#طوبى "جنة طوبى"
#جمان_فريد
#الجزء_103"بنت السلطان"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الإستغفار
قال الإمام ابن كثير رحمه الله؛
« من اتصف بصفة الاستغفار، يسر الله عليه رزقه، وسهل عليه أمره، وحفظ عليه شأنه وقوته »
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃فقرأت اقاصيص الأطفال
ودخلت قصور ملوك الجان
وحلمت أن تتزوجني بنت السلطان
تلك العيناها..اصفي من ماء الخلجان
***
وحلمت بأني أقطفها مثل الفرسان
وحلمت بأني أهديها أطواق اللؤلؤ والمرجان
علمني حبك يا سيدتي ما الهذيان
علمني كيف يمر العمر
ولاتأتي بنت السلطان🍃
_______________________________________
"الحمد لله كلنا كويسين وحالنا باهي انت شن حالك ومرتك وينها؟!"
تنهد بعدين قال..
/خليت عمر يحطها في حوش اختها..
مغليه بحزن:الحق وجعتني وخيتها ياناري غير شن طلعها برا بس..
عمر:ايه حقه هي امتى تزوجت وسافرت !؟
الجالي:قبل لتجيني نجاة بفترة بسيطه قالت قبل لتسافر ودعتني..
عمر:راجلها شن كان يخدم بالزبط وين طاحوا فيها العصابه اللي قتلتهم!؟
الجالي:التفاصيل مانعرفهاش ومانبيش نعرفها..يللا هما توا بين ايدين ربي ماتجوزش عليهم غير الرحمة..
مغليه هزت راسها وقالت..
/هو هدا الله يرحمهم..شن حالها نجاة توا؟
الجالي:اهو تحاول تولي كويسه..رفع حواجبه ونزلهم بعدين قال..الصغار وين؟!
رفعت امها حاجبها وقالت..
/رفعتهم مرت بوك معاها..
عقد حواجبه وقال..
/كيف!!؟ وين رفعتهم!!؟
عمر:للعرس..
بدت ع وجهه ابتسامه وهو يقول..
/يمشوا غادي عادي!؟
مغليه ضيقت عيونها وهي تشوف لولدها..
عمر:ايه عادي..
تنهد بعدين قال..
/بنركب ندوش..كان فيها كيف يام ديريلي حاجه ناكلها..
مغليه بإبتسامه:من عيوني ياغالي..
طبس عليها باس جبينها ومشي طلع من الصاله وهي بعيونها معاه..بعدين شافت لعمر وهي تقول..
/تحسه خير من قبل..
عمر هز راسه وقال:ايه الحمد لله...راكب نرقد..تصبحي ع خير..
وناض ومشي بيطلع وهو يسمع في امه ترد عليه..
"قدامك كل خير"
وبعد ماطلع قامت تليفونها واتصلت بخديجه..
🍃🍃🍃🍃
وعند اهل العرس..
كانت الخيمه مليانه..وبدوا توزيع الضيافه...
مروة وتاله وسدرة بنت المهدي...
سدرة اللي كانت سميتها تلاحق فيها بعيونها من اول ماجت..
نظراتها ليها كانت نظرات حزن واحساس بالذنب..
تمالكت نفسها ع قد ماتقدر وهي تتخيل في امها وين يطيحوا عيونها عليها..
🌸والعيون كانت ع مروة اللي بدت تكبر وتبان وعند بعض الناس ولت في سن زواج وفي من سأل امها عليها..
فايزة داخليا كانت راغبه لكن ردها كان الرفض لأنها شايفه ان بنتها تكمل دراستها...
☘لكن لفت الانظار ماكانش من نصيب البنات اللي في سن الزواج بس..فاتن كنة عيلة الواعر الجديده مرت حفيدهم الكبير كانت محط انظار الحاضرات..ماكانش الملفت شكلها وجمالها بس..حتى علاقتها بعيلة راجلها بالذات حماتها سدرة بانت قويه وفيها ود...
☘والود اللي كان بين طوبى وصغار نجاه مثير للإعجاب والتعجب..
🍃داخل..
كانت طوبى رافعه جنة في حضنها وشادة بيدها يد جوري وهما ماشيات للدار..
طوبى:هكي ياجنونه ديري لبنت عمك تريشيها وتاخدي توكتها..تو نوريك ياقنتشه..
جوري بضحكه:تلعب بيها ولاع بالها..
ضحكت طوبى بعدين قالت..
/هي خشي جوري..وفتحت باب الدار..
