طوبى "جنة طوبى"
#جمان_فريد
#الجزء_الثمانون "جنة قلبي "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
🌙رمضان مبارك🌧رمضان الدعاء🌙
إذا دعَوتُم فألِحُّوا؛ فقد قال الأوزاعي: "كان يُقال: أفضل الدُّعاء؛ الإلحاح على اللَّه، والتَّضرع"، وتتجلَّى دعوات المُلِحِّين في لزومهم لها، وتكرارها، وحضور قلوبهم فيها، وإظهار ضعفهم وحاجتهم لربهم، وتجديد الآمال بحصولها ولو تأخر وقوعها.
- الشيخ صالح العُصيمي.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃ماذا لوعاد معتذرا؟!...
مُعتذراً عن ماذا !!..عن لهفة قلب أضاعها بعناده ..
أَم عن خذلان كالصفعه !!..أَم عن تقلب وده !!..
أَم عن نومه ليلاً وهو يعلم أنه من سلب نومي !!..
أَم عن أنه أفقدني الثقه في كل من حولي !!..
أَم عن أنه مَن رفعني للسماء ثم تركني اهوى ..دون شفقة!🍃
_________________________________________
وتنغصت عليك فرحتك ياعواطف..
وخديجه دارت أكثر من هدف بضربه وحده في هاليوم..
بعد مااتقنت تمثيل فقدانها للوعي اللي قلب الصاله رأسا على عقب واربك الحضور واولهم سميره..
كملت باقي العرض في دار حمواتها بعد مادخلوها فيها وبخوا عليها بش فاقت..
ومجرد ماتفيق تنهار بالبكي بدون ماتقول كلمه..
وامها تسال خيرك!
وعزوزتها تسأل شن جاك؟
وهي تبكي وبس...
وسكوتها هدا خلا امها تعزوا اللي صارلها لسبب واحد مافيش غيره السبب الجوهري عندها لكل المصايب اللي تنزل عليهم كبيره كانت ولاصغيره..
مغليه بقلق بالغ:عطهولها والله عطهولها..
نجمه بقلق:اقري عليها يانجاح اقري..
نجاح؛خل نعرف قبل كان تحس قي حاجه كان تحسي في حاجه ياخديجه قولي خل نكلم محي الدين!..
هي هدا وين تكلمت وقالت بنبرة باكيه..
/والله ماني مسامحتها كان تصير في العيل حاجه..
هما استغربوا..
وامها قالت:من هي؟
خديجه قعدت تبكي وهي ساكته..
نجمه؛تي تكلمي قولي مني!
خديجه ببكي وبنظره لوم..
/سميرة ياعمتي سميره..
اتفاجئوا نجمه وبنتها..
ومغليه قالت..
/خير بلاها شن دارتلك؟
خدت نفس بعمق وطلع معاها بعبرة بعدين قالت..
/اني والله مادرتلها حاجه ولا في بيني وبينها حاجه اني حتى سرها لما عرفته سكت عليه وماقلت عليه لحد لكن..سلفاتي هما جبدوا مني الدوة جبد..
نجمه:دوة شني وسر شني!
خديجه شبحتلها شويه بعدين رشفت وقالت..
/عبد الفتاح واخد عليها بنت كعبار..
مغليه دارت مصدومه..
عكس نجاح اللي كانت مصدومه فعلا..
اما نجمه بدت ع وجهها ملامح الغضب والتزمت الصمت..
خديجه ببكي:باهي اني غلطت لكن مش قصدي الغلط..وحاجه زي هادي مش حتقعد مدرقه اصلا..واني والله ماكنت نعرف انها عارف وانه واخد عليها برضاها..
هني الصدمه كانت من نصيب نجمه حتى هي..
وخديجه مكمله وهي مدايره روحها مرتبكه وملخبطه تقول..
/شدتني في الكوجينه وماخلت ماقالتلي وقعدت تعاير فيا
قالتلي انتي راجلك متاع نساوين وقاعد معاك ع خاطر فلوس بوك..
مغليه بشهقه؛هي هكي قالت!
خديجه حطت يدها ع وجهها وقعدت تبكي وهي تقول..
/كلامها يحرق يام يحرق..
مغليه شافت لنجمه وقالت وهي معصبه..
/شني يانجمه!
نجمه شافت لبنتها بغضب قالت..
/بري نادي سميره..
نجاح بتوتر:خلوها بعد ماتروح عواطف ماتفسدوش فرحتها..
ناضت خديجه وهي تقول..
/نجاح عندها حق مانبيش نفسد ع عواطف لكن مش قاعده بنركب شقتي..
نجمه:مشيها ياخديجه توا وبعدين نتفاهموا..
حركت راسها بالرفض وقالت..
/سامحيني عمتي والله مانقدر..
نجمه بتوتر:ع خاطري بنتي..
غمضت خديجه عيونها وحركت سبابتها بالنفي وهي تقول..
/لالامعليشي..معليشي..فتحت عيونها وقالت..كان نقعد اكثر من هكي نتبلغم..
ومشت طلعت من الدار..
مغليه:تو الواحد شن بيقول لاحول ولاقوة الا بالله وخلاص..
ومشت لحقت بنتها..
نجمه بخوف:تي غير راجو شويه بالله عليكم..
ومشت طلعت وراهم..
نجاح بكره: غير علاش طالعه في جرتهم خل ينتلفوا!..سكتت شويه وهي تفكر بعدين قالت..الله يسامحك ياعبد الفتاح ياوخيي..ومشت طلعت من الدار وسكرتها وراها.
🍃وسكرت خديجه راسها واصرت تروح لشقتها وطلعت مع امها من باب الكوجينه بش مايشوفهم حد..
وخلوا نجمه في حالة ارتباك وخوف..
خوفها من تبعات هالمشكله اللي متأكده انها حتكبر..
🍃🍃🍃🍃🍃
"من بكري المغص ماهفتش"
فردوس؛هادم الموليات ماتخافيش منهم..
طوبى وهي حاطه يدها ع بطنها وملامح الوجع باينه ع وجهها شافت لسرير بنتها وقالت..
/نبي نروح مش طايقه القعاد هني..
اريج:كلها ليله وفراقها صبح..
تنهدت طوبى وعيونها ع بنتها وقالت..
/زعمة من بيسجلها؟
فردوس:فايزة قالت قاعد ماروحش..
شافتلها طوبى وقالت..
/كان سمع بيروح طول عارفاته هدا علاش نبي نروح..
اريج:مش في تونس هو بش يروح طول ماتخافيش..
تنهدت طوبى مرة تانيه وقالت..
/يارب..
فردوس وهي طمن فيها..
/إن شاء الله خير يارب..ان شاء الله خير..
واريج تشوف لخالتها بحزن وقلق وهي تفكر في اللي حيصير بعد جية جنة..
🍃🍃🍃🍃🍃
وتمت حفلة عواطف اللي ساد جوها التوتر برغم محاولات نجمه وبنتها وكناينها تخفيف هالتوتر وتلافي الموقف اللي داراته خديجه..
لكن عواطف مجرد ماجو قريبات راجلها بيروحوا بيها نست كل شي..
وولت كلها فرح وحماس لحياتها الجديده اللي ياما تمنت تعيشها..
زوج...حوش مسؤولة عنه...واستقرار..
ودعتها امها وفي قلبها خوف عليها..
وودعتها اختها وهي تدعيلها بالهني والراحة والسعاده...
🍃لكن اللي صار في حوش اهلها بعد ماروحت...!
🍃🍃🍃
ركب محي الدين لشقته وهو في قمة القلق بعد ماحكتله بنته راما ع اللي صار لأمها..
وين خش الشقه قعد ينادي عليها وماجاش منها رد..
كان قلبه حيوقف من الخوف من لو يكون صارلها شي وهي حامل..
ومجرد ماخش دار النوم وقف في مكانه وهو متعجب ومستغرب من اللي شافه..
شناطي كبار واقفات قرب الباب..
