#طوبى "جنة طوبى"
#جمان_فريد
#الجزء_123"ياربيع أيامي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#ذكر_الله
«إن ذكر اللّه عز وجل يُذهب عن القلب مَخاوِفه كلّها، وله تاثير عجيب في حصول الأمن، فليس للخائف الذي قد اشتد خوفه أنفع من ذكر اللّه عز وجل، إذا بحسب ذكره يجد الأمن ويزول خوفه..
ابن القيم رحمه الله..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ومَن يُعطَ في الدنيا قرينًا كمثلها
فذلك في عيشِ الحياةِ رشيدُ!
جميل بثينة🍃
________________________________________
صباح يوم جديد..
اجوائه بارده..لكن الدفي غزاها باللمه المليانه حب ..
☘هذا كان الصبح في حوش محمد شنيبه..
ملتمين في دار المعيشه ع الفطور..
محمد شنيبه ونضال ونسرين وصغار طاهر ومغليه ع كرسيها وجنبها سميرة مقعمزه ع كرسي تفطر وتفطر فيها وكلهم كانوا مستمتعين بوجود القطعه من الجنه معاهم بهدرزتها وتصرفاتها اللذيذه..
🍃"ننوسه نبي زبدة وبربى"
قعدوا يضحكوا عليها هي مررت نظرها عليهم من الخجل عصبت غمضت عيونها بشده وقالت بصوت عالي..
"نبي زبدة وبربى"
قلدها نضال وهو مغمض عيونها زيها وقال..
/ديرولها زبده وبربى..
نسرين بضحكه:هي ياجنونتي تو نديرلك زبده وبربى..
فتحت عيونها وشافت لنسرين وهي تقول..
/هيا..
ضحكوا وجدها قال..
/الله يبارك الله يبارك..
وحناها مغليه تشوفلها بإبتسامه وعيونها مليانات دموع شويه غيرت نظرها لنضال لما سمعاته يقول..
/هي اني طالع ماتبوا شي؟
سميرة:سفيرة البكلاوة اللي قتلك عليها امس..
نضال:في بالي في بالي..
هي السلام عليكم..
ردوا عليه السلام ماعدا جنه اللي قالت وهي تأشر بيدها..
"باي ندوله"
التفت وهو يقوللها..
/باي ياقشطوطه..ومشي طلع...
غيرت سميرة نظرها عنه بعدين خدت ربع تفاحه عطاته لمغليه..
خداته وهي تشوفلها سميرة شافت نظرتها فهمتها وهزت راسها بإيجاب..
هي تنهدت وبدت تاكل في ربع التفاحه وعيونها ع جنة اللي كانت عندها اغلى احفادها لأنها بنت اغلى ولادها ع قلبها..
🍃🍃🍃
وولدها هدا في بلاد بعيده عايش بروحه في شقة مطلة ع البحر..
وفي الحقيقه ماكانش عايش بروحه..قاعد عايش مع معشوقته..مع روحها مع ذكرياتها مع اثارها الحلوة اللي تخلي فيه يتخيل فيها قاعده معاه..
هو توا واقف يدير في القهوة ع طريقتها هي..
بعد ماطابت صب لروحه فنجان وحطه في سفره ومشي لصونية كبيره معبيه فل خدي منها شويه ورجع للسفرة ونثرها عليها..
بعدين خداها ومشي لداره اللي كانت مطلة ع البحر..
الفيرندا متاعها كانت مفتوحه..
حط السفرة ع الطاوله ومشالها طول..طلع..خدي ابريق معبي ميه سقي بيه الورد المزين الشرفه..
بعد كمل وجه نظره للبحر وقعد يتمعن فيه وهو يتفكر في لون عيونها المحير وقلبه يتوجع كل مايتفكر كلام اخته عنها
استاقظ من سرحانه في البحر لما حس بشي يداعب في رجله نزل عيونه وشاف القطوسه اللي ليها فترة طويله عايشه معاه مونساته طبس عليها خداها وهو يقول..
/وين كنتي قلبت عليك الدنيا..
ومشي خش بيها داخل..
🍃العشق بروحه مرض عضال يابالك لوصاب نفس مريضة🍃
🍁وحتى لما يصيب نفس سويه وقلب نظيف وصافي يقعد مرض يمرض صاحبه بيه..يخليه مايتحملش يتنفس من غير معشوقه..
🌼"عباده..عباده..بودي"
كانت مقعمزه قدامه ع الكنبه ع اطراف اصابعها حاطه يدها ع خده وهي تمسح ع لحيته وتفيق فيه..
