#طوبى "جنة طوبى"
#جمان_فريد
#الجزء_113"الحجر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#ذكر_الله
قال ابن القيم رحمه الله..
"اذا انكشف الغطاء للناس يوم القيامة عن ثواب أعمالهم لم يروا عملا أفضل ثوابا من الذكر فيتحسر عند ذلك أقوام فيقولون ما كان شيء أيسر علينا من الذكر.."
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃و لكن العاطفة الإنسانية غلبتني , لقد صدق الشاعر هايني حين قال أن هذه العاطفة الإنسانية تحشر أنفها في كل شيء ..
دوستويفسكي 🍃
________________________________________
في هالليله الربيعيه..
كان روشن"شباك" دار نضال وعمر مفتوح عليهم وكل واحد فيهم مقعمز ع سريره مقابلين بعض..
واحد يحكي والثاني يسمع فيه..
🍃عمر بضيق:كل مانحساب روحي تخطيت يصير شي يبينلي العكس..المرة هادي بالذات يانضال حسيت بحسرة بمعنى الكلمة..حط يده ع صدره..وجع هني حسيته مش عارف كيف نوصفه..نزل يده وتنهد بأسف بعدين قال..تمنيت لو يرجع بيا الوقت ماخليت شي يفرق بيني وبينها راني قدرتها وعرفت قيمتها ومافرطتش فيها..
نضال بحزن:ردان الفايت محال ياعمر خلاص انسى حاول تنسى وتشوف نصيبك..
عمر بإبتسامة أسف..
/ماعندي ماندير غير هكي..لكن عارف روحي حنقعد متحسر عليها ونتفكر ديما كيف حرمت روحي من نعمة معاش تتعوض..
نضال:ماتقولش هكي ربك كريم يعوضك باللي خير منها الف مرة..
هز عمر راسه ومازالت ابتسامة الأسف ع وجهه بعدين قال..
/ونعم بالله...عندي ليك نصيحه خودها من مجرب رد بالك تتزوج لغايه في نفسك..لابش ترضي امي ولابش تبرد ع روحك رد بالك راك تظلم روحك وتظلم بنات الناس معاك..
ضحك نضال ضحكه خفيفه وقال..
/الموضوع هدا توا ولى صعب..شاف ليده وقال..مرات يعطل هلبه..
عمر وهو يشوف ليد خوه قال..
/من قالك!!..تبي شهور علاج طبيعي بس..
شافله نضال وقال..
/مش حتولي زي قبل..
عمر:كلام التشاؤم هدا مفروض مايطلعش من واحد زيك!؟
نضال بضحكه؛لا والله لاتشاؤوم لاشي..اني نبي نكون واقعي مانبيش نضحك ع روحي وفي نفس الوقت راضي بحكم الله ومن قلبي الحمد لله على كل حال..
عمر:الحمد لله...
🍃🍃🍃🍃🍃
ويجي تاني يوم..
من قبل الظهر بنص ساعه كانت عيلة مغليه كلها في حوش محمد شنيبه بش يطمنوا على نضال ويتحمدوله بالسلامه..
وتجنبا للمشاكل..مشت سميرة لحوش خوها بتقعد عليه اليوم كله..وسدرة قعدت في حوش غرفه ماروحتش منه...
🍀🍀🍀🍀🍀
ويعدوا يومين بعده...
صرف فيه المحجوب ذهب بنته اخته اللي جابلها مبلغ كبير ولما جابه اجتمع بيها ومرته معاهم بش يتكلم في موضوع مهم..
🍃المحجوب:شوفي بنتي عبد الرؤوف توا سكر اسبوعين متوفي الله يرحمه ويغفرله..
نبيله وغرفه بحزن..
"الله يرحمه ويسامحه..الله يرحمه"
تنهد وقال:الراجل سيب وراه تركه كبيره اكيد عندك خلفيه عنها..
مسحت دموعها وقالت..
/نعرف ان عنده محلات..وفي عنده في تركيا زي العمارة مأجرها لشركة ملابس..
