#طوبى "جنة طوبى"
#جمان_فريد
#الجزء_109"عرجون فل"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#التسبيح
التسبيح من الأذكار العظيمة
قال ابن مسعود رضي الله عنه :
ما كُرِب نبي من الأنبياء إلا استغاث بالتسبيح
فأكثروا من التسبيح في الرخاء والشدة
"الذين يحملون العرش ومن حوله يُسبّحون بحمد ربهم"
ويقال أن الملائكة لم يعينوا على حمل العرش إلا بالتسبيح
فالتسبيح يفرج به الهموم وتفك به الأزمات وهو سر من أسرار الإستجابة كما شرط من شروط اداب الدعاء لأن لكي يكون دعاءك صحيحا لابد من الثناء على الله والتسبيح فيه ثناء على الله وتنزيه له.... 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ما مضى قد مضى وانقضى ، وما قيل قد قيل ولا يستعاد..
دوستويفسكـي🍃
_______________________________________
في الجزء الداخلي لقهوة الزعيم..
كانوا المهدي وعبد القيوم مقعمزين ع طاولة وحده وبينهم حديث يدور عن مشكلة حبس التارقي..
🍃عبد القيوم:كيف ماتقولوا الجماعه حفرولي وربك طلعني منها وجبهتي بيضا..
المهدي بشي من العصبيه..
/والله مافي واحد جابلي سيرة..
عبد القيوم:عريس جديد ياراجل ليش يخبروك !؟
المهدي؛مهما كان لازم يكون عندي علم انت جار وصاحب ياتارقي..
عبد القيوم بإبتسامه..
/عارفك امير ياصاحبي ومن يوم عرفتك فزاع..
المهدي مسح ع خده وقال..
/باهي توا كيف بيصير فيك..قصدي في الخدمه شن وضعك توا؟!
عبد القيوم؛مستمر فيها لكن المسؤوليه اللي كنت ماسكها بنخليها كان كملت فيها نطلع من مشكله نخش لغيرها..
هز المهدي راسه وقال..
/عندك حق..
🍃ومن جلسة المهدي مع صديقه لجلسة سلطانة قلبه مع بنته..
كانت سدرة صغيره تسأل في مرت بوها عن الماضي البعيد..
عن طفوله امها وصداقتها هي وسدرة المنتهى..
وسدرة الكبيرة تجاوب بكل حب واريحيه..
☘سدرة المنتهى وهي شاده في يدها ألبوم صور فاتحاته بينها وبين سدرة المهدي..
/هادي اللي لابسه قفطان قهوي عيشه..
سدرة بضحكه..
/محلاه شعرها كيف كان..
سدرة المنتهى:ايه شعرها كان زي الميه طويل وع جبهتها قصة"جمة" مغطيتها..
سدرة المهدي؛كانت مشاغبه ولاهاديه!؟
سدرة المنتهى:كانت عاقله هلبه وهاديه ومش متاع مشاكل بكل كانوا يستغربوا فينا كيف صاحبات وطباعنا مختلفه عن بعض هلبه..
ابتسمت سدرة المهدي وقالت..
/كنتوا صاحبات هلبه هلبه!؟
شدت سدرة المنتهى دموعها بالقوة وهي تقول بإبتسامه..
/كنا اكثر من الخوات..
سكتت سدرة المهدي وهي تشوف لأمها في الصورة بعدين ردت نظرها لمرت بوها وقالت..
/باهي كان هكي..
"كيف ماما خدت منك بابا؟!"
السؤال كان قوي ع سدرة لدرجة حست بالدم جمد في عروقها..
انصدمت في اللي طلعت تفكر فيه سدرة المهدي..
معقوله البنت كانت واخده فكره ع امها انها خدت بوها من المراة اللي يحبها!!؟
لازم رد سدرة يكون مقنع لازم يحول من قلب البنت اي شي سيء ناحية امها..
رسمت ع وجهها ابتسامه حلوة وقالت..