هو سمعها وحسها وشم ريحة عطرها فاق وقعد يفتح فعيونه شويه شويه بان عليه وجهها الجميل اللي ماشافش ولاحيشوف اجمل منه في حياته بالذات عيونها اللي ديما مغرقينه في بحرهم...
ضحك ضحكه خفيفه لما سمعها تقول..
/هيا بودي نوض يراجوا فينا ع الفطور..
هو بإيتسامه متعجبه وصوت ناعس قال..
/بودي!
وقفت ع حيلها وهي تقول بضحكه انزعاج..
/تي نوض ياهمي..
رفع حاجبه وقال..
/همي!! اني نتغزل فيك ونقولك في اشعار وانتي تقولي ياهمي!!!
قالتله:ولاتزعل في الجديد معاش تناديني كان يامصيبتي اصلا اني من لما عرفتني واني مصيبه نازله ع راسك..
قالت كلامها مازحه وهو رد عليها بنبرة حلوة..
/وهنا المصايب سماح هك ويذوبن!
ضحكت وقالت..
/عبادة خلاص نوض عيب عطلنا عليهم..
تنهد وناض قعمز وهو يقول..
/بندوش..
شافت ليده وقالت..
/نسيتها مرة تانيه!
قاللها:والله صعب قلبي مش متحمل روحي..
قالتله:اني اللي نعرفك حتى في عز الصقع دوش مرتين تلاته..
لفت ومشت وهي تقول..
/راجي شويه..
تبعها بعيونها المغرمات وهو يشوف فيها شن لابسه..
تنورة طويله لونها رمادي وعليها ماليه رقبتها طويله نازكه ولونها ابيض عليها طرف سماوي من غير اكمام وشعرها حتى اليوم مظفور "سبوله"
قعمزت مقابله الشنطه وطلعت منها زوز كياس نايلو ومشتله بيها وهي تقول..
/ان شاء الله ماتخشلهاش الميه..
وصلت فيه وخدت يده وبدت تلبس فيه الكياس وهو مابطلش تأمل فيها..
طوبى:حاول ماتخليش الميه تقربها..
وقفت ع حيلها وقالت..
/برا خش تو نطلعلك شن تلبس..
وقف حط يده ع راسها من الخلف وقرب منها وطبع قبله طويله ع جبينها وهي مبتسمه بحب وقلبها يدق بقوة..
تباعد عنها وقال..
/مانبيش دبش ثقيل..
ومشي بيطلع للحمام وهي معاه بعيونها لعند ماطلع وقالت بصوت مسموع ليها هي بس..
/غير اعبى..
🍁وطلعتله حوايج ومشتله بيهم للحمام مدتهوله خداهم ورجعت من جديد خشت للدار...
خدت هاتفها وقعمزت ع السرير..خشت ع الماسنجر ولقروبهم طول بعتت..
(صباح الخيرات)
ردت سدرة..
(صباح الوردات شن جو)
بعتتلها..
(مافيش احلى منه الحمد لله)
ردت عليها..
(دوم جوك حلو رتيلتي)
ضحكت طوبى بعدين كتبت وبعتت..
(يدوم هناك ياقلبي..شن جو رتيلتي اني)
بعتتلها..
(تهيج في حوش جدها )
ابتسمت وعيونها تعبوا دموع..
شويه بعتت غرفه..
(صباحو ياحناتي)
ردوا عليها .
(صباحو فل)
بعتت..
(اسمعي سدرة نبيك تجينا اليوم ضروري)
خافت طوبى وبعتت طول..
(ان شاء الله خير)
ردت اريج..
(تبيها ديرلها حل مع حسين)
ضحكت طوبى وسدرة بعتت..
(خيره هالنشفه شن دارلك تاني)
غرفه..
(معاش متحمله تصرفاته تصوري مشي لعدنان الاشتر في المعرض ودارله عركه وقاله ياتفض الشراكه برضاك يانخليك تفضها غصب عنك)
طوبى..
(غير راجي قصدك انتي عرفتي شن يبي عدنان)
غرفه..
(ايه جاني للكليه)
ضحكت طوبى وقالت..
(احكيلي احكي شن صار)
وحكتلها اللي صار بإختصار وطوبى تقرا وتضحك بعدين بعتت..
(مجنون بيك رسمي ياروفي)
بعتت غرفه..
(مانبي من ينجن بيا المهم سدرة هو بيجي اليوم تفاهمي معاه)
ردت سدرة..
(خالي امس كلمني وقال بيجي نكلموه ونديروا حل)
غرفه..
(تمام...جوك مليح بيبو)
ردت عليها..
