#طوبى "جنة طوبى"
#جمان_فريد
#الجزء_115"الأوراق المتساقطة"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
قال شَيخ الإسلام #ابن_تَيمِيَة -رحِمَه اللّٰه- : 🎙️
إِذَا نَاجَى العَبدُ ربَّهُ في السَّحَرِ و استَغَاثَ بِهِ و قَالَ :
"يَا حَيُّ يَا قَيُّومُ لَا إِلهَ إلَّا أنتَ بِرَحمَتِكَ أَستَغِيث " أَعطَاهُ اللهُ مِنَ التَّمكِينِ مَا لَا يَعلَمهُ إلَّا اللهُ.
📜 مجموع الفتاوى (242/28) 🍂
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لكي تنجو في هذه الحياة عليك أن تكون خفيفاً،
ألا تتعلق بشيء ولا بأحد.
– أحلام مستغانمي🍃
________________________________________
نضال..
اللي كان في يوم من الايام الشاب"الملعب"..
ياما علق قلوب تعشمت فيه وصدقاته ودار مع صاحبات هالقلوب اللي مايرضاه لخواته ولأهل بيته..
ومع الوقت دفع ثمن الذنوب غالي جدا وزي ماحرق قلوب قلبه انحرق وتعذب...
نضال الحالي..
اكثر شي نادم عليه في حياته هو ماضيه اللي يبغضه بغض شديد ومايحبش يتفكره ماضي استحل فيه اعراض خوته المسلمين ورضي عليهم مالايرضاه ع نفسه..
اللي شافه نضال في جناح خوه الجالي فكره بهداكا الماضي البغيض..اثار غصبه..خلا دمه يغلي في عروقه..
بدون وعي منه مشي طول للدروج ونزل يجري ولما وصل لأخرهم بصوت عالي كله غضب نادى..
"نسرين"
صوته وصل لخوته عمر والمهدي وهما في المربوعه..
الزوز ناضوا طلعوا بسرعه لين وصلوا للمستراح اللي يجمع بين بيبان الصاله والكوجينه والدروج..
شافوا نسرين راكبه تجري ورا نضال..
وبدون تردد لحقوهم يجروا..وقعدت سميره واقفه فم باب الصاله وهي في قمة القلق..
نفسه القلق اللي سيطر ع مغليه اللي كانت متكيه في دارها تراجي في حد يخش عليها تبي تعرف شن صاير..
عكسهم خديجه اللي كانت فدارها رايحه في النوم..
🍃🍃
وصلت نسرين للجناح وهي تقول بخوف شديد..
/شن في !؟
وتشوف مايجمد الدم في عروقها ويخليها مش
قادرة تتحرك..
نضال وهو واقف جنب الباب قال بغضب..
/شن معناه هدا يانسرين!؟
هو سأل هالسؤال ويوقفوا المهدي وعمر في الباب ويشوفوا ماصدمهم بقوة...
المهدي من غير شي كان عايش حالة توتر وقلق وهو يفكر في سدرة..
لما شاف اللي شافه عقله غاب بالمرة وبغضب الدنيا كلها مشي يجري نزل من الدروج وهو متجاهل نداءات خوته عمر ونضال...
🍃🍃🍃🍃🍃
فارده كف يدها اليمين وتعقد ع اصابعها بالتسبيح..
كانت تبي تهدي من روعها اللي تسببلها فيه كلام سدرة وصوت سدرة واسلوب سدرة..
اول مرة تكلمها هكي..اول مرة تواجه غضب سدرة الجامح هدا..
مازعلتش منها ابدا..لكن خافت من زعلها تعرف زعل سدرة كويس واعر وقاسي...
صوت رنين هاتفها بنغمة اتصال"ماسنجر" طلعها من الحاله اللي كانت فيها خلاها توقف تسبيح لما شافت اسم المتصل حست بشي من الراحه..
خدت نفس..وفتحت الخط وردت..
/خالتي سالمين..
"بيبا ياقلبي وينك وينك معقوله يعدي العيد وماتعيدي عليا"
طوبى بشي من الاحراج..
/سامحيني والله مرضت شويه الفترة اللي فاتت..
"مرضتي!؟ ماقالتش سدرة!"
طوبى:شكلها ماتبيش تشغلك..
"راك تقولي جاتك الكورونا"
طوبى بإبتسامه..
/ع الخفيف حالي توا ولى باهي الحمد لله..
"ناعليا حبيبتي من وين جاتك وكيف درتي معاها وجنونه كيف درتي فيها!؟"
خدت نفس وقالت..
/مش قاعده معاي اني مش في حوشنا..
"كيف قصدك قاعده في مركز عزل!؟"
طوبى:لا..قاعده في..حوش خوي مختار..