/انتي من قالك الدوة هادي!؟
سدرة المهدي؛سمعت من هلبه ناس قالوا بابا كان يحبك بعدين تزوج صاحبتك..اني نشوف ونعرف مش صغيره راهو نعرف ان اللي دير هكي عمرها ماتكون صاحبه..لكن مش فاهمه..مش فاهمه كيف صار هكي ماما مراة كويسه هلبه وتعرف ربي كيف دير هكي!!؟
سدرة المنتهى قاطعتها وهي تسمح ع راسها وتقول..
/استني شويه حبيبتي استني..اول شي يابنتي امك مراة تربت احسن تربيه تربت ع الدين واللي يتربى ع الدين مايديرش الغلط..تاني شي امك احسن صاحبه عرفتها في حياتي اني وياها قعدنا صاحبات انتي واعيه للحاجه وشفتينا كيف كنا مع بعض..اخر شي حبيبتي اللي خلا ماما تتزوج بابا النصيب يابنتي..نصيب امك وقتها كان بوك وهدا اللي يبيه ربي واللي يبيه ربي يصير مهما كان..
نزلوا دموع سدرة المهدي وقالت..
/معناها ماما مادارتش شي مش كويس في حياتها؟؟
ضمتها سدرة لحضنها وقالت والدموع ينزلوا...
/امك مادارت في حياتها كان الباهيه..كانت احسن بنت وصاحبة وكنه وزوجه وام..امك طول عمرها كانت باهيه ومادارت كان الباهي يابنتي..
🍃🍃
حتى وان غلطت عائشة يوم من الأيام اخطاء كبيره لكن اعترفت بيها وصلحتها وقدرت تنسي سدرة كل آذى تسببتلها فيه..
هو الاعتراف بالخطأ وبحجم الخطأ وبذل الجهد في اصلاحه والتكفير عنه يخلينا ننسوه ونتخطوه ونكملوا مع الناس اللي نحبوهم..
وفي المقابل المكابرة والتجاهل يديرول العكس تماما..
يكبروا حجم الخطأ ويزيد يكبر حجم الفجوة اللي تصير بين الطرفين..
🍃لكن غرفه حاليا وصلت لمرحلة مش مستنيه في الاعتذار نهائي..لامش حيغير أي شي بالنسبه ليها..
☘هي توا مقعمزه في دار البنات تشوف في طوبى وهي تجرب في ماركه مكياج معينه لعيونها..
كملت مكياج العين وشافت لغرفه وقالت..
/شن رايك!؟
غرفه بإبتسامه اعجاب..
/فضيع..
ابتسمت طوبى وقالت..
/خاطرك تجربي..
هزت غرفه راسها بإيجاب وهي مبتسمه..
طوبى بحماس..
/تعالي تعالي..
ناضت من ع الكرسي وغرفه جت قعمزت في مكانها وبدت طوبى بحماس وشغف تزين في عيونها..
🍃وبرا الدار..
اريج تلعب مع الصغار وهي في قمة الاستمتاع والسعاده..
معاهم تنسى في همها حرفيا...
وزي ماقال دوستويفسكي..
...تشفى الروح بالتواجد مع الأطفال....
🍃وهذا اللي صاير مع نضال وهو يلاعب في يحيى..
كان مركبه ع ظهره ويزحف بيه..
نسرين بخوف:رد بالك يانهاري راهو يطيح!
نضال بإنزعاج:كان تسكتي انتي مايطيحش..
سميرة بضحكه:خليه خليه الكيد ع هو بيقعد يشكي من ظهره بعدين...
نزلهم بهدوء وهو يقول..
/امك النشفه فسدت علينا برا اضربها..
وينطلق يحيى لأمه ويضربها برجله ع رجلها.
نسرين بزعل:هكي تضرب ماما يايويو! برا معاش تكلمني..
نضال:قوللها طز فيك..
يحيى قلد خاله وقال لأمه نفس الكلمه بلغه طفوليه..
ضحكوا عليه..
نسرين:تو تشوف بعدين شن نعلم صغارك ياشيخ..
نضال:لاشيخ لاشيوخ بعدين اني مش متزوج بكل بنكمل عمري هكي تريحي..