(يهبل..هوا بنغازي يرد الروح)
🍁في هاللحظه خش عليها عبد القيوم شافتله لقاته شاد في يده مالية وماشي طول للشنطه.. بعتت للقروب بسرعه..
(سلام)
حطت الهاتف ع السرير وناضتله وهي تقول..
/شن دير!؟
قاللها:ثقيله واجد هذي ياقلبي..
مشتله وهي تقول..
/الجو مصقع عباده واني ملاحظاتك باديه عليك علامات البرده..
سكرت الشنطه وهي تقول..
/وانت مرضتك بمرضات..
وقف ع حيله وقال بإستسلام..
/خلاص نلبسوها وامرنا لله..
ولما جي بيلبسها حس بشي من الوجع بسبب جرح يده شافاته كيف توجع قالت..
/قعمز ع السرير قعمز تو نلبسهالك..
هو قال..
/ماعنديش أي مشكله..
مشي قعمز ع السرير ومدلها الماليه خدتها وهي تضحك بعدين بدت تلبس فيه..
لما نزلت الرقبه وبان وجهه عليها قالتله..
/بخ..
قعد يضحك وهي ضحكت معاه..
ولبساته بعدين مشت للزيانه خدت عطره وجاته بيه حطتله منه وهي تقول..
/نفكر في جية اهل عمي صابر..
قاللها:ناس طيبه كيفه وجوهم سمح..
قالتله؛بس حسيت علاقتهم بأمي كاريمان مش حلوة..
هوقال..
/سمعت دوة من هنا ومن هنا ياما صار زمان لما فتح مع هله موضوعها..
طوبى:علاش مايبوهاش..
عبد القيوم:مش منهم وهما ياخدوا من بعضهم بس..
حاولت طوبى تخفي الضيق اللي حست بإبتسامه هزت راسها بعدين حطت من عطره ع رسغي ايديها ومشت رداته مكانه حطاته وخدت المشط وجاته بيه وهي تغني..
/سألتك حبيبي لوين رايحين..
وبدت تمشطله في شعره وهي تغني وهو هايم فيها بعد كملت شافتله بعدين شدت خدوده وقالت..
/نجك ليا...
🌼🌼🌼🌼🌼
"حسيت جوها ولى سمح بزياده من لما جينا هنا"
سالمين بإبتسامه وعيونها فيهم لمعة الدمعة قالت..
/حتى انا حسيتها مطلوقه وعفويه واجد عمرها ماكانت هك..
عبد القيوم:تعرفي حالتها هذي خلتني متمني لو نكملوا عمرنا هنا..حاس الردة لطرابلس كيف الهم الثقيل ع قلبي..
سالمين بضيق..
/هلها وبنتها غادي مستحيل تفارقهم..
تنهد بضيق وقعد ساكت...
ع جيتها هي قالتلهم بنبرة باينه فيها الحيويه..
/هي تعالوا الفطور واتي..
شافولها بعدين ابتسموا بحب ومشولها...
🍁وع الفطور اللي مكانه مختلف المرة هادي في الصاله وفي جيهتين..جهة يفطروا فيها الرجالة وجهة النساوين
كانت الهدرزة شغاله بيهم وطوبى مستمتعه ومرتاحه ع الآخر..
☘"قولي ياطوبى بعد التخرج شن بديري"
شافت للصابر وجاوباته ع سؤاله وهي تقول..
/بنشد ادارة قسم الروضة والحضانه في مدرسة اختي وفي معهد عبد القيوم بنشد قسم تعليم الخط لأطفال من سن خمسه لتمانيه سنوات..
الصابر:حلو حلو..ابتسم وقال..اخترتي تخصص شبيه بيك ويناسبك..
ابتسمت ونزلت عيونها..
عبد القيوم وهو يشوفلها قال..
/تحق فيها طشة ومحنطشه تقول عليها هك راهو هذي مسكت ادارة مدرسة وادراة مطحن قهوة ومحل حلويات وخشت خشات قويه قدرت عليهن وغلبتهن مازلت ماتعرفها ولاتعرف اسلوبها اللاذع اللي ياما جلدتني بيه..
هو يحكي وهما يضحكوا وطوبى كانت مبتسمة بخجل شديد..
الصابر وهو مبتسم بمفاجأة..
/هذى كله وعمرها 23سنة بس!!؟
سالمين:ماشاء الله عليها فايته سنها من صغرها..
عبد القيوم وهو يشوفلها بإبتسامه حب قال..
/فارقه عن جيلها من يوم يومها..
هي قالت بإحراج شديد..
/باهي خلاص..
ضحكوا والصابر قال..
/لكن حكاية الاسلوب اللاذع هذي صعب نصدقها..
