#طوبى "جنة طوبى"
#جمان_فريد
#الجزء_122"ذكريات لاتموت"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تلاوة_القرآن
" فإنّ قراءة القرآن بالتدبّر تُعطي العبد قُوةً في قلبه، وحياة، وسعة، وانشراحًا، وبهجةً، وسُرورًا؛ فيصير في شأن والنّاس في شأنٍ آخَر ".
- مدارج السالكين لـ ابن القيم 🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 جميعنا نعيش نفس الليل، لكن لكل واحد منا ظلامه🍃
_________________________________________
مقعمز قدام المطحن ونظره ع الحوش اللي مقابله..
كان جدا متوتر وقلق وكله خوف ع زوجته اللي اختارت تواجه خوها اللي عمره ماعرف معنى الاخوة ولادار قيمة لصلة الدم...
عقد حواجبه وناض وقف..
لما شاف خو زوجته طالع من الحوش ويبان في قمة الغضب ووراه مرته وهي شاده شنطة ولدها كان باين في وجهها الخوف..
ركبوا السيارة وراجلها تحرك وهو يحرق بالعجل..
والمهدي قعد بنظرة مع السيارة لين درقت عنه..بعدين طلع هاتفه من جيب البالطو وحط ع رقم زوجته واتصل بيها..
🍃مختار وهو يسوق في حالة غضب كان يتردد لمسامعه كلام سدرة وفردوس..فردوس بالذات كلامها والنبرة اللي قالاته بيها خلوه يحس بألم وقهر ورجعاته للخلف عقدين من الزمن..
🔺️🔺️🔺️قبل اكثر من عشرين عاما🔺️🔺️🔺️
=هي تفضلوا خشوا تفضلوا..
خش هو ومعاه شابين كانوا من جيله والراجل اللي دخلهم للدار كان من عمر بوه..بإبتسامه كلها ود قال..
/شن مااحتجتوا قولوا ماتحشموش انتم من طرف جبريل ولد سيدي..
مختار بإبتسامه:بارك الله فيك كفيت ووفيت..
رد عليه يقول..
/باهي نخليكم ترتاحوا السلام عليكم..
ردوا عليه بأصوات متقطعه..
/وعليكم السلام..
مجرد ماطلع الراجل وسكر الباب واحد منهم وهو يمرر في نظره ع الحجرة قال..
/يعني لعند امتى بنقعدوا هنا!؟
قعمز مختار ع المندار وقال
/لين يصير اللي في بالي..
قعمز صاحبهم الثالث جنبه وقال..
/كان ماصار!؟
مختار بملامح انزعاج قال..
/فكنا من النكد..
=عنده حق يامختار لازم نحطوا قدامنا كل الاحتمالات..كان باتك قعد مسكر راسه شن يصير!!
مختار وهو يفكر..
/خلي توا يمشيله عمي جبريل ونشوفوا شن يصير معاه..
=مش متحمل القعده في ليبيا بكل مش عارف شن بيصير فيا فهالشهرين
مختار:مرات يزيدوا حط الحاجه هادي في بالك..
تأفف صاحبه..
مختار؛قلتلكم من الاول اللي ناوي عليه مش ساهل نوصله يبي صبر انت وياه اصبروا..
=نقولوا ان شاء الله باتك يرضى عليك ويسامحك وتروح وتخلي امك تتنازلك ع ارضها..
=ااامين..بس هاه مختار رد بالك ترخي بينا ياغالي..
=مايقدرش وهو عارف انه مايقدرش..
رفع مختار حاجبه وهو يشوف للي كلمه وقال..
/مانديرهاش..مش مانقدرش..مانديرهاش..
شافوا لبعض الزوز وهزوا روسهم وقال واحد منهم..
/عارفينك غير نحرصوا عليك بس..
ابتسم ع جنب وقال..
/ماتوصيش حريص..
🔺️🔺️🔺️الوقت الحاضر🔺️🔺️🔺️
استاقظ لما سمع فاتن بنبرة خوف تقوله..
/هدي يامختار بتقتلنا حني وولدك!
هو شاف لولده بنظرة ألم وكلام سدرة يتردد في عقله..
"حرام فيه الصغار حرام يكون اب"
بنبرة ألم قال..
/اسف يابابا اسف..
شاف القدام وهدا السرعه..نزلوا دموعه مسحهم بعنف وملامح وجهه تبدلت للحقد وفاتن تشوف بنظرة خوف مخالطها الحزن...
