#طوبى "جنة طوبى"
#جمان_فريد
#الجزء_117"رحلة حب وحرب"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 والغيرة في الحب
تجعلنا أحيانًا مثل الأطفال
لا يرضينا سوى الإمتلاك🍃
_________________________________________
يوم الأحد..
الخامس والعشرين من شهر محرم..
13سبتمبر...سنة2020..
الساعه 6:30مساءا..
في شقة فايزة اللي بعتت بناتها لحوش الواعر..
كانت مقعمزة مع صديقتها نسرين تسمع فيها تشكي وتبكي وقلبها موجوع ع حالها..
🍃نسرين ببكي:ياريتك شفتيها امه هادي لما جت خطبتني تشكر فيا وتحط وكان تلقى تروح بيا طول.. تي اني اصلا لما جو خطبوني تفاجئت لأني رديت ربيع قبل لما فتح معاي موضوع الزواج..وتوا ويعاملوا فيا وكأني هاربه معاه ولافرضت نفسي عليه وعليهم..اقسم بالله يافايزة امس تمنيت ربي ياخدني بش نرتاح من هالعيشه السودا والبخت الاحرف..وقعدت تبكي بالعبرة..
تأثرت فايزة لين نزلوا دموعها وقالت..
/باهي هو شن قلبه عليك هالقلبه!؟
بنبرة باكيه ردت..
/من اللي صار مع الجالي وهو متغير وزادت طينتها خديجة لما ضربتني اشبح من وصلها لأمه الشيطانه وهي عاد وصلتهاله ع قد ماحاولت نكذب كلامها ماصدقنيش وعاد جت بعدها مشكلة راما وانتي عارفه الدوة اللي طلعت عليها من بعدها الراجل معاش ولى طايقني يافايزة..
فايزة بتعجب؛باهي انتي شن دخلك في هدا كله!!؟
نسرين وهي تبكي بحرقه..
/امه وخواته حسبي الله ونعم الوكيل فيهم زادوا عبوله راسه وكرهوه فيا..
فايزة بأسف:الصراحه مصدومه ماتوقعتش ربيع يطلع هكي..
حطت نسرين ايديها ع بعض وشدت عليهم وهي تقول..
/مش هكي وبس..حساته حاط عينه ع وحده تانيه..
اتفاجئت فايزة..
ونسرين كملت بألم..
/وحده صاحبة اخته الافعى سهى شفتها امس لما مشيت لحوشهم كان تشوفي نظراته ليها ولابصارته معاها ولاالحقيرة سهى كيف دير في حركات بش تقربه منها قالتله بدير عيد ميلاد ولدها في المطعم متاعك..
فايزة بإستغراب؛ولدها؟
نسرين رشفت وقالت..
/ارمله هي ومن عمر الحقيرة سهى..
فايزة؛بالك غير تتوهمي يانسرين..
نسرين حركت راسها باالنفي وقالت..
/لالا يافايزة لا اني اللي نفهم في الحاجه هادي كويس نزبط الوهم من الحق فايزة بضيق..
/معقوله هكي!! معقوله ربيع يطلع هكي!
نسرين بقهرة؛من بختي الاسود يافايزة من بختي الاسود..ولابالك اللي درته في طوبى لقيته يافايزة..
فايزة بألم..
/لاحول ولاقوة الا بالله..
نسرين؛هدا علاش مانبيش سدرة تعرف ماتقوليلها شي يافايزة عارفتها بتتشمت فيا
فايزة بإبتسامه اسف..
/معقوله بعد هدا كله مازال ماعرفتيش سدرة يانسرين!؟
نسرين؛سدرة حتى لو رجعت علاقتها بيا قاعده تلقح وترمي في الكلام مرة مرة اللي صار مش ساهل يافايزة مش حتعديه بالساهل وكأنه ماصار..
فايزة بحزن..
/والله مااعارفه شن نقولك يانسرين
نسرين بحسرة:مانبيش نسمع كلام يافايزة اني جيتك بش تسمعيني ونبي منك حاجه تانيه
فايزة بإستغراب..
/شن هي!؟
🍃🍃🍃🍃
"نبيك ترفعني غدوة لحوش خوي شكري"
عبد المطلب وهو يمرر في نظره ع الجنان ويفكر قال..
/مطيره كيف طالعه من الكورونا ياهاديه..
هاديه بضحكه؛خلاص خليني محجورة غادي اسبوعين ..
شافلها بطرف عينه..
ابتسمت وقالت..
/غير تربح طلوبه الغالي ارفعني..
عبد المطلب:بشرط تفكيني من جو خودلي حاجه نخش بيها ساد الهديه اللي خديتها في اول مشيه..
هاديه؛دايرة صفيرة حلويات بنرفعها معاي..
عبد المطلب؛باهي غدوة بعد العصر نرفعك..
هاديه رفعت ايديها وهي تدعي...
/ياربي سلم راجلي مامخلي حاجه في خاطري..
هو بضحكه؛ماتبي الا كف..
هاديه بإبتسامه وهي ترقص في حواجبها قالت.
/ضرب الحبيب زي اكل الزبيب..
عبد المطلب بضحكه..
/تي خشي ياعن شكلك خشي..
ضحكت ومشت خشت للحوش وهو حرك راسه يمين ويسار وتوجه لسيارته..
لما وصل فيها جاه اتصال طلع هاتفه من جيبه ولما شاف المتصل بدت ع وجهه ملامح المفاجأة..
🍃🍃🍃🍃
"والله اني في مواقف المواساة فاشله الحق"
محمد المهدي:مش لازم تواسيها بالكلام امشي شوفيها هدرزي عليها غيريلها جوها بنت خالتك هادي زي اختك..
فرح بإبتسامه..
/حاضر حاضر لكن قولي شن سر هالاهتمام!؟
هو قال؛عشتي برا عامين معاش وليتي تتحشمي..
فرح بضحكه؛لامن قبل مانتحشمش اني..
ضحك بعدين قال..
/واجعني حالها ومش هي بس حتى خوتها..
فرح بإشمئزاز؛كلا محمد هدا حاشى اسمه مايوجع حد شوفه كيف رجع عاش حياته عادي وكأنه مادار شي..
محمد المهدي؛وين تندري عليه انتي!؟ معاش تحكمي ع حد من الظاهر..
تنهدت وقالت..
/ياسيدي باهي غدوة ان شاء الله ناخد اختي ونمشولها..
ابتسم وقال؛منورة..
فرح بضحكه..
/تبي حاجه تعالى في اي وقت مايحشمك شي..
ضحك وقال..
/بري خشي داخل..
ضحكت ومشت خشت للحوش..وهو ابتسم بعدين مشي طلع من باب الحوش البراني..
شاف يمينه لقي خوه يزن واقف مع ولاد عماته ومعاهم واحد من ولاد عبد الفتاح..
سمع باب حوش طوبى انفتح غير نظره ليه..
شاف تاله طالعه..غير نظره لخوه لقاه يشوفلها..
ضحك ضحكه خفيفه ورد نظره لحوش طوبى شاف معتز طالع ولاحق تاله لين وصل فيها وقعد يمشي معاها وهما يهدرزوا..
رد نظره لخوه بسرعه شاف ملامح وجهه تقطر غضب وغيرة..
☘معتز:العيشه غادي حلوة ومريحه لكن في شي هني ماتلقيشي غادي..
تاله؛يقولوا من طلع من داره قل مقداره..
ضحك وقال؛مش هكي يامتخلفه يقولوا بلادي وان جارت عليا عزيزة..
تاله بضحكه؛وليت مثقف..
معتز:من زمان..
تاله؛مولي زي الكبار..
معتز؛من يومي..
تاله بضحكه:مبردك..
ضحك وكملوا طريقهم مع بعض للسوبر ماركت..
يزن حاول يتجاهل حاول يطنش ويتغاضى ويقول لنفسه
"انت شن دخلك"
لكن ماقدرش انسحب من وسط رفاقته ولحقهم وعيون خوه محمد وهو مقعمز في القهوة تراقب فيه..
☘وصل للسوبر ماركت وخش..
لقاهم واقفين ع واحد من الرفوف ياخدوا منه ويحطوا في السله..
☘معتز:كثري من الشكلاطه اريج تحبها..
