#طوبى "جنة طوبى"
#جمان_فريد
#الجزء_109"عرجون فل"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#التسبيح
التسبيح من الأذكار العظيمة
قال ابن مسعود رضي الله عنه :
ما كُرِب نبي من الأنبياء إلا استغاث بالتسبيح
فأكثروا من التسبيح في الرخاء والشدة
"الذين يحملون العرش ومن حوله يُسبّحون بحمد ربهم"
ويقال أن الملائكة لم يعينوا على حمل العرش إلا بالتسبيح
فالتسبيح يفرج به الهموم وتفك به الأزمات وهو سر من أسرار الإستجابة كما شرط من شروط اداب الدعاء لأن لكي يكون دعاءك صحيحا لابد من الثناء على الله والتسبيح فيه ثناء على الله وتنزيه له....🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃"لابد أن نتألم حتى النهاية في سبيل سعادتنا المقبلة، يجب أن نشتريها بآلام جديدة. إن الألم يطهر كل شيء..!"
دوستويفسكي
______________________________________
"شن في إن شاء الله خير!؟"
سألت طوبى فاتن هالسؤال بعد ماطلبت منها تكلمها ع انفراد في موضوع مهم..
جاوبت فاتن وهي متوتر وباين في عيونها الخوف..
/مش عارفه لو كان خير ولالا..
طوبى بقلق..
/شغلتيني يا فاتن..
خدت فاتن نفس بعدين مسحت ع جبهتها وقالت..
/اني حامل..
طوبى ماابدتش اي ردة فعل قعدت تشوفلها بس..
مشاعرها وقتها تضاربت..لاعرفت تفرح لفاتن ولاتخاف من مختار..
فاتن بتوتر؛بان عليك الخوف..حتى انتي خفتي..
طوبى بشي من القلق..
/هو مش خوف خوف..بس يعني قعدت نفكر في ردة فعل راجلك..
فاتن بضيق..
/من لما عرفت واني مانفكر غير في ردة فعله ماقدرتش نفرح..وعلاش نفرح واني عارفه ان فرحتي مش حتم..
طوبى:اهدي شويه فتونه..مرات اني وياك بالغنا في خوفنا..تشوفي فيه كيف تعود ع جنه وحبها وهو قبل كان مايحبش يشد الصغار ماتندريش مرات ولى في قلبه شوق ان ربي يرزقه بصغار..
فاتن بشي من الامل..
/هكي تقولي!؟
طوبى:ايه..من رأيي تخبريه بطريقه مميزة تخليه يتقبل ويفرح..
فاتن بضيق:مانقدرش نخبره واني عارفة موقفه من الحكايه هادي كويس مش حيتغير بين يوم وليله ياطوبى..
سكتت طوبى وهي تفكر..
وفاتن قاعدين الخوف والقلق مسيطرين عليها..
🍃🍃🍃🍃🍃
الساعه 8:15مساءا..
في الشقه اللي قاعدين فيها عيلة نبيه الكسابكجي كانوا مرته وبناته عايشين حالة من الخوف والقلق حتى هما..
نبيه طلع من بعد العصر ومازال ماروحش..يتصلوا بيه رقمه مقفل..
🍃شاديه بخوف..
/ياربي دخيلك ياربي..ياربي الرجال وين راح وين!؟
سلافه بقلق شديد..
/طولي بالك مشان الله يمكن يكون راح ع المطعم..
شاديه؛لك قلتلك ماعندوا شغل بالمطعم اليوم..خبطت ع فخادها وقالت..ماعنده..
لبانه بخوف:ماما لاتعملي هيك يمكن يكون ع الطريق هلأ..
فجأه دق باب الشقه..
مشت سلافه بسرعه بش تفتح وهما وراها..
وصلت في الباب وفتحاته..
والثلاثه جحظت عيونهم في نبيه وهما يشوفوا فيه بحالة يرثى لها..
اثار ضرب ع وجهه..وحوايجه ملوثات بالتراب..
خش وهو في قمة التعب وكانت باديه ع وجهه ملامح الصدمه..
شاديه بصدمه:نبيه!؟ ليش هيك حالتك !؟
سكرت سلافه الباب وجت لبوها شداته من ذراعه وهي تقول بصدمه..