🍂🍂🍂🍂🍂🍂🍂🍂🍂🍂🍂🍂🍂🍂
"استغل طيبة عمي جبريل وحب خالتي سالمين ليه وعرف يضحك عليهم وخلا عمي جبريل يجي هني ع خاطره بش يخش واسطه بينه وبين بوي ولان بوي كان عارفه كويس مارضاش يسامحه عارفه كان روح بيدير بلوة تانيه اكبر من اللي قبلها لأن هدا مختار..وللأسف اللي خاف منه بوي صار صار...لما رده هو قعد في بنغازي وقال ع اساس بيبدا يخدم مع عمي جبريل ونبه عليه مايعطيش علم لبوي وقعد فترة غادي يخدم عنده وعمي جبريل بنيته الطيبه يحساب ربي هداه..المسكين قعد يحاول فيه بش يصلح منه ولأن هداكا ثعلب عرف كيف يوهمه ويضحك عليه وخلاه يأمنله لعند ماجت ليلة غبره الكلب هدا اتفق مع جماعته يخنبوا حوش ولد عم عمي جبريل ومش هو بس خنبوا حتى عمي جبريل وهربوا بعدها معاش حد عرفلهم طريق..هرب زي عادته وخلا لبوي العار والرزيه"
🍃انهارت سدرة بعد ماحكت القصه اللي قعدت سر مدفون سنين مايعرف عنه حد غيرها هي وبوها وامها وجدها علي وخالها المحجوب وعبد القيوم..
وخواتها حداها يسمعوا وهما في حالة صدمة شديده افقدتهم القدرة ع النطق..
ع خشة اريج اللي كانت جايبه معاها هاتف خالتها مررت نظرها عليهم وهي موجوعه ودموعها ينزلوا بعدين قالت..
/خالتي عمي المهدي من بكري يتصل..
استاقظت فردوس وقالت بخوف..
/خير غبارة..كف هداكا الحقير معلم ع وجهك!
غرفه بحقد شديد..
/ضربه ع فاده..
سدرة بخوف:ياربي شن بنقوله!
سكتوا شويه وهما يفكروا بعدين سدرة قالت..
/تو نقوله بنبات حدا خواتي يومين تانيات..
غرفه وهي تمسح في دموعها قالت..
/وكان قالك علاش!
ناضت وهي تقول..
/تو نعرف شن نقوله..
ومشت طلعت من حداهم واريج تبع فيها بنظرة كلها الم وحزن ع خالتها اللي ياما شافت وحملت حمول ثقيله تهد جبال...
🍃🍃🍃🍃🍃
"اني نبهتك قبل وقتلك ماتبذلش بيها مجهود زايد خلي كل شي يمشي وحده وحده يانضال"
نضال وهو عاقد حواجبه بضيق قال..
/قصدك توا وضعها تراجع!؟
المعالج الفزيائي..
/للأسف الاجهاد زياده يخلينا نرجعوا خطوات للخلف يانضال..
سكت وهو مضايق ومخنوق..
☘ومازال الدكتور يلوم فيه وينصح وكل اللي يسمع فيه منه يزيد الضيق في صدره..
..طلع من العياده وركب سيارته وهو حاس ان في جبل قاعد ع قلبه للحظه كان حيبكي بسبب عجزه..عجزه اللي مخليه يشوف نفسه ناقص في عيون اريج..هو صح ديما يبينلها انه متجاهلها بس من داخل كان قلبه بيموت عليها وفي نفس الوقت محروق من الغيره..نظرات الاعجاب ديما محاوطتها وفي استاذ معاهم حاط عينه عليها المعلومه من لما وصلاته وهو في حالة يرثى لها وللأسف ردة فعله كانت غير حكيمه ومؤذية ليه والنتيجة سمعها من المعالج..
حط يده ع صدره غمض عيونه بشده بعدين رخاهم..خدي نفس وبدي يقرا في سورة الفاتحه..
كل آيه كان يقرا فيها من قلبه ويحس ويستشعر في معانيها لدرجة خلاته يحس وكأن الله سبحانه وتعالى يرد عليه..
تبدد الضيق..وارتاحت النفس..والقلب استكان..
فتح عيونه وحول يده عن صدره..شاف ليده المصابه بنظرات طويله بعدين غير نظره عنها ورفع يده الصحيحه لفمه وبدي يقرا في سورة الفاتحه مرات ومرات لعند ماوقف ونفث في يده وينزلها ليده التانيه وقعد يمسح عليها وهو يقول..
/ياشافي ياالله..ياشافي الله...ياشافي يارب..
🍃ياالله..يارب..وهو من يقدر يتخطى اوجاعه في هالحياة من غير لطفه ورحمته ومعيته..حتى للكافر بيه معين..هو الله سبحانه وتعالى..ارحم الراحمين..