خشت جوري وطوبى وراها..مشت بجنه حطتها في حباسها وجت لجوري وهي تقول..
/تعالي حبيبتي..
خدتها من يدها وقعمزتها ع كرسي الزيانه وبدت تفكلها في شعرها ومرة مرة تراقب في جنه من المرايه...
فردت شعر جوري وهي تقول..
/الله يبارك..الله يبارك..توا بنديرلك تسريحه نموت فيها نراجي امتى جنه تكبر زيك بش نديرهالها...
ابتسمت جوري بحماس..
وبدت طوبى تمشطلها في شعرها..بعدين خدت شويه من الزيت متاعها دهنت بيه الشعر..وبدت تظفر فيه ظفيرة"السبوله"..كانت دير فيها بشغف وحطت لمستها الفنيه عليها وجوري فرحانه هلبه باللي تشوف فيه..
بعد بضع دقائق..كملت طوبى وفي النهايه خدت توكه "بكلة" من عندها وزينت بيها شعر جوري..
بعدت عنها شويه وقالت..
/شن رايك..
جوري وهي تلف ع جنب قدام المرايه بش تشوف شعرها ابتسمت بفرح وانبهار وهي تقول..
/تهبل تهبل..
ضحكت طوبى بعدين قالت..
/انتي اللي تهبلي..هي اطلعي لصحاباتك اكيد يدوروا فيك..
جوري بإبتسامه:باهي لكن قبلها شكرا هلبه..
طوبى بإبتسامه:عفوا..
مشت جوري طلعت من الدار..وطوبى التفتت لجنه وهي تقول..
/ياشعشبونه..وقدمتلها خدتها من الحباس وطلعت بيها من الدار...
🍃🍃🍃🍃🍃
"الله يرحمها قعدت تمشي ورا مايبي عقلها وضاعت وضيعتنا معاها"
نجاه وهي تشوف في الفراغ ودموعها ينزلوا..
/خلاص يامروة..خلاص..هي توا ماتت ادعيلها بس ياوخيتي..
مروة بنبرة باكيه:والله مابطلت ندعيلها ونطلع عليها في صدقات وان شاء الله ربي يقبل..رشفت وقالت..انتي شن صار فيك؟
مسحت نجاة دموعها وهي تقول..
/الجالي وقف معاي زي ماوقفت معاه واكثر ومايبيش يخليني..
مروة:اهله يعرفوا؟!
نجاه وهي ترشف:في مرة كلمهم خبروه..القصه اللي قالوا انهم سمعوها ان في عصابه خشت عليهم حوشهم سرقاته وقتلوهم..
عقدت مروة حواجبها وهي تقول..
/معناها في حد تاني عارف !؟
نزلت نجاه راسها وقالت..
/ايه..راجل صابرين كان يخدم عند مختار الواعر..
مروة بصدمه:خو طوبى!؟ حي عليك كان تعرف اللي صار حق والله لما تشهدر بيك..
حركت نجاة راسها بالنفي وهي تقول..
/لو يبوا يشهدروا كانوا داروها من زمان اختك ليها فوق 4شهور متوفيه..
بدت ع وجه مروة ملامح الوجع وهي تقول..
/الله لايسامح اللي وصلنا لهالحال..حسبي الله ونعم الوكيل..
ونجاة تسمع فيها وقلبها محروق ودموعها مابطلتش نزول..
🍃باتت هديكا الليله في حوش اختها بعد ماوافق راجل مروة ع مضض..
اما الجالي خلا نجاة ع راحتها من باب الشفقه ع حالها..
وفي نفس الوقت كان يبي يقعد ع راحته...
🍃فتح باب الجناح وطلع وسكره وراه..
مشي للدروج ونزل..وين وصل في اخرهم سمع اصوات هدرزة جايه من الكوجينه..
قدملها..ووقف في الباب..
شاف سميرة مع جوري وسدرة ونضال..
وع الطاوله قدامها صواني موالح جايبتهم من حوش اهل العرس..
سميره:هدا كله من طوبى حلفت عليا مانروح فاضيه..
☘وقلب الجالي المليان بيها اول ماجت سيرتها بدي يدق بقوة من الشوق واللهفه..
نضال بإبتسامه؛بارك الله فيها..
سميره:خل نمشي نبدل ونجي هيا يابنات قدامي..وترفع عيونها في الباب وتشهق شهقه انسمعت في الحوش كله..
جوري وسدرة عيطوا بفرح..
