#طوبى "جنة طوبى"
#جمان_فريد
#الجزء_السادس_والثمانين "انتقام/فستان الإنتقام"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر
الله اكبر الله اكبر..لاإله إلا الله..
الله اكبر الله أكبر...ولله الحمد...🍀
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 انتم القوانين المؤقتة وانا الدستور ثابت 🍃
________________________________________
ومازلنا في يوم تسعة نوفمبر يوم الجمعه..
والمعروف عن يوم الجمعه ان صبحه يلم العيله ع الفطور...
وعائلات شارع القهوة لمتهم الصباحيه حيكون محور الحديث فيها العرس واللي صار فيه..
واهم ماصار فيه يوم امس اللي حيقعد حديث الساعه مش بس عن طوبى ونجاة..
حتى عن سميرة كنة عيت الصيد وضرتها وهالحدث بالنسبه ليهم كان "القنبله"
🍃وفي حوش الصيد..
اللي هو حوش العرس..الاهل والاحباب كلهم موجودين وملتمين ع سفر الفطور ولأول مرة ابتسام تكون معاهم..
وضع ابتسام وسطهم كان موترها لأن مافي حد متقبل وجودها اخطا خديجه..ونجاح اللي كانت تعامل فيها كويس لوجه الله..
وهما في عز فطورهم..
خش وليد صغير حفيد من احفاد نجمه وقال..
/خالتي سميره..
حناه وامه وسميرة شافوله..
وهو قال:عمي عبد الفتاح يبيك برا..
ابتسام شافت لسميره..
وكل اللي حواليهم يمرروا في نظرهم بيناتهم..
سميرة ولت شافت للسفره وقالت..
"ابتسام اطلعيله اني نبي نفطر"
كلهم اتفاجئوا ووجهوا نظرهم لإبتسام..
ماعدا نجمه اللي كانت تفطر بصمت وتبان عاديه جدا..
ابتسام شافت لسميره شويه بعدين ناضت ومشت بتطلع وهي تقول..
/وينه حبيبي؟
:تعالي معاي..مشي وهي لحقاته..
وابتسام ماعارضتش ومشت لأنها شبه فهمت قصد سميره وتبي تبين انها لما تطلع لعبد الفتاح مش حيهمه ان سميرة مابتش تطلعله..يعني مااختارش ينادي سميرة لأنه مستاحشاتها ويبي يشوفها مثلا...
🍃وتطلع ابتسام لعبد الفتاح لقاته واقف سرحان..
ابتسمت وقالت:عبدو..
هو استاقظ وشافها وكان باين عليه من نظرات عيونه الخيبه مع الغضب في نفس الوقت..شاف لولد خوه وقاله..
/اني من قتلك نادي!؟
:قلت لخالتي سميره هي اللي قالت للمراة هادي اطلعيله..
رفع عبد الفتاح حاجبه..
وابتسام قالت:خلاص برا حبيبي..
الولد مشي طول وهي شافت لعبد الفتاح وقالت..
/خليها براحتها مش ساهل اللي مرت بيه اليومين اللي فاتوا..
هو كتم غضبه وهز راسه وقال..
/بري حدديلي السوريه العربيه تلقيها في المربوعه..
هي قالت:حاضر..
طول مشي وخلاها..
وهي لفت ومشت وع وجهها ابتسامه...
خشت للحوش..وتوجهت للمكان اللي يفطروا فيه قالت..
/معليشي راما نبعتك للمربوعه تجيبي سورية عمك..
خديجه:نوضي راما..
ناضت راما وقالت:شويه بس..
ومشت طول..
ابتسام؛نبي مكوى نجاح؟
نجاح وهي تاكل:امم..تو نعطيهولك شويه بس..
هي مشت طول متوجهه للحمام..
خديجه؛تعالي كملي فطورك؟
جاها صوتها وهي تقول.
"لا خلاص الحمد لله"
خديجه:عندها الحق تبي تحافظ ع جسمها..
وولت تاكل..
اللي حواليها كانوا منغاضات منها حتى خوات نجمه لأن سميرة تعز عليهم..
اما نجمه فكانت تراقب في سميرة وعاجبها اللي دير فيه..
🍃🍃🍃🍃🍃
ومن حوش الصيد لحوش لطفي الواعر..
كذلك كانوا ملمومين ع الفطور واهل العرس يحاولوا يكونوا بحال احسن ع خاطر ضيوفهم وع خاطر العروس المسكينه اللي نكدوا عليها شياطين الانس اسعد ايامها..
بس ع سفر الفطور كان في وحده ناقصه...
وهالوحده كانت في الجنان واقفه تحت شجرة الياسمين تتكلم بالتليفون..
صفيه:قتلك ماجتش امس بنتها بس كانت موجوده نحنا قبل لنعدوا للصاله سمعتها قالت بتعدي لمعمل حار تجيب منه طلبيات للعشا...
"باهي كيف داروا في الطلبيات اللي قلتي عليهن"
صفيه؛ماسألتش الحق بس العشا ماكان ناقصه شي.. انا استنتجت انها جابت الطلبيات بعدين عدت
قعد ساكت معاش سمعت صوته..
صفيه:عبدو..
تنهد وقال..
"توقعت في حد غادي دارلها موقف ولا وجعها بالكلام"
صفيه بإستغراب:كيف!
"ماهو انا امس شفتها وهي راده للحوش كانت تبكي ووضعها صعب بكل"
كان يتكلم بنبرة فيها ألم..
صفيه بعد تفكير قالت بحزن..
/معناها شافتها..
"من هي!؟"
صفيه قعدت ساكته..
هو قال..
"فهمت فهمت.."
صفيه؛ربي يكون معاها مسكينه..خلاص عبدو بنسكر امي اكيد فقدتني..بعدين تستلمني وتقعد تحقق معاي..
"باهي باهي بس بنطلب منك طلب"
صفيه:شنو؟
سكت شويه بعدين قال..
"خلاص انسي..سلام"
ونهي المكالمه..
هي نزلت التليفون وقعدت تفكر بعدين ابتسمت بألم وقالت..
/ربي يكون معاك حتى انت..
تنهدت بحزن ومشت خشت للكوجينه...
🍃🍃🍃🍃🍃
الساعه 11:30صباحا..
في حوش شنيبه..
كان الجالي متكي في جناحه.
ضام فولار طوبى لحضنه..وقدامه اللاب مفتوح يتفرج ع فيديو يوم الحفله..الزفه متاعه هو وطوبى..