/من عمل فيك هيك بابا!؟
تكلم بصوت متعب وهو يقول..
/راحو المصاري..راح التعب الشقا..
طاحوا دموع لبانه..
وشاديه تقوله بنبرة مرتعشه..
/فداك حبيبي فداك المهم انت تكون بخير..
قعد يمشي بتعب وهو يقول..
/اي خير!؟ من لما طلعنا من بلدنا ماشفنا خير..راح الخير..راحت الكرامه..راح كل شي..
سلافه وقفت في مكانها وهي تشوف لبوها بألم ودموعها ينزلوا..
🍃مروا قدام عيونها ايام خوالي..ايام كانت عايشه مع اهلها معززين مكرمين..بوها ليه قيمته في شغله بين جيرانه وناسه امها مراة مقدرة تحب تجمع العيله في حوشها والخير كله ديره لما يجوها..
هي واختها مش ناقصهم شي كانوا عايشين بش يحققوا احلامهم وطموحاتهم بس..
ودار الزمان وع قولة بوها راح كل شي..
حتى الاحلام راحت والطموحات ماتت وتوا بدوا يعافروا بش يعيشوا...🍃
انتفض قلبها بفجعه لما شافت بوها طاح ع الارض..
صوت ارتطام جسده بالأرض هدها هي من داخل..
وصوت صراخ امها واختها مزق روحها..
"نبيه..نبيه مشان الله رد عليي ياربي لا دخيلك لا ماألنا غيروا ياربي"
ولبانه تنادي في بوها وتراجي يرد عليها ولاصوت ولاحركه جوها منه..
سلافه اللي ديما في مواقف زي هادي تعرف تتصرف مشت بسرعه طلعت من الشقه ودقت ع باب شقة جارهم حتى هو نازح وساكن بالايجار..
انفتح الباب وطلعوا هو ومرته مفجوعين..
سلافه بذعر..
/الله يخليك الله يخليك خدنا ع المستشفى بابا اغمى عليه ماعم يفيق..
الراجل قال:حاضر يابنتي راجي شويه...
وخش بسرعه..مرته بخوف؛بالك رقي عليه الضغط..
سلافه بخوف شديد ودموعها ينزلوا..
/مابعرف..مابعرف..
🍃ويطلع الراجل من شقته ويخش مع مرته لشقة نبيه..
حاول ينهضه بروحه ماقدرش عليه اضطرت سلافه تنادي ع شباب واقفين قدام العمارة..
ساعدوهم ونزلوه للسيارة..ومشوا مع الراجل مرته وشاديه وسلافه اما لبانه قعدت في شقة جارهم مع بناته..
🍃توجهوا لمستشفى عام..
ومن سوء الحظ كان المستشفى في حالة طوارئ استقبل عدد من جرحى جبهات القتال كوادر المستشفى كلها لاهيه بيهم..
وسلافه وامها يجروا بكرسي متحرك حاطين عليه نبيه وهو فاقد الوعي..
يدوروا ع حد من الاطباء او حتى الممرضين يعبرهم لكن للأسف مااهتم لأمرهم حد..
لعند ماجاهم واحد وقال..
/ارفعوه لمكان تاني يااختي راهو بيقعد للصبح ماحد يدوره..
شاديه ببكي؛لوين بدنا ناخدوا يابني لوين..
:ارفعوه ل*******..
جارهم قال:خل نرفعكم غادي..
🍃وطلعوا بنبيه ومشوا بيه لمستشفى عام تاني..
استقبلوه في الاسعاف والطبيب اللي فحصه بعد ماشاف ضغطه قال..
/هدا حولوه لمصحة ***** هني مايقدروا يديروله شي..
شاديه خبطت ع وجهها وقالت..
/اوليي علي اوليي..
سلافه وع وجهها ملامح الموت قالت..
/طيب شو صاير معه فهمنا..
بلامبالاة قال..
/ارفعوه غادي بسرعه الدكاترة غادي تو يقولوكم شن فيه..
ومشي وخلاهم في حالة صدمة شديده..