المحجوب:ايه..وعنده ارض ومزرعه وتشارك هو وواحد صاحبه في معرض سيارات جايين بيفتحه بداية العام اللي فات لكن الحرب وقفتهم..
غرفه:حكالي قبل عنه المشروع لكن حكاية المزرعة والارض ماعنديش علم بيهم..
المحجوب:المزرعه في الخمس..
نزلوا دموع غرفه وهي التزمت الصمت..
المحجوب:باهي فلوسه غالبا وين يحط فيهم!؟ لأن حسابه في المصرف مافيشي اكثر من 100 الف..
غرفه؛الفلوس يدس فيهم هني تحديدا الشقه..
نبيله بصوت مبحوح:هدا علاش سكرها هو!؟
هزت غرفه راسها بصمت..
المحجوب:تمام..توا هدا حيتقسم الميراث حسب الشرع انتي تاخدي الثمن وصغارك للذكر مثل حظ الانثيين..وطبعا لأن صغارك مازال صغيرين الوصاية حتكون ليك انتي..
🍃مافكرتش غرفه قبل في الحكايه هادي..سهت عنها غفلت!..المهم انها بعد اللي سمعاته من خالها حست بشعور مختلط بين الخوف والمسؤولية...
هي توا مش مسؤوله عن تربية صغارها ورعايتهم بس..هي توا مسؤوله حتى عن رزقهم..عن ثروة خلاها بوهم تعب وخدم عليها عمره كله...
باهي كيف!؟..كيف تقدر تكون قد هالمسؤولية!؟كيف لازم تحافظ ع رزقهم !؟ حتما حتحتاج حد يساعدها..لكن من !؟ من اللي تقدر تعتمد عليه في حاجه زي هادي!؟..🍃
"غرفه"
طلعت من دوامة الاسئلة اللي كانت غارقه فيها بعد ماسمعت خالها ناداها..
المحجوب:وين سرحتي!؟
خدت نفس وقالت بشي من الربكه..
/الحق ماكنتش مفكرة في الشي هدا بكل..رزق صغاري توا امانه تانيه في رقبتي..
المحجوب:ماتخمميش هلبه بنتي اني معاك وتو نساعدك عبد الرؤوف وصاني عليكم..
تنهدت بقلق قالت..
/الموضوع مش ساهل بكل ياخالي..
نبيله بضيق؛صح مش ساهل..
المحجوب؛ربك ييسرها ياخالي..
غرفه؛يارب..باهي توا خلي الموضوع هدا ع جنب..في شي اهم نبيه منك..
المحجوب ضيق عيونه بتركيز وهو يشوفلها..
غرفه:زي ماتعرف اني صرفت ذهبي بش ندير نطلع صدقات عن عبد الرؤوف..
ابتسمت نبيله بألم ونزلت عيونها لإيديها اللي كانت ضامتهم لبعض..
وغرفه متابعه تقول..
/اقترحت عليا طوبى ندير صدقات فيها فك كرب..يعني حد عليه دين ومعسر ندفعه عنه ولافي ناس ساكنه في ايجار ومهدده تقعد في الشارع لأنها مش قادرة تدفع..مريض ماعنداش حق دوا هي قالتلي لو ندفع حق جرعات لمرضى السرطان خير..انت شن رايك؟!..
ابتسم المحجوب وقال..
/بالنسبه ليا اني اللي تقوله اختك هادي مانقدر نقول بعده شي..
ضحكت نبيله ضحكه خفيفه..
ابتسمت غرفه وقالت..
/معناها خلاص بنعبا عليك في الموضوع هدا،نبيك تشوف ناس مستحقه وتتحرى عليهم كويس..
المحجوب؛بإذن الله..
غرفه؛مادابيك ماطولش خالي..
هز راسه وقال:من لما نطلع من عندك نبدا نسأل و ندور..
غرفه:بارك الله فيك خالي وسامحني بنتعبك في حاجه تانيه..
المحجوب؛معاش تقولي هكي بنتي اللي تبيه قولي عليه طول..
