونه ازرق ورافعه شعرها فوق ومنزله خصلتين..مظهرها كان بسيط لكن حلو ومميز..
وهي ماشيه للكوجينه شافت لعبد القيوم لقاته مازال راقد
غيرت نظرها وهي مكمله طريقها للكوجينه..
خشتلها وقفت فيها..كانت عندها رغبه شديده دير قهوة..
حاسه روحها لو دارتها هالمرة حتجبها مزبوطه وفيها بنة..
رفعت ايديها لفمها قرت سور الرقيه..
الفاتحه والاخلاص والمعوذتين..نفثث في ايديها ومسحتهم ببعض..
بعدين بدت تحوقل وتوجهت طول لمكان القهوة..
وبدت دير فيها وهي تردد في الحوقله وتستشعر في كل كلمة فيها..
لما حطت البكرج ع النار قعدت واقفه عليه وهي تقول..
"لاحول ولاقوة الا بالله"
وتراجي في النتيجه..لحظات والميه بدت تغلي وتبدا تتبع في الخطوات اللي تعودت دير بيهم القهوة..
🌼وتطلع الريحه وتوصل لأنف عبد القيوم..ضربت في دماغه زي مايقولوا والدماغ بدوره اعطي الاوامر وخلا صاحبه يفيق..
فتح عيونه وهو يشم في ريحة القهوة..ارتسمت ع وجهه الناعس ابتسامه حلوة..
حرك عيونه للكوجينه..شافها تتحرك فيها..
ناض بهدوء وقعمز..بانت عليه كويس..لاحظ انها مختلفه شويه...طريقه لبسها اليوم غير..
تلقائيا قعد يمسح ع شعره بش يساويه..بعدين ناض وقف وهو يساوي في التيشرت متاعه..
قدم للكوجينه وهو يشوف فيها كيف تصب في القهوة..
وصل في رخامه البار اتكا عليها وقال بإبتسامه..
/احسبيني.
شافتله وهي متفاجئه بعدين قالت بضحكه..
/صباح الخير مرة تانيه..
هو بإبتسامه ونظرات حب واعجاب..
/صباح النور..
مشت خدت فنجان تاني وهي تقول..
/جيت بنوضك لكن حسيت خاطرك في النوم..
هو قال بإبتسامه..
/ريحة القهوة وعتني..
ابتسمت وهي تقول..
/يارب الريحه زي البنه..
هو قال؛الريحة عنوان الطعم..
شافتله بإبتسامه بعدين خدت السفره اللي حطت فيها الفناجين..
حطتها ع رخامه البار وقعمزت قدامها من داخل..
وهو قعمز من برا مقابلها..
خدي الفنجان وبدي يشرب..وهي شربت معاه وعيونها عليها..
غيرت نظرها للفنجان بعد ماحولاته وقالت بضحكه مفاجأة..
/تجنن!
نزل فنجانه وقال بضحكه..
/ايه والله تجنن..
ابتسمت خجلا ونزلت عيونها..
وهو ابتسم..
حمحمت وقالت..
/باهي قولي..وبعدين؟
بإستغراب قال..
/بعدين شني!..
قامت عيونها وقالت..
/بعدين شن بيصير حتتكرر معاي الحاله هادي مرة تانيه..
خدي نفس وقال..
/قبل قتلك العلاج يبي وقت وخطواته واجده..انتي توا حتقعدي ماشيه ع اللي كنتي دير فيه وردي بالك تخليه..
اه ايه فكرتيني..ليش قريتي سورة النجم؟
طوبى:حلمت بيها..حلم بحد كان يقرالي فيها فالحلم وامس سمعته يقرا فيها قريتها..
عبد القيوم:واضح التفسير..التزمي بيها وراك تسيبيها هي وسورة البقرة والفلق وتاج الذكر..تاج الذكر ياطوبى كان نلقى ماتحكي الا بيه..
هزت راسها وقالت:إن شاء الله..تعرف زمان كنت ملتزمه بيه بس بعدين شديت في اذكار تانيه..
عبد القيوم:عارفه حديث الرسول عليه الصلاة والسلام عنه
قال.. من قال لا إله إلا الله وحده لاشريك له،له الملك وله الحمد وهو على كل شيء قدير في يوم مائة مرة كانت له عدل عشر رقاب وكتبت له مائة حسنة ومحيت عنه مائة سيئة وكانت له حرزا من الشيطان يومه ذلك حتى يمسي
ركزي حرزا من الشيطان يعطي تحصنك تحصين تام...
قالتله...
/بإذن الله مش مسيباته بكل..
هز راسه وهو يشوف للفنجان..بعدين حمحم وقال..وفي حاجه اخرى..
ضيقت عيونها وهي تراجي فيه يكمل كلامه..
عقد حواجبه وقال..
/اكيد تعرفي الحجامه وفضل الحجامه ولا؟
قام عيونه وشافلها..
هي هزت راسها وقالت:ايه..
هو قال:الحجامه من اهم خطوات علاج الاصابات الروحانيه وغير هكي صحيا ممتازة جدا والرسول وصى بيها وحددلها ايام معينه..17 و19 و21 من كل شهر عربي..
طوبى:ايه صح..
