#طوبى "جنة طوبى"
#جمان_فريد
#الجزء_113"الحجر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
قال ابن القيم رحمه الله..
"اذا انكشف الغطاء للناس يوم القيامة عن ثواب أعمالهم لم يروا عملا أفضل ثوابا من الذكر فيتحسر عند ذلك أقوام فيقولون ما كان شيء أيسر علينا من الذكر.."
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃و لكن العاطفة الإنسانية غلبتني , لقد صدق الشاعر هايني حين قال أن هذه العاطفة الإنسانية تحشر أنفها في كل شيء ..
دوستويفسكي 🍃 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
"المراة خوها مرض وماعنداش من يعانيه مشت قعدت معاه وين المشكله"
الجالي تعجبا..
/مختار ماعنداش من يعانيه!؟
المهدي:ايه ماعنداش من يعانيه زوجته حامل خطر عليها تقعد معاه..
الجالي بألم..
/ومش خطر ع طوبى!؟
ضيق المهدي عيونه وقال..
/انت شن مشكلتك بالزبط!؟ بنتك قاعده في امان وقدام عيونا مافيش عليها خوف..
الجالي:وشن ماتبنيش نخاف ع امها!؟ مهما كان طوبى تقعد ام بنتي وعادي جدا نخاف عليها..
هز المهدي راسه وهو يشوفله بنظرات شك وقال..
/ايه عادي..ع العموم ماتخافش عليها تعرف تتصرف وان شاء الله مايجيها شي..
غير الجالي نظره عن المهدي بغضب بعدين لف ومشي بإتجاه شقته..
حرك المهدي راسه يمين ويسار بعدم رضا..وحتى هو مشي بإتجاه الدروج وركب لشقته...
🍃🍃🍃🍃
خش لشقته وهو في قمة الغضب والقلق..
مشي للكوجينه..
خشلها وفتح الثلاجه طلع منها المهدئات حطهم في جيب سرواله وبسرعه طلع من الكوجينه ومنها من الشقه كلها..
🍃ونجاة في دار النوم واقفه ع الزيانه تشوف للمراية بنظرات بارده ومخيفه وهي رافعه شعرها وتلف فيه...
🍃🍃🍃🍃🍃
"والله ماكان لازم هالتعب جيت بنقعد ساعه ونروح"
الاقجم:غير مد يدك ياراجل وسمي بالله اهو ع قولة المصريه عشان يبقى بينا عيش وملح..
ابتسم عبد القيوم ومد يده وهو يقول..
/كان هكي باهي..
سمى بالله وبدي ياكل..بنة الماكله متاعها حفظها وبدي يميز فيها..
قعد ياكل بصمت وهو مبتسم والاقجم حداه يخش في موضوع ويطلع من موضوع ويحكي عن كل شي وهو يسمع بإستمتاع ومرة مرة يشارك..
🌼وطوبى داخل مختليه بنفسها في الدار اللي دارها مختار لجنه..
قدامها مصحف الحفظ الميسر ومذكرة تكتب فيها الآيات...
وصلت في آية"وقضى ربك ألا تعبد إلا إياه وبالوالدين إحسانا"...
وقفت عندها..تأملت فيها وكأنها أول مرة تقراها..
وهي تتأمل في كلماتها ومعانيها عقلها رفعها للمريض القابع في حجرة العزل..
جت بين عيونها مشاهد..وتردد لمسامعها كلام...
لبوها وجدها وسدرة...
كلهم كانوا يقولوا ان مختار مغضوب عليه..
وان بوها قبل ليموت حرم عليه يحضر جنازته او يوقف ع قبره..
قبل كانت تشوف انه يستحق هدا كله..
بس توا نظرتها تغيرت وحست بخوف عليه..الخوف من العقوبه دنيا وآخرة...
حطت القلم..ومسحت بإيديها ع وجهها وهي تقول..
/استغفر الله العظيم..
نزلت ايديها وحطتهم ع رجليها..تسائلت بضيق..
/خيرك ياطوبى!؟ معقوله لهالدرجة واجعك!؟ تفكري شن دار تفكري..هدا قهرك في عمرك..بسببه هو كنتي حتموتي انتي وبنتك..هو اللي ذل بوك وخلاه يموت بقهرته وبسببه امك ماتت..هو اللي خرب حياة غرفه...وبسببه قعدت سنين حياة سدرة واقفه...
《"كان جاكم خبر موتي حتحزنوا عليا هكي!؟"》..
طاحوا دموعها بدون ماتحس..مسحتهم بقوة...
نزلت نظرها للمصحف..خدت نفس عميق وقالت..
/اعوذ بالله من الشيطان الرجيم..
ورفعت القلم وولت تكتب في الآيات وهي تحاول تبعده عن تفكيرها...
🍃🍃🍃🍃🍃
وتعدي ليله تانيه من ليالي رمضان سنة الوباء..
رمضان هديكا السنه فقد رونق لياليه وايامه..وللأسف حتى احترامنا للحرمه متاعه ولى ينقص سنه ورا سنه...
🍃🍃
"تي كيف هكي كيف وين مشوا الفلوس!؟"
هدا محي الدين اللي كان يلم في حاجاته وحاجاته ولده من الشقه وين وصل في الخزنه متاعه وفتحها لقاها فاضيه تماما عقله طار من راسه..
الفلوس اللي كانوا في الخزنه كانوا دولارات وهما كل مايملك من مال حرفيا...
طلع يجري من الشقه ونزل للأمن متاع العمارة وطلب منهم يوروه تسجيلات الكاميرات..
********
خبط كفوفها ببعض وهو يقول بإنفعال..
/مافي شي مالقيت شي الكاميرات مش مصوره حد غريب خش للعمارة..
اشرف:مافيش كاميرات داخل..
محي الدين بنفاد صبر..