صمت تام..معاش سمعت حتى النفس..عقدت حواجبها بإستغراب وقالت..
/خالتي سالمين!
لارد من سالمين..
بعدت الهاتف ع بالها الاتصال فصل لقتها قاعده ع الخط..
رداته لوذنها وهي تقول..
/خالتي الو..خالتي..
"ليش قاعده عنده!؟"
نبرة صوتها كانت فيها رعشه وهي تسأل فيها زاد استغرابها ردت عليها تقول كذبا..
/هو جابني عنده بعد مرضت...
رجعت سالمين التزمت الصمت..
طوبى:والله راد باله عليا كويس..
"باهي باهي حبيبتي ربي يشفيك ويعافيك ياقلبي..ايه بيبا
قولي من عندي!؟"
طوبى بإبتسامه تساؤل..
/مني!؟
"خالتك كاريمان"
ضحكت وقالت..
/يااه خالتي كاريمان..روحت خلاص!؟
"ايه خلاص راجلها كمل خدمته في البحرين"
طوبى بإبتسامه..
/وشن فرحانه اللي روحت!؟
"اها بطير من الفرحه قالت ليل نهار وانا ندعي يارب خلينا نردوا لبلادنا شقني الغربه والارياف "
طوبى بضحكه..
/الحمد لله استجاب دعائها..
"اهي مصادري توا..كاريمان..طوبى.."
ابتسمت طوبى وهي تسمع في "كاريمان" تقول..
"بيبا بنتي هاتي الهاتف هاتي..بيبا ياام العيون الحلوة"
طوبى بضحكه..
/خالتي كاريمان عاش من سمع صوتك...
🍃🍃🍃🍃
مقعمزة في الصالون ..ضامه كفوفها لبعض وهي تهز في رجليها الزوز..تستنى في نتيجة اللي داراته وتدعي في داخلها يصير زي ماهي متوقعه..
لحظات..وسمعت دق قوي يفجع ع باب الشقه..ابتسمت بنصر لما عرفت انها وصلت للي لمرادها..ناضت رسمت ع وجهها ملامح الفجعه ومشت بتفتح الباب ع طلعة راجلها من دار النوم وهو مفجوع يقول..
/يالطيف!؟..
سبقها يجري للباب..
وصل فيه وفتحه ويشوف قدامه خوه الكبير اللي جايه بغضب شديد خلاه يدفعه بإيديه الزوز ويدخله داخل وهو يقول..
/قولي..كنت تكذب لما قلت تعالجت!؟ المصحة اللي كنت فيها ضحكوا علينا!!؟
الجالي بفجعه:شن تقول انت شن جاك!؟
عمر وهو يحاول يشد المهدي..
/هدي يامهدي مش هكي..
دفعه عنه وهو يقول بعصبيه..
/مالا كيف قول..كيف!..مستوعب اللي شفته..مستوعب التافه هدا شن دار!؟
الجالي بخوف وعصبيه..
/شن درت شن!!؟
قربله المهدي وشده من ياقه التيشرت متاعه وقال بغضب شديد..
/ياكلب ياكلب..شن يديروا تصاوير بنت الواعر في جناحك ياكلب..
بلع ريقه من الصدمه ماعرفش شن يقول..
ونجاة وراه تتفرج عليهم وهي تتصنع في الخوف والفزع لما سمعت اخر ماقال المهدي شهقت وقالت..
/كيف!؟
المهدي وهو يهز في الجالي قال..
/شن مازال تبي في راسك ياتافه لوين تبي توصل ياسافل يامنحط..كل عمله ديرها احرف من التانيه وكله مشيناه ووقفنا معاك وساعدناك..بدال ماتصلح من نفسك زدت في الفساد والبلي..
نفض الجالي ايديه خوه بقوة عنه وقال..
/امشي اطلع برا امشي مانبيش نغلط فيك..
المهدي كاد يفقد عقله من الغضب والعصبيه قال..
/شوف الكلب شوف..ليك عين ترفعها فيا وتفتح فمك! لكن اني الغالط نستاهل اني اللي دسيت عنه ووقفت معاه وقعدت نرقع في عمايله اللي تحشم..اللي زيك انت بعد العبيتر اللي داره ومازال يدير فيه مفروض يقعد بروحه معاش نعرفوه ولايعرفنا..وهالشي مفروض صار من اول ماعرفنا بعملتك مع هادي..
نجاة بحده؛احترم نفسك وتكلم كويس خوك تزوجني زواج شرعي مادرتش معاه حرام..
المهدي بنفاد صبر وازدراء..
/ماعنديش معاك كلام انتي..
الجالي وهو يشوف لخوه بغل
/خشي داخل ..
نجاة بعصبيه..