والغبطه كل الغبطه للناس اللي ع قد ماتشوف في حياتها من مصائب وآلالام وشدائد تزيد تتمسك بحبل الله تزيد تقوي علاقتها بيه تزيد قرب منه اكثر واكثر لدرجة انهم يوصلوا لمرحلة يحسوا فيها ان اي مصيبه تنزل عليهم نعمة لأنها قاعده تزيد في قوة الصلة بينهم وبين الله سبحانه وتعالى هنيئا ليهم هالمحبه هنيئا لقلوبهم اللي ولت من قوة الايمان جنة عامرة...
☘وكذلك هنيئا للقلوب الطيبه الصافيه..زي قلب صفيه بنت عمة عبد القيوم اللي تعزه وكأنه خوها ولد امها وبوها وتبي سعادته زي ماتبيها لخوتها الاشقاء..وتحب طوبى ومتعاطفه معاها لأبعد حد وتبيها تعيش حلوة تستاهلها..
صفيه اليوم دارت شي امها ماتعلمش بيه ومش مهتمه للعواقب ابدا لأنها واثقة جدا انها ع صواب..
🍃"عبد القيوم ولدكم وكل واحد فيكم متأكده انه يحبه اكثر من عياله ومتأكده انكم ماتمنوله كان الخير ووالله ياخوالي والله المراة اللي خداها ذهب صافي وهلها ناس ماشاء الله عليهم وخالي عبد الله عارفهم وكلي وشرب معاهم والاهم من هذى كله ان عبد القيوم مرتاح وسعيد معاها..بالله عليكم بالله كملوا عليه فرحته ديروا مايطيب خاطره ويديرله قدر كبير قدام مرته وهلها عدوا تعرفوا ع ناسها وارمولهم حبال الود خلوا عبد القيوم يزيد يرتبط بيكم ماتخلوش العكس يصير"
كانوا راجلها وخالها عبد الله يسمعولها وهما يشوفولها بإبتسامة ود واعجاب .
عمها الكبير بعد ماسمعها قال..
/نا والله عبد القيوم عندي كيف ماقلتي اعز من عيالي ومن صغره نتمنى نفرح بيه..ومادام هو شايف ان راحته مع الولية اللي اختارها ماعندي مانقول كان ربي يهنيه وكيف ماقلتي الاصول لازم نديروهن عشانه هو بالدرجة الاول..
ابتسمت صفيه بفرح..
وباقي خوالها ايدوا خوهم الكبير في كلامه صح ماكانوش مقتنعين تماما ومازال واجعهم اللي داره عبد القيوم لكن حبهم الشديد ليه ولخوهم اللي هو بوه ووفاءا لذكراه قرروا يساندوه في اختياره ويديروا مايكمل فرحته..
🍃ولأنه اللي صار بين صفيه وخوالها حتما مش حيدرق عن امها هلبه لما علمت بيه صار بيناتهم نقاش حاد..
🍃صفيه:نا مادرتش غلط مانبش خويا ينكسر قدام مراته وناسه..
سليمه بعصبيه:انكسر وفات قدام ناسه هنا..كلهم وين علموا انه واخد مطلقه انصدموا فيه..كلهم قالوا شن ناقصه بش ياخدها!! تخطا بناتنا ماقلنا شي مش لازم ياخدها تارقيه وحتى مش ليبيه راضيين بيها المهم تكون وحده تناسبه وحده كيفه وحده تفرح مش وحده مش حيجيه من وراها كان الهم والبلي..
صفيه بملل:نفس الكلام ياامي نفس الكلام اهو كم له مزوجها صارت حاجه من اللي خايفه منه!! ماصار شي وبعدين انا اللي نعرفه ان ماكانش عنده مشكله في حكاية مطلقة هذي ليش تغير الكلام بعدين ولاكلام خالاتي اثر فيك!!؟
سكتت سليمه وهي تغلي من الغضب..
صفيه بأسف:مانلومهن والله..هن مايعرفنهاش كيف ماانتي عرفتيها واللي عرفتيه عنها خلاك تحبيها ويوجعك حالها وكنتي متحسرة عليها كيفي!؟ شن اللي تغير توا !!؟ ولا كله كان من بعيد لبعيد ولما جي وقت الجد غيرتي رايك!!؟
سليمة ردت بنفس العصبيه..
/خلاص خلاص..انا من اليوم معاش نحكي نهائي موضوع عبد القيوم..رفعت ايديها وقالت..ونقول ان شاء الله ان شاء الله مايصير شي من اللي خايفه منه..ووجهت سبابتها ليها وقالت..لأن كان صار بعدين ماتلومي الا نفسك ياصفيه..
نزلت صفيه عيونها بضيق وقالت..
/تصبحي ع خير..
ومشت طلعت من حدا امها وخلتها تبكي..
🍁🍁🍁🍁
ومن الجنوب الشرقي للغرب..
للجميله..الخمس..