نزل عيونه للفنجان حط سبابته ع يد الفنجان وقال..
/يوم 17 لازم ديري اول جلسه..
هي قعدت تشوفله بصمت وتفكر بتساؤل..
"من بيديرهالها!؟"
جاها جوابه وهو مازال منزل عيونه يقول..
/نا بنديرهالك..
جمدت تماما وهي تشوفله بعدم استيعاب..
قام عيونه ووجه نظره لروشن الكوجينه يقول..
/ماتخافيش نا متمرس فيها ويدي خفيفه..
نزلت عيونها وهي بتموت من الخجل...
سرقلها النظر شاف لون وجهها وعلامات خجلها الشديد ابتسم بعدين حك انفه من القدام وقال..
/طبعا احسن شي تندار الحجامه ع الريق يعني نديروها صبح نهار الأحد ان شاء الله..وبنقولك حتكون جلسات كل شهر مرة..
هزت راسها بصمت تام مش قادرة تنطق بحرف ولاتقيم عيونها..
خدي الفنجان ورشف منه وهو مبتسم..
هي حطت يدها ع رقبتها بالجنب شدت عليها بعدين خدت فنجانها وشربت منه..
قعدوا في حالة صمت للحظات بعدين هي حمحمت وقالت..
/ايه بنقولك..سدرة والمهدي بيجوا للخمس يوم الاحد.
عقد حواجبه بإستغراب..
رفعت عيونها فيه وقالت..
/اني طلبت منهم يجوا..
عقد حواجبه وبان في عيونه الخوف وقلبه يدق بسرعه..
خدت نفس وقالت..
/عارفه ان عندك حاجات مهمه السبوع هدا اول حاجه افتتاح المعهد تاني خدمتك مع الراجل اللي يبيك تركبله الضي في حوشه..
رخي حواجبه وهو متفاجئ..
طوبى:سمعتك يومها تتعارك معاه يبيك تجيه وانت ماتبيش تمشي ع خاطري..
هو قال؛لا..
قاطعاته وقالت بإيتسامه..
/ارجوك وبالله عليك كان تبي تريحني معاش تعطل حياتك اكثر من هكي..برا شوف شن وراك تم امورك براحتك وبعدين روح سدرة ناويه طول معاي..
عبد القيوم:ليش تتصرفي من راسك بدون ماترجعيلي!
طوبى بنفس الابتسامه..
/زي ماانت دير بالزبط...
عقد حواجبه بضيق وقال..
/في امور مالكش دخل بيها نا نعرف نتصرف بروحي..
طوبى بضيق:لا معليشي دخلي ونص..انت وقفت حياتك بسببي ياعبد القيوم وهالشي مش مريحني بكل ومركبني ذنب..بإصرار كملت تقول..تبي راحتي دير اللي قتلك عليه ولا والله العظيم معاد قاعده..
شافلها بصدمه..
هزت راسها وهي مصرة وقالت..
/حلفت..
نزل عيونه وهو مضايق لأبعد حد..هو معاش قادر ع فراقها لو بيدير اللي قالت عليه حيقعد ايام بعيد عنها كيف بيتحمل!
طوبى:عبد القيوم..
رفع عيونه فيها وتنهد بضيق وقال..
/حاضر..
ابتسمت وقالت..
/وارجع صلي في الجامع زي قبل..
ابتسم وضم شفايفه لداخل بعدين رخاهم وهز راسه بإيجاب وفي داخله حس بخوف كبير..
🍃خوف يجي نهار ترفض تكمل معاه وتسيبه..حتى لو اعترفلها حبه مرات تختار الفراق لهلبه اسباب اولهم بنتها وتانيهم خوفها عليه...
🍃🍃🍃🍃🍃
في وقت صلاة الجمعه..
وين ماكانت عيلة الواعر ملتمه بس هالمرة في حوش طوبى..
خدت غرفه خواتها سدرة وفردوس وخشت بيهم الدار وسكرتها..
سدرة بإستغراب:خيرك!
غرفه؛بنحكي معاكم في حاجه مهمه غفلتوا عنها..
فردوس بقلق:شن هي!؟
غرفه؛قبل لنقول نبيك ياسدرة تسمعيني للآخر..تمام!؟
سدرة وهي تشوفلها بقلق هزت راسها بالموافقه..
🍃🍃🍃🍃
تاني يوم..
السبت..
السادس عشر من شهر صفر...
3اكتوبر..سنة 2020..
الساعه 5:30عصرا..
في مربوعه حوش محمد شنيبه الخارجيه..
كانوا محمد وولاده..
المهدي وعمر ونضال مقعمزين مع ضيف جاهم من زليتن فاجئتهم جيته هلبه وجملة
"جيت في موضوع خير" اللي قالها اول مافتحت حديثه اثارت فيهم الاستغراب..
🍃محمد شنيبه..
/خش في الموضوع ياولدي..
بشير وهو محرج بعض الشي ضحك وقال..
/والله ماعارف منين نبدا..
المهدي:تكلم طول انت قدام عمك وولاد عمك ماحد براني وشن ماتبي حني حاضرين يابشير..
حمحم وضم ايديه لبعض وقال..
/والله ياعمي..جيتك بنطلب منك بنتك خديجه..
