■■■■■■■■■■■■■■■■■■■■ ❎تنويه❎ بعض احداث اقسام جزء #منازل_القمر صعبة ومرهقه نفسيا #طوبى "جنة طوبى" #جمان_فريد #الجزء_116"منازل القمر" ☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆ 🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫 #تاج_الذكر لاإله إلا الله وحده لاشريك له له الملك وله الحمد وهو على كل شيء قدير.. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿 🍃 يقال : إن الإنسان ينتقم ، لأنه يعد ذلك عدلاً . فهو إذن قد وجد المبدأ الأساسي الذي كان ينشده : العدل . وهو يشعر إذن بطمأنينة كاملة ، فينتقم هادئاً كل الهدوء ، وهو يظفر بالانتقام ظفراً تاماً ، لاقتناعه بأنه يقوم بعمل عادل شريف . #في_قبوي لــــ #دوستويفسكي🍃 ________________________________________ السادس من شهر ذي الحجه.. 27يوليو..سنة 2020.. ☘طلع من داره بعد ماصلى الفجر متوجه للكوجينه.. وصل فيها وخشلها لقي امه واقفه ع الغاز طيب في القهوة وتردد في كلمات بهمس..عرفها تسبح.. قعمز ورا الطاوله وهو يقول.. /صباح الخير امي.. التفتت شافتله وقالت.. /صباح النور ياامي.. طفت ع القهوة وخدت البكرج ومشت قعمزت مقابلاته صبتله قهوة في فنجان وقرباته ليه وحطت البكرج ماشاركتاش فيها لأنها صايمه.. هو خدي الفنجان ورشف منه..وامه مركزه ع ملامح وجهه اللي كلها هم.. ام أسامه:شن حال اميمه؟ تنهد بألم وقال.. /ع حالها.. هزت راسها وقالت بأسف.. /الله يصبرها ويرحم جدها ويغفرله.. هو قال.. /آمين..وبقلق كمل يقول..خايف عليها هلبه كيف طالعه من مرض يضعف المناعه والحزن يزيدها ع مابيها.. سكتت امه وهي تشوف لفنجان القهوة وتفكر.. اسامه بحزن.. /مش عارف كيف نديرلها..نبي نخفف عنها ونطلعها من الحاله اللي هي فيها نحس في روحي عاجز وين نشوف حالتها نتعب اكثر منها.. شافتله امه وقالت.. /شن رايك ترفعني نشوفها؟ قعد يشوفلها بنظرات مفاجأه.. امه قالت.. /كان فيها كيف ولدي.. فكر للحظات بعدين قال.. /اتصلي بعمتي شوفيها.. هزت راسها وقالت.. /مع 11 ان شاء الله تو نكلمها... 🍃🍃🍃🍃 الساعه 9:30صباحا.. طلع عبد القيوم من طرابلس وهو مخلي قلبه وعقله عند عشقه أم العيون الحايرة... كان في حالة ضيق..وقلبه مش مرتاح..طول الطريق يسمع في القرآن كان كلام الله سبحانه وتعالى يخفف عنه شويه.. بعد ماقطع مسافه طولها الصمت والقلق وصل في الخمس.. الخمس اللي متمني يجي يوم يخشلها وهي معاه ويعيشوا فيها احلى ايام عمرهم.. هو هكي كان يحلم ويتمنى..كان يبي طوبى تبعد عن اي مكان عاشت فيه احزان وآلام.. كان يبيها تعيش في مكان يشبهها من لما تفتح عيونها الصبح لين تغمضها في الليل ماتشوفش الا كل شي مبهج وحلو.. ابتسم لما تخيل اللي تمناه صار.. تنهد من قلبه وقال.. /يارب..انك على كل شيء قدير.. 🍃وصل في المزرعة..خشلها بسيارته وهو يشوف في عمه وولد عمته،وراجل بنت عمته وصديقه في نفس الوقت يستنوا فيه وع وجوههم ابتسامات حلوة.. درس سيارته..نزل..قدملهم وهما قدموله وبدي بسلامه الحار وكله شوق ع عمه واقرب الناس ليه.. ☘☘☘ بعد السلام عليهم توجه للحوش لقي عماته وصفيه ومعاها ولدها يراجوا فيه.. وكعادتها صفيه لما تشوفه تقوله جملتها الشهيره... "عبدو ننغ" وهو يضحك عليها... قدم لعمته الكبيره سلم عليها هي الاول..وهي تحضن وتبوس وتقوله في كلام حلو وتدعيله.. كان نفسه سلام عمته سليمه كله شوق..وختم بسلامه بالكلام ع صفيه اللي كانت تناشب "تشاغب" فيه بكلامها المضحك وهو خدي ولدها رفعه في حضنه وفاتها... 🍃عمته الكبيره "بريكه" قعدت معاه بعيونها وهي تقول.. /ماشاء الله لاقوة الا بالله زايد سماحه.. صفيه؛حتى هي طرابلس ياعمتي.. سليمه؛من يومه سمح حبيبي.. ضحكوا عليها... 🍃وهو وباقي الرجاله قعمزوا ع كراسي وطاوله خشبيه موجودات تحت مظلة كبيره وهما يهدرزوا.. عبد الله:يومين ونحنا في طريق سفر تعبنا صح لكن الوضع الامني يعتبر كويس.. عبد القيوم؛والله قبل مانبيكم تتعبوا هالتعبه مفروض نا نجيكم لعندكم.. ولد عمته قال.. /شور عماتك ياسيدي سكنوا ع روسنا لعند استسلمنا وطاوعناهن.. ضحك وقال:انا اللي نعرف زنهن كويس.. معمر "زوج صفيه" غمزله وقال.. /شنو ياسمح انت شكلها طرابلس زاداتك جنتله وكارزيما.. ولد عمته ضحك وقال.. /والله حق متغير واجد.. هو عقد حواجبه بإبتسامه وقال.. /من يومي حاجه ماصارت ياثور انت وياه.. ضحكوا عليه.. وعمه قال بإبتسامه.. /عماتك ناوياتك من توا نقولك ضيق عيونه وقال /ان شاء الله خير! معمر رفع حواجبه ونزلهم وهو يقول.. /ناويلك ع حبسة العمر.. فهم عليه وغير الموضوع وهو يقول.. /شن حال ناسنا وهلنا؟ هز معمر راسه وهو يضحك.. وولد عمته ابتسم لما غير الموضوع اما عمه قال بضحكه.. /يسلموا عليك.. 🍃🍃🍃🍃 طلع من داره وهو بكامل اناقته وبطريقه لباب الفيلا.. لكن وقف في نص الطريق لما سمع امه تنادي فيه.. "حسين" التفت وهو يشوفلها جاياته.. وصلت فيه وهي تقول.. /امتى مروح؟ حسين:قتلك بكري اليوم عندي خدمه بنروح مع المغرب.. صفيه:باهي بنقولك اتصلت توا ام اسامه قالت بتجي هي ولدها بعد العصر.. مسح ع لحيته وهو يمرر في نظره قدامه..حط يده في جيبه وشاف لأمه وهو يقول.. /نحاول نروح بكري..ماتبي شي!؟ صفيه:سلامتك.. مشي طول كمل طريقه وهي ولت للكوجينه.. 🍃🍃🍃🍃 "حالها متبدل هلبه بالذات الاسبوع هدا كل يوم لتالي" هادي غرفه تحكي لفايزة وهاديه اللي كانوا مقعمزات معاها في الصاله... كملت تقول بضيق وقلق.. /تصدقوا من بعد صلاة الفجر لتوا راقده.. فايزة بضيق.. /واضح مضاعفات كورونا دير هكي راهو.. هاديه ودموعها في عيونها.. /ماصارش فيها شي شويه لما روحت بعد وفاة عمي،نسيتوا كيف انهارت واغمى عليها اكثر من مرة وهي تبكي.. نزلوا دموع غرفه وهي تقول.. /موته هد حيلنا كلنا.. هاديه والعبرة خانقتها ودموعها تنزل.. /ايه والله الله يرحمه..وهي كله تلاقى عليها مسكينه.. فايزه وهي تمسح في دموعها.. /مفروض ترفعوها دير تحاليل شامله.. غرفه:هذا اللي نفكر فيه..شافت لهاديه وقالت..عمتي نتصل بيها اكثر من مرة ماتردش عليا.. بنبرة الم جاوبت.. /عمتك حالها احرف من حال طوبى امس كلمت شكري قالي ماتبيش تجي في العيد.. هزت غرفه راسها ودموعها تنزل وهي تقول.. /معذورة.. تنهدت فايزة بألم وهي تقول.. /ربي يصبر قلبها اني اللي حاسه بيها كنت بنت وحده والمدللة عند بوي الله يرحمه لما راح نحساب روحي نموت بعده.. حطت غرفه يدها ع فمها وقعدت تبكي وهما بكوا معاها بصمت... 🍃وبعيد عنهم شويه في دار المعيشه.. كانت اريج لاهيه مع الصغار تلعب معاهم..تركيزها ع جنة اكثر شي..البنت كانت تشارك في اللعب وتضحك بس الحزن واضح في عيونها... تعلقها بأمها كبير وهي توا حاسه روحها فاقدتها ومشتاقتلها وكأنها قاعده في بلاد بعيده عنها مش فالدار اللي مقابلاتها غارقه في النوم... 🍃🍃 قعدت هاديه نص ساعه وروحت وكانت فايزة مروحه حتى هي لكن غرفه شدتها وقعمزت معاها ع انفراد في المربوعه الداخليه.. 🍃غرفه بشي من الغضب.. /اني طايرتلي منها هلبه وعارفه روحي كان كلمتها بنلبز معاها في الدوة ونقربعها مرة وحده..كلميها انتي يافايزه عقلي صاحبتك ورديها لوعيها قوليلها اختك ياما تحملت ع خاطرك تحملت شي مايتحمله حد معقوله هدا ماتلقى منك!.. فايزة بضيق.. /حتى سدرة الفترة الاخيرة حالها مش باهي نفسيتها تاعبه والحمل زايدها.. غرفه:طوبى عاشت ظروف اسوأ من ظروفها ومع هكي ضغطت ع نفسها هلبه ع خاطرها سدرة عند طوبى امها راهو وهي تعرف كويس قداش متعلقه بيها اللي دير فيه واعر عليها..نزلوا دموع غرفه وهي تقول..سادها مارت وعانت وقاعده تعاني حرام عليها..حطت ايديها ع وجهها وانهارت بالبكي.. وفايزه مدت يدها لركبة غرفه وقعدت طبطب عليها وقلبها موجوع ع حال طوبى.. 🍃🍃🍃🍃 "بنبدوا خدمه بعد العيد ان شاء الله" صفاء وهي تلبس في ولدها.. /ع خير ان شاء الله..الحمد لله افتكيت من البعد.. شافلها بإبتسامه من المرايه وهو يمشط في شعره بعدين قال.. /ايه نسيت نقولك..حط المشط ع الزيانه والتفت يقول..كلمني معين امس قالي كان تبي تاخد ضحيه للعيد تعالالي طول.. رفعت ولدها في حضنها وهي تقول بإبتسامه.. /وليتوا صحبه.. اشرف:الحق الخدمه اللي دارهالي كبيره.. ☘ساعده في كسب وظيفه جيده في احدى الشركات النفطيه☘.. صفاء:هما بشكل عام ناس كويسه وخدومين.. قرص انفها وقال.. /باهي ياخدومين انتي قوليلي ماخاطركش تولي تقري!؟ فتحت عيونها ع وسعهم بمفاجأه وقالت بلهفه.. /خاطري وهلبه.. ضحك وقال.. /كويس.. هو تقريبا خلاص بيستأنفوا الدراسه واكيد بيبدوا التسجيل ع الفصل الربيعي وزي ماتعرفي اني معارض حكاية الجامعه نبي نسجلك في معهد عالي.. هي بإبتسامه؛ماعنديش مشكله المهم نكمل قرايتي وناخد شهاده.. اشرف بإبتسامه.. /تمام..