■■■■■■■■■■■■■■■■■■■■
قد يحمل هذا الجزء ومايليه احداث مؤلمة وقاسيه ولكنها تخفي بين طياتها مغزى عميق لايصل اليه سوى أصحاب القلوب الحية وأولوا الألباب فهنيئا سلفا لكل من يقرأ بعمق ليصل للعبرة🌸
/////////////////////////////////////////////////////////////
#طوبى "جنة طوبى"
#جمان_فريد
#الجزء_126"إمتحان/في الضراء"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#التقوى
(وَالصَّابِرِينَ فِي الْبَأْسَاءِ وَالضَّرَّاءِ وَحِينَ الْبَأْسِ ۗ أُولَٰئِكَ الَّذِينَ صَدَقُوا ۖ وَأُولَٰئِكَ هُمُ الْمُتَّقُون.) 🌿🌿🌿🌿🌿🌿🌿🌿🌿🌿🌿🌿🌿🌿
🍃 إنني أشتهي أحياناً أن أغيب حقاً تحت الأرض. و في لحظات أخري أُحسُّ أنني مستعد لأن أرتمي بين ذراعي واحد من أولئك الذين شهدوا حياتي الماضية، واحد من أولئك الذين شاركوا في حياتي الذاهبة، لا لشئ إلا لنبكي معاً .. نعم لا لشئ إلا لنبكي .. أقول ذلك صادقاً..
دوستويفسكى🍃
________________________________________
"اطمني ياطوبى وضع الجنين كويس الله يبارك"
غمضت طوبى عيونها المدمعات براحه وهي تقول بصوت مبحوح..
/الحمد لله..
وعيون سلافه تشوفلها بإبتسامة ألم وهي تمسح في دموعها..
الطبيبه:اللي صارلك تشنجات ممكن بسبب انفعال او حركه غلط..زيدي اهتمي بنفسك وردي بالك من روحك ياطوبى .
هزت طوبى راسها وهي تقول..
/إن شاء الله
🍃🍃🍃
في طريقهم لخارج العياده اللي كانوا فيها..
سلافه وهي شاده طوبى كانت تسمعلها وهي تقول..
/بالله عليك زيدي نبهي عليهم مايخبروش عبد القيوم
سلافه:شددت عليهم لاتخافي مافي حدا رح يخبروا..
طلعوا برا متوجهات للسيارة..
وصلوا فيها..ركبت سلافه طوبى للسيارة بعدين ركبت هي وشغلت السيارة وطلعت بيها خارج مكان العياده..
في البدايه ساد الصمت بينهم لعند ماقالت سلافه.
/باخدك ع البيت؟
طوبى:لالا ولي بيا للمعهد..
سلافه:فيكي تعطي حصص؟
طوبى بتعب:لا..لكن نبي عبد القيوم وين ماحطني يلقاني..
سلافه:مثل مابدك..
ورجعوا سكتوا للحظات ويقطع هالسكوت انهيار طوبى بالبكاء..
سلافه حست بألم وحزن ونزلوا دموعها وهي تسمع في عباراتها..
قعدت دور مكان فاضي مظلل توقف فيه ولما لقاته توجهتله ودرست السيارة فيه..
قعدت تشوف لطوبى وهي تبكي بألم بعدين مدت يدها وحطتها ع ظهرها..
طوبى هني تكلمت وقالت..
/شن مازال يبي شني!! مش ساده ماجاني من وراه!!؟ مش ساده القهاير اللي تسببلي فيهم..مش ساده البلي اللي قعدت نعاني فيه في جرته!؟ حتى بنتي اللي قلت ربي عوضني بيها ماقدرتش نفرح معاها ولابيها حتى لما تقعد معاي نحس فيها في الاخير بتتاخد مني..يقولي بنتي مانخليهاش لوحده زيك!! يبيها تقعد معاه المجرم اللي في يوم من الايام جي بيقتلها بدم بارد!!؟..نموت ولانسلم بنتي لواحد زيه نموت ولانخليله جنة هالمجرم..
ورجعت تبكي بقوة وسلافة قالتلها بنبرة باكيه..
/لاتعملي بحالك هيك لاتنسي الولد اللي ببطنك!؟
حطت يدها ع بطنها وقالت بمرارة..
/ويلي هو وويلي بوه..ياويلي كان مايدير فيه هداكا المجرم حاجه!..
حطت ايديها ع وجهها وهي تقول بقهرة وندم..
/والله ماكنت نبي والله انجبرت نخليه يحدف روحه في النار معاي..عندهم الحق عماته عندهم الحق..
مسحت سلافه دموعها اللي نزلوا لذقنها وهي تقول..
/لازم يعرف ياطوبى لازم تخبريه مابتعرفي هداك الحقير من وين يطلعلوا..
حولت ايديها وشافت لسلافه بفجعه بعدين قالت..
/اتصلي بيه ترا..
تفاجئت سلافه..
طوبى:ديري روحك مش عارفه انه جاي واني ماخبرتكش..
سلافه قعدت تشوفلها شويه بعدين قالت..
/طيب..
مسحت دموعها وحمحمت بعدين قامت هاتفها وحطت ع رقمه واتصلت بيه..
وطوبى حطت ايديها اللي كان ضامتهم لبعض تحت ذقنها وهي تردد بخوف ..
"يارب"
🍃وكلمت سلافة عبد القيوم بطريقه غير مثيرة للريبة والشك ولما اطمنوا انه بخير نهت المكالمه وقالت لطوبى..
"يعني مارح تخبريه!؟"
قالتلها:لالازم يعرف لكن مش توا..في حد تاني لازم نخبره قبله..
التفتت للمقعد الخلفي بتاخد شنطتها حست روحها فاشله يدها طاحت وهي تقول بألم..
