#طوبى "جنة طوبى"
#جمان_فريد
#الجزء_121"انا لحبيبي وحبيبي إلي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الدعاء
251 - باب فضل الدُّعاء بظهر الغيب
قَالَ الله تَعَالَى: وَالَّذِينَ جَاءُوا مِنْ بَعْدِهِمْ يَقُولُونَ رَبَّنَا اغْفِرْ لَنَا وَلإِخْوَانِنَا الَّذِينَ سَبَقُونَا بِالْأِيمَانِ [الحشر:10]،
وقال تَعَالَى: وَاسْتَغْفِرْ لِذَنْبِكَ وَلِلْمُؤْمِنِينَ وَالْمُؤْمِنَاتِ [محمد:19]،
وقال تَعَالَى: إخْبَارًا عَن إبْرَاهِيمَ ﷺ: رَبَّنَا اغْفِرْ لِي وَلِوَالِدَيَّ وَلِلْمُؤْمِنِينَ يَوْمَ يَقُومُ الْحِسَابُ [إبراهيم:41].
1/1494- وَعَن أَبي الدَّردَاءِ أَنَّهُ سمِعَ رَسُولَ اللَّهِ ﷺ يَقُولُ: مَا مِن عبْدٍ مُسْلِمٍ يَدعُو لأَخِيهِ بِظَهرِ الغَيْبِ إِلاَّ قَالَ المَلكُ ولَكَ بمِثْلٍ رواه مسلم
.
2/1495- وعَنْهُ أَنَّ رسُول اللَّه ﷺ كانَ يقُولُ: دَعْوةُ المرءِ المُسْلِمِ لأَخيهِ بِظَهْرِ الغَيْبِ مُسْتَجَابةٌ، عِنْد رأْسِهِ ملَكٌ مُوكَّلٌ كلَّمَا دَعَا لأَخِيهِ بخيرٍ قَال المَلَكُ المُوكَّلُ بِهِ: آمِينَ، ولَكَ بمِثْلٍ رواه مسلم.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لأجلها سأحارب حتى نفسي🍃
___________________________________________
🍀يوم الخميس..
العاشر من شهر ربيع الأول..
29اكتوبر...سنة2020..
الساعه 8:40ليلا..
🍃بعد يوم ادهوروا "تجولوا" فيه في اجمل الاماكن في مدينة بنغازي..
روحوا لحوش صحابهم..خلاها تركب الدور التاني وهو خش مع صاحب الحوش للدور الأول..
🍁هي اول ماخشت توجهت لدار النوم..
حولت شنطتها وعبايتها وشاربتها وقفازتها حطتهم ع السرير بعدين مشت للحمام..
قعدت فيه لحظات وطلعت وهي متوضيه لكن ع وجهها كانت باديه ملامح قلق ممزوجه بالضيق..
خدت الملايه من فوق الكرسي وصلت بيها صلاة العشاء وبعد كملت اذكارها مشت قعمزت ع السرير وخدت شنطتها طلعت منها الهاتف وخشت بسرعه ع التقويم..وهي تشوفله الدموع عبوا عيونها..
تبدلت ملامح وجهها للاستغراب لما جاها اتصال ماسنجر من حساب ماعرفتش صاحبه في البدايه لكن لما ركزت ع الاسم ارتخت ملامح وجهها وابتسمت ابتسامه خفيفه..
فتحت المكالمه وردت..
/السلام عليكم مريوة..
"وعليكم السلام بيبو استاحشتك هلبه هلبه هلبه"
ضحكت وقالت..
/واني اكثر حبيبتي..
"ديما نسأل في ماما عليك واليوم بس خديت من ابله غرفه حسابك الجديد ع الفيس اني عندي هداكا جنة طوبى"
مسحت طوبى نص وجهها وقالت..
/باهي فكرتيني اكثر من مرة بنسكره وننسى..
"بعتلك طلب ع هذا اقبليه"
طوبى بإبتسامه..
/إن شاء الله..شن حالكم انتم..انتي وصفاء ووليدها وتاله..
"الحمد لله كلنا كويسين..انتي شن حالك وشن حال عمو عبد القيوم ايه حقه مبروك عليكم"
ضحكت وقالت..
/الله يبارك فيك وعقبالك بعد الشهاده..
سمعت تنهيده منها تبعها كلام تاني..
"بيبو نبي ناخد رايك في موضوع مصيري هو نفس اللي قلتي عليه توا"
عقدت حواجبها وقالت..
/موضوع زواج!؟
"ايه..عندك وقت تسمعيني فيه"
هزت راسها وقالت..
/ايه حبيبتي..نسمع فيك..
🍃🍃🍃🍃
"والله ماعارفه كيف بنبدا كلامي"
عبد القيوم وهو عاقد حواجبه بقلق قال لسالمين..
/هاتي اللي عندك بسرعه ياخالتي من غير مقدمات..
شاف جبريل لمرته بنظرات ضيق مخالطهم الغضب..
سالمين بملامح حاده واثر البكاء باينه في عيونها قالت..
/قبل لتجوا بشوي اتصلت بيا عمتك سليمه وماخلت ماقالت..
بدت ع وجهه ملامج التهجم وهو يسمع فيها..
سالمين؛الله اعلم من وين عرفت تمت تلوم فيا وتحاسب وتقولي في كلام قهرني لكن مش ع نفسي ع طوبى قالت عليها سحارة وانظر شن دارتلك بيش قلبت عليهم وخديتها من وراهم وكلام تاني مانبي نذكره لأن يزيد يقهر فيا ويحرقلي في دمي..