كان عبد القيوم مقعمز في الركن اللي تحبه طوبى في المزرعه..يشوف لهاتفه اللي شاده وهو مبتسم بسعاده..هالسعاده كان سببها مكالمه مالاش ثواني مكملها..
وتفاجئه ام العيون الحايره لما حطت ايديها ع كتافه وطبست ع راسه وطبعت عليه قبله..وشعرها الطويل اللي كانت ضامه جزء منه فوق شويه وطالقه الباقي طاح عليه..
هو في هديكا من قوة المشاعر الحلوة اللي حسها غمض عيونها وهام في عالم تاني وقلبه المحبوس وسط ضلوعه بيفر منه..
كل ماله قربها يزيد يعلق بيها اكثر..وصل معاها في حبه لدرجة العشق..جملة ميت عليها ماتعبرش عن عشر اللي يحسه اتجاهها..
وتزيد طير هالقلب في عشقها لما تسأل فيه وهي تغني بصوتها العذب..
/سألتك حبيبي لوين رايحين؟
ابتسم وهومغمض عيونه بعدين رد عليها يقول بنبرة القائه للشعر..
/قتلك لبنغازي ياحد الزين..
ضحكت بعدين قعمزت جنبه وقالت..
/هما كانوا يكلموا فيك!؟
جاوبها وهو يوزع في نظراته المغرمه ع ملامح وجهها..
/عمي اللي كان يكلم فيها
بإبتسامه قالت..
/عمك عبد الله..
هز راسه وهو مبستم..
قالتله:شن حاله؟
قاللها:الحمد لله..قالي ان الاسبوع الجاي ان شاء الله عمامي بيعدوا شور طرابلس عشان يتعرفوا ع هلك..
ابتسمت بفرح بعدين قالت..
/اممم..باهي كيف بيصير توا حني الاسبوع الجاي في بنغازي!؟
عبد القيوم؛مش لازم نكونوا حاضرين عمي بلغ خالك المحجوب وقاله يتفضلوا عنده وخالك قال بيخبر حسين والمهدي وباته يحضروا حتى هما يعني كيف ماتقولي لمة كبار..
طوبى بإبتسامه وعيونها مليانات دموع..
/الله يرحم بابا وجدي..
هو قال..
/الله يرحمهم..
حاوطها بذراعه وضمها لقلبه وهو يقول..
/راقده جنه..
طوبى بإبتسامه:اكيد من الفجر نايضة تلعب..
عبد القيوم بضحكه..
/بدري مت ضحك عليها وهي تدوي للقوبعه اغلب كلامها عن الحضانه المس وغزل ومهيمن..هالمهين هذى انظر شن دايرلها ناقمه عليه نقمة سودا..مهيمن خي..مهيمن قرد..مهيمن شرير...
طوبى بضحكه:ابله زهره قالت ديما يتناقر هو وياها كان داروا مسابقه ولااي نشاط مهيمن يفوز وهي عاد تنغر منه وتنزل فيه..
ضحك عبد القيوم وقال..
/ربي يحفظها..
طوبى بإبتسامه..
/آمين..
🍃🍃🍃🍃
"باهي قاعده مع امها ماقلنا شي لكن مش حقها تاخدها وترفعها مع راجل غريب"
فايزة بإستنكار؛شن تقولي يانسرين هدا راجل امها زي بوها.
نسرين بضيق:لامش زي بوها وعمره ماحيجي زي بوها البنت بوها حي مش ميت بعيد السو عليه..
فايزة:اسمعي نسرين فوتي الجو هدا ماديريش مشاكل للمراة وتفسدي العلاقه بينك وبين سدرة..
نسرين:يافايزة افهميني اني مانبيهاش تحرمنا من بنتنا..
فايزة بإنزعاج:تحرمكم كيف بس وهي يوم بعد يوم عندكم جت ع النهارين اللي قعدت فيهم مع امها!
سكتت نسرين وهي مضايقه..وفايزة كذلك سكتت وهي تشوفلها بعدم رضا..
تأففت نسرين بعدين غيرت الموضوع لما قالت..
/امتى بتسافري!؟
فايزة:مازال اخر اسبوع في شهر 2..
نسرين:علاش ماتفكريش بعد ماتروحي ديري كورسات؟
فايزة؛مخططه للموضوع هدا..
نسرين بضحكه..
/بنخشله بلوشي..
فايزة وهي تشوفلها بطرف عينها قالت..
/غير والله نقرشي..
☘ومن صالة شقة فايزة لدار مروة اللي كانت مقعمزة ع سريرها وهي شاده هاتفها ومازال تفكر في الخطوة اللي ليها ايام ناويه ديرها وفي النهايه حسمت امرها ودارتها واتصلت بالرقم اللي كانت حاطه عليه..