تاله بضحكه؛هاه عرمتها تعريم..
معتز قعد يشوفلها وهي تحط في الحاجات بدهشه بعدين قالت .
/قصدي انتم البنات مش عارف كيف..معقوله تاكلوا في هدا كله!!؟
تاله:لو سمحت اسكت خليني نشري بمزاج
ضحك عليها بإستنكار..
"معتز"
انفجعت تاله لما سمعت اسمه بصوت يزن اللي يزلزل..
شافتله ووجهها ولى احمر..
معتز:اووو يزون..
خداه يزن بالأحضان وهو يشوف لتاله بحده..
تاله فنصت بخوف ولفت ومشت هربت..
تباعد عن معتز وهو يشوفلها ويقول..
/حمد لله ع السلامه..
معتز بإبتسامه..
/الله يسلمك..
☘وتاله ادرقت ورا واحد من الرفوف وهي تراقب فيهم وتقول لنفسها همسا..
/حي..تو وين بيرفعه دماغه ياهمي اكيد بيقول لسدرة معاش تكلميها..تأففت وقالت..لكن معتز اصغر مني ياهمي..
******
سدرة المهدي وهي تتكلم بالهاتف..
/اصغر منك بقداش يعني بشهور بس ياتاله غلط تهدرزي معاه وتطلعي معاه في الشارع..
"ماهو بعتوني ناخد حاجات هو قالي نمشي معاك ماتطلعيش بروحك"
سدرة؛وعلاش ماخداهمش هو!؟
"ماهو في حاجات خاصه"
سدرة بتعجب:وخلتيه يمشي معاك!
"ماهو لما بناخدهم نعرف نوزعه"
سدرة:غلط ياتاله غلط انتي تتصرفي بحسن نيه صح لكن اللي ديري فيه غلط اني بعد بلغت معاش بديت نتكلم مع ولاد العيله هلبه مش انتي تهدرزي وتمشي للمحلات مع واحد براني..
"افف سدرة..باهي قوليلي شن بديري كان خوك قالك معاش تكلميها!؟"
سدرة بمزح؛نقوله عندك حق حاضر..."خزي عليك يابيوع"
سدرة؛باش تتأدبي مرة تانيه..
☘وسدرة حامد مقعمزة معاها وتسمع فيها شن تقول بعد مانهت المكالمه قالت..
/دعشوشه انتي.
سدرة المهدي..
/دعشوشة عينك هدا الصح وهدا الدين..
سدرة حامد قال بضحكه..
/قصدي حني مازال صغيرات؟
سدرة المهدي:تو انتي بلغتي ولا؟
سدرة حامد :من قبل رمضان اللي فات..
سدرة المهدي:معناها لازم تلبسي حجاب ياابله..
قالتلها؛فرح اختي لبساته السنة اللي فاتت بس..
سدرة المهدي؛غلط يابنتي غلط..
🍃هالنقاش كانت تسمع فيه سدرة المنتهى وهي تحط في هاتفها في الشحن..كانت مبتسمه بحزن ودموعها ينزلوا وطيف الذكريات الحلوة يحوم حواليها..تنهدت بألم وقالت..
/الله يرحمك ويسامحك ياعويشه..
🍃🍃🍃🍃
تاني يوم...
الإثنين..
السادس والعشرين من شهر محرم..
14سبتمبر..سنة 2020..
الساعه 6:00مساءا..
في سانية العمه كامله كانت خديجه ماشيه تصب للسعي في عشاهم وبشير وهو مقعمز مع عمته في مكانها المفضل يراقب فيها بإعجاب..التفت لكامله وقال..
/تو هدي يطلع عليها ترعى سعي ياعمتي!؟
كامله بنرفزة:مع لبسها هدا اكيد لا..
هو بإعجاب شديد..
/كيف التركيات ماني عارف الغبي اللي كان واخدها كيف خلاها..
كامله؛الزين زين الروح ياولدي مش الشكل..
بشير بهيام:كلا خديجه ياعمتي زينه من كل جهة..
قعدت تضحك عمته وهي تحرك في راسها يمين ويسار..
"يما"
بشير؛مفيده..
كامله بصوت عالي؛تعالي تعالي..
"جايبه معاي ضيف"
كامله بإبتسامه..
"مرحبتين بيك وبيه"
بشير:منو زعم!؟..
كامله:تو نشوفوا..
شويه وبانوا عليهم مفيده وجمال..
بشير؛اوو جمال..وناضله بصعوبه ومشي بيسلم عليه..
ومفيده فاتت من حداه وهي تشوف لخديجه من بعيد تتمشى في السانيه..لابسه بلوزه طويله للركبه ع سروال جينز وحاطه الوشاح ع راسها حط..
قعمزت حدا امها وقامت الخمار وهي تقول..
/طارحه اليوم!؟
سلمت عليها امها وقالت..
/ليها يومين معاش تلبس في قفاطين معاش قدرت عليها بكل لسانها يدوخك..
ضحكت مفيدة..
ع جية جمال مع بشير ابتسم وهو يقول لكامله..
/شن حالك ياخالتي وشن حال صحتك..
هي قالت بإبتسامه؛الحمد لله ولدي..الحمد لله ع سلامتك..
قعمز جنب بشير وقال..
/الله يسلمك ياخالتي..
كامله؛شن حالك شن داير؟
جمال؛والله ماشيه والحمد لله..
☘وهما يهدرزوا وبشير هايم مع خديجه ومفيده تشوفلها..انتهزت الفرصه لما قالت..
/خديجه خدت ع حياة المزارع..
شاف جمال وين ماتشوف مفيده..
كامله؛تحسي نفسيتها تحسنت شويه..
جمال ضيق عيونه وقال..
/من تكون؟
مفيد؛بنت خالي محمد..
رفع حواجبه وقال..
/بنت الحاج محمد شنيبه؟
كامله؛ايه..
مفيده:مسكينه اطلقت بعد 17عام زواج وانحرمت من ضنوتها..
فنصت كامله..
جمال بإستغراب..
/بعد 17عام!؟
بشير:كانت واخده واحد حمار مايفهم طلقها بش ياخد ارملة خوه..
فنصت مفيده مع امها بصدمة مضاعفه..
ماتوقعوش خديجه تحكي شي زي هدا لبشير..
جمال ضيق عيونه وقال..
/ربي يعوضها خير..
مفيده؛ايه والله..
كامله ضميرها ماهنهاش قالت لجمال..
/حتى هي واعرة ولسانها طويل سلامتها الرجاله مايتحملوش طباع زي هادي..
مفيده في نفسها قالت..
"وااك منك يما"
بشير؛تو انتي ياعمتي يومها قلتي اللي كان واخدها مش ليها واحد لقاق ومتاع نسوان..
كامله:هو ايه ماينفعش لكن حتى خديجه طبعها واعر..
مفيده؛شخصيتها قويه وقياديه يما تبي راجل يكون زيها بالزبط..
هما يتكلموا وجمال يشوف لخديجه كيف تتمشى..
كانت تقرب منهم لين وصلت فيهم مالاحظتش جمال كانت في عارصه"عمود حجري'" مدرقاته..
قربت منهم وقالت..
/موفا عندنا..لما شافت جمال اتفاجئت وقالت بإحراج..السلام عليكم..
ردوا عليها السلام وجمال يشوفلها بإبتسامه..
مفيده؛تعالي سلمي مافي حد براني جمال ولد عمي..
وعاد خديجه وطول لسان خديجه حبت تحرج بنت عمتها وعمتها لما قالت..
/مش براني عليك انتي وعمتي لكن عليا براني..
عقد حواجبه وهو مبتسم..
مفيده برفعة حاجب؛زليطني زيك ومن نفس القبيله..
خديجه؛وكانا يقعد ولد عم بنت عمتي..
ضحك جمال وقال..
/قولي ولد سلف عمتي تولي اقرب..
رفعت حاجبها ونزلت عيونها وهي مبتسمه..
مفيده شافت لأمها بإبتسامه وهي ترقص في حواجبها امها غيرت عيونها عنها لجمال..
اما بشير بدت نظرته لجمال تتغير وولى معاش طايق وجوده معاهم..
كامله؛باهي بري ديرلنا قهوة خديج..