شبك اصابع ايديه في بعض بقوة من الغضب..
جبريل:من الاول كان متوقع الشي هذى وانا قتلك ياسالمين كان عرفوا من برا ردة فعلهم حتكون واعرة واجد وقلت هالكلام لعبد القيوم في نفس اليوم اللي عقد فيه ع طوبى..
مسحت سالمين دموعها وقالت..
/انا خايفه توصل في طوبى وتسمعها نفس الكلام ولاتكلمك انت وتقولك مايخليك تندم..
رفع عيونه في سالمين..
سالمين؛ماتبحتش فيا هك ليا عذري في كلامي هذى وانت عارف كويس ونقولها لك صريحه واهو عمك جبريل عارف لعند توا مازلت مااطمنتلك واجد ومتوقعه منك كل شي..
جبريل وهو مركز بنظره ع عبد القيوم قال بأسلوب فيه نوع من التنبيه..
/وانا مازلت مصر ع رأيي فيك انك راجل وعند كلمتك..كلمتك اللي عطتيها ليا قبل لتعقد ع طوبى مذكرها كويس اكيد!؟
🍃🍃🍃🍃🍃
"شن رايك انتي!؟"
تنهدت طوبى بعدين قالت..
/اني ارتحت للموضوع وحسيت ان الولد صادق معاك واللي داره لتوا معاكم يثبت انه راجل كويس وفرصة ماتتعوضش ومدام الزواج بعد ماتاخدي الشهاده الثانويه مافيش مشكله..
"يعني مش حنندم بعدين!؟"
طوبى:اللي يعلم الغيب الله سبحانه وتعالى صلي استخاره وتمسكي بدعاء"اللهم اخترلي ولاتخيرني فأنت خير من يختار" في كل سجده من كل صلاة وفي كل وقت اجابه وامشي في الموضوع وخلي عندك يقين ان الله مستحيل يخيبك..
"ونعم بالله..الحق ريحتيني هلبه هلبه بندير اللي قلتيلي عليه وبنفوت يومين وبعدين نرد عليهم"
طوبى بإبتسامه..
/ربي يقدملك اللي فيه الخير ويبعتلك ايام حلوة زيك يامروشه..
"وإياك يارب"
🍃🍃🍃
"مليت وانا نحاول نثبت صدق نيتي لكم ولغيركم"
قال عبد القيوم هالكلام ردا ع جبريل وسالمين بلهجة شديده وكمل وهو يقول..
/ومعاش نبي نحاول مرة تانيه خلاص..رفع سبابته وقال..لكن نبي نقول كلمتين استوعبوهم كويس وخلوهم يوصلوا لغيركم..اشر ع نفسه وقال..طوبى توا تعنيني انا وبس هي هلي ونا هلها وانتم وغيركم تجوا بعدين فهمتوا..
ناض وهو يقول بشي من الغضب..
/وهذى اخر كلام عندي..
ومشي طلع من حداهم وجبريل معاه بعيونه لعند مافتح الباب وطلع وسكره وراه..
شاف لمرته وهو يقول..
/خلاص ياسرك بكا الله يربحك هلكتي نفسك..
هدت بكي ورفعت عيونها للأعلى وهي تقول..
/حسبنا الله ونعم الوكيل..
🍁🍁🍁🍁
خش للدور الثاني وهو معصب..يفكر في اللي بيصير بعد مااهله عرفوا..مش مهم عنده من قاللهم عاجلا او اجلا حيعرفوا..اللي يفكر فيه بس ردة فعلهم..
وقف في مكانه لما شافها جاياته وهي لابسه فستان حلو بالمرة تبي تمشي بيه في اول يوم من فرح بنت اخت سالمين..
بإبتسامة ارتباك قالت..
/شن رايك طالع عليا!؟
ابتسم من قلبه بحب وقال..
/اللي تلبسيها تحليها وتخليها تخيل عليك غصب عنها..
ضحكت بعدين قالت..
/جديات!؟
قدملها وحط يده ع راسها وهو يقول..
/وجد الجديات..مرر يده ع شعرها اللي كان مطلوق ورفعه وحطه ع كتفها وهويقول..
/تعرفي في شي خاطري فيه من وقت وكل مانجي نطلبه منك نتراجع..
هي بإبتسامه ووجهها محمر وقلبها يدق بقوة قالت..
/شن هو!؟
مرر نظره ع شعرها وقال..
/نمشطلك شعرك..
ضحكت وقالت..
/هادي بس!؟ غالي وطلب الرخيص..
خداها وضمها وهو يقول..
/مافي شي رخيص منك انتي كله غالي ويسوى روحي..
ضماته وهي تقول..
/كلامك يهبل واسلوبك في الكلام يهبل..
ابتسم وقال..
/والله مافي حد يهبل كان انتي انتي وبس..
ضحكت بعدين بعدت عنه شويه وهي شداته وقالت..
/بجديات..طريقتك في الكلام ونبرتك حلوة هلبه بالذات لما تناديني بإسمي الوحيد اللي تنطق فيه نطق صحيح الباقي وين يقولوا فيه يغيروا في معناه..طوبه..طوبه..
ضحك..
ضماته مرة تانيه وقالت..
