#طوبى "جنة طوبى"
#جمان_فريد
#الجزء_113"الحجر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
قال ابن القيم رحمه الله..
"اذا انكشف الغطاء للناس يوم القيامة عن ثواب أعمالهم لم يروا عملا أفضل ثوابا من الذكر فيتحسر عند ذلك أقوام فيقولون ما كان شيء أيسر علينا من الذكر.."
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃و لكن العاطفة الإنسانية غلبتني , لقد صدق الشاعر هايني حين قال أن هذه العاطفة الإنسانية تحشر أنفها في كل شيء ..
دوستويفسكي 🍃 عدوا شهرين..
وهالشهرين ياما صار فيهم...
اول حالة كورونا معلن عنها كانت في اواخر شهر مارس...
حالة من الخوف سيطرت ع الناس في منهم وصلوا لمرحلة الوسواس..
اللي ياخد حاجه من برا لازم يغسلها ويعقمها قبل الاستعمال حتى لو كانت معلبه او مكيسه..
وبدت صفحات وقروبات الفيس تتناقل طرق ووصفات للوقاية من الوباء في منها مالهاش اي اساس من الصحه لكن الناس خدت بيها وبدت طبق..
يوميا يسيقوا بالواركينه"الكلور" الصافيه..يبخروا بالزعتر وبالقسط الهندي..
وغيره وغيره من اجراءات الوقايه اللي كانت عبارة عن اجتهادات شخصيه..
وقعد حديث الساعه عن الوباء..
كلامنا كله عن طرق الوقايه كيف لازم نغسلوا ايدينا ونستعملوا الكحول ونلبسوا الكمامه وغيره وغيره...
لكن هدا كله كان اهون من اللي صار لما تقرر علينا الحظر...
اقسى واصعب حظر كان...
"صلوا في رحالكم"
اول مرة سمع الحاج علي هالجمله في الآذان بكي من جده..
بكي بوجع..عمره ماسيب الصلاة في الجامع،من صغره وهو يصلي في فروضه كلها في الجامع احيانا كان يجاهد في المرض بش يمشي ويصلي في بيت الله..
وتوا اجباري..مفروض عليه معاش يصلي فيه لأن بابه تسكر..
🍃اميمه بألم ودموعها ينزلوا..
/صل ع النبي ياجدي فترة وتعدي إن شاء الله..
علي وهو مدرق عيونه عنها بيده..
/هذا غضب يابنتي غضب رب العالمين غاضب علينا هدا علاش معاش يبينا نجوه في بيته..
بنبرة باكيه قالت..
/ماتقولش هكي الشي هدا صار زمان في عهد الصحابه خيرة البشر بعد الرسول هدا ابتلاء ياجدي ابتلاء..
مسح عيونه بعدين ناض وقال..
/خل نمشي نصلي في داري..
ومشي وهو يقول..
"لاحول ولاقوة الا بالله..حسبنا الله ونعم الوكيل"
واميمه معاه بعيونها اللي تذرف في الدموع وقلبها مقبوض..
🍀وعدت الايام وراها الايام...
وخش شهر رمضان المبارك..
ورمضان هالعام من غير تروايح..من غير صلاة في المسجد..
نضال رمضان اللي فات عاش احلى ايام حياته كان اغلب وقته في المسجد..صلاة وقراءة قرآن وكتب دينيه خلاته يعيش رمضان صح..
لكن هالعام برغم حرمانه من دخول المسجد ماباش يحرم نفسه من انه يعيش اجواء شهر رمضان المبارك حتى لو كانت في الحوش..
خلاهم يهيئوله مكان في الريفودجي متاع الحوش بش يعيش خلوته مع الله وكتابه المجيد..ويقرا كتب الفقه ويسمع شروحها من علماء كبار عن طريق التسجيلات..
🍃اما خوه الكبير..
فمن لما اعلنوا عن اول حاله انفرض عليه حصار مشدد..
منعاته سدرة ينزل لحوش اهله..ماكانتش هي قوة الضغط الوحيده عليه حتى بنته سدرة اللي معاش مشت لحوش جدها..
وولاده اللي كانوا يطلعوا..لما يخشوا للحوش مايشوفوش بوهم الا بعد مايديروا كل الاجراءات الاحترازيه...
وكان لازم يشربوا مشروبات دافيه وياخدوا فيتامين C..
🍃🍃🍃🍃🍃
واللي كان حريص حرص شديد ع نفسه من لما طلع الوباء في العالم...هو اول من انصاب بيه في المحيط متاعه..
وزي مايقولوا المصريه"اللي يخاف من العفريت يطلعله"
مختار..
من لما بدي يحس بالاعراض تطلع عليه وهو يتجنب الاختلاط بأي حد في الفيلا..كان شاده حجرته ومانع اي حد يخش عليه..لعند ماطلع عليه العرض الأبرز علامة الكورونا المميزة آنذاك..فقدان حاستي الشم والتذوق..
وهني خلاص قرر يطلع فاتن وامينه والخدم من الفيلا..
لما جت الاوامر لفاتن من امينه رفضت رفض قاطع ومشتله للحجرة متاعه بش تكلمه..
من ورا الباب كانت تكلم فيه لأنه كان مسكر ورفض يفتحه..
🍃فاتن بإنفعال وخوف..
/باهي خليهم يجيبولك ناس هني تعالجك كان ماتبيش تخش مراكز العزل..
"فاتن..فاتن ماتخلنيش نجرحك بالكلام اني قلت اطلعوا يعني اطلعوا وماتناقشيني في شي مانبي حد يكلمني عن شي.."