/لا مانيش خاشه..وجهت كلامها للمهدي وهي تقول..احترمتك بمافيه الكفايه وقلت سلفي الكبير معليشي مشي وفوتيله حتى مرتك وصلت فيا ومابيتش نرد عليها ع خاطرك انت لكن لعند هني وياسر..
التفت المهدي لعمر وع وجهه باديه ملامح الازدراء..
عمر:نجاة خشي داخل..
الجالي بصوت عالي..
/بري خشي قتلك..خشي..
هي رمقت المهدي بنظرة كره ومشت خشت داخل..
شاف المهدي للجالي واشرله بسبابته وهو يقول..
/من بعد اللي ريته جنة تنساها معاش تفكر فيها بكل خلاص..
ضيق عيونه وقال تهكما..
/نعم نعم!؟
المهدي بصوت عالي..
/اللي سمعته ماتخلنيش ندير شي مانبيشي يالجالي..
الجالي بغضب..
/دير اللي بديره اعلى مافي خيلك اركبه بنتي مش مخليها لوتطبق السمي ع الوطا بنتي مش مخليها..
المهدي بعصبيه..
/لابتخليها غصب عنك بتخليها..
الجالي بتحدي..
/مش مخليها مش مخليها..
عمر حس بإن في شي حيصير لاتحمد عقباه..
شد المهدي وقال..
/مهدي خلاص يامهدي..اطلع انت وخليني نتفاهم معاه..
🍃في هالوقت..
خش محمد شنيبه للحوش مروح من حوش خوه سمع اصوات دوشه وعراك..شاف للباب الدخلاني لقي سميرة واقفه وع وجهها باديه عليها ملامح القلق قاللها..
/شن في!؟
سميرة بخوف..
/برا لحق ع الولاد في شقة الجالي..
هو طول مشي بإتجاه الشقه وسميرة لحقاته..
🍃المهدي وهو داهش بعصبيه وغيظ حط صبعه ع انف الجالي..
/تو نخليك تخليها غصب عن خشمك..
تعامل المهدي اللي كان فيه اهانه وانتقاص للجالي وصله لأقصى مراحل الغضب..نزل يد خوه بقوة ودفه عنه وقال..
/برا اقلب وجهك..
والمهدي معروف عنه لما يسيطر عليه الغضب معاش يوعى لشن يطلع من فمه ولاشن يديروا ايديه قدم للجالي وصفعه بقوة...
عمر بخوف؛مهدي!
والجالي هالمرة وبدون تردد رد الصفعه لخوه بأقوى ماعنده..
عمر جمد من الصدمه...
وخوته نسرين ونضال اللي قعدوا واقفين في الدروج لما احتد النقاش ركبوا في اللحظه اللي صفع فيها المهدي الجالي لكن صفعة الجالي للمهدي هي اللي صدمتهم وهالصدمه زادت لما شافوا بوهم في لحظه قدامهم..
شاف المهدي وهو حاط يده ع خده وع وجهه وباديه ملامح الوجع عرف ان قلبه اللي اجهده الانفعال تعب..
من خوفه الشديد عليه قال للجالي بغضب..
/معاش نعرفك تقعدلي في حوش عليا الطلاق من امك معاد قاعدلي في حوش..
🍃🍃🍃🍃🍃
"سلمي ع عمي جبريل"
سالمين:يوصل حبيبتي المهم يابيبا تفطني لروحك..
"حاضر حاضر"
سالمين:نجك ليا ياقلبي ربي يحفظك من كل سو بالسلامه حبيبتي..
"بالسلامه خالتي"..
نهت سالمين المكالمه وهي تتنهد بألم..
كاريمان:سلومه كنك!؟
☘كاريمان بنت خالة سالمين وهي وياها اكثر من خوات اصغر من سالمين بسته سنوات متزوجه وكان عندها ولد توفى في عمر العشر سنوات ومادارتش صغار غيره☘
سالمين ودموعها في عيونها
/جت بين عيوني امها..
كاريمان بإبتسامه حسرة..
/وردة الله يرحمها ماعرفت في حياتي مراة بطيابتها وكبر قلبها زي النسمه مرات مرات تخطر عليا ونتفكر كيف كانت تبكي مع طوبى لأنها ماتقدرش ترضعها..
سالمين بإبتسامه ألم..
/وخديتها انتي رضعتيها..
كاريمان بعيون مدمعه وابتسامة حزن..
/رضعتها مع رائف الله يرحمه..
سالمين؛الله يرحمه..
ع جية كنة سالمين بسفرة الضيافه ضيفت كاريمان وهي تسمع فيها تقول بنبرة كره..
/الغضيب هذكي معاش جاهم بعد عزا لطفي الله يرحمه!؟
سالمين بنفس نبرة الكره..