/مش اسمي بس ملاحظة ان طريقتك في الكلام بالفصحى اكثر شي..
عبدالقيوم..
/طريقة كلام عرب الكفرة هك يختلفوا واجد عن عرب الشرق بنغازي وغيرهم التشابه بس في لحن الكلام وبعض العبارات..
طوبى:لاحظت..كلامك مايشبهش هلبه كلام الشراقه..
عبد القيوم..
/نا مداير مكس للهجة الليبيه..شويه من الشرق وشويه من الغرب ع شويه من الجنوب والوسط..
ضحكت وقالت..
/ايه لاحظت اللكنة متاعنا بدت تمشي في لسانك..
قاللها:هلبه هلبه..
قعدت تضحك وهو ضحك معاها وزاد ضمها وملامح الضيق تصارع في ملامح الضحكه ع وجهه..
باعدت عنه وخدت يده شدتها وقالت..
/تجي معاي نوريك باقي الحوايج اللي بنلبسهم في العرس!؟
ابتسم من قلبه وقال..
/lats go ..
ضحكت ومشت بيه وهي تسمع فيه يقوللها..
/بعدها بنكسد ع شعرك راك تنسي..
طوبى بضحكه..
/مش ناسيه...
🍃🍃🍃🍃🍃
"منه ولامن غيره اولها واخرها حيعرفوا ياصفيه"
صفيه بضيق:زادوا نقموا ع المسكينه مافكروش نهائي ان هذى قرار عبد القيوم وهو دار هك لأنه يبيها ومصر عليها لا..داروها هي اللي لاعبه بعقله وساحرته حتى امي اللي عارفه كل شي وشاهده عليه..
معمر:بيني وبينك حتى نا تراود فيا هالفكرة مرات..
صفيه بإنزعاج..
/حرام عليكم ياناس اتقوا الله..
ضحك وقال..
/قتلك مرات مش ديما..ضيق عيونه وقال..شن رايك نديرولهم طبه..
ارتسمت ع وجهها ابتسامه عريضه وهي تقول..
/وهذي تبيلها راي..طبوا ولاتردوا..ومشتله تجري وضماته وهي فرحانه..
وهو ضمها وقعد يضحك عليها...
🍃🍃🍃🍃
"من وين طلعت قصة الحنة هذي"
طوبى وهي تحط في شاربتها ع راسها قالت..
/نحساب خالتي قالتلك !
عقد حواجبه وقال..
/يعني انتي توا بتباتي عندهم!؟
طوبى نزلت شاربتها ع كتافها وقالت..
/هي قالتلي انتي مراة متزوجه وفي حكم العروس لازم تحضري العرس وانتي محنيه لكن كان انت ماتبيش مش لازم..
رخي حواجبه وابتسم وهو يقول..
/لانبي ونبي..
ابتسمت بخجل وحطت شاربتها ع راسها وشافت للمرايه وهي تقول..
/الحق اني استاحشتها وخاطري فيها هلبه..
قدملها..وقف ع الزيانه بالجنب وحط عليه ايديه عليها وقال..
/اللي تجي في خاطرك قولي عنها ماتفكريش في رايي وشن نبي بالذات في الامور اللي تخصك انتي بالدرجة الاولى..ابتسم وكمل يقول..في كل الحالات اللي تبيه انتي يصير..
شافتله بإبتسامة حب ممزوجه بالخجل وهي تقول..
/ماينقدرش عليك انت كلامك يدوخ..
ومشت طول من حداه وطلعت من الدار وهو ضحك ولحقها..
🍃وصلها لسالمين وركب..
سالمين بعد ما دخلتها للحوش ركزت ع ملامحها وطريقة كلامها ولاحظت انها عاديه وجوها حلو يعني عبد القيوم ماحسسها بشي وهالتصرف عجبها منه..
🌼بدهشه وخجل وهي تشوف للصقة الحنه..
/هادي كلها بديرهالي!؟
سالمين:مال ربعها! راك عروس يامراة كم مرة بنفكرك!
طوبى؛لبسي كله مستور مش حتبان منه الحنه هادي كلها..
سالمين ضحكت وقالت..
/وماعندكش راجل يشوفها!؟
بدت ع وجه طوبى ملامح الضيق..
سكتت سالمين شوية وهي تشوفلها بعدين قالت..
/حبيبتي طوبى انا كيف امك قوليلي وماتحشمي مني..انتي وعبد القيوم لعند توا ماصار بينكم شي!؟
من الخجل ماقدرتش ترفع عيونها لكن هزت راسها بإيجاب..
استغربت سالمين ورجع خوفها خلاها تفسر تفسيرات كلها ضد عبد القيوم..
عقدت حواجبها وقالت..
/منك ولامنه!؟
طوبى بحزن..
/لامني ولامنه شي غصب عني ياخالتي..
سالمين؛قصدك من السحر..
رفعت طوبى عيونها المليانات دموع وقالت..
/ايه..
سالمين بضيق وحزن قالت..
/شن اللي يصير بالزبط!؟
نزلت عيونها وقالت..
/بدون مانحس بشي فجاة هكي يغمى عليا اول مايقرب مني وبعدين نبدا خايفه منه ونتحاشى فيه..هو صح صار بينا تقاربات بسيطه زي انه يحضني ويشد ايديا بس كلها عاديه يعني مش زي...سكتت شويه وقالت..فهمتي عليا خالتي!؟..
تنهدت سالمين بضيق وقالت..