يتأمل في ابتسامتها الحلوة..وجمالها الفريد من نوعه برغم بساطة طلتها..
مميزة ماتشبهش حد..وهو هالشي عرفه بعد مافقدها وخالط وشاف غيرها ورجع لنجاة..
حس ان كل شي يريح بسرعه..
اعجابه بأي وحده تعرف عليها برا في سياق الخدمه..
اعجابه بنجاة وشخصيتها..
كله كان ليه وقت محدد لما تم كل شي حسه راح وكأنه لم يكن..
هي بس اللي قعدت تابته في قلبه..قعدت زي الحسرة..
متحسر عليها بيموت..
ومش قادر يتقبل فكرة التفريط في مراة زيها لو شن يصير..
تم فيديو الزفه..فتح بعده فيديو لسفرتهم في شهر العسل لتركيا..
يشوف فيها كيف كانت زي الفراشه طير حواليه وتخليه يبتسم من قلبه ويضحك وهو معاه..
جي بين عيونه اليوم اللي مشوا فيه للبسفور..
حديثهم وقتها..ضحكهم..خجلها الحلو..
ولما رفعها لحضنه وقعد يلف بيها وهي تضحك من قلبها..
ماكانش في اصفى وأحلى منها هي والعسل سواء..
ويتفكر يوم غنالها "زيدني عشقا"
كيف كانت تسمعله وهي تشوفله بنظرات حلوة من عيونها الحايرة...ياااه ع هالعيون قداش مشتاق يتأملهم ويشبع من شوفتهم...
شوقه زاد زاد..قريب يوصله للجنون المحقق..
جي بين عيونه هداكا اليوم اللي عرفت فيه كل شي..
غمض عيونه بشده وضم فولارها بكل قوة وهو يشم في ريحتها المخلطه بريحته..ريحة عطره اللي كانت تعشقها ومشاركاته فيها..بدي يبكي بصمت..يبكي بألم...
فجأه..دق باب الجناح وسمع صوت نجاة ينادي..
"جالي"
تأفف بضجر..بعدين فتح عيونه وحمحم وقال..
/انزلي تو نجي..
معاش سمعلها حس..
رجع شاف لشاشة اللاب توب لقي الفيديو واقف ع صورتها..
تنهد بألم وطلع منه وسكر اللاب توب..
بعدين خداه وناض..ومشي دسه في الدولاب مع الفولار وسط حوايجها..
بعد ماسكر الدولاب..مشي للحمام متاع الجناح..
غسل وجهه..وطلع..
وقف ع المرايه..وقعد يشوف لنفسه للحظات وقال..
/مش حتكوني غير ليا ومعاي..مستعد ندير كل شي بش نردك لحياتي..تبي ولاماتبيش ياطوبى..
مسح بيده ع شعره للخلف..بعدين مشي طلع من الجناح..
🍃🍃🍃🍃🍃🍃
"ياصباح الجمال والحلاوة..تي والله مافي احلى من عيون وخيتي ياناس"
تسمع فيه وتشوفله ويدوب كانت تبتسم يدوب..
يوسف:زمان خالتي ورده تقول عيون سدرة زي عيون امي الله يرحمها اللي هي حناك..
قعد يشوف لعيونها وهي تشوفله بنظرات تشبه نظرات الاطفال الرضع اللي مش فاهمين ولاعارفين شي..كانت وكأنها تسأل بس هو مش عارف هي ع شن تبي تسأله..
ابتسم من قلبه وقال..
/نبي نحكيلك سر..تعرفيها الدكتورة جهينه الليبيه الوحيده في الدكاترة اللي هني..خوك معجب بيها..
لاحظ نظره عيونها تبدلت للإستغراب..
مافهمش علاش كانت هكي نظرتها بس قاللها..
/هو توا مش وقت نفتح معاها الموضوع بس خبرتك بش انتي وين يجي الوقت المناسب تفتحيه معاها..
غيرت عيونها عنه وقعدت تشوف للروشن..
هو حس ان في شي غريب..ردة فعلها فيها شي غريب بس اختار ينسحب ومايكملش معاها كلام لأنها حاليا ماتبيش من يضغط عليها نفسيا لازم تقعد مرتاحه ع الاخر..
يوسف؛خلاص اني طالع توا بنولي للخدمه..
رجعت شافتله مرة تانيه..
ابتسم ورفع يدها بعتلها بيها بوسه بعدين قال..
/سلام ياقنين..
تبدلت نظره عيونها لنظرة حلوة..هو زاد ابتسم بعدين مشي طلع وخلاها..
غيرت عيونها عن الباب وقعدت تشوف للروشن..
كانت حجرتها مطله ع مناظر طبيعيه حلوة بالمرة تحب تشوفلهم..
دق الباب وانفتح..غيرت عيونها ليه..
شافت اياد خاش عليها..بس تركيز نظرها ولى ع اللي في يده باقة من زهر الياسمين..
رجعت ابتسمت الابتسامه اللي لاتكاد ترى وتنعرف من عيونها..
هو ابتسم وقال..
/صباح الياسمين ع الياسمين..وقربلها وحطه قريب ع وجهها..
قعدت تشم في ريحته..غمضت عيونها.
وبدت تشوف في جنان حوشهم....شجرة الياسمين وشجرة الفل..
واللي اجمل منهم..الورده امها وهي تقطف في الفل..
زادت توسعت ابتسامتها اياد لما شافها فرح من وسط قلبه..
فتحت عيونها وقعدت تشوف للياسمين..بعدين غيرت عيونها لإياد وكأنها كانت تبي تقوله شي..
هو ابتسم وقال..عفوا..
قعدت تشوفله وخلاص..شويه تبدلت نظرة عيونها لنظره تبان استغراب...ورجعت شافت للروشن..
حس انها ضايقت ومافهمش السبب..معاش بت تشوفله بكل..
اياد تنهد وقال:نبي نقولك اني مروح السبت وان شاء الله نولي مرة تانيه فاقرب فرصه..
مابتش تشوفله نهائي..هو حس بالضيق وقال..
/نشوفك ع خير..
مشي للخلف وهو يشوفلها ويراجي تشوفله بس بلافايده وطلع وهو محروم من نظره اخيره من عيونها قبل ليطلع..
طلع..وخلاها في حالة التوهان والحيرة اللي قاعده عايشه فيهم...والله اعلم امتى حتطلع منهم وكيف...
🍃🍃🍃🍃🍃
الساعه 9:00ليلا..
