#طوبى "جنة طوبى"
#جمان_فريد
#الجزء_124"إمتحان/تمحيص"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
حقيقة الابتلاء:
قال الشيخ #ابن_عثيمين ـ رحمه الله ـ :
إذا أُصبت بالمصيبة فلا تظنّ أن هذا الهمَّ الذي يأتيك، لا تظن أَنه يذهب سُدىً، بل ستُعوض عنه خيرًا منه، سَتُحطُّ عنك الذّنوب كما تُحطّ الشجرة ورقها، وهذا من نعمة الله.
[شرح رياض الصالحين]
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃كيف أخبركَ بطريقة أكثر عمقا أنني اشتاقك وشوقي لايتبدل ولايزول!؟
كيف أخبرك أنك ثابته بقلبي ومتورط بك إلى هذا الحد الذي لا رجوع فيه!؟
كيف اخبرك بأنك عشقي واماني وتوام روحى !؟
أنتي البعيده التي كالقمر ألمحه
أنتي القريبه التي في الروح قد تربعت
إن جئت حيناً فكل الأرض ضاحكة
أو غبت يوماً فكل العالم في عيوني كئيب🍃
_____________________________________
"هاه قولي شن رايك"
قامت غرفه عيونها المدمعات في صفيه وماقدرتش تهمس بحرف..
ضحكت هاديه وقالت..
/شكلها المفاجأة ربطت لسانها..
صفيه بإبتسامه:شوفي قدرك قداش كبير عنده وحتى عندي يابنتي وراهو زيي زيه نبيك تولي كنتي اليوم قبل غدوة..وختمت كلامها بضحكه وهي توزع في نظرها عليهم..
الموقف مايحتملش صمتهم اكثر من هكي لازم حد فيهم يوقف اللي قاعد يصير لأنه مؤلم جدا..
وصار وفي منهم اللي تحرك بش ينقذ مايمكن انقاذه..
"امي"
شافت صفيه لسدرة لما كلمتها..
جتها سدرة خدت العلبه سكرتها وحطتها ع الطاوله وقالت..
/تعالي معاي.
وخدتها من يدها وصفيه وهي متعجبه قالت..
/خيرك!؟
سدرة:تو نفهمك..
ومشوا طلعوا من الصالون بطريقهم لدار صفيه..
هاديه لما شافت وضعهم وتصرف سدره اختفت ملامح الابتسامه من وجهها وحلت محلها ملامح القلق..
وغرفه اللي كانت غارقه في صدمتها ومجموعه مشاعر تانيه غير مفهومه وجهت نظرها طول لطوبى لقتها تشوفلها بنظرة حزن..
غمضت غرفه عيونها ومسحت بإيديها ع وجهها بعدين قالت..
"نبي نروح"
🍃🍃🍃🍃
"انخطبت!!!"
سدرة وهي حاطه ايديها في نصها قالت..
/ايه..حني مابيناش نخبروك بش مايوجعكش خاطرك قلنا لو صار منه الموضوع تخبرك غرفه وتشرحلك اسبابها..
قاطعتها وقالت بصدمه..
/شن تقولي انتي!! اسباب شني!!..حطت يدها ع صدرها وقالت بألم..ياناري ع ولدي وع حظه علاش هكي علاش يصير معاه هكي!!؟
سدرة بضيق:ياامي اسمعيني حسين قال لغرفه انسي موضوع الزواج ومعاش تفكري فيه وخلينا صغار عم وخلاص ومن قبل فتره قاللها ع وحده عاجباته كان تتفكريها بنت عمة عبد الرؤوف الله يرحمه. شوره شايفها تجي لمحلات غرفه وصغارها وعجباته ونشد غرفه عليها وع اخلاقها..
صفيه نزلت يدها وقالت بإستغراب شديد..
/معقوله!
سدرة:والله هدا اللي صار ياامي...اني ماكنتش نبي غير حسين ياخد غرفه لكن بعد اللي صار قلت اكيد خيرتها في غيره..مش خاطر عليا بكل ان ولدك هدا قاعد يرفس ويلبز من راسه ويدير في حركات..سامحيني فيها ياخالتي..حركات مفرخ..
🍃🍃🍃🍃
"ماخليت طريقه مادرتهاش معاها وكلها بلافايده"
عبد القيوم:مشكلتك ماتعرفش تصبر ..
حسين بضيق وانزعاج..
/مليت من الصبر ياصاحبي..
ابتسم عبد القيوم وقال..
/ربي يعطيك مافي بالك ويفرحنا بيك..وهاه..كان صار من موضوعك يوم العقد كله عليا..
حسين بضحكه:راهو ناوي نديره عرس كبير ويوم الفاتحه بنذبح فيه ابل ياغالي..
حط يده ع صدره وقال..
/ماعندكش مشكله خوده عهد عليا نخلي يوم العقد متاعك ينحكى بيه سنين القدام..
ضحك حسين وقال..
/منور من يومك..
ويرن هاتف عبد القيوم اللي كان ع الطاوله خداه وشاف المتصل بعدين فتح الخط ورد طول..