عبد القيوم:نا قتلك مازلت ماتعرفها السمحه هذي فيها صفات متناقضه الشي الوحيد الثابت فيها ان قلبها ديما لله..
رفعت عيونها وشافت لعبد القيوم وقلبها يدق بقوة اثرت فيها هلبه الجمله الاخيره اللي قالها زي مااثرت في كل اللي حواليها واكثرهم سالمين..
🍃🍃🍃🍃
"باي دوشة"
"باي يامارشميللو"
نزلت جنه من حجر عمتها نسرين ومشت تجري للصغار بش تلعب معاهم..
"سلمها ياربي عسل معسل"
شافت نسرين لشاشة هاتفها وقالت بإبتسامه..
/والله نراجي في جيتها لحوشنا بفارغ الصبر..
"كلمها بوها"
نسرين:ايه امس..
"نسرين بنسالك سؤال وجاوبيني عليه بصدق..حق هديكا طوبى تزوجت"
نسرين بضيق..
/شن تقولي انتي المراة مريضه..
"ماتحاوليش يانسرين المعلومه اللي وصلتني مؤكدة"
نسرين بنفس الضيق قالت..
/اني مانعرف شي ومانبيش نعرف المراة معاش تخصنا..
"ع قولتك همي كله بنتنا بس"
سكتت نسرين وهي مضايقة بينما اختها طلعت منها تنهيده قهرة وهي تقول..
"لما كنت في تركيا مشيت للجالي في الشقه اللي قاعد فيها وشفت شي قطعلي قلبي عليه مربي قطاطيس وزارع ورد وفي وسط داره معلق صورة لطوبى ع الحيط"
غمضت نسرين عيونها بشده وهي تتأفف بتذمر..
كملت خديجه تقول بنبرة باكيه..
"شيطانة الرجيم هديكا بعد اللي داراته فيه عاشت حياتها بطول والعرض ووصلت لمواصيل حتى في الحلم ماوصلتها وهاديكا طوبى تزوجت وعاشت حياتها وهو قاعد عايش ع ذكراها وموقف حياته عندها دمروه الزوز حسبي الله ونعم الوكيل فيهم"
فتحت نسرين عيونها نزلوا دموعها وهي تقول..
/مش هما اللي دمروه ياخديجه مش هما هو اللي دمر روحه بروحه في الاول لما خلط ع نجاه وبعدين لما طاوعكم وخلاكم تاخدوله طوبى..
"هو انتي ديما هكي لازم تجي مع الكل ضدنا"
نسرين بحسرة:ياريتني كنت هكي ياريت..
"غميتي قلبي بري عليا غادي"
وسكرت عليها..
ابتسمت نسرين بألم واسف بعدين ناضت ومشت طلعت من الدار...
🍃🍃🍃🍃🍃 فهالوقت كان نضال كيف طالع من مكتبه متوجه لقسم احد زملائه..
وهو ماشي وقف في مكانه لما شاف اريج واقفه ع زميله اللي حاط عينه عليها..بلع ريقه اللي استطعم فيه مرار بعدين نزل عيونه وتابع طريقه وفات من جنبهم وسمعها تقول..
"تو نفكر ونرد عليك"
الجمله هادي كانت وكأنها سكين خش قلبه وقتل ماقعد عنده من امل اتجاهها ماكملش طريقه لمكتب زميله لف ورجع لمكتبه خشله وخدي منه حاجاته وتوجه لخارج الكليه..
☘"باهي توا نخلوا موضوع الخدمه ع جهة ونجوا للموضوع الاساسي اللي نبيك ع خاطره..
اريج قعدت تشوفله بإستغراب..
هو ابتسم وقال..
/من غير مقدمات..اني نبي نكمل معاك نص ديني..
🍃والرد اللي جي للأستاذ من اريج كان معروف ع قد ماحاول معاها رفضها ليه كان قاطع وهو احترم الشي هذا وطلب منها تكمل معاه موضوع الشغل اللي كان ليه علاقه بالتدريس في مدرسة تقويه دايرتها امه وهي وعداته مرة تانيه انها تفكر..
🍃🍃🍃🍃
الساعة 12:30قبل الظهر..
روح نضال للحوش خشله وهو معصب ومش طايق نفسه فات من قدام الكوجينه بيركب الدروج ع طلعة سميرة اللي شافت حالته وهي مستغربه فيها..
☘فهالوقت..
في شقة المهدي..بعد مارقدت سدرة ولدها وحطاته في سريره مشت بأتجاه الروشن وقفت عليه ووجهت نظرها للحوش اللي كان حوش جدها وهي متألمه..