وبدي يسعل بقوة..
فاتن وهي تبكي..
/مختار..
هو بصوت عالي كله غضب قال..
"والله كان ماسمعتي الكلام يافاتن نطلقك"
🍃وكلم الاقجم هاتفيا وخلاه يخش للحوش ويطلعهم غصب عنهم...
وقعد هو حبيس حجرته..مرمي ع كرسيه الجلد وهو مرهق ومتعب وارتفاع حرارة جسده انهكه...
وهو فهالحاله..جت بين عيونه ايام بعيده..من الماضي الأسود..
🍃لما كان محبوس في اسوأ الظروف..وياكم مرض مرة وعانى وسوء المعامله زاده ع مابيه...
هو كان سيء اخلاق في السجن تعارك مع المساجين ومع الحراس..والمشاكل اللي يدير فيه خلتهم يحطوه بالأيام في الانفرادي..ومرض غادي وعاش آلام المرض بروحه...
كان يستسلم للمرض وكأنه يبي ينهي حياته..لكن مازال عنده عمر بيعيشه وشوية الرأفه والرحمه اللي قاعده عند امراء السجن وقتها كانت سبب في انقاذه من الموت..🍃
🍃🍃🍃🍃🍃
في حوش طوبى الواعر...
كانوا في الكوجينه هي واريج يغلفوا في انواع موالح داروها للفطور ناويين يرفعوها معاهم لحوش غرفه...
☘بعد ماعدا شهر ع وفاة عبد الرؤوف روحوا طوبى واريج للحوش وقعدت صفيه مع غرفه لين تكمل عدتها..
خلال هالفترة زادت قوة العلاقه بيناتهم والصغار تعلقوا بصفيه تعلق كبير وكأنها جدتهم الحقيقيه وهي تحبهم حب كبير...
كذلك..كانت غرفه تتواصل مع خالها هاتفيا عن طريق مكالمات الفيديو..كان يشرحلها عن امور تخص التجارة..
وكان يعطي فيها معلومات قانونيه عن الخدمه لأنها في صلب تخصصه...
وهي كانت تتعلم وتستوعب بسرعه واللي ساعدها هو المكالمات اللي كان يدير فيها عبد الرؤوف قدامها بخصوص شغله كانت تركز معاه وتلقط في بعض المعلومات واحيانا تسأل فيه وهو يجاوبها طبعا بعد مايشبعها مسخره واستهزاء..
"ع اساس فهمتي حاجه من اللي قلته"
وهي كانت تفهم وتفهم كويس..لكن ماكانش متخيله ان هدا كله صار بش يهيئها لوضع حتعيشه بعدين...☘
🍃طوبى:خلاص معاش في شي ولا!؟
اريج؛تمينا كل شي..
طوبى:مالا خل نمشي ندوش لجنه وبعدين نطلعوا..
اريج:تمام واني نشطب الكوجينه..
هزت طوبى راسها وطلعت وهي تنادي..
/جنه جنونتي..
جتها جنه تجري من الدار..
"شيت ماما"..جيت..
طوبى:هي تعالي ماما نديروا دوش..
جنه بفرحة..
"دوش اني وبطه"
طوبى بضحكه؛بري جيبي بطتك وتعالي..
وخشت طوبى للدار بش طلعلها حوايج..وجنه مشت للدار التانيه بش تجيب لعبتها متاع البطه...
🍃حممت طوبى بنتها ولبستها وعطرتها وزينتها..بعدين جهزوا انفسهم هي واريج وقبل ليطلعوا بدقائق رن جرس "الانترفون"
طوبى بإستغراب..
/ان شاء الله خير!..
ومشت طول للجهاز..خدت السماعه وردت..
/مني..
"افتحي ياطوبى"
كانت فاتن..صوتها وهي تتكلم فيه نبرة مختلطه بين الخوف والبكاء خلت قلب طوبى ينقبض..
/لحظه..
سكرت وهي تفكر بقلق...
اريج؛مني!؟
طوبى بقلق..
/فاتن شكلها تبكي..
ومشت بسرعه طلعت من الحوش واريج خدت جنه وطلعت بيها ورا طوبى..
🍃وصلت طوبى في الباب وفتحاته..
خشت وملامح وجهها كلها خوف غارقه بالدموع..
/طوبى..بالله عليك ساعديني..
سكرت طوبى الباب وهي نقول بخوف..
/شن في!!؟
فاتن بنبرة مرتعشه..
/مختار مرض..شكله جاته الكورونا ياطوبى..لزنا كلنا وقعد بروحه يبي يموت ياطوبى..
اريج حطت يدها ع فمها بصدمه..
طوبى بخوف وارتباك..
/كيف لزكم وكيف بيقعد بروحه!؟
وهي تبكي جاوبتها..
/ياطوبى مايبيش يدعينا لزنا كلنا ومايبيش حد معاه ولايبي يتعالج..
طوبى:شن هدا هبل!!؟ مش كان خايف منها!!؟ لما تجيه مايبيش يتعالج!!؟
فاتن بألم..
/حاولي تكلميه طوبى بالله عليك يتأثر بكلامك هو..ارجوك كلميه..
بلعت طوبى ريقها وهزت راسها وهي تقول..
/باهي باهي..طلعت تليفونها من جيب العبايه. وبدت دور في رقمه...
🍃وفي الحوش المقابل حوشها..
