#طوبى "جنة طوبى"
#جمان_فريد
#الجزء_109"عرجون فل"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#التسبيح
التسبيح من الأذكار العظيمة
قال ابن مسعود رضي الله عنه :
ما كُرِب نبي من الأنبياء إلا استغاث بالتسبيح
فأكثروا من التسبيح في الرخاء والشدة
"الذين يحملون العرش ومن حوله يُسبّحون بحمد ربهم"
ويقال أن الملائكة لم يعينوا على حمل العرش إلا بالتسبيح
فالتسبيح يفرج به الهموم وتفك به الأزمات وهو سر من أسرار الإستجابة كما شرط من شروط اداب الدعاء لأن لكي يكون دعاءك صحيحا لابد من الثناء على الله والتسبيح فيه ثناء على الله وتنزيه له....
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 عرجون فل منــين فاح خداني
خطر عليا عمــــــرنا الـحقاني🍃
_____________________________________
ويعدوا ستة ايام...
وعبد الرؤوف لادور غرفه ولاصغاره ولاجي جهة حوش طوبى حتى لحوش اخته معاش مشي..
وغرفه عايشه في حاله تشبه حالة العزله..
شاغلها بنفسها بصغارها وبس..مابتش تحتك بحد ورفضت تخلي اي حد يتكلم معاها..
طوبى احترمت رغبتها في الصمت والانعزال وخلتها تعيش حزنها ع حالتها..
لكن في نفس الوقت كانت في قلبها نار والعه من خوفها ع عبد القيوم..مختار معاش جاهم ولاخلا فاتن تمشيلهم قعدوا فقط يتواصلوا ع الهاتف معاها.
🍃"والله ياطوبى مايبي يقولي حاجه لكن صدقيني هو مالاش علاقه باللي صار"
طوبى بضيق شديد..
/باهي كان هو مالاش علاقه علاش هارب هكي علاش معاش جي ولاخلاك تجي..
"تعرفيه ياطوبى انتي بسبب الكورونا حتى اني مايبنيش نطلع"
مسحت طوبى ع شعرها بشي من العصبيه وهي في قمة القلق والخوف بعدين قال..
/باهي فاتن مانعطلش عليك المهم كان عرفتي حاجه خبريني..
"ان شاء الله حتى انتي كان صار شي طمنيني"
طوبى:إن شاء الله..السلام عليكم..
"وعليكم السلام"..
نهت المكالمه وهي تقول..
/لاحول ولاقوة الابالله..يارب يارب الامر ليك من قبل ومن بعد يارب فرج عليه يارب..
سمعت صوت بنتها تبكي ناضت طلعت من الصاله لقتها طايحه ع ركابها والولاد يشبحولها..
ع جية امهم من الدار قالت بقلق..
/خيرها..
طوبى خدت بنتها وقالت..
/شي شي شكلها عترت وطاحت..
جنه وهي تبكي قالت..
"هوبا"
غرفه بصوت عالي بعض شي..
/علاش دير هكي لاتضرب في جنه!؟
الولد خاف جي يجري لرجل طوبى تخبى وراها وخوه قلده..
طوبى؛شن فيها ياغرفه صغار هادم..
غرفه بضيق..
/مانبيش نثقل عليك..
طوبى بصدمه..
/بعقلك انتي! شن الدوة اللي تقولي فيها هادي!؟ هدا حوشك حتى انتي وحوشهم هدا حوش العيله..يابنتي حتى مختار خشله وبات فيه..
ضحكت غرفه غصب عنها..
طوبى بضحكه:ايوه روفي اضحكي سلم وخيتي وحاولي تعيشي حياتك وخليها ع الله..
تنهدت غرفه من قلبها وقالت..
/يارب..
طوبى:هو هدا يارب..خودي وليداتك رضيهم وقعمزي العبي انتي وياهم صدقيني ينسوك كل شي..
ابتسمت وشافتلهم لقتهم يشوفولها بنظراتهم البريئة الخايفه..
وجعها قلبها بس حاولت تبين العكس وهي تقول..
/نلعبوا كورة!؟
هما بفرح قالوا مع بعض..
"ايه..كرة..كرة"
طوبى:برا جيبها اوبا..
مشوا يجروا الزوز..ضحكوا عليهم..
شويه وجوا بالكرة..وبدوا يلعبوا بيها في الصاله مع امهم وطوبى وجنه..
ع جية اريج شافتهم يلعبوا ضحكت بعدين خدت دور المعلق..
هي تعلق ع لعب الصغار بأسلوب فكاهي كعادتها وطوبى وغرفه يضحكوا عليها...
🍃🍃🍃🍃
"الكمامه الكمامه الله الله في الكمامه يامهدي"
المهدي وهو يلبس فيها قال..
/تخنق فيا..
سدرة:معليشي تتعود..حطت في جيب بالطوه شيشه كحول وهي تقول..دير زي مختار حتى انت كل شويه فش فش فش فش..
ضحك المهدي..
سدرة:مانعرفكش ساعتين وتركب ساعتين بس تفوت الدقيقه ننزل نركبك..
لف شالها حوالين رقبتها وقال..
/بش بعدين نشنقك..
ضحكت وقعدت تساويله في بالطوه يعدين قالت..
/اللهم بارك يارويجلي..صفقت بإيديها وقالت..توكل ع الله..
حط يده ورا راسها وقربها ليه باس جبينها بعدين فتح باب الشقه وطلع..
وهي قعدت واقفه في الباب تشوف فيه لين درق من قدام عيونها بعدين سمعت الباب الفاصل انفتح وتسكر..
سدرة:اللهم اني استودعك اياه..وخشت وسكرت الباب..
🍃هو لبس الكمامه كويس بعد مانزل ومشي بطريقه للباب الحوش..
لما وصل فيه شاف امه جايه من جهة القراج لما شافاته قلبت وجهها عنه وكملت طريقها للباب الدخلاني..
وعمر اللي كان وراها جاي بشناطيها قال لخوه..
/شن جو؟!
المهدي:الحمد لله..
عمر:للمطحن!؟
المهدي:ايه..اوينا..وفتح الباب وطلع وسكره وراه..
وعمر مشي خش للحوش..