الليله كانت السهريه الكبيره عند العيليتن..
في خيمة العروس جابوا منظومه الاغاني الشعبيه كانت شغاله..
وصاحبات العروسه..وصاحبة اختها مناسك وفوزيه مرت بوها حضروا...
مع الجيران اللي طول هاليوم كانوا مقسومين بين حوش الواعر وحوش شنيبه..
في خيمة اهل العريس كانوا جايبين منشطه كيف بدت بالعرض متاعها..
والشابات الصغار اكثر المتفاعلات معاها...
بس باقي الحاضرات كانوا منشغلين بسميره وضرتها..
ابتسام كانت في غاية الاناقه والجمال..
لكن سميره كانت طلتها عاديه هاربه بالعواله عن الوجود وسط الناس 🍃🍃🍃🍃🍃
في خيمة اهل العروس كانوا صاحباتها قايمات الليله مع مناسك اللي ماعندهاش روح مع الهياجه ومروة اللي بطبعها رزينه كانت يدوب تتحرك معاهم وتضحك وتصفقلهم..
متوسطهم العروس ترقص وعايشه فرحتها هالليله بالحق..
🍃🍃
رقيه فهالليله اختارت تجي لحوش العروس بش تشوف طوبى وتشوف اصداء اللي صار امس وتأثيره عليها زي غيرها من الجيران اللي فضلوا الجية لسهرية صفاء عن سهرية حوش الصيد اللي بالمنشطه..
كان في ترقب واضح وانتظار لطلعة طوبى..
وبعد طول انتظار طلعت طوبى مع صفيه التارقيه وكانت رافعه في يدها قعماز جنه..
طلتها كانت حلوة بس عاديه جدا..
لابسه تنورة طويله ضابطه لونها زيتي وفيها من فوق ربطه لونها بيج..وبلوزه قصيرة لونها بيج كانت تفصيلتها حلوة وفيها ربطه من الرقبه نازله لوطا..ورافعه شعرها اللي كان مصبوغ باللون البني الفاتح مرفوع ذيل حصان ومسرحه جزء من جمتها ع الجنب بطريقه حلوة هلبه..المكياج كان بسيط جدا مع اكسسورات عاديه مزينه بيهم وذانه وايديها..طلة بناتيه مش لمراة متزوجه..
بس الاهم من الطله الابتسامه اللي ع وجهها..ابتسامة وحده لاعندها هم ولاعرفت في حياتها مشاكل من الاساس.
قعدوا بعيونهم معاها وهي ماشيه مع صفيه لين وصلوا في جهة مقعمزه فيها اميمه..
حطت طوبى قعماز جنه مقابلها وقعمزت في النص بين اميمه وصفيه..
والعيون عليها تتفحص ودقق وتدرس وتحلل في الملامح والتعابير..
وهي تهدرز عادي وتضحك وكأنها طوبى اللي كانت منهارة امس..
تمت الاغنيه اللي في المنظومه ..
واشتغلت اغنيه"انا في حوشي زايطه"
وتنوض غرفه تحزم وتتوسط الخيمه وتبدا ترقص..
ومطيره ناضت تلود عليها وتصفق وتصيح ومرة مرة تقول..
"الله وحد..الله يبارك.."
وطوبى تتفرج عليهم وهي مبتسمه بحب ودموعها في عيونها..
اميمه؛محلوة هلبه بالصبغه..
طوبى:ايه مغيرتها..
اما صفيه مابتش تعلق عليها لانها مش متقبلتها وغرفه كذلك قاعده تتعامل معاهم برسميه وشي من التكبر..
عكس آلاء اللي غيرت نظرتها ومعاملتها ليهم تماما بسبب عبد القيوم..
وحتى هي ناضت رقصت مع خالتها شويه بعدين مشت قعمزت جنب صفيه وقالت.
الاء:صفو شن جو..
صفيه بضحكه:يهبل..
ابتسموا اميمه وطوبى..
الاء:امم باهي نبي نفتح معاك موضوع ومش عارفه من وين بنبدا..
صفيه:ابدي من وين ماتحبي..
الاء بإبتسامه؛باهي..ولد خالك الجنتل مان قاعد سنقل صح..
اميمه وطوبى استغربوا..
وصفيه ضحكت بإستغراب وقالت..
/قصدك عبدو؟..
الاء:ايه عبد القيوم..
صفيه بضحكه:ليش؟
الاء:عندي بنيه زي العسل صاحبتي جميله جميله وفكرت فيها عروسه ليه..
ابتسمت صفيه بإستغراب شديد..
اما طوبى غيرت نظرها لحنان اللي كانت تسرق في النظر لعيلة التارقي.
الاء:عندي صورتها نوريهالك!؟
صفيه:والله ماعارفه شن نقولك..
طوبى:بصراحه حني مانبوشي يطلع من الشارع..
شافتلها صفيه طول وهي متفاجئه..
طوبى بإبتسامه؛عندي ليه عروسه مازال احلى واهلها نعرفوهم كويس صغيرونه ومحترمه وفالحه..شفتي البنيه اللي لابسه قفطان ازرق وطالقه شعرها مقابلتنا توا..
صفيه اللي دموعها عبوا عيونها شافت وين ماتشوف طوبى جو عيونها ع حنان..
اللي كان وجهها احمر من الخجل لما حستهم يشوفولها..
طوبى:صغيرونه وزي العسل وتمشي معاه وتهنيكم عليه..
الاء؛حلوة وصغيره صح بس صاحبتي ومعليشي يعني من عيلة راقيه..
طوبى شافت لآلاء بإنزعاج..
اميمه:حتى حوش خالتي منجيه ناس كويسه هلبه وطيبين..
طوبى:صفو شن رايك..
الاء:خل نوريك صورة صاحبتي قبل..
غيرت صفيه عيونها لآلاء وقالت بإبتسامه وعيونها يلمعوا بالدموع..
/ولد عمتي اللي يكون خويا في نفس الوقت لو جبناله احلى البنات في الدنيا كلها مش حيبحت فيهن بطرف عينه..
الاء:قصدك عنده وحده؟
صفيه بنفس الابتسامه:اها..ويعشقها مش بس يحبها..
طوبى:قصدك نفسها اللي مشي خطبها وردوه!؟ معقوله بيوقف حياته عندها!؟ قولوله يحط عقله في راسه وينسى ويفكر في العمر اللي يجري والوحده اللي عايش فيها..هو انسان كويس ومواقفه معانا لين نموتوا ماننسوها واني نبيله الخير..حاولوا تقنعوه ينساها ويفكر يستقر..وصدقيني مش حيلقى بنوته زي حنان..