كان عبد القيوم جاي للروشن اللي يفتح ع الشارع بش يسكره
لما وقف عليه القى نظره ع الشارع..عقد حواجبه بإستغراب وهو يشوف لسيارة مختار " VIP"واقفه قدام حوش طوبى..
🍃وطوبى تمشي وتجي قدام فاتن واريج تراجي مختار يرد ع اتصالها..
🍃هو وقتها ظن ان الأقجم يتصل بيه..رفع تليفونه اللي كان حاطه ع يد الكرسي..وشاف المتصل..ابتسم تهكما وفتح الخط ورد..
/اها انتي..شكلك انتي اخر حد نكلمه قبل الموت..
"شن تخرف انت شن تقول..موت شني..شن الهبال اللي انت فيه هدا"
بتعجب قال..
/راك تقولي خايفه عليا..مستحيل..اكيد في حد واقف حداك تمثلي قدامه..
"اسكت اسكت ومعاش تتكلم بكل..توا توا خليهم يرفعوك تعاين لو ماتبيش تمشي قوللهم يجيبولك من يعاينك.."
قاطعها بصوت الكحه متاعه كان قوي هلبه..لما وقف عن السعال قعد يتنفس بصعوبه..حاول يرد عليها لكن ماقدرش حاول يرد التليفون لمكانه طاح منه جي تحت الكنبه..
"مختار...مختار..الو..مختار"
🍃حطت فاتن ايديها ع خدودها وهي تقول بفجعه..
/شن صارله قولي خيره!؟
نزلت طوبى التليفون وهي تقول بخوف وصدمه..
/شكله اغمى عليه ولامش عارفه..
فاتن ماتحملتش اللي سمعاته طول فقدت الوعي...
🍃🍃🍃🍃🍃
وفي مصحة القدس..
كانت اميمه واقفه تشوف في صور فحوصات لحالة عندها..بعد ماشافتهم قالت..
/الحمد لله في تحسن كبير...
:الحمد لله رب العالمين..
اميمه؛قتلك بعد العمليه ومع العلاج تخف الاعراض لين تختفي..
ويقطع عليها كلامها الاتصال اللي جاها..
قربت التليفون ليها شافت المتصل خافت قالت للحاله..
/خلاص بعد اسبوعين تعالي في نفس الموعد..
:بعد اسبوعين العيد دكتورة...
شافتلها اميمه شويه بعدين ضحكت وقالت..
/ايه صح..خلاص بعد العيد ان شاء الله في نفس اليوم يعني..
سكتت وهي تحسب في الايام بعدين قالت..
/يوم 27..
خدت المريضه الملف..ناضت وهي تقول..
/ ان شاء الله..كل سنه وانتي طيبه..
اميمه بإبتسامه..
/وانتي بخير..
رفعت المريضه الكمامه ومشت طلعت من الحجره..
الممرضه:ندخلوا حاله تانيه؟
اميمه بقلق؛لا استني..
خدت تليفونها وردت ع مكالمة طوبى اللي عاودت عليها اكثر من مرة...
/ايوه طوبى..
جاها صوت طوبى الخايف وهي تتكلم بعجله..
"اميمه في حاجات بنسألك عليهم بالله جاوبيني عليهم بسرعه.."
اميمه بقلق..
/نسمع فيك...
🍃🍃🍃🍃🍃
"حبيبتي جوري ركبي معاي الحافظه هديكا"
جوري قالت..
/حاضر...
وخدت الحافظه ومشت طلعت ورا عمتها خديجه من الكوجينه..
وعيون سميرة تتفرج وهي شاده ضحكتها..
🍃وفي شقة المهدي..
تحديدا في دار النوم..
كان المهدي يتكلم هاتفيا وهو مسكر الباب..
المهدي:ايوه تارقي نسمع فيك..
"بنسألك صاير شي لنسيبك مختار!؟"
المهدي ؛مختار!
"زي ماتوقعت ماعندكش علم هذى ليش قتلك خليك بروحك توا شفت سيارته ع باب حوش نساباتك..شفت نسيبتك الصغيره ومعاها بنت اختها شايلين زوجة مختار ركبوها السيارة وعدت بيهم"
المهدي:كيف قصدك المراة دايخه!؟
"اللي شفته انها واعيه لكن كانت تبكي"
المهدي وهو يفكر بقلق..
/شن صايرله هدا توا!؟
"كلمته اكثر من مرة ماردش عليا"
دق باب الدار..
المهدي قال بصوت عالي..
/لحظه..خفض صوته وهو يقول لعبد القيوم..بنسكر توا وانت زيد شوفه..
"تمام تمام"..
ونهي المهدي المكالمه ومشي فتح الباب..
لقي بنته تراجي فيه وهي تقول..
/عمتي خديجه جت بتفطر معانا..
المهدي:باهي بري بابا تو تجي..
سدرة لاحظت ارتباكه ومشت وهي تفكر فيه..
وهو بعد مشت قال بقلق...
/شن صاير معاك يامختار!؟..
🍃🍃🍃🍃🍃🍃
والفيلا الكبيره الفخمه بكل شي فيها وحواليها..
كان مختار مقعمز في وحده من غرفها ع الأرض وهو شاد تليفونه ويكتب بصعوبه في رساله يبي يوصلها لفاتن..
يكتب في كل حرف فيها وهو حاس بالموت يطوف حواليه ويراجي فيه يتسلل لجسده..
الرؤيه ولت صعبه..الدموع تنزل من عيونه بسبب ارتفاع درجة الحرارة..فأي لحظه حيفقد الوعي...
🍃في هالوقت..