/فهمت حبيبتي فهمت..شدت يدها وطبطبت عليها وهي تقول..مع العلاج ان شاء الله الوضع يتغير..
طوبى ودموعها ينزلوا..
/هدا علاش قتلك قبل هو مش متريح معاي..
شدت سالمين دموعها وقالت..
/معاش تفكري هك حبيبتي خليك كيف ماعرفتك متفائلة وايمانك قوي..اصبري واخر الصبر خير بإذن الله..
طوبى:ان شاء الله حتى هو يزيد يصبر عليا..
ابتسمت بألم وقالت..
/عبد القيوم يحبك واجد ياطوبى وعشانك يصبر عمره كله..
ابتسمت من بين دموعها..
مسحت سالمين دموعها وقالت بحماس مصطنع..
/هي خل نبدوا مدي كرعيك..
مدت طوبى رجليها وهي تقول..
/متشوقه للعرس هلبه تفاصيل الاعراس عندكم تختلف علينا..
سالمين؛وانتي صغيره جيتي حضرتي فرح ولدي خالد..
طوبى:ايه لكن مانذكرش منه هلبه تفاصيل وبعدين عرس الولد مش زي عرس البنت..
ابتسمت سالمين وقالت..
/صح..
🍃وحنت سالمين طوبى وهما يهدرزوا عن اجواء الافراح في الشرق والغرب بسلبياتهم وايجابياتهم وموضوع جاب موضوع خداهم الوقت لعند قبل الفجر بساعتين بش جاهم النوم ورقدوا..
🍁🍁🍁🍁
ويفيقوا ع آذان الفجر..
حولت طوبى الحنه وتوضت وصلت الفجر وسالمين كذلك وبعد الصلاة جابت سالمين الزيت الخاص بالحنه لطوبى دهنت بيه ايديها ورجليها ولبست الشخاشير"جوارب" وقفازات وقعمزت في الكوجينه تهدرز ع سالمين اللي كانت تجهز في القهوة والفطور..
وماإن كملت تجهيز الفطور روحوا عبد القيوم وجبريل من الجامع طلعتلهم فطورهم وطلعت مع طوبى للجنان بش يفطروا في الهواء الطلق..
☘سالمين:نزيدك اخرى!؟
طوبى بضحكه:لالا خلاص ماعندي وين نحطه..
سالمين بإبتسامه:صحتين..
ويجيهم صوت حمحمة لما سمعاته طوبى حتى من عيونها ضحكوا..
سالمين وهي تشوفلها قالت بضحكه..
/تعال تعال..
التفتت طوبى شافاته جاي ناحيتهم..
كان يشوفلها بإبتسامه وعيون تغزل في الحب غزل وطوبى تبادل فيه نفس النظره والابتسامه..
لاحظتهم سالمين بهدوء ناضت وانسحبت من حداهم وخشت للكوجينه..
هو وصل في طوبى وقعمز قريب عليها وقال..
/صباح عسل وكل الحاجات الحلوة في الدنيا كلها..
بضحكه خجل ردت..
/صباح النور..
قاللها:فطرتي كويس..
بإبتسامة ردت تقول..
/الحمد لله..وانت؟
هو هز راسه وقال..
/الحمد لله..ركز بنظره ع ايديها وقال..ورينا..
ضحكت وحولت القفازات ومدت ايديها..
منظر الحنة في ايديها كان حلو بالمرة شدهم الزوز ورفعهم لأنفه شم ريحة الحنه بعدين باسهم..
طوبى بخجل شديد..
/شن دير!؟
بإبتسامة حب قال..
/نبوس في ايديك..
طوبى بضحكه خجل..
/عطيك الخير مش هني عيب..
رفع حاجبه وهو يقول بإبتسامه..
/عيب ع اللي يدير العيب ياسمحه..وقرص انفها..
ضحكت وهي تشوف لعيونه..
وهو قعد يتأمل في عيونها بهيام وصمت دام لثواني قليله بعدين قال...
"تعرف انك لما تغيب
عليا حتي العقل يغيب
ولما تقرب وقتي ايطيب
معاكي نحس بحال غريب
لولاك الدنيا ما تسوي
ولا فيها شي ايفرحني
عارف ما تحمل في قسوه
وكل همك تبي تريحني
ربي يقدرني ونكافي
صبرك عني ونبقي وافي
نوفيلك ليوم مماتي"
🌼غرقت نظرات عيونها المحبة بالدموع وهي تسمع في ابيانه اللي كان يقول فيهم بأسلوب مميز حستهم طالعات من قلبه وكأن قلبه هو اللي يقول فيهم ووصل المعنى لقلبها هي اللي ولى ينبض بحبه...
ومازال مكمل في توصيل احساسه وشعور قلبه المغرم لما قال بعد سكته خفيفه..
"تعرف انك لا ماتهون
عليا ولا حبك ننساه
وتعرف كل اللي فالكون
حبيبي ظفرك ما يسواه
انت اصلا عندي غالي
ما تسواك حبيبي اثمان
والغالي يرخص للغالي
مهما اغلي سومه ينهان
فداك اعيوني وعمري يا عمري
ما يغلا عنك لو تدري
يا املي واغلي غاياتي
🌼من قوة شعورها في هديكا اللحظه نزلوا دموعها هو مسحهم بأطراف اصابعه وكمل يقول.. "تعرف لما تزعل مني
تزعل روحي وكل حواسي
ولما ترضي يرضوا عني
ويغمرني فالنشوه احساسي
لو بيدي ماتشوف احزان
وانشيل حبيبي عنك همك
بس تبقي انتي فرحانه
وبسماتك ما تفارق فمك
ماتبخل بيها عن عيني
بسماتك بيها تحييني
يا حبي..وروحي...وحياتي..