🍃وفي الحوش..
طلعت خديجه تستقبل في امها وهي تقول..
/مرحبتين مرحبتين بنور العين بمولاة الحوش وكبيرته وكبيرة الشارع كله..
مغليه بإبتسامه..
/سلم بنيتي سلم بنيتي..وضموا بعض..بعدين خدت خديجه امها ودخلتها للصاله..
وعمر اللي شاف هدا كله ضحك وحرك راسه يمين ويسار ومشي حط شناطي امه قدام دارها بعدين مشي للحمام بش يغسل ايديه..
🍃وسميره في الكوجينه باديه طيب في الغدي وهي تقول بصوت منخفض..
/قد مايعطي باللطف..
🍃🍃🍃🍃🍃
الساعه 4:00عصرا..
في مطعم ربيع الفرع التاني..
كان نبيه والد سلافه واقف عليه ويسأل عن وضع عبد القيوم..
ربيع بضيق:والله ماقدرنا نشوفوه ولانعرفوا عنه شي..
نبيه بأسف:لاحول ولاقوة الا بالله..ياريت الواحد يطلع بأيده يعمل شي..
ربيع:الله غالب..
نبيه؛الله يفك كربه عن قريب ويثبت برائته..
ربيع:اللهم آمين..وعطاه الظرف وقال..تفضل هدا المعاش الشهر هدا فيه زياده شويه..
خدي الظرف وقال..
/خير ونعمه من الله..الحمد لله..
ربيع:الحمد لله..
نبيه؛يللا بخاطرك...
ربيع:في امان الله..
ومشي نبيه طلع وعيون زوز من عمال المطعم عليه..
واحد فيهم قرب للتاني وقاله..
/ايه رسيت على ايه..ده مالوش حد هنا يعني مافيش من يدور وراه..
:خلاص معاك..
:ايوه كده خليك جدع..نتقابل الليله في بيتي ونشوف مع بعض حنعمل ايه...
🍃🍃🍃🍃🍃
"خلاص سلافه عيونك انفقصوا من البكي"
سلافه ببكي:ياربي ياميار..شو رح يصير فيه هلأ معقوله بدوا يضل بالحبس..ياربي دخيلك حاسه قلبي رح يوقف..
ميار بضيق؛اني تو نحاول نكلم بابا عنه بالك يعرف حد غادي يقدر يساعده..
رشفت وهي تقول بلهفه..
/ايه احكي معه ميار مشان الله..
ميار طبطبت ع يد صاحبتها وهي تقول..
/حاضر حبيبتي حاضر والله اليوم نروح ونكلمه طول..
🍃🍃🍃
"للأسف لتوا مافي شي واضح جدي مسكين يخمم فيه ليل نهار"
اسامه:هو واضح انسان كويس ومحترم مايطلعش منه شي زي هدا..وارد تكون مكيده بش يحولوه من الخدمه..
اميمه بإستياء..
/شكلها هكي..
اسامه:في بلادنا بالذات تلقي السوس في كل مكان..تلقيهم يحفروا للي يبي يدير نظام ويمشيها صح ويقعدوا ورا الناجح لين يدمروه ولا يهججوه برا ..
اميمه بأسف؛مش عارفه لامتى بنقعدوا هكي..
اسامه؛للأسف شكلنا بنقعدوا هكي ليوم الدين
شافتله اميمه وقالت..
/تفائل خير..
ابتسملها وقال..
/انتي تبيني نتفائل خير..حاضر نتفائل خير اللي تبيه نديره.
ضحكت وضرباته ع ذراعه..
اسامه بضحكه؛ترا احسبي معاي قداش مازال ويتموا التلاته الشهور!؟
اميمه بأبتسامه؛احسب من تاريخ اليوم ل17 مارس
عقد حواجبه وقال..
/هلبه هلبه..اليوم اول يوم في شهر 2..
اميمه بإبتسامه..
/غمض عين وافتح عين تلقى شهر 3خش..
غمض عين وخلا التانيه مفتوحه وهو يقول..
/ترا شوفي التاريخ بسرعه..
اميمه بضحكه؛وااك مبردك
وهو بضحكه قال..
/شن جو الكناريه..
اميمه بإبتسامه..
/جوها مليح محصله الدلع من العيله كلها حتى جدي بجلالة قدره مهتم بيها..
اسامه وهو يشوف لعيون اميمه بحب قال
/يابختها اللي تشوف فيك ليل نهار..
غيرت اميمه عيونها عنه وع وجهها ابتسامة خجل وهو يتأمل فيها بحب...
🍃وبعيد عنهم في نفس المصحه..
كانوا هناء وخالد ماشيين مع بعض يهدرزوا..
هناء:لاطبعا رفضت المواضيع هادي مسكرة عليها حاليا..
خالد؛اها حاليا..يعني مرات ترجعي تفتحيها بعدين..
هناء برفعة حاجب؛شكلك عندك ليا موضوع..
خالد؛هدا اللي مازال عقاب الوقت نولي خطابه.
ضحكت..
🍃وفاتوا من قدام اميمه واسامه وين ماكانوا مقعمزين شافوهم واميمه قالت..
/قداش نتمنى من ربي يردهم لبعض ع خاطر ع ولدهم ..
اسامه:هما يبوا يولوا لبعض وحيولوا ان شاء الله لكن يبوا شوية وقت..
اميمه هزت راسها موافقة لكلامه وقالت..
/عندك حق...
🍃يبوا شوية وقت..
هي شويه الوقت اللي مازالت سبقوها سنين من الفراق مافيش حد فيهم قدر يتخطا اللي صار بالذات هناء..
المراة صعب تتخطا..تجي ع نفسها مرات وتكمل مع راجل وجعها وجرحها جرح عميق لكن لايمكن بينها وبين نفسها مازال تقبله ولاتحس ناحيته بمشاعر الود..
اول مرة غلط فيها رؤوف مع غرفه جرحها بعمق حست بشي انسكر بينها وبينه..المشاعر اللي كانت مخليتها متوهجه بحبها ليه خفتت وبدت تضعف
اما توا..فهي معاش حاسه تجاهه بأي شي حلو..حاسه بقلبها ناحيته تجمد تماما..