زيدي شوفي امورك وافتحي الموضوع مع اختي عواطف يعني ع خاطر احمد تفاهموا من توا... هزت راسها وهي تقول؛حاضر..ابتسمت بحب وفرح وهي تشوفله بعدين غنت.. يامولاي نجي حبيبي..مهندس في النفط الليبي ضحك وهو يقول.. /تحركي قدامي تحركي.. ومشت قدامه بتطلع من الجناح وهي تغني وترقص في ولدها واشرف وراها يضحك عليها وهو يحرك في راسه يمين ويسار... 🍃🍃🍃🍃 "ايه بنولوا فترة قبل الامتحانات بش نحلوا الاسئله الاسترشاديه" هادي مروة تكلم في صديقتها مناسك هاتفيا.. "الحمد لله المصايب اللي صارت في البلاد جت من حظنا" مروة بضحكه؛رب ضارة نافعه.. "باهي يارب انتي بنقولك ام مؤيد وخواته بيجوا يوم الموسم بش يلبسوني الدبله" مروة بدهشه.. /الله! "والله العظيم هو سكر راسه قالي لازم نلبسهالك بش مايجي جنبك حد." مروة بضحكه.. /مؤيد شكله حزار احرف من صاحبه.. " بكل مانحكيلك..الا ع سيرة صاحبه ميروشا طلع مكلم أيودي عليك وايودي يبي يدخلني واسطه بينك وبينه حتى هو ناوي يخطب طول ميروشا" ضحكت مروة.. "نحكي جد" مروة بضحكه.. /جو عليه والله جو..خدت نفس وقالت..وصليله اني محوله الموضوع هدا من راسي بكل خلوه يقطع الامل بكل منوش.. "تبي الحق اني معاك في هادي..وتبي الحق اكثر واكثر مش عارفه علاش حاسه ان معين ولد خالتي فهيمه حاط عليك العين" احمر وجه مروة وارتبكت وهي تقول.. /لاعين لاوذن..غيري الموضوع مناسك تربحي غيريه.. ضحكت مناسك وقالت.. /خلاص خلينا نولوا لغم القرايه.. مروة وهي عاقده حواجبها ووجهها مازال محمر قالت.. /احسن شي.. 🍃🍃🍃🍃 فاقت مع قرب الظهر تلقائيا.. لكن كانت مازال عندها رغبه في النوم..بكسل ناضت قعمزت..مررت نظرها ع الدار تحاول تسترجع وعيها شويه شويه..ناضت وقفت بالغصب..ومشت طلعت وهي تجر في رجليها جر من الدار.. قابلتها دار المعيشه سمعت اصوات لعب الصغار بدون ماتشوفهم.. مشتلها ووقفت في الباب.. لقتهم يلعبوا بالمكعبات بنتها وولاد غرفه وحداهم مئاب شاده لعبه قطنيه تلعب بيها.. تنفست بشي من العصبيه..كانت حاسه روحها مش طايقه نفسها..اليوم بالذات مزاجها معكر هلبه.. "نضتي" رفعت شعرها فوق وهي تقول.. /شن درتوا غدي!؟ اريج؛خالتي غرفه بدير مكرونه بالبيشاميل.. شدت شعرها بعد ماضماته ومشت للحمام بدون ماترد ع اريج...واريج قعدت معاها بعيونها لين خشت للحمام تنهدت بضيق وغيرت نظرها لجنه لقتها لاهيه باللعب مع ولاد خالتها.. 🍃طلعت بعد ماتوضت..وآذان الظهر كيف بدي.. توجهت طول للدار..خدت الملايه من ع الشماعه ولبستها بعدين خدت صلايتها وفرشتها مقابله القبله.. كل شي دير فيه من غير رغبه..حساته شي لازم ديره وخلاص..كانت مضايقه هلبه من حالتها هادي..ليها فتره لاعاد حست بخشوع ولاشوق للصلاه..وردها من القرآن بدت تقرا فيه يوم ايه ويوم لا..تنسى فيه..الحفظ ليها فترة هاملاته..كتب الفقه والعلم اللي خدتهم من مختار ماقربتش منهم.. وقفت ع الصلايه وهي مضايقه بشده حاولت ع قد ماتقدر تخش حالة الخشوع مش قادره..رفعت ايديها وكبرت وصدرها ضايق هلبه... 🍃🍃🍃 كملت الصلاه وطلعت للكوجينه.. وصلت فيها وخشت لقت غرفه دير في كيكه.. غرفه لما شافتها قالت بإبتسامه.. /واخيرا زرقت الشمس.. يدوب ابتسمت وهي تقول.. /جعانه.. غرفه؛افتحي الكوشه تلقي العجه.. مشت طول للكوشه وغرفه تراقب فيها.. طلعت صونيه العجة المغطيه بالقصدير حطتها في سفره وخدت خبزة ومشت طلعت من حداها ونظرات غرفه القلقه مرافقتها... 🍃🍃🍃 بعد فطرت متأخر..حطت سفرتها في الكوجينه وولت للصاله تمددت قريبه من المكيف وولت رقدت.. ☘فهالوقت جي خالها المحجوب الحوش استقبلاته غرفه ودخلاته للمربوعه الخارجيه... 🍃حطت قدامه ع الطاوله ظرف ابيض وقالت.. /هدا حق ضحيتهم..حط ظرف تاني وقالت..هدا فيه مصروفهم...ولت قعمزت وهي تقول..مادا بيكم توصلوهم اليوم.. المحجوب:ان شاء الله..المهم توا بعد العصر اني وحسين بنتلاقوا مع الراجل اللي بيشارك في مشروع المعرض عدنان الاشتر نتفاهموا معاه.. ربعت ايديها وقالت.. /وماتنسوش لازم نعرف اللي صار معاكم بالتفصيل.. ابتسم وهو يقول.. /اكيد غدوة بإذن الله نجوك هني ونهدرزوا.. غرفه:ان شاء الله.. تنهد وقال.. /شن حال طوبى.. غرفه بضيق.. /مايسرش.. بدت ع وجه المحجوب ملامح الالم وهو يقول.. /خيرها!؟ غرفه:مش عارفه شن نقولك ياخالي نفسيتها تاعبه هلبه معاش زي قبل بكل.. المحجوب بضيق.. /سدرة قاعده مقاطعتها.. غرفه هزت راسها وهي مضايقه.. وهو علق يقول بأسف شديد.. /لاحول ولاقوة الا بالله..غير مستعجل توا كان هدا خشتيلها هدرزت عليها.. ناض خدي الظروف وهو يقول.. /غدوة بإذن الله تو نقعمز معاها.. ناضت معاه غرفه وهي تقول.. /إن شاء الله.. 🍃سقدت غرفه خالها وولت خشت للحوش وهي فايته من قدام الصاله شافت طوبى راقده فيها تنهدت بضيق ومشت للكوجينه... 🍃🍃🍃🍃🍃 ..وبعد العصر بساعه... استقبلت صفيه وسيله ام اسامه وولدها ودخلتهم الصالون.. تبادلوا اطراف الحديث بعدين قالت وسيله.. /معليشي نبي نهدرز عليها شويه كان فيها كيف.. صفيه بإبتسامه: /مافيش مشكله..ناضت وهي تقول..تعالي.. ناضت وسيله وصفيه قالت لأسامه.. /عن اذنك ولدي.. اسامه وهو مبتسم بلطف.. /خودي راحتك.. مشت صفيه بوسيله لدار اميمه وخلوا اسامه يدعي في نفسه ربي يقدر امه ع اللي هو ماقدرش عليه.. 🍃وصلت صفيه في الدار دقت الباب بعدين فتحاته.. وحتى المرة هادي اميمه كانت تقرا في القرآن... ماخبرتهاش امها عن زيارتهم خافت عليها ترفض تقابلهم ودير موقف يحرجها ويزعل راجلها وامه منها.. صفيه لوسيله؛تفضلي.. سكرت اميمه المصحف وشافت لأمها..تفاجئت هلبه لما شافت وسيله خاشه للدار.. وسيله لما شافت اميمه ابتسمت بلطف وقالت. /كنينتي الدكتورة.. ابتسمت صفيه.. وكذلك اميمه اللي حطت المصحف ع الكمادينو ونزلت من السرير و قدمتلها سلمت عليها.. ضمتها ام اسامه وقعدت تمسح بإيديها ع ظهرها وهي تقول.. /شن حالها حبيبة ولدي.. ضحكت صفيه.. تباعدت اميمه وهي مبتسمة بخجل ووجهها محمر.. وسيله بضحكه.. /سلمها يارب.. صفيه بإبتسامه:مالا خل نمشي نقعمز مع نسيبي الغالي نهدرز عليه.. ضحكوا وسيله واميمه وصفيه مشت وهي تضحك وسكرت الباب.. تنهدت وسيله وشدت يد اميمه وقعمزت هي وياها ع السرير.. /شنو ياميمو..خيرك بنتي..علاش دايرة في روحك هكي في هالايام المباركه!؟..انتي توا مفروض تطلعي من حالتك هادي وترجعي لخدمتك..خدمتك هادي عظيمه بنتي وتكسبي من وراها اجر بالذات في هالايام المفضلة،اسامه قالي هلبه حالات يسألوا عليك وفي منهم مايبيش يتعالج الا عندك انتي معقوله ترخي بيهم وضيعي ع روحك الأجر.. نزلت اميمه عيونها ودموعها نزلوا منهم.. وسيله:حبيبتي..اسامه حكالي قداش كافحتي بش وصلتي هني وكيف جدك دعمك بش خلاك دكتورة ليها شنه ورنه زي مانقولوا..بضيعي اللي داره جدك معاك هكي.. غمضت عيونها بشده وقعدت تبكي.. حطت وسيله يدها ع ظهرها وهي تمسح عليه وتقول.. /لو حق غالي عليك يابنتي اطلعي من هالحالة اللي انتي فيها وكملي حياتك زي قبل زي ماهو كان يبيك تعيشي..ماتخليش الشيطان يسيطر عليك ويخلي الحزن يتمكن منك..لو تحبي جدك ديريله اعمال خير بنيته وادعيله وزي ماقتلك عيشي سعيده..هكي قالي اسامه..هدا ماكان يبي جدها الله يرحمه.. بدون ماتقول كلمه لقت روحها راميه بنفسها في حضن عزوزتها اللي ضمتها بحنان وقعدت طبطب عليها.. 🌸ونجحت وسيله في المهمه اللي جت ع خاطرها.. غيرت اميمه حوايجها وطلعت قعمزت معاهم كانت تسمع في هدرزتهم اللي اغلبها كانت بصارة"مزح" وغزل من الام وولدها لاميمه خلوها تضحك وذوب من الخجل في نفس الوقت وقلب صفيه طاير من الفرحه..اكثر شي كان مفرح صفيه وقتها ان ربي عوض بنتها اجمل عوض مش بس راجل كويس وحتى عيلته طلعت خير منه.. 🌸🌸 شدتهم صفيه ع العشي بالذات بعد ماعرفت ان ام اسامه صايمه خشت الكوجينه بش دير عشي يستاهل قدرهم وخلت اميمه مع عزوزتها.. وقبل المغرب بشويه خش حسين وقعمز مع اسامه في المربوعه ودارت بيناتهم احاديث عن مواضيع مختلفه.. وبعد العشي.. قعمز اسامه مع مرته في الجنان بش يهدرز عليها تحت عيون حسين اللي كان مقعمز بعيد عليهم شويه.. حسين وهو يشوفلهم كان في داخله فرحان لأخته بهالعوض الجميل..وكذلك لأول مرة يحس برغبه فالزواج والاستقرار وانه يعيش الحب مرة تانيه.. 🍃🍃🍃🍃🍃 "في الخمس!؟" المهدي:ايه..نبي نغيروا جو ونتنفسوا هوا نظيف..نبي نفسيات مرتي وامي تتحسن.. محمد شنيبه سكت وهو يفكر والمهدي يراجي في رده.. مسح بوه ع لحيه وقال.. /خلاص..معاك.. ابتسم براحه وقال.. /بإذن الله نتسقدوا بعد غدوة..غدوة ان شاء الله نرتب الامور كلها اني والولاد.. محمد شنيبه:اسمع كشخة الجالي مانبيش نشوفها.. عقد المهدي حواجبه وقال.. /ولا اني.. 