/مافيش ياأشرف مافيش...
واحد من خوته قال..
/انت قلت الشقه كانت عاديه مش ملخبطه والخزنه مش مقفوعه معناها اللي دارها يعرفك كويس ويعرف شن عندك ويعرف مكان الخزنه ورقمها السري..
محي الدين..
/مستحيل ياكريم..اني مانحكي لحد عن الحاجات هادي بكل..
خوه التاني..
/مرات حد متحطط عليك ويتابع فيك من فتره وراهو عادي يقدروا يعرفوا الرقم السري من غير ماحد يقوللهم عليه في جهاز يستعملوا فيه للحاجه هادي..
محي الدين بإنفعال..
/توا قولولي شن ندير..شن ندير.. خاش في مشروع حاط فيه نص ماعندي والباقي حولتهم دولارات ودسيتهم في الخزنه راحوا في ليله..ومازال عندي التزامات وديون كيف ندير توا كيف ندير!..
وخبط بقوة ايديه ع رجليه..
خوته بأصوات متقطعه..
"محي استهدي بالله..صل ع النبي"
اشرف:كلمت حد تعرفه بلغته باللي صار !؟بالك يساعدك ويلقى اللي دار هكي!
شاف لخوه وهو يفكر للحظات بعدين ناض ومشي طلع من حداهم وخلاهم ينادوا فيه بعدين طلعوا وراه..
وهو طول مشي لحوش الشخص اللي ماخطرش في باله غيره...
🍃🍃🍃🍃
"شن يبي منه زعمه!؟"
يزن بنرفزة..
/مصايبهم ماتمش هادم..
سدرة بقلق..
/باهي وينهم توا!؟
يزن:قال بيمشوا للمطحن..
تأففت سدرة بضيق واستغفرت..
يزن؛ولي ارقدي خالتي وماتخافيش عمي عمر معاه ..
مشت سدرة للدار وهي في قمة القلق..
ويزن مشي طلع من الشقه...
*******
المهدي:قتلي لما خشيت للشقه كان وضعها عادي..
محي الدين هز راسه وهو منفعل..
بدت ع وجه المهدي ملامح الاستياء والأسف..
رفع تليفونه ودار اتصال مع احد معارفه في الجهات الأمنيه وحكاله اللي صار بالتفصيل..
وعمر جنبه مايبيش يشوف في وجه محي الدين ومستحلي فيه اللي صارله...
كمل المهدي المكالمه وقال..
/خلاص الموضوع عندي يامحي بإذن الله نطيحوا في اللي دار هكي وفلوسك يولولك..
🍃ووقفة المهدي مع طليق اخته حتما مش حترضاها اخته وحتثير غضب باقي خوته..
الجالي وهو مبتسم بسخريه..
/جو البطولات اللي يدير فيه خوك هدا امتى يبطله مش عارف..
عمر:الراجل جاه وطلب يساعده مايقدرش يرده..
خديجه بعصبيه ونبرة ساخره..
/ماشاء الله عليكم خوتي ماشاء الله..الراجل اللي تحكي عنه ياعمر لز اختك وطلقها..
عمر؛كان انتي كارهتيه طاق اني كارهه 24طاق لكن يقعد بو صغارك ياخديجه..
خديجه بإزدراء:وبيه ليه وليهم..
الجالي؛الكلب هدا ماينفعش فيه الخير ناسي مواقفه المسخه اللي دارها معانا قبل..نسي هو شن كان قبل لياخد اختك امتى كان ٩راجل قبل لياخد خديجه!؟.
🍃نقاشهم هدا كان يدور بينهم وامهم حداهم تسمع فيه وملامح الغضب الباديه ع وجهها تبين انها مع الجالي وخديجة في رأيهم..
واصواتهم كانت واصله لسميرة ونسرين وهما متكيات في دار المعيشه..
نسرين بضيق:ربي يهديه المهدي ماله ومال محي الدين..
سميرة:ماتنسيش يانسرين الراجل يقعد جاركم..
نسرين؛جارنا هدا كان راعى حق الجيره راهو مادارش في اختي هكي..
سميرة؛يانسرين الحكايه قسمه ونصيب وفي النهايه طلقها بالحسنى وعطاها حقوقها كاملة
نسرين:اني مانبيش تصير مشاكل بين خوتي في بعضهم وحتى بوي كان عرف مش حيرضى..
"شن في خيركم"..
ناضت سميرة قعمزت وهي تقول..
/اهوا ناضلهم يستر الله وخلاص..
نسرين بخوف..
/حي كان علقوا بوي والمهدي مع بعض حي..
********
محمد شنيبه:وشن دار من غلط!؟ الراجل طلب منه يساعده تبوه يرده !؟
خديجه ودموعها في عيونها..
/عادي يابوي عندك يوقف مع الراجل اللي هان بنتك!
رد عليها بحده وهو يقول..
/اسكتي ياخديجه ماطلعنيش عن طوري اسكتي..
الجالي:اني مش عارف انت كيف وليت هكي! شن مايدير المهدي باهي وحاضر وعاجبك حتى كان غلط!..
عمر:جالي..
ابتسم بوه تهكما وقال..
/خليه يدوي خليه..خليه يطلع ماعنده بش حتى اني نطلع ماعندي ونخليه يتبكش مرة وحده..قبل لتقيم خوك المهدي وافعاله راجع روحك وشوف شن درت في حياتك..
ماقدرش الجالي يرد بأكثر من نظرة الغضب اللي شافها لبوه
وبعدين مشي..
محمد شنيبه وهو يشوف لخديجه بغضب..
/انتي..الراجل طلقك خلاص وكل حد مشي في حاله معاش ليك بيه دخل نهائي ديريه زيه زي غيره من الجيران..فاهمه!؟
هزت راسها اللي كانت منزلاته للأرض وهي تحاول تكبت غضبها..بعدين مشت لما سمعت بوها قال...