نسرين:غير اعبى..
سميره بضحكه:امك حايزتله بنت خالتك ام الشعر الليمي..
نسرين بإزدراء:وووك عليا هدا اللي ينقال عليه بدل غزلانه بقرود..
نضال قعد يشوفلها بنظرة تعبر عن قوة الوجع اللي تسببتله فيه اخته بزلة لسانها..غير نظره لسميره لقاها تشوفله بإبتسامة اسف..
اما صاحبة زلة اللسان انربط لسانها ومعاش قدرت تقول شي..
هو توا لازم ينسحب ناض بهدوء ومشي طلع ويحيى لحقه وهو ينادي بإسمه..
غمضت نسرين عيونها بشده وقالت..
/عطيني بكشة..
سميرة بحزن:مولي حساس بزياده من الموضوع هدا بعد ماخوه خدي سدرة.
شافت نسرين لسميرة بضيق وقالت..
/سامحيني في اللي بنقوله توا مرات يضايقك..بس فراق اريج ونضال صار بسبب غيرهم..عملة خوي الجالي مع طوبى هي اللي فرقتهم عن بعض..
سميرة؛عارفه ومتفهمه..وقتلك قبل لو يقولي نبيها والله اني اللي نكلمهاله..
نسرين بضيق:باهي مش انتي غدوة بتمشي غادي مع سدرة كان فيها كيف حاولي تجسي نبض اريج..
ابتسمت سميرة وقالت..
/والله في بالي من لما المهدي قال بيخطب سدرة قلت اهو انفتحتلهم الطريق لكن المشكله الكبيره في امك من غير شي ناقمه عليه ومقاطعاته مش بعيد كان خدي اريج تتبرا منه مرة وحده..
نسرين؛امي طبها معاملة المهدي يدير مافي راسه ويخليها غصب عنها ترضى بيه..
سميرة بأسف؛لكن نضال مش زي المهدي مقاطعة امه ليه واجعاته هلبه مش قادر عليها..
نسرين بضيق..
/تو مش نضال اخر ماجابت مفروض هو المدلع واللي مازيه حد لكن اللي صاير العكس نضال حظه مع امي قليل..
سميرة بإستياء..
/ماعندي مانقول غير ربي يهديها وخلاص..
نسرين:آمين..تنهدت بعدين قالت..مازال صغار طاهر مش مروحين من حوش حناهم!؟
سميره؛ياحنه مش مروحين لين تروح امهم،المريضه هادي ماتبيهمش يقعدوا معاي..
نسرين بإزدراء؛مريضة حق..ااه الله يرحمك ويسامحك ياطاهر..
🍃🍃🍃🍃🍃
الساعه 11:00ليلا..
طلعت سدرة من دار سميتها بعد مارقدت ردت باب دارها شويه ومشت توجهت لدار النوم..
وهي ماشيه شافت ضي دار الاولاد مفتوح قدمت وهي تقول..
/يزن..محمد..
"خشي خالتي"..
قدمت سدرة لقت يزن بروحه واقف ع طاولة الكوي يكوي في حوايج المدرسه..
ابتسمت وقالت؛ربي يعاون..
يزن بإبتسامه؛اجمعين..
سدرة؛مالا وين محمد!؟
يزن:مشي يبات عند عمي التارقي..
سدرة؛مامداير في الناس هالتارقي.
ضحك يزن وقال..
/راجل اجتماعي وعنده قبول..
ابتسمت سدرة وقالت..
/سلمه اللي يحلل في الشخصيات..ماتبي شي!؟
يزن بضحكه؛لالا بارك الله فيك..
سدرة:فيك بارك الله خوي..ومشت وخلاته يضحك ..
توجهت لدار النوم وخشتلها لقت راجلها واقف ع الدولاب وهو لابس كانتيرا وسروال توته "بيجامه"وشعره مبلول
شهقت وقالت..
/نهارك احرف..اسود..مغبر!
هو التفت وشافلها بفجعه..
جاته وهي تقول بعصبيه..