ساد الصمت المكان..
نضال جاته رغبه شديدة في الضحك وهو يتخيل في خديجه مع بشير..كان يقاوم بقوة ومن داخله يقول..
"استغفر الله..اللهم لاتؤاخذني"
اما عمر..مرر نظره ع بشير من فوق لتحت وع وجهه ملامح ابتسامة استنكار..ماقدرش يدرق ردة فعله..
لكن المهدي ومحمد شنيبه كانوا متفاجئين ومش مستوعبين اللي سمعوه..
محمد شنيبه:خديجه بنتي اني!؟
ناض نضال وهو يقول..
/شويه وجاي..
وطلع برا وقعد يضحك بكتمان وعمر كان زابطه لكن شاد روحه بقوة وهو يشوف لبشير وع وجهه ابتسامه وحواجبه معقودة...
بشير بشي من الاحراج..
/ايه ياعمي خديجه بنتك
شاف محمد للمهدي..والمهدي قال..
/ع حسب علمي انت متزوج!..
هو وبكل ثقه واندفاع..
/نطلق ماعندكش مشكله..
انصدموا محمد والمهدي..
وعمر رفع حواجبه بتعجب..
محمد شنيبه..
/لاياولدي صل ع النبي طلاق شني!
بشير:ياعمي مش من توا مانيش متفاهم مع المراة من قبل وبخديجه وبلاها ناوي الطلاق..
المهدي:خديجه اكبر منك ب4سنين..
بشير:وين العيب لااني اول ولااخر واحد ياخد وحده اكبر منه..
المهدي شاف لبوه..وبوه قال..
/فتحت الموضوع مع عمتك كامله!؟
هز راسه بإيجاب..
محمد قال:معناها اكيد تكلمت مع خديجه فيه!..شن كان ردها!؟
🍃🍃🍃🍃
"قالت مافيش نصيب"
جمال عقد حواجبه وقال..
/علاش!؟
مفيده بإستياء..
/قالت ماارتحتش للموضوع..
رفع حاجبه وقال..
/من اي ناحيه!؟
مفيده:مش عارفه..ماقالتش..كل اللي قالاته صليت استخارة وماارتحتش..
سكت شويه بعدين قال..
/نبي نقعمز نحكي معاها ونفهم منها..
مفيده بإبتسامه:شكله عاجباتك واجد؟
ابتسم وقال..
/قوليلها وماتخليهاش الا وانتي محدده معاها موعد..
مفيده بضحكه..
/حاضر.. 🍃🍃🍃🍃
"قصدي اختك لهالدرجه مئيسة من وضعها!؟"
نضال بضحكه؛اللهم اغفرلي ولاتؤاخذني..مش نعيب ع خلق الله لكن ماقدرتش نتخيله جنب خديجه..وقعد يضحك..
عمر بضحكه:لاوقال نطلق عادي وندير عرس كبير ومش عارف شنو..
🍃وهما في الصاله يهدرزوا نسرين كانت ماشيه بولدها للكوجينه تعطيه ميه سمعت كلامهم انتابها شعور بالغضب
كملت طريقها للكوجينه اللي كانت فيها سميره طيب في العشي..عطت لولدها ميه وطلعت بسرعه..
وسميره تراقب في يحيى وهو يشرب..
🍃🍃
خشت نسرين الدار..
خدت هاتفها وهي معصبه حطت ع رقم اختها واتصلت بيها
نادي الخط مرتين وفي الثالثه ردت..
"باهي اللي خطرنا ع بالك!"
نسرين بغضب:مش عارفه امتى تتعظي وتوبي يامراة انتي مش ساد الخراب اللي درتيه هني حتى غادي قاعده تخربي في الحياش العامرة!
"شن تخرفي انتي!"
نسرين:ياكلبه معاش لقيتي الا بشير المسكين تلعبي عليه وتاخديه من مرته وصغاره يامريضه..
"والله مافي كلبه غيرك اللي قاعده شاده تركينه وتبكي ع واحد باعك بالرخيص تستاهلي مايجيك تستاهلي مكثر"
وسكرت عليها..
نسرين بعد اللي سمعاته من اختها قعمزت بهدة ع السرير وقعدت تبكي..
هي اكثر شي خلاها تحمق فكرة الراجل اللي يطلق مرته بش ياخد غيرها..هدا اللي صار معاها..وممكن فهمت ان خديجه عرفت علاش انفعلت هكي وضغطت ع مكان جرحها بش تزيد توجعها..عادة خديجه مش حتشريها..
🍃وخديجه بعد سكرت ع اختها طلعت لعمتها وخبرتها باللي سمعاته من نسرين..
كامله بصدمه:لاهدا هبل رسمي!..عقدت حواجبها بغضب وقالت..جيبي هاتفي جيبي خل نكلم بوك..جيبي..
🍃واتصلت كامله بخوها وشرحتله اللي صار بالتفصيل وهو بعد فهم من اخته قاللها انه في كل حالات مش حيوافق عليه ويرضى يبني دار بنته ع حساب دمار غيرها..
☘اتعظ..من كل اللي صار معاهم اتعظ ولايمكن يرجع يكرر نفس الأخطاء مهما كانت الدوافع..