/السلام عليكم..
"وعليكم السلام عباده تعالى روح بينا"
شاف عبد القيوم لحسين بعدين قال..
/تمام تمام..السلام عليكم..
"وعليكم السلام"
نزل عبد القيوم الهاتف وقال..
/قالت تعال روح بينا..
حسين بإستغراب..
/توا!!..وشاف لساعة يده بعدين قال متعجب..مازال بكري..
ناض عبد القيوم ومشي طول بيطلع من المقهى وهو ملتزم الصمت..
ويلحقه حسين اللي ولى في قمة التوتر والقلق..
🍃🍃
وصلوا للفيلا مع بعض ودرسوا قراب ع الباب..
اتصل عبد القيوم بطوبى..لحظات وانفتح الباب الصغير وطلعت طوبى مع جنه لسيارة راجلها وبعدها انفتح الباب كله وطلعت سيارة غرفه وتلحقها سيارة عبد القيوم..
🍃حسين لما شاف اللي صار نزل من سيارته وخلاها برا وخش طول للفيلا..
🍃🍃
توجه للصالون لقي هاديه مقعمزه بروحها والطاوله اللي عليها التورته مقابلتها..ركز ع التورته لقاها قاعده زي ماهي والهديه اللي جابها قاعده في مكانها..
بلع ريقه وشاف لمرت بوه وقال..
/شن صار!؟
هاديه وهي تشوفله بحزن وضيق..
/والله ماعارفه شن نقولك ياولدي..
ع جية امه اللي وقفت قدامه وهي تقول بتهجم..
/حق انت كلمت غرفه ع بنت عمة عبد الرؤوف؟
غمض عيونه بإستياء..
بتهكم قالت...
/شن تحساب روحك بتحصل من حركات الصغار هادي قولي! لا وتقوللها خلينا صغار عم بس ومازال طامع منها تقول عليك باهي!.
فتح عيونه وتأفف بعدين قال..
/شن قالت؟
صفيه بحزم:موضوع غرفه انساه غرفه حولها من راسك بكل..
بإنزعاج قال..
/ماتكبريهاش يام غدوة تو نمشي غادي نوضحلها الصورة ونتفاهم معاها..
صفيه:قتلك حولها من راسك خلاص..
"المراة انخطبت"
هاديه قعدت تشوفله بأسف وخوف في نفس الوقت..
الجمله الاخيره اللي سمعها من امه خلاته جامد في مكانه..
هربت امه بعيونها عنه وقالت بضيق والم..
/شوف غيرها ياولدي مالكش نصيب فيها..
ومشت طلعت وهو طول لحقها يسأل فيها بصدمه ممزوجه بالغضب .
/كيف انخطبت وامتى ومني اللي خطبها يام!!؟
وصلت في دارها فتحت الباب وقالت..
/مانعرفش..
وخشت وسكرت الباب في وجهه..
وهو قعد واقف قدام الباب ومازال تتردد لمسامعه نفس الجمله..
"المراة انخطبت"
وتجي بين عيونه غرفه بكل الحالات اللي شافهم وعرفهم بيها من زمان لليوم وحاليا ماوقفش الا عند حالة وحده يوم شافها في اسبوع ولد خوه..
ولعت فيه النار من اسفل رجليه ووصلت لأعلى راسه وزي البركان الثاير مشي بسرعه طلع من الفيلا وخلا هاديه اللي شافت حالته تدعي بخوف..
"يارب سترك"
🍁🍁🍁
في نفس الوقت..
في الطريق..
عبد القيوم وهو عاقد حواجبه قال..
/صاير شي!؟
طوبى بإستياء..
/موقف بايخ لين خلاص..
عبد القيوم سكت شويه بعدين قال..
/ليش بايخ..الراجل رايدها من قلبه مااعتقدش في غلط في اللي داره..
طوبى شافتله وقالت..
/عندك علم؟!
هز راسه بإيجاب..
شافت طوبى للطريق وقالت بضيق ..
/ياريت خبرتني..
قاللها:ليش شن اللي صار بالزبط!؟ اختك شن قالت!!؟
🍃ومن سيارة عبد القيوم لسيارة غرفه اللي كانت تسوق فيها سدرة..
فردوس بضيق:كان يبيها علاش يدير في حركات بايخه زي هادي !؟
اريج:شوره فهم انها بتغار عليه وطلع اللي داساته في قلبها..
غرفه بعصبيه:وشن هو اللي داساته في قلبي!! اقسم بالله مانحس جيهته بحاجه غير انه ولد عمي وزي خوي بالزبط لو كنت غير هكي راني ماصدقت لما فتح معاي موضوع الزواج..
اريج:عارفه ياخويله والله عارفه اني نحكي عنه هو كيف يفكر.. سدرة بأسف:ربي يهديه ويسامحه..
🍃🍃🍃🍃
"ليش ماحكتيلي!؟"
طوبى بضيق:هي أمنتني مانقولش.
عبد القيوم بضيق وعدم رضا..
/عليك موقف حطيتوا فيه الراجل..