/بالله خوديها وطلعي هاتفي منها..
سلافه خدت الشنطة وقالت..
/لازم تاكلي شي..
طوبى:مش مهم توا..بالله حطي ع رقم اختي سدرة المنتهى..ايه الرمز متاع الشاشه 2018..
كتبت سلافه الرمز وخشت ع سجل المكالمات شافت اسم سدرة خشت عليها واتصلت لما بدي ينادي الخط حطت الهاتف ع وذن طوبى وطوبى شداته..
🍃🍃
سدرة فهالوقت كانت منشغله بغسل الملابس سمعت هاتفها يرن طلعت من الحمام وتوجهت للصالون وين ماكانت حاطه هاتفها في الشحن..
لما وصلت فيه نست انها مامسحتش ايديها من الميه ووين شافت المتصل مسحتهم في فانيلية البيجامة بعدين خدت الهاتف من الشحن وفتحت الخط وردت..
/طويبه..
جاها صوت طوبى الخايف وهي تقول..
"سدرة..الحقير الجالي روح ياسدرة جاني للمعهد يهدد فيا قالي بناخد منك جنه"
جمدت سدرة في مكانها حتى لسانها ماقدرتش تحركه..
"تسمعي فيا سدرة..الحقير شكله في حد خبره ياسدرة"
تكلمت سدرة وهي نقول بنبرة مرتعشه..
/سكري بنتي سكري خل نكلم المهدي..
"قوليله خش وراي للمعهد قوليله هددني ببنتي قوليله"
نزلوا دموع سدرة وهي تقول..
/حاضر ياماما حاضر...
ونهت المكالمه طول وهي تقول بنفس النبرة..
/الله ياخده الله ياخده..الله ياخده ..
وحطت ع رقم المهدي واتصلت بيه..
🍁🍁
"خلاص ردينا للمعهد.."
شغلت سلافه السيارة وتحركت وهي تمسح في دموعها..
قعدوا ملتزمين الصمت طول الطريق لعند ماوصلوا للمعهد..
🍃🍃
خشت سلافه بطوبى للمكتب متاعها ساعدتها تقعمز ع الكرسي وقالتلها..
/ثواني وراجعه..
ومشت طلعت من المكتب وقعدت طوبى بروحها ورجعت تفكرت اللي صار من البدايه..
حطت ايديها ع صدرها المكتوم وقعدت تقول ببكاء..
/ياربي خليه كابوس فيقني منه يارب..
ع خشة سلافه بسفرة صغيره حطتها ع الطاوله قدام طوبى وهي تقول..
/لاتقولي مابدي فكري بإبنك حبيبتي..
شافت طوبى للسفره شويه بعدين خدت ساندويتش الجبنة الرومي مع الطماطم والخس..كلت منه شويه..
سلافه:العصير طبيعي اشربيه كله..انا رايحه اعطي الحصص مكانك اذا احتجتي شي اتصلي فيني..
طوبى بإمتنان قالت..
/بارك الله فيك..
ردت عليها سلافه بإبتسامه ومشت طلعت من المكتب..
طوبى بعد ماتبعتها بعيونها غيرت نظرها للساندويتش شافتله بضيق شديد وعدم رغبه ومع هذا غصبت نفسها تاكل ع خاطر روحها التانيه..
تاكل وهي تذرف في الدموع..وكل لقمة تنزل في جوفها بعد غصة..
تفكر في اللي بيصير بعد هاليوم..والافكار السودا سيطرت ع عقلها..وتنهار مجددا بالبكاء واللقمه قاعدة في فمها..
وقعدت ع هالحال لحظات بعدين هدت وبلعت..وقالت..
/يارب..يارب..يطلع كابوس يارب ..
غمضت عيونها بشدة وكانت فعلا تراجي حد تفيق من هالكابوس..
ويصدح صوت رنين هاتفها يفيقها من الوهم اللي تبي تقنع نفسها بيه..
فتحت عيونها وشافت لشنطتها اللي كانت ع حجرها..
وهي تتنفس بسرعه من قوة ضربات قلبها حطت الساندويتش في السفره بعدين طلعت هاتفها من الشنطه..
لما شافت الشاشه لقت المتصل رقم دولي..
فتحت الخط بسرعه وحطاته ع وذنها ويجيها صوت مختار اللي حست انه مش طبيعي..
"السلام عليكم طوبى"
خدت نفس بعدين ردت عليه..
/وعليكم السلام..
"خيره صوتك هكي كأنك كنتي تبكي..ولدي صارتله حاجه!؟"
بلعت ريقها وقالت..
/لاعلي كويس مافيه شي..
"متأكدة؟"
طوبى:والله العظيم مافيه حاجه..
"ابعتيلي صورة ليه توا"
غمضت عيونها وقالت..
/اني في الخدمه..
"كيف!!؟ لمن خليتي ولدي!؟"
فتحت عيونها اللي كانوا مليانات حزن وهي تقول..
/لفردوس ماتخافش عليه مع فردوس..
"تمام تمام..ع العموم غدوة بتروح امينه تو نخلي حد يجيبهالك بش تاخده"
هزت راسها وقالت..
/ع راحتك..
"Ok..تشاو"
ونهي المكالمه فورا..نزلت الهاتف وشافتله وهي مبتسمه بتهكم بعدين رداته للشنطه..
حطت يدها ع صدرها اللي كانت حاسه بجبال محطوطه عليه وقالت..
/يارب..انت حسبي وكفى..حسبي الله وكفى..حسبي الله وكفى..حسبي الله وكفى..
رددت هالدعاء مرارا وتكرارا لعند ماحست ان صدرها بدي ينشرح شويه شويه..
سكتت وشافت للسفرة بعدين رجعت تاكل وتشرب..