غرفه؛تسلم يارب..تعرف ان عمة عبد الرؤوف ونبيله مع بناتها ساكنين بالإيجار وعبد الرؤوف الله يرحمه هو اللي مأجرلهم ويدفع عنهم،راجل بنتها ماعنداش قدرة ع الايجار..قلت لو تشوف صاحب العمارة اللي مأجرين عنده وتعطيهم ايجار تلاته شهور القدام..
المحجوب:عبد الرؤوف قبل ليمشي دفع ايجار ستة شهور قدام..
غرفه ودموعها في عيونها..
/توقعت..باهي هو كان مسؤول عنهم هو اللي يصرف عليهم.. نزلوا دموعها وهي تقول..من بعده الله يرحمه مانبي شي ينقصهم نبي ندير زي ماكان هو داير معاهم..
وجهوا انظارهم لنبيله لما سمعوا صوت بكاها..
كانت حاطه يدها فوق عيونها وهي تبكي..
حط راجلها يده ع ظهرها مسح عليه بحنان وهو يقول..
/نبيله..
نزلت نبيله يدها وشافت لغرفه وهي تقول..
/الله يسامحهم هما سبب اللي صار كله ..
نزلت غرفه راسها وهي تبكي بصمت..
المحجوب:اللي صار قضاء الله وقدره يا نبيله..شاف لغرفه وقال..خلاص ياخالي حتى الموضوع هدا تو نشوفه اني ومرت خالك هي تتواصل معاهم وتعرف شن يبوا وتخبرك..
🍃🍃🍃
الوفاء..
الوفاء حتى هو ليه صور..زي وفاء الرسول صلى الله عليه وسلم للسيده خديجة بنت خويلد..تزوج بعدها وحب بعدها لكن قعد وفي لذكراها..وين تجي سيرتها يتكلم عنها احلى كلام كله احترام وتقدير وامتنان..لعيونها هي كان يكرم في صاحباتها واي حد يعز عليها...
🌼وغرفه برغم كل شي صار بينها وبين عبد الرؤوف قبل موته قدرت العشره اللي كانت بيناتهم وحطت بين عيونها كل شي حلو داره معاها وكل خير شافاته منه..
🍃"مش هدا بس..نبي نربي الصغار زي ماكان يتمنى زمان قالي خليهم رجاله مانبيهمش يطلعوا زي النماذج اللي ماتنفعش.."
طوبى وهي تمسح في دموعها..
/ربي يقدرك ويعينك..
غرفه ودموعها ينزلوا..
/لكن اكثر شي نفكر فيه الرزق اللي خلاه لصغاره..
طوبى:في شي في بالك..
مسحت دموعها وهي تقول..
/نقولك وماتضحكيش عليا!؟
طوبى بإبتسامه..
/مانضحكش عليك..قولي..
غرفه خدت نفس وقالت بشي من الحماس..
/نبي نمسكه ونمشيه زي مادارت سدرة مع المطحن وانتي بعدها..نبي اللي داره عبد الرؤوف يستمر ويخي احسن من قبل..نبي نفهم في كل شي مانبيش حد يستغلني ويضحك عليا..صغاري ماعندهمش عمام ولاعندهم خوال ينشد بيهم الظهر نبي نعوضهم عن هادم كلهم..فاهمه عليا طوبى!؟
طوبى تأثرت هلبه بكلام غرفه..كلامها خلا عينها تدمع..
جت بين عيونها غرفه ايام الزمان المدللة الانانيه الاتكاليه اللي ماتعرف دير شي وماينعبا عليها في شي ولاعمرها تحملت مسؤوليه في حياتها..
شتان بين الامس واليوم..شتان بين غرفه هديكا وبين اللي مقعمزه قدامها..
☘ومن قوة تأثير كلام غرفه على طوبى عاودته بالحرف لسدرة وهما مقعمزين يهدرزوا مع بعض في دار الصغار..
🍃سدرة؛بالك غير لحظه انفعال وخلاص..
طوبى ودموعها في عيونها..
/لالا مش هكي..كانت تتكلم من قلبها ياسدرة..
سدرة بعدم اقتناع..
/صدقيني الا جو طهقه خلي يفوتوا شهرين وشوفيها بعدين..
طوبى بضحكه..
/شي نظرتك فيها مستحيل تتغير..