وخديجه مقعمزة ع السرير بعبايتها ووشاحها ع كتافها والباين انها كانت تراجي فيه لأنه اول ماخش عليها ناضت وقفت..
هو سألها؛شن هدا!؟
جاوباته بملامح وجه حاده ونبرة مبحوحه..
/زي ماتشوف..خلاص لعند هني وياسر
هو بقلق وعدم فهم..
/شن تقولي انتي شن جاك!
خديجه وهي تتصنع في الحرقه قالت..
/كل شي مشيته وفوته يامحي كل شي وشديت فيك وكملت معاك قلت مهماصار يقعد بوصغاري مانبيش نشردهم ونحرمهم يعيشوا بيني وبينه..ماكنتش عارفه اني قاعده نهدر معاك في كرامتي ونطيح من قدري
هو بعدم استيعاب..
/يامراة خيرك شن جاك هبلتي!
خديجه؛نولي مهبوله حق لو قعدت معاك بعد اهانة مرت خوك ليا الاهانه اللي جتني منها بسببك..
هو قال..
/تعوذي من الشيطان وقعمزي واحكيلي وحده وحده شن صار ومن هي هادي اللي هاناتك شن قالتلك بالزبط!
خديجه بنبرة مخنوقه تصنعا..
/قالتلي كلام انت ياما قلته وديما تلقح بيه وتلمح لكن ماتوقعتش توصل بيك انك تحكي بيه قدام الغير..معقوله يامحي مااحترمتش اني ام صغارك وماشي تقول قاعد معاها ع خاطر ماليها وفلوس ماليها!
هوبصدمه:اني!!! ؟
هي بإنفعال مصطنع..
/مالا منين بتجيب الدوة هادي سميره كان مش انت اللي قلتهالها قولي! تعاير فيا وتقولي راجلك ديما يخون فيك لأنه واخدك ع خاطر فلوس بوك!
محي الدين بصدمه..
/سميره هكي قالت!
هي ببكي..
/ايه سميره اللي اكيده سامعه الدوة هادي منك ولامن خوك ولامن حد من عيلتك اللي مافيهم حد طايقني رغم اللي درته ع خاطرهم ديما مدايرني برانيه ديما اني اخر من يعلم ديما اني زي الاطرش في الزفه بين نساوين خوتك..نجاح هادي الجاحده الناكرة ناسيه وقفتي معاها اللي لولايا اني ماكنتش حملت ولاشمت ريحة الصغار..ولاعواطف اللي ياما وقفت معاها بالذات بعد مااطلقت زمان وانضحك عليها..ولا ولا ولا..نقعد من توا للصبح واني نحكي ع اللي درته معاكم وبالذات انت ياراجلي يابو صغاري يلي عمري ماقصرت معاك وشن تبي نديرلك وناخد بخاطرك وانت بشن جازتيني فالنهايه..بطياح القدر وقلة القيمه..
هو بإرتباك وقلق..
/غير شويه ياخديجه عطيني معاك كلمة.
قاطعاته وقالت..
/لاكلمه لاعشره اني خلاص فاض بيا معاش نقدر نتحمل نبي نطلق يامحي.
هو قال؛لالا ياخديجه تعوذي من الشيطان معاش تقوليها الكلمه هادي..
خديجه تحركت ومشت بترفع شنطتها وهي تقول..
/خلاص اسكت معاش نبي نسمع صوتك..
هو وقف قدامها وشدها من يدها وقال..
/بري غادي مافيش طلوع..
هي قالت بآنفعال وكانت تبعد فيه عنها..
/حول خليني حول..
محي الدين..
/قسما بالله العظيم ناخدلك حقك والله ناخدك حقك..
هي بعياط..
/حق شني حقي اللي شرتعته يمين ويسار..
هو قال..
/خلاص وطي صوتك خديجه!
وهي تعيط وتقول..
/حول..حول..معاش طايقاتك حول..
وهو قعد يحاول معاها لين قدر يحتوي غضبها ويبوس ع راسها وهو يتأسف منها ويوعد فيها انه ياخد حقها ومافكرش نهائي في انه يسألها شن سبب المشكله اللي صارت بينها وبين سميره من الاساس...!
وبعد ماانشحن الشحنة اللي هي نزل لحوش اهله طول..
🍃🍃🍃🍃
"غير استهدا بالله خل نفهموا شن صار بيناتهم قبل"
هو بغضب؛يصير بينهم مايصير ماتوصلش بيها انها تهين مرتي وتهيني اني معاها وتقول قاعد معاها ع خاطر فلوس ماليها!..ترضاها ياعبد الفتاح!!
عبد الفتاح بضيق وهو يكتم في غضبه حرك راسه بالنفي..
نجمه بخوف..
/اسمع المشكله صارت بين النساوين خليها بيناتهم واطلع منها..
هوقال بإنفعال..
/كيف نطلع منها كيف هادي وصلت فيا وصلت فيا تي هدا خراب بيوت يام!
عبد الفتاح بإحراج وضيق..
/امسحها في وجهي وحقك اني ناخده..
🍃وفي دار المعيشه..
سميره ببكي..
/استفزتني يانجاح صغرت مني قدام سلفاتي هي اللي بدت بالاهانه يانجاح وربي شاهد..ان شاء الله نلقاها في صحتي كان اني اللي تسببت فيها..
نجاح بضيق..
/صادقه صادقه..خديجه نعرفها كويس واني اللي نفهمها لكن مفروض ماخليتهاش تستفزك ياسميره مفروض كبرتي عقلك وتجاهلتيها..
سميره ببكي؛ماقدرتش والله ماقدرت وجعتني روحي.وجعتني اكثر ماني موجوعه...
وقعدت تبكي بالعبره..
حضنتها نجاح وهي تقول بحزن..
/لاحول ولاقوة الابالله..
وسلفات سميره حواليهم متأثرات باللي صار لسميره لأنها صاحبة قلب طيب وعمرها ماوجعت حد ولادارت مشاكل مع حد..لكن الطيب من يخليه في حاله!يقعدوا اصحاب النفوس المريضه وراه لين يجبروه ع الغلط ويطلعوه في صورة اسوأ من اللي هما عليها بش يتساوى معاهم ومايكونش خير منهم...
🍃قدرت نجمة تهدي ولدها وتدارك الوضع قبل لتصير مشكله بين الخوت ونهت المشكله قبل ليروح راجلها ويشهد عليها لأنه ممكن يكبرها اكثر..
بعد ماسقدت محي الدين..مشت طول لكنتها..
نجمه بصرامه..
/الكلام ليكم كلكم مش لسميره بس في الجديد تصير بيناتكم مشكله تخلوها دابكم مادخلوش تريسكم فيها وتقعدوا تلقحوا بيهم ع بعض وتسببوا حساسيات بين الخوت...واللي تسمع كلام من وحده عن وحده فيكم في غيابهم ماتمشيش زي شيطانة الرجيم تعاود الدوة وتفتن..
الكنة المعنيه بهالكلام وجهها تغير لونه..
نجمه:سمعتوني شن قلت!؟
هزوا روسهم بإيجاب والصمت مسيطر عليهم..
نجمه؛خلوني معاكم باهيه وماتخلونيش نغير المعامله..وتوا اطلعوا كلكم واقعدي انتي ياسميره..
ومشوا كناينها طلعوا وهما مضايقات ونجاح مشت طلعت معاهم وسكرت الباب وراها..
نجمه قعدت تشوف لسميره للحظات..
وسميره تشوفلها بألم واحراج ودموعها ينزلوا..
نجمه؛من امتى تعرفي ان راجلك واخد عليك!؟
سميرة بنبرة مخنوقه..
/شاورني قبل مايتزوج..
نجمه:وسلمتي فيه هكي عادي!
سميرة بألم..