"خودي امك وارفعيها للدار"
وخدت امها ومشت بيها للدار والزوز كان دمهم يغلي من الغضب..
شاف محمد لعمر وقال..
/شن صار معاه بالزبط كيف انخنبوا فلوسه وامتى!؟
🍃🍃🍃🍃🍃
"اسمع مشي الموضوع بالتليفون مانعرفكش تمشي غادي وتختلط بأشكال والوان الله اعلم من وين جايين"
المهدي بملل..
/سدرة..
رفعت سبابتها لفمها وهي تقول..
/ولا كلمه خلاص..نزلت يدها وعيونها وهي تقول بعصبيه..انهي..
تنهد بعدين رمي نفسه ع الكنبه وغمض عيونه وهو يقول..
/فيقيني لما يذن الظهر..
سدرة حطت ايديها ع بعض وقالت..
/ماعندكش دار ترقد فيها!؟
عطاها بالظهر بدون مايرد عليها..
سدرة حركت راسها يمين ويسار ومشت للكوجينه...
🍃🍃🍃🍃🍃
وتفيق نجاه من النوم مرعوبه بعد ماسمعت صوت باب دار انفتح بقوة..
شافت الجالي يحط في تليفونه بغضب ع الزيانه وهو يقول..
/يعاير فيا..اخرتها يعايرني..خبط بإيديه الزوز ع الزيانه وقال بغضب..توا اني وليت الولد اللي ماينفعش والمهدي هو الباهي اللي كلمته تمشي علينا كلنا..
نجاة:شن صار!؟
التفت شافلها وقال بعصبيه..
/اللي صار واللي قاعد يصير شي مش قادر نقبله ولانتحمله..كلهم..كلهم يعاملوا فيا معاملة دونيه كلهم يحسسوا فيا بالنقص..اخرهم بوي اليوم عايرني..قالي قبل لتقيم المهدي شوف شن درت في حياتك..
نجاة:وشن الجديد بوك من يومه مفضل المهدي ع الكل والمهدي مسيطر ع كل شي واللي في راسه يديره والمراة اللي تاخده تنفش ريشها وتقول اني مرت المهدي..
عقد حواجبه وقال..
/ حتى سدرة قالتها!؟
نجاه:مش هي بس حتى الناس..ع العموم عادي في النهايه يقعد خوك الكبير..
قعد يشوفلها للحظات بنظرات كلها غضب ومشي طلع من الدار..
وهي بعد ماكانت معاه بعيونها ولت حطت راسها المخدة وعقلها يفكر...
🍃🍃🍃🍃🍃
"رد بالك ياعبدو تشيل الكمامه وامشي ع النصايح متاع الوقايه ياولدي الله يربحك"
عبد القيوم وهو يكلم في عمته هاتفيا قال بضحكه..
/حاضر والله حاضر وباهي واللي تبيه نديره..
"ايوه اسمع كلام عمتك ماتبي كان اللي فيها مصلحتك"
ابتسم وهز راسه بصمت..
"الو..معايا انت!؟"
عبد القيوم؛ايه معاك ماعندي وين نعدي..
"باهي قولي مازلت تسأل عن السوريين وتشوف في احوالهم"
عبد القيوم :اكيد..
"ايوه سلم ولدي العيد قريب وهذى اولهم عيد من غير باتهم وماعندهم حد"
عبد القيوم:لاتوا خلاص داروا نسيب مش مخليهم وهو واخته شبه يوميا عندهم..
"عارفه عارفه لكن هذى مايمنعش تسأل عليهم بين فترة والتانيه مرات يحتاجوك.."
عبد القيوم؛إن شاء الله إن شاء الله..ماتبيش تسأليني عن عيت الواعر!؟
"نعرف اخبارهم من صفيه..هي مانعطل عليك عدي شوف اشغالك ورد بالك من روحك..بالسلامه"
عبد القيوم بإبتسامه اسف..
/في امان الله..
نهي المكالمه وهو يشوف للتليفون بنظرات بضيق..
حطه ع المكتب واتكا بمرافقه ع الطاوله وسرح بتفكيره...
🍃🍃🍃🍃
"بالله ياميمو خلي عيونك عليه ولدي ونعرفه مهمل هلبه"
اميمه بضحكه..
/ماتوصيش حريص عمتي عيوني عليه ومرة مرة نديرله في طبه..
"ربي يحفظكم ويحميكم وان شاء الله نفرحوا بيكم قريب"
اميمه بإبتسامه:إن شاء الله..
"هي نخليك تشوفي شغلك في حفظ الله حبيبتي.."
اميمه:في امان الله عمتي سلمي ع بنات..
"يوصل سلام"
اميمه:سلام...
نهت اميمه المكالمه ورفعت كمامتها ومشت تكمل خدمتها...
🍃🍃🍃🍃
"محلاها خالتي سدره كيف تعامل في سدرة زي الكبار.."
فايزة وهي تخشي في الكوسا..
/زي ماكانت دير مع طوبى زمان..
تاله:سدرة فرحانه هلبه بحملها وقالت ياريت لو تقدر تاخدلها هديه..
فايزة بحسرة:فرقة الحال من وين بتاخدها والدنيا كلها مسكرة..
مروة وهي تلف في البراك"محشي ورق سلق"؛عيد العام هدا بيمشي في الكساد..
فايزة:ربي يفرج ونخلصوا من هالكابوس..
🍃وباء الكورونا كان اسوأ من الكابوس من جميع النواحي..
واقسى صورة من صور ازمة الكورونا علينا كمسلمين صورة الكعبه وهي خاليه من البشر..
ياكم دمعت عين وهي تشوف فهالمشهد المؤلم اللي كان اشبه بعلامات الساعه...