نادى مرة تنين تلاته وفي الرابعه انفتح الخط .
"ياهلا بمريوة ياهلا"
ضحكت مروة وقالت..
/شن جو هدوله؟
"تمام التمام شن جوك انتي وشن دايرة في القرايه؟
مروة:الحمدلله ماشيه شن حال عمتي والبنات وباقي العيله..
"الحمد لله الكل كويسين شن حال امك وخواتك"
مروة:الحمد لله..هدوله..
"اممم بتسألي عن خطيبك"
ابتسمت بخجل بعدين قالت..
/كان موجود عطيني نكلمه..
"نعطيك رقمه تكلميه!؟"
مروة بأحراج:لالا عطيني نكلمه شويه بس كان قاعد..
"قاعد ياحنه قاعد...مونا...يامونا..هيروشيما.."
"خير جدك تصيحي"
ضجكت مروة..
"يابارد احرجتني قدام خطيبتك"
فجأه سمعت صوت غريب مافهمتاش شنو وبعد بثواني جاها صوت معين وهو يقول..
؛"ماعنديش رقم تكلميني بيه!؟"
ضحكت بدون صوت لما فهمت ان جبد الهاتف من اخته وطلع من حداها بدون مقدمات بعدين شدت ضحكتها وتكلمت بجديه..
/لا عندك..لكن كلمتك من اختك بنقولك حاجه مهمه بس وبنسكر..
"يالطيف يالطيف..شن هي هالحاجه المهمة"
شدت ضحكتها ع قد ماتقدر بعدين قالت..
/نحكي جد..في لقطة دير فيها مش عاجبتني جيتك كل يوم في المرواح ووقفتك بالموطو قدام المدرسه مش حلوة بكل اللي يشوفك يقول جاي يعاكس واني نشوف تصرفات من البنات مستفزة وكلها بسببك ياريت مرة تانيه لما تجي توقف بعيد عن الباب وتجي في سيارة زي قبل..
"وشن تاني ياكاتيوشا"
مروة بإستعراب:شن هيا!؟
"كاتيوشا ياكاتيوشا حامله صواريخ روسيه تطلع منها مجموعة صواريخ في وقت واحد زي توا قصف اوامر ورا بعض ماخديتيش بيناتهم نفس"..
بعدت الهاتف شويه وهي تضحك بعدين رداته وقالت بجديه..
/المهم اللي عندي قلته وياريت تمشي عليه ماتخلنيش نزعل منك تصبح ع خير..
وسكرت عليه وهي تضحك..فجأه سكتت وقالت بخوف..شكلي زودتها هلبه..حي كان مايحرج!..عقدت حواجبها وقالت..يحرج ولاينفجر هدا اللي عندي ..
وتجيها رساله ع الهاتف كانت من رقم غريب فتحتها طول .
(تعرفي لو حد تاني غيرك كلمني هكي راني مسحته مسح..لكن انتي مانقدرش عليك)
ضحكت..
بعتلها رساله تانيه..
(معين***** بالانجليزي اسم حسابي اقبلي الطلب اللي ليه معلق قريب شهر..تعرفي لو حد غيرك دارها راني علقته من رقبته..لكن انتي مش اي حد)
ومروة تقرا وتضحك لين عيونها دمعوا..
☘ومن مروة لأختها صفاء اللي كانت مقعمزة مع بنت سلفها في دارها ويهدرزوا في موضوع خطير بعض الشي..
راما بخوف:والله العظيم مافي بيني وبينه حاجة ياصفاء اصلا انتي تعرفي كل شي تتوقعي يعني ممكن تصير بينا حاجه!؟
صفاء:تمام..لكن هو بحركاته بيجيبلك مشاكل تعرفي لتوا شادة اشرف بالسيف بش مايتهورش ويدير قصة..
راما بضيق:قوليله ياصفاء اني مانمشيش غادي الاع خاطر حناي وخالتي بس ومحمد شبه مانشوفش فيه بكل..
صفاء:قلتله حبيبتي قلت..وانتي لو حصلتي كيف تكلمي محمد تقوليله يبطل الحركات اللي يدير فيها ويفكك من المشاكل..
هزت راما راسها بإيجاب وهي مضايقه...
🍃🍃🍃🍃🍃
مسحت ع وجهها بعدين قالت..
/ااه ياخالي ااه..رسمي اليوم حيلي انهد هد مانحساب روحي الا بنموت ياخالي..
المحجوب بأسف وحزن..
/ياريتك سدرة خديتي رايي قبل اللي ديري درتيه انتي مش عارفه المخلوق هدا قداش خطير ياسدرة نسيبه بو مرته قالي عليه شي اثبتلي انه قايم ايده من ربي ويدير كل شي في اي حد يوقف في طريقه ولايهينه..