🍃🍃🍃🍃
"طلع مروح امس الزفت.."
خديجة بإستياء..
/واك منك يالجالي واك..
نسرين بضيق شديد..
/لعند امتى هالحال ياربي لعند امتى!؟
المهدي:تو بنمشيله نتفاهم معاه المريض هدا..نسرين قولي لخالتي سميرة تركب لسدرة..
هزت نسرين راسها بصمت والمهدي مشي طلع من حداهم..
خديجه:باهي هو يبي حضانة بنته يمشي يرفع قضية علاش يلحق فيها لغادي المصيبه هادي..
نسرين:والله مافي مصيبه كان خوك ياخديجه الله..
خديجه بإنزعاج:اقعدي فيها..
ومشت بإتجاه الدار وخلتها وهي تشوفلها بعدم رضا..
🍃🍃🍃🍃
ويجي وقت صلاة العصر اللي يخلي طوبى تهرب من كل شي للمصلى..للمكان اللي بتلاقي فيه مولاها بش تشكيله وتحكيله وتراجي منه يريح بالها ويفرج عنها وينصرها..
لكن وهي تصلي خوف رهيب تملكها وخلا كم من الافكار السوداوديه تتزاحم في عقلها وتسيطر عليه وتطلع من الصلاة والخوف والقلق ماليين قلبها..
"طوبى"
التفتت يمينها شافت سلافه مقعمزة جنبها وهي لابسه ملايه الصلاة قالتلها..
/كيفك هلأ؟
هزت راسها وقالت..
/احسن شويه..
سلافه:خلصتي أكلك وشربتي العصير ماعطيتهن لحدا ماهيك؟..
يدوب ابتسمت وقالت..
/لاوالله ماعطيت حد..
ابتسمت سلافه وقالت..
/الولاد خلوني درسن بالغصب من اول مادخلت عليهن وهن عم يسألوا عنك...وين معلمه طوبى..نبوا معلمه طوبى..واحد منهم قلي اطلعي انتي اطلعي نبوكش..كانت تتكلم وهي تمثل بحركات اليد وخلت طوبى تضحك ضحكه خفيفه..
سلافه بضحكه:ولما قلتلهن معلمه طوبى تعبانه زعلوا كثير حتى انو قبل مااطلع ماعندن عطوني شوكولا وسكاكر وقالولي عطيها لمعلمة طوبى..
طوبى بإبتسامة شفقه..
/ياعمري..
سلافه وهي مبتسمه قالت...
/بتطلعي معنا تحضري النشاط اللي رح نعملوا بالباحه؟
هزت طوبى راسها بإيجاب وهي مبتسمه..
وهما يهدرزوا عيون ميار كانت من بعيد عليهم وهي تشوف لوضعهم مع بعض بتعجب وعدم تقبل في نفس الوقت..
🍃🍃🍃🍃
"وبالله العظيم يطرا لطوبى حاجه من وراه المسخ هدا نقربعها ع راس الكل ومعاد يهمني فيها واحد"
سميرة بقلق:استهدي بالله ياسدرة بإذن الله مايقدر يديرلها شي هو توا يبي يخوفها بس هدا اللي يقدر عليه..
سدرة ودموعها ينزلوا قالت..
/وهدا شويه! يركب مراة حامل الرعب شويه!؟..رفعت عيونها للأعلي وقالت من وسط قلبها..الله يعطيه مايرفعه ان شاء الله مايكمل هاليوم ياربي...
سميرة كانت تسمعلها وهي تشوف لحالتها بألم..
نفس الألم اللي كانت تحس بيه سدرة المهدي وهي تسمع في بكي مرت بوها وكلامها اللي كان واصلها لدارها..
🍃🍃
وبوها مشي لعمها وين مايعرفه ساكن وينصدم بناس تانيه ساكنين في الشقة من يومين..
ويطلع من العمارة وغضب الدنيا كلها فيه..اتصل بيه ع الرقم اللي يعرفه لقاه خارج الخدمه ماخلا ماقال عليه من شتايم وكان حيلعن بسببه جدهم السابع..
*******
حكيم:لاوالله لاكلمني ولاجاني ولانندري عليه روح من أصله...
مرر المهدي نظره ع الشارع وهو يحاول يتمالك اعصابه بعدين قال لحكيم..
/كان حصلته كلمني ورد بالك تقوله المهدي سألني عليك..
🍃🍃🍃🍃
جي وقت نهاية الدوام في المعهد وتطلع طوبى لعبد القيوم اللي كان كيف مدرس بسيارته قدام البوابه..
ركبت جنبه وقالت.
/السلام عليكم..
ركز ع ملامحها وهو يقول..
/وعليكم السلام..كنه وجهك اصفر وعيونك حمر!؟
طوبى بضيق: تعبانه شويه نبيك تروح بيا لماليا..
تحرك بالسيارة وهو يقول بقلق..
/شن صارلك بالزبط؟.
طوبى:دخت شويه..
قال بشي من الانفعال..
/وليش ماخبرتيني جيت شلتك للمصحه!.
بقلق وارتباك قالت..
/رفعتني سلافه..
رفع حواجبه وهو يقول..
/معناها هذى ليش كلمتني!؟ قسما بالله حسيت في حاجه..
طوبى بتوتر:مافي شي خطير تعب حمل عادي..
قاللها:وانتي بعدين رديتي للمعهد وكملتي شغلك غادي!
طوبى:بعدين ولى حالي باهي..
عقد حواجبه بشي من الغضب وقال..
/والله توقعت يصير فيك هك يوم من الايام شغل صبح وعشيه وفي الشقه مش مريحه روحك..وكمل يقول بحزم..اسمعي انسيها الخدمه الفترة هذي خلاص..حرك يده من اليسار لليمين هو يقول..اخر كلام عندي..