🍃غرفه:كنت نقول لروحي اني خليته هكي لأنه في الاصل ماكانش هكي..كان انسان طيب زي النسمه وحنون لأبعد حد..طبيعي بعد اللي درته يولي انسان تاني..طبيعي يكرهني ويحقد عليا...كل اللي ريته منه اول ماتزوجنا كله بررته وعذرته عليه لدرجة قعدت نعاقب في نفسي معاه..درت هلبه ياطوبى هلبه بش نخليه يصدق ندمي ع اللي درته معاه ويصدق حبي ليه..تعرفي برغم كل شي دارهولي بعدين من حاجات حلوة ماكنتش نحس انها طالعه من كل قلبه لدرجة اني كنت مرات نشوف في نظرة منه وكأنه مستخسر فيا اي حاجه حلوة يديرهالي..ونرجع نقول لروحي انتي تتوهمي..لكن بعد اللي صار تأكدت ان اللي نفكر فيه كان صح..اللي حسيته طلع صح..واهوا توا عشت اللي كنت خايفه منه..
طوبى بحزن:لكن تعرفي مع هدا كله نحس فيه يحبك باينه في عيونه..
نزلوا دموع غرفه وهي تقول..
/شن دار هالحب! كان اضعف منه انه يخليه يتخطا الماضي..
طوبى:انتي توا شن حاسه ناحيته..
غرفه:صدقيني ولاحاجه..لاحب لاكره لاشي..اني توا واجعيني صغاري وبس..
سكتت طوبى وهي تفكر بحيرة في حالة اختها مش عارفه شن الاصلح بيها الانفصال ولاانها تحاول تتفاهم مع راجلها وتكمل حياتها معاه ع خاطر الصغار!؟..
مابتش تشور عليها بشي حاليا..خلتها تزيد تفكر بدون اي ضغوطات ممكن تخليها تاخد القرار الخطأ...
وفي نفس الوقت كانت تفكر في موقف سدرة لو عرفت انها اخر من يعلم باللي صار مع غرفه،لكن هي عروسه مايبوش يخربوا عليها فرحتها...
وزادت غرقت طوبى في الحيرة...
🍃🍃🍃🍃🍃
الساعه 7:30مساءا..
في دار المعيشة مقعمزات البنات قدام التلفزيون..
والصغار حداهم يلعبوا...
طوبى بخوف:يارب لطفك يارب..الارقام كبيره هلبه..
اريج؛مفروض معاش يستقبلوا حد يجي من برا خلاص..
طوبى:تعرفي نحس فيها واصله فينا وجماعتنا مايندروش عليها منين زارقه..ردي بالك اريج انتي تختلطي بالصغار وهما اكثر من ينقل المرض..
غرفه؛عندها الحق..ردي بالك..
اريج هزت راسها بقلق...
فجأة سمعوا باب الحوش دق..
شافوا لبعض وطوبى قالت..
/زعمه مني!؟
ناضت وهي تقول..
/ان شاء الله مؤمن..
ومشت طول طلعت من الدار...
وتوجهت للمدخل..خدت من ع الشماعه بالطو وشاربه ولبستهم وهي تسمع في صوت الدق..
مشت للباب لبست في رجليها وطلعت من الحوش..
واريج وغرفه مشوا يجروا للمربوعه الدخلانيه ووقفوا في الروشن متاعها..
🍃وصلت طوبى في الباب وقالت..
/مني!؟
"مختار افتحي"
هي هني غضب الدنيا تجمع في قلبها..
ولان الغضب مسيطر عليها نست نفسها وفتحت الباب وهي واقفه قدامه..
وفي لحظه..
ملامح الغضب تبدلت للصدمه بعدين الخجل..
ردت الباب وقفت وراه وهي تقول بصوت فيه شي من الرجفه..
/شويه بس..
ومشت بسرعه وهي تقول..
/خشوا خشوا..
وصلت في الباب الدخلاني خشت وسكراته وهي ترجف بكل مافيها..
ع جية غرفه واريج يجروا..
وقفوا قدامها واريج قالت..
/خالي خش بالتارقي..
طوبى وهي مصدومه..
/مافهمت شي بكل..حاولت تتمالك نفسها وهي تقول..خل نخبر جدي..ومشت تجري لدار المعيشه وهما معاها بعيونهم..
غرفه؛طوبى طايحه وماحد سما عليها..
اريج بضيق؛ياريت يندري عليها ولامدورها..
بدت ع وجه غرفه ملامح الضيق بعدين مشت للدار..
واريج ولت للمربوعه بش تشوفهم قاعدين برا ولا خشوا للمربوعه الخارجيه..
*********
عبد القيوم؛مكيده للأسف وكانت محبوكه صح
علي الواعر:باهي كيف بيصير توا في الخدمه مازال بتولي ولابتسيب..
عبد القيوم؛مدام طلعت منها وماعليا شي مانسيبهاش لكن المكان اللي كنت فيه بنخليه..
علي الواعر هز راسه وقال..
/باهي باهي..الحمد لله ع سلامتك مرة تانيه..
عبد القيوم؛الله يسلمك..
ناض مختار وهو يقول..
/اني لازم نمشي عندي ماندير..شاف لجده وقال..اهو جبته لعندكم ياحاج بش تتأكدوا ان ماليش يد في اللي صار نهائي..
جده ماباش يشوفله لكن في داخله كان مرتاح انه هالمرة طلع منها..
تنهد مختار وقال..
/تصبحوا ع خير..
ناض عبد القيوم وهو يقول..
/حتى انا لازم نروح كنت محبوس اسبوع..
مختار بصدمه مصطنعه
/لا ياإلهى نسيت القصه هادي بكل لينا ساعتين مع بعض جيغي ميغي..
علي شافله من فوق لتحت..
عبد القيوم بضحكه..
/كرهتني في روحي..عدي روح..
مختار بضحكه:تصبحوا..
ومشي طلع بسرعه...
عبد القيوم رد نظره لعلي الواعر وقال بإحراج..
/اسف ع اللي صار اخر مرة الكلام اللي قلته طلع مني في لحظه غضب عقلي غاب عني..