لكن في اللي ع قد مايصير معاه لايفهم ولايتعظ..
🍃"اني كنت حاط من البدايه احتماليه رفضه للعرض بعد ماتكلمت معاه..اللي نعرفه انه يحب الفلوس حب مرضي لكن لما عرضت عليه المبلغ شفت في وجهه تردد او عدم تقبل"
الأقجم:وهكي حتى عمتك رافضه..
مختار:اكيد..ع كل حال..اني مش هدا اللي كنت نبي نوصله اللي نبي نوصله شي تاني تماما..اشر عليه وقاله..ماتسألنيش عنه..
ضحك الاقجم وقال..
/حاضر..
مختار برفعة حاجب..
/واهي الابله طوبى ماطلعتش مسافرة مع خالها زي ماتوقعت..توا نبيك تجيبلي هي وين ومع مني خلال الاسبوع هدا نبي المعلومات توصلني بالتفاصيل مانبيش ولاتفصيل يغيب عنكم..
الاقجم هز راسه وقال..
/حاضر..
ع خشة امينه عليهم وهي تقول بلهفه خوف..
/استاذ مختار..مدام فاتن باينها حتولد..
بدون مايحس بروحه مشي بسرعه طلع من المكتب وامينه لحقاته اما الاقجم طلع برا يجهز في السيارة..
🍃🍃🍃🍃
"غدوة متسقدين الصبح بكري"
فردوس:توصلوا بالسلامه ان شاء الله..
ع جية غرفه بشنطه صغيره فيها حوايج جنه وشنطه تانيه..
/ترا نادي ع معتز يافردوس..
خشت فردوس داخل..
وغرفه قالت لسدره..
/هدا ساكو جنه..وهادي شنطة فيها حاجات لطوبى..
سدرة:هي طلبتهم!؟
غرفه:لا..لكن اني حسيتها حتحتاجهم..
ابتسمت سدرة برفعة حاجب وقالت..
/وليتي تحسي هلبه..
غرفه بضحكه:مش حنعكر مزاجي..
ضحكت سدرة..
قعمزت غرفه ع رووس صوابعها قدام جنه وقالت..
/عطيني بوسه..
مدت جنه خدها لخالتها باساته غرفه..بعدين جنه باست غرفه وقالت..
/عطيهم بوسات اوبا وهوبا وموبا..
ضحكوا سدرة وغرفه اللي قالت..
/حاضر..
🍃ويجي معتز يطلع مع خالته الشناطي ويوصلها لحوشها.
وحلت جنه في هالليله ضيفه ع حوش عمها..
صغار عمها قريب هبلوا عليها كانوا مشتاقيلها هلبه.
لعبوا معاها بعدين نزلوها لجدها وعمامها..
نضال فرحته بشوفتها لاتوصف..وعمر ومحمد شنيبه فرحوا بيها هلبه..
حتى نسرين طلعت من دارها من فرحتها بعدين وبعد ماسلمت عليها بحرارة رفعت لمغليه تشوفها.
وفرحة مغليه كانت بالدموع وهي ضم فيها وتشم في ريحتها وريحة اغلى ضونتها ع قلبها..الجالي..
🌼🌼🌼🌼
نضال:تلعبي بالدجيحه صار!
ضحكوا عمر ونسرين..
جنه بلغتها الطفوليه الحلوة..
/ايه..وسيارة..ونلعب..حطت ايديها ع عيونها وقالت..وبيس..نزلت ايديها وهي تقول..اني واوجا..
عمر ونسرين شافوا لنضال اللي خفتت ابتسامته شويه وكان قلبه يدق بقوة..
عمر:باهي تلعبي معانا وبيس؟
شافتله شويه بعدين هزت راسها بإيجاب..
ناض عمر وهو يمرر في نظره ع خوته ويقول..
/هيا نوضوا
شافوله بإستغراب..
ناضت جنه وهي تقول..
/هيا هيا..نعد نعد..ومشت تجري طلعت من الصاله
ناض نضال وهو يضحك..
ونسرين رمت كل شي وراها وناضت وهي تقول بحماس...
/هيا درقوا بدت تعد..
ومشي كل حد فيهم درق في مكان في الصاله وجنه تعد في الارقام بطريقه لذيذة ومضحكه وهما يعلقوا ويضحكوا عليها..
كملت عد وخشت وهي تقول..
/ستاشيو اوجا..ستاشيو اوجا..
نضال اختفت ابتسامته وعيونه تعبوا دموع والقلب يرجف وسط الضلوع..
جابله عقله كل الذكريات الحلوة اللي حاول يتنساها ع قد مايقدر..
مااستاقظش الا لما طبعت جنه بوسه ع خده وقالت بلغة طفوليه لذيذة..
/وجدتك...
ضحك وضمها بيده وحده وهو شاد دموعه بقوة...
🍃🍃🍃🍃
"عبد القيوم"
هو اللي كان في داره لما سمعها تنادي فيه قال من وسط قلبه..
/روحه..
ومشي فتح الباب..
شافها واقفه وهي لابسه ملاية الصلاة كانت تصلي في العشاء..ابتسم وقال..
/نعم..
طوبى بإبتسامه..
/بنطلب منك طلب..
هو قال بإبتسامه..