هالمشهد اللي تعب قلب الحاج علي وهو يشوف فيه يوميا..
🍃"أزمه وتمر ان شاء الله وترجع تزحم زي قبل واكثر"
علي بألم:تقول حلم يابنتي ياهاديه..حجيت مرتين ومشيت هلبه للعمرة..واني هني كل يوم لازم نتفرج عليها عمري ماتخيلت يجي يوم ونشوفها بهالمنظر..
بدت ع وجه اريج ملامح الحزن وهي تسمع في نبرة الألم طالعه من جدها مع كلامه..
هاديه بحزن:الله غالب ياعمي..
ع جية عبد المطلب من داره وهو يقول..
/بوي توا كلمني بشير معتوق قال بوه تعبان هلبه
علي بأسف:لاحول ولاقوة الا بالله..
هاديه:مني هدا!؟
عبد المطلب:واحد معروف في القبيله متاعنا صاحب الحاج..
علي بقلة حيلة..
/بنكلمهم فهالهاتف وخلاص الله غالب مانقدرش نمشيله..وكان قدر الله وصارتله حاجه حتى الجنازة مايقدروش يديروها..الله ياربي عليك وقت..الواحد يموت ومايمشى حد في جنازته..!
عبد المطلب:ربي يلطف بينا..
هاديه مسحت بيدها اعلى صدرها ومشت للكوجينه وهي تقول بضيق شديد..
/اللهم جيرنا..
🍃🍃🍃🍃🍃
وينتهي صيام يوم تاني بعد آذان المغرب..
وكالعاده صلى المهدي بعيلته جماعه..وبعد الصلاة خدي ولده الكبير محمد ع انفراد..
المهدي:تشوف في ولد عمتك خديجه!؟
محمد بضيق:لا ليا هلبه ماريتاش..
قعد المهدي يشوف لولده وهو يفكر..
محمد قاله:انت شاك في حاجه!؟
المهدي:زي شني!؟
محمد؛سؤالك عنك توا حسيته مش بلاش..
عقد المهدي حواجبه وقال..
/انت تعرف حاجه ومدرقها..
تنهد محمد بضيق وقال..
/ايه..سمعت من واحد يعرفه انه مصاحب جماعه ماينفعوش شافهم مرة وهما يدخنوا في حشيش..
بدت ع وجه المهدي ملامح قلق ممزوجه بالغضب وقال..
/دوره الولد هدا واسأله جماعته هادم نبي نعرف اسمائهم ووين يقعد معاهم..
هز محمد راسه وقال..
/حاضر..
المهدي:بعد الفطور ع طول كلمه..
🍃🍃
ومحمد محي الدين فهاليوم عاطي علم انه بيفطر في حوش واحد صاحبه،وبسبب المصيبه اللي نزلت ع راس بوه مافي حد استغرب لامبالاته باللي صار غير عمته عواطف..
🍃نجمه؛تي هو بوه وامه اطلقوا ماعدلش عليهم..
عواطف بقلق:مش عارفه يما لكن وضع الولد مش عاجبني وبديت نلاحظ فيه الايام الاخيرة مش طبيعي..
نجمه بخوف:كيف مش طبيعي!؟
عواطف؛ضاعف هلبه يام وتحسيه زي المريض..
نجمه بذعر:كان ماجاته الكورونا ومايبيش يقول..
عواطف بتفكير..
/زعمه !؟
نجمه بقلق:تو بيقولك كان عرفوا بيلوحوني في العزل ومعاش يدورني حد..
عواطف بخوف:مصيبه يام كان هكي..كان فيه كورونا معناها نشرها فينا!..
نجمه حطت يدها ع فمها وهي تقول بصدمه
/ياغبارتنا السودا..
🍃وناضت عواطف تغلي في الزعتر وتبخر فيه مع القسط الهندي...وعبت سطل مية سخونه صبت فيها ديتول ونشفت الحوش كله..
و استنشقوا هي وامها بخار الزعتر..بعدين دارت طاستين زعتر بالليم وشربوه...
🍃ومحمد المهدي كلم صاحبه وعرف منه انه شاف محمد هو والجماعه اللي قال عليهم جنب وحده من العمارات..
وبدون مايعطي علم لحد خدي سيارة بوه وطلع بيها متوجه للعمارة اللي قاله عنها صاحبه...
🍃🍃
وصل في الحي اللي فيه العمارة..
العمارة كانت في نفس منطقتهم لكن هادي المرة الاولى اللي يجيها فيها..
نزل من السيارة واتصل بصاحبه..
🍃"شفتهم من فوق السطوح بكري شويه كانوا ورا العمارة بالزبط..راجي شويه محمد نوض نشوف مرة تانيه"
قعد محمد واقف في مكانه يستنى بتوتر لعند ماكلمه صاحبه مرة تانيه لكن نبرة صوته هالمرة كلها ذعر..
"الحق يامحمد شكلهم يضاربوا"
محمد نزل التليفون وطلع يجري بإتجاه خلفية العمارة ..
وصل فيها وشافهم تلاته ولاد متلاقيين ع ولد عمته ويضربوا فيه..
لوح تليفونه وخش في العركه..حامى ع ولد عمته وبدي يضرب فيهم...
محمد وراه كان منهك..جرعة المخدر اللي خداها مع الضرب معاش خلوا عنده جهد..طاح مقعمز ع الارض وهو ياخد في انفاسه بصعوبه..
وولد خاله يضرب في الاولاد اللي ماقدروش عليه..
واحد فيهم برك عليه وقعد يضرب فيه بقبضة يده..
ورفاقه حواليه حالهم من حال محمد محي الدين...
"محمد"
سمعوا كلهم صوت صاحب محمد المهدي ينادي..
هني واحد من الولاد اللي ضربهم محمد طلع "كميه" من جيبه وجاه بيها..طعنه في ذراعه بقوة..