طوبى:هو اللي حط روحه فهالموقف لما قاللها يبي غيرها..
عبد القيوم بإستغراب..
/كيف!؟
طوبى:وقاللها انسي اني كلمتك في موضوع الزواج وخلينا ولاد عم وخوت..
غمض عبد القيوم عيونه وفتحهم بإستياء بعدين قال..
/غبي...دخل الدنيا في بعضها..
طوبى:ع العموم هكي خير عدنان يناسبها اكثر من حسين.
عبد القيوم؛وليش في شن خير من حسين!؟
طوبى بضيق..
/مش قصه مني خير من مني..بس ظروف عدنان مناسبه لظروف غرفه..
سكت عبد القيوم لما فهم قصدها وانتابه شعور يضيق شديد لما وصله منها انها مش مرتاحه معاه لهذا تبي تجنب اختها اللي هي عايشاته..
وقعدوا ملتزمين الصمت طول الطريق وجنه وراهم من اول ماركبت للسيارة خداها النوم...
🍃وبعد طول مسافه وصل عبد القيوم نسيباته لشارع القهوة بعدين كمل طريقه..
وسدرة درست بالسيارة قدام حوش شيابينها..
نزلوا هي واريج اللي كانت رافعه علي عطتهوله بعدين مشت ركبت في مكانها..
وقعدوا قدام الباب وهما يشوفوا في يزن جاي من القهوة للحوش فتح الباب لمرت بوه وخلاها تخش بعدين ولى للقهوة واريج تحركت بالسيارة لحوش خالتها..
🍃🍃🍃🍃
"ماما نبي كيكه ماما"
غرفه وهي تبدل لأواب قالت بشي من الضيق..
/غدوة الصبح ياما نشريلكم احلى كيكه باهي..
اواب:به..
وبعد مالبستهم فرشتلهم ورقدتهم بعدين مشت للحمام بش تاخد "دوش"
🍃في هالاثناء..
في الدار اللي اريج كانت تكوي فيها عبايتها بش تمشي بيها للجامعه تاني يوم..وقفت كوي لما جي لخالتها اتصال..
مشت للزيانه وقفت ع الهاتف اللي كان محطوط عليها لقت الاتصال جايها من..حسين..
ضمت شفايفها داخل بأسف بعدين ولت لطاولة الكوي..
🍃🍃🍃🍃
بعد ماصلت العشاء..
توجهت للكوجينه بش دير عشي ع السرير..
دارت عجة وحطت معاها جنبة شرايح وهريسه وزيتون وزوز علب عصير..
🍁ع خشة راجلها للشقه رمي من رجليه وتوجه طول لدار النوم..
هي شافاته..تنهدت بضيق وقعدت للحظات تشوف لسفرة العشي بعدين طلعت ومشت لحقاته للدار..
🍁🍁
خشت عليه لقاته يلبس في التيشرت متاعه وكان باين عليه من ملامح وجهه انه مضايق..
قالتله:تعالى تعشى..
هو مشي قعمز ع السرير وخدي هاتفه مع ع الكامدينو وقال..
/ماعنديش نيه..
شافتله بعدين مشت قعمزت جنبه وقالت..
/زعلت مني!؟.
حرك راسه بالنفي وهو يشوف لهاتفه..
بحزن قالت..
/مش قصدي اللي فهمته..
شافلها وقال..
/انتي مش مرتاحه معاي!؟
تعنقت ذراعه وقالت..
/علاش فهمتها هكي ياقلبي بس!..
قاللها:باهي كيف تبيني نفهم قصدك من كلامك!؟ ياطوبى فكرة انك مش مرتاحة معاي تقهر فيا واجد..
خدت يده ورفعتها ليها وباستها بعدين ضمتها وقالت..
/معاك انت بس من الناس عرفتها الراحة وربي شاهد..
بس اني قصدي ان اختي مرات ماتلقاش في حسين اللي لقيته فيك..حسين طبعه صعب هلبه وفي بعض الامور صايرة قبل ممكن دير مشاكل القدام بينه وبينها ومرات لو خداها وين يجي يوم يختلفوا فيه يديرلها مادار عبد الرؤوف الله يرحمه ويقعد يتمنن عليها ولايعايرها..حسين عصبي ومتهور وسهل عليه يجرح بالكلام ياعبادة واني مانبيش اختي تنكسر مرة تانيه..
قاللها:وليش التسرع في الاحكام..وبعدين من قال هذى عدنان مايديرش معاها اللي انتي خايفه منه..
قالتله:شبه مستحيل تعرف علاش..لأنه ارمل زيه زيها وتاني شي هو اللي سعي بش ياخدها ويبيها هي وصغارها اللي قال عنهم صغار صحابه ويبي يرعاهم ع خاطره هو بالدرجة الاولى وغير هكي هو براني علينا مايعرفش هلبه تفاصيل عن اللي صار معانا ومع غرفه تحديدا يعني حيقعد بينهم الاحترام..