علي الواعر؛عارفك ياولدي عارفك معذور..المهم تقتنع انها قسمه ونصيب وان خيرتك في مكان تاني..
عبد القيوم بإبتسامه..
/المهم انت مش زعلان مني هذى المهم توا بس..
علي ابتسم نص ابتسامه وهز راسه وهو يقول..
/برا روح برا..
ضحك وقال..
/تصبح ع خير..
علي:قدامك كل خير..
ومشي عبد القيوم طلع من حوش المحبوبه اللي كان اول وجه شافه بعد ماطلع من الحبس وجهها اللطيف.
ملامحها المصدومه والخجوله قاعدات بين عيونه
قطع عليه تفكيره بيها صوت سامي وهو ينادي فيه
"تارقي"
التفت عبد القيوم وقال..
/من بعيد لبعيد خلوني نرقى ندوش بعدين ننزل نضبطكم كلكم..
سامي بضحكه؛باهي برا دوش يامعفن ريحتك وصلتني هني..
عبد القيوم:تو تحصل بعدين..
ومشي بسرعه وخش لحوش المهدي..
وسامي ولى للمصور وهو يتصل بربيع..
🍃🍃🍃🍃🍃
"مالاش دخل بشي هو اللي ساعده بش يطلع منها
طوبى:بالك دار هكي بش بعدين يطلع روحه بطل..
علي؛لالالا عبد القيوم كان يحكي وكأنه عارف كويس من اللي دار فيه هكي مش مختار يابنتي
طوبى بإستغراب..
/مستغربه هلبه..شن سر الصحبه بيناتهم لدرجة يسعاله بش يطلعه من الحبس..الوضع هدا مش مخوفك جدي!؟
علي؛اي شي يديره مختار مانتريحلاش ندعي الله ونقول يارب اكفي ولد الناس شره بما شئت وكيفما شئت..
طوبى بقلق:يارب..
******
غرفه؛يعني مختار هالمرة مالاش علاقه وهو اللي طلعه!؟
طوبى:هكي فهمت من جدي..
اريج؛استغفر الله ظلمناه..مهما كان حملنا أثمه..
طوبى بضيق:استغفر الله العظيم اللهم لاتؤاخذنا..
وغرفه معاش سمعت شي من اللي يقولوا فيه..
اللي كانت تسمع فيه وقتها هو صوت عبد الرؤوف وكلامه الجارح المهين..
كل اللي قاله كان ع الفاضي..في النهايه مختار طلع بريئ من القصه براءة الذئب من دم يوسف..ومش هكي وبس هو اللي طلع التارقي..
اكيد مش حتتغير نظرة غرفه لمختار لكن نظرتها لعبدالرؤوف من بعد اليوم لايمكن ترجع زي ماكانت..
هي توا فهمت انه كان يدور في حجة قويه مش للطلاق بس
كان يبي يبان صاحب الموقف الاقوى..يبان هو الصح وانهاهي واهلها غلطوا في حقه غلط كبير لما خدوا منه هالموقف ويخليهم يندموا عليه..لكن مع الاسف الندم مش حيكون من نصيب حد غيره هو..
🍃🍃🍃🍃🍃
"صار هو اللي طلعك"
عبد القيوم حط براد الشاهي ع الكانون وقال..
/ايه..
ربيع بضحكه ساخره..
/غير بالله ياتارقي عدت عليك!
شافله وقال..
/شن اللي عدت عليا مافهمتش!؟
ربيع:لافاهمني عدت عليك انه مش وراها من الاصل..
سامي شاف للتارقي وهو يسمع فيه يقول..
/هو مش وراها فعلا..
ضحك ربيع وخبط كفوفه ع بعض وقال..
/تمام انت حر..بس نقولهالك انت خلاص بلعك مثلث برمودا..
ابتسم التارقي بإمتعاض وهو ساكت وسامي مازال ملتزم الصمت..
ربيع؛انت في جرة مختار هدا قطعت علاقتك بعبد الرؤوف..الراجل جاك بش يساعدك تقوله اطلع منها!؟ ياريت سمعته كيف يعاود فيها بقهرة ماتوقعش تطلع منك انت حاجه زي هادي..
مسح عبد القيوم ع ذقنه وهو يقول..
/هو هكي قالك!؟
ربيع بإبتسامه متهكمه؛ايه والخوف توا الدور يجي عليا اني..
عبد القيوم بإبتسامه..
/تعرف انت وعبد الرؤوف شن صايرلكم بالزبط..اها ماننكر انكم خايفين عليا وتبوا مصلحتي بس المبالغه في الانفعال متاعكم هذي تبين انكم ماتبوش تكون ليا علاقة بمختار بسبب حقدكم عليه..
قعد ربيع يشوفله بنظرات انفعال فيها شي من الضيق حس ان كلام عبد القيوم صاب كبد الحقيقه..
وسامي وهو يفكر في كلام التارقي كان يشوف لربيع ويراجي في رده..
عبد القيوم هز راسه بعدين قال..
/باش نريحك بكل اللي تسبب في حبستي..
"نسيبك الجالي"
بدت ع وجوده سامي وربيع ملامح الصدمه وهما يشوفوا لعبد القيوم..
عبد القيوم؛خبرتك بش نريحك لكن رد بالك ردبالك تعاود للمهدي ساده ماجاه من مشاكل خلوه يفرح شويه ويشوف ايام باهيه في حياته..
سامي:وعلاش الجالي يدير معاك هكي!؟
عبد القيوم:من قبل مش صافيلي ولااناصافيله وياما صار بينا..
ربيع بشي من القلق..
/غير دقيقه..راهو يكون عارف حاجه!
سامي اشر ع ربيع وهو يقول..
/هدا اللي نبي نوصله..
سكت عبد القيوم شويه وهو يفكر في كلامهم بعدين قال..
/لاكان هكي حيجني ع روحه..
ربيع:كان مش الغوله سلال القلوب..
عبد القيوم شافله بإبتسامة امتعاض وقال
/تشرب شاي!
سامي بضحكه؛تشرب ايه..
عبد القيوم:اشرب شاي ...
وقعدوا يغنوا فيها مع بعض واحد يسأل والتاني يرد عليه..