سلافه؛ياربي مصحة شو!! نحنا مامعنا شي ندفعوا للمصحات.!
بدت شاديه تنوح وتبكي ع راجلها ولأنها تسببت في ازعاج للمرضى طلعوهم كلهم ونبيه معاهم ع كرسي متحرك..
شاديه وهي تبكي بشده..
/ياربي ماالنا غيره ياربي دخليك لاتحرمنا منه ياالله..
جارهم بأسف قال..
/ياريت نقدر نساعدكم ياريت..
والناس حواليهم يتفرجوا بس مافي حد فكر يجي ناحيتهم..
سلافه كانت تسمع في نواح امها وهي تشوف لبوها وتفكر في عز هالمصيبه شن بدير..
اقاربهم اللي كانوا في ليبيا طلعوا منها ليهم شهور..
خطيب اختها واهله برا المدينه...
ماعندها حد تستنجد بيه غيره هو..
رفعت تليفونها وهي ترجف حطت ع رقمه واتصلت بيه..
🍃هو في هالوقت..
كان في الحجرة اللي يمارس فيها هوايته..
منعزل بيها عن كل الناس..يكتب في اسم محبوبته وعقله مايفكر كان بيها..
جاه اتصال سلافه قطع عليه تفكيره..
خدي تليفونه وشاف المتصل زاد ضاق صدره..
قعد يتفرج عليه لين فصل..وبعد فصل سكر تليفونه وحطه في مكانه..ورجع يكتب في اسم طوبى ويفكر فيها..
🍃وسلافه عاودت اتصال بيه وتسمع البداله تقول..
"الرقم المطلوب مقفل"
زادت ع صدمتها صدمة تانيه..حسستها بشعور بشع زاد وجعها وجع مميت..
شافت لأمها لما قالتلها..
"اتصلي بالأستاذ ربيع"
وكأن شاديه كانت عارفه ان بنتها اتصلت بعبدالقيوم وماباش يرد عليها...
سلافه بصوت يرجف..
/طيب...
وقعدت دور ع رقم المطعم لين لقاته واتصلت..
ومازال تسمع في صوت بكي امها ونواحها...
🍃🍃🍃🍃🍃
ربيع في هالأثناء..كان في الشقه يتعشى مع مرته وولدها وهما يهدرزوا...
نسرين:عجبتني اكبر من هادي واشرح..
ربيع:خلاص ان شاء الله الشهر الجاي نبدوا نحولوا..
ويجيه اتصال..
تليفونه كان قريب ع نسرين خداته ومدتهوله..
هو خدي التليفون شاف رقم غريب يتصل بيه..
فتح الخط ورد..
/ايوه..
"استاذ ربيع"
شاف لنسرين ونسرين تشوفله وهو يقول..
/ايه من معاي...
ونسرين تراقب في ملامح وجهه..شافت صدمه بانت عليه خافت..
ناض وهو يقول..
/وينكم بالزبط وين!؟
مشي بسرعه طلع لدار النوم ونسرين لحقاته تجري..
🍃🍃🍃🍃🍃
"باهي الحمد لله خير من بكري بهلبه"
صفيه:الحمد لله..مسحت ع شعر مهاب وقالت..بعيد السو عليه هالسمح..
ابتسمت غرفه وهي تشوف لولدها..
وماحستش الا واواب طايح عليها وشادها وهو يقول..
"هبيبي"..
ضحكوا..
وطوبى بضحكه؛سلم النغارين..
وتقول كلمتها من هني وتجيها تجري من هني تحضنها وهي تقول..
"ماما بيبي"
وتعالت اصواتهم بالضحك..وفاتن تراقب في هالمشهد الجميل بإبتسامه حسرة ودموعها في عيونها..
ع خشة اريج وهي تقول..
/خالي مختار جي..
انقلب مزاج غرفه للسيء..وقلب فاتن انقبض بخوف..
طوبى وهي ضامه جنه قالت..
/قوليله يخش مافي حد..
اريج وقفت في الباب وشافت برا وهي تقول..
/تعالى خالي..
بعدين خشت..وهو خش بعدها ونص وجهه مدرق بالكمامه..
فاتن هربت بعيونها عنه من الخوف..