ينفتح باب الفيلا وتخش طوبى والاقجم وراها...
طوبى بصوت الكمامه اللي لابستها كتماته..
/وين بالزبط..
الاقجم كملي القدام اول باب يقابلك ع يمين..
هزت طوبى راسها وهي تقول..
/وتي الدار اللي قتلي عليها..
وكملت طريقها للحجره متاع مختار..
وصلت فيها طلعت المفتاح من جيبها وحطاته في الباب وفتحتها..
خشت لقاته طايح جنب الكنبه وتليفونه في يده..
وخرت وطلعت من الحجرة نزلت الكمامه ونادت بصوت عالي..
"اقجم"
🍃🍃🍃🍃🍃
"متخلفه هادي متخلفه غبيه!!"
صفيه بخوف وقلق..
/معقوله تمشيله وهو مريض بهالهم نست بنتها!؟
اريج قالت ودموعها ينزلوا..
/قلتلها قالتلي مايصيرلي شي وجنه امانه عندكم..
غرفه بإنفعال ودموعها ينزلوا..
/هي هادي اللي اسمها فاتن علاش تجيها هي علاش!؟ والغبيه مشتله برجليها الهبله هادي نست شن دار فيها خلاته يجيف الحقير هدا وياخد جزاء اعماله..
اواب ومهاب وجنه كانوا واقفين يتفرجوا عليهم وهما خايفين..انفعال غرفه وعياطها خوفهم..
وغرفه من خوفها الشديد ع طوبى قالت
/هادي مايقدر عليها كان سدرة تو نكلمها تخليها تروح غصب عنها...
🍃وسدرة في هالوقت كانت تجهز في سفرة الفطور وهي متنرفزة من وجود خديجه وتوددها الزايد عنه معاها الفترة الاخيره..
بعد ماكملت نادت يزن...
هو خش عليها وقال..
/نعم خالتي..
سدرة:ارفع السفرة ولدي..
يزن خدي السفرة وقال..
/معليشي مشي الامور ع خاطر الكينج..
ضحكت وهي تقول..
/شن دايرة اني قاعده ندف فيها بش تمشي..
ضحك وطلع بالسفره وسدرة وراه..
وصلوا في الصالة...
حط يزن السفره ع الأرض وسدرة تقول..
/عمتي من قاعد معاها؟
خديجه؛نجاة كان تلقى ماتتحرك من حداها..
سدرة المهدي مطت شواربها بملل..
ومحمد ويزن يتبادلوا في النظرات وبوهم عقله مش معاهم..
سدرة:به بارك الله فيها..وكيف جت بتقعمز سمعت صوت تليفونها يرن..
ناضت سدرة المهدي وهي تقول..
/تو نجيبه..
سدرة بقلق..
/ان شاء الله خير...
والمهدي يشوفلها بضيق...
ع جية بنته بالتليفون مداته لسدرة..
خداته سدره وشافت المتصل قالت..
/غرفه..زعمه علاش متصله توا..
فتحت الخط وردت وكل من قاعد حواليها يشوفلها بترقب...
سدرة:ايوه غرفه..
"ايوه سدرة..اسمعي..كلمي اختك المهبوله تروح من حوش مختار.."
سدرة بصدمه..
/شن رفعها غادي!؟
"مرته هادي فاتن جتها بكري شويه قالتلها فيه الكورونا ولزهم كلهم ومايبيش يتعالج خلتها تكلمه وهو اشبح شن قاللها مشتله طول.."
🍃عيون المهدي مافارقوش سدره..شاف لون وجهه كيف شحب ولون شفايفها كيف ابيض...
توسعوا عيونه لما شافها ناضت وقفت وهي تقول بنبرة مرتعشه..
/خيرها هادي خيرها!؟ شن رفعها غادي نست بنتها!؟
رفعت خديجه حاجبها بعد ماسمعت اخر جمله..
سدرة وهي ترجف؛سكري تو نكلمها..
الصغار وبوهم كانوا يشوفولها بقلق .
ناض المهدي وقال..
/شن في ياسدرة!؟
سدرة وهي دور في رقم طوبى قالت برجفة صوت...
/مش حيرتاح لين يقتلها..
اتصلت بيها هي تسمع في المهدي يقول..
/من هي!؟؟
وسدرة ملتزمه الصمت..تراجي في طوبى ترد عليها...
وقعد الخط ينادي وينادي..ومايرد حد..
الخوف اللي حست بيه سدرة وقتها عمرها ماحست زيه..
نزلت التليفون وجت بتمشي لدار النوم وهي تقول بصوت مخنوق..
"ارفعني يامهدي"..
ومالحقتش تكمل الخطوة التانيه الا وهي حاسه بكل شي فيها هبط في مرة وطاحت فاقده الوعي...
🍃🍃🍃
طوبى في هالوقت..
كانت مقعمزة ع كرسي جنب الحجره اللي نقلولها مختار..
الحجرة تجهزت ببعض التجهيزات الطبيه..
كانيولا..جهاز اكسجين..ادويه..
وكان معاه فيها طبيب من دولة عربيه وممرضة اسيويه..
🍃"المغرب اذن ابله طوبى"
استاقظت من سرحانها لما سمعت الاقجم كلمها..
وجهت نظرها ليه لقاته واقف بعيد عنها بمسافه وعيونه في الارض..
هزت راسها وقالت..
/خليك هني لين نجي..
ناضت ومشت بإتجاه الكوجينه..
وهو قدم وقف قدام الحجرة...