دفه الولد اللي كان بارك عليه وناض يجري ولحق صحابه اللي هربوا قبله..
ع جية صاحب محمد المهدي ومعاه شباب واحد فيهم كان ماسك سلاح "كلاشن"..
اللي عنده سلاح طلع يجري وراهم ومعاه واحد تاني..
وصاحب محمد جاه وهو يقول بذعر ..
/شن دارولك!؟
محمد وهو شاد ذراعه اللي تنزف ويتألم بقوة قال..
/خود..رقم عمي..عمر..وكلمه بسرعه..
طلع صاحبه تليفونه..
وواحد من الشباب جي لمحمد شد ذراعه وضغط بقوة ع مكان الجرح وهو يقوله..
/سامحني نبي نوقف النزيف شويه..
واحد تاني قال وهو يشوف لمحمد محي الدين..
/دايخ هدا راهو...
شافله محمد وهو يسمي في رقم عمه عمر لصاحبه..
:اسمع نرفعوهم وخلاص..
:هو هدا راجي نقرب السيارة...
ومشي يجري..
وصاحب محمد بعد ماخدي رقم عمر..اتصل بيه...
🍃🍃🍃🍃🍃
"قال الاعراض ابدت تخف واستجاب للعلاج"
طوبى:ماقالش كان عادي حد يخش يشوفه ولالا!؟
امينه؛الاقجم قال دخل شافه شويه ماكانش قادر يتكلم بس كان بيبصلوا بصات مرعبه..
ضحكت طوبى وقالت..
/يالطيف من هالراجل..
ضحكت امينه..
تنهدت طوبى وقالت..
/اكيد يوم عن يوم يزيد يتسحن..
امينه:مع الكورس العلاجي اللي ماشي عليه ان شاء الله يتحسن..مش حتكلمي بنتك النهارده..
طوبى بضحكه:توا توا بنكلمها..
ابتسمت امينه بحب..
طوبى قامت هاتفها وخشت ع الماسنجر وهي تقول..
/نخمم في فاتن زعمه في حوش بوها يهتموا بيها كويس!؟
امينه:ابوها بيموت فيها هو بنفسه حيهتم بيها..
ابتسمت طوبى وهي تشوف للشاشه..
ويبان وجه جنه الحلو وخدودها مغطيات نص الشاشه..
قالت بنبرة بهجة حلوة..
"مامتي"
طوبى بضحكه..
/عيوني جنوني..
اتكت امينه بمرفقها ع الكامدينو وحطت يدها تحت خدها وبدت تتأمل في طوبى وهي تتكلم وتسمع في كلام جنة الحلو...
🍃🍃🍃
وفي مصحة القدس..
خشوا الممرضين يجروا بمحمد محي الدين ع الباريلا لغرفه الطوارئ...
وعمر وراهم يساعد في محمد المهدي اللي قاعد متماسك..
جاته ممرضه خداته منه دخلاته لغرفة الطوارئ وهو قعد يستنى برا...
لحظات..
وجو اسامه واميمه ومعاهم احد الاطباء المتدربين..
عمر لما شافهم جمد من الصدمه..
الطبيب المتدرب اشر عليه وقال..
/هدا قريبهم..
وقفت اميمه في مكانها شافت لأسامه..
لقاته يشوف لعمر وهو يقول..
/تعالى خوي..
وخش اسامه طول للحجرة وعمر غصب عنه لحقه..
خدت اميمه نفس عميق وخشت وراهم..
🍃🍃🍃
اجروا الفحوصات اللازمه لمحمد محي الدين من تحاليل وصور...
وولد خاله محمد المهدي اللي اجهد نفسه بالمقاومه فقد الوعي..زادوه دم تعويض ع اللي فقده..وخيطوله جرحه ولحسن الحظ ماكانش عميق..
وهدا كله صار ومافي حد عنده علم لهالحظه غير عمر...
🍃🍃🍃🍃
جابوا لأسامه تحاليل محمد محي الدين وهو واقف في الممر اللي فيه حجرته..
ع جية اميمه..وقفت عليه وقالت..
/تحاليل محي الصيد!؟
اسامه وهو عاقد حواجبه نزل الكمامه وقال...
/ايه..رفع نظره لأميمه وقال..شوفي..مدلها اوراق تحاليله..
خدتهم وقعدت تشوف فيهم..
اسامه وهو يشوف لعيونها قال
/واضح ان عنده مشكله..
قامت عيونها فيه وقالت..
/انت شاك في شي!؟
اسامه:في علامات في وجهه خلتني نشك..فمه..عيونه..حتى لون لسانه..نبيهم ياخدوا عينه تانيه ويديروله تحليل مخدرات..
اميمه بضيق..
/لاحول ولاقوة الا بالله..
اسامه؛مانبيش نبلغ خاله بشي حاليا لين نتأكدوا..
اميمه:هو المفروض بوه يعرف شن صار لولده..
اسامه؛صح..تو نكلم خاله..
هزت اميمه راسها موافقة..
اسامه:كملتي دوامك خلاص!؟
اميمه:ايه..
اسامه:تمام راجي خمسة دقايق ونروح بيك..
اميمه؛تمام..
مشي اسامه وهي معاه بعيونها ونظراتها كلها ضيق..
🍃وصل اسامه في الممر الموجود فيه عمر..
وقف عليه وقاله..
/لازم تخبر والد محمد محي الدين بوضعه..
عمر بقلق:شن صايرله بالزبط يادكتور!؟
اسامه:زي ماقلنالك قبل مافيش جديد لكن بوه لازم يعرف ولازم يكون هني..
تنهد عمر وقال..