/شن تبيني نقولك ياعمتي! انتي خديتني لولدك مش هو تزوجته وعشت معاه قريب 20سنه عمري ماحسيت انه يحبني ولايبيني ياعمتي مراة خداها وعاش معاها ودار منها صغار لكن قلبه ماكانش معاها...تعرفي ياعمتي ولدك قعد سنين معاي وهو داس صوره هو وياها ورسايلهم لبعض مانقدرش نوصفلك اللي حسيت بيه لما شفتهم عنده اول مره..تمنيت نموت ياعمتي..
نجمه غرقوا عيونها بالدموع وهي تشوفلها بندم..
وهي كملت تقول..
/درت صغار ماهانش عليا نشردهم واصلا عارفه مش حيقدر يتحملهم حد زي بوهم علاش نمرمد فيهم! طز في كرامتي قدام كرامة صغاري ماهمتنيش روحي هموني صغاري بس ربيتهم وكبرتهم والحمد لله كل واحد فيهم طلع احسن من التاني وهدا اللي صبرني وخلاني مع ولدك لليوم..وراهو اني اللي قلتله يدرق عليك وع ولاده ماكنتش نبيهم يعرفوا لأني متأكده انهم حينفروا منه مش حيتحملوا في امهم مش حيتحملوا فيها الاهانه ياعمتي..ابتسمت تهكما وقالت..لكن وين مافيش حاجه تدرق عمر كامل واهي طلعت وحتوصلهم..
نجمه تنهدت بألم وقالت..
/والله مايستاهل ظفرك يابنتي انتي خير من مية وحده زي اللي اسمها ابتسام هادي..لكن هما هكي الرجال ديما يغلطوا في المراة الصح ويجروا في جرة المراة الغلط..سامحيني يابنتي مافي حد غلط في حقك غيري اني..
سميره رشفت وقعدت تمسح في دموعها وهي تقول..
/الله يسامحك ياعمتي..في النهايه هدا نصيبي وراضيه بيه والحمد لله ع كل حال..
ونجمه وهي تسمع فيها شن تقول كانت تشوفلها بحسره وتحرك في راسها يمين ويسار بأسف...
🍃وفوق عند كنتها التانيه..
اللي قاعده مكمله في عرضها الدرامي بش توصل للي يرضي غرورها وكبريائها المجروح..
خديجه؛قتلك نبي نمشي لحوش اماليا..
محي الدين:كان تبي تمشي تغيري جوك وترتاحي باهي..
قعدت ساكته وهي تشوفله بإمتعاض..
محي الدين:كان غير هكي مافيش طلوع من الدار..
هزت راسها بالموافقه وقالت..
/باهي حول من قدامي..
محي الدين:نرفعك تعايني قبل..
تنهدت بضجر بعدين قالت..
/باهي..
🍃وطلع هو وياها من الحوش للعياده اللي تابع عندها في حملها..
وخلوا راما بروحها في الشقه..
وهي قاعده بملابس المناسبه وزادت حطت مكياج ووقفت قدام المرايه وقعدت تاخد في صور"السيلفي" صورة ورا صورة..
وبعتت بعض منهم لأسماء تشوفهم...
ويفجعها خوها لما سمعت صوته ينادي فيها..
قعدت تمسح في المكياج بسرعه وهي ترد عليه بصوت عالي..
/شويه شويه تو نجيك..
وبسرعه بدلت حوايجها بعدين طلعتله..
لقاته مقعمز في الصالون لاهي بتليفونه..
هي قالت:خيرك تنادي!؟
قام عيونه فيها وقال؛شن صار لامي؟
راما؛مش عارفه بالزبط لكن شكلها تعاركت مع خالتي سميره..
هو قال:وعلاش!
راما:قتلك مانعرفش شن صار بيناتهم بالزبط لكن شكله ع خاطر ماما قالت.ان عمي عبد الفتاح واخد مراة تانيه ع مرته..
هو قال..
/وباهي شن فيها!؟
راما:شن فيها! قصدك كان بوي ياخد ع امي عادي عندك!؟
هو قال..
/عادي مافيها شي الراجل ياخد اربعه مش وحده بس
راما قعدت تشوفله بصدمه..
وهو قال بلامبالاة..
/خليني منهم وخشي ديريلي حاجه ناكلها..
راما:ماتعشيتش في العرس!
هو قال..
/من امتى ناكل حاجه مش عارف من دايرها! هي بري ديريلي ماناكل مادرهليش كبدي..
قلبت عيونها بإزدراء وومشت وهي تقول بقرف وبصوت غير مسموع..
/مافيش دراه كبد غيرك وانت عايش..
ومشت بطريقها للكوجينه...
🍃🍃🍃🍃🍃
"غدوة نبيك تمشي معاي"
نسرين وهي تسمح في دولاب الكوجينه..
/إن شاء الله ان شاء الله.
"تمام ماتبي شي"
نسرين؛سلامتك وخيي..
"عمر عندك ولا؟"
نسرين؛ايه..
"تمام تصبحي ع خير"
هي قالت..
/قدامك كل خير...
سكرت بعد ماسكر خوها وحطت التليفون في جيب سروال بيجامتها..
شطبت الكوجينه ومشت طلعت للمربوعه..
شافت عمر لقاته راقد بالنوم..مروح تاعب من الرحله وماصدق حط راسه ع المخده..
طفت عليه الضي..ومشت لدار نومها...
🍃خشت شافت ولدها في سريره لقاته قاعد راقد..
قعمزت ع سريرها مقابلاته وطلعت تليفونها وفتحت النت..
وخشت ع ماسنجر راجلها بش تكلمه..
لقاته باعتلها رساله ومسكر..
(غدوة بإذن الله مروح)
ارتسمت ع وجهها ابتسامة فرح..
وقعدت تكتب في رد بعدين بعتتاته..
(احلى خبر..
توصل بالسلامه يارب غير قولي ع الوقت)
وقامت عيونها في يحيى وقالت بضحكة فرح..
/عمو ربيع غدوة مروح يويو...
ضحكت بعدين تنهدت من قلبها بحب وهي تفكر فيه..
فجأه..سمعت صوت نغمة رساله..
بلهفه شافت تليفونها ع بالها رد منه هو..
لكن كانت رساله من ولدها محمد..
(امي فايقه؟)
كتبت وبعتت طول..
(ايه فايقه حبيبي في حاجه)
(لامافي شي نبي نهدرز معاك)
(هدرز حبيبي)
(امي نبي نروح معاش متحمل العيشه هني)
قعدت تقرا في الرساله وتعاود وهي حاسه بضيق شديد..
(امي)
(خيرك معاش رديتي؟)
بدت تكتب وهي تقول..
(بوك مايخليكش)
(لالا قتله نبي نروح قالي دير اللي يعجبك)
(كيف دير اللي يعجبك بيخليك تروح بروحك!؟)
(قالي نبعتلك مع واحد نعرفه)
(كيف هكي!!)
(ماتبنيش نروح!)
قعدت تقرا وتعاود وعيونها يدمعوا..
(باهي خلاص معاش نبي نروح لكن ماتبكيش عليا بعدين)
قلبها انقبض وقعدت تكتب وتبعتله..
(كيف! شن بدير يانهارك الاسود!)
(محمد..امي)
واتصلت بيه فيديو وهي ترجف من الخوف والاتصال فصل لأنه سكر النت..
وقعدت نسرين ع نار ليلة كامله مارقدتهاش لعند ماآذان الفجر..
بعد ماتم الآذان..سمعت رنة تليفون خوها عمر..
بعدين سمعاته يتكلم...شويه وسكت صوته..
تنهدت ورجعت تخمم في ولدها..
لعند ماسمعت عمر ينادي فيها..
فزعها وهو ينادي وكأنه في حاجه صارت..
ناضت طول وطلعتله تجري..
وصلت فيه وقالت بخوف..
/نعم!
عمر بخوف..
/تو كلمني خالك قالي دنيا بتجيب! كيف بتجيب وهي قاعده في السابع..!
نسرين بقلق:شكلها ولادة مبكره..برالها بسرعه..
عمر:تعالي معاي!.
نسرين:وولدي عند مني نخليه في هالوقت!..