اما هو بعد ماسلم بالكلام..جي لجنه وهو يقول..
/قلبي..
جنه قعدت تشوفله بخوف..
طوبى؛خوفت البنت نزلت الكمامه..
نزلت الكمامه وهو يقول..
/جنوني..
اشرق وجه جنه بإبتسامه فرح وهي تقول..
"بابا"
خداها ورفعها في حضنه وهو يضحك..
وفاتن تشوفله ودموعها في عيونها..وعيون طوبى عليها..
مختار؛حبيبة قلبي..مرر نظره حواليه وهو يقول..كيف حالكم..ثبت نظره ع مهاب..عقد حواجبه وقال..خيره مريض!؟
مابتش غرفه ترد..ردت عنها صفيه وهي تقول..
/ايه مريض شويه..
مختار:عاينتوه!؟
طوبى:العصر روحنا بيه من المصحه برده عاديه مش كورونا ماتخافش..
شافلها بطرف عينه بعدين مشي قعمز بجنه وهو يقوللها..
/كل ماتكبري تحلي يابنت انتي..
🍃وقعد يلاعب فيها وطوبى وفاتن يتفرجوا عليه..
اما غرفه وصفيه واريجانشغلوا بالهدرزة..وصغار غرفه يتفرجوا من بعيد ع مختار وهو يلاعب في جنه..
🍃🍃🍃🍃
ويوصل ربيع بيسارته للمستشفى..خش بيها داخل وشاف قدامه نبيه ع كرسي متحرك ومرته وبنته حواليها في حالة يرثى لها..وجارهم وزوجته يراقبوا في وضعهم بأسف..
نزل ربيع يجري وبمساعدة جارهم رفعوا نبيه للسيارة ركبت معاه شاديه بس..اما سلافه ركبت مع جارهم ومرته وطلعوا مع ربيع من المستشفى متوجهين لأقرب مصحة...
🍃وعبد القيوم في شقته يجهز لنفسه شاهي اخضر ومازال معكر وعقله عند طوبى بس..
🍃وطوبى بعقلها مع مختار..
ومختار عقله مع غرفه...شافها طلعت للكوجينه بش دير لبنتها مرضعه..ناض ومشي طلع وراها...
🍃🍃🍃
في الكوجينه..
صبت غرفه مية معدنيه في الكاتل وشغلاته وقعدت تراجي لين تدفا الميه..
"عنده علم ان ولده مريض"
طفت الكاتل وهي تقول..
/ايه جاه غادي..
قدم مختار وهو يقول..
/معناها تلاقيتوا..جابلك سيرة باللي صار معاه امس..
التفتت وشافتله بإستغراب وهي تقول..
/شن صار معاه امس!؟
ابتسم مختار تهكما وقال..
/اكيد مش حيقول..
غرفه بنفاد صبر..
/ياقول شن صار يااطلع..
مختار:بنقولك حتما..بس لسبب حنذكره بعدين..راجلك امس كان حيتعرض لمحاولة خطف نجي منها بفضلي..
غرفه بصدمه..
/خطف!
مختار؛ايه..المعلومه وصلتني من مصادر خاصه ولما تأكدت منها بلغت جماعته في الكتيبه وداروا اللازم..
غرفه بعدم استيعاب..
/علاش بيخطفوه ومن بيخطفه!؟ لالا هدا ملعوب جديد منك..
مختار:توقعت تقولي هكي..مش مشكله كلمي خالك المحجوب واسأليه وحتعرفي منه لو اللي صار ملعوب مني ع قولتك ولالا..
غرفه قعدت تفكر بخوف..
ايه خافت عليه..وهدا شي طبيعي..ع عيون العشرة اللي بيناتهم وفي النهايه يقعد اب صغارها..
مختار:اكيد سألتي نفسك شن مصلحتي من اللي درته..تعرفي ان راجلك مايستحقش مني ندير هكي ع خاطره..اني درت هكي بش نخلص نفسي من الشعور بالذنب...اني سبب الحال اللي وصلتوله واني اللي لازم نصلح بينكم حتى لو كان بشكل غير مباشر..اني بصريح العبارة حاولت نعتذر لراجلك ع خاطرك انتي وصغارك لعل وعسى يتصلح حالكم ومعاش يكرر راجلك غلطته ويعايرك بيا..لكن الباين انه ماقبلش الاعتذار ولاقبلها ع نفسه يبان محقوق قدامك يبي يقعد ديما هو بس اللي ع حق..هدا علاش ماحكاش اللي صار معاه...