/معاش خلاهم..شافت لكنتها وقالت..حطيها عندك..
حطت السفره ع الطاوله ومشت الكوجينه وهي تسمع في كاريمان تقول..
"كيف كيف!؟"
🍃خشت كنة سالمين للكوجينه اللي كانت فيها سلفتها قالتلها..
/عرفت من كانت تكلم عمتي بنت عيت الواعر..
سلفتها قالت..
/اها..هذى ليش بكت!
قالتلها؛توا سمعتها تحكي مع خالتي كاريمان ع ولدهم مختار..
سيبت اللي في يدها وقالت..
/مش هذى هو نفسه اللي سرق حوش عمي وحيدا مع عوض وعلي ولاد عيت******!؟
هزت راسها وقالت؛اها هو نفسه..
قالتلها:امي حكتلي شويه عن القصه هذي وقالت انتي حاضرتيها..
ردت عليها تقول..
/ايه كنت في حوش خالتي وقتها امي مسكوها في المستشفى بعد جابت خوي المنتصر تعبت واجد..
بفضول قالت..
/باهي شن صار بالزبط!؟
"وين العداله يابنات!؟"
بإستعجال قالت..
/مش وقته توا بعدين نحكيلك...
🍃🍃🍃🍃🍃
مروح بطريقه للحوش..يسوق في سيارته وع وجهه ابتسامه حلوة مافارقتاش من لما طلع من حوش خوها...
نبضات قلبه قاعده متسارعه وكأنه مازال يشوف فيها يشوف في عيونها الحلوه الحايرة اللي هالقلب معاها من اول لحظه شافهم فيها...
ماحسش بروحه الا وهو خاش لشارع القهوة..
وين قرب يدرس قدام الحوش تبدلت ابتسامته بملامح الاستغراب لما شاف الجالي طالع مع نجاة وصغارها وهما رافعين شناطي..الصغار كان يبكوا وامهم تهزب فيهم..
فتح الباب ونزل ومشي بإتجاه الحوش وهو يفكر ف اللي شافه حاليا..
🍃وفي حوش شنيبه..
تحديدا المربوعه الدخلانيه..
وين ماكان موجود المهدي وحواليه صغاره وخوته وبوه ومرت بوه..
المهدي بشي من التعب..
/حتى اني غلطت وكثرتها عليه..
محمد؛شن مادرت تقعد خوه الكبير..
المهدي بضيق..
/لكن سامحني فيها يابوي اللي درته غلط هكي قلبه بيزيد يغلاظ..
محمد؛خليك من هدا توا وقولي شن اللي صار بينك وبينه علاش تعاركتوا؟
نسرين بلعت ريقها بخوف ودموعها ينزلوا..
وخوتها كانوا يشوفوا للمهدي بضيق..عكس ولاده وبنته اللي كانوا مع خوفهم ع بوهم في حالة غضب شديد ع عمهم..
المهدي:موضوع تافه ماتوجعش راسك بيه..
حرك راسه نفيا وقال..
/لالا في شي كبير صاير اللي خلاك تطلع عن طورك هكي..
تنهدت سميرة تنهيده ضيق صوتها مكتوم..
شافت لنسرين بأمتعاض لما سمعتها قالت..
/عراك نساوين وصل للرجاله..
شافولها كلهم ماعدا المهدي اللي قعد مثبت نظره ع بوه وقال..
/زي ماقالت وهو قلل عقله وقال كلام سفيه ماتحملتاش..
شد نضال ع قبضة يده اليسار بقوة من الغيظ..
هز محمد شنيبه راسه يمين ويسار اسفا وقال..
/لاحول ولاقوة الا بالله..وقف ع حيله وقال..الله لايسامح الساعه السودا اللي لمت بينا وبين نجاة هادي..
ومشي وهو متنرفز طلع من حداهم ولما جت مرته بتلحقه وقفها المهدي لما قال..
/ماتقولي لحد خالتي..
هزت سميرة راسها موافقة ومشت لحقت راجلها..
المهدي:محمد خالتك سدرة ماروحتش!
محمد المهدي:ايه..
هز المهدي راسه بعدين قال..
/خود خوتك وروحوا الشقه..
سدرة بنته بقلق..
/حالك باهي بابا؟
المهدي:ايه يابابا ايه بري مع خوتك..
محمد؛تبي اي شي كلمني طول..
هز المهدي راسه بصمت..بعدين خدي خوته اللي كانوا مستائين هلبه وطلعوا كلهم من المربوعه..
ومجرد ماطلعوا نسرين سكرت الباب وشافت لخوتها وهي تقول..
/شن بيصير توا!؟
المهدي:وضع خوك توا احرف من قبل..