عمر:تو نرفعه لأمي غير بسرعه وتي روحك بالله عليك..
نسرين بقلق:باهي باهي خل نوتيله شنطة قبل..
ومشت تجري للدار..
وهو اللي كان في حالة قلق بالغ قعد واقف وهو محتار ومش عارف شن بيدير...
🍃وبعد عشرة دقايق..
طلع بولد اخته حطه عند امه اللي خلاها في حالة قلق حتى هي...
ومشي طول بنسرين للعيادة اللي قاعده فيها دنيا..
🍃🍃🍃🍃🍃
فهالوقت..
كانت طوبى مع جنتها اللي كانت في حضنها تهدرز عليها وتلعب فيها...
طوبى:نجيلي هالعوينات ياربي..غير امتى تبدي تشوفي ماما وتعرفي شكلها زي ماعارفه صوتها..يانجيلي هالشديقات الكلبوزات ياربي..
وتجيها فردوس بعد ماكانت في الحمام ..
وهي مبتسمه قالت..
/قاعده نايضه!؟
طوبى:اهو توا غمضت عيونها...
جتها وقالت:هاتي نحطها في سريرها..
مدتهالها وهي تلحق فيها بعيونها المتيمات بيها..
حطتها فردوس في سريرها بعدين استعدت للصلاة وبدت تصلي..
قعدت طوبى تتفرج عليها وهي حاسه بشعور شوق من نوع تاني..
شوق لأكثر حاجه تريح فيها فحياتها وتخليها قريبه من اقرب حد لقلبها..اللي ديما يطمن فيها ويهون عليها ويعطي فيها القوة..
رفعت عيونها فوق..بعدين غمضهم وبدت تهمس بذكره وهي تقول..
"سبحان الله وبحمده"...
🍃🍃🍃🍃🍃
وصلوا الزوز للممر اللي فيه اهل دنيا..
لقوهم في حالة قلق وانتظار..
عمر جي لمرت خاله وقال..
/شن صار فيها!؟
مرت خاله وهي تبكي..
/مش عارفه من لما دخلوها معاش رينا حد..
نسرين؛باهي هي شن صارلها شن اللي خلاها بتجيب قبل موعدها بشهرين!
:والله يابنتي ماكان فيها حاجه اللي جاها جاها فجأة..
عمر:اني نتواصل مع الدكتورة متاعها ماقالتش ان عندها شي تعاني منه..
:واني هدا اللي مخوفني!..
ع جية الدكتوره اللي كان بادي ع وجهها ملامح الأسف..
ام دنيا لما شافتها جايه قالت بلهفة خوف..
/اهي الدكتورة..
قدمولها وهما خايفين..
وعمر قال:شن صار!
الدكتورة:متأكده ياحاجه ان ماصارلها شي قبل تجيبوها هني!
:ماصارلها شي بكل هي جتني لداري تعيط وتتوجع وماكان فيها شي..
عمر بخوف:شن في يادكتورة!
الدكتورة؛هي كانت حامل بولد زي ماتعرف ووضعها كان طبيعي لكن للأسف توا بعد مادرنا العمليه بش نطلعوا العيل لقينا الحبل السري ملفوف ع رقبته..
امها خبطت بيدها ع صدرها وهي مصدومه..
ونسرين ضمت ايديها لبعض وهي موجوعه وبدت تبكي..
اما عمر ماكانش مستوعب اللي سمعه من الدكتوره..
كل اللي سمعه شي في داخله قاعد يتكسر..
الدكتورة بأسف..
/واضح انها متحركه غلط او صار معاها شي ماتصيرش حاجه زي هادي بدون سبب..
امها وهي تبكي..
/باهي وبنتي شن حالها توا..
الدكتورة:حالها باهي مافيش عليها خوف..
عمر بلع ريقه وقال..
/نبي نشوفه..
نسرين بوجع..
/مش لازم..
عمر ودموعه في عيونه:كيف مش لازم!ولدي هدا حتى كان ميت نبي نشوفه هكي ولاهكي بنشوفه..
الدكتورة؛صح..تعال معاي..
نسرين خافت ع خوها من وقع اللي بيشوفه ع قلبه قالتله..
/ماشيه معاك..
مشت الدكتورة وهو وراها وهي لحقتهم..
وخلت مرت خالها في حالة يرثى لها..
🍃ومافي حال اسوأ من حال عمر..
لما شاف ولده وهو شبه مكتمل الخلقه ميت قدامه..
مشهد قطعه تقطيع..خلاه يحس بشعور ماحسش ولاحيحس بأبشبع منه في حياته..
اما نسرين اللي كانت تشوفله وهي تبكي بحرقه جي بين عيونها يوم لايمكن تنساه..
جريمه سكتت عنها..مش بس سكتت عنها مسحت اثرها وحاولت درقها..
منظر اميمه وهي مرميه ع الارض وتنزف تشوف فيه زي ماتشوف في هالجنين الميت..
ونفس اللي كان خاطر ع اخته خطر عليه..
وحالة اميمه واللي صار جي بين عيونه...
بصوت مخنوق قال لأخته..
/تاني واحد نخسره..
نسرين تسمعله وهي تبكي..
ماقدرش يتمالك نفسه وقعد يبكي بعبرته..
واخته ضماته وقعدت تمسح ع ظهره وهي تقول..
/قول اللهم اجرني في مصيبتي واخلفني خيرا منها..
ماقدرش يقول الدعاء من حالة الحزن والقنوط اللي كان فيها وقتها..كان حاس روحه قاعد يتعاقب وفي نظره اللي يتعاقب مايستحقش الرحمه...
🍃🍃🍃🍃🍃
"خلاص يام سادك بكي"
مغليه ببكي:كبدي طابت من اللي صاير في خوتك يا خديجه علاش هكي نصيبهم علاش هكي يصير فيهم..!
خديجه بضيق..
/قضاء وقدر يام والحمد لله ع كل حال..
مغليه بألم؛ااه ياربي..الحمد لله ع كل حال..الحمد لله..ورجعت تبكي بالعبره..
وخديجه تشوفلها بضيق ووجع ع حالها..
🍃🍃🍃🍃
وبعيد عن الحزن والوجع..
للعروسه اللي عايشه فرحتها اللي كانت لحظات تحسها حلم مش حقيقه..
عواطف عاشت شعور العروس بكل معنى الكلمه..
خشت لشقه مفرشه احلى فرش وسط اجواء رومانسيه حلوة..
سمعت احلى كلام من راجلها..حست وكأنها خاشه جنه..
🍃اكثر حاجه كانت تبي تعيشها عواطف بعد الزواج..
جو يوم الصباحيه..
ناضت وهي في قمة السعاده والحيويه..
تزينت ولبست احلى ماعندها ومشت وتت فطور ملوكي ..
وهي تجهز فيه خش عليها راجلها.
:ياصباح العسل والفل والياسمين ع احلى عروسه..
ضحكت وقالت..
/صباح الخيرات..
هو قعد يمرر في نظره ع السفره وقال..
/الله يبارك الله يبارك..
هي قالت؛قعمز افطر..
هوقال:شويه ياقلبي ونجيك..ومشي للدار..
وهي تنهدت بسعاده بعدين قعمزت وقعدت تراجي فيه وعيونها ع الفطور اللي كانت فرحانه بيه..
ويجيها وفي يده علبة مجوهرات صغيره..
حطها قدامها وقال..
/مش من قيمتك..
خدتها وهي فرحانه وفتحتها لقت خاتم ذهب ضحكت بفرح وقالت..
/يهبل..ذوقك حلو ع الاخر..
ابتسم وقال:اكيد مادام خديتك..
ومشي قعمز وقال..
/وياما حتشوفي القدام..
هي قالت بإبتسامه..
/ربي يحفظك ليا ومايحرمني منك..
هو رد بإبتسامه..
/ولامنك ياقلبي...
🍃🍃🍃🍃🍃
"نفسيته مدمرة ع الآخر"
المهدي وهو يسوق..