قعدت غرفه ملتزمه الصمت وهي تفكر في كلامه..
مختار:مع هذا نقولك فكري في صغارك وتراجعي عن فكرة الطلاق..مكتوبلك تعيشي مع راجل يشوفلك بنظرة دونيه هدا نصيبك وارضي بيه..غيرك قاعدين مع رجاله اسوأ منه بمراحل ويتمنوا في رضاهم اصبري زي ماصبروا هما وتحملي..
كلامه زاد قهرها وحرق قلبها..التفتت ع الكاتل خداته وصبت منه في المرضعه..
سكرتها ومشت طلعت من الكوجينه ودموعها ع حافه جفونها..
هو بعد ماطلعت بكل برود مشي للكاتل اللي قاعده فيه ميه وشغله..
بعدين مشي لدولاب "خزانه" الماعين خدي "مق"..
ورجع لمكان الكاتل..
غلت الميه طفا عليه..فجأه..سمع باب الكوجينه تسكر...
ضيق عيونه وهو يشوف للمق..بعدين حط يده في جيبه وطلع كيسه فيها وراق مليسا..
فتحتها وطلعهم منها وحطهم في الميه وخدي صونية فنجان كانت محطوطه قدامه وغطا بيها المق..
لف وجهه يساره..
شاف طوبى واقفه تشوف للمق بريبه..رفعت عيونها فيه لقاته يقلد في نظرتها..
طوبى بريبه:شن هدا!؟
مختار؛مليسا يامليسا..
طوبى:مليسا!؟ شن دير هادي!؟
مختار:هادي عشبة الروقان متاعي..
طوبى بخوف..
/قصدك مخدرات!؟
قعد يضحك وهو يحرك في راسه يمين ويسار وقال..
/هادي عشبه نافعه طبيه من عيلة النعناع مفعولها زي مفعول البابونج واليانسون ويخي هي خير منهم بهلبه..
طوبى:قصدك تهدي في الاعصاب!؟
مختار؛تخليك قمة الريلاكس..وعندها فوائد تانيه ابحثي عنها تعرفيهم..
طوبى:وانت جايبها معاك وحاطها في جيبك زي الكحول!..
لفلها وخر بالطوه وحط يده في نصه وهو يقول..
/اول مرة..نقولك علاش..هدا ياستي اني محرص ع زوجتي الجميله ماتطلعش من الحوش بتاتا واليوم قبل الظهر طلعت..سألنا امينه..وينها ياامينه..قالت راحت مشوار صغير وراجعه.. وهالمشوار الصغير شوره كبر في الطريق وخلاها توصل هني وتقعد لهالساعه من غير ماتعطي علم..ولأن الموضوع مايبيش تفكير عرفتها جت هني..فخديت معاي مليسات واني جاي قلت نشربهم عندكم بش نقعد رايق ومانعصبش عليها...
طوبى:ماعندك علاش تعصب عليها المراة خلوقها طبقوا جت توسع خاطرها..اشرب مليسا اشرب..
مختار؛مازال مش توا..ايه قوليلي في شن تبي تكلميني!؟
طوبى:واضحه من تسكيرة الباب عرفتني بنكلمك في موضوع لكن قبل كل شي بنسألك..شن مصلحتك من اللي درته مع عبد الرؤوف!؟
ابتسم وقال..
/ماعنديش اجابه..
طوبى:مختار!
ضحك وقال..
/يعني لو قتلك لإثبات حسن النيه بتصدقي!؟
طوبى بإستغراب..
/حسن نيه!؟
مختار:ايه..نبي نصلح..نبي نفتح صفحه جديده..نبي ندير شي نكفر بيه عن اخطائي..وطبعا انتي مش حتصدقي كلمه من اللي قلتها..لأن الملاك مستحيل يصدق ان الشيطان عنده حسن نيه..واني في نظرك شيطان بقرونه..