سدرة:لأني نعرفها كويس..
ابتسمت طوبى وقالت..
/ماتعرفيهاش كويس..ماتعرفيش شن عاشت وشن مر عليها ومع شني تعايشت..اصغر مثال عمة نبيله وبناويتها اللي قريب طلعوك عن طورك مستوعبه ان غرفه تحملت يقعدوا معاها عشرة ايام ع بعض تخدم فيهم وتساير فيهم وهما ع تلقيح وتصرفات مستفزة سحنولها كبدها بمعنى الكلمه ومع هذا ماسمعوش منها كلمه غلط..
سكتت سدرة وهي تفكر في كلام طوبى..
طوبى:غرفه معاش زي قبل بكل ياسدرة..
شافتلها وقالت..
/الحق علاقتكم هي اللي معاش زي قبل قريبات من بعض هلبه وهي ماتتحركش من غير شورك حسيتها ولت متعلقه بيك وانتي وليتي قريبه عليها اكثر مني..
طوبى بضحكه..
/اها الحكايه حكاية غيرة !
سدرة وهي تشوفلها بطرف عينها..
/حسيتها خدت مكاني..
طوبى ضحكت بعدين قالت..
/ياعليك سدرة وخلاص..ماحد ياخد مكان حد..تنهدت بعدين قالت..غير في الفترة اللي فقدتم فيها..في اصعب المواقف اللي عشتها في حياتي واني في اضعف حالاتي منهارة ومدمرة ع الآخر جتني غرفه وعتني لروحي قالتلي حني بنات الواعر ماننكسروش..حتى لو انكسرنا مانخلوا حد يشوفنا مكسورات زي مادارت لما تزوج المهدي..واكثر جمله قعدت في عقلي من كلامها..خليك بنت الواعر حق..
نزلوا دموع سدرة وهي تقول..
/شن كان صاير معاك !؟
تنهدت طوبى وقالت..
/مش مهم فوتي..المهم توا حني لازم نوقفوا معاها وندعموها..نقولولها انتي بنت الواعر حق..
نزلت سدره نظرها لإيديها اللي كانت تفرك فيهم ببعض ودموعها ينزلوا..
طوبى:سدرة..
سدرة بنبرة باكيه..
/معاش وليتي معاي زي قبل تغيرتي معاي هلبه..رفعت عيونها فيها وقالت بنبرة مخنوقه..الفترة اللي بعدت فيها عنكم بعداتك عني هلبه..
حطت راحتي ايديها ع عيونها وانهارت بالبكي..
طوبى كانت مصدومه في حالتها ناضت قعمزت جنبها وخدتها في حضنها وهي تقول..
/منك جد سدرة!؟ اني نتغير عليك ولانبعد عنك!؟ سدرة انتي امي راهو..
كلامها خلا سدرة تبكي بالعبرة..
طوبى بصدمه..
/بسم الله الرحمن الرحيم..سديره خيرك!؟..حي!كان ماتطلعي حامل!
هدت سدرة بكي وماعلقتش ع كلامها..
مسحت طوبى ع شعرها وقالت بضحكه..
/شكلك بتطلعي حامل يامراة..
بعدت عنها سدرة هي تمسح في دموعها..شافتلها وقالت..
/معاش تخليني بعيده عنك انتي اغلى حاجه عندي ياطوبى عمري مانبدي حد عليك حتى لو ربي رزقني بالصغار العيل اللي نجيبه مش حيجي في ربع غلاك عندي..
ضحكت طوبى وضمتها وهي تقول..
/لكن اني بنحبه اكثر منك وبنولي مامته حتى اني..
ضمتها سدرة بقوة وقالت..
/ربي مايحرمني منك..
طوبى بضحكه؛ولامنك..لكن رسمي انتي حامل راهو وشكلك تتوحمي عليا.
سدرة بإبتسامه ودموعها ينزلوا..
/تخيلي نحمل حق!؟
طوبى:اللي عند ربي مش بعيد..
تباعدت عنها سدرة ومسحت دموعها وهي تقول بضحكه..