/ربي يصبره..
قعدت نسرين ساكته وسرحت بتفكيرها ودموعها مابطلوش نزول..
والمهدي اللي كانت تبان ملامح وجهه عاديه..
كان مستغرب في نفسه كيف مش متأثر باللي صار مع خوه..
وعلاش الاستغراب يالمهدي!
عشت ماخلاك تتعود ع ألم الفقد وتتكيف معاه معاش تتأثر بيه هلبه ولابحالة اي حد يعيشه قريب منك او بعيد..
🍃وبعد ماقطع مسافه لابأس بيها..
وصل للمصحه..
ونزلوا هو واخته وخشولها متوجهين للقسم اللي قاعده فيه طوبى..
مازالت في المصحه ساعة الخروج مازال ماجتش..
بس كانت مجهزة نفسها للخروج وتستنى امتى تطلع ببنتها..
ووين خشت عليهم نسرين حست بقلبها قريب بغمة حطت ع صدرها....
نسرين بآبتسامه؛صباح الخير كيف حالكم..
فردوس وطوبى قعدوا يشوفولها بإمتعاض بدون مايردوا..
هي مشت طول لسرير جنة وقعدت تشوفلها بضحكه وهي تقول..
/شن حالها حبيبة عمتها..
لمست خدها بأطراف اصابعها وقالت..
/نجيها ياربي..سجلها المهدي عن الجالي..شبحتلها وقالت..زي ماتعرفي قاعد مسافر..
طوبى قاعده ملتزمه الصمت وماتبيش تشوف لنسرين..
وفردوس تشوف لنسرين لنفس نظرة الامتعاض..
تنهدت نسرين وقالت..
/المهدي برا يبي يشوفها..
قامت طوبى عيونها فيها..
نسرين:تطلع معانا فردوس بش تطمني..
فردوس قعدت تشوف لطوبى وتراجي في ردها زي ماتراجي فيه نسرين...
🌿🌿🌿🌿🌿
طلعوا فردوس ونسرين وفي حضنها جنة..
المهدي اللي كان واقف بعيد عن الحجره سمع نسرين ناداته..
التفت شافها..بعدين مشالها طول..
وصل فيهم وقال..
/السلام عليكم..
ردت عليه فردوس بصوت منخفض..
نسرين بآبتسامه:وهادي اللا جنة..
بدت ع وجهها ملامح الابتسامه وهو يشوفلها وقال..
/الله يبارك..
نسرين؛خودها..
فردوس قعدت تشوفلهم بريبه..
هو قال:هاتي..
ومدتها نسرين وهي تسمي بالله...
وتلقاها منها المهدي واستقرت في حضنه..
حضن عمها الكبير..اول راجل يحتويها في الدنيا ويعطيها من حنه وعطفه..
المهدي وهو ضامها لقلبه وعيونه تتأمل فيها حسها وكأنه بنته مش بنت خوه وهالشعور سيطر عليه فهاللحظه بطريقه استغربلها هلبه..
🍃وأمها واقفه حدا باب الحجرة من داخل وهي في حالة قلق وخوف مبالغ فيهم..
ماتحملتش بنتها تبعد عن نظرها لدقايق فوق طاقة تحملها هالشي..
طلعت برا..
وقعدت تمشي بشي من الصعوبه وهي تشوف فيهم..
تشوف في المهدي حاضن جنة خوف رهيب سيطر عليها وخلاها تنادي..
/فردوس..
التفتت فردوس وهما وجهوا نظرهم ليها معاها...
شافت فردوس الخوف واضح ع اختها..
شبحتلهم وقالت:خلاص ساد هكي..
نسرين شافت لفردوس بضيق..
والمهدي اللي قاعد يشوف لطوبى بأسف غير نظره لأختها وقال..
/خوديها..
تنهدت نسرين بضيق وخدت منه جنه اللي قعدوا عيونه معاها لين عطتها نسرين لخالتها..
خدتها فردوس ولفت ومشت بيها لأختها اللي كانت تراجي في بنتها بلهفة خوف...
نسرين بألم:شي يحرق القلب حال عمر بكري حيعيش الجالي أحرف منه..
المهدي:جابه لروحه..
نسرين هزت راسها موافقه لكلام خوها بصمت..
وقعدوا الزوز يشوفوا لطوبى كيف مشت اختها للحجره وخشولها...
غير المهدي عيونه لأخته وقال..
/هيا خل نلحق ع الجنازة..
هزت نسرين راسها وهي تمسح في دموعها بظهر يدها ومشت مع خوها..
🍃وفي الحجره..
طوبى وهي مقعمزة ع السرير وبنتها في حضنها قالت لأختها..
/ماقال شي؟
فردوس:لا ماقال شي..لكن خزي عليه جاي يصفق بإيديه..
طوبى ودموعها في عيونها:مانبي منهم شي غير يخلهوهالي بس..
فردوس؛مايقدر حد ياخدها منك معاش تخافي..
ويرن تليفون فردوس..
مشت خداته من ع الكامدينو..شافت المتصل قالت..
/جدي..شكلهم جو..
طوبى:وينهم لتوا ماحد جاب ورقة الخروج..
فردوس وهي تشوف للساعة في تليفونها..
/خل نمشي نشوفهم..
ومشت طلعت من حداها..
طوبى بعد ماطلعت اختها رجعت تتأمل في بنتها بحب وخوف في نفس الوقت..
قربتها وقعدت تشم في ريحتها..بعدتها شويه وهي تشوفلها قالت..
/محلا ريحتك ياقلبي مسك..ربي مايحرمني منك ياروحي..
🍃ولحظات وخشت فردوس مع الدكتوره اللي كانت عندها ورقة الخروج..
بعد ماسملت ع طوبى وسألت ع حالتها هي وبنتها قالت..
/طبعا التحاليل بينت ان في ارتفاع بسيط للبكتيريا في البول وهي اللي مسببتلك الوجع اللي تحسي بيه..كملي ع الدوا وع النصايح متاعي طوبى انتي توا مراة مرضعه لازم تهتمي بصحتك اكثر من قبل ..
هزت طوبى راسها بإيجاب وقالت..
/إن شاء الله..
الدكتوره:هو كل شي بمشيئة الله لكن انتي لازم تكوني حريصه ع روحك لازم تشدي صحتك وتتقوي تربيه الصغار تبي جهد وقوة ياطوبى..
فردوس وهي تشوف لأختها بإبتسامه؛حني معاها دكتورة..
ابتسمت طوبى بإمتنان وهي تشوف لأختها..
والدكتورة قالت..
/ربي يديمكم لبعض وان شاء الله تفرحي بجنة وتشوفيها احسن الناس..
طوبى بإبتسامه؛بارك الله فيك دكتورة...
🍃🍃🍃
ويطلعوا من المصحه وسيارة عبد الرؤوف كانت تستنى فيهم...
☘في السيارة..
عبد الرؤوف:آنساتك جنه..
ضحكت طوبى وقالت..
/الله يأنسك..
هو بإبتسامه قال..
/ربي يباركلك فيها..
طوبى:آمين..ويباركلك في ولادك..
عبد الرؤوف:آمين..
علي:حالها باهي وامورها كلها كويسه؟
طوبى:إيه الحمد لله..
علي:الحمد لله الحمد لله..
عبد الرؤوف:بنروح بيكم طول لحوشي..
فردوس:ايه قالتلنا غرفه..
عبد الرؤوف هز راسه وهو ساكت...
🍃وشويه انشغلوا علي مع عبدالرؤوف وفردوس بالهدرزة..
وقعدت طوبى ملتزمه الصمت وعقلها في عالم تاني..
عالم جنة اللي قاعده مش مصدقه انها شافتها..
شعور الامومه عندها زاد اضاعف..قوي اكثر واكثر..
وتعلقها بجنة مع كل نظرة ليها يزيد..
🍃وفي مكان تاني..
كان عمر يودع في ولده اللي جي ع الدنيا وماخداش فيها نفس واحد..