🍃عرف محمد شنيبه باللي داره ولده وحل عليه منه غضب عظيم خلاه يحلف ع خوته بالطلاق ماحد فيهم يواصله ولايدوره ولايساعده في شي🍃 والجالي حاليا عايش في كنف نجاة وهي زي ماهي معاه معيشاته عيشه حلوة ماتنقص عليه في شي الفرق الوحيد بين قبل وتوا وهو فرق كبير ان زمام الامور كلها ولت بإيديها.. ومع هذا كله..وفوق هدا كله..الجالي مازال مهووس بطوبى ويبيها وقاعد يخطط بهدوء بش يوصل فيها ونجاه تعرف ومخلياته ع راحته.. 🍃🍃🍃 الساعه 10:30ليلا.. مقعمزة في فيرندا شقتها..شاده في يدها تليفونها..تبان وكأنها تراسل في حد..ملامح وجهها كانت بين الضحكه وابتسامة الغرور من تفاعلها وانسجامها مع اللي تقرا فيه.. تنهدت ونزلت تليفونها..رفعت عيونها شافت للسمي ركزت بنظرها ع الهلال..بدت ع وجهها ملامح الحقد.. سمعت صوت سيارة نزلت عيونها تحت لقت سيارة راجلها كيف خاشه للعمارة..رفعت حاجبها وناضت خشت داخل... 🍃🍃 خش للشقه.. سكر الباب وتوجه للكوجينه.. خشلها لقاها واقفه تشرب في ميه..بلامبالاة مشي للثلاجه صب ميه في طاسه وبدي يشرب.. هي كملت شراب وقالت.. /وين كنت؟ نزل الطاسه وقال.. /عند حكيم.. نجاة؛غدوة بنمشي لأختي ع خاطر فضانية بنتها.. الجالي بعدم اهتمام.. /بري.. نجاة:قالت راجلها اتصل بيك ماحصلكش.. طلع وهو يقول.. /مانبي نمشي لحد.. ابتسمت تهكما وردت الطاسه لمكانها وطلعت وراه... 🍃🍃🍃🍃 السابع من ذي الحجه.. 28يوليو..سنة 2020.. الساعه 12:15قبل الظهر.. في شقة فايزة.. البنات مع امهم في الكوجينه يتساعدوا في تجهيز الغدي وصفاء معاهم جت تتغدا مع امها وخواتها.. وحداهم وليدها احمد مقعمز في الكرسي المخصص ليه وياكل في التفاح.. ☘فايزة:شن خطر عليهم؟! صفاء وهي تقرض في البصل قالت.. /قولي شن خطر عليه..سلفي محي الدين ياحنه هو اللي يبي قال نبي نعيشوا جو العيد سادنا حزن ونكد.. فايزة:عنده حق النفسيات تعبت من الحرب والكورونا والحزن الواحد قريب يموت ناقص عمر.. صفاء بضحكه؛لكن هو يبي يفرح فرحه تانيه يام.. مروة وهي تقرض في البطاطا قالت.. /فرحة شني!؟ صفاء:ياحنه يامنه قال لعمتي اعزمي عيلة سميرة..وابتسام..مدت في الالف لما قالت اسم ابتسام.. ضحكت مروة.. فايزة بضحكه.. /الله عليك جو وخلاص. صفاء:وعاد عمتي ماصدقت اتصلت بابله سميره وعزمتها اعتذرت ولما كلمت هديكا قالت نرد الشيرة ع خوتي ونرد عليكم..جو زايد دير فيه.. فايزة:تعرفوا عمري ماتوقعت ابتسام تكون هكي بكل زمان كانت تبان طيبه وهاديه مش باين عليها الخبث.. مروة؛ياما تحت السواهي دواهي.. سكتوا شويه وكل وحده لهت باللي في يدها وفايزة تلعب في احمد وتغنيله شويه وقالت صفاء.. /يام ماتنسيش قبل لنروح تعطيني فلوس غدوة ان شاء الله اشرف بيمشي يشري الخرفان.. فايزة؛قولي لراجلك مش مسامحاته كان زاد عليهم.. صفاء بضحكه.. /لالا حني بروحنا حصلنا عرض خاص ياحنه.. فايزة؛عرض خاص!؟ صفاء:ايه..من معين ولد خالتي فهيمه.. لون وجه مروة تغير للاحمر قعدوا عيونها في الصونيه قدامها معاش رفعتهم.. امها سرقتلها النظر وقالت.. /بارك الله فيه الحق راجل مقوم وولد ناس.. صفاء:اشرف يشكر فيه هلبه.. فايزة؛زيه هو زي امه الله يبارك عليهم..عندهم لمة جياب بعد العيد عزمتنا عليها قولي لأشرف.. صفاء:تو نشوف.. مروة:في معندوس ولا؟! صفاء شافتها كيف تبان مرتبكه شدت ضحكتها.. فايزة:ايه.. مشت طول للثلاجه وامها واختها يتبادلوا في النظرات ويتغامزوا وهما شادين الضحكه... 🍃اما عند الجيران.. فكانت الضحكه غايبه الحزن والكآبة مسيطرين بحضورهم ع اجوائهم.. في الصاله كانت طوبى مقعمزه..تشوف للفراغ..سرحانه.. وجنه واقفه قدام باب دار المعيشه تشوف لخالتها كيف تلبس في صغارها بعد دوشتلهم.. لفت ومشت للصاله..وصلت فيها وخشت لأمها وهي تقول.. /ماما..ماما..دوش.. وطوبى مش حاسه بوجودها نهائي.. قدمتلها جنه وطبطبت ع ذراعها وقالت.. /ماما..ماما.. طوبى بإنزعاج.. /شني!؟ ضمت جنه ايديها لبعض وقالت.. /دوش.. تنهدت بضيق بعدين نادت.. /اريج..يااريج.. لحظات وخشت عليها وهي تقول.. /نعم بيبو؟ طوبى:بالله دوشيلها والله ماعندي ليها حيل ولاخلوق.. اخفت اريج ضيقها بإبتسامه وخشت لجنة رفعتها في حضنها وهي تقول.. /هي تعالي ندوشوا جنوني مع البطه.. طلعت بيها الصاله وعيون طوبى معاهم .. غيرت نظرها للفراغ..