رفعت عيونها في عمتها وقالت..
/حاضر..
جمال بإبتسامه..
/سادا مانبيش فيها ذرة سكر..
ابتسمت برفعة حاجب وقالت..
/باهي.. ومشت طول..
جمال شاف لكامله وقال..
/صيف السنه جاكم قوي!؟
مفيده ابتسمت وكامله قالت برفعة حاجب..
/ايه يالطيف وقالوا مازال بتجي موجة حر..
بشير بحده:امتى بتروح للكويت؟
انصدموا كامله ومفيده في سؤاله وفي النبرة اللي سأل بيها..
جمال بضحكه..
/مازال ياغالي نروح في نص عشرة بإذن الله...
بشير؛والله ماعندك مادير بيها هالبلاد مقربعه كاني منك نجي نهارين ونروح طول..
جمال:عندي صغار مايشوفوش فيا الا مرة في العام نستاحش فيهم زي ماهما يستاحشوا فيا..
بشير:وخيرك ماترد امهم وتخليهم معاك!؟
كامله وهي تفنص فيه قالت
/بشير !بشير بملل؛تي غير شن قلنا ياعمتي بس!
ضحك جمال بعدين غير الموضوع وهو يقول..
/شن درتوا مع الكورونا؟
☘واستمروا في هدرزة موضوع يجبد موضوع لعند ماجت خديجه بسفرة القهوة ومعاها مقروض دايراته عمتها..
عطت جمال الاول وهي تقول..
/الفنجان الذهبي..
خداه وهو يسرق في النظر لملامح وجهها وهي ماقامتش عيونها فيه قالتله..
/خود مقروض..
رفع يده ممتنعا..فاتت من قدامه وفرقت ع بشير اللي يبيها تخش داخل وماتطلعش طول مدام جمال قاعد..
وبدون مايقول بشير رغبته خديجه نفذتها فرقت ع عمتها وبنت عمتها وحطت السفرة ع الطاوله ومشت..
بشير قريب طار من الفرحه وعمتها اللي عجبها تصرفها قالت..
/ماشيه دير العشي..
مفيده؛ماشاء الله عليها ماكلتها بنينه وديما يد بيد مع امي..
كامله شربت من الفنجان القهوة وهي تسب في بنتها بينها وبين نفسها..
اما جمال فتح موضوع جديد وهو يشرب في القهوة انسجموا معاه في الهدرزة كامله وحتى بشير لكن مفيدة ناضت خشت داخل..
🍃🍃
دورت ع خديجه في الحوش وفعلا لقتها في الكوجينه باديه تجهز للعشي..
مفيده:يعطيك الصحه ياحنه..
خديجه:سلمك ياحنه..
مفيده؛خيرك خشيتي؟
خديجه؛وشن ندير مقعمزة معاكم؟
رفعت مفيده حاجبها وقالت..
/باهي فكيني من طولة لسانك وقوليلي يومها لما دويتي ع اللبسه كنتي تحكي منك جد!؟
خديجه سيبت اللي فيدها وقالت..
/مني جد وجد الجد غير انتي هبله وفسرتي كلامي بعباطه..انتي يامفيده قاعده صغيرة البسي اللي يناسب عمرك واصبغي بألوان تمشي مع سنك ولون بشرتك..
مفيده وهي تفكر في كلامها قالت..
/باهي انتي شوفي جسمي يمشي معاه الافرول؟
خديجه بضحكه..
/كانك ماتعرفيش ياهلبه جسمك في نساوين يخشوا نوادي بش يحصلوا زيه يشبه لجسم ياسمين صبري تعرفيها؟
مفيده بدهشه؛جديات!؟
ضحكت خديجه..
مفيده؛مالا والله لتتسهوكي عليا ياخديجه..
خديجه بضحكه؛معاش تحلفي..نقولك شن رايك نطلعوا للسوق وناخدلك واحد عملي جربيه..
مفيده؛طبعا هني الطلوع للسوق ممنوع ع النساوين نمشوا ناخدوا من مصراته عندهم حاجات تجنن..
خديجه:ومن يرفعنا؟
مفيده؛نمشوا اني وياك وامي ويرفعنا بشير..
خديجه بإبتسامه وهي رافعه حاجبها..
/باهي المهم نغير جو..
مفيده فردت شعرها وقالت..
/باهي شعري؟
خديجه؛عندي ليك صبغه خيال ان شاء الله يطلعوا يبيعوا فيها غادي..
🍃وخديجه تعطي في بنت عمتها نصائح تبرز جمالها وتغير طلتها نست تماما تعطي لبنتها ولو كلمتين فيهم حن يهونوا عليها مصابها..
لكن الله سبحانه وتعالى مايخلي حد بعت لراما من ينور عليها الظلام اللي اختارت تعيش فيه من حزنها...
🌸فرح:مازال شهر وفوق ياراما يبروا جروح العمليه واثرها يقعد منه حاجه بسيطه..
راما وهي تبكي:شن تقولي يافرح بيقعد منظري خي وياما من دوة بتطلع عليا..
فرح؛طز فيهم سويتي طز ريت هالانبياء والصالحين اللي عايشين وسطهم ماتوقفيش مستقبلك ع خاطر فتفتهم..
راما بحزن؛صعب يافرح..
فرح؛لامش صعب خليك قويه وقد روحك ماتخلي شي يأثر فيك شدي واقري وجيبها امتياز وحطي صوابعك في عيونهم اللي يدووا عليك هادوا..هيا بابنت ياسرك كآبه فاضيه وحزن اهبل نبيك تقري وتنجحي بش نقروا مع بعض العام الجاي راهو اني اللي ضاعت عليا السنه..ورسمت ع وجهها ملامح بكاء مصطنعه خلت راما تضحك من بين دموعها..
فرح بضحكه؛ايوه هو ده..وكانك ع بوك وامك انسيهم تشوفي حالنا حني بابافي جهة وماما في جهة وقاعدين مشردين لكن الحق حياة التشرد احلى..
ضحكت راما وقالت..
/قصدكم معاش بتسافروا خلاص!؟
فرح:خلاص..العيشه غادي غاليه نار وبابا معاش قدر عليها وبعدين حضرت جنابه حتى هو بيتزوج..
راما:عادي عندك؟
فرح بلامبالاة:واقل اقل اقل من العادي وان شاء الله تجيه مراة بنت امها تجيبه للطريق متاع النساوين هدا..
ضحكت راما من قلبها وقالت..
/ان شاء الله تجيه زي مرت بوي حتى هي جاباته للطريق..
فرح؛محلاك لما تضحكي وتاخدي الامور ايزي طنشي طنشي ومعاش دوري حد..
راما بإبتسامه؛بجد شكرا..
رمشت فرح عيونها وقالت..
/عفوا بالنون..
🍃🍃🍃🍃
"مختفي وتليفونه مسكر كلمت راجل بنت عمته تعرفه قالي كان في الكفرة الاسبوع اللي فات وروح لطرابلس"
سامي وهو يصور في منظر الغروب قال.
/ربي يهديك ياراجل اكيد شغلتهم.
ربيع؛لالا عرفت شن نقوله..قتله اني كنت برا البلاد وهدا وين روحت ماتلاقيتش اني وياه..
سامي حرك راسه يمين ويسار بعدم رضا ورجع يصور..
تأفف ربيع بضيق وقالت..
/ياراجل نبي حد نفضفضله ويفهم عليا..
سامي بإبتسامه..
/اني موجود..
ربيع؛والنعم لكن عبد القيوم اكثر حد يفهم عليا في حالتي هادي..
نزل سامي الكاميرا وشاف لربيع وقال..
/تبي تغير العتبه..
بلم ربيع في سامي معاش عرف بشن يرد عليه..
ابتسم وقاله..
/واضح عليك..حتى المطعم اللي في الشارع بتسكره بديت تسحب في نفسك شويه شويه..
ربيع بضيق:مش عارف شن نقولك..لكن تعبت ومليت من لما خديتها والمشاكل تنزل عليا من كل تركينه ووجيج ماليها هلبه..خوها مريض نفسي ضحكت عليه مرته وخدت منه كل شي وهربت..اختها..غمض عيونه وقال..استغفر الله العظيم..