/اطلبي..
طوبى:نبي ناخد فواكه وورد نرفعهم معاي غدوة ان شاء الله..
حاول يحافظ ع ابتسامته ع قد مايقدر وهو يقول..
/حاضر..
رفعت حواجبها وقال..
/اوو..ونوسي.
رفع حواجبه وقال..
/لا الباشا هذى نا بنشيله معاي نزرد بيه..
طوبى بضحكه..
/عبد القيوم..
بدت ع وجهه ملامح امتعاض وهو يقول..
/ياودي باهي..
ضحكت بعدين قالت..
/باهي اطلع تعشى العشي واتي..درت عجة..
ابتسم وقال:حاضر..
طلع وسكر الباب..مشت وهو مشي وراها وخافي في داخله لهفة قلبه المتيم بيها عليها...
🌼تعشوا وهما يهدرزوا وكالعاده هو اكثر من يتكلم..
كانت تسمعله اكثر وتتأمل فيه تبي تشبع من تفاصيله اللي حتفارقهم تلاته ايام..
اما هو لولا اصرارها عليه ماخلاها تغيب عنه لحظه وحده..من كل قلبه متمني لو مايجيش اليوم تاني..مش مستوعب انه حيخليها بعيده عنه تلاته ايام..مش عارف كيف بيعديهم..!
🍃ولاعارف مختار شن جاه اول ماشاف ولده..
قلبه ذاب فيه..روحه تعلقت بيه..حس بلهفه عليه غير عاديه..
عطتهوله الممرضه خداه منه وحمله بين ايديه..
دموعه طاحوا غصب عنه وهو يتامل فيه بعدم استيعاب مش مصدق ان العيل هدا منه هو..ولده..ضناه!
فرحة فاتن نستها تعب عملية الولاده..فرحتها اللي زادت وهي تسمع في مختار كيف يوصفلها في ولدهم ودموعه تنزل..
كانت عارفه ومتأكده ان عاطفة الابوه عند مختار قويه هلبه..خوفه من الابوه خلا رغبته فيها مخفيه..هو بس ماكانش يبي يكون نسخه عن بوه ..يقسى ع صغاره ويظلمهم ويوقف في وجه احلامهم..
ايه هكي كان لطفي في عيون مختار ولده..
🍃🍃🍃🍃
يوم الأحد..
السابع عشر من شهر صفر..
4اكتوبر..سنة2020..
وع الريق..دار عبد القيوم الحجامه لطوبى..
وقت الحجامه كان طول الوقت يذكر في الله ويخلي فيها تذكر الله وتقرا في الرقيه..
هي نست الخجل والاحراج بعد اللي حست بيه من الحجامه..
فقدت الوعي..وهو كان متوقع يصير معاها الشي هدا لهذا دخل معاه عصير طبيعي وحاجه تاكلها..
بعد مافاقت وصحصحت لم الحاجات وضم الحوسه وطلع وخلاها بروحها وهي في حالة خجل واحراج خلتها معاش طلعت من دارها..
🍃بعد ربع ساعه..
بدي يجهز في نفسه وهو مضايق ع الآخر...
بيمشي ويخليها تراجي المهدي وسدرة لين يجوها هما ويرفعوها وطبعا هدا بطلب منها هي كانت تبي تسقده...
🍁طلع من الدار بعد ماجهز نفسه ومشي قعمز ع الصالون..
خدي اللاب توب وفتحه وشغل نفسه بيه...
☘طلعت هي من الدار وفي يدها مذكرتها..
كانت خجلانه ومحرجه ومرتبكه مش عارفه تقدم ولاتولي من وين ماجت..
وفي الاخر حسمت امرها ومشتله..خشت الصالون مررت نظرها عليه كان متأنق وجذاب كالعاده..
بدت ع وجهها ملامح الضيق لأنها عارفاته وين بيمشي..
هو كمل شغل وسكر اللاب وقام عيونه وشافها..
هي ابتسمت وقالت..
/جبتلك المذكرة اللي قتلك عليها..انت قلت تبي تكون اول من يكتب فيها..
ابتسم وهز راسه وقال..
/هاتي..
مشتله ووقفت قدامه وعطتهاله..
هو خداها..وهي قعمزت جنبه بمسافه..
فتح المذكرة لقي بيرو راكب في وحده من صفحاتها..
خداته وفتح ع الصفحه الاولى..
مسح عليها بيده..هي ابتسمت فرحا لإن ريحة عطره حتعلق في المذكرة..
حمحم بعدين بدي يكتب..
وهي تتأمل فيه وعيونها مليانات دموع..
وتفكر في مشاعرها فقلبها كل مالها تكبر اكثر واكثر...بس ماتقدرش تبين منها شي..هو مش ليها وعمره ماحيكون ليها قلبه لغيرها...واصلا مافيش مجال للمقارنه بينها وبين اللي مالكه قلبه...
كمل كتابه ووراها شن كتب..
هي ابتسمت مجامله وقعدت تقرا بعيونها..
وهو يتأمل فيها...
هي طول فكرت ان سلافه خطرت عليه وهو يكتب في الابيات اللي كانوا...
"يمُرُّ عَلَيَّ النّاسُ ولستُ بِمُبْصرٍ
سواك كأنّي في الزِّحامِ ضريرُ.."