/تو نخبره..باهي حال محمد المهدي!؟
اسامه:زي ماقتلك بكري مافيش عليه خوف تو يزيدوا فيه دم وبإذن الله غدوة يكون حاله باهي..المهم محمد محي الدين لازم بوه يكون موجود هني بعد شويه..اني طالع من المصحه حاجه عشرة دقايق ومولي..
ومشي طول وخلا عمر في قمة القلق والخوف...
🍃🍃🍃🍃
"كلمت مؤيد قالي ماريتاش بكل اليوم وكلمته اكثر من مرة ماردش عليا"
المهدي بغضب مكتوم..
/اني قتله كلم الولد ماقتلاش امشيله وتصرف من راسك..
سدرة وهي تشوف للمهدي بقلق..
/يزن ماعندكش رقم الولد هدا اللي قال عليه بوك؟!
يزن بضيق وقلق..
/مانعرفاش من هو ..
خبط المهدي بيده تحفه موجود ع الانتريه اللي كان واقف جنبه طاحت انكسرت..
سدرة شدت ذراعه وقالت..
/مهدي صل ع النبي..
المهدي بغضب..
/غير يروح بس غير يروح..
ويجي اتصال لتليفون يزن كان من عمه عمر..
بوه وسدرة وجهوا انظارهم ليه بإنتباه..
هو لما شاف المتصل قال بخوف..
/عمي عمر..
فتح الخط ورد..
/ايوه عمي..
المهدي وسدرة ركزوا ع ملامح وجه يزن تبدلت من القلق للصدمه والخوف..
المهدي بخوف وعصبيه..
/شن في!؟..
يزن بصدمه..
/قال محمد في المصحه ضاربينه في ذراعه بكمية..
المهدي كاد عقله يطير من راسه بصوت عالي زي الرعد قال..
/وينه وين قاعد!؟..
وسدرة جنبه تشوفله بقلق وهي ترجف..
يزن بخوف:اهو معاك..
مدله التليفون جبده المهدي بقوة ومشي بإتجاه الباب..
/وينكم انتم وين!؟.
فتح باب الشقه وطلع وخلاه مفتوح..
مشت سدره تجري لدار النوم وهي تقول..
/استنى شويه يزن..
🍃خشت للدار..
خدت كمامتين وزوز عبوات كحول وطلعت بيهم تجري..
وصلت في يزن عطتهوله وقالت..
/رد بالك ع بوك..وطمنونا ع محمد.
خدي منها الحاجات وطلع يجري من الشقه..
هي لحقاته تدعي وتسكر في الباب..
/يارب لطفك يارب..
🍃هدا كله صار وسدرة الصغيره غارقه في النوم..
🍃🍃🍃🍃
ويوصل خبر لمحي الدين حتى هو نسي كل شي ومشي يجري للمصحه ومعاه خوته...
وخلوا النساوين في حال بكي ونواح..
وراما من فجعتها ع خوها اتصلت بأمها وخبرتها...
🍃وقلبت خديجه حوش بوها ع اللي فيه وهي تنوح وتندب ع ولدها..
"ارفعوني لولدي..ارفعوني"..
🍃سميرة بوجع وشفقه...
/ارفعوها ياحاج..
محمد شنيبه بنرفزة..
/تي وين تبيها تمشي ولدها في قسم الرجال!وحتى كان مشت ماعندها ماديرله..
"حي عليا ولدي شن دايرين فيه شن دايرين".
محمد شنيبه بضيق شديد..
/لا حول ولاقوة الا بالله...
🍃ومن مدخل الحوش ورا بابه المسكر..
للصاله اللي كانت فيها خديجه تنوح وتعيط وحداها امها تبكي ع حالها ونسرين اختها تحاول تهديها..
وبنات نسرين وجوري في حالة من الخوف..
ونجاه ضامه معاذ ولدها اللي كان مرعوب لحضنها وهي تتفرج ع حال خديجه..
بعيد عليهم شويه نضال واقف مع الجالي يقول..
/خلي عليك العياط ياخديجه وادعيله..
خديجه وهي تبكي بألم..
/شن داروله يانضال شن داروله ياوخيي قولي كان تعرف حاجه مادرقش عليا..
الجالي بضيق..
/شن بيدرق عليك ياخديجه اللي نعرفوه قلناه..
خديجه ببكي..
/لالا..راما قالت بوي وعمامي طلعوا مفجوعين يجروا اشبح شن داروله..
🍃وتنزل سدرة من الشقه تجري بعد ماسمعت اصوات العياط..وصلت في الباب وقعدت دق بقوة..
فتح محمد شنيبه الباب وهي تخش طول تقول بفجعه..
/على من تعيط هادي!؟
سميرة بألم..
/ولدها راقد في القدس ضاربينه طريحه..
خبط سدره بيدها ع خدها وقالت..
/حتى هو!؟
عقد محمد شنيبه حواجبه بتساؤل وقال..
/شن قصدك!؟
وسميرة تشوفلها بنظرات خوف..
نزلوا دموع سدرة بألم وهي تقول..
/محمد ولد المهدي ضاربينه بكميه..
جده بفجعه قال..
/شني!؟.
سميرة بصدمه..
/نهار اسود!!
🍃🍃🍃🍃🍃
"لالا..الفجي الفجي"
هادي صفيه تكلم في اميمه هاتفيا..
ع خشة غرفه عليها بسفرة شاهي ومعجنات..
حطتها قدامها وقعمزت تسمع فيها..
صفيه بأسف..
/والله الواحد ماعارف شن يقول..الله يجيرنا وخلاص..
بان ع وجه غرفه استغراب وهي تشوف لصفيه
صفيه:خلاص بنيتي بري تريحي..تصبحي ع خير..
نهت صفيه المكالمه وهي تقول..
/الفجي..
غرفه:شن في!؟
صفيه:اميمه قالت بكري جابوا ولد المهدي وولد خديجه للمصحه..قالت ولد المهدي ضاربيه بسلاح ابيض ع ذراعه وولد خديجه واكل طريحه باهيه..