/معقوله هكي يامهدي معقوله!..شافت للدولاب وجبدت منه فانيليه صوف رقبتها طويله وهي تقول..تحساب روحك في عز الصيف..كانتيرا وشعر مبلول في شهر 2 عز الصقع..وقعدت تلبس فيه وهي تقول..شن الاستهتار متاعك هدا..شني!!..لبساته وحطت يدها ع شعره وقالت..يقطر..لاحول ولاقوة الا بالله..مشت خدت الفوطه من ع السرير وجاته بيها وحطتها ع راسه وبدت تنشف فيه وهي تقول..ماتبي الا طريحة باهيه..
نزلت الفوطه وشافت لوجهه لقاته شاد ضحكته قالت..
/تضحك!؟ لهالدرجة الاستهتار!؟
هو حرك راسه بالنفي وقال..
/مانضحكش!..
هزت راسها وقالت..برا قعمز غادي برا..
شافلها شويه بعدين مشي قعمزت وين مااشرتله..
وهي مشت حطت الفوطه في الحمام بعدين خشت للدار خدت الاستشوار وجاته بيه..
المهدي:ياودي مش لازم نشفتيه بالفوطه ساد..
مابتش ترد عليه..شغلت مجفف الشعر وبدت تجفف في شعر وهو استسلم وقعد يستنى فيها تكمل..
بعد ماكملت قالت..
/اخر مرة دير الحركه هادي تعاودها تشوف مني شي عمرك ماشفته..
شد ضحكته والتزم الصمت..وهي مشت ردت الاستشوار لمكانه..
المهدي:غدوة ماشيه لحوش ماليك ولا!؟
التفت وجاته وهي تقول..
/ايه..وياويلك تطلع من الشارع تقعد في المطحن الساعتين اللي عندك وتجيني تروح بيا..
المهدي:في امور لازم نشوفها بروحي..
سدرة:مهدي ارجوك ماتعصبنيش ابعت حد يشوفلك انت ماتطلعش من الشارع بالله عليك.
المهدي:ياسدرة اللي كاتبه ربي بيصير..
سدرة؛بعد ماناخدوا بالاسباب..بالله يامهدي اسمع الكلام وماتوجعش قلبي..
بإبتسامه جانبيه قال..
/سلامة قلبي من الوجع..
شدت ابتسامتها مكابرة وقالت..
/خل نمشي نجيبلك ميه..
المهدي:غير فكينا من الليم خليها ميه عاديه..
مشت طلعت من غير ماترد عليه..
حرك راسه يمين ويسار بعدين قال بإبتسامه..
/مادير الا ف راسها...
🍃🍃🍃🍃🍃
"ماتبيهاش تعرف"
غرفه؛ايه مانبيهاش تعرف توا خليها تعيش لنفسها شويه سادها ماعطتنا من عمرها وهي مشقيه روحها معانا..
طوبى وهي تشوف لغرفه بحب قالت..
/والله هدا اللي كنت نفكر فيه بس قلت نشوفك انتي شن تبي..
غرفه:غدوة تو ناخد منك قفطانك هداكا المورد مالبسيشي بكل ونقول لأريج تعطيني تعليقتها ماشافتهاش عليها حتى هي مع شوية مكياج يمشي الحال..
هزت طوبى راسها بالموافقه..
غرفه؛باهي بنمشي نرقد تصبحي ع خير..
طوبى؛قدامك كل خير..
مشت غرفه طلعت من الدار وطوبى بعيونها معاها وهي تشوفلها بنظرات اعجاب..
اعجاب بالتغيير اللي بدي يولي واضح وجلي في شخصيتها حست ان اللي قاعده تمر بيه غرفه من محنه معاه منحه كبيرة..
ابتسمت بإمتنان وهي تقول..
/حتى قضاء الشر فيه خير..سبحانك يارب..
🍃🍃🍃🍃🍃
تاني يوم..
الساعه 10:30صباحا..
خشت سيارة عسكريه لشارع القهوة اللي يقابلها من اهل الشارع يسلم ع صاحبها وهو يرد في السلام..