سامي؛نعطيك نصيحهصارحها قوللها النصيب اللي بيني وبينك تم..
ربيع بضيق:مش ساهله هكي ياسامي هي واجعتني شويه الحق وولدها حتى هو واجعني خايف نظلمهم..
سامي؛حتظلمها لو كملت حياتك معاها وانت ماتبيهاش وولدها بوه مازال حي وعنده خوت وخوات..
ربيع شافله شويه بعدين قال..
/تقول هكي؟
سامي؛ومش حتلقى حد يقولك احسن من هالنصيحه ياربيع..
تنهد بضيق وقال.
/بنخسر المهدي..
سامي؛في كل الحالات بتخسره..
ضم شفايفه داخل بعدين رخاهم وقال..
/عندك حق..
🍃ونسرين في حوشها واقفه في الكوجينه تقرض في خضرة للعشي ودموعها ينزلوا..
🍃ربيع ليه يومين يرقد في الصاله وحجته ان الجو في الصاله ابرد من الدار وهي عارفه انها حجه واهيه الراجل خلاص معاش يبيها وعينه من غيرها وقاعد يدفع فيها دفع بش تجي منها هي وتطلب الطلاق ونسرين مش مستعده دير حاجه زي هادي نهائي قاعده تستغبى طول الوقت..🍃
سيبت اللي في يدها لما سمعت هاتفها يرن ومشت طول بتاخده من الصاله وين ماحاطاته في الشحن..
لما وصلت فيه وخداته شافت المتصل قلبها انقبض..
بلعت ريقها وفتحت الخط وردت..
/ايوه مهدي..
"ايوه نسرين كيف الحال؟"
نسرين؛الحمد لله شن حالك انت ومرتك وصغارك؟
"الحمد لله في خير ونعمه..شن حال يحيى"
نسرين؛حال الشطانه..
"سلامته وربي يحفظه"
نسرين؛ويحفظ صغويرتك وخيي..
"نسرين قوليلي صايرة مشكله بينك وبين ربيع"
ارتبكت واخفت ارتباكها بإنكار وهي تقول..
/لالا نهائي..علاش!؟
"الراجل بيسكر المطعم اللي هني وحسيته يكلم فيا من فوق منافسه"
تعبوا عيونها دموع وبلعت ريقها وهي تقول..
/لالا يتهيألك وخيي هو عادي جدا مافيه شي..
سكت شويه وتنهد بعدين قال..
"ان شاء الله خير ان شاء الله خير"
ضحكت تصنعا ودموعها ينزلوا وهي تقول..
/اكيد خير وماهناك كان الخير..
🍃🍃🍃🍃🍃
"والله ليكم وحشة وبالي ديما عندكم لكن مش غابيين في الظروف"
غرفه:معذورة خالتي سميرة..
شافت سميرة لفردوس وقالت بإبتسامه..
/ماشاء الله محلوة ومتغيره..
فردوس بإبتسامه..
/عيونك الحلوة كيف حالك انتي وكيف حال اماليك..
سميرة بإبتسامه:الحمد لله في خيار الخير..
فردوس:دوم ان شاء الله..
سميرة:جايه زيارة ولامروحه؟
فردوس؛لتوا مش معروف..
تفاجئوا غرفه واريج في اجابتها واكثر من تفاجئ آلاء..
🍃فردوس من لما سمعت باللي صار لطوبى وهي مهمومه وحست بندم شديد اللي قعدت المده هادي كلها بعيد عنها لهذا بدت تفكر تقعد وتخلي معتز يروح مع اخته وهي مطمنه عليه معاها🍃
☘وفي الوقت اللي حلت فيه سميرة ضيفه ع بنات الواعر
كانت صفيه مع بنتها اميمه في حوش ولدهم يوسف يعولوا لعزومه دايرتها جهينه لأهلها..كانت تبي تعاونهم لكن صفيه حلفت عليها مادير شي..
بعد ماجهزوا كل شي قعمزوا مع بعض في الصاله يهدرزوا لعند ماانسحبت من جنبهم اميمه لما اتصل بيها راجلها..
🌸اميمه وهي تتكلم بالهاتف..
/هلا سامو شن جو توا..
"تمام..اني مدرس قدام حوش خوك اطلعيلي بسرعه"
هي بإستغراب..
/علاش؟
"عطيت علم لخوك جيبي شنطتك وتعالي"
ضحكت بتعجب وقالت..
/باهي..
نهت المكالمه وخشت بسرعه خدت شنطتها وهي تقول لأمها..
/اسامه يراجي فيا قال عطي علم ليوسف..
ابتسمت جهينه وصفيه قالت بضحكه..
/بريله بري..
عقدت حواجبها بإيتسامه وقالت..
/امم هي هكي..هزت راسها وقالت..باهي..
ومشت بسرعه وهما يضحكوا عليها..
🌸🌸🌸
طلعت برا شافت راجلها في سيارته قدام الباب..
تبادلوا الابتسامات وهي مشت ركبت جنبه..
اميمه بتضييقة عيون قالت..
/شن في؟!
اسامه حرك السيارة وهو يقول بإبتسامه..
/نبي نطلع اني ومرتي ندهور بيها فيها حاجه هادي!؟
اميمه بضحكه:لامافيش..
🌸وتحرك بيها اسامه لأحد الاماكن العامه اللي كانوا موجودات فيها ام وخواته،وغادي اميمه تلقت مفاجأة حلوة
..حفلة ذكرى ميلادها..
كان كل شي منسق ومرتب احلى ترتيب بإشراف حمواتها..
فرحة اميمه بالمفاجأة كانت لاتوصف واللي فرحها اكثر شي هو حب اهل زوجها ليها ومعاملتهم الطيبه معاها عندهم وكأنها بنتهم مش كنتهم وقدرها من قدر ولدهم عندهم..
🌸هو عوض الله عظيم لما يجي يخلي الانسان يحس انه عمره ماعاش حزن ولاشاف هم..
🍃وسدرة من لما تولت امر طوبى وهي في قلق دائم عليها من اللي داساته الأيام حاولت ع قد ماتقدر تحميها لكن قضاء الله وقدره ديما نافذ ماخد يقدر يمنعه..
وقدر الله ع طوبى تكون من عباده المبتلين وتواجه شدائد عظيمه ع صغر سنها ومع هذا تخطتها كلها وسدرة كانت حاسه انها ممكن تتخطى شدة السحر وتنتصر عليه لكن هل حتقدر تتخطى الحب وعذابه والفراق لو صار!!!؟
🍁🍁🍁🍁
في هاليومين اللي عدوا عاشت طوبى احلى لحظات حياتها..
كانت حاسه وكأنها قاعده في جنة وين ماتلتفت تشوف جمال ابداع الله اللي يريح النفسيه بس في عيونها ماكانش في اجمل من الأسمر التارقي اللي كان يعامل فيها بحن ولطف عمرها ماشافت زيهم من حد..
وممكن لأنه حبيب قلبها قاعده تشوف فيه غير عن كل الناس اللي عرفتهم في حياتها...
☘وهو ماشي معاها ع البرنامج العلاجي بحرص شديد وكان ملحوظ عليها بعض التحسن خلال هاليومين وابرز علامات التحسن هو رجوعها لحفظ القرآن...
🌼🌼🌼
حاليا هي مقعمزة تحت المظله..قدامها مصحف الحفظ الميسر مفتوح ع سورة هود ومذكرة تكتب فيها ايات السورة..وحاطه في وذانها سماعات البلوثوث وتسمع في السورة..
كانت احيانا تحس بشي من التعب لكن تقاوم فيه وتكمل مجاهده بكل ماعندها من قوة..
☘وعبد القيوم كان واقف بعيد عنها يراقب فيها وهو يتكلم بالهاتف..
"بعتلك ياهن ع الايميل"
عبد القيوم؛ايه شفتهن امس ربي يعطيك الصحه وللمرة تانيه نتأسف اللي خليتك تخدمي عليها بروحك..
"ولايهمك يازلمه انت عريس بنخدمك برمش عين"
هو ابتسم وقال..
/بارك الله فيك ويرحم والديك..واها بكرا ان شاء الله بعد الورشه نبيك في موضوع..
"موضوع شو"
هو بإبتسامه:خليها لبكرا ان شاء الله..