مسحت وجهها بإيديها وهي تقول.. /ياربي حاسة روحي مش طايقه عمري.. شافت للمكيف شويه..بعدين ناضت خدت الريموت متاعه وزادت فيه وولت للفراش اللي كانت مقعمزة عليه.. خدت مخده وتمددت وحطتها تحت راسها.. 🍃وقعدت راقده لآذان العصر حتى الغدي ع قد ماحاولوا ينوضوها عليه مابتش.. بعد ماصلت العصر خشت للكوجينه تغدت وبعد ماكملت غداها فكرت تغسل ماعينها بس حست بكسل شديد..سيبتهم ومشت طلعت.. كانت ناويه تتوجه للدار لكن بعدين خطر عليها تركب فوق السطوح..لدار الخزين وين مافي مرسمها الخاص.. 🍃🍃🍃🍃 "حطي البيجامه هادي والقفطان هدا" سدرة المهدي؛تمام.. طلعت اللي قالتلها عليه مرت بوها وحطتهم في الشنطه.. حطت سدرة المنتهى ايديها في نصها وقالت بضحكه.. /سيدا قاعد عندك برينجلز.. ضحكت وقالت.. /شكلك تتوحمي عليه.. ضحكت وقالت.. /ايه ياعفريته.. ابتسمت سدرة المهدي وقالت.. /راجي نطلعلك وحده.. ومشت للدرج متاعها وسدرة تشوفلها بلهفه.. شويه سمعت صوت رنين هاتفها.. جتها سدرة المهدي وعطتها اللي تبيه وهي تقول.. /وينه خل نجيبهولك.. سدره وهي تفتح فالعلبه.. /ع طاولة الممر.. طلعت سدرة المهدي تجري وخلت مرت بوها تاكل في "البرينجلز" بنهم.. لحظات ورجعتلها بالهاتف وهي تقول.. /خالتي فايزة.. خداته سدره وفتحت الخط وردت.. /ايوه شراده.. "هلا سديرة شن جو" سدرة المنتهى:تمام الحمد لله شن جوك انتي .. "الحمد لله..شن ديري؟" قالت؛اهو نجروا اني وسدرة ونوتوا غدوة بنمشوا للخمس بنعيدوا غادي.. "اها..يعني مانقدرش ناخد من وقتك ساعه بعدين نجيك نهدرز عليك" مطت سدرة شفايفها القدام بعدين رختهم وقالت. /لا الحق صعب مش فاضيه بكل خليني توا نكمل شغلي غدوة من الصبح بنطلعوا.. "باهي ع راحتك..سلام حبيبتي" سدرة:سلام.. نهت المكالمه وولت تاكل وهي تشوف لسدرة كيف ترتب في حاجاتها..ضحكت وقالت.. /حطي البرنجلز حطي.. ضحكت وقالت.. /حاضر.. 🍃فايزة بعد مانهت معاها المكالمه بسرعه فهمت انها عرفت السبب اللي بتجيها ع خاطره وتهربت.. ضايقت لأبعد حد..ومشت ولت لوسط الحوش وين ملتمات بناتها..قعمزت معاهم جثه بس وعقلها بعيد عنهم.. صفاء:قداش ليا نفكر في الحكايه وخفت نكلمه عليها بعدين قلت في بالي شديها ع الصلاة الابراهيميه ياصفاء مافيش مرة داومت عليها فيها الا وربي ميسرها ممكن ليا اسبوع شادتها ونتفاجئ بيه امس هو بروحه فتح معاي الموضوع.. مروة بإبتسامه:اللهم صل على نبينا محمد.. تاله؛حتى اني نتفكر في مرة شديتها وقعدت نقول فيها قبل امتحان الكيمياء الابله متاعه صعبه هلبه ولما جي الامتحان الاسئله كانت مية.. صفاء:اللهم بارك.. شافت مروة لأمها لقتها سرحانه نادتها. /امي..ماما..شراده.. استاقظت وقالت.. /نعم؟ صفاء:ماكنتيش معانا!؟ فايزة:ايه سرحت شويه..في شن كنتوا تحكوا.. مروة؛صفاء قالت اشرف بيسجلها في معهد عالي.. ابتسمت وقالت.. /باهي الحمد لله والله كنت نخمم في قرايتك هلبه وقلت زعمها يخليها تكمل ولالا.. ابتسمت صفاء وقالت.. /هو بروحه قالي عليها منه ليه.. 🍃وكملت صفاء تحكي بحماس لأمها عن موضوع قرايتها الحماس اللي فقداته طوبى تماما وحل محله فتور.. فتور ناحية كل شي..فقدت الشغف..وفقدت رغبتها في كل شي.. حاولت ع قد ماتقدر ترسم..حاولت ترسم ورده..وفي اسهل من رسم الوردة لوحده تملك موهبتها الكبيره في الرسم! اللي حاولت ترسمه رسم مبتدئين شافتله بعين السخط..لوحت قلم الرسم من يدها وبدت تبكي..بكاء صامت زاد اكثر واكثر لين تحول لبكاء بالصوت حطت ايديها ع فمها بش تكتمه... 🍃بعد ماتعبها البكاء اكثر ماهي تعبانه..نزلت تحت وتوجهت طول للدار خشتلها وسكرتها عليها... سمعوا صوت الباب اريج وغرفه اللي قالت.. /غدوة غصب عنها بنرفعها نعاينها.. اريج بضيق.. /اني نفكر نكلم ابله زينب تشوف الدكتورة النفسيه اللي عالجت خالتي سدرة.. اضايقت غرفه لما جت سيرة سدرة وقالت.. /خل نديرولها تحاليل قبل بعدين ساهل.. سمعوا جرس الانترفون رن... غرفه؛اكيد خالي.. اريج:تو نمشي نفتح.. وناضت طلعت من الدار... غرفه شافت لولادها اللي كانوا يلعبوا ب"البازل" قالتلهم.. /تعالوا نبدلوا حوايجنا بش نطلعوا لخالو حسين.. الزوز بفرح قالوا بفرح.. /سونه.. ناضت ومشت للدولاب وهي تقول.. /ايه سونه... 