عمر:لتوا مصدوم ومش مستوعب هدا تعالج من حالة وركباته غيرها..
نضال بقلق وضيق..
/هدا بيقعد في جرتها مش حيخليها في حالها والله اعلم توا بعد انكشف شن بيدير..
حل عليهم صمت مخيف وهما يفكروا بعدين نسرين قالت..
/بتقول لسدرة!؟
المهدي:لا..اللي فيها سادها..
عمر:من رايي خبر صاحبة الشأن بروحها طوبى عاقلة وتعرف تتصرف..
نضال بتفكير؛حتى اني نقول هكي..
نسرين؛معاكم..هي بروحها من لما بعتلها الالبوم شكت انه داير بيه شي..
عمر؛معناها انتي خبريها..
نسرين شافت للمهدي وقالت..
/شني مهدي!
شافلها لحظات بعدين هز راسه بالموافقه...
🍃🍃🍃🍃
"روح من حوش طوبى طول لداره وسكرها عليه"
صفيه وفي تتكلم هاتفيا قالت بقلق..
/زعمها شن صار!؟
"الله اعلم لكن شكله شي كبير"
خدت نفس بعدين قالت..
/ربي يستر وخلاص..شن مايصير بنتي كلميني..
"حاضر ماما..سلام"
صفيه؛بالسلامه..نهت المكالمه وشافت لأريج وغرفه وهي تقول..قالت جدكم علي روح من حوش طوبى طول خش لداره وسكرها عليه..
اريج؛واني توا توا شفت خالي المحجوب من فوق السطح كيف طلع من غادي..
غرفه بتفكير..
/مش عارفه علاش حاسه انها بتسألهم عن شي يخص اللي صار مع طوبى..
اريج؛وشن خلاك تتوقعي هكي!؟
غرفه؛مافيش غير هكي من لما خدت المهدي واني نراجي في اليوم هديكا العقربانه مش حتقعد ساكته..
صفيه بإزدراء:الرزيه نجاة!؟
غرفه؛ايه..
🍃نجاة اللي نجحت في الوصول لهدفها الطلعه من حوش عيله..صح اللي صار فوق توقعها بس في النهايه وصلها لمبتغاها..
هي توا في السيارة مع راجلها وصغارها متوجهين لشقتها اللي كاتبها الجالي بإسمها..
والجالي جنبها يفور ويغلي..اصوات بكاء الصغار ضغطت ع اعصابه وخلاته يهزبهم..سكتوا من خوفهم وامهم اللي كانت خايفه زيهم قاعده تظاهر بالثبات ومحافظه ع هدوئها بقوة..
🍃الهدوء اللي فقداته سدرة بعد ماعرفت المخفي عنها..
يقولوا ماخفي كان اعظم..واللي درقوه ع سدره طول هالمده كان اعظم من اللي عرفاته..
هي توا راقده في دار بوها..ع السرير متكمشه في بعضها وتبكي بالعبره..بألم..وبخوف..
🍃🍃🍃🍃
مرت هديكا الليله ع طوبى وهي راقده في سريرها لكن مش بالنوم..كانت تفكر بحزن وضيق..
في سدرة...ومختار...
رجعت للماضي وحاولت تتفكر كل مشهد يخص مختار وقصته..غضب لطفي عليه..حقد سدره عليه..كره باقي العيله لسماع سيرته بالذات جدها..
فكرت بعدين ف اللي صار بينها وبينه..هني عاشت مجموعه مشاعر متضاربه خلتها مازال مش قادره تحدد موقفها منه..
طلعت فجأة من دوامة افكارها لما سمعت صوت سينفونية موسيقيه..ناضت قعمزت خدت سماعات البلوثوت وحطتهم في وذانها وفتحت سورة من القرآن منزلتها ع الهاتف وقعدت تسمع فيها...
🍃🍃
فالوقت اللي رقد فيه المهدي سدرة وغطاها وهو يشوفلها بحزن..
لما روحت كانت حالتها صعبه مش قادره تتكلم لكن دارتلهم
عشاهم ورتبت الحوش وصلت صلاتها وفي الاخر خشت للدار وسكرتها عليها وقعدت تبكي بروحها بصمت وهو خلاها ع راحتها لين خش عليها لقاها راقده ودموعها تنزل..
تنهد بألم وقال..
"قداش مازال بتتحملي ياسدرة.."
🍃🍃🍃🍃🍃
تاني يوم..
الساعه 8:30صباحا..
كانت طوبى واقفه مقابله شباك الدار اللي قاعده فيها وهي تردد ف "الصلاة على النبي"..
دق الباب التفتت شافتله وهي تقول..
/خش..
انفتح الباب وخش..
كان مبتسم ابتسامه باهته وهو يقول..