صفيه وهي تسمع فيها كانت شاده دمعتها بالسيف لكن ابتسامتها قاعده ع وجهها ردت عليها تقول..
/كان عرفتي تحبي قبل راك عرفتي حكم القلب لما يحب بمعنى الكلمه،واللي كيف عبد القيوم راجل بالحق وين يحب يحب من وسط قلبه واللي يحب من قلبه عمره ماينسى..
طوبى حست ان صفيه تكلم فيه بشي من الحده مع هداتغاضت وقالت..
/ربي يجيبله اللي فيه الخير
صفيه غيرت نظرها عنها وقالت..
/آمين..
بس اميمه اللي كانت مركزه ع صفيه وهي تتكلم حست ان في كلام تاني تبي توصله في وسط كلامها..الدموع اللي في عيونها وهي تحكي خلوها تتأكد من احساسها..
آلاء:بصراحه يابختها..وين الراجل اللي يحب هكي توا بس وينه! اسمعي عبدو هدا عملة نادرة اللي بتاخده مفروض تسكر عليه..
اميمه بضحكه؛وين عزيز يجي يسمع!
الاء بضحكه:لاعزوز بروحه...اني فانز من فانزات عبد القيوم بس..
ضحكوا..وصفيه مكتفيه بالابتسامه وهي ترد ع الاء..
/تسلمي حبيبتي من ذوقك
وتنوض حنان تحزم وتبدا ترقص حتى هي ومرة تجي قدام صفيه ومرة قدام سليمه..
سليمه ماكانتش مهتمه لأمرها تهدرز مع النساوين..
اما صفيه فكانت حاسه اتجاهها بالشفقه...
وحتى طوبى كانت واجعتها مابتش تريح من بالها نظرتها لعبد القيوم حستها تحبه وتبيه يكون من نصيبها...
🍃🍃🍃🍃🍃
والمنشطه في خيمة حوش العريس قالبه الدنيا..
طلعت سميره تشوف في الضيافه كان سدت الحاضرات كلهم ولالا..
ومن حظها طلعتها تجي ع نوضة ضرتها بس ترقص..
وبدت ابتسام ترقص..قعدت تشوفلها ودموعها في عيونها بعدين مررت نظرها ع الحاضرات لقتهم يتفرجوا عليها بإعجاب..
ماتحملتش خشت داخل طول..ونظرات خديجه الشامته معاها...
🍃خشت سميرة للكوجينه وهي شاده دموعها لان سلفاتها فيها..
فجأه جاها اتصال..هاتفها كان ع دولاب الكوجينه..
وحده من سلفاتها..
/تليفونك سميره..
سميره؛ترا مديه بالله..
خداته مدتهولها..
سميره بعد ماخداته منها وشافت المتصل بغل فصلت عليه بعدين سكرت تليفونها بكل ومشت رداته لمكانه..
شافت شيشة روزاطه"عصير لوز" خدت طاسه وعبتها منه وقعدت تشرب..كان مصقع لكن هي مش حاسه بشي من النار اللي والعه فيها..
وسلفاتها يسرقولها في النظر..
فجأه..خشت عليهم راما وقالت..
/خالتي كريمه..خالتي مريم ترا اطلعوا للخيمه..
هما حسوا ان في شي خطير طول مشوا طلعوا..
سميرة بإستغراب؛شن في راما..
راما وهي تشوفلها من فوق لتحت:راجي شويه..
ومشت طلعت من حداها..
حطت سميره الطاسه وقالت..
/هادي خيرها!؟
ويخش عليها عبد الفتاح..
طول جت بتطلع لكن هو سكر الباب ووقف عليه..
سميره بعصبيه:حول خير مانصكها عيطه حول..
عبد الفتاح بغضب:شن جو الصغار اللي ديري فيه هدا اني راجلك مش صاحبك بش تتعاملي معاي هكي..
هي بغضب:احترم نفسك شن الدوة اللي تقول فيها هادي!
عبد الفتاح؛تتكلمي ع الاحترام وانتي مش محترمه راجلك ومستكردتيه كانك تعرفي ربي راك عارفه اللي ديري فيه حرام..
هي ودموعها في عيونها قالت..
/نعرفه ربي اكثر منك هدا علاش خليتك تاخد اللي تحبها برضاي وشرطت تكون كرامتي محفوظه بس توا خلاص راحت بين الرجلين والحق الحق اني معاش عندي ليك عفتك..
هو بصدمه:عفتيني!
سميره بأنفعال وألم:علاش ماكانش واضح من قبل!..
هو عيونه لمعوا بالدموع وقعد يقول..
/معقوله ياسميره!معقوله! لهالدرجه! باهي علاش قاعده علاش ماطلبتيش تطلقي..
هي قالت:خلاص حني فيها طلقني..
هو بعصبيه:نطلق عينك..اسمعي يامراة اعقلي احسلك ماتخلنيش نتهور واني فهالعمر وندير تصرفات ولادي مايديروهاش..
سميره بنفاذ صبر..
/شن تبي مني شن تبي! هونا عندك مرتك المراة اللي تحبها وتمنيتها وعشت معاي عمر وانت تتخليها فيا..نزلوا دموعها وقالت..كم مرة ناديتني بإسمها اول ماتزوجنا! كم مرة شفتك قاعد مع ذكرياتكم بالدرقه! انت كنت عايش معاي جثه وقلبك وعقلك معاها واول ماتلاقيت انت وياها مرة تانيه جيتني تجري ولافكرت فيا ولافي شعوري حكيتلي وقلت بنتزوجها..مسحت دموعها وقالت..وعفست ع كرامتي وقلبي ورضيت بش مانخربش حياة ولادي..انت بعد ماخديتها وليت بنادم تاني تقول كنت ميت وردوا فيه الروح!
شن عندك معاي اني شن دير بيا قولي!..تبيني نخليك عايش كيف ماكنت عايش قبل حياة منظمه ومثاليه اعتقد مش مقصرة في ولاحاجه وقايماتك وقايمه حوشي وصغاري..معاي معاش عندك شي تاني غير هكي..
هو قدم خطوة وقال بنبرة صادقه..
/مش قادر نعيش من غيرك..
ضحكت سخريه وهي تمسح في دموعها..