"عمو"
ونضال قعد يشوفله بإبتسامه مفاجأه..
قعمز ع روس صوابعه وهويضم في سدرة وجوري لحضنه..
بعدوا عنه وهما يشوفوله بإبتسامه..
جوري؛امتى روحت!؟
الجالي:وانتم في العرس..
سدرة:مولي حلو هلبه..
ضحك من قلبه بعدين باسها من خدها..
وسميره قاعده في حالة الصدمه والرعب..
قام عيونه شافها بعدين وقف ع حيله وقال..
/مساء الخير..
هي ردت:مساء الخير..ونظراتها ليه كلها ريبه..
بعد عن الباب وقال..
/اطلعوا..
ابتسموله البنات بعدين مشوا وسميره طلعت وراهم وهي مفجوعه وهاربه..
رفع الجالي حاجبه بعدين نزله وشاف لنضال لما قاله..
"حمد لله ع السلامه"
قدمله وضمه وهو يقول..
/الله يسلمك..
🍃وفي جناح سميره..
سميرة وهي تمشي وتجي في الدار..
/ياحي ياحي عليك ايام غبر..مانحسابه بيروح حق ياكبدي..
اعوذ بالله منه الشر في عيونه..وقفت في مكانها وهي تقول..حي كان علمت هديكا المسكينه شن يصير فيها! الفجي فيها وخلاص...
🍃هديكا المسكينه كانت عايشه اجواء الفرح اللي تبي فيها عن التفكير في اي شي يخوفها ولايوجعها..
في الصاله..
انطرحت ع الفراش وجتها جنه طاحت عليها..
ضحكت وهي تقول..
/قتلتيني..
جنه..
"نني"..
ضمتها وهي تقول..
/باهي هي..وبدت تغنيلها..نام نام يللا نام من تحتك ريش النعام واغطيك بزهر الفل وتتغندر زي السلطان نام نام يللا نام..
وحداها سدرة وفاتن يتفرجوا عليهم بإبتسامه حب وعيونهم تلمع بالدموع..
🍃"شن جو العرس"
جوري وهي مقعمزه جنب عمها تحكيله..
/حلو هلبه..
الجالي بنظرة لهفه:شفتي جنه؟
ضحكت جوري وقالت..
/ايه..ريشتني من شعري وفسدتلي تسريحتي بش تاخد التوكه متاعها..
ضحكوا الجالي ومغليه...
جوري:عاركتها ابله طوبى ودارتلي التسريحه هادي وعطتني توكه تانيه..
خفت ضحكة مغليه وهي تشوف لردة فعل ولدها..
الجالي مرر يده ع ضفيرة جوري لين وصل في اخرها شد التوكه وقال بإبتسامه..
/حلوة..
جوري:حتى اني عجبتني هلبه..
مغليه؛ماسألتيش عن ماما جوري..
بدت ع وجه جوري ملامح الضيق والتزمت الصمت..
الجالي لاحظها..باسها من راسها وقال..
/خلاص بري ارقدي الساعه 12..
نزلت جوري عن الكرسي وقالت..
/تصبحوا ع خير..ومشت بسرعه وطلعت من الصاله..
مغليه:مرت بوك الشومه كرهتهم في امهم..
الجالي:واخده راحتها هلبه .
تنهدت مغليه بتهكم وقالت..
/بوك ياسيدي متقويه ببوك..رفعت حاجبها وقالت..تعرف كيف خداها!؟..جابتهاله هديكا العقيربه اللي ينقاللها طوبى..
رفع حواجبه وقال..
/قصدك علاقتها بطوبى قويه!؟
مغليه وهي تشوف برفعة حاجب..
/بالعيله كلها..
غير نظره للطاوله قدامه وهو يفكر..وامه مركزه تركيز شديد عليه..
"باش مهندس"..
التفت للباب شاف بوه وخوه المهدي..
ناض ومشي لبوه باس ايديه وراسه بعدين ضمه..
محمد:حمد لله ع سلامتك..
الجالي:الله يسلمك..تباعد عنه وشاف للمهدي..
المهدي فتح ذراعه وقال..
/تعال..
ابتسم الجالي وضم خوه..والمهدي يطبطب عليه بيد وحده..
🍃وفي دار خوتهم..
نضال بضيق:قاعد قلبي مش صافي من ناحيته..خوك هدا دمرلنا حياتنا كلنا..