خلوا ربيع يضحك غصب عنه بعدين خدي مخدة جنبه وحذفها ع عبد القيوم وهو نزل راسه وخلاها تجي في الحيط..
🍃🍃🍃🍃🍃
"الحمد لله ع سلامته ريتوا كيف طلعتوا ظالمين مختار"
هادي فاتن تكلم في طوبى هاتفيا..
"انتي هدا اللي مفرحك"
فاتن بضحكه؛بصراحه ايه..
ضحكت طوبى وقالت..
"خلاص قوليله يطلق سراحك ويخليك تجي"
فاتن:يابنتي قتلك حابسني ع خاطر الكورونا حتى لبابا ماخلانيش نمشي..
"شن بنقول بس ربي يهدي وخلاص.."
فاتن بإبتسامه:آمين..هي مالا مانعطلش عليك سلمي ع الكل..
"يوصل حبيبتي السلام عليكم"
فاتن:وعليكم السلام..نهت المكالمه وخشت للكوجينه تقول..
واتي السحلب منمن!؟
امينه؛واتي ياحبيبتي لكن والله ماوقته
فاتن بضحكه؛كان هدا مش وقته مالا امتى وقته!؟
امينه؛قصدي ده وقت عشا مش كفاية انك ماتغدتيش!؟
فاتن بشي من الاحراج..
/سامحيني منمن لكن اليوم الدجاج ذقت فيه بنة مش حلوة وكأنك مش منظفتيه كويس..
امينه بصدمه:ايه!؟ والله سبتوا ربع ساعة منقوع بالخل واللمون!؟
فاتن:مش عارفه شميت منه ريحة مش حلوة وطعمته قلبت) معدتي..
امينه:معقوله!
فاتن:مرات دجاج نفسه ماينفعش..
امينه:لو كده فعلا كان الاستاذ مختار قالي عليه ماهو تغدى بعد مارجع..
سكتت فاتن شويه وهي مستغربه بعدين قال..
/باهي عطيني السحلب..
امينه وهي تفكر مشت خدت البكرج اللي دارت فيه السحلب صبت منه في مق كبير وفي الاخر زيناته بالمكسرات وعطاته لفاتن..
وفاتن خداته وطلعت وهي تفكر في الحديث اللي دار بينها وبين أمينه..
🍃والحديث اللي يدور بين مختار والاقجم في حجرة المكتب كان عن...
الاقجم وهو واقف قدام المكتب بمسافه..
/يعني خلاص هدا اخر كلام..
رفع مختار عيونه عن شاشة اللابتوب فيه..
ضحك الاقجم وقال..
/الحق الحق نبي نعرف علاش غيرت كلامك في اخر لحظه..
رد مختار نظره لشاشة اللابتوب..ضغط ع بعض الازرار بعدين دفه شويه وشاف للأقجم وهو يقول..
/تعرف ان مش من حقك تسأل انت مفروض تنفد وبس لكن مش مشكلة اشباعا لفضولك حنجاوبك..اللي صار الفترة الاخيره خلاني نغير الطريقه اللي نبي نوصل بيها للهدف متاعي..وفي النهايه كل الطرق تؤدي الى روما .
الاقجم بضحكه..
/قسما بالله مافهمت حاجه..
مختار:الله يرحمك يارضا..
ضحك الاقجم وقال..
/معليشي خودني ع قد عقلي واشرحهالي..
مختار؛اللي صار حيكون فيه فرصة ليا نوصل بيها للهدف متاعي بطريقه احسن من اللي خططتلها..هو كشخص من خلال تعاملي معاه حسيت انه صاحب شخصيه مهزوزه يبي يحاول يثبت نفسه لنفسه قبل الناس اللي حواليه بهلبه حاجات دارها في حياته..زي ماتعرف هو قبل كان شي وبعدين ولى شي تاني نقطة التحول في حياته كان ليها دافع قوي هلبه مش معروف شن هو بس كان قوي لدرجة خلاته يتغير ظاهريا وكليا..ايه ولى من اصحاب النفوذ وعنده كلمه مسموعه وغالبا اللي يبيه يديره ولو يحط حاجه في راسه يوصلها بس مع هذا كله شخصيته قعدت مهزوزه واللي صار معاه مؤخرا اثبت هالشي..اللي صار خلاه يرتكب اخطاء حيندم هلبه بعدين هدا اذا كان مش غارق في الندم حاليا..اني شن اللي يهمني من هدا كله..التركيز ع النقطه هادي..هي اللي لازم نستغلها بقوة بش نخليه يوصل لمرحلة ينتهي فيها داخليا ومعاش يولي عنده دافع يخليه يكمل ويقاوم وحيخش في حالة من اليأس والاحباط توصله لنهايته..مليون في المية فهمت توا..
الاقجم بإبتسامه..
/زين زين..باهي افرض بالطريقه هادي ماصار شي من اللي تبيه!؟
مختار: وقتها ماقعدش قدامي غير هداكا الحل..
هز راسه وقال..
/تمام..
حك مختار صدغ راسه وقال..
/شكلك مازال خاطرك تقصقص..
مسح الاقجم ع انفه وهو يضحك بعدين قال..
/ايه..نبي نعرف شن طبيعة علاقتك بالتارقي علاش درت ع خاطره هدا كله!؟
حمحم وقال:خل نسألك اني سؤال قبل لنجاوبك متفكر اول مرة شفت فيها التارقي وهدرزت عليه شن قتلي عنه!؟
الاقجم؛قتلك بنادم مريح..
مختار:مريح..مريح ومرتاح..الوحيد من الناس اللي ماتعرفنيش حسيته تعامل معاي براحه..ماحسيتاش مرتاب مني ولاخايف ولاشفت في عيونه نظرة اتهام زي اللي نشوف فيها في عيون الناس التانيه..نظرته ليا نظرة واحد يبي يعرفني..هو راهو واخد عني نفس الفكرة اللي عند اغلب اللي حواليه عني بس الفرق بينه وبينهم انه يبي يعطي نفسه فرصه يعرفني بش يحكم عليا صح..
الاقجم:مرات يكون يتعامل معاك هكي تجنبا للمشاكل..
ابتسم مختار وقال..
/يعني اني متاع مشاكل!؟
تغير لون وجه الاقجم ضحك بخوف وقال..