بدت ع وجه طوبى ملامح الامتعاض بعدين قالت.
/باهي يا شيطان بقرونه اشرب مليسا..
قدملها خطوه وحط يده ع راسها وقال..
/بيني وبينك 23سنه..يعني كنت اكبر منك توا لما جيتي ع الدنيا..كلامك معاي بالأسلوب هدا غلط ولا!؟ ياسمح ياملتزم يامتحجب يللي تلبس في جلابيه دخل معاك عشره وتغطي في راسك بشاربه زي الخيمه..
طوبى شدت ضحكتها بقوة وهي تقول..
/باهي خلاص..اسفه..ممكن تشرب مليسا وتقعمز..
وخر عنها وهو يشوفلها بطرف عينه بعدين خدي المق وبدي يشرب وطوبى تشوفله بقلق وترقب..
🍃القلق والترقب..
اللي عايشينهم توا سلافه وامها وهما يمشوا ويجوا في ممر المصحه يراجوا في اي خبر يريح قلوبهم..
وربيع واقف بعيد عنهم يراقب في حالهم بحزن وقلق..
اتصل بعبد القيوم اكثر من مرة عطاه مقفل وماعرفش بعدها يوصل فيه..
شاف الدكتور اللي استلم حالة نبيه جاي مشاله يجري وسلافه ونبيهه جوه يجروا من الجهة التانيه..
شاديه بخوف..
/طمنا يادكتور..
الطبيب وملامح الأسف باديه ع وجهه قال..
/للأسف تأخرتوا هلبه..عظم الله اجركم..
شاديه كادت تنجن ..ناحت وصاحت وقعدت تخبط ع وجهها ورجليها..وسلافه وهي تبكي بشده كانت تحاول تهديها..
الطبيب وجعه حالهم مشي وخلاهم وربيع حتى هو ماتحملش تباعد عنهم وعطاهم بالظهر وهو متأسف وحزين ع نبيه وعيلته...
🍃🍃🍃🍃🍃
"اهو شربت المليسا يامليسا قولي شن عندك"
طوبى:قعمز..
وخر الكرسي وقعمز..وهي قعمزت مقابلاته..
قعدت تشوفله وهي ساكته..وهو يشوفلها بصمت شويه وقال..
/ايه وبعدين!!؟
طوبى:انت علاش حبيت جنه!؟
رفع حواجبه بتعجب..
طوبى:نعرفك ماتحبش الصغار انت قلت هكي..بس علاقتك بجنة بينت العكس..
نزل حواجبه وقال..
/جنة حالة خاصه لتوا مش قادرة نفسرها..
طوبى:لاتفسيرها واضح..جنه بنت اختك ويقولوا الخال الوالد..
ضحك وقال..
/نهائي..اصلا اللي نحس بيه معاه نحس بعكسه معاك..
طوبى بأمتعاض..
/ماعلينا...المهم..انت تحب الصغار وتظاهر بالعكس والصغار يحبوك ويرتاحوا معاك..شفت ولاد غرفه كيف جوك وقعمزوا حداك وانت طول انسجمت معاهم!؟ شن معناه هدا قولي!؟
مختار:تمام تمام..فهمت..اكيد فاتن فتحت معاك موضوع الصغار وتبيك تقنعيني بيه..لكن مش عارف علاش اختارتك انتي وسيط عارفتنا نحبوا بعض هلبه!
تجاهلت طوبى كلامه وقالت..
/انت حتولي اب غصب عنك..
مختار بضحكه:نعم!
طوبى بخجل؛فاتن حامل!؟
عم الهدوء المكان..رفعت طوبى عيونها فيه لقاته يشوفلها بنظرة غريبه و ملامح الضحكه قاعده ع وجهه..
هي خدت نفس وقالت بهدوء ولطف..
/صدقني احلى حاجه في الدنيا الصغار يغيروا حياتك كلها للأحسن..يغيروا طباعك ونفسيتك يخلوك واحد تاني..مرات ربي يبي يعوضك بيهم..شفت المشاعر اللي تحس بيها مع جنه حتحس اضعافها مع صغارك..ماتحرمش نفسك وتحرم فاتن مسكينه من هالنعمه..