عبد الفتاح:ماتهزيش ع كلامي والله ياسميره معاش متحمل عيشتي وانتي مجافتيني..سميره انتي كنتي تحبي تهدرزي عليا هدرزة تريحني..كنتي تمشي معاي وين مانمشي حتى لسوق الخضرا والحوت....مانطلعش من الحوش الا وانتي تقري عليا وتدعيلي برا ان شاء الله بواب الخير مفتوحه وراك وقدامك..وغيره وغيره ياسميره اللي بعد جفتيني فقدته واستاحشته هلبه..
سميره بتهكم:تو نعلمه لإبتسام ديروهلك يجيك من المراة اللي تحبها خير..
هو فقد اعصابه شدها من ذراعتها بقوة وقال بعصبيه..
/نحبك...افهمي اني نحبك انتي..
هي جمدت في مكانها..اول مرة تسمعها منه...
مع هدا ماقدرتش تصدقها نفضت ايديه وقالت..
/ماتقولش كلام انت مش واعيله..
شد يدها بقوة وقال..
/اسمعي الكلام هني مايمشيش غدوة نروح بيك من االصاله للحوش وغادي نهدرزوا براحتنا ونتفاهموا..
ويدق باب الكوجينه..حساته منقذ ليها اللي جي يدق..
جبدت يدها من يده ومشت بسرعه للباب وفتحاته..
وتلقى قدامها ابتسام..اللي شافت عبد الفتاح داخل ابتسمتله..
التفتت سميره شافتله وعيونها معبيات دموع..
/اهي جاتك قوللها..
هو شافلها بإستغراب..
ابتسام؛شني بيقولي!؟
شافتلها سميره وقالت..
/قال قولي لإبتسام غدوة بنروح بيها من الصاله للحوش طول..ابتسمت وقالت..مستاحشك..
بعدين مشت طلعت من حداها..وخلاته مصدوم لأبعد حد..
ابتسام وهي مبتسمه قالت..
/لهالدرجة معصب منها!؟
هو ماباش يرد عليها..ومشي فات من جنبها وطلع حتى هو وهي معاه بعيونها لين اختفي..
🍃🍃🍃🍃🍃🍃
بعد نص الليل..تموا السهريات والناس بدت تروح.. والعروس خلوها ترقد بكري غدوة وراها يوم طويل..
ومش غير هي بس هلبه غيرها حيكون يوم 10نوفمبر طويل عليهم هلبه..
🍃وتعدي ساعات هالليله وفي من كان يراجي امتى يطلع الصبح وفي كان خايف من جية اليوم التاني..
والخوف قبل خوض المعارك امر طبيعي ومعروف..
ايه معركه..
حتصير في ليلة هاليوم معركه...ليلة هاليوم حتقعد في الذاكرة لاتنسى لسنين وسنين...وعواقب اللي حيصير فيها مش معروف للإن اذا كانت محموده ولا خيمه...
وعدى الليل وجي اليوم اللي بعده...
السبت...10نوفمبر...سنة 2018..
الساعه 12:00قبل الظهر...
طلعت طوبى ومعاها صفاء اللي كانوا يدعوا فيها بشوط دربوكه ركبوا الزوز لسيارة سدرة..
شغلت طوبى السيارة وتحركوا طول بإتجاه مركز امها حتطلع صفاء الليله من تحت ايدين طوبى..
وطبعا هدا كان خبر وانتشر بين الجيران..واغلبهم استنتج ان طوبى مش حتحضر الحفله..
🍃نجاة وهي تسكر في سوسته غلاف فستانها كانت تتكلم بالتليفون..
/توقعتها..ماحضرت يوم الكسوة بتحضر الحفله..
"انتي كان تعرفي شن سمعت..قالوا ليلتها كانت غادي لكن ماقدرتش تطلع"
نجاة بدهشة:الله!
"هدا اللي سمعته."
ابتسمت بمكر ورفعت حاجبها..
"ع العموم اليوم صاحبتي حطلعك وحده تانيه ردي بالك تدخلي في شغلها خليها دير اللي تبيه"
نجاة:لا هادي نسلمها نفسي ومانخافش بعد اللي دارتهولي ليلة حفلة دخول ولد الساحلي..
"الليله حطلعك خير بمليون مرة"
نجاة تحمست ع الاخر بس دارت روحها عاديه وقالت..
/باهي سكري توا خل نوتي حاجاتي ساعة تانيه وبيجي الجالي يرفعني..
"اوكي..طيري"
وسكرت عليها..
نجاة مطت شفايفها للأسفل بأزدراء بعدين ناضت ومشت بطلع باقي حاجاتها..
🍃والاستعدادت كانت قائمه في اغلب حياش شارع القهوة لحضور حفلة الليله...
🍃🍃🍃🍃🍃
الساعه 7:30مساءا..
في احدي الصالات الكبيرة والمشهورة في العاصمه..
كانوا اهل العروس والعريس حاضرين هما الاولين..
يشيكوا ع الوضع ويشوفوا الاستعدادات..
فايزة كانت في قمة اناقتها..ام العروسه طبعا...
ومروة كانت طالعه عسوله بفستان انيق مناسب لعمرها..
وطلة تاله كانت لطيفه بشعرها الطويل المموج..
من جهة تانيه كان نجمه مقعمزه وتشوف في بناتها وكنتها الكبيره كيف يحوسوا في الصاله..
كانت خايفه ع نجاح اللي تقدم حملها هلبه والحركه الزايده مش باهيه ليها..
وعقلها مشغول بحال عواطف اللي كانت مطفيه وكأنها مش موجوده طول ايام العرس..
لكن كنتها سميرة اليوم كانت غير..طالعه حلوة وكلها حيويه وابتسامتها مافارقتش وجهها..
وصلوا مطيره وصفيه وسميره وفردوس اللي كيف جو من المزين..
سلموا ع نساوين عيت الصيد وقعدوا يحوسوا معاهم..
مطيره كانت لابسه فستان انيق لايق عليها ومتزينه وطالعه حلوة بالمرة..
اما فردوس فكانت لابسه بدلة قونه للركبه ودايرة تسريحه بسيطه ومكياجها حلو..
زي مرت عمها اللي كانت لابسه بدله حتى هي بس القونه طويله وكانت نازكه زي مانقولوا...
اللي كانت مميزة فيهم سميره بفستانها الخمري اللي مصغرها في العمر مع المكياج والتسريحه كانت طالعه حكايه..