كانت تراجي كل يوم في اي شي يديره مختار للحوش بش ينفذ مخططاته واكثر ماكان مخوفها انه يهده ومعاش يخليله أثر..
🍃وفي بداية الشارع..
درس باص راما..نزلت منه وخشت للشارع وتخش بعدها سيارة محمدالمهدي بعد مامشي الباص..
هي حست بيها وسرعت مشيتها ومحمد ملاحظها..
زي مالاحظه خوه اللي خش للشارع حتى هو مروح من المدرسه مع ولد عمته نسرين..
يزن كان مستاء للغايه من وضع خوه ومتخوف من نهايته ومحمد حامد حتى هو ملاحظ كل شي لكن مفضل عدم التدخل..
ومن وراهم خشوا تاله وسدرة اللي السنه هادي اوللها سنه في المرحله الاعداديه ملامح النضج بدت تبان عليها ومش هكي بس البنت كانت فيها صفات مميزة حاده بعض الشي وشخصيتها قويه كانت تهدرز مع تاله وهما ماشيين لعند ماجت عينها ع خوها محمد وهو نازل من سيارته شاد شنطة اللاب توب وادواته الهندسيه شافاته وعيونه ع راما اللي فتحت باب حوش جدها وخشت..
تاففت بغضب..
تاله ركزت معاها وقالت..
/بدت تجيب فيه للطريق..
سدرة بغضب:والله ماهي صايرة واني نتنفس..سلام..ومشت طول بإتجاه حوشهم..
خشت ورا خوتها وولاد عمتها واللي سكر الباب يزن اللي لازم يطمن ع تاله وهي خاشه للحوش..
برغم احساسها بيه لكن قاعده متبعه معاه اسلوب التجاهل التام وهو عاجبه ع الآخر...
🍃🍃🍃🍃🍃
ماشيه بإتجاه الكوجينه وفي يدها مرضعة ولدها وين قربت توصل فيها وقفت لما سمعت جملة خلت قلبها ينغم اكثر ماهو مغموم..
🍃"اني مش مستوعب نقمته ع ماليه "
حطت امينه قدامه فنجان القهوة وقالت..
/مالكش دعوة ماتحشرش نفسك في اللي مالكش فيه..
الاقجم بضحكه صدمه..
/غير شن قلت بس قاعد نفضفض وخلاص..تنهد وقال..من قبل مانخدم معاه عارف عنه كل شي لكن ماتوقعتش الشي يوصل لماليه بالذات ابله سدرة والله ماهاينه عليا..
امينه بخوف وقلق..
/يابني افهمني انت راجل متجوز وعندك عيال ماضيعش نفسك وضيعهم..
هو ابتسم وقال..
/خلاص سكتت سكتت..ورفع الفنجان وبدي يشرب..
"امينه"
حطت امينه سبابتها ع فمها تبي الاقجم مايتكلمش نهائي..
وتخش عليهم فاتن وهي تقول..
/بالله عقميها وديري لعلاوي مرضعه..
جتها امينه وقالت..
/حاضر..خدت المرضعة ومشت وفاتن قبل لتطلع شافت للأقجم..جي بين عيونها رضا قلبها فوق خوفه انوجع غيرت نظرها لأمينه لقتها دير في اللي قالتلها عليه وع وجهها باديه ملامح الحزن..لفت ومشت طلعت من حداهم وهي رافعه معاها شكوك جديده قاعده تزيد يوم عن يوم هالشكوك اللي رجعت تنزرع داخلها بعدين اخر لقاء بين راجلها وخواته..
🍃🍃🍃🍃
ومن الغرب للشرق...
بعد الغدي خشت سالمين للدار رقدت فيها وهي تتفرج ع مسلسل هندي..وقعدوا طوبى وكاريمان يتعاونوا ع غسل الماعين وهما يتبادلوا في الاحاديث الحلوة اللطيفه..
بعد ماكملوا طلعوا مع بعض وكاريمان رفعت طوبى لدارها هي والصابر..
🌼"خشي بنتي خشي ماتحشميش'
خشت طوبى وهي محرجه بعض الشي..بس هالاحراج زال لما مررت نظرها ع الدار وهي تشوف في ديكورها ونظامها تبان كلايسكيه وفيها دفي عجيب وقتها كان خاطرها ترقد فيها..
"تعالي بحتي"
شافت لكاريمان لقتها واقفه ع الزيانه مطلعه صندوق خشبي طرازه قديم لكن مميز وحلو..
كان مفتوح وكاريمان مطلعه منه مشبك شعر لونه ذهبي طار عقل طوبى فيه مشتلها طول وهي تقول..