عبد القيوم؛الله يهديك ياقلبي كل كلمه تقوليها احرف من اللي قبلها..قصدك انا اللي نعرف عنك كل شي ماعندكش قدر عندي ومش محترمك!!.
عضاته من ذراعه..ضحك بصدمه..
طوبى بنرفزة:قتلك انت بروحك ماتشبه حد ومافي حد زيك..افهم..
فك ذراعه منها وخداها لقلبه وضمها بقوة..
طوبى بصوت مكتوم..
/انخنقت..
رخاها شويه وقال بضحكه..
/وين عشاك؟
ناضت وشدت يده وهي وقول..
/ماكله في دار النوم.." Noo"...وماتحلمش بيها..هيا نوض..
ناض معاها وهو يضحك بعدين مشوا طلعوا للكوجينه..
🍃🍃🍃🍃
وهديكا الليله حرق حسين هاتف غرفه بالاتصالات لعند ماخلاها تحطه في الحظر..
ويتصل بيها ماسنجر حطاته في الحظر..وخشت ع الفيس وحظراته..
ولاقال نمل ولانكل..اتصل بفردوس وفردوس دارت هاتفها صامت وخلاته بعيد عنها..
ومارقدوا ليلتها الا بصعوبه..اما هو ماعرفلاش النوم الطريق كان حينجن بمعنى الكلمه ولو يطول اللي خطبها حتما حيكسره تكسير بين ايديه..
🍃🍃🍃🍃
"هادي اخرة عقوقه العاق هدا"
هاديه بضيق:حرام عليك..
عبد المطلب:الحرام عليه هو ع اللي داره معاي وحرام فيه غرفه مراة مقومه مش لأشكاله غرفه تبيلها راجل عقله في راسه مش المهبول هدا يحساب روحه صغير ع الحركات اللي دارهم..
هاديه بحزن:والله يوجع مسكين بخته بالهون..
تمدد عبد المطلب وتغطا وهو يقول..
/من فعايله..وهي سكري الضي وارقدي..
شافتله بإنزعاج بعدين ناضت بش تنفد طلبه..
🍃🍃🍃🍃
تاني يوم..
بعد الفطور..
طلعت اريج للجامعة ورفعت في طريقها ولاد خالتها للحضانه...
وخالتها تقصدت اليوم تقعد في الحوش لأنها كانت متوقعه حسين يجيها في الكليه..
🍃واللي توقعاته صار..
ومشي حسين للكلية وقعد يستنى فيها وهو مقعمز تحت المظلات ويشوفوه صاحباتها لما طلعوا من المحاضرة وحتى هو شافهم وناض من مكانه ومشالهم..
🍃"لااليوم غرفه مش جايه قالت بتغيب اليوم وغدوة"
بملامح وجه بان فيها الغضب هز راسه ولف ومشي وهو يلبس في نظاراته..
=كلمي غرفه..
رفعت هاتفها وقالت..
/هاني بنكلمها..
**********
غرفه وهي تكلم في صاحبتها هاتفيا قالت وحاجبها مرفوع..
/المهم قلتيله حتى غدوة مش جايه!؟
"اي اي قتله اليوم وغدوة غايبه"
غرفه:تسلميلي نرجوسه..سلام..
"غير راجي فهمينا شن صاير"
قالتلها:غدوة ان شاء الله نحكيلكم..سلام..
"سلام"
ونهت غرفه المكالمه وهي تشوف لهاتفها ومازال حاجبها مرفوع..رخاته لما ضوت شاشة هاتفها بإتصال طوبى ع طول ردت وهي تقول بضيق..
/بيبو..
🍃🍃🍃🍃
"والله الحمد لله كلنا بخير"
هادي فايزة تكلم في فهيمه هاتفيا..
"دوم ان شاء الله..فيزة"
فايزة:نعم..
"فيزة..تعرفي قداش مريوه غاليه عليا وفرحانه بيها ومونا وليدي زيي واكثر امس وليدي جاني وقالي نبي نديرلها شي يام البنت بنقعد خاطبها عامين لازم نديرلها حاجه..قتله شن تبي دير..قالي بيان يام ونبيه في رمضان"
بدت ع وجه فايزة ملامح الضيق..
"فيزة..شن قولك"
تنهدت وقالت..
/والله شن بنقولك يافهيمه..بصراحة مش مستعده..
"ماتخمميش من هالناحيه مش جاي حد كان اني وبناتي وكنايني"
سكتت فايزة وهي مضايقه ع الاخر..
"مانبيش نزر عليك ياوخيتي كان مافيهاش كيف في رمضان نديروه بعده عادي "
فايزة:تو نزيد نشوف روحي ونرد عليك..
🍃ونهت فايزة المكالمه وهي مضايقه ع الاخر حست بالعجز ع انها دير لبنتها حفلة بيان كبيره..
ماعندهاش حاليا امكانيات الفلوس اللي طلعهم من المركز يغطوا مصاريفهم هما والمركز بس وماكانت داسه من فلوس صينت بيهم الشقه اللي واخدتها بعد مالحقتها بعض الاضرار من الحرب..