غرفه بأسف..
/لاحول ولاقوة الا بالله..
صفيه بإستياء..
/وقالت شوره ولد خديجه مش مزبوط اشبح شن واخد..
غرفه:الله يحفظ صغارنا الولد هدا من قبل يقولوا اخلاقه ماتنفعش...
صفيه:ع اللي داراته فينا امه وجعني الحق.
غرفه تنهدت بضيق وقالت..
/ماوجعني كان ولد المهدي ياروحي اشبح شن صاير في سدرة توا زعمه نكلمها توا ولانخليها غدوة..
صفيه:كلميها كلميها وافهمي منها..
غرفه:تليفوني حداك خالتي..
شافت صفيه جنبها لقت تليفون غرفه رفعاته ومدتهولها
خداته غرفه وهي تقول..
/اشبح قاعده في شقتها ولانزلت لوطا..
صفيه صبت الشاهي وهي تقول..
/اشبح..
🍃واتصلت غرفه بسدره ماردتش عليها..عاودت عليها وكذلك لارد..
غرفه:شكلها لوطا وناسيه تليفونها ولا مش قادرة ترد..
صفيه:ان شاء الله خير..
غرفه:ان شاء الله..
صبت غرفه شاهي لروحها بعدين قالت..
/خالتي..
صفيه:نعم..
تنهدت وقالت..
/نبي نحكي معاك في موضوع عرس اميمه..
عقدت صفيه حواجبها وهي تشوفلها بإنتباه..
غرفه:مانبيهاش تأجل عرسها اكثر من هكي لو تقدر ديره بين الاعياد ديره..
ابتسمت صفيه وقالت..
/مع الكورونا مافيش عراس يابنتي..
غرفه:في ناس مازال يديروا في عراس في الحياش عادي..
صفيه:لا نبي بنتي تفرح مانبيش ندير عرسها في ظروف زي هادي وفي الحوش..
غرفه؛اني مانبيهاش تعطل ع خاطري بس..
صفيه بإبتسامه..
/ان شاء الله تفرج وتنزاح هالغمه ونديروا عرس قنين تحضريه..
غرفه بإبتسامه حزن..
/مش عارفه نحس فيها صعبه عليا خشة الافراح حتى بعد نرمي العده..
صفيه:الله يرحمه ويغفرله..يستاهل حداد عام لكن يابنتي الدين قالك حداد المراة ع راجلها اربعه شهور وعشرة ايام..ماتخليش روحك للحزن بنتي عندك صغار ماتخليهمش يشوفوك حازنه راهم يحسوا يابنتي..
هزت غرفه راسها بإيجاب وهي تمسح في دموعها..
صفيه؛اشربي الشاهي اشربي..خل نحطلك ع التمتليه متاع الوليد الاسمر رقدنا بكري وماتفرجناش عليها..
وخدت الريموت وبدت تقلب في القنوات..
وغرفه تشرب في الشاهي وتشوف للتلفزيون بإبتسامه..
🍃🍃🍃🍃
والتارقي يشرب في شاهيه الاخضر وهو يتابع في الاخبار..
قطع عليه انسجامه معاه صوت دق ع باب الشقه..
ناض وهو يقول..
/ان شاء الله خير!
طلع من الدار وتوجه لباب الشقه..وصل فيه وفتحه..
ربيع ؛السلام عليكم..
لاحظ التارقي في عيونه الضيق قاله..
/وعليكم السلام..
خش ربيع وعبد القيوم يقوله وهو يسكر في الباب..
/شن جو؟!
نزل ربيع الكمامه وقاله..
/زي الزفت..
عبد القيوم بقلق..
/ياساتر! ليش!؟
تنهد ربيع وقال..
/خش وتو نحكيلك..
🍃وخشوا الزوز للدار وقعمزوا وبدي ربيع يحكي عن اللي صار للتارقي..
عبد القيوم بصدمه..
/محمدالمهدي شن حاله توا!؟
ربيع:لا محمد المهدي وضعه ماعلشي خوف..وضع ولد عمته هو اللي يخوف..
عبد القيوم:ليش!؟
ربيع:شوف حسيتهم قدامي مايبوش يدووا لكن الدكتور لما خدي محي الدين بروحه وقعد يدوي معاه قريب ساعه فهمت ان في شي مش مزبوط..
عبد القيوم بضيق..
/لمح قدامي محمد قبل ان حال ولد عمته مش عاجبه..
تنهد ربيع وقال..
/يستر الله وخلاص..
عبد القيوم..
/لازم نكلم المهدي..
ربيع:اكيد لكن قبلها قولي شن اخبار صاحبك المتكورن..
عبد القيوم ابتسم بإمتعاض وقاله..
/بدا يتحسن..
ربيع بضحكه:توقعتها اللي زيه لاتقبلهم سمي ولا وطا..
عبد القيوم؛زيد قرم زيد بش هو ياخد حسناتك ويجنك سيئاته وحط ع كتافك..
ربيع فنص عيونه بصدمه وطاح ع وجهه..
عبد القيوم بفجعه..
/ربيع!..
قام راسه شويه وشافله بعين وحده وهو يقول..
/سيئات مختار هدوا حيلي..
خدي عبد القيوم طاسه ميه جنبه وبخه بيها وهو يضحك..
🍃🍃🍃🍃🍃
السيئات..
اعمالك السيئة ياخديجه اليوم ولت عليك..
وحتى محي الدين مش بريء..
الجزاء ديما يكون من جنس العمل والعقاب لازم يكون مؤلم بش يكون رادع..
وزي مايقولوا..اللي ديره في الرخيص تلقاه في الغالي وهادي هي قمة العدل..