🍃وشويه وبدوا يوصلوا المعازيم والعيلتين يرحبوا ويرفعوا فيهم لطاولاتهم...
بعد نص ساعه..
خشوا سالمين وكنتها وسليمه وصفيه وكلهم كانوا انيقات وطلتهم حلوة..
رفعتهم مطيره للطاولة متاعهم..
بعدهم بشويه..جوا الاء واريج ومعاهم اميمه...
بنات فردوس جميلات بالذات الاء ديما مبهره..
بس مش زي اميمه بفستانها الذهبي القصير وقصة شعرها الجديده..وطلتها اللي كانت طلة اوروبيه..
اميمه ديما هكي تبان بين الناس مش غير في شكلها حتى حركاتها ومشيتها وكأنها بنت من بنات القارة العجوز تحديدا من بنات الطبقه الراقيه النبيله..
العيون كانت عليها..ونظرات الاعجاب لاحقتها لين وصلت في طاولتهم وقعمزت..
كان في منشطه توتي في روحها لحفله الليله في الصاله وين شافت اميمه قامت المايك وتكلمت..
/اللي لابسه ذهبي جاية من الجاليه الهولنديه!..
ضحكوا..وهي ضحكت بمفاجأه وتحشمت..
المنشطه:وين امك وين؟
صفيه وهي تضحك رفعت يدها..
المنشطه:اقري عليها اقري..عيني حارة راهو..
مطيره بصوت عالي..ووك منك عطيك فقصه..الله يبارك ع بنية خوي.
قعدوا يضحكوا..
المنشطه؛مطيره خلينا صحاب كان نحطك في راسي مانخليك ترقصيها..
قعدوا يضحكوا....
ووسط هالاجواء الحلوة قاعدين المعازيم بتوافدوا لين تعبت الصاله..
وبدت المنشطه تحط في اغاني شعبيه كبدايه...
فهاللحظه..
خشوا مغليه ونسرين ومعاهم سدرة المهدي..
سلموا عليهم عيلة الصيد..بعدين رفعتهم نجاح لطاولتهم اللي كانت قريبه هلبه ع الكوشه وجايه جنب المسرح..
وتخش بعدهم غرفه اللي كانت طالعه قمة في الجمال بفستانها الاحمر ومشت طول للطاوله اللي فيها البنات ..
الطاوله اللي وصت فايزة تحجزهالهم بعد ماعرفوا من نجاح ع اما طاولة طلبوا يقعمزوا عيلة شنيبه..
طاولتهم كانت مقابله..الفاصل بيهم المسرح لكن ماكانوش قراب زيهم للكوشه..
قعدت غرفه تشوف لطاولتهم..
اميمه:طالعه خيال ياروفي..
شافتلها غرفه وابتسمت بعدين قالت.
/مش احلى منك الله يبارك..
ع جية فردوس بكروسة جنه وهي تقول..
/اني قلعتكم كلكم..
اميمه بإبتسامه؛ياعمري الله يبارك طالعه عسل..
اريج؛تبي الزمط..
غرفه :الله يبارك ع كنتي..قوليلي ياشفشه وين تلقي عزوز زيي مهتمه بيك وبطلتك..
قعدوا يضحكوا..
اريج:الشفشوفين هدوكا مع بوهم..
غرفه:يس..خدوا عليه اكثر مني..
فردوس:هكي احسن تاخدي راحتك شويه..
ورفعت عيونها للباب..
وتشوف خديجه جايه مع راما بنتها ..
كانت خديجه مبالغه في طلتها رغم حملها الواضح..
اما راما مع لبسها اللي مش لعمرها بانت حلوة صح لكن مأسوف عليها..
مروة لما شافتها جوها انقلب زي ماصار فيها يوم الكسوة..
ومناسك لاحظتها :خيرها هادي تشوفلك هكي..
مروة بضيق:فكيني من سيرتها توا..
مناسك هزت راسها بصمت..
حداهم فوزيه مقعمزه حداها فايزة وهما الزوز يحكوا عن بعض التفاصيل اللي تخص الحفله...
وبعد مالصاله تعبت بالمعازيم والعيلتين اكتمل عددهم وسط الحضور..
مع بنتها جوري خشت نجاة...
اللي خلت الانظار كلها تتوجه ليها..
بفستانها الاحمر القاني الكبير اللماع...والتسريحه اللي رفعه فيها شعرها كله فوق..والمكياج الصارخ..مع طقم الالماس نفسه اللي لبساته في حفلة عيت الساحلي...
كانت وكأنها عروسة محضر...والحق يقال كانت جميله جدا ومختلفه بالمرة ماتنعطاش عمرها..والباين صاحبة خديجه دارت شغلها وزياده...
حماتها الكبيره كانت تتفرج ع نظرات الحاضرين لعند ماوصلت في طاوله عيت الواعر ابتسمت تهكما وهي تشوف لغرفه..
وغرفه تشوفلها بإمتعاض..
المنشطه كانت مع نجاة بعيونها لين قعمزت غيرت نظرها لغرفه..
غرفه شافتلها وغمضت عيونها وفتحتهم..
وهي هزت راسها بإيجاب..
🍃ع طاولة عيلة شنيبه..
كانت نجاه وخديجه قراب من بعض..ونسرين قريبه ع امها..
وسدرة ومعاها جوري من الجهة التانيه تشوف لنجاة بنظرات كره..
نجاه قربت من وذن خديجه وقالت..
/ماجتش!
خديجه:مالهاش اثر..
ابتسمت نجاة بنصر..
ونسرين تشوفلها بنظرات حاده..
اما مغليه برغم انها عجباته بس استخسرت فيها كلمة شكر ولانظرة اعجاب دارت روحها عاديه وخلاص...
🍃وبعد مفاجاة نجاة بربع ساعه..
وصلت العروسه..دخلوها للدار قعدت فيها شويه تتفاهم هي والمصورة وشويه وخشت عليهم غرفه وقعدوا هما الثلاته بس في الدار...
عشرة دقايق..وجي وقت خشة صفاء...
البدايه كانت مع فيديو يبين ايدين صفاء وهي تلبس في الطقم متاع الفيلو..وتحط في الريحه وتاخد في الباقه وبعدين تلبس الكندره...وشويه وتبدا تمشي لين تطلع من الدار بطريقها للقاعه..
وتخش للقاعه ع اغنية زفه خليجيه اسمها..
"هب السعد"
وقعدت تمشي وغرفه ترفع في الطرحه متاعها..
صفاء كانت طالعه عروس ناعمة وجميله جدا..