وعدا عليها باقي نهارها في المركز وهي مهمومه لعند ماجي وقت مرواحها وتطلع من المركز وتتوجه طول لحوش عيلتها اللي ماتلقاش غيرهم بعد الله كل ماضيق بيها..
🍃🍃🍃
فايزة بضيق..
/هما ناس معروفه وربي عاطيهم مانبيش بنتي تبان ناقصة قدامهم..
فردوس:اهو حوشنا يافايزة ديريه هني..
قالتلها: شاوروا طوبى قبل..
فردوس:عارفتها مستحيل تقول لا..
غرفه ضيقت عيونها وقالت..
/الحوش هدا صغير والمربوعه مش كبيره..
رجعت فايزة اضايقت وفردوس قالت..
/علاش قداش بتجي وحدة!؟ قالتلها بتجي هي وكناينها وبناتها بس..
غرفه:قالتها ع اساس ماتبيش تكلف ع فايزة...شافت لفايزة وقالت..كلميها وقوليلها نديروه في رمضان ان شاء الله ليله 27 وتعالي انتي وبناتك وكناينك وحمواتك وخواتك..
فايزة قعدت تشوفلها بعدم استيعاب..
فردوس:شن تقولي انتي!؟
غرفه بإبتسامه:بديره في حوشي اني ومصاريف البيان بيني وبينها..
حطت فايزة يدها ع فمها وهي مندهشه ع الاخر..
قالتها غرفه:خيرك مصدومه هكي!؟ انتي مش حاسبتيني اختك!؟ مش حاسبتيني خاله لمروة!؟
ابتسمت فردوس ودموعها في عيونها..
اما فايزه ناضت ومشت قعمزت جنب غرفه وضمتها وهي تقول..
/ربي يجبر بخاطرك ويفرحك بصغارك..
غرفة ضمتها وقالت بضحكه..
/آمين..
🍃🍃🍃🍃
في حوش شنيبه..
تجديدا الجنان من القدام..
كان محمد مقعمز مع فرح وراما يقري"يدرس" فيهم..
واخته داخل في الصاله تقري في بنت عمها..
ويخش عليهم عمهم نضال،قعمز مقابلهم وهو يسمع في سدرة تقول..
/ترا دخلي كان في جمله..
قاللها بنبرة منغمة..
/كانتيرا في المناطق الحارة..
ضحكوا جوري وسدرة..
ع خشة عمر سمعه شنو يقول قال بضحكه..
/مقدمها قاعد تتفكر فيها!؟
نضال بإبتسامه:الله يرحم جمال الحريري..
قعمز جنبه عمر وقال..
/الله يرحمه..
سدرة:هي خليك معاي جوري..
انتبهت معاها جوري وعمامهم قعدوا يهدرزوا..
ع خشة سميره وهي تقول..
/نضال..
شافلها وناض وقف طلع هاتفه من جيب السوريه العربيه"ثوب" وقاللها..
/نبي نبعتلك صور الشقه بش توريهم غدوة للمودام
ضحكت سميرة وعمر يشوفله بإبتسامه..
قامت سميرة هاتفها وقالت..
/هي خل نفتح البلوتوت
نضال وهو يشوف للهاتف قال..
/قوليلها كان في حاجه ماعجبتهاش تقول قوليلها فوتي ام المجاملات..
سميرة بضحكه:باهي باهي..
ابتسم وقال:هي اقبلي هي..
☘ومن الصاله للجنان..
فرح بتذمر:خير بلاها!؟
محمد وهو يشوف في الآله الحاسبه قال..
/شكلها البتاريه خلاص..
تأففت وقالت..
/عندي غيرها تو نمشي نجيبها..ناضت ومشت خشت داخل..
حط محمد الآله الحاسبه وقال..
/الجو حلو...
يدوب شافتله راما وقالت..
/امم..
ابتسم وقال..
/راما بنسألك سؤال
شافتله ووجهها محمر من الخجل..
محمد بإبتسامه..
/مش حاطه في بالك شي يخص المستقبل؟ يعني شن ناويه تخشي بعد تكملي الثانوي؟
نزلت عيونها وقالت بإبتسامه..
/فكرت في هلبه حاجات قبل لكن من اول بدت السنة هادي اخترت نخش كلية التربيه..
قاللها بإبتسامه؛علاش!؟
راما؛نبي نولي زي عمتي نجاح وخالتي عيشة الله يرحمها..
غير نظره لباب الحوش وهو مبتسم بحزن..
راما:اصلا التدريس اكثر مهنه تناسب المراة..
شافلها وقال:مزبوط لكن نتمنى تخشي التخصص هدا ويكون عندك فيه طموح..زي خالتي طوبى قداش كانت تعجب فيا كيف تتكلم ع تخصصها وكأنها خاشه طب ولاهندسه تتكلم بطريقه تعطيك شغف جهة طموحك..اني من لما خشيت الثانوي واني راغب الهندسه..تنهد وقال..عمي الجالي حببني فيها واللي زاد قوا رغبتي خالتي طوبى مع انها ولامرة هدرزت معاي في الموضوع هدا..