الألم اللي حس بيه وهو يدفن فيه كان يقطع في قلبه تقطيع..يحرق في روحه اللي تتمناها تطلع ويرتاح من هالعذاب..
حواليه خوته وبوه اللي كانوا يحاولوا يساندوه ويخففوا عنه..
بس في الجهة المقابله خاله وولاد خاله اللي ماكانش باين عليهم الحزن..وكأنهم ماصدقوا ينقطع الرابط الوحيد بينهم وبينه..
ومافكروش انه اللي صار حيكون اثره أكثر قوة ع بنتهم اللي حتعيش بيه عمرها كله..
🍃🍃🍃🍃🍃
"يابنات يابنات يابنات اللي مخلفش بنات ماشبعش من الحنيه ولاذاقشي الحلويات"
فايزة بضحكه:ايه والله محروم اللي ماعنداش بنات..
شافولها بناتها بحب وهما يضحكوا..
غرفه وهي شاده جنة في حضنها:ربي مايحرمني ويرزقني بوحيده حتى اني..
مطيره:ترا هاتيها هاتي..
مدتها غرفه لمطيره بحذر..
وطوبى تشوفلهم بصمت وهي مبتسمه..
مطيره خدتها وبدت تغني..
/نجي البنيات..البنيات الحلوات..
الحلوات القمرات..جنينه وجنينات.. بتجيك شقيره راهو..
طوبى:زعمه!؟
مطيره:فكرتني بخواتك هكي كانوا..
طوبى:ان شاء الله تطلع زي خالاتها..
فايزه قربتلها وحطتلها بياض وهي تقول..
/الله يبارك عليها..
مطيره:كلك بياض..
طوبى؛والله مالازم يافايزة ساد ماجبتي قبل..
فايزة:مش خسارة في هالعسل..ربي يفرحك بيها..
طوبى بإبتسامه:آمين..
آلاء:نبي ناخدلها صور بيبو..
طوبى:ماتنزلي شي ع الفيس..
الاء:لالا مش منزله بس بنوريها للبنات في القروب من كثر ماحكيت عليها تشوقوا يشوفوها..
طوبى تنهدت وقالت؛باهي..
وناضت آلاء ومشت تاخد لجنة صور لعند مافاقت وبدت تبكي..
وعطوها لأمها..هني الآء صورت مقطع فيديو بدون مايركزوا عليها وقفاته لما ولت جنة في حضن امها..
بعدين ولت قعمزت وبعتت المقطع مع الصور لخالها..
شويه وجي اتصال لمطيره..وكان من سالمين..
بعد ماهدرزت عليها شويه عطت لطوبى تكلمها..
طوبى:خالتي سالمين..
"طوبى بنيتي مبروك ماجاك"
طوبى بإبتسامه:الله يبارك فيك خالتي..
"شن حالك وحالها حبيبتي"
طوبى: في احسن حال والحمد لله ..
"الحمد لله الحمد لله..بنقولك راني قاعده عند وعدي بكرا ان شاء الله نكونوا عندكم"
طوبى بإبتسامه فرح..
/مرحبتين بيكم خالتي
"رحب بيك حبيبتي"
🍃ونهت طوبى معاها المكالمه وهي فرحانه حست وكأنه امها بتجيها..
بس بعد هالفرحه..لما اختلت بنفسها في دار المعيشه بش يخلوها ترتاح مع بنتها..
خطروا عليها الغايبين اللي خلوا فراغ كبير..
للحظه تخيلتهم معاها..تخيلت جنة في احضانهم وهما يلاعبوا فيها ويقروا عليها..
بكت بألم وهي تشوف في طيف بوها وكأنه حقيقه قدام عيونها وهو حاضن جنة ويضحكلها ضحكته الحلوة ويغنيلها..
وبنبرة الم مخنوقه قالت..
/ااه يابابا ااه..موعر فراقك لتوا مش مصدقاته يابابا..سامحني ياربي..اغفرلي..مش بيدي مش قادره نتخطا ولانصدق...الصبر من عندك يارب..
حطت يدها ع صدرها وغمضت عيونها وهي تحاول تهدي روحها لعند ماوقفت بكي وقالت..
/الله يرحمه ويغفرله..
بعدين غيرت نظرها لبنتها اللي لما جو عيونها عليها غزت ملامح وجهها الحزينه ابتسامة حب...
وتقعد جنة بلسم جروح امها من لما كانت ساكنه فيها لعند ماولت جنبها...
🍃🍃🍃🍃🍃
في هالوقت..
كانت اميمه مداومه في المستشفى العام..
مقعمزة في حجرة الاطباء وقدامها ملف مريضه لكنها كانت منشغله بتليفونها وهي دور ع حاجه حلوة للمواليد ناويه تهديها لجنة.
ويخش عليها وسام اللي ماصدق شافها بروحها..
قعمز قريب عليها وقال..
/اليوم متعب هلبه..
اميمه:ربي يعاونك..
وسام:اجمعين..بس جديات نهنيك مايبانش عليك التعب مهما خدمتي..
اميمه:لانتعب هلبه..
ابتسم وقال:قاعده لتوا تجري ورا التزكيه..
نزلت تليفونها وشافتله وهي تقول..
/لافكرة امتحان الزماله لغيتها من بالي حاليا..
هو قال:دكتور خالد السبب..
اميمه:لامالاش علاقه اني غيرت الخطه متاعي بس..
قاللها؛اكيد فكرتي في السفر صح؟
اميمه:لا..
وسام؛مالا شني؟
اميمه؛مش ملزومة نقولك..
ضحك وقال..
/مش قصدي نقصقص لكن هكي عندي فضول نعرف طموحك لوين واصل..
تنهدت اميمه ونزلت نظرها لملف المريضه..
وهو محاصرها بنظراته الخبيثه..
ع خشة امل ومعاها ممرضه..
وين شافت نظرات وسام ليها حمقت..
الممرضه؛دكتور يبوك في الحجره 10..
ناض وقال:باهي..التفت لأميمه وهو مبتسم قال..
/نكملوا هدرزتنا وقت تاني..
ومشي طلع مع الممرضه..
وقعدت أمل تشوفلها وهي لاهيه بالملف وماردتش عليه حتى بنظرة عين..
وجعتها نفسها..تحبه من طرف واحد وع قد مادارت بش تلفت انتباهه عبث هو ديما كان يتجاهل فيها..وتوا تشوف في العكس صاير مع أميمه...
نار الغيره كلت قلبها ماكله وطلعتها عن طورها وخلتها تقول لأميمه بتهكم..
/محيرة انتي تصدقي!
قامت عيونها وقعدت تشوفلها..
:اللي يشوفك يقول ملايكه نازله من السمي لكن بعد يعرفك يلقاك وحده مش هوينه..
اميمه:الكلام هدا ليا اني!
؛مافي حد غيرنا هني..
اميمه رفعت حواجبها تعجبا بصمت..
وهي قالت..
/صحة ليك تعرفي من أين تؤكل الكتف ومزبطه امورك مرة مع الدكتور قصي ومرة الدكتور خالد ولما تكسدي تشدي وسام..
اميمه قاطعتها بحده وهي تقول...
/كلمة زياده.تشوفي مني شي عمرك ماشفتيه..
امل:وتهددي فوقها!!
اميمه خدت نفس وقالت..
/افتحي ودانك واسمعيني كويس..وسام هدا لويقعد اخر راجل فالدنيا مانفكرش فيه لأنه مايناسبنيش ولابأي شكل وحتى انتي هلبه فيه راهو مايستاهلش الوقت اللي ضيعي فيه وانتي تفكري في واحد زيه...
ضحكت تهكما وهي تخفي في ربكتها وقالت..
/شن تقولي انتي راك شحطتي بخيالك هلبه..!
سكرت الملف وناضت بيه وهي تقول..
/باهي زي ماتبي وبالنسبه لباقي القطاف اللي قلتيه مايستاهلش مني الرد غير بشي واحد لو سمعتك قلتيه مرة تانيه نخليك تندمي صدقيني وردي بالك تهزي ع كلامي..