ولت ملامح وجهه عاديه وهو يقول..
/ناديهالي..
تنهدت..بعدين ناضت وقالت..
/حاضر..
ومشت للباب..وقفت عليه التفتت شافلته لقاته سرحان..
فتحت الباب وطلعت وقلبها يدق بقوة من الخوف..
🍃🍃🍃🍃🍃
"وين راجلك"
نجاة:خدي دوش سخون ورقد..
مغليه:خليه يتريح وليدي..
خديجه:شن جو مصراته!؟
نجاة:عادي..انتم شن جوكم هني هديكا ماجتش هني بكل!؟
خديجه؛نهائي..
نجاة:واللي ينقاللها سميرة تمشيلها!؟
مغليه؛مالا شنو اشبح لشن يتكتكوا ويخططوا..
نجاة؛شوفي عمتي اللي قاعد يصير كله من تحت راس الشيطانه طوبى..بدت بعمي الحاج بعدين ولده الكبير واكيد توا يخططوا ياخدوا الصغير..
خديجه؛قلتها لأمي..
مغليه بحمقه؛والله لو يديرها نغضب عليه دنيا وآخره..
خديجه؛تو يشجعوه يدير مادار ولدك الكبير..
نجاة:عاد سميرة وراه وربي يرعاه...
خديجه بحقد..
/سميرة الحقيره هادي ااه كان نحصل فيها فرصة..
ومغليه تسمع فيهم وهي تفور وتغلي من الغضب وفي قلبها
خوف من نضال يدير مادار خوه الكبير...
🍃🍃🍃🍃🍃
"متوقعه مني نقولك نزليه!؟"
فاتن بضيق؛نعرفك كويس ..
مختار؛تعرفيني بلاقلب للدرجه هادي!؟
فاتن؛مش هكي..قصدي حكايه الصغار عندك مرفوضه تماما..
تنهد وقال..
/تمام اني مافرحتش هلبه ونقولهالك بكل صراحه لكن قلت في نفسي خلي نعطوا ارواحنا فرصه..
بدت ع وجه ابتسامه وهي تقول..
/يعني تبيه!؟
هز راسه بصمت..
هي من فرحتها نست نفسها وضماته وهو قعد يطبطب عليها وابتسامته ع وجهه..
دق باب الكوجينه..
تباعدت طول وهي تضحك ودموعها نزلوا..
مختار وهو يمسح في دموعها قال..
/خش..
فتحت طوبى الباب وخشت وهي تقول بقلق..
/شن صار!؟
مختار:بنروح بيها بنقتلها ونقطعها ونلوحها في البحر..
ضرباته فاتن ع ذراعه..
طوبى بإمتعاض:شني فتون!؟
التفتت وقالت بضحكه..
/بتولي عمه..
ضحكت طوبى وهي تقول بحماس..
/عمه..جو..ومشتلها وضمتها وهي تقول..مبروك حبيبتي..
فاتن:الله يبارك فيك..
مختار؛اووف..الجو ولى كله معبي عواطف ومشاعر حلوة كتم ع نفسي..
ومشي طلع من حداهم..
طوبى وهي معاه بعيونها قالت بتعجب..
/هدا بشن معجون!؟
ضحكت فاتن من بين دموعها...
🍃🍃🍃🍃
وغرفه في دار المعيشه بنتها راقده في حضنها وهي سرحانه بتفكيرها في اللي سمعاته من مختار..
بغض النظر عن كل اللي قاله اللي داره لعبدالرؤوف في نظرها حيزيد كرهه وحقده عليها..بل فكرت في ابعد من هكي ان عبد الرؤوف حاول يكلمها اليوم بش يراضيها ويردها ويرجع ينتقم لنفسه من جديد...
هالأفكار خلتها في لحظه قامت تليفونها..
خشت ع قائمة جهات الاتصال..دارت لأرقامه حظر..
بعدين فتحت النت وخشت ع الفيس ودارتله حظر وع الماسنجر كذلك واخر شي الواتساب...
#عرجون_الفل
#طوبى
....يتبع...