بهرت عيون عزوزتها وحمواتها ..وحركت غيرة سلفاتها كلهم بدون استثناء اصغرهم وبتاخد الصغير في خوته اكيد حتكون مكانتها غير..
بس امها ماقدرتش تشد دموعها..ع قد ماكانت فرحانه بيها كان قلبها موجوع...ياقداش تمنت احمد يحضر هاليوم..
وخواتها قريب هبلوا عليها من فرحتهم بيها قعدوا يحيوا فيها من بعيد وهي ترد عليهم وابتسامتها الحلوة ع وجهها..
وقعدت تتدرج...لين وصلت في الكوشه..
وساعدوها بش قعمزت..
المنشطه:الله يبارك الله يبارك..ملكة ياصفو ملكه يابخته السي شروفه والله..
قعدوا يضحكوا وصفاء تضحك بخجل..
وشغلت اغنيه فرايحيه..
وولعت الجو..وبعض الحاضرات ناضوا يرقصوا ع المسرح ومنهم حنان اللي كانت تبي تلفت نظر اهل عبد القيوم بأي طريقه ماتبيش العرس يتم قبل ليفتحوا موضوعها مع اهلها..
وهما ولامهتمين لأمرها...
وشويه وتنوض نجاه..وتمشي تركب ع المسرح حولت كندرتها وبدت ترقص..
خلت اللي حواليها يقعمزوا لأن فستانها كبير وبيقيديهم..
كلهم يتفرجوا عليها..
والمنشطه من ضمنهم خلت الاغنيه شغاله عادي لكن مابتش تتفاعل معاها نهائي..
نساوين عيلة الواعر تجاهولها..
ماعدا صاحبتهم سميره..اللي ركبت ع المسرح ورمت كندرتها وبدت ترقص..
اللي في الصاله كلهم انذهلوا فيها..
جبرت نجاه تمشي تقعمز غصبا عنها..
وهي ترقص ونظراتها مع ضحكة مستفزة متوجهه لمغليه مرة وخديجه مرة .
خديجه تنرفزت منها وقالت:من هي هادي!؟
مغليه برفعة حاجب:صاحبة الشلولح مطيره شلولح زيها..
خديجه: واضح الطيور ع اشكالها تقع..
المنشطه:هاه هاه..صحه ليك صحة ليك الله يبارك..
وبعد ماتمت الاغنيه نزلت سميره ومطيره قعدت تزغرد..
والبنات ع الطاوله يضحكوا بكتمان..
ومرت ربع ساعه
وزعوا فيهم عصير فواكه طببعي وشكولاته وماكرون..
في الوقت اللي فيه المصورة تاخد في لقطات لصفاء..
ع جية نبيله..
قعدت تمشي وهي دور في نجاة بعيونها لين شافتها بعدين مررت نظرها ع الصاله..لين وصلت في طاولة نساوين عيلة الواعر وقالت..
مساء الورد..وقعمزت وحطت عبايتها وعباية تانيه معاها ع الكرسي اللي جنبها..
هما ركزوا عليها وردوا..
"مساء الفل..مساء الوردات"
رفعت نبيله تليفونها وقعدت تكتب بعدين نزلاته وحطاته ع الطاوله...
🍃نجاة:الشكلاطه اي كلام..
مغليه:صح عاديه..
خديجه:حتى العصير خفيف..
نسرين بحده:كله قنين الله يبارك ..
تجاهلوها...
بعدين شافت خديجه لطاولة عيلة الواعر شافت نبيله معاهم ابتسمت بمكر وتنهدت براحه بعد ماحست انها وصلت للي تبيه وحققت هدفها..
زي نجاة بالزبط..
🍃بس..
حلاوة الانتصار يحس بيها اللي ينسحب ويوهم عدوه انه انتصر عليها..ويلتف عليه ويباغته ويعطيهاله بالقاضيه...
من فم القاعه..
خشت...بطله خلتها وكأنها سلطانه جايه من حكايات الف ليله وليله..
كل الالوان حاضره ماعدا اللون اللي كان لابساته هي سيد الالوان...الاسود..
فستان مطلعها وكأنها حوريه مخليها تلمع وتبرق...
وتجر وراها طرف طويل لهالفستان وهي تمشي خطوة ورا تانيه..خطوات واثقه وواثق الخطى بمشي ملكا..
شعرها كان واصل لأسفل ظهرها...كان غايه في الجمال واللمعان واللون زاده ع مابيه..رافعه شويه منه ودايره نفخه بسيطه من القدام....
مزين وذانه اقراط "خراص" لؤلؤ غايه في الجمال..
ومزين رقبتها عقد لؤلؤ يبهر العيون..وفي اليد اليمين خاتمه والانسيال متاعه..
هي اللي زينت وجهها بايديها كان مكياجها مخليها فاتنه بزياده..
ابرزت عيونها الحايره الجميله وحطت احمر شفاه لونه احمر غامق..غير باقي التفاصيل اللي طلعتها ساحرة بكل معنى الكلمه..
وحتى من اظافرها كانت ملونتهم بنفس لون الروج...
صاحبه هالطله السالبه للعقول كانت طوبى..اللي من يوم يومها بحضورها القوي تلفت في الانتباه يابال وهي فهالليله بأبهى واجمل صورة...
كل من في القاعه كانوا في حالة ذهول..
عيونهم المبهوره تلحق فيها وهي ماشيه طول بإتجاه صفاء..
🍃ألاء بذهول:ياربي شن هدا! مش مصدقه عيوني
اريج بإعجاب:ع قد ماتخايلتها كيف بتطلع فيه ماتخيلتهاش تطلع هكي! الله يبارك..
اميمه بإبتسامه اعجاب:من يومها طوبى طلتها تسحر..
ونبيله وغرفه يشوفوا لطوبى بإبتسامه..
🍃🍃🍃
مطيره:الله يبارك ع بنيه خوي الله يبارك..
سميره:ياقهرتك وياعازتك ياوجه السفنزة والله حرام في فنزوزته ظفرها تي هديكا المعفنه وهلبه فيها..
صفيه بحسرة:الله غالب نصيبات...
🍃🍃🍃🍃
فوزيه بذهول:تو هادي ياخدوا عليها!!؟ عطيه عمي وخلاص..
ومناسك ومروة يضحكوا..
🍃🍃🍃🍃
صفيه بصدمه:عليك قهرة يما..
سليمه بأسف؛الله غالب الدنيا نصيبات..