/صباح الخير..
هي ركزت ع ملامح وجهه وقالت..
/صباح الخير..
حط ايديه في جيوبه وقال..
/اليوم احسن..
هي قالت..
/ايه الحمد لله لكن قاعده مانشم في شي ولانتبنن في شي..
مختار؛قتلك مازال تبي وقت ع ماترجعي زي ماكنتي..تنهد وقال..تطلعي معاي للبحر؟
سكتت شويه وهي تفكر بعدين قالت..
/باهي..
مختار:خلاص ابدي وتي روحك..
ومشي طلع..
وهي خدت نفس بعدين مشت سكرت الباب وعقلها مابطلش تفكير..
🍃🍃🍃🍃
"كولوا واسكتوا معاش نبي نسمع حس"
هادي نجاة تخاطب في صغارها بقسوة بعد ماعطتهم فطورهم وهما مابطلوش اسئله...
"علاش طلعنا من حوش جدي""امتى بنروحوا لحوش جدي"
حمزة كان في حالة غضب..وخوته جوري ومعاذ في حالة حزن شديد..
طلعت من حداهم ومشت لدار النوم..
لقت الجالي مقعمز يقلب في قنوات التليفزيون بملل..
وقفت حداه وقالت..
/اتصلوا بيا جماعه المشروع وقالوا لازم نكونوا غادي الاسبوع الجاي..
شافلها برفعة حاجب وقال..
/وعلاش يكلموك انتي!؟
نجاة برفعة حاجب..
/تبيني نفكرك علاش!؟
عقد حواجبه بضيق ورجع نظره للشاشه..
نجاة؛وتي روحك الاسبوع الجاي ماشيين.
الجالي؛الصغار كيف بديري فيهم!؟
نجاه وهي جايه بتطلع..
/بنرفعهم لحناهم..
الجالي؛استني شويه..
وقفت وشافتله..
ضيق عيونه بتساؤل وهو يقول..
/ماعلقتيش ع اللي صار امس!؟
ابتسمت تهكما وقالت..
/وشن بنستفيد!؟..
غير نظره عنها للشاشه والتزم الصمت..
اما هي ضحكت ضحكة تهكم خفيفه ومشت طلعت من الدار..
🍃🍃🍃🍃🍃
"ضغطك راقي شويه جدي"
هاديه؛توا توا خداها حبة الضغط..
فكت اميمه الجهاز وقالت..
/شويه ويتعدل..
هو هز راسه وقال..
/باهي اطلعوا وخلوني نرقد..
عطاهم بالظهر وهو راقد ع السرير..
هما شافوا لبعض بضيق بعدين مشوا طلعوا من الدار وخلوه يعاني من صداع اول مرة يحسه قوي لهالدرجه وألمه زاده ع مابيه من اوجاع وآلام لاحصر لها...
🍃🍃🍃🍃
في الطريق..
كان يسوق وهي جنبه في حالة صمت..
هي تفكر وهو يفكر وولا حد فيهم قادر يبوح للتاني باللي قاعد يفكر فيه..
وصلوا للبحر..
درس قريب عليه وقعدوا مقعمزين في السيارة يتنفسوا في هوا البحر اللي انحرمت طوبى من انها تشم ريحته..
طوبى:والله ماحسيت بنعمة حاسة الشم الا توا..شن شكلها حياة لاليها ريحة ولاطعم!..
مختار:في اللي معاش يشوف في هالدنيا لالون ولايحس بطعم ولاريحه وهو مش فاقد ولا وحده من حواسه..
شافتله وقالت..
/قصدك انت هكي!؟
ماردش عليها.
هي قعدت ساكته شويه بعدين قالت..
"خاطري نعرف شن صار معاك زمان"
ابتسم تهكما وقال..
/علاش توا!؟
سكتت معاش عرفت شن ترد..
بنفس الابتسامه قال..
/فات وقته الكلام هدا خلاص..
طوبى بحزن وشي من الانفعال..
/مفروض مادسش الوجع مفروض كل شي مريت بيه حكيته طلعت اللي في قلبك من اول ماروحت من اول مرة جيت فيها للحوش ولاقيت سدرة..
ضحك تهكما وقعد ملتزم الصمت..
طوبى:لما دسيت زدت حقدت ونقمت ودرت افعال متأكده انك بينك وبين نفسك مش راضي عنها..
قعد ملتزم الصمت وهو مبتسم تهكما..
طوبى بحزن وأسف..
/لهالدرجة صعب!؟
شافلها بنظرة تساؤل..
هي وضحت سؤالها..
/اللي صار معاك صعب لدرجة مش قادر تحكيه!؟..
شاف القدام وهو عاقد حواجبه بضيق وهي تشوفله وتراجي في اجابته..