🌼رفع ايديها مرة تانيه وباسهم وهي تشوفله بنفس نظرات الحب وفي نفسها تحمد في ربي وتعاود..ربي اللي عطاها فوق ماتمنت..هي كانت تتمنى يخش لحياتها راجل يحبها من قلبه بصدق حب حقيقي يعطيها ومايراجيش منها في مقابل ويراعيها ويدور ع سعادتها وكل همه في الحياة راحتها..وربي عطاها فوق اللي تمناته..راجل حبها حب اسطوري من الصعب يكون في شبيهه في زماننا وحده بل يكاد يكون مستحيل وبرغم كل شي عاناه معاها حب قاعد يزيد ليها ماينقصش..
🍃اي حد يعرف قصتهم ويشوف حالهم يقول يابختك طوبى بهالراجل..
لكن ثلاثه لهاللحظه مش قادرين يشوفوا بغير نظرتهم لهالقصة مهما يصير قدامهم من مشاهد حب ومودة وعطاء وتضحيات..
سدرة المنتهى اللي قاعده للآن مش قادرة تحط ثقتها التامه فيه..
وسالمين اللي برغم معزته في قلبها لكن قاعده خايفه من الوقت يغيره في أي لحظه ع طوبى..
وثالثهم المحجوب...
🍃اللي روح اليوم هو وزوجته بعد رحلة عمل دامت لقرابه شهر ونصف..
استقبلهم في المطار واحد من ولاد خواته رفعهم لحوش اخته اللي استقبلتهم استقبال حلو تغدوا عنها وارتاحوا لعند آذان العصر بعدين روح بيهم لحوشهم...
🍃🍃🍃
"في بنغازي!!؟"
قال محجوب هالكلام لسدرة اللي كان يكلم فيه هاتفيا وهي ردت عليه تقول..
"هي خاطرها تمشي غادي وهو دار ماتبي"
تنهد المحجوب وقعد ساكت..
"خالي"
رد عليها يقول..
/معاك ياخالي معاك..
"بتخطم علينا غدوة"
المحجوب:بإذن الله..ضحك وقال..وتولنا الغدي..
"من الصبح بنمشي غادي ونديرلك كسيكسو بإيدياتي مانخلي حد يدير معاي شي"
ضحك وقال..
/يعطيك الصحة يازعيمه من توا..
"قداش عندي خالي باهي اني"
ضحك وهو يحرك في راسه يمين ويسار ع تلميحها..
"هي خلاص مانعطلش عليك نتلاقوا غدوة ان شاء الله سلم ع الافوكاتيه"
المحجوب بضحكه..
/يوصل يوصل..حتى انتي سلمي ع المهدي..تصبحي ع خير.
"قدامك كل خير..بالسلامه"
نهي المكالمه والتفت بيطلع من المكتب شاف نبيله واقفه في الباب وهي تشوفله بإبتسامه بعدين قالت..
/سدرة؟!
هز راسه وقال بإبتسامه..
/ماتاكلي لغدوة يراجي فيك كسكسي لاقبله ولابعده..
ضحكت نبيله...
🍃🍃🍃🍃
"غدوة؟!"
سدرة المنتهى وهي تكلم في غرفه هاتفيا ودور في الكوجينه..
/ايه بيجوا ع الغدي اني بنديره الغدي راهو وبنقول للمهدي يجي يتغدا..
"مرحبتين بيهم كلهم"
سدرة؛ياريت طويبه قاعده..
"بكري كلمتني فيديو ورتني الحنه"
سدرة بضحكه..
/ايه الله يبارك صابغه وطالعه عليها تهبل..
"طاحت في ايدين خالتي سالمين اللي تحب تفتلك شفتي الحوايج اللي خلتها تاخدهم"
سدرة بإبتسامه وعيونها يلمعوا بالدموع..
/ربي يفرح قلبها ويهنيها..
"اللهم آمين.."
🍁وهما يدعولها من قلوبهم بالفرح استقبلت ابواب السمي دعواتهم اللي وصلت عند مولاها واستجابها كرما ورحمة وحب...
🌼خش عليها للدار..
لقاها واقفه ع الزيانه تحط في اخر لمساتها ع طلتها..
ويزيد قلبه المغرم يذوب فيها وفي جمالها اللي مش شايفله شبيه في عيونه..
قدملها وهو شد في يده حاجه وقف قريب عليها وقال..
/بنقولك ع حاجه اخرى قاعده في خاطري..
ضحكت وهي تحط في بكلة الشعر الذهبه ع شعرها اللي رفعت جزء منه ع جنب وقالت..
/قول..
ابتسم وهو يتأمل في جمالها ويقول..
/خاطري نشوفك وانتي ديري في مكياج..
نزلت ايديها وقعدت تضحك..
بضحكه وقال..
/نحكي جد..
هي بإبتسامه قالت..
/خلاص الايام الجايه قبل لنديره نقولك..
مرر نظره عليها بتأمل..