سدرة بعدم استيعاب..
/علاش ولى هكي علاش!!؟ اني ياخالي عشت فترة علاجي لما كان معاي والندم ياكل فيا نقول ياريتني عطيته فرصه ياريتني خليت بوي يكلمه ياريتني وياريت..ركبلي عقده ياخالي ركبلي عقده..خبطت ايديها في بعض وقالت..توا بس فهمت علاش طوبى رفعتني لدكتورة نفسيه فهمت حالتي عرفت شن دار معاي وقتها خلاني نكرهك كره ياخالي..
المحجوب:عارف يابنتي خوك هدا عرفته اكثر مانعرف نفسي..
سدرة رشفت ومسحت انفها بعدين قالت..
/ربي يعطيه فاش يلهيه ياربي يارب..
تنهد المحجوب وقال..
/خلينا من سيرته واسمعي..كلمني بكري شويه عم عبد القيوم قال بيجوا هو وخوته رجاله بس يتعرفوا ع العيله..
سدرة بضيق..
/والنساوين ماهمش جايات..ااخ وخلاص ااخ..والله وكان مش عارفه ان عبد القيوم راجل باهي وطوبى مرتاحه معاه ماخليت هالزواجه تم من اصلها..
المحجوب:في النهايه بعاد عليها..
سدرة قعدت تشوفله بنظرة هو فهمها غير نظره عنها وهو مضايق للغايه..
غمضت عيونها وتنهدت بعدين فتحتهم وقالت..
/خل نوض نجيبلك قهوة..
ناض وقال:لالا بنتي ماتجيبلي شي مروح توا..
ناضت وقالت..
/ع راحتك..
قدملها وحط يده ع ذراعها بعدين طبطب عليها وقال..
/تصبحي ع خير..
هي مشت وراه وقالت..
/قدامك كل خير..
قعدت واقفه في الجنان لين شافت خالها طلع ولما جت بتولي عيونها جو ع حوش جدها بدت ع وجهها ملامح الألم نزلوا دموعها ومشت خشت للحوش بسرعة..
🍀🍀🍀🍀
ويعدوا يومين..
عاشوا فيهم بنات الواعر اسوأ لحظات حياتهم حسوا بالوحده وكسرة الظهر توا بس..ضاع منهم جزء لايتجزأ من ماضيهم وحاضرهم واحلى ايام حياتهم..ريحة الغوالي اللي راحوا..راحوا وبعدهم بدي يريح كل شي حلو..
سدرة بعد يومين اثر الصفعه ع وجهها خف وهي زادت درقاته بالمكياج وروحت مع راجلها اللي مابتش تحكيله شي من اللي صار..مش لأنها مش مأمنه فيه بالعكس تماما..لكن ماكانش عندها حيل ولاجهد تعاود توصف مشهد تبي ضعف عمرها بش تنساه..وراجلها خلاها ع راحتها برغم الألم اللي كان يحس بيه ع حالها...
🍃ويسمع حسين باللي صار ويمشي طول لحوش عمه ويتلقى مايجيه من غرفه..
🥀"كله منك انت لو ماكنتش جبدت روحك وخليت بوك ينجبر يدير اللي داره راهو ماصار شي من هدا كله"
حط يده ع صدره وقال..
/تو اني اللي طلعت غالط!؟
غرفه بغضب:ايه انت..ياريت عمي جاني والله لو جاني كنت مستعده نعطيه نصيبي من الورث ولايريح هالحوش اللي حلينا عيونا فيه وكبرنا فيه..الحوش اللي عشت فيه عمر ياحسين..حوش جدي علي الواعر ريحة علي الواعر ماقعد من علي الواعر..نزلوا دموعها وهي تقول..الله يسامحك ياعمي وانت والله ماني مسامحاتك..ومشت خشت وخلاته في حالة صدمه وغضب شديد..لما جي بيمشي طلعت فردوس وشداته من ذراعه وهي تقول..
/رد بالك تمشيله ياحسين ماتخليشي يحطك في راسه مانبوش نخسروك حتى انت..
حسين ماقدرش يسمع الا كلام غرفه اللي قهره ووجعله قلبه وحسسه انه مايسوى شي جبد ذراعه من فردوس ومشي بسرعه طلع من الحوش..
فردوس وهي تبكي قالت بخوف..
/ياربي احميه منه ياربي...
🍃🍃🍃🍃
"لو تعطيني مايحويه ذهب ماني بايعه"
عقد حواجبه بعدم فهم وقال..
/اني نبي نعرف ياراجل انت من شني معجون من شني خالقك ربي..
مختار ببرود..
/شامية بالمكسرات...
حسين قعد يشوفله بملامح ازدراء..