ومشت طلعت وخلتها وهي تبع فيها بنظرات الضيق والكره اللي كانوا معبيات عيونها...
🍃🍃🍃🍃🍃🍃
وطلعوا غرفه وعبد الرؤوف بمهاب وأواب ومعاهم نبيله للمصحه اللي بيديرولهم فيها عملية الختان"الطهار"
وخلوا باقي العيله في الحوش يعولوا ع عزومة هالمناسبه..
☘☘☘
طول الطريق وغرفه في حالة توتر وقلق ع ولادها..
عبد الرؤوف:اقعدي في السيارة تو نزلوهم اني ونبيله..
غرفه:لالا نبي ننزل مع صغاري..
عبد الرؤوف:مالا اسكتي ماتوترنيش معاك..
غرفه:وواك منك زايد الهم ع الهم ساير شويه ياهمي..
نبيله :مش وقت نقاركم توا..
غرفه:قوليله هو خوك هدا لايعرف يساير ولايطيب خاطر..
عبد الرؤوف:من امتى نعرف اني كان نعرف ماخديتكش..
نبيله فنصت فيه وهي تشوفله من المرايه..
وهو طنشها..
اما غرفه اللي كانت ع اعصابها ماتحملتش مزحه هالمرة دمعوا عيونها وقالت..
/بارك الله فيك..
نبيله:حيي عليك روفي تبكي! ماتعرفيش بصارته الباردة !
عبد الرؤوف:من قالك نبصر!
نبيله بتفنيصة عيون:رؤوف!!
شد ضحكته وهو يسوق وماباش يرد..
وغرفه تبكي بصمت وتمسح في دموعها..
حركت نبيله راسها يمين ويسار بعدم رضا ع خوها..
بعدين غيرت نظرها لصغاره اللي كانوا راقدين جنبها..
وبعد مرور بضع دقايق قضوها في الطريق بصمت وصلوا للمصحه ونزلوا الثلاته مع الصغار وخشولها...
🍃🍃🍃🍃🍃
وفي مكان تاني..
حوش الصيد..
اللي كانت فيه نجمه مقعمزه مع ولدها اشرف ويحكوا في موضوع كان حديث الساعه في العيله..
نجمه:ماشاء الله عليكم طلعتوا فالحين في الدس سنين وانتم داسين عليا..
اشرف:تعرفي لو قعد الموضوع عند التريس ممكن لليوم ماعرفتيش مجرد ماطلع للنساوين مافاتش اسبوعين وطلع..
نجمه:توا هدا موضوعنا!
اشرف تنهد وقال؛وباهي يام وهاك عرفتي شن بديري بتقوليله يطلقها بعد مادار منها صغار!
نجمه:لامانقولاش طلقها لكن لانبيها ولانعترف بيها كنتي بكل..
اشرف:وصغارها اللي هما احفادك؟
نجمه بضيق:الله غالب ماعندي ماندير مالهمش ذنب اصلا بش نحاسبهم عليه..
اشرف:راهو حتى المراة كويسه ولو اني عندي عليها تحفظات لكن كويسه ومحترمه..
نجمه:مش لينا يااشرف وماتجيش في ظفر سميره اللي تقصه وتلوحه..
اشرف؛لكن قاعده خير من طيرة الشر بنت شنيبه..
نجمه بإنزعاج:هادي بالذات مصيبه جبتها بإيديها وحطتيها ع راسي..
اشرف؛تعرفي يام لولا انها مراة راني وريتها حجمها لكن من توا نقولك يام بعد نتزوج ان شاء الله توصل فيها والله مانعرف راجل ولامراة..
نجمه:راك بتكرهني فيها من توا..
اشرف:ايااه عاد يام فكينا تربحي..
ضحكت غصب عنها وهي تقول..
/ان شاء الله تجينا خير من نساوين خوتك كلهم وتجي فالحة وقد روحها ماتقعدش تدلع عليا ..
اشرف مسح ع لحيته وقال..
/لا من هالناحية تريحي قد روحها..
رفعت نجمه حاجبها اليسار وقالت..
/ان شاء الله ياسيدي..
شبح لأمه بطرف عينه وهو شاد ضحكته.
وهي تبادل فيه بنظرة متهكمه مع رفعة الحاجب..
🍃🍃🍃🍃🍃
"الدوة طالعه منك انتي ياابتسام ماتقعديش تلفي ودوري"
ابتسام بضيق..
/والله مابقصدي ماكنتش نعرف ان تقرب لخديجه بكل..
عبد الفتاح بحده..
/وعلاش كذبتي لما سألتك قبل!
سكتت وهي مضايقه ع الآخر..
مسح عبد الفتاح ع وجهه بعدين تنهد بضيق..
شافلها وقال..
/خلاص اللي صار صار توا..بنخلي الموضوع يهدا وبعدين بنرفعك لحوش العيله..
ابتسام بتوتر:ماتقبلنيش امك ياعبد الفتاح..
هو قال:نمشولها مرة واتنين وتلاته لين تقبلك تعرفي مكانة امي عندي ياابتسام مانتحملش زعلها بكل..
هزت راسها بالموافقه وهي مضايقه ومتوتره ع الآخر وقالت..
/عارفه..حاضر اللي تبيه نديره ع خاطرك نتحمل كل شي..
🍃🍃🍃🍃🍃
مقعمز في مكتبه..
وفي يده تليفونه..كان يتفرج منه ع مقطع الفيديو اللي بعتتاته بنت اخته..
كان متأثر بيه هلبه..
متاثر بيه لدرجه هو مااستوعبهاش واستغربها هلبه..
هو من الناس اللي ماتحبش الاطفال ..
ولاكان في يوم يتمنى يكون اب..
يشوف في الابوه هم كبير ومسؤولية مكروهه...
بس فيديو جنة بالذات لما كانت في حضن امه..اثر فيه لدرجة خلت عيونه يدمعوا..
ولما حس ان دموعه حيخونوه..سكر الفيديو وتأفف بضيق بعدين قال..
/علاش تبعتلي فيهم!..
جي بيمسحهم لكن ماقدرش حط التليفون ع الطاوله قدامه بقوة..
وعيونه عليه وهو مضايق ومعصب..
غمضهم..وخدي نفس عميق وزفر..بعدين مسح وجهه..وبسرعه خدي التليفون مرة تانيه وحط ع سجل المكالمات..وحط ع رقم صابرين واتصل بيها...
وهي ماخلتاش يراجي طول فتحت الخط وردت..
"أيوه"
هو قال:وتي روحك بنتغدوا برا اليوم..
"تمام"
مختار:تو نبعتلك رضا يجيبك للمكتب وتي روحك بسرعه مايحبش يستنى..وسكر عليها..بعدين اتصل برضا..
"نعم"
مختار:برا جيب صابرين..
"حاضر"
سكر عليه..وحط التليفون ع الطاوله..
والتفت للاب توب متاعه فتحه وقعد يشغل في نفسه بيه لين تجيه صابرين...
🍃🍃🍃🍃🍃
ويطلعوا عبد الرؤوف وعيلته من المصحه..
وغرفه تسكت في صغارها اللي كان واحد فيهم عندها والتاني عند نبيله..
بعد ماوصلوا للسيارة وركبوها..
غرفه بشفقه؛ياروحي ع وليداتي قطع قلبي وهما يعيطوا..
عبد الرؤوف:ترا فكيني من الاوفر متاعك ربيهم رجاله من توا عوديهم يتحملوا كل شي..
غرفه:تسمعي في خوك شن يقول!
نبيله بضحكه:فوتيه..
عبد الرؤوف:لاشن فوتيه هادي..كان تعودت ديرلهم هكي تربيهم ع الدلع ويطلعوا مرخيين ويتعسلوا زي الشكالات اللي كثروا توا...
غرفه:بعيد السو عليهم..