🍃واستقبلت اريج "سونه" والمحجوب وهدرزوا عليها شويه بعدين قال المحجوب.. /شن رايك نقعمزوا برا الجو قنين.. هز راسه وقال.. /تمام.. اريج:شويه وجايه.. حسين وهو ماشي قال /بالله طلعي الولاد.. اريج بإبتسامه.. /حاضر.. ومشت بسرعه خشت وخلتهم قعمزوا حوالين الطاوله... 🍃🍃🍃🍃 ماشيات في ممر المصحه.. وحده فيهم شاده بإيديها مقات بابونج وهي تقول.. /هدا وين نورت المصحه.. اميمه بإبتسامه من وسط ملامحها الباهته وهي تشوف لخالد اللي كان واقف ع اياد قدام الشباك قالت.. /منورة بيكم.. ضحكت هناء ومشتلهم.. مدت مق لخالد وقالت.. /شن حالك دكتور اياد.. خدي خالد المق وهو يشوفلها بإبتسامه.. اياد وهو مبتسم.. /الحمد لله..شاف لأميمه وقال..شن حالك اميمه.. اميمه بإبتسامه مجامله.. /الحمد لله.. هناء شدت ذراع اميمه وقالت.. /عن اذنكم..ومشوا مع بعض وعيون خالد مع هناء.. اياد؛مش ان الاوان يادكتور دير موقف؟ خالد:خلاص مش مطول خل العيد يعدي ع خير ان شاء الله.. اياد بإبتسامه.. /ربك يسهلها.. خالد؛امين..ورشف من البابونج... 🍃🍃🍃🍃 يتفرج عليهم كيف يلعبوا معاه وعيونهم البريئه تشوفله بلمعة حب واضحه.. حاط قدامه زهرات فل ع الطاوله وهو يقول.. /هيا عد اواب..واحد.. كمل اواب عد للأربعه.. مهاب بحماس.. /اني اني اني.. وبدي يعد فيهم للأربعه.. صفقلهم وهو يقول.. /بروا ع الزعامه بروا.. المحجوب بضحكه.. /الله يبارك.. ☘داخل.. كانت غرفه واقفه ع مرايه المدخل تلبس في شاربتها كان لونها ازرق غامق ع جوانبها في خط احمر..ولابسه فستان صيفي ازرق غامق فيه حزام من النص يرتبط من الخلف.. مشت لبست في رجليها اللي كانت مغطيتهم بشخشير"جورب" لحم اسود حذاء فلات اسود وتوجهت للكوجينه.. خدت سفرة ميه مصقعه حاطتها ع الطاوله ومشت طلعت بيها من الباب اللي يطلع للجنان.. ☘حسين؛لاالنظارة مش عاطيها لحد عارفكم بتتعاركوا عليها.. ضحك المحجوب.. "السلام عليكم".. قام حسين عيونه وشاف يمينه... ..كانت هادي المرة الاولى اللي يشوف فيها غرفه بعد حوالي اربع سنوات..غرفه بنت عمه مش جديده عليه من طفولتها كانت معاه شبه رباها مع طوبى وكبرت ع ايديه..البنت الدلوعه الانانيه المستسهترة اللي فيها عيوب قد شعر راسه ابرزهم وقاحتها وقلة ادبها...بالذات لما كانت تحرص ع لفت نظره باللبس والزينه ولالما صرحت بمشاعرها اتجاهه وحاولت كذا مرة تشوه اختها في عيونه بش تصرف قلبه عنها.. صفات غرفه وطبعها وقتها يخلوها في نظر من يعرفها بشعه من داخل ومن برا.. لكن توا..مش عارف شن جاه لما شافها وكأنه عمره في حياته ماشافها ولاعرفها... قعد معاها بعيونه اللي مدرقتهم النظارات وهو يرد عليها فالسلام وهي جايه..حطت السفره ع الطاوله وصافحت خالها بعدين مشت قعمزت جنبه... غرفه:اواب مهاب ماما بروا خشوا لأريج.. الزوز بدون اعتراض سمعوا كلامها ومشوا يجروا خشوا من باب الكوجينه.. المحجوب؛الله يبارك عليهم يكبروا بسرعه.. ابتسمت وقالت.. /سلمك خالي..شافت لحسين وقالت...كيف حالك حسين.. ربع ايديه وقال:الحمد لله..شن حالك انتي وشن حال طوبى؟ بدت ع وجهها ملامح الضيق وهي تقول.. /حالي من حال طوبى.. عقد حسين حواجبه بضيق.. المحجوب:وينها هي؟ غرفه؛حابسه روحها في دارها وين خشيت عليها بش نقوللها تطلعلك لقيتها راقده.. حسين:ممكن الكورونا دايرتلها مضاعفات معروفه ضعف المناعه هلبه.. غرفه؛قلت غدوة بنرفعها تعاين ودير تحاليل.. المحجوب: هو هدا سكرت راسها وقالت مانبيش نمشي كلميني.. هزت راسها وقالت.. /ان شاء الله...شن حال مرت خالي؟ المحجوب؛الحمد لله..امس مشينا اني وياها لحوش عمتها عطيناها الفلوس اما الخروف وكلت حسين بالمهمه.. غرفه؛بالله جيبلهم حاجه باهيه.. عقد حواجبه وقال بضحكه.. /واخده عليا نجيب الحاجه اللي ماتنفعش! ضحك المحجوب.. هي قالت بإبتسامه.. /مش قصدي اني مانبيهمش يحسوا بشي تغير عليهم بعد وفاة رؤوف الله يرحمه.. الزوز قالوا.. /الله يرحمه ويغفرله.. تنهدت وقالت.. /باهي شن صار معاكم انتم وعدنان الأشتر؟ قدم حسين بجسمه ع الطاوله وحط ايديه عليها وقال.. /ياستي تفاهمنا حني وياه... ☘وبدوا يشرحولها وهي تسمع بإنتباه ومرة مرة تسأل في اسئله وجيهة ودقيقه تفاجئ بيها في حسين... غرفه؛كويس اهم شي عندي انكم خليتوه يديرلنا الف حساب.. حسين ابتسم وهو عاقد حواجبه.. المحجوب:هو بروحه راجل دغري ومستقيم وواضح عليه كان يعز رؤوف الله يرحمه ويقدره.. غرفه:ان شاء الله خير.. حسين:مريت ع محلات الملابس وشفت الوضع غادي زي ماتعرفي ازمه الحرب وبعدين الكورونا رقدوا السوق لكن توا ولقدام ان شاء الله الوضع حيتحسن فكرت بطريقه نصرفوا بيها البضاعه المكدسه بش نجيبوا غيرها بعدين.. غرفه؛التخفيضات.. حسين:50%.. غرفه؛مجبورين زي ماقلت الوضع كان صعب هلبه..