تنهد بملل ورفع حواجبه بعدين نزلهم وقال..
/كان ماعندك شي تاني تدوي فيه..توكل..
رفع حسين حاجبه وقال..
/لاعندي وانت تعرفه كويس الشي اللي خلاك تقعد ورا عبد الرؤوف لين خليته يخش الحرب ويموت فيها..
ضحك ضحكه خفيفه..بعدين تبعها بوحده زيها..بعدين تبعها بتالته وطولها شويه وتنهد تنهيده متهكه وقالت..
/اعلى مافي خيلك اركبه..رفع سبابته بعدين قال..بس بنقولك حاجه ياحسين انت بالذات تعز عليا ومانبيش نضرك..مانبيش ياحسين..وماتجبرنيش..اشر عليه بسبابته وهو يحرك فيها بوعيد بعدين حط يده ع الطاوله..
حسين قعد يشوفله بنظرات كره وازدراء بعدين قال..
/ وَأَمَّا الْغُلَامُ فَكَانَ أَبَوَاهُ مُؤْمِنَيْنِ فَخَشِينَا أَن يُرْهِقَهُمَا طُغْيَانًا وَكُفْرًا...توا بس عرفت علاش كان عمي وين يقرا الايه هادي ولايسمعها يقعد يبكي..توا بس..
وختم لقائه معاه بنفس النظرات بعدين مشي طلع وخلاه جامد في مكانه من اللي سمعه منه...
وهو الجمود مااستمرش لأكثر من ثواني بعدها ناض زي الاعصار..يكسر ويخبط لعند ماوصل في رقعة الشطرنج خداها ورامها ع طول ايده وتجي ع اللوحه..اللوحه اللي رسمتهاله طوبى قبل اربعه سنوات وعطهاله الجالي قعد يشوفلها كيف انخدشت من النص عند رقبته..قعد ياخد في انفاسه بصعوبه وهو يقول بحقد شديد..
/تو تشوفوا ياكلاب..تو نوريكم...
🍁🍁🍁🍁🍁
"صابر وصلوا ياصابر"
سكر الصابر الكتاب اللي يقرا فيه وهو مبتسم بعدين ناض ومشي طلع من مكتبه وهو ماشي ورا مرته اللي يشوف فيها تمشي بسرعه وهي ملهوفه..ضحك ضحكه خفيفه بعدين نزل عيونه لرجله لقي روحه حتى هو يمشي بسرعه ضحك وحرك راسه يمين ويسار..
🌼وصلوا برا سمعوا صوت منبه سياره..مشي الصابر ضغط ع زر جنب الباب اللي كان سحاب بدي ينفتح..
وكاريمان كان مبتسمه بلهفه وهي تشوفله لين انفتح كله وخشت سيارة جبريل اللي كانوا راكبين فيها عبد القيوم وطوبى..
شافت طوبى لكاريمان من زجاج السيارة رفعت يدها وحيتها بحرارة وكاريمان ضحكت وهي ترد فيها والصابر يشوف لمرته بإبتسامه..
درس عبد القيوم ونزل من السيارة وطوبى نزلت معاه..
الصابر قدمله وهو يقول..
/مرحبا مرحبا..اهلا وسهلا..
وسلموا ع بعض بالأحضان..
وطوبى كانت حاضنه كاريمان وكاريمان تحضن فيها بقوة وهما يسألوا عن احوال بعض..
بعد مافكوا بعض وكاريمان مشت لعبد القيوم تسلم عليه بالمصافحه..
وطوبى لما قدمت للصابر بتسلم عليه بالكلام هو مد يده..ضحكت وصافحاته بيدها المغطيه ويفاجئها لما يقرب ليه ويطبع قبله ع راسها..
نزلوا دموع كاريمان وهي تشوفلهم وعبد القيوم وهو مبتسم كان مركز بنظره ع زوجته بس..
طوبي في هديكا اللحظه حست بدفي قرب لطفي حن لطفي شمت حتى ريحته..
"كيف حالك بنتي"
حتى السؤال هذا سمعاته بصوته..
رفعت عيونها المدمعات في الصابر وقالت..
/الحمد لله..كيف حالك انت..
الصابر بإبتسامه:الحمد لله..
☘وبعد السلام دخلوهم للحوش..
طوبى وين خشتله حست براحة..الحوش بكل تفاصيله كان مريح..كان بسيط بس في نفس الوقت راقي..حوش تفاصيله هاديه مافيهاش ضجة ولاصخب..مرتب ونظيف وفيه جو حلوة بالمرة..حوش يشبه صحابه يشبهم هلبه وكأنه فيه روح من روحهم وكأنه حي..
"عجبك حوشنا"
شافت لكاريمان وقالت بضحكه.