/جو.. رفعت عيونها فوق وقالت..يارب نحمل ونشرد المهدي ونطلع عليه القديم والجديد..
وطوبى تسمع فيها وتضحك...
🍃ليلتها طوبى رقدت في حضن سدرة وجنه بحداهم..
لكن غرفه اللي كانوا صغارها راقدين حواليها..كانت تتأمل فيهم وتفكر في حاضرهم ومستقبلهم وكل ماله شعورها بالمسؤوليه يكبر...
🍃🍃🍃🍃🍃
تاني يوم...
كان اليوم اللي بيشوف فيه الجالي جنه تأجل من الجمعه للأحد بسبب شغل كان عنده هو ونجاة في مصراته..
في هداكا اليوم..
اتصل مختار بطوبى وخبرها انه بيجي يشوف غرفه وصغارها..
🍃"والله ماهو عافسه"
طوبى بضيق:معليشي غرفه خليه يخش المربوعه الخارجيه..
غرفه بحزم وحده..
/اني قلت لا يعني لا..عبد الرؤوف الله يرحمه ماكانش راضي ع خشته لحوشك مابالك حوشه..لالا مايخشلاش ياطوبى بري استقبليه في حوشك هني لا..
طوبى بقلة حيله.
/هو جايك انتي مش جايني اني..لكن باهي حاضر زي ماتبي تو نبعتله رساله نقوله يجيني للحوش..
غرفه بضيق:بالله ماتحرجي مني..
طوبى بإبتسامه..
/وعلاش بنحرج منك عندك حق..وبدت تكتب في الرساله وهي تسمع في غرفه تقول بكره..
/يحساب اللي صار بيني وبين عبد الرؤوف ولا اللي دارهوله بيخلوني ننسى ونسامح..هو لأخر لحظه كان يحرض فيا عليه ورؤوف الله يرحمه ويسامحه ساعده من غير مايحس..
طوبى وهي عاقده حواجبها قالت..
/حرضك عليه!؟
هزت غرفه راسها وقالت..
/ايه..هو اكثر واحد خلاني نخاف من الطلاق قبل وهو اللي خلاني ناخد قرار طلاق بعدين..مش لأن كلامه اثر فيا لا..لأنه اللي داره زاد عبد الرؤوف حقد ع حقده تأكدت وقتها اني لو وليت مرة تانيه حنشوف من عبد الرؤوف احرف من اللي ريته اول ماتزوجت..
طوبى تسمع فيها وهي تفكر..جي ع بالها كلام خالها لما قال ان مختار انقذ عبد الرؤوف بش يذله...
ربطها للأحداث خلاها توصل لنتيجه وحده ان مختار كان يسعى لإبعاد عبد الرؤوف عنهم بشكل او بأخر...
🍃🍃🍃🍃🍃
وتجي الرساله لمختار ويقراها...
كان متوقع ردة فعل غرفه..هو كل اللي يبيه حاليا يبان في عينها وفي عين اللي حواليها انه قاعد يبادر بش يصلح ويرجع المياه لمجاريها..
🍃🍃🍃
قبل العصر..
ع طاولة الجنان من جهة الكوجينه كانت مقعمزه معاه تسمع فيه شن يقول بإنتباه وتركيز..
مختار:صعب اثبات حسن النيه لناس واخدين عنك فكرة غلط ومتشبتين بيها..
طوبى:لو تبي تثبت حسن النيه حق خليك بعيد عنها ومعاش تدخل فيها ولافي أي شي يخصها..
تنهد بعدين ابتسم وقال..
/تعرفي..يوم جبتلكم خبر موت عبد الرؤوف الحزن اللي عشتوه عليه وقتها خلاني نسأل نفسي سؤال..
"كان جاكم خبر موتي حتحزنوا عليا هكي!؟"
طوبى غيرت نظرها لزهور الاقحوان وهي تقول..
/ماعنديش جواب..
مختار:لاعندك غير ماتبيش تقوليه حيكون عندكم يوم عيد عارف..
حركت عيونها ليه بدون ماتتكلم..
ابتسم بألم وقال..