لين درس بيها قدام حوش جده..
نزل وهو لابس البدله العسكريه الشتويه وفوقها كبوط"معطف" عسكري اخضر..
مشي بطريقه للباب دق عليه..
شويه وجاه صوت مرت بوه تقول..
"منو"
حسين بإبتسامه؛حسين..
فتحت الباب وهي مدرقه وراه..
خش سكرت الباب وهي تقول ببهجه...
/مرحبتين مرحبتين بأفندينا..صفيه ياصفيه الافندي جي تعالي..
حسين بضحكه:وطي صوتك..
هاديه بضحكه:تحمست..
ع جية صفيه تجري لما شافاته قالت بلهفه..
/وليدي..وضماته بقوة..
وهو حضنها وقال..
/يام..فكينا من النكد..
تباعدت عنه وهي شداته وقالت بنبرة باكيه..
/شن حالك يما وشن صاير فيك!..
حسين وهو يمسح في دموعها قال..
/خلينا نخشوا داخل ونهدرزوا صقع عليكم..
حاوط امها من كتافها بذراعه وشاف لهاديه وقال..
/هيا خشي..
ضحكت وهي تمسح في دموعها ومشوا مع بعض وخشوا للحوش وهما يهدرزوا..
🍃🍃🍃🍃🍃
الساعه 12:45قبل الظهر..
كانوا مروة ومناسك ومعاهم زميله ليهم في الفصل طالعين وقت الانصراف..
وقفوا قراب من الباب وهما يراجوا في الباص..
البنت اللي معاهم قالت..
/بنات ردوا بالكم تشبحوا..في سيارة سودا عليه مرشها مظلم ليا ايام نشوف فيها درس قدام المدرسه في المرواح واول ماتروحوا في الباص تلحق فيكم..
مروة بشي من الخوف..
/حتى اني لاحظتها ليا فتره لكن نحساب روحي نتوهم..
مناسك بخوف..
/حي علينا زعمه منو هدا!!؟
🍃اللي تسألي عن هويته يامناسك قاعد بعيونه الرزق يراقب في صاحبتك بنظرات يسرق فيهم سرقه..
جاه اتصال..رفع تليفونه..ولما شاف المتصل حرك راسه يمين ويسار بعدين فتح الخط ورد..
/ايوه..
"قدام المدرسه ولا"
معين؛ايه يام معكسر قدامها واهو نراجي في باصهم امتى يجي بش نطلع وراهم..اوامر تانيه !!؟
"لالا وليدي ماعنديش اوامر تانيه توا الاوامر التانيه بعدين يجي وقتها..
☘وسكرت عليه وهي عاضة ع شاربها وتضحك..
بنتها جنبها قالت بضحكه..
/مش عارفه كيف ولى يسمع في كلامك هكي!
فهيمه:ماك حمارة كانك مش حمارة راك عرفتي..هو يبي هكي اصلا غير كان يدور في سبله واني درتهاله..
:متأكده انه يبيها!؟
فهيمه؛بيهبل عليها غير مايبينش..هي الحاجه اللي قاعده بينها بينه كان تحولت بإذن الله يخطبها طول..
:حاجه شني يام!؟
فهيمه:قرضي الخضرة زين قرضي..
ضحكت بنتها وهي تحرك في راسها يمين ويسار...
🍃🍃🍃🍃🍃
الساعه 5:00عصرا...
رفع المهدي سميرة وسدرة لحوش طوبى...
وحوش طوبى كان فيه وقتها ضيوف جايين يباركوا لسدرة اهل الفاندي..
استقبلوها مع اهلها وهما يغنولها في احلى شتاوات خلوا الفرحه في قلب سدرة تزيد تكبر..
🌼🌼🌼
قعمزوا في الصاله يهدرزوا في احلى هدرزة وجوهم كان حلو..
سدرة في عز الهدرزة مررت نظرها ع البنات وثبتاته ع غرفه..
غرفه كانت تحاول تمثل انها جوها عادي..
بكامل اناقتها والابتسامه مافارقتش وجهها..