عمر؛خلاص اللي صار صار..وفي النهايه هدا خوك لابتنظف منه ولابينظف منك وانت وليت متدين يانضال وتفهم في الحاجة هادي كويس صلتك بخوك رد بالك تقطعها مهما دار..
تنهد نضال..بعدين خدي تليفونه فتح ع تطبيق القرآن وبدي يقرا سرت..
اما عمر عطاه بالظهر وهو يفكر في كلامه..في قرارة نفسه كان موافق خوه في رأيه ومشاعره لكن مهما دار يقعد خوه..
🍃🍃
"ايه والله يقعد خوهم سيورهم لبعض"
الصيد:لكن لتوا قاعد بين عيوني الموقف اللي صار في جنازة لطفي الله يرحمه..الراجل مات وهو غاضب ولده..اني شفت الحاج علي كيف قالب وجهه عنه مش راضيه اللي صاير..
نجمه بضيق..
/الله غالب في الاخير البنات محتاجين خوهم يقعد في فوق روسهم مايقدر حد ياخد مكان بوهم غيره..
هز راسه وقال..
/ربي يهدي النفوس ويصلح الحال..
نجمه:ايه والله..المهم بنقولك ولدك عبد الفتاح مش مرتاحتله
الصيد قال بضحكه..
/شن مالا خدي الثالثه!؟
نجمه بضيق:ندوي مني جد ياحاج..ولدك يلمح يبي يمشي يشوف حوشه اني عطيته قلة السماح لكن انت تعرفه معاندي ويدير مافي راسه تفاهم معاه بالله عليك..
هز راسه وقال؛حاضر حاضر..معاش تخممي فيه تو نتفاهم معاه..
🍃🍃🍃🍃🍃
"صار روح!"
هدا مختار يتكلم هاتفيا مع الاقجم اللي جابله معلومه مرواحة الجالي..
"روح بيه خوه الطيار حطوا مرته في حوش اختها قبل"
رفع مختار حاجبه وقال..
/امم..باهي يااقجم تصبح ع خير .
"قدامك كل خير"
نهي مختار المكالمه ومشي خش للمربوعه الخارجيه متاع حوش اخته اللي كاين بايت فيها بروحه..
تمدد ع الفراش وهو منزعج النومه يكرهها..النومه هادي عنده مربوطه بآلام وذكريات بشعه مايبيش يذكرها..
وللأسف اول ماحط راسه ع المخده خطرت عليه ناض قعمز..
ربع ايديه وغمض عيونه وع وجهه باديه ملامح غضب ممزوجه بالألم..
"مارقدتش"
فتح عيونه وشاف للباب..
خشت عليه وقالت..
/تخاف ترقد بروحك..
بدت ع وجهه ملامح الامتعاض وهو يقول..
/بطلي طولة لسان..
ضحكت ضحكه خفيفه بعدين قالت..
/نوض ارقد في دارك..
رفع حواجبه وقعد ساكت..
طوبى:مش مني من مرتك المسكينه اللي باين عليها تعشقك عشق..قالت يكره النومه ع الوطى..
ناض وهو يقول..
/مش حنبات فيها غصب عنك..
طوبى:انت خشيت الحوش غصب عني جت ع الدار يعني!
تنهد بعدين نزل نظره للأرض عقد حواجبه بضيق وقال..
/باهي اطلعي قدامي..
طوبى:هيه راك تنسى اني مولاة الحوش..اشرت بيدها ع الباب وهي تقول..
/اطلع قدامي..
مختار؛يابنت انتي بيني وبينك ربع قرن عيب اسلوبك هدا معاي.
تنهدت بملل وقالت..
/لو سمحت تفضل نوريك دارك..
🍃فضل السكوت وهو يحرك في راسه يمين ويسار عارفها تبي تستفزه بش يدير تصرف يغلط بيه قدام سدرة..
وهي كانت عارفه انه فاهم عليها ومع ذلك مصرة تكمل في اللي دير فيه لأنها واثقه من الوصول لمبتغاها..
ممكن طول هالحرب البارده بينه وبينها..ووارد جدا طوبى تفقد تركيزها بعد تعرف برجعة الجالي..
لكن قرر يخلي الخبر يجي من غيره اتقاء للشبهات🍃
خشت للحوش وهو وراها..
قاللها بهمس:جنه راقده؟
ردت عليه بنفس الهمس..
/ايه..
وقعدوا يمشوا لين وصلوا في داره..
وقفت وقالت..
/مش قد المقام..وفتحت الباب بهدوء..
هو خدي نفس وخش للدار...