/لالامش زي مافهمت..قصدي زي ماالغير فاهم..
مختار بضحكه؛ماعلينا..تنهد بعدين قال..ممكن يكون هكي بس في نفس الوقت نحس فيه يبي يعرفني اكثر بش يحكم عليا صح..
الاقجم:يعني انت مرتاحله!؟
مختار:جدا..ونبي نحافظ عليه..نبي نحطه في زاوية الاشخاص المفضلين..مانبيش نقولك كصديق..بس كشخص مقرب راجل زيي زيه يفهم عليا اكثر..لازم يكون في حد شفاف وصادق في حياتك شخص ترتاح وانت تتعامل معاه وفي نفس الوقت ماتحسش بالفرق بينك وبينه..صدقا عمري في حياتي مااحترمت حد زي ماااحترمته هو..بس هاه حط في بالك ان مافي حد يقعد في حياة مختار من غير مايستفيد منه..الا مايجي يوم ونحتاجه..
الاقجم ابتسم وهز راسه بإيجاب بعدين قال..
/وسعت بالك معاي هلبه صحيت..
مختار:انت مش غبي ولافهمك بطيء انت تبي تعرف كل شي واني زابطك رد بالك..
ضحك الاقجم من قلبه بعدين قال..
/نستأذن يامعلم..
هز مختار راسه بالموافقه..
والاقجم طلع من المكتب..
تنهد مختار بعدين رجع شاف للابتوب قربه وكمل شغله عليه...
🍃🍃🍃🍃🍃
طلعت من الكوجينه وهي تتكلم بالتليفون..
لبانه؛يعني بكرا رايحين!؟
"ايه حبيبتي بنفقع من الصبح بش نرفعهم غادي وينضطر نقعد معاهم"
لبانه؛مو مشكله المهم دير بالك على حالك..
"انتي تبي تفتكي مني وخلاص"
خشت للدار وهي تقول بضحكه..
/بدي افتك من حصارك..
"وتقولي فيها هكي عادي خلاص تو ناخد راحتي هني عاد قداش ليا ع بنات خالاتي وخوالي مستاحش الهدرزة معاهم"
لبانه؛خود راحتك حبيبي احكي معهن وطالعن مشاوير ماعندي اي مشكله..
سلافه حداها وهي مقعمزه تكتب ع لوحه كانت تسمع فيها وع وجهها ابتسامه خفيفه..
ابتسامه تخفي ضيقها ووجع قلبها ع الراجل اللي تحبه..
🍃🍃
بعد اقل من خمسة دقايق نهت لبانه مكالمتها مع خطيبها وقالت..
/رايحين بكرا ع الزوايه رح يبلش عرس خاله..
سلافه؛بعرف خبرتني ميار..
لبانه:يعني رح نقضيها تكاسي..
سلافه؛يومين وبابا يروح يشتري السيارة..
لبانه؛ان شاء الله ماياكل مقلب فيها..
سلافه؛مانا سيارة محرزه شي بيأدي الغرض وبس..
لبانه؛ع قولتلك..
تنهدت سلافه وحطت القلم ع جهه وقالت..
/تعبت..خدت اللوحه وحطتها ع الزيانه بعدين دست اقلامها وتمددت ع فراشها..خدت تليفونها من جنبها وخشت ع الفيس..
ولبانه حداها تجهز في ملابسها اللي بتمشي فيهم للخدمه..
لما طلعت البالطو متاعها ضماته من الفجعه وين سمعت اختها تقول..
"لبانه الحقيني تعالي شوفي تعالي"
جتها تجري قعمزت جنبها وشافت للشاشه بعدين قالت..
/هي مو صفحة عبد القيوم!؟
سلافه بدهشه وتوتر:ايه البوست اللي قدامك امتى نزل مكتوب NOW مو هيك!!؟
لبانه وهي تشوف بتركيز..
/لا منذ دقيقة واحده..
ضربتها ع كتفها وهي تقول..
/تضربي مااثقلك..
لبانه بضحكه؛معناها طلع؟!
سلافه وهي تشوف للبوست بفرح ودموعها في عيونها..
/ايه..شوفي شو كاتب..
مساكم الله بالخير...ان شاء الله تكونوا طيبين..
صارلي ظرف الفترة اللي فاتت خلاني غبت عنكم وتوا الوضع كويس والامور تمام..
ولكل من سأل عني مشكورين واجد وان شاء الله ماتنشغلوا ع غالي..
لبانه بضحكه؛صرت عم تحكي مثله تمام!
سلافه بإبتسامه؛ /وقت اللي بيحكي مابدي ياه يسكت نبرة صوته واسلوبه بيجننوا..شافت لأختها وقالت..شو رايك ابعتله مسج!؟
لبانه؛لاتبعتيلوا ولاشي سوفي..
سلافه بإنزعاج..
/انا الغلطانه اللي اخدت رايك..
لبانه ناضت من جنبها وهي مضايقه..
"الو ميوش كيفك ياقلبي..شفتيه!!؟"
التفتت شافت لاختها بضيق وفي نفسها تقول..
"الله يهديكي يااختي"
سلافه؛شو رايك انتي ابعتلوا مسج!؟
"لالا ردي بالك راجي لتاني يوم واتصلي بيه اتصال وخلي امك تكلمه"
سلافه بتفكير:صح هيك احسن..تنهدت من قلبها بعدين ابتسمت وقالت..مبسوطه كتير ياميوش..
"حمد لله ع سلامته ياحنه"
ضحكت سلافه وقالت..
/خسارة رح تغيبي عني اسبوع كامل .
"اللي يسمعك مايقولش نفسها اللي قعدت بالشهور مقاطعتني"
سلافه؛لاتظلميني ولوو كنت عم اتعذب كتير بغيابك..
"بري يابلعوطه"
وسلافه تضحك عليها وقلبها يرفرف من الفرح..
🍃🍃🍃🍃🍃
"عصفور طل من الشباك وقلي يانونو..
خبيني عندك خبيني دخلك يانونو..
خبيني عندك خبيني..دخلك يانونو...
قلتلو انت من وين..قلي من حدود السما..
قلتلو جاي من وين..قلي من بيت الجيران..