/اني عندي حظ في كل شي الا معاكم انتم..عبد الرؤوف البراني اللي غلط فيكم وعايركم وتمنن عليهم باللي داره معاكم نسيتوله هدا كله وقعدوا تبكوا عليه..اما اني...ع غلطه عمرها ربع قرن الناس كلها نستها وانتم..لا حرمتوني ناخد فرصتي ونصلحها..وياريت هكي وبس بعدين قعدتوا اي مصيبه اي كارته تصير معاكم..قرب يده منه وتف عليها وقال..لصق في ظهر مختار..تو بالله عليك وانتي مراة دايرة روحك قريبه لربي مش هدا ظلم...!
تنهدت طوبى بعدين لفت وجهها ليه وقالت..
/تعرف غرفه علاش حتى بعد جاها عبد الرؤوف هني وخبرها انه ماشي للحرب مابتش تعطيه فرصة تانيه وتوليله!؟ لأنها كانت واثقه ومتأكده مليون في الميه انه حيكرر نفس الغلط وبطريقه احرف من اللي قبلها..في اللي ماينعطاش فرصه تانيه يامختار لأنه خدي فرصته قبل واثبت انه مايستاهلش..انت جاتك اكبر فرصه بش تصلح وتثبت حسن النيه بعد ماروحت لكن للأسف بدل ماتثبت حسن النيه اثبتت العكس وانت عارف واني عارفه وكلنا عارفين شن درت ماتحاولش تعيش دور المظلوميه قدامي اني بالذات عرفت قبلك ناس عاشوه ونعرف كويس كيف يقتنعوا بيه لين يصدقوه لدرجة يحسسوا فيها ضحيتهم انها هي الجانيه..
ابتسم ع جنب وقال..
/تمام كان انتي شايفتيني شيطان لهالدرجة علاش قاعده دخلي فيا لحوشك!؟
طوبى:بعد ماسدرة تزوجت كنت ناويه نمنعك تخشه لكن حمل فاتن غير تفكيري كله..
رفع حواجبه تعجبا..
طوبى:نبي ولدك ولابنتك يتربوا بيناتنا ويعيشوا زينا يتربوا زي ماتربينا ويكبروا زي ماكبرنا...
"نبي يجيك عيل يبرك وما يديرش فيك اللي درته في بوي وامي"
بانت لمعة الدموع في عيونه وهو يسمع فيها ويشوفلها..
طوبى:اني اليوم معاك صريحه زياده عن اللزوم لسبب واحد..معاش نبيك دير اكثر مادرت لغرفه وصغارها..ارجوك..
رشف وغير نظره عنها وهو يحك في رقبته بعدين شافلها وقال..
/تمام مش حنجادلك لأن الجدال بينا ديما عقيم...ناض وهو يقول..نبي نشوف جنه..
ويصدح صوت المؤذن مناديا لصلاة العصر..
هي ناضت وقفت وقالت..
/نصلي ونطلعوا..ومشت خشت من باب الكوجينه..
هو غمض عيونه وحط يده ع رقبه وقعد يمسح عليها بعدين فتح عيونه وولى قعمز...
🍃🍃🍃🍃🍃
ويروح المهدي من الجامع ويتوجه طول لحوش عبد الرؤوف
وتستقبله مرته ويقعدوا هو وياها واقفين في الجنان..
سدرة وفي رافعه جنه في حضنها..
/لالا مانطلعش قبل لتجي امها..
تنهد بعدين شاف لجنة بأبتسامة وقال..
/بطشه..عمك نضال مستاحشك هلبه..
هي قالت..
"امشوا..ندوله"
ضحك وقال..
/ايه ياعسل ايه..
وسدرة تشوفلهم بإبتسامه..
دق باب الحوش..
مدت سدره جنه للمهدي خداها منها وهي مشت وقفت ورا الباب وقالت..
/مني!
"افتحي"
فتحت سدرة طول الباب وتتسمر في مكانها لما تشوف مختار جاي مع طوبى..
مختار بإبتسامه..
/شن جو سدو؟
بلعت ريقها وقالت..
/تمام..
ع جية المهدي شاف مختار قال..
/اوو بونسيب..