فتح باب السيارة ونزل ومشي وقف قدامها..
وهي قعدت معاه بعيونها..شافاته يمسح في دموعه وهو يوزع في نظره قدامه..
خدت نفس ونزلت من السيارة مشتله..
وقفت جنبه هو لف وجهه عنها..مدت ايديها وشدت يده بيهم..
هو سحبها بهدوء وحطها في جيبه..
بدت ع وجهها ملامح الحزن وغيرت نظرها للبحر..
مختار:نكره التصرفات هادي معاش ديريها معاي..
هزت راسها بالموافقه بدون ماتشوفله..
مختار:البنادم لما يتمكن منه المرض معاش ينفع معاه العلاج...
تنهدت بضيق وقالت..
/لاحول ولاقوة إلا بالله..
قعدوا الزوز يمرروا في انظارهم ع البحر..عيونهم كانت مليانه حزن...
هي كانت تتمنى لو تشوف منه اللي يخليها تعطيه فرصة تانيه لكن هو كل ماله يثبت انه مايستحقهاش..
وهو اللي كان مثقل بالذنوب وآلام ماضي بعيد مش قادر يتجاوزه ولاينساه..حالف انه مايكملش حياته الا وهو واخد بثاره من كل حد اذاه أوتسببله في الآذى..
مختار:غني هديكا الاغنيه..
مررت نظرها حواليها تأكدت ان االمكان فاضي تماما..ركزت بنظرها ع البحر وبدت تغني..
☘عصفور طل من الشباك وقلي يانونو..
خبيني عندك خبيني دخلك يانونو..
كانت تغني بصوت اصفى من الصوت اللي غنت بيه اليوم اللي قبله..نبرة الحزن بانت اقوى اثرت فيه لدرجة خلاته يدرق عيونه بيده ويبكي..
هي وقفت غني وشافتله..اشفقت عليه..قلبها وجعها قربت منه وضماته...
وهو كأنه ماصدق ضمها وقعد يبكي بالصوت يبكي بألم..
وهي طبطب عليه وغصب عنها دموعها نزلوا..
🍃خبيني عندك خبيني دخلك يانونو🍃
🍃🍃🍃🍃
"صار ماروحتش!؟"
اريج بضيق:ايه..
"تمام كان كلماتك قوليلها سدرة مسحاتك من حياتها"
وسكرت الخط في وجه اريج..
نزلت اريج التليفون وهي تقول بضيق..
/شكله اللي توقعتيه صح..
غرفه وهي تلبس في بنتها..
/شن قالتلك!؟
اريج:قالت قوليلها مسحاتك من حياتها .
لبست غرفه بنتها توكه في شعرها وهي تقول بأسف..
/لاحول ولاقوة إلا بالله..
خشت عليهم صفيه وهي تقول بضيق..
/مزاجي اليوم زي الزفت مش عارفه من الجو ولا من شنو!..
اريج:ايه اليوم الجو في طاعة الله يطبق الصدر..
تنهدت غرفه ورفعت بنتها لحضنها وبدت ترقد فيها..
🍃🍃🍃🍃
الساعه 6:30مساءا..
في الجنان..
هاديه مقعمزة ورا العاله وحواليها راجلها وبنته يهدرزوا وشيبانها مقعمز ع كرسي مقابلهم مايسمع في شي من كلام كان سرحان بفكره بعيد عنهم..
لحظات وحس بشي من التعب والوهن..بمساعدة عكازه ناض وهو يقول...
/بنخش نتكا شويه قبل المغرب وين يقرب وقت الصلاة نوضوني..
اميمه وهي مركزه ع ملامح وجهه..
/حاضر...
قعدوا معاه بعيونهم..لاحظت هاديه شحوب وجهه حست بالخوف..شعور الخوف زاد تقوا..
فتحت عيونهم ع وسعهم لما شافاته وقف فمكانه قالت..
/عمي..
حط يده ع صدره..بدت ع وجهه ملامح الوجع..
فزت اميمه وقفت وهي تقول بخوف..
/جدي!
ناض عبد المطلب وهو يرجف انفاسه تسارعت من الخوف وهو يشوف لبوه..
مشت اميمه تجري لجدها عترت في الكرسي دفاته وطيحاته وكملت طريقها لجدها وماإن وصلت فيه الا وهو طايح ع الأرض وعكازه طاح جنبه..
🍃🍃🍃🍃
يجروا بيه وهو ع الباريلا دخلوه غرفة الاسعاف والطوارئ ومعاه الدكتور خالد..
اميمه اللي كانت حتنجن تبي تخش معاهم لكن اسامه شدها وضمها وهو يقول..
/ادعيله يااميمه ادعيله..