هو قال:شن رايك؟
هي شافتله بإبتسامه وقالت..
/حلو زي العاده..
قعد يشوف لعيونها وهي تشوف لعيونه لحظات وسط هدوء المكان اللي هما فيه...
اخترق هدوء المكان الاتصال اللي جاه..هي نزلت عيونها لتليفونه...
شافتها المتصل كانت هي..قالت..
/عطلت شكلك..
هو تنهد ومدلها المذكرة بيد وخدي التليفون باليد التانيه..
خدت المذكرة وحضنتها لاإراديا وهي شاده دموعها بقوة.
وهو بدون مايشوفلها ناض طلع برا بش يرد ع المكالمه...
🍃عبد القيوم..
/السلام عليكم..صباح الخير..
"وعليكم السلام..صباح النور..انت بالطريق"
هو قال:لعند توا ماطلعت..
"اممم..كان بدي قلك تمرق ع الجمعيه الاستاذة نفيسه عامله حفلة تكريم صغيره بدها نحضرها قبل الافتتاح.."
هو قال..
/تمام تمام شويه تانيه وطالع..
"سوق ع مهلك انا رح استلم شهادة تكريمك"
قاللها:لاان شاء الله حنوصل ع الوقت..ماتبي شي!؟
"سلامتك..مع السلامه"
هو قال..
/سلام..نهي المكالمه معاها واتصل بالمهدي..
***********
المهدي:ربع ساعه ونكونوا غادي ان شاء الله..
"تمام السلام عليكم"
المهدي:وعليكم السلام..
نهي المهدي المكالمه اللي كان يجري فيها مع عبد القيوم..
وسدرة جنبه قالت..
/مستعجل مش قادر يصبر..
المهدي:بتبدي توا..
سدرة بضيق؛ماسمعتاش كيف يتكلم من فوق منافسه.
المهدي شاف لجنه من مراية السيارة لقاها راقده..
غير نظره لسدرة لما سمعها تقول..
/كان حسيتها مش متريحه معاه بننهوها يامهدي..
رد نظره للطريق وقعد ملتزم الصمت وسدرة جنبه تخمم وقلبها موجوع...
🍃بس مش زي وجع قلبه هو اللي مش مطاوعه يبعد عنها لحظه وحده..
خشلها الحوش لقاها في الكوجينه تصب في بكرج قهوة داراته وسط طرمس..
كملت وسكراته كويس..وين جت طالعه بيه شافاته وقالت..
/درتلك قهوة..عارفاتك ماعندكش عليها هلبه بس جي في خاطري نديرهالك..
بلع ريقه وقال..
/مشيتي كلها ع بعضها مالهاش لزوم..
حطت الطرمس ع الطاوله وقالت بضيق..
/شن قلنا يومها!؟
تنهد وقال..
/مش مرتاح..
طوبى:مش حنقعد بروحي..استودعني الله انت بس ومعاش تفكر في شي..فكر في نفسك وبس..
قعد يشوفلها بنظرات اربكتها..نظرات تقوللها انه مايبيش يمشي ويخليك..لكن هي كذبتهم..
جاها اتصال..هربت بعيونها عنه ومشت طول للدار..
تنهد بضيق..ومشي لداره..
خدي منها شنطته طلعها وحطها قدام الباب..
بعدين دس اللاب في الشنطة متاعه وخدي الطرمس وحطهم حدا الباب..
ع طلعتها تستعجل فيه وتقول..
/خلاص المهدي وسدرة وصلوا توكل ع الله..
عبد القيوم بضحكه:شكلك تبي الفكه مني !
ابتسمت بإرتباك وعيونها تعبوا دموع وهي تقول..
/لا والله ماهكي..مانبيكش تعطل بس..
ابتسم ابتسامه يخفي ألمه...
هي مدت يدها وقالت..
/في أمان الله..
صافحها وشد ع يدها بقوة..قعدت تشوف لعيونه بنظراتها الغارقه بالدموع..
طلق يدها وحط يده ورا راسها قربها ليه وطبع قبله ع جبينها خلت قلب طوبى يفر فران...
وبعدين بسرعه تباعد عنها وعطاها ظهره خدي شنطة اللاب توب ولبسها..رفع شنطته والطرمس..ومشي طول طلع من الحوش..
وهي معاه بعيونها ودموعها ينزلوا..
🍁ركب سيارته..وشغلها وتحرك بسرعه وطلع من المزرعه وهو يحرق في العجل...
ع طلعته هو وصل المهدي يدوب حياه بيده وفات يجري..
سدرة:وكان يلقى يخلي سيارته صاروخ..
المهدي:مافيش داعي تدوي دوة زي هادي قدامها بكل مادابيك ماتدويش عليه نهائي خليها تغير جوها وتنسى همومها تمام!؟
تنهدت بضيق وهزت راسها بالموافقه..
🍃ويدرسوا قدام المزرعه وهما يراجوا فيها..
شويه وطلعت وهي شاده شنطه وشكارة فواكه وباقة ورد وقفص صغير وابتسامتها ع وجهها..
تفاجئت سدرة لما شافتها متغيرة ومزيانه هلبه..