🍃دورت طوبى ع الكوجينه لين لقتها..
خشت ومشت طول للثلاجه دور ع حاجه تحل بيها صيامها..
فتحتها ولقت فيها كل شي وماخدتش منها غير حافظه تمر..
سكرتها ومشت بالحافظه حطتها ع الطاوله..
دورت بعيونها لين جو ع تلاجه الميه مشتلها صبت مية دافيه في طاسه "كوب" وولت للطاوله..
وكعادتها قبل لتشرب لازم تقرا ايات الرقيه ع الميه..
بعد كملت قرايه خدت تمرة وبدت تدعي وهي تقول..
"يارب اشفيه وعافيه واهديه"
وحلت صيامها...
🍃تبان في حالة هدوء..لكن داخلها قاعد يدور صراع رهيب وعاصفه من الاسئله مش لاقيتلها اجابه..
هي توا شني تحس!؟ هل حست اتجاهه بالشفقه!؟ ولا حستها اتجاه فاتن وعيلهم اللي بيجي!؟
ولاهي خافت عليه فعلا..خافت تفقده!؟
معقوله بدون ماتحس مختار خش قلبها وطوعه لحبه!؟
كيف بعد كل اللي داره فيها تحنله وتحن عليه!؟
يقولوا الدم يحن..ممكن غصب عنها حنتله الرابط اللي بينهم كان اقوى منها ماقدرتش تقطعه وتنهيه...
زي ماصار لسدرة تخطت الماضي الأليم ورجعت قرباته منها وحنت عليه..
"لكن اني نعرفه اكثر ماتعرفه سدرة..نعرف شن دار من شر وشن مازال يبي يدير!؟
كيف تخطيت كيف جيته نجري بدون وعي مني!؟"
استاقظت من سرحانها لما تفكرت الصلاة حطت الطاسه ومشت طلعت من الكوجينه...
🍃🍃🍃🍃🍃
"خيرها شن جاها هبلت!؟"
وجه عبد المطلب سؤاله لأميمه بعد ماخبرتهم باللي صار..
هاديه بخوف..
/البنيه طيبه وحنينه هلبه ياعبد المطلب ماقدرتش تشد روحها عن وخيها..
عبد المطلب:هدا اسمه هبال لاطيبه لاحنيه عندها عيل معقوله تمشي برجليها للوباء والبلي..شاف لبوه وقال..تكلم ياحاج خيرك ساكت!؟
وجهوا هاديه واميمه انظارهم ليه..
وهو تنهد وقال..
/تو يابنتي يااميمه في ناس برت منها الكورونا هادي ولا؟!
اميمه بضيق:ايه في حالات تعالجت وبرت..
علي هز راسه بصمت..
عبد المطلب:علاش مبرد هكي ياحاج!؟
علي:من قالك مبرد ياولدي!؟ اني نخمم فيها اكثر منكم..هي توا خلاص مشتله وفات الفوت توا مفروض نفكروا شن لازم دير بش ماتجيهاش العدوى ولا كان جتها العدوى ومرضت..
اميمه:صح مزبوط كلامك اني عطيتها نصايح تمشي عليهم وربي هو الحافظ..
تنهد عبد المطلب وكانت باديه ع وجهه ملامح عدم الرضا
وهاديه جنبه تفكر بقلق بالغ في طوبى وتدعيلها...
🍃🍃🍃🍃🍃
"مافهمت شي كل اللي عرفته انها تحكي طوبى لما قالت نست بنتها"
نجاة ضيقت عيونها وهي تقول..
/شن رفعها غادي!؟ زعمه وين مشت في المغاريب!.
خديجه:هي هادي اللي نفكر فيها..
رخت نجاة عيونها وقالت..
/اني اللي نفكر فوق هكي تصرفاتك المده الاخيرة..
خديجه وهي تسأل بكبر..
/تصرفات شني!؟
نجاه:فاهمه عليا كويس دوجه..انتي في راسك موال وتبي تغنيه..
خديجه غيرت عيونها عنها للتلفزيون..خدت الريموت وعلت الصوت وهي تقول..
/فاتتني الحلقه اليوم...
نجاة:يعني ماعندكش مشكله تاخدي راجلي متزوج!؟
شافتلها بطرف عينها بعدين قالت ..
/اللي داروها مش خير مني..وانهي كلام في الموضوع هدا خلاص..
ضحكت ووجهت نظرها للتلفزيون وهي تقول في نفسها..
"ماك طايلتيه حتى في الحلم "
🍃🍃🍃🍃🍃
وفي مصحة القدس..
المهدي وهو في قمة القلق كان يراجي حد يجيه يطمنه ع حالة مرته..
وسميرة مقعمزه ع كراسي الانتظار تشوف في حالته بضيق..
/ماتخافش يامهدي هبوط عادي ياولدي..
المهدي هز راسه مسايرة والخوف مسيطر عليه..
ع جية الطبيبه المسؤوله عن حالتها..
قدملها طول وسميرة ناضتلها..
الطبيبه قالت بإبتسامه..
/جايه نبشركم ونبي الزرده..
بدت ع وجه سميره ملامح الفرح..
والمهدي عقد حواجبه بإستغراب وقال..
/تبشرينا بشني!؟
هي قالت..
/المدام حامل استاذ مهدي..
سميره ضحكت بفرح وقالت..
/الله يبارك الله يبارك..
المهدي يشوف لسميرة بنظرات عدم استيعاب..