عرفت طوبى كيف درق اثار الحزن والارهاق بالمكياج لكن ماقدرتش لاهي ولاغرفه يدرقوا نزول وزنها الملحوظ..
🍃سدرة من لما عرفت بالمشكله اللي صارت بين عبد الرؤوف وغرفه وبمعايرته ليها بمختار تأكدت من نظرتها ف عبد الرؤوف...
كلام مختار عنه كذباته..بس صدقت احساسها فيه من بداية زواجهم هو وغرفه..🍃
☘فهالوقت..
استفردت سميره بأريج في الكوجينه وصدمتها بالموضوع اللي فتحاته معاها..
سميرة:ماتستغربيش..خوي الله يرحمه ويسامحه مابتموتي وراه..من حقك تكملي حياتك مع راجل يحبك ويستاهلك يااريج ونضال يستاهلك يابنتي..
بملامح متجهمه قالت اريج لسميره..
/لامايستاهلنيش ياخالتي وماتسألنيش علاش الموضوع هدا بالنسبه ليا مفروض ياريت معاش تفتحيه معاي مرة تانيه..
سميره وهي مستغربه ردة فعلها قالت..
/ع راحتك بنتي في النهايه كلها نصيبات وربي يبعتلك اللي يستاهلك..
*********
طوبى بصدمه؛علاش!!؟
اريج بإنفعال..
/شن علاش متاعك هادي!؟ ناسيه شن دارلي قبل ناسية الكلام اللي سمعهولي!؟ تبيني نرضي بيه بش يدير فيا مادار رؤوف لخالتي!! نولي غبيه وحمارة لو مانتعلمش من اللي صار معاها ونرضى بواحد عايرني وهاني..
معاش قدرت طوبى ترد عليها..اللي قالاته اريج صح في نظرها..
نضال مش حيكون خير من عبد الرؤوف ومادام هانت عليه قبل ووجعها هالوجع حتهون عليه بعدين ويكرر نفس الغلط..
🍃وهما في الدار..
وغرفه برا ضم في الحوش والصغار يلعبوا حواليها..
"سدرة"
اواب بفرحه:سونا!!
وطول طلعوا يجروا للباب هو وخوه وجنه..
اما غرفه مشت تجري للكوجينه خشت ع سدرة وصفيه وهي تقول..
/حسين ينادي فيك..
صفيه بإبتسامه:يبي يباركلك..
سدرة بضحكه:استاحشته الشفش..ومشت طلعت من الكوجينه..
غرفه لصفيه:بالله خالتي بري معاها ودخليهم للمربوعه الخارجيه صقع ع الصغار..
صفيه:حاضر بنتي..
ومشت طلعت ولحقت سدرة..
تنهدت غرفه بضيق بعدين مشت طلعت وتوجهت لدار البنات.. 🍃🍃🍃🍃
في المربوعه الخارجيه..
كانوا اواب ومهاب مقعمزين في حجر حسين لاهيين بتليفونه..وجنه مقعمزة في حجر صفيه..
سدرة:الحمد لله الامور تمام والامن مستبب..
حسين:شديتهولك ع تركينه وعرفته اللي ليه واللي عليه..
سدرة بضحكه:سلم وخيي ياربي..لكن المهدي عارف اللي ليه واللي عليه طمن بالك..
حسين:الحرص الواجب..شاف للاولاد ومسج ع رووسهم وقال..شباب وين بابا!؟
صفيه بضحكه تخفي بيها توترها..
/ع اساس بيعرفوا يقولولك وينه..!
اواب..
"هوش"..حوش..
سدرة:طلعتي انتي اللي ماتعرفي شي ياامي..
ضحك حسين بعدين قال..
/ تو ندوره...
🍃🍃🍃🍃🍃
وعبد الرؤوف ليلتها ماروحش لشارع القهوة مشي قعد في شقة واحد من اصحابه..
في عز الليل وهو مرافق السهر...الشوق وصل لأقصى مراحله..
رفع تليفونه وحط ع رقمها..كان حيضغط ع زر الاتصال لكن في اخر لحظه تراجع واختار يخش ع الفيس يشوف حسابها..