راما قالتله:تعزها هلبه..
قاللها بضحكه:من واني في عمر خوك تيم نحب نلعب معاها هيا اكثر شي ووين بديت ندوي نحب نتكلم معاها ولما خشيت الروضه لازم نوريها شن درت ونقوللها شن قالولي الابلات علمتني حتى الرسم كانت عندي كراسه نرسم فيها الرسمه اللي نرسمها لازم نوريهالها..ابتسم بأسف وقال..خسارتها والله خسارة..
راما:تبي الحق مش لعمي الجالي بكل..
قاللها:خداها اللي يستاهلها..
وتجيهم فرح وهي تضحك وتقول..
/والله جو خالو نضال ماينمل منه..
محمد وهو مبتسم بسخريه قال..
/ماشاء الله عليك ماشاء الله اني هني نراجي فيك وحضرتك مقعمزة تهدرزي داخل!
قعمزت ومدتله الآله الحاسبه وهي تقول..
/باهي سقد روحك وحل المسأله معاش ضيع وقت..
شافلها تعجبا وهو رافع حواجبه وراما تضحك عليهم..
🍃🍃🍃🍃
"بيان!!!"
فايزة:ايه بيان حبيبتي..
مروة وهي متفاجئه قالت..
/شن خطر عليهم!
فايزة؛قالت خطيبك هو اللي يبي..
تاله بضيق..
/وحني مش في بابه..
عقدت فايزة حواجبها وقالت..
/شن عرفك انتي انه مش في بابه ولامش في روشنه..
تاله بأنزعاج:معاش بيبي ياماما راهو راني كبيره نشوف ونفهم في كل شي..
ضيقت امها عيونها وقالت..
/هوبي منك انتي..
مروة بضيق؛عندها الحق..مش في بابه..
فايزة بإبتسامه:لافي بابه حبيبتي في بابه..
☘وبدت تحكيلها ع اللي خططوله هي وبنات الواعر كانت تحكي بحماس ومروة تسمع وهي تحاول تخفي ضيقها حست ان اهل معين حطوا امها في الامر الواقع..
بعد ماكملت كلام مع امها خشت لدارها وخدت هاتفها وع طول خشت ع الماسنجر بش تكلم خطيبها..
بعتتله..
(السلام عليكم)
ع طول شافها ورد عليها..
(وعليكم السلام..شورها زارقه من مغربها!)
يدوب ابتسمت بعدين بعتتله..
(علاش ماخديتش رايي في قصة البيان؟)
قعدت تراجي فيه وهو يكتب بعدين بعتلها..
(عارفك كان كلمتك مانكش راده..ماتبيش انتي؟)
بعتتله..
(مش قصة نبي ولامانبيش لكن حاجات زي هادي موالها طويل وتبي استعداد)
بعتلها..
(جديات مروة انتي عمرك 17عام بس)
ضحكت بعدين بعتتله..
(فكنا من المواضيع الجانبيه..مرة تانيه حاجات زي هادي كلمني عليها لانها ضروريات)
طول شويه وهو يكتب بعدين بعتلها..
(باهي انتي توا تبي ولالا اللي تبيه انتي يصير)
بعتتله..
(مدام الموضوع ولى في يد امي وعمتي معاش نقدر نقول فيه شي)
بعتلها..
(شن رايك نخلوها قراية فاتحه مرة وحده)
ضحكت بعدين بعتت..
(السلام عليكم)
ويرد عليها بعد ماطول في الكتابه..
(مشكلتي معاك مانعرفش نتصرف بكل حتى كان جيت بطيرلي منك مايصيرش..قيمتك عندي ماوصلها حد ياكاتيوشا)
قرتها وهي تضحك وقلبها يدق بقوة ومع هدا ماردتش عليه..
☘ «إنَّ الحَيَاءَ لَدَى الرِّجَالِ فضيلة
لَكِّنَّهُ .. عِنـدَ النَّسَاءِ جمال!»☘
🍃🍃🍃🍃🍃
"جنيوة..شن جو ياسمحه"
طوبى بإبتسامه؛قالتلك نينه شن جو..
جنه:حلو نينه حلو .
"نجك ليا نجك ليا"
جنه:نشك..نشك"نجك نجك"
ضحكوا امها وكاريمان اللي كانت تكلم فيهم فيديو بعدين قالت كاريمان..
"ربي يحفظها ويبارك فيها"
طوبى:آمين..عمي الصابر مهناش؟!
"شويه ويخش الحوش"
فجأة فصل الخط..
طوبى بإنزعاج..
/لاعاد..
جاها صوت عبد القيوم من الكوجينه وهو يقول ..
"فصل"
طوبى:الجهاز يأشر..تغطيه النت حالة هني..
جنة:مامي نبي اكل..
طوبى؛وين طاجينك عباده اني وجنوني جعانين هلبه راهو..
لحظات وجاهم بسفرة وهو يقول..
/قعمزوا لوطا قعمزوا..
خدت طوبى جنه ونزلوا من ع الكنبه وقعمزوا ع الفرشه..