تنهدت بضيق وقعدت ساكته وهو تابع يقول..
/اخر مرة درقي عليا أي شي يصير معاك ماتجربيش زعلي ياطوبى ارجوك..
هزت راسها وهي تقول..
/حاضر..واسفه..
التزم الصمت وحاول يركز في السواقه وهي جنبه كانت في قمة الخوف..
🍃🍃🍃🍃
ويروح المهدي للحوش يلقى قدامه جمال راجل اخته واقف مع بوه في الجنان كانوا يستنوا في خديجه تكمل سلامها ع اهلها وتطلع..
وقف معاهم وسايرهم مسايرة لعند ما طلعت اخته قدمتله طول وهو قدملها وضموا بعض..
خديجه:شن صار معاك..
قاللها:مالقيتاش..
وخر عنها وباس راسها بعدين قال..
/الهي بحياتك وراجلك..
طبطبت ع ذراعه وقالت..
/نحاول..بالسلامه.
المهدي:في أمان الله..
وتمشي تسلم ع بوها بعدين تطلع مع راجلها سقدوهم المهدي وبوه وقعدوا واقفين برا يراجوا في سيارتهم تطلع من الشارع..
وتطلع سيارة جمال وتخش سيارة عبد القيوم..
محمد شنبيه؛خاش داخل..
هز المهدي راسه وعيونه ع سيارة عديله..
بعد ماشاف طوبى وعبد القيوم نزلوا نادى ع عبد القيوم..
التفتله..اشرله المهدي يقعد هز عبد القيوم راسه بالموافقه
🍃وطوبى وهي في قمة القلق فتحت الباب وخشت..
وين وصلت داخل الحوش قابلتها فردوس لقت روحها بدون ماتشعر ماشيتلها وراميه نفسها في حضنها وبدت تبكي بقوة..
فردوس بفجعة:خيرك!
وتسمع صوتها غرفه وهي فالكوجينه وتطلع بسرعه تشوف حالة طوبى وتنفجع معاها..
🍃وبرا دخل عبد القيوم المهدي للحوش وسكر الباب ..
عبد القيوم؛ان شاء الله خير!
المهدي:خلينا نخشوا المربوعه قبل..
ومشي مهدي بإتجاه المربوعه وعبد القيوم وراه..
*******
فردوس بصدمة؛غبارة سودا!!
طوبى ببكي؛قالي والله لما ناخد بنتي مش مخليها عندك..
غرفه بغضب:لما يلحس ظهره..
قالتلها طوبى بنبرة باكيه..
/والله نحساب روحي بنجهض..
آلاء وهي تشوفلها بألم ودموعها تنزل..
/عاينتي!؟
هزت طوبى راسها وقالت..
/ايه مافي شي خطير الدكتورة قالت تشنجات..
"والله نقتله باالله"
سكتوا وهما مفزوعات بعد سمعوا هالجمله اللي قالها عبد القيوم بغضب شديد..
طوبى بخوف:حي عليا!
وناضت ومشت بسرعه للمربوعه الدخلانيه والباقي لحقوها..
🍃🍃🍃
المهدي:وشن تحساب روحك بدير كان قتلته!؟ تبي تجني ع روحك!
عبد القيوم بغضب قال..
/تهدد فيا انت ولاشنو؟
المهدي بصرامه؛افهم يابنادم كان قتلته لو ماضيعيتش روحك جنة بتحصل في النص خودها مني والله مافي واحد من عيلتي يرضالها تتربى مع قاتل بوها..
عبد القيوم بسخريه:بوها اللي يوم من الايام جي بيقتلها!
المهدي:عهدي بيك راجل حكيم وعاقل ياعبد القيوم ماديرش مايخليك تودر روحك..اني جيت خبرتك بش تاخد احتياطك وخليني اني نتصرف معاه..
شافله عبد القيوم بنظرات كلها غضب وفي لحظه رفع يده وخبط بيها طاوله مرش صغيره جنب الكنبه الل كان مقعمز عليها..كسرها وانجرح ودمه بدي ينزف..
🍃🍃🍃🍃
"الله يقصف عمروا ان شاء الله"
سلافه بإزدراء:الوسخ كان عم بيقول عنها كلام بالشارع ينزع سمعتا..
شاديه؛الله يلعنه..مابعرف كيف وحده مثلا تزوجت هيك واحد..
سلافه بأسف وحزن..
/انا كمان خطرلي هالسؤال..شو وجعت قلبي ياماما وهي بتقول انا اللي انجبرت خلي عبد القيوم يرمي حالو ع النار مشاني وقالت عماتو كان معهن حق..يعني حتى مع عبد القيوم ماكانت مرتاحه كثير..
شاديه بأسف:شفتي لك بنتي شفتي هي المسكينه اللي كنتي مستكثرة عليها عبد القيوم ..
نزلوا دموع سلافه مسحتهم وهي تقول لأمها..
/عن جد انا اليوم قرفت من حالي واستصغرت نفسي كتير لما شفت حجم المعاناة اللي عم تعيشا هالمراة بتصدقي ياماما انها اصغر من لبانة وتحملت كل هالشي!
شاديه بحزن:في ناس يابنتي حمالين هموم وقسى من صغرهن ع طول الله بيبليهن بيطلعوا من مصيبه بيفوتوا بغيرها واللي قلبوا لله بيصبر وبيقول برضى الحمد لله ع كل حال..
سلافه بألم:الموت اهون من هيك حياة..
شاديه:كلنا اخرتنا للموت لك بنتي وهالدنيا مافيها شي بينزعل عليه..
هزت سلافه راسها موافقه ع كلام امها وهي تمسح في دموعها...
🍃🍃🍃🍃
في الجنان..