اميمه وهي تبكي بهستيريا..
/هدا جدي جدي اني..نبي نقعد معاه..حول خليني..خليني..
تحاول تخلص نفسها منه وهو يضم فيها بكل قوته ودموعه في عيونه..
وفي نفس الممر كانوا واقفات ممرضات ودكاترة ومنهم هناء اللي وجع قلبها حال اميمه وقعدت تبكي معاها...
طلعت ممرضة تجري وهي تشوف لاميمه بوجع..
اميمه ببكي وفزع..
/شفت ريما كيف شافتلي يااسامه شفتها..
اسامه بألم..
/اميمه شدي حيلك خليك قويه زي ماعرفتك..
بصدمه قالت..
/شن قصدك بكلامك هدا!؟شن قصدك..لالا..لالا..
وبأعلى صوتها نادت..
"جدي"
🍃وخالد اللي كيف بدي بعمليه الانعاش لقلب الحاج علي سمع صرخة اميمه وهي تنادي ع جدها تألم هلبه لحالها..
عمره ماتمنى لمريض في هالحاله يطلع من تحت ايديه حي زي توا..
لكن للأسف..حانت ساعه الآجل..والقلب اللي وقف معاش رجعت دقاته..والروح اللي كانت ساكنه في هالجسد ارتفعت لخالقها...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
ومات الواعر الكبير..
الحاج علي الواعر..اقدم رجال شارع القهوة واكبرهم..
موته كان فاجعه مش بس لأهل شارع القهوة بل للمنطقه كلها ولكل من يعرفه في اي مكان في البلاد..
ومافيش من حينفجع فيه زي اهله وناسه..
سدرة كادت تفقد عقلها..المهدي ع قد ماحاول يهديها ماقدرش عليها..اثرت حتى في خديجه ومغليه وخلت عيونهم دمع...
وعمتها مطيره..مطيره بنته الوحيده اللي تعشق بوها لما وصللها شكري الخبر يحسابها ماتت بعده طاحت ومافاقتش الا في العياده وماسكتتش الا بالابرة المهدئه...
🍃وحال صفيه الى حد ما كان يشبه حالها بالنسبه ليها كان بوها...
غرفه واريج انهاروا..هاديه كانت تبكي بقهرة وحزن شديد..
فايزة وبناتها انفطرت قلوبهم ألما ع فراقه المفاجئ..
🍃فراقه المفاجئ اللي دخل ولده عبد المطلب في حالة صدمه..
وقهر عبد القيوم وخلاه ينقم ع دموع عيونه اللي مازالت رافضه تنزل وتهون عليه حتى شويه..وياوجع قلوب احفاده يوسف وفردوس وبنتها آلاء بعاد وفي بلاد غربه فجعتهم وحزنهم كانوا اضعاف مضاعفه..
🍃وياللي قطع قلب حسين ان جده حيندفن ومش حيمشي في جنازته حد..بسبب الكورونا...ولأنه للأسف كان مصاب بالكورونا..
اللي اكتشفوا بعدين ان اميمه مصابه بيها ومازال ماطلعتش عليها الأعراض..وهي لما عرفت خشت في نوبه بكاء شديد وحملت نفسها الذنب وهي تردد وتقول..
"اني قتلتك ياجدي..اني قتلتك ياحبيبي"
🍃🍃🍃
خش عليها وهي مقعمزه تقرا في القرآن من هاتفها..
قعد واقف يشوفلها بنظرات ألم حامل خبر ثقيل ع قلبه هو كيف بتتحمله هي..
حست بيه..وقفت قرايه وقعدت تشوفله..
ملامح وجهه خلت قلبها ينقبض سألاته بخوف
/ شن في!؟
ضم شفايفه داخل بأسف شديد بعدين قال..
/الحاج علي..توفى..
قعدت تشوفله بنظرات هو مافهمهاش..
بعدين نزلت عيونها لتليفونها ورجعت تقرا بصوت مسموع..
صوتها بدي يرتعش..وشويه شويه بدت تبكي لعند ماانهارت بالبكي والتليفون طاح من ايديها وحطتهم ع وجهها وبدت تبكي بالعبره..
هو قربلها وقعمز مقابلها وخداها في حضنه وقعد يطبطب عليها...
🍃🍃🍃
"هاك محجوب اشرب"
خدي المحجوب طاسة مية بيده اللي ترجف يدوب شرب منها ورجع يبكي مرة تانيه..
ومرته جنبه تذرف في دموع الحزن وهي تقول في نفسها..
"ماكنتش نعرف انه غالي عليك لهالدرجه..الله يرحمه ويغفرله"
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀
بعد مرور اربعين يوما....
#الأوراق_المتساقطة
#طوبى
....يتبع....