وقف في بابها وقعد يمرر في نظره عليها وشبح الذكريات يحوم حواليه..
يجيبله فيهم ذكرى ورا التانيه وفي اغلبهم كانت امه حاضرة..
طوبى؛نمشي؟!
التفت وشافلها شويه بعدين هز راسه بالموافقه..
سكرت طوبى الباب ومشت بإتجاه دارهم..وين وصلت فيها شافت لدار بوها وامها...
حست بوجع في قلبها لما تفكرت وصايا بوها ليها..
مشت بخطوات خجوله لداره..فتحتها بهدوء وخشت..
سكرت الباب وراها..وبدت دموعها بالإنهمار..
قدمت للسرير وقعمزت عليه وهي تبكي بصمت..تبكي بألم وقلبها موجوع..حاسه روحها خذلت بوها..مش همها اللي جاها من مختار قد ماهمها اللي صار في بوها من وراه...
تمددت ع السرير وغمت وجهها في المخده وقعدت تبكي بالعبرة..
🍃زي ماكان هو مغطي وجهه ويبكي بألم..من شعور مخفي مايبيش يعترف بيه لنفسه..وشوق شديد لأمه...امه اللي كسر بخاطرها وخلاها تذبل بعده لين ماتت...
🍃🍃🍃🍃🍃
ويطلع تاني يوم...
فرحوا سدرة وفاتن لما لقوا مختار بايت في داره..
لكن غرفه زاد ضايقها الوضع وطوبى كالعاده تحاول تمتص غضبها وتهدي فيها...
🍃عدى اول النهار..داروا فيه غدي للرجاله..
الغدي جاهم من تحت شيف ليبي مشهور يعرفه مختار..
حضروه اغلب اهل الشارع وع راسهم عيلة شنيبه..كلهم حضروا طبعا ماعدا الجالي..
وكذلك عدي كان موجود ونسيبه راجل اخته اللي ساعد في علاج سدره..وخوت الفاندي كانوا موجودين...
عبد القيوم في حضور عدي كان مش طايق روحه..مش متحمل وجوده..مش متحمل يشوفه يتقرب من اهلها ويهدرز عليهم..نار والعه في قلبه ماتبيش تهدا زايدتها نار الشوق...
وفي عز الغدي واحد من الجيران قال للمهدي..
/مهدي.. زي اللي بكري تلامحت الجالي!؟
اللي سمعوه في الخيمه كلهم توجهت انظارهم للمهدي وخوته..
عبد القيوم جمد من صدمته..
وعدي بدت ع وجهه ملامح الضيق..
بينما ايمن عقد حواجبه بغضب وهو يراجي في اجابه المهدي اللي قال..
/ايه روح امس..
غير عبد القيوم نظره لعبد الرؤوف لقاه يشوف للمهدي هو متفاجئ..
:باهي حمد لله ع سلامته..
المهدي:الله يسلمك..ورجع ياكل مرة تانيه..
هدا كله والرجاله الكبار اللي مقعمزين في طرف الخيمه ماسمعوا شي..
مختار اللي كان ملتزم الصمت قعد يسرق في النظر لعبد القيوم..لقاه وقف ماكله وع وجهه باديه ملامح الغضب وربيع وسامي يكلموا فيه..
غير نظره عنه جو عيونه في عيون عبد الرؤوف..شافوا لبعض بنظرات حاده بعدين غيروا عيونهم عن بعض..
حسين قرب لوذن عبد الرؤوف وقاله..
/عندك علم!؟
عبد الرؤوف:نهائي..
بعد حسين وهو يمرر في نظره ع ولاد شنيبه اللي كانوا ملهيين رواحهم بالغدي..غير نظره عنهم لخوه لقاه يبان مهموم بعد ماكان مبتسم وجوه حلو...
🍃🍃🍃🍃🍃
وفي الكوجينه الخارجيه لحوش طوبى..
سميره؛والله لتوا ترعش مع بعض انتي كان تشوفي كيف كان يشبحلي مش عارفه كيف عاشت معاه طوبى!!؟
سميرة بقلق..
/عطيه دي مش وقت مرواحه بكل..اسمعي توا ماتقولي شي بكل خلي النهار يمشي ع خير وبعدين ساهل..
هزت سميره راسها مواقفة لكلامها..
مطيره:هي تعالي..
ومشت مطيره طلعت..وسميره طلعت وراها وسكرت الباب...
#بنت_السلطان
#طوبى
....يتبع.....