🌼هو ماكانش طامح بأكثر من انه ينول سدرة بعد سنين طويله من العذاب..وبعد ماولت نصيبه حس روحه ملك الدنيا ومافيها..لكن الله سبحانه وتعالى لما يبي يعطي العطيه متاعه تليق بيه..عطية جواد كريم🌼
"مبروك يامهدي مبروك"
ضحك بفرحه واحراج وهو يقول..
/الله يبارك فيك..
🍃🍃🍃🍃🍃
"دار معاه مايلزم وان شاء الله غدوة الصبح يصحصح "
امينه بضيق..
/ربنا يشفيه ويعافيه..
الاقجم:آمين..اسمعي خالتي نبيك نروح بيك تباتي مع المراة في الحوش..
امينه:ومادام فاتن!؟
الاقجم:كلمت وحده من معارفي تجي تقعد معاها مرافق ماتخافيش المراة ثقه والمعلم يعرفها كويس..
تنهدت وقالت بضيق..
/اللي تشوفه...
🍃وفي الفيلا...
طوبى كانت في دار الضيوف تصلي في التراويح...
في كل ركعه تقرا من السورة اللي قاعده تحفظ فيها حاليا "الاسراء"
كملت صلاة التروايح وقعدت في مصلاها تذكر في الله..
وفي عقلها تتردد آية من سورة الإسراء...
"وننزل من القرآن ماهو شفاء ورحمة"
خدت نفس وناضت وهي ترفع في الصلايه طوتها وحطتها ع السرير..
ومشت طلعت من الدار وتوجهت للحجره اللي فيها مختار..
وصلت فيها..قعمزت ع الكرسي المحطوط خداها ربعت ايديها واتكت براسها ع الحيط..
وبدت تتلى في القرآن بصوت مسموع...
🍃الممرضة كانت موجوده في غرفه قريبه تسمع فيها براحه وتفهم في كل كلمه لأنها مسلمه...
وهو داخل في الحجره المغلقه..معزول عن المحيط الخارجي
راقد بعمق..لكن صوتها واصله..
واستمرت طوبى في التلاوة لعند ماوقفت شويه بش ترتاح..
جتها الممرضة من الحجرة التانيه وقالت بإبتسامه..
/كمل..
ابتسمت طوبى وقالت..
/حاضر..
ابتسمتلها الممرضه وولت لحجرتها..
وبدت طوبى تتلى في القرآن مرة تانيه..
☘ع خشة الاقجم وامينه للحوش وصللهم صوتها..
امينه ابتسمت وقالت بإعجاب..
/الله!
الاقجم :الله يبارك عليها الحق..
تلاشت ابتسامه امينه وهي تقول..
/انت بتعمل ايه هنا مايصحش تسمعها...
الاقجم ضحك وقال..
/ايه الله حق..خلاص اني برا صار شي كلموني..
وطلع وسكر الباب..
تنهدت امينه وتبعت الصوت لوين وصلت للمصدر..
قعدت واقفه في مكانها تسمع فيها..
وطوبى تقرا وهي هايمه في عالم السورة اللي تقرا فيه..
وقفت وقفة بسيطه..لاحظت فيها امينه..
امينه بإبتسامه..
/ربي يكرمك ياحبيبتي صوتك حلو قوي..
ابتسمت طوبى وقالت..
/تسلمي..
قدمتلها امينه وهي تقول ليكي معايا حاجه تخصك نستيها في العربيه..
طلعت من الشنطه التليفون ومداته لطوبى..
خبطت طوبى جبهتها وقالت..
/راح ع بالي بكل..
خدت اللتليفون وشافت المكالمات اللي وصلوها عقدت حواجبها بضيق وهي تقول..
/حي عليا منهم حي..قامت عيونها في امينه وقالت..شن حال فاتن؟
امينه؛كويسه الحمد لله بكرا الصبح تخرج..
طوبى:من قعد معاها!؟
امينه:وحده من معارف الاقجم قال يعرفها استاذ مختار..
طوبى:عطاك رقمها؟
ابتسمت وقال..
/اه وعرفني عليها باين عليها ست محترمه..
طوبى:تو نتصلوا بيها مرة مرة نشوفوها..خل تو تشوف العيله اكيد قالبين عليا الدنيا..
امينه:طب عن اذنك..
طوبى:خودي راحتك...
مشت امينه لدارها..وطوبى حطت ع رقم اريج واتصلت بيها...
🍃🍃🍃🍃🍃
خشوا عليها الحجرة لقوها سرحانه...
سميرة بإبتسامه..
/سديرة..
استاقظت من سرحانها ووجهت نظرها عليهم..قالت..
/طوبى..
المهدي:كلمت جدك وفهمت منه الوضع ماتخافيش..
نزلوا دموع سدرة وهي تقول..
/كورونا يامهدي..
سميره؛اميمه قالت نبهتها ع حاجات كان مشت عليهم مافيش عليها خوف..
غيرت نظرها للمهدي..كانت تشوفله بنظرات ألم..
وهو ابتسم وقال..
/نبي نخبرك بحاجه توا مانعرفش شن يصير فيك لما تعرفيها..
سدرة بخوف.. /ان شاء الله خير!
سميرة بضحكه:واضح من وجه المهدي خير..بتخاوي لمحمد ويزن وسدرة..
فتحت عيونها ع وسعهم بصدمه وهي تقول..
/كذابه!!
المهدي ضحك ضحكه خفيفه وقال..
/صدقي صدقي..
حطت يدها ع فمها وهي تشوفله بعدم استيعاب..
سميرة ابتسمت وقالت..
/شويه وجايه...