/يجنن!
كاريمان بإيتسامه..
/المساكه هذي ليها ذكري حلوة امك كانت فيها..
طوبى وهي متفاجئه..
/امي!؟
كاريمان:ايه..مرة لما جو لحوش سالمين زياره طلعنا مع بعضنا للسوق انا وسالمين ووردة ومعانا عزيزة تعرفيها عزيزة؟
طوبى:ايه سمعت عنها من خالتي سالمين قالت كانت تخدم عندهم..
كاريمان وهي مبتسمه بحزن..
/الله يرحمها..المهم شرينا من هذي اربعه لكل وحده فينا..
طوبى وهي تفكر قالت بضحكه دهشه..
/ايه ايه شفت عند امي خوه توا بس تفكرته..تعبوا عيونها دموع وهي تقول..بوي الله يرحمه كان داسه في قجر الكامدينو في دارهم..
كاريمان:الله يرحمهم..امسكي..
طوبى بضحكه:بتعطيهالي ولاتبيني نجربها..
كاريمان بضحكه..
/لاجربيها..
طوبى؛لا معليشي كان خديتها معاش نردها..
كاريمان ضحكت بعدين قالت..
/خوديه ياطشه ع قولة راجلك..
ضحكت طوبى وخداته وقعدت تتأمل فيه وكاريمان تشوفلها بحب..
غيرت طوبى نظرها عنه وشافت للصندوق بانت عليها صورة محطوطه فيه لاحظتها كاريمان وقالت..
/هذي الصورة خذيناها في نفس اليوم..
طلعتها كاريمان وعطتها لطوبى..
خدتها طوبى وقعدت تتأمل فيها وين جو عيونها ع ورده دمعوا وكاريمان تشوفلها بحزن..
مسحت طوبى دموعها وقالت..
/هادي عزيزة؟
كاريمان بحزن:ايه..
طوبى؛الله عليك جمال عندها بالذات شعرها..
كاريمان بإبتسامه حزن..
/جميله من جوا اكثر من برا..كانت كيف النسمه بريئة وطيبه واجد وفيها حن غريب وتموت في امك ورده..
طوبى ودموعها ينزلوا قالت..
/تبان اصغركم!
كاريمان:بيني وبينها عامين وردة الله يرحمها وسالمين اكبر منا بواجد لكن ترافقنا وجونا ركب مع بعضه..
طوبى:قالتلي خالتي سالمين عزيزة خدت من امي لقطه حطان الفل في سفر القهوة..
كاريمان:مش غير هذي حاجات واجده كانت اكثر من يتلهف لجية وردة ووين تجي قريب تشيلها ع راسها..
دموع طوبى وهي تسمع فيها كانوا زي السيل تمسحهم يرجعوا ينزلوا..
خدت كاريمان الصورة وردتها لمكانها بعدين قالت..
/هي خل نعدوا نرقدوا شويه قبل يذن العصر ويخشوا علينا قوم عمك الصابر..
ضحكت طوبى من وسط دموعها وكاريمان ضحكت معاها..
🍃🍃🍃🍃
ماشيه بأتجاه دار خوتها الاولاد..
وقفت ع الباب ودقت جتها اصواتهم وهما يقولوا مع بعض..
"خش"
فتحت الباب وخشت..
لقت خوها الكبير لاهي بقرايته اما التاني كان مقعمز ع السرير وفي يده هاتفه قالتله..
/نبيك شويه يزن..
شافلها محمد لقتها ماشيه التفت ليزن شافه ناض من سريره ومشي طلع من الدار وسكر الباب..
رفعت سدرة يزن لدارها خلاته يخش وخشت بعده وسكرت الباب..
يزن بإستغراب:خيرك!؟
عقدت حواجبها وقالت..
/تشوف في محمد شن يدير ولا..
سكت وع وجهه باديه ملامح الضيق..
سدرة بألم:مافهمتش خوك هذا كيف يفكر معقوله يحط في عقله وحده زي هادي!؟
يزن:اني خايف نكلمه نتعارك معاه..
سدرة بقوة قالت..
/اني نكلمه..
فنص فيها وقال..
/تحشمي ع وجهك شن انتي تكلميه هادي! تي تعرفي كان درتيها يضربك حتى الضرب..
سكتت وهي مضايقه ومعصبه..
يزن:مانسبقوش الاحداث مرات حني فاهمين غلط..
قالتله:لا مش فاهمين غلط اني كان نلقى معاش تكلموا خوها هو احقر منها..
يزن؛ماتخلطيش الامور في بعضها...اسمعي حاجات زي هادي مالكش علاقه بيها اطلعي منها كان صار ماصار نعرف شن ندير..