"طيب متل مابدك مارح طول عليك بشوفك بكرا"
عبد القيوم:ان شاء الله..السلام عليكم..
"وعليكم السلام"
نهي عبد القيوم المكالمه وشاف لطوبى لقاها تشوفله..
ابتسملها..هي يدوب ردتها بعدين نزلت عيونها للمذكره..
تنهد بضيق بعدين مشي بإتجاه الكرسي الخشبي قعمز عليه ودار روحه مشغول بهاتفه وهو يراقب فيها..
🍃🍃🍃
"مو ع اساس بدنا نترك كل شي وننسى!؟"
سلافه بعجز وحزن.
/مافيني يالبانه مو بإيدي..
لبانه بحزن:مارح تجني غير العذاب ياسلافه..
سلافه ودموعها عبوا عيونها..
/اي عذاب اهون بكثير من البعد عنه..ابتسمت بألم وقالت..قلي بكرا بدي احكي معك بموضوع ..
لبانه بإستغراب..
/موضوع شو؟
سلافه؛ماقال بس بعرف شو هو..رح يحكي عن المعهد..
لبانه بمفاجأة:رح يحققلك حلم حياتك!..
سلافه بإبتسامه حب والم..
/رجال بيضل ورا الكلمه اللي بيعطيها..
لبانه بضيق ورجاء..
/بترجاكي سلافه لاتعملي شي يقلل منك ومن تربايتك مافيكي تنسيه خبي حبه بقلبك وخليه عم يحترمك حبيبتي..
مسحت سلافه دموعها وهي تهز في راسها بإيجاب..
🍃🍃🍃🍃
الساعه 10:00ليلا..
من بعد المغرب خشت طوبى لدارها ومعاش طلعت منها حتى لماناداها للعشي طلبت منه يجيبه للدار تبي تتعشى بروحها..
هو برغم استغرابه في تغير حالها لكن خلاها ع راحتها..
قعمز ع الكنبة الصالون بالطول وعيونه ع باب دارها حتى العشي ماحط منه في فمه شي..
كان هي تعلقت بيه مرة هو تعلق بيها الف مرة معاش يتحمل بعدها ولاغيابها عن نظره..
قعد ع اعصابه يبيها تطلع وفي نفس الوقت مايبيش يضغط عليها لأنه فكر في احتمال يكون اللي صاير فيها سببه السحر..
انفتح باب دارها شافله بلهفه..
طلعت بالسفره ومشت بيها للكوجينه ولما فاتت من قدامه قالت بدون ماتشوفله..
/يعطيك الصحه..
ناض ومشي خش معاها للكوجينه يشوف فيها كيف تلم في الماعين وع وجهها ملامح عاديه لاتبان معصبه ولامضايقه..
وهو يبي يحتك بيها بأي شكل يبيها تكلمه وتشوفله وتقعد معاه طول الوقت زي اليومين اللي فاتوا..
عبد القيوم؛خليهن نا نغسلهن انتي بري قعمزي ف الصالون..
طوبى وهي تغسل في الماعين..
/لالا خليني نغسلهم..ركزت ع الماعين مالقتش غير الماعين اللي تعشت فيهم..شافتله وقالت..تعشيت؟
حط ايديه في جيوبه وقال..
/تعودت ناكل وانتي حداي..
غيرت نظرها للماعين وبدت تغسل فيهم وهي تقول..
/اسفه بس حسيت روحي نبي نقعد في الدار بروحي..
هو قال:ليش حسيتي بشي؟
طوبى وهي تحاول تخفي ضيقها..
/لالا بس هكي نبي نقعد بروحي..
ابتسم وقال..
/شكلك مليتي مني..
🍁في صدرها تنهيده مكتومه لو طلعتها حتبكي بشده بعدها
حست روحها كانت عايشه في حلم حتفيق منه غدوة ع واقع مرير للحظة تمنت لو يوم الثلاثاء مايجيش..تمنت لو ترقد وتفيق تلقى روحها في يوم الأربعاء..
نار والعه في قلبها وصهدها يلفح في ضلوعها مش قادرة طفيها..
هي توا رجعت تحط بينها وبينه حدود تبي تهيأ نفسها للي حتشوفه تاني يوم وان كانت مش حتقدر تمنع وجع قلبها ع الأقل تخففه..🍁
تصنعت ضحكه وقالت..
/لا مش هكي بس مرات نحب ننعزل شويه..
تنهد وقال..
/باهي خليك معاك لين نتعشى وبعدين كملي انعزالك..
شافتله..
عقد حواجبه وابتسم ابتسامه خفيفه..
غيرت عيونها عنه وبدت تغسل في الماعين وهي تقول..
/باهي..
☘☘☘☘
قدام طاولة الصالون كانو مقعمزين ع الكنبه قدامه سفرة العشي وجنبها كراستين تعليم خط ومذكرة عاديه..
هو اشر ع وحده من الكراسات وقال..
/خودي هذي وشوفي اللي فيها..
مدت يدها وخدت المذكرة..فتحتها..بدت ع وجهها ابتسامه خفيفه وهي تقرا اللي مكتوب فيها..
وقعدت تقلب فيهم بالصفحه تتفرج ع الخط وتقرا في مجموعه اقتباسات وآيات قرآنيه وابيات شعرية بالفصحى كانوا مكتوبات بخطوط مختلفه اثاروا اعجابها..
رفعت عيونها فيه وقالت..
/ليك؟
هز راسه بإيجاب وهو مبتسم بعدين قال..
/شن اكثر خطك شدك وعجبك رسمه؟
ردت نظرها للمذكرة وقالت..
/كلهم بس احلاهم..قعدت تقلب في الصفحات لين وصلت في صفحة مكتوب فيها جزء من آيه قرآنيه بخط الثلث..وجهتله الكراسه وقالت..هدا
ضحك وقال..
/حلو..
هي نزلت الكراسه وقالت بإستغراب..
/علاش ضحكت؟
عبد القيوم بإبتسامه..
/توقعت يعجبك..
هي قالت..
/زي ماقتلك هما كلهم حلوات لكن هدا..ضحكت وهي تقول..مش عارفه كيف حسيته افخمهم..
بضحكه قال..
/هو هكي فعلا..
ابتسمت طوبى وهي تتأمل في الآيه..
(فسيكفيكهم الله)
هو قال:باهي توا حطيها وخودي المذكرة الصغيره..
حطت الكراسه وهي تشوف للمذكرة قالت بضحكه..
/فكرتني بأيام المدرسه كانت عندي وحده زيها نكتبوا فيها واني صاحباتي ذكرياتنا..
ضحك ضحكه خفيفه..
خدت المذكرة اللي كان لونها اخضر باهت ومعلق فيها قلم حبر شكله حلو ولونه من لون المذكرة..
هو قال؛افتحيها وفي أول صفحه اكتبي اسمي..
شافتله بنظرات تساؤل..
هو بإبتسامه قال..
/هيا..
وهي مستغربه خدت قلم الحبر بعدين فتحت المذكرة حطتها ع الطاوله وفي اول صفحه كتبت اسمه..
وهو يشوف لإسمه كيف تكتب فيه وحاسده..
رفعت عيونها وقالت بإبتسامه احراج..
/عاد مايجي شي جنب خطك..
هو تجاهل اللي قالاته وقال..
/بعد فترة نطلعها ونخليك تكتبي اسمي ع الصفحه اللي بعدها ونعاودوا نديروا نفس الشي لعند ماتكمليها..
ضيقت عيونها بعدم فهم..
بإبتسامه قال:حطي المذكرة في مكانها..
وهي مش فاهمه شي سكرت المذكرة وحطت فيها قلم الحبر وردتها لمكانها..
هو قال؛ريتي الكراسه اللي في نص؟
طوبى وهي تشوف للكراسه هزت راسها بإيجاب..
هو قال؛هذي كراسة تعليم خط حتتعلمي فيها الكتابه بخط الثلث..
بدت ع وجهها ملامح المفاجأة..
هو بإبتسامه قال..
/ممتع رسم الخط اكثر من الرسم نفسه توا لما تبدي تتعلميه تحبيه اكثر من الرسم..
حست بحماس وهي تشوف لكراسة تعليم الخط..