مقعمزة مقابلاته تلف ع يده في الشاش..
هو يشوفلها وهي تشوف ليده..بعد كملت قالت..
/انت هكي بتزيد تخوفني..
قاللها؛جاوبيني ع سؤالي ليش ماقلتيلي!؟
طوبى بحزن؛بش مايصيرش فيك زي هكي..وشدت يده وهي تشوفلها..
شد يدها وقال:قولي شن دارلك شن قالك هالنجس!؟
طوبى وهي تشوف ليده المجروحه بألم قالت..
/قالي بناخد بنتي مش مخليهالك..
زاد شد ع يدها وقال..
/متأكده هذى ماقالك!؟
طوبى:معاش تشد ع جرحك ينزف..
قاللها بإنزعاج:فوتيه وجاوبيني ماتهربيش..
قامت عيونها فيه وقالت بألم كاذبة..
/هددني بيك..ونزلوا دموعها..
هو مسحهم بيده الثانيه وقال..
/كلب كيف هالكلب ماعنده كان النباح لاتخافي منه ولاتعدلي عليه جنة والله ماهو واخدها...
رشفت وقالت:بنقولك حاجه.
عقد حواجبه بتوتر وهو يراجي فيها تقول ماعندها..
خدت نفس وقالت..
/امس ومرت ربيع عندي وصلتني هديه مع مندوب توصيل من****** هو بوكس فيه مصحف وحنة ورق وعطر نوعه كنت نستعمل فيه زمان بعدين غيرته..
عبد القيوم وهو يسمع بدي يهز برجله بقوة من الغضب الشديد زاد وترها وهي تتكلم..
/كان فيها كرت مكتوب فيه ان الهديه جتني من وحده تابع فيا ع الصفحة..اني في الاول مش عارفه كيف فاتت عليا بعدين تفكرت اني ولامرة عطيت معلومات عن نفسي حتى صفحة الشخصيه مايعرفوهاش.
غمض عبد القيوم عيونه بغضب وقال..
/هو الفاسد الوسخ..
جبد يده من يدها وناض مشي بإتجاه المربوعه ومااهتمش لندائاتها وهي بعدين خشت داخل تبكي بألم..
غرفه بضيق شديد..
/شن قالك؟
طوبى بنبرة ألم باكيه..
/والله ماكنت نبي نتزوجه والله هما خوفوني من حالتي وخلوني مجبورة ناخده..عرفت هاليوم بيجي عرفته...
ضمتها غرفه وهي تقول بألم..
/الله ينتقم منك ياجالي الله لايريحكم انت واختك جعنكم تلقوه..
🍃🍃🍃
"غير نوصل فيه الكلب هدا وربي ماني راحمه"
عبد القيوم بتهديد..
/اهو نقولهالك ورب العزة يدير حركة تانيه ماضال الا قاتله ويصير اللي يصير..
ناض المهدي ومشي طلع من المربوعه ومنها من الحوش كان في حالةغضب شديد تخليه كان شاف الجالي قدامه يطلع روحه..
🕸والجالي هداكا الوقت كان في احدى مدن الغرب الليبي في استضافه ناس من علية القوم عنده بيهم علاقة وثيقة كانت من سنين معرفة عاديه بس هو بعدين قواها لخدمة مصالحه الشخصيه..
🍃"هو كلمني وطلبك بالأسم عجبه شغلك جدا"
الجالي بإبتسامه لبقة ونبرة ثقه قال..
/مروح غدوة ان شاء الله نتلاقوا وجها لوجه ونهدرزوا..
=بيضلي وجهي معاه ياباش مهندس..
الجالي بنفس الابتسامه..
/وجهك ديما أبيض إن شاء الله..
=إن شاء الله..قولي شن صار معاك حليت امورك؟
تبدلت ملامح ابتسامته للألم..
=شني مامشاش الحال!؟.
شافله شويه بعدين حرك راسه يمين ويسار..
=احكيلي احكي بالك نقدروا نساعدوك..
ابتسم وقال..
/ماتشغلش بالك استاذي تو نتصرف ..
=ع كيفك لكن هاه كان احتجت حاجه كلمني طول..
هز راسه وهو يقول بإبتسامه..
/بارك الله فيك..
🍃🍃🍃🍃
وتمر باقي ساعات هاليوم الثقيل ودموع طوبى مابطلوش نزول..حاسة نفسها وكأنها كانت عايشه في حلم وردي جميل وفاقت منه ع واقع بائس ومرير..
من قوة سيطرة الحزن والخوف عليها فقدت الخشوع في الصلاة..حتى وهي تقرا في القرآن مش قادرة تركز ع معاني الآيات..
مالقتش قدامها غير الهروب للنوم وقتها هدا اللي حاساته ان النوم هو الوحيد اللي يقدر يريحها..
خشت لسريرها وحطت راسها ع المخده وهي تقول بنبرة ألم وضعف..
/ياربي..ياربي..
وغمضت عيونها وهي تنادي فرفيقها الأعلى لعند مانزل عليها النوم ورقدت..
🍃وعيلتها قلوبهم بتتقطع عليها حتى الماكله معاش عندهم ليهة نيه..
غرفه كانت تبكي عليها بقهرة وهي تقول..
"امتى بتتهنى في حياتها زي الناس"
وفردوس تسمع فيها وتبكي بألم وهي تفكر كيف بتخلي اختها اللي عندها زي بناتها فهالحال..من غير شي فردوس كانت حاسه ان في شي حيصير ومازال قلبها مقبوض..
🍃🍃
اما عبد القيوم لأن حوش العيله ماكانش فيه رجاله ماقدرش يبات فيه كلم صاحبه سامي وطلب منه يبات عنده وسامي كالعاده رحب بيه..