ومشي طول طلع من الدار وخلاها تغلي من الغضب ودموعها في عيونها...
🍃🍃🍃🍃
وبعد آذان العصر جوا اهل الصابر لحوشه..
امه وبوه وخوته وخواته في منهم جي يجامل فيه مجامله وفي اللي فعلا كان متشوق يشوف طوبى..
وطلعت عليهم طوبى لكن قعدت بحجابها استثقلت تحول الحجاب قدامهم بسبب احساسها انهم غرب عنها..
سلمت ع النساوين ولما وصلت في ام الصابر تلقتها بالأحضان وبحب وحرارة والصابر يشوفلهم وهو مبتسم بفرح..
وبعد سلام طوبى ع ام الصابر سلمت ع الرجاله بالكلام لكن كبيرهم مشتله وكبت ع راسه وين تسأل ع حاله كانت تقول..
"ياجدي"
وهالكلمة برغم انها تعتبر عاديه ووارد جدا تقولها طوبى لأي راجل في عمر اب الصابر لكن لما سمعها الصابر حس اتجاه طوبى بإحساس قوي بالحب...حب الابوة اللي انحرم يعيشه سنين طويله بعد خسارته لولده الوحيد..
🍁وتعرفوا على طوبى وهدرزوا على بعض الرجاله كانت باينه فيهم طيبه وجوهم كان حلو وكذلك ام الصابر لكن خواته تعاملوا معاها برسمية وتجاهلوا وجوده كاريمان من اصله..
كاريمان اللي ماكان في شي يهمها قد شعور الفرحه اللي كان باين في عيون راجلها...
🍃🍃🍃🍃
مقعمز في المربوعه بروحه شاد مصحف ويقرا..
وقف قرايه لما سمع الباب يدق..شافله..
سميرة:عادي ناخد من وقتك شويه نبيك في موضيع..
ابتسم وحط المصحف جنبه وقال..
/تعالي احكي في موضيعك..
ضحكت بعدين خشت قعمزت مقابلاته وهي تقول..
/خيرك اليوم حسيتك ملخبط شويه..
قاللها:لالا اموري تمام لاملخبطة لاشي خشي في موضوعك طول .
تنهدت وقالت..
/صل ع النبي..
قاللها:اللهم صل وسلم وبارك عليه...
سميرة:مش مفكر تكمل نص دينك..
قاللها بضحكه..
/عارفه من الاول موضيعك هذا..
سميرة:امك تبي تتريح عليك ولدي..
نضال:واني هكي مستريح ياخالتي..
سميره:امك تبيك تخطب اريج..
🍃قلبه كاد يطلع من صدره لما سمع الجمله اللي قالتها سميرة بلع ريقه بعدين ابتسم وقال..
/لااريج خلاص راحت ربك مش رايدهالي..
باستغراب شديد قالت..
/كيف راحت مافهمتش!؟
بإبتسامة الم:قريب تفهمي ياخالتي قريب..وتوا بالله عليك خليني نراجع اللي حفظته قبل ليريح من راسي بكل..
ناضت وهي موجوعه عليه ومتفاجئة في نفس الوقت بعدين مشت طلعت وخلاته مع كلام الله اللي وين يقرا ترتاح نفسه و وجع جرحه..
🍃🍃🍃🍃
"اني ياخالي مانبيش مشاكل ووجع راس"
المحجوب حط فنجانه ع الصونيه بعد رشف منها وقال..
/حتى اني ماعجبيش تصرف حسين ولاتصرف عدنان مادام اني سكرت الموضوع علاش يدير حركة زي هادي!؟
غرفه بضيق:سامحني خالي بنزيد نثقل عليك نبيك انت بس اللي تابع الرزق..
هو قاللها:تو نكلف حد من عندي يتابع كل شي انتي توا خلاص وليتي تفهمي في كل شي وتعرفي تتصرفي تبي حد يتابع معاك الحسابات والامور القانونيه بس واني عندي من يقدر ع حاجه هادي وفي نفس الوقت شخص امين..
ابتسمت وقالت..
/ان شاء الله مانفقدك ياربي.
ابتسم وقال..
/صغارك وين!؟
ناضت وهي تقول..
/شويه نمشي نجيبهم..ومشت طلعت من المربوعه..
بعد ماطلعت المحجوب قام الهاتف فتح الشاشه وخش ع سجل المكالمات دور ع رقم معين لين لقاه واتصل بصاحبه..
🍃🍃🍃🍃
ومن المربوعه للصاله اللي كانوا مجتمعات فيها نساوين عيلة الواعر مع نبيله كان حديثهم عن..