مختار بضحكه وعيونه في جنه..
/ياهلا..
جنه لما شافاته بلهفه قعدت تنادي..
"بابي بابي"..
مختار بضحكه..
/تعالي ياعمري استاحشتك موت ع خاطرك الكمامه حولتها اليوم..وخداها من المهدي.
خشت طوبى وهي تقول..
/خلاص عطيها للمهدي يرفعها لبوها..
مختار وهو يمرر في نظره بين سدرة والمهدي
/نمشي معاكم؟!
سدرة شافت للمهدي بضيق..
وهو قال؛تأنس وتنور..
مختار بإبتسامه..
/تسلم..
المهدي:هيا سدرة..
سدرة هزت راسها بصمت..
طوبى بضيق:ساعه بالله عليكم ماتزيدوش ع الساعه..
المهدي شافلها بإبتسامة حزن وقال..
/حاضر بنتي حاضر..
بعدين مشي وطلع وسدرة طلعت وراه..
وطوبى قعدت واقفه لعند ماشافتهم مشوا سكرت الباب..
🍃🍃🍃🍃🍃
وفي جنان حوش محمد شنيبه..
كانوا نجاة وخديجه جايات من الشقه وهما يهدرزوا..
خديجه:خليتها تشد جناحها معاش تطلع منه بكل..
نجاة:وهديكا!؟
خديجه؛هديكا شاده حوش اختها..
خشوا للجنان الأمامي ع خشه المهدي وسدرة ووراهم مختار رافع جنه..
نظرات نجاة ليه كانت كلها حقد..
لكن نظرات خديجه كانت نظرات اعجاب..
قعدوا معاهم بعيونهم وهما يشوفوا فيهم ماشيين للجهة اللي ترفع لشقة المهدي..
خديجه بذهول..
/كان نعرف مختار كيف ولى هكي بس..
نجاة:اول مرة تشوفيه قصدك!؟
خديجه؛اول مرة نشوفه عن قرب في المصحة لكن قبل كنت نلمح فيه لمح مش زي توا..
نجاه برفعة حاجب..
/قصدك ركزتي هلبه..
خديجه ابتسمت تهكما ومشت ونجاة مشت وراها وهي تشوفلها بإبتسامه استهزاء...
🍃🍃🍃🍃🍃
ويالا الصدمه اللي جت للجالي وهو يراجي في شقة خوه امتى تخش ع بنته لما شاف مختار جايبها في حضنه..
الصدمه الاكبر حصلها لما جنة رفضت تخلي مختار وتجيه ع قد ماداروا فيها البنت كانت متمسكه بمختار..
لهذا اضطر مختار يقعمز جنب الجالي بش يخليه يلاعبها وهي عنده..
هالساعه مرت ع سدرة وهي في حالة صمت قعدت مقعمزة ماتحركتش والمهدي مرة مرة يسرقلها في النظر...
🍃المهدي:خل نزلها لجدها وعمامها يشوفوها..
مختار:نوصلها للباب وبعدين خودها مني..
المهدي؛تمام...
وطلعوا كلهم من الشقه ونزلوا من الدروج الخارجيات..
الجالي كان في حالة غضب شديد قاعد يكبت فيها بكل قوة..
وصلول لباب الحوش الدخلاني..
خدي المهدي جنه من مختار وهو يقوللها..
"بنمشوا لنضال"
ولأنها تحب نضال هلبه جت لعمها خش بيها ومعاه سدرة والجالي..
ومختار مشي قعمز ع كرسي ورا طاولة الجنان..
وعيون خديجه تراقب فيه من الروشن..
"تي هدا وين والعازي اللي كنت واخداته وين"
نزلت عيونها لولد خوها وقالتله..
/برا اطلع توا
معاذ مشي يجري لباب الحوش لقاه مفتوح طلع بسرعه..
وخديجه طلعت وراه وهي تنادي..
"معاذ تعالى هني وين ماشي"
مختار شاف معاذ هو ويجري للغرس ابتسم بعدين التفت شاف خديجه جايه تجري..
رفع حواجبه وغير عيونه القدام..