ومشت طلعت وخلتهم ع راحتهم..
هو قدم لسدرة حط يده ع راسه ونزل ع جبينها وطبع قبله طويله..
وهي مازال في حالة عدم استيعاب..
بعد وهو يشوف لعيونها ويقول..
/بيجوني منك صغار يافرخة انتي..
بعدت يدها وقالت..
/تحشم مهدي شن فرخه هادي !؟
المهدي بضحكه..
/نبيك تردي زي زمان وحني صغيرين لما كنت نقولك فيها شن تردي متفكره!؟
ابتسمت وهي تقول..
/انت الفرخ يافرخ..
ضحك ونزل طبع قبله تانيه ع جبهتها..
سمع صوت بكاها..تنهد بألم..وضمها لقلبه...
🍃🍃🍃🍃
"خالتي غرفه تغز عليك في الملح قريب تهبل"
طوبى بضيق..
/وسدرة عرفت منها!؟
"ايه طول اتصلت وخبرتها"
قالت:باهي وجدي!؟
"ردة فعله كانت عاديه حسيته خايف عليك لكن مش زعلان منك"
طوبى استغربت وقالت..
/قوليلهم هو معزول واني بعيده عنه..
"مالك بيه يابنتي بس! تو انتي تقدري تبعدي عن جنه المده هادي كلها!؟"
طوبى بضيق ودموعها في عيونها..
/اكيد لا..لكن مطمنه عليها معاكم وكل يوم نكلمها فيديو منك..
"علاش مشتيله ياطوبى"
غمضت عيونها ومسحت اليسار وهي تقول بتشتت وارتباك..
/مش عارفه..نزلت يدها وفتحتهم وهي تقول..كلمني بطريقه وجعتلي قلبي عليه غصب عني مش بيدي..وحتى حال فاتن وجعني هلبه..مش عارفه تصرفت من غير وعي وخلاص..
"حتى اني مش عارفه شن نقولك لكن عاذراتك نعرفك من قبل قلبك رهيف مهما حاولتي تقسي في الاخير تحني"
طوبى بضيق..
/لكن مش راضيه..في شي داخلي مش متقبل اللي درته..
"اللي داره فيك مش حتقدري تنسيه مهما حنيتي عليه مافي حد يقدر يعدي حاجه زي هادي بكل"
تأففت وقالت..
/استغفر الله العظيم..باهي قوليلي نكلم سدرة وغرفه توا ولانفوتهم..
"اني نقولك ابعتيلهم رسايل خير..اكتبي فيها كلام يمص الغضب متاعهم..بش كان كلموك بعدها يكونوا هاديات شويه وتقدري تقنعيهم"
طوبى:صح..خلاص تو نبعتلهم وان شاء الله يفهموني وماياخدوش مني موقف..
"إن شاء الله"
طوبى:باهي انتي بتباتي في حوش جدي اليوم..
"ايه بنرقد مع اميمه في دارها وجنه من بكري راقده حدا هاديه في الدار وعمي عبد المطلب بيرقد في المربوعه "
ضحكت طوبى وهي تقول..
/معفنه..
🍃🍃🍃🍃🍃
وروح المهدي بسدرة من المصحة بعد نص الليل..
وصلها للشقه ونزل لعبد القيوم اللي كان يراجي فيه قريب من المطحن...
🍃🍃🍃
المهدي:ياسيدي مختار طلع عنده كورونا..
بدت ع وجه عبد القيوم ملامح الخوف لما توقع تكملة كلام المهدي..
المهدي:طلع مرته وكل من قاعد معاه لمكان تاني وقعد بروحه سكر راسه ع العلاج مافهمتش دار هكي خوف ولا يأس..المهم زوجته جت لأخته وخبرتها وهي طول مشتله وقعدت معاه..
قلب عبد القيوم كاد يوقف من الخوف تلقائيا وبدون مايشعر قال..
/كنها هذي هبلت!؟
رفع المهدي حواجبه تعجبا..
هو فيسع ادارك نفسه وقال..
/قصدي غلط اللي داراته هو مفروض مايقعد معاه حد كان دكاترة ولاممرضين وباء هذى مرض خطير..
المهدي:هدا اللي صار هي خبرت العيله انه معزول في دار بروحه وهي بعيده عنه..
حط عبد القيوم ايديه ورا ظهره وهو يمرر في نظره في حوشها ومحل الحلويات وملامح الخوف والقلق باديات ع وجهه..
والمهدي مركز..
تنهد عبد القيوم بضيق وقال..
/باهي ان شاء الله لاباس عليه..تصبح ع خير..
ومشي طول بإتجاه الحوش...
وعيون المهدي تلحق فيه لين خش...
🍃وعبد القيوم اول ماخش للحوش قعد يمشي في الجنان والقلق مسيطر عليه..صدره طبق..وقلبه انغم من خوفه عليها..
هو توا كان يلقى يمشيلها وين ماقاعده ويطلعها غصب عنها..
وللأسف لاحيلة للعاجز..
قعد يمشي ويجي في مكانه وهو يمسح ع لحيته من التوتر...
شويه وقف..وطلع تليفونه من جيبه وقعد يدور ع رقم الاقجم لين لقاه واتصل بيه..
ورجع يمشي ويجي وهو يراجي في الاقجم يفتح الخط..
ويرد الاقجم..
"اوو تارقي عاش من شاف رقمك ع تليفوني."
ضحك وقال..
/اقجم كيف حالك وشن امورك؟
"والله شن بنقولك ملخبطه ياغالي"
عقد حواجبه وقال..