والمهدي لاحظ نفس الشي..
نزل من السياره ومشي خدي منها الحاجات حط الشنطه وشكارة الفواكه من الخلف..وهي ركبت السيارة بالباقه بالقفص وتشوف احلى مفاجأة..
طوبى بفرحه:جنوني..
جنه اللي كانت كيف فايقه لما شافت امها ابتسمت بفرح وقالت..
/مامي..
وضموا بعض بقوة..ذرفت طوبى دموعها وهي تضحك..
وسدرة تشوفلهم بإبتسامه ألم ودموعها ينزلوا..
نفس الابتسامه اللي كانت ع وجه المهدي وهو يتحرك بالسيارة ويشوفلهم من المرايه...
🌼🌼🌼🌼
"هذا ارنوب اسمه ونوسي"
جنه وهي تشوف للأرنب قال..
/نوسي..
ضحكت امها وقالت..
/ونوسي البنيه الحلوة هادي بنتي واسمها جنوني..
قربت من الارنب ودارت روحها تسمع فيه بعدين شافت لجنه وقالت..
/قالك كيف حالك ياجنوني..
جنه:حمدولله..
ضحكوا كلهم بعدين طوبى عاودت نفس الحركه وشافت لجنة وهي تقول..
/قالك انتي حلوة هلبه..
جنة رفعت حواجبها وقالت..
/ايه هلبه..
قعدوا يضحكوا عليها وامها تحضن فيها وتبوس وهي تقول..
"الله يبارك..الله يبارك"
🌼ويوصلوا لمزرعة المهدي..
اول ماخشوا استريحوا شويه بعدين خلوا جنه مع عمها وخشوا للكوجينه يوتوا في الغدي..
سدرة كانت تتكلم مع طوبى في كل شي الا المواضيع اللي تنغص ع طوبى...
وطوبى تتفاعل معاها ويبان جوها حلو وسدرة وهي تشوف فيها هكي قلبها يرتاح..
☘ويعدي باقي النهار وطوبى عايشه كل لحظه فيه مع جنة وجنة فرحانه هلبه بوجود امها معاها..
بعد العصر طلع بيهم المهدي لأحدى مدن الالعاب في المدينه..
غادي طوبى عاشت احلى اللحظات مع بنتها وكانت طول الوقت الضحكه ع وجهها مافارقتهاش..زي ذكر الله اللي مافارقش لسانها..
🍁لكن عن عقلها غاب عبد القيوم..نساته تماما..زي مانست هاتفها اللي من لما طلعت من مزرعته وهو محطوط ع الصامت..اساسا ماكانش خاطر ان حيتفكرها بكل لما يشوف سلافه...
وهو اساسا معاش شاف غيرها من لما خلاها..
اغلب وقته سرحان وعقله مش معاه..حتى وقت كرموه كان باين عليه انه جاي بالسيف..
وفي حفل الافتتاح كان يجامل مجامله..مش قادر يركز ع شي نهائي كل شويه يتصل بيها ماتردش وقلبه والعه فيه النار وسلافه مركزة عليه وقلبها موجوع...
🍃🍃🍃🍃🍃
"باهي كان واخدها لان يحبها حق هي علاش قالت هكي يومها"
سلافه بحزن:مو مهم المهم انو بيحبا ياميار هاد المهم..
ميار بأسف:خلاص انسيه وحوليه من راسك معاش تعذبي روحك سوفي..
مسحت دموعها وهزت راسها بصمت وهي تمرر في نظرها ع المنتزه اللي كانوا مقعمزين فيه..
🍁عبد القيوم فهالوقت كان في مكان شغله مع صاحب ع الحوش..
ع اعصابه اللي يتمالك فيهم بقوة..قعد حوالي ساعتين وروح..
🍁🍁🍁
خش لشقته وهو يتصل بطوبى للمرة العاشرة وماردتش..
اتصل طول بالمهدي وهو معصب ع الآخر...
☘في المزرعة..
كان المهدي بجهز في الشوايه ناويين بيديروا العشي شوا..
جاه الاتصال..طلع هاتفه من جيبه شاف المتصل وفتح الخط ورد..
/ايوه..
"ايوه مهدي..طوبى وين!؟"
المهدي بإستغراب..
/في الحوش مع بنتها..
"كيف قصدك جبتوا جنة معاكم!؟"
المهدي:ايه..
"باهي كنهاماتردش ع هاتفها"
المهدي:لما طلعنا بكري نساته في الحوش..
"وين طلعتوا؟"
المهدي:اهو دهواري ورفعنا جنه للملاهي..
"باهي طوبى شن جوها شن دايره"
المهدي:امورها تمام والحمد لله..شاف سدرة جاياته قال..لحظة عبد القيوم..بعد هاتفه وهو شاده وقال..
/قولي لطوبى تشوف تليفونها..
سدرة بإنزعاج:ماعندها مادير بيه..
فنص فيها المهدي تأففت وقالت..
/باهي..حطت الصونيه متاع اللحم ومشت خشت للحوش..
وهو رجع رد ع عبد القيوم وقال..
/كون هاني ياعبدو وماتخممش فيها..
'"باهي باهي..تصبح ع خير"
المهدي:قدامك كل خير..