هي توترت غيرت نظره عنه لطقم البلاكيور اللي كانت حطاته ع الزيانه قدامه لما مدت يده لوحده من الخراص"الاقراط"
اتفاجئت لما شافت العلبه متاعهم تبدلت بعلبه تانيه..
تعليقه ذهب ناعمه وحلوة بالمرة..
غيرت نظره ليه وهي مندهشه..
هو قربلها وقال..
/ذوقي وان شاء الله يعجبك برغم اني متأكد لما تلبسيه حيحلى غصب عنه..
خدي السلسال ولبسهوله وهي تشوفله من المرايه بحب ودموعها في عيونها..
بعد مالبسهولها خدي الخراص وقال..
/عطرك مميز..بعد شعرها ولبسها اول قرط..
هي قالت:عطور طبيعيه مخلطه...
هو قال:غالب عليهم اللافندر..
ضحكت وقالت..
/صح..نحب حتى ندير الزيت متاعه لشعري..
لبسه القرط التاني وقال..
/شعرك هذى زادني ع مابيا..
نزلت عيونها وهي مبتسمه بخجل وهو شافلها من المرايه وابتسم..
🌼ولبسها بعدين الخاتم والانسيال بعد كمل قال..
/شن رايك..
بإبتسامة حب قالت..
/يجنن حبيبي..
رفع يدها وباسها بعدين قال..
/انتي اللي تجنني ياروح حبيبك انتي..
ضحكت بخجل وهو ابتسم وحط يده ع راسها وبدي يقرا عليها وهي تشوفله من المرايه وقلبها يرفرف وسط ضلوعها..
☘☘☘☘
ورفعهم هي وسالمين لحوش اختها..
هالليلة اول الليله في الفرح اللي حيستمر لأربعة ايام..
اول ماخشوا سالمين وطوبى ع المعازيم بعد ماحولوا حجابهم..
الانظار المعجبه كلها توجهت لطوبى بانت في عيونهم عروس وزادها البهاء الرباني جمال ع جمالها المميز..
سلمت مع سالمين ع كل من في الصاله ولما وصلت في كاريمان ضمتها بقوة وقالت..
/ماشاء الله ع بنتي..
سمعت طوبى الجمله بنبرة مخنوقه وسالمين كانت تشوف لبنت خالتها بإبتسامة حزن..
كاريمان وهي تضحك قالت..
/قعمزي حداي قعمزي..
ضحكت طوبى وقالت..
/حاضر..
وقعمزت طوبى جنب كاريمان اما سالمين مشت تشوف اختها..
لحظات وخشت سلوى اللي كانت دور ع طوبى بعيونها لين جو عليها ضحكت واشرتلها بعدين مشتلها..
وطوبى ناضت وهي تضحك..وصلت فيها سلوى وسلموا ع بعض سلام حار بعدين قالت لكاريمان..
/خالتي امي تبيك..
ناضت كاريمان وهي تقول..
/مايعرفن يديرن شي من غيري..ومشت طول وسلوى وطوبى يضحكوا عليها..
بعدين قعمزوا جنب بعض..
سلوى:الله يبارك عليك طالعه حلوة بزياده اليوم..
طوبى بإبتسامة:مش احلى منك..
🌼وتبادلوا الاحاديث بيناتهم لعند مابدي جو السهريه اللي استمعت بيها طوبى للغايه...
🍁رفعت شعرها فوق وشداته وخشت جنبه في السرير وهي تقول..
/يختلفوا علينا في هلبه حاجات حتى طريقة غناهم..
عبد القيوم:من مكان لمكان تختلف عادات الافراح..
ابتسمت وقالت..
/انتم اكيد تختلفوا اختلاف جذري..اني سمعت من صفيه شويه حاجات عن عاداتكم..
قاللها:ثقافة اخرى كل شي فيها يختلف..
رفع هاتفه وقال..خل نوريك عادات الفرح للعريس كيف تكون عندنا..قعد يدور في الاستديو وهو يقول..ان شاء الله قاعد عندي فيديو فرح ولد خالي..لقاه وفتحه وقرب منها الهاتف..
قعدت تتفرج وتسمع في شرحه عن اللي تشوف فيه..
طوبى بإبتسامة اعجاب..
/حلو...اكثر حاجه عجبتني لقطة السيوف..
قاللها:مش في كل الافراح نديروا فيها..
شافتله طوبى لقاته يتفرج ع الفيديو حست بالحزن عليه لما فكرت انه انحرم يعيش هالاجواء..حرم نفسه من فرحة العمر ع خاطرها..وان كانت خاضت تجربه فاشله وقاسيه قبل لكن دارت عرس وعاشت اجوائه بكل تفاصيلها اما هو فوق انه خدي وحده كانت متزوجه قبله ماقدرش يعيش فرحة العمر معاها..
ضحك وهو يتفرج ع الفيديو بعدين قال..
/هذى ولد عمي الكبير من يومه متخلف..
غير نظره ليها لقاها تشوفله بحزن والدموع في عيونها عقد حواجبه وقال..
/كنك ياقلبي..
ضماته وقالت..
/نحبك ونموت فيك..
ضحك وقال..
/نجك ليا ياغالي عليا..
بعدت عنه وطبعت قبله ع جبينه بعدين شافت لعيونه وقالت..
/ايه حقه مش اليوم مفروض نكتب اسمك في المذكرة..
وهو يشوف لعيونها بهيام هز راسه بإيجاب..