🍃غرفه كان ليها فترة مافتحتش النت والليله قررت تفتحه وتخش ع الفيس..
قعدت تتصفح وتقرا عن اخبار الحرب والكورونا..لين جي قدامها منشور نازل في احدى الصفحات
كان في ابيات شعر مكتوب فوق صورة معبرة عن الفراق..
الابيات كانت صعبه شويه قعدت تبحث ع شرحها لين لقاته وحساته يعبر عنها...
نسخت الابيات ونزلتها طول في الصفحه مع الصورة...
🍃 قَدْ نَالَني مِنكَ ما حَسبي بهِ وكَفَى
يامَنْ تناهيتُ في إلطافِهِ.. فجفَا
عَلّلْتَني بالمُنى، حَتّى إذا عَلِقَتْ
بالنّفْسِ لم أُعْطَ مِنْ أسبابها طَرَفَا
غيّرْتَ عن خُلقٍ، قد لانَ لي زمناً
لِينَ النّسيمِ، فَلَمّا لَذّ لي عَصَفَا
لا يحبطنْ عملٌ، أرضاكَ صالحُهُ
فَفي سَبِيلكَ أنْفَقْتُ الهَوَى سَرَفَا🍃
مسحت دموعها اللي نزلوا وهي تقرا فيهم..
🍃وطوبى واريج اللي شافوا منشورها وقروا الابيات دمعت عيونهم لما وصلهم احساسها..
🍂وهو قراهم وفهم المقصود منهم..زاد عذاب قلبه وشوقه ماباش يرحمه..
خشلها ع الماسنجر وبدي يكتب..
🍃هي كانت حتسكر النت وترقد..لكن الرساله اللي وصلتها منعتها..
عرفتها منه..حست بضيق شديد..ترددت هلبه قبل لتفتحها وتقراها وفي الاخير حسمت امرها وفتحتها...
(تتفكري اول مكالمة صارت بيني وبينك!؟مش عارف اذا كنتي مازال تتفكريها.. تعرفي لو كنتي وقتها صافيه وصادقه معاي راهو خليت الموت اهون عليا من اني نجرحك بنظره)
ابتسمت بأسف ودموعها نزلوا وكتبت ردها ليه وبعتاته..
(الماضي معاش يولي والحاضر معاش قادر تقبله..اني وياك وصلنا لطريق مسدود خلاص معاش يصير منا..)
تأخر هلبه في الرد ولاكان يكتب اساسا..
مسحت دموعها وسكرت النت وحطت التليفون جنبها وقعدت تبكي بصمت..
🍃لكن هو كان يبي بحرقه وصوت مكتوم وقلبه مفطور من الحزن..
🍂🍂🍂🍂🍂🍂
موتن يا أشواق
صار فراق مابعده الفراق
شن مازال
أرحل ياحنين
عشنا امعاك في أجمل سنيـن
وذقنا العشـق رغم الحاسديـن
وصار فـراق من بعـد الوفاق
ارحم يا ارياف
يكفي خـلاص فيا الله خـــاف
راني بديت في نفسي انعـاف
ونومي بيـك ماعمـراش راق
جفّي يادموع
صار فراق مابعده رجـــوع
وحراب الياس غاصت في الضلوع
ودمع القهر على خدي انســـاق
غيبي ياصور
راني انموت وين صورة اتمر
جيّـك دوم في الذكرى ايجـر
رغــم العزوم ماهم برقــّــاق
تعالى يامنام
حرام عليك واللـــه حـــــرام
فراق وبعد واخلاف الاقسام
وانت اتزيد في مر المـــذاق
خلوني في حالي
من الفراق يكفي ماجـرالي
مانحساب يا أعز الغوالـــي
انا والحزن بنعيشوا رفـــاق
واللي صار ماكانش فبــالي
ايباس العود واطياح الاوراق
وغير الله ما عنديش والــي
بيــا ايروف قسّـــام الارزاق
#عرجون_الفل
#طوبى
...يتبع....