🍃داخل خشت سدرة لقت طوبى مقعمزه تقرا في القرآن..سورة البقرة وجنة راقده حداها..
مابتش تقطع عليها..خلتها تقرا ومشت طلعت لراجلها...
🍃🍃🍃🍃
"لالا..لانكلمه لايكلمني ياعمتي"
كامله بإستغراب شديد..
/علاش رافضة الموضوع هكي!؟ معاش تبي تتزوجي!
خديجه:لامش هكي..لكن الموضوع هدا مش مستريحتله..
كامله:علاش باهي عطيني سبب يقنعني..
خديجه برفعة حاجب..
/اللي عرفته عنه انه بعد طلع فات موضوع الزواج بكل علاش توا خطر عليه!
كامله:مفيده قالت عاجبتيه..
خديجه:توا واحد زيه ياما شاف في حياته وهلبه يتمنوه وبنات صغار مش مطلقات ولاارامل ولاعوانس..علاش يختارني اني..
كامله برفعة حاجب..
/قصدك لهالدرجه مش شايفه في روحك شي يعجب!
خديجه بغرور..
/اكيد لا..بس اللي نبي نوصلهولك ان جمال هدا فيه حاجه مش مزبوطه مدرقها ولما عرف بقصتي فهم اني مسكينه وياناري عليا وندور في السترة وخلاص قال خل ناخدها وبعدين ندير مانبي..
ابتسمت كامله بتهكم وقالت..
/هو هدا..انتي خايفه اللي درتيه في بنت الواعر يولي عليك..
خديجه بإنزعاج:شن تقولي ياعمتي شن درتلها بنت الواعر مادرتلها شي انتي اللي مانكش عارفتيها كويس ولاعارفه شن دارت..
كامله:مانبيش ندوي في مواضيع الكلام فيها مش منه فايده..ياودي ع راحتك ماتبيش خلاص..لكن نقولهالك ماتعبيش ديري هكي مع غيره..
خديجه:اطمني حتى اني نفتك منك مش انتي بس..
ضربتها عمتها ع رجليها وخديجه قعدت تتحسس في رجلها وهي تضحك..
🍃🍃🍃🍃🍃
الساعه 12:00ليلا..
دهنت طوبى جسمها بزيت الزيتون المرقي وخشت فراشها جنب جنه..
خدت شنطتها متاع اليد..فتحتها وطلعت منها هاتفها فهاللحظه اللي اتصل فيها عبد القيوم..
ابتسمت بفرح وقلبها فرفح..
فتحت الخط وقالت..
/السلام عليكم..
"وعليكم السلام..باهي والله اللي عبرتينا وعدلتي علينا"
طوبى بضحكه:انشغلت مع جنوني طلعوا جايبينها معاهم مفاجأه..
"قالي المهدي وفرحتلك واجد..لكن مع هذا عاتب عليك لدرجة الزعل..شوفي كم مرة كلمتك وانتي مش مهتمه نهائي والله عقلي تم يشيل ويجيب لعند ماكلمت المهدي وقال طلعنا ونست هاتفها..باهي انتي ليش مافكرتي اني ممكن ننشغل ياطوبى !"
طوبى بضيق وحزن..
/اسفه والله بدون قصد بعدين قلت اكيد مشغول ماعندي علاش نكلمه ونعطل فيه..
سكت ومعاش رد عليها..
طوبى:عبد القيوم..
تنهد وقال..
"المهم انتي كويسه جوك تمام "
بعيون مليانات دموع قالت..
/ايه الحمد لله.
"باهي تصبحي ع خير"
بضيق شديد قالت..
"قدامك كل خير"
نهت المكالمه وهي مضايقه ع الآخر..
حطت راسها ع المخده وهي شاده هاتفها وتشوفله..خطر ع باله تتصل بيه حاساته زعل منها وتبي ترضيه..
بدون ماتفكر زياده اتصلت بيه...وحطت الهاتف ع وذنها وللأسف عطاها الخط مشغول..
نهت المكالمه وهي مضايقه ع الآخر..قعدت تفكر للحظات بعدين قررت تخش ع الفيس قداش ليها عليه..
واول ماتخش..
يجي قدامها منشور مشار بيه لعبد القيوم اللي ولى من ضمن اصدقائها ع الفيس قبل اسبوع..
المنشور كان فيه صور عن التكريم وافتتاح المعهد..
خشت عليهم تشوف فيهم..
وتقابلها اول صورة..
لعبد القيوم واقف يكلم في سلافه وهو مبتسم وهي تضحك كانت صورة عفويه مش معروف شن اللي كان صاير بالزبط لما المصور خداها..لكن عليها بس في اللي تشوف فيه بعيونها..
مرت ع صور..صورة ورا التانيه واغلبهم كانت فيهم سلافه معاه..
طلعت من الفيس ودموعها ينزلوا..كانت تبي تتصل بيه وتصرفت بدون ماتفكر وهي تحت تأثير مشاعرها وترجع تتصل بيه وتلقاه مشغول..
سكرت وحطت هاتفها جنبها وقبلت بوجهها لجنة وقعدت تتأمل فيه بحب هي تذرف في دموع الحزن...
#انا_وياك
#طوبى
...يتبع...