حط عبد القيوم السفره وعيون طوبى يشوفوا طاجين البطاطا والدجاج..لمعوا بشغف وشهيه وهي تقول..
/ياإلهي..
جنه:مامي نبي بجاجه..
ضحكوا عليها وامها قالت..
/حتى اني يامامي..
🌼وبدت طوبى تقص لبنتها وتعطي فيها بعدين كلت هي وبعد اول لقمه حطتها في فمها قالت سيل من المدايح والشكر وعبد القيوم وهو يسمع فيها مرة يضحك ومرة يبتسم لما يشوفها تاكل بشهيه مفتوحه وكل ماله يكبر الشك في داخله تجاه توقع معين لكن ماباش يستعجل في البوح بيه وفي نفس الوقت يتمنى من الله اللي في باله يكون صحيح🌼
🍃🍃🍃🍃
تاني يوم..
الخميس..
الساعه 11:30صباحا..
في كلية العلوم..
في مكان المظلات كانوا صاحبات غرفه مقعمزات مقعد طويل وانظارهم مركزه ع شخص معين مقعمز تحت المظله..
=عليك زين وشخصيه يمشي مع غرفه اكثر من ولد عمها..
=لاحسين مازال مهيوب اكثر منه وهو اللي يمشي مع غرفه..
=مش بالهيبه والزين انتي وياها..بالانسجام والتفاهم والتكافؤ..
= ايه..حسين لو خدي غرفه مرات بعد عامين تلاته يجيها يقوللها نبي نتزوج بنت بنوت وهدا حقي..
=معقوله!
=عندها حق نرجس مش عارفه كيف مافكرتش فيها هادي..
=لكن يابنات حتى عدنان يعتبر ماتزوجش قبل كان قاري فاتحه بس..
=اسمه ارمل في النهايه وبش تعرفي ان فاهم وضعه كويس لما فكر في الزواج اختار وحده بنفس وضعه..
سكتوا وهما يشوفوله ويفكروا في الحديث اللي دار بينهم..
وفي هاللحظه..
تخش غرفه وولادها يمشوا قدامها..شافوها صاحباتها ابتسموا..
=سلمهم ياربي..
=غير شوفوا شوفوا عدنان لما شافهم ناض وقف..
☘وقف وهو يشوفلهم بإبتسامه جذباته هلبه اناقة غرفة وصغارها كانوا لابسين لون واحد..اخضر باهت..
هي لابسه بلوزة بيضا للركبه عليها دجيلي طوله لتحت الركبه ع بنطلون جينز ازرق غامق وع راسها شاربه بيضا..وشنطة يد صغيره سودا وفي رجليها بوت رياضه ابيض..
وولادها كل فيهم كان لابس قميص ابيض عليه جاكيت خفيف لونه اخضر باهت على بنطلون جينز وفي رجليهم لابسين زي امهم..
قدملهم وهو يقول..
/السلام عليكم..
طبس ع الاول ومد يده لاواب وقال..
/اسمي عدنان وانت شن اسمك؟
رد عليه وقال..
/اواب..
غرفه:سلم ع عمو عدنان ماما..
مد اواب يده وصافحه..
ابتسم عدنان بعدين جي لمهاب وقاله..
/وانت؟.
رد عليه وقال..
/مهاب ..
مد يده وقال..
/واني عدنان..
صافحه مهاب وهو بعدين وقف ع حيله وقال بإبتسامه.
/ربي يحفظهم..
غرفه؛ آمين..تسلم..
اشر بيده ع الكراسي وقال لولاد..
/بروا ياتريس..
شافوله بعدين شافوا لأمهم هزت راسها بالموافقه وهما مشوا طول للمقاعد..
شافلها عدنان بإبتسامه اعجاب بعدين لحقهم وهي وراهم..
قعمز بروحه ع مقعد وهي وولادها قعمزوا مقابلينه..
خدي كيسه معبيه شكولاتة كان جايبها لغرفه فتحها وقال..
/اواب مهاب تعالوا شوفوا..
غرفه:بروا ماما..
نزلوا من الكرسي ومشوله وقفوا عليه وهو قال..
/خودوا اللي تحبوها..
شافوا للكيسه بعدين اللي هدا خدي الشكولاته اللي لفتت انتباهه
قاللهم:قعمزوا حداي..
الزوز سمعوا كلامه وقعمزوا جنبه..
حط الكيسه جنبه وبدي يحول في غلافات الشكولاته وغرفه تراقب فيه كويس..
بعد ماعطاهم الشكولاته شاف لأمهم وقال بإبتسامه..
/شن الاخبار؟
قالتله:تمام الحمد لله..
قاللها:فرحتيني هلبه لما عطتيني فرصه..
غرفه:وان شاء الله مانندمش..
ضحك بعدين قال..
/لا ربك مايجيب ندم..شوفي اني ماخطرش في بالي نهائي انك تجيبي الصغار من اول لقاء لكن نقولك احسن مادرتي بش تطمني من بدايتها..اني معروف عليا نحب الصغار هلبه صغار العيله كلهم كبرتهم ع ايديا ولما تخشي عيلتنا ان شاء الله حتشوفي مكانتي في قلوبهم..