عبد القيوم:ومش من باب التشجيع انا متأكد انك حتتقنيه في فترة قصيره.
ابتسمت بحماس وقالت..
/امم..باهي..وهزت راسها بإيجاب وهي تضحك..
عبد القيوم وهو هايم في ضحكتها قال..
/بكرا إن شاء الله حتاخدي نبده عن خط الثلث وحتحبيه مش بس يعجبك..
لما فكرها بيوم غدوة اللي تبي تنساه خفت ابتسامتها وهزت راسها بإيجاب بعدين ناضت وقالت..
/تصبح ع خير..
ومشت طول للدار وهو يتبع فيها بعيونه اللي نظراتهم كلها حزن وقال..
/وانتي من اهله..
🍃سكرت الباب ومشت طول للسرير خشتله وقعمزت ثنت ركابها فوق وضمتهم وبدت تبكي بصمت..
غمضت عيونها بشده وبدت تردد..
"لاحول ولاقوة الابالله"
قعدت تردد فيها لين هدت بكي..
تمددت ع السرير ورقدت ع جنبها الايمن ومازال تردد
"لاحول ولاقوة الا بالله" لعند مانعسها النوم وراحت فيه..
🍁اما هو حط العشي اللي ماقربش منه حاجه في الثلاجه وولى للصاله..
خدي المذكرة اللي كتبت فيها اسمه قعمز ع الكنبه وهو يتأمل فيه..
خطها كان عادي..خط حلو لكن عادي مافيشي مايميزه بس هو يشوف فيه احلى من خط اكثر الخطاطين احترافا..
غير عيونه عن المذكرة وقعد يشوف للفراغ وهو يتفكر في حوار صار بينه وبين المحجوب قبل يوم من زواجه بطوبى..
🔺️🔺️🔺️في وقت سابق🔺️🔺️🔺️
المحجوب:لولا شهادة لطفي الله يرحمه فيك ماكنت حطيت فيك الثقه وعطيتهالك،وع فكرة حتى عبد الرؤوف الله يرحمه اخر مرة شفته فيها قالي بالحرف الواحد..
"لو جي يوم وقررتوا تعطوا طوبى ماتخلوهاش لغير التارقي الراجل هدا اصلي ومعدنه ذهب"
عبد القيوم:الله يرحمه ويغفرله..
المحجوب:آمين..اللي قالتهولك سدرة اني معاها فيه،راهو ياولدي مش زي ماتشوف من بعيد زي ما تجرب..لما تعيش الواقع حتشوف حاجات كنت معمي عنها قبل لأن مشاعرك مسيطرة عليك وبعد ماتشوفها تتغير طريقة تفكيرك وحساباتك كلها..اني واثق فيك انك حتراعيها وترد بالك عليها وتساعدها لين تتعالج اما انك تستمر معاها هادي مشكوك فيها هلبه عندي...ومش لسبب واحد لعدة اسباب..حتخليك بعدين تقول..اني شن درت في عمري!!
ابتسم عبد القيوم تهكما وحرك راسه يمين ويسار..
المحجوب؛تو بعدين نشوفوا كان تجي لكلامي ولا..ع العموم هدا اختبار ليك حتى انت بش تتأكد من نفسك كويس..ومن توا لهداكا الوقت نتمنى انك ماتخليش طوبى تزيد تتشتت وتتعب خليها تركز ع العلاج وبس..
غمض عيونه وفتحتهم وهو يهز في راسه بالموافقه وقال..
/انا عطيت كلمة لسدرة وتوا نعطيهالك انت حنخليكم تشوفوا بعيونكم واولكم هي ان مافي حد في الدنيا تعنيه طوبى اكثر مني..
🔺️🔺️🔺️الوقت الحاضر🔺️🔺️🔺️
سكر المذكرة وهو يقول..
/ماظني حنقعد ورا كلمتي هذي واجد.
وناض من مكانه خدي الكراسات ومشي بيهم لداره..
🍁🍁🍁🍁
ويطلع فجر يوم الثلاثاء..
فاقت طوبى وهي مضايقه لأبعد حد..
صلت صلاتها..وطلعت العبايه والشاربه والقفازات اللي بتلبسهم..
بعدين شربت شيشة ربع لتر مية رقيه وقعمزت في دارها تردد في الأذكار لعند ماسمعت دقته ع الباب وصوته وهو ينادي فيها للفطور..
☘بالغصب طلعت..يدوب صبحت عليه وبدت تاكل..
هو ماتكلمش معاها..قعد يشوفلها وبس..كانت تاكل بنهم وماتبيش تشوفله حتى بالغلط..كملت فطورها وناضت ولت للدار وعيونه مافارقوهاش لين درقت عنهم..
تنهد بضيق وناض يلم في سفرة الفطور من غير ماياكل منه حاجه...
☘☘☘☘
بعد ساعة وربع...
جي وقت المشيه للزاويه..
هي جهزت نفسها وقعمزت في الصالون تستنى فيه..
لحظات وطلع من داره..
لما شافاته لون وجهها انخطف..كان انيق جدا..
لابس قميص لونه سماوي محشي في بنطلون لونه ازرق غامق..كان جذاب جدا..
ابتسم وهو يشوفلها وقال..
/صدفه؟
نزلت عيونها وهي تشوف للون العبايه والشاربه..
🍃وعقلها لحظتها اختار يفكرها للمرة التانيه بشي من حياتها مع الجالي..تشابههم في اللبس والوانه وهي كانت تحب الحركه هادي هلبه بس بعدين كرهتها من كرهها للجالي..🍃
واكيد تذكر اي شي يعني الجالي مش حيسعد طوبى..
ناضت وهي تقول بإبتسامه مجامله..
/اكيد صدفه..
هز راسه وهو مبتسم بعدين قال..
/في شيشه مية رقيه في الثلاجه طلعيها والحقي..
ومشي طول للباب..
وهي مشت بإتجاه الكوجينه وعيونها يسرقوله في النظر لعند ماطلع..
خشت للكوجينه فتحت التلاجه..
شافت صواني العشي متاعه مغلفات بقصدير وصونيه الفطور متاعه مغطيه بغطاء بلاستيك..
قالت بصدمه؛معقوله لاتعشا امس ولافطر اليوم!؟..تبدلت ملامح الصدمه ع وجهها لملامح الحزن وهي تقول..اكيد من كثر مامستاحشها وملهوف ع شوفتها..دمعوا عيونها وهي تقول..شدي حيلك وخليك قويه وساعدي نفسك بش تشفي بسرعه خير مايمل ويندم بعدين ويقولك معاش نقدر نكمل..
نزلوا دموعها ومسحتهم وطلعت شيشة مية الرقيه من الثلاجه..
🍁برا..
كان واقف ع سيارته يتكلم بالهاتف وعيونه ع الحوش.
/اها بالبراده..بعدين انا عريس ياعديم الذوق مفروض عليك تعزمني..
شافها طالعه مشي لباب الكرسي اللي جنب السواق وفتحه وهو يقول..
/والله مانعرفك..نرجي فيك تقولها !؟من نهار عرفتني وانا اللي نعزم فيك..
وصلت فيه وركبت وهو بعيونه من ورا نظارات عليها سكر الباب وقال..المدام تحب رشدة الكسكاس..
شافتله والضحكه غلبتها هو ابتسملها ومشي بيركب وهو يقول..
/خلاص الساعه تنين تلقاني قدام الحوش..
فتح الباب وركب وهو يقول..خلاص نتشاوفوا..سلام..
ونهي المكالمه وسكر الباب وهو يقوللها..
/هذى صاحبي كان يخدم معاي في شركة الكهرباء قاعد من الحرب في الزاويه ويمشي ويجي ع طرابلس..اها تعرفي محمود اللي يخدم عند المهدي.؟
بدت ع وجه طوبى ملامح الامتعاض وهي تقول..
/قصدك خوه اللي خدي اخت محمود؟
عبد القيوم بإبتسامه؛عليك نور...المهم عزمنا ع الغدا نطلعوا من الفندق ونمشوله..
هي بصدمه:شني!؟
هو بإستغراب:كنك؟
قالتله:اخت محمود مرت خو صاحبك وتبيني نمشيلهم!؟
هو بعدم فهم:وين المشكله!؟
قالتله؛كيف وين المشكله!؟ مش بتعرفني مرته ومرات تهدرز هي وحنان وتقوللها واكيد هي بعدين حتنشرها..