قلتلو خايف من مين..قلي من القفص هربان.
قلتلو ريشاتك وين..قلي فرفطها الزمان..
عصفور طل من الشباك وقلي يانونو..
خبيني عندك خبيني..دخلك يانونو"
🌼صوت طوبى الجميل كان يصدح في الحوش كله وهي تغني فهالاغنيه لجنة اللي كانت راقده جنبها..
غرفه وهي تسمع فيها دموعها كانوا ينزلوا لاإردايا وهي تتأمل في وجوه صغارها اللي راقدين جنبها..
اما اريج فكانت سرحانه في الماضي والحاضر والقريب والبعيد والدمعه ع طرف العين..
وجنه وهي تشوف لأمها كيف تغني خداها النوم ورقدت..
شافتها طوبى..باست يدها وحطتها ع خد جنه بلطف..
بعدين تنهدت وسرحت بتفكيرها..ويجي بين عيونها الموقف اللي صار ع الباب...
عيونها لما تلاقوا بعيونه وهو حياءا بسرعه غيرهم عنها ابتسمت من قلبها بعدين حطت ايديها ع شعرها اللي كانت فرداته جنبها رفعاته وفرداته للخلف..حطت ايديها الزوز فوق بعض ع بطنها وقالت همسا وهي تشوف للأعلى..
"الحمد لله"
☘اللي فرج عنه ونجاه وماخلاش الضرر هالمرة يصيبه من ناحيتها..هكي كانت مفكره☘
🍃🍃🍃🍃🍃🍃
ويطلع فجر تاني يوم ع عبد القيوم اللي رجع لعادته الاولى صلى الفجر في الجامع مع الحاج علي اللي فقدته هلبه في فترة غيابه وكان جوهم مع بعض حلو زي قبل ولاكأن صارت حاجه...
وبعد ماروح للشقه...
دار لروحه قهوة مرة ومشي شربها في مكانه المفضل...
وقعد مشغوله مع هوايته الشغوف بيها لعند الساعه عشرة الصبح..
ويجيه اتصال..لما شاف المتصل بدت ع وجهه ملامح الضيق..
تردد هلبه قبل ليحسم امره في النهايه ويرد..
/السلام عليكم..
🍃سلافه وهي مقعمزه ع الفطور مع امها واختها قالت بلهفه مكتومه وخجل ظاهر..
/وعليكم السلام..حمد لله ع سلامتك..
"الله يسلمك"
سلافه:طلعت امبارح؟!
"ايه بعد المغرب شن حالك وحال هلك؟"
ابتسمت من قلبها وقالت..
/الحمد لله..
وامها واختها يراقبوا فيها وكل وحده فيهم كان مضايقها حالها..
سلافه؛ليكا ماما بدها تحكي معك..
انصدمت شاديه ولبانه شافت لاختها بدهشه..
سلافه بهمس:ماما!
حركت شاديه راسها يمين ويسار بعدم رضا بعدين خدت التليفون حطاته ع وذنها وتكلمت..
/صباح الخير ابني..
"صباح الخيرات شن حالك؟"
شاديه؛الحمد لله..انت كيفك حمد لله ع سلامتك..
"الله يسلمك"
شاديه؛انشغلنا عليك كتير انا وعمك نبيه سأل عنك الاستاد ربيع اكثر من مرة..
"اها قالي ربيع بارك الله فيه..وسامحوني شغلتكم"
شاديه؛لايوه شو عم تقول انت ابننا ياعبدالقيوم طمنا مشكلتك انحلت ماهيك..
"ايه الحمد لله سوء تفاهم وانحل"
شاديه:طيب الحمد لله..الله يحميك ياابني ويحفظك..
"ويحفظكم ويطول في عمركم السلام عليكم"
شاديه؛وعليكم السلام..نهت المكالمه وقالت لبنتها بحده..شو هالتصرف هاد!؟
سلافه؛عادي ماما شوفيها يعني!؟
شاديه؛لك الشب كان عم يحكي وهو خجلان..
سلافه؛هو طبيعي هيك بيستحي..
شاديه؛وانتي مابتستحي ماهيك!
سلافه بصدمه:ماما!
شاديه بحده؛لاتفكري اني غبيه ومخليه الميه عم تمشي من تحتي ومو دريانه..انا ربيتك تحترمي حالك قبل غيرك..مابيليق فيك ترمي حالك ع رجال مابدوا ياكي وفي بحياته غيرك..
شافت سلافه للبانه بحده..
ولبانه نزلت راسها بضيق..
شاديه؛طالعيه من راسك ياسلافه لاتعملي شي يخجل ابوكي قدام الزلمه..
نزلوا دموع سلافه وهي تقول..
/شكرا كتير..عنجد شكرا..
خدت تليفونها وشنطتها وناضت ومشت بسرعه لباب الشقه لبست في رجليها وفتحاته وطلعت ورفعت الباب بقوة وراها..
لبانه بضيق؛قلتلك احكي بينك وبينها ياماما مو قدامي وبهالطريقه..
شاديه بحمقه؛ماسمعتي نبرة صوت الشب وهو عم يحكي كان عم يحكي بخجل وغصب عنه..
سكتت لبانه وهي مستاءة ع الآخر..
شاديه بضيق:من بين شباب الدنيا ماحبت الا رجال قلبه مع غيرها!..
تنهدت لبانه بضيق..
🍃وسلافه مشت مسافه وهي تبكي بصمت لين وصلت في طريق تمر فيها سيارات الاجره..مسحت دموعها ووقفت وحده وركبت فيها وتوجهت بيها لمكان المعهد اللي تخدم فيه..
🍃🍃🍃🍃🍃
الساعه 12:15 قبل الظهر...
في احد محلات الملابس المشهورة..
كان عبد الرؤوف مقعمز ورا المكتب..في الظاهر يراقب في حركة البيع..
لكن في الحقيقه هو كان سرحان بفكره في الماضي البعيد..
خلال الايام اللي فاتوا تخطر ع باله هلبه ذكريات بداية قصته مع غرفه..
العجيب والمؤلم انه ماكانش متفكر منها الاالتفاصيل الحلوة.