🍁وبمجرد ماوصل عبد القيوم غادي فرغ غضبه كله وهو يحكي في اللي صار وماخلاش شتيمه تعتب عليه ماقالهاش ع الجالي وسامي بعد ماسمعه حاول يهديه ومن داخله كان غضبان زيه ودمه محروق وفي نفس الوقت خاف ع صاحبه من عواقب اللي قاعد يصير...
🍃🍃🍃
وبعيد عن هدا كله لكن مازال يدور في فلك ام العيون الحايرة اللي حيرت قلوب معاها..
كان عدي مقعمز في جنان حوشهم وهو يفكر في اللي صار معاه اليوم واللي عرفه من المحجوب..
🔺️🔺️في وقت سابق🔺️🔺️
في مكتب المحجوب..
كانوا مجتمعين يتكلموا عن موضوع فض الشراكه بين غرفه وعدنان..
عدي:رفض وقال اموري متيسرة فيه وقاعد نكسب مستحيل نفض الشراكه ونبدا من اول وجديد بعد ماقطعت هالشوط..
المحجوب بإستياء:والله ماناقصاته هو التاني..
عقد عدي حواجبه وقال..
/صايرة حاجه تانيه!؟
ضم المحجوب شفايفه داخل بعدين رخاهم وقال..
/الزفت الجالي جي هني المده اللي فاتت وعرف كل شي..
عدي بقلق:وشن دار؟
المحجوب:لتوا مادار شي ومش عارف شن ناوي يدير خوه لما بلغني حسيته متخوف هلبه الله اعلم شن قاله..
عدي:ماحاولتش تعرف منه..
المحجوب:قال ماقال شي لكن اني ماصدقتاش..
عدي وهو يشوفله جت بين عيونه طوبى وهي طالعه من المدرسه اليوم قلبه وجعه وخاف عليها هلبه..
قال للمحجوب:لازم ديروا شي تحطولها حماية ديروا اي شي الجالي هدا كان ماقدرش يوصل فيها يقتلها حتى القتل..
المحجوب:هدا اللي نفكر فيه نبي نديرلهم حمايه هي وراجلها..
عدي:راجلها مايصيرله شي هداكا كان بيدير شي يديرهولها هي مروا عليا هلبه قصص زي هادي يااستاذ الراجل اللي زي الجالي ينتقم من المراة بس لأنه يشوف فيها خاينه..
تأفف المحجوب بقلق بعدين قال..
/لولا خوفي من الله راني بعتت من يقتله ويريحها منه..
عدي سكت وهو يشوف للمحجوب وقلبه معبي خوف ع طوبى..
🔺️🔺️في الوقت الحاضر🔺️🔺️
"خيرك مقعمز بروحك"
التفت شاف لأخته اللي كانت طالعته وهي لابسه البودري ضحك وقال:مسيبه عرسك وطالعه تقصقصي.
جبدت كرسي نايلو وقعمزت مقابلاته وهي تقولك..
/جوك ماعجبنيش اليوم بكل..
خفتت ضحكته وهو يقول..
/زينب ماحكتلك شي ع صاحبتها؟
ايمان:لاحكتلي قالت خوك نسي ربي مرة وحده وقاعد يفكر في مراة متزوجه..
عدي بضيق وإنزعاج:اختي هادي ديما تحب تفهم بمزاجها،اصلا ماعفس فيا حد غيرها..
ايمان؛من خوفها عليك..
عدي بإستياء:شن بيصير فيا اكثر ماصاير..استغفر الله العظيم ماتخلنيش نقول دوة ماتنقالش..
ايمان:حاول تتخطى وتعيش حياتك زي قبل..
ابتسم بتهكم وقعد ساكت..
ايمان:بيقعد بالي مشغول عليك..
قاللها:لالا فوتيني ماتقعديش تتصلي بيا بعدين ودرهيلي كبدي ماصدقت افتكيت منك ومن فلسفتك..
قاللها بإبتسامة زعل مصطنعه..
/غير جيت اكبر مني راهو ضربتك..
ضحك ضحكة خفيفه وهي ابتسمت وناضت وقبل لتخش طبطبت ع ظهره بمواساة لكن هالطبطبة مقدرتش تسلي نفسه حتى شويه...
🍃🍃🍃
وتزيد تبعد المسافات ويستمر الدوران في نفس الفلك..
مع راجل هالمرة الرابط اللي بينه وبين طوبى يختلف عن البقيه..
هالراجل قاعد في شاليه ليه ع البحر في احدي الدول الاجنبيه..
متمدد ع كنبه طويله وراقد بالنوم لكن في عز نومه الهني يزوره منام وهو اللي قليل النادر مايشوف احلام في حياته بعد ماعاش فترة مايشوفش غير في الكوابيس المرعبه من تأثير المرحلة الصعبه اللي عاشها وقتها.
☄فهالمنام..
شاف نفسه في مكان مألوف بالنسبه ليه بس مش قادر يحدد شن يكون..
كان يمشي فيه..يخش من جهة ويطلع من جهة تانيه لعند ماوقف في دار معالمها مش واضحة كل اللي شافه منها سرير فقط..
قدمله وهو يشوف في حد راقد عليه..
وقف قدامه وهو يتمعن بالنظر في الشخص هدا..
بدت ع وجهه ملامح الفجعه لما عرف هويته!
كانت حبيبة عمره وجرح قلبه اللي قاعد ينزف لليوم..
وهو يشوفلها لاحظ الدم ينزل من عيونها المغمضات وفمها المسكر وقعد ينزل وينزل..ينزل بغزارة لعند ماغير لون السرير الأبيض للأحمر..
مرر نظره ع جسمها شاف عند صدرها طفل صغير راقد ع بطنه والدم ينزل منه حتى هو..