بس اغلب البضاعه شتويه وحني في عز الصيف لو تزيد ل 70%احسن.. المحجوب:اني مع رايها.. حسين:المال مال صغارها وهي حرة فيه.. غرفه:لاحسين بالله عليك ماتقول هكي نبيك توجهني صح وتعلمني شن ندير.. هز راسه وقال.. /حاضر..الاقتراح اللي قلتيه في مكانه وحتى اني معاك فيه.. هزت راسها وقالت.. /بارك الله فيك..ناضت وهي تقول..شويه وجايه.. ومشت خشت داخل.. ضحك حسين المحجوب شافله وقال بإستغراب.. /خيرك!؟ حول نظاراته واشر بيهم ع باب الكوجينه وقال.. /هادي نفسها غرفه بنت عمي!؟ المحجوب بإبتسامه.. /غرفه الواعر.. ضحك حسين وهو يحرك في راسه يمين ويسار بعدم استيعاب.. 🍃🍃🍃🍃🍃 الساعه 9:00ليلا... حل الليل وبانت النجوم في السمي حالكة السواد..سوداها اللي بدده ضي القمر اللي وصل اليوم لمرحلة التربيع الاول نصه كان منور... وعيون نجاة عليه وهي فجنان حوش اختها.. "نجاة".. التفتت وقالت.. /هاني جايه..ومشت خشت داخل تساعد في اختها ع تجهيز وجبة عشي الفضانيه.. 🍃🍃🍃🍃 "لالا فكيني من المعاينه والتمزريط كرهتهم وكرهت اليباري والادويه" غرفه؛بيبو حبيبتي سايريني خوديني ع قد عقلي وبري معاي نبي نطمن عليك بس طوبى بإنفعال.. /خيرني شن فيا!!؟ مافيا شي.. غرفه؛راك تنسي حبيبتي كنتي مريضة كورونا والكورونا دير مضاعفات لازم نستاقظوا بيها بكري.. طوبى برفض وانفعال.. /لالا مانحس في شي ومافيا شي وبالله ياغرفه خليني في حالي وماتضغطيش عليا ارجوك والله ماطايقه عمري.. غرفه بضيق.. /باهي قوليلي خيرك شن مضايقك احكيلي ياطوبى فضفضي.. طوبى بدت تبكي وهي تقول.. /مضايقه من كل شي حتى من نفسي ياغرفه حاسه روحي ملخبطه وخايفه.. غرفه:من قصة الصور!؟ طوبى ببكي.. /من كل شي من كل شي..حاسه روحي معاش عندي حيل لشي تعبانه هلبه هلبه.. قربتلها غرفه وضمتها في حضنها وهي تبكي معاها بصمت.. حطت يدها عليها وقعدت تقرا في القرآن لحظات وراحت في النوم.. 🍃ماقدرتش تفارقها غرفه هديكا الليله وخلت اريج تبات حدا الصغار.. طول الليل كانت طوبى تتكلم في نومها وتأن..تفيقها غرفه..تفيق وترجع ترقد ويصير معاها نفس الشي.. قلب غرفه تقطع عليها..ضمت لحضنها وقعدت طبطب عليها ومن بعدها رقدت طوبى بشي من الراحه.. 🍃عدت ليلة صعبه ع غرفة اللي كان واجعها بشده حال اختها.. فيقتها لصلاة الفجر..ناضت بصعوبه توضت وصلت وولت رقدت وكذلك اريج ناضت صلت وولت للنوم.. وقعدت غرفه بروحها مقعمزه في الجنان تتفرج ع شجرة الياسمين بنظرات اسف وعتب ودموعها ينزلوا.. 🌼وصاحبة الياسمينه طلعت الصبح مع عيلتها وعيلة راجلها في رحلتهم لمدينه الخمس كانت طول الوقت تضحك وتنكت مع راجلها وصغاره وجوها تغير 180درجة.. 🍃ومختار اللي كان في مدينه تانيه مع زوجته في استضافه واحد من اصدقائه بيقضي معاهم ايام العيد حتى هو عايش اجواء حلوة مع مرته اللي كانت اغلب هدرزتها مع مرت صديق راجلها عن الحمل والولاده... ومافيش حد فيهم سأل ع طوبى ولااهتم لأمرها... 🍃🍃 وبإصرار ومسايسه من غرفه اقتنعت طوبى تمشي معاها للمصحة عاينت ودارت تحاليل ومابتش طول بيها كانت حاسه ان طوبى في حالة قلق وتوتر من اول طلعوا.. ولما روحت بيها يدوب فطرت ومشت خشت للدار سكرت عليها ونست بنتها تماما.. 🍃غرفه بضيق.. /الدكتورة قالت نقص الفيتامينات يدير هكي بالذات دال وب12 وهي لأنها مرضت بالكورونا كانت تاخد في مضاد قوي تعب جسمها بزياده.. اريج:امتى يطلعوا باقي تحاليلها؟ غرفه؛العشيه..ماجتش فايزة؟ تنهدت اريج بضيق.. /روحت قبل لتخشوا بشويه..قالت ماحصلتش فرصه تمشي لخالتي سدرة قالت لقتها مش فاضيه توتي في روحها بش بيمشوا لحوازة راجلها في الخمس بيعيدوا غادي.. ابتسمت غرفه تهكما ودموعها عبوا عيونها بعدين قالت.. /حتى هداكا لااتصل بيها ولادورها ومرته تشفرت بكل.. حولت شاربتها من ع راسها بعنف ومشت بعصبيه بإتجاه الدار نزلوا دموع اريج وهي تشوفلها وتقول.. /ياغيبتك ياماما...
#منازل_القمر
#طوبى
...يتبع....
يزن وتالة
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