تباعدت عنه ونزلت من السرير ومشت تجري للشنطه بش طلع منها المذكر وهو معاها بعيونه اللي مافارقوهاش لحظه..
طلعت المذكرة ومشتله بيها..
قعمزت جنبه وفتحتها حطتها بينها وبينه..
غمضت عيونها وقالت..
/يارب..بعدين فتحتهم وبدت تكتب وهو يضحك عليها..
كتبت اسمه وشافتله وهي تقول بحماس..
/شن رايك!؟
وهو مركز بنظره ع الاسم قال..
/مقبول مقبول..
طوبى:قصدك مش حلو!؟
شافلها وقال بضحكه..
/انتي تبي راي استاذك اللي يعلم فيك ولاراجلك اللي يموت عليك!؟
ضحكت وقالت..
/الزوز..
ابتسم وقال..
/الرأي الاول وقلناه والتاني شن ماديري عندي ديما مافش احسن منه..
ضحكت ومسحت عيونها بخجل..
وهو عجباته ع الآخر حركتها هادي بانت طفوليه هلبه خلاته يشوفها الطفله اللي تحاول تخفيها غالبا في ثوب المراة الناضجة..
☘وكملت ليلها هالطفله وهي متوسده قلبه وهو يقرا عليها في سورة البقرة لعند مارقدت..
غطاها..بعدين رفع هاتفه وشاف تقويم التاريج الهجري..
مازال ع ليله اكتمال القمر ليلتين ناقصات برغم قلقه كان متفائل شويه ان الاعراض تظهر بشكل اخف ويقدروا يسيطروا عليها واللي خلاه يتفائل هو مرور الايام الفايته بسلام بدون مايصير معاها اي شي..
وفي الحقيقه هو في شي غريب صار مع طوبى ماقدرتش تخبره بيه...
🍃🍃🍃🍃
"وهذا كيف وصلت فيه والتم عليها!؟"
الاقجم:كانت في بينهم خدمه..
هز مختار راسه وقال..
/ع العموم المراة هادي شيطانه دماغها سم ماكانتش غبيه الا في خلطتها ع الجالي ومع هذا لحقت نفسها بسرعه وطلعت من هالعلاقه المتخلفه وهي رابحه وراده ثارها نوعيتها تعجبني هلبه عكس اختها البلهاء..تنهد وقال..المهم هداكا الزفت شن صاير فيه!؟
الأقجم؛قاعد في شقه ملكه في تركيا ويخدم في شركه لصديق ليه غادي..
مختار:عارفه مايقعدش هكي هدا الا مايكون مأمن ع نفسه ومفكر القدام...مش حندير فيه اكثر من اللي داراته نجاة يكفي انه مش حيقدر يقرب منها ولايردلها اللي داراته فيه..
الاقجم بإبتسامة..
/حيكمل عمره وهو مقهور..
مختار:ومنها للأسوء..باهي خلينا من اخبار الزباله هادم وقولي شن صاير مع اختي والتارقي؟
الاقجم؛ليهم اسبوع في بنغازي..
بدت ع وجه مختار ملامح ماقدرش الاقجم يفسرها كانت غريبه عليه
غير مختار نظره عنه وبعد ياقة قميصه بسبابته وخدي نفس بعدين هز راسه وقال..
/تمام..توكل..
الاقجم وهو يشوفله بإستغراب قال..
/تصبح ع خير..
ولف ومشي بدون مايسمع من مختار رد عليه..
ناض مختار وعيونه جو ع رقعة الشطرنج قدملها ووقف عليها وهو يمرر في نظره عليها..
تنهد بضيق بعدين مشي طلع وتوجه لدار النوم..
وصل فيها وخش لقي فاتن واقفه ع سرير ولدهم ابتسم ومشالها وقف جنبها وقال بهمس..
/توا كيف رقد؟.
ردت عليه بنفس النبره..
/ايه..رد بالك تفتح دولاب ولاتتحرك حركه تانيه ودير دوشه ارقد بحوايجك اللي عليك..
ضحك ضحكه خفيفه بعدين مشي للخلف كم خطوة لين وصل للسرير التفتله ورمي نفسه عليه دار صوت قوي وخلا السرير يهز..
رفع نص جسمه والتفت شاف لفاتن لقاها تشوفله بنظرات حاده قعد يضحك عليها بإستفزاز..
🍀🍀🍀🍀🍀
بعد مرور يومين...
🍃مع العصريات في حوش الحاجه فهيمه..
كان معين في داره يوتي في روحه بش بيطلع للخدمه..
لبس ساعته..بعدين مد يده للخاتم بش ياخده وقف لما سمع صوت صلي رصاص..
عقد حواجبه وشاف للروشن للحظات..بعدين مشي لدولابه فتحه وطلع الكلاشن متاعه من الرف الاخير ومشي طلع من الدار ومازال يسمع في صوت الرصاص..
وهو ماشي قعد ينادي..
/امي..هديل..
جاه صوت اخته وهي تقول..
"هني يامعين في الكوجينه"
عقد حواجبه بإستغراب ومشي للكوجينه خش ع اخته لقاها تضحك سألها..
/امي هادي!؟
هديل بضحكه..
/ايه..
قاللها؛شن جاها!؟
هديل بإبتسامه فرح قالت..
/كلمتها مروة وقالت موافقه عليك..
تبدلت ملامح وجهه للهفه مشي طول طلع للجنان وقف وقال..