خاف هلبه..ومن خوفه لف وبيهرب من الدار لكن وقف في مكانه لما سمعها تنادي فيه..
"مختار"
التفت بيشوفها لقي السرير فاضي لكن الدم قاعد معبيه دب في قلبه رعب خلاه يطلع يجري من الدار وهو يجري هارب مازال يسمع فيها تنادي فيه..
"مختار"
☄فاق من نومه وهو يشهق وكأنه طالع من وسط غريق..
ناض قعمز وقعد يشوف حواليه بفزع ويسمع في صوت حركة امواج البحر..
كان يتنفس بسرعه من الخوف...بلع ريقه وقال..
/ولدي..
وينوض بسرعه يخش داخل وهو يجري شاف هاتفه لقاه محطوط ع الطاوله مشاله وخداه ع طول اتصل بطوبى..
🍃وطوبى فهالوقت كانت سهرانه ترقد في علي بعد مادارتله حليب وغرفه جنبها تسمع فيها..
طوبى بحزن وضيق..
/عفستلكم في المشية للعرس..
غرفه:بالنا في عراس ياطوبى!
قالتلها:كان خاطركم فيه لكن في جرة همي اني قعدتوا..
غرفه:مشينا امس ساد وبعدين كيف تبينا نمشوا نهيجوا وانتي هدا حالك؟
طوبى:ماصار شي ياغرفه مشكله وتو تنحل ان شاء الله، غدوة بتمشوا للكسوة ونهار السبت بتمشوا لحفلة الدخول بالله عليكم..
غرفه بضيق:شن تقولي ياطوبى بس!
قالت:خايفه من فردوس تولي في كلامها ياغرفه نبيها تسافر وهي مطمنه..
تنهدت غرفه بضيق وقعدت ساكته..
وطوبى ماكانت تشوفلها بضيق غيرت نظرها لقاته راقد ارتسمت ع وجهها الحزين ملامح ابتسامه خفيفه لكن سرعان مااختفت هالابتسامه لما سمعت صوت رنين هاتفها وقالت..
/اكيد عبد القيوم..
غرفه:مالاش هلبه مسكر منك!
طوبى بضيق:بالسيف..
حطت علي جنبها بعدين خدت هاتفها من جنب المخده وين شافت المتصل عقدت حواجبها وقالت..
/مختار..
فتحت الخط وقبل لترد جاها صوته الخايف وهو يقول..
"ولدي وين"
طوبى بإستغراب:راقد جنبي..
"صوريه وابعتي الصورة توا"
ونهي المكالمه..
نزلت الهاتف وهي تقول بإستغراب..
/مش طبيعي!
غرفه:خيره بلاه!؟
طوبى وهي رافعه الهاتف قباله علي بش تصوره قالت..
/قالي صوريلي ولدي..
ويرجع يتصل بيها مرة تانيه نزلت الهاتف لقاته متصل فيديو فتحت الخط ووجهت الكاميرا لعلي وهي تقول..
/هاه شفته توا تريحت؟
"وريهولي زين نبي نشوفه كله"
غرفه تعجبت منه..
وطوبى كذلك مررت الكاميرا ع علي وقالت..
/خيرك انت شن صايرلك!؟ حلمت بيه؟
تنهد بعدين قال..
"ايه شفت حلم مانبيش نحكيه"
وجهت طوبى الكاميرا لنفسها وقالت..
/تعوذ من الشيطان..
غرفه قالت بصوت منخفض..
/بختفي هو بعدين..
طوبى في عز همها كانت حتضحك لكن شدت روحها بقوة..
"اعوذ بالله من الشيطان الرجيم..المهم زي ماقتلك غدوة بتجي امينه تاخده"
هزت راسه وقالت..
/تمام..
"تصبحي ع خير"
طوبى:وانت بخير..السلام عليكم..
فصل المكالمه ع طول من غير مايرد عليها..
مطت شفايفها بملل ونزلت هاتفها تحت..
غرفه:امينه هادي الشغاله المصريه؟
التفتت وقالت؛مش شغاله قولي مدبرة منزل..
غرفه؛جو الرسومات هدا ماعنديش فيه اللي نعرفه انها شغاله هو هدا..
طوبى بضحكه:ع كيفك ياحنه..
ضحكت غرفه وطوبى ضحكت معاها ويرجع يرن هاتفها
غرفه:كان طلع هو ابعتيله ولده في رساله..
طوبى شافت المتصل وقالت بضحكه..
/عبد القيوم..
غرفه:هي مالا خل نوض..
ناضت غرفه ومشت طلعت من الدار وسكرت الباب..
وطوبى ردت ع راجلها وهي تقول..
/السلام عليكم..
"وعليكم السلام..مازلتي مارقدتي؟!"
طوبى:كنت نرقد في علي بعدين اتصل بيا مختار ينشد ع ولده..
"حكتيله!؟"
طوبى:وعلاش بنحكيله!؟مختار زيه زي الجالي بالنسبه ليا ولو عرف وفكر يساعد مش حيدير حاجه لوجه الله،الله الغني عنه..
"كل مالك تزيدي تعجبيني وتخلي فيا نهيم فيك اكثر واكثر"
ابتسمت من قلبها..
"نعدوا بكرا الصبح للخمس!؟'
طوبى بخوف:لالا انسى المشيه غادي الفترة هادي..
"كيف تبينا نقعدوا كارسين خوف منه الحلوف هذى!؟"
طوبى:حبيبي بالله عليك معاش تفكر بمشاعرك وخليك زي مانعرفك عاقل وحكيم..
"لاحكيم لامراجع..مع السرافه هذى مايمشيش العقل هذى يبي واحد هبل كيفه يتفاهم معاه"
حطت طوبى يدها ع خدها وقالت بصدمه..