غرفه:يقعدوا صغار عيلتك..
هز راسه وقال بإبتسامه..
/فاهم عليك..شوفي اني صغارك نعزهم من قبل مانشوفهم من معزة بوهم رحمة الله عليه..وحتكبر معزتهم بعدين اني واثق ومتأكد من الحاجه هادي..
غرفه:يعني انت فكرت فيا ع خاطر صغار صاحبك؟
ضحك بعدين قال..
/اني كنت ع علاقه حب بزوجتي الله يرحمها لمدة اربع سنوات بعدين قعدت خاطبها عام تقريبا ولما جينا نتزوجوا بدون مبالغه كنت اسعد من خلق ربي..وربي قدر عليا في نفس الوقت نولي اتعس من خلق..تخيلي يوم الدخول وهما ومروحين بيها من المزين يديروا حادث وتموت!
متخيله حالتي وقتها واني عريس في قمة الفرح يجيني خبر يقولولي فيه مرتك العروسه متاعك توفت..!
تنهد وقال..عشت اتعس ايام حياتي اللي ولوا سنين بعدين صح رجعت عشت حياتي طبيعي لكن سكرت باب الزواج ومايجي منه واي حد يجيب سيرته قدامي نسكره طول ..ابتسم وقال..لعند ماجت اول مرة شفتك فيها كانت اول مرة نحس بيها ان نفسي انفتحت للحياة مرة تانيه والله وبدون مبالغه..لفتي انتباهي عجبتيني شكلك لطيف لكن شخصيتك قويه وراكزة جذبتيني هلبه ومع تكرار اللقاءات لقيت روحي نقول لأمي وخواتي نبي نتزوج..ضحك وقال..مانحكليكش ع اللي صار بعدها الدنيا كلها انقلبت غني ع زغاريط ع عياط ماتفهمي شي...
ضحكت غرفه ضحكه خفيفة وهو ضحك معاها..
ابتسم وقال..
/صدقيني ياغرفه مش حتندمي نهائي وحنحطك في عيوني انتي وصغارك..
🍃🍃🍃🍃
"هو كويس ومريح لكن ماحركش فيا شعره ماحسيتش اتجاهه بولا حاجه"
طوبى:مازال بكري ياغرفه..
غرفه بضيق:حاسه قلبي ولى جامد ومشاعري بارده وخايفه نقعد هكي عمري كله من الراجل اللي بيعيش معاي متهني؟
طوبى بحزن؛حاسه انك استعجلتي لما فتحتي موضوع الزواج!؟
دمعوا عيونها وقال ..
/مش هكي..صح نحس بروحي مازال مش مستعده لكن فكرة الزواج مااقتنعتش بيها لأني نبي نتزوج..اني لازم نتزوج زي ماقلتوا ظروفي حكمت عليا ..
طوبى:هدا علاش حاول نقنعك تقبلي..ع العموم زيدي استخيري حسيتي روحك مش مرتاحه سكري ع الموضوع ماتضغطيش ع نفسك ياغرفه..
تنهدت وقالت..
/ان شاء الله ان شاء الله..
سكتوا شويه بعدين قالت غرفه..
/خالتي صفيه خدت موقف..
طوبى:سيورها ترضى وتولي زي قبل..
غرفه:ع قولتك..هي تعالي نخشولهم..
طوبى هزت راسها بالموافقه وخشوا مع بعض من الجنان للحوش.
🍃🍃🍃🍃
"ياحسين المسألة هادي قسمه ونصيب ياولدي".
حسين وهو واقف قدام المحجوب وهو مربع ايديه محاولة منه لكتم غضبه قال.
/باهي اني ولد عمها من حقي نعرف من خطبها ولاانتم عجبتكم الحركة اللي درتوها قبل وتبوا تعاودوها مرة تانيه!
تنهد المحجوب وقال...
/عدنان الأشتر..
مجرد ماسمع حسين الاسم تخيل نفسه قالب المكتب ع راسه المحجوب باللي فيه..لكن احتفظ بهالمشهد في خياله وقال..
/خير ان شاء الله..خير..
🍃🍃🍃🍃
الساعه 9:39ليلا..
في حوش طوبى اللي دايرين فيه لمة كل خميس..
طلعت طوبى من الحمام وهي قلقه ومضايقه..
توجهت طول للدار..بعد ماخشتلها خدت هاتفها من الشنطه وخشت ع التقويم..
لما ركزت فيه قالت..
/ليها هلبه غايبة..! شكلي لما سيبت الدوا رجعت تتلخبط مرة تانيه..لكن الكورس العلاجي تم هداكا هو!.
وتخش عليها اريج وهي تقول بفزع وصدمه..
/اسمعي شن صار!
طوبى بخوف:شني!؟.
اريج :خالي حسين..
"تهجم ع عدنان الاشتر في المعرض وعطاه طريحه رقداته في المستشفى"