عبد الرؤوف:اعرفي كيف تربيهم من توا من وهما هكي..تعودي تتحملي انتي بش هما بعدين يتحملوا ويشدوا رواحهم..
سكتت غرفه وماعلقتش بس كانت موافقاته في كلامه.
اما نبيله قالت..
/ان شاء الله تشوفهم زيك رجالة متسميين يخشوا ع الموت ومايهابوش..
ابتسم وقال..
/خير مني نبيهم خير مني يانبيله..
غيرت غرفه نظرها ليه وهي تشوفله بإبتسامه اعجاب..
وهو كان لاهي بالطريق بس ع وجهه ابتسامه خفيفه مع عقدة حواجب..
🍃🍃🍃🍃
وفي حوشهم..
كان المحجوب موجود غادي..
قعمز هدرز ع فردوس شويه..بعدين خش معاها ع طوبى في الدار اللي قاعده فيها..
المحجوب بإبتسامه..
/الحمد لله ع سلامة...مبارك عليك جنة..
هي بإبتسامه فيها مسحة خجل..
/الله يبارك فيك خالي..
قدم لجنة وشافها لقاها راقده قال..
/الله يبارك الله يبارك..
طلع من جيب سرواله علبة مجوهرات صغيره وحطها في جنبها وهو يقول..
/من حملة كتاب الله ان شاء الله..
طوبى:ان شاء الله..علاش مكلف ع روحك..
المحجوب:اسكتي احسنلك..
ضحكوا فردوس وطوبى..
بعدين قالت طوبى..
/تسلم يارب ربي يطول في عمرك..
المحجوب:سلمك بنتي..
طوبى:خالي شن صار مع عبد الرؤوف؟
بدت ع وجه فردوس ملامح الجديه وهي تراجي في اجابته..
تنهد وقعمز قريب ع جنة وقال..
/طلع كلام يوسف مزبوط دفع مستحقات ستة شهور القدام..
بدت ع وجه طوبى ملامح الضيق..
فردوس:بيني وبينكم اني فرحانه اللي دار هكي ع الاقل تكمل علاجها برا خير ماتروح هني..
طوبى:اني لو نعرف فلوسه حلال نفرح زيك يافردوس..
فردوس:مادخلناش منين جو فلوسه حني في الاخير ماطلبناش منه يعالجها هو تصرف بروحه..
سكتت طوبى وهي مضايقه كان خاطرها تقتنع بكلام فردوس بش ترتاح...
المحجوب:خلاص توا صار اللي صار..كل اللي نبوه من ربي ان يدير معجزة ويخليها تفيق ونرتاحوا كلنا..
الزوز من قلوبهم دعوا..
/يارب..
ويسمعوا صوت بوابة الحوش انفتحت..
فردوس ببهجه:روحوا..
ابتسمت طوبى..
مشت فردوس طلعت من حداهم وهما معاها بعيونهم بعدين التفت المحجوب لطوبى وقال..
/ماشفتي منهم حد؟
طوبى تنهدت وقالت..
/نسرين جت امس واليوم قبل لنطلع ومعاها المهدي قالتلي هو اللي سجل جنة عن خوه..
هز راسه بصمت بعدين قال..
/قبل لنجي تلاقيت اني والتارقي كيف واصل للشارع وقالي جاي من جنازة ولد عمر..
طوبى بصدمه:ولد عمر!
المحجوب:قال جاه وليد ميت..
طوبى بأسف وشفقه..
/لاحول ولاقوة إلا بالله..ياروحي ع دنيا مسكينه..
المحجوب هز راسه وهو يشوف لجنة بعدين شاف لطوبى وقال..
/كان الله في عونها..
ع خشة نبيله وهي تحول في وشاحها وتقول..
/جيت!
شبحلها بإبتسامه وقال..
/جيت..
طوبى:وينهم..
نبيله بضحكه:ناقر ونقير يبسولي ريقي معاهم..
ضحكوا..
نبيله:طول الطريق عراكات..
ع خشة غرفه ومعاها فردوس وفي ايديهم التوأم..
المحجوب بإبتسامه..
/اهم جو...
غرفه بإبتسامه:خالي شن حالك..
ناض وهو يقول:الحمد لله..جيبوهم جيبوا..
قربوهم للمحجوب اللي قعد يلاعب فيهم ويبرك عليهم..
بعدين حطلهم اللي فيه النصيب..
وغرفه تعاتب وهو يهزب وهما يضحكوا..
وطوبى تتأمل في هالاجواء الحلوة وهي مبتسمه بحب بس كانت في القلب غصة حزن وخوف مايبوش يفارقوها..
🍃🍃🍃🍃🍃
طلعت من باب العمارة الدخلاني ومشت للسياره..
لقاته مقعمز جنبها وهو يشرب في مكياطه ولاهي بالتليفون..
جت بتفتح الباب وهي تقول..
/هيا..
ماباش ينفتح الباب ولاهو رد عليها..
رفعت حاجبها وهي تشوفله..بعدين قالتله..
/هييه انت ماتسمعش!
غير عيونه ليها وقال ببرود..
/نعم..
صابرين:قتلك هيا..
هو قال:معليشي اركبي السيارة وراجيني نكمل المكياطه بعدين نطلعوا..
صابرين بعدم استيعاب للي قاله ردت..
/نعم!
هو قال..
/شكلك انتي اللي ماتسمعيش!
استفزها وخلاها تعصب وتقول..
/اسمع مادرهليش كبدي ونوض تحرك افتحلي السياره واطلع بيا طول لمكتب الاستاذ..
هو حط طاسة المكياطه وناض بكل هدوء..
فتح السياره..بعدين مشي فتحلها الباب السحاب..
ركبت بغرور...
وهو بعد ماركبت قاللها..
/نكمل المكياطه ونطلع بيك..
وسكر الباب..بعدين سكر السيارة كلها..
ومشي ولى قعمز في مكانه..
وخلاها في حالة صدمه..
بعدين بغضب قالت..
/شن الوقاحه هادي من يحساب روحه هدا!..
وطلعت تليفونها من الشنطه واتصلت بمختار..
بعد مارد عليها شكتله تصرفات رضا بس رد فعله صدمها اكثر من تصرف رضا..
"خليتيه يستنى ولا؟"
صابرين:وكان خليته يستنى هو مالاش علاقه خدمته يرفع ويجيب وبس..
"علاش مخدمه عندك اني!"
سكتت معاش عرفت ترد..
"صابرين رضا عندي وضعه خاص ردي بالك تغلطي فيه ولاتقللي احترامه وتوا راجيه يكمل المكياطه متاعه بعدين يجيبك"
وسكر عليها..
نزلت التليفون وهي في قمة الغضب ورداته للشنطه بعصبيه وربعت ايديها وقعدت تراجي وهي تغلي من الغضب..
ورضا بعد ماخلاها تستنى اكثر ماأستناها وطاب خاطره..
مشي ركب السيارة وقال..
/اسف عطلت عليك..
شافتله من المرايه بحده وهي رافعه حاجبها...
وهو ولا شافلها ولااهتم لردها عليه..كل اللي داره انه شغل السيارة وتحرك طول...
🍃🍃🍃🍃🍃
في الوقت اللي درس فيه عمر سيارته في بركيدجو المستشفى...
وقعد في سيارته وهو متردد ينزل ولايولي من وين ماجي..
وبعد وقت طال في التفكير..
قرر ينزل..وين جي بيفتح السياره..
شافها من المرايه الجانبيه..ماشيه لسيارته..
قعد يتبع فيها بنظره وقلبه موجوع ودمعته ع حافة عيونه..
تراجع عن قراره ..من الخوف..والاحراج..والاحساس بالندم والذنب..
وهي ركبت سيارتها وتحركت بيها وفاتت من ورا سيارته وهو مازال معاها بعيونه المليانات ندم وحزن..
بعدين شغل سيارته ومشي طلع من المستشفى..
وفي عيون كانت تراقب فيه بنظرات كلها حقد...
#جنة_قلبي
#طوبى
....يتبع....