/شن اللي تقول فيه هدا يانهاري الاحرف!!
"عين العقل..تبيني نخليه يفهم اني خايف منه بيش يدير مايبي الوسخ هذى!؟ "
طوبى:ياودي ماقلتش هكي..غمضت عيونها بعدين فتحهم وقالت..عبادة حبيبي ماترعشنيش بالله عليك..
تنهد بعدين قال..
"باهي خلينا نعدوا مجموعه مع بعضنا انا تو نعزم العيله ع زردة غادي ولانقولك زوز نديروا وحده ع البحر والاخرى في المزرعه.."
سكتت طوبى وهي تفكر..
"ماتفكريش ياقلبي قولي تم..هي اختك بتسافر يوم الاربعاء خلاص نعدوا الاحد الصبح ونروحوا الثلاث الصبح"
تنهدت بعدين قالت..
/باهي نشوفهم ونرد عليك..
"انا بنحكي مع عزيز وحسين انتي ريحيلي روحك ماديري شي"
ضحكت وهو لما سمع ضحكتها قال..
"نموت عليها وعليك"
بمزح قالت..
/من هي اللي تموت عليها!؟
"مرتي التانيه"
سكرت في وجهه الخط وقعدت تشوف للهاتف بإبتسامة غيظ وغيرة..
وبعد لحظات جتها رساله منه فتحتها طول وبدت تقرا فيها..
( لـو كـان اتصيـر فالـدنيــا عجـايـب
اعـــرف راك مــا غيـــرك غـــلا
انت الــروح حـاظـر و الا غـايــب
مـا ننســاك لـو ننسـى الحيـــاه
افـداك العمـر و فـداك الصعـايـب
بـلاك العمــر مـا يعــرف زهـــا
انكـانـك غبـت يـا عــز الحبـايـب
قلبــي ايمـوت و يـديــرو عـــزا
تبيـك العيـن فـي وقت الشدايــد
تمسـح دمعها كـانــــه جـــــرا
يفنـى الكــون و اطــول المـدايـد
غيـــر غـــلاك مـا يلــزم غــــلا)
دموعها وهي مبتسمه بألم بعدين قالت..
/ياربي ماتوريني فيه مكروه..
🍃وفي غيرها يدعيلها هالدعاء في كل لحظه ومن كل قلبه المليان حب ليها وخوف عليها..
قلب امها الروحيه سدرة المنتهى اللي اصرت تخلي جنه تبات عندها ورقدت جنبها ع السرير وخلت عمها يرقد فوق فراش ع الأرض..
وهالحال كان زايد خوف المهدي حس ان اللي يدير فيه الجالي حيخلي ارتباطه بيها ع المحك..
يعرف سدرة كويس مستعده تبيع الدنيا ع خاطر اهلها يعني لو صار والجالي آذى طوبى مرة تانيه ممكن هالمرة حتكون النهايه الحقيقيه بينه وبين وسدرة حتى لو كان في بينهم رابط قوي زي اللي بين الجالي وطوبى..
🍃واريج نسخة مصغرة عن خالتها مع اهلها ماتعرف حد..
وهالتخوف حكت عنه نسرين لسميره في صباح يوم الجمعه وهما يشربوا في القهوة في الكوجينه..
سميرة:وشن دخل نضال والمهدي في عبيتر الجالي اللي حتى بوه محرم عليه يخش الحوش..
نسرين بخوف:باهي كان لاقدر الله الجالي دار حاجه في طوبى شن بيكون موقفهم حطي نفسك في مكانهم وقوليلي!؟
سميرة بضيق:والله خايفه نقول كلام يزعلك يانسرين..
نسرين بأسف وحسرة..
/عارفاتك شن تبي تقولي لكن اني بنقول ربي يبعده ويلهيه بحاجه تنفعه وتصلح حاله ويكفي طوبى وخوته شر اعماله..
سميرة تنهدت بقلق وقالت..
/آمين..
🍃🍃🍃🍃
"جمعه مباركه بش مهندس"
الجالي وهو يتمشى عالشط رد ع اللي يكلم فيه هاتفيا وهو يقول.
/جمعتك ابرك استاذة امتنان شن حالك وحال الاسرة..
"الحمد بش مهندس شن حالك انت وشن اخر المستجدات".
وقف ووجه نظره للبحر وهو يقول بألم مخفي..
/صارلها زي ماتوقعت بالزبط اول ماشافتني جتها نفس الحاله..
"كويس..طبعا لازم تنتشر بين الناس قصة انها مصابه بالسحر وحاولت الانتحار بسببه وزي ماقتلك لازم تجيب مايثبت محاولتها للأنتحار زي مافهمتك قبل مدام حاولت الانتحار اكيد اسعفوها لمصحه او مستشفى والمكان اللي اسعفوها فيه اكيد حيكون عنده ما يثبت"
الجالي:الموضوع هدا بسيط وساهل نقدر نجيبه بسرعه..
"كويس..انت هكي ولاهكي حيحكملك القاضي بالحضانه لكن اللي نبوه منه زياده ع هكي انه مايعطيهاش حتى حق زيارة بنتها ولو صار واطلقت ماترجعلهاش الحضانه وهكي ممكن تكون ليك فرصة تانيه معاها"
ضحك وقال:مادلتني عليك خديجه من فراغ.
"ايااه قداش ليا عليها بالله شن اخبارها"
الجالي:عايشه في خيار خيرها..
"سلملي عليها".
الجالي؛يوصل..نرجعوا للقضيه استاذة اني نبي منك خدمه بعد نقولك عليها تونخبرك امتى ديريها..
"قول شن هي كان نقدر عليها مش حنقصر"
ابتسم ع جنب وهو يشوف للبحر بعدين قال..
/لاتقدري عليها بإذن الله تقدري..