سدرة:اول اسبوع من شهر 3..
نبيله:قبل رمضان..
فردوس:هكي خير..
نبيله هزت راسها بصمت..
مطيره قالت:يوم الاربعاء بإذن الله بنجوك من الصبح..
نبيله بإبتسامه:مرحبتين بيكم..
ردوا عليها بأصوات متقطعه وهما يقولوا..
"رحب بيك..بارك الله فيك"
🍀🍀🍀🍀
ويجي الاربعاء..
ويحلوا عمام عبد القيوم وخواله ضيوف ع حوش المحجوب في حضور حسين والمهدي ومحمد شنيبه..
ايه محمد شنيبه اللي قاعد بكل الطرق والوسائل يحاول يكفر عن ذنبه اتجاه طوبى واهلها..
🍃اللقاء في البدايه كان رسمي بعض الشي بس مع الهدرزة انطلقوا وانسجموا مع بعض والاجواء ولت حميميه الى حد ما..
ولما جي وقت الضيافه زي مايقولوا قاموا القدر وبيضوا وجه عبد القيوم قبل طوبى وهاللقاء خلا موقف بعضهم يتغير اتجاه زواج عبد القيوم من طوبى..
🍀🍀🍀
ومازال دور عجلة الايام..
وتنتهي احلا ايام قضتهم طوبى في حياتها روحت وهي مخليه شي منها وخدت معاها شي من اهل المكان اللي كانت فيه وبتقعد الاشواق حاضرة لأول اسبوع من شهر مارس اسبوع الفرح..
🍃🍃🍃🍃
اليوم اللي وصلوا فيه عبد القيوم وطوبى لطرابلس كان يوم تعيس بكل معنى الكلمه ع بنات الواعر..
كلهم كانوا في حوشها يبكوا بألم وهما يسمعوا في حس حركة العمال في الحوش اللي كان لكبيرهم..
جزء من العمال كانوا يطلعوا في محتويات الحوش والجزء التاني كانوا يخدموا ع تعلاية السور اللي بين الحوشين والغاء الباب الفاصل..
المهدي كان يتفرج ع العمال كيف يطلعوا في الاثات في كانتر وهو موجوع ويفكر في حال سدرة..
وفي هاللحظه درست سيارة عبد القيوم قدام حوش طوبى اللي كانت تشوف للي قاعد يصير وهي في حالة صدمه ماتقلش عن صدمه عبد القيوم اللي كان زيها مايعرف شي..
نزلوا من السيارة وعيونهم تشوف في العمال كيف يرفعوا في اثاث المربوعه الخارجيه..
طوبى مشت طول للباب قعدت دق عليه بقوة وراجلها يشوفلها بحزن..
ينفتح الباب تخش طول واللي فتحه سكره بعد خشت..
سمع صوت بكاء قعد الصوت يتباعد لعند مااختفي التفت لجهة حوش شنيبه شاف بعض اهل الشارع يتفرجوا لكن المهدي كان يشوفله وهو طول مشاله بش يفهم منه شن قاعد يصير..
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
بعد مرور يومين...
في حديقه فيلا مختار درست سيارته VIP..
انفتح الباب ونزل منها ومشي بإتجاه باب الفيلا..
لما وصل فيه رن الجرس..وع طول فتحت امينه..
خش وهو يقول..
/ازيك..
امينه وهي تشوفله بتوتر قالت
/بخير الحمد لله..
كمل طريقه بدون مايشوفلها وبدي يدندن في اغنية "مافيا" وهو طارب..
لكن سكت فجاه لما سمع حس هدرزة جاي من الصالون عقد حواجبه بإستغراب ومشي باتجاهه لعند ماوصل فيه ويشوف قدامه مايخليه واقف متسمر في مكانه من المفاجأة..
"موخا"
صاحبه هالصوت اللي ناداه مشتله تجري بفرح وشوق هو برغم ارتباكه طبس عليها رفعها لحضنه وعيونه مازالوا مركزين بالنظر على جهة وحده..
فاتن كانت مقعمزه تمرر في نظرها عليه وع ضيفتها اللي كانت شاده علي ومقعمزاته في حجرها..
هالضيفه رسمت ع وجهها ابتسامه واسعه وهي تشوف لمختار وتقول..
/شن مافيش..السلام عليكم...قالتها وهي تقلد فيه..
وهو مازال ع حاله متفاجئ ع الآخر..
ضحكت طوبى وقالت..
/قصدك لهالدرجه المفاجأة تجلط!
رفع حواجبه ونزلهم بعدين قال..
"اهلا وسهلا"