/مريح هلبه..
ابتسم الصابر لما سمع اجابتها..
عبد القيوم:جو طوبى النظام هذى ماتحبش الدوشه والبهرجه..
ابتسمت طوبى بشي من الخجل..
الصابر:هي صبي ياكاريمان ديري واجب ضيوفك..
ناضت كاريمان وطوبى ناضت معاها وهي تقول..
/اني مش ضيفه عمي صابر..
قرصتها كاريمان من خدها وهي تقول..
/انتي نجك ليا وخلاص..
ضحكوا وطوبى وجهها احمر خجلا وهي تضحك..
حاوطتها كاريمان من ظهرها وقالت..
/هي تعالي ياسمحه..
ومشوا مع بعض طلعوا وخلوا الرجاله برواحهم..
الصابر لما شاف لعبد القيوم لقاه مازال بعيونه ع الباب ضحك وقال بصوت عالي شويه..
/شن تخبرنا..
شافله عبد القيوم وهو رافع حواجبه بعدين قال..
/الحمد لله..
والصابر سمع اجابته وهو يضحك...
🍃🍃🍃🍃
طلعت اريج من القاعه بعد ماتمت محاضرتها..
صاحبتها مش منزله معاها الماده قعدت تمشي بطريقها للمكان اللي قاعده فيه تراجي فيها..
"اريج..اريج"
وقفت في مكانها والتفتت شافت استاذ ليها في احد المواد جاي وراها ينادي فيها..
وقف عليها وقال بإبتسامه..
/باهي اللي لحقت عليك..اريج نبي ندوي معاك في موضوع ضروري لو عندك وقت طبعا..
هي بإستغراب قالت..
/الحق ماعنديش وقت توا..
قاللها:خلاص خليها غدوة ان شاء الله..
🍃فهاللحظه كان نضال كيف جاي للكليه وهو ماشي مرر نظره ع المكان جو عيونه عليهم..ولعت في قلبه النار ..رد نظره القدام وكمل طريقه بالسيف..
اريج:ان شاء الله..نستأذن..
ولفت ومشت وعيون الاستاذ تلحق فيها ابتسم بعدين توجه بطريقه لمكتبه..
☘وتعدي ربع ساعه ويجي وقت محاضرة الماده اللي يعطي فيها نضال..
سبقوه هي وصاحبتها والطلبه داروا نظامهم اللي عودهم عليه في الجلوس..
خش عليهم القى السلام لكن ملامح وجهه كانت متجهمه..
قاللهم بيدير"كويز" تفاجئوا هلبه واستغربوا في حالته كان يبان جوه معكر ومعصب..
عطاهم السؤال وخمسة دقايق للأجابه..
وهما يجاوبوا كان يشوف لأريج وهي تكتب بنظرة غيرة والم تلمع بالدمعه....
رفعت عيونها فيه ع غفله بسرعه نزل عيونه يدوب ابتسمت وردت نظرها للورقه وهو معاش رفع عيونه فيها..
تم الوقت المحدد طلب منهم يسلموا وراقيهم..
الولاد لموهم من بعض وعطوهمله واريج لمتهم من البنات ولما جت بتمدهم معاش عرفت شن دير تمشيله ولاتعطيهم لواحد من زملائها..
هو طول مشالها خداهم منها بدون مايشوفلها..
من الارتباك والتوتر لما حطهم ع الطاوله ناش حافظه نظاراته طاحت لما طبس بيقيمها بيده المصابه وجعاته قامها بيده التانيه..الطلبه داروا رواحهم مايشوفوا في شي ماعداها هي اللي قلبها كان يتفتت عليه وهو لما حط الحافظه ع الطاوله ماشافش لغيرها..احساسه بالنقص خلاه يشوف نظرتها ع انها نظرة شفقه وهي في حقيقتها كانت نظرة حب ممزوجه بالألم..غير عيونه عنها..حمحم وقال..
/هي نخشوا في موضوع المحاضرة اليوم..
ورجع يحاول يتجاهل وجودها وهي مش قادره تحس بغير وجوده...
🍃وخالتها في هالوقت كملت محاضراتها ومشت بتطلع من الكليه..
اول ماوصلت في الواجهه يطلع في وجهها شخص غير متوقع كان يشوفلها بإبتسامه تنرفز فيها لأبعد حد..
قدملها وقال..
/السلام عليكم..
غرفه وهي تشوفله من فوق لتحت بإستغراب..
/وعليكم السلام..
🍃ولحسن الحظ..فهاللحظه يدرس حسين بسيارته قدام الكليه..نزل منها ولما جي بيخش يطيحوا عيونه ع منظر رقى الدم لراسه....
#ذكريات_لاتموت
#طوبى
....يتبع....