صفيه:خاطر عليا نبعت ناس يقتلوا المصيبه اللي النازل علي راسها وماتقعد كان لعبدو..
انصدمت سالمين اللي نسوا وجودها معاهم..
شافت لصفيه وقالت:كيف!؟؟؟
هما استاقظوا وقعدوا يشوفولها بصدمه..
🍃🍃🍃🍃🍃
ووسط حالة الذهول اللي عايشينها الحضور..
كانوا الاكثر ذهول وصدمه..
نساوين عيلة شنيبه..
خديجه الشكولاته اللي تاكل فيها ذابت في فمها بعد ماوقفت مضغ من صدمتها وذهولها عيونها كانوا يلحقوا في طوبى لااراديا..
اما مغليه فكانت مصموته قريب تموت..غيرت نظرها لنجاة وقعدت تقارن..
هني تكلمت نسرين..
/شباب وجمال ونزاكه..تي هي كان تلبس شكارة خيشه تطلع عليها..اااخ..ياخسارة وخلاص..
نجاة اللي كانت تموت بالعرق..شافت لنسرين بحده ودموعها معبيات عيونها...
🍃طوبى وصلت في صفاء..
ركبت درجه وجتها سلمت عليها وهي تقول..
/مبارك عليك وربي يهنيك ياقلبي طالعه قمر..
صفاء بإعجاب:من بعدك ياعمري والله مافي بحلاوتك الليله..
طوبى وهي مبتسمه بإمتنان:سامحيني صفو..
صفاء؛شن تقولي اني اللي نبي هكي..نبيك ديري زي مادارت ديانا بالزبط..
ضحكت طوبى..
وصفاء اشرت للمصورة..
المصورة اللي كانت تشوف لطوبى بإعجاب هزت راسها..
ووخرت خطوة..
وطوبى ساوت طرف الفستان بطريقه جي منظره حلو بالمرة وهو مطروح..
المصورة:ابتسامه..
ابتسموا الزوز..
والمصورة خدت الصورة..
وطوبى كانت نجمة الحفله الليله بلا منازع هربت بنظرها عن عيون الناس لعيون اختها غرفه وتفكرت كلامها ليه..
《ردي عليهم ماتهربيش ردي..قهروك مرة اقهريهم الف مرة حني بنات الواعر نقهروا وماننقهروش ولانخلوا حد يشوف كسرتنا ويتشمت فينا..وانتي صغيره سدرة مشت حضرت عرس المهدي وقاماته سحنت كبده وكبودهم رغم انها كانت بتموت بقهرتها لكن ماخلت حد يتشمت فيها..وانتي زيها..لامش زيها انتي مازال اقوى منها واللي قهرك حتخليه يوم السبت يموت من قهرته..نوضي نوضي وخلي عنك البكي والنديب عمره ماحيجيبلك تارك ولايردلك كرامتك.
خليك بنت الواعر حق ونوضي》
ابتسمت طوبى بحب وهي تشوفلها..وغرفه بادلتها نفس الابتسامه..
بعدين غرفه غيرت عيونها لخديجه لقتها تشوفلها..
ابتسمت بنصر..
وخديجه غيرت عيونها عنها وهي تفرك في رقبتها من الخلف..
ونجاه جنبها تمرر في نظرها ع الحاضرات اللي كانوا مبهورات بطوبى بعدين شافتلها ولقتها تاخد في صور مع صفاء وفايزة ووقفتها ونظراتها كلهم ثقه وكبرياء...
🍃بعد ماخدت الصورة سلمت ع صفاء مرة تانيه وقامت طرفها ومشت نزلت مع فايزة من المسرح وهي تهدرز معاها..
مررت نظرها ع الطاولات كان اي حد يشوفها من الجيران يرفع يده ويحيها وهي ترد عليهم..
"طوبى"
التفتت شافت نجاه تنادي فيها ابتسمت ومشت بإتجاه النص التاني من الصاله والعيون تلحف فيها..
لين وصلت في نجاح وسلمت عليها..
هني المنشطه شغلت اغنيه شعبيه..
كلماتها..حي علي هبلني..هبلني هبلني..
قعدت تغني معاهم وهي تقول..
الاسود هبلني.. تي من هي هادي ياهووو! ياعيت الواعر شن هدا ياهوو..
وهما يضحكوا..
مطيره بصوت عالي..
"اخر العنقود سكر معقود طوبى اسمها طوبى"
المنشطه؛ربي يحفظك ياطوبى وخلاص..
وطوبى تسلم ع نساوين عيت الصيد وهي تسمع وتضحك..
وعيون مغليه وهي قريب تموت عليها..
خديجه بغيظ:هما جايبين المنشطه .
نجاة بحده:اللي لابساته من وين جاها!؟
خديجه سكتت ماعرفتش شن تجاوب..
نسرين بمكر:ايه صح واضح من حاجه صح ومش من هني!زعمه منو اللي بيجيبلها هدا كله!
مغليه ضيقت عيونها وهي تفكر.
وعقل خديجه مشي للقصد من كلام نسرين..
ونجاة وقتها حست روحها قاعده تنحرق حرق حرفيا..
🍃🍃
طوبى بعد ماسملت ع عيلة الصيد ولت للجهة العروس..
ومشت للطاوله وقعمزت ع كرسي مخليها تبان ع نساوين عيلة شنيبه..
اريج:يااحلى منهم..
الاء:يافرق عنهم..
اميمه:انت اللي فيهم..
والتلاته مع بعض قالوا..
"وهما فينهم"
وطوبى تضحك..
فجأة المنشطه شغلت اغنيه "ماليش بعدك"
ووقفتها وقالت:هادي ليك ياورد اسود ياطوبى...
كلهم ركزوا معاها....ووين شافتلها طوبى..
غمزتلها المنشطه وقالت...لكن مش مني راهو..
ورجعت شغلتها وعلت الصوت..
كلمات الاغنيه كان مقصدها واضح ووصلت رساله وصلت للمعني بيها وتعداته...
واللي تحكي عن حالته كلمات الاغنيه موجود في مكان للرجاله تابع للصاله موجوين فيه مع العريس..
كعادته كان بكامل اناقته نافش ريشه وكأنه لاقبله ولابعده..
ونظرات عبد القيوم الحاقدة عليه ولولا الحرام راهو مخلص عليه ومخلص طوبى منه...
بس كله متروك لله...ومافيش احسن من تدبيره....
#انتقام
#طوبى
.....يتبع....