/ليش شن صاير معاك!؟
"لا مش معاي اني مع المعلم الراجل جاته الكورونا كلب مرة وحده..لزنا كلنا حتى عياله وياخد ويتحلف فيا يقولي تجيبلي دكتور نقتلك."
عبد القيوم؛وليش يتصرف هكي هو كان خايف منها ولماتجيه مايبيش يتعالج!؟
"والله الحق مافهمت كيف يفكر.."
عبد القيوم:باهي توا شن صار فيه!؟
"ياسيدي جاته اخته وخلتني نجيبله من يعالجه في الحوش.."
بلع ريقه وقال..
/باهي انت توا وين قاعد!؟
"انا في الملحق متاع الفيلا"
عقد حواجبه بغضب وقال..
/وهي قاعده وحدها في الفيلا!؟
"لا خالتك امينه المصريه معاها..غير دقيقه رد بالك اني ولد بيتيه ياغالي وهادي اخت الراجل اللي نخدم عنده"
عبد القيوم قاطعه وقال..
/ماتفهمنيش غلط..انا سألتك من باب الحرص بس..
"ماتوصيش حريص ياغالي".
تنهد وقال..
/باهي شن مايصير خبرني وانا مرة مرة تو نكلمك ونشوف الوضع..
"تمام.."
عبد القيوم:تصبح ع خير..
"قدامك كل خير..وصح سحورك"
عبد القيوم؛سلمك..
ونهي المكالمه وهو يفور ويغلي من الغضب والغيره والخوف معبي قلبه..
شاف لكرسي محطوط قدامه مشي قعمز عليه..
مرر نظره ع زهور الاقحوان..امعن فيهم النظر وبدي يتأمل فيهم..وبين عيونه موقف صار من قبل شهر ونص فاتوا جمعه بيها...
🔺️🔺️قبل شهر ونصف🔺️🔺️
كان عبد القيوم تحت العمارة اللي ساكنه فيها سلافه .
واقف مع معز ويحكي عن موضوع مهم..
🍃معز:سألنا اكثر من شيخ من كل جهة في البلاد قالوا كان ماعندهاش ولي القاضي او المؤذون الشرعي يكون وليها..
عبد القيوم بضيق..
/الله لايسامح من تسبب في هالحروب والمآسي..
معز بإبتسامه:كانك عليا بندعيله ليل نهار بسببه هو ربي جمعني بنصيبي من هالدنيا..
ضحك عبد القيوم وقال..
/رب ضارة نافعه..
🌼ومن قدام مدخل العمارة تطلع طوبى..
وهي ماشيه مالاحظتش عبد القيوم ومعز..تركيزها كله مع قطوسه مجريه قاعده تحت الشجره مع صغارها شافتهم اول ماجت..
وتوا تشوف فيهم حواليهم صغار الانس الشياطين كانوا يخوفوا فيهم ويناشبوا فيه بالعصي..
طوبى نست نفسها ومشت بسرعه ناحيتهم وهي تقول بلوم وانفعال..
/لاحرام عليكم علااش هكي!
قلب عبد القيوم التفت قبل عيونه لما سمع صوتها..
شافها واقفه ع الصغار تلوم فيهم وتعاتب بحرقه..
طوبى:حرام هادم صغار وضعاف علاش ديروا فيهم هكي!؟
الولاد طلقوا العصي وهربوا...
طوبى بأسف وضيق:لاحول ولاقوة الابالله..
غيرت نظرها للقطاطيس وهي تشوفلهم بوجع عارفه كان مشت وخلتهم حيولولهم الصغار ويعذبوهم..
"تو نشيلهم بعيد عنهم"
التفتت طول وشافتله..
لقاته واقف لابس نظاراته الحلوات وع وجهه باديه ملامح ابتسامه خفيفه..
حست قلبها بيطلع منها نزلت عيونها..
هو قال بإبتسامه..
/روحي وماتخافيش عليهم
ماقدرتش ترد عليه حتى بإيماءة الراس مشت طول كملت طريقها بسرعه...
وهو تبعها بعيونه لين ركبت سيارتها ومشت..
وخر كم خطوة لين وصل في معز ..
معز:قالوا جارتكم في نفس الشارع..
رفع حاجبه وهز راسه بإيجاب..
ابتسم معز وقال..
/حكولي انها الفترة اللي فاتت كانت تخدم في طلبيات عمتي وتبيع فيهم وتجيبلها في حصتها اكيد حتى توا جاية لنفس السبب..
معز يتكلم..وقلب عبد القيوم يتجاوب معاه فوق غيرته حبه وشوقه كانوا يزيدوا ويزيدوا...
معز؛مازال في الدنيا خير..
تنهد وقاله وهو يحاول بقوة يخفي مشاعره...
/يقولوا كان خليت خربت..
🔺️🔺️الوقت الحاضر🔺️🔺️
ابتسم من قلبه وبدي يردد في ابيات شعريه..
🌼كيف المطر متقاوي
غلاك في سما قلبي سحابة ناوي
ايهيل بالغلا
كيف المطر وغيومه
وكيف من زها بالخير بعد همومه
غلاك في سما قلبي غرس بسهومه
سيل حبهن داير معاي فجاوي
غلاك ع الغلا قلبي معلي سومه
غلاك ما غلا كيفه غلا مساوي
غلاك دنيتي غلاك عيشتي المقسومة
غلاك نبض روحي ونا لغرامك غاوي🌼
#الحجر
#طوبى
....يتبع....