وهي مكمله في المسرحيه متاعها وصلت في معاذ وخداته رفعاته لحضنها وقالت..
/مش عيب هكي حبيبي..مش عيب ماتسمعش كلام عميمه دوجه..
وهي ماشية بتخش تصنعت الصدمه لما شافت مختار شهقت وقالت..
/حي نهاري والله ماشفته..وخشت تجري بمعاذ..
مختار ابتسم تهكما وربع إيديه..
وهدا كله صار ع عيون جوري اللي كانت جايه من جهة جنان الكوجينه دور في خوها..
🍃🍃🍃🍃🍃
"بننفجر بننفجر..خيره ربي مارفعاش الكلب هدا حتى هو"
نجاة؛اهدى اهدى..خود المهدئ..
خدي الحبه منها وكلاها وشرب بعدها طاسة الميه بعدين قال...بنتي نبيها تقعد عندي خلاص..
نجاة:شن قالتلك المحاميه قالتلك ماتسقطش الحضانه الا بشروط وحده منهم فقد الاهليه وع ماحكتيلي قبل انها وين تشوفك تخش في عقلها وتطلع..
الجالي عقد حواجبه وقال..
/ايه!؟
نجاة:هي ماعندهاش مايثبت فقدانك انت للأهليه..وانت ماتنازلتش عن الحضانه..بعد ماانت تثبت انها هي فاقده للأهليه ارفع عليها قضيه ..
الجالي:صعب هلبه صعب..مانقدرش نثبت حاجه زي هادي..
نجاة سكتت وهي تفكر .
الجالي حط الطاسه بقوة ع الكامدينو وقال..
/مادام هالكلب وراها مانقدر ندير شي..
نجاه:انت توا اهدى وخليك عادي وحاول تصفي ذهنك وتفكر بالشويه عليك اكيد حتوصل لشي..
الجالي تنهد وقال..
/باهي بري اطلعي وخليني نرقد..
نجاة:حاضر..ناضت خدت الطاسه وطفت الضي وطلعت..
وهو تمدد ع السرير وحط ذراعه ع عيونه...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃
🍀بعد مرور شهرين...
"اني قلت طلعهم مانبي حد يقعد هني حتى انت اطلع معاش تخش.."
الاقجم بتوتر..
/الله يربحك يامدام اطلعي ارجوك..
امينه وهي تبكي .
/خلاص ياحبيبتي ماتعنديش يللا تعالي معايا..
فاتن وهي تبكي بألم..
/كيف تبوني نخليه يموت كيف.!؟
الاقجم بنفاذ صبر..
/خالتي امينه بالله عليك..
حاوطتها امينه وطلعتها وهي تقول..
/يللا ياحبيبتي عشان ابنك..
وطلعت بيها وفاتن تبكي وتقول..
/وبوه ياامينه وبوه..
امينه بحزن؛ادعيله ربنا يشفيه..
بعد ماطلعوا..طلع الاقجم وسكر باب الفيلا وهو مضايق ع الآخر..
🍃🍃🍃
في الطريق...
فاتن وهي تبكي..
/وين ماشي بينا ؟
الاقجم: للعمارة..
قالتله ببكي..
/باهي صح اللي يدير فيه يااقجم صح! شن عرفه ان اللي فيه كورونا لاعاين لادار فحص لاشي..
الاقجم بضيق:شن بديريله سكر راسه..
بنبرة الم قالت..
/كيف هكي ياربي لايبي يعاين لايبي من يعالجه يبي يموت هدا يبي يموت..
امينه بقلق..
/ع كده احنا مفروض نعمل الفحص بتاع الكورونا ده..
الاقجم:ايه قبل لنمشوا للعمارة بنديروا فحص في مكان نعرف صحابه كويس كان لاقدر الله لقينا شي نديروا حجر وناخدوا الادويه اللي يقولوا عليها وخلاص..
فاتن بصدمه..
/ومختار!؟
الاقجم:غصب عنه يتعالج مش بكيفه غير توا نرفعكم نديروا الفحص بعدين نقوللكم ع اللي نفكر فيه...
#الحجر
#طوبى
...يتبع....