عبد القيوم بضحكه..
/غير من قالك بيصير هذى كله مرات يطلعن ما يحبنش بعضهن ومافيش بينهن تواصل..
طوبى بقلق:تتسهوك!؟ وقت تسهويك!؟
هو قعد يضحك..
تأففت وقالت بإنزعاج:طلعت بارد..
هدا ضحك وقال بإبتسامه..
/انا كان نلقى نحطها في شريط الاخبار متاع ليبيا الاحرار والحدث خل الدنيا كلها تعرف..
شافتله بطرف عينها بنظرة امتعاض..
هو قال:يعني لعند امتى بيقعد سر؟
تنهدت وشافتله كويس وهي تقول برجاء..
/باهي انت كان تبي راحتي فوت الغدي عنده بالله عليك..
تنهد وقال:مانبي الا راحتك..هز راسه وقال..حاضر تو نكلمه ونعتذر..
☘وكلم عبد القيوم صاحبه واعتذر منه وعيسي شد فيه هلبه ومع هذا بدا راحة طوبى ع كل شي..
نهي المكالمه وقال..
/ارتحتي..
طوبى؛لامازال..طلعت من كيسه سندويتش طن وهريسة وزيتون كانت لافاته في كلينكس مائده ومدتهوله وهي تقول..
/كمله كله..
ضحك وخداه منها..
قالت بنبرة فيها شي من التهكم:من غير زيت بش مايفسدش اناقتك..
شغل السيارة وهو يضحك وتحرك بإتجاه البوابه..
فتح العامل الباب وعبد القيوم قبل ليطلع عطاه توصيات..
طوبى:مسلم؟
عبد القيوم:ايه من رفاقه بلال.
ابتسمت طوبى لما جت سيرة بلال..
🍁🍁
وبدي عبد القيوم يفطر وهي جنبه تتفرج ع الطريق وتردد في الحوقله همسا لعند ماكمل عبد القيوم فطوره طلب منها تفتح درج السيارة تعطيه مناديل معطرة وعطر وطرف حلوة حارة..
مسح ايديه واثار الخبزة اللي نزلت ع بنطلونه بعدين حط من عطره واخر شي حط في فمه الحلوة الحاره..
طوبى ردت كيس المناديل المعطره لكن قعدت شاده العطر تقرا في اسمه..
هو شافلها وابتسم...
فتحت العطر وقعدت تشم فيه..
غير نظره عنها وهو يحس بعداد نبضات قلبه وصل للألف...
غطت طوبى العطر وقالت..
/العطور الرجاليه احلى من النسائيه بهلبه..تعرف كنت نحفظ في ريحة عطور بابا وجدي الله يرحمهم..ضحكت وقالت..قبل بابا لما كان يغير ريحة عطر متعوده عليه نخليه يرد عطره الاول..تعبوا عيونها دموع وهي تقول..اما ريحة عطر جدي قعدت تابته من لما وعيت ع الدنيا حلوة وتهبل..نزلوا دموعها ومسحتهم وهي تقول..حتى حسين عند عطر ماغيراش بكل..
هبت فيه نار الغيره لما سمع جملتها الاخيرة رفع حواجبه وقال..
/عطر حسين!
هي استاقظت لنفسها شن قالت..كلام زي هدا مايجيش ينقال قدام راجلها غير هكي في دوة طلعت عليها هي وحسين وهو سامع بيها لما تقول قدامه كلام زي هدا غالبا حيفهم غلط وممكن يشك فيها..
حاولت تستدرك نفسها لما بررت تقول..
/ايه عطر حسين..حسين قبل كنت نعتبر فيه بوي التاني حتى هو رباني مع سدرة..
عبد القيوم هز راسه بصمت عكس ماقاعد يدور في داخله نار الغيرة تاكل في قلبه..خطر ع باله كلام حسين عنها وحالته وهويشكي من عذاب حبه ليها...
كل جزء فيه كان ينحرق بنار الغيرة لدرجة حس روحه سخن هلبه..
شغل مكيف السيارة وقعد ملتزم الصمت وهو معصب..
وطوبى لاحظت حالته وخافت ليكون فكر زي ماهي فكرت..
ردت عطره للدرج وسكراته وردت نظرها للروشن وبدت تردد في الحوقله همسا..
🍁وفي طريقهم للزاويه اللي تبي ثلاثه ساعات الاربع..
مرت منهم ربع الساعه وهما في حالة صمت قطعه اتصال سدرة..
تنهدت طوبى لما شافت اسمها ع الشاشه فتحت الخط وردت
/صباح الخير سدرة..
"صباح النور بنتي طلعتوا"
طوبى:ايه في الطريق..
"باهي ربي يوصلكم سالمين"
طوبى:آمين..
"شن جوك اليوم"
طوبى؛كويس الحمد لله..
" الحمد لله..زي ماوصيتك امس حبيبتي قوي روحك واعفسي ع قلبك خليه يطلع منه عارفتها صعبه حبيبتي لكن مش اصعب من انك تقعدي معلقتيه في وهم "
شدت دموعها بقوة وقالت..
/عندك حق..
"وحاجه تانيه هادي سلافه وحده مش هوينه مرات ديرلك حركة هكي ولاهكي ماتعطيهاش مجال قوليلها خليتهولك مشبط ملبط عليك اشبعي بيه"
طوبى في عز وجعها غلبتها الضحكه..
"ايوه اضحكي حني بنات الواعر مايكسرنا ولايقهرنا شي"
🍁عبد القيوم كان يسمع في حس سدرة واضح تتكلم بإنفعال توقع انها قاعده تحرض في طوبى عليه عارف تفكيرها كويس...🍁
طوبى بإبتسامه..
/اكيد وانتي تعرفيني كويس..
"سلمها بنتي ياربي ونجيها"
ضحكت طوبى..
"هي خلي نمشي نشوف شن عندي وانتي شن مايصير معاك كلميني طول"
طوبى:ربي مايحرمني منك ياقلبي..
"ولامنك ياعيوني في وديعة الله بنتي"
طوبى:في أمان الله قلبي..السلام عليكم
"وعليكم السلام"
ماسكرتش طوبى لين سكرت سدرة بعدين نزلت هاتفها واتكت ع كرسي السيارة وعيونها ع الروشن..
هو شافها وقال..
/بترقدي؟
هي قالت..
/ايه..معليشي نقص المكيف شويه..
ابتسم بعدين نفد طلبها ونزللها الكرسي شويه..وهي غمضت عيونها ولحظات وراحت في النوم..
🍃🍃🍃🍃
الساعه 10:50صباحا...
درست سيارة معز راجل لبانه امام احد الفنادق..
كان جايب معاه ميار اخته وسلافه نسيبته..
🍃ميار:لما نكملوا نكلمك..
معز:اوكي..
نزلوا ميار وسلافه من السيارة ومعز تحرك طول..
تعنقت ميار ذراع صاحبتها وقالت..
/طالعه عسل بزيادة اليوم..
اكتفت سلافه بالإبتسامه ردا عليها..
مشوا مع بعض وخشوا للفندق وهما يهدرزوا..
العيون كانت ع سلافه جمالها وهيئتها يبينوا انها مش ليبيه وفي واحد من الموظفين قعد مركز معاها..
☘خشوا لممر القاعه اللي بتقام فيها الورشة..
وهما ماشيات انظارهم جت ع منظر جمدهم من الصدمه..
قرب باب القاعه كان عبد القيوم واقف ع واحد يكلم فيه وجنبه بمسافه طوبى واقفه تشوفلهم..
سلافه بصدمه وعيونها تعبوا دموع..
/مو قلتلكن ياميار...هي مافي غيرها..
ميار غيرت نظرها لصاحبتها وقالت بقلق..
/سوفي!..
غمضت سلافه عيونها..خدت نفس وزفرت..بعدين فتحت عيونها ورسمت ع وجهها ابتسامه مصطنعه وقالت..
/تعالي..
☘"تبي اي حاجه تانيه استاذي تفضل"
عبد القيوم بإبتسامه..
/لا كفيتو ووفيتو بارك الله فيكم..