/امي..
فهيمه قدمتله وهي شاده الكلاشن وتضحك وصلت فيه وطبطب ع ذراعه بقوة وقالت..
/ماخليتهاش تريح من يدك صحة ليك..
معين:شن قالتلك؟
ابتسمت وقالت..
/قالت فكرت مرة تانيه واستخرت وقلت خل نعطيه فرصه..
عقد حواجبه وهو يضحك بعدين مسح ع لحيته مرر نظره ع المكان بعدين رد نظره لامه وقال..
/خشي داخل يام..
ضحكت ومشت خشت للكوجينه وجت عند الروشن ووقفت جنب بنتها والزوز قعدوا يترقبوا في ردة فعله...
وهو رفع الكلاشن وبدي يضرب في الهوا وامه واخته يضحكوا...
🍃🍃🍃🍃
الساعه 7:30مساءا..
ليه مايقارب الساعه ونص مقعمز مقابلها يتفرج عليها كيف تحط في المكياج..
في البدايه توترت بس بعدين خدت راحتها..انسجامها مع هواياتها يخليها تنسى نفسها وهو كان مرة مرة يذكرها بوجوده لما يعلق في تعليقات مضحكه...
بعد ماكملت مكياج طلقت شعرها وخدت جهاز "الفير" ودارت بيه لقطه حلوة لشعرها..
هو اللي كان هايم فيها قال..
/بعد تكملي حلي اول درج وشوفي شن فيه..
التفت شافتله بإبتسامة استغراب بعدين حطت جهاز الفير وفكاته من الضي ورجعت للزيانه فتحت اول درج لقت فيه علبة مجوهرات سودا..
ضحكت..بعدين طلعتها وسكرت الدرج..حطت العلبه ع الزيانه وفتحتها وتشوف مايرسم ع وجهها ملامح الانبهار..
طقم ذهب يبان من النوع الغالي...جميل وفخم..
ابتسم وقال..
/عجبك؟
طوبى ودموعها عبوا عيونها..
/حلو بالمرة..
ناض ومشالها وهو يقول..
/وحيزيد يحلى عليك غصب عنه ..
وبدي يلبس فيها وهي تشوفله بنظرات ياما تحكي وتقول..
اللي يدير فيه ع قد ماكان يفرح فيها كان يوجعلها في قلبها عليه..
🍃قاعد يعطي عطاء مالاش حد وهي في المقابل مش قادرة تعطيه حتى حقه الشرعي فيها ومع هذا لاشافت منه تذمر ولاعدم رضا بالعكس ديما يحسس فيها انه شايفها ومش مصدق..🍃
طبع قبله ع راسها بعد قري عليها وهو يقول..
/ربي يحفظك ليا ياقلبي..مافش داعي نوصيك حبيبي اقري سورة الفلق وعاودي لعند ماتخشي ع الناس باهي ياعيوني!..
بإبتسامة حب ونبرة حلوة قالت..
/باهي...
باس راسها بعدين قال..
/هي غمي روحك غمة مقنطه..
ضحكت ومشت بتاخد عبايتها وخمارها بش تلبسهم...
🍁🍁🍁
طول الطريق كانت يهدرزوا هو وسالمين لكن هي كانت سرحانه وتفكر في وضعها معاه..وبعد طول تفكير قررت الليله تعطيه وتعطي نفسها فرصه بش تبدا معاه حياة زوجيه حقيقيه كاملة الأركان..
☘وصل بيهم قدام حوش عياده وقال..
/مانوصيكش عليها ياخالتي..
سالمين بإبتسامه..
/في عيوني..
نزل وهو مبتسم ومشي فتحلها الباب ساعدها تنزل بعدين جتها سالمين شدتها ومشت بيها لباب الحوش..
هو قعد واقف يشوفلهم لين اطمن عليهم خشوا..
"عبادي"
التفت لواحد من ولاد سالمين بعد ناداه رفع يده وحياه بعدين سكر السيارة ومشي بإتجاه خيمه الرجاله..
🍃🍃🍃🍃
وكعادتها طوبى كانت اكثر من يلفت الاتباه بين الحضور العيون عليها والكلام عنها واكثر من مركز معاها كناين سالمين..
☘☘☘
نشطت الاجواء وطوبى من كثر ماانسجمت كانت تصفق وتغني معاهم..
ناضت سالمين ترقص مع خواتها بعدين ناضت سلوي بأختها العروس وقعدت ترقص معاها..
شويه مشت سالمين لطوبى نوضتها بش ترقص معاهم وطوبى كانت متحمسه جدا..
رقصت مع سالمين بعدين مع كاريمان وبعدين مع سلوى
والعروس زاد حماسها وقعدت ترقص وهما داروا دايره عليها وقعدوا يشتوا عليها ويصفقوا..
وفي عز هالأجواء الحلوة وبدون مقدمات..
حست طوبى بألم فضيع في منطقة الرحم..حطت يدها عليها وصرخت بصوت عالي..
الدربوكه والغني وقفوا وصوت سالمين وكاريمان المذعور وهما يسألوا فيها..
"كنك ..طوبى!"
هو بس اللي قعد مسموع في المكان..
وطوبى ماقدرتش ترد عليهم في لحظه حست بكل شي فيها هبط وطاحت ع الارض بعد مافقدت وعيها...
#أنا_لحبيبي_وحبيبي_إلي
#طوبى
...يتبع...