وكأنه قاعد ينخدع من اول وجديد بس هالمرة وهو عارف وقلبه راضي..
بين عيونه...كلامها وسلامها وضحكتها..مزحها وجدها وزعلها...
بين عيونه اللحظه اللي خلاته فيها يشم ريحة الفل من ايديها..
وع مسامعه يتردد اسم الدلع اللي كانت تنادي فيه بيه..
"بيكو"..
فجأه يخترق مسامعه صوت تاني خشن يقول..
"شيخ عبد الرؤوف"
غير نظره لمصدر الصوت بدت ع وجهه ملامح الضيق والاحراج..
عبد القيوم بإبتسامه؛نبي ناخد من وقتك عشر دقايق..
نزل عبد الرؤوف عيونه وهز راسه بعدين ناض..
شاف لواحد من الشباب اللي يخدموا عنده ناداه..بعدين اشرله يجي مكانه..
طلع من ورا المكتب وقال لعبد القيوم..
/هيا..
مشي طلع عبد القيوم من المحل وهو وراه...
*********
عبد القيوم:من البدايه عارف انه مش وراها حاولت نفهمك لكن انت كنت في حالة غضب مخلياتك ماتسمعش غير صوتك..حتى لما قتلك اطلع منها سبقتها بجملة "كان هو وراها حق اطلع منها"..مانبيكش تخش في مشاكل تانيه من غير شي وضعك مع هلك ومع عيت الواعر ملخبط لو بتخش في صراعات جديده معاه مرات يصير شي يخربها مرة وحده..هذى كل قصدي وربي شاهد..
عبد الرؤوف وهو يشوف للطريق بنظرات ضيق وتعاسه..
/لاهي هكي ولاهكي خربت خلاص..
بدت ع وجه عبد القيوم ملامح الاستغراب..
عبد الرؤوف شافله بعدين ابتسم ابتسامه خفيفه وقال..
/ماتحط شي في بالك ياتارقي..طبطب ع كتفه وقاله...ع قد مانقدر نسيبتي الصغيره ونحترمها مانشوفش في راجل يستحقها غيرك..
يدوب ابتسم عبد القيوم بعدين قال..
/كل شي يتصلح ماتستسلمش ولاتسلم..
نزل عبد الرؤوف يده وقاله..
/بارك الله فيك...
فتح الباب ونزل من السياره وقبل ليسكر بابها قال.
/السلام عليكم..
ومشي بإتجاه المحل متاعه وعيون عبد القيوم معاه وهو يشوفله بنظرات كلها أسف...
🍂🍂🍂🍂🍂🍂
وتمر ساعات هاليوم زي ماعدت الايام اللي قبلها ع عبد الرؤوف..
الناس تشوف الحياة بألوان وهو حياته ولى اللون الوحيد اللي يشوفه فيها رمادي...
اصعب اللحظات يعيشها وين يفوت قدام حوش طوبى..الحوش اللي هي قاعده فيه ومايقدرش يخشله ويشوفها...
لكن اللحظات الأقسى هي اللي يعيشها اول مايخش حوشه..
من اول مارجله تعفس داخل الحوش يسمع في صوتها العالي وهي تنادي من الصالون..
"روفا جيت!!"
كمل طريقه لدار النوم وقلبه موجوع..وين فات من قدام الكوجينه سمع صوتها تقول..
"اليوم درتلك كسكسي مبدع زي متاع اختي سدرة..لااستغفر الله الكذب حرام..زي متاع طوبى..لاعاد من غير مبالغه كسكسي مبدع وخلاص"
وقف وشاف للكوجينه..
لمح طيفها وهي لابسه فستان جينز للركبه ربع كم كان يحبه هلبه عليها..ولافه ع مقدمه شعرها فولار وردي تشوفله بإبتسامه وتقوله..
"اليوم جربت هديكا الكيكه اللي قتلك عليها يومها تعالى ذوق بسرعه."
"هاه شن رايك"
"ماشي حالها"
"حرام عليك والله حلوة"
"ياودي باهي حلوة غير فكيني من نشفتك"
"باهي زيد وحده تانيه ع خاطري"
"وواك باهي هاتي وحده تانيه"
"وخيته سلمه"
حط يده ع خده لاإردايا لما تفكر اكثر حركه تحب ديرهاله
قرصة الخد..
نزل يده ومشي بسرعه للدار..
اول ماخشلها..شاف للسرير..
تفكر مرة لما توحمت ع شعره وخلاته ينوض يقعمز بش تمشطه..
"ديما مخالفه ومتعبه يامراة انتي"
"مش مني قتلك من ولادك هما يبوني نمشط شعرك"
قربت من شعره وشمت ريحته بعدين باساته وقالت..
"يارب يجي شعرهم زي شعرك"
"باهي هي ديري اللي بديريه وخليني ندمدر"
"بعيد السووووو"
"ذيبه"
"دب"
🍂مشي بإتجاه السرير وانطرح عليه ورقد ع جنبه الايمن..
ملامح الحزن سيطرت ع وجهه..ودموع الألم غصب عنه نزلوا من عيونه...
ولابت الذكريات تعتقه ..
كانت مرات تحب تفاجئه اول مايرقد بورد الفل وهي تنثر فيه عليه..
"انتي مراة متخلفه للمليون"
وهي تجيه من الجهة التانيه ترمي نفسها ع السرير وتخلي وجهها مقابل وجهه وتبدا تغني..
"انا مابدي تقلي كلام يدوب قلبي حنين وغرام بيكفيني تقلي بحبك هيدي الكلمه بتقتلتي"
"نحبك"
"حي شن جاك كيف قلتها هكي من غير مانطلبها'
"قلتها بش تقتلك وتفكني من دوشتك"
حولت المخده من تحت راسها وطاحت فيه ضرب وهي تقول..
"ياعدو الرومانسيه"
وهو يضحك عليها...
🍂غمض عيونه بألم وقلبه كان مفطور من الحزن ومتعذب من الشوق..والندم بادي يسيطر عليه...
🍃هو هكي الراجل مايحسش بقيمة المراة اللي يحبها الا بعد مايخسرها ويكمل عمره وهو متحسر عليها🍃
#عرجون_فل
#طوبى
....يتبع.....