🍃🍃🍃
وطالت هالليله ع عيلة شنيبه وعيلة الصيد وسادت عليهم اجواء الغم والحزن..
لكن في ناس حتى في عز المصيبه لازم تنفث ماعندها من سم..
☘في كوجينه حوش محمد شنيبه..
كانوا نسرين وسدرة ونجاة يجهزوا في السحور..
قلب سدرة واكله الخوف ع راجلها وولده..
ونسرين موجوعه ع حال اختها وخوها وصغارهم..
اما نجاة فكانت تقيم حفلة شماته داخلها في الجميع...
خشت فرح وهي تقول بحزن..
/واخيرا رقدت خالتي..
تنهدت نسرين بألم..
فرح بضيق:جيتنا كانت نحس ياريتنا ماجينا..
نسرين بإنزعاج:شن تقولي يافرح بس..
نجاه:كانك ع النحس حبيبتي من اول السنه وحني فيه..
سدرة قامت راسها وشافتلها بحدة من فوق لتحت..
ونسرين حست بغضب لكن كتماته وقالت لبنتها..
/بري قعمزي حدا حناك فرح..
فرح مررت نظرها عليهم بريبه وهي تقول..
/ ok..
ومشت طلعت من الكوجينه..
سدرة وهي تشوف لنجاة بحده قالت..
/ماشيه نشوف سدرة يانسرين..
ومشت طلعت حتى هي..
التفتت نسرين لنجاه وقالت..
/نجاه مش وقته جو اللي ديري فيه..
بإبتسامة استغراب قالت..
/جو شني!؟ مافهمتش..
نسرين:انتي فاهمه ع شن ندوي يانجاة تلقيح الدوة والحركات الناقصه هادي فوتيها..
تصنعت التعجب وهي تقول..
/اها قصدك فهمت ان الدوة عليها!؟ اني قلت من بداية السنه يعني من قبل ماتجي هي..
نسرين هزت راسها وهي تقول..
/كملي اللي فيدك كملي..
نجاة ببرود..
/حاضر..
والتفتت كملت شغلها وهي مبتسمه بمكر..
🍃🍃🍃🍃
وقعدت سدرة فوق حالها اللي هي فيه تحرق من الغضب مش قادرة تتجاهل اللي صار..
هي حاقده ع نجاة بشده وقلبها مليان منها وتبي تحصل فيها فرصه بش تاخد بثارها وثار طوبى منها
مش مستعده تتحمل منها اي غلط او تطاول..
لهذا اختارت ترد عليها بطريقه تانيه...
🍃🍃
بعد السحور مباشرة..
روحت نجاة للشقه وخلت الجالي يجيب معاذ ويلحقها..
وهو طالع لحقاته سدرة..
"جالي"
التفتلها طول..
سدرة:ارفع معاذ وتعالى نبيك في موضوع..
هو تلقائيا فكر ان الموضوع يخص طوبى قاللها..
/تمام..
ومشي بسرعه بإتجاه...
🍃خش ع نجاة دار النوم وحط معاذ ع السرير بسرعه وطلع..
لحقاته نجاة وهي تقول..
/قول لحمزة وجوري يركبوا..
لكن هو ماسمع شي طلع طول من الشقه..
رفعت حاجبها وهي تفكر للحظات..
ولت لدار النوم خدت وشاح حطاته ع كتافها ومشت بسرعه لباب الشقه...
🍃🍃
في هالوقت..
وصل الجالي في سدرة اللي كانت واقفه قريبه ع الطاوله وقاللها بشي من اللهفه..
/خير سدرة شن الموضوع اللي تبيني فيه؟
سدرة بجديه وحزم..
/شوف اني من لما وليت كنتكم واني نحاول ع قد مانقدر مانديرش مشاكل مع حد مخليه روحي في حالي وماعفست ع طرف حد ولانبي من يعفسلي ع طرف ولايفوت حتى من ركني..شد مرتك عليا يالجالي شدها وقوللها خليك في حالك وفهمها يعني لو كانت خايفاتك ترد اختي مثلا قوللها هادي من سابع المستحيلات مازال ترضى بحاجه زي بعد اللي راته ولاحني نرضولها..انت في حالك وهي في حالها والبنت بس بينكم..
الجالي وهو يسمع فيها بداية حديثها انتابه غضب شديد من نجاة لعند ماوصلت لنص حديثها تحول هالغضب مت نجاة وولى ع سدرة اللي قاعد تحطمله في أحلام اليقظه متاعه..
سدرة:ديرلها حد انت خير مانديره اني وماعلياش لوم بعدين..
ابتسم الجالي سخرية وقال..
/نجاة دايرة لروحها حدود وواقفه عندها وعمرها ماتخطتها..بعدين هي مالهاش ذنب في شي بش تحقدي عليها لهالدرجه..اني خديتها قبل لناخد اختك..وانجبرت نطلقها بسبب تهديدات اختك وبعد مااختك شوهت سمعتها خديتها مرة تانيه ولعند اليوم ماوصلت فيها بشي..
ضيق عيونه وقال..
/وع سيرة البنت اللي بينا اللي اختك سيبتها ومشت تقعد مع خوها اللي عنده وباء معدي عندك علم اني نقدر نستخدم الحركه هادي ضدها ونرفع قضية حضانه وناخدها منها..بالذات وانها مشت لرجليها للراجل اللي خلاها في يوم من الايام..ضحك ضحكة سخريه خفيفه وقال..ولا بلاش..ع العموم اني بنفوت الحركه هادي وبنمشيها لعيون بنتي وبس..ونجاة انتي خليها في حالها تخليك في حالك..تصبحي ع خير..
ومشي وخلا سدرة في حالة عدم استيعاب وخوف وهي تفكر في تلميحاته وقلبها يدق بسرعه من التوتر والقلق...
#الحجر
#طوبى
....يتبع...