:فيك بارك الله..موفقين ان شاء الله..
ومشي فات من حداه ع جية سلافه وميار..
سلافه بإبتسامه..
/مرحبا بعريس الغفله..
هو شاف لطوبى لقاها لافه وجهها للجهة الثانيه مش باينات عليه ملامح وجهها..
ميار بإبتسامه..
/مبروك..
شاف لميار وقال؛الله يبارك فيك..
سلافه بإبتسامه؛جبتلك هديه الزواج بعطيك ياها بعدين..
هو شاف لطوبى وقال..
/شكرا..بعدين نادى..طوبى..
🍃هي لما سمعاته ينادي فيها غمضت عيونها بشده بعدين فتحتهم..رسمت ع وجهه ابتسامة ثقة مصطنعه ولفت وجهها ليه..
هو ابتسم وقال:تعالي..
ميار كانت تتفحص في طوبى بنظرها..
لكن سلافه كانت تشوفلها بنظرات غيرة..
وصلت فيهم وشافت لسلافه وميار بإبتسامة مجامله..
هو قال:طوبى..
"زوجتي"
الكلمه خلت قلب طوبى يرجف وقلب سلافه ينعصر عصر حافظت ع ابتسامتها بقوة وقالت..
/مبروك حبيبتي..ومدت يدها..
صافحتها طوبى بيدها المغطيه وقالت..
/الله يبارك فيك..
ميار بإبتسامه من فوق نفسها..
/مبروك..
طوبى طلقت يد سلافه وقالت..
/الله يبارك فيك..
ميار؛لو كنتوا عزمتوني ع العرس راني عبيت بيكم وجبت هديه..
بلعت طوبى ريقها وشافت لعبد القيوم..
هو قال بإبتسامه تهكم:وكان درت عرس ليش نعزمك؟
بدت ع وجه طوبى ملامح ابتسامه شماته خفيفه..
وسلافه شافت لميار لاحظت غضب فعيونها حاولت تخفيه بضحكه لما قالت..
/خيرك حمقت نبصروا!..
هو شد يد طوبى وقال بلامبالاة..
/مش مشكله..شاف لسلافه وقال..هيا سلافه معاش في وقت..
وخدي طوبى وخش بيها داخل..
سلافه بصوت منخفض قالت بنرفزة والدموع في عيونها..
/تستاهلي..
ميار بحده:صدق روحه هدا واحد متعجرف..
فنصت فيها سلافه وقالت..
/ميار!
حطت ميار يدها ع فمها بعدين قالت..
/همم..سكتنا..هيا خشي ..
سلافه بضيق؛ الأول بحكي مع ماما طمنا بعدين فوت اسبقيني انتي..
شافتلها ميار بضيق بعدين خشت..
وسلافه تباعدت عن مكان القاعه لنهايه الممر وقفت وبدت تبكي بصمت..
🍁في نفس الوقت..
رفع عبد القيوم طوبى لكرسي منفرد خاص بيها..
بعد ماقعمزت قاللها بإبتسامه..
/ركزي معاي بس ماتبحتي في حد غيري..
هي قالت بحمقه..
/لمن بنشبح يعني!؟
عقد حواجبه وقال وهو يقلد فيها..
/لمن بنشبح يعني...كمل كلامه بصوته وهو يقول..لما يبدا الخطاط اللي حكتيلك عنه دوره في الشرح شوفيلي نا وبس..
☘ومازالت طوبى خايفه تفسر اللي تشوف وتسمع فيه من عبد القيوم ونصايح سدرة مازال ترن في وذانها..
"قوي روحك واعفسي ع قلبك...
فترة وتعدي"
نزلت عيونها للكراسه وقالت بخجل..
/باهي..
وخر عنها وهو مبتسم بعدين لف ومشي للاب توب متاعه اللي كان محطوط ع طاوله متوسطه الحجم جايه في مقدمة القاعه..ووراه سبورة خطاط طويله طول..
وقدامه مجموعه كراسي مصفوفات ع هيئه حرف u تشبه اللي في قاعات الأجماعات..
الكراسي كانوا معبيات بالمشتركين في الورشه..قعد كرسي واحد بس محطوط ع جهة لضيفهم..
عبد القيوم استنى سلافه هلبه ماجتش اضطر يطلع برا يشوفها..
🍃فالوقت نفسه..
سلافه بعد ماهدت ومسحت دموعها وساوت مكياجها التفتت بتولي للقاعه شافت واحد جاي من بعيد ويشوفلها بإبتسامه... هو نفسه الموظف اللي حط عليها العين اول ماخشت للفندق..تجاهلاته..لكن اعترض طريقها وقعد يتحرش بيها لفظيا..
ع طلعة عبد القيوم من القاعه..
شاف يمينه مالقهاش..شاف يساره جو عيونه عليهم لاحظ سلافه تبي تهرب لكن المتحرش مش مخليها..
عقد حواجبه بغضب ومشالهم وهو يقول...
/اوووي ياشاب..شن في!؟
شافله وقال؛خليك في حالك..
عبد القيوم وقف بينه وبين سلافه وشافله بنظرات حاده وهو يقول..
/شوري ياغالي..
هو بان عليه الخوف وقاله:كان هكي سامحنا..
ولف ومشي بسرعه..
التفت عبد القيوم لسلافه وقال بشي من العصبيه..
/تو نا مش قتلك تعالي معاش في وقت! شن ديري هنا!؟
سلافه بإرتباك واحراج..
/كنت عم بحكي مع ماما..
حرك راسه يمين ويسار بعدم رضا ومشي وهو يقول..
/تعالي هيا قعد اقل من عشر دقايق.
هي لحقاته وقالت بإحراج قالت..
/اسفه..
ماردش عليها وكملوا طريقهم للقاعه لعند ماوصلوا فيها وخشولها..
🍁شافتهم طوبى..
لاحظت ان عبد القيوم يبان معصب وسلافه منحرجه ووجهها محمر لونه..
استنتجت طول انهم تعاركوا بسببها..
اما ميار اللي كانت عارفه اللي فيها استغربت حالتهم وتوقعت لوسلافه فقدت السيطرة ع نفسها وطلعت اللي في قلبها..
🍃قعدوا ميار وطوبى يراقبوا فيهم ولاحظوا كيف بعد بضع دقائق تغير جوهم وقعدوا يتكلموا مع بعض بحماس وانسجام تام..
هالشي طبيعي يجمعهم تخصص واحد وموكلين بمهمه معينه تعاونوا عليها طبيعي..واللازم يكونوا متفاهمين منسجمين بش يأدوا مهمتهم ع اكمل وجه..
لكن طوبى مش حتشوفه طبيعي ابدا للأسف..
حتى انها قعدت تقارن بينها وبين سلافه...
سلافه اللي تكبرها في العمر ب5 سنوات لو يحطوها جنبها تبان هي اكبر منها،هدا غير جمال سلافه ونضارتها وحلاوة طلتها مقارنه بيها اللي ذبل جمالها وولت باهته من جميع النواحي...
غيرت نظرها ليه هو وشافت اللي تعودت ديما تشوفه عليه جاذبيته وملامح الرجوليه اللي تقطر من وجهه ومتمكنه من كل صفاته،واناقته المميزة..
وكأي انثى ينتابها شعور الإحساس بالنقص حتشوف انها ماتستاهلش تكون معاه وهو يستاهل خير منها..
مراة مطلقه باهته ومريضه ومشوهه نفسيا وظروفها سيئة حرام واحد بمواصفاته يديرها شريكة حياته..
🍃وللأسف هادي نظرة مجتمع كامل..يعني لو عرفوا الناس بزواجهم واولهم اهله مش حيعترفوا بحبه ليها بل حيطلعوا اسباب واهية وظالمه نبدوها بالطعن في اخلاق المراة ع اساس انها لفت عليه وطيحاته في شباكها وننهوها باللجوء لأعمال الشعوذة والسحر بش قدرت تجيبه للطريق..
اما انه يحبها هادي مستحيل شن بيحب في خردة باليه زي هادي!!؟..هدا مجتمعنا وهدا تفكيرنا اللي حتى ع ايام الجاهليه الأولى ماكانش موجود🍃
🍃🍃🍃🍃
🌸يتبع ...
